DEMON KING CHAPTER 9

DEMON KING 

CHAPTER 9 

“Bawiha lo chhuk tawh ula zanriah ei a hun e” tihri ah chuan harh chhuak zawkin ka zi mar zui ṭiah ṭiaha. Damian-a chuan min lo en reng bawk nên nui deuh sakin ka kuaha, ka hmuiah chuan rawn fâwp zauhin “Tho tawh ang hmiang, i ril a ṭâm tawh em? Ka nu in zanriah ei a rawt tawha” a tihchuan ka bu nghata.

Inhnuai lama kan inzui thlâk lai chuan maid ho chu an lo che suau suau a, an hausa bawka. Hnathawk pawh an ngah ngei mai, an chawhmeh siam lah chu an tui hmêl hlawm hle lehnghâl. Ka pum chu a rawn ri zui kuar kuar a, ka chil ka lem nghal khawlh mai, Damian-a chuan a hrethiam nge nui sukin an lam chu min panpuia.

“Lo ṭhu rawh u a ei theih e. Fiona zanin chu riak ve nghal rawh aw, i nutei te kan dil tawh a, an rem tih viau kha in inah pawh la rawn kal angai a ni” nu Daisy chuan a ti zung zunga, chutia kan ina rawn kal an tum tih ka hriat chuan ka che buai lek lek a ni. An in lakah te chuan keini in chu eng tham mah a nilo lehnghâl.

Damian-a chuan chawhmeh chu min rawn suah sak zung zunga, ka ei seng meuhlo. Sa lah  chi hrang hrang a tama, keini lam angin buhfai an ei ve vak lova, chuvang chu nge ka ei thei phian mai. Tui ti zet chuan ka ṭhial pak paka, zah kual vêl avânga chaw ei tlêm kha chu ka tum lo, keimah inhrem ka duhlo a ni ber mai.

Ka ngaina tih hria in thak lam an lo siam tel a, Damian-an a hrilh a ni ngei ang. “Fiona ei ṭeuh rawh aw” Damian-a pa in a rawn tihchuan ka bu nghata “Pa, a ei tam lutuk hrilh a ngai reng reng lo. Baby-i te chuan ei hi a duh ania, a duhawmna chhan pawh hei hi a ni ngei ang, a ei tlêm ka phal hauh lo bawk“ Damian-a chuan a la rawn ti zuia.

Hepa hian min tih zah a tum nge ni dâwn ni, hetiang lam lam a rawn sawi leh tak ni. Ka thil ei lai pawh min ti buai vek “Kha chhaih laih phêt tum suh u, mang ni pafa sual thei lutuk hi ka chunga intih ang kha ka monu tur chungah hi chuan in tih ka phal hauh lo ania, Fiona engah mah ngai suh. Chaw ei duh loh ai chuan ei tam hi a ṭha, a chak pawh kan chak bik ania” nu Daisy chuan min lo chhan vata.

Damian-a te pafa erawh an nui kur kur mai, chaw ei kham chuan theitui in ho in tv kan ena, football lam chu an ngaina vak lo ania'ng volleyball bêng chu enin Damian-a leh a pa chu an in be mawlh mawlha, kei erawh ka phone chuan ka ṭhiante bia in Damian-a te ina chaw ka ei thu leh ka riah tur thu ka sawi chu an lo phur nasa mai.

“Nang chu channel pawh siamla midang ai subscribers i ngah hrim hrim, i pasal a hmêlṭha dâwn si, chutah an la hausa zui. Miin an ngaihven nghal dâwn che ania, siam vaih la chuan i hlâwk viau ang” an tih erawh ka ner pui saka.

“Sumdawnnana ka pasal hi hman ka duh hleinem, lo innei pawh ni tehreng ila channel siam ve kher ka tum lo e, duh leh kan faten nakina an la en atân video erawh ka la dah ṭha ve mahna. Damian-a hian a duh kher bik lovang, media leh news vela lan nuam timi a nilova, keipawhin tihluih ka tum lo” ka tihchuan engmah an rawn sawi belh tawh bik lêm lo.

Thildang chu sawiin Mizoram lam thil thleng te chu an sawi mawlh mawlha, inthahna tam tawh zia leh mi rethei leh hausa inkar zau an tih tawh dân te chu an rawn sawi bawrh bawrha. A dik ve ang, Kristian ram in ti si hian kan nundan a râpthlakin misual kan tam bawk si a, kan rinna hi a pan tial tial a nih ber hi.

Vai ho te hi an rin Pathian lakah an ngheh nên Mizote erawh hi chu kan rin Pathian meuh pawh bum kan tum chu a ni si a. Pathian hi bum theih a ni loa, Mizote erawh chuan pâwn langah mi hmuhah ringtu ṭha nih tumin sum tam pui pui kan theh chhuaka, kan chhûnglamah erawh eiruk leh hlemhlet kan pawisa lova, midangte chunga kan rilru put hmang lah a chhe hle bawk.

“Baby kan mu tawh mai dâwn em ni?” Damian-a chu ka en nghal haw a “Eng...engmaw? Kan mu ang maw? Nangmah nên?” tiin zawhna chu ka zâwt bah deuh naka, a chhûngte an awm ve reng bawk si a khatiang a sawi kha ka ring lo hrim hrim.

“A nih mai lohin” tiin ka bengbulah chuan a rawn awm hnaia “Chuti lo chu i bulah ka rawn mu tho ang, min hnial mahla ka rawn mu dâwn tih hre reng rawh” tiin a nute hriat phâk loh tur chuan a rawn phun sar sara, hepa hi tinge maw a thu a duh em em mai le?

“Aw le” ka ti ta ringawta, hnial pawh ni ila ka hnial leh tak tak thei dâwn chuang lo tih ka hria a, chuvanga hetianga ti ka ni bawk. 

Ka sawi zawh rual chuan min kai dawr dawrin a room lam chu min panpui zuia, “Engthil mah ti suh ang che, mu ang i ti bawka kan mu ang” ti ve hmakin a room kawngkhâr a hawn rual chuan ka lût nghal vata, mut kawr ka ken loh avâng chuan a tshirt chu ka hâk saka, a kekawr erawh ka ha duhlo, a kâwng ka thawl deuh bâkah a sei lutuka ka tân chuan hnawksak mai ani.

Kan in len hleih bawka a mak lêm lo, ka inthlâk zawh rual chuan a khumah chuan ka mu nghâl thaka, a ni pawh a mut kawr ha in a rawn mu zuia. A rawn mutrual chuan min kuah nghâl zata, ka dul chu a rawn chûl nghal dan dana.

Chuveleh a lamah inherin a chalah chuan ka kuk nghal lawlha, a ri fawk mai. A na bawk ania'ng titau tih hriat taka lehlam hawiin min rawn en duh tawh ṭhak lo, ka inthiam lo leh si chuan alam chu hawiin ka lam hawia kawih her ka tuma. Mahse ka theilo nasa, chêt pawh a che eihlo.

“Damian i thinrim em ni? Hetiang ka ti ngai lo ka tih kha, nangpawhin min hrethiam ve la. Kan inneih hunah ka hlân em em ang che, inneih hma chuan ka tân pawh a mawilo, ka rin Pathian ka phatsan dâwn tihna a nia,” ka ti ta ringawta.

Min chhâng duh lo bawk nên ka awm a tinuam lo vek “Damian” ka ti leh chu ka kut chu rawn man thutin a kap lam lo ruh ṭung mai chu min khawih tira, ka phu nghal zawk mai. Rawn in herin ka mitah tak chuan a rawn ena.

“A nihchuan hei tal hi ti ang” tiin ka kut chu a ti che zuia, hetiang hi ka ti ngailo bawk nên ka khawr ṭûta, ka lai bawk. Ka zâm lutuk chu ka khûr der der thei, hetiang ti tur hian ka lo in dah ngailoa, ka tih ngam pawh ka ring heklo, mahse tûnah hian a thleng mêk chu ani si a.

Damian-a rûm leh hawk ṭhin chuan phûrna mak tak min pe in keimah chuan ka kut chu ka ti che zuia, ka chungah rawn bawkin tirang tur chuan min hrilh leh zauh ṭhin bawk. Hetiang zawnga ka pui thei anihchuan ka pawi ti lêm lo, a tâwp kan thlen lohna tur a nih phawt chuan.

Mipa a ni a, insûm harsa a tih dân tur pawh ka hre vek, chuvang chuan hetianga ka pui thei a nih phawt chuan ka hreh duh ta lo. Min nawr lui ngai dâwn lo tih ka hria a, ka tân a awm reng dawn tih pawh ka ring nghet thlap tawh.

Rum hawkin ka chungah chuan a rawn bawka, ka kut berh nuaih ka hmuh chuan ka âng pam mai. Kan thiltih ka ngaihtuaha, ka zak leh hnuhnawh, ka sa deuh pup pup bawk. 

Min thawh puiin a nui suk suka, bathroom ah min luh puiin ka kut chu amah chuan a sil mual muala. Kei erawh ka ṭawng ngam der lo, ka zak tlat amah pawh chu ka en ṭha ngam meuhlo. Khatiang thil ka timai kha keimah ngei pawh hian mak ka la inti.

Min chhuahpui hnu pawh chuan ka la ngawi renga, “Baby enga tinge? Khatianga i ngawih char chara, i thinrim em ni?” tiin ka khabeah a rawn vuana, min kawih dah rual chuan lu thing nawk nawkin ka mit ka chhing zui daiha. A nui deuh hawk rual chuan ka hmai chu a rawn lum deuh haka, ka en ngam tawh lo hrim hrim.

“I zak em ni? Min en teh, khatianga i awm tlat chuan ka awm anuam theilo” a tihchuan muangchangin ka meng chhuaka, min lo en reng tih ka hriat chuan ka nui seu ringawt, sawi tûr ka hre der lo.

“Khatiang kha a la thleng fo mai thei” tiin ka hmuiah chuan rawn fâwp in min pawm kâng zui nawlha, inrinna hman pawh awm lo hian khumah chuan min delh mu zuia, a chêt dân ang ang chuan ka dawh tawpa. Ka kawr phelh a tum erawh ka dang tlat thung.

Hetianga awm tur hian ka la ngam lo, keimahah hian min dang tlat tu an awm ṭhin. A ni pawh chuan min ti lui bîk lovin a mu ṭha a, ka chalah chuan a rawn fâwp zauh a, “Muhil tawh rawh, naktuk thawh i hai hlauh ange. Ka nu hian tho tlai a duh hauhlo ania, nakin lawka fanu thar nimai tur i mut rei lutuk chuan a ṭha lo ang” a ti kher erawh ka sik deuh sawk mai.

Tho har rawh pawh min ti se ka thawh har theih ka ringlo, “I ṭawng thei, a nihchuan min be tawh miah suh” tiin a awm lohna lamah chuan inher ve hmakin ka mit ka chhing zuia, a nui ri suk ka hriat rualin ka bengbulah a rawn thaw lum ham hama. Ka kawngah a kut rawlh lutin alamah chuan min pawt hnai zui zat bawk.

“Muttui le ka naute” tiin ka chhipah chuan a rawn fâwp zauha, a hmuh loh lamah chuan ka nui var var mai. A nuam ka ti ṭhin, hetianga bialpa duattu neih chuan tunge hlim lo bik ang, a chhûngte hmaah ngei pawh min zah pui hauh lovin a awm thei ania.

Ka mut tawh hi chuan mutthilh ka harsat ngai lêm lo bawka ka muhil rang viau mai. Zîng thleng chuan tui zetin ka muhila, ka harh meuh chuan ni alo lang ut tawh mai. Damian-a chuan a khabe dawm meuhin min lo en renga, a tih ṭhin dân nimahse ngaia neih a har dâwn riau hian ka hria.

Hetia khawdang hawi lêk lo a min en hi chuan laih loh a theihloha, awmdân a ti danglam vek ṭhin. 

“Morning ka hmangaihnu, i mutui em?” a rawn tihchuan ka bu nghat nghata “Morning, ka tho tlai viau em?” ka tihchuan a nui suka “Nizan kha ka fiam mai mai che a nihkha, tirawh le tho chhuak tawh ang hmiang. Inhnuai lamah kan chhungte'n min nghâk leh reng tawh ang” tiin min kai thla zuia.

Hun a liam ve zela, keini pawh kan inzui nghet tial tiala. Vawikhat mah ka thik tur zâwngin hmeichhia a awm pui ngai hauh lova, a châng a insual a chîng ṭhin erawh kan inhauh phah ve fo mai. Tumahin an tibuai ngam meuh lova, an hausakna chu thuhran amah hi insual a thiamin a thinrim tawh chuan hlauhawm tak a ni.

Thlakhat aia tam fe chu kan inzui ve ta a, a mize tam zâwk erawh ka zir chiang ngun bawka ka hre bel tawh hle. Kan rama rawn zin an duh miau avângin ticket kan hauh sa veka, a ṭhiante lah keini ai a phûr phûrah an ṭang zuia, an phur ang hu hi an hmulo ang tih erawh ka hlau ru viau thung.

ZAWMNA..

“Hei Sângbehlawi” airport aṭanga kan chhuah rualin ka ṭhiante chu an lo awm ṭhap a. Damian-a te ho erawh ka hnungah an la awm thung, ka nghâk hman tawh lo kan bungrua buaipuiin hnung an rawn dâwl a, kei erawh ka ṭhiante ka hmu châk tawh bawk nên a tlanin ka tlân ani ber mai.

“In lo dam em?” tiin kan inkuah khâwm nghal laih laiha, Rami leh Thani chuan min namsawnin “I rawn hruai tel dawn emaw tia? Khawnge an awma? Kan va hmu lo ve” tiin an hawi kual ruaia, chutah Damian-a te rawn phei mêk hmai tuam tlat si chu kawkin “Saw an rawn in keh phei ngawng ngawng saw en ta che u” ka tihchuan ka hawina lam chu an en ṭhapa.

“Awi Lalram ka thi dang mai dâwnin ka hria, an pian nalh zia saw an sâng bawk si. Awi keichu ka be ngam lo ang, lo haw hmasak mai ka duh” tiin Thani chu a talbuai ti tiha, a mak ṭhin ania. Amah ber hian hruai rawh a ti ve kha a nia, a hun a thlen meuh chuan a zâm chhe lo chauh chu a nih hi.

“Awi khawi ber nge i bialpa kha saw ti saw chuan kan hre thiam lo” an tihchuan ka nui haka. “A hmasa bera rawn kal saw a nih saw, midang saw en ula ka bialpa in sawtiang mi zia saw a nei ve lo. A ṭhiante pathum chu an in keh ngâwng ngâwng reng saw en ta che u, a sam buang saw Martin-a kha ania, samkir saw Tyler kha, chuan a sam sei ber saw Sammy-a kha” ka tihchuan an bu nghat nghata.

An ni pawh an rawn thleng har lo, kan bul an rawn thlen rualin an mask chu an phelha, ka ṭhiante âng pam leh che lâi kual vêl chuan ka nuih an ti za ru lutuk, mahse insûm a ngai tih hria in ka insûm hrâm hrâm a ni.

“Hei hi em ni i ṭhiante chu?” Damian-an a rawn tihchuan ka bu nghata, chutah nui sukin an lamah chuan kut a phara, Engi chuan lo chibaiin a nui sanga “Kan ṭhiannu ilo duh thei chu a mak zâwk a lawm, sazu piangsual a an teh lul nen” a tihchuan rum zetin ka ena, hetiang hian min ko ziah mahsela ka bialpa bula min ko leh erawh ka ngei ngei mai.

Damian-a chu a nui deuh haka “A hmêlṭha tho a lawm, ka mitah chuan ani aia hmêlṭha an awm biklo ” tiin ka kâwngah chuan a kut rawlh lutin alamah min pawt hnai salha. Ka ṭhiante lâi leh ngei deuh bawk si awmdân chuan ka nuih an tiza bawk nên ka nui chhuak haka, Damian-a hian a chhân dân tur tâwk a hre dâwn tih ka hre bawk nên ka inrawlh duh lêm lo.

“Kal vat ang u, i nu leh pa pawh kan hrilh hlimah mak an ti ania aw, pa Zika phei chu an meng pâwt lo chauh mawle. I u te pawh tûnlai chu an ṭha riau mai” an tihchuan ka bu nghat nghata. Ka lâwm takzet, ruihhlo hi kalsan thei se ka duhthusam a ni.

Infak lam pawh nilo in an hmêlṭha a, ruihhlo an khawih chung pawh hian nula fel leh hmêlṭha tak takin an ngaizawng tih ka hre ve renga, keimah min rawn be nawlh nawlh tâwk lah bo lo. Hna ṭha tak an nei bawka, ruihhlo hi kalsan thei se misual an ni hauhlo bawka kan chhûngkua pawh kan hlim leh ngei in ka ring.

Airport aṭang chuan an car rawn ken ah chuan inthiar lûtin car pahnih an rawn keng bawk nên kei leh Engi bâkah Damian-a leh Sammy-a chu kan chuanga, Rami Thani leh Martin-a, Tyler-a te chu an in phur bawka.

Damian-a leh Sammy-a chuan kan ram vêl chu enin an in melh leh zauh ṭhina. Nuam lo an ti ang tihchu ka hlau khawp mai “In ram chu anawm dâwn hi, ka fankual châk chi tak ani. A ram leilung hi ka ngainat chi tak a ni“ Sammy-an a rawn tihchuan Engi chuan a lo chhâng vata.

An pahnih chuan an titi nghal mawlh mawlha, kei erawh Damian-a dâr nghêng chuan ka bei hle hle a, tukverh aṭanga thlifim rawn thaw heuh heuh chuan min rawn chhemin ka nui leh sak ṭhin a. Bialpa neiin kan ram hial min zui thleng chu a nia, ka beisei ngai loh thil a ni bawk nên mumang a la ang rum rum ten ka hre ṭhin.

“I ṭhiante hi in inah an awm vek dâwn nge nge ni a keiin Sammy-a hi ka lo mikhual mai dâwn em ni? Sâp tlangvâl mikhual theih te chu anuam dawn emai” Engi chuan arawn ti a, mipa pahnihte erawhin Mizo ṭawng kan hman miau avângin an hre thiam dâwn lo tih ka hria.

A sawi ang tak takin inṭhenawm vek kan ni a, têt tê aṭanga kan inkawm khâwm avâng hian kan engkim kan inhriatsak vek ti ila ka sawisual lo ang, kan in au pha vek dâwn tho a a pawi ka ring lêm lo.

“A ṭha phian ang chu, Rami leh Thani hian Martin leh Tyler kha mikhual ve nghal sela a ṭha ang, an mahni hi thleng phawt ila kan be chhin dâwn ania” ka tihchuan a bu nghat nghata.

Kan in kan thlen chuan ka en vang vanga, ka hmuhlohna a rei ve deuh tawh bawk nên ka ngai ve riau mai. Ka nu rawn chhuakin min hmuh rual chuan a rawn tlân vata, kan inkuah nghal chawt mai “In rawn chau em? Ka ngai hle mai che, hei hi em ni i ṭhianpa chu?” tiin ka bula Damian-a ding luah reng chu a ena.

Ka bûk nghat rualin Damian-a chu bia in an inchibaia, Damian-a chu ka rin ai takin awm dân tâwk a hre leh pek viau mai. A cool leh ruih tawha, a ṭawng tam lo nângin ka nu ngainat tur a awmdân erawh a hre hle thung.

Inchhungah chuan inzui lûtin kan ṭhiante pawh chu ka nu leh pa pawh chuan an chibai ve a, Damian-a hnênah a ṭhiante chu ka ṭhiante'n mikhual ve sela ti a ka hrilh chu a pawm tlân avângin Engi nên kan lo ruahman ang chuan an pawm a.

An phur lutuk zâwk tih ka hmuh chuan ka nuih a za viau mai, in ngaizawng thei sela chuan kan ṭhianho nên englai pawhin kan awm ho thei dâwn tih ka hre bawk nên an inngaihzawn chu ka châk ngei mai, bâkah kawppui neilo vek an nia ka ṭhiante tân pawh hnamdang nimahse ka duhpui lo theilo.

An inhruai haw ta diah diah chu Damian-a nên chuan kan en zuia, ka nu leh pa in min koh luh chuan kan in en ha a. Eng tak chu sawi ang maw? Ka pa chuan a lama kal tur chuan min hui hnai zauha, Damian-a chuan ka kuta kaiin min phei puia.

“Ka fanu in dinhmun a inthlau mah mah lo maw? Chubâkah hnamdang a ni a, kan chhûngte leh kan hnam hian an dem nasa dawn che tih i hria ang chu maw?” a rawn tihchuan Damian-a chu ka melh zawka, a ni erawhin ka pa thusawi chu a hrethiam hauh lova, mahsela a awmdân aṭang chuan hriatthiam a tum ve hle tih ka hre thei.

“Pa ka hria a lawm, ka hnam ka phatsan tih pawh ka hria a lawm. Mahse pa Damian-a hi ka hmangaih a ni, a ni pawhin min hmangaih bawk, kan dinhmun in thlauh zia ka hailo, mahsela a nu leh pa pawhin min pawm em em zawk a sin, nangni pawhin in pawm ve ngei ka beisei” inthlahrung tak chuan ka ti a.

Ka pa chu a thaw deuh haka, ṭhen turin min ti ang tih mawlh ka hlau. A chhan chu Damian-a hi chân tur anga ka indah hian ka phal thei hauhlo.

Chutah Damian-a lam chu enin “Ka fanu hi i hmangaih takzet em?” tiin a zâwt a, Damian-a chhân dân tur mawlh chu ani ka hriat châk ni. Engtin nge a chhan ang tiin thinphu dep dep chuan ka ngai châng renga.

“In fanu hi nangni aia nasa a hmangaihtu dang chu an awm dâwn lova, mahsela nangni tih loha hmangaih ber tur chuan ka intiam ngam. Min ring ula in hnam zia ka lo hre ve nual tawha, min iai a nih pawhin ka dem hauh lo che u, mahse in fanu ka hmangaihna avâng hi chuan engpawh ka huam ani” a tihchuan ka pa chuan ka nu chu a melh zawka.

“A nih hetah kan bulah awm turin duh ta cheu ila? Tin, i nei duh tak zet em?” ka pa chuan a rawn ti leha, he chhânna hi a ni keipawhin ka hriat châk em em chu ni. Damian-a chuan ka kut chu a rawn hmer salha “Ka tiam a che u, ka neih theihna a nihchuan helaia awm pawh pawi ka tilo, mahsela nu leh pa nei ve tho ka ni a, an ngaihdan tur erawh ka hre biklo, mahsela Fiona hi neih ka hnial lova, ka hmeichhe hmuh tawh zawng zawnga ka mitla tu awmchhun a ni, a tân chuan ni e ka chhûngte pawh ka kalsan mai ang chu” a tihchuan ka hlim veng veng mai.

Ka tân engkim a huam tihna? Keipawhin hetiang ang chiah rilru hi put ka tum ang, ka chhûngte hian an rem ti lo anih chuan amah ang hian engkim chân huamin ka vuan ve ang. Chu chu ka ngaihdan dik tak ani bawk.

Ka pa chuan a duh ang chhânna a hmu ta nge a nui ta saka, “A ṭha e, in inhmangaih chuan hnam nunphung chu vawn duh viau mah ila hmangaihna meuh dang tur chuan tih theih kan nei biklo, kan rin ang che hian kan fanu hi hlim taka i siam kan beisei, tûnah innei in la niloa, a zahawmna pawh i kutah a innghat a kan rin ang ngei che a a zahawmna pawh i humhim kan beisei” a tih tâkah chuan ka lo thaw deuh huaia.

Damian-a hlim hmêl chu ka hmuh hmaih lo, mikhual roomah chuan a bungrua chu ka dah luh puia, a mood a fuh hle tih hriat takin a faifuk hlarh hlarh lehnghala. Ka nuih leh hak ṭhin, ka hnunglam aṭang chuan min rawn kuahin “Tunah chuan inneih chiah kan hmabâk ta, lehkha i zir kher pawh a ngai tawh lo. Keimahin ka enkawl ang che, ka pa hian Company hi ka kutah ala dah vat dâwn a, hnathawh kher i mamawh lo tih hria la, min nei turin i rilru kha lo siam hmin hmak ang che” tiin ka biangah chuan a rawn fâwpa.

Ni e, a sawi ang hian min châwm thei dâwn tih ka hria. Bâkah keipawhin awm mai mai erawh ka tum bik hauh lova, in lam chêt tal ka thiam angai dawn tih ka hria, k ute rawn haw pawh chuan Damian-a chu an be nghal bawrh bawrha, an harhfim lai ka hmu thei chu lâwm tak ka ni.

Hetiang hi ni reng thei tawh ila ka châk takzet, hman ang khân chhungkaw hlim thei tak nih leh kha ka châk ani. Chaw ei lai te chuan ka chhingte chuan duhsak takin Damian-a chu chawhmeh chu an suah mawlh mawlh renga.

Damian-a ka fakna deuh chu a awmna hmun azira a inthlak danglam thei ṭhin hi ani. Tûnah pawh an ni in an ei ngai miahloh thil hlir kan hneha, sawisêl leh ei duhloh pawh neilo in an pêk ang ang chu tui tih hmêl takin a ei zel a, ka nu leh pa pawhin an hmêlah chuan an ngaisang tih ka hre thei.

Hnampui chutah pawh mi hausa fa lehnghâl in a bula awm te a zira a insiam rema chapona a nei miahlo hi keipawh hian entawn tlâk ka ti. Mizo ngei pawh mi hausa fa ṭhenkhat te nundan hian sawisêl a hlawh nasat laiin a hnampui zâwk hrim hrim hi an nundan a lo mawia, an mahni aia hniam zawkte nundan anga awm an thiam riau bawk.

NAKTÛK ZÂNAH EMAW LAST TAWH ANG AW