DUHLAI ZORINPUIA CHAPTER 3

DUHLAI ZORINPUIA

CHAPTER 3

“An rawn haw dâwn tawh angem le? Ka ngaihtuah emai, nikumah kâng hlum an awm kha an ti si a” tiin lo halna lam chu ka ena, a rei riau tawh hian ka hria a, chubâkah ka ngaihtuah deuh bawk nên inhliam palh an awm ang tih mawlh ka hlau a. A rûk tak chuan ka rilru a buai takzet a ni.

Mawii chu ka bulah rawn ṭhu in lo halna lam chu a en ve a, “Ka u a tel ve a lawm, an rawn haw ṭep tawh ang. Mei khu pawh a reh deuh thaw tawh hi, hlauthâwng lutuk suh, tumah an inti palh tawh êm lo turah ngai ang. Nikum pawh kha vanduai palh vâng liau liau ania, lung a rawn lum thut an tia, chumi a bum tumna lamah meiah khân a lût palh an tia, nikum kha chu a pawi tak tak a ni, a chhûngte lah an khawngaihthlak, an ṭap ri te kha ka bengah a la châm reng mai” rawn ti ve in thil awmzia chu a rawn sawi a.

A sawi ang tak takin lo hâl khu chu reh ṭan in a hma anga nasa chuan a khu pawh a awm tawh hauh lova, vân lam erawh meikhu hlirin a la khat thunga. Ni êng sen phût te chuan eng tin emaw hian min mawlh tlat lehnghala. 

Amah vêk chuan rawn sawi zawmin “Hrehawm i ti em? Helamah chuan mi hi an buai bawk sia, hna ṭul tak tak phei chuan khawchhûnga awm hi a hrehawm zawk. A reh bawk nen lo lam hi a khawhar thlâk loh zawka, keipawh naktûkah ka feh nghâlin ka ring, a kâng ṭha em tih en hrim hrim pawh a ngai dâwn a, thing erawh khawih ngam an la ni dâwn lova, a mût tâwk an la awm bawk nen, ilo tel ve duh chuan ilo tel ve thei ania aw i peih chuan” rawn tiin ka chhânna beisei tih hriat tak chuan min ena.

“Rawn tel ve pawh ka pawi tilo, in rem tih chuan. Ka rawn kal ve ange, kâng vâr pawh ka la hmulo a; phone leh tv a kan hmuh bâk hi chu khawpuiah awm chuan a harsa reuh lutuka. Bâkah lehkha zir nen kan feh ngai meuh lo, feh ve chu ka châk ṭhin lutuk, mahse hun hi ka nei ngai lova, ka nu leh pa hian an phal ngai lo bawk nên" tiin ka chhânga, min chhâng mai lo hian a ngawi deuh rauh rauh mai, enge a ngaihtuah ang tih ka hrelo bawk nên ka lo ngai châng ran a.

A chhân hun nghaka ka en reng lai chuan min rawn chhâng har phian bawk nên “Mawi ila awm maw?” ka ti chu a la rawn phu zuk zuia, ka nuih a za ngei mai. Nui hak haka ka en chu a rawn nui ve haka, a hmelah pawh a nuih a za hle tih a hriat, “Tihpalh thil ka lo ngaihtuah nasa deuha, chuvang mawle. I duh chuan lo kal ve rawh, ka ute an tel ve dâwn a,a hlauhawm loh ania. Hnathawh phei chu a ngai lo a, i hmuh châk ka rin vâng ania, ka lo ngaihtuah nasa deuh a lâwm mawle” tiin a riat nawi zui niah niaha, a awmdân chuan ka nuih a tiza ru takzet, a lâi deuh nge mawni.

 “Um feh ve chu ka châka, Sâwma te ho kha ka lo be tawh sia, rawn feh ve chu ka duh khawp mai. An mahni pawh ka lo be leh anga, in lo a rawn feh zâwk chu ka duhthusam a lawm, mipa rual kâra awm chu midangte mit tih kham palh a awl sia, hmelhriat loh tân phei chuan min selna tur a tam bawk nen” ka thil tawn ngaihtuah ran chung chuan ka ti a, a ni erawh hi chu hnunglam aṭanga min rêl duh tur chi a niin ka hrelo, kan inbiak chin aṭang pawh hian a zia tur chu ka hre ve in ka hria 

Amah vêk chuan “Aw a nih chu, an bula i feh duh zâwk pawh in a pawi chuang lo a nia, an fel a sin. An tlâwmngai a, mi hian engmah hrelo lah hian an lo sawisêl leh mai ṭhin a” a tihzawm zata, chutia a hriat chian thu a rawn sawi tâkah chuan keipawh ka thaw huaia, hmelhriat ka la nei vak silo nên an inhnaih chuan ka tân pawh anuam deuh ang chu, a thusawi dân chu ka lawm zâwng tak a ni, tumah a la sawisêl hauh lova, tukina ka mi tawn te ang kha chu nise sawisêlna tur an zawng leh ṭalh in ka ring.

Mi rilru chhe deuh hi chuan midangte tlinlohna lai hi an hmuhsak thei in, fak theih reng pawh han sawisêl hrâm hi kan ching bawk si a. Mawii erawh ka hmuh tirh aṭangin a zia a dan riau avângin keipawhin nêl takin ka kâwm in thil pawh ka sawi pui ngama, a rintlâk dâwn a ka hriat vâng a ni.

Amah misual a nilo tih ka hriat vâng nge ka ring ve tawpa, chunga zêp ṭit ṭêt ka tum lem lo “Nia, ka hriat hmasak ber te an nih vâng nge, an fel ka ti viau asin, ka khua an tihar hman meuh lo. In khaw tlangvâl te hi an polite khawp mai,ka tuihmun pawh hi an mah ni min rawn siam sak a nia, hlawh an beisei hauh lo lehnghâl, an fel ka ti tak tak a ni” ka ti chu a nui saka, a hmêlah an khaw tlangvâl te ka fak chu a lâwm ve hle tih a hriat, chu ringawt pawh chu midangte lak aṭanga a danglamna a niin ka hria.

Fimkhur taka kawma, thildang dang ka sawi pui pawhin a buai hauh lova, a mitmengah vertherna a lang hek lo.

“A ṭhat hlauh chu an ni ho hi chu kan khaw tlangvâl fel rual alawm an nih, an felin an tlâwmngai a nia. Chutia an ni ho ilo kawm hlauh chu a ṭhat nasat chu, i kawm thiam phei chuan mipa chu hmeichhia ai ṭhian atân pawh an rintlâk a lawm; mahse min kawm duh loh phah nân hmang kher lo la, mipa chu i lungngaihni ah an hnêm thiam lo ang che, keipawh hian ka sim khawp a nia. Han thinrim in han phun ve pawh ni ila, kan thlavang hauh emaw, min hnem emaw pawh tumlo hian an ngawi ngal mai a ni" tiin a ding chhuaka, kei erawh fel a tih zîngah Zorinpuia a tel ve miau avângin ka lo ner ru saka, kha mipa chimawm lutuk khân ka rilru a luah ber bawk si a, a mize ngêng leh ngeiawm lutuk khân min hip rualin ka sawi tawh angin amah duh huam anga lan ka tum lo, bialnu nei phei chu biak ṭhat vak kha ka tumlo, an bialnu te nên kan inhauh phah ang tih te pawh ka hlau.

An khaw nula ṭhenkhat mizia ka hriat aṭang phei kha chuan ngaihzâwng nei lai lehnghâl chu hnaih hi ka tum lo hrim hrim, reilote ka awm chhûng leh mipa in lêng ka nei pawh khati khawp khân min lo chhuah chhe hmana. Mi in ngaizawng inkârah inrawlh vaih ila chuan min chhuah chhiat dân tur ka hailo.

“Haw i tum em ni?” ti a ka en ha chu min nuihin a lu a thing nar nara, ka filter dahna lam chu panin tui chu a inzui khalh khalha. “Lo hâl ho rawn haw thleng ka awm ve ang chu, nangmah chuan a hrehawm duh dâwn emai. Zânah te i hlau lo em ni? Ramhnuai i hnaih ropui sia” tiin ka inchhûng chu a en kuala.

Eng tak chu sawi ang maw? Ti a ka lo ngaihtuah lai chuan “An luah lohna a rei ve tawh sia, tihfai tur a tam viau lo maw? Mahse pa Rama te hi an fel khawpa, an mahni hi an zau bawka. I inluahna te an nih angin mamawh i neih chuan lam pawp pawp rawh aw, fiamthu te hi an duha. An rilru a ṭha tehmai a nia” tiin a fak zui leh siam siama.

A zia hi ka duh chi tak a ni, midangte han rêl emaw chuti khati an ni chu an ṭha lo tih ala nei miahlova. Keimah pawh chutianga min han en vung vung pawh a nei chuang lo, ka nihna ang ang chuan min en liam tawp tih ka hre mai.

Kan ngawih dun reng hnu chuan amah zâwk chu rawn ṭawng hmasa ah ṭangin “Ṭhian angin ka ngai che a, tûn aṭang chuan nang pawhin min rawn be bawrh bawrh zel rawh aw. Harsatna i neih pawhin min hrilh hreh suh aw, ka lak aṭang chuan a chhuak dawn lo, keipawhin ka ṭhian ah ka ngai che ania, i rawn awm tirh pawh khân rawn kawm che kha ka châk lutuka, mahse Vcp te ho nên khân in ni thluah bawk si a, ka ngam chiah lova, ka ṭhian tam zâwk te lah hi zirna avângin hmunpui lamah an awm vek si a, khua hi a har ve duh reuh lutuka” tiin a phun sapa, a nih ka ring. Khawlian tak an la ni hauh lova, a mi chêng te pawh nundan mâwlmang ve te te pawh an la awma, a lehlamah chuan mihring tam lo na na na chu a hrehawm ve ṭhin viauin ka ring.

Keimah min rêl leh sawichhe tute pawh kha ka dem em em chuang lo, khawpui zia tam tak an la hmu dâwn lova. A hriat lah an hre hek dâwn lo, tûnlai changkanna in a ken tel thil tam tak chu an mahniah hian hmuh tur a la awm lo tlata, pi leh pute hunlaia an zia ang kha la pu an tam zâwk mah a. Hei vâng aniang keipawhin ka ngainat rûk tlat ni, a khaw thleng leh a boruak hrim hrim hian min hip zar mai.

“Ni e, keipawh min ring rawh. Ṭhian anga min ngaih phawt chuan ṭhian chu kan ni thei alâwm, chuan Zohmingsangi ka nia, i duh chuan Zoi emaw Sangi emaw min ti thei ang, a tam zâwk hi chuan Hmingi min timai zela” tiin ka tho chhuaka.

Thingpui chu han thliin ka pe zuia, a nui sâng reng chu hmuh a nuam takzet, hmeichhe sual leh mi chhiatna lai sawi nuam ti chi a ni dâwn lova ka hriat avânga chutiang thu sawi pawh chu ka ni bawk. “Tehrenh mai, tûnah chuan ṭhian neih belh leh ah ka in ngai, mi kawm vak hi ka thiamloa, sawi tûr hi ka haihchham ṭhin lutuka, thawnthu ka ziak ve tawpa, rinai hei tûnah chuan ṭawng pawh ka duh ve deuh tawh” tiin a nui hak hak a,kei erawhin thildang ngaihtuah lêm lo chuan a thawnthu ziah lam daih chu a ni ka lo ngaih ven ni.

“Maw? Thawnthu i ziak ve maw?” ka tihchuan a bu nghata, “Hnathawh kâr lakah hian ka ziak ṭhina; a tîrah chuan ziah ka tum em em pawh anilo; ka phûr thut khân ka han ziak ve tawpa, a tirah phei chuan ka thiam lo lutuka, mahsela hei chhiartu lam an lo fela, post dân pawh ka hre silo midang ka post tira,tûnah chuan ka chawlhsan hleithei lo anih hi, hlawh tlêm a zâwng kan neih ve hi a ṭha ka tia, bâkah school han chawlh tâkah chuan kan thiamna te a han bo mai loh nân a ṭha phian mai” a tihchuan ka pawmpui viau.

An hnathawh phei chu tha hman tam ngai hahthlâk lutuk lehnghâl, chutiang chungin engtin nge a ziah peih zâwk ni? Kei chu ni ila ka peih teuhlo mai, “Ka ṭhiannu pawh hian a ziak ve tak a sin, mahse a ni chu Youtube lamah chiah a dah chhuaka, a nih chuan writer ṭhian thar ka chhar dawn che a, nakinah ka thawnthute min la ziahsak ve ang chu” ka tihchuan a rawn nui ve hak haka, a hmêlah a phûr hle tih ka hre maia, a tuizâwng tur tak a thlang niin ka hria.

“Aaa ka ziak thiam vak lo, ka phûr pheng vel thil tih a ni ber mai, kan la tum ang chu. I tawn ril viau angai ang, a changtupa lam tur pawh han fuh em em mai sela . Chutilo chu ka ziak peih ṭhak lo ania, ziah paha star tur ka duh " tiin a nui zui hak haka,  thingpui chu a in pah bawk.

A che reng reng chu a fel thlap lehnghâl, hmeichhe inzo tak a nih ka rin avâng chuan alakah pawh ka inthup lutuk duh lêm lo.

“En teh, Zorinpuia hi a sual viau em? Eng ang mizia nge a put? ” ka tihchuan min rawn en zawkin zawhna mitmeng hian min ena, a hmêlah chuan mak a ti hle tih a hriat, u Rinpuia chanchin kher kher ka zawh chu a beisei lo te pawh a niang, keilah hian ka hre châk tlat bawk sia.

Amah kha a ṭawng tam chu a ni hauh lova, mahsela a zia dang leh chimawm ru riau si kha ka hre châk tlat. A ze ngêng ngalh phênah hian inthup chu a awm ka ring tlat, a bialnu avâng ringawt pawh a nih ka ring chiahlo.

“Aaa tinge? Ka hre lutuk lo, a sual lamah phei chuan sual lo tak a ni. An tlawmngaiin an chhûngkua phei chu mi zah an hlawh riau a sin” a tihchuan ka bu nghata, kan awmdân erawh sawi ka tum lêm lo, ṭhiante bul mah nisela khatiang thu ka sawi a nih chuan Mawii pawh hian min hmuh dân a dang daih thei tlata.

Chubâkah u Rinpuia awmdân ka sawi a, a mi tihdân a hria anihchuan a bialnu beng te a lo thleng palh theia, ka fimkhur ve tlat a ni. 

“A nih chu aw, amah kha a nelawm loh hmêl ka ti lutuka. A rawn lên te hian a ṭawng tam ngai silova, a ṭawng chhuah chhun lah hi a puitling leh bawk sia, ka hre chiang châk mai mai a. A ngai tawh lo mai, hmeichhe tân mipa chungchâng sawi chu a mawi lo emai tiraw?” tiin thudangah chuan ka pakai zui ta daiha. 

Ka sawi thui a nih chuan sawi loh tur tur ka sawi palh anga, ka mualpho hrep ang tih ka hlau ve tlata. Khua a la tê si a, ka mipa in lêng nêna kan awm dân pawh khatiang khawp khân an sawi duh ania, bâkah Zorinpuia ka ngaihven lutuk anga lan tir ka duhlo. Bialnu nei lai chanchin ka lo sawi ve vak khân Mawii tân pawh mi a ngaihdik lohna tur a ni ve phah theia, ka ngawi tlang ta zâwka.

Chutia kan lo titi dun mawlh mawlh lai chuan  Sâwma te ho chu an rawn in zui lût diah diaha. “Hmingek, thingpui min lo thlit rawh, awi ka chau lutuk. Ka ut vekin ka hria, ka rawn dum haw hial lo maw?” a rawn ti lut lung lunga, Mawii nên chuan in enin kan lo nui dûn haka, a rawn haw chu mei em nasat tih hriat tak hian a sawi ang tak takin a dum deuh nuai mai.

“I hmêlṭha zâwk a nih kha, kha kâng bâng in rawn ni êm lova a zia, lo ṭhu rawh u. Ka rawn thlit nghal ang che u, in chau viau ang. A khu aṭang pawh khân a hmunah chuan a alh vung viau anga, keichu ka hlauh chi tak” ti pahin thingpui chu thliin Mawii chuan min rawn pui ve bawka, mipa ho rawn lan thut vâng nge Mawii pawh a ṭawng ta miah lova, a zak ve deuh te pawh aniang, a che khawr deuh tlat chuan a rûkin ka nuih a tiza ngei mai.

“Mawii chu i lo awm ve a nimaw? Nang hi chu i fel ṭhin ani, Hmingeki te ang i rawn kâwm duh chu a hlim viau ang chu. Keini lah mipa mipa min tia, kan lakah a in vêng em em a, in inkâwm thei chu a ṭha dâwn hle mai, kumin chu in lâwm ho ila a ṭha ang” a tinghal zata, Mawii pawh a lo nui ringawta, tlêm chuan a tim ve tih ka hre thei, an khaw tlangvâl te an ni nâng in, kei ngei pawh mipa rual kârah hi chuan ka kimki deuh ṭhin miaua, ka hrethiam lutuk tlat.

“Nia a fel tih ka hria a chuvâng ania ka rawn kawm chat ni, min lâwm duh phawt te chuan lâwm lutuk e a, ka ûte lah in hrang changin an awm ta vek si a, min rawn pui ve mahsela a zawng zawnga in puih theih a ni silova, nang ni in min lâwm duhte chuan a lâwmawm viau ang, taka hei Zoi hi kan lo a feh turin ka lo sâwm a, in lo in be tawh tih ka hria a, ka bulah nuam a tihzawk ringin ka lo sawisak a nih chu aw” tiin thingpui chu a chhawp zung zunga.

“A pawi hleinem, kan feh ho dâwn a nia ama inah hian in nghâk khâwm ila a ṭha ang, Zorina pawh kan lo hrilh dâwn ania, a ni zawng ram lama awm nuam ti zâwk tih takah a ram chhuah leh tawh kha. A rawn kâp lian leh viau mai thei a ni” Mama chuan a rawn ti ve a, u Rinpuia chanchin an rawn sawi chhuak chu ka lo thaw ve huai ringawt.

A zia kha ngei viau mah ila ka ngaihtuah ru ve tho, Sawma te ho nên inzui dial dial kha an nia a rawn tel ve ta si lo kha a rûk tak chuan ka hlauthâwng deuh kha a nia, chutia a ram vah tur thu an sawi tâkah chuan midang hriat loh lamah chuan ka lo thaw ve huai mai. Amah lah kha a chêt dân mak viau si khân a ṭawng tam lêm lova, mi han biak bawrh bawrh kha a neilo nên a lehlam takah chuan a nelawm loh duh viau in ka ring.

“Hmingi i va lunghnûr hmêl ve, a rawn haw lo chu ilo ngaihtuah viau te a nilo maw?” Fakan a rawn ti chu midang chu an nui dar dara, kei erawh ka ner sak mai. Ka ngaihtuah chiam pawh ka hrelo, khatiang a ngeiawm ropui si “A teuh lo emaia, khatiang mi chimawm lutuk kha, min hmehbel phêt tum suh u. Bialnu nei lai lehnghal, mi bialpa chhuhsak duh tur khawpa hmu zolo ka ni bik hleinem, amah” tiin ka sawi thui dâwn tih inhria in ka tâwp zui ta daiha, an ni lah an lo la nui ṭha a. Mawii erawhin mak a ti deuh nge kan thusawi lah chu a hriatthiam hmêl vak loha, a lo ngawi kar ringawt.

“Ṭhian inkârah thuruk awm ngailo, kan in hrilh vek tho tho a lawm. Ṭhian kan nihna ang ngeiin engkim inhriat pui hi a ṭha, ṭhian tih hming pu a thuruk leh harsatna te min hrilh ngam lo ṭhian chu ṭhianṭha an ni ngailo. Ṭhian kan nih chuan engkim kan inhrilh ngama, kan mimal harsatna te pawh in hrilh tur, kan han fiam mai mai che a nia, Zorina pawh i hrechiang anga, i ngaina thuai ang” a han ti ve ngeia, kei erawh ka ner ru nasa, khatiang mi kha ka ngainat pawh ka ring lo, a hmui a tui leh tui loh te kha min la zâwt ta deuh deuha, ka ngaihtuah lêt a ka la zakin ka ngei tel bawk, engvanga min ngam viau nge maw a nih le?

“A dik a lawm, engmah zêp ka neilo. Khapa chanchin ringawt kha chu sawi tawh lo teh ang u, ṭhian ah ka ngai cheu a, chuvâng alawm hetia tlangnel taka in kiangah ka awm ni” tiin ka sawi ve dap dapa Chutih rual erawh in ṭhianṭha lo tak, ring em em a kan engkim kan hrilh hnua min lo sawi mualpho châk zek zek mi ang hi ka nei ang tih ka hlau.

“A dik ang, kan bem rawn luai luai mai tur che a nia, Mawii chengkawl i ei hnem deuh em ni? I va ngawi thei ve, nangmah ang lo taka i awma, i zak em ni?” Faka chuan Mawii en chung chuan ava ti zauh pek a, ka lo nui haka. Mawii lah an sawi ang tak takin mipa ho awm hnu kha chuan a ṭawng duh ta vak lova, a ngawi rei rêng ani.

“Ei bawk lo, luiah pawh kan kal lo hrim hrim. Engah nge ka lo sawi ve vak anga, midang inbiakna kâra lo inrawlh te chu i zia zâwk ania, keite chu mi thusawi in kâra lo va inrawlh ve te hi ka zah zâwng tak a nia maw“ tiin a nui haka. Faka nên chuan an in en rum dûn ngang mai, hemi te pahnih hi an lo inhre ṭha sa nge ni dâwn ni.

“I dang te lah hi a nal nasa mai sia, ka hmeichhe duh loh zâwng tak i ni. Mi hnial hrât lutuk” Fakan a tih laiin Mawii erawh a nuih a za hle tih a hriat.

“I hmeichhe duhzâwng nih ka duh loh avângin a lawm,i duh loh zâwng tak mizia ka put luih ni” Mawii chuan a ti ve leha, ka lo nui ru char char tawh. Faka nên chuan an inhnial tawn zak zaka, Sawma chuan a ning ta ngâng nge ni, a bân vai hluaiin a ding chhuaka “In ninawm, nang ni pahnih hi in inhmuh apiangin inhnial lo teh u, in in duh viau chuan in ngaizawng mai ula, ṭhiante in kâra inthup nâna in hnial reng hi sim rawh u” tiin an pahnih chuan a en duna, an ni pahnih lah an mengphawk nasa.

Chutah a rual ṭhawt hian “Ka duh teuhlo mai” an ti dûn leha, midang erawhin an lo nuih liam mai mai thung. An zia chu ka lawm zâwng tak an ni, in hua leh thinrim miah silova inhnial nuam ti chi an ni dâwnin ka hria, an in mil phianin ka ring.

“A nih kan haw phawt ange, in tih fai vat te kan duh ve bawk si a, hetiang chuan thlan nên kan ban chuap mai, zânah a rem leh kan rawn lêng dâwn a nia” tiin an tho chhuak zui phak phaka “Thingpui te kha in belh leh phawt ula, a nih chutia in haw duh tawh miau chuan chaw ei tui u aw” tiin ka thlah zui ve ta thuaia, kawmchhak a an in zui phei diah diah chu thlir liam tê tê in

“An thinrim êm lovang chu maw, Faka nên hian in inhre ṭha em ni?” ti a ka zawh chuan a nui ringawta, a awmdân aṭang pawhin Faka nên an awmdân chu a huat vâng a ni hauh lo tih ka hre ve maia.

“Fiam an dâwl a lawm, mipa te chu bâkah hmeichhe fiamah an thinrim duh lo, mipa dik tak a lâwm an nih, ṭhenkhat hian an zia hre miah lo hian an sual hi an ti ve ngawta, an mak ka ti ania aw kan khaw mite pawh hi, mi rêl leh sawichhiat hi an peih lutuka" tiin a ṭawng zui leh siam siama, a sawi chu a dik ka ring, mi hi kan han sawichhe ngawt zela, kei ngei pawh min sawi duh dân aṭang kha chuan Mawii sawi hi ka pawm thlap mai.

A thusawi dân te a mah a awmdan hrim hrim aṭang chuan misual a ni dâwn lo tih ka hria, mi lang tlang tak a niin ka hre bawk. A nunah thup ṭit ṭet a neilo ang tih a hriat bawk, keipawhin ka nel nghâl sarh mai.

“Taka u Zorina nên chuan engea? Ka lakah hlauthâwng suh ka tih kha aw, ṭhian kan ni ka tihkha. Min rin ngam phawt chuan keichuan ka sawi chhuak dawn lo” a rawn ti leha, keipawhin ka ringhlel buai duh tawh lo.

“Engmah a nilo, mi fiam dân avang mai mai a nih kha, ka ngei lutuk zâwka” ka tihchuan a rawn nui haka “Keipawh duh deuh mai phone aṭanga min rawn be tu ah hian ka neia, kan la inhmu pawh a nilo mahse a mizia ka duh tawpa, a ṭawngkam kha ka lawm timai ang, mipa hi an zia hi a lawmawm ru riau zel” tiin a nui haka.

Nui mahse a mitmeng aṭang chuan hlim lohna tak a nei tih ka hre thei “Chutisi in in ngaizawng lo em ni?”  ka tihchuan za lo tak hian a ṭhen saka, min rawn en in a thutak ta ran mai.

“Kan ni ngei alawm, mahse ka lakah a rilru zawng zawng a lo pe lo va, a hringnunah keiai lang hmasa awmin chu mi chu a theihnghilh theih loh thu min hrilha, min kalsan ta a nihkha, keiaia a lo tawn hmasak tawh chu ka hneh ngai hian ka ring loa, dan buai pawh ka tumlo, a duhthlanna a ni a ka zahsak mai a ni” a hmai chu a tuai zauha, a hmêl aṭang chuan a tuar ve hle tih ka hre theia,“Mipa hi an mak ka ti ṭhin, kan hmangaih tih hre rengin min fiamkuala, min duh âwm ang taka awmin kan han hnaih dawn chiah hian an in la hrang leha, hlat tak tak dâwn ila hlat hlen phallo in beisei tur tâwk in an awm leha, an nunrawng hi ka ti ngawih ngawih, hetiang tur chuan beiseina min pêk loha an duh kha thlan mai tur a nia, midang thinlung fiam hi nuam an ti viau emaw ni” tiin tukverh aṭang chuan a dâk chhuaka, angaihruahna a vâk thui hle tih a hriata.

“Hriatthiam an har a nih ber hi ” lo ti ve in kan titi tui zui ta phiana, a ni pawh a ṭawng duhin a châng in a nuia, a châng leh a ngei thu vêl a sawi leh ṭhin. U Rinpuia laka ka rilru put dân chiah a niin ka hria, keipawh hian ka ngei viau si hian a lehlamah chuan ngaihtuahna ah a rawn lang ve zel lo theilo, ka hmêlṭha tih a ni ve miaua, ka ngei avâng ngawta theihnghilh nghâl theih ni hek lo le.

Duh kan neih tak tak hi chuan awm hmuna in biak leh in hmuh pawh hi a ni kher lo, kan mit leh thinlung hian a thlang miau va, kâ kher a sawi ngai hek lo le. Mit in ṭha a tih tawha, rilru in a vei vêk vêk hi chu an zûn hi a na ngawih ngawih tawh zel, kan hmuh renga duh em em hi chu an awma, mahsela vawikhat pawh kan la hmuh loh zûn pawh hi a nêp chuang hauh lo. 

“I nghâk dawn tihna em ni? A rawn kîr leh i ring em?” ti a ka zawhna avâng chuan a phone chu enin, a nui saka a hmêlah beiseina a neilo tih ka hmu thei“Ka hrelo le, mahse nghah phawt chu ka duh. Mipa betu leh lo nihpui chu ka nei ve nual tawha; mahse a ni anga thinlung taka min tinuia, min tihlum tu kha an awm leh tawh dâwn lo tih ka hria. Chuvang te pawh chu a niang nghah ka inhuam em em ni? A ṭawngtam lova, thutam kan sawi ngailo, mahse kha a thusawi tlêm te pawh kha mipa min be kur nguai tute thusawi ai pawhin min hneh zâwk” tiin a nui sen sena, a mipa chanchin chu sawi nuam a ti takzet tih ka hria.

Ka khawngaih ru viau, mihring hi chu kan mak ani. Min hmangaihtu tina in kan hmangaih kan thlanga, kan tihsual leh an mahni demin ka ring leh tawh ngai lovang kan han ti a, min hmangaihtu kan hriat hi chuan thlah loh mai tur a nia. Kan lerh ve tum hranga, hmangaihna zawng siin hmangaihtu kan duh leh chuang silo

“I ti dik chiah, kan duh leh hmangaih turah hian kan duh thu a ni bik lova, thinlungin a duh tawh miau chuan dan theih a ni tawh lova, a rawn thleng pawp pawp a nih ber tiraw? Min duhtute hi duh ve zel mai ila hringnun chu a nuam nimai tur” tiin kan nui dun hak haka.

“A nih ka haw phawt ange aw, naktûk chu ka rawn sâwm ang che. Mipa ho an tel chuan a zia awm deuh ang chu, hei ka awm reng chuan khua a tlai lutuk dâwn si a, ka haw har lutuk chuan ka chhungte'n min lo hau palh ang, in hlap rual kan ni tawh bik siloa, a zahthlâk” tiin pâwnlam chu a pan zuia.

Ka zui chhuak ve thuai bawk a, a sawi ang tak takin khua chu a lo tlai tawhin ni pawh thlang lamah a her bawih tawha, ka dang duh ta bik lo “A nih chaw eitui aw, naktuk chu ka lo nghâk dawn cheu a nia” tiin kan in mangṭha zuia, a kal liam hnu chuan in chhûngah lûtin rawngbawl tur chuan ka in buat saih zuia.

Keimah chauhin ka ni bawka, chawhmeh han siam chiam ngai ka tilo bawk nên ka in bawl rei lo viau mai, kawmthlang ve Vawk lah chu chaw a duh tawh tih hriat takin a ngek rawng rawng renga, a bengchheng phian lehnghâl. Ran ah pawh Vawk kher kher hi chu ka duh loh chi tak an ni, an thâwm hi a bengchheng ṭhin bawk nên.

Khua a thim dâwn tâkah chuan chaw chu ei zui maiin ka thleng sil zawh chuan ka chhuat chu ka nawt leh thuak thuaka, thing a nih vâng nge nawh a hahthlâk in a chauh thlâk viaua, a lehlamah erawh a fai vêk vêk chuan a lang mawi duh phian zâwk mai.

Sâwma te ho pawh rawn lên an tum lo nge an thâwm a reh hmaka, an chau ve viau in ka ring. Lo hâl chu hmu ve ngai lo mah ila an vên nân leh kal kual nân a hahthlâk tur zia ka hai bik lova, engtin nge u Rinpuia kha a la ram vah peih zâwk ni. A zia hi amak ka ti telh telh, min la be tam hauh lova, chutih rual erawhin a mah ka ngaihtuah chhuah na tur tâwk ṭawngkam hman erawh a thiam phian lawia.

ZAWMNA

Zân a tlai tâkah chuan mut tumin ka in tin tuah a, chhuat ka phiah mêk lai chuan ka sumhmun chu a rawn ri ṭhiap ṭhiapa, ka rilruah thlahrang a rawn lang nghal bawk nên hlauthâwng thinphu dep dep hian kawngkhâr lam chu ka en pheia, ka meng phâwk deuh hra bawk.

Muangchanga pan hnaiin ka hmun phiah chu ka hûm nghet sauh sauha, ka hlauthâwng lutuk chu ka khûr deuh dar dar mai. Chutah kawngka chu rawn inhawng in ka au nghâl tuara, u Rinpuia hmêl ka hmuh rual erawh chuan ka tâwp nghal hmaka, ka thaw huai bawk.

Ani pawh ka lo awmdân avâng chuan a phu ve zuka, chutah a hmêl ah chuan nuihza hmêl rawn lang zuiin a khi suka, kei erawh min ti hlau bawk nên ka la melh rum viau. Engvanga hetia mi ti phu reng nge maw a nih le?

“Enge i rawn tih leh dâwn” ti a ka zawh chuan min chhâng lo hian a rawn lût zuia, zân tlai lamah hlir a rawn kal bawk nên ka hlau ru riau zel. Bâkah khatiang khân ka phalna la hmasa hauh lovin min fâwp tawha, mipa hlauhawm takah ka ngai deuh bawk nên ka nêl hlawl lo, a mizia ṭawng mawh lutuk nên lam hian ka hlau riau zel. 

Ṭhutthlengah chuan va ṭhu in a hawi kual ruaia, enge hmuh a tum ni. Chutah ka lam chu muangchanga rawn en in,“Ka kut hi min lo en sak ta che” a rawn ti ta sapa, eng tak chu ni ang maw. Muangchang leh hlau ru deuh chunga ka pan chu a hre thiam deuh nge a bul ka thlen rual chuan a lo nui haka.

“Min hlau em ni? Lungngai suh, ka seh hauh lovang che” tiin a nui suk suka, a hnathawh thawmhnaw nên ala ni nuaih bawk nên hel pâwl te pawh a ang lek lek mai “Tunge ka hlau che ti? A hrim hrimah zân rei tak tak hnuah i rawn kal ziaha, a mawi pawh a mawi lo, enge i duh?” tiin a hmaah chuan ka dinga, hlau lo ang leh zâm lo ang tak chuan lan ve ka tum bawka, a nui leh haka. Engvanga min ngaihnêp hmêl taka awm ziah nge maw anih le, min hrechiang hauh lo lehnghâl.

A kawr bân chu hlimin a tih tum ka lo en renga, chutah a bân puam aṭanga thi rawn chhuak leh a sir vêla thi khang tawh lo awm nuaih chuan hlauh lam pawh a tilang tawh lo. Ka hnaih nghal ruaka, a kak ruah chu ka hmu chiang lutuk, a thûk viau tih ka hre bawk nên dim tê chuan ka khawiha.

“Ana viau em? Engtin nge i tih nata” tiin amah chu ka ena, a ni erawh in a ngaih holam hmêl viaua, a na pawh a tih hmêl loh. Ka chêt dân chu min lo en reng ringawta, a hmêl chu a dam dap mai bawk.

“Na lo e, min ṭhui sak turin ka duh che. I thei ang chu tiraw?” tiin a bân chu a rawn lek zauha, a kak thui bawk si ka tha a khûr thei hial mai. Hmuh nuam ani hauh lova, mahsela ka tih ngei ngei a ngai tih erawh ka hre chiang viau thung.

“Tikhan lo awm lawk rawh aw, ka hmanrua leh damdawi vêl ka va la lawk ang” ti sapin ka room lam chu ka pana, bakcheh leh a hliam ṭhuina tur hruai vêl chu la zung zungin ka chhuak lehnghâl vata, a ni erawh in ka chêt dân vêl chu min en renga. Hrelo ang mai chuan ka awm lui tlat thung, a rûk tak erawh chuan ka ṭha tih rûk em em in min han thlir reng chu confi taka awm chu a har ve em em thunga.

“Khawi maw i kut kha, a na deuh dâwn ania aw, engtia i tih nge ni reng renga?” tiin lapua ah chuan ka damdawi chu tat in a hliam lai vêl chu ka hruk sak hliau hliaua, ka chhêm pah hauh hauh bawk. A nat viau ka rin laiin a ni erawh a rum chhuak hauh lova, ka tih ang ang chuan a dawh tawp ringawta, a tuarchhel tâwk hle tih a hriat bawk.

“Vawiin chu i khua alo har em?” tiin amah zawk chuan min rawn be hmasa leha, kei erawhin a hliam ringawt chu tihsual palh hlau tak chung chuan hriau ah chuan ka chu han thilin dimte chuan ka ṭhui sak zuia, keimah zâwk ka ner sawk sawk mai. Ana dâwn tih ka hria, a thau a lang ti tih lehnghala, chu ringawt pawh chuan ka tha a ti khûr, hetiang a hnaia han hmuh meuh chuan kei ngei tân pawh hmuh a hrehawm.

“Ka zawhna kha” a rawn tileha, a kut ka ṭhui mêk chu ngaihtuah ang pawhin a awm lo “Har love, Mawii a rawn lêng a, bâkah khawhar ka hre vak lo” ka tih lai chuan “Min lo ngai em?” a rawn ti chu ngaihtuah chiang mang lo chuan “Aw...ah...ka tih, ngailo, engah nge ka ngaih ang che” ka ti deuh nawk nawk chu a lo nui suk suka.

Ka chhân dân chuan a tihlim pawh a niang a hmel chu a nung sara, ka chhânna chuan a tihlim viau pawh a nimahna, kei erawh ka rilru chuan ka inhau ru mawlh mawlh mai. A hma lahin ka chhâng sual tawh bawk nên he pa hi ka hlat a ngai tak tak tih ka hria, ngaihzâwng a nei lehnghala, hetia min fiam min fiam hi ka duh miah lo, bialnu nei reng si a min beisei hi a mak ka ti.

“Nui reng suh, tin, ka sawi tawh kha. I ngaihnêp tur ka ni miah lo a nia aw, hmeichhia chu ilo ngainep viau pawh a ni theia. Khâng i hmeichhe hriat ṭhin ang kha ka ni ve lo, min fiam reng hi duhtâwk rawh” tiin a mitah chuan ka melh kara, a ni pawh chuan chiang zet hian min ena, a ngaihtuahna tur awm ang hre lo mah ila ka thusawi a lo dawnsawn dânah chuan a ngai thutak lêm lo tih ka hria, hei tak hi ka ngei zual chhan a ni.

Eng thu pawh sawi ila a ngai pawimawh duh hauh lo te hi ka huatpuia, hmêlṭha ka ti reng thei erawh keimah ka inhaw zual bawk. Mi ngainêp em em tu ka haw pumhlum theilo pawh hi ka in haw bawk.

“Ka ngainêp hleinem che, ka hmeichhe duhzâwng tak i ni te pawh a ni mai thei a sin, ka fiam kual lo che a, ka zâwt mai che a ni zâwk. I ngaihtuahna ah khân thil nilo lam hlir dah lo la, ka kut kha ṭhui phawt teh” a rawn ti dam dapa, ka thusawi kha haw âwm pawhin a lang lova, a hliam chauh chu a ngaihsak leh tawh tih a hriat hle bawk.

Engang mizia fako nge a neih anga, eng rilru chiah nge a put tih pawh ka hrelo va, chutih rual erawh chuan mipa sual zawk zawk chu a nih ka ring bik ta loa, Sawma te thusawi chu ka ngaihtuah chhuak zawka. Mahsela an sawi ang zia kha tûnah rih chuan amahah hian hmuh tur ka la neilo. 

“Ka zo e, a dam fel hma chu i kut lehlam hi chuan engmah rit chawi pui lo la, a ṭhuina kha a peh a nih chuan a dam har dâwn a nia. A pûn vaih chuan a pawi viau ang” tiin ka tuam sak zui mawlh mawlha, ka ṭhui lai pawha na ti thâwm a chhuah miah lo te kha a mak ka ti a, damdawiin ah ka na avâng te ka chhûng te avâng te in ka lo awm ve foa, hliam ṭhui ngai te pawh ka nei ve ṭhin, a nat zia ka hria a. A ni kah hikna pawh tel miah lova thâwm a chhuah lo kha mak ka ti lo theilo, chutih rual erawhin a ner sak sak erawh chu ka hmu ve tho va, a luhlul ang bawkin na tawrh pawh a huai tih a hriat mai.

“Min ngaihtuah ve deuh tihna em ni? I in a fâl si a, i hlau viau lo maw?” rawn tiin a ṭhut dân chu a siam rema, a hnathawh kawr a chung zâwk chu a phelh zuia, ṭhutthlengah chuan ṭhu in a hliam chu a en vang vanga, a ner deuh sawk chu ka hmuh hmaih lo, a hliam chu pawi ti hmêl te pawh a pu.

“Engtin nge i inhliam reng renga, a thûk bawk si, khatiang hliam kha ka la ṭhui ngai miah lo lehnghâl” tiin a zawhna pawh chhâng duh lo chuan thil dang chu ka sawi pui ta daiha, khatiang lam sawi pui vak kha ka duhlo, a bialnu takngial pawh ka la hmu va, mi ngaihzâwng nula leh tlangvâl in biak anga lo biak ve chu ka tih tur a nilo tih ka hre chiang viau mai.

“Ka sa chânna lamah mawle, ka hnim sâmna lamah ka tlu palha, ka chempuiin a at a nih hi” tiin a ngawi zui daiha, kei erawh chu ka lo ner sawka, a sawi zâwng ringawt pawh chuan ka ṭim uai uai thei. Ka ti a tiza tlat nia.

“I ti hlauhawm emai, fimkhur ve tur che a lawm. Kha ai zai thûk phei la chuan i bân tha a chat ngei ngei ang, a hlauhawm lutuk” ti a ka ṭawng mawlh mawlh lai chuan a lamah ṭhu turin min pawt thuta.

A sirah chuan mawng sawh dawt hian ka ṭhu a, a na ngei mai. Rum zeta ka lo en lai chuan “Min ngaihtuah deuh em ni? Ka inhliam ilo phal lo reng te hi an nilo maw” tiin a nui haka, a nuih zâwnga a ha var rual ṭhat lang te, a hmui khabe phîr ṭhaih mai te pawh chu ka en renga, a ṭhat hi chu a ṭha a ni ti a ngaihtuah neuh neuh chung hian ka inthing harh zui thuaia.

“Min fiam reng suh, a hrim hrimah i bialnu ka khawngaih, hetiang hian hmeichhe dang i fiamin mi i bia ania. I bialnu nih chu a hrehawm viau ang” tiin a kut chu ka thin thlâk saka, a na lai ka khawng palh nge a rum nghâl haka, ka inthiam lo viau nângin engmah ka sawi duh ta lo.

A kut chu en zauhin “A hrehawm leh hrehawm loh hre turin ka zûna uai ve kher i duh em ni? Tin ka bialnu a ni a, ka nupui a la ni hauh lo tih hria la. Engpawh chu nise zanin a tân chuan i thin a rim leh tak tak hma hian ka haw phawt ange” tiin engmah sawi tawh lo chuan a ding chhuaka, a mah a sâng bawk nên ka en chho haw mai.

Min melh leh zawk hian ka hriat theih loh tur hian a phun sapa, pâwn lam pana a kal chu ka en zui reng bawk. “Muttui aw” tiin rawn hawi lêt map tawh lo hian a chhuak zuia, eng in nge min mawlh pawh ka hrelo, zui ka châk tlat bawk nên thâwm nei lo thei ang ber chuan ka sumhmunah chuan ka va ding chhuak ve a, a kalna lam chu ka en nghal vat bawk.

Chutah kawmchhak kawngpuiah chuan lo dingin zân thla eng kulh lam chu a lo thlir vang vanga, a chhak aṭanga street light êng chuan a rawn chhun pha deuh bawk nên a hmaifang chu chiang vak lo hian a langa, shmêl ka hmu thei lo nângin a awmdân chuan mak min tih tir viau mai. Che lo chuan a ding renga, a mei zial chu hip kawkin a khu chu vanlam hawi chuan a chhêm chhova, Thla chu thlir rengin chutah “Hey khuanu, ka neih theih loh tur leh ka chelh theih loh tur min vawn tira, min duh tir dâwn ai chuan  tûmah ka nunah rawn tir lût tawh suh aw” tiin a in her zui ta nghata, hawi pawh hawi chhuak tawh lo hian a kal liam lai chu ka thlir zui renga.

A ṭawngkam chhuak tin chu ka ngaihtuaha, kei min hmuh avânga sawi a nilo tih ka hria. Pâwn light ka chhi lova, min hmuh ka ring lo hrim hrim bawk, engvanga khatiang thu kha sawi nge a nih anga, bialnu nei ti si a engvanga a bialnu chungchâng sawi miah silo nge a nih? Tûnah khân a bialnu chungchâng a sawina tur âwm ang thu pakhat mah a chhâk chhuak lova, chumai nilo in a aw ah khân tawrhna ka hriatpui thei. 

A nunhluiah eng chiah nge a lo tawn tawh ang? Sawma te ho in a nuna bumna nasa tak leh hmeichhia a rin theih tawh lohna tur khawpa ti chhe tu chu tunge tih hriat ka châk takzeta, chutih rual erawhin a mah zawha, a chanchin ngaihven nih chu ka tum hauh lo thung.

Ka lo ngaihven ve vak tur pawh a awm lo bawk, ngaihzâwng nei lai a ni a. Ka lo ngaihven vak khân ka tân sawtna a neilo, keimah ka in dah hniam mai maia, a rûka ka duhna ka lan chhuah tir a nih chuan a ni ang mi puitling tak tawn hriat lo ngah tawh chuan a hai dâwn lo tih ka hria.

In chhûngah chuan lût vatin kawngka chu ka kalh zuia, ṭhenawm te thâwm pawh a reh vek tawha. Helamah chuan zân mengrei tak an awm lova, chhûn lama hna hahthlâk tak an thawh ṭhin vâng nge dar 9 a rik hi chuan thâwm hriat tur a tam tawh hauh lova, an reh duak tawh ṭhin.

U Rinpuia hliam ka tih faina vêl chu dah ṭha in lapua ka hman tawh thisen kai nuaih chu bawlhhlawh bâwmah chuan ka paih zuia, a hliam kha a tih nat belh êm lovang chu maw? Naktuk lam te kha Sawma te ho khân feh kha an ti si a, khatiang chung kha chuan hna a thawh theih ka ring hauh lova, a thawk lui a nihchuan a luhlul tâwk hle ah ka ngai ang.

Hmunte chu phiat leh te te in ka hliam ṭhuina hmanrua ho chu ka room-ah chuan ka keng luta, ka dahna ngaiah chuan dah ṭha in khumah chuan ka ṭhu a, chutah ṭawngṭai phawt ka duh avâng chuan ka kut hmalama suihin ka ṭawngṭai zui ta a.

“Lalpa, tûn hun thlenga min hruaina avângin ka lâwm a, ka nunah harsatna te hneh zêl thei turin min pui la, mite pawi ka sawi palh theihna lakah min vêng la, ka tâna ṭha lo tur thil chu min lâk bo sak ang che, ka hmalam hun pawh i hnênah ka rawn kawltîr che a, midangte min sawisêlna tur neilo a ka awm theih nân ka nun min hruai sak la, chutih rual erawhin sawisêlna tuar dama ngaidam thei turin keimah min ṭanpui ang che” tiin ka ṭawngṭai zui dap dapa.

Ka ṭawngṭai zawh chuan ka mu zui a, rei pawh meng tawh lo chuan ka muhil zui ta thuaia.

Ka mutui lai chu inhau thâwm bengchheng zet avâng chuan meng chhuakin ka ṭhu zuia, ka mumang emaw ti a ka ngaihthlâk vang vang lai chuan mumang a ni lo tih hriat tak hian ka kawmthlang lamah chuan nutling leh patling aw hi a rawn chhuak zuia, hmeichhe rilru na ṭap ri chu ka hriat hmaih lo.

Ka kawmthlang te nên hian kan in hlat lêm lova, an thusawi pawh chiang takin ka hre thei ta “Ran kan vulh veka, mahsela ran â chungah lehzêl kut in thawh duh mai hi pu Fel in van mak em em ve? Mahni ran ṭheuh chu kan hmangaih ve a sin” tiin nu pakhat chu rilru na tih hriat tak hian a rawn ṭap ti tiha, eng tak chu thleng nimaw? Zîng kâr kârah chutiang buaina a rawn thlen chu ka lo ring pha lo hrim hrima.

“Kan thlai a pet kawlh nasa lutuka, ka vaw mai anih kha, mi tâna hnawksak lo tur ran te vulh ve ta che u” mipa puitling thinrim aw hian a rawn ti zui ṭhawt ṭhawt a, amak ka ti. Mipa lehnghâl in chutia hmeichhe âwm nêm zâwk a vin tawn tawn chu a pa loh thlâk ka ti a, ran te chu an â a, chutia kut lo thlâk sak kher pawh chu an timak ka tiphian mai.

Ṭhu chhuakin ka room tukverh aṭang chuan thlang lam chu ka thlira, chutah Kêl ruang lo let ngat leh a bula nutling pakhat rilru na taka lo in dawm kûn ngawt ngawt chu ka hmu zuia, a mittui a hru zauh zauh pawh ka hmu chiang viau mai. Chutia thihna hial a thleng chu mak ka ti lehzual, ka kawmthlang pa chêt dân chuan kei ngei pawh mak min tih tir bâkah mi ranvulh lai êm thlai peh palh avânga a vaw hlum duh chu a mak ka ti a ni.

He khuaah hian ka awmna a la rei hauh lova, chutih rual erawh in thil mak tak tak ka tawng ta fo dâwn hian ka hria a, ka awm rei thei meuh angem ka hrelo. Khawpui lamah pawh khân awm ve bawk mahse a hmunah ka hmu ve ngai lêm lova, mahsela helaia ka mithmuh lai ngeia ran inthahsak an awm mai chuan min ti ham haih ve tlat bawk.

“I thinrim viaua i huana lût lo tur i duh a nih chuan ṭha deuhin kan hnênah i rawn sawi thei a sin maw. A hrui a lo ti chat palha, hetiang êm a nunna la tur khawp hial sual hi a lo khawih a nimaw?” tiin nutling zâwk chu rilru na tih hriat tak hian a ṭawng chhuak leh sap sapa, ka lainat takzet.

“A hnawk ka tihchuan a hnawk tihna a nimai, ka ninna hi a rei tawh. Engvangin nge in enkawl sên loh tur chu in vulh rêng ni” chupa lah chuan inthlahrunna nei map lo tih hriat tak hian a la ti zuia, a zia chu ka ngeih loh chi tak lehnghal, a thilsiamte enkawl turim Pathianin mihring min ruata, chutah kan duhzawng leh ngainat zâwng ṭheuh vulhin kan chêng ho va, midang ran han hmu thei leh miah silo te ai bâka ranvulh peih tho si hi an awm khât viau ang.

A hmeichhia zâwk chuan a chhâng leh dâwn emaw ka tih lai chuan an piahlam aṭang chuan patling râwl pawr a rawn chhuak ve zuia “Fela, khatiang sawi hauh suh aw. In bâwng leh Lâwi vulh lai kha ngaihtuah lêt teh le, eng zât a tam nge kan huana kan fu an peh kawlha, kan huan thlai an peh chhiat tam zia kha i la hria ang chu maw? In hmuh loh lai pawhin nise kan ûm chhuah sak cheua, lei chawi tir cheu emaw, talh sak che kan nei tawh em? I hre hauh lovang tiraw? Tûnah Vawk pâwn chhuak theilo i han vulha, ilo in luling ta a nimaw? Ran hi kan vulh an nih loh avâng leh midang ran an nih avâng hian hmu theilo bîk tur kan ni em? I ran vulh tam lai ngaihtuah lêt miah lova i han awm chu le, i ranten kan thlai an peh zât ang kha, kan ran te hian an la pet hauh lovang tiraw?” tih ri chu rawn chhuak veleh in kawmthlangpa pawh chuan chhân dân tur a hre tawh lo nge a ngawi ta kara.

Kei erawh chuan en duh tawh lovin ka tho chhuaka, mi inhau lo en reng thu awm suh. Min rawn hmu fuh a nih phei chuan a zia lo viau ang, ka hmai te chu phihin ka ha ka nawt zuia, phone ah chuan hla playin rawng ka bâwl san ta daih bawk.

Mi in hau ri lo ngaithlak reng kha a mawi lo ka tia, bâkah ka zak. Hawk dâk lutuk ang maia awm kha ka duh lo bawk, rawngbawl pah chuan ka hla play chu ka zai pui leh rat rat tawha, zai hi nuam ka ti bawka hla pawh ka hre tam viaua, ka hriat tam ang hu erawh chuan ka zaithiam leh chuang hauh lova.

Feh ka tum ve avâng chuan hma takah chaw chu ka ei zui ta thuaia, kawmthlang lamah in hau ri pawh a awm tawh lova, ka thaw huai mai. Mi inhau ri hriat hi nuam ka ti ngai lova, keimahni inchhûng ngeiah pawh ka nu leh pa an in hauh tawh hi chuan hrehawm tihna in ka khat ṭhin.

Dâr 8 vêlah chuan kawmchhakah thâwm a rawn awm nak naka “Zoi i hman em?” Mawii chuan min rawn ko lâng lâng a, keipawh chu tho chhuakin pâwnlam chu ka pana, Sawma te ho bâkah u Rinpuia pawh chu ka hmu zuia, feh luih a tum ta tak tak a nih hmela, a nat te chuan inah awm ve mai tur a nia.

“Ka hman e, kawng hi ka han kalh anga ka hman animai” tiin ka in kawngkhâr chu ka kalh ta zung zunga, an ni pawh in kawmchhak kawngpuiah chuan min lo nghâk ve ṭhap bawk. 

Hmanhmawh zet chuan ka pan chho va, “Khate zawng kha em ni i ken leh dâwn?” ti a ka bag an en chu ka bu nghata, ka tiffin bâk a awm lo hrim hrim. “Hei bak ken tur ka hre lo a lawm, bâkah tuthlawh vêl pawh ka nei lo” ka tihchuan hrethiam tak hian an lo bu nghat nghata.

“Kal tawh ang u hmiang, kan tlai lutuk ange” u Rinpuia chuan a rawn ti supa, a bân ka tuamsakna ka en chu a lo la in tiam ṭha viau mai. Thu chu a âwih ve tih a hriat a, chu chuan a rûkin min ti thaw huai mai. A kut chu a tihnat belh ang tih mawlh ka hlaua, ngawi renga a hnung lama a kal chu ka en leh zeuh zeuh ṭhin.

Midang chu titi ho nak nakin Mawii leh Faka erawh an inhnial leh ṭan der tawha, keipawh an inhnial ngaithla in ka nui ve leh hak ṭhin. A châng leh an in chum leh ang awk awka, an awmdân chu a naupang chhia viau hian ka hria a, chutih rual erawh chuan kal kawng tireh lo tu pakhat chu an ni chianng alawm.

“I bulah hian ka awm peih tawh lo, hmeichhe biak dân leh fiam dân pawh i hre silo, i ṭawng thei em em ringawt” Mawii chuan tiin a kalsawn deuha, Faka hlat deuh takah chuan a kal nghal bawk.

“Awm rawh pawh ka tilo che, i pa ṭeng ṭung si bialpa pawh i nei thiam ve dawn em ni? Patil i nih kha, ka..” a sawi zawh hma chuan Mawii chuan lei nawi chuan a vawm nghal zauha, Faka chu lo phun hlukin a in nuai nawk nawk mai 

“Chunu mai mai chuh! Ka kilh hrep dawn emaw ni?” tiin Faka chu a phun zui bul bul a, Mawii lah chuan hlau lo zet chuan a chho melh ve ar bawk.

“Nang ni pahnih hi naupan lai aṭangin hetiang ngar ngar hian in awm maia, in hauh hi ngaiah in neih tawh a nih hi. In inhmuh loh chuan in in ngaia, in inhmuh leh in inhnial leh bawk sia, in ngaizawng tawp ula a ṭha” Mama chuan lo tiin an pahnih chuan mit a siai zuk zuka, an ni pahnih lah chuan an han duh lo em em khawpa, an hawi tau dûn hmak hmak mai.

Nui sen sen chuan ka en renga, chutih lai chuan u Rinpuia chu ka bulah rawn kalin mi pawh en lêm lo hian “Nizan chu i mutui em?” a rawn ti sapa, “Um nang zâwk” tiin hmalam ngawt chu ka ena, han biak vak dân tur hi ka hre ṭhin lo, chubâkah kan inkâra thil thleng a vâng pawh khân hlat hrâm hrâm a ni ka tum ni.

“Keichu ka mu tui khawp mai, i mumang ah min hmu lo em ni?” a rawn ti zuia, a mah chu ka en zawka. A hmêlah chuan nui hmêl a rawn lang leh tawha, a mitmeng chu a nung sar bawk.

“Hmulo, ka mumanga ka hmuh tur chu ka tâna mi pawimawh fe an nih a ngai, a hrim hrimah i hliam nên inah engvanga awm mai lo nge i nih? I tih peh chuan ka ṭhui sak tawh hauh lovang che” tiin a bân ka tuamsak chu ka en zawka, ka ti tak tak. A hliam kha hmuh a nuam miah lo, khatiang ti reng tur kha chuan ka thei pawhin ka ring lova, chutih rual erawh chuan ka hna a nihna ang erawh chuan tlanchhiat emaw ka tum hauh lo.

“Hna kan la khawih dâwn lova, engtin mah a awm lovang, min ngaihtuah deuh em ni? Keichuan ka mangah ka hmu che a sin, nuisâng hian ka kiangah i lo awma. Nangmah i ni lo emaw ka ti hial mai” tiin a phun sapa, a thusawi chu a timai mai lo tih ka hria. 

Tinge hepa hian bialnu nei reng chung si a hetianga ka lakah a awm tlat le. A bialnu lah chu ka awm hnuah hian vawikhat mah ka la hmu lova, bialnu nei si ah chuan a ngaihsak lo hle hian ka hria a, a bialnu tur rilru ka ngaihtuaha. Hetiang chung hian engtin nge a la nihpui reng peih ka ti, a bialnu chu hmuh ve pawh ka châk hle bawk.

“I mumang a nih chiah chu, u Rinpui i rilru hi ka hrethiam miah lo, bialnu nei reng chung chuan min ti buai suh ka tih tawh kha. Mi inkar tichhia a, inrawlh duh tur khawp chuan hmu zo lo ka ni bik hauh lo a nia aw, keichuan” ka sawi zawh hma chuan kan hnung lama aw rawn awm avâng chuan ka ngawi zui ta daiha.

Min rawn be tu chu enin ka nui nghal sanga, ka thawhpui tur, nu Kimi fapa Rintluanga chu a rawn lang zui zata, ka bulah rawn ding chung chuan “I feh ve dâwn em ni?” tiin a nui sanga, a hmêl hi a nelawmin ka hmuh tirh aṭangin keipawhin ka ngaina nghal mai, “Aw feh ve dâwn a nih hi, lo ka la hmu siloa, hei ka zui ve tawp mai” tiin ka nui hak haka.

A ni pawh ka ruala kal ve in “A nihchu, i duh chuan kan lo ah pawh i feh ve thei tho a nia aw, ka rualin i feh ve thei ania” a tihlai chuan u Rinpuia chu a rawn ṭawng chhuak khauh a “A feh duhna takah a feh tawh hi, lo sâwm kawi i tum tihna em ni? A duh lovang” alo ti liam puata, a hmêlah chuan thinrim hmêl te pawh a pu a, a rum al mai. Nichina min biak laia a ze dam dup reng kha hriat tur a awm tawh lova, kal chak thutin  midang chu a va lehpel veka.

A chêt dân mak leh a mize dang thut avâng chuan ka en zui vang vanga, engvanga khatia awm teh thut nge a nih le. Midang kârah lehnghâl, khatianga ka laka awm tûrin a enga mah ka nilova, chutia Rintluanga ka biaka ka kal pui avânga a danglam chu mak ti a, engvanga ka lakah thikthu chhe ber âwm dân anga awm nge a nih le, tiin ka in ngaihtuah neuh neuh va.

“Zorina chu ava mak fua fua ve, ka rawn bia che hi a lâwm vak lo a nilo maw?” Rintluanga chuan a rawn ti sapa, ka mitah tak chuan a melh kara, u Rinpuia awm dân chu a mak êm lah taka, Rintluanga hmêlah chuan min ringhlel tih ka hre nghal mai bawk, Ka dâr chu sân akin “Kan kal muang a ti a niang chu, midang hmaa kal a duh te pawh a niang” ka ti liam puata.

Ṭawng leh a tum lai tak chuan in chûm ridawp ri a rawn chhuah avâng chuan Mawii leh Faka lam chu kan en ṭhapa, Faka chu a hnung dawmin alo er ngawng ngawnga, a hmêl chu a ner nawng mai, a hmai sen ṭalh ṭalh aṭang chuan ana ve viau in ka ring.

“Lalnunmawi engvangin nge kut min thlâk? patil i ang si” a ti chhuak hul haka, Mawii lah chuan rum mang kheng hian ala en bawk. Inhlau miah lo tih hriat tak hian kal pah si chuan an in melh ram rama, midang ho lah chuan chutia an awm kual chu ngai pawimawh hauh lo hian an lo nuih ṭhaw hlawma.

“Phungpuinu ka ni bik em ni? Nangmah in a nih kha mi nam bu lâwp hmasa tu chu, patil ka an pawh leh ka ni chuang lova enga tân mah ka ngai lo. Tuai i an thu ka sawi ka sawi bik loh kha” Mawii chuan lo ti ve in Faka hlat a kal tum chuan a kal chak sauh va, Faka lah chuan a va ûm lui leh ngat bawk. Mipa a ni bawka kal chak ang zâwng phei chuan Mawii chuan ter pha lo tak a ni.

“Kha in pa khân a hlat rei thei lo che a nih kha, i zûnah lo uai tir nasa rawh, kan in lâwm phei chuan pakhat tal in in ngaihzâwn a ngai. Runluih tur in awm dâwn lo tlat” Lalrina chuan lo tiin midang chu kan lo nui hak a, an ni pahnih erawh an kawng kal pah pawh chuan an la in beng tawn reng peiha, a lehlamah chuan in ngaizawng titau inthlêm te pawh an ang hle lehnghala.

“Engtikah mah a zûnah khan ka uai ngai lovang, in duh duh sawi ringawt suh u” tiin Faka chu a au ti tiha, midang lah chuan an ngai ho hle tih a lang chiang viau thung. Keipawh ka bâng biklo, min dema kan huat viau leh a mimala kan hnial peih deuh hi kan vei duh viau an tih kha.

“Kan huat deuh leh midangin min chhaiha kan thinrim ṭun hi chuan eng emaw hi a awm tihna” ka lo ti ve chu an ni pahnih erawh chuan an ngaihsak tawh lo. In kal chak siak hian hmaah u Rinpuia ang mai chuan an kal vâwk vâwk a, ka nuih an tiza. Pakhat lah titauh avângin min kalsana, tûnah pahnih te inhnial avângin an in kal chak siak bawk, kan chhangchhiat hmêl riau te hian ka hria.

A lehlamah erawh chuan feh kawng ringawt pawh chu ka tân chuan thil thar a niin ka hlim em em thung, Rintluanga lah chuan sawi tûr a hre phian a, zawhna eng emaw leh ka zirna chungchâng te chu min zâwt paha, a ni pawh tûnah hian Police lam a try mêk tih ka hria a, a tlin ngei pawh ka ring.

Amah a hleitlinga, lehkha a thiam hle tih pawh ka hria, “In lo a hla em?” tiin ka thlan chu ka hru zauha, ni a sa bawk nên lum tak a ni. Kalkawng lung chu chhir pah hian a aw a thian kharha “Hla lo ve, keini phei chu a hnai ber kha a nia, chuvang ania lo feh rawh ka tih che, i duh chuan midang hi ka biak sak thei che a nia” a rawn tihchuan ka lu ka thing nar nara.

Ka chhâng dâwn chiah tihah engtik laiin nge a lo din ni, u Rinpuia chu kan hmaah a lo ding reng tawha. “Kan lâwm zîngah a tel dawn a, lo sâwm hran kha tum lo la a ṭha in ka hria” a rawn ti chu Rintluanga zâwk chuan a melh deuh khera “A duhthlanna a lawm, chutah chuan sawi theih i nei hleinem. Lo pawh an nei ve lova, a duh duhnaah feh thei turin zalenna a nei bawk. A hrim hrimah i va hauh reng reng ve, i bialnu in a hria em?” Rintluanga chuan a ti ve saka.

An insual mai te pawh ka hlau hnuhnawh viau mai “Ilo buaina tur a awm lovang, Hmingi khapa bulah khân nge kan bulah chuan i tel dâwn?” tiin keimah chu min en ta daiha, engtik laiin nge midang ho pawh an lo din ni. Ka lam chu an hawi ṭhapa, tûnah hi chuan tuboh leh dolung inkârah ka awm ni ber in ka hria, mipa pahnihah duhthlan tur nei ang mai ni hian ka inhria a, ka zak bawk si, Mawii leh Faka pawhin inhnial tawh lovin min en ran mai.

“In bulah a niang chu, a tir aṭangin kan sawi sa a lawm. Mawii bulah ka feh dawn” ka lo tih tâkah chuan midang chu an lo thaw deuh huaia, Rintluanga bula ka awm pawh chu an hlau viau emaw ni? An in ngeih lo a nih ka ring rum rum mai, chuti nilo se hetia an awm ṭhap hi ka ring lo.

“Kal vat ang u, intihbuai lam chu ngaihtuah lo ula, Hmingi pawhin a duh chu a sawi tawh kha, kan tlai zel a nia kawng a la thui si, i hmanhmawh ang u” Sawma chuan rawn ti ve in engmah sawi tawh lo chuan an kal zui leh maia, kei erawh ka ṭawng tawh mai lo.

U Rinpuia awm dân te, Rintluanga awm dân te chu ka ngaihtuah a, keimah avânga an inhnial leh an in melh dân avâng khân ka awm a nuam lo ve ringawt bawka, eng pawh chu nise tu ta mah ka nilova, ka lakah thunei turin tumah thuneihna ka pe hek lo, ngaihtuah zui duh tawh lo chuan midang chu ka umzui ta thuaia.