DUHLAI ZORINPUIA CHAPTER 8

DUHLAI ZORINPUIA

CHAPTER 8

Kawngpui kan chhuah chhoh lai chuan naupang ti ila tleirawl ṭan ek ek tawh mitthi buhfai leh thing khawn ho kan tâwk a, u Rinpuian min pua chu min en duh hlawm khawp mai. Pakhat tê chuan min rawn panin “Au Zorin, i bialnu em ni? Tinge in in puaka” a rawn ti ta reuha, an la tê ve tak nângin an fel ka ti viau mai.

Êm an phur ât a, mipa naupang nên an inzui ve bawka, ka nuih var var mai. “Um a ke a na a, ka pua a nih hi, in va fel ve. In nulât hunah pawh khatiang kha ni reng rawh u aw” u Rinpuia chuan lo ti ve in an in lam chu min pan pui leha, kal kawnga kan mi tawh apiang lah chuan an lo fiam ṭhin bawk nên keimah chu ka lo zak zâwk.

An in kan thlen dâwn chuan ka zâm leh viau tawh, a nu leh pa hmaah ka che chhe ngun lutuka a nuam pawh ka ti chiah lo. Tunah pawh an rawngbawl sa ka ei leh dâwn chu ani si a, “Nu kan rawn haw e” tiin in chhûngah chuan min luh pui zuia, a nu pawh a rawn lang har lo.

Min rawn pan vatin ka ṭhat leh ṭhat loh te chu min lo zâwt zung zunga, keipawh chuan tawi tê tê chuan ka chhâng ve zel bawka, “Kha in rawn in ru haw thei maw, theihai rûk in bul in ṭan a, artui in inruksak leh a. Kan fapa pawh hi min rûk sak leh lo ang tih pawh a hriat miah loh maia” a pa lah chuan a rawn ti zuia, mi mah zah sa nâk alaiin chutianga min rawn ti chuan zah a ti zual a, ka ṭhu ngawi kar ringawt.

A fiamthu mah nise theihai rûk kher kher kha chu sawi a nuam miahlo “Maw? Artuia? Enge a awmzia?” a nu chuan a rawn ti ve a, a la hrelo a nih hmêl. U Rinpuia chu ka en ringawta, a ni erawhin a nu chu enin “Mingmingi hi a khua a sik nasa lutuka, a taksa chau nên ka ngaihtuah si a, i artui khâwl ka ken sak a nih kha” a ti ta supa.

Kei erawh awm nuam lo deuhin ka lo awm tawha, a nu chu a thinrim ang tih ka hlau viau bawk, “Aw a lo nimaw? Tinge engmah i rawn sawi loha, chu kan hriat lohin na ilo tuar reng a nimaw? Hetah lo ṭhut pui rawh” tiin an sofa lam chu a kâwk a, u Rinpuia pawh chuan min dahthla ve mai bawka.

“Zanin pawh mitthi in lam chu ka riak rih lo mai ang, a khaw sik a awm leh chuan a buaithlâk. Ka u riak lût mai rawh se, nu tuilum kha lo chhuang teh aw, a ke saw kan hmeh leh loh chuan a chiloh” a ti zuia, a nu nên an in biak mawlh mawlh laiin kei erawh ka lo ngawi kar thung.

An inchhûng hi ka kal hmasak khân ka hawi kual ngam lo nên khân ka lo en vak lova, thingtlâng inah chuan a nuamin a changkâng viau mai. Thil reng reng chu a in rem fel thlap bawka, u Rinpuia unaute hi an in dang vek tih ka hria a. A nu leh pa hi an fel viau a nih ka ring, u Rinpuia pawh a ni mai thei bawka.

Ka hnunglam bang ka en chu ka meng kâwk kâwk mai, u Rinpuia chu ka va melh zawka. English te khân ka lo inti be ve chiam a, keiai a zir sâng daih zâwk tih ka hnunglama chawimawina a dâwn hian a ti chiang zual, lehkha a zir ve tihchu hre mah ila zir sâng tak a ni a ka rin loh avâng khân ka lo hmu eng lo ve deuh kha a nia, tûnah chuan ka zak tawh zâwk.

BA a zo tawha, a chawimawina dawn reng rengah chuan mi lehkhathiam thei tak tih a hriat, distinction ah vek han pass chuan, kei ve kha chu first kha ka pha ṭawk zela, class 10 leh 12 pawh kha ka pass ṭawk ṭawk a nih kha.

“I va en tui âwm ve, bawiha chawimawina dawn ho an nih kha, amah lah hian zir zawm hi a duh tawh bawk si lo a, tihian thingtlâng hna a thawh phah a nih hi. Sawrkar hna lah hi a vâng bawk si a, lehkhathiam tân pawh a buaithlâk a nih ber hi, amah hian tum tak tak se chuan hna chhete te chu a hmuh theih ka ringa, hei a peih tawh der silo. A nu nên pawh kan ti lui theilo a nih ber hi“ a pa in a rawn tihchuan ka bu nghat nghata.

A nu leh pa a ngaihtuah a nih ka ringa, ka ngaisang zâwk. Lehkhathiam tak ni siin mi hmuhah erawh lehkhathiam ang pawhin a awm duh silova, a mak ka ti zâwk.

“Khawi maw i ke kha ka lo phelh ange” u Rinpuia rawn kal hnai chuan ka ke bawk chu a buaipui leh tawha, keiai pawhin ka ke na chu a buai zâwk nimai hria ka hria, chutih rual erawh chuan min ngaihsakna chu ka hlimpui viau bawk si, mipa in hetiang em em hian min la ngaihsak ngai lova, duat taka min enkawltu pawh ka nu leh pa an nimaia, tûnah chuan ka mipa duhthusam chu ka tawng ve dâwn ta in ka hria.

A hma a ka bialpa te kha chu an mahni ngaihsak nih duh si khân kei min ngaihsak lêt na châng an hre ngai tawp silo. U Rinpuia erawh a dang hlak ka timai, a ngaih la tâwk a ṭawng dân a thiamin a aw ka a dam dap renga, mi a ngaihsakin a bialnu ka nih hma hauh aṭangin ka tân a awm reng chu ania.

Ka ke chu a khawih rem tur chuan dah sakin a tuamna chu a phelh zui mawlh mawlha, a la vûng nasa viau mai. A khawih zâwng chuan ana nghal zawk zawka “Ehe kha i ke chu rinai a lo va vûng nasa ve, khawsik lo chi pawh i nilo a nih kha. A sisual hlen ang tih pawh a hlauhawm a lawm” a nu chuan rawn tiin a chek zui tlat tlata.

Ka ke a en zâwng chuan a ner nâng bawk “Nu tuilum kha min lo chhawp sak ta che” tiin ka ke chu u Rinpuia chuan a hmet zui leh mawlh mawlha. Ka in hum ruh leh nasa tawh mai, “A na em?” a rawn tihchuan ka bu nghauh nghauh a “Na lutuk, ka taksa chhûng lam zawng zawng nên hian a na vekin ka hria” ka ti sapa.

A na miaua, na lo tih kha ka tum buai peihlo. A pa chu a lo nui sâng renga “Tikhan in kawl hlen daih ula a ṭha ang, monu hmêlṭha deuh neih te chu ka châk tawh a lawm. A fel viau lehnghala, ka fapa ang te ilo duh hi ka lâwm a sin” a pa chuan nui kur kur chungin a lo ti a, keipawh ka nuih a za ve tho bawk nên na hmêl pu chung chuan ka nui tawi tak tak mai.

“Ka hmêlṭha a lawm, tu hmeichhia mah hian min hnar thei lo ang. Hmêlṭha chu kan heti tlat zêl” u Rinpuia chuan a rawn ti ve khauha, amah leh a thusawi chu inhmeh lo ka ti tak tak. Ka lo nui haka “I zak lo, i hmêlṭha thlâwt lo” ka lo ti chu ka ke a hmehna chu tâwpin min rawn melh a.

“Chiah maw. Ka hmêlṭha lo i ti tak tak em? Hmân zânah kha chuan” a tihrualin a hmui chu ka hup sak vata, hmêlṭha ka ti tih a hre chiang tih ka hria. A pa nên chuan an nui zui kur kura, kei erawh a bialnu anga ka vawikhat lênna a ni bawk nên nuam viau mahse ka zak tello theilo.

“Kha tikhan lo awm rawh u, pâwn lam a saw naupang ho in thil an rawn khawn tlat mai ka va pe lawk a nge” tiin a nu chuan tuilum chu puan nên min rawn chhawpa, a chhuak nghal daih bawk si chu ka en zui vang vang mai.

Mipa pahnihte lahin min tihluih nuam an ti bawk nen keimah chauha hmachhawn chu ka huphurh. Ka ngawi renga, a pa in min tilui zuk zuk reng bawk nên ka ngawi chawi deuh deuh mai, u Rinpuia erawhin ka ke chu uluk zet hian tuilum nên chuan a zut mawlh mawlh renga.

“A dam har viau angem le? Naupai ho training neih pui te ka ngai a sin le. A zia lo e, hetiang chuan ka sawn rih mai a ngai dâwn a nih hi” ka ti sapa, u Rinpuia chuan min rawn en vutin “Sawn rih mai rawh, i ke na chung chuan vâk chhuak suh ka tih kha. A dam har chuan i tân bawk, bialnu luhlul leh thuawih lo deuh neih ka duh miah lo ania” a tihchuan ka hmui ka pet sâwi nâng a.

A ve ngei chuana, tûn aṭang a inla thu nghal êm êm chu a nia, a rinloh dân ang deuhin ka awm lui vak zâwk dawn emaw ni.

“Zorin in awm em? Kan rawn lût” tihri rawn chhuah rualin kawngka inhawng rawk leh Sawma te hmêl a rawn lang zui zata, an rawn ri lût nghâl lawng lawng mai.

“Ehe kha in inru haw em ni? Helam daih daihah te kan hmuh cheu a, Hmingek pasal i nei nghal dâwn der a nimaw? A pawilo fa nei zung zung rawh u, kan pawm châk tawh ania” Sawma chuan a rawn ti zuia, midang chu an nui dar dar bawka. Kan bulah rawn ṭhu in ka ke chu an en laih laih a.

“Ka khua a sik avângin a nih hi, hetah chaw ka ei ringawt dâwn kan inru bawk lo” tiin ka hawisawn hmaka “A hrim hrimin naupai te chu a hrehawm a sin, mipa ho lah hian naupai hi in tiseka, in pai ve ngai lova a hrehawm zia in hre tawp silo, pai ve zawk ula a nia ka tih” ka tihchuan an nui zui leh dar dara.

An inkuah thuak thuak bawka, fiamthu thawh in an nui zui dar dar reng bawk.“Hmeichhia hian pai mai mai ula a tâwk der, Eden huan aṭangin nangmahni avânga hnawhchhuah kan nia. Hrehawm zawng zawng hi in tuar tur a ni rêng ani, Pathian thupêk a ni tlat. In vir dâwk dâwk lutuka eiloh tur tur in ei avângin heti hian hah thi kûlin kan awm phah a nih hi, kan tuar nasa ti reng reng suh u, in huai piap piap lutuka eiloh tur a tih in ei avâng a nih kha” an rawn ti chu ka ner sawka; an va han ṭawng thei tak êm.

“I inla zâwng tilmu lian a nih chu” ka lo tih ṭhat lai chuan ka awmna ka hre chhuak leh si chu ka hmui ka hup chawta, u Rinpuia chuan min rawn en nghâl vat bawk. Kha thil kha sawi ka tum miah lo a sin le, Mafaka Khiangte thawnthu ka ngaithlak vâng vek a ni. Awi! A pawi lutuk! U Rinpuia lah chuan khawi dang mah hawi lovin min rawn melh ngur tawh mai si.

Mama te ho lah chuan “Kha in nu in zâwng tilmu lian a ti che, khatiang ṭawngkam kha engtin nge a chhâk chhuah ngam ni? A zak lo a nia hau hrep teh” an la ti zuia, khawvêlah hian an ngeiawm ber mai âwm e.

Ka zak tawh bawk si, a pa a awm ve reng bawk nen a hrehawm duh ngei mai. A hre dâwn tih ka hrechiang lutuk, ka chal a rawn pen ta fawk mai, ka aiah ṭhat a, ka chal chu ana ngei mai.

“Khatiang engvanga sawi nge i nih? Khawi aṭanga i zir nge?” a tihchuan ka chhâng duh der lo, sawi vaih ila chuan ngaihthlâk a phal tawh lovang tih ka hlau bawk si. Keilah in keimaha ka awm chuan in awm tlei nân ber ka hmanga, ka ngaithla tui bawk nên engmah ka hrilh duh lo.

“Eh! An pa chu a va hlau ve, mahse kha a sawi duh chuang lo a nih kha, Rinpui in nu khân ṭawngkam mawi lo lo a thiam belh zêl dâwn a nih kha. Kha a hmêl en ang aiin a ngam huai zek lehnghâl” Faka chu ka melh rawm rawm mai, an ṭawngthei bawk si, u Rinpuia ka en chu ngawi reng hian min lo ena, ka thaw hak ringawt.

Ka hrilh duh bik bawk silo, “A ho emai, khatiang te chu sawi ṭhan a awm ve a lawm. Ka sawi reng dawn pawh a nilo, in ṭawngtheih lutuk vâng a nih kha” tiin ka insawi khalha, an la nui vak lehnghâl. Ngeiawm lutuk, u Rinpuia pa pawh ka va en chu a lo nui ve vur vura, a va han fuh lo tak.

“A hrim hrimin zâwng tilmu i hmu tawh em ni? Nang hi zâwng te hi ilo ngaizawng vêl a nilo maw?” an thusawi avâng chuan rum zetin ka en a “Hmuh kher a ngai em ni? Miin an sawia kan sawi ve a nimai ni, engah nge chutiang chen chen in sawi ka ning” tiin ka tûm luau a, chuveleh ka lâwm lo hmêl an hmuh tâkah chuan thil dangah an pakai zui ta daiha.

U Rinpuia pawh chuan ka titau chu hria in ka kut a rawn hmer chata, en pawh ka en duhlo. Mi chhan ve reng reng tumlo mai, an ṭawng mawlh mawlh lai pawhin ka ngawi tlata, chutianga hmêl hmuh nuamlo erawhin ka awm bik lo. Ka ṭawng lo tawpa an ni erawh ka thinrim chu hria ang pawha awm duhlo in an in bia a an nui leh vak vak tawh mai.

“I thinrim em ni?” u Rinpuia chuan a rawn ti supa “Rimlo” ka chhâng bûl lutuk chu a ner sawk mai. “Kan haw phawt ange tikhan chance te lo nei rawh u, lo inthlêm lungawi phawt ula khatiang chuan uṭawk lungawilo a ang lutuk” tiin an tho chhuak zui leh ta phak phaka.

Kawngka an pelh rual chuan an thâwm chu a reh zui ta diak bawk “Mingming” rawn ti dût dût tu chu hrelo ang hmaka awm in ka kut ka kuangkuah thana, ka ngei laklawh tlat. Nge mi thawnthu kan ngaithla ve a, thawnthu ngaihthlâk lah hi an ṭawngkam ṭha lo lo zir a awla, an ṭawngkam mawilo deuh deuh hi kan hlimpui leh daih bawk si.

Mi thil uar ve laia khatia in pen fawk zel mai,ka chal te hi a pen kuh vekin ka hria “Thinrim tawh lo la, khatiang hmeichhia in an sawi ngai hleinem, zâwng tilmu chu i hmu tawh em ni?” a rawn ti veleh kher chu a samah ka ṭhâm sak vaka, a pa chu lo nui leh hawkin a kalsawn zui ta daiha, a fate inchhai lai bula awm reng chu a tihchi loh tih a hre ve te pawh a niang.

“Ka duh em em te unau sawi a nihkha, i hriat ve pawh a ngailo. Hmeichhia ka nih avâng enge a pawina, mi zawng zawngin uar bik kan nei a lawm. Mi i hrethiam duhlo” tiin a awm lohna lamah chuan ka inhera, ka bulah rawn ṭhu in a nu leh pa an awm tâk lohah chuan min rawn kuah ta hlu hlua.

Ka tal nghal nawk nawk chu min kuah bet tlatin ka nghâwngah chuan a rawn fâwp zauha, hria ang pawhin ka awm duhlo. Ka ngei laklawh tlat, tha nei deuh chu ni ila ka bin ṭhuai duh ang chu, ka thin a tirim tlat. A hmêlṭha lutuk ka en nin theih loh te chen hian ka ngei zo vek tawh.

“Tunge i duh êm êm te chu? Keilo duh dang i nei a maw? Kei chauh min duh emaw ka ti a sin, chu ka tluk loh mipa an lo awm a nimaw?” thutak zeta a rawn ti chu ka nuih a za deuh tlat “Inla zâwng tilmu ve deuh em ni?” ka ti leh su su chu ka taiah a hmer ta vak mai.

Ana lutuk chu ka ner sawk thei, a ni lah a lâwm lo lutuk chu a tum ta bara “Tu ṭawngkam teh hrep nge? Sawi vat teh Zohmingsang tu ṭawngkam nge?” a rawn ti leh chhar chhara, a aw chu a hlauhawm ta ngei mai. Chhân loh ngam pawh a ni tawh lo a mengrum ropui si.

“Chawnghnuna, i hre velo ang ka pasalṭha thawnthu ngaihthlâk a mi a nia, Chawngliana a changtupa a ni thunga, ka duh ber bawk” ka ti ta chu ho a ti lutuk nge a ner suk suk mai. A lo thik ve em em a thawnthu an ni tih a hriat takah chuan ho a ti viau rêng ang chu.

“I thik chhe lo tiraw?” ka ti leh chu ka dârah chuan a rawn seh zauh va “Sawi vat ta che, mahse kha ṭawngkam kha hmang tawh reng reng suh. Ṭawngkam mawilo i hman phahna a nih dâwn ai chuan ngaithla tawh lo mai rawh” tiin ṭhutthleng nghengchhan nghêng chuan a âwmah min bei tira.

“A nuam ve a lawm, bâkah chhûnah a reh thei sia ka in awm tlei ve na a nia, nang ni lah englai pawhin in rawn lêng hman siloa. Mahni a in awm hrehawm zia hi e, a reh si, mu in min rawn la ang tih te ka hlau zâwk, hetiang em em a reh lo ah feh leh ka châk daih zawk” tiin ka phun zui nâng nâng a.

A ni tak tak chhûnah naupang ho school an kal vek phei chuan khawchhûng chu reh tak a ni ringawt, tar leh nu nau pawm ho bâk in awm an awm silo. Chubâkah hriat lah ka nei tlêm si han lên mai na tur a awm lo nên ka tân chuan mut leh a khât tâwka ṭhut chhuah leh tlawng a nia.

“Thlai an ṭo hunah ka hruai dâwn che a nia, tûn chu mangkhawh nên i chau leh lutuk palh ang. Nakinah fur ah ka hruai ang che, nikhua a lum lutuk tawh lo anga nuam pawh i ti zâwk ang. Tûnah chuan feh leh pawh nila engvak mah lo lamah tih tur nuam ala awm lo va, ina i awm hian a ṭha zâwk a lawm, i ke a na bawka inah awm mai mai rawh aw, zânah ka lo lêng ziah zêl dâwn a lawm” tiin ka samah chuan a chûl hliau hliau a.

“Nia mahse ka ngaihtuah ve che a lawm, nangmah chiah i ni tawh sia. Tinge i unaute hi an in dan vek reng renga, inpui nghâk turin an duh che em ni?” ka zawhna chu a bukpui nghata “A naupang ber ka nia an chhuah kha a ngai si a lawm, bâkah ka lo ti rei ve tawha ngaiah ka neih tawh. Min ngaihtuah reng reng suh, nakinah kan inneih hunah chuan keimah chiah ka ni tawh bîk nâng, kan riak dûn ṭhin dâwn a lawm” a ti chu ka phûr ngei mai.

Ramriah chu a nuam dâwn hian ka hria, ka pasalṭha thawnthu ngaithla nasa nên nawm hmêl ka ti thei lutuka. Chutia a tak ngeia tawn ve chu ka châk takzet, “Tak tak maw? Min nei duh chiah ang maw? Hmeichhe dang te hi i nei daih mai anga, hma hun hi kan hre bawk silo va, keilo i nei ang tih ka hlau” ka ti ta sapa.

A lu a thing nghal nu nu mai, “Hma hun kan hrelo, mahse ka hmalam hunah pawh nang tho hi awm la ka duh, ka hmalam hun zawng zawng kawl tu, ka tâna mi danglam bik i nih hi. Ka nunhlui theihnghilha hmalam pan thei tura beiseina thar min pe tu, mi hlu lutuk i nih hi, ka thlah ngai hauh lovang che“ tiin ka biangah chuan a fâwp zauha. Ka nui nghal seih mai.

“Inṭhen ngai miah lovang aw, keichu ngaihzâwng ka neih chuan ka pasal tur ang hi ka duh tawha. In ngaihzâwnna satliah ang mai mai hi ka duh ve lo, damchhunga ka kawppui ni thei tur ka duha, ka kianga awm renga hrethiam taka min en reng thei tur, midang lak aṭanga in lâk hran nân maia midang nihpui ang te hi ka duh ve miahlo a nia, nangpawh chutiang mai mai tur chuan min en lo la hlim taka awma, chhûngkua din pui a min hmangaih tu tur ka duh” ka ti ve sap sapa.

Kan hmalam hun kan hre lo ang bawkin kan hun kal tawh pawh kan ko kîr thei tawh lova, tûn hunah hian a ni leh keichu kan chêng dûn a, khawvêl pakhat in ṭawm tumin hringnun bul kan ṭan ve mêk bawka, he kan nun bul ṭanna hian tâwpna hlimawm nge damchhunga hriatreng tur natna min hnutchhiah anga, kan natna tur mai hian bul kan ṭan ang tih pawh ka hre hek lo.

Chutia kan lo inpawm lai chuan thâwm a rawn awm avângin kan in la hrang zui thuaia, ka ṭhu ṭha sawk sawk bawk. “In lo zo tawh maw? Hei ṭhenawmnu in maian min lo pe a, an thar hma bik khawp mai. An inhmunah an chîng a, keini pawh hi tih ve tawh tur a ni, tirawh u chaw ei thuai ang u. Hmalaiah khawhar inah te kan va lan ve loh chuan, bawiha lah kal a tum hmêl siloha” tiin amah chu a che zui mawlh mawlha.

Puih ve ka tum erawh an pathum chuan min lo dang vata, ka ṭhulh leh ta tawpa, ka ke chu an vai mai chuan an buaipui a ni ber mai. Ka nu leh pa ka hre chhuaka, an ni chhûngkua ka tawng chu vânnei ka in ti hle a, tûnah chuan nu leh pa bula awm ang maiah ka in ngai, u Rinpuia leh a chhûngte ka tawng kher kher chu ka tân chuan malsawmna a nilo theilo.

Chaw kan ei lai te chuan u Rinpuia sakhi kah rêp an chhûm bawk nên chûng te chu a ti ṭha ṭha chu an vai mai chuan min pe tawna, ka thlêngah chuan a khat titih bawk nên “A ngai tawhlo, ka ngah tawh lutuk. Ka ei sêng lo ang, u Rinpui la ṭhen rawh” ka lo ti ve zung zunga.

“A ho lutuk, a hâng te hi hâwp tam rawh. I ke tân pawh khân a ṭha ania, ramsa hâng hi a hrisela, hâwp ṭeuh rawh. I nu leh pa angin min ngai la, mamawh i neih leh buaina i tawh chuan kan bulah lo sawi vat ṭhin rawh aw, i chhûngkua ah min ngai tûrin kan duh che. Kan fapa nun i rawn thlâk danglam hrim hrim pawh hi i chungah kan lâwm a nia, nupui neih a tum tawh lo emaw kan ti tawha, nupui neiin tu hmêl te hmuh kan châk tawh bawk nên a ni lah hian a ngaihsak tawh der silova, Nunzuali avâng khân kan buai phah hrep a nih hi, a û te hian fa nei ve diah mahsela in hrang chang tawh an ni a, he in chhûng uap lum tur tu hmêl pawh hmuh kan châk tawh a nia” a nu in a rawn tihchuan u Rinpuia chu ka melh zawka.

Min en lo in a chaw ei lai ringawt chu a buaipui a, a nu thusawi pawh chu hrelo ang hmak chuan ala awm zuia, ka nuih a tiza lek lek mai.

“Taka Hmingte school hi i kal duh tawh lo nge?” nu Âsangin a rawn tih leh chuan ka chaw ei lai tawp datin amah chu ka ena “Nia BA ka kal ta lova, hna neih vat kha ka duh bawk sia, a tirah chuan nurse kha ka han training a, tumloh deuhin heti lam zâwk hi ka ni ta nulh a nih hi. Mahse hei damdawiina thawh ai em chuan anuam ka ti, a hahdam thlâk bawk si a, in khua lah anuam. In hrisêl a ni'ang, min rawn pan pawh hi an awm meuhlo, nau nei hnai te hi hriat vat an ngai ang, hotute lamah report pêk ve te a ngai zel bawk si a” ka lo tihchuan a bu nghat nghata.

“Ni e zir sân pawh hi ṭha viau mahsela kan ram angah chuan hna hian min daih bawk siloa, sawipuitu nei ṭha leh mi thil ti thei fate bawk hi hna zawnna kawngah pawh hian a hmu hmasa sa an ni tawh mai si a, keini ang tân phei chuan beisei ngam pawh anilo, bawiha lah hi hna zawng tura kan tih hian min hnial tlata, hei tûnah chuan hlo a thlawh kurh kurh reng a ngai a nih hi. Lehkha zir zawm tura kan tih lah hian min hnial zel bawk si” a tih leh chuan u Rinpuia chuan a aw a rawn thian kharha.

“Ka ngaihtuah vâng cheu a lawm, ka pa nên engmah in thawh theih tawh loh hi. Hetia ka chawlh hi a ṭha zawk, kan nghei bik loh hi maw, rethei lutuk chuan kan awm bîk nâng. A hrim hrimin mo neih i châk thu i sawi i sawia, tûnah lehkha zir tura min duh thu i sawi leh bawk si a, i timak emai. Mo neih vat i duh chuan hei i monu tur hi duat hle la a nimai” a la ti zuia.

Min va ti zak mai mai tak, a pa lah chu alo nui huka. Nu Âsangi pawh a ner nasa mai “Nupui chu nei vat ta rêng che, school kal peih bawk silo, nupui neih tum bawk silo i ṭhian ṭhenkhat te chuan fa nula tlangvâl an nei ṭep tawh” a ti leh hlak hlak chu u Rinpuia leh a pa chu in enin an in nuih vur vura.

“Aw ka fapa te chu a fel êm hi maw, hei hmeichhe hmêlṭha leh fel deuh mai a hmuh tawh hi. Hetiang a tawn theih nân alawm kha chen a tlangvâl ni, nupui pasal turte hi thlan fimkhur a ngai tawha, keimahni mai bâkah chhûngte min hmangaih pui thei tur hi an pawimawh viau a nia, Hmingtei pawh hmeichhe fel tak a nih ka ringa, in pahnih hian rilru nei taka in awm a ṭul ania, in ngaihzâwn lai hi chuan ngaihte hi a sama, chu chuan mi a pawt ṭhen leh fo a nia, nangni pahnih erawh inṭhen awlsam lo ula, in ngaihzâwn lai hi a pawimawh lai ber zâwk ania, chhûngkua in dinna tur kawngah leh nupa in nihna tura kailâwn pawimawh ber chu in ngaihzâwn lai hi a ni, inneih tawh hnuah chuan a in siamṭhat theih tak tak loh, kan in ngaihzawn lai hi kan damchhung nuna a pawimawh ber lai zâwk ania, in hriatthiamna leh in tlin lohna lai te in dawm chunga in kawp in tum dawn ania” a pa chuan a rawn ti ve charh charh a.

A thusawi chu a dik viau mai, kan in ngaihzawn lai hi kan hlim hun lai leh kan inpawh lai ber zâwk a nia. A tu a ve ve pawh kan in ngaihpawimawh hun, hemi huna engkim in hriat tawn hi a pawimawh reng ani.

Ka thleng ka thawhsan tharh chu min en ha in “I puar tawh em ni? I va kham hma ve ei leh rawh” an rawn tihchuan ka lu ka thing nar nara, ka puar lutuk tawh bawk nên ka in hnawh belh thei tawh ngânglo, chawhmeh a tui bawk sia keimah lo ang takin ka bar tam viau mai.

“Ei belh leh rawh, nupui chaw ei tlêm thei deuh ka duh lo a nia' u Rinpuia chuan a rawn ti supa, a thutak êm êm mai lehnghâl, ,“Ka ei ṭeuh kha, nangmahin chawhmeh min pe ṭeuh ṭeuh a nih kha, ka puar lutuk tawh ka inhnawh belh thei tawh lovang, chaw chu ka heh lutuk” ka lo ti zung zunga.

Ka thleng chawi chung chuan thleng silna lamah chuan ka bai phei auh auha, ka ke na hi ka ning takzet tawh. Reilote pawh nimahse ka tân chuan a hrehawm hluah hluah tawha, ka duh duhnaah ka kal thei lo ringawt pawh hian min ti thinrim bawk.

Chaw an ei kham pawh chuan ka chêt ve an phal lova, u Rinpuian thlêng sengin a nu in a sil thunga. Ka inthlahrung bawk nên lo va puih ve ka tum chu min lo hauh zêl avâng chuan ka ṭhu tawpa, pa Sena erawh room lamah a lût a, khawhar ina kal tumin a insiam pawh a nimahna.

Thleng sil zawhah nu Âsangi pawh chu insiam ve in an nupa chuan min chhuahsan ta daiha, u Rinpuia pawh inbual turin bathroom lamah a lût a, keimahte chuan sofa ah chuan mu in phone chu ka en mai mai a, ka ṭhiannu hnênah chuan chin ka hrilh pah bawk, a ni lah a lo phûr nasa.

“Awi ka van hmu châk tak, a hmêlṭha i ti bawk sia hmuh ve ka duh, a thlalâk te i neilo em ni?” a rawn ti ta rêng bawka. Keiai mahin u Rinpuia nên kan in ngaizawng chu a phûr zâwkin ka hria.

Engkimah min support reng thei te hi ka tân chuan ahlu zual, ṭhianṭha tak tak hi chu kan laizawn te ngei ai pawha an pawimawh châng hi a tam miaua,“Nakinah thla ka lo lâk pui anga, ka rawn thawn dawn che a nia, tûnah chuan a inbual riha, an in ah chaw ka eia, ka zak lutuk. Ka chêt ve pawh an phallova, ka inthlahrung zual” ka tihchuan a rawn phûl leh hlut mai.

“An fel viau ang, thingtlâng mi hi an felin biak an nuam an ti lehnghala, ka rawn kal ve châk e. Chhelo deuh te an tam ve em?” a rawn tih leh chuan ka nui haka, Sawma te ho ka hre chhuak zawk bawk. An inhmeh dâwn hian ka hria a, nakinah an nipawh la hmuh tir ngei tur a ni.

U Rinpuia rawn chhuak chu ka lo en dauh dauha, a pian chu a nalh viau mai lehnghâl. Six pack te a nei ve vêl mawle, mipa in enkawl uluk tak a nih ka ring. A lu chu hru hul mawlh mawlhin min rawn melh zawka, ka lo en reng a hmuh chuan a mit a sân nghal uk mai.

“I hmêlṭha, i pian pawh analh, ka DUHLAI ZORINPUI” ka ti kher chu a chek hluka, “I ho teh tuh” tiin room-ah a lût daih bawk nên a thusawi dân kher kher chuan ka nuih a tiza, khatiang ṭawngkam a hmang kha a inhmeh riau lehnghâl.

A rawn chhuah leh chuan hoodie dum ha hian a sam chu a rawn zût chhuak leh mawlh mawlha, thawmhnaw dum lam hi mipa ho hian an uar a nih hi, mahse an inhmeh zual bik bawk sia. A bikin mipa pian nalh deuh hi chu engpawh ha se an inhmeh bik ngawih ngawih zel.

“Tirawh le i inlam pan ang hmiang, hetah chuan ka duh angin ka che theilo” a tihchuan zawhna nên ka melh haw a “In chuk zeuh zeuh te ka duha, hetah chuan mi an lo kal palh ang” a rawn ti chu “I lerh” ka lo ti nghâl chiam chu a rawn nui hawk hawk mai.

“Tak takah hetah chuan mi thâwm kan hre pha reng si a, i inah thâwm a reh deuh ang. Kan kal thei ta lo ro ro chu mi hmuh loh theih ang bera kan awm kha a ṭha zâwk” a tihchuan ka hnial lo viau mai, kawngpui anah an awm bawk si a, mi veivâk vêl in min rawn hmuh pawh a hlauhawm.

A hnung a rawn dawh rual chuan ka bawk nghal vata, “U Rinpui ka rit i ti lo em ni?” ka ti a, dik tak chuan ei ka thei ve reuh bawk si a, keima tâwkah ka rit ve nalha. Hetia min paw reng hi hrehawm a ti ang tih te pawh ka hlau ve a ni pakhata, “Rit lo e, bialnu te rit kan tihin, mahni bialnu te êm kan zawh loh chuan bialnu nei tlâk kan ni nâng” a rawn ti a, a aw ah chuan a nuih a za tih a hriat.

An in chu khâr in a lock thlapa, min paw ṭha leh in ka in lam pan chuan min kal puia, khawhar in lama zai ho pawh a hriat theiha, mi an tam viau a nih ka ring. Thla a êng ruiha, khau chher leh perhpawng chiri ri vêl te chuan lung an ti leng viau maia, keipawh ka ngawi kar reng ringawt.

Zanlam thlifîm rawn thaw heuh heuh chuan engtin emaw tak hian min siama, u Rinpuia min pua nên a romantic riau hian ka hre lehnghâl. Zân thlaêng ruih hnuaiah ka mipa duh em em mai hnungah ka bei a, a rim tui tak ka hre thei bawka. Hei aia nuam tur dang hi ka hre biklo, a ângchhungah chuan ka thla a muang hliah hliaha, engmah hlauhna lah ka nei hek lo.

A tira ka ngaih dân te ka vin pâwng pâwng ṭhinte kha ka ngaihtuah lêt a, min duhna avâng nge ka lakah khân a thinrim ngai hauhlo.

“Ilo muhil ange aw zân thlaêng hnuaia in chuk zauh zauh hi a nuam a, ka chuk duh che a nia” a rawn ti leh chu a nghâwngah chuan ka sih sak sawka “I zak lo lutuk aw, lerh viau suh. Min chuk miah lo ang, hlei miah suh ang che” ka ti chu nui hak hian a tukkhum chuan ka chalah a rawn tauh data.

“I ṭawng thei sâwt riau mai, ka lo hmu changtupa ve em em che a, hero to zero in ka hmu tawh che, a hma a i mizia ang khân awm leh daih rawh” ka lo ti leh hlaka.

Ding deuh datin ka lam a rawn hawia,  “Enge a hmaa ka mizia chu? Kan pahnih chiaha kan awm chuan ka ṭawng lohin a reh dâwn sia mipa zâwk ka nihna angin sawi tûr ka zawng ve a lawm. Ka ngawih reng chuan nuamlo i tih leh zeilo min tih te ka hlaua, ka boring te ilo tih ve hlauh chuan ka mark a chhe vek dâwn a sin” a han ti ngei a.

Ni e kan pahnih chauha awm chuan keimah ngei pawhin sawi tûr ka hre ṭhin lo. Ka zah vâng pawh ni hauh silo hian sawi tûr ka vân riau zel, kan duh ber te bulah hi chuan sawi tûr vâng êm êm si hian in biak fuh tawh erawh chuan ṭawng a nuamin kan hlim leh êm êm tho sia.

“Ka hria a lawm, kal phawt ang” tiin ka kuah ṭha sauh sauha, a ni pawh chuan engmah sawi tawh lo hian min kalpui leh zuia, ka in kan thlen rual chuan tukverh bulah min dahthla in “Eng hi ti thi vek ang aw, thla êng kan thlir dâwn a nia” a tihchuan ka bu ve nghata, light vêl chu off vekin ka bulah chuan a rawn kal hnaia, ka hnunglam aṭanga min rawn kuah hian ka dârah a khabe a rawn nghat zuia.

Engmah sawi dûn mai lo chuan thla êng kulh chu kan thlir chho vang vanga, “Thla êng mawi zia hi tiraw? Ni leh thla hi awm lo sela khawvêl hian mawina a nei miah awm silova” tiin ka phun sapa, ka biangah chuan rawn nul dan danin thâwk ala zui ta haka.

“Khing ang chiah khian ka mitah chuan i mawi lutuk,  ka beiseina rawn keng tu ka arsi i nih hi. Ka nunah ni êng i rawn keng lût leha, hmeichhia ka hmuh dân dik lo zawng zawng min hmuh dik tir lehin i lamah min hip a, ka hmuh tirh aṭang che khân ka ta ni turah ka ngai tawh che” tiin a nui zui suka.

“Ni êng maw?” tiin ka phun sapa, Ni nên min tehkhin chu a awmzia ka hre hauh lo “Um, ka tân chuan ka beiseina êng neih chhun i ni tawh. Ka nunah i rawn lan aṭangin êng i rawn chhi lût a, ka lungngaihna chhûm rawn in mung khâwm mek tawh rawn vai kiangin i êng in nunna thar min rawn pe leha, ka tân chuan ka ni êng hlu tak i nih hi. Ka nunah beidawnna leh mal tlat ni a ka inhriat laiin mawi takin i rawn êng lût a, nangmah vâng chauhin a ni chhûngkua din ka duh leh chhan, nangmah vâng chauh” tiin ka biangah chuan a rawn fâwp leh zauha.

Alamah in herin a biang tawn tawnah ka dawma, ka nuih var var bawk. Thla êng in a chhun a hmel chu chiang takin ka hmu theia, a thutak ran mai te chuan a thusawi chu a timai mai lo tih a hriat hle bawk, ka ringhlel phallo.

“Nangpawh ka suangtuahna zawng zawng kawltu ka Thla êng mawi lutuk i nih hi, thla hi ka thu hre tu a ni a. A ni chu engkim ka thuruk thlenga ka hrilh ṭhin a nih khi, chutiang chiah chuan nangpawh, duhthu ka lo sam fo ṭhin a, ka mipa hmangaih tak tawngin ani nên chuan hlim takin awm dûn ila tiin ka suangtuah fo ṭhin, ka tân chuan ka suangtuahna zawng zawng leh lunglenna min pe thei tu ka Thla êng mawi lutuk i ni ve tho ania” ka ti ve sapa.

Ka biang tawn tawnah rawn vuan ve in min en rana “I hmui bul a khuavang chu i inhmeh hle mai” ka lei ka chhuah nghal zuka, ka hmui chung lamah hian khuavang ka neia. Kei tak phei chuan tihreh daih ka châk ṭhin.

“I ninawm khatiang lo sawi suh, min en reng zela, ka zak ania” tiin kûn ka tuma, ala phallo tlat lehnghâl. Min en hnai tulh tulha melh pawh ka melh lêt ngam tawhlo, ka sa pup pup bawk, a mitmeng fiah kelh kawlh leh sexy ru riau si chu melh lêt a har ka ti. A mithmul lah a pir sâng a, mipa mithmulah atân chuan a sei mah mah angem tih tur a ni, amah lah chuan a inhmeh pui em em mai si.

“Zorinpui” ka ti chu a rawn rum ta nghata “Engtin maw min koha? Ka hmingpum in min ko a maw?” a rawn ti ta chhar chhara, min hnaih zual sauh bawk. Ka hmui bul chêt ah rawn kûn hniamin keilah hnuailam ka lo melh bawk.

“Ka koh mai loh che in, i hming a ni miau sia lawm” ka hmuiah chuan a rawn fâwp chata, ka kut chu man betin ka mit leh ka biang, ka hnarah chuan a chuk kual dan dan mai. A chêt dân avâng chuan ka nui ta haka, min hneh thei riau hepa hi a che changtupa thei riau mai.

“I engkim hi ka ta vek an nih hi, tin nang ai ka upa fe ania hming pum lawlh lawlha min ko ve chi i nilo” a tihzawm zat bawk. Nge ka thin a tihrim tehreng ni, a mah chu kuahin a âwm ah ka beia, a ni pawhin min namsawn bik lo, a lungphu dat dat chu ngaithla in ka thaw dep depa.

Hahdam zet chuan ka thaw chhuak zui suai suaia “Ka ngai che” tiin a mah chu ka en chho a, a hmêl êng sar chu ka hmuh hmaih lo. “Nang anga mipa ka duh hi ka la hre ngailo, ka hmuh tirh aṭang che khân min tibuai vek, mahse i ngeiawm thei kutuka, hian ṭhat hleih theihloh khân i ngeiawm bawk sia, biak che kha ka tim tlat ṭhin kha a nia” tiin ka nui saka.

Ka chhipah chuan a kha be rawn nghatin “Min ngai tak zet em?” a rawn tihleh chuan ka bu nghauh nghauh a, nitin hian ka ngai. Kan in ngaihzâwn tirh vâng nge pawh ka hrelo ka hmuh loh rei chuan ka khua hi a har ngawih ngawih zel, hetianga mipa pakhat lakah hian ka luanliam ka ring ngai miah lo. Luanliam chu sawiloh heti khawpa min tibuai thei tu mipa hi an awm ang tih ka ring pha ngailo hrim hrim.

“Min ngai reng rawh, i kianga ka awm lai emaw. Ka hlatah i awm lai pawhin min ngai tûrin ka duh che, nitin darkar tin hian min ngai la. Ka kiangah hlim takin awm la ka duha, keipawh hian i kianga awm ka thlahlel tih hria la, mipa ka nihna angin ka inthup vekah ngai suh. Nitin hian ka ngai che a, ka ngaihtuah reng che tih hria la, i natna thlentu nih ka duh hauh lo bawk, keimahah rinna nghat la in ngaizawng satliah mai mai kan nilo tih hi hre reng rawh” tiin a sawi sapa.

Chutah a mah bawk chuan “Nang chu ka nupui tura ka thlan, kumkhuaa ka bula awm tur a ka duh i ni tih hria la, hmeichhe dang ang mai maiin ka en lo che tih hre reng rawh. I tâna pasal ṭha tak ka nih theih nân min hriatchian tumla, nakina i inchhîr loh nân tûnah hian keimaha i lungawi lohna tur awm zawng zawng siamṭha la, nangpawh ka tâna nupui ṭha ni turin i inbuatsaih ka beisei, ka nupui hualah ka ngai che tih hre reng rawh” a rawn tihzawm dap dapa.

Ka nui nghal sak mai, a kut chu vuanin “Aw le, i tâna nupui ṭha i chhûngte nêna in inkar ti chhe tu chu ka ni hauh lovang tih ka tiam a che, ka theih tâwp ka chhuah anga. Nangmah ka hmangaih che a nih chuan i chhûngte pawh ka hmangaih tur a lawm, ka hmangaih chhûngte ka hmangaih pui lohin tu in nge hmangaih pui ta ang. I tân nupui ṭha, i chhûngte tâna mo ṭha alawm nih ka tum,” tiin lai deuh tak chuan ka nuih sen sena.

A rawn nui ve nghal suk mai, “Ka nupui i nih hunah chuan heiai nasa hian ka duat ang che. Hna i thawh ka phal hauh dawn lo ania, nitin kawngka bul aṭangin ka feh haw min lo hmuak ṭhin anga, ka ippuite lo chhuahin in chhûngah i luh pui anga. Kan fate an harh leh i hau pah hlak hlak zêl anga, ka nghakhlel tawh” a ti leh sapa.

A awmdân aṭang pawhin keimah nêna inneih chu a châk tawh tih ka hailo. A kum enin naupang zawk zawk a ni tawh lo nen ka hriatthiam pui khawp mai.

“Chutiang chhûngkua chu kan la din dâwn a lawm, nang i rinawm chhûng chuan ka rinawm reng dâwna. Kan inngaihzawn lai hian Kristian chhûngkua chu din ṭan tur an tih kha, tûn aṭangin kan ṭan anga. Nakinah hlim takin kan la awm thei dâwn a lawm tiraw? Keipawhin ka nghakhlel tawh, zantin i âwm nghêngin ka mu anga, kan mutthilh hma chu ka be char char zêl ang che” kan duhthusam chu kan sawi dun a ni ber mai.

In ngaizawng rei tak chu la nilo mah ila, chhûngril taka kan inpawhna erawh a thûk tawh hle thung. “Min hmangaihna kha danglam ngai suh se, ka tân i thinlung kha phu reng sela, a ngai rengin awm tir rawh. Keilo ṭha tih neilo la, i nei a nih pawhin keiai ṭha chu nih tir hauh suh” tiin a rawn ṭhu chhuaka.

A sana bun lai chu a melh zawk bawk “A lo va tlai leh tawh ve, i bula awm hi chuan hun hi a kal duak duak mai a nih hi maw, mahse a pawilo ka riak dâwn tho va, tihian a nuam zâwk ” a tih zawm zata, min kuah ṭha sauh sauh mai bawka.

Chutih lai chuan ar an rawn khuang al ala, zaikhawm ho pawh an thâwm a reh ta diak mai. An ṭin ta a ni ang, zai ri reng reng hriat tur a awm tawh lova, a reh ngawih ngawih tawh mai

“A nuam reuh e, ar khuang te hi ka vawikhat hriatna, khulamah chuan a vulh an vâng sia, a vulh chhun lah kan hlat bawk nên tûn hi ka vawikhat hriatna, hmanlaia awm ang maiah ka in ngai, in khua hi ka lo kal lo ang tih ka hlau” tiin amah hnungchhawn zâwng chuan ka inher leha, a âwm chu ka nghêng ar ar bawk, chutia ka ṭawng tui ve em em lai chuan “Inla zâwng tilmu ve mi?” a rawn ti a nihchu! 

“Awi i zaklo” tiin ka chum ta awk awka, ka nuih a za bawk si. A hmêl ka en ṭhin, a mizia ka hre bawk. A inmil ve hlawl lo, nui ar arin ka ena “Nang chu cool taka i awm hian i inhmeh ber” ka ti chu a nui ve hawk mai “Chu ka pa ilo ti viau a nimaw? I awmdân aṭangin ka hre mai, ka pa i tih vângin em ni min vei em em?” tiin a mit chu min siai saka.

“Awi i over lutuk, i zaklo bawk si. Bialpa nghal tak i ni” ka ti chu remchângah rawn la in “Bialnu zêp ṭît ṭêt neilo nu, zahmawh sawi hrât bawk si” a rawn tileh zata. A va han sual thiam tak êm, thawnthu ngaihthlâk chu an ṭawngkam dik lo hi zir a awl bawk si.

Ngaihthlâk tui phei chuan ngaia neih a awl viau lehnghâl, a mood-ah kan chen laklawh phei chuan kan nun kaihruaitu a ni ve thei tlat.

“Zahmawh sawi ka hrât kher lo, ka pasalṭha ngaihthlâk khân a lawm hrat ni, keichu mi thianghlim, mi fel, mi hmêlṭha” ka in ti duah chu a rawn nui leh hawk hawka, ka thusawi chuan a nuih a tiza hle tih a hriat.

Keipawh ka nuih a zalo theilo, keimah leh keimah ka han infak vak chu a nia. “U Rinpui eng angin nge min ngaih?” tiin ka zâwt leh khauhva, ka hre châk miau sia. A mi en dân ka hmuh hmaih a nilo, mahse a ṭawngkam nem leh fel thlap maia min sawi ṭhinna hi ka ngaithla khamlo ṭhin a ni ber mai.

“Ka bialnu, ka ṭhian. Ka nuna beiseina thar leh hlimna thar rawn keng lût thar tu, ka nuna ka tawn ngai rêng rêng loh hmeichhe hmangaihna min hriattîrtu leh ka tâna mi hlu lutuk, ka thlah phal miah loh tur i ni” a rawn ti ta dap dapa, a thusawi chu a ti tak tak tih ka hria.

Rei kan la in hrelo, mahse ka hmangaih tih a hria. Ni e ka hmangaih, alaka ka awm dân hi chu love at first sight an tih ngei kha a ni, ka zêp hek lo. Ka tân chuan ka vawikhat hmuh hi a tâwk “Hre reng rawh, chutiang chuan ka ngai tak tak che tih hi. Mipa ka ni a, thutiam liam mai mai chi ka ni hek lo, ka tiam tawh sût a thlâk danglam leh mai tur mi ka nilo, ka duhna che hi a taka. Niin a liam pui mai mai turin ka tiam lo che a, ni a tlâk a a rawn chhuah leh hun apiangah a aia nasa zâwk a duh tur che in ka tiam che tih hre reng rawh” a châwl deuh data.

“Thusawi dân tur leh i rilru hneh dân tura sawi ka thiam kher lovang, mahsela ka duhna che hi a mai mai lo tih hre phawt la. Keimahah i rinna nghat tawp rawh, mipa dang i hnaih tih ka hriat chuan a ni chu ka khawih duh mai ang. Ka ta ni turin ka hauh tawh che a, ka hmeichhe rim lai midangin min lo rimpui hi ka thei ve lo a nia, ka ta i nihchuan ka ta ni tawp la. Keipawh i ta ka ni ve bawk ang, midang awm ngai suh se” tiin a insiam rema.

Ka chhâng mai lo, a thusawi chu ka hlimpuia, hriat nuam ka ti em em bawk. Ka suangtuahna kâwm chuan ka ngawi zui ta renga, chu chu a duh vak lo nge “Enge i ngawih renga” a rawn ti ta rênga, a aw ah chuan vui aw a lang bawk nên a kut chu ka chûl sak hliau hliaua.

“Engmah, suangtuahna ka nei mawle. Suangtuahna hlimawm tak” tiin in her zawkin a biangah chuan ka fawh sak ve zauha, rei tak ka lo hriat tawh ang maia ka pawh em em mai hi keipawhin mak ka ti, a mize dam dup reng vâng pawh hi a nimahna.

Vân lam chu thlir vang vangin min rawn en leha “Ka tel ve phâk lohna khawvêl hran din lo la, ka lan ve lohna suangtuahna nei lo la. Ka hlimthlâ hliahbo lo turin i mitthla ah min châm tir la, ka chhuah leh theih tawh loh nân i thinlungah min khung tlat ang che. Ka kalbo san mai loh nân che hrui tello in min phuar ka phala, ka hlata i awm loh nân min vuan bet tlat ang che” a rawn tihchuan ka en lo theilo.

A thusawi chuan min hneh in engtin nge khatiang thu kha a rawn sawi chhuah thiam zâwk ni, ka beisei phâk bâk in thu a thiam daih lehnghâl. Ka ngaihtuahna te hi a hre thei vek nimaiin ka hria a, a thusawi erawh ka bengah chuan rimawi ber ang mai a ni.

Ka bialpa a ni mai te hi âwih loh châng ka ngah ṭhin, ka hlauh ber erawh kan inṭhena ka tâna khuanu ruat loh a ni ang tih hi ka hlauh ber a ni. Êng a rawn ken luh ang hian thim zâwk min hnutchhiahin mei khu ang maia a zâm ral ka hlau a ni.

Ka phone rawn ri zawk chu kan melh dûn a, mipa hming rawn lang avâng chuan u Rinpuia chu a rum deuh nghat mai. Chhân ka tum lêm lo, ka ex tih ka hria, u Rinpuia chuan a hre kher lovang, hrilh pawh ka tum lêm lo. Ka nunhlui thil a ni tawha, ka tân a pawimawh tawh heklo.

“Tunge?” u Rinpuian a rawn tihchuan ka melh zawka, hriat ngei a duh tih pawh ka hria. “Ka ex a nihkha, phone chhas mai mai mawle, min rawn be leh ṭhin a, mahse beiseina ka pe ngai hauh lo a nia, ka tân chuan engmah ani tawh lo” in sawi fiah tum tak chuan ka ti a, min ring ngei se ka duh bawk.

A bu nghat a, “Be tawh suh, ka thikthu a chhe dâwn a nia, ka ta i ni tawha. Tu mipa mah biak a ngailo, chutilo chu ka tawtawlik ang che” a ti chu a ngaihna hre lo fe hian ka ena, a thil sawi chu eng a sawina nge ka hre hauhlo.

“Enge tawtawlik chu?” ka ti chu a nui suka, min kuah lehin “Hmeichhe hriat chiloh, i hriatthiam ho kha zâwm la a nimai” tiin a ipte chu a zen rak raka, meizial phawrhin a lighter chu a talh alh zui papa, a pak khu nghâl tual tual mai.

“Zu tam suh aw, i chuap te a ṭha lo ang, ka ngaihtuah che ania” tiin a meizial khu rawn lêng chu ka vai vat vata, “Reilote a nimai, a khu i ngeih vak nange” a tihchuan ka bu nghata, meizial hi chu ka zuk ngai loh vâng nge a khu ringawt pawh hi ka ngeih ṭhin lo, mahsela khap bur erawh ka tum lo thung.

A nunah ka lang ve ṭan chauha, a thil chin ṭhan zawng zawng chu khap nghal ka tum lo. Kan inkar tihchhiat theihna thil lam phei chu sawi loh ka tum bawk, meizial hi chu mi tin deuh thaw in an zu bawk nên ka khap bur duh lo.

Mawii message ka hmuh avâng chuan enin a rawn hlim lutuk chu ka nuih chhuah pui haka, a bialpa hlui a nghah ngat ngat ngei khân a rawn bia a nih hmêl. “Ih...nihpui leh min sâwm a, ka haw bawk siloa. Ka nihpui leh mai dawn em ni ka tia. A pawi a ngem?” a rawn tihchuan ka ngawi vang vanga, a duh zia ka hailo. 

Bâkah a mipa pawhin a lo duh ve viau mai theia u Rinpuia ka en chu min lo ngaihsak vak lo bawk nên a message chu ka chhâng zuia “A nih a bialnu hlui avângin in inkar a chhia i ti tiraw?” ka tihchuan a rawn aw vata “A bialnu hlui a theihnghilh theihloh avângin ka lakah a rilru a pe theilova, mipa pawh hi hmangaih an nei ve thei tho va, chutih rual erawhin hmêlṭha an tih avâng mai khân hmangaih lam pawh nilo in kalsan har sa tih an nei ṭhina, hrethiam takin ka kal tir kha a nia” tihchu a rawn thawn leha.

Amah vêk chuan “Ka nghâk reng tho sia, vawikhat chance pêk leh chu a phû in ka hria, a hma ang khân ka awm san tawh lovang che min tia, dik tak chuan ka tân pawh mipa dang an awm thei tak tak silova. Ka lo hmangaih tawh viau pawh a niang” tihchu a rawn thawn leha, an inkâr a hlat tehlul nen ka ngaisang letling.

Khuaah ngei pawh ngaihzâwng nei lovin hmun hla tak vawikhat pawh a la hmuh loh tân heti tak hian a rinawmin alakah a pawimawh thei a nia. Amah pawh mi rilru nghet tak tih a hriat “A ṭha a lawm, ni e chutia a mah berin a tihchuan chance chu a phu a lâwm; mahse fîmkhur la aw. Mipa chu an inthup thei a nia, an inṭhen lai an rilru nat lai hian hmeichhe dang bem an chinga, i nat leh ka hlauhpui che a nia” ka tihchuan a fimkhur tur thu a rawn sawi ve dap dapa.

Dik tak chuan ka duh tak takte lakah kan nem hma zia leh belo a kan awm theih loh zia hrechiangtu ka ni ve tlat. Hmeichhia phei chuan hmangaih kan neih tawh chuan engkim kan huam a ni tawp mai, midang in an sawichhiatna leh min duh pui lohna an sawi pawhin kan âwih thei tak tak tawhlo, kan hmangaih tawh chuan an nihna ang angin kan hmangaiha. An tlinlohna lai kha kan hai der vek thei tlat.

Min ti â veka, min thunun thei tlat. Awm dûn kher lovin an thuhnuaiah min dah thei tlat si, Mawii pawh ka hriatthiam pui, a hmangaiha thlah a harsat tur zia pawh ka hria, chutia a mipa in kir a duh a nihchuan lo pawm suh lo tihsak ngawt ka duhlo. A rawn hlimzia ka hailo, a hlimna tihchhiatsak tu nih ka duh hauh lo bawk.

“Enge ni ta?” u Rinpuia chuan a rawn bih ve duk duka, keiin ka lo keng sawn vat thung “Uikawm ṭet ṭût mange, i bialpa ka nih hi. Ka hmu ve duh, tunge i biak ka lâwm hauh lo ania” a rawn tihchuan ka hmui ka pet zauha.

“Mawii a nih hi a bialpa hlui nên an in be leh tawha, midang ka be lo. Mipa hriat ve chi a nilo” ka ti ve khera, nichina min tihdân ang in a ni ka tih ni, a rawn ner zui suk rêng a.

Nge hmeichhe hriat chi a nilo a tih kher ni “Ah khi arsi thlâwk” ka tih rual chiahin thlang lamah chuan a liam deuh puata, a lang lianin a êng em em bawk. A sen deuh phût bawk nên mawi ka tiin a lang reilo lutuk erawh chu ka ui ngei mai.

“A mawi tiraw?” ti a u Rinpuia lam ka en chuan van lam hawi chuan a dâk vauh vauh a, enge a ngaihtuah ni dâwn ni. Chutia ka lo en reng lâi chuan “Khatiang ang khân mawi deuh nisi in reilote atân chauh ka nunah rawn lang suh ang che, mawi em em siin ka neih theihloh tur i nih ka phal hauhlo ania, mu dâwn tawh ang hmiang men rei lutuk a ṭha lo” ti a thawh mai a tum chu ka lo hnial vata.

“A la hmat êm hi, vanlam hi a mawi telh telh a nia aw. En mah teh khi arsi leh thla te hi an lang chiang telh telh a nia, ka mut pawh a la chhuak lo” ti niah niah in ka bulah chuan ka pawt ṭhu leha, a ni pawhin min tilui ta êm biklo.

“Ka tân chuan thla ang khi nila, mahse thla anga mal leh mite thinlung tina tu chu ni ve miah suh aw. I êng mawi tak chauh kha min hmuh tir la, thla mang lai ang maia thim chuan ka lakah awm miah suh ang che. I en mâwi lai chauh keichuan hmuh ka duh, varparh arsi ang mai chuan biru lo la, mite hmuh theihin mawi takin êng la, ka hmuh theih tûrin awm reng ang che” tiin a bân chu ka kuah ṭha sauh sauha.

Suangtuahna tam tak ka neia, chûng ka suangtuahna zawng zawng chu u Rinpuia ah hian an beta, amah nên hmalam hun ka suangtuah bawk. Chung ka suangtuahna erawh an thâmral mai ka phal ngai lovang, mei alh nasa tak ang maia in kâng kâia, mit mai mai lo tûra kan nun in châwm tawn ka duha, mahsela mei tak tak anga mit leh mai thei turin erawh ka duhlo, meialh thi tawh chu a tihnun leh theihloha, a thar a chhêm ṭhat a ngai ṭhin, kan nunah erawh tihnun chawp ngailo turin mei mit mai mailo tur chhir ka duh ani.

“Ka tiam a che, khawiah mah ka kalsan ngai lovang che. I tân thli ang maiin ka awm anga, ka taksa hla takah awm mahsela boruak zâm vêl ang maiin i kiangah ka awm reng ang, inhlat mah ila ka ngaihtuahna erawh i kawl reng dawn tih hria ang che” a rawn ti leh sapa.

Zanin hian ka hlim tak zet, khâng hun ka lo suangtuah ṭhin tam tak kha tûnah chuan ka tawng chho mekin ka hria a, thâmral leh mai mai tur ka suangtuahna lalfapa nilo in bo hlen lo tur ka takram lalfapa ka duh tawha, an in anna erawh ka duhthusam tikimtu ve ve an ni thung.

“Min hmuh tirh khân tinge i ngeiawm theih em em a” ka ti chu a nui maia, “Mawh i ngeiawm bawk sia, Rohlui lah khân min rawn be bawk sia a hnua i ṭawng ka hriat leh phei kha chuan ka ngei che a nia aw, ka wadi rawn kal tur min lo biak kha i hria em?” ka tihchuan a bu nghata.

Kha mi tûk khân ka inah a rawn kala, chuvang a nia ka ngei zual che. Bialnu nei reng chunga min bem emaw ka ti che a, ka haw lutuk che a, mahse i hmêlṭha ka ti tho bawk sia” ka tileh chu za tak mai hian a rawn nui a.

“Rohlui chu i bulah a rawn kal a maw? Ka tân han hauh vak dâwn in hmeichhia a ni bawk sia, mi hnên aṭangin ka hre fo mai, vawikhat ka lêng peka. Chupawh Sawma te ho hian Nunzuali ka ṭhen hlim khân min lo sawipui peka, tum loh lutukin heti hian kan awm phah a nih hi, keimah tak chuan eng thu mah ka sawi hauh lo“ a tihchuan ka ring thlap.

Sâwma te ho pawh chu an va ti âwm lo tak “Nang chu ka hmuh tirh aṭang che khân ka hmeichhe duhzâwng tak i nia, i hmêlṭha em em bawk. I mitmeng ka hmuh aṭang khân ka duh tawh che, ka laka i rilru put hmang thup tum viau mahla keimah ang bawkin i danglam tih ka hai bik lo, hmeichhia hi rin leh theih pawh ka lo in ring lova, hmeichhe pakhat chauh chu a ka kawp bik lova, bialnu hran hran te pawh ka lo nei ve tawh, chung ho chuan ka lung an dum zolo a ni ber mai, nang erawh i danglam. I nunah thurûk a awm lêm lova, i rilru i thup thiam miah lo te hian min hip bawk” min pawm tho nawlhin light chu a on zuia.

“Mu tawh ang, i meng rei lutuk dâwn tlat, naktuk thlân ṭhut a ni dâwn sia, thlanmual lamah ka awm leh a ngai dâwn a, nangmah a lo awm i hreh em?” a tihchuan ka lu ka thing nar nara, kha kha chu ka hriat sa a ni, helamah chuan khawpum in mitthi an neih pawhin an la in ṭawiawm tawn ṭhin a, keini lamah erawh vêng khat ringawt pawh kan tam tawh avângin a zawng zawng kan kal ngai hauhlo.

Helam erawh engkimah an la in pawh tawn hlawm viau mai, “Ka ke hi a dam har angem le? A dam har vaih chuan engmah ka ti thei silo a, a buai thlâk emai” khuma min dahthlak lai chuan ka lo ti sapa, ka ke chu a niin a en dik leh thuak thuak bawka.

“A ṭha leh vat mai ang, in dim la kâr khat a liam chuan i in dim thiam phawt chuan a dam vat ang. Kal vak vak lo la, naktûk zingah i tiang hawl tur kan siam dâwn a nia, mu tawh rawh“ tiin ka chalah chuan a rawn fâwp vang vanga.

“I haw dawn em ni?” ka lo ti ha chu a lu thing in “Pawnah sawn ka mu ang chu ka ti deuha, min mamawh chuan min lo ko mai rawh aw” ti a chhuah mai a tum chu ka pawt bet vata.

“Hetah mu ve rawh, keimah chuan ka mu ngam chiah lo” dik tak chuan mitthi an awm bawk nên mi dawih chi ka ni bawk si a, keimaha mut chu ka ngamlo a ni ber mai. In tih ṭhaih ka hmang bawk nên ka dawihzep a, ka room-ah tukverh a la awm zui nên ka thla a muang hlawl lo, tukverh aṭang hian min rawn bih dâwn tlat te hian ka hria.

“I phal chiah maw?” a rawn tihchuan ka bu nghauh nghauh a “Ka hlau a, thil dang ka duh vâng a nilo ania, mitthi an awm hi chuan ka hmelhriat pawh nilo mahse ka thla a muang lo” ka ti ta tawpa, a ni pawhin engmah sawi tawh lo chuan ka bulah rawn mu in min kuah bet a, “Muhil rawh engmah hlauh tur a awm lo, thlahrangte chu an in lan mai mai ngai hleinem” a ti tak nâng in ka thla a muang chuanglo.

Ramhuai hi ka ngaina lo, a âwmah hmai phûm chuan “Muttui aw” ti leh sapin ka mit ka chhing zui ta riai riaia, reiloteah ka muhil zui ta thuaia.