DEMON KING CHAPTER 8

DEMON KING

CHAPTER 8

“Awi saw Sakeibaknei var ka hmu” tiin ka au chûl mai, kan lêng chu ka duh ang ngeiin sahuanah min kal puia, Mizoram lam sahuan ai chuan pui tak ani. Ramsa leh sava awm te pawh Mizoram lama kan hmuh ngailoh an awm ṭeuh a, chu chuan a ti nuam zual.

Damian-a kai chung chuan ka tlân kual char char ti ila a dik ang. Ramsa an tam si a kal pawh a hlawk bik ngei mai, peihlo deuha min zui ve hnu hnu hmuh chuan nuih a za ru ngei mai. 

“Hmun dangah kal ve tawh ang, ramsa bulah hian chen hlen i tum te a nih loh chuan hmun danga kal a hun ve viau tawh ania baby” tiin thinrim ngam chiah silo chuan a rawn ti a. A hmêlah chuan a ning tawh hle tih ka hria, keipawh chutia sahuanah ringawt awm chu ka duh biklo.

In ngaizawng kan lêng dûn vea, keima duhzâwng hlir tih kha ka duh biklo. “Aw le, i duhnaah kal ve tawh ang, keichuan hmun hriat pawh ka la neihloh hi, i duhnaah kan kal ve tawh dâwn ania” ka tih tâkah chuan a nui ta suka.

Sahuan aṭanga chhuakin restaurant ah thil min ei pui leh te te a, ka ei tam leh viau tawh. An ni lam thil ei hi chu an siam tlêm thei sia ka kham khawp lo lek lek ṭhin. Plate pakhata an siam hi tlêm te to deuh si hi a ni ziah lehnghâl, “I puar loh chuan i duh zâwng chah belh rawh” ka hawi ka hawi chu a hrethiam nge min nuih suk chung chuan a rawn sawia.

Inthlahrung viau mah ila ka ril a ṭâm bawk nên korean food lam chu ka chah leha. Asian ka ni bawka mahni awmna ram thil ei ṭhang lo hi chu a lo tui tak tak theilo. Mizo ka ni bawka thak pawh ka ngam, thak tello hi chuan keichu ka engtih mah hi a tui thei tak tak lo.

Ka duhzâwng ka ei zawh leh meuh chuan ka puar awk thei nia. Chutah waitress chu ko in kan ei man chu a pe zuia, a man a tam tham tih ka hria, Mizoramah chuan awm ila man tlawm zawkin kan puarna khawp chu kan ei leh thei awm sia.

A card an rawn pêk lêt tâkah chuan min kai chhuakin a bike chuan kan in phur zui lehnghala. Chutah tuipui kam lam kan pan tih ka hriat chuan ka phur ru ngei mai, kan pahnih chauha kal kha ka châk rêng a, a ṭhiante an awm chuan an thawveng si a duh ang pawhin ka ṭawng in ka che ngam ngai lo kha ania.

Khawpawn mi awm vaklohna ah chuan min kalpuiin  thingkung pakhat hnuaiah chuan puan phahin kan mu duna, a hahdam thlâk hliah hliah mai. Tuipui sava hrâm ri leh tuifawn ri delh delh bâk ri dang hriat tur a awm lova, a khât tâwka kawngpuia motor tlân ri chauh chu ri dang hriattur awm chhun a ni.

Mit chhing chialin Damian-a bân kham chung chuan ka nui leh ve ver ṭhin a. Hetiang khawpa hmun hahdam thlâk hi chu a awm bik kher lovang, rilru hah châng phei chuan duhtawka in ngaihtuah harh nân leh in tih thawvenna atâna duhthusam a ni ringawt.

“Damian engtikah nge kan ramah chuan kan kal ang?” tiin alam chu ka hawia, kan ram a haw tluka châk ka neilo. Mahni hnampuite awm lohna hi chu nuam ve viau bawk mahse kan in leh Mizoram kha ka ngai em em tho, hetah chuan Damian-a te hi an ni maia. Mizoramah erawh ṭhian tam tak ka neia, ka ngai em em bawk.

“Chawlh veleh a rei tawh lovang, thla leh vêlah hi chuan kan kal theih tawh ka ring. Kan kal a nih rau rau chuan min zinkual pui ka phût ania, hmun mawi deuhte pawh a awm ve ka ringa, helama kan hmuh ngailoh thil te pawh, thil thar hian min hipa chutiang chu min fanpui ngei ka beisei” a tihchuan phur zet hian ka bu nghauh nghauha.

Mizoram chhûng fankualpui chu ka hnial hauh lo, a ṭhiante an tel ve dâwn phei chuan ka ṭhiante nên kal ila a nuam viau in ka ring bawk. “Tehreng mai kan kal phawt chuan kan zin kual dâwn ania, mahse tlângram a nia a chhengchhe deuha. Kawng pawh a ṭha lutuk lo ania” ka tihchuan a bu nghat nghata.

“Chutiang chu ka duhthusam zâwk, helam anga hmun rem renga awm chu ka ning ṭhin, in ram mawina tak a nih dâwn chu. Hmun dangdai deuh fante pawh a ṭha ve alawm, bâkah i seilenna ram chu hmuh ve ngei ngei ka duh, ram nuam tak ani ngei ang tih pawh ka hria” tiin ka samah chuan a rawn chûl zui hliau hliaua.

A thusawi chuan lung a ti lenga, ka ngaihtuahna chu Mizoram lamah daih a ni a awm ni. Eng emaw ti tak hian lung a ti lêng veng veng thei, helama awm ve miahlo zo thlifîm in chhêm tir te, tlâng hrang hrang romeiin a bawh pâwt chûk zel te kha hmuh leh ka châk a. Ka ṭhiante, thawveng taka ka harh pui theihte bula awm leh kha ka châk hle bawk.

Chutiang zawng zawng ka ngaihtuah chuan lung a lenga, Mizorama haw ka châk zual sauh bawk. Ka nu leh pa hian ti tlat lo sela helaiah hian ka kal ka ring lo, mahsela an mahni avâng zawkin Damian-a nên kan in tawn phaha, ka rin phâk bakin a ṭha bawk. 

A âwmah chuan ka thai sak neuh neuha, tuipui ri leh sava hrâm ri te chuan min awi nimaiin ka hria a. Mutchhuak in min zem chiai chiai bawk “Muhil rawh, ka bialnu mut duh deuhnu” tiin ka chalah chuan dim te hian a rawn fâwp a, ka nui nghal sak mai. Ni e, ka mut tawh hi chuan mutthilh tur emaw hi ka ti nge pawh ka hrelo ka mut tawh phawt chuan ka mut hi a chhuak em em zel hi a chhan pawh ka hre bik lo.

Khawiah pawh kal ila ka awmna hmun apiangah awlsam takin ka muhil theia. Mutna danglam vanga muttheih loh ang te hi ka nei ve ngai lêm lo, hei vâng hian ka chhûngte pawhin mut lam kher kherah hi chuan min ngaihtuah lo ve khawp mai.

“A nih ka muhil dâwn ania aw, boruak awm dân hian ka mut a tichhuak lutuk, ka meng lui thei tawh lo” ti a mutthilh mai ka tum lai chuan thâwm rawn awm avângin ka meng chhuak leh kâwk a. Chutah bodyguard ang pui pui a dum veka inthuam ho an rawn lan tâkah chuan hlauthâwng zetin Damian-a chu ka ena, a ni erawh a hlauthâwng hauh lo tih hriat takin chûng ho chu rum zet hian a ena.

“Master, i pa in lo haw turin a duh che a ni. Call ila duh siloa i bialnu pawh hi hruai tel tur che in a duh che” an rawn tihchuan Damian-a chu ka en ha a. A chhûngte hmuh maw? Ka la ngaihtuah ngai lo, ka ngam dâwn em ni? Kan dinhmun a inthlau ropui si a .

“Ka sawi tawh kha a la pawm na cheu nge, ka bialnu ka lên pui a nih hi” Damian-a chuan a ti deuh hrawk a, a lungni lo hle tih pawh ka hria. A rawn kal hma in an inhau nge tihte ka ngaihtuaha, a hmêl nelawm ta lo lutuk chuan min ti hamhaih ve vek mai.

“Lo haw ngei turin a duh che a ni, min zui duh loh chuan tharum hmang pawha hruai lui tur cheu a tih kan ni” an rawn ti leha, Damian-a chu a rum hak mai. Min rawn enin ka biangah chuan a rawn tuai zauha “Ka bulah awm tlat la tumahin an tina hauh lovang che, hlauthâwng lo la ka nu leh pa in an hmu ve duh che a” tiin hahdam tura min duh tih hriat tak hian a nui saka.

Keipawh chutia a sawi tâkah chuan ka hahdam deuh huai mai, muangchanga tho chhuakin chûng ho chuan min zuia, a bike-a kan tlân chhuah hnuah kan hnungah min zui diah diah hlawma. Tûnah hi chuan movie vela ka lo hmuh mi thil ti thei tak kha kan ang ka ti, a eng emaw tih nawm riau lehnghâl.

Chutah khawpui chhûng mi hausa ho fuan khâwmna lai bika inlian leh ropui em em hmaah chuan Damian-a chuan min dinpuia, kan in te chu an lakah chuan tê tak a ni. Sai leh fanghmir ang vêl nimaiin ka hria, an ropui dân a in thlau lutuk tlat.

Damian-a chuan min kaiin Gate chu an lo hawng vata, guard ho chuan chibai min lo bûk sap sap bawk. In kan hnaih zela, ka zâm tulh tulh bawk. Engtin nge ka hmachhawn ang ka hrelo, ka rinloh lutuka hetiang thil a thlen avâng hian engtianga dawn sawn tur nge tih hriat a har ṭalh mai.

Thawk la ham hamin Damian-a bân chu ka hmer na zual sauha “Hahdam rawh ka tihkha” tiin kawngkhâr nalh zet chu a hawng zuia, chutah maid ho chu lo che mawlh mawlhin inchhûng kan luh rual chuan ka âng pam mai. Thil awm reng reng chu an nalh in an to dâwn tih hriat vek hian an mawiin an thianghlima pangpar an khawi deuh far bawk.

Mahsela sofaa lo ṭhu khup te ka hmuh rual erawh chuan ka tim nghal dai mai. Annie bâkah nupa tuak hnih lo awm te chu ka en vang vanga, chutah pa pakhat hmêl chu Damian-a nên an in an êm avâng chuan a pa a nih ka ring nghal bur mai.

Min lo en ṭhap avâng chuan hawi pawh hawi chhuak ngam lo in Damian-a bân chu ka hmer ngar ngara, a ni erawh zâm hmêl pawh a pulo. Ngêng ngalh hian an lam chu min panpuia, “Bawiha vak chhuak suh kan tih che kha, Annie nêna in chung châng kan rel tur thu kan hrilh che sia” a nu ni ngei turin a rawn tihchuan Damian-a chu ka en vata.

Engthil nge ni dâwn ta? Annie nên hian inneih tir an tum tihna em ni ang? An thusawi chuan min ti bing deuh mup mup mai, ni e keite chu an tân chuan ka hniam lutuk tlat. Mi hausa fa nilo chutah ram kilkhawr berah ka la awm zui a nia, engtin nge hetiang khawvêl hriat pawh a mi hausa chhûngkua chuan kei ang mi ṭhing lutuk chu min duh theih teh lul ang ni.

Damian-a chuan engmah sawi lo in ka chalah a rawn fâwp phawta, chutah a nu leh pa lam chu hawiin “Ka hmeichhe duh chu keimahin ka thlang mai ang ka tihkha ka pa, min nawr lui suh u. Annie kha ka duhlo, a ni pawhin kawplai a neih reng kha khatiang hmeichhia ka duhzâwng a nilo tih pawh vawi engzat nge ka sawi tawh, in sumdawnna in tih zauh duh avângin in fate hi chu min tuar tir lo teh u” tiin ka samah chuan a rawn chûl zauha.

“Hei hi ka bialnu ka sawi fo ṭhin chu a nih hi ka nu, a ni hriatah pawh khatiang kha sawi tawh lo ula ka lâwm viau ang. Ka duhloh thawmhnaw hak chu ka tum hauh lo a nia” a ti leh charh charha.

Midang chu an lo ngawi ṭhap thung, engtia han awm tur nge ka hriat ve loh avâng chuan ka ngawi kar renga. An chhungkaw boruak chu a rit ru riau hian ka hria, ka inthiam mawlh lo. A pa hi a thinrim mai angem tihte thlengin ka ngaihtuah a, ka khûr deuh der der reng mai.

“Damian Alfero khatiang in i nu leh pa thu hnial hauh suh, i nupui tura kan hual hi vuan la i ti fuh zâwk ang. Khatiang hmeichhia khân engtikah mah i sumdâwnna thil a pui ve thiam lovang che, Annie erawhin englai pawhin a pui thei dâwn che tih i hria a ni lo'm ni?” a pa chuan a rawn ti hriam deuh hrawiha.

Chu chuan min ti hrehawm viau bawk engtin nge an tih ang? Keimah avângin an inhau ang tih ka hlau bawk si chu ka tâwt ru ṭun mai.

ZAWMNA.

“Ka pa a ni ka neih avânga kan ṭhat tlanna tur ka hrelo, ka duhzâwng pawh ka nei theilo a nih chuan keichuan i ro chan hi ka duh kher lo. Keimah pawhin ka in enkawl thei em em ang” Damian-a chuan a ti hmaka, Annie neih chu a duhlo viau tak tak tih pawh ka hria.

A pa lah chu a thinrim hmêl in a meng rum bawk nên chhuah daih mai te ka duh tawh, Damian-a hian min chelh reng lo phei se chu ka chhuak daih tawh ang ka ring.

“Khatiangin min chhâng hauh suh, i nu leh pa kan nih hi kan duh chu i nei mai tur ani” a pa chuan a rawn ti leha, a insûm nasa hle tih pawh ka hria. A nu erawh chuan a pa chu insûm turin a lo ti ve thung “Puitling ka ni tawh ka pa, ka duhthlang turin thuneihna ka nei ve bawk. Hei hi ka bialnu a ni a, a ni zahna chhe te tal hi lantir ve teh u” tiin a chhûngte hmaah chuan min dinpuia.

Annie erawh a chhûngte nên chuan an lo ngawi kar thung “Khatiang i hriat chian loh lût thar mai mai kha i ngaizawng a maw? Eng mi nge a nih pawh i hre chiang hman em ni?” a pa bawk chuan a rawn ti leha. A mi en dân avâng chuan kei erawhin hnuailam ka bih ngar ngar thung.

A rûk chuan hrehawm ka ti hluah hluah tawh mai “Ni e rei lote ka hriat hian ka thinlûng zawng zawng a luah te pawh animahna. Reilote chiah la hre mah ila a ni aia hmeichhe ṭha tur ka hrelo, ka pa i sawi fo a ni lo'm ni? Hmeichhe hmêlṭha satliah leh nei nung satliah nilo in i neih sum en lova nangmah i nihna anga en thei zawk che thlang rawh i ti ani lo'm ni?” tiin a pa chu a melh ran rana.

A thusawi chuan min tilawm ru veng veng thei, a pa pawh a hmêl hmuh a nuam ta deuh. Chutah keichu min rawn enin “Lo kal teh nula” a tihchuan Damian-a chu ka en ha a, ka hlauthâwng takzet. Mahsela Damian-a mitmenga hahdam tura min duhna ka hmuh chuan tlêmin ka awm anuam ve deuh.

“Hlauthawng suh i bulah ka awm reng hi engmah hlauh tur i neilo va kal rawh le” tiin ka chalah chuan a rawn fâwp vang vanga. Keipawh in ti huaisen in a pa bulah chuan ka va kala, chutah ka kutah lo vuanin “Tunge i hming?” a rawn tihdam dap tâkah chuan tlêmin ka awm anuam huaia.

“Fiona” tih zawng chuan ka chhâng a, ka ṭawng ṭha ngamlo a ni ber mai. Kan dinhmun a inthlauh zia ka hre chiang bawk nên min iai a nih pawhin dem thei ka nilo. Mi hausa tân a mi rethei lo ngaihzawn kha chu a tlâwm lâk thlâk ve dâwn em a ni.

“Khawi aṭanga rawn kal nge i nih le?” a ti leha, Damian-a ka en chu a nu bulah ṭhu in a nu chu a bek bawr sar sar lehnghâl. Kei zâm em em a ka awm laia a hahdam hmêl lutuk chuan amah min ngei tir lek lek mai.

“India ram hmun pakhat Mizoram aṭanga lo kal ka nia,” tihzawng chuan chhâng leh in ka thaw haka. “Min hlau em ni?” tiin a nui ta suka, Damian-a nên an in ang takzet, a nu erawh Damian-a hian a sam rawngah chiah a chhûn. A pa sam a buan thang laiin a nu leh a ni erawh an sam a dum hlap thung.

“Bawiha i bialnu chu a va ṭawng tlêm hmêl ve, Philip keini chhûngkua chu tikhan ṭhian anga awm tlang a ṭha mai lo em ni? Hei kan fapa berin bialnu a nei ta miau si a, kan sumdawnna pawh kan fate innei kher lo pawhin a tih theih ang chu” Damian-a pa in a tih tâkah chuan ka lo thaw huai mai.

Annie erawh a lâwm hmêl vak loh, Damian-a chuan min rawn en in “Dad, mom ang chiah a nihkha. Thinchhe deuhin a thusawi erawh a dik thei teh ania, a lawm zâwng pawh hote mawle. Mom nên hian an inmil dâwn tih ka hria” tiin Damian-a chu anui suk suka.

Annie erawh a nu leh pa chuan chhuanlam siamin an haw zui daiha, Damian-a te erawhin ngaihsak ang pawhin an awm leh tawh lo “I hmêlṭha hle mai, i hmêl chuan Philippines lam te pawh a pâwl lek lek a nih hi, in ram chu ka lo hre ve zeuh tawha. In cultural Dance kha vawikhat chu ka hmu ve tawh, helam mite'n an show ah khân min sâwm ve a, in hnam hming chu tlêm chuan ka hre ve deuh” a rawn tihchuan ka bu nghat nghata.

“Kan tam lêm lo a, ram tetakte mai ania. Helam ang em em chuan mihring pawh kan tam lo, ka nu leh pa in heta ka rawn kal hi an duh tlat sia” ka ti sepa, “A ṭhat nasat chu rawn kal tir lo ta che sela kan fapa hian hetianga min hnial ngamna tur hi a nei ang tih pawh kan hre tawp nâng, nangmah avângin a nu leh pa min hnial ngam ania” tiin a nui hawk hawka.

Chutah a nu zâwk chuan “Tirawh in hi ka fan pui ang che, an pafa hian lo in bia sela hmeichhe thu an ti leh dâwn si a i kalsawn daih ang, bawiha room te pawh ka hmuh ang che” a tihlai chuan Damian-a chuan “Mom kha chu keimahin ka hmuh ang, hmun hla ah lo kal pui hauh suh. A chhûngte an strict teh mai a nia” Damian-a chuan a rawn ti ve zata.

Chutia boruak a inthlak thleng hlawk chuan hah a ti dama, keimah ngei pawhin nuam ka ti bawk. A nu chuan an inchhûng chu min fankual puia, a titi pah bawrh bawrh bawk. Damian-a unaute chu Los Angeles lamah a pi leh pu bula an awm thu a sawi chuan hmuh ve ka châk ngei mai.

Amah ang bawka an hmelṭhat ka ring ve ringawt, “Nu Daisy min ti mai rawh aw, i duh chuan min nu thei bawk ang. Kan fapa in ina a duhthu ngeia a hmeichhe rawn hruai luh hmasak ber i ni” a tihchuan ka en nghal ha a.

“A luhlula, a thu hi a duhin a pa a chhunna lam tak ania. Bialnu a sawi ngai awm kan hreloa, chuvanga Annie nên pawh sawi rem tum kan nia, a chhan chu bialnu a neih loh rau rau chuan a pa nên hian kan thawhpuite nêna in pawh leh zual nâna tih kha a ṭha mai a kan rin vâng ania, mahse hei rin loh lutukin niminah khân a sawi khauh a, mahse a pa hian a fiah ve duh avângin a rawn hruaitîr cheu a nih kha” a tihchuan ka thaw deuh huai mai.

An in lah chu a zauin a mawi takzet, thil awm reng reng chu an felfai thlarha. Pangpar an uar dânah nu Daisy hian pangpar a ngaina hle tih ka hre mai, hmeichhe awmna hi chu a hriat ve ṭhin anih hi. 

“Baby” banga thil in tar ka lo en malh malh lai chuan ka hnung lam aṭangin Damian-a chuan min rawn kuahin ka biangah chuan a rawn fâwp zauha. A nu a awm ve reng bawk nên ka zak ngei mai “Ka room i hmu châk tawh em? Ka hruai ang che” ti a min kalpui mai a tum lai chuan a nu chuan min lo dang leh riha.

“Dinner ei ve nghal sela, riak rawh se. I pa nên pawh la kawm te kan duh dâwn a, a chhûngte number min lo pe teh u kan lo be mai ang” a tihchuan ka hamhaih ngei mai. Nutei te an nia anga maw? Nutei chuan min tilui leh nasa viau ang.

Damian-a chuan a neih loh miau avângin keimah chuan nutei number chu ka pe a, Damian-a chuan min kalsawn pui zuia, in chung lam min pan puiin room hmasa berah chuan min luhpuia, ka âng nghal pam mai. Engkim chu bâng chenin a dum vek mawle, mafia ho room ang mai ani a thim khup mai.

Chutah banga a thlalak in tar chu ka enkual dan dana, a naupan lai thlalâk ka hmuh rual chuan ka pan nghal vata, a ha bal seu ka hmuh chuan ka nui lo theilo, a va han duhawm tak. A naupan lai pawhin a hmêlṭha tho mai.

“I hmeltha reuh e, i ngai reng a nih hi. I ha tê hi ka duh reuh lutuk'” ka tihchuan rum deuh nghatin ka kâwngah chuan rawn kuahin alamah min pawt hnai deuh salha. 

“Khatianga min nuih kha ka duh hauhlo ania, thlum ka ngaina lutuka ka ha a chhiat phah thu tûn hnuah hian ka nu in min hrilh ṭhin, tûnah erawh ka ei tam lo mai pawha. Thak hi ka chhûngte ang lo takin ka ngaina a, nangmah nên kan inanna lai tak pawh animahna” tiin min pawm kâng nawlhin a khum lam chu min panpuia.

A khum puan chu satin vek a ni a, a phah chu a dup nuam hle bawk. Min mutthla riai riaiin ka hmuiah chuan a rawn fâwp zui chata, keipawh chuan ka lo chhâng ve zêl bawk. Amah a nih avângin ka thla a muanga, nawmna mak tak hian min tuam deuh chiai chiai bawk.

Ka nghâwng a rawn fawh a vâng chuan nui deuh hak hakin a samah chuan ka ṭhâm sak nak naka “I muhil hman ta siloa i mut ala chhuak em?” a rawn tihchuan ka lu ka thing nar nara, tûnah chuan mutchhuak lam ai mah chuan zahpui hauh lova a chhûngte hmaa min ṭan ngam khân rilru aluaha, mutthilh lam chu ka ngaihtuah thei der lo.

Nui leh ṭhin in amah chu ka en a, ka lungawi hliah hliah mai. Ani pawhin a theih chuan keipawhin ka nu leh pa hnênah kan inkar hi ka sawi ve vat chu angai ani, a ni pawhin zahpui hauh lovin ka nihna ang angin min pawma, keipawhin ka thup reng chhan tur ka hre biklo.

Kan intawnna la reilo mahsela a rilru a nghet dâwn tih pawh ka hria, chu chuan ka thla a timuang bawk. Min tihnat mai mai ka ring hauh lo bawka, min tina a nih erawh chuan keipawh ka danglam mai ania'ng chu.

“Mutthilh pawh ka duh lo, ka lawm e aw khatianga i nu leh pa hmaa min ṭan kha ka ring pha lo. Keipawhin engtikah emaw ka nu leh pa hmaah ka la inhmelhriat tir ve ngei ang che” tiin a biangah chuan ka chûl sak heuh heuha.

“In rama kan kal hunah aw? Kan sawi tawh kha kan kal ang tih, ka nu leh pa pawhin an rem ti ngei ang, keichuan hei ngawt hi ka ngaihtuah” tiin ka hnute chu a rawn ṭhâm salha, ka hnute hi a tê chhe hauh lova. Keimah thau lam ka nih avâng hian a lang lian viau ṭhin bawk, chutia a rawn khawih chu nghal tizet hian ka ena.

“I zak lo lutuk aw, khatiangin rawn khawih ringawt suh. Ka muhil leh si dâwn i nghal dâwn tlat” ka tihchuan a nui deuh vur vura, bâkah a khum hi mut a nuam bawk nên englai pawha mut a châk awm hliah hliah mai.

Nui deuh var varin a mah khan deuh chial chung chuan ka thawchhuak siai siaia. Chu chuan hahdamna min pe chiang hle, ka kâwngah kuahin ka chalah chuan a rawn fâwpa. “Engtikah tak ka rilru ang hi pawm ve ang che maw? Mahse ka nawr lui ngai lovang che ka tih tawh kha” a tihchuan a thusawi awmzia ka hre chiang viau.

Tûnah ngei pawh hian hnuailam che tual tual chu ka hriat hmaih lo, mahse ka thu a zah avângin a insûm hrâm hrâm tihpawh ka hria, chu chuan ama lakah pawh ngaihngam na min pe a, min tilui ngai dâwn lo tih ka hriatna hian min ti thlamuang bawk.