DUHLAI ZORINPUIA CHAPTER 15

DUHLAI ZORINPUIA 

CHAPTER 15

“Awi ana hi ka ti emai” ka kâwng dawm chuan ka eu al ala, u Rinpuia chu a la rawn nui huk zui. “Khawi maw mu teh, ka lo ti dam ang che” tiin ṭhutthleng lam chu min pan puia, ka hnial peihlo. Ka kâwng hi a na tak taka, a kham hluah hluah bawk nên lo hnial mawi vêl kha ka peih lo.

Ṭhutthlengah chuan bawkkhupa mu in ka hnung zângah chuan min chum sak dat data, ka nuam nghal suai suai mai, rawng ka bâwl zo tawh bawka. Tih tur dang awm tawh hek lo, ngaihtuah tur dang ka nei lo bawk nên ka mit ka chhing diar diara.

“A zia deuh em?” a tihchuan ka bu nghauh nghauh mai, chutia kan lo in buaipui lai chuan pâwn lamah thâwm a rawn awma “Aiah! Awi ka nu, ka mawng a hîk vek, a thlêr vekin ka hria” tih ri rawn ri chûl kârah “Ana, ka tilmu a keh dâwn Laldampui tho vat rawh, awi a chhe zo vek anga” tihri in a rawn zui bawk.

U Rinpuia nên chuan rang zetin kan tlân chhuaka, kawmchhak lam kan en chu ka in panna kawng chhuk laiah chuan Sawma te ho lo awmin Mama leh Faka an lo tlua, an tlûk dân lah chu ani nuaih mai.

“Laldampui tho zung zung rawh ka tihchu, awi ka nu ka kap a chhia” Faka lah chu a au nasa tawh mai si. Nuihza lutuk chuan ka ena, ka nui khûr dawt dawt mai, puih lam pawh rilru ah a lang theilo; u Rinpuia chu ruahsur hnuaiah chuan kal hmiahin a han puia, Sawma leh Kimkima lah chuan kaih thawh na châng pawh an hrelo, an lo nuih char char mai.

 “Ka khuate hi a sik dâwnin ka hria, i kalna en ve ta che. Engvangin nge min rawn delh kher, ka chi thlahna zawng zawng i ti chhe zo, i hria em? Ana lutuk, i vawihnih tihna a ni tawh” tiin Faka chu ala kûn ngawih ngawiha, a na viau a nih ka ring. Ruahsur hnuaiah awm ê tilo chuan a hmai a sen ṭûn a, a khawngaihthlak zâwk. 

Mipa hi chu an sahuatna lai hi a hriat khawpa, an sawi dânah hmeichhe nau vei ang vêl an tih kha. Nau pawh ka la vei ve lo nângin ka ring thiam ve ruak mai, u Rinpuia chu a rawn lêt leh thuaia.

“Enge in rawn tih dâwn? Tun angahte in rawn lêng ngai silo, enge tih in tum?” ka tihchuan min chhâng mai lo, rawn chhukin an in beng fai pah paha, mahsela an berh vek tawh nên an fai tak tak chuan ka ring lo, Faka lah a la ner sawk sawk renga, a na viau a nih ka ring.

“Engmah, chaw kan rawn ei dawn mawle, inah chawhmeh a tui lo thei lutuk. Bâkah i rawngbawl kan ei châk a, kan rawn kal a nih hi, min hau hauh suh, huh pawh huamin kan rawn kal a nih hi” Sawma chuan a ti zung zunga, lo hauh chi pawh an nilo. An in sawi khalh nasa emai.

“A dik chiah, maian ringawt kan hmeha, ka hne tawh lutuk. Maian lo deuhte kan duh, taka kha chhawhchhi ka rawn ru, keimahni in kan buai pui nghâl mai ang” tiin tap lam an pana, thirbel chhuangin  chhawhchhi chu an chawk nghâl a.

Ka buaipui ngai lo nên tihdan vak ka hreloa, an mahniin an siam peih ro ro chuan va chuh kher ka tum lo. U Rinpuia bulah chuan Faka chu ṭhu in a la ner nasa maia, a kap chu ala hup renga, Mama chuan a delh nat sak viau a nih ka ring.

“Ka khuate hi a sik dâwn in ka hria, Laldampuia vang vek a ni” tiin a ṭhen chak chaka. Ka khawngaih viau mai “Faka lo mu mai rawh, enkawl dân vak a awm hmêl siloh” tiin ka bia a, a ni pawh a mu nghal hnawk mai.

“Keimah ringawt min puh hauh suh, keipawh ka mawng vun zawng zawng a hîk a nih ber hi. Ka ṭhu ngam lo tih te hi i hria em? In puh thei pawh kan awm lo, Hmingeki kawmchhak kawng nal lutuk vâng vek” tiin keimah chu min rawn la puh lêt daih zuia.

A va han zâm lo ham ham tak, keiin thiamlohna ka neiloa, an rawn tawlh thlu ang tih ka hre bîk tawp silo. “Phun phun suh u, in kalna en ula chuan in tawlh thlu miah lovang, ka in kawng chhiat vâng pawh a nih loh kha, rawn tawlh thlu rawh u ka ti hleinem, chaw ei lah hi sâwm pawh in ngailo. In duh hun hunah in rawn ei mai” tiin pâwn lam chu ka thlira.

Naupang ho chu ka in piah kawrah chuan ruah sur avânga hawk luang ah chuan an lo chêng nasa mai, an thawmhnaw chu a bal eng veka. An chhungte'n an hmuh hunah chuan an hau nasa viauin ka ring, naupang tih tâkah ruah do vel te chu nuam an ti hle tih a hriat.

“Duh duh hunah kan rawn ei lohin kan duh loh hunah a ei theih hleinem. Duh loh hunah chuan engmah a ei theih loh, kan duh hun a ngai, Mama leh Faka kha chu engmah an ei theih pawh ka ringlo, an thi lo chauh a nih kha” tiin an nuih leh haka.

An ni pahnih erawh an tûm kawh nasa mai, u Rinpuia nêna kan boruak an rawn vai bo leh vek tawh. Hêng ho an awm tawh hi chuan induat leh ṭha deuha in biak theih hek loh le, an bengchheng ropui sia, ngawih tawp a ngai, buaina ral lian ho an nih hi.

“Chaw ka lo chhum belh ange, rawn sawi sa ta che u, ka bâwl zo vek tawh lehnghâl. Chaw in rawn ei dawn chuan rawn sawi zêl rawh u” tiin ka cooker pakhat zawk chuan chaw chu ka chhuang leha, an ni erawh chhawhchhi chu ka rawt thleng neih chhunah chuan an denga.

Faka erawh a che peih ngang lo aniang a la mu reng mai, a na viau a nih ka ring. Mama pawh a si leh vung vung ṭhin “Hming, kekawr hâk hawh tur i nei em? A nih loh pawhin puan ro tal min lo pe teh, ka mawng hi a thip vin tûk tawh. Ka tuar thei tawhlo, a sahal huam huam bawk si” a rawn ti ta ngeia.

Nui hak hakin ka room-ah lût chuan puan ro chu ka va pe a, ka kekawr ah hâk tâwk a nei dâwn lo chiang lutuk. A ni pawh chuan lo la vatin a kekawr vêl chu a phelh zuia “Faka i zia awm deuh em? Nge a la na viau nge?” ti a ka zawh chuan a rawn meng zawka.

“A zia ṭan e, Mama vâng vek kha a lawm, a rah mai duhtâwk lo vin a rawn rap hrual khera. A tirah phei kha chuan a puak dawn te hian ka hria a, khatianga na tih pawh kha ka la neilo, ka thi dâwn hialin ka hria” a thusawi avâng chuan u Rinpuia pawh a lo nui pâwt pâwt mai.

“Ruah sur lai kherin in rawl kala, a fuh lo a lawm. Ruah lah a rawn tam nghal huk nên lei chung lâng chu a huh hneh viau ang, taka ṭiau ah kal ila kan tia. In peih em? Fur a in ṭan tak tak hma in riak lût ila” ka tihchuan an ngawi rauh rauh hlawma.

“A nuam viau ang chu, naktûkah Pathian zara dama kan awm chuan riak lût ila a ṭha ang. Hei ruah hi a sur leh ka ring tawh rihlo, hetiang hunah hian sangha man an awl zual, i ṭhiannu kha lo sâwm la. Hna ṭul tak tak hma hian kal ila animai alawm, mi hriat tam hma a tih hi a ṭha, phai leilet nei thlamah riak ila a ṭha mai, a remchâng zâwk” tiin an lo phur phiana.

Keipawh ka thaw huai mai, hnim an ṭhang chak si a, kan kal vat loh chuan nakinah hnuh pui la in an buai dâwn chauh bawk nên tûna an dinhmun ṭhat lai hi chuh angai reng a ni, keimah tak pawh ka inah in entir an awm ngai lova, damlo an awm chuan keimah zâwkin ka pan tawp zel. 

Bâkah khaw mite ka hriatchian theih phaha, a awlsam phian zâwk. “A nih chuan insiam sa a ngai dâwn a nih chu, ka phûr tawh lutuk. Sangha hâng tui tak mai ka hâwp châk, Chakai te pawh, an awm ang tiraw?” u Rinpuia chu ka en leh ha a.

A ni pawh a lo bu nghat mai, a ṭhiante an awm tâkah chuan a ṭawng duh leh vak tawhlo. Tinge mi bula a awm hian a ṭawng tlêm em em mai le? Ṭawng tam lo na na na chu mi pawi a sawi âwm ka la hre hauh lo thunga.

Bâkah mi kâra ṭawng tam lutuk pawh mi pawi sawi a awla, tum loh tawpin kan rêl duh loh pui pawh relin midang nên kan buai phah ṭhin.

Chuvang chuan keipawh ṭhian ka kâwm tam vak ngailo, hmeichhia phei chu sawisêl tur leh rêl tur kan hre thei bawk si a. In hmuh thiam loh nikhûaah ṭhiante thuruk zawng zawng phawrh sak duh ṭhian kan neih ngat phei chuan kan tân thil hlauhawm ber a ni tawh ṭhin.

“Le, chaw ei kan hman e. Nu ber leh pa ber khân ro han rêl ula, keini in fate hi chu kan lo awm mai mai ang” tiin Sawma te chu an rawn ṭhu thapa. Chaw ei siam erawh an tum tawh ṭhak lo tih a hriat, an duh duh hunah chaw an rawn eia, keipawhin huatah pawh ka la ngailo, ka ṭhian neih chhunte an ni a.

Mipa hi chu han in hauin han in bakkaih châng nei ṭhin mahse hmeichhia te anga in huat zui leh in biak duh loh ang te an nei ve lo, hei hi mipa te ropuina a niin ka hria. An insual hnu lawkah an inkâwm leha, in hauh avânga in rêl leh thuruk in puan sak ang te phei chu hmeichhia te angin an chîng ve ngailo, hei vangte pawh hian a niang, mipa kawm nuam tih zâwk châng ka ngah mai.

U Rinpuia chu rawn tho chhuakin kan pahnih chuan chaw ei chu kan siam dûn a, chaw ei lai te chuan Faka leh Mama chu an ṭhu ṭha ngam meuhlo. An ner leh sak sak ṭhin, pakhat a mawng a pilha, pakhat lah a kap a na bawk. An na a in ang lutuk chu a lehlamah erawh a nuihzatthlâk zâwk.

“Chaw eikhamah damdawi hnawih tur ka pe dawn che a nia Mama, Faka chu eng damdawi nge ṭha ang ka hre bik hauhlo, a nat dân a danglam emai” ka tihchuan Faka zâwk chu a rawn phun nghal hluk mai.

“Ka dam daih tawh, phuba ka la khawp ang. Khatianga kan rohlu ber in tihchhiatsak tum kha ka duh lo rêng rêng” tiin chaw chu a bar zui tawn tawna, keipawhin ka lo nuih hak mai.

Midang erawhin engmah an sawi tawh lêm lova, chaw chu a phai leh duak duak tawh mai. Ka inah chaw an rawn ei tawh chuan chaw ṭhing ka nei ngai hauh lo a, mipa rual an ni bawka an chaw lâk lah a na, chhum ang ang hi an ei zo duak zêl.

Chaw an la ei thei tlâng bawka, chaw eikhawm pawh a nuam. “Ruah pawh a bâng ta , a nuam huai huai mai, ruah a rawn sur vak ang tih te pawh a hlauhawm a lawm, chutilo chu naktuka kan thil tum a tlawlh palh ang tih ka hlau” tiin pâwnlam chu ka pana.

“Thil tih tur hi i hre thei sia maw” Maman a rawn tihchuan ka nui haka “Hre ve bawk ang chu, tih tur hriat te chu hriat loh ai chuan a ṭha zâwk a lawm, Faka enge i an?” ka ti nghal zata.

“A reh tawh, tûnah chuan ka dam var var” a ti chu Sawma te ho chu an lo nui haka “Thi tur râka i han rak tak tak kha chu i thi tak tak dawn emaw tih tur a ni, i aw râwl lah hi a ring mai sia. Naktuk lui lama riah luh kan tum chuan haw hma ila insiam te pawh a ṭha e, kan nghakuai vêl pawh en dik a ngai” tiin an tho chhuak phak phaka.

“Kan current lah hi ruah sur dêk dêk se thi reng mai, thli tleh sela a thi bawk. Khawpui a rik hlek lahin a thi bawk, han zâwt chiang ila chu mi khua leh chumi khaw inkârah chuan a chhia an ti leh anga, kan khawram chhûngah hian a chhe ngailo, a chhiat lah hian a chhiatna ngai khawram hlir ah a chhe lehnghâl, hrui chhe chi vek hi an hmang nge, mi ram pawh ṭek tla leh thlipui tleh kârah an êng renga, Mizoram erawh ruah hmite pawh in a delh chat thei ang tih ang vêl a ni” tiin an chhuak paha.

Ka nui hak hak mai, thingtlâng lam phei hi chu current fur lai chuan an nei chhe ṭhin bawk nen an sawi chu a dik chiahin ka ring. Khawpuiah chuan a thih ve pawhin an siam nghal zung zunga, thingtlângah erawh kâr khat chuang te nghah angai a nia.

“Fimkhur ula in tawlhthlu leh ange, in au ring ropui si midang in ti phâwk lêk zo ang” tiin ka au zuia, an inhnial chho leh rap rap tawh mai.

“Fa lian pui pui nei ang vêl ka ni” ti a ka phun sap lai chuan u Rinpuia chuan min rawn ko dut duta “Nu i, lo lût tawh la. In pa hi ka khua a har a nia” a rawn tihchuan ka nui haka, a va han nghal tak.

“Tunlai hi enge i hriata? I inla zei riau mai, ka hlau deuh riau mai che” ka ti chu rawn ding chhuakin alamah min pawt nghâl dawrha, a âwmah ka va bei nghâl thlawp mai.

“Zei ve viau lo maw?” a rawn ti leh chu ka insûm thei tawh lo ka nui chhuak uar uara, ka nuih a za tak tak. A mah nên a inhmeh lo lutuk, a ni lah a thutak nasa mai si, chutia ka nuih chu lâwm loh hmêl deuh hian min ena. Chûng te chuan ka nuih an tiza deuh deuh.

“Min nuih tawh suh” a rawn ti tawi tûk mai, a mah lah a tum luau bawk nên hmêlṭha ka ti deuh deuh. A thinrim hmêl hi a pa ka ti tlat peka, a duhawm ka ti ṭhin, hmêl hlauhawm leh rorum lutuk ang kha a put loh vâng te pawh a niang, nêl takin a bulah chuan ka awm theia, inthup vêl ka nei ngai hek lo.

“Awi ka nuuuuu a za lutuk” tiin kûn hniamin ka nui khûr dawt dawta, ka nui ri ṭha thei tawhlo. Ka pum te chu ana urh tawh mai, min rawn chelhin “Nui tawh suh ka tihchu” a tûm len tawh êm avângin keipawh chu ka insûm zui ta thuaia.

Ka nuih erawh a la za viau thung, a kâwng dawm meuhin min en a “Ka thusawi ve pawh khatianga min nuih zêl dâwn chuan engmah ka sawi tawh lovang, i lakah ṭawngkam thiam zawng zawng ka hmang ve a min nuih ziah mai, a hma pawhin i nui ngun lutuk” lâwm lo aw lek lek chuan a rawn ti a.

 “Aw a nih ka nui tawh miah lovang, titaulo la, ka ngaih holam vâng che a ni miahlo ania. Nangmah ka en che hian i inhmeh lo êm a, chuvang chauh chu. Ka nuih tawh miah lovang che, nang chu ka hlimna ber i nia, ka lungngaih leh harsatna ka tawh châng pawha ka hriatchhuah hmasak ber i ni bawk. I engkim hi ka hlimpui avâng zâwkin i lakah thinlung tak takin ka nui ṭhin, chu chu hre reng rawh aw. I thusawi hi ka hlimpui ṭhin mai zawk, chuan ka lâwm em em bawk” tiin ṭhutthleng lamah chuan ka hruai phei leha.

“Ka lâwm chuang lo, ka ngawih reng leh min be rawh i tia, nangmah betu mipa ṭawngkam thiam deuh deuh i duh ka hlaua, ka theih tâwp ka chhuah ve em em a, min nuih hi ka duh lo rêng rêng, mipa ka nia. Chutih rual erawhin midangte anga hmeichhe bem leh an hawi her man zung zung chi ka ni ve lo, chuvang tak chuan ka theihtâwp ka chhuah in ka in ngaihtuah ve a, khatia min nuih uar uar zêl dâwn chuan engmah ka sawi tawh lovang” a ti nghat nghata.

Engmah ka sawi ngam mai lo, ka lo nuih kher kher chu ka inthlahrung zo vek, a âwma bei chung chuan ka ngawi kar ringawta, thudang sawi pawh a inthlahrun awm zâwk. 

“Ka tihpalh, ka nui tawh miah lo tak tak ang. Mahse i thusawi zawng zawng kha chu ka nuih miah lo che a nia aw, i awmdân kha i inhmeh lo lutuka, chuvang chiah chu” tiin ka bân ka phar hliaia.

A thaw huai mai “A pawilo, engtin nge ka tihhlim ang che a? Engtin nge i duhzâwng ka tih ang tiin ka ngaihtuah fo a, keimah avânga i hlim a nih chuan ka thinrim tak tak lo a nia. Keimah avâng chauh hian hlim la ka duha, mipa dang vânga nui tur in ka duh lo che, i nui a nih chuan keimah avângin nui la, i ṭap a nih pawhin keimah vâng tho in ṭap turin ka duh che. Mahse i ṭah tak tak erawh ka phallo, mipa dang vâng phei chuan ṭap turin ka duh hauh lo che a nia, mipa dang vânga i mittui a tla a nih vaih chuan ka lâwm hauh lovang” ti dap dapin ka hnungah chuan a chûl hauh hauha.

“I thikthu a chhe theilo emaw ka lo timai a sin” ni e, mipa thik hi a nei ngai miahlova. Khawmpui lai kha a chhe deuh chu animai, tûnah phei chuan mipa be ve pawh ni ila a thik ngailo hi ka ngaihtuah lo thei bik lo.

“Ka thik lo a ni hleinem, ka ta i la ni pumhlum lova, ka nupui i nih hunah chuan ka khap ngei ang che. Tûnah erawh ka ta i la nilo va, tupawhin an be thiang che a lawm, hauh ṭung che ka duh lova, ka laka i lâwm lohna tur thil phei chu siam ka duh lo. Kan innei kher lo theia, mipa chuan an be thiang che a lawm, chunga lo hauh nghâl bur thei tur che in i lakah thuneihna ka la nei hauh lo. Ka hauh nat lutuk che chuan midangin an thlir dân che pawh a dang thei, ka theih hnu anga an hriat palhna tur che a thusawi pawh ka hlau hle a sin” a tihchuan ka en haw mai.

Hepa hian min hmangaih ve tak tak niin ka hre ta, chu chuan min tihlim a ni. Ni e, ka lakah thu nei lutuk ṭawngkam te hmang fo sela keimah ngei pawhin ka hlat phah ngei ang, midangte min thlir dân tur thlengin a ngaihtuah a. Engmah a lutuk in a ti duh lo tih ka hre thiam ta chiah.

“Hre reng rawh, ka thik thu chu a chhe lutuk, mahsela ka nupui i nih hma chuan tu mipa pawh i be thei. Mahse kan in ngaizawng a nih erawh chuan tumah beiseina pe zâwng erawh chuan be lo turin ka duh che. Ka ring tâwk che ka tih kha, keilo mipa dang i duh ta a nih leh ṭha deuhin sawi la, ka inthiarfihlim mai ang. In kawp ai chuan a hnu hnung zâwk kha thlan hmak tur, a hmasa zâwk kha a pawimawh tawh lo tihna a nimai, duh dang kan neih theih chuan a hmasa zâwk khân kan rilru a luah tawh lo a ni tlângpui” min kuah nghet sauha.

Sawi mai tur ka hrelo, a thusawi chu dik lo pakhat mah a awm lo. Ni e, ngaihzâwng nei renga midang bia a nih pui leh thei te hian an ngaihzâwng kha an hmangaih tak tak lo tih a hriata, kan hmangaih tak tak te lakah chuan kan nghetin phatsan tumna a awm ngailo, keimah ni ah ngaihtuahna an nat phallohna a awm tawh tlat ṭhin.

Ṭhen tak tak ngam silo, midang va bem kual leh dun dun ang te hi ka ngei ber an ni.

“I thusawi chu a dik a lâwm, mahse tumah beiseina ka pe ngai miah lo a nia aw. I rinhlelh turin tu mipa mah ka be ngailo, i duh chuan ka phone i check thei reng, ka huam zak a nia. I lakah thuruk neih ka duhlo, neih ka tum lo bawk” tiin ka hrilha, a nui ringawta.

“Ka ringhlel nem che, ka phone hi check ve kher i duh em?“ a tihchuan ka bu nghata, “Ka ring tho che a, mahse ka en hrim hrim dâwn. Khanu khân a lo be leh che em?” tiin a phone chu ka lâksaka, a lock ve ngai lêm lo. Hei ringawt pawh hian a inrin tâwk zia a ti langin ka hria.

A WhatsApp leh messenger vêl chu ka check mual muala, amahin a biak lêt chu an tlêm hle a, chupawh a chhûngte leh a ṭhiante tih ka hre chiang hle bawk. Chutih rual in hmeichhia zâwk in an biakna a tam ngang mai, tûnlaiah chuan a mipa in a biak hmasak kher ngai lova hmeichhia zâwkin biak hmasak hi a tam tawha, mak ka ti lêm lo.

Chûngte erawh u Rinpuia hian a chhâng lo hrim hrim, nui sakin a phone chu ka pe lêt a, bân phar hluai pah hian a malpui kham chuan ka mu nghâl ar ar bawk.

“Duati palai chu ka rawn tir tawh tak tak mai dawn a sin?” a rawn ti khauh chuan ka en chho ha a, a lo thutak êm avâng chuan chhân mai dân tur ka hre bik lo. 

“Ka kum a naupang zawk zawk tawh siloa, inpui luah tur ka nihna angin kan inchhûng ngeiah ka nu leh pa hian mo hmêl an hmu châk tawh si a, ka hmanhmawh riau tawh a nia” a tihchuan a dik ka ti bawk si.

Mahse tûnah tir ringawt dâwn sela ka nu leh pa rilru ka hre chiangin u Rinpuia te an lo ti zak hrep duh dâwn a ni tih ka hre bawk nên ka rilru a buai ngei mai.

“Ka hrelo le, mahse ka sawi kha u Rinpui nghâk deuh hlek ila, chumi chhûng chuan keipawh ka lo in buatsaih hman dâwn a. Bâkah ka nu leh pa chungchâng ka sawi i hriat kha, lo hmin ka tum phawt ang aw, neih ka duh loh vâng che a ni miah lo a nia” tiin a kut chu ka hûmsaka.

Thil a ngaih dik loh ka hlau takzet, ka nu leh pa hi hel tlat lo se chuan keipawhin inneih mai pawh pawi ka tilo. Rei lutuk in zui pawh hi buaina a tam duh an ti bawk si a, ka nu leh pa hian remti se keichuan ka hnial hauh lo.

Mahsela ka chungah thuneihna an la nei miaua, nu leh pa rem tihna thlapa neih chuan ka tân mai bâkah ka pasal nu leh pa te chena keimah ka zahawm theihna tur a ni ve miau a. Dil leh chhin phawta, an phal ngang lo a nihchuan tih dân dang te pawh ka zawn ve a ngai tawh ang.

“Aw le, ka lo nawr mah mah che a niang. Nghah rei che erawh ka thei tawh dâwn hauh lo ania, inneih dâwn chuan inneih vat ka duha, a hma in khatiang kha ka lo tâwk tawha. Tûn ah chuan tawn nawn ka duh hauh lo a nia, nang nên chuan tumahin min pawh ṭhen ka duh hauh lo, min pawh ṭhen ai chuan kan inru ang, chu chu i ngam em? ” tiin ka kut chu a rawn hmer lêt salha.

Keipawh ka ngaihdan chiah a ni, a nun hlui ka hria a. Rei tak a lo zui tawh leh a mi hriat chian em em in a bum a nih kha, keimah ah a hlauthâwng viau pawh hi a âwm tho mai. A hma anga tihsual leh kha a hlau tih pawh ka hria, mahsela keichuan ka tân a awm theih chhûng chuan phatsan ka tum lo.

A hnênah thu ka tiam tawha, hlen ngei ka tum bawk. Ka nu leh pa pawh ka biak tam phah hle, an ni erawhin Doctor Timothy an duhthu hlir an la sawi thung. Ka pa in min hauh phah hiala, kei erawh chuan u Rinpuia phatsan ka duhlo, tawrh a ṭul pawhin ka tuar mai aniang chu.

“Ka tiam a che, tumah in min ṭhen hauh lovang. Keimah aṭang chuan inṭhenna thu ka sawi ngai dâwn lo, nangmahin bul i ṭan te a nih loh chuan. Eng pawh chu nise chutiang lam chu sawi tawh lo teh ang, rilru a hah mai mai. Rilru hah chu thil tih a nuam theilo, a ṭul phawt chuan inruk pawh ka hrehlo ania aw” hrethiam se ka ti a, a pawm ngei ka beisei bawk.

A lu chu bu nghatin ka kut chu a hmer vang vanga, “Naktuk chu kan riah luh dâwn chuan engtin nge aw, mutbu a hran ṭheuh kan ken chuan kan in keng sêng dâwn em ni? Kan bâwr viau lo maw?” tiin ka ena, “Mutbu kan inṭawm mai ang chu, khaw lum lai a nia.  Lui kam phei chu a lum dâwna, mutbu ken tam angai lo vang, zankhat bâk kan riak nâng, phai khawlum chu bawl a awla, i thak sup sup palh ang” a tihchuan ka en ho a.

“Thak a vei theih maw?” ka la hre ngai hauh lo, ka zâwt lo thei lo. A rawn bu nghat nghata “Phai bawl an tia, taksa a bawl chhuak veka, i in hiat pilh tuar mai ang” a tikher erawhin ka nuih a tiza.

“Ka kal châk tho tho, ṭhianhoa hetiang tih ho te hi a nuam a lawm. Helamah hian bâkah ka la kal ngai lo hrim hrima, ṭiau pawh ka la hmulo, Mizoram luia hming thang pâwl te chu ka hmu ve châk a lawm, Myanmar lam ralah a ni nghala, ramdangah ka la kal silo, ṭiau kan kal chuan ram dangah ka kal a ni nghâl mai a lawm” ka ti chu a rawn nui hawk hawk mai.

“Tirawh insiam sa ang, ken tur vak ka hrelo a nia. Dâwrah zân ei tur leh chawhmeh tur pawh kan lâk sa a ngai ang chu, hetiang ringawt te chuan kan man ṭhat loh phei chuan chaw hmeh kan nei âwm tawp silo” tiin ka room lamah chuan kan lût zuia, puan sin tur pan te leh a phah tur vêl chu kan buaipuia, a mahin ka tum ang a ti erawh ka phal lo thung.

Puan ka ngah a, ka sin sêng chuang lo. Ruah chu a han duak tawha, thla a rawn êng kulh mai, tukverh aṭang chuan a rawn in kâp lût a, êng a awm lo bawk nên ka emergency light chhit bâk eng dang a awm meuh lova, a nuam ngei mai.

“Awi thla en mawi zia hi, tirawh pâwn aṭangin va thlir dun ang” tiin u Rinpuia chu ka kai chhuaka, ka nui var var bawk. A êng fiah bawka, tlâng leh ruam te chenin an lang paw châk a, fiah tak chu nilo mahse thing dingte pawh a hmuh theih hial mai.

“Thla mawi zia hi, mal tak chung pawhin a ên a ṭhulh ngai lova. Ni leh thla anga mal hi an awm kher lovang, mahse an pahnih tello chuan mihringte hi kan awm thei silo. Ni lo a kan awm theih loh ang bawkin thla êng tello chuan kan awm thei silo, an mak e tiraw? Pathian hi a ropui ka ti, engmah reng reng hi ṭangkai lo tura siam a nei lova, thil tê ber aṭanga lian ber thleng hian ṭangkaina an lo nei vek si” tiin vâna arsi leh thla êng mawi zet chu ka thlira.

A châng chuan arsi leh thla ang hi nih ve ka châk ṭhin, tu sawisêl leh rêl mah an kai ve lova. Mitinin an fakin lunglêngin mi tam tak an siama, tumah rêng rêngin sawisêlna tur an hre hauh lovang. Mal viau si hian lunglêng kai tho thei khawpin a êng mawi tlat lawi si.

“Ka tân Ni i nia, i tân pawh Thla ka ni ang. Engtikah mah kan tâwp ngai lovang, inhlat ṭhin mah ila kan awmna erawh thuhmun, thla leh ni in en an tâwp san ngai lo angin kan tâwp ngai tur a nilo. Ka tân chuan ka ni chhuak eng mawi, zingtina min kai tho a, ni thar hmêl duhawm tak min hmuh tir ṭhin tu ini, i tân thla ka nih ang bawkin ka enna hnuaiah awm reng la, thla chuan êng chhuah loh hun a nei ṭhin a, mahse a bo hlen ngai lo. A hma aia mawi leh zuala a rawn êng leh ṭhin angin i lak aṭangin ka lo bo palh a nih pawhin, ka rawn lêt leh ṭhin ang” tiin ka hnunglam aṭang chuan min rawn kuaha.

Ka nui sen sen mai “Ni leh thla an lêng dûn ngailo, mahse an awmna an sawnin an kal bo ngai lova, an ên hun leh chhuah hun an hai ngailo, ên an ṭhulh ngailo tih hre chiang tu te kan ni. Ni leh thla chu lêng dûn thei lo mahsela keini pahnih erawh vanhnuaiah lêng in khawvel khatah kan chêng duna, hmelma tam tak pawh awm mahse kan pahniha kan ṭan dun tlat chuan tumahin min tichhe thei ngai lovang, englai pawhin thla leh ni an boa, an rawn lang leh tawh lo a nih hauh loh chuan i thutiam hlen ngei tum ang che” tiin ka sawi ve dap dapa.

Thla êng hnuaiah chuan ding dûnin ka phone ah chuan Lma leh Mendal hla KA HELLAI tih hla chu ka playa, u Rinpuia chu kuahin ka lâm pui a, ka nui ver ver bawk.

Zân romantic leh hriatreng tlâk khawpa nuam a ni tlat, a thunawn a rik rual chuan min vir puiin kan nui dûn hawk hawka. Tudang mah kan ngai bik lo, kan pahnih hlimna chuan midang min ngaihtuah tir lova, kan pahnih chauh.

Khing arsi leh thla zîngah khian he ka hellai di aia thlan tur an awm bîk lo va, ka tân chuan khawvêl ah ka chhûngte tihloha ka duh ber ani.

Zân a rei tâkah chuan in mangṭha in keipawhin mu tur chuan in lam ka pan zuia, tûnah chuan hringnuna hlimawm lai ber an sawi ṭhin chu ka tawng chho ve mêk in ka hria.

“Awi a nuam dâwn lutuk” phai leilet ah chuan dingin ka hawi kuala, buh kûng hring dap tawh khup chen dâwn dâwn ni tawh tlim hmur chu thlir kualin thla ka la a. Thli rawn thaw heuh heuh te chuan boruak lum lutuk tur chu a tizia awm bawk.

Mawii chu ka bulah a rawn dinga, a ni pawh tûnah chuan a pângngai chho ta viau mai. “Min rawn call a nih hi” a rawn ti chu tunge tih nân ka mit ka sân aka “Amah kha” a tihchuan ka hre thiam mai.

“La rawh a tâwp nân thlah fel la” ka tihchuan a bu nghata, “Aw” a tih rualin lehlam a mi chuan thusawi a rawn nei a nimahna a nui deuh haka “Ih maw? Ka na lo ka tihchuan dâwt a ni dâwn a, nangmah pawhin i âwih lovang, ka na a lawm mahse ka tuar thei” tiin a ngawi leh vang vanga.

A kut chu ka lo hum sak ve ran bawk, u Rinpuia erawh leilet nei ho thlâm hman hawh dil tumin a kal sawn daiha. Sâwma te ho pawh kan piah lawkah an awm bawk, “Ih maw Mk(Hawh chawp ang) Nangmah hre reng chungin hmalam ka pan a, min tihnatna hi mahni intihchak nân hmang zêl chungin ka infuih thar ṭhin . Engtikah emaw chuan ka nui leh anga,ka nuih chhanah tel tawh lo mahla ka hre chhuak fo ṭhin ang che, theihnghilh che ka tum ngai dawn lova, chutih rual erawhin ka hre reng tawh bik lo ang che. Ka hmangaihna che a dai ngai dawn lova, pawm nawn leh tur che erawh chuan min beisei tawh suh” tiin a châwl  data, a thusawi tum chu sawi a harsat hle tih ka hria.

Engmah lo sawi ve lo chuan a bulah ka lo ding ngawi renga, hetia ṭha taka an inbiaka. An sawi dun theih chuan ama tân mai nilo a mipa zâwk tân pawh a ṭha dâwn tih ka hria, an pahnihin dem tur bik an awm lova, a mipa pawh a lo chêt pelh palhna avângin a tih tur hria in a ko a tla a lâk ngamna ah ka fak bawk.

“Ka hmangaih che avângin ka kaltîr che a, i hmangaih avangin thlah ngai suh ang che. Ka hmangaihna che avângin ka hrethiam che a, i hmangaih avângin duat takin enkawl ang che. Ka hmangaihna che avângin ṭap chungin ka kal tîr che a, i hmangaih avângin a mittui ti tla ngai suh ang che. Hlim taka i awm ka duh avângin ka thlah zalên che a, ngaihṭha taka ka awm theih nân a hlimna thlen ang che. Chutiloa  a ṭahna i thlen leh si chuan, hmangaih taka i hlimna tur a nih beiseia kaltîr tu che rilru hi i tina dâwn tih hre reng ang che, ka rilru tina thar tur chuan min rawn be tawh lo la, chutih rual erawhin i rilru hah leh hnemtu i mamawh hunah erawh i ṭhian angin ka pui thei ang che, a bâk rawn beisei tawh suh. Ka dah phawt aw, kan buai dâwn a, ṭhiante zînga phone hman reng ka duhlo, a tâwp nân i fa tan leh a nu tân khân theih tâwp chhuah la, nei ang che. I rai ngam chu nei ngam rawh” tiin phone chu a dah zuia.

“I ṭha tiraw?” ka tihchuan a nui saka, a bu nghat nghat bawk. “Ka zia ta huaiin ka hria, engah nge ka lungngaih reng bik ang ni. A ni pawhin chhûngkua a din vat turah ngai ang, keipawhin ka tâna mipa ṭha a rawn lan hun chu ka nghâk zêl mai ang chu, ka la nghâk chhuak em em ang. A ni erawh kha chu ka hmangaih hmasa ber, ka neih theih tâk loh ni turin ka tawng a, a dawt lehah chuan kumkhua a ka chelh theih tawh tur a nih ngei ka beisei“ a tihchuan ka buk pui nghauh nghauh a.

“A dik chiah, Pathian hian kan tâna ṭha lo tur chu min lâk saka, a dah bo thuai ṭhin. I bialpa pawh kha ka sawisêl lam nilo se tûn thlenga a la rawn beisei che kha chu a ti âwm lo ve deuh chu ani. Hmeichhe dang a rai tawha, mipa a nihna angin a mawhphurhna chu a hlen chhuak ngei ngei turah ka ngai, nang erawh i la nula dâwn chauha enge i lungngaih ang ni? A ni chuan tikhan a nun zawng zawng a nupui leh fa tan a hmang anga, nang chuan khawvêl ila chên dawn chauh a lawm, a ai a ṭha an rawn lang leh nawlh mai ang. Mi ṭha tak tak an tam tawh a lawm” tiin ka kuah thaka.

Thil a êng lama a thlir thei chu keipawh ka thaw huai lo theilo, tam tak hi chu kan hringnunah reilote rawn châm zawkin sulhnu hlu tak tak leh mawi em em mai an rawn hnutchhiaha, hriatrengna kil khata châm reng tawh turin khual an rawn chang a, an chhuak leh mai ṭhin. Kan chelh zawh leh dan zawh miah loh turin bang langtlang ang maiin min rawn tâwn a, an kal tlang leh mai ṭhin a, ṭhenkhat erawh chuan châm hlen turin an rawn in khuara, chhuak leh mai mai tawh lo turin lungphum rinawm tak an rawn phun thung.

Kan duh zawng zawng nei turin siamtu hian min phal lova, lungngaihna leh harsatna kârah pawh huaisen taka engkim hmachhawn kan thiam theih nân kan hringnunah zirlai hautak leh zir chhuah harsa tak tak a rawn thlen tir ṭhin a, awlsam taka kan neih thil chu kan neih hlen theih loh zia min hriat tirin, harsa taka beia, nei thei turin tumruhna leh luhlulna min pe zâwk ṭhin. 

Kan nunah reng reng awlsam taka kan neih chu awlsam tak bawkin an ri rala, harsa taka kan neih erawh a hlut zia hrechiangin kan thlah phal tawh ngai lo, hêng zirlai zawng zawng kan zir chhuah tawh chinah chuan beidawng chung pawha a phêna malsawmna a lo la awm zia hre chunga hmalam pan kan thiam tawh ṭhin.

Kumkhua in kan tlu hlen ngai lova, harsa taka beia tuar ṭang ṭang te nunah a tâwpah hlimna leh khawvêl malsawmna zawng zawng a rawn awm ṭhin. Mite sawisêl leh rêlna kârah pawh ding tlata, beng chhu ngawng ṭhin te chu sawiseltu leh haw tu nei mahse an tlu ngailo, min tluk lo tu tih hriat sa reng reng sawiselna a vâng ngawt chuan in tihchhiat hi ka tum ve reng reng lo.

Chutia Mawii nên leilet kotlanga kan din reng lai chuan thâwk leh khatah Faka te ho chu an rawn tlân chhia a “Hmingi tlân rawh u, tlân vat rawh u. Thingkungah sâwn lâwn rawh u” tiin an rawn au tuar tuar bawk nên en loh chi pawh an nilo.

Chutah an hnungah Lawi lian leh chal em em hian a rawn ûm tih ka hriat rualin ka au nghâl vaka, hlauhthâwnna in ka khat nghal. “Mawii tlân ang, saw min rawn si dawn” tiin kan hnunglamah chuan chak zetin kan tlana.

Chutah thingkung sâng lutuk loah chuan kan van kai nghal zawt zawt mai, ka dam chhûng zawngin hetianga hlauhthâwn avânga chêt ran hi ka la neilo. Ka che rang lutuk chu keimah pawh mak ka inti zâwk.

Sâwma te ho pawh chu kan lâwnnaah chuan an rawn lâwn ve zawt zawta, an ni pawh an rawn lâwn chak ngei mai. Kimkima lah a hnung berah a tlân a, Lâwi lah chu a rawn hnai tawh nasa mai si, kan au chêl chûl tawh.

“Kima rawn zuang kai tawp mai rawh” tiin Mama chuan a kut a lo phara, a ni pawh a a rawn zuang ve mai bawk, an in pawt chho hman lo ang tih kan hlau lutuk chu Mawii nên kan au tuar tuara, Kimkima ke lâk chhoh hma chuan Lâwi lah chuan a ki chuan a rawn pir fuh teuh em em mai lehnghâl.

Ka hlauthâwng lutuk chu ka ṭap pur mai, Lâwi lah chu a kawlh tâwk tih hriat tak hian kan hnuaiah chuan awmin a vei kual thur thura, a mitmeng te chen chuan ka rap zo vek tawh.

Keini lah kan lawnna thing hi a sâng vak silo, kan in man bet fara. “Engah nge i va vuak rêng rêng,nangmah vâng vek a nih hi aw Laldampui;  va tibuai lo la hetianga kan awm a ngailo tur” tiin Sawma chuan Mama chu a vin ti tih, an Lâwi chhaih kawlh lah chu a kalsawn duh bawk silo.

“Engtin nge kan tih dâwn? Ka hlau a nia aw, min pui rawh u” tiin ka au vak vaka “Hahthlak thei, i chhuk a nihloh chuan a tina lovang che, tikhan in pawm bet ve reng mai rawh. Nakinah a kalsawn mai ang” Sawman a rawn tihchuan Mawii zâwk chu a rawn inrawlh vat a.

“A kalsawn lo chu a nih khu, engah nge in chhaih kawlh reng reng. Lâwi hian an huat tawh mihring an theihnghilh mai mai lo an ti a nia aw, ran â tih ngawt chi an nilo. A neitu rawn kalin a rawn hau a nih loh chuan a kalsawn hauh lovang, mi sawi ka hre tawh. An ngêng lutuk” a tih leh lek phei chuan hlauthâwng tawh tak ka ni.

Ka mittui lah hlauh luat avângin a luang zung zunga, ka kut chu a kham ut ut tawh bawk si. In chelh nghet zo lova ka tlâk mai ka hlau. 

Hlauthâwng lutuka kan lo awm lai chuan vin ṭhat ṭhat aw rawn chhuakin chu Lâwi pawh chu aw a hriat rual chuan a kalsawn zuia, u Rinpuia leh pa pakhat rawn inzuiin kan hnuaiah chuan an rawn dinga, chuveleh rang zet chuan chhukin u Rinpuia âwmah chuan ka bei ta thlawpa.

Ka ṭap nghal hliam hliam bawk, ka hlau êm a ni. Khatiang thil kha ka la tawng lo hrim hrim “Ka hlau, ka hlau lutuk. Tinge ilo thlen har em em, kha Lâwi khan min si dawn emaw ka ti tawh a sin” tiin ka ṭap tak âwl âwl a.

Ka insûm buai peih lo, ka damchhungah khatianga hlauh kha ka la neilo, ka lungphu lah a la pângngai thei hek lo. U Rinpuia chuan ka lu ah chuan a kut pakhat a chulin a lehlam chuan ka hnungah a kuaha.

“A kawlh a nia, ka lo hmu lo cheua. Hnaih tawh lo ula a ṭha ang, a neitute hian an rawn vêng vak ngai lova. Ka lo hrilh leh dâwn a nia, tihral dân an zawn vat a ngai dâwn a nih kha, nang ni lo pawh mi pakhat chu a bân a tih tliah sak dêr tawh mai. A huaisar bawk si a, nang ni pawh kha tlêm a tlêmah in na lo chauh a nih kha” tiin pa pakhat rawn tel ve chu a kalsawn zuia.

Mama chu an hauh rawn nghal luai luaia, u Rinpuia pawh a lâwm vak lo nge rum deuh tak hian Mama chu a ena, a ni pawh a inthlahrung tih hriat takin u Rinpuia chu en pawh en ngam lo in a kûn daih lehnghâl.

“Hau suh aw, an thiam loh a nih loh kha. A kawlh ang tih an ring bik lo ang, ka hlauthâwng mai mai ania, ka ṭha tawh lutuk. Ka bulah i awm tawha, ka hlau tawh miahlo” Mama inthlahrung hmêl ka hmuh chuan ka awm a nuam lo bawk nen ka ti ta zung zunga.

U Rinpuia pawh a hmêl a dam leh dup tawh “Nidangah chuan fiam tawh loh hrâm tum ula, ran chu an â a, an âtna avâng reng hian an luhlul bawk a nia, tlêm a tlêm ah Zâwng ah in ṭang lo chauh a nih kha, thingrah ang mai“ a tih tâkah chuan midang pawh chu an rawn nui leh thei ta.

“Kan hlauthâwng tak tak bawka, Hmingeki pawh a hlauhthâwn chuan a tlân chakin che rang tak hi ani, thingkunga a lawn ka hmu tawha. Ka hmuh hmasak ah kha chuan muang chângin lâwn ṭha thei lo ang mai khân a awma, tûnah meuh kha chuan e. Khawvêla thingkung lâwn hnehsawh ber ang mah a ni, a zuanin a zuang kai nawlh mai a lawm” Sawma chuan a rawn ti a.

Ka ngei bawk si, a sawi dik bawk nên ka tin uaih uaih ringawt “Thlam chu kan hmang thei dâwna, phei ang u hmiang. Kan chêt vat loh chuan khua a tlai mai dâwn” tiin ka bag chu a khai zuia, a hnungah chuan ka zui nghal vat.

Kha Lâwi kha a rawn lêt leh a nih vaih chuan ka thidang thei tawh hial ang, a ki lah kha a seiin a zum ropui si. “Ka kal theilo” Mawii aw rawn chhuak avâng chuan kan ding ṭhapa, alam kan hawi chu a ke a lo dawma, kan hnaih nghâl ruak mai.

“Engtin nge a awm? I bilh sual palh em ni?” tiin ka en saka, a lo vûng deuh al tawh lehnghâl. “Kan tlanchhiatna lamah khan ka rap sual palha, sawi hman a ni tawh siloa, mahse hei a rawn na ta phian a nih hi, kal luih ka tum ngiala ka thei bawk silo” a tihchuan u Rinpuia chu ka melh zawk a.

Midang zawng hian bungrua hi keng phei ila Faka nang rawn paw rawh, i vei deuh nu a nih kha. I puak loh chuan a awm loh hunah keimahni te min mawhchhiat leh hlauh ange, mahni duhber te chu thup ṭit ṭêt lova lan tir pawp pawp mai tur. Ilo hnial leh ange, i awm a nuam lo leh hle mai tur a nia” tiin midang chu an kalsawn diala.

Faka hawihai sawi tûr hre lo hmêl chu a khawngaihthlak zâwk, midang ho lah hian tihluih an peih ropui bawk sia. “Lo kal rawh, an thusawi kha dâwt vek a nih kha. Ka duh hauh lo che” a han ti leh hrama, u Rinpuia nên chuan in en in an hmuh loh lamah kan nui dûn saka.

“Min duh pawh ka tih loh kha, i sawi kher a ngailo. Keipawhin ka duh lo che, kal zung zung ang che. Thlâmah ka hmeh tir vat duh, hetiang chuan ka hmang nuam ve thei lovang”  tiin Faka hnungah chuan a lâwn zuia, an in puak tâkah chuan keini pawh u Rinpuia nên chuan hnung dawlin thlâm lian ṭha hem hawm tak lam pan chuan kan kal zuia.

Faka leh Mawii pawh an in hau phei leh a ni ber, pakhat in i rit si nu thau a tih laiin pakhat lahin “Ka rit  ve ang chu, nitin chaw ka ei a ka rih belh lohin mihring dam lai zân reng thu awm suh, i thi te a nih loh chuan nangpawhin chaw i ei tho vang chu” Mawii lah chuan a lo ti ve bawk.

Hetiang em em a inhnial nuam ti hi ka la hre lo, ngaiah an neih tawh ni berin ka hria. An inhmuh tawh chuan inhnial lovin an awm theilo hrim hrim.

Thlam kan thlen rual chuan in nghat sap sapin kan mut duhna lam kan thlang hlawma, Mawii nên kan mu tlâng dawna, u Rinpuia lah in min hlatah mut a tum der lo. Keipawhin pawi ka ti em em lo bawk, vawikhat mah helai hmunah ka la kal lova, thla a muang lo riau.

Mipa ho chuan thlam chhûng chu an singsak fel laiin Mawii nên erawh zanriah ei tur kan bawl zui mawlh mawlha. A ni pawh a ṭawng tui barh barh hle,  a ke na an hmehsak a a lo bilh na lutuk lo a nih hmêl, nui dûn hak hakin nuam kan tih thu chu kan in hrilh tawna.

Mipa ho bengchheng leh lutuk chu a ninawm zâwk “Lalmalsawm in thâwm te kha dim ve ta che u, khatianga ram palailenga au tuar tuar mai, mi hriat loh in hlau em ni? A titi ve theih reng reng hleinem” tiin ka hau hlak hlaka.

“I thinchhe ve sia maw, i bialpa nih hi chu a peihawm loh. Hmêlṭha thinchhia tih i ni ringawt dâwn a nia,  Rinpuia hian engtin nge a ngaihzâwn peih zâwk che, bawp kuai deuh si hian i aw râwl hi a ring si” Sawman a rawn tihchuan rum zetin ka ena.

“Ka bialpa hian zaidam rawh min ti kher lo, tin zaidam avânga an fel bîkna leh an rilru ṭhatna bik sawi tur i hria em ni? Zaidam si, mi hmuha fel deuh mahse rilru chhe si hi an tam a nia, mi thinchhia lang chhuak phawng phawng ṭhin hi an rilru a chhia i ti bikin ka ringlo. Mi langtlang tak an nih avângin an mahniah thuruk a awm ve lo, mi ngawi chit chet ṭawngtam lo anga lang te hi a rûka mi era mi chhiatna sawi peih peih an ni duh châwk ania” ka ti chu an rawn eee nasa mai.

“Tiru tui va chêng ang u, in in ṭawng tui dâwn tlat, in taksa chiah daih in mamawh. In thluak te kha va chiah dai ang u” Mama chuan rawn tiin keini pawh rawng kan bawl zo tawh bawk nên kan tho chhuak vata.

Inthlâkna tur vel chu la in thlam aṭang chuan kan chhuak sap sapa, thlam piah kawrte tui luanna ah chuan in ti faiin mipa ho awmna aṭanga a fâl deuhah chuan kan inbuala, an ni erawh an au leh lauh lauh tawha, anuam kan ti tlâng hle tih a hriat, kan inbualna chu kawrte a nia, a tui a fimin a dai raih bawka, a nuam viau lehnghâl.

In tifai zung zungin Mawii nên chuan kan inthlâk zuia, thlama kan lêt hnu lawkah mipa ho chu sangha man turin an chhuaka, dinamo an ti emaw ni an hawlh dâwn a nih hmêl. Ka la hmu ngai lova, en ve ka châk si u Rinpuia chuan a phal tlat lo “Zan thil a ni a, tui a tam si a, chêt sual a hlauhawm” a ti tlata, keipawhin ka hnial duh bik ta lo.

Ka tih luih leh chuan atân pawh hahthlâk chan ka chang dâwn tih ka hre chiang viau mai. “Anih ka lo awm ange, va hlawhtling mawlh ang che u, reilo ula aw. A reh bawk si a, a nuam miah lo” tiin ka vai liam zuia, Mawii nên chuan thlâmah kan pahnih chauhin kan awma, a reh nghâl em em ringawt, zân hrâm chi hrang hrang chu hriat tur a awma, ṭiau lui luang ri te chenin.

Thlam tukverh aṭang chuan thla êng a rawn in kâp lût raiha, chulam pana ka dah chhuah rual chuan ka thaw chhuak nghal suai suai mai. Zân thlaêng hnuaiah chuan phai buh tlim hmar chu a lang theia, kan awmna hi ruam zâwl lai a ni bawk nên tlâng sâng pui pui kâra awm ang mai kan ni.

Hawi kualin thla êng chu ka thlir vauh vauh a “Engtik nge u Rinpuia nên hian inneih in tum?” Mawii thu rawn sawi avâng chuan amah chu ka en ha a “Aaaa dam chuan nakkum lamah te chuan kan tum ve ang chu kan tia, mahse midang hriat thu suhah tûnah pawh inneih chu kan duha, ka chhûngte lam aṭang hian buaina a la awm tlata, thingtlâng mi hi min duhpui chiah lova” tiin ka sawi phawnga.

“A hahthlâk a nih hi tiraw? Nu leh pa te pawh hian kan kawppui tur hian duh bik hi an nei leh zêl a, fate duhzâwng mi ngaipawimawh der lovin an duhzâwng tho mi neih tir an tuma. An nulat tlangvâl laite hi ngaihtuah lêt ve sela hetiang reng hi an ni lovang mawle, tam tak chuan thingtlâng mi hmuhsit hi an la hmanga, kei ngei pawhin facebook lam aṭang ngei te pawh hian ka hmu tam a sin, a âwm ve tho. Mahse mi ṭhenkhat in a thingtlâng kan nih avânga zirsang lo leh thingtlâng mimâwl min ti fo hi chu a dik lo ve deuh a ni, thingtlangah pawh zirna a awm veka, khawpui lama zir chhunzawm pawh an awm ve thoa, khawpuiah pawh sawisêl dâwn chuan thingtlâng mite pawhin khawpui nun sawi tûr hi chu kan ngah mawle” tiin a nui hak haka.

A dik ka ti viau, thingtlâng an nih avângin mâwl viau turah kan han ngai ngawt ṭhinte hi a ṭha lo. Lehkhathiam leh zir sâng tak tak khawpui ang thovin an awma, khawpuiah pawh lehkha zirsang hna hmulo kan tam ang bawkin thingtlangah pawh an awm ve ṭeuh a, tumah in hmu hniam tur chuang kan awm lo, Mizo vek kan ni a, engtiang pawhin in la changkang mah ila thlahtu in ang vek tho kan ni miaua.

Tlin lohna lai hlir inhmuhsak tur ni ila tumah hi in remin kan awm reng thei hauh lovang.

“Nun hi a hahthlâk a nih hi, keichuan u Rinpuia bâk hi neih ka tum lo. A ṭul leh ka tuar mai anga, nu leh pa chuan min hmangaih vâng ni bawk mahse an fate hian hmangaih leh duhzawng kan nei tih hi an pawm ve a ṭul in ka hria, hausakna tur ringawt kan ngaihtuah dâwn chuan mi ṭha tak tak chu an awm ang. Mahsela hausakna in a lei theihloh zahawmna leh hmangaihna, hlimnate hi keichuan ka ngai pawimawh zawk, u Rinpuia aia ka tâna ṭha tur ka hre bik lo” tiin ka hawi vauh vauh a.

“Ni e hmeichhe tân chuan min hmangaiha, min duat theitu hi an ṭha. Sum ngah si chhungkaw hlim lo leh buai reng te hi an tama, rethei tê chhungkaw hlim leh in pawh tlâng tak an awm bawka, keipawhin sum tam tak neiha hlim siloh ai chuan retheite ni chunga nunhlim tak neih chu ka thlang zâwk” a rawn ti vea.

Kan thu a inhmu thei bawk nên keipawhin a kianga thusawi chhuah vêl hi nuam ka ti ṭhin. Thu inhmu hleitheilo, ngaihdan nei hrang ṭhin bula thusawi hi chu a nuam lo ve êm bawka.

“Mipa ho hian enge an ngaihtuah ve ṭhin ang le? An rilru te hre thei ila chuan rinawm thei tur te hi kan thlang nalh nalh mai tur a nia, an ni chuan hmeichhia min en hian kan nungchang leh chêtzia aṭangin an hre zung zunga, an ni erawh han bêl chiang dâwn ila hriatthiam an har deuh deuh lai hi siamtu in hmeichhia aia chungnunga a siam chhan pakhat ni ve in ka hria, an rilru hi hriat a hara. Min hmangaih nge hmangaih lo tih te pawh hi in zawh nawn fo a ngai a nih ber hi” kan pahnih chuan kan sawi dûn ve nasa mai.

Chutia kan titi mawlh mawlh lai chuan thlam piah thingbuk hnuai aṭang chuan eng emaw thâwm rapthlâk deuh hi a rawn chhuaka, Mawii nên chuan kan mengphawk nghâl hra mai, chutah thlam bang te chu a inhiat ri ṭawk ṭawka. Mawii nên chuan kan au deuh tuar bawk.

“Engthil nge ni ang le? Ramhuai em ni ang” ti a ka zawh lai chuan a hriat bik loh thu in min rawn chhâng a, thla a muang lo takzet. Chutah patling natuar rum kâwk kâwk ri chu rawn chhuakin Mawii nên chuan kan in pawm chawta, ka hlau takzet. 

“Engtin nge kan tih ang? Ka hlau a nia, u Rinpuia te ko mai ang” ka tihlai chuan “Eng hi on phawt ang, an rawn lêt har ka ringlo. Tûnah chhuak ila a ṭha lo zâwk, engmahin min tina lovang, thâwm bâk an siam thei hleinem” tiin a sawia, engtin nge hlau miahlo anga a awm theih bik le? Keichu ka hlau takzet, ka thla a muang lo bawk, thlahrang hi ka ngaina lo.

Dâr 10 vêlah mipa ho pawh chu an rawn lêt a, chu veleh rang taka tlân chhuakin u Rinpuia rawn pên lût mêk chu ka kuah chawta, ka hlauthâwng bawk nên ka khur dar dar mai. 

“I ṭha em? Enga tinge hetianga i awma? Enge thleng” a rawn tihchuan ka kuah nghet sauh sauha, midang pawh chuan mak min ti tih ka hria. Mawii zâwk chuan rawn chhangin “Thawm kan hria a, patling na tuar thâwm te, thlam bang te hi a rawn hiata, mahse a thâwm kan hre reilo” a tihchuan u Rinpuia chuan min kuai dâk zui vuta.

“Helai vêlah hian tui tla hlum an awm tak kha, mahsela a hlauhawm loh ang, a rawn hrân leh leh kan lo vin hrep dawn a nia” Mama chuan tiin an nui zui haka, chutia mipa ho an awm tâkah chuan keipawh ka thlamuang ve ta deuha.

An sangha man te chu phawrh hlawmin an buaipui zui mawlh mawlha. Lêng phar an tih phei chu an mahni sawi dân takah sangha ah chuan a tui ber an ti bawka, ka ei châk tawh lutuk tlat. Hnâng hmanga Sangha rêp na tur an siam chawpah chuan rêp ṭhap in mei chu kan chhawm ṭha a, a ṭhen chu zînga buaipui ngai lovin kan chhûm sa bawk.

“Sangha an la tam a nimaw? In man hnem emai, hetianga tam hi vawikhat a man ah phei chuan ka la hmulo, keini kan ṭhian hoa kan kal chuan maw tlêm te sâwm vêl lek bak kan man ngailo. Sangha an vâng tawh lutuka, helai chu a la tam a nimaw?” tiin ka ṭawng ta barh barha, u Rinpuia kiangah ka awm tawh bawka ka thla a muang viau tawh, min venghim dâwn tih ka hriat avâng te pawh animahna ka thlamuan em em ni.

Ka mut chhuak chu ka ham leh buai buai ṭhin “Hmeichhe pahnih kha chu lo mu mai rawh u, kan lo vil ang, kha Hmingeki phei chu a hâm hmelchhe tawh lutuk, sakawr hâm ang mai a nih tawh kha“ Sawma chuan a rawn ti leh khera.

Hepa hi chuan mi rauh hi chu nuam a ti mawle, rauh let ila a tûm leh bûr awm sia. “A dik lutuk, keipawhin ka hmu, a hâm chiah kha chu a hmêlṭha tih chi a ni tawh lo, a chhiat in a chhia” Kimkima pawh chuan a rawn ti ve bawk nên midang nuih na kârah nuih chu za lo duh tak ani.

“Ka duh leh ka hmelchhia ang chu, nangni pawh han hâm ve ula eng in ni hian ka ringlo, keiai hmelchhe tur vek. Mawi, mu daih ang, hêng ho bula awm chu inhnialna a tam mai mai” tihmakin mutna tur chu kan pan ho a, thlam hi an sa lian bawka, kan pasarih pawhin kan thâwl var var mai.

A tîrah khân an ṭhian zîngah Rina leh Davida kha an tel ve nâng in eng emaw ti chen a ṭang khân an rawn lang ngai tawh hauh lova. An inkawm tawh loh chhan erawh ka hre hauh lo, zawh pawh ka tum chuang lo.

Mawii nên chuan mut bu chu phahin kei erawh u Rinpuia nên kan lo inṭawm ve lak lawh tawh sia, a mutna tur chu ka phah tel saka. Mawii erawh min hnaih lutuk silo, hlat lutuk bawk lo hian amahin a mu thung, lukham atân ka bag chu ka hmang tawpa, mipa ho erawh fiamthu hraw pui pui thawhin an nui leh huk ṭhin.

Keilah hi thâwm a awm reng chuan ka muhil thei mai ngai lo a ka meng leh kar tawh maia, bâkah nichina patling natuar ri kha ka bengah a châm tlata, ka muhîl theilo a ni ber “Zingah in kaih thawh âwih miahloh, ka tho hma peih miah lo a nia, inah chhungte'n duh tâwkin min ko nin em em laiin ramah tal hi chuan i inkai tho lo ang u. Thawh hma hi kan hlâwk pui dawn te a nih loh chuan keichu ka tho hma peih hauh lo a nia, zânah kan mu hma leh thei silo, chuvang chuan kan tho a nih pawhin bengchhen loh tur” Faka chuan a ti bul bula.

“Thawh tlai loh lai i nei em ni? Zîng tin i nu in vawi za vêl a au chung che pawhin i thawh duh ngai loh kha, sawi ve lo mai rawh. Thawh hma hi nang chuan i thihpui dawn emaw tih tur in i hreh tih kan hria a lawm” Mama chuan a ti a, mu chungin an ṭawng chu ka ngaithla ve kar reng mai.

“A nuam êm a ni, kan thawh hma avângin kan hrisêl phah tih awm lo, kan hausa ṭûn ṭûn dawn tih awm hek lo, chuvang chuan mu theia kan awm hi lâwm zâwk tur. Zing thawh hi chu e, thih ai pawhin ka hreh ang tih tur vêl a ni, mut hunah hian ka mut hi a chhuak theilova, thawh hunah ka mut hi a leh chhuah daiha, a mak ve a sin. Mut ka hreh êm êm a, ka han mu ta chêng a, thawh ka hreh leh bawk si” a tihchuan midang chu an lo nui dar dara.

“U Rinpui lo mu ve tawh mai rawh, ka muhil theilo” ka ti ta tawpa, thla thâwm hre reng chungin engtin nge ka mutthilh theih reng ang ni. Ka thla a muang thei tak tak tawhlo.

A ni pawh chu rawn tho chhuakin ka bulah a rawn inthawlh a, “Muhil rawh le, an tina theilo che a nia. Ka awm hi ka vêng reng dawn che a lawm, saw i ṭhiannu pawh a mut tawh saw, mutthilh tum rawh. Thil mawi hlir kha ngaihtuah la i muhil thei mai ang” a tihchuan keipawh chuan thu âwih zetin thildang chu ka ngaihtuah luia, a tâwpah chuan ka muhil ve thei ta hrâm e.

“A uih lutuk” chu ṭawng thâwmah chuan ṭhu chhuak ṭhapin Faka chu kan en a, a lo in zâp vak vak mai. “Laldampui in vawih khum chi a nia mi? A uih ṭeng ropui si, i vawih kha i ip theilo a nih chuan i mawng kha hnawh rawh” a ti nghal hluk chu Faka enin zîng kârah kan nui vak vaka.

Maman a vawih in a lo ur a nih hmêl, “Zing kaihthawh i duh siloa, au lo tur che leh i hming lam lo turin min ti hlawm sia, thâwm neilo chi. Ngawi renga in kaihthawh dân ṭha chiin ka kai tho ta mai che a nih kha, kha a thawh ṭhat khawp kha, i tho nghal nalh mai a lawm” Mama lah chuan ngaihsam zet hian a ti a, in melh rum tawh tak an ni.

Tunge muttui laiin boruak uih vut vut hip chunga mu lui thei reng ang ni.