DUHLAI ZORINPUIA CHAPTER 15

DUHLAI ZORINPUIA 

CHAPTER 15 

“Awi a nuam dâwn lutuk” phai leilet ah chuan dingin ka hawi kuala, buh kûng hring dap tawh khup chen dâwn dâwn ni tawh tlim hmur chu thlir kualin thla ka la a. Thli rawn thaw heuh heuh te chuan boruak lum lutuk tur chu a tizia awm bawk.

Mawii chu ka bulah a rawn dinga, a ni pawh tûnah chuan a pângngai chho ta viau mai. “Min rawn call a nih hi” a rawn ti chu tunge tih nân ka mit ka sân auha “Amah kha” a tihchuan ka hre thiam mai.

“La rawh a tâwp nân thlah fel la” ka tihchuan a bu nghata, “Aw” a tih rualin lehlam a mi chuan thusawi a rawn nei a nimahna a nui deuh haka “Ih maw? Ka na lo ka tihchuan dâwt a ni dâwn a, nangmah pawhin i âwih lovang, ka na a lawm mahse ka tuar thei” tiin a ngawi leh vang vanga.

A kut chu ka lo hum sak ve ran bawk, u Rinpuia erawh leilet nei ho thlâm hman hawh dil tumin a kal sawn daiha. Sâwma te ho pawh kan piah lawkah an awm bawk, “Ih maw Mk(Hawh chawp ang) Nangmah hre reng chungin hmalam ka pan a, min tihnatna hi mahni intihchak nân hmang zêl chungin ka infuih thar ṭhin . Engtikah emaw chuan ka nui leh anga,ka nuih chhanah tel tawh lo mahla ka hre chhuak fo ṭhin ang che, theihnghilh che ka tum ngai dawn lova, chutih rual erawhin ka hre reng tawh bik lo ang che. Ka hmangaihna che a dai ngai dawn lova, pawm nawn leh tur che erawh chuan min beisei tawh suh” tiin a châwl  data, a thusawi tum chu sawi a harsat hle tih ka hria.

Engmah lo sawi ve lo chuan a bulah ka lo ding ngawi renga, hetia ṭha taka an inbiaka. An sawi dun theih chuan ama tân mai nilo a mipa zâwk tân pawh a ṭha dâwn tih ka hria, an pahnihin dem tur bik an awm lova, a mipa pawh a lo chêt pelh palhna avângin a tih tur hria in a ko a tla a lâk ngamna ah ka fak bawk.

“Ka hmangaih che avângin ka kaltîr che a, i hmangaih avangin thlah ngai suh ang che. Ka hmangaihna che avângin ka hrethiam che a, i hmangaih avângin duat takin enkawl ang che. Ka hmangaihna che avângin ṭap chungin ka kal tîr che a, i hmangaih avângin a mittui ti tla ngai suh ang che. Hlim taka i awm ka duh avângin ka thlah zalên che a, ngaihṭha taka ka awm theih nân a hlimna thlen ang che. Chutiloa  a ṭahna i thlen leh si chuan, hmangaih taka i hlimna tur a nih beiseia kaltîr tu che rilru hi i tina dâwn tih hre reng ang che, ka rilru tina thar tur chuan min rawn be tawh lo la, chutih rual erawhin i rilru hah leh hnemtu i mamawh hunah erawh i ṭhian angin ka pui thei ang che, a bâk rawn beisei tawh suh. Ka dah phawt aw, kan buai dâwn a, ṭhiante zînga phone hman reng ka duhlo, a tâwp nân i fa tan leh a nu tân khân theih tâwp chhuah la, nei ang che. I rai ngam chu nei ngam rawh” tiin phone chu a dah zuia.

“I ṭha tiraw?” ka tihchuan a nui saka, a bu nghat nghat bawk. “Ka zia ta huaiin ka hria, engah nge ka lungngaih reng bik ang ni. A ni pawhin chhûngkua a din vat turah ngai ang, keipawhin ka tâna mipa ṭha a rawn lan hun chu ka nghâk zêl mai ang chu, ka la nghâk chhuak em em ang. A ni erawh kha chu ka hmangaih hmasa ber, ka neih theih tâk loh ni turin ka tawng a, a dawt lehah chuan kumkhua a ka chelh theih tawh tur a nih ngei ka beisei“ a tihchuan ka buk pui nghauh nghauh a.

“A dik chiah, Pathian hian kan tâna ṭha lo tur chu min lâk saka, a dah bo thuai ṭhin. I bialpa pawh kha ka sawisêl lam nilo se tûn thlenga a la rawn beisei che kha chu a ti âwm lo ve deuh chu ani. Hmeichhe dang a rai tawha, mipa a nihna angin a mawhphurhna chu a hlen chhuak ngei ngei turah ka ngai, nang erawh i la nula dâwn chauha enge i lungngaih ang ni? A ni chuan tikhan a nun zawng zawng a nupui leh fa tan a hmang anga, nang chuan khawvêl ila chên dawn chauh a lawm, a ai a ṭha an rawn lang leh nawlh mai ang. Mi ṭha tak tak an tam tawh a lawm” tiin ka kuah thaka.

Thil a êng lama a thlir thei chu keipawh ka thaw huai lo theilo, tam tak hi chu kan hringnunah reilote rawn châm zawkin sulhnu hlu tak tak leh mawi em em mai an rawn hnutchhiaha, hriatrengna kil khata châm reng tawh turin khual an rawn chang a, an chhuak leh mai ṭhin. Kan chelh zawh leh dan zawh miah loh turin bang langtlang ang maiin min rawn tâwn a, an kal tlang leh mai ṭhin a, ṭhenkhat erawh chuan châm hlen turin an rawn in khuara, chhuak leh mai mai tawh lo turin lungphum rinawm tak an rawn phun thung.

Kan duh zawng zawng nei turin siamtu hian min phal lova, lungngaihna leh harsatna kârah pawh huaisen taka engkim hmachhawn kan thiam theih nân kan hringnunah zirlai hautak leh zir chhuah harsa tak tak a rawn thlen tir ṭhin a, awlsam taka kan neih thil chu kan neih hlen theih loh zia min hriat tirin, harsa taka beia, nei thei turin tumruhna leh luhlulna min pe zâwk ṭhin. 

Kan nunah reng reng awlsam taka kan neih chu awlsam tak bawkin an ri rala, harsa taka kan neih erawh a hlut zia hrechiangin kan thlah phal tawh ngai lo, hêng zirlai zawng zawng kan zir chhuah tawh chinah chuan beidawng chung pawha a phêna malsawmna a lo la awm zia hre chunga hmalam pan kan thiam tawh ṭhin.

Mite avângin kan tlu ang, kan chhûngte avângin kan rilru ana in beidawn ngawih ngawih châng pawh kan nei ang. Sawisêl leh rêl phurin tlâng sel leh tuma puihna rêng rêng dawng lovin vanduai leh mahni inkhawngaih châng pawh kan nei ang. Mahse chûng hunah pawh beiseina tur kan la nei thei, kan tlu anga, kan tlu hlen dâwn lo, kan ṭap anga, kan nui leh ngei ngei dawn. Kan beidawng anga, beiseina kan nei leh bawk ang, kan kehchhia anga, tuam dam kan ni leh ang tih hi hriat tur.

Kumkhua in kan tlu hlen ngai lo, harsa taka beia tuar ṭang ṭang te nunah a tâwpah hlimna leh khawvêl malsawmna zawng zawng a rawn awm ṭhin. Mite sawisêl leh rêlna kârah pawh ding tlata, beng chhu ngawng ṭhin te chu sawiseltu leh haw tu nei mahse an tlu ngailo, min tluk lo tu tih hriat sa reng reng sawiselna a vâng ngawt chuan in tihchhiat hi ka tum ve reng reng lo.

Chutia Mawii nên leilet kotlanga kan din reng lai chuan thâwk leh khatah Faka te ho chu an rawn tlân chhia a “Hmingi tlân rawh u, tlân vat rawh u. Thingkungah sâwn lâwn rawh u” tiin an rawn au tuar tuar bawk nên en loh chi pawh an nilo.

Chutah an hnungah Lawi lian leh chal em em hian a rawn ûm tih ka hriat rualin ka au nghâl vaka, hlauhthâwnna in ka khat nghal. “Mawii tlân ang, saw min rawn si dawn” tiin kan hnunglamah chuan chak zetin kan tlana.

Chutah thingkung sâng lutuk loah chuan kan van kai nghal zawt zawt mai, ka dam chhûng zawngin hetianga hlauhthâwn avânga chêt ran hi ka la neilo. Ka che rang lutuk chu keimah pawh mak ka inti zâwk.

Sâwma te ho pawh chu kan lâwnnaah chuan an rawn lâwn ve zawt zawta, an ni pawh an rawn lâwn chak ngei mai. Thantea lah a hnung berah a tlân a, Lâwi lah chu a rawn hnai tawh nasa mai si, kan au chêl chûl tawh.

“Thana rawn zuang kai tawp mai rawh” tiin Mama chuan a kut a lo phara, a ni pawh a a rawn zuang ve mai bawk, an in pawt chho hman lo ang tih kan hlau lutuk chu Mawii nên kan au tuar tuara, Thantea ke lâk chhoh hma chuan Lâwi lah chuan a ki chuan a rawn pir fuh teuh em em mai lehnghâl.

Ka hlauthâwng lutuk chu ka ṭap pur mai, Lâwi lah chu a kawlh tâwk tih hriat tak hian kan hnuaiah chuan awmin a vei kual thur thura, a mitmeng te chen chuan ka rap zo vek tawh.

Keini lah kan lawnna thing hi a sâng vak silo, kan in man bet fara. “Engah nge i va vuak rêng rêng,nangmah vâng vek a nih hi aw Laldampui;  va tibuai lo la hetianga kan awm a ngailo tur” tiin Sawma chuan Mama chu a vin ti tih, an Lâwi chhaih kawlh lah chu a kalsawn duh bawk silo.

“Engtin nge kan tih dâwn? Ka hlau a nia aw, min pui rawh u” tiin ka au vak vaka “Hahthlak thei, i chhuk a nihloh chuan a tina lovang che, tikhan in pawm bet ve reng mai rawh. Nakinah a kalsawn mai ang” Sawman a rawn tihchuan Mawii zâwk chu a rawn inrawlh vat a.

“A kalsawn lo chu a nih khu, engah nge in chhaih kawlh reng reng. Lâwi hian an huat tawh mihring an theihnghilh mai mai lo an ti a nia aw, ran â tih ngawt chi an nilo. A neitu rawn kalin a rawn hau a nih loh chuan a kalsawn hauh lovang, mi sawi ka hre tawh. An ngêng lutuk” a tih leh lek phei chuan hlauthâwng tawh tak ka ni.

Ka mittui lah hlauh luat avângin a luang zung zunga, ka kut chu a kham ut ut tawh bawk si. In chelh nghet zo lova ka tlâk mai ka hlau. 

Hlauthâwng lutuka kan lo awm lai chuan vin ṭhat ṭhat aw rawn chhuakin chu Lâwi pawh chu aw a hriat rual chuan a kalsawn zuia, u Rinpuia leh pa pakhat rawn inzuiin kan hnuaiah chuan an rawn dinga, chuveleh rang zet chuan chhukin u Rinpuia âwmah chuan ka bei ta thlawpa.

Ka ṭap nghal hliam hliam bawk, ka hlau êm a ni. Khatiang thil kha ka la tawng lo hrim hrim “Ka hlau, ka hlau lutuk. Tinge ilo thlen har em em, kha Lâwi khan min si dawn emaw ka ti tawh a sin” tiin ka ṭap tak âwl âwl a.

Ka insûm buai peih lo, ka damchhungah khatianga hlauh kha ka la neilo, ka lungphu lah a la pângngai thei hek lo. U Rinpuia chuan ka lu ah chuan a kut pakhat a chulin a lehlam chuan ka hnungah a kuaha.

“A kawlh a nia, ka lo hmu lo cheua. Hnaih tawh lo ula a ṭha ang, a neitute hian an rawn vêng vak ngai lova. Ka lo hrilh leh dâwn a nia, tihral dân an zawn vat a ngai dâwn a nih kha, nang ni lo pawh mi pakhat chu a bân a tih tliah sak dêr tawh mai. A huaisar bawk si a, nang ni pawh kha tlêm a tlêmah in na lo chauh a nih kha” tiin pa pakhat rawn tel ve chu a kalsawn zuia.

Mama chu an hauh rawn nghal luai luaia, u Rinpuia pawh a lâwm vak lo nge rum deuh tak hian Mama chu a ena, a ni pawh a inthlahrung tih hriat takin u Rinpuia chu en pawh en ngam lo in a kûn daih lehnghâl.

“Hau suh aw, an thiam loh a nih loh kha. A kawlh ang tih an ring bik lo ang, ka hlauthâwng mai mai ania, ka ṭha tawh lutuk. Ka bulah i awm tawha, ka hlau tawh miahlo” Mama inthlahrung hmêl ka hmuh chuan ka awm a nuam lo bawk nen ka ti ta zung zunga.

U Rinpuia pawh a hmêl a dam leh dup tawh “Nidangah chuan fiam tawh loh hrâm tum ula, ran chu an â a, an âtna avâng reng hian an luhlul bawk a nia, tlêm a tlêm ah Zâwng ah in ṭang lo chauh a nih kha, thingrah ang mai“ a tih tâkah chuan midang pawh chu an rawn nui leh thei ta.

“Kan hlauthâwng tak tak bawka, Hmingeki pawh a hlauhthâwn chuan a tlân chakin che rang tak hi ani, thingkunga a lawn ka hmu tawha. Ka hmuh hmasak ah kha chuan muang chângin lâwn ṭha thei lo ang mai khân a awma, tûnah meuh kha chuan e. Khawvêla thingkung lâwn hnehsawh ber ang mah a ni, a zuanin a zuang kai nawlh mai a lawm” Sawma chuan a rawn ti a.

Ka ngei bawk si, a sawi dik bawk nên ka tin uaih uaih ringawt “Thlam chu kan hmang thei dâwna, phei ang u hmiang. Kan chêt vat loh chuan khua a tlai mai dâwn” tiin ka bag chu a khai zuia, a hnungah chuan ka zui nghal vat.

Kha Lâwi kha a rawn lêt leh a nih vaih chuan ka thidang thei tawh hial ang, a ki lah kha a seiin a zum ropui si. “Ka kal theilo” Mawii aw rawn chhuak avâng chuan kan ding ṭhapa, alam kan hawi chu a ke a lo dawma, kan hnaih nghâl ruak mai.

“Engtin nge a awm? I bilh sual palh em ni?” tiin ka en saka, a lo vûng deuh al tawh lehnghâl. “Kan tlanchhiatna lamah khan ka rap sual palha, sawi hman a ni tawh siloa, mahse hei a rawn na ta phian a nih hi, kal luih ka tum ngiala ka thei bawk silo” a tihchuan u Rinpuia chu ka melh zawk a.

Midang zawng hian bungrua hi keng phei ila Faka nang rawn paw rawh, i vei deuh nu a nih kha. I puak loh chuan a awm loh hunah keimahni te min mawhchhiat leh hlauh ange, mahni duhber te chu thup ṭit ṭêt lova lan tir pawp pawp mai tur. Ilo hnial leh ange, i awm a nuam lo leh hle mai tur a nia” tiin midang chu an kalsawn diala.

Faka hawihai sawi tûr hre lo hmêl chu a khawngaihthlak zâwk, midang ho lah hian tihluih an peih ropui bawk sia. “Lo kal rawh, an thusawi kha dâwt vek a nih kha. Ka duh hauh lo che” a han ti leh hrama, u Rinpuia nên chuan in en in an hmuh loh lamah kan nui dûn saka.

“Min duh pawh ka tih loh kha, i sawi kher a ngailo. Keipawhin ka duh lo che, kal zung zung ang che. Thlâmah ka hmeh tir vat duh, hetiang chuan ka hmang nuam ve thei lovang”  tiin Faka hnungah chuan a lâwn zuia, an in puak tâkah chuan keini pawh u Rinpuia nên chuan hnung dawlin thlâm lian ṭha hem hawm tak lam pan chuan kan kal zuia.

Faka leh Mawii pawh an in hau phei leh a ni ber, pakhat in i rit si nu thau a tih laiin pakhat lahin “Ka rit  ve ang chu, nitin chaw ka ei a ka rih belh lohin mihring dam lai zân reng thu awm suh, i thi te a nih loh chuan nangpawhin chaw i ei tho vang chu” Mawii lah chuan a lo ti ve bawk.

Hetiang em em a inhnial nuam ti hi ka la hre lo, ngaiah an neih tawh ni berin ka hria. An inhmuh tawh chuan inhnial lovin an awm theilo hrim hrim.

Thlam kan thlen rual chuan in nghat sap sapin kan mut duhna lam kan thlang hlawma, Mawii nên kan mu tlâng dawna, u Rinpuia lah in min hlatah mut a tum der lo. Keipawhin pawi ka ti em em lo bawk, vawikhat mah helai hmunah ka la kal lova, thla a muang lo riau.

Mipa ho chuan thlam chhûng chu an singsak fel laiin Mawii nên erawh zanriah ei tur kan bawl zui mawlh mawlha. A ni pawh a ṭawng tui barh barh hle,  a ke na an hmehsak a a lo bilh na lutuk lo a nih hmêl, nui dûn hak hakin nuam kan tih thu chu kan in hrilh tawna.

Mipa ho bengchheng leh lutuk chu a ninawm zâwk “Lalmalsawm in thâwm te kha dim ve ta che u, khatianga ram palailenga au tuar tuar mai, mi hriat loh in hlau em ni? A titi ve theih reng reng hleinem” tiin ka hau hlak hlaka.

“I thinchhe ve sia maw, i bialpa nih hi chu a peihawm loh. Hmêlṭha thinchhia tih i ni ringawt dâwn a nia,  Rinpuia hian engtin nge a ngaihzâwn peih zâwk che, bawp kual deuh si hian i aw râwl hi a ring si” Sawman a rawn tihchuan rum zetin ka ena.

“Ka bialpa hian zaidam rawh min ti kher lo, tin zaidam avânga an fel bîkna leh an rilru ṭhatna bik sawi tur i hria em ni? Zaidam si, mi hmuha fel deuh mahse rilru chhe si hi an tam a nia, mi thinchhia lang chhuak phawng phawng ṭhin hi an rilru a chhia i ti bikin ka ringlo. Mi langtlang tak an nih avângin an mahniah thuruk a awm ve lo, mi ngawi chit chet ṭawngtam lo anga lang te hi a rûka mi era mi chhiatna sawi peih peih an ni duh châwk ania” ka ti chu an rawn eee nasa mai.

“A dik chiah, mi enga mah hma in a sual, keichu ka kâwm peih lo, a thil tih pawh ka lawmpui peihlo te kan han tinghal ngawta. Mizote phei chu kan rilru hi a chhia ka ti, lar loh hlauin kan hmanhlel hlawma, mipui lam lahin an fans kan ni, chuti khati tiin kan mi ngaihsanzawngte huat hi kan huat pui ve leh nghal theia, kan pawisawi pawh ni hleilo kan mi duhten an huat avâng ngawtin kan haw thei a nia, kan rilru hi a mak e. Keite hi thawnthu ka ziaka, lar ka inti ngam lo. Thiam tak pawh ka in ti heklo, ka tuia ka ziak ve animaia, mi hian mi rêlna leh sawichiatna tur hi an lo la nei cheu mai,an ziaktu duhzâwng chu an fak hluak hluaka, an ngainat lêm loh chu an sawichhe leh bawih bawiha, dawhtheih reng hi har tak a ni, a ni chu a thawnthu chuti khati tih te hi an hmang sia, mahse hei hrelo ang in kan han awm lui hmaka. Tûnah chuan min haw tu tam tak kârah duhtu tam tak kan nei ve tih ka hre chiang tawha, sawisêlna mai mai chu ka ngaipawimawh duh ta lo, min tluk lo tu leh kan nihna ang ni pha ve ngai rêng rêng lo tur te bakin min rêl lovang tih hi ka ngaihdan a ni tawh” Mawii chuan a rawn ti ve dap dapa.

A sawi dik chiah, a lar a te ai chuan a duh tu an fans lam te hian buaina chawh chhuah an hrat. An duhte kha duh mai sela, mi ngaihsanzawng leh mi duh kha va sawisêl a ngai miah lo mawle. In ngeih taka chêng tlâng thei si hi, in rêl leh sawichhiat hi kan bâng ngai dâwn lo niin ka hria.

“Tiru tui va chêng ang u, in in ṭawng tui dâwn tlat, in taksa chiah daih in mamawh. In thluak te kha va chiah dai ang u” Mama chuan rawn tiin keini pawh rawng kan bawl zo tawh bawk nên kan tho chhuak vata.

Inthlâkna tur vel chu la in thlam aṭang chuan kan chhuak sap sapa, thlam piah kawrte tui luanna ah chuan in ti faiin mipa ho awmna aṭanga a fâl deuhah chuan kan inbuala, an ni erawh an au leh lauh lauh tawha, hetiang khawpa thawveng hi ka la hmulo.

An thil tih engkim hi an phûr pui nimaiin ka hria, thlama kan lêt hnu lawkah mipa ho chu sangha man turin an chhuaka, dinamo an ti emaw ni an hawlh dâwn a nih hmêl. Ka la hmu ngai lova, en ve ka châk si u Rinpuia chuan a phal tlat lo “Zan thil a ni a, tui a tam si a, chêt sual a hlauhawm” a ti tlata, keipawhin ka hnial duh bik ta lo.

Ka tih luih leh chuan atân pawh hahthlâk chan ka chang dâwn tih ka hre chiang viau mai. Mawii nên chuan thlâmah kan pahnih chauhin kan awma, a reh nghâl em em ringawt, zân hrâm chi hrang hrang chu hriat tur a awma, ṭiau lui luang ri te chenin.

Thlam tukverh aṭang chuan thla êng a rawn in kâp lût raiha, chulam pana ka dah chhuah rual chuan ka thaw chhuak nghal suai suai mai. Zân thlaêng hnuaiah chuan phai buh tlim hmar chu a lang theia, kan awmna hi ruam zâwl lai a ni bawk nên tlâng sâng pui pui kâra awm ang mai kan ni.

Hawi kualin thla êng chu ka thlir vauh vauh a “Engtik nge u Rinpuia nên hian inneih in tum?” Mawii thu rawn sawi avâng chuan amah chu ka en ha a “Aaaa dam chuan nakkum lamah te chuan kan tum ve ang chu kan tia, mahse midang hriat thu suhah tûnah pawh inneih chu kan duha, ka chhûngte lam aṭang hian buaina a la awm tlata, thingtlâng mi hi min duhpui chiah lova” tiin ka sawi phawnga.

“A hahthlâk a nih hi tiraw? Nu leh pa te pawh hian kan kawppui tur hian duh bik hi kan nei leh zêl a, fate duhzâwng mi ngaipawimawh der lovin an duhzâwng tho mi neih tir an tuma. An nulat tlangvâl laite hi ngaihtuah lêt ve sela hetiang reng hi an ni lovang mawle, tam tak chuan thingtlâng mi hmuhsit hi an la hmanga, kei ngei pawhin facebook lam aṭang ngei te pawh hian ka hmu tam a sin, a âwm ve tho. Mahse mi ṭhenkhat in a thingtlâng kan nih avânga zirsang lo leh thingtlâng mimâwl min ti fo hi chu a dik lo ve deuh a ni, thingtlangah pawh zirna a awm veka, khawpui lama zir chhunzawm pawh an awm ve thoa, khawpuiah pawh sawisêl dâwn chuan thingtlâng mite pawhin khawpui nun sawi tûr hi chu kan ngah mawle” tiin a nui hak haka.

A dik ka ti viau, thingtlâng an nih avângin mâwl viau turah kan han ngai ngawt ṭhinte hi a ṭha lo. Lehkhathiam leh zir sâng tak tak khawpui ang thovin an awma, khawpuiah pawh lehkha zirsang hna hmulo kan tam ang bawkin thingtlangah pawh an awm ve ṭeuh a, khawpui lam phei chu in sawisêl dâwn chuan sawisêlna tur kan ngah ang. Mahni inchhûng faia bungraw man to pui pui hung, in bul kawr vêl bâl leh kawmkar rimchhe tak tak hriat tur a tam si, ruihhlo tilah kan tam, tualthahna chenin hetiang hi thingtlângah chuan a leh awm loh zâwk.

Tlin lohna lai hlir inhmuhsak tur ni ila tumah hi in remin kan awm reng thei hauh lovang.

“Nun hi a hahthlâk a nih hi, keichuan u Rinpuia bâk hi neih ka tum lo. A ṭul leh ka tuar mai anga, nu leh pa chuan min hmangaih vâng ni bawk mahse an fate hian hmangaih leh duhzawng kan nei tih hi an pawm ve a ṭul in ka hria, hausakna tur ringawt kan ngaihtuah dâwn chuan mi ṭha tak tak chu an awm ang. Mahsela hausakna in a lei theihloh zahawmna leh hmangaihna, hlimnate hi keichuan ka ngai pawimawh zawk, u Rinpuia aia ka tâna ṭha tur ka hre bik lo” tiin ka hawi vauh vauh a.

“Ni e hmeichhe tân chuan min hmangaiha, min duat theitu hi an ṭha. Sum ngah si chhungkaw hlim lo leh buai reng te hi an tama, rethei tê chhungkaw hlim leh in pawh tlâng tak an awm bawka, keipawhin sum tam tak neiha hlim siloh ai chuan retheite ni chunga nunhlim tak neih chu ka thlang zâwk” a rawn ti vea.

Kan thu a inhmu thei bawk nên keipawhin a kianga thusawi chhuah vêl hi nuam ka ti ṭhin. Thu inhmu hleitheilo, ngaihdan nei hrang ṭhin bula thusawi hi chu a nuam lo ve êm bawka.

“Mipa ho hian enge an ngaihtuah ve ṭhin ang le? An rilru te hre thei ila chuan rinawm thei tur te hi kan thlang nalh nalh mai tur a nia, an ni chuan hmeichhia min en hian kan nungchang leh chêtzia aṭangin an hre zung zunga, an ni erawh han bêl chiang dâwn ila hriatthiam an har deuh deuh lai hi siamtu in hmeichhia aia chungnunga a siam chhan pakhat ni ve in ka hria, an rilru hi hriat a hara. Min hmangaih nge hmangaih lo tih te pawh hi in zawh nawn fo a ngai a nih ber hi” kan pahnih chuan kan sawi dûn ve nasa mai.

Dâr 10 vêlah mipa ho pawh an rawn lêt a, an nghabawm aṭanga sangha an rawn bun chhuak chiah chu Mawii nên chuan kan phûl hluta. An man tam ngei mai, ngharul lian lutuk, ka bân tiah dâwn chu an la rawn man zuia(hei chutiang tiah a awm theilo te in ti ange😂keimah ngeiin ka ute man ka hmu a, ka ziak ve ṭhuai nih hi).

Lêng phar an tih phei chu an mahni sawi dân takah sangha ah chuan a tui ber an ti bawka, ka ei châk tawh lutuk tlat. Hnâng hmanga Sangha rêp na tur an siam chawpah chuan rêp ṭhap in mei chu kan chhawm ṭha a, a ṭhen chu zînga buaipui ngai lovin kan chhûm sa bawk.

“Sangha an la tam a nimaw? In man hnem emai, hetianga tam hi vawikhat a man ah phei chuan ka la hmulo, keini kan ṭhian hoa kan kal chuan maw tlêm te sâwm vêl lek bak kan man ngailo. Sangha an vâng tawh lutuka, helai chu a la tam a nimaw?” tiin ka ṭawng barh barh renga.

Ka mut chhuak chu ka ham leh buai buai ṭhin “Hmeichhe pahnih kha chu lo mu mai rawh u, kan lo vil ang, kha Hmingeki phei chu a hâm hmelchhe tawh lutuk, sakawr hâm ang mai a nih tawh kha“ Sawma chuan a rawn ti leh khera.

Hepa hi chuan mi rauh hi chu nuam a ti mawle, rauh let ila a tûm leh bûr awm sia. “A dik lutuk, keipawhin ka hmu, a hâm chiah kha chu a hmêlṭha tih chi a ni tawh lo, a chhiat in a chhia” Thantea pawh chuan a rawn ti ve bawk nên midang nuih na kârah nuih chu za lo duh tak ani.

“Ka duh leh ka hmelchhia ang chu, nangni pawh han hâm ve ula eng in ni hian ka ringlo, keiai hmelchhe tur vek. Mawi, mu daih ang, hêng ho bula awm chu inhnialna a tam mai mai” tihmakin mutna tur chu kan pan ho a, thlam hi an sa lian bawka, kan pasarih pawhin kan thâwl var var mai.

A tîrah khân an ṭhian zîngah Kimkima leh Davida kha an tel ve nâng in eng emaw ti chen a ṭang khân an rawn lang ngai tawh hauh lova. An inkawm tawh loh chhan erawh ka hre hauh lo, zawh pawh ka tum chuang lo.

Mawii nên chuan mut bu chu phahin kei erawh u Rinpuia nên kan lo inṭawm ve lak lawh tawh sia, a mutna tur chu ka phah tel saka. Mawii erawh min hnaih lutuk silo, hlat lutuk bawk lo hian amahin a mu thung, lukham atân ka bag chu ka hmang tawpa, mipa ho erawh fiamthu hraw pui pui thawhin an nui leh huk ṭhin.

Keilah hi thâwm a awm reng chuan ka muhil thei mai ngai lo a ka meng leh kar tawh mai. “Zingah in kaih thawh âwih miahloh, ka tho hma peih miah lo a nia, inah chhungte'n duh tâwkin min ko nin em em laiin ramah tal hi chuan i inkai tho lo ang u. Thawh hma hi kan hlâwk pui dawn te a nih loh chuan keichu ka tho hma peih hauh lo a nia, zânah kan mu hma leh thei silo, chuvang chuan kan tho a nih pawhin bengchhen loh tur” Faka chuan a ti bul bula.

“Thawh tlai loh lai i nei em ni? Zîng tin i nu in vawi za vêl a au chung che pawhin i thawh duh ngai loh kha, sawi ve lo mai rawh. Thawh hma hi nang chuan i thihpui dawn emaw tih tur in i hreh tih kan hria a lawm” Mama chuan a ti a, mu chungin an ṭawng chu ka ngaithla ve kar reng mai.

“A nuam êm a ni, kan thawh hma avângin kan hrisêl phah tih awm lo, kan hausa ṭûn ṭûn dawn tih awm hek lo, chuvang chuan mu theia kan awm hi lâwm zâwk tur. Zing thawh hi chu e, thih ai pawhin ka hreh ang tih tur vêl a ni, mut hunah hian ka mut hi a chhuak theilova, thawh hunah ka mut hi a leh chhuah daiha, a mak ve a sin. Mut ka hreh êm êm a, ka han mu ta chêng a, thawh ka hreh leh bawk si” a tihchuan midang chu an lo nui dar dara.

Mut hmunah chuan ka nui ve sak sak mai, keipawh thawh hma hi ka thei der lo. Zânah hian ka meng kura, mutthilh ka tum pawhin ka harh deuh deuh zel, mahse ka han muhila zînga thawh hma ka tum hian ka mut hi a chhuak telh telha, ka mu leh nge nge ṭhin. Tho tlai lâwmman hi awm se ka dawng ngei ngei ang tih tur khawpin zîng thawh hi ka hreh, thawh chhuah ai chuan duh leh kan mut chhûnga hlawhtling tur chu lo hlawhtling phawt mai rawh se, an hnungah ka ûm ve mai ang tih hi ka ngaihdan ani ṭhin, a ṭha lêm lo mai pawha.

Mutthilh tum ta na na na chu an thusawi ngaithla reng chung chuan ka muhil ve ta nge nge a.

“A uih lutuk” chu ṭawng thâwmah chuan ṭhu chhuak ṭhapin Faka chu kan en a, a lo in zâp vak vak mai. “Laldampui in vawih khum chi a nia mi? A uih ṭeng ropui si, i vawih kha i ip theilo a nih chuan i mawng kha hnawh rawh” a ti nghal hluk chu Faka enin zîng kârah kan nui vak vaka.

Maman a vawih in a lo ur a nih hmêl, “Zing kaihthawh i duh siloa, au lo tur che leh i hming lam lo turin min ti hlawm sia, thâwm neilo chi. Ngawi renga in kaihthawh dân ṭha chiin ka kai tho ta mai che a nih kha, kha a thawh ṭhat khawp kha, i tho nghal nalh mai a lawm” Mama lah chuan ngaihsam zet hian a ti a, in melh rum tawh tak an ni.

Tunge muttui laiin boruak uih vut vut hip chunga mu lui thei reng ang ni.

“Vawih uiha in ur i duh a nih chuan kan in ur lêt ve zel tawh ang, a rim kha maw a uih satliah pawh anilo a ṭeng chhe khat tlat, uak” tiin Faka chu a uak zui khera, midang erawh mut hmunah kan nui khûr ngat ngat mai.

U Rinpuia pawh a nui ve huk huk mai “Tho chhuak ang u, zingkarah khatiang boruak uih hmuar nên chuan in kaihthawh tam a chi loh ang. Mama, pakhat chiah i ur emaw i tih lai khân keini pawhin kan hip vek a nia. A tih nawn fo chi loh, tho vat teh ang u, mi zîng kâr boruak thianghlim hip tumin an tho hma a ni ngaia, keini zawng zîng kârah kan hip uih huk mai a nih hi maw” tiin Sawma chu a tho chhuak zuia.

A ni pawhin a lo hip reng a nimaw? Tho phak phakin zanlama sangha kan chhum chu chhuanglumin artui kan ken vêl chu kan kanga, mipa ho pawh an awm mai mai lo, tihtur ṭul ang ang chu an lo thawk ve mawlh mawlha.

“Awi! Saw Bawng chêr chhiat khen khawn zia saw” Thantea chu a rawn au hluta, a la nui huk huk lehnghâl. “A chaw ei man chu a awm lo ve bawk a ni, mihring chu nise a pian a mawi lo ve chiang ang chu aw” a la ti zuia, kan lo nui deuh hak mai

Thil mak pui pui lah hi an hmu thei bawk sia, chaw eikham chuan luiah chuan in chiah daih tumin kan inzui phei ṭhâm ṭhâm a, phai buh khup chen chen ni tawh ho kara kal chu a nuam ngei mai. Thla la kualin Mawii nên chuan kan in post mawlh mawlha.

Tui chhûng kan lût a, keini erawh a thûk lohna laiah chuan kan awm thung, a thukna laiah chuan mipa ho in kal phal hek lo. A tui luang a mar bawk nên keini pawhin kan ti lui duhlo.

“Lalthanpui” aw rawn chhuak ṭhat lam kan hawi nâk chuan Mawii nên au chûl chungin kan mit kan hupa, mipa ho lah an nui uar uar hlawma, Mama kekawr Thantean a pawhthlak sak kha kan hmu ve vuai bawk nên a zahthlâk lam mah zâwk.

“In va han ṭhing tak, hmeichhia kan awm ve hi zak ve deuh ta che u” tiin ka kut chu ka la thla a, “Engah ngawt maw? In hmu vek tawh tho a lawm, in tih zah thar vel kha a ngailo, naupan laiin in hmu vek” Faka chuan a rawn ti a, Mawii nên chuan kan melh rawm rawm ringawt.

“Naupan lai chu puitlin hnu nên a in ang em ni? Ṭawng thei si, nangmah kha kan pawh thlâk sak ve mai tur che a nia” tiin u Rinpuia lungpui chunga ṭhu vûng lam chu ka pan pheia. Faka erawh Mawii nên an inhnial zawm leh char char tawh, an in hnial tam ang hian in be tam se an in bem tlu tawh ang tih tur vêl a ni.

“I hleuh peih tawh lo em ni?” tiin u Rinpuia bana ka kut rawlh lût chuan a mah si chêt chuan ka ṭhu a, “A vawt emai ka peih tawhlo” a ṭawngkam kher kher chuan ka nuih a tiza bawk nên ka nui hak haka, midang ho infiam rak chûl chu enin kan nui dun var vara.

“Ehe Mawii a tla a nia, Mawii a tla” tiin lung chung aṭang chuan ka chhuk dâwn a u Rinpuia chuan min dang vat mai “Lo awm rawh” tiin Mawii tui tlâkna lam chu a pan phei zuia, Sawma te ho pawh Mawii awmna lamah chuan an hleuh phei nghal bawk. 

An in aua, kei pawh lung chung aṭang chuan hlauthâwng zetin ka lo au ve bawk. Mawii lah a pil hmak tawh bawk si, u Rinpuia chu hmanhmawh turin ka tur seka, chutih lai chuan Faka chu Mawii pilna ah chuan liluhin a bo vang vang hnuah a thlang lawkah chuan Mawii chu a rawn pawm chhuak ta nawlha.

Vau kam lam chu a pan pui nghâl bawk. Rang zet chuan lungpui chung aṭang chuan chhukin an lam chu ka pan zuia, midang pawh an rawn chhuak phak phak bawk. 

“A ṭha em Faka?” tiin Sawma te chu an rawn au pah lauh lauha, Faka erawh Mawii âwmah nemin thaw a pe zuia, tumah a chhâng lo. An bulah chuan va dingin hlauthâwng zet chuan Mawii chu ka au mawlh mawlha, a tui tlâk lai ka hmu chiang bawk nên ka tha te chu a khûr dar dar mai.

Midang pawh chu an rawn thleng phei har lo, tih theih vak awm heklo kan vai chuan Fakan Mawii tih harh tuma thaw a pe chu kan thlir ṭhap a. “A thi a mi? Awi ka hlauthâwng emai, engtin nge kan tih dâwn?” tiin u Rinpuia chu ka ena, chutih lai chuan Mawii chu a rawn khuh chhuak ta bawrh bawrha.

Tui a hâk ho chu a rawn khuh chhuak bawrh bawrh mai, Faka pawh hahdam huai ang hian leiah chuan a ṭhu thla hnawka. Mawii rawn meng siar siar ka hmuh chuan ka hnaih nghâl vat bawk “I ṭha em Mawii, awi min ti hlauthâwng lutuk” tiin ka kuaha.

“Ka ṭha e, tunge min la chhuaka?” a tihchuan “Faka, kan rawn thlen khalh hman hleinem, tlêm a tlêmah kan in chân lo chauh a nih kha, min ti hlauthâwng a lawm” Maman a lo tih lai chuan Mawii chuan Faka chu a en zauha “Ka lâwm e” a tinghal sap bawk.

Faka pawh a lo bu nghata, a hah ve hle a niang a la thaw hle hle mai. A lehlamah a tui hleuh thiam avângin Mawii nun kan chhan theih phah ka tilo theilo.

“Engtin nge i tlâk theih reng reng” ti a an zawh na chu thawk lâk hak pah hian “Ka rahna kha a rawn pil thut sia ka in vêng hman tawhlo, a thûk lohna laiah ka awm reng emaw ka tia, rin loh lutukin a thukna lai a lo awma” a tihchuan mipa ho pawh chu an bu nghat nghata.

“Phei phawt mai ang u, Mawii i kal thei angem?” ti a an zawh chuan a ni pawhin a kal theih mai a rin thu in a lo chhâng a. A hmêlah erawh a tha a zuai ru hle tih a hriat “I kal thei tawp lovang” tih hluk pahin Faka chuan a paw nghâl nawlha.

Mawii lah a phu nasa êm êm mai lehnghâl, Faka chuan a kalpui zui nul nula, a hnung lam aṭang chuan kan en ṭhap mai. “An ni pahnih hi eng emaw thleng te a awm a nilo maw? A ngaihsak riau, nichin lah kha khatianga a tui hleuh chak kha ka la hmu lo, tûnah lah heti bawk, mak riau mai. An inngeih lo viau emaw tih lai hian an lo in ngeih lutuk mah mah te hi ani ange” Sawma chuan tiin an hnungah chuan muangchangin kan zui phei hlawma.

Kei erawh ka la hlauthâwng bawk nên u Rinpuia si chêt chuan ngawi reng hian ka kala. Mawii nun kan chhan thei chu ka lâwm ngei mai, tui hi chu nunna a la tam êm a, nêl lutuk chi a nih loh zia ka hre chiang hle bawk.

Kan in nghahna kan thlen chuan an ni pahnih pawh an lo ṭhu ngawi renga, kan boruak chu a rit churh mai. “In va ngawi thei ta ve, kha Mawii pawh hlauthâwng lutuk tawh lo la, a changtupa a chêt tawh chuan a chhan hman zêl ang che. I superman a awm ve hi maw, khatia in dawm kûn ngawih ngawih zawng a hrehawm, hlim rawh u nui rawh u” tiin Thantea chu a rawn au lâng lâng a.

“Ngawi mai mai teh Thanherh, a changtupa ka ni kher lo” Faka chuan a lo ti nghâl hluka, kan nui nghal dar dar bawk. An ni pahnih lah an chêt dân, an inchhan dân vêl an zir sak peka, chu chuan kan boruak a vaw zâng leh vek tawh mai.

An ni leh ni lo ang mai an thil tawn vâng nge Faka leh Mawii erawh an ngawi reng thung, an in en leh zeuh zeuh ṭhin erawh ka hmuh hmaihlo. U Rinpuia sawi kha a thleng dik dâwn riau hian ka hria, mipa leh hmeichhia in hnial peih deuh hi an induh tawh chuan an nghet thei lutuk an ti lehnghâl.

Inhnial inhnial ta chu thinrim silo in a rûkin an induh tual tuala, a tâwpah an in ngaizawng hmak zêl. Hetiang mite hi keichu an in ngaihzâwn dân hi a ril ka ti riau zel lehnghâl, hmelma aṭanga hmangaihna a lût hi chu an tâwp ve mai mai ngai lo tlat.

Zân riak duh tawh lovin kan haw zui ta diaka, sangha kan vawikhat ei ṭheuh tur a awm bawk nên mahni tâwkah kan hlim viau mai. Bike an nei ṭheuh bawka, chûngin kan bawr lo bawka, kal fo tlâk a nih rualin vawiina kan thil tawn avâng erawh chuan ka kal châk tawh vak lo.

Tlêm a tlêmah ruang nên kan haw lo chauh a ni bawk si a, khawchhûng kan thlen chuan inhmu khâwm tawh lêm lovin kei leh u Rinpuia erawh an in lamah kan tlang nghala, a nu leh pa in an inah chaw ei turin min ti leh bawk nên ka hnial duh ta bik lo.

Inchhûng kan luh rual chuan min lo chiau au nak naka, u Rinpuia nu leh pa hi chu ka fak thlâwt. An nupa in enkawl dân te, an fate an enkawl dân ah te hian sawisêl tur ka hrelo. An fate enkawl dân in a zir bawka, u Rinpuia te unau pawh mi rilru tluang tak leh fel tak vek an ni a. A nu leh pa an hmangaih thiam hlawm hle bawk.

Nu Âsangi pawhin kan sangha man te chu min lo phûl pui ve hluta, keipawhin thil thleng vêl ka sawi chuan a rawn hlauthâwng thar leha. “Ava pawi ve aw, tlêm a tlêmah chu in va chesual teuh ve le, mipa kal pui lo phei ula chuan a pawi khawp ang le. A ni lah an chhungkaw hnathawktu ber a ni tawha, a u te lah nupui pasal an nei zoa, a mah a awm loh leh zêl chuan a nu leh pa an ngaihtuah awm viau ngei ang. Mahsela chu vânneihthlâk lutukin Faka a lo awm hlauh chu a ṭhat nasat chu, tui hi chu ngam miah loh tur a nia, vanduai palh chuan khup pil lekah pawh a thih theih a nia” a ti ve dap dapa.

Keipawh ka lo bu nghat nghat mai, luia kan kal leh a nih pawhin tui chên ka tum tawh lo bur.

Tlai hmeh tur chuan saza rêp vêl an lo siama, khuaa la awm awm chhun u Rinpuia u chiah te nên chuan chaw kan ei khâwm laih laiha, an fate lahin min nel bawk nên keipawhin ka ngaina bawk, kan ri nak nak reng mai.

Chaw eikham chuan ka la inti fai lo bawk nên haw mai ka tuma, u Rinpuia chuan nghâk turin min ti leh tlat tawha. Rawn lên nghal a tum nge mawni? Mawii te inah lên ka tum bawk nên engtin nge ka tih dawn pawh ka hrelo, engpawh chu nise ka kalnaah min zui ve zel mai aniang chu.

A hman rual chuan ka in lam kan pan duna “Mawii kha va kan ka tum a sin, vawiin lah kha a la hlauthâwng viau in ka ring. Va lên hrim hrim ka duh, bâkah a thla hual te pawh angai ang, a ṭhiante kan nihna ang in kan tih tur a niin ka hria” tiin ka sawi pah mawlh mawlha.

A ni erawhin min chhâng leh chuang lo, ngawi reng in a kal mawp mawpa. Pasalṭha thawnthua ṭawng peih thlâwt lo an sawi ṭhin ang hi a niin ka hria, a ṭawng hian a damloh phah ṭhin nge mawni dâwn ni, heti êm êma ṭawng hreh mihring hi ka duh êm êm bawk sia, a eng hian nge min hip pawh ka hrelo. Ka duh ber bawk sia, lungpui ngaizawng ang vêl ka ni.

Mite chu an bialpa te an ṭawng thei mah maha, an khap ṭhin a ni ngaia. Keichu ṭawng tir tuma biak luih ṭâwng ṭâwng a ngai thung a nih hi, hmeichhe dangin bialpa fiamthu thiam, che nuihzatthlak leh ṭawngkam thiam zik zek, dang nal deuh deuh an neih laiin keichuan chengkawl bialpa ka nei hi a ni ber mai, mahsela ka hmangaih ve tho bawk sia, keimah hi ka â nge a mah hi a mâwl pawh ka hre teh hrep lo e.

Ka in kan thlen rualin châwl khawmuang lovin ka sangha hawn te chu mei chhemin rapah chuan ka rêp zuia. Ka zawh rual chuan ka in bual leh nghal sawk sawk mai, u Rinpuia pawhin engmah sawi lêm silo in ka mei chhêm chu a lo chhawm ṭha ve zela, hetianga ṭawng tam loh zual lai hi a neia, thil eng emaw ngaihtuah muk riau a nei ṭhin tih pawh ka hria.

Engmah ka zâwt duh lêm lo “Kal ila ka hman tawh ania” tiin pâwnlam chu ka pana, min rawn zui ve mai bawk. “Lo hawi lawk teh” a tih leh rih avâng chuan zawhna mitmeng pu chung chuan ka ena “I hmui kha” tiin ka hmui chu a rawn tuaia, lipstick ka in hnawih a piangin a ti reh ngei ngei.

Enge hnawih sen in hnawih pawh chu a ngaih theih loh em em ni. “I mak thei e, hnawih sen tello chuan ka mawi hleinem, ka in chei ve em em a i tih reh zêlin” tiin Mawii te in lam pan chuan ka kal zuia.

“I inhmeh lo ka tih tawh kha, hnawih sen tello khân i hmêlṭha, hnawih sen nên khâ chuan misualnu i ang” ka va han ngei tak e aw. Khawia misualnu mah hi ka ang hian ka ring lo, “Misualnu ka nih leh i changtunu tur chu zawng la tinia” tiin a hmaah chuan ka pên nghal hlawk hlawka.

A rawn nui huk huk mai, kei erawh ka tûm bûr thung. “Ka tân chuan ka changtunu leh misualnu i nih kawp a lâwm, i nuih leh i ṭah hian ka changtunu i nia, i tihtauh leh i thinrim hian ka misualnu i ni leh mai” tiin min rawn kuah thaka.

A kutah chuan ka sih sak nghâl vâwt mai, nui hak hak hian ka biangah chuan a rawn fâwp zauha.

Mawii te in kan thlen dâwn chuan namsawnin ka intuai mâm thuak thuaka, chutia ka awm chu ho hi an tih hmêl em em mai lehnghâl, mi hmuha lan mawiloh a hlauhawm tih te hi a hre ve leh pek lo aniang.

“In awm maw?” tiin kawngka chu ka kik dat data, inchhûng lam aṭanga min rawn chhâwn rual chuan lût nghal zatin Mawiin min lo hmuh rual chuan min lo chiau au zung zunga, a nu leh pa pawh an lo awm a nih hmêl.

“Lo lêng rawh u, Hmingte vawiin chu thil thleng kha kan lo hre ve a, nang ni nên in kal tlâng hlauh chu a vânneihthlâk hle mai. Chuti nilo se kan fanu hi kan chân dâwn a ni sia le” a nu chuan a rawn ti zung zunga.

“Keiniin kan ti hleinem, Faka kha che hmanhmawh lo phei se chuan keini chuan engmah kan ti hman hleinem, Faka vâng liau liau a ni, zanin chu hei thlahualna tur rawn buaipui kan tuma. Ar lei tur nei te hi an awm angem le?” tiin ka sawi nghal zung zunga.

“Aaa a ngai hleinem, keimah ni zâwk hian lo talh kan tuma, a ngai reng reng lo a nia” a pa chuan a rawn ti ve zung zunga, Mawii pawhin a ngaih loh thu a lo sawi ve bawk.

“Hnial âwih loh, ṭhian kan nia. Ṭhian chuan lungngaihna leh harsatna, hlimna leh lâwmna te pawh kan inṭawm vek ṭhin a lawm. Nang pawh ka ṭhian i nia, i tân tih pawh kan la neih loh hi, he thil hi chu ka tâna i hlutzia hriatrengna angah ngai rawh. Ṭhian kan ni a, engkimah ṭhian nihna kan lan tir a ngai a lawm, inthlahrun a ngai miah lo a nia” tiin ka sawi zung zunga.

“Nu keimahin ka lo lei tal ang, pawm mai teh u. In duh loh pawhin ka dah tho dâwn, in fanu hi ka ṭhianṭha ber a nia. Helaiah min kâwm duh tu leh min hnaih duhtu an awm vak loh lai pawhin ka tân a awm renga, ka ṭhian hian englai mahin min kalsan ngai lova, vawiinah lah kei hi a tân ka ṭangkai loh zia ka hriatchhuah phaha, ka inthiamlo lutuk reh nân tal min pawm sak rawh u” ka tih leh tâkah chuan an la ta hrâma.

“ A va lâwmawm dawn ve aw, nang ang ṭhian a lo tawng zâwk che hi kan vânneihna a nih hi, i chanchin pawh a sawi nasa a sin, tikhan lo awm rawh u ar chu kan zuk man ange” tiin an tho chhuak zuia. U Rinpuia chuan puih tumin a zui chhuak ve bawka, a hnung lam aṭang chuan ka nuih sak mai.

“I ti zahthlâk e, lei angai kher hleinem. Keimahni in kan talh mai dawn a lawm, ar chu kan ngah lutuk” a tihchuan ka nuih saka.

“Nang chu ka ṭhian mai bâkah ka unaunu ang i ni ka tih tawh kha, ka lungngaih chângin ka kiangah awm in min hnema, min fuiha. Kal dân tur leh tih mai tur hre lova ka awm châng leh ka chhûngte ngei pawh ka hrilh ngam loh laiin nang erawh engkim ka hrilh theihna leh min hnem tu i ni a, ka tân ṭhian mai nilovin unau ang i ni. Ka ṭhian te ngei ngei in min kalsan hnuah pawh nang chu ka tân i awm renga, nang anga ṭhianṭha hi chu ka tawng tawh kher lovang, kan inhriatna a la reilo chungin ka tân englai pawhin i awma, vawiinah pawh khân ka inthiam lo a sin, i nun i chân ang tih kha ka hlau ngawih ngawih” tiin ka sawi dap dapa.

A ni pawh a ngawi ta daiha, thudangah a pakai thuai bawk. Ni e, tûnah ngei pawh Aizawl lama ka ṭhian tam tak chuan min rawn be tawh ngai lova, midang hnên aṭangin min rêl tih hriatna ka dawng reng bawka. Ṭhian pawh hi kan thlan thiam a ngai viau rêng a ni, kan han awm hrang chiaha mi rêl nghal thei ṭhian neih hi alo hlauhawm berin ka hria.

Mawii erawh kan inhriatna a la reilo, mahsela ka awm loh laiin min rêl ve ngai lova. Ka bulah mi han rêl vak pawh a nei ngai hek lo, ama nunah hian a buai tâwk em em a, midang va sawisêl vak peih lo ta chu keipawhin tumah ka sawi chhe ngailo, ṭhianṭha chuan min hruai ṭha a, ṭhian ṭha lo kawm erawh chuan min hruai sual ṭhin.

Zu leh ruihhlo dang ti mai thei kawm chuan, a tîrah ti ve kher lo mah ila tih hun kan nei nge nge ṭhin. Ṭhian fel leh Pathian ṭih mi kawm erawh chuan kan nun chhia zawng zawng min tihreh sak hlauha, kan tâna ṭha lo tur ti turin min nawr ngai hauh lo. Hei hi ṭhianṭha dik tak zia chu a niin ka hria.

Ṭhianṭha chuan kan diklohnaah min hau ngama, kan beidawn hunah kan tân an awm leh a, ṭhian sual erawhin thil a punlun zâwngin min tawrhpui anga lang si mahse midangte nêna in rem theilovin min siama, kan mamawh tak tak hunah erawh an tlân chhe leh daih ṭhin.

Ka phone rawn ri avâng chuan ka kekawr ip aṭang chuan ka phawrh vata, Sawma hming a lo lang va mai. Rawn lên an tum leh tawh nge rinloh lutuka min rawn call thut chu le.

Ka lâk rual rual chuan “Khawiah nge i awm ve kir kera, i inah kan rawn kala i awm silo. Enge itih? Kan rawn lêng duh, rawn haw rawh” a rawn tinghal tawng mai. 

“Mawii te inah hei a thla hualna tur vel kan buaipui dâwn, rawn kal ve rawh u. Khata awm reng ai chuan ṭhiante awmnaah hian awm tur, nang ni ngat phei chu zaninah hian awm ngei ngei tur zâwk a sin in nih” tiin phone chu ka dah zui ta daiha.

An rawn kal ngei ngei dawn tih ka hre chiang viau thung. “Tute nge?” Mawii chuan a rawn ti ta rênga.

“Sawmauringa te bawk mawle, an rawn lang thuai ang. Zanin chu in in pawh a ri nuai nuai dâwn a nih hi” kan nui dûn hak haka, u Rinpuia pawh ar pawm chungin a rawn lût hlawla, ar pahnih an talh dâwn a nih hmêl.

“Va pui ve ang” tiin Mawii chu a rawn tho chhuaka, chempui chu va la in pâwnlam chu kan pana, keiin ar pakhat chu ka pawma. Mawiin pakhat chu a lâksak ve bawk, u Rinpuian a sât hlum dawn a nih hmêl.

Khu lamah kha chuan talh sa hlir kha kan lei ṭhin a, engtin nge an talh dâwn ka hre lâwk hauh lo. Chutah Mawii chuan a thla leh taksa chu nem kawpin a kut leh lam chuan ar nghâwng chu a pawt fân deuha, thingah chuan a nghah chhan bawk.

U Rinpuia chuan a sât bung nghal hmawka. Ka ner deuh sak mai, ar pawh chu an tal nghâl phur phura, Mawii chuan a ke ah khaiin a thi far zawh hun leh a thih fel hun chu a nghaka.

A tih ang chiah chuan tih ve tumin u Rinpuia chu ka hnaiha, chutah leh ar nghâwngah a rawn sât ve chiah chu a rawn tâl phut bawk nên ka inring lo si chuan ar chu ka chelhna ka thlah peka, lu bung chungin a tlân ta vak mai.

“Kha a tlân chhuak ania ûm rawh u” tiin keimah chuan ka ûmzui a, chu ar lubung lah chu lu bung chung pawhin a la tlân chak em em lehnghâl. Mawii leh u Rinpuia pawh chuan min rawn ûm pui vata, hnim kârah a lût bawk nên kan hmu thei mai lo.

“Engtin nge lu bung chung khân a tlân chhuah theih?” tiin mak ti em em hian u Rinpuia chu ka ena “A tîrah an thi mai ngai hleinem, lu bung chung pawhin rei deuh hlek an la dam thei a lawm. An thisen a la luma” Mawii zâwk chuan a rawn ti a.

A nui pah uar uar lehnghâl, keilah ka zak bawk si. Ar lubungin ka tlân chhuah tir chu a ni sia, “Enge in tih?” Sawma te ho rawn au lawng lawng chu Mawii chuan thil awmzia hrilhin a ko vata, an ni pawh an rawn hnai nghal vat mai.

Min zawn pui mai dawn emaw tih laiin min han nuih fe phawta “Ar lubung pawh i ûm pha lo chu ania le, tikhan zânah i mutna sirah lu bungin a rawn hran khum ngei dawn che a nih kha” an la tizuia, min ti thlamuang lo zo vek.

Chutah ar luhna zâwn chu ka kawh hmuh leha, zân zânah nula leh tlangvâl ar lu nei tawh lo zawngin hnim kârah kan kûn kût kût chu a ni sia. Keipawh a rûk tak chuan ka nuih a za ve tho bawk si, ka inthiam lo tho bawk nên ka awm dân chu a lai zo vek.

“Ka hmu e” u Rinpuia chuan rawn ti dût in ar lubung ngei chu a rawn khai chhuak nawlha, a lo thi fel tawh a nih hmêl. Thaw huaiin in lam pan chuan kan inzui hlawma, in chhûng kan luha Mawii nu leh pa thil awmzia an hrilh chu an ni pawh an nui hawk hawka.

Kei erawh tawi tak tak hian ka nui ve tawp bawk, ar puahna tur chu an chhuang sa bawk nên kan puah nghal zung zunga, kan han kal hma a ṭang tawh khân lo talh an tum tawh hrim hrim a nih hmêl.

Mawii nu leh pa pawh chuan midang ho chu lâwmthu an hrilh ve mawlh mawlha. A bikin Faka hnênah chuan Mawii a chhanchhuah avânga an lawmzia chu an hrilh nasa hle mai, a ni lahin chhân dân vak hre lo hian “A ho lutuk, keimah ka lo awm hnai bera, chuvang chu a ni e, a hun takah kan chhan thei kha a lâwmawm, tûn a chinah erawh lui kal pawhin tui chu dai ve tawh lo sela a ṭha ang” a tihchuan kan lo bu nghat nghat hlawma.

Keipawh lui te ah lo chuan ka chêng tawh hauh lovang, “Naktuk chu chaw rawn ei vek rawh u aw, in ei ngei ngei angai ania. In ṭhiannu thla hualna a ni bawka, tin, in ar lubung zawnna avâng hrim hrim pawhin” an ti leh chu ka lo ner nasa tawh mai.

“A rawn che phut sia ka inring hman lo alawm, ka hlauhthâwn zia kha e. A chak nasa mai si, ar ve si khatianga chak kha ka la hrelo” tiin ka phun sapa, ka ar tlân chhuah tir chu an lâwm hle aniang an sawi zui nak naka. 

An puah zawh rual chuan a chhum siam leh te te in guitar nên pâwn lamah kan chhuaka, thla a bial ṭêp tawh bawk nên a êng fiah tulh tulh mai lehnghâl. 

“Tihian mei kan vil pah mai dawn ania, zai ho ang u. Thla êng lawm te hi a khât tawh êm mai hi maw” tiin tualah chuan ṭhutthleng sei chu in zâwn chhuakin kan ṭhu ṭhap a, u Rinpuia chu guitar an pe leh nghal chat tawh mai.

“Perh la zai ang u, thla êng te pawh kan lâwm ve ang chu” tiin an phûl zui hluta, keipawh ka phûr ngei mai. Hetianga thla êng lâwm hian ṭhianho in kan awm ve ngai hauh lova, he khuaa ka kal chu ka tân chuan thil thar tawn tur leh ka tih ngai loh leh hriat ngailoh tam tak ka hriat phah a ni ber mai.

“Khuangchawi thla  tih hla kha aw” tiin an la zuia, kan hla sak leh thla êng chu a in rem vêl vek. “Lêng zawngte hlimna ber Khuang chawi thla hi, pi leh pu vânglai paw'n sawi nuam an ti” tiin kan zai rual ṭhap ṭhap a, nuam kan ti hlawm viau mai lehnghâl.

Mawii nên pawh theih tâwp chuan kan zai ve a, mipa ho erawh an au ring luah luah viau mai. U Rinpuia pawh chutia an nawr tâk tlatah chuan a inzai tui ta a niang, a rawn zai tak tak chu a aw a fawn nalh leh tawh lutuk tlat.

Hla dang kan sakai leha, C. Vansânga hla Derthiam mi u chu sa in kan duh hlawm bawk a niang kan zai ring ṭha hlawm viau mai “I tiamthu hre tu chhawrthlapui, a êng ruai e piallei mawiin, chhai thar belin i liam ta maw?” kan zai tui chho ṭan chiah tihah Thantea aw a rawn chhe peka, zai thei a bar kan awm tawh lo, kan nui nghal vak vak mai.

“Feel ve tawh tehreng nên i rawn tichhe vek a lawm, he hla phei chu an phuahtu ang mai hian ka lunglên pui thei a sin. A châng hnihna la ṭha leh ngat teh ang u, tumah aw tih ṭial leh zai sual phal a ni tawhlo” Mama chuan ti hmakin a zai chhun zawm leh nghal zata.

Mawii nên chuan in enin kan nui ru char char mai, mahse kan zai ho chu nuam ka tiin hetia ṭhian ho a thla êng lawm hi ka hlimpui lutuk tlat. Kei phei chuan vawikhat mah thla êng hi ka la lâwm lova, lehkha zir loh leh ṭhianho khân Karaoke te'n hun kan hmanga, hetianga awm dial dial hi kan nei ngai lo.

Thingtlâng nun meuh zawng ka awm rei tual tual a, nuam ka ti telh telh bawk. Zo nun zemawi tam tak an la chhawm nungin, pi pu te nun tam tak hmuh tur a la awm bawk nên nuam ka ti telh telh mai.

“Ka hun hman tawh zawng zawngah a la nuam ber” tiin thla chu ka thlir vauh vauha, midang pawhin an rawn tui hnih sap sap bawk.

“Hetianga awm ho dial dial te hi kan nei leh mai mai tawh lo ang, chuvâng chuan duhâm taka hman tur. In chhûnga in khung ngawt ngawt chu a nuam lo, hetia zân boruak thiang tak leh arsi lang thlir te, zân hrâm chi hrang hrang nêna hun han hman te pawh hi a nuam a sin, nakin lawkah fur pui a rawn in ṭan tawh anga, thla êng leh ni êng hmuh tur a khât leh pharh mai ang” an tihchuan dik ka ti viau mai.

An ni phei chu ruahsur pawh pawisa lovin an feh ṭhin tih ka hria, tûnah pawh u Rinpuia hian maian vêl chu min rawn hawn ziah tawha. Ka Fanghma tuh te pawh kha an pâr ṭan ve tawhin ka ring bawk nên hmuh leh ka châk viau mai.

“Nia zanin chu duhâm takin hmang ang u, hmakar chu Pathian zara dama kan awm te a nih chuan ka haw thlâk leh a ngai dâwna, training tê nau an rawn ko leh bawk sia. Ka peih lo tak tak” tiin ka lo tui hnih ve a, u Rinpuia chuan min rawn en nghal vut mai.

Ka bulah a ṭhu bawk nên a hmêl chu hmu fiah thei vak lo mah ila a chêtzia aṭang chuan a danglam tih ka hre thei, ka haw leh lawk angai tih ka la hrilh lova. A lungawi lo leh êm lo'ng chu maw? Bâkah a la hla bawk nên ka hrilh duh lutuk lo kha a nia.

“A va ngun ve, i hna lah hi ka peih lo chi. Nau chhar te phei chu a teuh hian a hnailo mai, engtin nge i peih zawk? Hêng ai chuan e hetia hnathawh reng hi ka thlang” Faka chuan a rawn ti a.

“In tui zâwng a in ang lo a nimai a ni, mi tinin nuam tih zâwng kan nei a lawm. Bâkah a rawn awm hi khua pawhin kan vânneih phah êm hi, damloh pawhin a na zual tih loh chuan kan pan zung zung thei a, damdawiin kan hlat bawk sia, a rawn awm lovang tih a hlauhawm zâwk” Mawii chuan a lo ti ve vata.

Faka ṭawng a tum leh chiah tihah u Rinpuia chuan “A dik chiah, rawn awm lo se ka nupui tur ka tawng har mai dawn a sin” a lo ti ve khauh lehnghala.