DUHLAI ZORINPUIA CHAPTER 5

DUHLAI ZORINPUIA

CHAPTER 5 

Chaw ei pah chuan ka in ngaihtuah neuh neuha, khanu min ṭawng khum dân kha ka ngaihtuaha. Thingtlânga awm chu nuam viau bawk mahsela a lehlamah chuan a buaithlâk dawn riau hian ka hria a, in rêl leh sawisel. Chumai ni lo in buaina hi ka tawng chho mawlh mawlh hian ka hria a, ka thaw leh hak ṭhin, kha hmeichhia kha ka ngaihtuaha. A ṭawng duh dân ah khân hmeichhe nasa tak anih ka ring bawka, khatianga min rawn tih nghal mai duh dânah u Rinpuia chu a hauh hle niin ka hre bawk nên Zorinpuia chu biak tawh lo hrâm ka duh.

Chaw ei kham chuan naupang vaccine pêk a ngai bawk nên ka bungrua nên chuan wadi lam ka pana, ka chal vûng chu miin an hmuh tam loh nân puanin ka inkhuh deuha, kal pah chuan khawchhûng chu ka en kual bawka. Fanna hun pawh ka la nei lo bawk nên chutia ka kal chhuah tâkah chuan in pawh a lo tlêm chhe hauh loa, khaw tê lutuk chu an ni bik lo tih ka hrethiam mai bawk.

Min hmutu apiang deuh thaw chuan min lo be bawrh bawrha, keipawh chuan nui sângin ka chhâng ve zela, an rilru a chhe vek bik lova. Mikhual an lo lawm dânah pawh sawisêl tur ka hrelo a ni ber mai, hetiang khuaah chuan khawpui ang tho in misual deuh te, mi rêl peih deuh te leh rapthlâk tak tak pawh an awm ve tho tih chu ka hria a, mi pawh nêl dân chin tâwk ka thiam a ngai viau in ka ring.

 “Enge i tih dâwn?" ti a min lo be tu an awm avâng chuan ka ding data, min be tu lam ka en rual in u Rinpuia zîng tho hlim hmêl chu ka hmu nghâl zata, a meng zîm deuh sana. A sam chu a la thur hiang bawka, a thawhna ala reilo tih a hriat viau mai.

Min lo en rana, a mitmeng chu a sexy phian lehnghâl. A bialnu min rawn ṭawng khum dân ka ngaihtuah chhuaka, rum zet hian ka en ta bawk. Amah avângin hmeichhe nasa zet ka tawn phaha ka haw hlur mai “Khitah” ti hmukin ka kal mai dawna, a rawn ṭawng leh a vâng chuan ka pên lai chu ka tawp leh data, engvanga min be sek nge maw a nih le.

“Khawi lai khi tah maw? Min va chhâng bûl em em ve” a rawn ti dam leh dapa, a aw ki chu a la sân hauh lo, a la dam dap renga. Amah hi chu mipa sual leh vin pâwng pâwng ṭhin a nilo tih chu ka hria a, mipa zezawi tak ani bawka, mahsela a bialnu erawh kha chu rapthlâk ka ti tak zeta, inneih hma hauh aṭanga a bialpa a hauh dânah khân ka hmeichhe rapthlâk tih ber a ni bawk.

“Wadi ah ka kal dawn, ka ṭawng thui peihlo tihna a nimai a ni ka kal dawn, min tibuai reng suh” min tibuai reng suh tih erawh English in ka sawi a, a hriat thiam ka rin loh vâng a ni pakhat.  Hrethiam vaih se chuan hmeichhe induhtawk lutuk min ti hialin ka ringa, mahsela amah avânga ṭawng khum ka tuar khân min ti lâwm lo êm ani.

Ka thusawi a vâng chuan a nui suka, haw hmêl pawh a pu chuang lo, a hmêlah chuan danglam na pawh a awm lova, thing nghêng hian a ke chuan a in do khalh a, ka lam hawi chuan mawi zet hian a nuia, a mitmengah chuan keimah min nuihzatna bâk hmuh tur a awm lova, a hmêl êng siah chu ka ngei hle bawk.

“ I tho fuh vak lo a nih hmêl, nizânah i mumangah ka lo be ṭha lo deuh che em ni?” a rawn ti leh a, awi! Hepa zahtheihloh zia hi, engtin nge chutiang a la sawi theih zâwk ni? “I zak chai nange ka hmu peih lo che, ka mumanga ka hmuh rual che chuan ka thi tawp theiin ania ka rin ni” ti hlak hlakin ka melh ngara, a rawn nui leh deuh hawka.

A dâk deuh bawk nên a hrawk bâwk che ralh chu ka en zauha, chutah min rawn en leh in “A nih chuan min lo vei hle a nih chu, mumanga min hmuh a i thih chuan ka zûnah i uai tawh tihna a nia, a takah pawh hian i uai tawh hial lo maw?” hah, he mihring hi a zak thlâwt lo.

Chhâng duh tawh lo chuan kal leh mai ka tum lai chuan “Kha i mawng lem i vuah dik lo ania” thutak fahrana a rawn tihchuan keilah chuan in ngaihtuah chiang miah lo hian ka mawng chu ka khawih ringawta, rum fahrana va enin “Hmela, mawng lem ka vuah bawk lo, i thluak kha nula chhaih nân nilo vin i vei zâwng ngaihtuah nân chauh hmang rawh” ka tihlaka, thinrim êm êm a ka en laiin a ni erawh ala nui var var renga, a hmeltha lutukah sâwn nawr sawk ka châk ngei mai.

“Ka vei zâwng ka ngaihtuah rêng avâng in a lawm ka biak che, ka vei zâwng i ni tlat” a rawn ti leha, min tih thinrim a tum ni ber tawh hian ka hria a, ka huat poh leh min runluih nuam a ti dawn tih ka hriat avângin chhâng duh tawh lo chuan ka kal san zui nal nala, ka mood zawng zawng kha a bialnu nên khân an tichhe zo vek.

A ṭawng tam lo ti si hian engvanga ka bulah hian ngeiawm tak taka awm fo nge a nih le? Midang bula kan awm lai kha chuan min be ngai hauh lova, mahsela mi awm lohah hi chuan mak tak tak hian min be fo a, mi hmuhah erawh min hre ve leh min ngaihsak ang pawhin a awm ngai lova, rilru a ti buai riau zel.

Wadi ka thlen chuan Rintluanga leh a nu chu an lo awm reng tawha, a nu a rawn pui leh dâwn a nih ka ringa, a rûk tak chuan fel ka ti viau mai. Tûn ang laiah nu leh pa puih duh miahlo, awm âwl mai mai an tam tawh laiin helamah chuan an nu leh pa te hnathawk an vâng viaua, an theihna ang angin chhâwk zâng khai an tum niin ka hria.

“In va hma ve a, mipui lam hi in koh khâwm vat a ṭha lo maw? Ruah te hi a sur ang tih a hlauhawm emai” ti zung zungin an bulah chuan ka va ṭhu ve a, naupang chu hmuh tur an la awm hauh lova. Rintluanga chu ka bulah rawn ṭhu in a nui sâng a.

“Nimin kha in haw hma nge ka va hmu lo cheu ve” tiin ka bul chêt ah chuan a rawn ṭhu a, ka chhânna nghâk in min melh reng bawk. A inthuamna chu a inhmeh leh pek hle mai, thingtlâng mi an nihna angin an vun a hâng tûrah ka lo ngai ṭhin a, mahse helaiah a hmunah han awm chilh tâkah chuan ngo tak tak pawh an awm nuka, ngo lo chu awm tho mahse chutianga hâng chhia chu an ni hauh lo thung.

Rintluanga pawh a vun a êng hle a, amah a palian lam a ni bawka a chhelo viau mai. Tshirt dum ha in jeans pâwl tak a mal phuar ṭang a ha a, a ni hi chu englai pawh hian a inthuam dân hi a smart thlup renga. Lehkha zir sâng tih takah a in uluk hle tih a hriat bawk.

“Kan haw hma a lawm, thlai chi kan thlâka, kan in lâwm vek bawk sia. Rinai kutrual nge nge chu an chak tlâng bawk nên kan haw tlai lo, nang i haw tlai em?” tiin ka sana chu ka en zauh zauha, chutih lai chuan YMA tlangauna aṭang chuan nu naupawm ho chu naupang vaccine lâk a ngaih thu chuan an rawn au meka, an rawn kal khâwm harin ka ring lo.

“Tlaiah ka rawn haw chauha, a nuam i ti em? Zanin chu ka lo lêng dâwn a sin i phal chuan” a rawn ti zui zata, a hmêl chu a êng sar bawk nên hmuh a nuam hle a. “Phal loh pawh a awm lo, i duh phawt chuan rawn lêng rawh. Keimahte chauh ka nih avâng hian a khawhar thlâk riau zela, tumah in rawn lên loh phei chuan a nuam vak lo” tiin ka nui hak haka.

Ka lamah chuan rawn hawiin min melh renga, eng emaw sawi duh nei sawi ngam chiah lo hi a ang ber maia, a kut chu a tlir dat dat bawk.

“Ka rawn lêng dâwn ania” a ṭawng tawh dawn lo emaw tih hnuah chuan a rawn ti zui sapa, a nu in min rawn koh tâkah chuan tho chhuakin in chhûng lam chu kan pan zuia, “Hmanrua hi lo phawrh zung zung rawh u, tlâng an au tawh kha. An rawn kal khâwm har tawh lovang” a lo ti zung zunga, amah pawh chu hriau vêl en chuan a che zung zung bawk.

A ni chu an lo thawhna a rei tawh bawka, a che reng reng chu a zei thlarh tawh mai. “Nu Thang nangmahin pe mai teh aw, ka jection sual te ka hlau deuha, ka la ti ngai bawk silova, ka zuam rih chiah lo” ka tihchuan a ni pawh chuan min hnial lo hian a lo aw zui ve maia, dawhkân pakhat chu la chhuakin ṭhutthleng kan hûng zuia.

Nu Thangi sawi ang tak tak chuan reilote ah nu naupai leh nau pawm ho chu an rawn thleng khâwm ṭak ṭaka, an rawn thlen rual chuan kan ri le lu mai. A ṭhen an ṭap chuah chuaha, an nu te'n an hau pah bawk, kan chhang chhe lutuk chuan ka nuih te lam lam a ti za a.

A kal thei tawh ho lah tual vêlah chuan tlân kualin a ṭhen an lo tlu leh ṭhin a, an nute an au chêl chûl reng mai. Rintluanga chu a lo nui kur kur a “Fa neih hi chu a siam lam nuam viau mahsela a hahthlâk dâwn anih hi, a bîkin nu mawhphurhna hi naupan lai phei chuan a lo sângin hmeichhe ho hi in lo ropui ka tia, fa in han neia. Inchei leh lenchhuah pawh ti lo in tihian in lamah fate in enkawla, rawng in la bâwl tel bawka, fate enkawl kawngah na na na hi chuan hmeichhia hi in ropui ka ti ve tlat” a tihchuan ka chhâng mai lova, a thusawi erawh chu ka pawm pui viau mai.

Mipa ṭhenkhat an nupui te'n fa an neih tâk avânga in chei hnum hman lova pasal fanaute tâna theih tâwp chhuahtu an nupui te sita, nula nalh leh tituai la mam zâwk kawp san chîng te hi ka haw lek lek zêl a, kan nupuite hian keimahni tân leh kan fate tân mahni pawh in ngaihtuah lovin inchhûng an enkawla, fate buai em em in an enkawla, naupan lai phei chuan nu mawhphurhna hi a rih zia chu kan hre vekin ka ring. 

Heti chung hian tuarchhel takin an la awm thei ania, kei erawh pasal ka la nei lova, a taka tawn loh chuan a hrehawm zia ka la hre pha tak tak lo. He ti chunga ka hmuh pawh hian pasal neiha fa neih pawh min ti châk ngai meuh lo, fa neih chuan an lo ṭahbelh deuh leh ni lêng a puakte an ngai ve anga, tlai a lo ni anga rawngbawl pah nên pasalte hnathawk bâng lo chhawn nên ka tlin pawhin ka ring lo.

Nu Thangi chuan a rawn kal hmasa ho apiang chu vaccine chu a lo pe hmasa zela, Rintluanga nên pawh chuan kan lo pui ve zêl bawka. Naute hriaua an vih ruala ṭap nasa ṭhin lutuk erawh chuan chhûng lamah hrehawm min tih tir ve ṭûn theia, a rûk chuan ka lainat viau mai, an khuate a sik ve ṭhin bawk si a, nausên phei chu an nute an hah viau ngei ang le.

“Rintluanga chu hei nula chhelo i ṭhut pui nghâl der elo? Bem hmiah rawh, in inhmeh viau lehnghala, khawdang nula te hi lâwi lût ve zung zung teh u. Nang ni ang lehkhathiam phei chu tu nula mahin an hnar cheu nang” nutling pakhat chuan Rintluanga chu rawn fiamin kei nên chuan min en tawn zak zaka.

Midang chu an lo nui dar dar mai, keipawh chu ka ṭhen ve saka, an infiam dân ka hre ve tawh bawk nên huatah pawh ka la lêm lo. “Hei ka bem mêk a, min chhân hun ka nghâk a nih hi, khawpui nula chu a fing bawk nên bem tlûk theih pawh ka inring lo, a ṭang ṭung zêla” Rintluanga chuan uang thuang zet hian lo tiin a nui zui hak haka.

Ka lo nghawk sawk mai “Nghal viau suh aw, ka ṭang ṭung pawh ka hre lo, kha naute kha” ka sawi zo hman lo naute bawk vâka kal thei tawh chu hmun sâng vak loah aṭang chuan a tla thla nghala, a nu chuan a pawm nghal vat nangin a ṭap nasa ngei mai.

A nu chuan thlêm hauh hauhin a kalsawn pui zuia, “Heng vang hian a nia pasal ka la neih peihloh, nu dinhmun hi tih na mai a nilo, nulât lai ang hian a awm theih siloha, hetia zalên taka awm hi alo nuam ber mai” tiin ka nui hak haka, Rintluanga pawh chu ti tho.

Vaccine kan in pêk zawh chuan khua chu a rawn dur khup tawha, vân lam chu chhûm dum chhah pui puiin a rawn khuh hlup bawk. Thli chu a rawn thaw vuk vuka, awm a nuam lo duh ngei mai, hmanhmawh zet hian ka insiam sawk sawka.

“Nu Thang ka haw mai aw, ka tukverh ka kalh siloa in lam ka ngaihtuah riau mai” tiin ka insiam zung zunga, an ni pawhin engmah an lo sawi lova, Rintluanga chuan min insiam pui mawlh mawlhin “Ka lo thlah ang che” a rawn ti a, ka hnial duh lêm lo, ka bungrua chu min khai sak zuia, hmanhmawh deuh tak chuan ka kal zuia, a ni pawhin ka hmanhmawh zia hria in engmah sawi lo chuan min zui ve mawp mawpa, ka ke na erawh chuan duh angin min kal tir theilo thunga.

Kan haw phei chu min hmu a piang hian min melh tawn hrek hrek renga, kan in ngaizawng emaw an ti a nih ka ringa, engmah an sawi lêm loh avâng erawh chuan keipawhin engah ka ngai duh lêm lo. Kan kal pelh rual a nula ṭhenkhat phun leh sar sar ṭhin erawhin awm an ti nuam lo viaua, khua a la lian silova, Mawii lah khân mipa leh hmeichhia inzui chu in ngaizawng thanin an thang zel a ti bawk nen keini pawh chutiang chuan min ngai hialin ka ring bawka, awm a nuam chiah lo chu a ni.

U Rinpuia te in bul kan thlen chuan ka hmu loa, ka thaw huai mai. Theih phei se chuan rawn lêng tawh lo miah se ka duha, a bialnu lah kha zah a hriat hmêl vak siloa, ka tum loh tawpa ka mualpho ka hlau a ni ber mai.

“Helai thleng hi a tâwk mai, ka lawm lutuk aw” tiin ka bungrua a ken chu ka lâksaka, thli lah chu a thaw vuk vuk tawh bawk nên ka hlauthâwng riau, ka in luah lah hi kan la siam ṭha lutuk silova, thli a nat phei chuan buaina tâwk thei ka ni tih ka in hre reng bawk.

“Aw le, zânah chuan ruah a sur a nih pawhin ka rawn lêng tho dawn ania, sawi duh ka neia” a aw ah chuan a zâm a ni tih ka hre theia, eng tak chu sawi tum nimaw? Chhâng lêm lo chuan ka bu nghata, mangṭha in ka in lam pan chuan ka kal nghal vat bawk.

Rintluanga min en dân hi ka hai bik hauh lova, a thil sawi duh pawh kha ka ring thiam mai bawka, chutih rual erawhin ka chhân dân tur erawh ka hre chiang viau thung. Tûnah rih phei chuan ngaihzâwng neih nghal ka duh lo hrim hrima, mite mak tih lutuk tur ang zâwnga awm ka duh hauh lo.

Ka in ka thlen rual chuan ka bungrua chu ka dah fel sawk sawka, tukverh chu ka kalh fel chiah tihah ruah chu a rawn ri phei hum huma, a tam dawn tih hriat tak hian a ri lah chu a ring em em mai lehnghâl. 

Khua lah chu a rawn thim nghal mupa, current chu a thi zui bawk nên ka thla chu a muang lo hle a, ka chhûngte tal awm se chuan ka hlau em em in ka ring lo. Tûnah chuan keimah in ka awma, thli in ka in a rawn chhêm zâwng te chuan ka in chung rangva chu an ri rawk rawka, thlamuang taka awmna chi pawh anilo. 

Ngawi reng chuan ka ṭhu renga, rawngbawl lam pawh rilru ah a lang lo. Pâwn lam chu tukverh aṭang chuan ka thlir renga, hawk a luang hum huma, kawmthlang Vawk in te chu a chhûng chawpin a huh vek mai.

Ka ṭawngṭai mawlh mawlha, ka in hi a hlui ve tawh bawk nên a tlûk ka hlau a ni ber mai. Ka phone chu phawrhin ka hlau bawk nên Mawii chu ka text ta tawpa, a chhân pawh ka rin loh laiin min rawn chhâng vata.

“Enge ni ta, buaina i tâwk em ni?” a rawn ti nghal zata, a ni biak hi chu a hahdam thlâk ṭhin. Zâng khai tak hian min be ṭhin bawk nên kan inhria chu ka vânnei hle hian ka hria a, ka lâwm viau mai.

“Tawk lo e, mahse ka hlau deuha. Bâkah hrilh duh che ka neia, sawi chi a ni em pawh ka hre chiah lo” tihchu ka thawn zuia, u Rinpuia bialnu chungchâng kha hrilh ka tuma, a chi a ngem pawh ka hre chuang lo. Mahsela amah hian thu râwn min pêk theih ngei chu ka ringa, khanu zia pawh kha khaw khat an nih angin a hriat ngei ka ring bawk.

“Enge ni sawi la, ka lakah thurûk nei suh ka tih tawh kha, ṭhian kan nia min hrilh vek rawh. Mahsela i duh loh chuan ka tilui chuang lo che a nia” a rawn tihchuan ka thaw ta haka, ka ring tâwk tawh bawka. A zia ka hre tawh bawk nên a sawi chhuah chu ka ring hauh lo.

Chutah zîng lama ka thil tawn zawng zawng chu hmaih nei lêm lo hian ka hrilh veka, a rawn seen nghal vat bawk. “Keichu ka inthlahrung e, ka ngei bawk sia ka zah zia chu” ka tih lai chuan a rawn typing mêk a, keiin a message chu ka lo ngaichâng reng bawk.

“A va zak lo ve, engah mah ngai suh. Ka sawi tawh kha, hmeichhe nasa lutuk zah hre miah lo ang hi ania, u Rinpuia pawh khân a duh tak tak lovang, a mah khân a zar nasa lutuk ka tih kha, zahna tur a awm lo. Amah zâwk kha zak tur a lawm a nih, a pasal pawh aniloa, a mipa in a duh lova a rîm peih lo animai, inthiamlo duh suh. Mi zawng zawngin a zar hneh zia leh a ûm kawi nasat zia an hria alawm, dik tak chuan u Rinpuia hi chuan a ngaihsak miahlo,mahsela a mah hian an in ngaizawng tiin a sawi kual nasa lutuka, u Rinpuia lah kha mi ṭawng tam lutuk leh hmeichhia khing duh lo a ni bawk sia, a huang tau lutuk a nih kha. Lo khawih hrep tur che a lawm, hmêl bakkhate ropui si” a rawn ti duah chu keimah chuan ka nui haka.

Ka rilru chu thli tleh lak ata a hruai pêng chiang ngei mai “Dik tak chuan u Rinpuia hian min fiam a hmanga, amah hi ka hrethiam lo, mi kâra kan inhmuh hi chuan min hre ngai lo ang hmak hian a awma, kan pahniha kan awm leh hian a ṭawng kam hi a mak thei lutuk, amah hi ka hrethiam lo" ka ti a, ka rilru tak tak in ka sawi bawk.

Mawii chuan a rawn seen rang ṭhin hle a, keimah ang bawkin midang message a en lo te pawh a niang “A duh che a nih i ring ve em? Amak e, hetiang hian tu hmeichhia mah kha a bialnu hlui in a phatsan aṭang kha chuan a nihpui a a biak ṭhat hi ka hre ngai miahlo, nula in an fiam pawh hian a nui liam mai mai zela, a duh che a nianga” a rawn ti chu chhân mai dân tur pawh ka hrelo, ka ngawi renga.

“Eng pawh chu nise Rohlui thusawi kha chu engah mah ngai suh aw, a thik che a nih kha. U Zorina hi neih a tum nasa bawk sia, i rawn kal hma pawh khân hmeichhe dang nên an buai fo tawh mai. Zah a hrelo, khaw chhûngah pawh hian an sawi nasa lutuka, mahse a sim hleitheilo a nih hi” a rawn ti leha.

“A nih u Rinpuia bialnu hlui chu tunge a? Engvanga inṭhen nge an nih?” tihchu ka zâwt a, ka hre châk miau a lawm. Engvanga hetianga ka laka awm tlat nge pawh anih ka hre duh bawka, mahsela Mawii chuan min hrilh theih erawh ka ring hauh lo thung.

“Aaa a hming chu Nunzuali a nia an inzui rei, têt tê aṭanga in kawm a in ngaizawng chho kha an nia. Khaw mite pawh hian innei mai turin an ngai vek tawha, mahsela Nunzuali khân mipa dang an school kalpui ve tho nên a lo kawp a niang, an inṭhen zuia kha mi hnu kha chuan bialnu nghet a neih âwm ka hrelo” a rawn ti dap dapa, ka ring hlel lêm lo.

A bialnu pawh chu amak ka ti takzeta, chutiang khawpa inzui rei si a phatsan thei chu amak ka ti hle  a, mihring hmangaihna hi chu a lo pâwnlang hle dâwn hian ka hria a, kan hmangaih viau emaw kan tih pawh hi kan la phatsan thei tho va, kan hmangaihna hi a nêp ka ti ngawih ngawih bawk.

Min duh lo tu kan duha, min duhtu kan hnar ve leha. Kan nun hi a kual nuaih ni ber hian ka hriaa, mihring hmangaihna ah hi chuan rinna nghah lutuk hi ka tum lêm lo, vawikhat tihsual palha reh thei hmangaihna hi a tam tawha, tumah han rin tak tak tur hi an awm meuh lo ni hian ka hria a, hmangaih kan tum poh leh hian natna a hnai ni maiin ka hre tawh.

“A nih chu, thli hi a tleh nasa sia ka hlau deuh hleka, ka lo be tawp che a nih kha, chutih rual erawhin i thusawi ka en ka en hian u Rinpuia chu biak ṭhat chi vak niin ka hrelo, amah sual lo mahse a duhtu kha a nasa emaia, tihbuai loh law law a ṭha in ka hria, vawikhat pawh mitmei ka la hmuh lova, a hmeichhia zâwk in khatiang khawp khân min rawn ṭawng khum ania” ka ti sapa.

Ka ngaihdan dik tak ka sawi bawk, amah chu ṭha ka ti a. A mizia pawh ka duhzâwng tak a ni bawk, mahsela ngaihzawng a neih loh thu pawh a sawi miau silova, keiina ka lo buaipui ve chiam tur a nilo in ka hria, kan awm lohna tura awm tum chu mahni chhiatna bul mai mai ani.

“Hlauthawng lutuk suh, eng êm a thleng lovang. Hmanni khan an rawn siam sak che a ni lo'm ni? Ngaih ṭha deuhin awm rawh, ruah sur lo se chuan ka rawn kal tur ania, bâkah ka hmui leh mit la vûng hian min la vah chhuah tir ngam chiah lova, naktûk lamah te chuan a vûng pawh a zia awm tawhin ka ring, nang enge i an?” a rawn ti zuia.

A thurâwn sawi avâng chuan ka hlauhthâwnna te pawh an reh ve deuha, thaw huai hian “Ka ṭha e,ka chal bâk an zuk ve lova, ka ke hi a ni deuh mai. Tukinah khân ka zût theihnghilh daih lehnghâla, a pawi tak tak, a dam har vaih chuan a buaithlâk ve viau ang” tiin ka ke chu ka melh zauha.

U Rinpuia min hmeh sak vâng kha nge chutianga na erawh chu ani tawh hauh lo thunga, min hmeh sak lo se chuan a vûng nasa viau in ka ring.

“Tuilum khân zût leh rawh, ngaihthah chi a ni miahlo ania, dam chiang lova i awm chuan nakin zêlah a pawi thei a nia. Ka dah phawt aw, chaw ei kan tum deuh tawha” a rawn ti zuia, keipawh chuan ka lo aw ve mai bawka, chaw chu an ei hma âwm hle mai.

Keipawh chu ka ke hmehna tur chu chhuangin ka che zui rak raka, rawngbawl ka ngai lova. Zîng lama ka siam sa rin ka tum avâng chuan chhuanlum tawp ani mai, ka nute ka be paha. An ni pawhin min ngaihtuah viaua, rawn zin vat an tum thu an sawi chuan keipawh chuan ka hnial lêm lo, ka ngai takzeta. Hna neih ve ka tum ṭalhh avâng khân an phallo chung ka kal lui kha ania.

Ka nu leh pa hi sawrkar hna nei ve ve an ni a, sum lamah pawh kan buai lêm lo, kan unau hi kan tam lova, unau pali chiah kan ni bawk nên ka nu leh pa chuan lehkha zir zêl turin min duha, kei erawh chuan hna neih vat ka duh avâng khân tûna ka hna pawh hi pawm ka ni bawka, nuam pawh ka ti a chutih rual erawhin chhûngte hmuh phâk loha awm erawh hrehawm tihchang ka ngah mai.

Ka tui chhuan a so tâkah chuan u Rinpuia tih ang chiah khân ka ke chu ka zut ve a, a na sa huam huam mai hian ka hria a. Ka ner leh sak sak ṭhina, mi damlo enkawl nuam ti viau si hian keimah leh keimah in enkawl erawh chu a har ṭalh mai.

Ka inhmeh zawh chuan ka chawhmeh ṭhing vel chu chhuanglumin chaw chu ka ei zuia, ruah chu a han ta bawk nên tlêm chuan awm pawh a nuam ta deuha, current erawh a la êng chuang lo. Thingtlâng lam chu ruah a sur hlek leh current a thim nghal an tih kha a dik dâwn riau hian ka hria a, ka awm hnu pawh hian ruah a tlâk tawh phawt chuan ala thi zat zat tlata.

Ka emergency light neih chhun chu ka chhi ve rana, khua a thim chiang tawh bawk nên awm erawh a nuam lo ru viaua, tu emaw tal awm pui ila ka ti takzet bawk.

Mut chu châk viau mah ila Rintluanga khân rawn lên a tum bawk nên mu duh bîk mai lo hian ṭhutthlengah chuan ka ṭhu rana, power bank ka lo keng hlauh chu ka lâwm ngei mai. Ka phone chu charge phahin ka khawih pah paha, chutih lai chuan kawngka chu a rawn ri zui karh karha.

“Lo lêng rawh” ka tih rual chuan u Rinpuia a rawn lang leh hlawl mai, zanin chu nidang ang lo takin tshirt var ha in a chungah denim jacket dum a rawn ha a, jogger pants dum tho a rawn hak chu a inhmeh leh pek viau mai. 

Engmah sawi lo hian ka bulah chuan a rawn ṭhu a, mi pawh a en chuang lova. A ngawi renga, chunglam melh hian a meizial chu a ṭan zuia, a pak khuk rual chuan tui tih hmêl tak hian a mit a chhing duar duar bawk.

Min la be chuang hauh lova, a phone phawrhin a hmet mual mual mai. Sâwma te ho erawh kha chu an rawn lên kha ka ring lo hrim hrima, an vûng nasa bawk nên an vâk chhuak ngamin ka ring lo.

Ngawi reng hian ka bula ṭhu chu ka melh leh zawk ṭhin a, min ngaihsak miah lo hian a phone ringawt chu a bih ngar ngar mai. Engvanga ngawi reng chung hian rawn lêng fo nge maw a nih le, tukinah a bialnu in min ankhum zo chauha, a zânah amah a rawn lang lehnghâl chu ania, buaina ka tawh leh mai erawh ka hlau hle thung.

“Thingpui i duh em?” ka ti ta nge nge a, a rawn lêng ve si a mawi lo deuha lo biak ringawt pawh kha ka duh bik lo. A lu a bu nghata, keipawh chuan flash a ka thingpui lumsa dah chu va thli chhuakin a bulah chuan ka chhawp zuia.

Keimah erawh amah hlat deuh takah ka ṭhu thunga, a mi uap ana leh riau tawha. A ṭawng miahloh hi chuan ka nêl lo riau zel bawka, chutih rual erawh in a ṭawng chhuah leh ka haw zêl si lai hi a danglam na a ni ve in ka hria.

Ngawi reng chuan mahni phone enin kan ṭhu dûn ren râwn a, a ninawm duh ngei mai. In be miahlova rawn ṭhu chu rawn lêng lo nên hian thuhmun reng an niin ka hria. A reh ruiha, zân hrâm chi te hrâm bâk hriat tur a awm lova, naupang thâwm tak ngial pawh hriat tur a awm hek lo.

“Hmingi ka lo lêng” tih ri ah chuan ka ṭhu chhuak zawka, Rintluanga a ni tih ka hria, ka bula ṭhu ka en chu a lo ner sawka, Rintluanga rawn kal tur chu a enga mah hma hian a ngaih theih hmêl loh hle a, engmah erawh a sawi chuanglo.

Engvanga ṭawng mawh ta em em nge maw a nih le, tukinah kha chuan a pâwt zawih zawih sia.

“Awm e lo lût tawh, i va rawn lêng har ve a. Lo ṭhu rawh, thingpui ka lo thlit ve ang che” ka tih lai chuan u Rinpuia nên kan ṭhutna lam chu a rawn pan zuia, a rawn ṭhu ve dawn emaw ka tih laiin Zorinpuia chu a rawn mu thuta “Ka kâwng a na tlat mai, pakhatah khân ṭhu mai rawh” a ti zuia, a hmêlah chuan a runluih tih hriatna tir awm lo mahse a runluih tih erawh ka hre chiang viau thunga. Engvanga chutianga lo awm ringawt nge a nih dâwn ni.

“Kha aw thingpui chu” tiin Rintluanga bulah chuan ṭhut tumin ka che zuia, chuveleh u Rinpuia chu rawn hawi pheiin a lu chu a kân uk uka, “Ka kâwng hi min lo hmeh sak teh, i ke ka zût sak man che a nimai” a rawn tileh a, a hmêl ka en chu a uang hauh lo, hepa hi! Enge a hriat ni.

Rintluanga a thik ti dawn ila engmah kan inkârah a awm bawk silo, Rintluanga min rawn en chuan zawhna mitmeng hian min melh renga, kei erawh chuan chhân mai dân tur pawh ka hrelo. U Rinpuia lah chu ṭhutthlengah chuan a bawk zuara, a mah a ruang a sei bawka ṭhutthleng bân pâwn lamah chuan a ke a la lawr chhuak zuah mai.

Ka in lêng neih laia chutiang a rawn sawi kher kher chu ka ngei viau dâwna, han tih vak ngaihna ka hre bawk silo. “Tunah kher angai em ni? Mi phût lêt neiin an pui ngailo, Mizo tlawmngaihna pawh anilo” ka lo tih laiin a rawn nui haka, “Phut lêt neiin thil ka tihsak lo che, Mizo tlawmngaihna hre rengin ṭanpui ngai i hmuh chuan hawisan suh, hei ṭanpui ka ngai a nih hi” a rawn ti leh supa, ka nui tawi tak mai, amah lah chu a thutak bawk nên ka ngei lutuk.

Engvanga tûnah kher chutiang rawn sawi chu nge a nih le, Rintluanga lah chuan rinhlelhna mitmeng hian min en renga. Zawhna a ngah zia chu ka hmuh hmaih biklo, mahsela ani lakah pawh in sawifiah ka ngai in ka hrelo bawk.

“In lêng ka neih hi, inah haw la i chhûngte tih tir mai rawh” ka tileha, ka huphurh tak tak. Mipa dang an awm ve renga, chutia a nupui ang maia min bia chuan min ti lâwm lo lek leka, mahsela lâwm lo ngam erawh ka ni hauh silo. A sawi ang tak takin ka ke na min hmeh sak mai nilo in min paw tam ber a ni a, a lakah lâwmthu sawi tûr zâwk ka ni tih lah ka hai bik lova, mahse ka hreh êm êm tho.

“Hmanhmawh la, mipa ve tho a nih kha. A mawi lohna a awm lo, ka kâwng a na ka tih kha, ka puak haw nân che a na vek a nia, ka dâr pawh a na tel” a rawn ti leh lek phei chu ka inthlahrung viau mai. Dâwt a nilo tih ka hria a, min puak rei zia ka hriat avângin a thusawi chu rinhlehna pakhat mah ka neilo.

“Hmingi Zorina nên hian in in ngaizawng em?” Rintluanga chuan a rawn ti zuia, a mah ka va en chu a zawhna chhâng ngei turin min duh tih hriat tak hian min lo en reng a, chhân mai ka tum lai chuan u Rinpuia rawn ṭawng leh avângin engmah sawi lo chuan ka ngawi zui a, an pahnih chuan ka en tawn chhên ringawt.

“In ngaihzâwn leh zâwn loh hei hian a kâwk lo, Hminghming hmanhmawh la, ka haw ṭep tawh a nia” a rawn tih leh avâng chuan a sawi ngun bawk nên a bulah chuan va ṭhu in a kâwng chu ka chumsak zui dat data, engmah sawi tawh lo hian a mit a chhing renga, Rintluanga awm ve chu a ngai pawimawh lo tih hriat tak hian a duhna lai lai chu a na tiin a sawi zauh zauh renga, tih loh theih ni hek lo, ngawi reng chuan ka chumsak ve mawlh mawlha.

“Bialnute an awm ve renga, hmeichhe dang han in massage tir chu i bialnu in a haw leh viau lo maw?” Rintluanga chuan a rawn ti tawla, a aw chu alâwm loh hmêl in ama lam ka va hawi lai chuan lâwm loh hmel tak hian a ner sawka, a awmdân chuan awm a tinuam lo ru viau maia, an insual mai ang tih pawh ka hlau hle bawk.

“Bialnu ka neih âwm pawh ka lo hre lova, min hmeh bel hi an ngah bawk si a. A tu ber hi nge ka bialnu ah ka pawm dâwn ni” u Rinpuia lah chuan a lo ti sam mai a, a aw dam dap reng te chu mak ka ti a, thinrim in Rintluanga chu a chhân loh laiin a ni erawh a lâwm hmêl chiam loh hle thung.

Ka en tawn zak zak renga, ka lo ṭawng a hun lo tih ka hre bawk. “Rohlui kha i bialnu emaw ka ti a, chu a lo ni nange? Nge ni a nula hmêlṭha deuh a rawn awm tâk avângin i thlauh thla zâwk ni?” Rintluanga bawk ani, engvanga chutiang thu sawi chiam chu nge a nih ka hre lova, u Rinpuia thusawiah khân huat tur a awm pawh ka hrelo bawka, a aw râwl vin chu mak ka ti hle bawk.

U Rinpuia chu a nui suka, a hmêl chu a la ngai renga, Rintluanga thusawi chu a ngai pawimawh lo hle tih ka hre bawk. A mit rawn meng zawkin Rintluanga lam chu a hawia “Ka tân nula hmêlṭha an vâng hauh lo tih i hria ang chu maw? Ka duha, ka lêng a nimai, tlangvâl ka ni a. Ka duh chu ka thlang mai ang, midang min thlansak ka ngai hauh lo” a ti ve ta nghata.

Rintluanga nên chuan an inmelh tawn ngar ngar mai, an mitmei chuan an inbei nimai hian ka hria a, ka awm anuam ta miah lo. A tu amah hi ka tân chuan engtihna mah an nilo, u Rinpuia pawh a bialnu avâng khân ka la lawm hauh lo bawk, a bialnu pawh nilo mahsela a mah avânga hmeichhe dang ṭawng khum ka tuar kha ka tha a na bawk nên biak ṭhat chiam ka tum lem lo.

Rintluanga chu za lo tak hian a ṭhensaka “I hmêl chu i chhuang deuh nge hmeichhe ho in an zar vâng che hian ilo in la viau zâwk? Keichuan engah ka ngai chuang lo che a nia” a ti hmuka, u Rinpuia chu a thinrim dâwn emaw ka tihlaiin a khi suka, a tho chhuak nghâl zat bawk.

“Nula avângin i ṭawng tam ta mah mah hle mai, ka kian ang che. I duhtawkin ilo bem dâwn a nia, mahse hei erawh chu hria la, ka nunhlui i sawi leh a nih chuan ka ngawi tawh hauh dâwn lo a nia, Sawrkar hna zawng chuan rilru zâu tak put tum tawh ang che” tinghutin keichu min en tawh lo hian a chhuak zui daiha.

Ka hamhaih bawk nên sawi mai tur ka hreloa, a chhuahna kawngkhâr chu ka en zui vung vunga, thâwm a rawn nei tawh hauh lova. A haw tak tak a nih ka ring, khatiang a a awm kha ka lo beisei hauh lova, keipawhin Rintluanga ṭawng duh dân chu amak ka ti a, a ni pawh hi eng a nih ka ring ta hauh lo.

A enga mah hma a a bialnu ang thaw thanga ka laka thikthu a pe chhia te chuan amah ka hlat duhna an tizuala. Ka ngawi reng ringawt, zanin ka in lêng te zet chuan min ti lâwm lo dûnin min ti thang tlâwm riau hian ka hria a, ka in seh ruh ṭeuh mai.

“Hmingi min ngaidam dawn a nia, i pawi sawi ka lo neih chuan kha lah ka fiam mai mai emaw ka tih laiin a lo thinrim hlauh si a” Rintluanga chu ka melh zawka, chhân pawh ka chhâng lo. A zia ka hriat chian tâkah chuan ka mi ngainat chi a ni hauh lo, mahni hmakhaw ngai tak leh mahni in sawimawia midang sawisêl chîng mi a ni tih ka hre chiang ta viau a.

U Rinpuia zâwk kha a thinrim hauh lo tih leh amah zâwk hi a thinrim zâwk leh buaina chawk chhuak hmasa zâwk a ni tih lah ka hai bik lova, u Rinpuia a ṭawng khum dân kher kher chuan min ti thinrim ve lek lek a, midang hmuhsit chîng leh sawichhiat chîng tak a ni ang tih ka ringa, ka en leh lai chuan pawisawi âwm lo fahran hian a kut hmalama suihin min en renga, a thusawi ka chhân loh avâng chuan mak tih hmêl tak hian min en bawk.

Rawn ṭhu ṭha in a aw a thian kharha, “I pawi ka sawi a nih chuan min ngaidam dawn ania, tih thinrim kha ka tum miah lo mawle. Rinai in fiam a lo dâwl lo a” tiin a nui haka, a hmuh loh lamah ka ner sawk thung, vawiin thleng kha chuan mipa fel leh kawm nuam tak angah ka la ngaia, zanina ka hmuh dân leh a chêt dân erawhin khâng ka lo hmuh dân kha an ti bo vek tawha.

Mipa mahni in dahsang tak leh nihna hre ran mi a nih ka ring bawka, ka mize duh loh ber chi a ni bawk. Amah zâwk kha a thinrim hmasa a, u Rinpuia khân fiamthu bâkin a chhâng hauh lo tih ka hre chiang viau bawk, kei pawh chu engvanga Zorinpuia chu ṭan em em nge ka nih ka hre thiam bik lo.

Mahse ka hriat loh lamah miin amah an sawisêlna hriat chu ka lâwm loh zia erawh chhûngril lam aṭang chuan ka hre chiang viau thung. “A thinrim pawhin ka lo hre lova, i biak dân a zirin a lo chhâng mai che niin ka hria, mipa fel tak leh dawhthei tak niin ka hria asin” ka lo ti a, ka ngaihdan tak tak a ni bawk.

Mipa thinram tak leh sual chu nise Rintluanga kha a hnek daih tawh ang tih ka hria, mahsela Rintluangan thinrima a chhân lai pawh khân a hmêlah khân a ngaih nêp hmêl hluah hluaha, Rintluanga thusawi te kha a beng ah a khung pawhin ka ring lo. A nuih a tiza zâwk niin ka hria.

“I hmuhah chuan a nimahna, mipa hi chu kan hmeichhe duhzâwng lakah hi chuan ṭhat kan chhuah ṭhin a, kan inthup thei riau a sin. Insawi theih hi nuam kan ti bawka” a tihchuan a rûkin ka khi saka, current a la awm lo bawk nên ka hmêl a hmuh theih ka ring lo.

A thusawi chuan ka nuih a tiza tak tak, amah pawh hian a thusawi ang chu a ti tih a hrethiam miah lo a nih hmêl, u Rinpuia kha chuan ka bulah han insawi theih leh fel tak anga lan kha a tum lêm lova, ka rilru hneh tum pawhin a che ngai heklo, a nihna ang ang khân a lang tawpa. In ngaihzâwn rawng kaia min fiam pawhin beisei tak tak nei ang erawh chuan a awm duh hauh lova, kha kha keipawhin dangdai ka tih chhan a ni.

“A nih pawh a nimahna, mipa hi chu ngaihzâwng neih lai pawh hian mi kawp mai te hi in hreh lova, in in ang tlâng deuh vekin ka hria a sin. Nangpawh a rûk hian ilo hûng ṭha phian lo maw?” tiin ka nui zui haka, amah chu ka melh kher bawk, amah infak nâna midang a sawisel kher chu a mipa zia lo ka ti a, pa lo ka ti viau bawk.

Mipa dik tak chuan an duh chu an bawh zui maia, an duh neih nân a in sawi theih lam aiin hneh tumin an bei zâwk ṭhin. In sawi theih leh in lâk fel vak hian hmeichhe rilru hi a hneh vek lo tihte hi an lo hre nge maw ni, kan mipa duh tur chuan ṭawng ka khera min bem ngai lovin kan rilru leh thinlung hian a duh mai ṭhin, neih hmachhuan a in duhna chu rosum hmanga lei theih, siam chawp hmangaihna ah ka ngaia, keichuan ka damchhung mai nilo thih hnu piahlam thlenga hmangaih tur ka duh, hmeichhia chuan tumah chhan neiin kan hmangaih ngai lova, kan duhzâwng tak kan hmuh chuan an chanchin kan ngaihvenin kan ngaipawimawh teh chiam lo, an nihna ang ang khân kan duh tawp mai ṭhin.

An hausak avâng leh an hmêlṭhatna te avânga kan hmangaih a nih chuan dam chhûng a daih ka ring lo ve tawp bawk. Keichu in sawi theiha ka duh theih nâna mahni nihna chapo pui mi hi ka duh ngai dâwn lo tih ka hria, thinlung leh hriatna ṭha tak ka neia, chu thinlung chuan a milpui tur thinlung nei tu a hmuh hunah a thlang mai tûrah ka ngai, hausakna leh enge a neih lam a ngaihtuah hauh lo bawk ang.

“Aaa tûn thleng hian ka duhzâwng ka la hmu bik lo a nih hi, in sawi theih vâng pawh a ni kher lo a sin. Englo a nia, ka duhzâwng tak i ni” a rawn ti lehnghâl zata, ka rin sa mah nise chutianga tlang taka a rawn sawi chu mak ka ti lek lek mai.

“Hmingi vawiina ka thusawi kha i hria anga, zanin hian i thutlukna hriat ka duha. Ka zin leh thuai dawn si a, min duh ve em tih hi ka hre duh a ni, keichuan ka hmuh tirh aṭang che khân ka duh tawh che a, min nei a nih phawt chuan hrehawm tak chuan ka siam hauh lovang che. I thutlûkna a zirin ka chhûngte ka be duh dâwn a” a rawn ti chu chhân dân tur pawh hrelo hian ka melh mâwl tawpa, eng ang mi ah nge maw min ngaih le? 

A duh duha bem thlûk theihah min ngai ni mai hian ka hria a, chu chuan amah chu min duh loh zual tir sawt hian ka hria a. Ka chhânna tur pawh ka hre chiang viau mai “Rintluang keichuan ngaihzâwng neih lam hi ka la ngaihtuah ngailo” tih zawng chuan ka chhâng a, a dang sawi tûr pawh ka hrelo. 

Khati teh tawpa a rawn sawi thei kha a mak ka ti zâwk, a zuam tur leh ka laka beiseina nei tur pawhin kan inhriatna ala rei hauh lova. Ka hmuh dân a dang vek tawh mai, duhna thinlungin ka en ngai lova, ka thawhpui nu fapa a nihna angin ka be ve mai kha a nia, chutianga min duh thu a rawn sawi mai chuan min ti awm nuam lo viau mai.

“Min duh lo em ni? Ngaihtuah chiang la, tûnah tut tut pawh ka ti chuang lova. Ka la nghâk thei che ania, ka hmuh tirh aṭang che khân ka nupui ni turin ka duh che a, zanina ka rawn lên chhan pawh ani, nge bialpa ilo nei reng zâwk nge?” a rawn tileha, a aw ah chuan chian lohna riau hi a lang bawk.

“Nilove, tûnah rih chuan bialpa ka nei thei rihlo. Bâkah a hma mah mahin ka hria” ka ti ringawta, a bâk chhân dân tur vak ka hre biklo. Mawi lo taka chhân kha ka duh bik silova, sawi mai dân tur ka hrelo a ni ber.

A ngawi vang vanga, a phone chu a melh zawk bawk. Enge a ngaihtuah ka hrelova, amah pawh ka en tawh chuang lo, nichina u Rinpuia a hmuhsitna kha ka haw ru tlat bawka, engvanga lo huatpui viau nge ka nih pawh ka hre chuanglo. Hepa hi ka hriat loh lamah hian ka lo vei viau nge tih te chu ka ngaihtuaha, a chungchâng a chhe zâwnga an sawi ka haw tlat te chu mak ka in ti hle bawk.

Tûnah pawh hian Rintluanga ka huat em em chhan a ni tih ka hai bik lova, midangte chu khatiang khân bia se engah mah ka ngaih ka ring lo. Mahsela u Rinpuia chungchâng a nihna chuan loh theih lohin min ti danglam tlat a ni.

Engmah a sawi tawh loh avâng chuan a thingpui ni chu sengin ka va sil zuia, chutih lai chuan current a rawn êng ve chiah bawka. Ka thaw huai mai, thim kârah chuan ka mut ṭhat theih pawh ka ring lova, chutia êng a rawn awm chu ka lâwm ru viau mai.

In chhûnga ka luh chuan a rawn tho chhuaka, kal mai lo hian a hawi kual a, enge a tih tum tiin ka lo en ve reng thung. Chutah ka lam chu rawn panin “A nih ka haw mai ang aw, a tlai tawh emai nidangah ka rawn lêng leh dâwn a nia” a tihchuan chhâng lo hian ka bu nghata, min rawn kal pelh dâwn lai chuan min en leh vang vang phawta, a awmdân chuan ka ngaih a ti ṭha chiah lo bawk nên in ring ran hian ka awma, mahsela engmah ti zui lo hian a chhuak zui vuta, ka thaw nghal huai bawk.

Ka hre chiang silova, mipa ṭha lo in lêng ka nei fuh ang tih ka hlaua, naktuk zân lam chu Sawma te ho lêng tura ka biak leh mai angai ang, an ni kha chu an zaua, an bula awm nuam ka ti bawk. Hmeichhia ang nilo in ṭhian ang tak takin min en tih ka hria a, chuvang te pawh chu a niang an bulah chuan ka thla pawh a muan em em ni.

Mipa hi ka nêl ngai hauh lova, chutih rual erawhin ṭhian atân erawh kawm ka nei nual thung, hmeichhia chu han in kâwm ve bawrh bawrh ṭhin mah ila buaina neuh neuh neih kan hrât avâng hian mipa hi a châng chuan kawm nuam ka tih zâwk châng a tam viau mai.

Rintluanga a haw tâkah chuan hmanhmawh deuh tak hian kawngka chu ka kalh zui sawk sawka, a tlai tawh avâng chuan hmun chu phiat leh te te in ka phone nên chuan room lamah ka lût zuia, ruah chu a tla tawh hauh lo va, chutih rual erawhin boruak erawh a vawt vur maia, mut lum a har viau lehnghâl. 

WhatsApp ka lût chu group thar a lo awm avâng chuan mak ti deuh tak hian ka lût a, group name te chu tu tih nge maw ni, a group chhûng ka luh chuan Sawma te ho siam a ni tih ka hria a, NU LEH PA NGHAPIH tih ringawt chu group nameah chuan an hmang thawr a, chutiang group hming mak sak lutuk chu engvanga hmang nge maw an nih ni.

Niminah khân group siam kha chu an sawi ngei a, hetianga rang hian an siam ka ring hauh lo kha a nia, keimah chauh nilo in midang pawh chuan group hming chu an duh vak lo a niang group ah chuan an lo in hnial hlawma, Mawii chuan “Hetiang group hming te chu, thlâk rawh u. A ṭhing lutuk, enge nu leh pa nghapih chu” a rawn ti a, mipa ho erawh chuan nui vak emoji hian an lo chhâng thung.

“A common loh êm hi, chhungkaw hnathawktu ber te kan nia, hnathawk nasa ber leh engmah nei ve chuang silo, hnathawk tura an duh, mahsela thil danga an duh loh kan nihna tak hi a entir” Maman a tihchuan kei erawh chuan engmah ka la sawi mai lo.

Mawii erawh chuan thlâk turin a ti char chara, admin bâk chuan a thlâk thei bawk silo. Mama chu a hau leh ṭhin, an inhnial laih laih chu engmah va sawi lêm lo hian ka en ve zela, ka nui ka nui mai a. An ni hi chu an thusawi engkim hi an nuihzatthlâk ngawih ngawih hian ka hria, an awm khâwm tawh hi chuan tudang mah hi an ngai bik hauhlo, ṭhian in pawh leh in ngai tak chu an ni ve in ka hria.

Chutih lai chuan group icon an rawn thlâk ta chu ka en nghâl vata, ka hmuh rual chuan ka ner nghal sawk mai. Kan vaia pic chu hmangin nimina kan hmai dum neu nuau chunga khuaiin min zuk lai chu an hmanga, kan lang chhe hlawm em em lehnghâl, engtik laiin nge thla an lo lâk hman ni. Ava ṭul lo tak, kei phei chu Sawman min puak laia kan inhnial ka ner lai tak hi an hmanga, ka ner ka ner mai.

“Laldampui group icon hi thlâk teh a ṭul lo emai, mite'n an hmu riau riau ange aw, hetiang hman chi pawh a nih loh hi” ka va ti ve a, midang pawh chuan min lo thlâwp bawk aniang an rawn sawi nghal phak phak mai. U Rinpuia erawh a la rawn lang ve miah lova, a mu tawh nge ni dâwn ni.

“A ho lutuk, tumahin an hmu dâwn lo. Keimahni group ania, keimahni thlalak ka hmang mai a nih hi, hmutu tur an awm lo. Mi hmuh lo ula a nimai” tiin a thlâk duh der lova, a va han buaithlâk ṭhin tak.

Hna chungchâng vêl bâkah in rin vela lui kal an sawia, ṭiau a kal an sawi chuan ka phûr viau mai. Kei pawh chuan zân lama rawn lêng tura ka duhthu chu ka va sawia “Rinlucka a rawn lêng lo em ni? Hun thâwl kan pe ve em em cheua, engah nge tûn thleng chuan in la in sawi fel loh?” Sawma chuan rawn tiin midang pawh chuan an lo pawmpui khawp mai.

Engvanga min hmehbel tum tlat zel nge an nih ni, min duh nise chuan hetiang mai mai lo hian min bem tawh ang. Mahsela ka lakah eng thu mah a la chhâk chhuak hauh lova, beisei awm deuh si leh beisei dâwna beisei ngam awm chiah siloa awm a thiam bawk si, kan ṭhiante lah chuan kan ni turah an ngai hmiah mai lehnghala, a zia lo ka ti viau mai.

“Sawi ziah suh u, kan inkârah engmah a awm lo ka tih tawh kha. An nu ka hlau, ka tibuai ngam lo” ka ti chu an rawn uang nasa mai “Hlauh angai lo, khatiang mai mai kêk phar hrep la a hneh lo dâwn lutuk che, a tê si nang ai a tê fe tih hre ta che. Bâkah a bialnu pawh a nih loh kha, ni vat teh u, nupui nei vat turin kan duh ania” an la ti zuia.

Thil hi thutakin an bulah hi chuan a sawi theih tak tak loh, an ngaih a sam bawk si. Be tawh lo chuan ka chhuah sana, love story chu ngaithla in suangtuahna ramah chuan ka lût zuia.

Ka suangtuahnaah chuan phûl hmun mawi tak, pangpar mawi tak mai a an parna hmunah hian lo awmin, chutah chuan ka mipa duhthusam nên ngei hian kan lêng duna, lungngaihna leh ṭahna te a awm pha velo, chutah chuan ka mipa duh ber nên chauh kan awma, amah chiah. Hlimna leh khawvêla ka duh ang zawng zawng a awm kim veka, chu ka suangtuahnaa mipa chuan ka kutah chelhin a âwm thlamuanthlâk takah chuan min pawm betin hahdam tak hian ka beia, tudang mah kan ngai lo.

Chu ka suangtuahna ramah chuan beitu hmelma kan nei lova, thil mawi ber ber leh hlimawm lam chiah a awma, keimah chiah min enin min hmangaih thu min fah renga, engdang mah kan ngai ngailo, chu ka suangtuahnaah chuan engkim a famkim a ni.

Tumahin min tihbuai phâk lohna ka suangtuahnaah chuan khawvela ka mipa duh ber leh keimah chiah, tudang an awm ve loa, ka suangtuahna a nih miau avângin tumahin ka lak aṭangin an la sawn thei hei lo, tah chuan zantin ka lêng ṭhina, chu mipa ka suangtuahna zawng zawng kawla ka thlamuanpui ṭhin ngei mai tawn tum chuan a ni a tak ramah ka luh leh ṭhin ni.

“I bialpa chu a haw tawh em?” suangtuahna rama ka chên lai chuan u Rinpuia message chu a rawn lût hlawla, a thil rawn sawi lah chu ka beisei loh lam daih lehnghâl, engvanga Rintluanga chu ka bialpa anga ngai ringawt nge a nih ang? 

“Tu ka bialpa maw? Bialpa ka neih âwm ka va hre lo ve” ka ti a, engvanga in sawi fiah duh tlat nge ka nih tih ka inhrethiam biklo. Mahse a message chuan min ti danglam tlata, sawifiah ka châk a ni ber mai, bialpa ka neih loh thu chena hrilh chu ka châk viau bawk.

“A huamhauh viau che kha, i bialpa a nih ka ring ringawt a. I nei fuh dâwn khawp a lâwm kha” a rawn ti leh chu ka chhâng mai lo, ka in ngaihtuah neuh neuha. A bialnu min rawn ṭawng khum dân te ka ngaihtuaha, tûn hi ka tân hnarna hun ṭha tak aniin ka hria.

“Nia mipa ṭha te chu hmeichhe tân chuan an hlu a lawm, hmeichhe vânnei ber chu mipa rintlâk thlazâr hnuaia awm te hi an ni ṭhin. Mi rinawm leh rintlâk kiang tluka himna leh hlimna a awm hleinem, nang pawh i bialnu chu a ṭhat khawp kha” ka ti ringawta, a hmuh loh lamah erawh a bialnu min ṭawng khum dân kha ngaihtuah chhuakin ka hnar ngei ngei a ngai tihchu ka inhrilh mawlh mawlh bawka.

Tûna ka hnar lo a nih chuan kha nu kha a la rawn kal leh duh lovang tih pawh a sawi theih loh, Mawii sawi dân takin khawvel a ngam hmêl si a. A ni anga mualpho erawh ka huam ve hauh lo, ka huaisen lohna lam a nih vâng pawh a nimahna. U Rinpuia hian a ṭhen te a nih ngawt loh chuan keichuan hnaih ka tum hauh lo.

“A ṭhat leh ṭhat loh hre turin ka tân engmah a nilo, muttui phawt. I bialpa pawhin a be duh ang che” a rawn ti leh tawpa, message dang ka thawn pawh a chhâng leh tawh chuang lo. Awm nuam lo deuh siin ka hnar ngei erawh a ngai tih ka hria, mi bialpa anga a lan chhûng chu ka hnaih thiang lo a ni tawp mai.

Phone pawh khawih tawh lêm lo chuan ka in ngaihtuah neuh neuha, he khua ka awm chinah hian ka rilru hi a buai ta riau zel hian ka hria a, ka awm rei thei angem pawh ka hre tawh lo.

Zîng ka tho chu ka lu ana ut uta, tho chhuak peih lo chuan ka khumah chuan ka mu reng bawk. In dawm vang vang in ka ṭhen chak chak mai, peih lo zet chuan tho chhuakin nachhawkna vêl chu ka eia, ka inluahna te chu pawisa pêk ka duh avângin muangchang hian an in lam pan chuan ka kala, ka awmna aṭangin an hla lêm lova, in thumna chiah an ni nghe nghe.

An in ka hnaih telh telh chu inhau ri ka hre zuia, lût mai lo chuan pâwnah chuan ka ding reng bawk.

“Hetiang tur tih hriata lo neih loh tur che a nia, i uire na nu lah mi nupui bawk. In va han rapthlâk em em ve, ka ngawi tam tâwk tawha min zuam a nih ber tawh hi, ka nute ka bia anga kan inṭhen khawp ang. Ka dawhtheih phâk bâk a thleng tawh, ka hmangaih êm che avâng leh kan fate avângin ka tuar hrâm hrâma, enge i tân tih loh ka neih? Rethei taka i awm lai ngaihtuah rawh, tunge pui tu che. Kei leh ka chhûngte hi awm lo se tûn dinhmun hi i thleng hauh lovang, ka nute ka bia anga Champhai lamah ka fate pawh hi ka hruai vek bawk ang, uirepa enkawlah ka dah dawn reng rêng lo” ti a rilru na taka âng mêk chu nu Maengi a ni tih ka hria a, ka ngawi reng mai.

An nupa an in ngeihin an in hmangaih hle emaw ka ti a, an lo buai ru viau pawh a nimahna. Chutia mi chhûngkaw inhau chu hriat duh viau lo mah ila ka hre lo thei silo, pa Zoa chuan “Tinge min rinhleh reng mai le, kan inkawp tawh lo ka tih kha, ka hmangaih bik lo che pawh a nilo, min ring ve em em teh. Inṭhen hi ka duh rêng rêng lo” a ti dam dapa, nu Maengi chuan a chhâng mai lo.

Kei chauh nilo an ṭhenawm te pawh chuan an hre vek tih hriat takin tukverh lam an rawn thlêk leh dâk dâk ṭhin chu ka hmuh hmaih lo.

“Dawt vawi engzat a tam nge i sawi tawh, nizânah pawh in inhmu a nih kha. Ka hai reng rêng lo, ka mit hi a del hek lo, thutlûkna ka siam tawh kan inṭhen hi a ṭha ber, keiaia tihlim thei tu zâwk che chu nei mawlh rawh” ngaithla zawm duh tawh lo chuan ka lêt ta tawpa.

Nidangah ka pe mai ang chu, tûna an awm dânah kha chuan an inṭhen ngeiin ka ring, mak ka ti a khawi hmunah pawh hian mi nu emaw mi pa emaw uire hi chu an lo awm ve vek tho anih hi. Kan mak hi ka ti ṭhin, duhtaka kan neih hun harsa kan tawh chânga min dawm kâng a, engkim kan lo sual chhuahpui ṭhin kan han phatsan duh ṭhin hi amak ka ti a, kan phatsan leh mai tur hi chu neih loh mai tur a nia.

A hmei a pa hian kan rilru hi a mak ka ti tawha, uirena te hi zah nachâng kan hre tawh lova. Mi pasal luahlana, neih sak tu lah sawisêl a hnêk in lo la ṭan a, an thlavang hauh duh tu kan la awm thei te hi kan mak ka ti ṭhin, inti piang thar ṭha zetin a sawisêltu pawh engmah in nih loh kha an duha an innei a nimai te kan la ti theia, mi nupui pasal te va luahlanin an kawppuite an tina tih lam reng ngaihtuah lova hetiang mi thlavang lo hauh duh tâwk te hi kan piangthar zâwk tak tak em tih hi in zawh fo a ṭha in ka hria, thusawm pêkah pawh uire suh tih a ni a, chuti chunga a uire te lo la ṭan leh mi nupa in kar tichhe tu thlavang la hauh ngam kan awm te hi ka zak zâwk.

Nu Maengi kha nu fel tak a niin ka hria a, pa Zoa chu mak ka ti viau bawk. Ka in a rawn thawm ṭhat ni te khân a ṭawng bawrh bawrha, pa ṭha tak ni a ka lo ngaihlaia chutiang uirena lam a a lo kal chu mak ka tilo theilo. Mi hi kan pâwnlam landan avâng ringawta in teh tur a ni lo tih hi a chiang viau in ka hria.

Tumah hi han rin tur leh in nghahna tlâk tur hi tûn angah chuan an vâng ta pharha, nupui pasal neih pawh hi a hmanhmawh thlâk ka ti ta lo. Kan kawppui tur te mizia kan hriat chian loh phei chuan kan tân hrehawmna mai an ni dâwn in ka hria a, fa neih hnuah phei chuan hmeichhia phei chu inṭhen te a lo har tawha, mipa chu inṭhen pawhin tumahin an dem lêm lova, hmeichhia erawh inṭhen hnu chuan mi min hmuh dân a dang ngei ngei ṭhin.

Ka in ka thlen rual chuan chaw pawh ei peihlo in ka mu leh ta daiha, chaw ei chakna pawh ka neilo. Ka lu lah chu a la na renga, tawrh a hrehawm viau bawk, ka nu tal ka bulah awm se ka ti ngei mai.

Reiloteah nachhawkna in min rawn chhâwk tâkah chuan tlêmin ka zia ta deuha, chaw erawh ka la ei peih chuang lo, ka phone chu phawrhin thawnthu play chuan ka mit ka chhing leh daiha, ka chau takzet.