DUHLAI ZORINPUIA CHAPTER 5

DUHLAI ZORINPUIA

CHAPTER 5 

“An rawn thleng e” tih thâwmah chuan pâwnlam chu kan pan sap sapa, inneitunu chu a ṭap chhuak rawih rawih mai. A ni mai bâkah mitthi pa nu pawh a ṭap ve bawk, thâwm dang awm lovin pick up aṭang chuan ruang chu an rawn la thla a, u Rinpuia pawh ka hmu ve ta.

A ni pawhin min rawn hmu tih hai rual lohin ka lam chu a rawn pana, mi hmuh loh tur chuan “Chaw i ei tawh em?” a tihchuan ka bu nghat nghata. An ni chu zanriah pawh an la ei dawn lo tih ka hria, an chau viau ngei ang le.

“Zanin tlaivâr a ngai dâwn si a, chaw min va ei pui lawk la” a tihchuan phâwk deuh tak chuan ka ena, “A mawi dâwn em ni? Hetah ka awm ve loh chuan” ti a ka lo sawi lai chuan min rawn pawt chata “Kan tlaivâr dawn chuan kan in ei puar a ngai, bâkah hmalai hi chu nu leh pa kan kian deuha, a pawilo vang. Midang an tam hi, min lo kal pui lawk la, kan kal rual leh dâwn ania, chutilo chu kan ṭhu hrang hlauh ange” a tihchuan a ri lo chuan ka nui saka.

“Aw le, Mawii kan hrilh lawk ange aw” ka tihchuan a hnial bik lo, Mawii va hmu a thil awmzia ka sawi chuan a ni pawhin “A pawilo, kal rawh u. An ril a ṭâm ang, mipa chu duat te an phût ve ṭhin a lawm, hetah ka lo nghâk mai ang che u” a tihchuan ka inthiam lo ru viaua, mahse a mah zâwk chuan min nawr tâk sekah chuan u Rinpuia lam chu ka pan pheia.

A ni pawhin a hma a a dinna ngaiah khân a lo la awm renga, min hmuh rual chuan a lu a thle nghâl bâk mai. 

“Kal vat ang, mite'n min hmu ange” tiin ka kal pêla “A ho lutuk, duh leh min hmu ang hmiang min zahpui em ni?” a rawn ti bul bul mai, a ngaihdân mai mai chu. Ka tuk lawlh dâwn emaw ni.

“Chutiang zâwngin ngai suh, hetiang ni khuaah mipa leh hmeichhia lo in zui hran kha a mawilo alawm, ngawi reng khân rawn kal vat mai teha” tiin chak deuh tak chuan ka kal tar tara, min rawn man beh thut avâng chuan ka ding chiang ngei mai.

“Enge” ti a ka en lai chuan a kut chuan ka kut chu rawn humin min kaia, ngawi reng chuan a kal zawm veleh mai. La sawn duh bîk lo chuan nui var var chuan hma lam chu ka ena, nilêngin kan inhmu si lova min ngai ve te pawh a niang.

Kut inkai rial chuan chu khawlai reh ruihah chuan kan kal duna, zân boruak nuam tak nên chuan a romantic phiana, mitthi awm lo se chuan ka thawveng viau ngei ang.

“I chau em? Engtin nge in hmuha?” tiin ka zâwt a, tui chhûngah an lût reiin ka ringa, amah pawh a chau viau ngeiin ka ring. 

“Chau vak lo e, a tlâkna aṭanga thui vak lo ah kan hmu a, a awmna lai a thûk bakah lung hnuaiah a lo awm bawk si a, hmuh mai a har deuha. Kan rei phah a nih hi, a lehlamah chuan midang kan zawn ṭhin ai chuan a zia deuh, ni hnih nithum zawn te angaih hi chuan chauh a na zual a” a tihchuan ka bu nghat nghata.

In kan thlen chuan a nu chu a lo la awma, a pa erawh mitthi in lamah khân ka hmu bawk nen a nu chuan a fapa chaw ei loh hria in alo la nghâk a ni ngei ang. Nu te hi chu khawi in chhûngah pawh hian an lo pawimawh a nih hi, pate'n fate an hmangaih lo nilovin nu hi chuan fate ngaihtuahna leh hmangaihna hi an tilang nasa zualin ka hria.

“In lo thleng tawh maw? Chaw ei ka siam dâwn che nge i inbual hmasa dâwn? Hmingte ilo zui ve a nimaw? Nang pawh ei ve leh la, chaw eia kan sâwmna che lah i rawn ei bawk silo” a tihchuan lai zet in ka bu nghat a.

“Ka puar lutuk, a ngailo tihian ka lo nghâk zâwk ang” tiin ṭhutthlengah chuan ka ṭhu thla a, u Rinpuia pawh a inbual hmasak duhthu sawiin a room-ah towel la chuan a rawn chhuaka “Min lo nghâk lawk mai rawh aw, ka reilo ang” tih pah chuan bathroom ah chuan a lût a.

Rei vak lo ah chuan tui inleih ri chu a rawn chhuak phar phar bawk. “Chakai kha ka chhûma, naktuk zîng chu chaw rawn ei ngei ngei tawh rawh aw, zah a ngai rêng rêng lo a nia. I khua a har leh hetah rawn lêng la, hei kan monute pawh an awma, in inkawm thei ang chu. Mama lah hi mi ṭawng mawh lutuk ania, a bula awm nuam iti lovang, hmeichhe biak dân hi a hrelo lutuka” tiin a nui hak haka.

Keipawh chu ka lo nui ve ringawt, ni e u Rinpuia hi chu mi chhawnchhaih leh tihdân chu a hre vak lo, mahse hei tak hi ka duhna a ni bawk sia. Chu erawh sawi chhuah ka tum lêm lo “Zanin chu i tlaivâr ve dawn em?” amah bawk chuan a rawn ti leha.

Mi biak tlangnel hrâm hrâm a tum ṭhin hi nu fel tak a nihzia tilang tu niin ka hria, keilah hi ka bialpa nu a nih vâng nge ka zak khawlo zo vek zel. Ṭawng ka harsat phah bawk “Aw ka tum dân chu a nia, tlaivâr ve loh chuan nula a pum pa a zahthlâk alawm” tiin ka nui hak haka.

An inchhûng chu ka enkuala, kan kal hmasak kha chuan ka hawi chhuah ngam vak loh avâng khân ka hmu chiang lutuk lova, thingtlâng inah chuan a changkâng pâwl tak a ni. A zau ṭha hle bawk, bangah chuan salu leh thlalâk bâkah chawimawina a intar ṭhupa. Ka en chiang châk bawk nen tho chhuakin ka pan hnaia.

U Rinpuia te ho têt lai chu ka en vang vanga “Hei hi bawiha a nih hi, a ute hi chu ṭhenkhat an in dang tawha. A u hmeichhia hian min boralsan tawh thunga, an naupan lai chuan an hlei thei a nia aw, bawiha hi a harh vâng bera. Engvanga hetia puitlin hnua ṭawng mawh ta lutuk nge a nih pawh ka hrelo” nuih hak hak pah chuan u Rinpuia chu min hmuha.

Ka nui ve lo theilo, a cute tak zet. A thlalak hlui lam tawh nimahse an hmel erawh a lang chiang viaua, u Rinpuia biang puar pêk leh hnute hmuam pang chu hmuh a nuam viau mai, thil dang chu en leh in a ṭhen chu an school a exam ti ṭha chawimawina ho a lo nia, u Rinpuia chu ka rin loh deuhin ka hmu.

Lehkhathiam lo emaw ka lo ti a, mahse keiai a zirsangin a chawimawina dawnah hian a ti ṭha hlawm lutuk tlat, board distinctionah ala pass zui, engtin nge hetiang ni chung hian lehkhathiam lo ang maia a awm theih zâwk ni, ka bulah engmah ala sawi lova, sawina hun pawh kan la nei miau lo.

Mahsela ka rin ai a lo theuneulo viau mai, BA a chhuak tawh tih ka hriat phei chuan ka ngaisang ru viau mai. “U Rinpuia hi tinge MA a kal zawm loh a?” nu Âsangi en chung chuan ka ti a, hetianga lehkhathiam thei tho si engvanga zir zawm lova hna thawk daih nge maw a nih le.

“Keimahni vâng ania, ka hrisel tawh silo. I pa Sena lah chuti bawk, a ute ho an in dang deuh vek sia min han awm bosan kha a hreh tawh sia, tihian kan rem tilo chung a châwl ta a nih hi, kal chhunzawm zêl sela kan duh viau nângin amah hian a duh tlat silova” a tihchuan ka lo uipui viau.

A lehlamah a nu leh pa a ngaihtuah vâng tih ka hriat chuan tluk lo ka inti, “Zir zawm thei sela chuan Sawrkar hna ṭha tak a hmu thei awm si a, a duh tawj lo bur tihna nge?” tiin amah chawimawi nâna khawtlâng leh pâwl bâkah a school luhna ho aṭanga a a thil dawn chu tam tham tak a ni.

“Nia a tello chuan hna han thawk thei kan ni tawh silova, min ngaihtuah a nih ber hi. A u te ho lah ti hi an ni sia, an nupui fanaute châwm ve an ngai bawk nen, a duh leh hna te a zawng veleh ang chu” a tihchuan ka bûk pui nghat nghata, a zawng duha thawk duh tân chuan Sawrkar hna pawh hi a vâng bik hauh lova, hna iaiawm tak a awm lova, kuthnathawh pawh nise a iai awm chuang loh. 

Eng hna pawh hi a thawk tu in dik tak leh rinawm taka a thawh chuan a zahawmin a ngaihsânawm ṭhin. U Rinpuia pawh a in bual zo tih hriat takin towel veng chungin a rawn chhuaka, a taksa hi rinai a ngo daih lehnghâl, a pian hi nalh ka tihchi tak ala ni zuia, rei erawh en lovin ka hawisawn daiha.

“Va inthlâk la, i chaw ei tur ka lo siam ange, in tlai lutuk hlauh ange. Hmingtei tân pawh a nuam lovang” lo ti zung zungin choka lamah chuan a phei zuia, a nu hmuh loh lamah chuan u Rinpuia chuan a mit min rawn sân uk mai, lei chhuah zauhin a salu tar ho chu ka enkuala.

Saza leh sakhi an tam deuh ber, uluk taka tih chuan an nalh dangdai phian lehnghâl. Hmanlaiah awm phei se chuan a luck ngawtin ka ring, amah hi hmeichhe duhzâwng takin a ṭawng tlêm reuha, a hmêlṭha lutuk tih tur ni silo hian ngaihno a bei bawk si, a pa hliah hliah an tih tur ang chi hmêl a pu a. Kei ngei pawhin hmêlṭha ai chuan pa ka ti zâwk.

A chaw ei chhûng chuan ngawi rengin phone ah video vêl ka lo en mai mai, mitthi in lamah erawh chuan khuang nen an zai dap dap tawh mai. Ka hmanhmawh ru ve viau mai, Mawii khân min lo nghâk reng awm sia, ka inthlahrung ve deuh. Lo hruai ve mai ila a ṭha tur ania, Faka te ho tal an awm êm ang chu maw?

U Rinpuia pawh a ei reilo, a ha te nâwt leh sawk sawkin min rawn pana “Kal ang hmiang, i nin hmêl emai” a tihchuan a nu hmuh loh lamah ka sik vak mai. Ngawi reng chuan inzui chhuakin khawhar in lamah chuan kan chho leha.

In ṭhenawm e tilo hian an inhlat ve deuha, kawng a chho bawk nên a hahthlâk lek lek mai. A kutah vuanin ka in pawh chhoh tira, ka thaw hliam hliam mai, a ni pawhin ka chauh hma zia hria in min kal chak pui duh lêm lo.

Mitthi in kan thlen chuan Mawii pawh a lo la awma, “In va rawn kal har tak, lût vat ang u. Rawn kal in tum tawh lo emaw ka ti hman a lawm” a tinghal zung zunga, pâwna awm reng chu a ning ve te pawh a ni'ang.

“Nia a inbual fai leh sia kan rei deuh alawm, Sâwma te ho hi an rawn kal tawh em?” in chhûng lam chu ka bih pah dâk dâk a, an hmêl ka hmulo an la kal lo nge maw ni.

“Ka la hmu lo, an rawn la kal lo a niang. Bâkah an in tifai ve a nimai thei, kan lût nghal mai dâwn nge” a tihchuan u Rinpuia zâwk chuan “An rawn thleng ṭep lo nghâk lawk mai ang u, kan luhsan chuan an thinrim leh ange” a tih tâkah chuan Mawii chu a thaw haka.

“Awi tlai tawh nên rawn hmanhmawh rawh se, miin min sawisel leh ange, nula ve si tlangvâl nghakin an awm renga te min ti leh anga, kei ka ning tlat. Thu hrechiang lova mi sawisêl lah hi an peih sia e, khawhar in kal naah takngial pawh fîmkhur a ngai tawh a nih hi” a tihchuan a dik ka ti ve tho.

Mahse ṭhiante'n nghah an duh miau chuan kan nghâk leh pauh aniang chu. An ni pawh an rawn thleng har lêm lo, “Lut vat ang u, kan tlai tawh lutuk” ka lo tihlai chuan “Kan buai a nih hi, kan hmanhmawh ve tho alawm, keini ai rawn kal hnuhnûng tur pawh an tam mai, lût ang u. Phun ve ziah, nula senior tih takah” mitthi in chu nilo se ka beng thum leh awk tawh ang.

Lalmalsawma ṭawng theih dân em em hi chu, kan luh chuan miin min lo en ṭhap a, nu leh pa an la tam mah zâwk. Ṭhalai chu mipa lam ruang zawng an ni nên an la kal vak lo tak taka, a hnung lam chu kan pan vat a, langsâr lutuka ṭhut chu a zahthlâk kan hla thiam loh a awm leh nulh zela, in dem ngawt chi pawh anilo, naupang lam deuh tân phei chuan inzir chhoh ve zêl angai bawk si.

A hnung tlarah chuan inhnawh khâwmin kan ṭhu a, phone chuan YMA khawhar hla chu enin kan zai ve dap dapa, u Rinpuia pawh a zai ve nasa mai. Rinai a zai thiam phian lehnghâl, a aw chu a mawi ka tihchi tak ani. A pa ka timai, mahse a fawn nalh phiana.

Thantea zaisual leh ṭhin chu nuih chi a ni silo, a zai sual pawh a nilo, a thlûk a hre lo lutuk chu a aw a langsâr bawk si. Kan hmalam a ṭhu nu leh pa ṭhenkhat chu an rawn hawi leh ṭhin, Sâwma te ho chuan a rûkin an sik nawk nawk mai.

Keipawh chu hmui zum pût pûtin ka nuia, insûm a har ngei mai. “Zai ve tawh lo mai rawh, engmah thiam i neilo, naupang pawh nila hla tal te chu sa thiam ve la” Mama chuan a tihluka, a ni pawh zai duh tawh lovin a ngawi daih bawk.

“Khatiangin ti suh u, a zai duh chuan zai rawh se. Zai ṭha peihlo, khawhar ina kal si a zai ngai lo an tam ania, a thiam te chu a la naua, a zai tam hunah a thiam chawp ve mai dawn a lawm” ka lo tih tâkah chuan an hau tawh lêm lo, Mawii leh Faka erawh an ṭhut dun tir khera rinai an in ngeih phian mai.

Hla chu en dunin an zai tui nasa, midang thusawi chu bengkhawn ang pawhin an awm lo. An inhnial peih teh lul nen a hunah chuan an lo insûm thei anih hi, keipawh ngawi karin ruang kiltute ṭap ri chu ka ngaithla a, ka mittui ka lo ti tla ve leh ṭhin. Ka chhûngte an nih loh pawhin mitthi ka hmuha, an chhûngte ṭap te, an ṭah hla ka hriatte hian keimah hian hrehawm ka ti ve ngawih ngawih zel.

Thihna hi chu a nunrawng êm a, kan thih ve hnuah chauh kan inhmu leh thei anga. Mahsela chutih hunah chuan tumah hmangaih bik awm tawh lovin kan awm ho tawh dâwn sia, he lei chiah hi in hmangaih tak leh duat taka kan in enkawl bik theihna hmun tur a ni bawk si.

U Rinpuia chu ka en leh zauh ṭhin, ngawi renga zaiin hmalam a melha, a hla sakah chuan a rilru a pe hle tih a hriat. “Run lum nuthai hrai chawi lêng te, kan vaih khua a va sei dâwn em, kan phal theilo dairial chang an. Ka pa ka pa, lo haw leh rawh” tihchu innei tu lam aṭanga an thlan avângin kan sa a, hnuk a ulh ṭûn mai.

Ka nu leh pa la chân lo mah ila hetiang hla hi chuan mi ia kam ṭun zel. Engtikah emaw Pathian hun ruat a, hringnun kal dân ang a kan kal a nih chuan a upa pa thih hmasak tur a ni sia le, mittui chu hru ve zauh zauhin hla chu ring takin ka sakpuia, a fate ka ena an la tê hlawm si. Pa tello chuan engtin tak rawn ṭhanglian ang maw? 

Mizo chu hmân aṭanga kan zia rethei leh hmeithai fate kan hmusitna hi a la reh thei tak tak lova, in hauh nikhûaah hian a lang chhuak leh châwk. An ni pawh pa tello a rawn ṭhanglian tur chuan an la naupang mah mah a ni, a nu lah a khawngaihthlak bawk si.

Ka en renga, nu ber ṭap in “Bawihtei pa, i tello chuan engtin nge kan fate hi ka enkawl tâk ang, he inchhung luahlum tur hian kan la mamawh che a sin. Tunge i awm loh chuan kan belh anga, tuin nge min enkawl ta ang? I lo haw hun nghakin i faten i thil hawn tur sawiin hlim takin an nui a sin; mahse i rawn haw dân chu a va mak êm” ti a a ṭap vawng vawng hriat phei chuan ka tâwt ṭûn mai.

Kei chang ka nilo tih ka hria, midang pawhin an mitmeng aṭang chuan an khawngaih hle tih a hriat theih. “I khawngaih viau a nimaw?” ka bengbulah chuan u Rinpuia chu a rawn phun sapa, ka lo bu nghat mai. Ni e, ka khawngaih lutuk, duh vang rêng ni lo hian tam tak hi chu kan inṭhen a ngai ṭhin si a.

“A fate mawlh saw ka khawngaih, engtin tak rawn ṭhanglian ang maw? Ka theih phawt chuan ka pui zêl ang” ka tihchuan a rawn nui suk, “I rilru a ṭha hle mai, ka duati hi rinai i lo fel anih hi, engpawh nise kan thu a ni silo va, Pathian ruat ang zêl hian engkim a thlenga, pawm thiam lo viau mah ila kan pawm tho a ngai ṭhin a lawm. Kan tâna a ruat miau chuan dan theih a nilova, chhel taka kan tawrh a ngai ṭhin, kan tuar nat pauh leh a ni in min pui nasa thunga” a tihchu dik ka ti viau.

Harsatna leh buaina te hi tawng lo ila Pathian kan au ngai lovang a, hausa leh duh duh nei thei ni ila Pathian kan mamawh lo thuai ang tih a hlauhawm. Chuvang chuan Pathian hian kan buaina leh kan harsatna te hi a mah kan hnaih ve theihna hmanrua ah a hmang a ni tih hria a, alam kan hawi vat hi a ṭha rêng a ni.

Kan lungngaih hun chauha hre lo hian kan hlim hun pawh hian hria ila chuan a malsâwm hi kan dawng leh zual in ka ring.

Engmah dang sawi tawh lo chuan hotute lam aṭanga ding an awm avângin kan ngawi ṭhap a, chhungkua a thusawi tur an in kohchhuah chuan mitthi pa pa chu rawn dingin lâwmthu te chu a sawia, a hmêl aṭang chuan ani pawh a tuar ve hle tih a hriat.

Thu a sawi zawh chuan midang ding an awm tawh lem loh avângin kan zai zawm leha. Nu leh pa ho chu haw phak phakin ṭhalai rual kan awm khâwm tâkah chuan tlêmin hla pawh thiam a tam ve deuh.

Thantea pawh a zai leh al al tawh mai, dar 12 a rik meuh chuan mut a chhuak ve tawh viaua, ka meng lui ṭang ṭang mai. A châng leh ka muthlu leh ṭhin a, a hrehawm zâwk vawiin kan tui chêng nasa nen ka chau ve hnawk mai. 

“I mut a chhuah chuan min lo nghêng la, muhil lawk rawh. Tumah hmai zah an ngai lo ania, hetiangah chuan a loh theih loh a nia” u Rinpuian a rawn tihchuan ka melh zawk a “A pawi lovang maw? Ka menglui thei ania” ka tihchuan a lu a thing nak naka.

“Tumahin min ngaihven lo, muhil zâwk la. Reilote i mut theih pawh a ṭha ania, nakinah a hun ka tih ah ka lo kai tho mai dawn che a lawm, naktûk thingpui lum vêl ah tel ve leh i tum chuan muhil rawh” tiin ka lu chu rawn vuanin a dârah a nghata, keipawhin ka hnial tawh biklo. Ka mut chhuak lutuk hi a hrehawm zâwk.

“In duat bîk maw? Keipawh bialnu nghen tur ka duh ngawt mai” Sâwma ṭawng chu hre reng mah ila ka chhâng peih tawh lo, ka mut a chhuak tawh êma. Mut vat ka duh zâwk, zai ri chu hla tial tialin ka muhil zuia.

Ka mang ramah thleng chuan kan lo zaia, pangpar vul chukna hmunah hian lo awm in ka hawi kual vela, an mawi takzet. Chutia ka lo din lai chuan ka lam pan hian mipa pakhat a rawn kala, a hmêl erawh ka hmu thei lova, a pian erawh ka hriat chian êm êm ni tlatin ka hria.

En chian ka tum lai tak chuan u Rinpuia chuan min rawn sawi deuh dat data “Duati harh rawh le, khua a vâr ṭep ania” a rawn tihchuan ka mengchhuak vata, mi an lo la awm ṭhap a. An lo la zai dap dap mai, ka hawi kual chuan muthlu an lo awm ve nual tho a nih hmel, mipa ho phei chu an chau ngawtin ka ring.

Thlân laih an la ngai dâwn bawk si, u Rinpuia pawh ka khawngaih, a chau viau ngei ang. A la tlaivâr zui, kei a âwl zâwk mah ka muthlu a nia, nu leh pa an rawn kal leh ṭan tâkah chuan kan haw zui ṭhap a, midang an pen tâkah chuan kan pahnih bâk kan awm leh tawh lo. A nu leh pa an rawn kal ve bawk nên an inah a awm duh tlat lo.

“I inah kal law law ang, thawh leh vat kan ngai dâwn tho va, kan inah chaw chu kan ei mai dawn ania. Kan inah chuan naute nên kan mu ṭha hman lovang” tiin a ham pah buai buai mai. A chau viau reng ang chu, hnial duh lêm lo chuan ka in luah lam pan chuan kan inzui a.

“I chau viau ang, i mut a chhuak ve miah lo em ni? Engtin nge i la men theih zâwk? Kei ka lu te kha a na vek thei” ka tihchuan “Mipa ka nia, ka tuar angai alâwm” an ti ngeia, ka nui pût pût mai. A thusawi tawi mahse ka nuih an tiza thei em em tho.

In chu hawngin kan lût zuia, “Ṭhutthlengah hian em ni i mut ang?” ka zawhna avâng chuan a lu a thing nur nura, “Kan pahnih in kan mu ang chu, hlauthawng suh. Sual lam ka tihpui lo ang che, min ring tawp rawh, kan inneih hma chuan i duh lo chung ka tilui ngai lovang che. Nakin zêlah pawh hria la ka duh, ka bialnu i nihna angin ka thlahlel ve mai che a nia” a tih tâkah chuan ka thaw huai a.

Ka ring thlap bawk, ka chungah rawng taka a chêt duh ka ring biklo. Mipa rilru nghet leh ṭha tak a ni miaua, ka khumah chuan miin min kuah beta, a muhil nghal daih bawk. Kei erawh ka mu thei mai lo, hetiang hian mipa ka vawikhat awm puina a nia, mak ka tilo theilo. 

Engtin emaw hian ka awm tlat bawk, a hmêl chu ka ena. Tui zet leh hahdam hmêl taka a muhil chu hmuh a nuam hliah hliah mai, a lungphu dat dat ri pawh ka hre pha a, a hmui phîr deuh ṭhaih te pawh chu chiang takin ka hmu bawk. 

A mithmul pir sâng chu tih harh hlau zet chuan ka khawih saka, a kut lianpui min kuah rûn tu te nên chuan ka thlamuang hliah hliah bawk. Hetiang hian mipa dang lakah ka awm ngai lova, an mi tawh hlek pawh ka phal ngailo; mahse Zorinpuia erawhin thu tawite hmang pawhin a thu zâwm lo theilo in min siam tlat bawk si.

A tihluih kher ngai lovin a thu ka zâwm a, a fiamthu thawh kher ngailovin a mah tawp hi ka happy pill ka timai, a nunzia hrim hrim hian a salah min phuar chu a nih ber tawh hi, khua a var ṭan bawk nen mutthilh tumin ka insiam rem ve a, amah chu ka khan ar ar bawk.

A rim tui tak mai hip chung chuan ka muhil zui ta siai siaia, dar 8 vêlah kan harha. Mut erawh ka la kham lo viau, a ni pawh a mit a bui ve deuh lâk mai “Thawh a va peih awm loh ve nu i” a rawn ti chu ka lai bawk nen a âwmah chuan ka chum data.

“I lai hma thei bawk sia maw, min en teh maw?” tiin ka khabe ah a rawn dawma, ka tha a khûr dar dar nia. Hetiang khawp hian a uap a na ang tih ka ring pha lo, ka en lêt kar chu rawn nui hakin a tho daiha.

“Tirawh kan inah chuan phei ang hmiang, ka nu thusawi kha ka hre pha a Chakai pawh ilo hâwn lo a nimaw? Tinge a vaia i pêk a, mawl reuh lutuk. I tân liau liau ka man a nih kha” a tihchuan “Ka zak a lawm, bâkah  i awm siloa, keimah chuan ka khawih ngam dâwn lo. A fûnna puan chawpa chhum tawp a nimai, min chep ang tih ka hlau, an cheh ana si” ka ti chu a rawn nui deuh hawka.

A khabe tuai zauh pah chuan pâwn lam chu a pana “An chep tawh che em ni?” ka lo bu nghal nghauh nghauh mai “Ka nu nên kan bazar ṭumin an lo zuara, ka en chhin laiin a lian ṭha deuh hian ka kut zung chalah hian min rawn chepa, a na bawk si. An phawi thei mai silo, chempuiin an sat bung tawp a lawm, kha mi hnu aṭang kha chuan kut lâwng chuan ka khawih leh tawh lo” tiin ka sawia.

A ni erawh a nuih a zat hmel viau, nge maw Chakai mi cheh te chu a na thip sawk sawka. In cheh nawn tir chu châk awm loh tak a ni.

“Kal phawt ang le, ka nu in min lo hau palh hlauh ange. Monu interview naah i tlin loh ka hlau sia, keimah zâwk hian theih tawpa ka puih che a ngai tlat, monu ṭha monu fel chhûngkaw huikhawm thiam i nih angai a nia” tiin a nui chhuak vur vura.

Kawngka chu kalhin ka zuia, “Lungngai suh, ka tling êm êm ang. In chhungkaw favourite ka ni dâwn hi a ni tawp, mahse min duat viau a ngai thung ang. Lerh vaih teh, pasal lerh deuh ka duh ve lo a nia” tiin fiamthu titih chuan sawiin kan nui dûn hak haka.

A bula awm hi chu nuam ka ti, ka nihna ang angin ka lang ngam bawka. Chutia kan nuih bawk bawk lai chuan hmeichhe ṭhenkhat in min lo hmu in an lo fiam zauh zauha, a chhâng duh ṭhak lo. A ngawi ngula a nui lai pawh a tâwp hmak bawk.

“I va rawn lêng duh love? Nula chhelo deuh an awm chuan i induh ve daih a nimaw?” tichuan an rawn au zui hrama, a chhâng lo an kal liam hnuah erawh “An va han zâm lo ṭhin e aw, ka bialnu hmelṭhat zia hi an hre siloa, an tluk der bawk silo. A zûnah ka uai nghet bur tih an hriat hunah chuan an la â vek dâwn a nih kha” a han ti ngei a.

“Duhai i luck riau mai, in khaw nula te hian an en ṭhup che in ka hria. Ka dinhmun hi a derthawng riau” ti a ka fiam chuan “Rinawm lo turin rinawmna ka tiam ve ngailo, ka phatsan leh tur thinlung chu ka thlang lo law law ṭhin, min rinngamna apiangah ka rinawm zia i hmu ang” thutak deuh taka a tihchuan ka chhâng ngam tawh der lo.

A thusawi lah hi a fiahin a rum ṭha ṭhin bawk sia, awih loh ngam pawh a ni lo. An in kan thlen tâkah chuan zawhna dang zâwt duh tawh lêm lovin in chhûngah chuan kan inzui luta.

“In rawn thleng maw? Hetah in mu zal dâwn emaw tia, chaw ei vat ang u. Bawiha nang phei chu thlân laih nên hmanhmawh a ngai ania” nu Âsangi chuan a lo ti nghal zung zunga, keipawh chu choka lamah pheiin chaw ei chu ka siam puia, an thil dahna vêl ka la hre lutuk lo bawk nên ka chêt erawh a buai viau mai.

Chu chu min nuih leh ṭhin “Kan monu tur kha engkim kan dahna kha chhinchhiah la, i lo lâwi luh hunah engkim i hriat sa chuan a nuam dâwn a nia, i hmêlṭha mai sia kan mo i nih phawt chuan ka duat viau ang che” a pa chuan a la rawn ti zui, midang chu an lo nui dar dara.

U Rinpuia pawh kil khatah a lo khi ve sak sak mai, a chhûngten min fiam chu nuam a ti zâwk emaw ni. Kei erawh min ti lai chhe kual zo veka, chutah an chi thlêng chu ka la thloh zui. Hahthlâk ngei mai “Ka tihpalh” tiin ka kûn ngara.

“A ho lutuk, mo thar chu an che sual ṭhin a lawm, tikhan nidangah chuan i confi sawt mai ang” min fiam tur emaw an ti zo vek tawh. Kei lah sawi tûr pawh ka hre tawhlo, ka ding tlâwn reng ringawt, chaw thlêng an kil tawh hnu pawh chuan ka la ding tlata.

Tinge an awm kim lai kher khera kan haw le, ka zak lutuk chu ṭah vak te ka châk. “Hmingte tinge i din reng? Lo ṭhu rawh, engahmah ngai suh. I pa Sena hi chu a buaithlâk ṭhin ania, hmeichhe fiam dân an hre ṭhin lo, khatiangte chuan kan inah chaw pawh a rawn ei ngam tawh nâng” tiin ka thlavang chu a rawn hauh ve a.

Min pawt ṭhu pah bawk, u Rinpuia bulah chuan ngawi rengin ka ṭhu a, chutah ṭawngṭai rualin chaw chu kan eia. Engmah pawh ka sawi ngam tawhlo, u Rinpuia min ngaihsakna erawh in min tihlim viau thung, saza leh Chakai bawp chu a lian ṭha ṭha min rawn pe zela, a chhûngte pawhin min hmu reng mahse engtin mah min fiam tawh lêm loa, a pa erawh a phawk chi a ni hrim hrima min la tilui zuk zuk mai.

ZAWMNA

Tûk ṭhuan kan ei kham chuan kan chhuak leh nghala “Ka zak lutuk, tinge min chhan ve pawh i tum miah lo a, i pa kha awi a nghal” ka ti ta ngawta, a rawn nui hak mai. “An ngaina che a nih kha, ngaiah i la neih vat mai ang. Kan inneih hunah chuan an duat ngawt ang che” tiin lo au tu te chu a chhâng paha.

“Min duat ve dâwn lo tihna em ni?” ka ti chu a nui suk suk mai, “Ka nupui i nih hunah chuan ka duat ber ang che. Zantin ka kuah ṭhin ang che a, hahdam taka awm tir che erawh ka tiam thei lo che a, kan dinhmun i hria a, mahse rilru na leh mittui nêna hun hmang tur chuan ka siam ngai lovang che. Fa kan neih phei chuan eitur ṭha ṭha hlui che ka tum ang” tiin a sawi pah sup supa.

Inneih ka châk ve phah rum rum mai, a hma kha chuan pasal neih pawh ka ngaihtuah ngai lova, ka nun hmanlaiah ka lungawi em em ṭhin. Mahse a ni ka tawn tâkah erawh pasal neiha, chhungkua din dun te thlengin ka ngaihtuah vek tawh. Amak ka inti zâwk, a hmeichhia zâwkin hma ka la hmasa ang tih hi ka ring ngai lova, ka nun lo hman tawh ah hetianga duha keimah ngeiin ka tihlan hi an la awm lo.

“Ka pêng phawt ange, tlaiah kan inhmu dâwn ania. Thlân chhilh zawhah ka rawn kal ang” a tihchuan ka bu nghata. A pen tâkah chuan ka phone phawrhin Mawii chu ka call a, a rawn la har lo “I thleng tawh em?” ka ti nghâl tawng a, a thlen tawh thu a sawi chuan ka thaw huai mai.

Hmelhriat neih loh chuan mi kâra va chêt ve nghal mawlh mawlh kha ka hreh ṭhin, muang chângin mitthi in lam pan chuan ka inhera, u Rinpuia ka va thlah thui deuh nên rinai kan lo kal thui ve zek mai.

A hmun kan thlen rualin Mawii pawh ka hmu nghal zata, a awm danah chuan a mood a fuh loh hmêl ngei mai. A bula va ṭhu a ka va hnaih chuan min rawn en vata “Thil thleng a awm em ni?” tiin ka zâwt zuia, a hmêl tak rânah chuan eng emaw tak chu a awm ka ring ve ringawt.

“Hei dah fel phawt ila nakinah a fâl deuhah ka hrilh ang che m” a tihchuan no ho chu bucket ah khung khâwm pui zung zungin kan dah ṭha thuaia. Mi tlêmna deuhah chuan kalin kan ṭhu thla a.

“Le! Sawi tawh rawh, tinge i mood a off em em a” tiin ka nuih hak haka, a rawn nui hul haka. “Tukin kan haw hnu khân phone lamah buaina ka tâwk a, ka writer puiin min lo rêl kual a, a hrehawm tak tak. Mi lah hian thuchiang hre lo leh a lehlam thu hre miah lo hian ngaihdan an lo siam nghâl ngawt zela, a ṭhen erawhin min rawn bia in min rin thu an rawn sawia, keichu mi va tihbuai hmasak hi ka duhlo a, min tihbuai erawh chuan ngawih mai ka tum ngai lo, mi pawi sawi hmasak te hi ka hlaua, ka thinchhe viau nâng in tu pawi mah ka sawi ngai lo, khanu pawh khân a ṭhiannu avângin min rêl ringawta” tiin a sawi sapa.

A inseh ruh ṭeuh bawk “Min rêl kha chu chhan lêt pawh ka duhlo, mahse nilo lutuk leh dâwt hmanga midangte an hmelhriat dangte hnêna piangah min rêl kuala, kan writer pui vêk te bulah nên lam mawle. Ka zia hre chiang tawh erawhin min ring thunga, mak ka tih deuh chu maw? Ṭhenkhat lah hi an duhzâwng leh an thawnthu duh vâng ringawt hian an duhzâwng tak thawnthu ziaktu chu an ṭan bura, ka reader pawh an ni ve tho. Thudik hrelo hian duhtawkin min hrechiang ber âwm ang hian an ṭawng nghal zaih zaih thei hi Mizo te hi kan mak ka ti ṭhin” a châwl data.

“Hmelhriat lo ngah ve tawh phei chuan min rêlna te kha kan hmu leh zela, fimkhur hi a ngai tawh a nih hi. Kan pawi sawi leh min rawn hmer tel tu ni miah lo pawh kha kan duhzâwng leh ngaihsân zawngte'n an huat avâng maiin kan huaa, an nihna kan hriat chiana kan hua a nih chuan a pawilo, mahse mi hrechiang lo, vawikhat pawh min hmu lo leh mi be ngai lo tena duhtâwk maia mi hrechiang ber âwm ang hrima min han rêl vak thei hi eng ang mihring nge an nih ang tih ka ngaihtuah, dâwt muhlum kha châwl miah lo vin an phuah chawp par par thei ania, dâwt sawi kawngah chuan ziaktute ai pawhin thu an phuah thiam zawk” tiin a nui leh hak mai.

“An va timak ve, ni e Mizo hi chu kan ṭawng theia, hetiang chauh lo pawhin mi pic post leh miin an thil tih an post mai mai pawh i en chuan sawisêlna i hmu ngei ngei ang. A tûr ve rengah ngai tawp rawh, i kal ngai khân kal ngar ngar la, engkim hretu Pathian i nei a lawm. Nangmah duhtu chu an ngai reng tho vang” tiin a kut chu ka chelh saka.

A ni pawh a thaw huai mai “Thingtlang mi ka ni hi min hmusit ve thei lutuka, tukin phei chu sawrkar hna neilo keichuan ka nei a rawn tia, nang thingtlâng nula hawi zîm te min rawn ti vaka, ka ngei lutuk khân ‘Sawrkar hna sâng tak thawk, mahsela duhtu pawh hmu lo a tûn thleng la nula i nihkha, i thi a hul teuh tawh ngawt ang, hawi zau viau nân ka hmuh aia thui chu i hmu bik lo ang' ka tih ve sak kha, a thinrim lutuk rawn ṭawng leh erawh ka en duh tawh lo” tiin a nui hak haka.

Ka nui ve lo theilo, thingtlâng mi hmusit tâwk leka zirsang ho hian thingtlâng hmuhsit chu an pe na, hei erawh thingtlâng mi lehkhathiam tak tak an tam lutuk tih hi hriat tel a ngai.

Mi hi an hriat leh hmuhah chuan kan fak hluak hluaka, mahsela hnung lam aṭanga mi rêl leh duh hi an lo tam khawpa. Tûn angah chuan fimkhur a ngai rêng a ni, nang chu i fela chuti khati ti ho hi midang bulah chuan chhe tâwp khawk a min lo chhuah duh an awma. Chu zawng aia ka hlauh chu kan biak chhiat hlaua mi tlawna, mahsela kan hlawhtlinna hmu thei lova mi rêl reng ṭhin te hi ka hlau ber.

“An thikin an ngaisang hle che ah ngai rawh, mi rela mi sawichhe ṭhin tam tak hi chuan min tluk loh vâng bâk a nilo, mahni hi in dah hniam duh miah loh tur. Chapo silo in tlâwm duh bik hauh loh tur, an mahni ṭan tâwk tê tê hi chu an awm ve ṭhin ania, khawvêl dân a lawm. I lam ṭang tam tak pawh kan awm ve ania” tiin ka sawi dap dapa.

“Ka tawng che hi ka lâwm, nia hetia min rêl vak hi chuan bum tâwk, lo âwih tâwk hi an awm ṭhin a. Tûnah pawh hian ka ṭhiante'n an mi rêlna an rawn thawn nasa mai, mahse ka va chhâng peih tawh chuang lo. Pathianin engkim a hria a, ka felna leh sualna pawh, ka dik lohna pawh a hre veka, an ni avânga in dawm kûn tur ka ni biklo” a tihchuan ka nuih ta var vara.

“A dik chiah, nangmah ngainaa i zia hre chiang tu chuan an awih dâwn chuang lo, mi ṭhatna lai ai hian mi chhiatna duh hi kan tam sia, vawisawm thil ṭha tih ai vawikhat tihsual a lang sâr zâwk an tih fo kha, i tihsual hmasak ni miah loa lo haw duh tu che chu mi ṭha takah ngai lo la, hnaih pawh tum tawh hauh suh, taka i mu ve miah lo em ni?” tiin ka zâwt nghal zata.

“Um mut chuan ka tho leh mai thei dâwn silova, ka meng tlang tawp. Tlaiah ka peih leh ka mu ang chu, zanin chu min rawn sâwm leh ru aw, keimaha kal ka peih miah lo ania. Ka naute nên kal leh kan inrual ṭhin lova ka peih chiah silo” tiin a sawi zawm zata, thingpui a la so lo nên kan la âwl viau mai.

Rinai mipui an tama, mi hi khawiah pawh hian an lo ṭha a nih hi ka timai, Mizo nih nuam ka tihna pakhat chu kan chhiat tawh chungchângah hian a ni. Misual leh fel an thliar miah lova, khawhar chhûngte hnem tura kan pungkhawm liai liai lai hi Mizo tih tinuam tu a ni ve in ka hria, hnamdang mitthi vuina te pawh ka lo mu ve zeuh zeuha, hetianga mipui in an lên puia an awmpui reng ka la hmu hauh lo.

An chhûngte chauh te'n an vuiliam a nia, Mizo erawh chu vuiliam hnu thlengin kan in lên puia, mitthi chhûngte tan pawh a thlamuan thlâk dawn êm a sin.

“Nia kan rawn sâwm leh ang che, tukin chu ka inah kan awm tlâng a” ka ring ngam bawka engmah ka zêp duh bik lo. Ṭhian neih chuan engkim lo sawi duna inhnem tawn te, hlim huna in hlimpuite hi a lo nuam miau va. Hei hi ṭhian kan nih chhan a ni bawk.

“Eh! Ava nuam âwm ve, a duat che em? A ni hi a ṭawng tam ngai lo nân mi a duat thiam viau ka ring ania, rinawm deuh tur ang hi a niin ka hria” a tihchuan ka bu nghat nghata.

“Nia a ṭawng tam lo, mahse maw a châng chuan a titi tui ve thei reuh lutuk. Min duat in min ngaihsak bawk sia a nuam, a hma chuan mipa hi long distance bâk hian ka la nih pui miah lova, duh tak tak na pawh ka neilo; mahsela u Rinpuia erawh a ni ve lo, ka ngai rengin ka hria” kan nui dûn hak haka.

“A nuam dâwn bik e, keichu ka mi nghah hi ka nghâk chhuak thei angem ka hrelo, ka be châk a mahse min rawn biak hmasak loh chuan biak pawh ka tum chuang lo. Ka status te chu a view reng; amah tihchhana ka status up zozai te hi a in hre ve angem le? A ngawi reng bawk si” tiin a phun sapa.

A mipa chu hmu ila hauh hrep ka châk ngei mai, an rinawma rei an daih pui theih dâwn loh chuan hnaih loh law law tur ania. Ngaihzâwng duh tho si, rinawm thei tak tak silo, han nihpui in ṭhen ve hmak ila a duh lo zâwk zâwk ah an la ṭang zui ania. Mipa ṭhenkhat hi chu an mak ve thlawtin ka hria.

“I nghâk zêl dâwn em ni? Mipa dang te biak tum la” ka tihchuan a nui ro halha “Keichu hmangaihna thawnthu tuipuia, chhiara ziak ṭhin ka nih avâng hi nge ka suangtuahna ang mipa hi tawn ka beisei tlata, mipa hmêlṭha ringawt pawh hian min hip ber lo, min duata min ngaihsaka ka thinlungin a duh bîk riau hi ka neia, a ni kha a ni a sin mawle. Min biak kher ngai lovin amah tawp kha ka hlimpui ni berin ka hria, keichu mipa min be reng hman tu hi ka duh leh miah lova, min be khât em em tu hi ka leh duh vâng aniang ka nat ni, mahse a message pakhat lek ka hmuh pawhin ka thinrimna leh lungawi lohna zawng zawng kha ka theihnghilh leh vek zêl” tiin a sawi leh sapa.

A hmêlah chuan lunglenna leh natna a lang thei, “Lo tawng lo law law ila, min lo be lo law law se tih châng ka ngah mai, ka nun hman tawhah a ni aia min tihlimtu kha an awm leh tawh ngai lovang, bialpa ka lo nei ve ṭhin a, amah ka tawn hma pawhin ka lo nei ve nual tawh, mahse tumah han duh leh thlakhlelh em em ka nei ngailo, a ni kha chu a dang a ni” a nui saka.

“U Rinpuia ka lak a a dana a Special ang hian maw?" ka lo ti chu a rawn nui haka “Ni chiang e, ngaihzâwng rau rau ah pawh kan thinlung hian duh bik riau leh nin theih miah loh hi a nei ve thlap reuha, kan control theih miah loha kan mizia tidanglam fo tu mi bîk hi an awm ṭhin. Ṭhenkhat chu kan duh em em vâng pawh nilo in kan nihpui fo a, ṭhenkhat erawh kan khawngaih vâng te, a ṭhen erawh chu an mahni aṭanga thil rawn chhuak kan thinlungin ṭha a lo tihsa êm êm an awm ṭhin” midang rawn phei chu a en zauha.

“Mahse hei erawh hria ila, kan thinlungina ṭha a tih a, a duh em em te hi neih an harsa châwk ania. Khawvelah hian kan thil duh tak aiin kan thil duh vak loh hi neih a awlsam zâwk, engkimah chu chu hre reng rawh. Kan duh tak chu engthil pawh nise kan neih theih nân chuan kan beih hrep phawt angai, hlawhtling tur chuan nghah peih a ngaia, awlsam taka kan neih theih thil chu kan tân a hlu lo thuai ṭhin, kan tâna hlu thil chu thi leh thau pawlhna beih angai” tiin a tho chhuaka.

A thusawi chuan ngaihtuahna a ti buaiin kei phei chuan ka ngaihtuah pha thiam hauh lo, thawnthu ziaka ngaihtuahna hmang nasa tih takah an ngaihtuahna leh an thusawi hi a rilin keini thluak sâwr bing ngai em em lo tân chuan hriat nghâl vat chi a nilo hrim hrim.

Keichu khatiang thu sawi tûr chuan ka ngaihtuaha ka beih fe angai ang chu. Amah chauh pawh nilo lehkhabu ziak ṭhin ho hian eng thluak nge an neih bîk ni, an rilin keini chhiara ngaithlatute mi an hruai pênga, a tak ni miah lo pawh min feel tir thei tu an nih leh si na hi an danglamna a ni a, hei vâng tak hian a tu a te pawh hi zah an phu in ka hria.

“Thlan lamah kan va sem tawh dâwn em ni? Midang hian helai hi lo buaipui sela, thlân laitute an dang a ro tawh ang” a tihchuan hnial lovin ka tho chhuaka, thingpui chu ketli ah dahin no nen chuan hmeichhe parukin thlân laihna lamah kan keng pheia.

Midang chu an titi nak nak mai “I fel hle mai, ṭhenkhat chu an in kil tawih ṭhin ania, nang chu zân pawh i rawn tlaivâr a, kan tluk lo hle mai che. Keini chu mikhual naah kan zak zum thei lutuka, tihna châng kan lo hrelova, tih ve zel tawh tur a nih hi, i hming min lo hrilh thei angem? I hming kan la hre miahlo” kan kalpui ten an rawn tihchuan ka hrilh ve maia.

An ni pawhin an hming chu an sawi ve sap sap bawk, thlanmual kan thlen chuan mipa ho chu an lo ri mam mama. A ṭhen in fiamthu an lo thawh bawk, rinai thlân lai an tamin an inchhawk zung zunga, chau zual bik an awm hman lovang tih a rin theih.

Chutia kan va kal tâkah chuan lo châwl hlawmin thingpui chu kan sem kual zung zunga, an tam bawk nên mi an fiam tak tak chu keini paruk chu kan lai titih der mai. An ni lahin chutia kan zak che sual leh ṭhin chu mi an nuih thûl, mipa rual bula awm chu hetiang hi a ni ṭhin tih hre mah ila ngaia neih chi pawh a nilo.

“Kan pi thar pawh a fel vut vut viau hi, naktûk zân aṭang chuan rîm ve tawh a ngai ang. Zorinpuia te ho in an lo rim tluk tluk chhan pawh a hriat mai, ka lo la hmu ngai miah lova, a lo hmêlṭha em a nih hi” tiin an nui dar dara, u Rinpuia ka en chu a nui ve hauh lo. A hmêl chu a tak ngur mai, chutah a hmuh leh hriat lai chuan ka number min la dîl hlawm zuia, pêk loh chi an ni silo. 

Ka sawia an lo save nghâl thliah thliah mai, Sâwma lo nuisawng leh u Rinpuia a mitmei zauh zauh chu ka hmu reng, hepa ngeiawm zia hi. Thil nilo lo a lo ti leh ang tih ka hlau rum rum mai, a ṭawng thei ropui sia u Rinpuia a lo fuih pawrh vaih chuan a châk lovang mawle.

An inna no ruak chu sengkhâwm in kan dahkhawm leh zung zunga, “La awm ve ula, kan tha a tho sawt dâwn a sin” an tihlai chuan Partei te ho chuan “Kan duh lo, in nghal emai. Tak takin in lamah kan lo va che leh ange, midangin min lo nghâk hlel tawh ang, lai thuai thuai ula” tiin hlim sâng chuan an thlaha.

An bula awm leh an hnathawk in ngeih tak hmuh chu a nuam ngei mai, ka awm erawh a nuam chiahlo. U Rinpuia kha a lungawi lo angem tih ka hre hauhlo, a hmêl lah kha a pângngai thlup reng sia, a awmdanah lâwm lo hmêl a put lêm loh avâng erawhin tlêm chuan ka thawveng ve deuh.

Mitthi in kan thlen chuan in lam pawh an lo sem zo tawh a nih hmêl, ṭhu hahchawl hlawmin kan ngawi ṭhap a, inchhûng lamah chuan hunserh an hmang mêk tawha. Kuang chu an ṭhenin an zâwn lût bawk, thlala tura pâwna an rawn chhuah takah chuan inthiar fihlimin Mawii nên chuan hmun dangah kan lo kal sawna.

“An nu tân khuan a na dâwn e, hmangaihten min duh lova min kalsan mah na kan ti a, a ni chu tikhuan duh rêng vang nilovin kumkhua atân an inhmu thei tawh dâwn lo ania, a lainatawm tawp. An nupa phei chu in ngai êm êm chi an nia, in hauh pawh an nei ngailo, pu Dina hi mipa fel tak chi a nia, an nu hi kut a thlâk âwm pawh kan la hrelo, in hauh deuh châng chu awm ve bawk mahse an nupa nunah hi chuan engkim an nu tân khuan ngaih tur vek ani dawn sia, an ni anga nupa in hmangaih ka la hmulo” a tihchuan ka en ve renga.

An nu ṭap chu a la reh thei meuhlo, a mit a bui vek tawha. A aw a chhâng vek bawk, an pa a hmangaih zia chu a rawn kal khâwm ho pawh hian an hre ngei ang. 

Chutia kan lo dinna ah chuan mikhual tlangvâl an ni ngei ang pathum hi kan lam panin an rawn kala “Kan lo awm ve” an tihchuan kan bu nghat ringawt.

Pakhat chuan Mawii chu a be mawlh mawlha, a ni erawhin a rûl tâwk bak lohin a chhâng lem lo. “Bialpa i nei em?” mi thih lai laia chutiang lo in zawh, ka melh deuh nghek mai.

“Sorry kan haw leh vat dawn sia i number min lo pe” a tihchuan ka thaw haka “A pawi khawi mai, bialpa ka nei tawha” tiin mipui lam bawk chu ka en sana, ala beidawng duh mai lo lehnghâl.

Mitthi phûm tura thlânmual lam an pan tâkah chuan kan kal ve vata, chu mite pathum lah chu kan bulah an kal ve zel bawk, kan ninzia tihlan chi a ni bawk silo, an ṭawng peih bawk si. Mawii pawh chuan a ning hle tih a hriat, a hmêlah erawh chuan engmah a ti lang lêm lo thung.

Thlanmual kan thlenga, thlân lai ho pawh hmun khâwmah an lo awm ṭhap mai. U Rinpuia ka hmuh rualin a ni pawhin min rawn hmu ve nghâla, chutia mi khual tlangvâl nen kan ding chu a lâwm hmêl viau loh. A tum deuh hmuk bawk nen ka ngaih a ti ṭha lo viau mai, vawikhat mah midang a thik hmêl ka la hmu loa, hmu tur pawhin thlatam pawh kan la inzui hek lo.

Mahse tûnah chuan a vawikhat nân ka hmu ve ta, rin phâk bakin a hmêl a rum. A mitmeng ngat phei chu rei pawh ka en ngam lo, hnuai lam melhin ka hawisawn daih ringawt.

“In pa chu den fia fia ve, a alh lo chauh a nih saw” Mawii chuan ka bengbulah a rawn ti sar sara, mipui kan tam si nuih chi lah a ni tawh bawk silo. A hrehawm ngei mai, a tawpah pastor-in thlahna thu a sawi zawh chuan kuang chu leiah an thlâk thla a. Mitthi chhûngte chu an ṭap leh rawih rawih mai.

Mipui lam erawh an rawn inthiar fihlim phak phaka, thlanlai tuten an chhilh ṭan tâkah chuan Mawii nen chuan haw tumin kan inhera “In number chu?” an va ninawm tak, kan sawi zawh rualin kan buai thu hrilhin kan kalsan zui nal nala.

“Awi an zak lo e, khatianga in dil ngam reng reng, mitthi avânga rawn kal ve si nula an ham chhai nghâl ania, ka hlauh chi tak. Min rawn bia pawh nise ka chhâng lovang, an lerh tih a hriat reng, bâkah min hmu pha tawh dâwn chuang lova a ho emai” Mawii chuan a ti hlak hlaka, ka lo nuih ringawt thung.

“Taka u Rinpuia kha a lâwm loh hmêl tawp” a tihchuan za lo zetin ka nui a “Sawi suh, ka ngaih a ṭha miahlo, a thikthu chhe awmdân ka la hre bawk silo, lo chhe viau ta se engtin nge ka tih ang?” tiin ka kut chu ka khawih niap niapa.

“Lungngai suh a zaidam alâwm, chûngin a awmsan lovang che. Ngaihṭha deuhin awm phawt teh, ka haw ange rawngbawl a hun tawh sia, zân chu min rawn sâwm theihnghilh lo ula” a tihchuan ka bu nghata, keipawh chu rei awm lovin ka in lam chu ka pan hnak hnaka.

U Rinpuia hmêl ringawt chu ka mitthlaah a awm, a thinrim hmêl ka la hmu lo a, tûna ka hmuh kha hlauhawm tak a ni. Zaidam thin thawk an lo sawi ṭhin a, khatiang vêl kha a nimaiin ka hria.

Ka thlan nasa bawk nên chaw chu chhuang te te in ka inbual sana, ka chhuah leh chuan ka chaw pawh a lo hmin ve dâwn chiaha, gas chu off in ka room-ah ka luh sana, inthlâk sawk sawkin ka sam towel a hru chung chuan ka chhuaka.

Kawngka bula mipa lo ding ka hmuh rual chuan ka thlâwk lo chauh a ni. “Awi ka nu!” ka ke chu ka khai zawk a, u Rinpuia chu a lo ding reng chu niin, ka hmu thut bawk nên ka lungphu pawh a la pângngai theilo.

“Min ti phu a lâwm, tinge ngawi renga ilo dina?” tiin ka pana, min chhâng lo hrim hrim. A din ngai chuan a ding renga, min en ngur ringawt “Vawiin kha” tiin an hmaah tak chuan ka va dinga, chutah ka biangah chuan a rawn piai vak a nihchu! A na bawk nen ka mittui a tling pam mai.

Chutah min ngaihsak miah lo in ṭhutthlengah chuan a va ṭhu zuia, kei erawhin ka biang chu dawmin ka ner sak sak mai “I â em ni? Tinge khatianga min piai vaka” tiin a bulah chuan ka va ṭhu a “Min chhâng duh bawk silo, tinge hetia i ngawih reng” ka tih leh lai chuan “I lerh vâng a nih kha, mipa dang dang nen in awma” a rawn ti ta hmak hmak mai le.

Engmah pawh ka sawi ngam lawk lo, a ṭawng a bul hmuk hmuk tawh mai si. A bula awm hian a uap churh mai, nidang angin ka tlâng nel theilo “Mipa te i number i pe a, khati chung khân ngaihṭha deuha ka awm theih i ring em ni? Thlân chu lai lo ila chuan ka rawn kal anga ka hnek ang, tumahin an hnaih ve che ka duhlo. Tikhan an rawn bia ang che anga, ilo chhâng vêl anga ka duh lo hrim hrim” ka en tawp.

Thikthu neilo emaw ka tih kha a thikthu han chhe tak tak chu sawi tûr pawh ka hrelo zâwk, hetiang hian mipa dang ka biak ah pawh a awm ngai silo vawiin kher kher chu a dân a dang tlat.

“Min en kur suh, ka bialnu i ni tawha. Mipa dang biak a ngai lo hrim hrim, keichu ngaihzâwng satliah mai mai angin ka en lo che ka tih tawh kha. Tumah biak san te ka duh lo, keipawhin hmeichhe dang ka be lo bawk ang, khâng mikhual tlangvâl nên khân enge in tih?” a rawn ti leh bul bula.

Ka chhân loh chuan a thinrim sauh dâwn tih ka hriat avângin a kutah chuan ka vawn sak tê tê a “Mawilo deuha biak chi an ni siloa, Mawii nên pawh khân kan ning a lawm. Mahse min rawn zui lui tlat sia, mi an tam bawk nen mi thihna tawh laia midang lo hauh kha ka duh lo alawm, tihpalh ka be dâwn hleinem” tiin ka nuih a.

Nuih pawh a nui ve lo “Ka nuih a za lo, ka rawn hmuh tirh phei cheu kha chuan nangmah te kha chum pil daih che ka duh” a tihchuan ka nui haka, chutah a dârah bei pah chuan “Ka lakah thikthu i neilo emaw ka lo tia, mahse ilo nei reng sia, pe chhe zêl rawh” tiin ka sawi sapa.

“A chhia a lawm, mahse hote te a ka tihlan sek chuan rilru tê min tiha min kalsan daih te ka hlau ve a, thikthu chhiat leh lutuk pawh ninawm châng a awm ṭhin si a, min kalsan daih ka hlau a lâwm. Mahse vawiin kha chu ka ngei êm a ni” a ti sapa, a va han lawmawm reuh tak.

A ṭawng duh ṭhin dân hi ka duh thei lutuk, zawi leh dam raih. Pangchang aw tel si a a han ṭawng ṭhin hi a lawmawm ka ti riau zel, a thinrim pawhin ṭawngkam vin leh chang a hmang khat hle a, a mah min duh tir em emtu a ni bawk. Thlakhat dâwn ka hre ve rawh a nia, a thinrim hmêl ka la hmulo, vawiin hi a nimai. A la pa em em zuia, ka ngaihtuahna mai mai chuh.

“Lungngai suh, min chân ngai hauh lovang. Ka tiam tawh che a lawm, bâkah ka duhzâwng an nilo hrim hrim. An nghal bawk si, min rawn bia pawh nise ka chhâng dâwn lo, bialpa ka neih chhûng chuan midang ka be ngai lo, ka ṭhiante tih loh” tiin a mah chu ka en chho a.

“Aw le, an bula i awm kha ka thinrim deuh mai mai a nia, sawi tawh lovang. In hauh ka duhlo, ka nu in chaw lo ei leh sela a ti che” a tihchuan ka lei ka chhuah zuka. Tukin zîng lam ka ngaihtuaha, ka duh tawh lo.

“Ka zak, i pa a nghal si. Khatiang tur chuan ka lo ei duh tawh lovang, kan inneih hunah phei chuan a chimawm âwm” ka ti chu a rawn nui hâwk mai. “A ngaina che a nihkha, keimah avângin hmeichhia an fiam khât a nia, nupui nei turin min ti fo a, ka ngawi reng zêl a an beidawn tawh lamah nang i rawn lang nawlha, nuam an ti ve a nihkha. An duat lutuk dâwn che tih ka hria a lawm” a tihchuan ka ringhlel lo.

“Mahse ka zak tho tho, ka hmai te kha a sa vek thei a nia aw. Mahse Chakai leh saza sa erawh kha chu a tui a ni” ka sawi chhuak leh phawng phawng tawh. Thil mawi leh mawi lo lam pawh hi ka ngaihtuah hman ṭhin lo, amah ka rin a ka thla a muan êm avâng te pawh hi a nimahna, a bulah hi chuan ka thla a muang ngawih ngawih zel.

A rawn nui haka “Ka rawn pe leh dâwn che a nia” a tihchuan “A ngai lo, i nuten an hau ang che” ka ti chu a lu a thing nur nura “Duati puitling ka nih tawh hi, ka duhthlanna a lâwm. Bâkah i tân te chuan ui an nei dâwn lo, kan dam anga Pathianin rem a tihchuan a dang pawh kan la kâp zêl dâwn a lawm, Chakai pawh nise kan man leh theia. Duh angin kan lui kal pawh kan awm thei lova, nakin lamah kan kal leh ang chu, sa chu kan ei ning tawh zâwk a lawm” a tihchuan ka hnial buai peih tawh lo.

Chu ai chuan a lui kal tur a sawi chu ka châk leh fe zâwk “Naktuk hi feh i tum em?” tiin ka zâwt ta daiha, a nu leh pa an awm chuan a ni chu a feh ka rin vâng a ni.

“Ka tum dân chu ania, kan lo kan ṭhat leh ṭhat loh pawh ka la en hman silova, thlai chi thlâk pahin ka zuk feh ang chu” tiin ka dârah rawn kuahin a lamah chuan min pawt hnai leh zuala.

Tumah min hmu tu tur an awm lo bawka awmsawn emaw pawh ka tum lo “Ka lo tel ve aw, in khua hi an hrisêl aniang rawn in entir pawh an awm khât e” ka sawi zâwng chuan ka nuih a za, a hmingin health worker ka ni ve a, mahse damlo in entir emaw nau rawn nei pawh an la awm lo. 

Ka thawhpui tur nu an khaw mi nên phei chuan vawikhat bâk kan la in hmu lo “I hahdam animai a lawm, tak takin hetah chuan ngaihsam na chen kan neia, khawsik pângngai ang mai mai te hi an in entir duh lova, nat tâwp khawk ah bâk damdawiin kan pan ngai lo, naupang chenin khawsik chung pawhin an la infiam thei ania, i rinai an bawn ang” tiin min kuah hlu hlu a.

Ka ring chiah, khawpuiah chuan naupang infiamna chi a vanga, vah chhuah tir dâwn leh motor a tam bawk nen an ngaihtuah awm si. In chhûngah an in khung ngawt ngawta, phone an khawih tam phaha, engkimah thingtlâng naupang ai an na awlsam in ka hria, thingtlâng naupang erawh nitin infiamna hmun an nei zaua, natna an kai pawhin an dam leh hma bik an ti fo a, a nih ka ring.

An tuarchhel bîkin ka hria, phone ai khawlaiah an la lêng tama. Tlâng hri lêng mai mai in a ti buai ve vak lo, a hrisêl pawh an lo hrisêl nge nge a nih dâwn hi.

“Lo ah chuan lo kal ve i duh tak tak em ni? A hah thlâk dawn a nia, kawng kan la lai lova, thui tak kal a ngai dâwn ania, bâkah a lum lutuk” a tih pawh chuan ka kal châk deuh deuh “A pawilo, ka lo kal duh tho, in a khawhar deuha awm ka duhlo” ka tihchuan min hnial tawh bik lo. Nge keimaha awm ka ning tawh miaua.