REMRUATKIMA CHAPTER 5

REMRUATKIMA 

CHAPTER 5 

“Engthil?” ka taksa rawn vawt deuh sur sur avâng chuan ka meng chhuak kâwk a, u Remruata ka chunga lo bawka min lo en rengtu ka hmuh avâng chuan ka meng phâwk ngei mai. Hetianga a awm hi ka beisei lo lutuk bawk nên chêt sawnna châng pawh ka hrelo.

Min en rengin ka kawr chu a lo hlim veka, chu thil ka hre phei chu ka zak lutuk chu ka sa nghal up up mai. “Engthil nge tih i tum? Awmsawn teh, ngatinge hetianga i awm?” ka tih lai chuan ka hmuiah a rawn fâwp nghal hmiaha, a chêt dân hian min ṭhawng dawt dawt reng mai. 

Ka hnute a ṭhâm vak rual chuan a mi fawh-na a ta awmsawnin ka au ṭhat ṭhat a “Awmsawn teh, engthil mah tih tum miah suh. Remruatkim i awm sawn vat loh chuan i châk lo ang aw” ka ti chung pawhin min la tilui ngat ngat tho, hetianga mutpui hi ka tum reng reng lo, ṭha takin kan awm pawh a ni silo.

Tihdân dang hre hek lo a kapah chuan ka khûp chuan ka do chho ta vaka, rum hakin ka sirah chuan a let thla nghal tawp mai. A in pet ruha, a hmai chu a sen nghal ṭawlh ṭawlh bawk, “Eng...thil....nge i tih hi? I chak...dâwn...lo“ a rawn ti khûr dar dara, ana bawk aniang a hmai chu a sen veka, a in pet fan fan mai.

Ka khawngaih leh inthiamlo leh si chuan hnaihin “I ṭha em? Ana viau em ni?” ka tihchuan min rawn enin a ner sawka, “A nat loh i ring em? Engang hmeichhia nge maw i nih le? Ka nupui i nih hi i hrelo em ni?” a rawn ti hluk hluka, a na chu a reh deuh tawh a nih ka ring, a thaw leh hawk ṭhin. A inhum ruh dânah a na thawkhat hle a nih ka ring, chu chuan min inthiamloh tir ve deuh.

“Khatiang ka duh hleinem, harh rual rual lehnghâl in tinge khatianga ka chunga ilo bawh rêng rêng, chubâkah i nupui ka nih kha i duh lo viau a ni lo'm ni? Engvanga khatianga chêt rawn la kha nge i nih hrim hrima? I mâwl em a nih kha, khatiang a chêt ka lâk mai loh chuan i awm sawn duh lo a nih kha“ ka ti leh chu rum tak hian min melha.

“Hmeichhia pawh i nih loh hi, mâwl lutuk. Hmeichhe â tak i nih hi, i kapah khân hmeichhe thil a awm ve meuh maw?” a rawn ti chu ka chûm chawrha “Engah nge a awm loh anga, i ta pawh a awm chuan ka ta pawh a awm ang chu, tin hmeichhia ngei chu ka nih hi. Nangmah kha i pa lo zâwk a ni lo maw?” ka ti ve leh khera, inrem taka awm hi chu kan hlat ve ngawt mai.

“Pa lo ila ka nei nâng che, hmeichhia ka kawp hek lo ang. Thingtlâng nula tih takah i mâwl he haw ngawt mai, khatianga i tih leh chuan kut ka thlâk hrep tawh ang che” ti bul bul in a tho chhuaka “Eee khatianga i tih leh vaih chuan keipawhin ka tih ang chiah kha ka ti nawn leh ang, khatianga in sual luih kha ka duh miahlo, kan sawi vek tawh kha. Kan inneihna hian nupa nun a huam tello, kumkhat hnuah kan awm dân in a hril dâwn chauh tih kha i hre ve ang chu maw?” ka ti ve saka.

Hetianga min khei fek fek reng hi ka ti thei bik ṭhak lo, ka hlauh chiamna chhan tur hi ka hrelo ve e, a mahin min tih hmasak phawt chuan ka ti lêt ve zêl ang. Mi kutthlawn emaw ṭawngkam emaw tawrh liam mai mai hi ka thei ve lo a, ka chunga ṭha lo na na na chunga ṭhat bik ka tum lo, min haw tu va tlawn tlat ang te hi keichuan ka thei ve lo. An mi huatna ang ngeia runluih hi ka duh zâwk ṭhin, keiaia dinhmun sâng an nih avânga zah chiam pawh ka tumlo, ka dikna ah chuan tute pawh nise tihlet mai duh mi ka ni. 

Thi leh tur ṭheuh ṭheuh mi han zah vak leh biak tlawn te hi ka tum lo bur, keima tâwkah ka zahawm ve tho a. Zahawmna ka nei ve bawk, damchhung tawitea midangte hlau leh an lung tih awi loh hlaua phar kual vêl hi ka tum lêm lo, ka nun vawikhat chauh neih hi ka duhdân tak leh a ṭha thei ang ber, keimah ka nihna ang ngeia hman ka duh.

Pindan aṭang chuan chhuahsanin mei ka chhêm zuia, thingtlâng hi chu gas duh duh huna hman tur kan neih loh avâng hian thing kan la tuah nasa a, thinghmanga eirawngbawl hi kan la uar mah zâwk. Vawiin pawh hi a theih chuan thingphur sa ila a ṭha ang, lo an hal hma a ka inphurh khâwl loh chuan fur ah kan tân a hrehawm dâwn tih ka hria.

U Remruata rawn chhuak chuan min rawn melh zawkin a ner nawka, exer la tur bawk chuan a chhuak leha. A taksa a enkawl uluk hi ka fâk ve na ber a ni, zu in ve zeuh zeuh mahsela a insawi zawi ṭha bawk nên a pian chu nalh tak ani.

Tûnlai zu in te chu zu hmunah an ṭhu a, a puamin an puam a, an dul lah nise a kiar ang luaha. Tlangvâl zu avânga thau anga lang zu ei puam hi an tam tawh lutuk tlat, kan Mizo mipa hmeichhia in a neih tlâk loh an tam an tih hi mipa hian an haw ṭhin a, kei pawh hian ka hmeichhiatpuite thusawi hi ka pawmpui viau.

Zu mai nilo ruihhlo dang nên ti hi kan tam si, ṭhangthar tam tak lah hnathawh tum miahloa social media ah hman em em ṭawng thei leh aia upa zahna châng hrelo kan tam tawh si a. Hmeichhe tân pawh khatiang mi chu chhungkaw pa berah an ṭha angem tih ngaihtuah nên pasal tur an vâng tih hi chu a ṭhenah chuan a dik viau mai, kan mipa duhzâwng te an mizia kan duhzâwng te emaw, mipa nungchang ṭha lo va sawi ila kan sawi zawh rual chiahin an nungchang ṭha lo kan sawi tichiang turin a mipa zâwkin min rawn hnial ang zuah zuaha, hmeichhia aia ṭawng thei an tam tawh bawk nên neih ngam loh tur hi an tam ve bawk êm ani.

A rawn haw leh meuh chuan chaw ei ka lo peih tawha, a ni erawh inbual turin bualin lam a pana, a va ri zui sur sur mai. Towel veng chunga a rawn chhuak chu ka lo en renga, a abs ka hmuh rual chuan ka rilru ah fictional men a rawn lang nghal zat mai. A pian mawi zet chu amah pawhin a inhria tih hriat tak hian a rawn pheia, ka lo en reng tih a hmuh phei chuan a nui vei suk lehnghâl.

Chu thil ka hmuh rual chuan ka hawisawn ta hmaka,  chaw ei chu ka siam zui nghal mawlh mawlha. Ka pasal awmdân erawh ngaihtuah loh hrâm hrâm ka tum thung, mahsela a har chu a ni e. Tukina a chêt dân mawlh kha ka ngaihtuaha, khatianga a rawn awm kha ka ring lo hrim hrim bawk nên chuvanga talbuai viau pawh ka ni.

A ni hian min mutpuia hmusit taka min biak a tum a ni hrim hrim ang. Chutiang a ti thei ngat a nihchuan keichuan inchhuanna tur dang ka nei tawh dâwn lova, chu ka thil ngaihtuah avâng chuan ka inhum ruh sauh sauha, engtikah mah ka intawh tir ngai lo ang.

A rilru ka hriat chian loh ang bawkin ka laka a tum ka hreloa, chuvang chuan ka laka a insawitheihna tur thil tih ka duh lo hrim hrim. A rawn chhuah rual chuan “Rawn ei ve vat rawh, vawiin chu dawr ilo nghah angai dâwn ania, thing tuah tur ka phur dâwna. I kutah engkim a awm angai ania, ka rei lutuk lo ang” ka ti chu peih loh hmêl zet hian a ner sawka.

“Phurh kher angai em ni? Gas a awm reng hi, dawr ka nghâk peih hleinem” a rawn ti ta rênga, engmah tih peih a la neiloa. A chhan pawh min huat avâng tih ka hria, a nu leh pa a ngei bawka, chuti nilo se hetiang em em a mipa sual leh chimawm chu a nih bik ka ring lo.

“Gas hi englai pawha hman tur a awm ve hleinem, khawpui lam angin ngai miah suh. Bâkah fur a rawn ni anga khua a vawt dawna, meilum ai kan la mamawh dâwn chauh. Tûn ang ringawt hian kan awm dâwn lo ania, kan hma lam hun tûn hun aṭang hian kan siamfel sa angai, keichuan fura hrehawm ti taka awm ka duhlo” ka ti hmaka.

Engmah tiloa awm tir mai mai ka tum tawhlo, dawr pawh ka haw hma a nih pawhin ka nghah tir tho ang. A ṭawng ngeiawm thei bawka, nghâk ve hrim hrim rawh se, kan thil zawrh erawh a lo ei hek vek ang tih erawh ka hlau ru ve deuha, mahsela chutiang mi a nih êm chu ka ring lo.

Chaw eikhamah chuan ka inthlâk sawk sawka, hnathawh thawmhnaw chu inbelin Êm chu phurin hrei leh chem chu ka phurah chuan ka daha, ka chhuah dâwn laia u Remruata phûr lo hmêl chu ka hmuh hmaihlo.

“Fimkhur rawh aw, mi thilte ilo rûk tir hlauh ange, phur thum tal phurh ka duh sia ka kal nghal mai ania, dawr chahbi kha kawngka bula perek inkheng ah ka tar aw” tiin ka chhuahsan zuia.

Alo tal buai lutuk êm lovang chu maw? Nui var vârin ram lam chu ka pana, thing ro fawm mai tur ala tam bawka hmun hla lutuk kal ngai lovin daia mi thing hring rukna lo ro tawh ho chu fawm zung zungin ka che zui mawlh mawlha. In fawm khâwl sa ka duh avâng chuan ka phur thum tur chuan ka fawm te te a, ka fawm zawh meuh chuan alo tlai veleh duai tawh mai.

STORYFB hack a ni tih la hrelo te kan awm palh tâkin thawnthu hi an hack na an phelh loh chuan kan post zawm theilo mai theia, WhatsApp group fb a link kan dahah hian rawn join hrâm hrâm tum ila, siamṭhat theih a nih loh chuan fb aṭang chuan engmah kan post thei tawh dâwn loa, chuvang chuan WhatsApp group lam hi join hrâm hrâm tum ila aw. 

Inthawn sawk sawkin in lam pan chuan ka haw zui ta thuaia, in ka hmu pha ṭan tihah chuan u Remruata dawr nghâk pâwna lo ṭhu a dâk vung vung chu ka hmu a. Dâwr chhûngah ṭhu lo in a pâwn aṭangin alo nghâk a nih hmêl, a che dangdai thei bawk sia maw.

Ka pan hnaih zêl tâkah chuan min lo hmu tih hriat tak hian a lo ding chhuak zawka “I va rawn haw har em em ve, rawn haw vat tur che alawm” a lo ti nghal hluk hluka, duh duh huna haw thei turah min ngai nge maw ni dâwn ni?

“Ka infawm khâwl sa alawm, duh duh hunah ka rawn haw thei ringawt hleinem ka kal lehnghâl dâwn ania, ka va in keuh phawt ange” tiin ka kalsana, kan dawr hi in aṭanga a hlat lêm loh avâng hian kan inhmu pha reng bawk nên min en zui reng tih pawh ka hria.

Tualah chuan ka thingphurh chu keuhin chawlh pawh châwl lo chuan ka kal leh nghala, u Remruata chuan ka kal chu a phal hmêl tawh lo ngang mai. “A chhûngah te ṭhu la, a pâwnah chuan i ṭhut tlata. Phur hnih vêl la phurh ka ngaia, ka rei tawh lo ang, tikhan lo nghâk char char mai rawh ka kal ania” ti a ka en zauh chu a hmêlah chuan phûrna reng rêng hmuh tur a awm lo, a lo tûm luau mai.

Thinrim châk thinrimna tur hre silo a ang ber mai. “Rawn haw zung zung ang che, a reh ropui si hetiangah keimah chiahin ka awm peih hleinem, ṭhiante lah an haw vek tawh bawk si” tiin a rawn phun nung bunga, ka khawngaih ve riau. Nidangah kha chuan a ṭhiante tal a khawhar hnêm tur khân an la awma, tûnah erawh an haw san bawk nên a khua chu a har ve viauin ka ring.

ZAWMNA...

Ka haw leh lai chuan dâwr kawtah chuan naupang ho nen ball an lo pêt vut vut mai, a dawr nghâk ve chu dâwrah pawh a awm hman lo a nih saw. Ka va thleng phei chu kan ṭhenawm hmeichhe naupang Lenleni an tih mai chuan lo nghakin min lo hmuh rualin “U Nunu hei dawr ka lo nghah sak cheu a, u Remruatan thil ka pe ang che min tia” a lo ti nghâl panga, ka nuih ringawt mai.

Mahsela u Remruata lam ka hawi rual chuan rum zet hian ka ena, chutia naupang mai mai dawr a lo nghah tira a mah alo awm mai mai si chu ka haw takzet. Amah lah chu naupang kârah lian zetin a lo tlân kual mai mai lehnghâl, hahthlâk hian mi puih chu khawilamah.

Min rawn hmu ve ta chu a mit a la sân uk zuia, be duh lo chuan in lam pan chuan ka kal ta daiha, hetiang chuan inhauh bâk tih tur kan nei loa, naupang ho hmuh laia inhauh ka duh bik teuh silo, ka thing ka keuh veleh chuan inbual zui sawk sawkin dawrah chuan ka phei zui ta vata.

A ni pawh a lo inkhel tawh loa, dawr chu fel ber âwm ang ziazangin a lo la nghak zuia. Nuih te lam lam a ti za, a awmdân hi ngeiawm ṭhin viau mahse a lehlamah chuan a nuih loh theih ṭhin lo.

A bulah chuan ṭhu in pawisa chu ka chhiar mawlh mawlha, rinai a lo inhralh ṭhat ve tho hi. A hmêl nelawm loh tehlul nên an lo dawr ve tho a nih hmêl, “Tikhan ka zârah pawisa chhiar bâk tih tur i neilo ania, i lâwm tawh bawk em?” ngeiawm zet chuan a rawn ti a, ka chhâng peihlo, ka chhân leh chuan kan inhau leh palh ang.

“Haw ang, i kâ te lah hi a kal bawk sia, i lei te hi a mah hian a lir tawr tawr thei in ania ka rin ni, haw ang” ka ti chu “Ka lei hi amaha a lirh lohin tu in nge rawn ti lir chuang anga, i lei pawh kha a nih ve tho kha” a rawn ti leh hrâm a, huiz hepa hi chu aw.

“Kal mai teh, i hmui ar mawng kha a nih chu. Haw vat ang, rawng pawh kan la bâwl lo lehnghâl” tiin ka nawr chhuak zui nawk nawka, tûnah tak hi chuan nupa te pawh kan ang ve tak tak tawh. A ni telin kan pawm chho thiam ve zel niin ka hria, keimah chauh nilo amah pawh hian chu chu a hriat ve kur ka ring.

Dâwr chu kalh felin in lam pan chuan kan inzui pheia, khua a thim ṭan tawha. Kan awmna hi ṭhenawm chu nei ve bawk mah ila thlanglam hi ramhnuai vek a ni bawk nên mahnia awm nân chuan a thlamuan thlâk vak lêm lo, hmeichhe tân phei chuan hlauh hi kan ngah ve bawk nên zân thim hian hmun falah hi chuan thla hi a muang lo lehzual.

“Enge kan chawhmeh dâwn?” a rawn tinghal panga, in chhûng chu luh pahin “A ṭhing kha kan chhuanglum mai ang chu, a dang vak a awm hleinem. Artui kan kang anga chu chu animai” ka tichu a ner sawk sawka “Tomato nên khân kang ang che, sa lei tur te hi a awm ve lo em ni? Hetiang lâwng lâwng hmeh hi ka ning, thingtlâng lo ah hian kan awm thei reng si a” tiin a ze ngai bawk chu a chhuah leh tawha.

“I ninawm e, nangni khawpui angin mihring kan tam lo, hausa over pawh kan awm lo. Tin, duh duh hunah ran talh tur an awm ve heklo, Inrinniah chauhte a awm ṭhin, tin sa ai chuan thlai a hrisêl zâwk. Lo kan neih hunah phei chuan nitin thlai i ei ang“ ka ti chu min melh deuh rûn rûn mai.

“Min zah lo viau suh aw Vannunhlu, i pasal ka nih hi lei tur a ka tihche chu lei mai rawh” a ti chu lungawi lo fe hian ka ena, “Mi rethei kan nih hi duh duh kan lei theilo, i duh leh khaw ṭhenawmah va kal la va lei rawh, i siam vek dâwn ania. Rawngbawltu ka nih hi, ei siamtu thilsiam an sawisêl reng ngailo, tikhan lo ṭhu mai mai rawh. I thih phah lo ang” tiin a thusawi leh tur pawh ngaihthlâk sak duh tawhlo in ka kut silfai chuan rawng chu ka bâwl zuia. 

A ni pawh ka chhân duh tawh miau loh avângin tukverh bul ṭhutthlengah chuan ṭhu in thlang lam chu a melh vang vanga. Chutih laia sihal rawn u chuah chuah avâng chuan rang zet hian ka bulah a rawn tlân pheia, a hlauh hmêl êm êm mai lehnghâl. 

“Engthil nge an niha, chu chu eng hrâm nge?” tiin ka kutah chuan a rawn chelha. Sihal hrâm a la hre ngailo a ni ngei ang, a hre ngai lo mai nilo a hre ngai tân pawh s rapawm ve bawk êm ani.  Hmeichhe tân phei chuan rapawm zual duh tak a ni bawk, mahsela kei erawh ka hre ngun tawh bawka ngaiah ka neih tawh.

“Sihal an nihchu, an va rawn hnai ve. Kan ar kha lo va khâr teh, zânah an rawn la hlauh ange” ka tichu a kal mai ngam lo lehnghal. Ka rinloh dân hlir hian a la awma, ka beisei loh dân deuh hian a che leh ṭhin, a kal ngam miau loh avângin keimah chuan ka va khâr puia, a hawi zuk zuk lehnghâl. 

“An hlauhawm loh emai, mihring phei chu an hlau lutuk. Khatiangin awm reng suh, mipa lehnghâl” ka ti chu a la na ta deuh aniang a kut chu la sawnin ṭha deuh hian a kal ve leh maia, a awmdân chu ka en reng thung. 

Ala hawi kual zuk zuk avâng chuan ala thlamuang chiahlo tih ka hria, a hnunglam aṭang chuan ka nuih deuh pât pât a, a awmdân chu ka lâwm riau mai. 

Inchhûng kan luh leh hnuah hian tukverh chu a khar hmaka “Kan awmna hi a thlang em em lutuka a fuh lo hrim hrim, i nu leh pa hian hruaia khawlai li deuh te hi an hrelo em ni” tiin a meizial chu a pak hlat hlata.

“Mi an awm vek tawh, tikhan phunnawi lo in awm mai mai teh. Ringtu i nihkha, a mipa zâwk i ni bawka hlauh ngah viau suh. Khatiangte chuan tumahin an thlamuanpui lo ang che” tiin artui leh tomato chu ka chawk mawlh mawlha, “Hlauh zâwng a in ang hleinem, mihring ah te chuan tumah ka hlau lo, hmanhmawh mai teh ka mut a chhuak tawh, ka mawng leh ka kâwng te hi ana” a rawn ti hluk hluka.

Tûnah chuan hlau hmêl pawh a pu leh tawh loa, ka bulah chuan rawn kal hnaiin ka chawhmeh siam chu a rawn en ve ta renga, keipawh chawhmeh ṭhing chhuan lum deuh chiah ani bawk nên ka che rei lêm lo. Kan pahnih chauh hi chuan chaw kan ei tam ngailo hrim hrima, zîng lama ka chaw chhum chu kan ring tawpa, antui vêl pawh zînga ka siamsa vek an ni.

Chaw kan ei khamah chuan khumah chuan kan inzui lût a, zân dang ang bawkin mahni phone khawih ve ve chuan kan in lehhawi leh hmak tawha. A ni pawh a bialnu kha a be leh tawh aniang a nin thu vêl leh a rang thei ang bera haw dân a zawn tur thu te chu a sawi mawlh mawlha.

Pa Muana te hian a haw an phal dâwn hauh lo tih ka hria, a rûka a zuk zin te anih loh chuan an phal hauh lovang le. Kei erawh ka tihdân ngai tê in recap chu ka en leh malh malha, chutih laia tho chhuaka insiam mawlh mawlh chu ka en a.

“Enge tih i tum?” ka ti chu “I hriat ve zel angailo ka lêng dâwn” a ti chu lâwm lo zet hian ka ṭhu chhuaka. “Khang nuthlawi kha zu in puia lên chilh leh i tum ange. Ka hrelo emaw ti hauh suh aw, ka hre vek ania, mi hian an sawi chhuak lo mai mai a nih hi, a rûka i chungchâng an sawi te hi i hre ve em? I chhuak lui a nihchuan pa Muana ka call ang, hetianga nupui nei chunga i awm hi ka duh lo rêng rêng” tiin ka melh ngara.

Min melh rum viau nângin ka hawisawn duh ṭhak lo,  ka zâmna tur chhan ka hrelo ve bawk ani. Pasal ka neia, ka pasal chu lerh tak leh midang kawp ṭhin ti a khaw mipuite hian min sawi ka duh teuhlo, chutah zu a ina, khâng nuthlawi pahnih te lah khân zah an hre dâwn der siloa, tum loh tâwpa an awm ka hlau a ni ber mai.

U Zuali te lah kha pasal te nêna inṭhen zu duh tak leh lêng rei tak, zah em em nei tawhlo an ni bawk nên u Remruata hian a zui fo ka duh hauh lo. “Kan inneih hma in hetiang thil chu kan sawi vek tawh kha, hetianga i awm dâwn ai chuan inṭhen pawh ka pawi tilo, kan inṭhen chuan keichuan chân tur engmah ka neilo, nangmah zawk kha i inhre chiang ang chu. I duh chuan kal lui la, kan inṭhen a nimai” tihmakin khumah chuan ka mu thla a.

A awm lohna lamah chuan inher nghatin ka film en lai chu ka ensan leh ta daiha. A ding renga, chhuah tum thâwm ka hreloa, a awmna ngaiah chuan a awm reng te pawh animahna. Nakinah chuan thinrim zet hian a rawn mu tau sawk sawka, puan chu alamah a pawt nghal hmak bawk.

“U Remruat ka zah loh avâng che a ni miahlo ania, mahsela i mualphona tur leh ka mualphona tur i tih hi ka duhlo mai ani. Hetiang chuan engtikah mah kan inrem ngai dâwn lo, inngeih lo taka awm reng hi i duh anihchuan thu hran, keichuan mi ka chenpui chuan inrem lo taka awm hi ka duh ve ngailo, nangpawh ka duh rêng avânga nei che ka ni biklova, mahsela nupa kan ni tawha, a tu amah mah hi mualpho ka duhlo” ti nghat nghatin alam chu ka hawia.

Min chhâng loa, min en heklo. Ka thusawi erawh a ngaithla ngei tihchu ka hria “Keichusn inrem taka awm ka duh ber, mahsela i duh loh chuan ka ti lui chuang lo che, zu avâng hian kan upa ber kan lo chân tawha. A ṭhat loh zia leh chhungkua buaina thlentu a nihzia pawh ka hre chiang, ka u pawh kha zu a inhma chuan mipa fel leh taima, tlâwmngai taka sawi a ni ṭhin, mahsela zu a ina, mite tâna hnawksak leh chhûngte tâna khaw hawi ngamlohna tur a sawi foa, a thi kha a lehlamah chuan ka nu leh pa khan an thiam lo zâwk hial a sin“ tiin ka phun leh sap sapa.

Min la chhâng chuangloa, min chhan kher pawh ka phût lo bawk. Hetiang chuan engtikah mah hlim taka kan awm dun theih ka beisei miahlo “I pa pawh ka hrilh lo ang, mahsela i hmalam hun chu nangmah ngeiin i siam rem thei. I hun kal tawh ka hreloa, hetianga misual tak i nih chu ka ring biklo, i lehkha zir san zia pawh ka hria, kei chuan i thiamna leh finna ang ka nei pha hauhloa, i duh zâwng ang nupui ka ni lo tih pawh hi ka hai reng reng lo, mahsela kan inneih chhûng tal chu mite hmaah ka lan mawilohna tur min tihsak lo hrâm rawh” tiin ka ngawi zui ve ta daiha.

Thudang sawi pawh ka tum tawh biklo, amah in atân ṭha tur chu a hria a, a tilui duh anihchuan a thu a ni tawh mai. Keia thusawi chu a ngai pawimawh tak tak lo ang tih pawh ka ring, mahsela tlêm tal khân a lakah thu an sawi ve ngei erawh ka beisei thung, hetiang reng chuan kan pahnih chauh kan inu bawk nên in hal renga awm chu a hrehawm.