DUHAISAM DUHLAI ZORINPUIA S2 CHAPTER 8-16

-
DUHAISAM DUHLAI ZORINPUIA S2 


CHAPTER 8



“Kan lo lêng” tih rik rualin Timothy-a chu inchhungah rawn bawh luh thlawp a ruala. A ri chawrh mai, “Khaiha!” tiin ka pi leh pu chuan va hnaih an ruala, a ni erawh rang zeta rawn tho chhuakin a ṭhiante nui chur chur chu a bêng nghal pawp pawp mai.




Siampuii leh Marami lah chu ti bawk, an rawn nui lût nghal uar uar a. Keipawh ka nuih a za ve tho, an vawikhat rawn lên naah chutia an che chhe nghal ngawt chu a zahthlâk ve viau ngei ang le, Vanrongura pawh a sawi ang ngeiin a rawn tela, min rawn en leh kar tawh mai.




Tukina a lêt leh lam kha a intina lo a nih ka ring, a pângngai thlapa. Khatia an in aṭanga ka room bathlarah a rawn zuang kai mai kha a lehlamah chuan a â ka ti tak tak a ni, a chetsual vaih chuan inhnaih tê mah ni ila a hnuai step a nia a tlâk vaih chuan a na viau dâwn tih lah a chiang.




“Enge min rawn hawn? I awm rei bawka fanghmate chu min rawn hawn em? Kha ber kha ania kan ei châk” Siampuiin a rawn tihchuan nui hakin fridge a ka fanghma hawn ka dah ṭhat chu va phawrhin ka pe hlawma, an lâwm thiam ve ngei mai.




Ka pi leh pu chuan lêng tura insawiin min chhuahsan zuia. An chhuah rual chuan ka ṭhiante ho chu an ri nghâl nak naka, ka pi leh pu an awm lai kha chuan an ṭawng ṭha ngam meuh lo kha a nia. An han awm lo chiah chu mipa ho chuan nuam an ti tih hriat takin an infiam zui nak naka.




“Vawiin chu in dâwl chuh ila, u Sangpui card in nei em? Ti mai mai ang u, khua a vawt si a vah chhuah pawh a peihawm loh” an tihchuan kan card dahna lai chu ka hrilha, putea te hian an hunawlah inchawi an hman avâng hian kan kawl reng ṭhin a, phur zeta Timothy-a kal chu midang chuan an la nuih ṭhaw hlawm mai.





“I mutui em?” ka bula rawn ṭhu a zawi sapa a tihchuan ka en nghal vata, min lo en hnai lutuk chu ka tawlh dawrh mai. Kan in hnaih dân chu kan infâwp lo chauh a ni “Mu....tui...i hriat” ka sawi zawh hma chuan ka inhup vata, i hriatreng kha tih ka tum kha a nia, sawi vaih ila chuan kan ṭhiante ho hian zawhna an nei ngei anga, kan riak dûn tih an hre vat mai ang, a chi loh hrim hrim.





Nui suk hian a ṭhiante infiam lam chu a en zauha, Timothy-a rawn lêt rual chuan chhuatah chuan ṭhu ṭhapin an in dâwl chuh zui laih laiha, an inhnial pah bawk nên kan ri leh nuaih nuaih tawh mai. Vanrongura erawh tel ve a tum lo nge ka bulah a la ṭhu renga, kei erawh a awmzia ka man loh hrim hrim avângin tel buai ka tum lo.




“Hmanni ah Rochhungate ṭhenawm nuthlawi kan rim peka, ka sim mai mai ania, card min den puia” Thanzuala chuan a rawn ti hlawla, a sawi zawng chuan a ner sawk sawka. Eng tak chu tawng ang maw? A hmêlah chuan a ten hmêl em em mai lehnghâl.




Timothy-a leh Rochhunga chu an lo nui put put mai “Enge a? Kan hre ve duh ania” Siampuii lah chuan rang zet hian a lo ti a, an card den pah chuan an inbe mawlh mawlh mai. Engtin nge an theih zâwk ni? Kei ka thei ve teuhlo, thluak hman tumin ka insawrbing ṭhin nasat nên an ni erawh titi zuah zuah chungin an buai eih lo nia.





“A hnute a khawih tir alawm” Timothy-a chuan a rawn ti phawnga, Rochhunga nên chuan an nui nghal vak vak mai. “Enga?” phâwk lutuk hian Thanzuala lam chu kan hawi ṭhapa, “Thanzuala hi a ngaizawng a, a chak loh apiangin hnute khawih a ti tlata, keini lah kan lo tel lak lawh tawh sia. Bân san chi ni hek lo, keichu ni ila ka ṭhâm sak vak vak ang mawle, khatiang hnute free te chu, a nula zâwk lah hi an uikawm ṭuta, khatianga a free a khawih theih lai te kha chuan ka duh reng mawle” Rochhunga chuan alo la ti zuia.




Ngei chuana. A râwp thlâk hi ka ti khawp a, “I zak theilo e a, kan ui ve bawk ang chu. Bialpa te mah nilo a hnute lo khawih tir te chu a, in neih ve reng kha in ta kha lungawi pui rawh u. A hrim hrimin tûnlai mipa chu hnute leh mawng in lâwm lutuka, chuvâng a nih hi nupui ṭha pawh in hmuh theihloh” Siampuii chuan alo ti bak hluka, a lawm vak lo ania'ng.




A bialpa chu a melh leh rawm rawm ṭhin “Chu Thanzuala chuan i hnute a khawih tawh bik a nimaw?” Timothy-a chuan a rawn ti leha, an thusawi avâng erawh chuan kei ka lo ner ru sak sak mai. Mipa ho hi chuan hetiang lam sawi hi nuam an lo ti ber a nih hi.




“I zak lo, a khawih teuhlo aw. Khatiang lam hlir kha sawi tawh suh u, in thiltih lai kha ngaihtuah ula a tâwk chiah.” Siampuii chuan a lo ti leh vata, kei erawh engmah ka sawi ve lêm lo. Mipa ho chu an nui kur kur a, hmeichhia chhaih thinrim chu nuam an ti ber in ka hria.




Vanrongura lam ka va hawi chu ka âwm bâwr alo en ngur ngur a nihchu. A ṭhiante thusawi nên ka âwm hup pah chuan rum zet hian ka ena “I rilru kha tikhir miah suh. Ka chhu thlu tawp che a nimai” midang hriat hlau tak chuan ka ti kha kha a, kan inkar hi an hriat ve ka duh hauhlo, kan inngaizawng pawh a la ni siloa, ngaihdan maksak pui pui an neih ka duh miah lo bawk.





Nui hak chung hian a hawi sawna, “Kar leh chu kan dam a nihchuan picnic ang u, zanhnih riak vêl in a nuam dâwn a sin. Khawpawn lamah, tent keng ila luiah kan kal dawn a nia, anuam viau ang, hei Vanrongura te hian farm an nei a lawm, lui te nên a inhnaiha. An farma thei leh thlai vêl kan ring thei ang” tiin an insawm phur chawpa.




Ka ṭhiante pahnih lah chu a phûr phûrah an la ṭang zuia, a hahthlâk ṭhin ania. Keini pahnih erawhin engmah kan sawi ve meuhlo, a rûk chuan ka kut a rawn hûm leh ṭhin a, a ni pawhin ka duhdân hria in a ṭhiante hmuhah a mawilo tur zawngin a awm bik hauh lo.




Chu chuan min ngaihtuah ve in ka mawilohna tur a ti duh bik lo tih ka hre thiam ve bawk. “Aaaa ka peih tawhlo, ka chal hi a na vek tawh. In thiam bik emai ka bang” Marami chuan a chal sen hlar tawh tuai vut vut pah chuan a ti a, a sawi ang tak takin a chal chu an pen nân a sen vual tapa, a na ve viau in ka ring.





Sofa ah chuan ṭhu in fanghma chu a ei zui malh malha, Siampuii pawh Marami a bân tâkah chuan a bâng zui ve a, mipa ho zawng chuan a chak lo lo thil in zawha chhân ngei ngei tur tiin an in fiam zawma.




Vanrongura pawh tûn ṭum chu a tel ve a, an au leh dur dur ṭhin. Thil ho pui pui “Tu pa nge dulkiar ber, tu nu nge thinchhe ber” tih vel mai mai chu an inzawta, bialnu an neih tawh hote chu an sawi ziah zuah lehnghâl. An la naupan ang aiin ngaihzâwng lah an nei tam hrep lehnghal, Vanrongura erawh a nei lo ania'ng.





A tâwpah Vanrongura chu “Tunge hmeichhiaah i duh ber?” tihchu an zâwt ta chata, keipawhin chu chu ka hre châk a. Mahsela huphurh rukna ka nei, keimah lo hmeichhe dang duh a lo nei tawh angem tih te thleng chuan ka ngaihtuah hman vek nia.




“Chutiang nei turin ka tlangvâl ve dâwn chauh anih hi” tiin a lo nui liam maia. Mahsela an zawh et et tâkah chuan min rawn en vuta, kei ka lo meng hraw thung, midang ho lah chuan ka lam an rawn hawi ṭhap a. Min ti lai chhia va a ni, sawilo mahsela keimah min ti tih a chiang reng miau alawm.




“Enga tinge min en ṭhup?” ka lâi tih ngaihna hrelo chuan ka ti ta tawpa, an nui nghal vak vak mai. “A lâi chiang a lawm, a duh ve che a ni chiang mai. Bem hmiah rawh, duh ber neih theih nân chuan thianglo a awm lo, a lo hnawl che leh kan chhaih thinrim leh dâwn a nia, a tira a sual theih zia kha aw” an rawn tinghal renga.




An va han ṭawng thei hlawm tak, ni e a hma te kha chuan kan college kawngah lo awmin min lo chhaih ziah a nih kha. Keilah khân ka zilh hrepa, kha tih laia Vanrongura kekawr ka pawhthlak sak lai kha mitthla ah a rawn langa, ka nui chhuak hak chu an ni chuan mak tiin min en leh chhawnga, ka tihngaihna hrelo chuan “Engmah a nilo” ka ti ringawta.




Engmah min zawh chhunzawm biklo, ka ṭhiante pahnih chu ka bulah rawn ṭhu in mipa ho infiama a chânga in khawih leh awk awk ṭhin chu enin kan titi mawlh mawlha. Vanrongura nên kan inkar chu min zâwt ta rênga, mahsela engtin mah ka chhâng theilo, a chhan chu kan ni ti turin min la bem tak tak hauh lova, kan nilo ti tur pawhin chhânna ka pe thei chuang lo.





Dar 2 vêlah an haw hlawma, Vanrongura erawh an in a hnai tho bawk nên ala awm thunga. A ṭhiante chuan an fiam zuk zuk reng mai, midang an awm loh tâkah chuan ngawi reng hian kan ṭhu duna, sawi tûr a vang ka tia, midang an awm lai kha chuan thusawi tur kha ka hriat tehlul nên.




“I va vâwt ve” tiin ka kut a rawn tawh palh chu a rawn hûm nawn leh ngata, a ni erawh a kut chu a lum ham ham mai. La sawn bik lo chuan a mi khawih ang ang chuan ka dawh tawpa “Ruah hi a sur reng bawk sia, a vâwt ka tia lawm. I haw ve dâwn lo em ni?” ka tihchuan a bu nghata.




“Ka la rîm dâwn che, i chhûngte leh kan ṭhiante awm lai kha chuan a chi siloha, hrehawm ka tihzia kha i hre kher lo ang. Ka bân te hi a na vek ania, min hmehsak ngei angai ang, ka chau lutuk” tiin ka dârah chuan a rawn beia. Ka phu deuh zawk mai, nizân aṭang khân tiang hian a bialnu angin min cheibawla, kan awmdân hi ka hrethiam teh nuaih tawh lo e a.





“Mahse tûn chu a vawt iti sia ka hrethiam ang che” tiin a nui suka, ka kut chu a hûm rauh rauh reng bawk. A châng leh a hmet neuh neuha, a awmdân chu naute thil hmang, ngawi renga khawih malh malh hi a ang ka tia. Ka nuih a tiza lek lek, a van lawmawm reuh tak.




“Ngura min duh tak tak em ni?” ka tihchuan “Het! Khatianga koh kha ka duh miahlo, ka hming hi a mawi ka tiloa, thil dangin min ko rawh” a rawn tichu ka nui haka, a common lo ve chiang a lawm a hming hi chu.




“Ngura sailo zaithiam lo zawk” ka tileh chu a tum bura, a cute ka ti tak tak. “Tak takin i hminga koh loh che in koh dân tur che ka hrelo a lawm. Nge Ds ka ti mai ang che aw” ka tihchuan min rawn en vuta, kei erawhin ka lo nuihsak thung.




“Enge chu chu a awmzia? Ds tihchu ka hmingah a tel hauh lo” a tihchuan ka nui saka “ I hriat ve chi a nilo, nakinah ka phal leh ka la hrilh ang che” ka tihchuan a ngawi vung vunga.



“A pawilo min koh dân anihchuan ka pawm vek mai ang chu” a rawn ti a, ni e ka thuruk a ni rih. Ds ka DUHAISAM Lalpa a ni tlat ani.


ZAWMNA..



“Va haw tawh rawh, ruahsur tam hma hian chutilo chu i haw tlai lutuk palh ang” ka ti chu a peih lo hmêl zet hian a thaw haka, a zawi hmêl ngawih ngawih bawk.




“Ka riak leh mai ang, i phallo em ni? I bulah ka riak leh châk a lawm” a ti chu a lu ah ka tuk lawlha “I zaklo, nupa pawh kan la nih loh hi. Hetianga awm fo hi a ṭha lo, a mawi lo bawk, thianghlim takin kan in ngaizawng thei alawm, hmeichhia ka ni a i laka hetianga awm fo pawh hi a ṭha lo” ka ti dap dapa, a hriatthiam ngei ka beisei.


“Ninawm mi khap reng bik mai, nuhrawn hrawn ang ngar ngar ka ni. Kan inngaihzawn hnu aṭang ka thusawi apiangin min la hau, hetiang chuan i bialpa nilo in i fapa ka ang ka ti ṭhin” a ti chu ka nui haka. Ka nuih a za tak tak, a sawi dik ve tho. A thusawi apiang ka la hnial kalh ti ila a dik ang, ka duh vâng pawh a ni bik lova, mahsela a thusawi han hnial kalh ve hrim hrim hi a nuam ka ti ni berin ka hria.




“Um a nihchuan i nu ka ni bawka, va mu tawh rawh le. Lehkhazir i ngailo bawk a, i bag hi la la va haw vat rawh, i nute'n an lo ngaihtuah tawh ang che” tiin ka nuih a, a duh lo nge thawh chhuah a tum hauh lo. A mut ngai chuan a mu a, ka thusawi pawh chu hria ang pawhin a awm duh miahloa, a mu tlawn zuar ringawt.




“Ngura sailo zaithiam lo zâwk, va haw tawh rawh ka tihchu. I va luhlul ve, hei thli a tleh ṭan ania, i awm rei lutuk chuan ka pi te an lo lût dâwn a nia aw” ka ti leh chu lâwm loh hmêl fe hian min rawn ena.



“Huiham, mi ngaihna leh min thlakhlelhna chhete mah hi ilo nei ve miahlo a nih hi. Haw tur chuan min duh bawk a, ka haw khawp ang, zânreiah i tukverh aṭang sâwn ramhuai rawn lût rawh se” ti in a tho a, a bag chu la in vung zet hian ka room kawngkhâr chu hawngin a chhuak zuia.




A va han hahthlâk ṭhin em, khatiang chuanin naktuk lam thlengin a titau leh dâwn tih ka hria, ka ûm zui vata. Ka pu leh pite chu an lo mu tawh a nih hmêl, sitting roomah chuan ka putea te pahnih chuan inkhel an lo la ena, kei hi chuan infiamna lam hi ka ngaina lo hrim hrima, ka en ngai meuhlo.




Vanrongura chu pâwnah ka va ûm pha a, a bag ah chuan pawh sakin thim laiah chuan ka din puia. “Khati khân kal nul nul suh, i lungawi lohna tur thil ka sawi loh kha, khatiangin tûm nghal bur zêl suh, ka ning tawh ania aw. I duh leh haw la, khatianga i lungawi loh zel chuan keichu ka peih lo” ka tihlai chuan a rawn inhera, a insut ri ka hriat chuan ka melh vata.




A thim deuh bawk nên ka hmu thei mai lo chuan ka phone chu hmet êngin a hmaiah tak chuan ka chhun saka “Ehe! Enga tinge?” ka ti chu a mittui chu a hru zauha, hepa hi! A ṭap tak tak a nih hi, Lalpa leh! 




“Nang hianin min duh ve tak tak lo tiraw? Ka duh êm che avângin min nihpui mai mai ani tiraw?” ṭah chhuak insûm tih hriat tak chuan a rawn ti a. Awi ha, chutiang ngaihtuahna te chu khawi lam aṭangin nge  alo neih dawn ni? Keipawh hi ka lo hau na mah mah nge, ka insûm a ngai a nih hi.




“Chutiang a nilo, ṭap tawh suh. Kawngpui bulah kan awm hi hria la, mite'n i ṭap ri te an lo hria ange. Bâng vat rawh” ka ti chu a insut leh hraiha.




“A nih reng kha, min duh ve tak tak lo. Nang chuan ka tih tauh pawhin min thlêm tumlo in min kalsan i tum nghal zela, i bula awm ka duh pawhin min hnar dân tur ringawt i zawnga. Hetiang mai mai ka duh bik lo” a rawn ti leh nuah nuaha, ka lo ṭawng na mah mah a nih hmêl.




Ka thaw ham hama, mipa inngaihzawnna leh hmangaihna lamah tawnhriat pawh la neilo ka ngaizawng tih ka lo theihnghilh leh ṭhin a. Keipawh ka ni tho, mahsela kei erawh ka kum a upa tawha ngaihzâwng nei lo mah ila ka inzirna aṭangin hriat erawh ka nei nual tawh.




Hnaihin a biang tawn tawnah chuan ka vuana, ka lamah kuai kunin a hmuiah chuan ka fawh saka. Min chhang lo a, min namsawn heklo, awmsawnin a chalah chuan ka fawhsak leh vang vanga, naupang thuawih deuh ang hian thâwm chhuah lo leh che hauh lo hian a lo dawha.




“Ka tihpalh a nih kha, khatiangin ilo ngaih ka ring lo a. Ka duh lo che a ni miahlo ania aw, nang aiin ka upa animahna, mahsela hmangaih ka la neiloa. Ngaihzâwng ka la nei bik lo tih hria la, tin, hmeichhia ka ni a, mipa a fala awm pui fo kha ka tân a mawilo tih i hrethiam ang tiraw. Engmah ka la pal bik lova, nangmah aṭang hian ka inzir ve zel ani tih hria la, nang nên ka hringnuna a vawikhat nân inlaichinna lam ka dai dar ve mêk tih hi hre reng rawh, ka duhlo che niin ngai tawh suh, ka duh lutuk zâwk che” tiin a mittui chu ka hruk saka.





“Chuan mipa i nihkha, ṭap mai mai suh. Mipa chu pa deuha awm tur” tiin ka nui saka, rang lutuka min rawn kuahin ka nghâwngah chuan a hmai a rawn phûm vang vanga. 



“I bulah bâk ka la ṭap ngailo aw, ka ṭah a chhuak ve tho a lawm. Mipa mah ni ila mittui te ka nei ve a, rilru natna te pawh ka nei ve thei tho, khatiang khân min ti bik kher suh aw” a rawn ti nuah nuaha, ka nui leh haka.



Nghet zeta kuahin a âwmah chuan ka bei vang vanga, a nuam ka ti. Keiai naupang mahsela keiai a liana, a âwm in pharh hlai hlap te hi puitling tawh taksa nên an danglamna a tam tawh bik hauhlo. Chuan ka thlamuan pui ve em em bawk.



Kan rei lutuk dawna hria in ka namsawn vata, “Va haw tawh rawh le. Hei khua a vâwt tawh ania, mu lum vat rawh i dam lo palh ang, naktukah keini pawh kan result a chhuak ve dâwn tho a. Kan inhrilh leh dâwn a nia” tiin a lu ah chuan ka chûl sak leh zauha, ani pawhin min hnial tawh bik lo.




“A nih muttui aw, ni leh lo. Mut pahin la in bia ang, ka la be duh che. Mipa dang kha be tawh hauh suh ang che, i be leh a nihchuan ka lungawi lo tawh viau ang. Naktûkah ka block bâng zawng kha ka block leh ang” ala ti zui.




Hnial duh tawh lo chuan ka lo aw zung zunga, ka hnial leh a nihchuan a lung a lian bawk si a, kan awm rei mai mai dawn in ka hria.



“A nih ka kal, lût nghal ang che. Kha i bân pawh a vawt vek tawh, ka rawn be vat ang che'” tiin ka chalah chuan a rawn fâwp leh vang vanga. Ka nui deuh var var mai, mipa in an bialnute an chala an fawhsak hian an hmuhnawm ka lo ti ṭhin a, tûnah ka bialpa ngeiin ka chalah a fâwp hian min ti lâwm veng veng mai.




Atana mi Special tak niin ka in ngai bawk, hmuia in fawh hi chu ka tûnlai dânah chuan a common tawh riau hian ka hre ṭhin.



“Lut tawh rawh le” a tihchuan awm khaw muang tawh bik lovin ka lût zui thuaia, inchhung ka luh tâkah chuan a lo lum ham ham mai. Pâwnah khân kan lo awm rei bawk nên ka taksa chu a lo hik thlar tak taka, hetiang chuan lehkha ka zir peih tawh bawk ka ringlo.




Nipuiah hian ninawm khawpin khua a luma, furah lah hian thawmhnaw suk a buaithlâk thei bawk si. Thlasik ah lah hian hrehawm khawpin a vawt leha, kan khawvêl hi chu a ninawm dân a inang deuh vek chu a nih hi.



Ka rooma ka luh rualin puan chu hlim sawt sawtin ka inthawlh lût vata, Vanrongura pawh a thlen tawh chu ka ringa. A huh nasa lutuk êm lovang chu maw, ngaihtuah vang vangin min rawn biak hun chu ka lo nghâk renga.




Chutah minute sâwm dâwn ka nghah hnu ah min rawn be ve chauha, ka tau hman lek lek a ni. “Tihpalh aw, ka huh deuh bawk nên ka inthlâk leh zawka, i mu lum tawh em?” a rawn tihchuan min hmu theilo mahsela ka lo ner nânga.




Ka thinrim duh ta bik em lo “I in hru hul tawh em? I dam lo ange aw intuam lum ṭha la” tih chu ka thawna, in text chu a ning nge a rawn call leh nghal zata.



In text hi a peih rei ngai lo reng renga, a dangdai ka ti ṭhin. Mipa ṭhenkhat hi chuan call ai text an ngaina a, Vanrongura erawh a ni ve miahlo, kan inbiak hian message ai chuan kan in call tam zawka, keipawhin a ṭha ka ti.




Phone en reng chu mit hian a lo tuar ve ṭhin si a, ka peih bik vaklo. “A vawt i ti em?” a rawn ti a, dik tak chuan vawt chu ka ti ve reng, ka ke hi a lum thei miah lo bawk “Um, ka ke hi a lum theilo, mahse ka taksa dang erawh chu a lum” ka lo ti ve sapa.




A rawn nui hak a “I bula ka mut i phalloh vâng a nih kha, phalla chuan i lum animai tur. Mahni a mut hi chu anuam miahlo” a rawn ti leh chu ka nui ve hak hak mai, a châng chuan a puitling riau zela. A châng hian a naupanna a lang leh ṭhin bawk, mahsela hei tak hi a nuam ka ti.




Aia upa nên inngaihzawnna hi engtin nge a awm ang tih chu ngaihtuah thiamlo mah ila aia naupang nên in ngaihzâwnna hi a nuam ka ti. Engkimah ka pawimawha, ka duhdân nilo in a awm ngai miahlo lâi te hi ka duh tak chu ani.




“A theihloh a lawm, inneih hma chuan riah dun fo loh tur. A fala awm pawh a ṭha lo, kan tum loh dân deuhten kan awm thei a, kan pahnih tâna ṭha tur zâwk zel a nih hi. Nakinah kan hmalam hun hre lo mah ila rinawm taka kan innghah tawn theih chuan awmdun hun kan la nei ve ngei ang” ka ti chu a rawn um ringawta.




Min chhân dân tur a hre leh pek lo a nih ka ring, mipa dang min be tute lakah chuan a dang hlak a ni. An ni chuan sawi tur an hria in min biak dân tur an hria a, hmeichhe chêng an man riau zel bawk, Vanrongura nunah erawh a letling hlauh thung.




A ṭawng tam em em lova, min tihlawm dân tur leh min biak dan tur chuan a hre ngailova. Chutih rual erawh chuan a ngaihla tâwk tur a awm dân erawh a thiam phian thunga, hei tak hi a ni'ang keipawhin a ni tela ka vei nachhan ni dâwn ni.




Engkimah tawnhriat ala neih loh zia a chianga, ka lungawi loh châng pawhin min thlêm dân tur a bo thei riau zela. Mahsela ngaihdam min dil a hreh ngai miah lo thung, a duhloh zawngah chuan thup lêm lo in a sawi phawng phawnga, a nunah thuruk a awm lo a ni ber.




Mahsela a mipat puite tân erawh a ni leh hauhlo, englai pawhin an duhloh zawnga awm ṭhin te hlau zâwngin a awm ngailoa. A cho em em emaw tih tur a ni, a ṭul chuan a aia u pawh a sual mai zela, tûna Remruata damdawiin a awm aṭang pawh hian a nêp dâwn hauh lo tih pawh ka hria, mahsela insual reng tur chuan ka duh hauhlo thung. 


DUHAISAM DUHLAI ZORINPUIA S2 


CHAPTER 9 


College gate ah chuan min dropin ka samah chuan a rawn tuai thuak thuaka “Fimkhur la, mipa dang hnaih hauh suh ang che. I hnaih vaih chuan chu mipa chu a nuamsa miah lo ang, ka thikthu a chhe teh ania, hêng in mipa te ah hian chhelo tak tak an tam si a, mipa dang melh hlek suh ang che” tiin ka thawmhnaw hâk chu enkualin ka sam thur chu a siamṭha leh tê tê a.




A awmdân chuan ka nuih a ti za viau mai, gate kan lût chiah chu u Remruata chuan min rawn panin ka dârah a rawn kuah nghâl thaka. Vanrongura ala kallo tih ka hriat avâng chuan ka hawi lêt zawka, a lo meng rum nasa mai.




U Remruata kut dahthlak ka tum chu a la phal tlat lo lehnghala, ka ngei tak tak a ni. Ka hnungah ka bialpa in min en reng laia mipa dangin min lo kuah chu keipawh ka awm a nuam vak lo “Min thlah teh enge i hriata?” ka tihchuan a rawn nui vur vura.




“Ka message i va chhâng ṭha duh lo ve a, ka duhzia che pawh i hriat reng kha. Tinge min chhan duh ngai miahloha?” a rawn tih leh lai chuan thawk leh khatah min kuahna chu a rawn inphelh dawrha, Vanrongura chu ka hmaah a rawn ding nghal zat bawk. 





College- students ho chuan min en ṭhup ta bawk nên a nuam vak lo, Vanrongura lah a thinrim tih hriat takin a meng rum al a. An insual mai ang tih pawh ka hlau “Naua engvanga min rawn namsawn ringawt nge i nih?” Remruata pawh chuan lâwm lo leh cho tih hriat tak hian a ena.




Vanrongura hi ala upa lo nângin a lian ka tih tawh kha, Remruata pawhin a chen meuh lo. A uniform hi ha lo phei sela chuan tlangvâl puitling tak tak emaw tihtur chu a ni tawh “U Sangpuii lak aṭang hian lo inthiar fihlim ang che” a ti bung nghata.





A insûm ve nasa viau tih ka hre thei, chu chuan tlêm chuan ka ngaih a ti ṭha deuh. A la naupang si a, ngaihtuahna hmang miahloa a chêt buan buan kha ka hlau a ni ber mai.




“Hah! Engvangin maw? Ka kuah chu enge i lo ngaihpawimawh ve a nang naupang hian? I rawn thlah mai avâng khân a chungah thunei emaw i inti em ni? Ka bialnu hual a nih hi” Remruatan a tihlai chuan midang chu an rawn pungkhawm ṭan tawha, Rinpuii te ṭhian ho pawh an rawn kala, Vanrongura an star zia ka hre bawk nên ka awm an ti nuam vak tawhlo.




“Ka bialnu huala?” tiin Vanrongura chu a nui hul haka, a mah aia upa vek kara a awm chu a zâm phah eih lo. Tûn ṭum chu a ṭhiante leh ka ṭhiante an la rawn kal lo bawk nên Remruata lah hian ṭhian a ngah ve bawk si a an intibuai anga, tum loh tawpin kan awm ka hlau.



College ah lah a thu chin an ni bawk nên Vanrongura hian thiam channa tur a nei dâwn lo tih ka hria, “Ni e, ka ngaihzâwng la ni mai tur anih hi, chuvang chuan lo inrawlh tam ve vak suh” Remruata bawk a ni.




Chutianga a ṭawng chu ka ngei lutuk tlat, chhân tuma ka ân zuau lai chuan Vanrongura thusawi avâng chuan ka tâwp leh riha. “Ka bialnu a ni tih hi i lo hre ve mai mai dawn a nia, lo inrawlh buai zâwk suh.” a tih rual chuan midang ho chuan ka lam an rawn hawi ṭhapa.



Ka lo ngawi reng ringawt, an ni bula insawifiah ka ngaih chhan tur ka hrelo. “A tâwk Ds, kal tawh rawh. U Remruat nang pawh min tibuai tawh lo la ka duh, i hmuh ang hian bialpa ka nei” ka tihchuan Remruata chu za lo zet hian a nui zui vak vaka.




Rinpuii te ṭhian ho in huat hmêl taka min en laiin midang lo awm ve te erawhin mak tihna nên, a ṭhen erawh an hmêlah chuan min awt tih ka hre thei. An thusawi nên ka hre miaua, “He naupang nang aia naupang lehnghâl hi i ngaizawng a maw? A va mak ve mawle, nang ai naupang han ngaihzâwn chu” tiin a ṭhiante ho nên chuan an nui lui vak vaka.




Mahsela a mitmenga Vanrongura a khawih châk zia chu ka hmuh hmaihlo, chuvang chuan Vanrongura hi kal vat sela ka duh. 



“Naupang, ka khawih hma che hian kal vat rawh. Higher naupang tê tê in i aia u fê min cho ania, kal nal nal rawh. He college hung chhungah hian tunge thu zâwk i hriat a ngai kher em?" tiin Vanrongura chu a en ngura.



A hmêlah chuan tih hlauh a tum tih ka hre reng, mahsela Vanrongura ka en chu zâm hmêl ala pu eihlo nia. A aia u vek in an huala, zâm hmêl a pu lo chu amak ka ti zâwk..




“He college ah chuan a nimahna, mahsela he college pâwnah chuan i thuneihna a awm tawh dâwn lo tih hi i hria ang chu maw?” a ti ve sak chu Remruata leh a ṭhiante chuan an rawn hnaih zui ruaka, chuveleh inrawlh ve in “Kal kiang rawh u, u Remruat nangpawh nang aia naupang sual rawn tum kha in zak nange, duh ka thlang thei. Tu ta mah ka niloa, in châwm pawh ka nilo, hetianga awm hi ka duh hauh lo ania, Ds nangpawh kal tawh rawh” tiin Vanrongura form kawr bânah chuan ka pawh saka..




A rum nghata, chutah ka lamah rawn inherin “Aw le, bânah ka lo lam ang che. Nangmah avâng chauhin ka insûm ang” tiin Remruata chu a melh leh tê tê a, a hmêlah chuan a hlauh loh zia ka hmuh sak thei. Mahsela college ah hi chuan intibuai lo sela ka duh, a chhan chu kan professor te thlengin Remruata lamah an ṭang dâwn chiang sa a, tûnah chuan Vanrongura tân thiam chan theihna a awm dâwn lo tlat a tin ni.




Kal a tum leh lai chuan Remruata bawk chuan a lo dang leha, ka ning ta takzet. “I hlau leh si em ni? Hmeichhe duh in ang chu a huai zâwk zawngin kan chang mai dawn em ni?” a lo ti leha. Ka kham ta takzet pan hnaih tuma ka chêt lai chuan ka ṭhiante pahnih rawn thlengin kan bulah an rawn dinga.




“Engthil nge a, Ngura Thanzuala te'n gate pâwnah sawn an nghâk che a nia aw. Enga tinge hetia in awm?” tiin keichu min rawn ena “Nakinah ka hrilh ang che u” ka tih tâkah chuan engmah an sawi zui bik lo.




U Remruata te chu melhin “Engmah lo ti tawh suh u, ka sawi tawh kha. Buaina hi ka duhlo, duh duh neih theih pawh ka nilo, Ds kal tawh rawh ka tihkha. I tlai mai dawn” tiin gate lamah chuan ka nawr dawt dawta, hreh deuhin a kal ve mai bawk.




Gate bul kan thlen rualin “Kha mihring pa lakah khân fimkhur ang che. A la hre khawp ang, tûnah chuan ka insûm ang, inveng nasa hle ang che, khatiang mipa chu i tân pawh a him dâwn lo tih hria ang che” tiin a ṭhiante an rawn lan tâkah chuan a ngawi zui data.




An chhuah hma chuan Remruata te chu en leh vang vangin a ner nawka. Chutah engmah sawi tawh lo chuan an chhuak zui chu ka thlir renga, engmah an tih loh hrâm ka beisei, ka ṭhiante lam ka pan leh lai chuan midang pawh chu an lo kal sawn tawha.




Remruata te ṭhian ho chuan min au el nghal rêng a, mahsela engah mah ngailo ang chuan ka kal pêl hmaka. Ka ṭhiante bul ka thlen rual chuan thil awmzia min zâwt nghal mawlh mawlha, keipawh chuan ka hrilh ve mai bawk.




“A va han zak lo tak, a tibuai peih che sia kan lo nin tawh sa nak alaia, khawih hrep rawh se. Chutia a ṭhiante a chhuan dâwn chuan Thanzuala te pawh an awm ve tho alawm, cho leh cho chu insual sela a nimai, an hneh bik tawp lo ang” Siampuii chuan a ti hlak hlaka.



A ni hi chu kan ṭhian zîngah pawh a huai ber ti ila mi a duhloh zawnga awm chu han sual mai pawh hi a hreh lova. Ama hriat phâka mi an rêl te hian amah hi a thinrim berah a ṭang ṭhina, tumah hian an tilui ngam vak ngailo. 




Ṭhian zîngah pawh hian a huai bik leh ṭhiante ṭan na em em an awm ṭhin an tih ang chiah kha Siampuii pawh hi a ni. Keimahni avâng te hian a insual tam tawh viau bawk, a huaisena hlauh em em anei ngai hauhlo.



Class kan lût a, ṭhenkhat chuan nichina Vanrongura te awmdân avâng khân min sawi sep sep tih pawh ka hre reng. 


“Ssngpuii chu luck bik hle mai, kha an inchuh riap mai che ania. Tluk loh rim i nam hle mai, a inchuh tu che lah chhelo ve ve, keipawh hian ngam ila chuan ka bem ve duh che a sin le” Awmpuia chuan a rawn ti a, midang chu an lo nui nghal dar dar mai.




A ni hi kan semester ah chuan a uang peihin fiamthu a duha, a bula awm a nuam hle bawk. Keipawhin a thusawi chu ka ngai haw lêm lo “A ni te chu lehkha a thiam theia, a hmelṭha bawk nên luck pawh a âwm alawm, kan class hmeichhia ah hian tumahin kan tluk nâng” Zawmtei chuan alo ti ve bawk.




Kan class hi kan inlungrual hlawma, han inkawm hrang diat diat hi kan awm ngailo. Zirtirtute pawhin min fakna a ni ve bawk, semester dangte pawh hian min awh na a ni. Mipa leh hmeichhia inkâwm hrang kan awm ngailova, in kawmngeih zual kan awm nângin tute pawh kan innela, thil kan ti ho dial dial zêl bawka, hei hi a nawmna pakhat a ni bawk.




“Bialpa i va duh naupang reng reng ve, mahsela hei kan senior Rinpuii te ho pawhin an star êm kha maw. Nang lah chuan an star êm êm i han neih sak daih ania, keichu ka duh emai che, an chawh ka ti a nia aw, an inti thu thei si. Mi tirh an peih bawk sia ka ning ania, sports ni khua te hian ka ning ṭhin” Thantei chuan a lo ti ve nâng nanga.



Mipa ho lah chuan fiamthu in an bem nghâl zuk zuka, nichina kan buainate kha chu kan theihnghilh leh vek tawh. Keipawh midang fiamthu ho tak tak ngaithla chuan ka nui leh hak hak a, kan class hi chu a nuam ka ti ṭhin.



Mipa ho lah an felin hmeichhe ho hi min duat thiam bawk nên midang hi kan mamawh bik lo hrim hrim. Kumin chu professor te tour neih dil ve ila a ṭha ang, kan class hi intihhlimna kan nei khât lutuka, kei chu zinchhuah ve te ka duh” Chanchina chuan a rawn ti a, midang pawh chuan an rawn thlawp hlawm viau mai.



Kei erawh engmah ka sawi loa, ka ngaihtuahna ah chuan Vanrongura te hlir a ni awm ni. A awm dânah khân a lawm vak lo tih ka hria, ka hlauhthâwnpui lova, Remruata te zâwk kha a ni. Vanrongura kha a lawm lo hle tih ka hria a, a insual thiam zia chu kha zân min chhan zânah khân ka hre tawha, chuvang chuan a ni chu ka hlauhthâwnpui lêm lo.




Ka hlauhthâwn ber zâwk erawh chu an intibuai anga, Police rawih ngai te hian an awm ang tih mawlh a ni ka hlauh ni. Chutih rual erawh chuan u Remruata min tihdân kha ka lâwm hauh lo, kan college zirlaite hmaah min ti mualpho ka tilo theiloa, khatiang khân awm lo sela tumahin an hre hauh lovang.




Khatianga a rawn chêt kha ka ring pha lo bawk nên lo hre sa ila chuan ka inveng ngei ang. Khatiang mize puitling lo lutuk kha alo nei ang tih ka ring pha hauh lo bawk.


ZAWMNA...


Haw turin kan insiam nak naka, vawiin chu Vanrongura zâwk ka nghah a ngaih hmêl. Chawhnu-ah period 1 chiah ka lâk avângin kan bâng hma viaua, keini ṭhian thum hi chu high school aṭang tawhin kan luh na a in ang vek zel a, college thlengin kan subject lâk pawh a in ang vek kan la a, ṭhianṭha tak tak ka tilo theilo.




Siampuii leh Marami chu an titi leh mawlh mawlh tawha, corridor a kan phei lai chuan kan teacher pakhat kan tâwk hlawla. “A melhna lam hriat a va har leh dâwn ve,” Marami chuan a hriat phâk loh tur hian a lo ti nghal sapa.



Kan nui hak mai, sir Emma hi a mit hi Pathianin ka ṭawng haw lo sela a kalh bawk nên tumah hian an en kan hrethiam ngailo. Min en emaw kan tih laiin kan piah a mi daih te a lo be leh ṭhin a, College ka luh tirhah keipawhin ka chhâng sual tawha, zahthlâk duh tak a ni.




“In haw nghal dâwn em ni?” a rawn tihchuan kan pathum chuan kan in en ṭhap a, “Sir keimah ni maw min biak?” Siampuiin a lo tihchuan a bu nghata, chutia min be si chuan hmun dang daih a ni a mit chuan a melh ni.



Marami nui chhuak tur lah chuan min hmer ngawr ngawr tawh, a ni hi chu fiamthu thawh kher ngailo hian a thil hmuh fuh lo hi a nui zung zung theia. Englai pawha nui thei kan tih ang chi hi a ni, midang a fiam peih ang bawkin a mah pawh a zaua, engtin pawhin fiam lêt se a thinrim ngai lo thung.




“Aw kan haw dawn a nih hi, kan hmanhmawh deuha kan kal phawt ange” tiin kan kal pêl zuia, kan hlat ta maw tihah Marami chu a rawn nui chhuak vak vaka. “I mak ṭhin, mi piansualna hi nuih a ṭha lo a nia. Piansual leh phar charin tlai luat a neilo an tih kha” ka lo tihlai chuan Siampuii nên chuan in enin an han nui leh vak vaka.




Huiham! A ngaihna hi an awm thlâwt lo “Nuih ka tum bik lo, mahsela class ah kan lo sawi nasa ṭhin sia, khâng kha ka ngaihtuah chhuak thut zel a lawm. Tûnah pawh khân min en emaw tihlaiin bang lam melh chungin a nih kha min biak” tiin an nui leha, ka nuih ve ta ringawt.




Mi piansualna hi fiamthu pui chi nilo in ka hria a, chutih rual erawh chuan hmuhsit vâng ni hauh lo hian hmuh thut hi chuan ṭhenkhat tân chuan nuih a awl viau rêng a. 




“In ho emai, kal ang u. Vawiin chu keimahni zawkin va nghâk mai ang u” tiin kan inzui ṭhâm ṭhâm a. Vanrongura te school nên hian kan inhlat lo bawka, ke a kal pawhin kan thleng har ngai lêm lo.




Kal pah chuan kawngsira pani puri an siamte chu kan ei leh lâwk a, keichuan tui ka ti em em lo. Thingtlâng a seilian ka nih vâng nge mawni hetiang kan thil ei ṭhan loh hi chu ka ngaina vak lova, a tui lo pawh ka ti chuang lo. Mahsela ṭhiante'n an ei duh hi chu ka ei ve thei zel thunga, keichu Mizo takin timai ila hmeichhia e tilo hian chaw ka heh a, hmarcha pawh ka ngam viau mai.




Ka ṭhiante pahnih erawh hi chuan thak chu ngam lo tak an ni, mahsela thlum an heh viau thunga. Keiin thlum ka ngaina leh miahlo bawk, ti chung hian kan in kawmngeih em em tho. 



Vanrongura te school bula ṭhutna an siamah chuan an mahni nghah pahin games kan lo khela, pubg leh ml kan khêl ve ṭhin a, kan thiam vak lo thung. Mahsela ṭhianhoa khelh hi a lo nuam bawk nên hunawlah hian insawmin kan khêl ṭhin a, kan bengchheng thei viau.



Tûn pawh ka ṭhiante pahnih chu an au leh nasa tawh mai, keiin an inhau leh ṭhin chu ngaithla in ka nui leh hak ṭhin. “Support leh tank i hman chuan min  pui ve ṭhin la, i mâwl emai. Mi khêl te hi en ṭhin rawh, ml khêl ve duh si a awmzia pawh i man lo, tank leh support i hman chuan mm hi min pui ve ṭhin ang che” Siampuii chuan a ti hlawk hlawka.





Marami lah chuan haw lêm lo in a nuih uar uar thunga, an ni pahnih hi chu inhnial nuam an ti hrim hrima. Kan pathum te lek pawh hian kan bengchheng thei viau mai, dar a ri ral rala. Chuveleh phone dahin Vanrongura te school lam chu kan melh ṭhapa.




An class aṭanga an rawn chhuak phak phak chu an mahni zawngin kan dingdihlip leh ak ak ṭhin, a ṭhen an rawn tlân chhuaka. A ṭhen inchhaih in an nui bawka, an bengchheng viau mai.




A hnung lamah Vanrongura te ṭhianho chu an rawn chhuaka, mahsela an mahni chauh an nilo. Hmeichhe rual khat, hmelṭha tak tak hian an rawn chhaih chhuak zawr zawra, an ni lah an nui leh vur vur ṭhin. Vanrongura nui ve ka hmuh chuan ka tûm nghal hmuka.




“Kan hmuh loh lamah nuam an va ti hawr hawr ve, Lalthanzuala chu a châk lo khawp ang. Saw naupang zah theih loh zia saw ka bialpa bânah te a vuan vêl a nia” Siampuiin a tihlai chuan Marami erawh keini pahnih min enin a lo nui vur vur thung.




“Naupang in tia, in bialpa te pawh saw naupang tho an la nih saw. Sawisêl miah suh u, tleirawl an la ni ve a mipa chhaih nuam ti rual, mipa bula awm te chu nuam an ti ve bawk ang chu. Tûnlai naupang chu kum 14 an tlin aṭangin ngaihzâwng neih an ngam vek tawh” a rawn ti chu Siampuii nên chuan kan melh rawm a.




A sawi dik ve tho mai, ig han lût ila kum 10 vêl tur lek lek rawn lâm hah hah hmuh tur an tam bâkah inngaizawng keini nula senior lam pawhin kan la tihngam loh ngaihzawngte inkuah tira, an bianga fawha rawn post chhuak ngam te hi an tam tawh lutuk tlat.



Khawvêl changkanna hian aia ute lehpelh a keng tel emaw tih turin an rawn inhmangaih thiam ṭhin ka ti.


Vanrongura te rawn phei zel chuan min rawn hmu ta chiaha, kan lo en reng tih an hmuh rual chuan an hmeichhe kal pui an mahni chhaih tute hlat zâwng chuan ding ṭhapin an nui tâwp hmaka, Vanrongura rawn hawi phei chu rum fe hian ka lo melha, a ngaih a ṭha lo tih ka hmu thiam reng.




An ṭhian ho chuan min rawn en ṭhap in min nuih tlawma, huiha. An nui mawi hrep lehnghal, tûnlai ṭhang thar hi chu an rawn hmelṭha tawh lutuka, a hmei a pa hian an hmêlṭha tawlh tawlh maiin ka hria, keini ve tihian kan chul der chu a nia.



An hmeichhe kalpui te chuan min rawn en ve a, keini pathum erawhin hlim hmêl put chu khawilam kan bialpa te awmdân chuan min ti lâwm chiahlo. Marami hi chuan ngaihzâwng a nei ve lo nângin a ṭhiante pahnih awm ang ang hian a insiam rem ve mai zêl.




“In va bâng hma ve, hehe kan....lo...infiam mai maia” Thanzuala chuan Siampuii rawn hnaih pah chuan a ti a, “In u te em ni?” an hmeichhe rawn kal puite'n an tihchuan ka lo thaw hak mai. Mai mai chuan kan upat hmêl viau emaw ni.




“Nilo e, kal ang u” tiin Vanrongura chuan min rawn pana, min nuih chu keiin ka lo ner khum nawng mai. An bialnu kan nih thu pawh zu han sawi miahloa? Ha! Kei hian ka thik in mi hma a in ngaihzâwn ka duh tihna em ni? Khatiang ngaihtuahna kha engtin nge ka neih theih zâwk?




Sawi chiah sela chuan kan inkar miin an hre vek dâwn tihna a nia, tûnah rihchuan ka la duh lo hrim hrim.



Ngawi reng chuan hma hruaiin an bike lam chu kan pana, mi hmaah thinrim lo mah ila kan pahniha kan awm hran hunah ka sawi dawn khawp. A ni pawhin mipa dang ka hnaih a phalloh chuan hmeichhe dang a hnaih ka phal bik hleinem, keichu ngaihzâwng ka neih chuan kan ngaihzawngte chiah kha kan ngaihsak turah ka ngai.





A bike chuan in phur chhuakin ṭhianho chuan kan inzui leh diah diaha. “Hmeichhe dang bula nuih chu a nuam bawk em? Kha i nuih mawi thiam khawp kha, khatiang chuan Leonardo dipcario te pawh i an kha” ka ti chu a rawn hawi zawka. 




“Hmalam kha en mai mai rawh, kan accident ange, ka na duh hlek lo ania” ka ti lehnghâl hlaka. “Ih...kan infiam mai mai a lawm, kei phei chuan ka fiam ve miahlo. I âwih loh chuan ka ṭhiante hi zâwt rawh, an mahni khân min fiam mai ania” a rawn ti chu ka thaw haka.




“A nihchu a, nuihte chu a nuam a lawm tiraw? Ilo nui fo ṭhin dâwn ania” ka tihchuan a nui haka. “U Sangpui i thik tiraw? Ava nuam ve, hmeichhe dang i thik pawh ka ring lo ania, theihnghilh daih rawh. Enga tân mah ka ti hleinem, ka duh ber ka bialnu i ni tawh alawm” a rawn ti ngei lehnghala.




Mi a ti lungawi lehnghâl der, naupang tê mah nise ka lâwm zawnga awm hi a thiam phian dâwnin ka hria.


“Zanin chu tihtûr ka neia, ṭhiante nên lên kan tuma ka buai deuh dâwn ania, ka hman veleh ka lo bia ang che” a tihchuan bike glass aṭang chuan ka ena.



“Khawiah nge lên in tuma? Nula rim in tum em ni?” ka ti chu a pum che dat chuan a rawn nuia, a awm dân hi ka ngaih a ti ṭha miahlo.


A thusawi ah chuan eng emaw tak a awm tlatin ka hria a, nge ka hriatsual ni zâwk dawn ni.



“Tum lo e, kan tihdan ziah ania. A khât tâwk hian intih thawvenna ni pah fawmin kan lêng ziah alawm. Hmeichhe dang rim tur chuan min ngailo la, rîm thei pawh ka nilo, hmeichhia ka rîm dâwn a nihchuan nangmah hi i ni ngei ang. Khatiang lamah kha chuan min ringhlel suh” a tihchuan ka bu nghata.




A zia ka ena, a thusawi chu a tih tak tak ka ring, kan kawta a din rual chuan ka chhuk vata “Ilo kawi dâwn em?” ka tihchuan a lu a thing nar nar mai.


“I pi ka hlau, min en uluk thei emai. Bâkah ka chêt hma loh chuan, kan in be pah dâwn ania” a tihchuan ka hnial biklo.



In chhûngah chuan lûtin u Nunpuii rawng lo bawl mawlh mawlh chuan thingpui min rawn pe vata, keipawh room-a lût mai lo chuan ka ṭhu tawi riha. Kan titi lehnghâl bawrh bawrh a, thingtlâng aṭanga awm ve ve ta chu kan titi pawh a rualin kan sawi duh zawng thlengin a in ang bawk nên titi pui pawh a nuam ka ti.




Thingpui ka in zawh chuan ka room-ah lûtin ka inbual zuia, vawiin chu ruah a sûr lo ve teh tlata. Zan lam erawh a sur leh ka ring deuh ngawta. Fur lai hi chuan khaw chin hi a hriat tawh ṭhin silo a, in rin sual hi a awl ka ti 




Ka inbual zawha phone ka en chu Vanrongura message chu a lo awm va mai. Ka inbual thu chu hrilhin ka chhâng zui a, ka message hi a chhâng tlai ngailo va, englai pawha min ngaihven reng hi a ang ka ti ṭhin.



Kan inbe char chara, vawiin tlai chu lehkha zir pawh rilru ah a lang theilo. Vanrongura fiamthu thawh chu ka nuih pui char chara, tûnah hi chuan min hmu tu chu awm se mi â emaw min tihial ang tih tur vêl a ni .





Chaw eikham chuan khua a vawt ve tawh bawk nên khumah mu pahin lehkha ka zir malh malha. Vanrongura chuan a kal thu min rawn hrilh thlap tawh bawk nên biak tur dang ka nei meuhlo, min he tu chu awm mahsela ka be châk lo a ni ber mai.


MUTTUI ULE

DUHAISAM DUHLAI ZORINPUIA S2 



CHAPTER 10 




Ka lo muhil hman sek tihah ka phone ri chuan min kai tho a, la kâng a ka en chu Vanrongura hming ka hmuh avâng chuan ka la vata. “I mu tawh em ni? Hei ka haw chiaha” a rawn tihchuan ka lungawi lo bawk nên ka chhâng duh mai loa.




Dar 9 thleng ka nghâk a, tûnah dar 11 a ri tawh ania. Eng êm êm nge a tih dâwn ni?

 “Mu tawh i va haw har ve?” ka ti nghal hlaka, ka lâwm thei der lo. A vâk chhuak duh anih pawhin min rawn biak pah tal ka ring ania, chutiang a ti hauh lo chuan ka lung a ti awilo ani ber mai. Engtik lai aṭangin nge biak reng ka châk tâk ṭan ka hrelo, mahsela keimahah a lo pawimawh tawh hle a nih ka ring, message dang tam tak kâra mi be miahlo tu message ka nghah ni.




“Ih.... ṭhiante'n haw an la duh chiah loa, lo haw bik kha chu a nuamlo a. I thinrim em ni?” a rawn tihchuan ka chhâng mai lo, ka lungawi lo miaua, ka lungawi lo tih hi hria sela, ka duh loh zâwng thil chu tilo bawk sela ka duh.




“Lalduatnu, min chhâng la. Ih zan dangah chuan rei deuh ka lêng tawh miah lo ang, a ṭha em?” a rawn ti leh a, a aw lah chu a in la khawngaih thlâk thiam viau lehnghâl. 


Engtin maw min koh kha? Lalduatnu a? Hmmm, min va chei naupang chhia deuh ve, mahsela a mawi phian bawk sia.



“Aw le, zan dangah chuan hetianga rei lêng tawh suh ang che. Keichuan bialpa zân lên hrât deuh hi ka duh miahlo ania, chutiang neih ai chuan bialpa neihloh pawh ka pawi tilo. Khawpuiah phei chuan nun uluk angai ania, mipa phei chu tualthah hmang leh insual hrât tak tak an tam si a, vak chhuak vak lo la ka duh” ka tihlai chuan a rawn thaw haka.



A thâwk dân lah chu na nei ang mai a ni “Enge i tih? Na i nei em ni?” ka tihchuan rang zet hian “Neilo e, ka in tauh palha. A nih i mu tawh bawk sia ka dah mai aw, naktuk zîngah ka lo bia ang che, tui deuhin i mu dâwn ania aw” a rawn tih takah chuan keipawh ka mut a chhuak bawk nên ka mangṭha ve sapa.




Zîng ah tho chhuakin ka bathlarah chuan chhuakin ka zi mar ar ara, EXER lâk hi ka peih lêm lo. Ka tum apiang hian thawh ka hai ziaha, bâkah misual chu ûm lohin an tlân ṭhin Bible in a lo ti bawk nên misual nih ka duh bik siloa, ka tlân lo leh mai ṭhin. EXER la lo pawh hian ka hrisêl lo bik lo ang tih hi ka ngaihdan a nia. 



Dsa chu a la tho lo nge mawni tukin chu a rawn dâk chhuak miahlo, tûk dangah te kha chuan ka chhuah hian a lo awm ve hman ziah kha ania. Tûn erawh chu a parda a la inzar ṭhiap mai. 


Chaw eikhamah an in lam ka pan pheia, an kawngkhâr ka hawng tur chiah chu rawn hawngin a helmet a rawn khuma. Keiin phâwk zetin ka lo en thung, nidangah kha chuan a bike chuan hnuah chauh a khum ṭhin kha ania, chutia a rawn inkhum sa chuan mak min tih tir lo theilo.





“Tinge?” ka ti chu ka lu ah a rawn chûl zauha, “Ka khum sa mai mai a nih hi, kal vat ila i tlai palh ange” a tihchuan thildang zâwt tawh bik lo chuan a bike lam chu ka pana.




Kan inphurh chhuah hnu thleng chuan a ṭawng tlêmin thil ngaihtuah nei ang mai hi a ni. Mahsela a awmdân chu keiin pa ka lo ti em em thunga, a bike darthlalang aṭang chuan ka en leh vang vang ṭhin.



College kan thlen rualin ka ṭhiante ho chu an lo awm leh der tawha. Thanzuala te ho erawh ka hmu lo thung “I tlang nghal dâwn em ni?” ti a Vanrongura lam ka hawi chu lo bûk nghat pah hian min kuah zauha.


“Ka tlang nghal mai ang, a tlai tawh riau. Bânah ka rawn hruai leh dâwn che ania” tiin a awmsawn zuia, tukin chu a awmdân hi a mak ka ti tak tak. Min pehhêl a tum tlat te hian ka hria, nidanga a mizia nên chuan a dang ka ti tak tak a ni.



“Tukin chu an va mak hlawm ve” Siampuiin a rawn tihchuan alam ka hawia “Timaw?” ka tihchuan Marami nên chuan in en zauhin “Thanzuala te kha ka hmuh tirh aṭangin helmet a khuma, nidangah chuan a khum duh ngai miahlo kha a nia. Chuan college kan thlen rualin Ngura ang chiah khân an tlân chhuak leh nghal daih bawka, tukin chu an chêt dân hi a mak. An hmêl hmuh an hlauh hmêl ka ti” a rawn tih leh tâkah chuan keipawh chuan thil eng emaw tak a awm anihchu ka ring.




College lam pan chuan kan inzui ṭhâm ṭhâm a, class kan luh laia kan classmate te titi chuan beng a luah nghal zar mai. 



“Nizanah SU Remruata te an intibuai an tia, an na viau a ni âwm e. College- pawh an la rawn kal lo an tia, damdawiinah Remruata phei chu a awm an tiin ka hria. Tute nên nge maw ni le an in tihbuai le? An hneh lo ve khawp ania'ng, an na lutuk an ti” tih an sawi thâwmah chuan keini ṭhian thum chu kan in en ṭhapa.




Ngaihdan in ang kan nei vek niin ka hria, Vanrongura nên niminah khân an intibuai ngei a. Vanrongura lên chhuah chhan te, tlai taka a rawn haw leh tukina an hmai an khuh tlat te khân awmzia a nei mai angem? 



Min rinhlelh tir lo theilo, khatiang khân an lo awm kher kher bawk nên Vanrongura thusawi te chu ka ngaihtuah chhuak leh uar uara. College pâwnah thiam chan theihna i neilo a tih lai te ka ngaihtuah chuan thil ni thei tak a niin ka hria.




“An ni mai angem? An ni ngei ngei ang, chuvang animaw an lo inthup tlat” Siampuiin a rawn tihchuan Marami nên chuan ṭawng zawi turin kan lo ti zuia. A ni pawh a ngawi ve leh mai bawk.



“Ban hunah kan fiah dâwn a nia, khatianga an awm tlat khan chhan a nei ngei ang. An helmet phelh duh loh khân thil eng emaw tak chu a awm tih a ti chiang, nimina Ngura mitmeng kha ka theihngilh thei lo. Thinrimna a khat tih hriat takin Remruata a melh kha ka la theihnghilh theilo” ka tihchuan an bu nghat nghat mai.





Midang sawi ang tak takin nilêngin Remruata chu ka hmuloa, a ṭhian kawm ṭhin ṭhenkhat te kha erawh an hmai khem deuh nuaih in an rawn kal thunga. Vanrongura te ka ringhlel tual tual bawk.




Remruata ṭhiante lah chuan min be duh hauhlo a, min pehhêl deuh nge mawni. Nidangahte chuan min be hmasa zâwk ziah ṭhin kha ania, vawiin chu tute mai pawh hian min pehhêl ani ber mai.




“Sangpui in ṭhianho khân ka office hi min lo tihfai pui lawk ta che u” sir Tetean a rawn tih avâng chuan Maramite nên chuan an Office lam panin kan kala, a ni hi tlangvâl ala nia. College ah pawh hian star tu a ngah viau mai, amah a fel ve bawk nên tute pawh hian kan ngaina ti ila a sual lo ang.





Kan pathum chuan zui lûtin hmunphiah a lo dahsa chu la in kan phiat zui mawlh mawlha “Naktukah result a chhuak tawh dawn sia Sangpuii chu a sâng ber ini leh anga” tiin sir Tetea chuan nui var var chung hian min rawn ena. Kei erawhin ka ring lêm lo, in elna hi a sâng ve si a chutih rual erawh chuan ka chhan dân ngaihtuahin ka tihchhiat lutuk erawh ka ringlo.




“Ka hrelo le, thiam tak tak an tam a lawm. Kan zo e, sir kan kal tawh mai dâwn asin” ti a chhuah mai kan tum lai chuan “Lo la ding lawk teh, in in awmna kha khawilai nge kha?” a rawn tihchuan kan in en ha a. Enga tâna hre duh nge anih ang? 



“Zarkawt Presbyterian Biak in thlang lamah khân kan awma, kan kal phawt” tiin ka chhuak zuia. Ka ṭhiante pahnih lah chuan min chhaih leh zuk zuk tawh mai.



“Nang hi chu i luck ngawt mai, mipa mit i lâk bik chhan te hi min hrilh teh. Sir pawh kha rawn lên a tum chiang lutuk, tluk loh rim hi i nam ṭhin e, keini kan nghah fe hnuah duhtu kan hmu ve chauh zela. Nang erawh i duh miah loh pawh an rawn in lâr zut zut mai chu a nih hi” an tihchuan ka ner nâng mai.




Keipawhin engvanga mipa te hian min duh nge an nih ka hre biklo, keimahah ṭhatna bik sawi tûr a awm lova. Hmeichhe dangte aia ka hmelṭhatna hmuh tur a awm heklo, ka felna leh ka Special na sawi tûr keimahah a awm lo chung hian Pathian hian mipate duhzâwng tak ni turin min siam nge pawh ka hrelo, nge ni a mipa ka ngaihsak lo lutuk hi min tibuaitu tur a rawn dah ṭhin zâwk ni.




Bânah chuan Vanrongura te kan lo nghâk ṭhapa, an mahniin min rawn call tawh avângin an rawn thlen har ka ring lo. An rawn thlen rualin an helmet an phelh tawh ngei angai ang, ka rin anga an awm anihchuan zawh fiah ngei pawh ka duh.





Rin ang ngeiin an rawn lang har lo, an bike aṭanga an rawn chhuh pawh chuan an helmet chu an la phelh ta chuang loa. Pan hnai sawk sawkin a kawr nghâwngah ka pawta, ka kuai kûn nghal zat bawk. 



Chutah a helmet chu phelh sak ka tuma alo la indang ve zuia. Ka melh rum tâk viauah erawh chuan min hnial tawh lo in a lo dawh ṭha hle hlea. 



Ka phelh rual chuan a hmai duk deuh ka hmuh avâng chuan ka rinhlelhna kha a sual dâwn lo tih ka hre nghal. “Hei hi engvang nge?” a chhan hre tawh mah ila zawh chian ngei ka duh avâng chuan ka melh khar khara, a hmui pawh a pilh deuh bawka ani erawh Remruata te ang em em chuan a na lo anih hmêl.




Thanzuala te ho pawh ka va en chu an lo hliam ve tho a, inthlahrun hmêl taka min en chu an khawngaihthlak viau nângin an aia u an sual chu ka lawm vaklo.



“Min chhâng vat rawh, engvanga in hmai hi hetia awm nge? Tu nên nge in insual?” ka ti leh faka, Siampuii erawhin engmah lo zawh a tum lo a, keimah chu min ring tih ka hre mai.




“Ih tlangvâl sual kan tawng palh a, kan insualna a nih hi” a rawn ti chu ka melh leh ngheka. “Remruata damdawiinah a awm tih i hria em?” ka tihchuan a hawi buai bawk nên a hming a hre ngai lo a nih ka ring



“Tunge chu chu?” a rawn ti ta chiah rênga, kei erawh ka lo thaw hak thung. “Nimina i intihbuai pui pa kha” ka tihchuan a nui suka “A va ṭha ve, a hung chhûnga a awm loh chuan a lo huai vak lo animaw? Damdawiinah a awm nghal mai ania, a inla pawr satliah a nihkha” a ti chu a ngalah ka chhir sak nghâl ṭawlha.




A aiah ṭhat mai, “Nangmahni nên tiraw in intihbuai, nimina i thusawi kha ka hre vek ania. Tin, nizâna i lên rei chhan te, min pehhêl tlat chhan te kha a ni tih ka hria” ka ti chu a mit chuar nung hian min ena. Insawifiah pawh a la tum chuang lo a nih hmêl, chu chuan ka thin a tirim bawk.



“Min chhâng tawp suh, kal ang u. Hetiang bialpa mi chhâng ṭha duhlo leh dâwt sawi ṭhin ka duhlo” ti a kal mai ka tum chu ka kutah rawn vuanin min pawt lêt dawrha. A awmah ka bei ti tih tihah innem khalhin a mah chu ka en chho kara.



“Aw kan tih a nih kha, a chhan chu nang an hnaih ve che ka rem tilo. Ka bialnu i ni tawh a, khatianga an chhaih nawmnah che leh duh duha an khawih ve che kha ka phallo. Chubâkah min cho a, cho leh cho chu kan insual mai anih kha” a ti chu ka thaw ta haka.


Rawlthar lunglian, pawisak neilo leh hlauh em em neilo an tihchu an lo nih chiah hi.


Ka en reng avâng chuan nge a ngaih ṭha lo chuan inthlahrun hmêl zet hian min ena “I duh leh min khawih ve mai rawh. I lung tih awi loh ka duh miahloa, mahsela khapa ṭawng khum dân che leh min tihdân kha ka hmu theilo anihkha, khawih nat em em kha ka tum miahlo. Mahsela tu mipa mahin an hmeichhia anga an sawi che ka duhlo” a rawn ti leh bai baia.




Remruata a sawisak avânga thinrim ka niloa, mahsela dâwt min hrilh kher hi ka hua a nimai zâwk.


“Nidangah chuan dâwt min hrilh leh tawh suh ang che, ka thlavang i hauhna ah erawh ka lâwm lutuk tihkha min hriatsak la. Keipawhin hmeichhe dang i hnaih ka phal bik lo ania” ka tih tâkah chuan thaw huai hmêl a pu reuh lehnghâl. A va han cute tak!



ZAWMNA...



“Nidangah chuan insual tawh miah suh u aw, a ṭha lo. Tûnlai mipa chu hote tê ah in pawr nghal hluai zel a, a ṭha ber lo ania, buaina siamtu nih aiin a chingfeltu nih a ropui zâwk” ka ti chu a bike khalh pah chuan a thaw haka, ka thusawi chu a pawm vak lo a nih hmêl.




“Ngawih reng ringawt hian buaina a chingfel lo, a châng chuan kutthawhte hi a ṭul ve fo zâwk a sin. Min ngaihtuah tih ka hria, mahsela ka puitling tawha ka inveng thei ania, khatiang an upatna chhuang satliah kha ka hlau biklo” a ti leha, ka thusawi chu a âwih hmêl vak loh.




A hnungah chuan ka bensak sawpa “Tunlai mipa ang hi ni hauh suh, social media ah mi cho vak vak. Sawisêl tur hmu thei deuh ho ang te hi i ni ange, Mizo mipa ṭhenkhat hna neilo, social media a mi sawisêl hna a neih ho ang te hi i ni ve ange, hetiang bialpa ka duh hauh lo ania. Hmeichhia zâwk mahin midang an fak laiin, a mipa zâwk hian sawisêl tur in hmu thei tawha. Hetiang mizia te hi ilo pu ve hlauh ange” ka ti chu a bike ti ding dawtin a rawn hawi lêt a.



Keilah in ring hman hek lo, a hnungah chuan ka khabe ka tauh dawt bawk nên ka intuai vut vut mai. “Chutiang tuai rilru pu ang lek chuan maw min ngaiha? Ka la naupang ka hria, mahsela ka ṭawng thei ve kher lo, khatiang social media a pawr satliah tuai rilru pu ho nên khân min tehkhin tei vet suh” a rawn ti hluk hluk mai.




Kei erawh a thusawi chuan min ti nui hak mai, mipa ṭawng thei chu a lo hmu pa bik vak lo a nih hmêl. “Tuai a? Tuai an ni kher nâng” tiin ka nui hak haka “Khatiangte chu mipa hna anilo, tuai ho hna a lawm. In la pa satliah, mahsela hmeichhe rilru pu lek an nih kha, mipa chuan sawisêl ai kuttum kan hmang mai ṭhin” tiin a kut tum chu a rawn lek larh larha.




Ka nui leh hak mai, ni e tûnlai mipa ṭhenkhat social media a hman deuh ho hi chu hmeichhia hian kan chuti ngaihsan teh ual lo. An comment a ṭang pawh hian an rapthlâk in chhungkaw pa ber atâna ṭha miahlo tur hi hmeichhiate hian kan lo en ru ve kar tih an hrelo nge, mi post an comment vak vak a, private ah hmeichhia bawlhhlawh tak takin min be leha, kan mipa ṭhenkhat hi chu an hahthlâk tawh chu a ni, hmeichhe tih âwm tâwk hi mipa hian an ti nasa ta mah mah ka ti bawk.




“Tuai te chu an awm hran ve thlap hi, kal phawt ang” tiin a hnungah chuan ka bêng thaka.



Min haw pui nghal a tum lo nge mawni kan in lamah kan tlân miahlo, chutah Kori's restaurant hmaah min dinpuiin a en vung vunga. Keiin mak tiin ka en haw bawk “Enge hetah kan tih dâwn?” tiin a bulah chuan ka dinga.



“Kan in date ang chu, lût ang. Vawiin chu ka treat ang che, i duh duh zât i ei thei ang” tiin a nui suk a. Ka man chhuak tawh tho a tinge, a helmet pawh khum tawh lo in a zakzeha. A school Uniform nên chuan movie vela bad boy kan hmuh ṭhin hi a ang riau lehnghal.



Dawr chhûng kan luh rual chuan hnathawkte chuan min lo chhâwn vata, hetiang kawngah hi chuan dawr hnathawk tu pawh mai hi an nelawm ka ti ṭhin. A châng chuan mood fuh loh hunte an nei ve ngei anga, chutiang châng pawha hlim sâng a customer te an be ṭhin hi an fakawm viau mai.




“I duh duh chah rawh” a tih avâng chuan menu chu ka en vata, Korean lam thil a tam zâwk bawka thlan tur a bar ka hrelo. Aizawlah hian ka awmna rei mahsela dawra chawlh hi ka ti ngai lêm loa, Siampuii leh Marami nên kan chawlh ve pawhin hetiang dawr changkâng lutukah châwl lo in kawngsir thingpui dawr vêlah mak mai kan châwl ṭhin a, hetiang dawr lian a ka vawikhat kalna a ni.




Thlan tur vak ka hriat loh avâng chuan mochaccino leh kimbap, Soya chicken tih vêl chu ka chah tawpa. An taste pawh ka hre lêm lo, tihian ka fiah ve a nimai. Korean movie ka en hnem bawka ka ei châk thei bawk nên ei ve chhin hrim hrim ka duh, ka bula ṭhu pa erawh chuan a chah ṭeuh a.




A ei sêng dâwn emawni? Rei a nilo kan thil chah ho chu an rawn dah zung zunga, a tui hmêl hlawm em em lehnghâl. Chhûnah thil ei tho mah ila kan thil chah chuan chil a tiput zawih zawih mai “Ei vat la, i chah tlêm emai. Ka chah ho pawh hi ei ve rawh” tiin a rawn nui var vara. 



Keipawh chuan fork vêl chu la in ka ei nghal mawlh mawlha, a tui lutuk tlat “A tui hle mai, ka vawikhat eina vek an nia” ka tihchuan a rawn nui suka “Ei ṭeuh rawh, aman zat ngaihtuah lo la” tiin a ni pawh chuan a hma a mi chu a ei ve ta mawlh mawlha.



A tui hlawm lutuk chu si hliam hliam chungin ka ei mawlh mawlha, Vanrongura erawh chuan a ei tam lutuk lo thung. Kei erawh ka ngainat zâwng tak an thak deuh vek bawk nên a tui ka tizual, thil thlum lam ai chuan al leh thak hi ka ngaina a, ka heh bawk.





“Ka ei zawh i phal tak tak em?” ka ti chu an rawn nui deuh hawka “Ei vek rawh, i tân alawm ka chah. Ka bialnu tân chuan ka engkim hi ka phal vek” a rawn ti chu naupang zâwk mahnisela min ti lâi chiang lutuk.




“A u i van heh êm êm, i pumpui a va lian âwm” tihri rawn chhuak ah chuan ka sir chu ka en vata. Mipa naupang sam kir chiat hian min lo en reng chu niin, a duhawm reuh em em lehnghâl, ka thil eilai pawh ka tâwp chawt mai.



“A u hei hi i bialnu ami?” tiin Vanrongura chu a en leha, a ni pawh nuihzat hmêl deuh hian a lo bu nghata. 


“In hmelṭha dûn lutuk, mahse a u i bialnu hian ei a thei lutuk, anu nên an in ang chiah, anu pawh apa in a phalloh thleng thleng a ei ṭhin a” a ti leh reuha. La ei châk viau mah ila naupangin ei thei min ti chu ka ei lui ngam vak tawh lo.




Chutah a nu ni ngei tur chuan a rawn ko a, ka en phei chuan nu hmelṭha zet leh palian pui mai lo ding chuan kan lam an lo pan reng tawh chu niin.



Kan bul an rawn thlen rual chuan “Enga tinge hetah ilo va kala? Kan zawng nasa che a lawm, a rawn tibuai êm lo cheu maw?” tiin keini chu min rawn ena “Tibuai lo e” ka lo tihlai chuan naupangte chuan a pa chu panin “Apa, a u hi anu ang chiah mawle. Hei hêng zawng zawng hi a ei thei vek ania” tiin kan dawhkan chu a rawn kâwk a.




A nu in a lo hauh laiin a pa erawh a lo nui hawk hawk thunga, “Evan, khatin tumah ti tawh suh. I pa hi i chhûn leh lutuk mai” nu zâwk chuan a lo ti leh hlaka.



An chhûngkua chu an hmêlṭha in hmuh an nuam viau lehnghâl, “A pawi ka ti hle mai, Puitei ka nia. Kan fapa hi a buaithlâk reuh lutuka, i ei te a nawm loh phah a nge, hmeichhia kan nihchuan ei hi thei em em ila a ṭha mai.” tiin a nui sâng a, keipawhin ka ei zawm veleh mai bawk.



“Cutie kal tawh ila, kan tlai riau tawh ania. Ka nu phun âng i ngaihthlâk peih loh kha” an pa zâwkin a rawn tihchuan u Puitei pawh chu a nui hak hak mai. An pa chu enin a nuih ver vera, a pasal mitmenga a nupui a hmangaihzia lang chhuak chu ka hmuh hmaih bik lo.




Chhungkaw awhawm tak an niin ka hria, ka en renga “Aw a nih kan kal phawt ange aw, hun nuam tak in hmang dâwn ania, Remsang kal ila” tiin keini chu min mangṭha in an chhuak zuia.




“Nupa inhmeh tak an nih kha” ka ti chu Vanrongura pawh a lo bu nghata “Nakinah chuan an mahni ang chiah khân chhûngkua kan la din anga, khapa ang chiah khân ka ngaihsak ve ang che” a rawn ti chu ka nui haka.



“Beisei ang hmiang, kei lo pawh nupuiah ila nei mai thei a sin. Hmalam hun hi kan hre siloa, chutih hunah chuan keite chu min hre reng tawh lo mai thei a sin” tiin ka nuih var vara, a ni erawh a nui duh ṭhak lo, mit chuar nung hian min ena.



“Nang lo hmeichhe dang ka nei ngai lovang, ka nupui tur leh ka fate nu tur i nih hi. Ka damchhung chuan tu ta mah i ni ngailo ang” a rawn ti fak fak a. A thusawi chu a ti mai mai lo tih ka hre thei.




“Ka ei zo tawh ania” tiin thudang chu ka sawi ta daiha. Hetiang hma lam hun hi chu ka sawi duh vaklo, a chhan chu hma lam hun a kan awmdân tur hi hriat lâwk a ni ṭhin lova. Duh dang, hmangaih dang nei leh ṭhin mihring kan ni miau a, hriat lâwk loh thila lo innghah thui vak ka duhlo.




Kan thil eina man ka han hre zet chu ka meng kâwk kâwk mai. A vahan to rapthlâk bawk ve mawle, “A va tam ve ka lo pêk ṭawm ang che, a tam emai” ka ti chu a kut rawn vai vakin pawisa a pe zuia, kan vawikhat thil eina ringawt pawh sângngâ chuang a ni hem mai! Hetiang chuan chawlh leh chi pawh a nih loh hi.




Kan chhuah hnu te chuan ka hau mawlh mawlha “Khatiang ai chuan dawra mi lei ila mahniin siam tawh ila kan hlâwk zâwk dâwn a nihkha. Thil tlâwm tui deuh deuh kha a ṭha zâwk. Khatiang dâwrah min hruai tawh miah suh” tiin ka hau pah mawlh mawlha.




Kan thil ei kha a tam loh ngaihtuah in ka rin phâk bakin a to, khatiang te chuan kawngsira kan sanpiau leh chow vêl man lêt daih ania. Khaw kar kawng restaurant a chawhmeh tui tak tak kha tûna kan thil tlêm ei ai chuan ei ila kan hlâwk zâwk ngei ang le.




La haw mai lo in kan lêng kuala, kan hlim ve viau mai. Ni tlâk dâwnah kan haw ve chauha, ka pi chuan ka haw tlai chhan min lo zâwt ta rêng bawka. Ṭhiante nên kan lên kawi thu ka sawi chuan min hau lo hian alo aw ve maia, ka nu leh pa chuan hria sela min hau leh nasa viau ang.



Khua a ka awm pawhin a ṭul lo ah chuan ka lên an phal ngai lova. Keipawhin an bula ka awm chuan an thu hnial ka duh ngailo, tûn erawh kan in date hmasak ber na a nia dâwt sawi mai loh chuan kan inkâr lah puanzâr chi a ni dêr silo.



Zânah chuan ka rin loh lutukin sir Tetea chu a rawn lêng tak taka, phawk fe a ka lo en laiin putea te chuan an lo be vata, kan college ah an lo kal ngun bawk nên an inhre ṭha viau mai.



Thingpui lum tura min tih avângin choka lamah ka phei a, sir Tetea chu engvanga lo lêng nge a nih ka hre hauhlo. Nge ni a ka ṭhiante pahnih thusawi kha a dik dâwn tihna nge niang?


Thingpui nêna ka phei leh lai chuan pute Tluanga nên an lo titi mawlh mawlh a, hna chungchâng leh ka chungchang chu an sawi a ni ber mai. Sir Tetean lehkha ka thiam zia leh zirlai thuawih thei deuh ka nih thu a sawi chuan ka lo ip deuh chawih mai. Engvanga min fak chiam nge maw a nih le?


DUHAISAM DUHLAI ZORINPUIA S2 


CHAPTER 11 



“Enge i tih?” Vanrongura message chu ka chhûngte bula ṭhut pah chuan ka ena “Hei in lêng ka neia, ka ṭhu chhuak a” ka ti chu “Tu” a rawn ti ringawta. A rawn thawn tâwi dânah a lungawi lo tih ka hrethiam nghal mai, a âwm ve tho. Bialnute mipa dangin an rim tih hriat chu a nuam miahlo ang.




“Sir Tetea ania, ka beisei lâwk pawh a nilo. A rawn lêng thuta” ka ti ṭha ve maia. A seen nghal zat mai “A ngaizawng che a nihchu, be ṭha hauh suh.” a tihchuan ka nui deuh saka “Biak ṭhat loh chi a ni hleinem, kan class teacher a nia” ka ti leh chu a seen a min chhâng tawh lo.




Chutah rei pawh a nilo kan kawngkhâr chu rawn inhawngin a school bag nên Vanrongura chu a rawn lang hlawla. Keini ho chuan phâwk hra hian kan lo ena, keimah tak pawhin mak ka ti. Chutia a rawn lang hlawl chu ka beisei pha miahlo bawk.




“Pi, u Sangpuii a hman em? Lehkha min zirtir rawh se, ka thiam theiloa. Nilaiah ka test dâwn a, ka rawn pan tawp ania, ehe! Kha chu an teacher kha a ni lo'm ni? A zirlaite a rîm vêl elo? Mak ve” a rawn ti chu kei ka lo ip ru chawi chawi mai, a thusawi dân chu ka pite tân chuan naupang chhe thusawi a ang anga, keia tân erawh a thusawi dân chu ka hrethiam kur bawk sia, a thikin sir Tetea chu tihzah a tum tih ka hria.





“Aw a, a la upa bik hleinem. Hei i u Sangpuii a rawn rîm a nih hi, chutia lehkha zir i duh te chuan a room-ah khân lo va zir leh mai rawh u. Tetea pawhin i hrethiam ani ang chu, hei kan naute ang a ni ve si a, kan buaipui loh chuan” ka pi chuan a lo ti a.




Sir Tetea pawh za lo tak hian a nui suk suk mai, “Ni e zan dangah lênna hun a la tam a lawm. Zir phawt rawh u, hun kan la ngah tho a lawm, Sangpuii chu i thingpui lum pawh a tui khawp mai. Hmelṭha thingpui lum chu a lo tui zual a nih hi, a nih leh ka haw phawt ange, naktûk zânah ka rawn lêng leh ang chu” a tihchuan keipawh chuan ṭha tak chuan ka thlah ve maia.




Vanrongura lo ner nûng nûng chu ka hmuh hmaihlo, a ner hmêl pawh a ṭha tho mai. A mah a no in a hmai a fai vêng reuh bawk nên rawlthar hmelṭha deuh tihtur hi chu ani chiang a lawm.



Sir Tetea a chhuah hnu chuan Vanrongura chu a nui vur vur mai “Pi khatiang mi chêr lutuk kha u Sangpuii pasal atân in duh em ni? A in nghahna tlâk dâwn loh e, keite hi min duh zâwk lo em ni?” a ti chu ka lo melh ngheka, ka chhûngte erawh chuan a thusawi chu an ngai thutak lo tih hriat tak hian an nuihpuia.




“Ngura mai mai ṭhin hi a, hna te han nei ve phawt la i u Sangpuii aia ṭha daih pawh ila hmu ang chu. In la naupang a, tûnlaiah chuan hna nei chu an iaiawm tawh hleinem. Hmêlin zir lo mahse hna an neih miau chuan hmeichhia te pawh hian an iai hauh lo ania, nang phei chu i hmêlṭha bawk si a, i u Sangpuii te chu eng a nih loh hi, i u Sangpuii aia hmêlṭha leh chhelo in an la rawn bâwm hut but ang che anga, Sangpuii te chu i duh tawh tawp nâng” pute Bawiha chuan a lo ti ve hluta.




Ka pi leh pu pawh an nui ve hak hak mai “Ka duh reng, u Sangpuii aia hmêlṭha tihte chu ka la nei miahlo. Hna ka neih veleh min neih tir angai ang” tiin a nui vur vura, ka pi chuan a bêng nghal taih taih mai. “Khatiang lam ngaihtuah thei pawh ila nih loh kha, i tlangvâl ve dâwn dêk dêk a, i lerh riau mai nang hi a hun hma te hian chite ilo thlah riau riau ange” ka pi chuan a lo ti mawlh mawlha.




Thildang an sawi tam hma chuan ka room-ah chuan ka pawt lût zui rawk rawka, mâwl thei lutuk. Putea te an awm ve leh nghala, an hrethiam ang tihte ka hlauh mah nak alai, hahthlâk thei lutuk.




“Tinge i rawn kal? Lehkha zirtir i duh tak tak vâng a nilo tih ka hria a nia” ka tihchuan a bag chu ka khumah theh thla in a dâr a sân uk a, “Chu ka chhân che ngai lovin ka rawn kal chhan i hriat reng chu, sawi tawh a ngai hleinem. Khatiang hmelṭha satliah kha i duh ve reng reng em ni? Engtin nge a rawn lên theiha? Nang hian ilo duh ve te hi a nilo maw?” a ti chu a dârah chuan ka bensak zui zawta.




“I mawl emaia, ka duh vâng pawh a nilo. A rawn lêng dâwn tih ka hre hleinem, nidangah pawh kan in be ngailo. Vawiinah khân kan in awmna min zâwt a, a rawn lêng ringawt a nihkha” ka ti chu a hmui chu a ti kawi deuh nawka. A pawm hmêl tehchiamlo.




“Hnaih hauh suh ang che, i chhûngte lah khân an be ṭha nasa mai si a, ilo nei riau riau ange. Ka nupui tur i nih hi hre reng rawh” a rawn ti chu ka en reng ringawt, chutiang thleng thleng chuan a lo hmu thiam ve ang tih rinngaihna pawh ka hrelo.



“Ka duh ve hleinem, ka duh lo chung chu min neih tir lovang, bâkah pasal nei tur chuan ka la naupang lutuk ka duh teuhlo” ka ti chu a thaw huai reuha. Chutah min rawn kuahin ka nghâwngah chuan a hmuiin a rawn nawr vang vanga, a awmdân chu hahdam tuma min rawn pan a ang ber mai.





“Ka ngai che, chuan khapa kha ka thik hle bawk. Mipa in an rim thu che hriat hi a nuam miahlo, keichu ka la naupang si a, min nghâk theilo hian mipa dang i nei daih ang tih te ka hlaua, chutiang a thleng a nih vaih chuan ka tuar thiam kher angem ka hrelo. Ka nupui ni turin ka duh che a, mipa dang an inrawlh hi ka remti hauhlo ania” tiin ka rim chu hnîm ni âwm tak hian a hnar chu a lên vat vata.




“Chutiang a thleng dâwn lo, ka duh ve lo ka tih tawh kha. Tirawh lehkha chu zir ang, test in nei dâwn a ni lo'm ni?” ka ti chu awmsawnin a nui vur vura. “Ka chhuanlam mai mai a nihkha, naktukah kan result a chhuak tawh dâwn a, pakhatna ka nihchuan i thutiam kha i la hre reng emaw chu? Ka duh duh min pêk i tiam kha” a tihchuan ka nui haka.




A va han hre rei thei bawk ve, “Aw le, ka hria alâwm, awm ṭha teh ang. Lehkha zir i duh kha” ka ti leh chu a tum hmuka “Ka ngai bawk lo, ka rawn vêng che anih hi. Mipa dang rim mai mai che ka phallo, naktuk zânah pawh ka rawn kal leh ang” a tichu ka en reng ringawt.




“I lerh dâwn tlat, i lerh ai chuan ka vêng zel mai ang che. Ka bialnu i nih hi, mipa dangin an rîm mai mai che ka duh lo, ka ta chu ka hauh ṭhin” a ti leha. 



“I mak” ka ti chu a nui suka “Ka mak reng a sin, ka tân chuan thil hi mak lo a awm lo. Nang ka duh che ringawt pawh hi ka tân chuan thil thar, ka la tawn loh thil ani. Mahse nang i ni a, ka pawi ti lo, ka bialnu i ni hi ka lâwm viau bawk. Chuvang chuan mipa dangin an hnaih che hi ka duhlo” a tihchuan ka nuih ringawta.



“Nui ringawt suh, i bialpa in thu ka sawi anihchuan ni e te lo ti ve rawh. Khatia nui hui lo khân. Ka thutak  teh ania, khatianga mahni zirtirtute lo in rîm tir kha ka duh miahlo. Mipa dang hrim hrim hnaih ka phallo ania aw” a ti bui buia, a hmêl tûm hmuk leh lungawiloh pe na lutuk chuan mipa naupang min hriat chhuah tir lo theilo.



“Aw le ka hria e, ka lo fimkhur tawh ang chuvang chuan khatiang vâng mai mai chuan thinrim lo la. Nula ka nia, rim chu ka thiang a lawm, lo hnar ringawt ila ka thang mawi lo in ka mualpho theihna a ni tlat. Pasal ka la neiloa, inlêng ka hnar a nihchuan mite min ngaihdan tur ngaihtuah tel ve la, i bialnu ka ni tawh tho a, midang chuan min rim pawh nisela ka hawi ve dâwn pawh a ni miahlo bawk” ka ti chu a thaw hak mai.





Hmeichhia te kan mualpho hma zia leh kan zalen loh zia hi a hre ve lo emaw ni. Kan sir hi han hnar chiah ila engtin nge min ngaih anga, engtin nge min sawi zui ang ka hre miau siloa, ka tân pawh in lêng han hnar dawt kha a mawilo ve em bawk ani.




“Ka hrethiam alawm, mahsela ka thik tho tho. A beisei theih turin awm lo la a nimai, ka la naupang si a keiai i thlan te ka hlau ve tho a lawm, ka thik tawh lo ang, ka hrethiam e. Mahsela bialpa i neih thu hi hre tal rawhse, i chhûngte i vêng thâwng tih ka hre reng, mahsela mipa dang beisei theiha i awm kha ka duh miahlo” a tileh chu a biangah ka piai sak nawk nawka.




Ka kut chu rawn dawm betin min mutthlakpuia “Min naupang chhe chei ziah suh, kum 18 kum tâwp lamah phei chuan kum 19 nimai tawh tur ka nih hi, khawi phone en ang i phone kan en ang. Mipa dangte hi ilo melh em?” tiin ka phone chu la in WhatsApp ah a lût a.




Ka message seen loh awm thla dal chu enin a ner nûng leh tawha. A mit a chuar nasat dânah a thik leh tawh tih a chiang reng “I va lerh ve” a rawn ti leh hluaia, ngawt ṭhin hian. 




“Enge ka lerhna ka seen miah loh kha aw” ka ti chu “Kan thlalâk hi hman angai a nih hi, i dp ah min hmang ang che” a rawn ti bung nghuta, a chiloh lutuk “I â mi? Ka chhungte'n an hmu che anga, min hau a nimai. Keiai naupang i nih hi hre ta che” ka ti chu a thaw haka.



“Khawi kan kut tal hi insuih ila, chu tal chu kan dp ang. An hrethiam awm lo emai” a tihchuan ka hnial duh tawh biklo, a thikthu a chhe ve bawk si a a duhzâwng ang chuan kan awm poh a niang chu.




Kan kut chu insuihin dp ah chuan kan hmang dûn ta renga, chutah ig ah chuan lûtin reels chu ka en puia, kan nui leh hak ṭhin. A âwm ka nghêng ar ara, a lum thar thar mai. Pâwnlamah chuan ruah a tla leh cherh cherh tawha, kan awmdân chu a romantic viau mai.




Chutah hmeichhe naupang pathum Siampuii Ralte leh Lil kiki MIN CHHAN LOH HMÊL  tih hla play chunga zei zet zeta rawn reels chu ka en fuh pui peka.



“Awi awi awi, an hnute pawh a la ûm dâwn em ni? An thak hawr hawr zia kha, tûnlai naupang ho zah loh zia hi, aia ute tih ngam miah loh rawn ti ngam lah an tam, kum 13 leh kum 14 te'n hmangaihna an rawn ti langa. An in chuk piap piap ngam tawh ania, an chhûngte hian an hmu ve lo nge mawni, ka fa chu nise ka vaw hrep tawh ang” a rawn ti bul bula.




A en ngur mai bawk nên ka nuih a ti za viau mai, a sawi dik ve tho bawk sia. Kum 14 tê tê in hmangaihna thuril tak tak an rawn posta, an kawppuite nên an awm dûn laite an rawn post ngam bawk nên Vanrongura thusawi chu a dik ka ti ve tho bawk si, ka nuih a za bawk sia ka nui ru pât pât ringawt.



“Nangpawh ila upa hleinem” ka ti chu a la na ngang nge mawni min sik deuh hlawka, ka au ṭhat mai. A mi sihna chu a sa na vung vung thei “Mawla engah nge min sih ringawt? I â emai” ka ti chu lungawi loh hmêl fe hian min en leha.




“An ni ai fe chuan ka upa tawh aw, nakumah phei chuan vote ka nei tawh dâwn. Kum ka tling var var tawh, ngaihzâwng ka nei thei tawh tihna, khatiang te chu an hapui pawh a la ṭo kim nâng, tikhan a hun hma in an thak em em a, mipa in be mawilo deuh se ṭhenkhat in an lo ṭan khaw mawi leh anga. Mi comment mawiloh kan duh loh hi chuan mahni hian nun uluk rêng tur a sin, Mizo hmeichhia pawh sexy tak takin mipa comment duhin ig ah in in post-a, mipa chuan kan it ta rêng cheu a, in in post dân amilin han bia cheu ila FIR in ti leh sek a, dân hian a hum lutuk cheu a, nundan hrelo hi hmeichhiate ah hian in tam phah anih hi” a ti leh hrep mai.





A thusawi chu ka han hnial dâwn viau na in a sawi dik ve tlat, hmeichhiate hi dân hian min hauhna lutuk tih hria in hmeichhe ṭhenkhat hi chuan eng emaw hlekah FIR kan han ti nghal zela, keimahni sexy tak tak a kan in post ngam miau chuan mihring kan in ang lo a, kan rinna leh kan sakhua nên kan nundan millo in kan awma, mipa min be eng emaw deuh an awm leh kan haw leh em ema, a dik chiah zâwk, mawilo takin mi mitla turin kan in post a, mawilo taka comment tu erawh kan hmu leh thei miahlo, chutih rual erawh chuan mipa ṭhenkhat erawh mawilo taka in post pawh nilo hmeichhia an nih an hriat avânga biak tenawm hmang erawh an awm ve tho bawka, kan khawvêl tenawm chho zêlin a ken tel nimaiin ka hria.




“Khatiang pâwl te chu an awm ve tur alawm, tupawh hian fak nih nuam kan ti a, mahsela tûnlaiah chuan followers ngah leh like leh comment tu ngah kan duh luatah ṭhenkhat chu kan kal sual fo reng ania, sawi tawh lo teh ang. Kha i mood a kawi zo dâwn thil dang en ang” ka tih tâkah chuan a ngawi veleh mai bawka.



ZAWMNA...


“Vanrongur min thlah teh, ka piten kan thâwm an hria ange aw” ti a namsawn leh ka tum chu ka kut chu vuan betin ka room chhûngah chuan min nawr lût a, hauh tuma ka kâ ka âng chiah chu ka hmuiah a rawn fâwp buan buan mai. 




Ka thaw chham lek lek khawp chuan a ni min fawh ni, ka hnar tumna chu engah mah a ngailoa, ka chhâng lêt lo chung pawhin min fawh-na a tâwp hek lo. Ka biangah chuan rawn dawmin ka hmui hnuai chu a pet ner nera, a na lek lek lam mah a ni.



Ka chil ka lem khalha, min fawh-na chuan min ti danglam tial tial tih ka hailo “Bawihi i mu hil tawh em ni?” ka pi chuan ka room kawngka rawn bêng dat data a rawn tihrual chuan Vanrongura pawh chu min fawhna thlahin ka kâwngah a la vuan tlata, kei erawh ka thaw chham lek leka min fawh avangin boruak ka hip lût kâwk kâwk thung.



“Aw...ka chau deuha,ka mu tlâng....mai ang” ka ti bah niaia, ka la pângngai theilo. Hepa lah hi ka bulah a awm reng bawk si a, thâwk pângngai a thawk chu har tak a ni. 


Ka pi chu a kalsawn zui a ni ngei ang a thâwm ka hre ta lo “Phei vat rawh, nangmah avânga ka chhungte'n min ngaih dik loh ka duh hauh lo ania, khatiang kha ti tawh” ka sawi zawh hma hma chuan a hma ang bawkin min rawn fâwp leh hmiaha.




Hepa hian thaw chhama min thih tir a tum tak tak nge mawni, ka hmui chu na deuh tak hian a peta. A thip leh zawk ṭhin, ka mit khap fak fakin a âwmah chuan ka nêm ṭai ringawt. 


“Ka duh lutuk che, ngaihzâwng i neih pawhin a pawi ka tilo. A ni ai chuan ka duhin ka hmangaih thei zawk ang che, min hnar tum mahla min hnar thei dâwn lo” tiin a hma ang nilo in dam raih hian ka hmui chu a fâwpa,  chutah ka mit, ka chal leh ka hmai velah chuan a chuk kual dan dana.




A chêt dân chuan min hnehin ka mit ka chhing tawpa, hetianga awm pui tur ka nilo tih ka hria. Mahsela engmah ka ti theilo, a chêt dân chuan min hnehin ka la tawn ngai loh mah ni sela ka danglam hneh viau tho si.



Ka hmuiah bawk chuan dam raih hian a rawn fâwp leha, ka chhâng lêt lo thei ta lo. Ka hmui chu ti che ve in a kawr âwma ka ṭhâmna chu ka ti na sauha, ka chhâng lêt tih a hriat rual chuan a duhthawh sawt lehnghâl.




Ka taksa chu vawt tih vâng nilo in a khûr der dera, a chânga thawk kan la ri tih loh chu thâwm hriat tur dang a awmlo. 



Chutah ka âwm a rawn khawih chu harh chhuak zawkin “I zaktheilo” tiin ka bêng sawn nawlha. Ka thusawi leh awmdân chuan a nuih a tiza nge a nuih deuh hawka, chutah insiam remin khumah chuan innem khalhin min en vung vunga, kei erawh kan awmdân avâng khân ka la lâi ṭut mai.




“Tikhan min duh lo i in ti thei tawh lo ang, keichuan ka âwih tawh dâwn lo. Ka ta i nih theih nân chuan engtianga rei pawh nise ka nghâk dâwn che, tin ka duh dânin ka che bawk ang. Min dang thei lovang, i duh dâna ka awm tir che chuan ka chân thei che tih ka hria a, chutiang tihna hun leh midang ta i nih theihna tur hun siamsak che ka tum tawh lo” a rawn ti tawla.




“I mak emai” ka ti ringawta, sawi tûr a bar pawh ka hrelo. Ka lo chhâng lêt ve bawk nên khâ khân min ti zâm vek a ni ber mai, Jeremy-a khân min khawih thei hauhlo, mahsela hepa ve thung chuan a duh hun hunah min khawih thei ni berin ka hria, chu pawh ka inring hman ngai meuhlo.




A naupang zâwk si hian ka lakah a chêt dân hi mipa puitling tak a duh zâwng ngampa taka tih mai duh mi a ang ṭhin.



“Ka mak i tih pawhin a pawilo, ka naupang tih kha sawi tawh lo bawk la. Naupang ka ni tawh lo, tin keiai i hniama, i hmêl pawh a naupang zâwk daiha. Kum tlêm te in i u a nimai, tlêm tê” ti duai kher hian ka bulah chuan a rawn ṭhu hnaia, chutah min kuah lehin ka nghâwngah chuan a hmai a phûm a.




“Ka ngai che, ilo haw har lutuka ka rawn kal ve ṭêp a ni. Rawn haw lo la chuan ka rawn kal chilh duh hial ang che” a rawn ti supa, min kuah nghet sauh bawk. A thusawi chuan engtin emaw tak nuam min tih tira, helamah nghakhlel tu ka nei ve a ni tih ka hriatna chuan min tihlim bawk. 




“Nuam i ti viauin ka lo hria a sin, hmeichhia leh party tih vêl kha nuam i tih hmêl riaua. Tûnah pawh midang bialpa i nilo ang tih pawh ka sawi theilo” ti a namsawn ka tum chu rang zet hian min delh beta, a rit bawk nên ka tâl thei der lo lehnghâl.




“Khatiang kha sawi ve ziah suh, ka duh vâng a nilo. Bialpa i neih thu i sawi khân min tihnat zia i hrethiam pha lo ang, hmeichhia chu ka lên chhuah pui ṭhin ngei a lawm. Mahse tûmah ka tawk ngai hauh lo ania, khatiang zâwng kha chuan min ringhlel suh, a fawh pawh ka fâwp lo, duh ni ila chuan khawih tur chu ka hmu ṭeuh, mahsela nangmah lo chu ka duhlo” a rawn ti bul bula.





A ṭawng dân chu mipa naupang lungawi lo zeta a dikna sawi tum hi a ang ka tia, ka nuih a ti za lek lek mai. A hmêl tûm buau reng chu ka ena “Kei nêna inzawmna neih chu i duh em ni? Nang ai ka u tih chu sawi nawn ngai lo in a chiang sa a, nakin thlenga kan ngaihtuah tel ve te a ngai ania, tûnah tleirâwl ât thil mai mai avanga inngaihzawn ka duh ve lo, keichuan ka damchhung kawppui tur ka duha. Keiai naupang ngaihzâwng tur phei chuan ka la in dah chhin ngailo, nangpawhin min duh emaw i inti mai mai aniang” ka ti chu lungawi loh hmêl tak hian min ena.




Awmsawn deuhin khumah chuan a ṭhu ṭha a, a ngal sei zet chu chhuatah nghat thla in a ti kak duaia, ka thusawi chu ngai pawimawh vak hmêl pawh a pulo “I ṭhiannu leh ka ṭhianpa an inngaizawng tih i hria tiraw?” a rawn ti leh tawpa.




Bu nghat hian zawhna nên ka en pheia, “An ni pawh an inngaihzawn theih chuan engvangin nge kan theih loh bik ang? An ni pawhin kum inthlauh avângin buaina an nei chuang hleinem, kan rilru leh thinlung a pawimawh ber. Keichuan ka thinlung zawng zawngin ka duh che a, i bialpa nih ngei pawh ka tum, ka beidawng bawk lo ang” tiin a nui suka.





Tihngaihna hrelo zet hian ka en reng ringawt, a luhlul bawk si a han hnial dân tur vak ka hrelo a ni ber mai. 


“Chuan bathlar aṭang chuan ka zuang lêt peih tawhlo, ka kut ana tawh. A vâwt bawk si, ruahte hi a sur dawn” a rawn ti nghal zuah zuaha, a sawi ang tak takin fur a in ṭan a, ruah a sûr zawm ve deuh reng tih theih a ni. Tûnah pawh thli a rawn thaw vuk vuk tawha, a sawi dik ve tho mai.




“I mâwl em ni? Heta ṭang chhuak la ka chhungte'n min ngai dik lo dâwn a sin, i mâwl lutuk. I rawn kal dâwn ah pawh i zuang theia, zuang lêt leh mai rawh” ka tichu ner nung hian min ena, “Ka thei tawh lo, ka bân ana tawh. Hetah ka riak dâwn ka ngai che” a rawn ti chu a hnungah ka bêng nghal thlawp a.




Mâwl lutuk ngaihtuah loh tawp tur a nihchu “I mâwl em ni? Nupa nilo a riahdun ka duh teuhlo mai, va haw rawh a mawi pawh a mawilo, ka chau ania ka mu duh” tiin ka ner nâng a, chuveleh ka bulah rawn ṭhu hnaiin ka lu chu a rawn hmeta, khumah chuan khum lu bang nghenga ṭhu awn duaiin “Min lo nghêng rawh” a tihchuan muangchang chuan ka hnaiha.




Ka motor chuang ka rawl bawk nên chutia min hmet chu ka pawi ti lêm lo, ka mamawh tak a ni bawk. Ka lu leh dar vêl chu a hmet kual a, puan chu sin ṭha sauh sauhin ka mit ka chhing diar diara.





Mi hmeh lah chu a thiam zek lehnghâl, ka thaw sak saka. Engtik laiin nge ka lo mutthilh ka hrelo, zân reiah ka harh chu fel than hian khumah ka lo mu a, mahsela kuah bet tu ka nei tih ka hriat rual chuan ka hawi chhuak vata.




Vanrongura tui zeta lo muhil ka hmuh chuan ka âng pam mai, a lo haw tawh ka ring ania. Mahse a riak tak tak a nih tawh ber hi, ka thaw haka “Engtia tihchi nge maw i nih le? I luhlul bawk si a, tûnah pawh ka khumah i mu der chu a nia, i thu i duh dâwn a nih hi, i hnar theih miah dâwn loh” tiin ka phun sepa.





A hmêl chu chiang takin ka en renga, a mithmul pir sâng chu ka mithmul ni se ka ti. Mipa hi chu makeup tello hian an hmêlṭha em em tho a, in chei mawi chawp an ngai ve lo, makeup tello a an hmêlṭha sa lutuk pawh hi tuiral pui tham chu an ni.



Hmeichhia erawh makeup nen lo chuan kan confi tawh meuhlo, khawiah pawh chhuak dawn ila makeup kan in bel phawt loh chuan kan chhuak theilo emaw tih tur a ni. Mipa erawh an ni ve lo, an hmai an phih tlawnga, an thawmhnaw hâk chu thu hran ni sela engpawh hi an mawi pui em em zel tho.




A hnar zum sâng chu ka khawiha. A lo vawt thlar mai, pâwn lamah chuan ruahsur nasa tih hriat takin khawpui phe zawr zawr nên ka tukverh aṭang chuan a lang chiang hle bawk. Khaw vawt deuh vur avâng chuan Vanrongura pangtilum chu ka hnaih sauha, a muhil tho tiin ka kuah a.




Ka ke vawt chu a kap karah rawlh lût in ka nui var vara, a tira ka hnar nasat nen tunah chuan hnar theihloh khawpin ka khumah hial a riak chu ania. Hmeichhe khaw lo lutuk ang chuan min ngai em lovang chu maw?


A âwmah chuan beiin ka mit chu ka chhing leh riai riaia, ruah sur nên chuan ka mutui lo theilo. Ruahsur hi chuan mut hi nuam ka ti ber mai.



Zîngah Vanrongura thâwm avâng chuan ka harha, a lo che sut sut mai. Chutia ka harh tih a hriat rual chuan a rawn hawi vata, a sam chu mu nasa tih hriat takin a thur sanga, a inhmeh phian lehnghâl. A hmêl chu a sexy zual, ka lamah rawn phei lehin “Muhil leh rawh, ka phei tawh ange khua a var ṭep” a tihchuan mit ti zîm sanin pâwnlam chu ka ena.




Ruah chu ala sur charh charh renga, ka en nghal ha mai. Ruahsur kâra a phei chuan a chêt sual ka hlau a ni ber mai, ka ngaihtuahna chu a hria nge mawni min rawn hnaihin ka inrin hma chuan ka hmuiah a rawn fâwp leh zauha.



“Min ngaihtuah suh ka ngaihtuah awm loh, tikhan awm la chhûnah midang rualin ka rawn lêng leh ang” tiin a chhuak zuia. Keipawh chuan engmah sawi tawh biklo in ka muthla zui leha, a che sual êm lovang chu maw?




Ka thawh chhuah leh meuh chuan ruah chu a lo han duak tawha. In phih harhin pâwn lamah chuan ka chhuaka, sarep chhum rim alo lêng ham ham mai. Sakhi sa rêp kha an chhûm a nih ngei ka ring.




Ka nute bia in kan titi liama, ka ngai lehnghâl der mai.

 
DUHAISAM DUHLAI ZORINPUIA S2 



CHAPTER 12 




“In rawn chhuak thei hrâm maw?” college gate pawn kan thlen rual chuan Vanrongura te ho chu an lo awm ṭhap tawha. A hmêl en sar dânah a result a ṭha anih ka ring nghal bur bawk, keipawh ka hlim topper ka ni leha, ka lâwm takzet.




Ka nu leh pa leh ka chhûngte ho hrilh hun mawlh a ni ka nghahhlelh leh ni. Ka pa phei chu a lâwm leh dâwn tih ka hria, ka hnathawh a phal loh avângin lehkha ṭha taka zirturin min ti ṭhin a, keipawhin a thu hnial ka duh ngailo, nu leh pa thu awih rah chu tûnah hian ka seng chho zêl niin ka hria.




“In result enge?” an rawn ti hmasa chu ka ṭhiante pahnih chuan an lo sawi zung zunga, an ni pahnih pawh an ti chhe lêm lo nângin an hma ah midang an awm nual thunga. “Ka ring rênga, i tihchhiat kha a tir aṭangin ka ring lo hrim hrima. Tûnah chuan pakhatna ve ve kan ni si a, dâwrah thil ei ho a ngai tlat” Vanrongura chuan a rawn ti a, midang lah chuan pawmpui tih hriat tak hian phur zet hian “Kal vat ang u” an la ti zuia.





Ka nui ve tawp, ka hnial duh lêm lo. Result ṭha tak kan nei chuan lawm ve te pawh a phu a lawm, kan vai chuan restaurant lam panin kan inzui diah diaha, a hla lêm lo bawka tlân chhûng a rei lo viau mai.




“I ei leh ṭeuh dawn em?” Vanronguran a rawn tihchuan ka melh zawka, kawngsira midang rawn kal ve chu en phahin min rawn en ve leh a. “Ei ṭeuh dawn” ka ti chu a nui deuh hawk hawka, enge maw ni ei ka theih avâng hian ka zah phah teuhlo mai.




Ei theia ka awm hi ka lâwm zâwk, keimah han ṭhangin han lian hluai lo mah ila ka thil ei tui em em hi keichuan insûm mai mai ka duhlo. Ei theia ka awm lai hian ei ṭeuh ka duh zâwk, ka san zawngah han kal lo mahsela ka thahrui tal a tihchak phaha, eiin insûm hi ka duh ngailo hrim hrim bawk.




Dawr chhûngah chuan lûtin dawhkân pahnih kan kila, kan duhzâwng chu kan lam nghal sap sapa. Kei hi chuan sa lam leh noodles lam hi ka ngaina bera, chutiang chu kei chuan ka chaha, Dsa pawhin ka duh ang chu a ei ve duh thu sawiin ka chah ang kher chu a la chah zuia.



Ka hau duh lêm lo, engkimah ka duh ang zela awm a tum tih ka hria. “In ngaizawng leh bik mai mai, vawiina kan thil hmuh kha kan sawi dawn em?” tiin Timothy-a chu a rawn nui vur vura, a eng tak chu tawng leh bik ang maw? 




“A ṭul mai mailo” Dsa chuan rang zet hian a lo ti a, min ti hre châk deuh deuh lehnghâl. A hmêl awmdân zawng zawngah hian thil eng emaw a ngei zâwng deuh thleng a awm anih ka ring bur bawk, chu chuan ka beng a luha, ka hre châk lutuk tlat.




“Sawi teh u, engthil nge a? Thuruk nei tawh suh u kan tih tawh kha” ka tihchuan an nui leh haka, Thanzuala ber chu rawn inher rem sawk sawkin “I bialpa hi maw Lalmatea'n a melh si li kaw a” ti a an nuih vur vur lai chuan ka lo man chiah lo nên ka ṭhiante pahnih lam chu hawiin ka nui hai ringawta.





An thusawi awmzia chu ka hre chiahlo, tunge Lalmatea pawh chu ka hre chuang lo. “I hrethiam lo a nimaw? Kan class a kan tuai chhuanvawr in a star a, vawiinah pawh a kuah chung chung mai mawle. Dang lo ila chuan i bialpa hian a hnek duk leh chawrh tawh ang chu” an rawn tih leh tâkah chuan ka hrethiam ve ta chiaha.





Ka nuih a za vaklo, hmeichhe ṭhenkhat angin tuai hi ka kâwm ngeih ve lêm loa. Hnaih pawh ka duh hek lo, kan tunlai khawvêla tuai pung ta hluai te hi hmeichhe ho hian kan kâwm ṭhin bawk nên an thlavang kan hauh nasa lutuk hi a nih ka ring.



“Sawi tawh suh u, hetiang Pathian siam ang pawha awm theilo. Hmeichhe ho lah hian han sawisêl ila an thlavang in hauh ve ang tum hranga, a hma zawng zawng pawhin an tuai loa, tûn hnu tuai vawrhlar an hrât a chinah hian an rawn pung chauh zâwk a nih hi. Hmanlaiah tuai an awm kan hre ngailo, an nun ania an thu thu te hi an han ti a, an thih hnuah an thu thu a ni tawh emaw chu. Siamtu siam dân pawha awm theilo chu engah nge ka lo dim dawih ang ni, filmah lah nise tuai rawngkai tello in kan Mizo film siam ṭhin te lah hian an siam thiam tawh lo nge an film siam a piang deuh thaw ah tuai tuai mawngkaw hur tireng ringawt mai, a sawi pawh sawi suh u. Min ti buai leh vaih teh se ka hnek hrep tawh ang” Vanrongura chuan a tihluk hluka.




Hmeichhia mah ni ila a thusawi dân chu ka haw lêm lo, a dikna chen a awm tlat. Mizo mipa phei chu hmeichhia ai an tlêm thu an sawi an sawi laia, tuai kan lo pung chak lutuk leh hmeichhiate'n an thlavang kan hauh tlat ṭhin hi kan kal dik ka ti bik miahlo. Ṭanin an thlavang hauh tlat lo ila heti em em a tuai ho hi an huang tau ka ring miahlo bawk.




“Sawi tawh lo teh u, sam sei hnuangin an la putar anga a nimai a lawm. An kapa awm pawh a ngai reng dawn a, an pianphungah an lungawi loh ang chiahin fa pawh an hring ngai dâwn siloa. Keini tân lo buaina tur a awm lo, hmeichhia te pawh kan in enfiah an ngai, mi an pianpui an pianpui kan ti a, mahsela Pathian hian tuai tur hian a pian tir hi an tam lo khawp ang. Mahni pian phung ah lâwmin mipa anga awm tum tlat sela an thei em em ang” Marami chuan a rawn ti charh charha.



Midang chuan an lo bukpui nghat nghata “Nang heidemriali nge nge, i thil thlir dân pawh a ṭha ṭhin e” Rochhungan a lo tihchuan kan lo nui hak a. Marami hi huat thu lo ah UPC ania, tûnlai mite'n kan runluih peih zia hi an rilru a zau ka ti ṭhin.



“Nang keini ho hi hremhmunah kan tlâk i ring ve em? A chhan chu in kohhran lo chu hremhmuna kal vek tura ngai ṭhin in awm sia” Rochhunga bawk a ni. Midang chuan lo khap eng ang mah ila kan in khap hlei theilo.



“I hnar lian kha a nih mai chu a, chutiangin kan ngai vek kher lo. I hriat mi te chuan i mâwl lutuka an lo bum mai mai che a nihchu. Mi mâwl deuh chu bum ve zel in ngai, Pathian thu zâwma a duhdâna awmte an kai ang, inkhawm tam avâng kher te kohhran avangtein tumahin vanram an kai dâwn lo. Ngawi la chêngkawl ini mai” Marami chuan alo ti hlaka.





Kan lo nui leh hak mai “Ṭawng la ar mawng i ni ve mai” an pahnih chuan thil ei pahin an inhnial char char a. Midang erawh an inhnial tâwk thei lutuk chuan min nuih tir leh hak ṭhin, “I ṭawng theih lutuk vâng em ni Rochhunga an tih che, i chhûngte tân chuan ṭawng theih lamah an rohlu tak kha i ni ve dâwn sia” Marami bawk a ni.





An pahnih chuan tehkhin thu dik deuh deuh hmang chuan an in kâp char chara, kan lo nui leh dar dar ṭhin. Thil kan ei zawhah chuan a man in chawi ṭawmin kan inzui chhuak leh diah diaha, “Leng ang u, kan ride leh mai mai dawn ania”  tiin kan inzui liam diaka.




Falkawn lam thleng thleng chuan kan ride a, khaw pâwn hmun theng thaw laiah chuan ding ṭhapin ni tla tur chu kan thlir liama, ka pi leh pu ka hrilh tawh bawk nên chutia lên rei chu ka inthlahrung duh lêm lo. Ka lêng chhuak khât êm a, an ni pawhin min hrethiam ve ngeiin ka ring bawk.




“I thutiam kha i hre reng ang chu tiraw? Pakhatna ka ni bawka” ka beng bul rawn nul thuak thuak pah chuan a rawn phun sar sara, ngawi rengin ka lo bu nghat nghata. Ka nui leh ver ver ṭhin, hetianga ṭhianhoa han lên ho dial dial te hi a nuam a nih hi.




“I va ngawi chawi ve, dik lo a awm te chu ani êm lo maw?” a rawn ti leh chu ka lu ka thing nar nara “Chutiang a nilo, hetia han lên khawthawn ve te hi a nuam ka tia, boruak ka hip duhâm deuh a nih hi. Engmah diklo a awm lo, ka hlim lutuk zâwk” tiin a âwm chu tawlh hnung deuhin ka nghêng data.




Min lo kuah vatin ka dârah chuan a khabe a rawn nghata, kan ṭhiante erawh kawngthlang thingkunga fanghmir bu lianpui chu an in vawm siaka, a awmna a hla deuh bawk nên an vawm fuh hlei thei lo chu an in nuih leh vak vak ṭhin a, kan tam lo nângin kan bengchheng tham viau mai.




“A mawi hle mai, vânglai te hi engtikah emaw chuan kan la pêl anga. Kan la tar ve dâwn si a, tûn ang reng hian kan awm thei âwm silo,” tiin hmalam chu ka thlir vang vanga, tlâng hrang hranga khaw lang iar te chu eng khua nge an nih hre lo mah ila eng emaw ti hian lung an ti lêng veng venga, suangtuahna ramah ka chêng veng veng mai.




Nakinah mihring kan tam tial tial anga, kan fate'n fa an rawn nei veleh zel anga, chûng kan chhuan lo awm turte hunah meuh chuan Mizoram pawh hi engtin emaw tak a danglam ve tawh in ka ring. Tûnah erawh ramhruaitu ṭha tak kan nei theilo bawk nên a ngai pât a kal reng a ngaia, hmasawnna hmuh tur a awm meuh lo chu a nih hi.




Mi ram ang hian hruaitu ṭha leh ram hmangaih tak chu nei ve ila chuan hetiang em em hi kan ni bik hian ka ringlo. Mi ramah chuan an kuthnathawk te zâwkin an la lût awk awka, Mizoramah erawh kut hnathawk mite an rethei tial tial zâwk bawk si a, hetiang renga kan ram hi a kal a nihchuan ṭhangthar lo awm zêl tur te tân hian he ram hi awm reng tlâkna a ni angem tihte chu a ni ka ngaihtuah mai mai ni.




“Kan haw tawh mai dâwn em ni? A tlai ṭan riau mai” an tih avâng chuan bike lam panin kan in phur haw leh vawk vawka, kan in kan thlen meuh chuan khua a thim fel der tawha. Ka chhûngte erawhin zanriah an lo la eilo a, khawpuiah hi chuan thingtlâng angin khaw thim hma a chaw ei hi kan nei ve vak lo a, thingtlângah erawh kha chuan khaw thim hma hian kan ei deuh tlângpui ṭhin a nih kha.





Ka haw hnu lawkah chuan chaw ei siamin u Nunpuii nên chuan kan buai dûn rak taka, kan titi pah mawlh mawlh bawk. Chaw ei lai chuan pute Tluanga chuan palai tirh a duh tawh thu a sawi ta ngeia, pute Bawiha erawh a naupang ber a ni bawka la neih a tum vak lo ania'ng nula a rim ve âwm pawh hi ka hre ngailo.




Ka pi leh pu chuan an lo phûl pui hluta, palai lam tur nên chen te chuan sawiin ṭhenawmte kan hmang dâwn a nih hmela, Vanrongura pa pawh an sawi tel avâng chuan a kal ve ngei ka ring. Keipawh ka phûr ve em em ringawta, ka nute ho an rawn zin dâwn tih ka hriat avâng a ni. An bulah ka awm châk bawk nên chutia pute Tluangan nupui neih a tuma an inrem a nihchuan an rawn kal ngei dawn tih pawh ka hria.



ZAWM LEH TUR 



ZAWMNA...



“Zirzeia chu a rawn lêng leh em?” Vanrongura message ka hmuh rual chuan ka nui chhuak haka, a va han ngeiawm thei tak. Hming phuah lah chu a awlsam em em mai lehnghâl, Zirzeia a ti kher kher chu sir Tetea hian hria sela chuan a lâwm vak miah lo ang.




“Rawn lêng leh e, i pa kha naktuk zânah putea Tluanga palai ah a ṭang dâwn a, ka chhûngte pawh naktuk zân chu u ber te inah an lêng dâwn bawka. Naktuk zân chu keimah chiahin ka awm dâwn a, ka peih vak loa, ka kal ve dâwn lahin ka peih chuang bawk siloa” tihchu ka thawna.




Chutiang ka hrilh kher chu enge ka beisei pawh ka hre chuang lo, mahsela ka bialpa a nihna angin a hriat ve ngei chu a ṭha tho niin ka ngai bawk sia. 



“Ka lo lêng dâwn ania, kha zirtirtu nghal zet kha ka duh ai a huangtau mah mah dâwn tlat. Bialpa i neih thu te kha hrilh vela, ilo nuih chhelo vawr vêl ange aw, han nuih vaih teh i nui hmelchhe vek a nimai” tihchu a rawn thawna, eng vanga nui hmelchhe tûra min ti nge maw anih le? A ni hi mi hnek duk vek te hi a lo tum reng nge.




“Engah chuan nge ka nuih hmelchhiat kher anga? Ka nuih ve bawk lohin, tûm hmuk te chu ka duh hleinem, a mawi pawh a mawilo” ka tihlai chuan emoji thinrim hmêl em em mai chu a rawn dah tuar mai.



“Khapa hmuhah khân nui mawilo la a nimai, nui suh pawh ka tilo. A vei zual theih tur zâwng che khân nui lo la a nimai, chutilo chu i ha hmai lam zawng kha a bal ang chiahin ka siam ang” a rawn ti leha, sir Tetea chu ka melh zawka. 


Ka lam a rawn hawi lo hlauha, kan inchhûng vêl chu a lo melh kual nasa hle thung. “Chu ka ha tih dum vek i tum tihna em ni? I va sual ve a, nuih pawh ka nuilo. Nangmah zâwk kha hmeichhe dang te i nuih vaih chuan ka lâwm lo khawp ang” tihchu ka thawna.





Zanin chu a cousin birthday lawmnaah a kal ve a, a rawn status aṭangin hmeichhia an awm ve nual tih ka hre miaua, ka thikthu ka pe chhelo thei bik lo. “Hmeichhia i melh vaih chuan i lu kha hawisawn thei tawh lo turin ka siam ve ang che” ka ti chu a rawn nui vaka, a emoji hman lah hi a uar fâl thei em em mai lehnghâl.




Ka thutak ve lai laia a rawn nui ve leh si chu ka lâwm miahlo “Lungngai suh, hetiang mawng tê bawk si, âwm tê bawk si hian min hip lo. Ka bialnu mawng leh âwm nei mawi deuh a awm laiin hetiang in ha bul tak tak hi ka hmu mawi theilo” a rawn ti kher chu ka bulah awm se chuan ka beng pawp tawh ang.




“Ngawi mai teh a, khatiang ṭawngkam mawi lo zet kha sawi tawh lo la a nih mai chu. Rawn haw har miah suh ang che, i haw har tih ka hriat vaih chuan ka lâwm dâwn miahlo a nia” tihchu thawnin phone chu ka dah riha. In lêng neih laia phone lo khawih reng kha chu ka duh bik miahlo.




“Aizawl a awm nghet in nilo tiraw kha?” sir Tetean a rawn tihchuan ka lo bu nghat nghata, ka bulah rawn tawlh hnaiin ka thingpui thlit sak chu a in hauh hauha “Thingtlang mi ka nia, ka pite bulah hian ka rawn awm mai mai a nih hi. Ka unaute pawh thingtlâng lamah vek an la awm” ka tihchuan a bu ve nghata.




“Thingtlang nula chu in fel a lawm, tûn angah te chuan khawpui tlangvâl tam tak pawh hian thingtlâng nula hi an ngaizawng nasa tawh a sin. Bialpa i nei em?” a rawn tih zawm leh zata, ka dp kha a en lo nge mawni ka ti deuh rum rum, ka number a nei reng si a a hmuh loh chu ka ring miahlo.




“Um nei ve e” ka tihchuan a meng deuh ak a, a hmêlah chuan hnual deuh rawih hmêl te pawh a pu bawk. “Oh! Khawi a mi nge a? Kan college a mi nge?” a rawn tihchuan “Nilo e, heta mi tho a nia kan college ah erawh a lût ve lo, kan inzuina pawh a la rei vak lo” ka tihchuan a bu nghat nghata.




“A fel em? Chu kan tlai deuh a nimaw? Mahsela innei pawh in la ni chuang lova ka tân chance ala awm tho a nihchu tiraw?” a rawn ti leha, a thusawi dân chu ka rin loh lam daih a ni. Bialpa ka nei tih a hriat kha chuan a pawm ve mai ka ringa, chutia chance la beisei anga a awm chu ka mak tih zâwng tak a ni.



Hetiang hi ka lakah a rilru put dân a ni ang tih ka ring ngailo, mahsela ka ṭhiante leh Dsa khân an lo sawi dik tak tak a nih hmêl. Tûnah hian min duh thu zêp lo miahlo in a sawi tih ka hria a, chuan bialpa ka neih avânga min kiansan a tum mai mai lo tih ka hrethiam bawk. 



“Aaaa chutiang tur pawhin ka hrelo, keichuan inkawp hi ka duh ve lêm loa. Bialpa ka neih chuan a tân chauh rinawm ka duh bawk, kan inṭhen leh mai pawh ka ring lo” ka ti ban charha, a la pawm vak hmêl loh.




“In teacher mah ni ila ka hmuh tirh aṭang che khân ka duh tawh che a, mahsela zirlai i nihna angah ka theihtâwp chuan ka insûm ve a, tûnah erawh ka theilo tih ka hrechianga, hmalam hun ngaihtuah chuan ka tân chance ala awm ve in ka hria. In la inṭhen theia, in innei thei kher lo bawk ang” a tihchuan chhân mai dân tur ka hre hauh lo.




Chutianga thu a rawn lâk kawih daih chu ka ring miahlo, inṭhen maw? Vanrongura hi ṭhen mai mai ka tum lova, chutia inṭhen leh mai tur anga min sawi chu ka lâwm chiah lo bawk.




“Kan inṭhen mai mai chu ka ringlo, mahsela pasal ka la nei lo miaua rîm ve chu ka thiang a lawm. Pângngai tak leh ṭha taka kan inkawm thei dâwn anihchuan i rawn lên hi pawi ka ti miahlo. Mahsela khatia ngaihzâwng ka nei tih hre chunga chance neih beiseia inhnaih kha ka duh miahlo, kan teacher i nihna angah chuan ka zah lutuk che, mahsela engkim ka hrilh tawh che a khawngaihin min hrethiam dâwn ania” ka ti sapa.




A ngawi vung vunga, min chhâng mai lo bawk. Engtin tak min chhâng ang maw ti chuan ka in ngaihtuah neuh neuha, a lâwm lo hian thil ṭha lo tak a ti duh mai angem tih te thleng chuan ka ngaihtuah hman vek.




Nuam ti chiah lo chuan a mah hlat zâwngin ka tawlh hlat sana “A ṭha alawm, i duh lo chung chu ka ti lui lo ang che. Mahsela in inṭhen a nihchuan chance chu ka zawng ve ngei ngei ang, ka hmeichhe duhzâwng tak i ni tih pawh i inhria ang. Ka hmeichhe duh neih tuma ka beih chhin chu a sual em em in ka hrelo bawk, ka haw phawt ange. I bialpa neih chhûng chu ni e ṭhian ang chuan ka awm mai ang chu” tiin za lo zet hian a nui hul haka.




Ka awm a tinuam miah biklo, a chhuah hnu chuan Vanrongura chu ka text leha.  A lo thinrim em em lehnghâl “In lêng i neih avângin ka message i chhâng duh lo a maw? A ṭha a lawm, keichuan i thu zawmin ka haw hma a, mahsela nang chuan ka message pawh i chhâng duhloa” tihvel te chu alo ni nuaih mai.




Huiham! Kan inthlem leh ngei chu a ngai dâwn a nih hi, rang zet chuan ka call a. A rawn hmet busy hmak a nih chu! Hepa hian enge maw a hriat le? Ka call nawn leh pawhin a la duh ṭhak lova, a thinrim tak tak viau a nih ka ring, kan hahthlâk leh dâwn mange. A tau rei thei bawk si a, hetiang chuan a buaithlâk leh dâwn tlat in ka hria.




Ka room-ah chuan lût in bathlarah chuan ka chhuak pheia, a room ala êng va va a. A la muhil lo tih ka hre chiang bawk nên “Phone kha chhâng teh, Vanropiang” tiin a hming dik pawha ko duh lo chuan ka phuah sak zui zata. A la rawn dâk chhuak duh chuang lo.




“Rawn dâk vat rawh a nih loh chuan ka au tawh dâwn miahlo che a nia, Ds thinrim lo teh” ka tih leh pawh chuan min la chhâng chuang lo, ka au reng chuan putea te ho in an lo hriat ka hlau bawk nên ka au duh tawh bik lo, ka call leh zata ala chhâng duh chuang lo.




“A ṭha alawm tikhan awm reng rawh ka be tawh dâwn lo che.” ti ve hmakin ka khum lam chu ka pana, ka be tawh bik awm lo emai. A duh leh min he tawh rawh se, thinrimna ho lutuk.




A hnuah a rawn call ve zata, amah anga awm ka duhloh avângin keichuan ka chhâng ve maia. Mahsela ka ṭawng duh ṭhak lo “Tinge ka titau ve chu a pawina? Min biak loh khân hrehawm ka tih vâng mai a lawm, ka titau ve a min kalsan i tuma” lunghnûr aw zet hian a rawn ti a, a phun pah bul bul bawk.





“Khavang khân alawm min duh ve lo ka tih ṭhin che, ka lungawi loh leh min kalsan i tum nghal zela” a rawn tileh bui buia, a lâwm vak lo tih a hriat. Keipawhin hetia awm khum ka duh bik lo a, mahsela a luhlul ngel ngul lutuk hi a châng chuan tih ve deuh hi a ngai ṭhin.



“Inṭhen lam ka sawi lo, luhlul deuh khân awm ṭhin lo la. Ka call kha engvanga dah kher nge i nih? I la ve thei renga, min chhâng duh lo a nih kha” ka ti chu pawr lutuk hian “Ka tau ka tihchu, ka tauh avâng chuan enge i pawi ka sawi? Min thlêm ve thei mai lo em ni?” a rawn ti leha.




A aw ah chuan a lungchhe leh tawh tih ka hre thei, kan hahthlâk ṭhin teh e. Mahsela a lawmawm ka ti bawk sia, a hriat loh tur chuan “Tikhan awm ṭhin suh, amak ṭhin emai. Inlêng neih laia phone khawih san reng a mawi lo alawm, ka thlem dâwn che a nangmahin call i la duh lo a nih kha. Ti hian awm tawh lo ang, inhauh reng hi ka ning ania” ka ti a.




Ka ngaihdan dik tak pawh a ni, in hauh reng hi ka ning ṭhin a. Inhauh ai chuan insual mai hi ka duh mai zel, inhauh thinrim vak hi ka thiam velo, ka ning ṭhin.


“In hauh ka duh bik hleinem, i sual si. Ka bialnu i nih reng laia mipa dangin an rim reng che kha mipa ni ve ta la nuam i ti bik angem? Ka bialnu chu nilo la ka thik miahlo ang” a rawn tihchuan a dik ka ti ve tho bawk nên thinrim chuan ka chhâng duh bik ta lo.



“Ka tihpalh a nihkha, mahsela kan inkar ka hrilh veka. I hming erawh ka hrilh lo thung, i awmna nên chutilo chu ka pute a hrilh anga, kan buai palh ka hlauh avâng zâwk ania. A ni pawhin a pawm thiam khawp kha, thinrim lo la hlim taka awm hi ka châk ania, inhauh hi nuam ka tilo, ka tihpalh” ka ti nawn leh sapa.




A lungawi ta nge “Ka ngai che” a rawn ti ri chuan ka lung a ti phu ranga, ka hlim veng veng bawk. “Keipawhin ka ngai che, ka ngai lutuk che” ka ti lêt ve ta nge ngea, hetiang thu hi ka vawikhat sawina a ni a. A ni pawh ani ve tho, a ni tel hian kan inpawh ve telh telh bawk nên nuam pawh ka ti.


DUHAISAM DUHLAI ZORINPUIA S2 



CHAPTER 13 



“Kan lo lêng” Vanrongura te ṭhianho leh ka ṭhiante pahnih chu an rawn lût a, ka chhûngte ho an awm lo tih an hre sa bawk nên an rawn phûr lût viau mai. Keipawh lo ding chhuak vatin an lam chu ka pana, chhum tur an rawn keng tih ka hmuh chuan ka phûr ngei mai.




“KFC kan ei dawn em ni?” Maramin a tihchuan Rochhunga chuan “A tuilo thei emai, a al thei si. Chutiang ei ai chuan hmawm sawm ei pawh a ṭha daih zâwk, chutiang thil tuilo lutuk man to taka lei ai chuan hetiang noodles mai mai pawh hi a tui zâwk” a rawn ti nghal zata.




He mite pahnih hi chu inhnial tura kan ṭhian zînga awm ve an ni berin ka hria. Ṭhianho ah pawh hetiang hi an awm ngei ngei an tih fo tichiangtu te an niin ka hria, inhnial loh lai hi an nei meuhlo.




“I hmêl kha a nihchu, a tuilo i ei fuh ania'ng chu helai venga mite chu Aizawl ah rau rau chuan a tui aw, hmun dang a mi a tui ka ti bik lo. Mahsela khatla KFC hi chu midang pawhin an fak ve lutuk ania” Marami bawk chuan a ti leha.




“Ei ve suh, vanram kai tur tân ei chi a nilo. Chubâkah i vir de daw lutuk mai, ngawi reng khân lei sa kha chhûm mai mai rawh” Rochhunga chuan a rawn ti a, “Enga Robuk, engvângin nge vanram kai tur tâna ei chi a nih lohna? A hrim hrimah nang chu hremhmunah tlâk i tum em ni?” Marami chuan melh pah chuan a rawn ti a.




Vanrongura chu ka bulah rawn ṭhu in min kuaha, kan ṭhiante inhnial pawh chu ngaihsak ang pawha awm lo in ka dârah lu nghatin a mit a chhing daih bawk.



“Aw nang chu vanram kai ngei ngei tur i nia, keinite chu setana fate kan nih hi. Vanram chu kan tân a hla lutuk a lawm, nang chuan i hnaih bik riaua, hnaih bik riau dân te hi min hrilh ve la. E a ni leh lo in ngaizawng ve mai ang” tiin Rochhunga chuan a nêk salh salha.




Marami lah chuan a lo bêng nghal pawp pawp mai “I zak nange, engtik lai mahin ka hnaih bik riau ka ti ngai lo. Min hmusit viau suh aw, nanga bialnu nihai chuan kan chowkidar nupuia ṭan pawh ka duh zâwk” a tih lai chuan Siampuii nên kan lo nui haka, a sawi ber kher lah chu a duh tak tak hi ka ring lo khawpa.




Kan chowkidar hi a pate in vai a nia, a hâng reuh bawk nên Rochhunga ai a thlan ka ring lo nghal bur. Siampuii ngaihdan a nih ve pawh ka ring “Nia in ngaizawng ve mai rawh u, in inhnial reng pawh a reh deuh ang”  midangin an lo tih veleh an duh loh thu chu an sawi rual ang leh lawia.




Midangin inhnial tawh lo tura an tih tâkah chuan an ṭhu ve hrama, hmeichhe ho chuan noodles chu chhum tura min tih avângin keipawh ka ṭhiante zui phei ka tum chu Vanrongura chuan a lo phal tlat lo “A innei tu i nihkha, ṭhu mai mai rawh. An pahnih pawh sâwn an chhûm thei lutuk ang, a tam loh kha” a ti tlata, ka ṭhiante pahnih pawhin an tih theih thu an sawi tâk tlatah chuan keipawh ka ṭhu ṭha leha.




“I mak ṭhin emai, ka ei ve duh dâwn tho a hmeichhia ka nihna angin ka che ve tur alawm. A nih loh chuan mipa ho hian in chhûm tawh ang” ka ti chu a thaw haka “Min hnial reng lo teh, ka chau ania. Sawtiang ai saw chuan min duat la kan pahnih hian kan hlim zâwk ang. Min duat duhin ka rawn lêng ve em em a, tih tur hlir ngaihtuah suh” a la rawn ti erh zuia.





Ngeiawm ve thei lutuk, engvanga chau em em nge maw a nih le? “Nizan i mengrei em ni? Tinge i chauh em em chhan chu ni a?” ka ti chu Timothy-a chuan “A lunglêng chau mai mai a nih dâwn kha, bialnu kha a nei bik khawp a. Kan neih ve hunah chuan in lâk naute na tur kan zawng ve ang, ṭhiante min thlim reng mai Thanzuala nên hian bialnu an nei mai mai a ni” a rawn ti hlak hlaka.





An ni erawh phone phawrhin games an khela, kan ṭhutthleng seiah chuan an mu zar hlawma. Nuam an tih hmêl viau mai, Siampuii te pahnih pawhin an thil chhum chu rawn chawi pheiin dawhkanah chuan an chhawpa, fian leh thlengkum chu rawn chhawpin mipa ho chu an suah saka.




An ni lah games an khêl bawk nên an la ngaihsak meuhlo, Vanrongura erawh ngawi reng hian a ei nghal mial miala. Keipawh chu ti tho, hetiang lam hi ka ngaina bawka ka hmaih theilo a ni ber mai, “Heti êm êm a ka zâwi hi min duat ve te i tum silo amaw? Bialnu neih man a awm lo hle mai” thil ei paha a tihchuan a bânah chuan ka sik vaka.




“Enge chau em em tur a i tih ka tihchu? I sawi loh chuan i tih ka hre siloa, engmah ka hre hleinem” ka tihchuan a phun nuah nuaha. “Nakinah ila hre mai ang, tûnah chuan engmah ka sawi rih dawn lo, min duat tawp la nakina i lawmna tur zâwk a nih hi” a ti ngei lehnghâl. 




Ve reuh ṭhin hiana, “A nihchu, min hrilh loh chuan tikhan chau reng mai rawh” ka ti chu a hawisawn hmaka. Ka awm lohna lamah chuan min hnungchhawn zawnga ṭhu in a thil ei lai chu a ei zawm mial mial bawk. A awmdân hian ka nuih a tiza ṭhin, a chêt dân naupang chhia thei lutuk hi ka hlimpui a ni ber mai.



“Aw tlangvâl lo hawi teh” ka ti chu kan ṭhiante zâwk chu an lo nui put put a. ka mitmeng chuan nuilo turin ka khap pah bawk, an ni lah an insûm hleithei lo chu an hmai a sen ṭul hlawma, ka ngei teh e. Hepa hian a hmuh leh vaih chuan a hma aiin a titau nasa leh dâwn tih ka hria.



“Amak e titau reng mai, i tihtauh dâwn ai chuan nang chu lo va mu daih mai rawh. Chau te chu mu la i hahdam sawng sawng mai ang” ka ti chu thinrim zet hian a thil eina chu dawhkanah dah thla in “A ṭha alawm, ka kal khawp ang. Mi duat pawh i thei ve thlâwt lo a nih hi” ti a chhuah a tum chu a ṭhiante chuan an lo dang nak naka.




Kan inngaihzawn ve dân hi zawng a hahthlâk mah mah chu a ni e, a titau awlsam bawk si a. Ka nihpui pawh hi a ṭha ber em ka hre tawh lo, “Tinge i thinrim reng bik le?” ka ti hapa, midang pawh kan awm dân avâng chuan an thutak ta riau bawk.




A rawn inhera, chiang taka min enin “Kei min nihpui hi i inchhir tiraw? A chhan chu min ngaihsak pawh i theilo ania, i ngaihsakna zawng zawng ka dil miahlo che. Mahsela chhete tal pawha i ngaihsakna ka phût ve ṭhin, tinge englai pawh hian min hnar reng mai le? A tâwk e, ka thei tawh biklo, ka tauh theihlohna leh ka pawimawh lohna hmuna awm reng tura mipa nêp ka ni bik lo” ti hmakin a ṭhiante dân tumna pawh chu duh lo in a kal chhuaka.




Khati taka a thinrim kha ka beisei phaloa, ûmzui pawh ka tum chuang lo. Ka ṭhiante pahnih chuan min hau mawlh mawlha “A mak e, ṭha takin be ve mai ṭhin la, nangpawh mipa mah nisela nang aiin a naupang a, duat leh ngaihsakna chhete i lan tir ve pawh kha a ṭhat nên a upa zâwk a dawh theilo zâwkah i ṭang renga, hetiang te chuan bialpa dang pawh neila in hlim reilo ang” an rawn ti chu chhân pawh ka tumlo.




An sawi chu a dik ve miau alawm, keipawhin ka lo timah mah deuh tih ka hria. Mahsela a duhthu thutlukna siam ania, va biak hmasak erawh ka tum tawh lo, mipa ho chuan an lo va biak tur thu sawiin an chhuak zui diaka.




An chhuak chiah phei chu ka ṭhiante pahnih chuan min hau char char mai. “Ka hre ve tho alawm, mahsela ngaihzâwng ka nei ngailo tih inhriat kha, engtin nge tihdan chu ka thiam vak bik ang ni. Ka zeilo tih inhriat reng kha, ka mu phawt dâwn” ka tihchuan tihngaihna min hre bik lo nge haw tumin an chhuak ve daiha.





Thâwk la ham hama kawngka chu va khâr ṭha in ṭhutthlengah chuan ka ṭhu thla a, ka in ngaihtuah neuh neuh bawka. Ka lo dawhthei lo ve êm ani, mahsela khatianga thinrima min bia kha ka duh biklo, a duha inṭhenna thu a sawi tawha keipawhin biak ka tumlo, tihian ngaihzâwng ngaihsak lo hian lehkha zir leh mai ila ka tân pawh a ṭha ber in ka hria.




Ngaihzâwng nei tur chuan ka la in peihlo te pawh a nimahna, amah pawh chutiang tho chu anih ka ring. Tûnah rih chuan ngaihzâwng nei tur chuan kan rilru a la in peih tâwk loa, kan thinlung ala inhmu tawn lo te pawh a niang, a tir te aṭangin kan buaia. Hetiang ai chuan ka in peih vêk vawk hunah ngaihzâwng hunah ngaihzâwng chu ka nei chauh tawh ang tihchu ka ngaihdan a ni.




Tûnah chuan ngaihsakna leh duat hliau hliau turin keimah hian ka la thiam lo a, mipa rilru pawh ka la manin ka hrethiam thei dâwn hek lo. Chu ai chuan a ni pawhin a duh leh midang zawng sela, ka bula a awm reng chuan a vuina tur hlir a hmu dâwnin ka hria a, kan inkar ṭha tur zawnga va biak chu ka duh ta bik lo.




Ala naupang bawk nên keipawh chuti teh lua in ka la upa bawk siloa, ka insiam rem ve phawt angai in ka hria, heti ringawt chuan inṭhen lo pawh ni ila rei kan inkawp thei chuangin ka ring lo.



Mut dâwn thleng chuan min rawn be lo va, keipawhin biak ka tum bik lo. A laka ka duhte hrethiam turin a la upa tâwk lova, ka laka a duh hrethiam turin ka zei bik heklo. Kan engkim hi ala in man tawnlo ni berin ka hria, keichuan mipa puitling tak, ka duhzawng hrethiama dawhthei taka min en tu tur ka duha, mahsela Dsa nunah hi chuan ka hmu ngailo dâwn lo niin ka hria.




Ka laka a duhte ti puitling turin keimah ngei pawh la inzir ngai ka ni si a. A tûk lam thleng chuan min be lova, keipawhin ka be bik hek lo, kan inkar chu a rawn lan ran ang bawkin a tâwp hma a, reilote tur tal taka inzawmna nei kan ni maiin ka hria, College kal tur pawhin taxi ka la a, a ni erawh hmuh pawh ka hmu hek lo.





Ka ṭhiante pahnih lah chuan kan inbia nge be lo min lo zâwt ve bawka. Kan inkar a tâwp fel dêr tih ka sawi chuan an ni erawhin keimah zâwk bawk min dem leha, mahsela engmah sawi belh ka duh tawhlo. Kal a duha, a kal a nimai, kan thlen thui tak tak hma a a kal vâng nge chutianyin ka tuar na lutuk lo thung.




Sir Tetea lah chuan college thlengin min bia in zirlai dangte hmuhah pawh min ngaihsaka, kei erawhin ngaihzâwng anga en ka tum der lo. Vanrongura lah chuan min runluih nge a status ah chuan an school infiamna a hmeichhia nên an ṭhu laite, an nui laite a rawn status a. 




Ka thik ve tho nângin kan ni rei lo miaua chutiang erawh chuan ka ngai pawimawh lo thung, en liam tâwpin keipawhin status hlimawm lam hlir chu ka upa. Ka thik anga a ngaih theihna tur thil hman ka tum lo bura, keima nuna ka hlim tâwk zia tihlan ka tum a ni ber mai.




ZAWMNA...



“Awi tûnlai hmeichhia zah theihloh zia hi” Siampuii chu a rawn âng hlawk hlawk mai, a thinrim hmêl êm avâng chuan Marami nên chuan alam kan hawi duna. A hmai a lo sen vek a, eng thil tak chu hria ang chu nimaw?


“Enge a?” Marami nên chuan kan ti rual ṭhawt a, kan bula rawn ṭhut pah chuan a bag chu a dah rawka. “Thanzualate mawle, i bialpa pawh a tel an ṭhian ho kha hmeichhe inzuar ṭhin ho in an lo bia a, pay puiah an lo sâwm mawle. Min rawn hrilha, tûnlai hmeichhia a bikin khawpuiah hian hetiang hi an tam tawh lutuk an ti lehnghâl, kan college ah ngei pawh hian in hriat kha, ka duh ve miahlo. Mahni taksa zuara inhlawh hi ka ten ber ani, Mizo hi chu kan thawhchhuah phu lo hian kan incheina a sanga, naupang zâwk ten an awt ve si a an inzawrh phah a nih ber hi, mi thil awh chuan hna thawh ve mai tur ania” a ti hlak hlaka.





Marami nên chuan kan in en tawn ha mai, “Enge i sawi awmzia naupang an la ni tihna em ni?” ka lo ti chu a bu nghata, “Kum pawh an la tling lo mawle, an ṭhianho a mipa pay pui tur an duhthu Thanzuala bulah an sawia, ka hmu ve vek si a. Rapthlâk ka ti tak tak, hetiang mi hi kan hriat kher lohah pawh mahni inzuar hi an tam tawh a nia, mi hmuha nungchang mawi deuh anga lang a ruka inzuar hi Aizawl a awm hmeichhiate ah hian kan tam tawh lutuk” a rawn ti bawrh bawrha.





A sawi dik in ka ring, Vanrongura te chuan engtin nge an chhân ang le? Mipa phei chu an hmuh phawt chuan insûm theihna an nei tlêm si a, chutianga a hmeichhia zâwkin an sâwm chuan an hnar thei angem tih te chenin ka ngaihtuah a. Chutiang tura ka han dah chuan ka thik bâkah thil ṭha lo tak chu a tihpui ang tih mawlh ka hlau.





“Mahni in enkawl thei hi kan ngaihsân rualin hmeichhe tân hi chuan kan sum zawn dân ṭhenkhat hi chu a bawlhhlawh mah mah chu ani. Mualpho an hlau lo nge an mahni taksa zahawmna pawh ngai pawimawh miah lo in an inzuar thei ania, an message ka hmu kha chu maw mak ka ti, Thanzuala pawh ka hau hrep a lawm, an zahmawh lang deuh thaw a thlalak kha an rawn thawn ngam nia!” a thusawi dânah chuan mak a tiin rapthlâk a ti hle tih a hriat theih.




“Vanrongura pawhin a hmu ve maw?” ka tihchuan a bu nghata “An ṭhianho khân an be miau a lawm, mi awm thei lutuk fate vek an ni si a, hmeichhe inzuar a sum tam tham tak duh tân chuan an hmêl a lo ṭha bawk nên an îtawm dâwn em asin. Nangpawh i ṭhen ringawta, i duh tak zet em ni inṭhen chu?” an rawn tihchuan ka ngawi ta renga.




“Ka va chhuak lawk” tiin ka kalsana, ka phone chu phawrhin Vanrongura chu ka call nghal zat bawk. A la har em em mai lehnghâl, a la tawh dâwn lo emaw tih hnu ah “Aw” tih ringawt chuan min rawn chhâng a. Min be châk vak lo tih a hriat theih mai.




“Enge i tih? Inhmu lawk ang” ka ti sapa, alaka ka awm dân avâng khân ka inthiam bik chiah lo nên ka aw pawh a zawi viau mai. 



Karkhat chuang kan inbe tawh lo va, hetia ka biak leh tâkah chuan ka ngaih ve zia ka hre chhuak uai uai bawk. Nitin in phur chhuaka hun lo hmang dûn ṭhin kan ni bawk nên ka ngaihtuah lo theilo.



“Ka hman lo ka lêng dâwn” tih a sawi zawh rual rual chuan hmeichhia in an au lâng lâng ri ka hria a. A ni pawhin a kal tur thu chu a hrilh ve bawk “Hmeichhia nên maw?” ka ti sepa, ka thik lo ang ka ti kha a nia mahsela ka thik lo theilo.




“Nimai e, hmeichhia nên lo kan lêng peih hleinem” tiin phone chu a dah zui ta daiha. Ka phone chu ka en vang vanga, ni e a ni pawhin enga tân mah min ngaih loh theih chuan keipawhin engah nge ka ngaih em êm bik ang, a duhthlanna a nia. Min duh hmasa tu a ni bawka, engvang mahin ka buai phah tur a nilo.





Duhtu neilo ka ni bik lova, kan in hauh avânga awlsam taka kan inkar a ti tâwp thei khân min duh tak tak lo tih a tichiang viau bawkin ka hria. Keichuan mipa puitling tak, ka tlinlohna leh ka fellohna zawng zawng nena dawhthei taka mi in enkawl thei tur ka thlang ang ka lo ti ṭhin a, mahsela chutiang nilo in mipa keiaia naupang hmangaihna lama tawnhriat la nei bik hauh lo ka thlanga.




Rilru puitling lo tak, awlsam tê a titau mai ṭhin leh min dawh thei kiah lo tu ka thlan avânga hetianga awm ta kan ni bawk. A la tlai chhelo a, keipawhin duhtu neilo ka ni lo bawk, hetianga awm a duh anihchuan kan awm mai tur ani.



Kan haw dawn chuan sir Tetea nên kan inhmu leh hlawla “Ka lo thlah ang che” a rawn tih avâng chuan ka hnial duh lêm lo, a hmelṭha in a fela kan college hmeichhia ah pawh hian amah star tu an tamina a class ah phei chuan hmeichhia kan tam ber ṭhin a, engvanga min duh tlat nge a nih ka hre biklo.




Mipa sual tak a nilova, a ṭawng duhin amah a inring tâwk hle bawk. A car chuan min thlahin kan titi dûn bawrh bawrha, lên kawi min sâwm bawk nên keipawhin rilru tih thawven duhin ka hnial biklo a, ka pi te ka hrilh chuan an lo phûr phian lehnghal.



Kan ina a rawn lên aṭang khân ka pi leh pu biak dân a thiam bawka ka pi leh pu hi chuan an iai em em lo tih pawh ka hria.

“Sangpui ka duhna che avâng hian min ngei viau ang tih ka hria, i laka ka chêt dân avang pawh khân. Mahsela min pehhêl tum ngar ngat lo la ka duh, ka nghâk thei che ka tih tawh kha, mipa dang i duha ka kianga lo kal i duh rihlo a nih pawhin ka hrethiam che. Keichuan ka ta i nih hun tur hi ka nghâkhlel bera, College rawn lût tura admission i rawn tih ni aṭang tawh khân ka mit i la tawha, mahsela ka hnaih che chuan min hlauh ka hlau ve si a. Chubâkah ka zirlai i nihna angin i laka ka rilru kha ka ti lang duhlo-a, mahsela tûnah chuan ka inthup thei ta ngang lo anih hi. Mahsela ka sawi tawh kha, ka duh che avâng hian min hlat phah lo la ka duh, i duh angin ṭhian ang pawhin i tân ka awm thei ania. Ṭhian chauh pawh a pawilo, mahsela i mipa duh em emin a kalsan hunah che ka tân i awm ve thei angem?” a rawn ti a.





Ka en vang vang mai, engvanga hetianga ka laka awm mai nge a nih le? Keichuan ka phu lo ka inti a, keiai hmelṭha leh chhelo tak tak pawh, kan miss te ngei pawhin an duh tih ka hai bik lo. Heti chunga kei a zirlai ve mai hi engtin nge min duh theih le? 


“Sir tinge min duh tlata? Ih, ka hmêlṭha bawk siloa” ka ti sapa, a rawn nui hak mai. “Mahni in hmuh ṭhat hi chu a har rêng a sin, ka mit aṭang hianin inhmu ve la i hrethiam ve maiin ka ring” tiin a nui suka. Chhân dân tur pawh ka hre tawh lo, mipa hrang hrang chutah mize in ang lo nuaih a rualin ka nunah an rawn lût a, engvanga hetiang tawng mai nge maw ka nih le?



“Mahse....” ka ti leh chu nui hak hian ka kutah chuan a rawn hûm vang vanga “Ka sawi tawh kha, ka ta i nih hma chu tu ta pawh ini thei. I thinlungah hmun ka chang rih lo tih pawh ka hria, kha naupang in ina rawn kal ve ziah kha tiraw i duh?” a rawn tihchuan ka melh vata.




Vanrongura a ni tih ka hria, engtin nge chutiang chu a hriat zâwk ni. Amah vêk chuan “Mipa ve tho ka ni a, in pahnih mitmeng hrethiam lo tur khawpin ka naupang chhe tawh lo bawk. Kha naupang khân ât huamin a duh che tih pawh ka hai bik lo a sin” a tihchuan “Ka chhûngte hrilh suh aw” ka lo tinghal vata.




“Hlauthawng suh, keiai i thlan zâwk mipa chu mipa mai mai a nilo ang tih ka hria a lawm, a hmêl pawh a ṭhat kha. Tûnlai hmeichhia hi chu aia naupang hian an hip tlat cheu a, ka hrethiam lutuk che. Mahsela engtikah emaw a tina che a, a kalsan che a nihchuan ka ta ni tura ka beih che i phal ve ang tiraw?” tiin car chu a ti ding zuia.





Khawpui pâwnah kan lo awm reng tawh tih ka hriat chuan mak tiin ka hawi buai deuha, “Ni e, ka nei ngei ngei dawn tih pawh a awm chuang lo a. I sawi ang khân a mizia hian min hip pawh a nimahna, hmalam hun erawh ka sawi theilo” tiin ka phun ve sapa.


Vanrongura nên kan inbiak dân leh sir Tetea min biak dân chu a hrang hlak a ni, ani chuan puitling takin thil a thlîr thiama, a dawhthei bawk. Vanrongura erawh a letling thawk, a thinchhia in a dawhthei lova, a thil duh chu neih nghal zel mai duh mi a ni.



Mahsela ka duh hmasak ber a ni lawi bawk si a, engtin nge kan awm zêl ang tih ka hreloa. Inṭhen hlen a duh a nihchuan keipawhin neih lêt tum chuan ka bei lo thunga, ka tel ve an phallohna hmuna tel luih ṭalh hi ka duh ngailo.


VANRONGURA POV...


“Roa en teh saw i bialnu te kan hmu, an sir nên khân an nih hmêl” kan inchungah kan ṭhianho bâkah hmeichhe ṭhenkhat nên kan awma, Timothy-a thu rawn sawi avâng chuan hnuailam chu ka en vata, car var aṭanga rawn chhuak mêk hmeichhia ka hmuh avâng chuan ka inseh ruh nghal ngheka.



Saw pa saw hnaih lo turin ka ti si a, a la hnaih tho amaw? Kan inṭhen chu alo la na ve miahlo a nih hmel, a thik theih nân hmeichhe dang bia in ka lên puia, ka status khum ṭhin bawk. Mahsela a status ah emaw, a hmêl ka hmuh apianga a awmdân ka chik a, thik ang pawhin a awm ngai heklo.




Nge ni a sawpa nên sawn an lo in zui reng tawh zawk? Keiai a upa in hmeichhe duhzâwnga awmdân pawh a thiam tawh dâwn tih ka hria, kei nên chuan tehkhin chi pawh a nilo, chutah ka hmuh lai ngeia an nui dûn chuan min ti lâwm lo zual.




Kei amah ngai em em a ka awm laiin mipa dang a rawn inthlah tir vêl amaw? Chupawh ka thik ber mihring lehnghâl, ka ṭhiante'n an auh tâkah chuan inchung lam chu an rawn hawi dûn a. Min hmuh ruala a phu zawk chu ka hmuh hmaih lo, mitchuar nûnga ka en lai chuan a inthlahrun ve ka ring ania, mahsela chutiang hmêl a pu hauhlo.



Ner sawk hian a mipa zâwk chu eng emaw hrilh zawkin inchhungah a lût daiha. Mai mai chuan, ka bialnu a ni leh dawn khawp “Roa in inhria em ni? An va han inhmeh dûn tak, an hmêlṭha bawk sia, a hmeichhia kha a chhelo tawp” an tihchuan chhâng tawh lo in “Haw tawh rawh u, ka mu duh” tiin inhnuaiah chuan ka chhukthlak san daiha.




Ka room-a ka luh rual chuan a room lam chu panin tukverh aṭang chuan ka en pheia, a parda a lo zar phui vek a nihchu. Ka call a, a la la duh chuang lo “Zaninah hian duhlo mahla kan inbe dâwn khawp, tu lakah mah ka chân dâwn lo che m” ti supin ka phone chu ka en renga.


DUHAISAM DUHLAI ZORINPUIA S2 



CHAPTER 14




Lehkha ka zir mawlh mawlh lai chuan ka bathlar rawn ri dawt anga ka hriat avâng chuan ka hawi chhuak vata. Chutah tukverh pâwna Vanrongura lo ding leh inbeng fai mawlh mawlh ka hmuh rual chuan ka ding chhuak zawka.




Engthil nge rawn tih a tum leh tâk? Tukverh rawn hâwn mai a tum chu inchhûng lam aṭangin ka kal tlat bawk nên a hawng theilo beidawng chuan hawng turin min rawn mitmei zauh zauha.




Ka hawn âwm lo emaia, “Va haw rawh, enge rawn tih i tum? Ka hawng dâwn miahlo ania, chuvang chuan haw vang vang rawh” ka tih lai chuan a rawn bêng ri ta vaka. Ka chhungte'n an hriat ka hlau lutuk chu alam pan chuan ka tlân phei nghal vata.



“Enge i hriata? Va haw rawh ka tihchu ka hmu peihlo che” ka tihchuan tukverh hawng tur bawk chuan min lo ti leha. “I hawn hma loh chuan thâwm bengchheng ka siam char char a nimai, ka piten an hriat vaih chuan zawhna an ngah dâwn tih i hriat kha” a rawn ti leh chu thinrim tak hian ka hawng ta hrâma.




“Min rawn hmuh tum tawh suh, hetianga i chin fo chuan ka room hi ka sawn duh mai ang. Min rawn tibuai tawh hlek suh ang che” ka tih lai chuan ka hnung lam aṭanga min rawn kuahin, ka kâwngah a kut chu a suih beta “Ka ngai che” ti a ka bengbula a rawn phun ri chuan ka taksa a ti ṭim chuai thei nia.




Ngawi reng chuan a kut chu dahsawn sak ka tuma, ka thei mai lo lehnghâl. “Vanrongur min thlah teh, ka buai ania lehkha zir ka ngai” ka tihlai chuan a thaw haka “Ka pakhatna nih lawmman pawh min la pe loa, i intiam vek tawh kha. Tûnah hian ka dil dâwn che” a rawn ti mauh mai, a hma khân min dîl lo tak.




Ka hnial dâwn lahin ka lo intiam ve laklawh tawh bawk si a, “Enge sawi vat rawh” ka tihchuan a nui vur vura “Ka duh chu maw...” tiin a ngawi deuh vang vanga, a nuih vur vur dânah eng emaw tak min dil ka ring nghal bur mai.




“I bialpa nih leh ka duh, chu chu ka duh anihchu. Hnial âwih loh, i duh ber ka tihsak ang che i tih vek tawh kha” a rawn ti chu hnial ngaihna hrelo in ka en tawpa. “I phakar lutuk aw, khatiang a fair lo lutuk” ka tihchuan a nui vur vura.




“A fair mah mah zâwk, ka bialnu nih leh te chu thildang min tihsak ai chuan a ṭha daih zâwk lo em ni? Thlawhna min lei rawh ti tlat che ila min lei thei dâwn em ni?” a rawn ti leha.



Hahthlâk hian “Thei e thlawhna ah te chuan a lem pawh a lei theih a lawm” ka ti chu “A lem mai mai ka duh dâwn siloa” a rawn ti leh tawh. Ka ning mi hnialna tur a hre bawk si a ka hnial hneh thlâwt lo a ni e, ka ngawi zui ta daiha.




Chutah alamah min kuai herin ka chalah a rawn fâwp vang vanga. “Min ngaidam rawh aw, i lakah pangchang taka awm kha nuam ka ti a, min thlêm ve ka beisei avâng zâwk ania. Khatianga tihche kha ka duh miah lo, hmeichhe dang i thik theih nân ka hmanga, a chhan pawh ka tello a i awm theih bik lohzia ka hriat duh avâng ania. Nang lah chu ilo awm thei ropui sia” tiin a vui leh niah niaha.





“I duh dân a lawm” ka lo ti chu a lu thak lo pui chu hiatin min rawn en a “Nangpawh in sir kha i rawn inthlah tir a, ka lâwm miah lo ania. A hma pawhin kan sawi vek tawh si a, khapa kha hnaih miah suh” a rawn tihchuan “Nangpawhin hmeichhe dang i lênpui tho kha, a nite chu a fel a sin. Nang ang lo takin a ni chuan ka ṭhian anga awm pawh a pawi tiloa, nang chuan hmeichhia ilo lên pui mai mai a nih kha” ka tihchuan inthiam lo hmêl ka hmu nghal zata.





Keipawh ka ṭawng thui lutuk dâwn a hria in “A thu hrimin tinge tukverh aṭanga i rawn zuan leh ṭhin, a tawpah i la tla tak tak ang. Khatiang kha chîng tam suh ka tih fo kha” ka ti leh ta daiha.




“Ka message i en duhlo a, ka call pawh i la duh hek lo. Thlan tur dang ka nei hleinem, ka tih dân tur hriat chhunin ka rawn che mai a nih kha, min ngaidam tawh tiraw?” tiin beiseina mitmeng nên hian min en kara, ka dar tawn tawnah vuanin ka chhânna a nghâk ran bawk.




Keipawh ka a dik vek bik lo tih ka hria a, engmah sawi tûr reng reng ka nei bik lo. “Um, chuan keipawh  min ngaidam rawh. I rilru ka lo hrethiam ngailo va, tûn aṭang chuan theih tâwp ka chhuah tawh anga, dawhthei taka en che ka tum tawh ang” ka tihchuan a thaw huai reuha.




Chutah a âwmah chuan min kuah bei leh vang vangin khumah chuan min ṭhut thlâk puia “Tunah chuan ka thaw veng ta huai mai, ka biak loh chhûng che khân mipa dang in an lo bem ang che anga, ilo nihpui mai ang tih hlauhna khân ka khata, mahsela min biak i tum loh avâng khân ka be duh lo che a nih kha, tûnah chuan min hrethiam tawh bawka. Engtikah mah inṭhen leh ka duh tawh lo” a rawn ti dap dapa.




A thusawi chu amah ang lo takin a puitling khaka, fiamthu hmêl reng reng a lang heklo. Alamah tawlh hnaiin a âwm hlai hlapah chuan ka bei kak a, a lungphu dat dat pawh ka hre thei. Chu chuan engtin emaw tak hian min ti thlamuanga, ka hlim bawk.



“Kan dawhtheih tawn angai a nih hi, inhriatthiamna nên in en tum ila. Thil kan hriatchian loh avânga buaina ka duh miah lo bawk, engkim ka lak aṭanga i hriat duh chu midang zâwt lo in keimah ngei min zâwt ṭhin bawk ang che. Mi chuan a dik lo te pawh an sawi theia, keichuan a dik tak vekin ka chhâng zel ang che” tihchu ka sawi ve sap sapa.



Min kuah nghet sauh hian ka kut chu a khal neuh neuha “Aw le, hriatthiamna leh dawhtheihna nên kan in en tawh anga, a tu amahin inṭhenna thu awlsam takin kan sawi tawh tur a nilo. A hma kha chu ka tihpalh a nih kha, mahsela nang lo hmeichhia hi ka la tawk hauh lo ania, lên chhuah pui ṭhin mah ila tumah ka khawih ngailo” a tihchuan Siampuii thusawi kha ka hre chhuak zawka.




“Nizan lamah hmeichhia in pay pui turin an sâwm cheu em ni?” ka tihchuan min rawn en vutin a ngawih deuh vang vang hnuah a bu ta nghata. “Min rawn bia a lawm, an hnute thlalak vêl min rawn thawna, kei phei chuan ka en reilo, Timothy-a leh Rochhunga khân an en a, an be bawk a chu pawh an zilh a ni ber mai. An mahni kha kum 17 vêl bâk an la nilo” a tihchuan ka thaw ham hama.




Ka rin ai an la naupang lehnghâl a, “I en lo tak tak maw? Khatiang lama rawn bia che an awm anihchuan block hreh suh aw, chutilo a ilo bia a nih vaih chuan keichuan ka enliam mai mai dawn lo che a nia. Ka tân rinawm la, keipawh i tân ka rinawm ang” ka tihchuan a pawm hmêl viau mai.




Ka kut chu la kângin a fâwp leh zauha “Ka tiam a che, ka damchhung zawng chuan itan ka rinawm reng ang. Ka hmeichhe duh ber i ni a, ka phatsan ngai hauh lovang che, khatiang mahni taksa zahawmna suma hralh duhte ai chuan ka thlang fe che tih hria la, ka thlang zel bawk ang che” a rawn ti chu ka hmu puitling riau lehnghâl.




Amah a chêt dân hrim hrim hi a puitling khak zela, thil tam takah erawh a la naupanna hmuh tur a la tam viau thunga. Chutih rual erawh chuan hetiang khawvêl thil lamah hi chuan a ngaihtuahna hi a puitling riau bawk si.




Ka khumah chuan ṭhu dunin kan titi dûn a, lehkha ka zir pah bawka. A ni pawhin min be buai reng bik lova, ka khumah bawkin games a lo khêl mial mial mai.




Ka en leh zauh ṭhin, a sâng bawka ka khumah chuan a ke a lâwr zuaha. A chhelo hle bawk, en nin hi chu a har ve thlâwt, Pasalṭha thawnthua a changtupa rawlthar a nih chhoh laia a han chhelo chho an sawi ṭhin ang mai hi niin ka hria. A kum en loh phei chuan tlangvâl puitling taksa ang a pu tawha, hmuh a nuam viau bawk.




Ka lehkha chhiar chu duh tâwkin a bulah ka va bawk ve a, a games khêl chu ka lo en ve mai maia. A pro phian lehnghâl, kei chu ni ila ka thi ngun leh tawh viauin ka ring, a sam chu ka lo khalh sak mai maia, higher zirlai sam atân chuan a buk mah mah ṭep a ni, an zirtirtuten an hau ngai lo nge ni dâwn ni.





Chutia a sam ka lo khawih mial mial lai chuan a phone chu dah thutin min pawt tlu rawka, ka phu nasa bawk nên ka au chhuak tur chu ka hmui a rawn  hup vata, ka au chhuak hman ta bik lo.




“I va dawih ve” tiin a nui suka, a kutah ka ben sak nghâl hlak mai. “Khatiang khân tinge i rawn chet thut tehreng ni? Ka thlarau a thlâwk chhuak lo chauh alawm” ka ti chu a rawn nui hawk hawka.




Keiin thâwm dim turin ka lo ti ve thung, ka room chhûng hi phui ṭha viau mahsela ka chhungte'n an hriat palh ka hlau a ni ber mai. An hria a nih vaih chuan ka pi leh pu min ngaihdan tur ka hrethiam lova, keiaia naupang ka ngaizawng hi hria se an lâwm hauhin ka ring lo bawk. Chuvanga Vanrongura nêna kan inkar pawh hi la zêp duh fan ka ni.



  
“Va phei tawh rawh, i duh duh hunah ka room-ah i rawn kala a ṭha lo” ka ti chu a ner nasa mai “Ka duhlo, ka duh duh hunah ka rawn luh ve bawk lohin ka duhloh hunah ka rawn kal peih bîk nâng. Rawn rîm ve ngawt dâwn che ila i chhungte'n mak min ti dâwn si a, ka insûm ve hrâm hrâm a nih hi min ngaihtuah ve la, kan pahniha kan awm theih dân tur awmchhun in ka chêt mai a ngai a nih hi” a tihchuan a dik ka ti ve tho bawk sia ka ngawi ta riha.




Tirh haw pawh ka tum ta lêm lo, kan pahnih chuan movie enin in nghêng rial chuan kan mu a, pâwn lamah chuan thli a tleh leh nasa tawh mai. Zantir lam hi ruah a hân diaka, zanrei lamah a sur leh ṭhin a, a lehlamah chuan a nuam phian mai. Mut a tui duh ka tia, fur ah hi chuan mut char char theih se ka ti ṭhin.




“Ruah hi rawn sur vak sela aw, chuan ka haw phei theilo anga, hetah ka riak leh mai anga” ti a a phun bal bal chu enin “Teuhlo, ruahsur hnuaiah pawh i haw tho ang. Ka sawi tawh kha riah dun fo hi a ṭha miahlo ania” ka ti chu “Ka hria ka hria, i uikawm ṭet ṭut bawk si a. Engmah a thleng lo ang, ka khawih luih ngam che i ring reng reng em ni? Bâkah mipa dik tak chu a hmeichhe thianghlimna khawih chhiatsaktu a ni tur a nilo” a rawn tihchuan ka nui lo thei lo.




A ṭawng dân ṭhin hi ka lâwm riau zel, ka muah pawp zâwk dawn nge mawni. “A ṭha khatiang tur kha a ni, ka tân chuan kha thu ngaihthlâk a nawm zia kha i hrethiam pha kher lo vang” tiin ka nuih zui var vara 


ZAWMNA....


“Khatiang rilru kha nakin hunah thleng i put zêl ka beisei, kan inneih hma chu kan pahnih hian kan thianghlim reng tur a ni. Hmeichhe dang bulah pawh invawng la, chutiang chiah chuan keipawh, hmeichhe dang avânga rilru na taka awm ka duh hauh lo ania” ka tihchuan ka thusawi tum chu a hrethiam ngeiin ka ring.





Min kuah nghet sauha “Ka hmangaih che, he thu hi hrilh che ka duh a ni. Keichuan ka hmuh tirh aṭang che khân i laka ka rilru hi ka hrethiam nghal a ni, naupang mai angin min ngai mahla keichuan naupang rilru mai maiin thu ka sawi hauh lo ania” a ti chu a thusawi dân avâng chuan ka ner nâng a, naupang angin ka ngai emaw a ti nge mawni?





“Naupang angin ngai che ila chuan ka nihpui miah lo ang che. Tikhan min ti ziah suh, naupang pawh i ni tawh lo, nuthlawi rai rual zet chu i ni ve tawh” ka thusawi lai lai chuan a rawn nuih deuh hawk avângin ka ngawi leh riha.




Mitmeng de sar sara min rawn enin ka hnârah chuan a rawn pen kerha “I sawi dik chiah, lerh phei ila chu fa ka neihna a rei tawh ang” a han ti ngei chu a kutah chuan ka sih sak hlawka. A si nghal vang vang mai.




“Lerh vaih teh aw, ka lâwm miahlo ania khatiang thusawi kha, ṭhenkhat inhmangaih em em a mipa in an daisual palh avânga hmeichhe tam takin natna an tuar ṭhin ka hmuh leh hriatte hian ka natpui ania. Hmeichhe dang lakah an insûm zawh loh avânga inṭhen phah ta tam tak an awm bawk. Khatiang kha tuar ve tur chuan ka duh lo, lerh lo la a nimai” ka ti chu a thaw huai reuha.




“Tun thleng ka la insûm ve hrâm hrâm zâwk a sin, chupawh nangmah avângin. Nizân a mi lo te pawh khân min be fo zâwk a sin, hmeichhiate pawh hi in danglam tawha. Incheina sâng leh midangte nun awh avânga mahni taksa zuar duh te hi an tam tawh a sin, ka la upa lo nângin ka tawng tam ta khawp mai, mahsela ka hrilh kher lo ang che. I laka insawitheih ka duh avânga sawi ka niloa, khatiang hmeichhia kha i nih ve ngai ka ring lo bawk, ka sawi tum zâwk chu nang ka duh avâng che in khâng thil zawng zawng kha ka ti ngailo tih hria la ka duh” a rawn ti nghet charha.





Keipawh chuan ka ring thlap bawk, min phatsan anihchuan ka hre leh em em dawna. Chu mi hun a thleng a nih pawhin ka tawrh thiam theih nân tûn aṭangin ka inveng ru thung ang. 



“Ka ring che, i sawi dik chiah. Mahsela khatiang lo dawr duh zingah khân mipa, nupui nei lai reng hi in tam veleh tho a nia. An sawi rûk ka hre ṭhin, an nupuite hriat miahloa hetianga KS dawr ru ṭhin hi an tam an ti tlat nia, Mizo pawh hi ringtu inti si hian a sual hi kan tam ve tawh lutuka, a ṭha an tam ang chiah hian a sual an tama, mahsela kan khawvelah chuan thil ṭha lam ai sual lam hi a langsâr hma ṭhin si a, hnamdangte pawh hian an hre ve leh zêl si a, tûnah chuan fak kan hlawh rualin sawiselna chhe tak tak pawh hmuh tur a tam ve tawh ania” tiin ka châwl deuh data.




“Khatiang lam kha chu sawi tawh lo teh ang. Kan tân a ṭangkai lo, kan pahnih hian inring tawn ila, hlim takin awm zâwk ila ka duh. Midang reng reng kha kan inkar tichhe tu ah hmang lo teh ang, ka bialpa i ni tawha. Ka rinawm dâwn tih hria la, nangpawh ka rinhlelh turin i awm ka ring lo” tiin amah ring tâwk taka ka thusawi chuan a tilâwm tih ka hria.




“Ka va haw phei peihlo ve, mahsela a lo tlai tawh phian bawk si a, hetiang chuan ka lêng rei lutuk dâwn si a. Zuan lêt leh chu ka peih chiahlo leilâwn dawh mai te ania ka duh tawh ni” a ti chu ka nui hak haka. A ni pawh chu ti tho, chutah nghet zet chuan min kuah lehin ka hmuiah chuan a fâwp leh vang vanga.




Keiaia naupang daih mah nisela min tihlaih châng hi a tam khawp mai. Tûn pawh ka en leh ngam tlat lo “Muttui aw ka bialnu duh ber, tui deuhin i muhil dâwn ania. A tlai tak tak hma leh ruah sur hma hian kan phei tawh ange” tiin a tho chhuaka, a thawh rual chuan a vawt nghâl sung sung mai bawk.




Chutia a haw tur chu ka rilru chuan ka ui ru ve takzet, mahsela a mawi bawk siloa. Miin min hmu kher lo mahsela hmeichhia leh mipa innei pawh nilo riahdun chu thil ṭha ber a nilo bawk nên ui ru tak chung chuan ka mangṭha zuia.




A bathlar lama a pakai phei ka hmuh chuan ka thaw huai mai, kan in hi a inzawm lo chauha. Chuvanga awlsam taka ka room-a rawn kal thei ṭhin pawh a ni, a lehlamah chuan a ṭha phian mai. Kan inah tlangvâl angin rawn lêng ringawt dâwn sela ka chhungte'n an hrechiang ropui si a, reilote-ah kan inkar an hre vat dâwn bawk nên min hau dâwn tih lah a chiang reng.





Ka pi khirh dân ka hre tawha, ka nu leh pa ngei pawh an innei lo ṭêp tihte thlengin ka hre ve bawk nên langsâr taka inzui ka duh lo a ni ber mai. Tûnah chuan an hmuhah phei chuan unau ang maiin kan awm dera, an ni pawhin an la hrethiam lêm lo a nih hmêl.




Thawk la ham hamin ka khumah chuan ka muthla leha, a thusawite chu ka ngaihtuah leta. Ka nui nghâl hak mai, a duhthusam sawi hun a hriat lutuk avângin kan inkar a ṭha leh dêr chu a nia. A fing hle tih a hriat, keichuan khatiang thu kan sawi lai pawh kha ka lo hre leh meuh tawh lo kha a nia, a ni erawhin ka thutiam hman ṭangkai dân tur a lo hre phian bawk sia.



Phone ah chuan intext leh in eng eng emaw chu kan sawi dûn a, a tlai tawh avâng chuan rei pawh in be tawh lo in in muttuiin phone chu kan dah zuia. Keipawh tui tak chuan ka muhil zawm ve ta mai bawka, zîng ah ka harh rual chuan sana ka ena, dar 6 chiah a la ni,  ruah a sûr nasat êm avâng chuan tho chhuak peihlo in ka mu renga.




Hetiang reng chuan college a kal theih pawh ka ring lo. Ruah sur chu thli a tel tlata, ka pi leh pu hian vah chhuah an phal dâwn lo bawk. College kan class group ka lût chu a la reh riaia, tumah an la tho bik lo a nih hmêl.
 



“Morning i mutui em?” Dsa message ka hmuh rual chuan amah ah chuan ka bur ta chata, “Um mutui lutuk, nangmah zâwk kha i mutui em?” tih chu ka thawna, a rawn seen ve lehnghâl zat tho.



Kan inbiaka kan online tawn tawh hi chuan midangah kan lût kawi ngailo tih hriat tak hian kan in seen sak zung zung ṭhin a. Hei hi ka duhdân tak ani bawk, ka bialpa chuan keimah au chiah a rilru pe sela tih hi ka duh ber a ni ṭhin a, Vanrongura pawh hi chutiang chiah chu a ni.





“Mutui khawp mai, ka mumangah kan lo innei a a nuam viau mai” a rawn tihchuan ka nui seiha, chutah ka chhân leh hma chuan a mah zâwk chuan a rawn call zata. Ka la rang viau bawk, ka lâk rual rual chuan “Ruah hi ka hua” a rawn ti nghal tâwnga, ka nui leh deuh haka.




“Keichuan ka haw ve lo, a nuam ka ti zâwk a sin. Khawlum hnuaia mut reng ai chuan hetia ruahsur laia mut lum mai mai hi a nuam a lawm, school chawlh te hi nise” ka tihlai chuan amah vek chuan “An rawn puan zawh chiah kha, Aizawl khawpui chhûnga zirna in zawng zawng vawiin atân khar rih a ni an tihkha, accident bâkah leimin a tam êm avângin zirlai naupang an ngaihtuah a nih hmêl” a tihchuan ka lâwm ngei mai.





Ka phone ka en chu an lo ti tak taka, kan class group ah chuan ṭhenkhatin an lo sawi sawi ṭan mêk a, an phûr hlawm hle lehnghâl. Khawpuiah chuan tihian ruah leh thli a nat deuh chuan chawlh an puang zung zunga, thingtlangah kha chuan ruah leh thli hnuaiah mahni khua ah nilo khawdangah ke in kan la kal ngat zel kha a nia, a inthlauh theih ngei mai.




Form huh leh berh vek khawp khân mi khuaah kan kala, hetah erawh zirlai hi an vânnei ka ti. Thingtlângah kha chuan a ṭul fê te a nih loh chuan chawlh kha an puang ve ngai lo rêng rêng kha a nia, kan in kal nawm hleih teh e ka ti ṭhin, Zirtirtu lah khawpuiah a ṭha rual an awm khâwm a, thingtlangah chuan a ṭha deuh an han dah pawhin awm rei peih lo in in sawn dân ngawt an zawng ṭhin kha a nia, zirtirtute kha kan in daih ngai hek lo.



Hetah erawh chuan zirtirtu an tam mah mah leh thunga, hmunpui leh thingtlâng hi chu alo in ang theilo a nih hi.




“A nuam dawn e, nilêngin kan mu teh ang. Chawlh manah ka mu heuh heuh ang” tiin phûr zet hian ka ṭawng zui barh barha. A ni erawh a ngawi leh ngar tawha, chutah ka duh ka sawi zo ta maw tihah chuan “Chhunah lo phei ka duh dâwn sia, ruah hi sur tawh lo sela ka ti, i room-ah khân movie en dun leh mai mai te kha ka châk, ruah a sûr pawhin ka lo kal tho ang” a tihchuan ka hmui ka pet zauha.




Ka pute'n hmu se an hauh pawh ka ring vak lo bawk nên ka khap duh ta lo. Bâkah ka chhûngte ho hi ruah a sûr hi chuan an room-ah an inkhung diak zela, a chânga zung tur a an chhuak a nih loh chuan room hi nuam kan ti tlâng hlawm viau mai 





“Ka dah phawt ange, u Nunpuii rawngbawl te ka va pui anga, chhûnah chuan i duh leh ilo lêng phei dâwn ania” ka tihchuan phur zet hian a rawn kal ngei tur thu sawiin call chu kan dah zuia.




Ka piten min hau êm lovang chu maw? Amah khân chhuanlam tur a hriat leh mai chu ka ring, a unaute hi a ṭhen nupui pasal neiin an awm tawha, a ni hi a naupang ber a ni bawka. Tihian a nu leh pa bula awm chhun a nih vâng nge nu Mapuii te pawh hian an duatin an ngaihsak ṭhin viaua, chubâkah mipa hi chu hmeichhia ang lo takin an zalên a, han lêng chhuak pawh nise chhûngte hauh hi an tuar khât khawp mai.




Hmeichhia erawhin engkimah chhûngte leh khawtlang kan thlir a ṭul a, han lêng ve deuh hlek ila sawisêl kan kai zel si a, nun hi a chêp ve ṭhin.



“U Nunpui ka lo pui ang che” tiin a bulah va dingin a Maian hnah hik mawlh mawlh lai chu ka va pui sawk sawka, a ni erawh chuan lo ti ve lo turin min lo tinghal zata. Awmpui a nih vâng hian a inthlahrung ṭhin tih ka hria, mahsela keimah anga thingtlâng mi a nihna angah hian ka kâwm ngeih a, a bula awm nuam ka ti bawk nên school chawlh châng hi chuan ka pui ve lâwp lâwp zel.




Rawngbawl pah chuan kan titi leh mawlh mawlha, thawnthu chungchangte sawiin a châng leh kan nui leh hak ṭhin. A ni pawhin bialpa a lo nei ve ngei chu niin, an khaw lam mi a nih thu leh an inzuina pawh a rei ve tawh thu a sawi chuan ka hmu châk ve takzet..





“Nang teh bialpa i nei em?” a rawn tihchuan ka bu nghata “Nei ve e” ka ti chu a lo phûr nasa mai “Helaia mi a ni ang tiraw? Nang phei chu i hmêlṭha a, bialpa pawh i nei chhelo viau ang chu” a tihchuan ka nui hak haka.




“Helai a mi chu ni e, chutiangin ka hmêlṭha hleinem, bâkah hmêl pawh hi a ni ber lo. Hmeichhe tân hi chuan hmangaihtu leh duattu hi an hlu alawm” ka ti chu a lo bu ve nghat nghata.

DUHAISAM DUHLAI ZORINPUIA S2 



CHAPTER 15



“Ih u Nunpui ka ring thei che angem?” ka tihchuan min rawn en vatin zawi deuh zâwk hian “Engthilah maw? Min rin ngam phawt chuan keichuan ka sawi chhuak lo ang” a tihchuan ka thaw huaia, ka hre chiang ve tawh bawk a a sawi chhuak dawn lo tih ka rin avânga sawi chhuak ka ni bawk.




“Ka bialpa chu ania” ka tihchuan phûr zet hian min rawn hnaiha “Sawi la, khawiah mah ka sawi lo ang. Kan pahnih thuruk ni rawh se” a tihchuan ka nui ta var vara, ka rinngam a ni bawka ka chhûngte lakah pawh ani hi chu ka vêng thâwng lo bawk.




“Ka bialpa chu saw ṭhenawm tlangvâl Vanrongura kha ania” ka tihchuan a phu zawk mai. “Enga! Hmannia rawn lêng hmelṭha deuh kha em ni?” min iai pui dawn emaw ka lo tih tawh laia chutia phûr hmêl taka a rawn ṭawng avâng chuan ka thaw huai mai.




Ala naupang bawk si a, min iai pui ka hlau a ni ber mai. Ka bu nghauh nghauh a “Kha kha a nia, chuvanga hetianga awm ka ni pakhata. Ka chhûngte hriattîr ka la duhloa, ala naupang bawk sia kan inkawp an phalloh ka hlau a” ka tihchuan a kut a vai hlaka.




“A ho emai mate, Mihringte chuan duhzâwng leh mit la zawng kan nei veka. Kumte hi ngaihpawimawh a ṭhat rualin hmangaihna dik tâkah chuan kum inthlauh lutuk hi a ni ber lo, mahni aia upa nei te pawh a mipa in an duha an hmangaih tak tak loh phei chuan an inṭhen leh thoa, aia naupang nei innei rei tak pawh an awm ve nual tho ania. Khatiang lam chu lungkham lutuk duh suh” a tihchuan ka thaw huai mai.





Ka ṭhiante sawi dân pawh ani, kum anga in en chi a ni tawh lo tûn angah chuan. Rilru puitling hma chi leh upa deuh si a rilru naupang chhia deuhte hi an awm ve leh tlat tawha. Kum anga in teh chi a ni tawh hauh lo.



“Um ka chhûngte hriat hi ka la duhloa, an ngaihdan tur ka hre siloa” ka tihchuan “Hlauthawng duh suh, khatiang lam chu engmah ka sawi chhuak dawn lo, mahsela in inthup reng thei dâwn lo tih hria la, la sawi hun i neih ngei ngei a ngai dâwn ania” a tihchuan ka bu nghata.





A sawi dik chiah, engtikah emaw chuan an la hre chhuak dawn tho tho a. Chu mi hunah erawh chuan engpawh huamin ka sawi mai tur a ni, “A hrim hrimah keichuan ka lo ringhlel daih tawh cheu a, a rawn lang ngunin bâkah an rawn lên ni a in awm dân kha ka lo hmu reng a, ṭhian mai mai chu in ang lo alawm. A hmelṭha bawk sia, hmeichhe ho duh chi tak a nih dâwn kha, in inhmeh dâwn kha. Rawlthar pianthiam leh hmêlṭha tak chu anih kha” a tihchuan keimah min fak lo mahse ka lo hlim ve veng veng mai.




Bialpa ṭha tak nei niin ka inhriat phah bawk, ni e Vanrongura zawng a hmêl chu khawvêla mipa hmêlṭha ber chu a ni lo anga, Mizoramah pawh a mah aia hmêlṭha chu an awm ṭeuh tho ang. Mahsela hmelṭha an sawi zîngah chuan a tel ngei ngei ang tih tur khawpin a chhelo ve tlat a.



Ka chhûngte ho an rawn thawh chhuah tâk avângin engmah kan sawi duh tawh rihloa, thudangah pakaiin kan nui nghâl hak hak mai. 


Pute Tluanga pawh a nupui tur lam nên kan insawi fel ta bawka, thla leh ni 15 a innei turin an ti tlua, July thla a nih hmêl e. Ka nute pawh engkim an hrilh tawha, keini pawh kan inpuah chah ṭan a, tûnah pawh kan chhûngte hmun dang danga awm chu an hrilh kual vek tawha.




Putea pawhin an in dan nghal dâwn avângin kan inpiah lawkah in sak sa diam chu leiin an thawm ṭha vek tawh bawka. Kei pawh ka phûr viau mai, ka nu leh pa te an rawn kal ve dâwn tih ka hriat chian avângin ka nghâkhlel zual.



“Nunpui hei hi min lo tuam sak lawk ta che” ti a pute Bawiha rawn kal hnai chuan a kut a zai palh ni ngei tur ani a rawn ti lang va va a, kei erawh thisen hi ka ngaina lêm lo nên ka lo hawi sawn vat mai.




“Oh! I inzai palh elo? A na viau em?” u Nunpuii chuan a lo ti sawk sawka, tuiah chuan tihfai sakin an intuamsak zui malh malh chu ka ena. An inbiak dân ah chuan eng emaw riau hi a awm hian ka hre tlat peka, ka hriatsual zâwk nge ni. 




Putean a en dân te chu mak ka ti riau, Vanrongura min en dân chiah chiah ani. U Nunpuii hi a fela, a hmêl pawh a chhe hek lo, a vun erawh ngo chiam a niloa, hâng ngaihnobei kan tih ṭhin ang hi ani. Chutia  an in be mawlh mawlh chu ka en renga, putean a en reng laiin u Nunpuii erawh chuan a en ṭha ngam hauh lo thung.




“A zo e” ti a u Nunpuii a nuih var var tâkah chuan putea pawh a nui ve suka, a kalsawn leh mai bawk. U Nunpuii chuan a en zui vang vang mai, chutah ka lo en reng tih a hriat avâng chuan a hawisawn vata “Ehem! Thil eng emaw awm anga ka hriat hi a dik em?” ka ti chu u Nunpuii chuan min rawn bêng pawpa.




Ka bân chu ka tuai nghal hauh hauh mai “I ti âwm ang lo lutuk, i piten an hria ange khatiang rawn sawi tawh reng reng suh. A zahthlâk, bialpa ka nei ka tihkha i putea pawhin bialnu a nei ang, khatiang rawn sawi tawh reng reng suh” a rawn tih hlak hlak tâkah chuan nui chungin ka kalsawna, mahsela putea melh dânah kha chuan awmpui ang mai mai chuan a en lo tih ka hre thiam ve tlat.




Hmangaihna leh inngaihzawnna lamah tawnhriat la ngah lo mah ila mi mitmei hrethiam lo tur khawpa bo chu ka ni biklo. 



Chaw ei lai te chuan ka pi leh pu chuan pute Tluanga chu an fuih mawlh mawlha, chhungkaw pa ber a nih tawh dâwn avânga a nun ngei pawh uluk tur leh a nupui duat tur te chuan an chah mawlh mawlha, a ni pawhin a lo bûk pui nghat nghat mai.




Putea te ho ka fakna deuh chu ka pi leh pu thusawi hi an hnial mai mai ngailoa, an zawmna theihna kawngah chuan an zawm ṭha hle ṭhin bawk. Thu an hnial ngai lova, an duh loh zâwng leh an ngaihdan niloah erawh chuan ka pi leh pu pawh hian an tihdik loh a nihchuan an hnial ngai bik lo.





Chaw eikhamah chuan Vanrongura chu a rawn kal ta tak taka, ka pi leh pu chuan an lo fiam lehnghâl bawrh bawrh mai. “Tunlai chu i va rawn lêng khât ve, i u Sangpuii pawh a khua a har ve ṭhin a, rawn lêng fo rawh” an lo tihchuan a ni pawh a bu nghat nghata.




Ṭhutthlengah chuan ṭhu dunin movie chu kan ena, kan titi pah mawlh mawlh bawk. U Nunpuii lah chuan engkim a hre tawh nên ka pite hmuh loh lamah chuan min lo tilui zauh zauh mai. 




Kan intin deuh zuai zuaia, ngeiawm lutuka a nui sâwng te chu ka ngei tak tak a ni. Vanrongura lah chuan engmah hre ve hek lo tv lam chu hmuhnawm tih hmêl zet hian a en renga, keipawhin ngai haw duh ta bik lo vin ka en ve ta daiha.




Ka pi leh pu erawh ruah a sûr nasa bawk nên room lamah an awm leh chawt tawha. Pute te pahnih pawh an ni tho mai, vawiin chu an ni pawh hna an kal dawn lo a nih hmêl.




“Ka ngai tawh lutuk che a ka rawn kal tawp” ka bengbula a rawn tih sar sar avâng chuan ka nui deuh haka. Ka kut rawn vuanin u Nunpuii lam chu a hawi zawka “Hlauthawng suh, a hre vek tawh. Ka hrilha” ka tihchuan a thaw huai reuh lehnghâl.




Chutah insiam remin ka mal kham chuan a rawn mu zui ta zata, keipawhin ka hau duh ta biklo. Ka kut chu hûm bet ranin tv chu kan en dûn a, a nuam dangdai phian mai.


Modern farmer kan en chu kan nuih pui hak haka, nuihna tur a tam bawk nên kan hlimpui phian mai. U Nunpuii pawh a chêt fel zawhah chuan kan bulah a rawn ṭhu ve a, a ṭawng duh bawk nên Vanrongura nên pawh an inkâwm thei ta phiana.




Kan nui leh hak ṭhin a, pathumte lek mah ni ila kan thâwm chu ana ve viau mai. Pâwnlam lah chhûm dum chhah zet avângin a thim khupa, nikhua chu nuam viau lo mahsela eng emaw ti zawng tak hian a lunglên thlâk ka ti a. Boruak vawt deuh mahsela nuam ka tih chi tak a ni.


Mite tân chhiatna thlen ṭhin tu nimahse keichuan fur hun hi nuam ka ti a, a chhan pawh ruahsur hian keimahah chuan hahdamna min pe ṭhin, ka rilru nat pawhin mite hriat loh turin min thup puia. Ka lungngaihna pawh chhûm dum anga rawn zâm phui mup mup châng nei mahse a hnu lawkah thli chuan a rawn chhêm kiang leh ṭhin.



Mi chuan thlasik te hi an hun duh lai ber a ni ṭhin a, mahsela keichuan fur hun hi ka hun ngainat lai ber ka ti ngam sak mai.



A vawh zual tâk êm avângin u Nunpuii pawh chawlh hahdam tumin inhnuai lamah a chhuka, chuveleh Vanrongura chuan min kuahin kan puan sinlai chu min inzâwnpuia, kei erawh ka chhûngte rawn chhuah ka hlau bawk nên ka hnial ve ṭâng ṭâng mai.




“A ho emai, naupang ang bakin min la en lo. Bâkah an rawn chhuak kher lovang, mu mai mai rawh” a ti tlata. Hlauhthâwnna te hi a nei ve siloa, a buaithlâk ṭhin a nih hi, mu duh lo chuan ka ṭhu mu timai ang ka chhûngte an rawn chhuah pawha min hriatthiam lohna tur ang chuan ka awma, min hnial lui ta bik lo.




“Ninawm ve, hetiang renga inthup ngai hi ka ning tawh. Lên chhuah tir vek mai ta che, ninawm lutuk. Romantic deuhin ruah a sur ve êm êm a, chutah bialnute pawh kan kuah theilo ania. Hetiang te chuan ruahsur romantic man a awm lo emai” a rawn ti nia! Awi hepa hi, enge a hriat ni.



“A romantic thlâwt lo aw” ka ti chu min rawn melh chho zawkin “Romantic e, pâwn lamah thli leh ruah an surin an thaw vawk vawka, khua a thim phui mup mai bawk. He hun hi maw inngaizawng te chuan hun romantic berah an puang ṭhin a sin, zei ve deuh la chuan i hria ang, inngaizawng tâna inkuah lumna hun ṭha tak a nih hi” a tihchuan ka nui haka.




Chutiang ngaihtuahna leh thil chu khawi aṭanga a lo hriat nge ni dâwn ni. A sawi dik ve tho bawk sia, in ngaizawngte tân chuan chhûngte hmuh loh lamah hun nuam ber hmanna hun a ni ve rêng ang chu, ka tân erawh chuan a vâwt lam maha, mahsela a nuam viau tho si.



Fur hi chu keichuan chhiatna thlentu ai chuan mut tinuamtu thla duhawm ber ka ti. Hahdam tak hian han mu ila a nuam ber hian ka hre ṭhin, thlasik leh nipui ah hi chuan mut a nuam ka ti meuhlo. Thlasikah a vâwt em ema, nipuiah a lum leh em em a, hei vâng hi a niang fur hi ka hun ngainat ber a nih ni.



Vanrongura sam chu ka ṭhâm sak neuh neuha, a ni pawhin thu âwih tak leh chhing diar diar chung hian a lo dawh ve bawka. A muhil zui daih lehnghal, ka dul zâwna bei chunga a thaw sak sak chu hmuh nuam ka ti takzet, a duhawm hliah hliah bawk. A hmui sen no châk te chu hmeichhe hmui ang mai a ni, a thaw sek sek a. A thla a muang hle tih a hriat bawk. 


ZAWMNA...


Pute Tluanga rawn chhuak ka hmuh chuan ka insiam rem vata, mahsela Vanrongura a mutui bawk nên insiamṭhat hleihtheih pawh anilo. Mahsela puan kan sin bâkah ṭhutthlêng chuan min hliah bawk nên a rawn hmu lo aniang a kal tlang nal nala.



A rawn lêt leh lam pawh chuan ala hmu chuang lo, ka thaw deuh huai thei. Vanrongura lah chu a mutui em em mai lehnghâla, mipa naupang thlamuang tak leh enghelh neiloa a nu bula a muhil te pawh hi a ang ka ti lek lek mai.



A ni tel hian ka duh ve telh telh zel tih pawh ka hria, an classmate te pawhin an star nasa tih ka hria a. A mah a ngo in a hmaifang a ṭha bawk nên Mizo lam ai chuan philipines lam rawng a kai daiha. Mahsela chu chuan a hmelṭhat tâwk zia a ti lang chiang daih thung.




“Engtin nge kan awm zêl ang aw? Tûnah chuan kan chhungte'n min la hrethiam lova, mahsela nakinah chuan lan chhuah hun a nei ngei ngei dawn a. Chumi hunah chuan tûn ang reng hian kan awm thei angem tih ka ngaihtuah châng hi chuan rilru a hah ṭhin” tiin ka phun sep sepa.



Ka pi zia ka hria a, a duhzâwng tê lo chu nawr luih a harin a thu duh zia pawh ka hria. Ka pa ngei pawh ka nu nên an inruk hma kha chuan a pawm lo a nih kha, ka pu hi chu a zia tak a awma, chhûngkua ah chuan nu ber thu hi an ngaithla tel ve lo thei tawh siloa, tûn angah chuan nu neih fuh hi a ngai tawh rêng a ni.





A samah chuan ṭham sak neuh neuhin thla ka lâksaka, a hmuhnawm hliah hliah hian ka hria. Chutah a rawn chet tâk ṭuah ṭuahah chuan ka kut chu ka la sawn vata, a rawn meng nghal diar diar mai.




Ka lo nuih chu min nuih lêt ve saka, a rawn ṭhu chhuak nghal zat bawk “Dar engzat nge ni tawha?” a rawn ti chu ka phone sana chu ka en zauha “Dar 2 a ri leh der tawh a nih hi, i muhil rei khawp mai” ka tihchuan a bu ve nghata.




“I mal kha kham a nuam viau pawh a nimahna ti em em a ka muttui ni, ka va haw dawn tawh ange i chhûngte hi hian min ngai dik lo hlauh ange” a tihchuan ka hnial tawh bik lo. An pindanah awm vek mahsela an rawn chhuak ve zeuh zeuh si a, kan awm dun rei lutuk chuan a hun hma in min hre chhuak ang tih ka hlau.




Pâwn thleng chuan ka va thlaha, kan inhnaih bawka ruah a sûr tam ta lo bawk nên a huh hman ka ring chiah lo. Chutah a tlân phei chu ka beisei loh lutukin kawng chu a lo nal nge a tawlhthlu ta ṭhuai a, a ke chu chunglamah a vawr suau mai.




A mawng chuan leiah a ṭhu chawta, a ri deuh thlawp mai. “Awi!” ti a va pan mai ka tum lai chuan rang zet hian a ding chhuak zawka, rawn hawi lêt tawh map lo hian an inchhungah chuan a tlân lût ta daiha, ka en zui vung vung mai.




Khati teh thuta a rawn tho rang leh si chuan a na vak lo ni turah ka dah ve ringawta. A tlûk dân lah kha ka nuih a za deuh tlat, bialnu te hmaah ke vân vawr suaua han tluk chu a zahthlâk ve duh ngawt ang chu. Mahse a duhawm ka ti, ka nui chhuak haka; inchhûng ka luh rual chuan u Nunpuii pawh lo chho leh tawhin chaw chhum a lo siam mawlh mawlha, kei erawh room-ah ka lût ta thunga.




Vanrongura room lam ka va hawi chuan a au ri ang pui pui ka hria a, enge maw chutia a au vak vak chu ni. Ka ngaih ṭha lo chuan ka call a, a au ri chu a tâwp hmaka, chhûm a zin avângin a mah erawh ka hmu thei hauh lo.




Phone chu a ring vang vang hnuah a rawn ri ta khapa “I ṭha em? Ni chin kha i tlu na em?” ka ti vata, a ngawih deuh ren râwn hnuah “Ka zak” a rawn ti ta tawla, a hmuh loh lamah ka ṭhen leh sak mai. Keipawh ni ila ka zak ve tho ang.



“Ngati maw? Khatiang te chu a thleng ve ṭhin alawm, tumah pawhin an hmuh loh che kha. Nangmah kha i na reng reng em?” ka ti leha, ka ngaihtuah tak tak. A au vak kha ka hre bawk nên ngaih chu a ṭha chiah lo a ni, mahsela tûnah erawh chuan na tuar ang pawhin a awm leh hauh silo.





“Na lo, mahsela ka bialnu hma a khatianga tlûk kha ka duh miahlo. Ka zak bawk, ka zak ngawih ngawih” a rawn tih leh tâkah chuan ka nui chhuak ta haka, a ṭawngkam hian min tihlim ṭhin, fiamthu thawh si lo hian a ṭawngkam mak leh thusawi mak pui pui te hian min ti hlim ka timai.




Hetianga mipa min tihlim tu hi ka la ṭawng ngailo, ani erawh chuan a thusawi hote hmangin min tinui leh ṭhin. Ka khumah chuan mu in puan chu ka sin ṭha sauh sauha “Zak duh suh, a ho lutuk. I tum rêng vâng pawh a nih loh kha, khatiang avâng mai maia ka duhloh che i ring zâwk nge?” ka ti chu rang zet hian a rawn aih vat a.




“Chutiang pawh a nilo, mahsela ka zak ve tho alawm. Tikhan sawi lo mah la i aw aṭang kha chuan i nuih a za tih ka hre reng” a rawn ti leh chu ka nui ta haka. In zêp ve tum viau mah ila a lo hrethiam ve tho a nih hmêl. 




“Ka nuih miah lo che a nia, khatiang sawi tawh lo ang. Zanin enge i tih dâwn?” ka tihchuan a rawn nui ve ta haka “Ka lo riak ang chu ka ti, khua a vawt si a mahni a mut hi ka ning riau, mite ang hian thlasik lai pawha min tilum thei tur tu emaw pangtilum chu ka mamawh ve tawh a ni” a rawn ti deuh khera.




“I zak lo ham ham lutuk aw, kum 20 pawh i la tlin loh laiin khatiang te kha ngaihtuah pawh ngaihtuah suh. I hmalam hun siamrem hmasa rawh tih a nih kha, ât huaia nupui te hi neih mai mai loh tur. Nakina i inchhîr leh na tur a ni thei, chubâkah keichu pasal lerh deuhte ka duh dâwn lo a, inneih hnu a in uiresan tih ang reng vel te hi ka ngaina lo. Chuvang chuan nangpawh tûn aṭangin in siamrem vek ang che” ka ti chu a rawn la na ngang mai.





“Min va ngai lerh âwm ve a, chutiang mi ka nilo aw. Innei pawh ni ila i inchhir ngai miah lo ang, hmeichhe dang vâng phei chuan i ṭap ngai dâwn lo tihkha hre tawp rawh. Ka tân chuan nangmah bâk an awm ngai dâwn lo, min rinngam phawt chuan keichu rintlâk takin ka awm dâwn” a rawn ti duaha.




Hetiang ka sawi chhan pawh inneih hma aṭang hian ka tawn theih tam tak hi sawi hmasaka, nakin hun thlenga ka hmalam hun atân a ti ka ni. Keipawh hi nupui a sawi avâng ringawtin kan hmalam hun te ka lo suangtuah ania! Amak ṭhin mange, hepa hian ka ngaihtuah loh tur thil min ngaihtuah tir tam ta khawp mai.




“Ka hria a lawm, i rinawm pawh ka ring. Mahsela ka sawi tawh kha, inneih hi a hmanhmawh thlâk loh, fa te kan nei dawna kan fate hmalam hun thlenga dâwn sa a inpeih sa a inneih ka duh avâng zâwk a nia. Tûnah chuan kan la upa lo ve ve a, hmanhmawh lo phawt ang aw, hun ala tam a lawm. Kan tân khua a tlai bik nâng” ka tihchuan min rawn hnial ta biklo a.





Chutah an ṭhianho a zanthum vêl hiking vêl an sawi thu a rawn sawi chuan ka phûr ve viau mai, mahsela tûnah chuan fur a la ni rih si a kan kal theih hmêl loh. September thla vêlah dam chuan hmang ila a nuam phian ang ka ring, thlasik rawn inṭan tur Ber thla boruak hi chu khaw nawm ve lai tak a nih avâng hian a remchang bawka.




“Ber thla lamah kal kan tum dâwn ania aw, tûnah chuan fur lai a nia Vangvat a tam dawn lutuk” ka tihchuan a rawn pawm ve mai “Bakah chhiatna te kan tâwk palh theia, a him lai nghah ve angai. Tûnah pawh leimin avânga chhiatna tam tawh zia hi, mahsela hiking chu ka châk reng” ka tihchuan a nui deuh hawk hawka.




A nui ri chu hriat nuam tak a ni, a ni ka biak hi chuan han inhnial peih viau mah ila ka hlim riau zel lawia. Bâkah hmeichhia hi chuan kan ṭhiante emaw kan mi nêl tak leh kan duh loh hi chu kan hnial ṭha peih tak tak lo an lo tih fo kha maw. Chuvang te pawh chu a nimahna Vanrongura hi chu thinrim ni miah siloa hnial hi a nuam ka ti tlat zel. 




Reife kan inbia a, a châng leh kan infiama, a châng leh kan inhniala chutiang reng reng chuan hun kan hmang a ni ber mai. Bâkah han induh ve viau mah ila inhnial loh hi chuan sawi tur hi avâng riau zel, inhnial hi chuan sawi tur hriat a awl ve deuh. 



Duh viau mah ila kan inzah rûkna hian a nimahna sawi tur hi kan pai tam lo ṭhin khawp mai. Chutih rual erawh chuan min rawn biak loh hi chuan a ngaihawm ve veng veng tho si, nitin hian zân mut dâwn leh zîngah kan in call ziaha, thu tam sawi ngai lo mah ila nitina kan lo tih chhoh tâkah chuan ngaia neih a lo awla, a rawn call loh hi chuan ka awm thiam ta meuhlo.




Call dah hnu ah chuan lehkha chu ka zir leh malh malha, a châng chuan ka ning ve ṭhin. Tihian nasa takin kan han zira, chutah result ṭha tak neih loh phei chuan chhungte'n min hau leh tho a, chutah result ṭha neiin hna han zawng dawn pawh ni ila Mizoramah hi chuan hna a vangin a awm chhun lah mi hausa fate leh sawipuitu nei ṭha in an chang zo zel bawk si a, lehkhathiam hna neilo kan tlep tuara. 




Kan lehkha zir dân hi a châng chuan a hlâwk lo ka ti ṭhin, zirna hi a ṭhat rualin chhawr chhuahna tur hi kan ngah lo ve khawp hian ka hria. Ram dangah hna han thawk thei ila chu thuhran, tihian degree nei  furin khawlaiah kan inhmelhriat loh kal pelh vawk vawk ringawta, a hlawk lo hi ka ti ṭhin.




Rilru hah leh pass loh hlau reng rengin kan han zira, kan zir chhuak ta chêng a. Hna a lo vâng leh si a, a tâwpah chuan kuthnathawh leh cement chawh turh tirh bâk hi kan ti leh ngai meuhlo chu a nih hi.



A ṭhen te lah an zir sâng mah maha, mahni hnam ṭawng bo ṭhak khawpin lehkha an thiam leh daiha. Hnamdang ṭawng ziak dik em em si khân a hnam ṭawng erawh a ziak dik leh hlei theilo a, kan lehkhathiam dân hi ṭhenkhat tân hi chuan a ṭangkai lo ve thlawt ani. 



Ka nu call a rawn luh avâng chuan ka lehkha bib lai chu dahin ka la zuia “Aw nu” ka tihchuan lehlam aṭang chuan a rawn au zui lâng lânga, putea Tluanga nupui neih tur vêl chu min rawn zâwt nawn leha, keipawh chuan hmeichhe ṭha tak a nih thu bâk han sawi tûr vak ka hrelo. Vawithum vêl chu kan inah chaw a rawn ei tawha, hmeichhe rilru suallo tak a ni chuan ka hria.




Chung thu ka nu ka hrilh chuan a thaw ve huai reuha “Kan rawn chhuk hma ang, khalamah bazar ve te pawh kan duh dawna, hei inchhûng bungrua hi a ṭhen hi thlâk a ngai tawha, i pa pawh feh suh ka ti tak nângin a feh lui leh tho a nih kha” a rawn ti bawrh bawrha.




A phun zui hlak hlak chu ka nuih deuh haka, ka pa hi chu pa taima ve ngang hi a nia. Amah avânga hetiang dinhmun thleng hi kan ni ka tilo theilo, fa min nei nual tawh nângin tu ṭanpuina mah tel hauhloin min enkawl vek thei a nia, ka tân chuan khawvêla pa ropui ber a ni ve tlat. 



DUHAISAM DUHLAI ZORINPUIA S2 


CHAPTER 16 




“A u,” ka naute sumo aṭanga rawn chhuak chuan min rawn au nghal chata, keipawhin ka pan nghal vat bawk. Inkuah khâwmin kan au chûl a, putea te inneih a hnai tawh bawk nên ka chhûngkuate an rawn kal kim thei chu ka lâwm ngei mai. 





Ka nu leh ka pa chu panin ka kuah leh vang vanga, Vanrongura pawh a awm ve ran bawk. “A u, saw tunge a vân hmelṭha em em?” kan naupang berin a rawn tihchuan ka nui haka, Vanrongura a sawina tih ka hria.



“I duh leh u Ro tila, i duh leh u Ngur tila a theih ve ve” ka tihchuan Vanrongura chuan min rawn pan vata, ka unaute chu a chibai ve a, ka nau chiah nên hian an inrual bawk nên an inkâwm thei viau in ka ring.



“Ehe! I va lian tawh ve, kan rawn zin lai kha chuan ila têt nên aw” ka nu in a rawn tihluai chu Dsa chuan a en ve vata “Nu Zo in dam ṭha maw? In rawn zin dâwn tih ka lo hria a, ka lo hmuak ve che u a nih hi” a ti ve vata, ka nu biak dân pawh a thiam hi. Zâmna eih a nei miahlo bawk.




“Dam e, i va in la puitling reuh tawh ve. Hmuh loh chhûngin hei i zak pawh kan chen tawh siloh, i va ṭhang nasa em em ve” ka nu chuan nui hawk hawk chung chuan a ti a. Keipawh ka lo nui ve sak mai, chutia nêl taka an inbia chuan ka awm a tinuam ve veng venga, mahsela kan inkar an la hre miau siloa.




Hre ta se ka nu leh pa hian engtin nge an ngaih ve ang le? An ni chuan min hriatthiam ngei ka ring.



“A ngai a lawm, chaw eilo in ka awm reng thei bik siloa. Ṭhan ka duh ve miau si chuan chaw kha ka ei ṭeuh angai si a, tûnah chuan ka duh ai ka lian ta mah mah a nih hi” tiin ka pa a rawn kal hnaih ve tâkah chuan a ngawi zui ta daiha.




“U Rinpui hei hi ṭhenawm nau, hmana ina rawn tlân lût ṭhin i pawm ziah ṭhin kha a nih hi. Ngurte, i pa Rinpuia a nih hi aw,” a tihchuan Vanrongura pawh a bu nghata. Ka pa bulah chuan a ṭawng tam ta vak lo a, ka nuih a ti za ru riau mai.



A awmdân chu a duhawm riau mai, ka pa hi chu a hre ṭha lo tân chuan a zahawm ve êm bawka. A mah a ṭawng tam lo bawk nên nêl hi a har hmêl reng a, mahsela a hrechiang tawh ho hi chuan an fiam bawrh bawrh ngam ṭhin thung.




“Ti rawh u, inchhungah i lût ang u. Hetah chuan tihtur a awm tawh lo” ka piin a rawn tih takah chuan kan inzui lût diah diaha. 



“A nuam i ti em?” ti a a bengbula ka va phun sar sar chu “Ka zak, makpa interview ve te a ngai si a. Mahsela ka interview na ber te hian an makpa tur ka ni tih pawh an la hre miahlo a” a tihchuan ka nui deuh haka. 




“Nakinah an la hre mai ang, tûnah rihchuan kan la inthup a ngai ka tihkha. Chutilo chu ka pi leh pu ngaihdan bâkah i nu leh pa ngaihdan tur thlengin kan hre siloa, a hun hma a an hriat chuan kan pahnih tân a pawi thei tih i hriat kha” ka ti leh sepa, a bu ve nghat nghat mai.




Inchhûng kan lût a, chhûngkhat laina hmun hrang hrangah aṭangin an rawn zin khâwm bawk nên kan ri laih laih reng mai. A ṭhen te erawh hotel-ah te an awm fura, chutia inhmuh khâwm tâkah chuan chhûngkua kan lo tam phian mai.




Kan ri le lu renga, Dsa nên pawh titi na hun kan nei ta rih meuhlo. Thingpui semin ka buai tluan zaka, a ni pawh ka buai êm avângin a nuam a ti chiah lo nên a haw tur thu a rawn sawi chuan pâwnah ka zui chhuak vata.




“In buai rih sia i mut dâwnah lo call rawh aw, ka lo nghâk ang che. Ka kal phawt ange” tiin thim kârah chuan min pawt lutin min kuah vang vanga, keipawhin ka kuah lêt ve vat bawk. Thla a êng bawka, kan lang chiang viau mai, midang min hmuh ka hlauh avâng chuan ka namsawn leh thuaia.




An inchhunga a luh tâkah chuan keipawh ka lût ve leh ta thuaia. “Khawiah nge ilo kal daih? No seng nên i u Nunpuii lo pui rawh ka tihkha” ka pi chuan a rawn ti hlak hlaka. “Pawnah ka chhuak lawka, ka lo pui nghal ange” tiin no la seng loh ho chu ka khâwm nghal zung zunga.




Ka pi hi chu a phunchiar ve bawk nên a hauh tam tak hi chu ngaia neih mai a ngai ṭhin. Ni hau ve nasa viau ṭhin mahsela amah aia a tute duat an awm leh miahlo thunga. A duh lohna zawngah erawh chuan a hlauhawm in a luhlul bawk nên chuvang ania Vanrongura nêna kan chungchâng pawh ka la zêp ṭang ṭang ni.




Sir Tetea nên pawh kan la in be renga, a fel bawk nên biak loh tawp chu keimah pawh hian hrehawm ka ti ṭhin a. Min duhthu erawh a sawi nawn tawh miah lova, Vanrongura nêna kan inṭhen hun a nghah thu erawh chu min hrilh tawh a, keichuan chhân mai ngaihna ka hrelo.




Kan inṭhen kher angem ka hreloa, chubâkah keimahah chuan Vanrongura a tlâk nat zâwk miau avâng hian sir Tetea chu ṭhian leh u ang a en tawp ka rilrûk kha a nia, mahsela amah lah hian a duhin ka ring hek lo.




A hmelṭha a, a zaidamin a fel hle bawk. Hmeichhe tam takte pasal duh zâwng ang tur mizia a pu a, a mizia a nghetin a rinawm ang tih pawh ka hria. Vanrongura erawh chu a tih loh zawngah chuan luhlul leh tihmawh tak, mahsela hmangaihna la na leh mi ngaihsak thiam tak a ni thung.




Hmeichhia hi chuan mipa zezawi leh ṭawng tlêm lutuk hi kan lo duh lutuk lo tlângpuiin ka hria. Tlêm a mi fak peih leh kan duhzâwng thu sawi tur hre thei deuh te hian min lo hip leh ṭhin, mipa ṭawng tlêm lutuk han awm fâl ni khua pawha mi biak dân tur hre miahlo te hi chuan min lo hip lo tlângpuiin ka hria.




Dar 10 pelh hnu fe ah kan âwl ve ta chauha, ka chau in ka kâwng te chu ana ṭhum mai. Ka inchum dat data, intifai leh te te in khuma ka mutthlak rual chuan Vanrongura chu ka call zuia, a rawn chhâng rang ngei mai.




“I hman tawh em ni?” a rawn ti nghal panga, min lo nghâk reng tak tak a nih hmêl. “Um hman chiah, min lo ngai em?” ka tihchuan “Ka taksa leh rilru zawng zawng hian an ngai che” a rawn tihchuan thinlung a fan rawih rawiha, a aw dam dup chuan engtin emaw tak hian min fana, hriat nuam tak a ni.





“Keipawhin ka ngai che” ka ti ve ta sepa, ka ngaihthu zêp tlat bik ka tum tawh lo. Ka duhna leh thlakhlelhna te pawh hi hriattir ve zel ka duh tawh, amah chauh a pe chhuak tu ka lo nih tir ṭhin a, tûnah chuan ka lan tir ve zel tawh dâwn.




“I chau viau em? In tam bawk si a, a hahthlâk viau lo maw?” a tihchuan ka nui haka, chutih laiin kan naupang ber chu rawn tlân lûtin ka bula mut chu min rawn dila, ka lo aw ve mai bawk.



“I bulah a mu thei bik dâwn a nimaw? Ka va châk ve e, kha naute ang kha ka ni ve châk khawp mai” a tihchuan nui hak hakin ka nau chu ka mut ṭhat puia. A ni pawh call ka hmang tih hria in a bengchheng bik hauhlo “A u tunge a? Bialpa i nei em ni?” a rawn tichu lehlama mipa lo nui hak ri chu ka hre pha reng.




“Aw nei e, bialpa hmêlṭha deuh leh duhawm deuh ka nei a lawm” ka tih lai chuan “A u vawiin tlaia tlangvâl kha tunge a? Keichu kha pa ang kha bialpa ka zawng ang, min lo nghâk thei angem le? Ka len hunah ka bialpa atân ka duh e” a ti chu lehlam ami chu a rawn nui leh hawk hawka.




A hre pha ve vek bawk nên keipawh ka nui ve tho, ka nau hi chu ala â ve a. Class 2 a zir ve mêk a, mahsela a naupang ber a nih vâng nge duat rawn a ni bawka a pangchang thiam viau zel. 


“Kha naupangah ka va tlâk nat hmêl ve, ka nupui nih a châk animaw?” ti a rawn fiamthu chu fiam ve ka châk bawk nên “Naupamh mai nilo in keimahah pawh i tla na a lawm” ka ti chu a thâwm a reh deuh vang vanga, a lai tih ka hre chiang lutuk. A nui ri ka hre miaua.





“A u, i bialpa chu ka hmu ve duh e. A thlalak min hmuh ve la” ka nau bawk chuan a rawn ti leha, a chi hian a chi loh reng reng. Ka hmuh a nihchuan ka chhûngte ho in an hre nghal vek a nimai, a zêp thei dâwn der silo.



“Nakinah in lo zin leh hunah aw, tûnah rihchuan a hmuh theih rihloh” ka tichu a ner nâng nâng a, a hmu châk tih ka hria. Mahsela a la naupang bawk nên a ni hian engmah a zêp thei dâwn lo tih ka hria “A nih ka lo bia ang, ka be ve duh” tiin ka phone chu min chhuhin a bengbulah a daha.




“Hello a u bialpa maw i nih?” a ti zuia, loud speaker ah chuan dahin ka ngaithla kara “Um ni e, i u kha ka nupui turin i phal angem?” a rawn ti chu ka lo nui hak mai. Bawihtei ṭawng dân ang chiah chuan a ṭawng ve lehnghâl, an in be tâwk dâwn khawpin ka hria.




“I fel leh aw, ânu chuan i pa ang zawng rawh u a ti ṭhina. A u pawhin chutiang chu a zawng dâwna, âpa ang i nih ve a ngai a nimai” a tihchuan Vanrongura mai nilo keimah pawh ka nui hak hak mai.



“Aw le, ka fela chuan ka hmeltha bawka. I u kha i âwih loh chuan i zâwt thei ang, ka hmêlṭha lutuk tlat. Nichina i pasal tura i sawi ang kha ka nimai” tiin a nui leh kur kura, keiin an inbia chu ngaihnawm ti zetin ka lo ngaithla thung.



Naupang biak dân pawh a thiam phian hi a, mipa fel tak chu ani ve in ka hria. Keichuan mipa ṭhenkhat fel leh felloh ka tehna chu naupang chunga an rilru put dânah te hian a ni tel tlata, Vanrongura pawh ka rin aiin naupang biak tlângnel dân a thiam bawk.




“Khapa te chu i tluk teuhlo, a hmelṭha lutuk ania. A ngo in sâng deuh mai ania” ka nau chuan a ti leh pang panga, Vanrongura pawh a nui hawk hawk reng mai. Ka nau lah hian a biak mek hi hmelṭha a tih em em chu a ni tih a hre hauh lo lehnghâl, hria sela chuan heiai hian zawhna a ngah ngei ang.





Rei in biak tir duh tawh lo in ka nau mutchhuak hmêl ka hmuh chuan phone chu ka lâksak ta vata. A ni pawh reiloteah a muhil zui ta vata “I nau chu a lawmawm riau mai, khatiang chiah kha fa nei ve tawh ila” a rawn ti chu ka nui haka.




“Kan nei ve tawh mai dâwn em ni? Mahsela kan la nau dûn emai a chi rih lo ang, nghâk phawt ang aw” ka tihchuan a sawi buai lêm lo. Inneih a hmanhmawh tih ka hria, mahsela keichuan hmalam hun siam fel hmasa lo a tûnlai ṭhangthar tam tak anga kum tling lo te a pasal neih ka duh loh avânga hei chen thleng ka ni a, ka tum ber tih hlawhtlin phawt ka duh ani.


ZAWMNA....



“I mawi lutuk, thla la ve ang” tiin ka bengbulah Vanrongura chu a rawn phun sar sara, a ni pawh suit nên a inthuama, a smart thlup mai bawk nên a chhelo tih piahlam a ni. Inneihna a rawn kal nula ho pawhin an en nasa tih ka hmu ve reng bawk.



Ka ṭhiante pahnih pawh kan bulah an awma, an ni pawh an nui ṭhaw renga. Ei tur ringawt an buaipui bawk, ,“Nangpawh i mawi lutuk, ka duh ai hmeichhe ho hian an en nasa mah mah che” ka ti chu a nui deuh haka.



“Mipa ho in an enna che hi i hai der bik dâwn em ni? Keipawh ka lâwm hauhlo, makeup te kha inbel ve a ngai miahlo mawle” a rawn ti chu a bânah ka beng zauha. Mo neitu lam pawh kawr rawng inang vek kan ha a, kawr sen duk ka hâk chuan min kâp êng leh zual bawk nên ka ngo hmêl viau mai. 



Ka peih lo chung pitei te'n min chei luia, mahsela darthlalanga ka han in en tâkah chuan ka lo inhmeh phian lehnghâl. Mipa ṭhenkhat pawhin pawimawh êm êm neilo in min rawn be ve renga, min duh hmêl deuha min en te pawh ka hmuh hmaih biklo.




Mahsela ka mitah chuan Vanrongura tluk an awm bîk hauh lo, a chêr hauh loa. Insawizawi nasa tih hriat takin a taksa a inphut mawi tawk khawp mai, a taksa ah thau chhia a awm lova, aesthetic mipa ang mai a pian nalh a ni.



“Siam helamah lo kal ula Dsa nên hian thla min lo lâk ve teh u” ka tihchuan ka ṭhiante pahnih chuan a ngaihna hriat loh hmêl tak hian min rawn pana.


“Tunge Dsa chu?” ti a an hawi hu hu lai chuan Vanrongura chu alo nui huka. “Keimah hi maw le ka u Siam, a Dsa ka nih hi. Mahsela a mi koh chhan ka hre bik hauh lo ania” a tihchuan keimah pawh ka lo nui pât pât mai.



Ka ṭhiante pahnih lah chuan a chhan an hriat châk hmêl ngang mai “In koh dân bik in lo nei vêl elo? In va mak ve, Dsa tih ringawt te chu a hmingah pawh a tel hauh silo” an ti chu ka nuih ringawta, ka DUHAISAM LALPA a ni miaua, keimah chiahin ka hriat hi a pawi ka ti lêm lo.




“Chutiang ngaihven lo in thla chu la phawt teh ang u” ka tih tâkah chuan min hnial tawh lêm lo in Biak in hmaah chuan in post dân tur min hrilh mawlh mawlh in Vanrongura nên pawh chuan kan in post ve maia “In inhmeh lutuk” an tihchuan anuam ve veng veng mai, ṭhiante'n kan ngaihzawngte min pawmpui hi chuan a nuam ve êm bawk a ni. 





“Tirawh u keini chu in lamah lo awm tawh mai ang u, hetah chuan tih tur em em kan neih tawh loh hi” tiin kan inzui chhuak diala, thlalak an ti vek tawh bawk nên a hnu hnunga thil la tih duh ho bâk an awm tawh meuhlo.




Ka ṭhiante pahnih chu an ṭawng leh bawrh bawrh tawha, keini pahnih erawh inkai rialin kan pahnih chuan kan innuih leh var var ṭhin.



“Hetiang ang chiah hian kan la innei ve anga, chutiang chu i duh em?” a tihchuan ka bu nghat nghata. Keipawhin Kohhran leh Pathian hmaah ngei thu tiama inneih chu ka duhthusam a ni, a zahawm ka ti bawk, mahsela ṭhenkhat erawh chuan kohhran hi zia thup nân leh mi fak duh vangin kan hmang ṭangkai fo ṭhin thunga.





“Bawihi in va rawn thleng har ve” ka nu in a rawn tih thut avâng chuan Dsa kut chu ka thlah vata, in kan lo hnaih tawh tih ka lo theihnghilh palh chu ka hlauthâwng ngei mai. Mahsela ka nu chuan engmah a rawn hmu hman lo hlauha, kan ṭhiante pahnihin hma an lo hruai chu a fuh ngei mai.





“Nia thla kan la ve leh lawk a lâwm mawle, tiin ka phun zui nâng nâng a. Ruai erawh Biakin lamah tho kan ṭheh dawna, hun kan nei thâwl viau mai, inneih zawh lam programme ka tel peih chiah lo bawk nên in a ka lo awm tur thu ka chhûngte chu ka hrilha, min hnial bik lo.




Kan mo tur te hi an in awmna a hlat bik loh avângin an in lamah fellowship tenau an buatsaih a, keini lam erawh inlêng kan la nei lutuk vak loa. Reilote tal lo mut ka duh a ni ber mai, ka ṭhiante pahnih bâkah Dsa nên chuan ka room-ah kan inzui lût a, an ni pahnih erawh an awm reilo. Ka chhûngte chhuah hnu lawkah dâwrah kan va kal lawk ang tiin min chhuahsan zuia.




Eitur an lei leh dâwn a nih ka ring, an ril a ṭâm reng hi a mak ka ti ṭhin. An ei theih ang ai hian an thau thei hauh lo thunga, mak ve tak chu an ni.


“I nalh tak tak hle mai” Vanrongura chuan a rawn ti leh khoha, min ti lai leh tawh. A naupang zâwk ni si hian min ti lâi reng mai chu a nih hi maw, ka lei chhuah zukin hmundang chu ka en daiha.




A chhan chu ka mitah a melh miaua, mi mit takah hian en lêt harsa ka ti ṭhin. Ka bulah rawn ṭhu thla in ka thawmhnaw hâk chu a en kual dan dana, ka beng bul chêtah a rawn thawk ham ham a vâng chuan ka ṭhu ngil auh ringawt.




Nui suk hian ka kut chu a rawn vuana “Innei ve zung zung ila ka ti, ka duh ai ka lo naupang hi ka lungawi lo lek lek dâwn mai” tiin a phun sa sa a, ka nuih deuh hak ringawt.


“Kan nunah ngei pawh hian thuneihna kan nei siloa, min siamtu min siam dân ang kan pawm mai a ngai sia lawm. Kan nihna hi pawm lo pawh nimah ila a siamṭha thei tu kan ni miau si lo a, bâkah i han upa anga nakinah chuan kan la innei ve em em ang. Tûnah chuan a tu a ve ve mahin hna pawh kan la neiloa, hetiang te chuan kan hma hun a thim dâwn lutuk a sin” ka ti chu a ngawi vung vunga, a ngaihtuah ve nge maw ni dâwn ni.




“Naaa fa neih ve te ka châk tawh a lawm” a rawn ti chu ka nui hak lo theilo, a duh hma ve em bawk a ni. “Han nghâk hrâm hrâm la, kan hmahun kan siam fel hmasak hian kan nakin hun zela kan nun nawmna tur zâwk a lawm” ka tichu min rawn en vatin “Hna ka neih loh chuan min nei duh dâwn lo tihna em ni?” a rawn ti leh khauha.




A zawhna lah hi a dik fek fawk thei a nia aw....nui deuh hakin “Nei duh tho e, mahsela han puitling leh zual la tûnah nang aiin ka upa bawk si a, hmeichhia chu kan upa hma si a, nakinah min iai leh mai lovang maw?” tih chu ka zâwt a, he thil ka zawh chhan pawh tûn aṭanga a rilru fiah fo hi ka duh vâng a ni. 




“Teuhlo lutuk, ka iai ngai miah lo ang che. Ka tân chuan nangmah bâk hmeichhe dang an awm ngai dâwn lo, eng emaw avânga kan lo inṭhen ta a nih pawhin nangmah chauh hi ka hmeichhe hmangaih i ni reng ang” a tihchuan ngaihtuahna a ti thuia. Kan awm dun loh hnu thleng pawhin a ni chuan min hmangaih dâwn tih pawh ka hria.




Ka ringhlel lova, a thutiam chu a hlen ngei pawh ka ring. A chhan chu a bialnu hmasa ber ka ni a, ka tân pawh chutiang chiah chu a ni, min theihnghilh mai mai dawn lo tih ka hria a, keipawhin ka theihnghilh ngai hian ka ring lo. 



“Engtikah emaw chhan eng emaw avanga kan lo inṭhen a nih pawhin tûn ang reng hian ka ngai reng ṭhin ang che.” ka ti ve ta sepa, a âwmah chuan ka bei nghal than bawk.




“Engtikah mah min kalsan theih loh nân keichuan ka pan lui ṭang ṭang thung ang che. Ka hmeichhe hmangaih ber hi ka kaltîr phal mai mai dawn lo che, ka tân chuan i pawimawh ber a ni tih hi hre nawn fo rawh aw” a ti ve sup supa, a aw chu a hahdamin ngaihthlâk a nuama, ka ngaih a ṭha hliah hliah bawk.



A ipte dap rak rakin eng emaw hi a rawn phawrha, enge tih ka han en chuan whistle mahsela âwrh theih tura pangpar lem vêl nêna an chei mawi hi a ni a, mak ka ti lutuk leh a awmzia hre silo chuan ka en hau reng ringawt.



“Ka lo awrh tir ang che” a tihchuan ka dang leh rih a, “A va dangdai ve enga tân nge?” ka ti chu min en reng chung chuan a nui suka “Min ngaih châng apiangin i ham anga, ka rawn thleng vat ṭhin dâwn alâwm” a ti chu ka âwih vaklo nên ka ner nasa mai.




“Vai film nghâl loh, chutiang i thei âwm lo emai. Thu awihawm deuh hlek te sawi la” ka ti chu a nui ta var vara, ṭhi chu min awrh tîr pahin chu whistle min pêk chhan chu a sawi ta malh malha.



“Game ah rêng rêng chuan he whistle hi game zawng zawng thununtu a ni a. A rik tawh chuan tumahin an namnul thiangloa, an zawm ngei ngei a ngai ṭhin. He whistle hi nang i ni a, kei hi player ka ni bawk, eng ang pawhin lo tlân kawiin lo che lutuk palh pawh ni ila he whistle i kawl chhûng chuan min thunun reng dawn, he whistle i ham a nih phawt chuan khawi hmun aṭang pawhin i thu zâwm turin ka rawn hnai ṭhin ang” a ti dap dapa.




A thusawi ka hriat tâkah chuan chu whistle chu ho ka ti ta hauhlo, kan pahnih nun chu infiamna mual ang a nia, kei hi referee niin a ni player a ni bawk. Tichuan chu infiamna mualah chuan kei hotu ah min dahin a ni ka thunun dâwn tihna, ka nui ta saka.



A locket chu a mawi lua loa, mahsela a phêna thil awm chuan mawina leh ropuina a kawl thung si.


“Ka lawm e aw, engtikah mah ka phelh ngailo ang. He ṭhi ka awrh chhûng chu i ta ka ni tihna a ni bawk ang” tiin ka nuih ta sâng a, a ni pawh a hlim tih ka hria.



Kan ṭhiante thâwm a rawn awm tâkah chuan kan insiam ṭha vata, an ni pahnih erawhin pâwnlam aṭanga an thil lei an siam nghal tûr thu an sawi tâkah chuan Dsa chu a thaw huai reuha, min rawn hnaih lehin ka khabe ah chuan a rawn vuana, min kuai dâk nghal zat bawk.



Ka hmuiah chuan dam raiha rawn fawpin pâwn lam chu min panpuia, kan ṭhiante pahnih pawh an lo che mawlh mawlh leh tawha. Kan va pui ve vat bawk, ruai ṭheh a hun ṭep tawh ka ringa, chutianga thil lo ei chiam erawh ka tum hauhlo, sa hi ka ngaina a, englai pawhin ei tur awm reng se ka hne pawhin ka ring chuang lo.




“Naktuk chu kan class ho bîk picnic an ti a, ka kal ve dâwn a nia aw” a rawn ti chu ka en ha mai, a chak tih ka hmu mai rênga. Mahsela kal ka phal leh phalloh min ngaichâng tih ka hria “A ṭha lutuk a lawm, kal rawh. Intihhlimna te hi a awm khât si a, mahsela hmeichhe dang hnaih lo la aw, i hnaih vaih chuan ka lâwm dâwn hauh lo ania” ka ti chu a bu ve nghat nghat mai.




Keini pawh naktuk chu kan semester ho in tour neih dân tur vêl ruahman an tum bawk nên a nuam leh viau in ka ring. Ka kal peih kher ring lo mah ila ṭhiante'n an phûr pui em em hi chu ka thlawp ve mai thei zela, bâkah kan semester bîk hi chu kan in pawh bawk nên a nuam phianin ka ring bawk. 













Comments

Post a Comment

Popular posts from this blog

DUHLAI ZORINPUIA CHAPTER 8

-
DUHLAI ZORINPUIA CHAPTER 8 Kawngpui kan chhuah chhoh lai chuan naupang ti ila tleirawl ṭan ek ek tawh mitthi buhfai leh thing khawn ho kan tâwk a, u Rinpuian min pua chu min en duh hlawm khawp mai. Pakhat tê chuan min rawn panin “Au Zorin, i bialnu em ni? Tinge in in puaka” a rawn ti ta reuha, an la tê ve tak nângin an fel ka ti viau mai. Êm an phur ât a, mipa naupang nên an inzui ve bawka, ka nuih var var mai. “Um a ke a na a, ka pua a nih hi, in va fel ve. In nulât hunah pawh khatiang kha ni reng rawh u aw” u Rinpuia chuan lo ti ve in an in lam chu min pan pui leha, kal kawnga kan mi tawh apiang lah chuan an lo fiam ṭhin bawk nên keimah chu ka lo zak zâwk. An in kan thlen dâwn chuan ka zâm leh viau tawh, a nu leh pa hmaah ka che chhe ngun lutuka a nuam pawh ka ti chiah lo. Tunah pawh an rawngbawl sa ka ei leh dâwn chu ani si a, “Nu kan rawn haw e” tiin in chhûngah chuan min luh pui zuia, a nu pawh a rawn lang har lo. Min rawn pan vatin ka ṭhat leh ṭhat loh te chu min lo zâwt zung zun...
Read more

DUHLAI ZORINPUIA

-
Image
DUHLAI ZORINPUIA CHAPTER 1  A HMASA IN HE STORY HI A TAK THIL THLENG BEHCHHANA ZIAH A NI E. “Kan lo lawm a che, helai hi ania i inluah tur chu. Luah man a to lem lo a, i duh ang chu maw" ka awmna tûr khaw Vc te chuan min lo hmuak in ka inluah tûr vel chu min en puia, he khuaah hian health worker hna thawkin ka awm dâwna, ka phur ru phian mai. Hmelhriat ka la neih loh vang erawh chuan ka la kimki ve deuh thung. Ṭhian siam mai ka harsata, keimah hi nel sa loh bulah chuan ṭawng chiam mi ka nilo bawk nen ka hriat ngai miah loh khuaa ka han awm chu a lehlam takah chuan ka huphurh bawk. “Um a nawm hmel lutuk, keimah chauhin ka ni dâwn bawk nen a zau chiam a ngai lo" tiin ka hawi kuala, a chhuat chu thing vek a niin a bang chu tile an hmang thunga. A chung pawh rangva a ni in thingtlâng in tak tak a ni tih a hriat viau mai, ka bungrua te chu an fate nen chuan min dah luhpuia, chutia hna thawh tlân takah chuan an fate nen chuan in nel zui thuaiin kan in be bawrh bawrha, t...
Read more

DUHLAI ZORINPUIA CHAPTER 12

-
DUHLAI ZORINPUIA  CHAPTER 12 “Tiru chaw ei vat ang u, ril a ṭâm tawh a lawm. Ramar sa hi a tuiin a hâng a sin, Hmingte i ei tawh em?” u Rinpuia nu in a rawn tihchuan ka lu ka thing nar nara “Ka la ei ngai miahlo, lui lam sa leh ranvulh ho hi kan ei nguna, ramsa lam tak hi chu kan ei ngai miahlo” ka lo ti chu a nui var vara. “A ṭhat nasat chu, kan inah chaw rawn ei zêl rawh. Hei bawiha hi rinai takin a kut a hmuia, sa hi lei ngai em em lovin tihian min ei tir reng theia, kan vânnei a nih hi. Ramsa kan ei tam vâng nge i nu nên pawh hei kan la hrisêl ṭha viau a nia, tin, pa min ti la ka duh. Helaiah chhûngkhat nei miah lovin i rawn awma, keini hi i chhûngte angah min ngai dâwn a nia aw” tiin pa Sena chuan a rawn ti a. Ka bu nghat nghat mai, a nelawm bawk a keipawhin ka ngaina “Kan monu hual ania , chhûngte neilo a ni rêng rêng lo, a theih phei chuan innei vat sela ka duh, kha tu emaw lah kha a rawn lâwr sek bawk si a, Hmingte ilo thik hlauh ange. Bawiha hian i duh loh zawnga a lo awmp...
Read more