DUHAISAM DUHLAI ZORINPUIA S2 CHAPTER 20

DUHAISAM DUHLAI ZORINPUIA S2 

CHAPTER 20 

Ka mu tui lai chu rawn au ṭhat ṭhat avâng chuan ka harh zawka, ka men chhuah rualin ka pi bâkah Dsa nu leh pa lo awm reng ka hmuh rual chuan ka meng kâwk a, Dsa pawh a lo harh ve reng tawh zawk.

Chutia kan lo awm dûn an rawn hmu chu an lâwm lo hle tih a hriat,  ka pi erawh chuan mak a tih hmêl hle thunga, keini lah thawmhnaw mumal kan ha bawk silo  “In va zak theilo em ve Vanrongur, kan hrilh chiang tawh viau che emaw ka tia, hetiang hian maw in lo awm leha“ a nu chuan a rawn ti ṭhat ṭhata. 

Tho chhuak vatin ka kawr chung chu ka ha sawk sawka, Vanrongura erawh chuan a nu thusawi chu a ngaihpawimawh hmêl vak loh.

“Rawn tho vat rawh, hetiang hian maw in lo awm ṭhin a, Sangpui nangpawh hetiang hmeichhia hi i nih ka lo ring lo a sin, in mu dun a maw?” nu Mapuii chuan a rawn ti hlawk hlawka, hrehawm ka ti leh ka zak bawk si chuan ka chhâng thei mai lo.

“Mu dûn e, ka fa a pai mai thei“ Vanrongura chuan a rawn ti tawla, alam chu phâwk tak hian kan chhûngte chuan an en veka. Keipawh ka bâng biklo, chutianga a sawi chu ka rin loh lutuk a nih avangin mak ka tilo theilo, khatiang thu kha a rawn sawi ka ring lo hrim hrim.

“Engmaw? Vanrongur i â em ni? Kum 19 êm pawh ila niloa, tûnah khân naupai lam in sawi a maw?” nu Mapuii chuan a rawn ti leha, a pa leh ka pi erawh chu an la ngawi char chara, engmah an la sawi ve hauh lo thung.

“In mu dûn tak tak em ni?“ nu Mapuii bawk chuan a rawn ti leha, chhân ka tum zuau tihah “Mu dûn e, in hmuh reng hi” Dsa bawk chuan a ti leha, ka sik nghal vak mai.

“Ngatinge hetianga in awm mai le aw, in hmalam hun te ngaihtuah ve ta che u. Hetiang chuan in inchawm thei dâwn em ni? Naupang mai ala nih hi, Sangpui nangpawh ngaihtuah chiang tur i ni a sin” nu Mapuii chuan a rawn ti leha, kei erawh ka zak bawk nên engmah sawi thei pawh ka nilo.

“Engpawh chu nise in lamah haw phawt ila kan sawi ṭha leh dâwn ania, hetah chuan awm reng chi pawh a nih loh hi” pa Ruata chuan a rawn ti ve khauha, kan inkawp kha an duh siloa. Engtin nge kan awm zui zel ang pawh ka hre tawhlo, Vanrongura thusawi lah chuan thluak a ti buai map bawk si, ka thianglim zia hre ve kur chunga mu dûn anga lan chu ka awm a nuam chiahlo.

Mahsela Vanrongura sawi chhan ka hre siloa, ka ngawih tawp a ngai a ni. Ngawi reng chuan kan inzui chhuak hlawm a, ka pi la ṭawng ve miah lo chuan eng ngaihdan nge a neih ang ka hrelo, a tunu a fak em em hi mipa nên kan riak dûn lai an rawn hmu bawk si a, sex hmang lo mah ila an ni ngaihah chuan kan hmang tura rinna a lian hle ngei ang.

“Ka thusawi kha aw tiin chhâng tawp ang che, chutilo chu min thawn bo dâwn. Ka kalsan theihloh nân che chuan kha thil kha thil ṭha ber a ni, hetianga ka awmpui chhan che pawh a ni bawk. Ka nu hian keiai a u ka neih hi a rem tilo, tin an ni chuan an ṭhianpa fanu tûna nurse training mêk nên hian min inneih tir an tuma, kan la nau deuh avânga nghâk mai an nia, neih ka tum hauh lo ania” a tihchuan ka thaw haka.

Engtia thutlukna han siam tur nge pawh ka hrelo, tûnah chuan ka zak lutuk tlat. A bike chuan kan in phur haw a, kan hnungah kan chhûngte chuan min rawn zui thunga, ka rilru hah lutuk chu thâwk ka la leh hluai ṭhin, naupai ang pawhin awm ila man chhuah hun an nei dawna, chutia thianghlim reng si a mu dûn ang a awm pawh ka awm a nuam chiah chuang silo.

Kan inah chuan kan inzui lût hlawma, chutia nula leh tlangvâl awmdun chhungte'n an phâwk nihchu a nuam chiahlo. Putea te lah chuan min lo en ṭhapa, ka pi in a hrilh sa a ni ngei ang, ka zak bawk nên Vanrongura kuta chelh chung chuan ka kûn ngara.

Kan chhûngte chu hmun khatah an ṭhua, keini erawh an hmaah min ṭhut tir  thung. “Engtik aṭang khân nge in lo inzui tawh?” ka pu in a rawn tihchuan kan inmelh zawka, keichuan ka chhâng ngam lo, kan awmdân an rawn hmuh avânga min ngaihdan tur nên ka ngaihtuaha, ka zak ngawih ngawih mai.

“A rei tawh, kum tir lam khân ani tawh, min inṭhen tir chu tum lo mai rawh u, in thei chuang lo ang” Vanrongura zâm ve hauh lo chu mak ka ti a, engkim chu chiang takin a sawi fak fak mai. 

“In mu dûn tawh maw?” putea chuan a rawn ti leh khauha “Aw mu dûn tawh, in rawn hmuh ang kha a nimai,” Vanrongura chu ka sik deuh ṭawka, dâwt hmanga kan chhungte bum hi ka duh miahlo. Ka thaw ham hama, ka awm anuam miah lo bawk, a ni lah chuan ka sihna te chu engah mah a ngai hauh lo.

“Awi engtin nge maw kan tih dâwn le, in in upat hleih nasa mai sia maw, hna lah i la nei bawk silo. Nupui fanau enkawl tur chuan ila tlin ve lo” nu Mapuii chuan a rawn ti hapa, a rilru a hah hle tih ka hmu ve reng bawk nên Dsa chu ka en leh ringawta.

“Kum nga bâk lohin kan inthlau lo, tin ka nupui leh ka fate chu ka enkawl thei em em ang. Lehkha pawh ka la zir thei reng a lawm, a nih loh pawhin Police lam te ka try ve mai ang chu” a ti leh ngata, kan chhûngte chuan tihdân tur an hre tawh lo aniang an ngawi vang vang hlawma.

“Enge Ruata i ngaihdan ni ve reng reng, chutianga an lo awm tawh si chuan mi in khawngaih ve te pawh angai anih hi. Kan tunu hi mualpho leh sawn pai ringawt tur chuan kan phal bik bawk siloa” ka pu chuan a ti dap dapa, a aw aṭang chuan a thinrim lo tih ka hria a, chu chuan min ti hahdam huai bawk.

“Ni e, ṭhenawm hnai leh nu leh pa ang tak taka kan en in nia, in zahawm khawp mai. Mahsela bawiha hi a la nau in kan fa tlum ber a ni bawk si a, nupui fanau han nei tur hian kan la dah chhin ngai hauh lova, kan tân chuan nupui han neih tir hi kan la zuam chiah loa, mahsela hetia an lo awm tâkah chuan a unaute ho pawh kan lo rawn anga, kan inhrilh leh dâwn a nia” pa Ruata chuan a ti charh charha.

A ngaihtuahna lamah chuan min inneih tir lam an la ngaihtuah hauh lo tih pawh ka chiang, keipawhin inneih nghal kha chu ka duh loa, mahsela hetia min ngaih dikloh tâkah chuan inneih mai pawh ka pawi tilo. Mahsela tûnah chuan a chhûngte hian an la rem ti dâwn chuang niin ka hria, chu chuan an laka ka tlâk tlum loh zia a ti lang chiang viau bawk.

“Lungngai miah suh aw, min ngai dik lo ta ro ro chu ka nei ngei ngei ang che, tumahin min dang dâwn lo. An phallo a nih pawhin kan tlânbo mai ang, nangin i inhuam phawt chuan, tûnah hian monu hual an neia, chu chu min neih tir ngei an tum dawn tih ka hria, chuvanga tûnah pawh pehhêl an nih saw, Duati min ring tiraw?” ka bengbulah chuan a rawn ti sapa, kan chhûngte chuan kan lam an rawn ngaihven rih lo bawk nên keipawh chu ka lo bu nghata.

Chutiang a sawi leh zêl te chuan min ti na a ni, hetianga kan awm hi ka ring ngailo. A tirah kha chuan inneih tir an tum hauh lo anga, mahsela tûnah chuan hetiang hi kan ni leh bawk si a Dsa sawi dânah a nu leh pa mizia leh thil tum chu a hre chiang tih ka hria, chu chuan ka rilru a tibuai map bawk.

“Haw phei phawt ang u, kan sawi ṭha leh dâwn ania. Chhûngkua kan in rawn a, hetianga kan awm a nih loh chuan tûnah chuan thutlukna kan la siam thei rihlo” pa Ruatan a tihchuan ka pi leh pu pawh chuan an lo pawmpui ve mai bawka. Dsa erawh chuan min kalsan chu a hreh tih ka hria, a nu chuan a pawt chhuak deuh nawk nawka.

An chhuak ta chu ka chhûngte chuan ka lam an hawi ṭhap a, mahsela an hmêlah chuan an thinrimlo tih ka hria. “Bawihi a va pawi ve aw, Ngura lah kha a la nau nasa mai si a, a nu leh pa thlir dân pawh kha a dik ve tho ania, khatiang kha chuan in inneih theihloh phei chuan, enga tinge maw in lo mutdun kher kher le aw?” ka pi chuan a ti vang vanga.

Kei erawhin kan mutdun loh thu takngial pawh ka sawi theilo, a chhan chu Dsa khân eng ruahmanna chiah nge a neih ka hre siloa, ka lo sawi nghal mai chuan nakina kan pahniha tâna buaina zakhua a ni ang tih ka hlau a ni.

“A pawi hleinem, nau i pai pawhin kan enkawl thei em em ang. Mihring kan nia hmangaih kan nei thiang alawm, kum avânga in iai mai loh tur, hmangaihna dik tak hian hmêl leh pian, kum leh nihna a thliar thei tak tak loa, tuma dan theih lah a nilo. In innei lo a nih pawhin lungngai lo la, chhûngte min neih hi” ka pu in a rawn tihchuan ka lâwm takzet.

Kuah thlawpin ka ṭap zui ta hliam hliama, min hauha min huat hial ka rin laia ka rinloh lam daiha an awm chuan min tilâwm lo theilo. 

“Va hahchawl tawh rawh, i nute pawh kan lo hrilh ve anga, lungngai lo la tihsual châng chu a awm tur alawm. Mahsela tihsual nawn tawh erawh tum lo la, hmeichhia chuan in zahawmna hi humhim tlat tur ania, mahsela in lo chesual tawh tawha siamṭhat theih a nilo, in thianghlimna hi in zahawmna ber a ni tih hi hriatreng a ngai a sin“ ka pu chuan a rawn tileha.

Keipawh chu muangchang chuan ka room lam ka pana, Vanrongura chu a nu leh pa khân ṭha taka thu an hrilha, kei nên kan inneih theih nâna hma an lâk ka ring hauhlo.

Ka rin ang ngeiin Dsa chuan engkim min rawn hrilh veka, a chhûngte chuan class kal dun te, inhmuh hrim hrim an lo phal lo a nih hmêl.

Chu chuan keipawh min tina ve lo theilo, a hma kha chuan ka chungah an ṭha viau si a, engvanga an fapa nên kan inkawp tâk avânga hetianga awm ta daih hi nge an nih tih hi hriatthiam har ka ti.

“Engtin nge kan tih ang?” ka ti ta tawpa, ka tân chuan hetianga awm hi a hrehawm takzet. Keiai lo naupang lo ta sela a nu leh pa hian min la duhlo tho angem tihte pawh ka ngaihtuah ve bawk.

“Lungngai suh, an thu zawng zawng zawm ka tumlo ka tih tawh kha, mahsela an thu âwih anga ka awm rih angai dawna. Ka ngaihtuah ve lo thei silo che a, zânah i room-ah ka rawn lût ṭhin ang, chhûnah chuan min enthlak reng ka ring tawh. Ka ute an hrilh vek tawh bawk si, tin an ṭhianpa fanu pawh a rawn lang ngun viau mai theia, ka nu in a bia a, mahsela lo ngai haw hauh suh aw. Ka tân chuan nangmah bâk hmeichhia an awm dâwn chuang lo ania, kan zirna te hi han zo dûn te te ila tichuan kan tlânbo dun daih dawn ania” a rawn tihchuan ka hniallo chiang hle.

Zirna zawh ve ngei ngei chu ka duha,BA ka zawh hun a ni ve dâwn bawk nên keipawhin chhuah law law chu ka duhdân chiah ani.

ZAWM LEH TUR