DUHAISAM DUHLAI ZORINPUIA S2 CHAPTER 17-19

DUHAISAM DUHLAI ZORINPUIA S2 

CHAPTER 17 

“Ka chau tawh lutuk” ka thlan a tla hliam tawha, mawmrang tlângah tent nên hiking nei tur chuan kan kal ta ngeia, ka chauh dân chu pui tak a ni. Thâwk ka la kâwk kâwk mai, ni a sa bawk nên thinghlimah kal mah ila khaw lum lutuk chu a hrehawm viau mai.

Vanrongura chu ka bulah rawn kal hnaiin kan ṭhiante pawh muang chângin kan hmaah an kal diah diaha, “A chhîp kan thleng ṭêp ania, ṭang hrâm hrâm la a hrehawm rei tawh lo ang. Kan thlen chhoh veleh i châwl hahdam nghâl siai siai dâwn a nia” a tihchuan ka bu ve nghat a.

Nithum chhûng awm tura kan inruahman sa ve kha a nia, khawi emaw laia zin ai kan duh tlâng zâwk a ni mahna. Chubâkah mahni ram chhûnga hmun mawi awm reng laia vairam vela zu kal kha ka peih hauh lo.

Tui chu in leh te te in muangchang chuan ka kutah kaiin tlâng chhîp lam chu min panpui leha, kan bâwr bawk nên a chauh theih ngei mai. 

A tlâng chhîp kan thlen rualin tent zârna tur an tihah chuan ka ṭhu thla hnawka, ka che thei tawh der lo. Siampuii pawh chuti tho, Marami erawh chau ve lo ang mai chuan mipa ho che mawlh mawlh chu a pui ve a, kei erawh ka che thei mawlh lo.

Ka zawi nguai mai, tent zar chhûng chuan thinghnuai daihlimah chuan ka ṭhu a. An zâr zawh rualin Dsa chu ka bulah a rawn kal hnaia, ka bungrua awmpui ho chu la in tent ah chuan a dah lût mawlh mawlha. Woofer kan keng bawk nên play in mipa ho chu an zai pah lung lunga, a ṭhen a hmawrah chuan va dakin an au lung lunga, anuam an tihzia chu hai theih a nilo.

Tho chhuak ve ṭaih ṭaihin hmeichhe pathum kan riak khâwm dâwn bawk nên chulam chu ka pana, ka ke te chu an zâwng na ut ut mai. Dsa chuan min rawn panin ka samah chuan a rawn chûl hliau hliau a, mit chhing diar diar in ka lo dawh heuh heuh ringawt.

Ka nui deuh haka “Ka ke hi a na ut ut mai, min lo hmehsak thei angem?” ka ti chu ka ke chu rawn enin amah chu a ṭhu thluang duaia, ka ke chu a mal chungah hlangin a hmet nghal neuh neuha. Ka thaw chhuak suai suai mai.

“Zan chu ka bulah mu mai la, helai vêl hi a hrâng an ti lehnghâl” a tihchuan ka meng phâwk nghal hru mai. Thlahrang kher kher hi chu ka ngaina miahlo, a sawi chhuah tâkah chuan kan awmna hi a fâl ropui bawk sia ka hawi tang nghal hru mai. 

Ka awm a tinuam lo chiang alawm “Saw kraws pawh an phun saw, thlahrang chuan Isua an hlau a lawm, mi pawh an riak ṭhin tih ka hria. Thlahrang chu an awm miahlo ang” ka ti hrâm a, a nui suk ringawta. A uang duh der silo, ka awm a tinuam miahlo, ka va han ngei tak min tih hlauh a tum nge ni anga thla chu a hrâng tak tak ni ang?

Kan ṭhiante lah chu nuam ti zet hian an lam a, Marami leh Siampuii pawhin rawng an bawl mawlh mawlh mai. Khua a thim hnai tawh nên keipawh chu tho chhuakin ka va pui zuia, zanriah kan ei kham meuh chuan khua a thim der tawha. 

Bûk tualah chuan meichhem in kan kil ṭhapa, woofer ah chuan thlahrang thawnthu PC hras chhiar ngei mai chu an la play zuia, ka ngaina lo tawp mai. Bâkah an thlahrang thawnthu chhiar hi a tak tak an han ti thla zên a, ka âwih vek miahlo. Chu mai bâkah thlahrang hmu thei deuh leh hre thei deuh ho hi inkhâwm khât tak leh zu duh deuh hi an ni duh tlângpui, tûn thleng hian ringtu ṭha tak leh kohhrana in hmang tak tak te hian thlahrang sawi tur an neih hi ka la hre lo bawk.

Kan pastor thusawi ka la hriatreng chu ‘Thla thâwm hre thei lutuk leh hmu thei lutuk mi piangthar ṭha tak an awm ngailo’a tih kha a dik hian ka ring. Keipawh hi dawih viau e tilo hian ka la hmu hauh loa, a thâwm takngial pawh ka hre ngailo. 

Ṭhenkhat hi chuan kan dawih lutuk hian kan thâwm hriat hi thla thâwmah kan ngai tlat zêl nimaiin ka hria, dem tur han zawn tlat hi chuan Sazu emaw zân chaw zawng ṭhin ho thâwm hi kan dawih luatah thla thâwma puh hi kan ngah viau ang.

“Keichu an thlahrang tawn tam tak hi ka âwih lo rêng rêng, chubâkah thlahrang an sawi hian hmeichhe sam thlah hnuang mai, kawrfual var ha hi a ni reng maia. Thlahrang lerh tak a nih ka ring, mipa hian an la hmu thei em em zui, sap ho te, Japan te, Thai ho te, vai ho te pawh hian hmeichhe kawrfual var ha hlir hi an hmu maia, keichu thlahrang indaih zai tak a niin ka hria. Ram hrang hrangah an hmu nuaih nuaih mai ania” Timothy-an a rawn tihchuan kan nui haka.

A hlauhawm lam pawh kan ngaihtuah thei tawh lo, nuih a za tlat. A sawi dik chiah bawk si, han hnialna tur hi a awm lo rêng rêng, “Chu chiah mai, a dam lai pawhin a lerh ngawtin ka ring, mipa hmaah a in lan tam bik bawk si. A damlaia a tih hman loh kha a thih hnuah pawh tihzawm a duh aniang, hmeichhia nilo in mipa zâwk zêlin an hmu tam lehnghal, mipa a râwp viau ania'ng” Rochhungan a rawn tihchuan hmeichhe ho chu kan nui vak vaka.

Mipa te pawh chuti tho, Vanrongura dâr nghêng chuan mittui tla phungin ka nuia, ka hlauhna pawh a reh vek mai. A ni erawh chuan min enin ka hlim lutuk che vel chu hmuhnawm ti zet hian min ena, zankhat êm pawh kan la riak lo nângin nuam ka ti takzet, ka pi leh pu in an lo phal hlauh chu ka tân vanneihna a ni.

“A nuam ka ti, hetiang hi ni reng thei sela. Lehkhazir te hi ngai tawh lo se, tunge lehkhazir hi lo hmu chhuak reng reng ni dâwn ni? Rual pâwl nân tiin lehkhathiam lo nih kan zaka, mahsela lehkha kan zir ve ṭauh ṭauh a, a neisa bawkin hna an hmu leha. Ṭhenkhat tân hi chuan lehkha zir pawh hi in hremna a ni maiin ka hria, sum tam tak sengin kan zira, hna kan nei leh chuang siloa, thiamna hi a hlut rualin lehkhathiam tam tak hi chuan kan chhawr ṭangkai tlêm khawp mai” ka ti chu midang pawh an lo bu nghat nghat mai.

Hna han zawng dawn ila Mizoram phei chu ram hmasawn theilo, ṭhenawm ramten hma an sâwn khalh reng kan ni a, sawrkar hna ro ro ah pawh hna sâng tak thawk hi kan vâng pharh mai a nih hi. Hruaitu ṭha tak, dâwt sawi leh ei ruk hmang lo te hi nei ve ila chuan heti reng hi chu kan ni lo ang, beiseina nên party hrang hrang an han sorkar chho a, tûn dinhmunah chuan eng sorkar mah hi ṭha tih ka la nei hauh lo.

“Lo kal lawk teh” tiin Vanrongura chuan tho chhuakin ka kutah chuan a rawn vuana, min kai kal nghal dat dat mai. Vân lamah chuan arsi leh thla an êng a, tlâng chhîp sâng tak aṭanga kan mi duh berte nêna han thlir dun phei chuan engkim chu a mawizual nimaiin ka hria.

Chhûngril tak aṭanga hlimna kan neih tawh chuan engthil nên mah thleng kan phal ngailoa, chhûngril tak aṭanga kan na tawh a nih thung chuan engthil mahin a ti danglam thei tawh lo thung. Chu chu a danglamna a ni.

Keipawh tûn hunah hian ka hlima, he hlimna hian eng chen nge min hruai dâwn ka hreloa, hlimna min pe reng ang nge ni a min ti na ti mai a ni zâwk dawn tih erawh ngaihtuah thui lo a hmalam huna dah mai hi a ṭha in ka hria.

Hma lam hunah engtin nge ka awm ang tih ngaihtuah reng rêng a mahni intih hah vak ai chuan hun bi kal rual zêl hian pên pui ila, hun rawn danglam in a a her chhuahpui ve zel theih tur hringnun ni sela tia ngaihtuah chunga ka hmalam hun tur ngaihtuah loh hi ka duh, a chhan chu hmalam hun ngaihtuah chu rilru ti hah tu a ni a, ka hun kal tawh pawh in bawh buai tir ka duh hek lo, hun kal tawh pawh hmasawn hleithei lo a min pawt bettu bâk engmah hlutna neilo thil mai a ni.

Ka tân chuan ka tûn hun ka la awm ngei tih ka hriat lai hun hi a pawimawh bera, ka mi ngaihpawimawhte an la awm ngei tih ka hriat lai leh ka bula an awm lai hi ka tân chuan pawimawh ber chu a ni, ka hmalam hunah chuan tûna ka kianga awm te hi an awm vek tawh kher lo theia, keimah ngei pawh ka la awm lo thei tih hre reng chunga ka tûn huna mite ngaihdan buaipui reng renga awm hi ka duhlo a ni.

Ka tûn hun hman mekah hian keima hlimna tur thil tih hi ka duh ber chu a ni. 

Vanrongura chuan kan ṭhiante piah phûl chungah chuan min ṭhut puia, a kap karah chuan ṭhu in puan kan sin duna. Kan hun hman boruak chu a nuam takzet, ral ram hla takah khua tih hriat taka êng de leh sep sep ṭhinte, arsi thlâwk leh ṭhin te leh thli rawn thaw leh heuh heuh ṭhin te chuan boruak chu a tinuam takzet.

Ber thla kan kai chho a, thlasik rim a rawn lêng leh ṭan tih hriat taka boruak leh vâna arsi inthlâk kual mêk te chuan thlasik rawn thleng tur chu min nghahhlelh tir zuala, chubâkah tun huna kan awmna hmun boruak hahdam thlâk tak chuan nun a tihlim veng veng mai.

“Tun hun ang reng hian ka ta ni la, zanin ang reng hian ka ngai reng ṭhin ang che” tiin Dsa âwm chu ka nghêng ar ara, ka mit ka chhing chial bawk. A âng chhûnga awm thlamuanthlâk zia chu ka sawi thiamlo zawk, keimah aia naupang a nihna ah chuan a iaiawm ve ngeia, mahsela a thinlung leh rilru erawh chu keiai puitlin châng a ngah mai.

“He zân ang hian mawi reng la, khing arsi te an bo hlen ngai lo ang leh. Thlapui anga danglam ngailo ang khian ka tân danglam ngailo la, chutianga i awm chhûng chuan i tân ka awm reng ang tih ka tiam a che” a rawn ti ve sapa.

Ka nui sak mai, kan hma hun chu hre dûn lo mah ila tûn hunah erawh midangte aia ka hlim lohna bik sawi tûr ka hre hauh lo.

Ṭhiante'n mut an tih avâng chuan awm rei duh bik lo in kan inzui phei thuaia, tent ah ka lût dâwn tihah chuan sihal an rawn u chuah chuaha, a rapthlâk bawk nên Vanrongura âwmah chuan ka bei chawta, nghet zet chuan ka kuah zui bawk.

Sihal hrâm hi chu ka ngaina ngailo, sihal mai bakah eng emaw hrâm dut dut ka la hriat ngai hauhlo hrâm rapthlâk deuh a tel avâng chuan ka khûr dar dar thei, thlahrang thawnthu kan lo ngaithla bawk nên chu chuan min ti hlau zual, ka ngaihtuah chhuak leh lo theilo.

“Hlau suh, lût la in bulah kan awm reng dawn a lawm. I ṭhiante pahnih pawh an awm ve reng hi, sava hrâm mai mai a nihchu hlauh tur a awm lo” a tihchuan ka bu nghat nghata, ka lût ve ta hrâm a. Thlâ erawh la muang duh lo tak a ni, puan hnuaiah chuan ka inthawlh ta vata.

Siampuii leh Marami pawhin an hlauh thu an lo sawi ve nghal zat mai, hmeichhe hlanga riah kan lo ti kher kher chu kei ngei pawhin hrehawm ka ti, thla a muang lo takzet. Thawh leh lawka Vanrongura bula mut mai te ka duh.

“Awi zan reiah tent pâwn lam aṭang hian movie vêl ang khân kuttin te hian a rawn ham mai anga” Maramin a rawn tihchuan Siampuii nên chuan kan hau nghal vata, a ni pawh a ngawi veleh mai bawk, a thusawi lai chuan thlahrang film hlir a ni min ngaihtuah tir ni, min ti dawih zo vek dawnin ka hria.

ZAWMNA....

Kan muhil ṭan dâwn tihah pâwn lamah chuan eng thâwm emaw hi ka hria a, ka meng nghal kâwk mai. Mihring thaw ri hrawk hrawk ang hi ka hriat rual in ka mu khawng nghal awt a, ka ṭhiante pahnih chuan an hre ve em ti a ka en chu an lo meng phâwk ve hra mai.

Light chu ti êng in tent aṭanga chhuak ngam silo chuan ka hawi kual hrek hreka, thaw ri lah chu a nasa êm êm mai lehnghâl. Ṭanpui tu mamawh thaw chham tur thâwk la hrawk hrawk hi a ang ber mai, ka lungphu rang lutuk chuan ka hlauh zia a ti lang chiang viau ang chu.

Ka phone ka phawrha, Vanrongura te chuan an hre ve lo nge eng thâwm mah a awm hauh lo. Chutah tent pâwn lam aṭang chuan an rawn ham ri hruah hruaha, ka ṭhiante pahnih pawh an mu thei meuh tawh lo. Kan pathum chuan ṭhu chhuakin kan inkuah khâwm dala, au mai nachâng pawh kan hrelo.

Thaw ri chu a rawn na zual sauha, patling na tuar rum kâwk kâwk ang ka hriat rualin kan mutna bula bottle kan dah chu ka in tent chu ka ṭhiante min danna pawh ngai pawimawh lo in ka hawng rawk rawka, ka hlauhna chuan min ti â vek zâwk nge pawh ka hrelo hlau viau e tilo in ka fiah châk tlat peka.

Chutah tent ka hawn ruala thil rawn kûn du mai chu a lu ah tak ka vaw ta pawp mai. A aiah tuarh a, chutah mipa ho nui ri ka hriat rual chuan lâwm lo zet hian ka ena, ka ṭhiante pahnih pawh hlauthâwng zeta rawn chhuakin kan mipa ho lek an ni tih an hriat tâkah chuan an ni pawhin lâwm lo zet hian an hau nghal hlawk hlawka.

An awmdân chu keipawhin ka ngei lutuk tlat, tlai lamah lah thlahrang thawnthu kan lo ngaithla in kan lo sawi hrep tawh bawk nên chutia min tih ṭhaih kher kher chu ka lâwm hauhlo, Vanrongura chu pan hnaiin a bengah chuan ka pawta, ka kuai kûn nghal vak bawk.

Ala nui reng te chu ka ngei zo vek tawh, khatiang infiamna chi pawh a ni hauhlo. Kan riahna piah deuhah chuan ka kalpuia “Nui tawh suh, a nuihzatthlâk miahlo ania aw. Khatianga intih ṭhaih chi pawh a nih loh kha, vawikhat mah chîng tawh suh u, khatianga in ti leh a nihchuan kan haw san ang che u” ka ti ta hmaka.

Ka la lungawi theilo, keini thlaphang em em in kan awm laia, an ni fiamthu mai mai kha ka lâwm miahlo. Ka lungphu hi tûnah pawh a la pângngai theilo, ramhnuaiah kan awm bawk nên hlauh a na zual bik bawk si a, tûm bûr chuan a awm lohna lamah chuan ka inher nghata.

Ka hnung lam aṭanga min rawn kuahin ka dârah chuan a kha be a rawn nghata, thingkung pakhat tê chauha ding hnuaiah kan awma. Thla êng lah chu khaw thim tirh ai khân a lo êng zual tawh lehnghâl, “Min ngaidam hrâm mai la, i bulah ka riak thei siloa ka duhlo a lawm, khatianga tih kha ka rawt chhuah pawh a ni chiahlo, mahse i bulah ka mu ve châk a, en teh khi arsi an thlâwk ania” a tih tâkah chuan vanlam chu ka en vata.

A sawi ang tak takin arsi thlawk chu kei ngei pawhin ka hmu nghal zata, zân boruak thiang kuk hnuaiah tlâng chhîp aṭanga arsi thlir hi ka lo ngaihtuah pha ngailo, ka ngaihzâwng nên ngat phei chuan ka ngaihtuah ngai loh thil a ni.

Mahsela tûnah chuan kha ka ngaihtuah loh thil kha ka tawng chho mêk chu a ni si a, alamah min kuai herin thingkung nghêng thei tur chuan min nam data, ka ngheng rualin ka hma zawnah tak chuan a rawn kûn hniama.

Thla êngin chiang vak lo a a hmêl a chhun chu ka hmu phe ruai chauh a ni, ka hmuiah chuan a rawn fâwp ta chata. Ka lungphu pângngai lo sa nên chutia ngen ngawl zeta min fawh leh phei chuan phu rang tawh tak a ni, ka thaw a chham mai dawn te hian ka hria.

A kawr nghâwngah chuan ṭhâm sakin ka awmsawn deuha, thâwk chu ka la zui ham ham bawk. Keimah zâwk chuan fâwp leh nghatin a nghâwngah chuan ka kut ka suih zuia, a niin ka kâwngah rawn kuahin alamah chuan min pawt hnai zui salha, kan thâwk rang dûn lutuk leh kan lungphu ri mumal lo lutuk te chuan engtin emaw tak hian boruak chu a siam alh zualin ka hria.

“Ds” ka ti ta sepa, thâwk la ham hamin a âwmah chuan ka bei ta daiha. A lungphu rang zet ri pawh chu ka hre chiang lehzual, min nawr na sauhin a ni pawh chuan boruak chu duhthawh zetin a hip lût zuia, kan pângngai lo dûn takzet. Mipa leh hmeichhia a fala han awm takah chuan kan lo induh tawnna nên boruak chu sosang duh tak a ni.

Ka biangah chuan rawn dawmin ka hmai vêlah chuan a fâwp kual dan dana, mahsela kan ṭhiante'n min rawn koh tâkah chuan inthlah vatin tent lam pan chuan in kai rial chung chuan kan phei duna, midang pawh an lo inhnial tawh bîk em lo.

Nichin thleng kha chuan thinrim zetin an la inhau kha a nia, “Min tih ṭhaih leh vaih teh u kan haw tak tak ang, mut kan duh tawh ania” tiin Vanrongura chu ka en leh te te a, a ni pawhin ka chalah chuan rawn fâwp vang vangin “Engmah hlauh tur a awm lo, in bulah kan awm reng a lawm. Mihring hi khawvêlah kan hlauhawm ber, a dang chu hlauh em em tur an ni lo, mu rawh u in mutthilh hnuah ka mu lût ang” tiin tent ah chuan a rawn lût ve a, zip phui mailo in ka bulah ka kut vuan chuan a ṭhu ve renga.

Keipawh chutia a awm ve tâkah chuan ka thlamuang huai thei, nichin kha chu ka hlau ve tak tak. Khatiang khân engtin nge lemchan an thiam zâwk ni, a kut hûm chung chuan thlamuang tak chuan ka thaw chhuak zui ta siai siaia.

Zînga ka harh meuh chuan midang chu an lo che sap sap tawha, thawh ka hriat tehlul nên tukin chu nizan lam vâng nge ka tho tlai riau mai. Ka innuai nawk nawka, ka tui pai chu phawrhin ka ha ka nawta, ka hmai ka phih leh hnu chuan rawngbawl pui tur chuan ka chhuaka.

“Rawn dâk chhuak ve mah teh u, a mawi a sin” Thanzuala chuan a rawn ti a, a thusawi zâwm chuan tlâng hmawr lamah chuan pheiin a mawi ka ti lutuk chu keipawh chu ka âng pam mai. Kan hnuai lamah chuan khaw thlir theih miahlohin leilung hliahin chhûm a zîng phui chûk a, keini erawh tlâng chhîpa âwm na na na chu eng chhûm mah a zing ve loa, chutianga thil mawi chu phone ah bak ka la hmu lo.

Thlate chu lâksakin rei pawh awm lo chuan rawngbawl chu kan va chhunzawm leha, mipa ho erawh rawngbawl lamah ṭangkai hek lo zanlam tuah tur bâkah kan rawngbawlna tur thingfawm chuan kan bul vel ramhnuaiah chuan an luta, keini erawh kan titi mawlh mawlh mai.

Zan lam thil thleng te chu kan sawi mawlh mawlha, kan nui leh hak ṭhin, khaw êngah chuan hlauh tur a awm lo bawka, fiamthu kan thawh leh bawrh bawrh thei tawh mai.

Ramhnuaia awm kan ni bawk nên rinaiin rawngbawl pawh kan sama, chawhmeh kan nei vak loa. Sangha-ṭin vêl kan ken chu a ni deuh tlawng mai, mahsela chuti chung pawh chuan chaw ei a tui reng tho. Ramah hi chuan chaw ei a tui duh bik nawk nên a nuam ka ti, ram lam hi chu ka ngaina ve hrim hrim bawk.

Vanrongura chuan sangha tak chu amahin ei lovin ka ei turin min rawn pe a, ka hau ve tak nângin a ngaipawimawh meuhlo. Kan ṭhiante lah chuan over min ti zet hian ner nangin min lo en leh ṭhin a, chûngte erawh Vanrongura chuan a ngai pawimawh der lo.

Chaw eikham lamah chuan tihtur a awm lo bawk nên mahni duh duhna lamah kan vâk darha, kei leh Vanrongura erawh a fâl deuh, tlâng aṭanga hawi na nuam zetah chuan kalin kan hawi dûn vauh vauha, tûnah chuan khaw thlir tur a thui leh tawhin kawngpui lang raihte chu a mawi zuala, fiamthu thawhin kan nui leh hak ṭhin.

Ka nuam tih zawng tak a ni bawk nên ka nui deuh reng mai, khawpui chhûngah mahni inah emaw mipui zi nuaih nuaih kara awm ai chuan hetiang hmun thawl leh thengthaw nuam, zalên taka vahvel theihna hi chu nuam ka ti hrim hrima.

Dsa âwm nghêng chuan ral hla taka khaw awm te chu kawkin ka phunpui sep sepa, kan khaw lam pawh ka ngai thar vawng vawng mai. Thingtlang nun hi ka seilenna a nih vâng nge nuam ka tihna a reh ngailoa, ka ngaihna lah a reh thei ngai heklo, tichung pawh hian zirna avâng nilo sela chuan thingtlangah bawk awm theih chu ka duhthusam a ni.

“Nuam i ti dawn tih ka hriat avângin alawm ka ṭhian te ka hrilha ka rawt chhuah ni. Khawpui chhûnga awm reng pawh hi a ninawm ve a, hetia vah khawthawn ve te pawh hi a ngai a lawm. Tlâng chung aṭanga khawthlir hi a nuam a sin” a tihchuan ka pawm zâwng tak a ni.

“I naupanlai ka hmu châk e, ka nu leh pa kha chuan an hmu ngei che a nih hmela. Kei erawh naupan lai kha chuan ka zin ngai meuhloa” ka tihchuan a nui suka, chutah ka dulah chuan rawn hmet neuh neuh hian thawk chu a la zui hliaia.

A awmdanah chuan sawi nuam a tih hmêl tehchiam loh “Naupan lai sawi tûr em em ka neilo, naupang ber nimah ila ka vah chhuah te, ṭhiante nêna infiam ve te kha a theih ngailoh. Ka nu hian min ko haw thuai ṭhin, ka nun kha ka room-ah ka hmang tam bera, cartoon ena ṭhiante nên infiam lam ai chuan ka lehkha zir kha min duh pui zâwka, infiam ve te kha ka châk ṭhin. Ka ṭhiante chu an lêng ho a, an infiama an chhûngte khân an hau ngai meuhlo, kei erawh ka naupan lai nun kha chu tanin animaiin ka hria” a tihchuan mak ti zetin ka ena.

A thusawi chu a tak tak a nih rin harsa ka ti, nu Mapuii te mizia ka en phei chuan chutiang ti duh tur hmêl pawh an put loh nên. “Kum 10 ka nih aṭangin school ṭha ber berah min luhtira, lehkha bâk loh ngaihsak lo tura tih ṭhin ka ni a. Kum ka han tling anga ka duh ang takin ka awm thei ang tih kha ka ngaihtuah ṭhin a, mahsela ka chhûngte erawh an la danglam chuang lo, ka tihluih fe angai ṭhin a nih hi maw. Tûnah erawh ka puitling ve tawha, an thu ang diak diakin ka awm ta bik loa” a tihchuan a kut chu ka hûm sak vang vanga.

Mi hausa fate pawh hi an lo hlim vek bik dâwn lo a nih hi, keiniin kan awt in an dinhmuna awm kan châk em em a. A ṭhen te erawh hi chu sum hian a lo tihlim tak tak lo a nih hi, fate duhzawng anga awm tir tum tlat an awm rualin, a ṭhente erawh an neih nun lutuk avânga sum hmanna tur hrelo in ruihhlo khawih phahte an la awm ve leh zela. 

Mihring pian dân in ang ro ro pawh dinhmun hi a lo inthlau thei hle a nih hi maw, a ṭhenin sum hman sen loh an nei laiin ṭhenkhat erawh chuan dam khaw chhuak turin thih tha nên meuha eizawn a ngai thung si a, a neisa te'n an neih belh ṭun ṭuna, a neilo sa bawkin kan chân belh duak duak bawk a.

“Tunah chuan hei i duh angin i awm ve thei tawh a lawm, engkim a ṭha leh vek mai ang. Nu leh pa hi chuan fate kan enkawl dânah hian tihsual kan nei ve châwk ania” ka tihchuan ka thutak ve tehreng nên nuihzat hmêl zet hian min ena.

“Fa nei tawh i ang reuh lutuk, a châng phei hi chuan ka nu i ang ka ti ṭhin” a ti chu ka hmui ka ti pawrh vaka, miin thutak deuhin thu kan sawi ve a, chutiang lama min lo hmu daih chu ka ngei tak tak a ni. Ka thil sawi tum zawng zawng pawh a ti bam zo vek.

“I mâwl emai, ka hnêm ve em em che a khatianga fiamthu a lo lâk, ka sawi tawh miahlo ang” tiin ka hawi tau hmaka, a nuih a zat hmêl zual sauh mai.

“Thi ta ila engtin nge i awm ang?” a rawn tih thut avâng chuan alam hawi chuan ka inhera, chutiang thu a rawn sawi thut chuan min ti hamhaih hial mai.

“Khatiang sawi suh, rei deuh dam tum tur chutiang a nih theih nân chuan ṭawngṭai fo bawk tur. Thihna lam chu sawi tawh lo ang ka duhlo” ka tih tâkah chuan engmah a sawi zawm ta biklo.

DUHAISAM DUHLAI ZORINPUIA S2 

CHAPTER 18

“Tlan rawh u” tih thâwm awmah chuan Dsa nên chuan kan ṭhiante thâwm awmna lam chu kan hawia, Siampuii leh Marami chu an au chûl a, an in vai vak vak bawk. An awm dânah chuan khuaiin an ûm a nih hmêl.

Ka bengbula nui hak ri avâng chuan ka lu chu thle deuhin ka ena, a lo nui suk suk mai. “Rochhunga a ni leh ngei ngei ang, Khuaibu an tawn darh a nih dâwn saw” a tihchuan ka ner nasa mai. An zuk ngei ngei ang, a fuhlo hle mai.

An lam pan chuan muangchangin kan pheia, an bul kan thlen rualin ka ṭhiante pahnih chu an mittui alo tling pam mai. 

An hmai erawh a him hlauh a nih hmel “A ṭul lo khawp mai Roa khatiang khân Khuai chhaih kawlh kha a chi tam loh khawp ang, kan vûng vek dâwn a nih hi. Duati i ṭha em?” tiin Thanzuala chuan Siampuii chu a pan hnaia, Siampuii pawh a lo bu nghata, mahsela a na viau aniang a mittui chu a luang ngiai ngiai mai. 

“Ka bân hi ana lutuk, a sa na hut hut mai” a ti deuh ṭiaka, a mah pawh a sen hlar mai. Kan ṭhian ah ro ro pawh Siampuii hi chu a nu hnâp tih ang tur hi a nia, a no pawh a no ber bawk. Chutah khuaiin ala zuk zuia, ṭahpui pawh a âwm viau mai.

Midang lah chuan “Lalrochhunga vek hi a lawm” tiin Roa chu an hauh rawna, Vanrongura erawh chu a lo nui ngat ngat thung. Kan ṭhiante lah an vûng ṭan bawk nên hmuh an nuam miahlo, “Keichu ka hmaiah tak hian min zuk a, tûnah pawh hian ka mitmeng te ho a zîm vekin ka hria, ka khawhmuh hi a zah lo” Marami chuan a rawn ti ve bawk.

Timothy-a leh Thanzuala lah chuti bawk, an hmai leh hmui a vûng lêk lûk mai. Rochhunga pawh a vawm tu ber nimahsela a vûng ve nasa viaua, a harh hi ka ti khawpa. Khuaite chu chhaih kawlh an hlauhawm tehlul nên, lo va chhaih kawlh chu a ṭul vak lo, an vaiin an la tuar phah zui.

“Vanrongur min nuih reng suh, in nupa hian a fala awm inhmang lutuk hi in him phah a nih hi. A falin awm reng suh u” Thanzuala chuan a rawn ti hluk hluka, Vanrongura lah chu a nuih a zat hmel zual sauh mai. A mittui te chu a tla phung tawh.

A ṭhiante chu kawkin “In hmelchhiat” a sawi zawm thei mai lo chu a kûn a, a nui uar uar mai. Keipawh a awm dân avâng chuan ka nuih insûm pawh ka insum reng thei biklo, ka lo nui ve haka. Kan ṭhiante chu an chhe lah taka, an vûng lêk luk bawk nên hmelṭhat chu an tân tûnah rihchuan thil theihloh tluk a ni.

“Min nuih khangtlang ka ti, in nupa khân kan zuk tir ve zâwk dawn cheu nga mawni. Ka ning min nuih tawh suh u” tiin tent ah chuan an lût zui ta diaka, ka bula ka bialpa la nui ngat ngat erawh chuan a ṭhiante thusawi pawh chu a hriat vak ka ringlo, a pum a dawma a la nui khûr dawt dawt reng mai.

Ka en reng ringawt, hetiang khawpa a nui nasa hi ka la hmu ngailo, “Awi ka pum ana lutuk” tiin a rawn hawi chhuaka. “Nui tawh suh, nuih nasat avâng hian a thih theih a nia” ka tih tâkah chuan a rawn ding ngil zawta. A aw a thian nghal hrak hrak bawk, thih sawi chuan a nui ṭha duh tawh miahlo.

Mahsela a hmêlah erawh chuan a nuih a la za hle tih ka hria, “Ṭhiante chesual khatiangin nuih vak vak tawh suh, a zia lo emai. Tirawh rawngbawl ang” tiin a lighter chu ka dil zuia, mei zuk ve zeuh zeuh a hman avâng hian lighter a kawl ve reng zela. Mahsela zu tam tur chuan ka duh hauh lo thung, mei chu chhêm sat satin zîng lama kan chawhmeh ei bang chu ka ti luma.

Tih tur dang vak a awm loh avâng chuan khua a vawt ṭan bawk nên meilum ai chuan kan in nghêng dûn riala, hetianga hunthawl ṭha tak neih hi a khât bawk nên a nuam ka ti. Vân lam chu a thiang kûk a, eng emaw ti zâwng tak hian lung a ti lêng riau mai bawk.

Kan ṭhiante erawh chu an la rawn chhuak peih meuh hlawm lo a, khuai khân an zuk nasa hman hle a nih ka ring. A lehlamah chuan nuih an ti za bawk si a, khatianga hmelchhia a an chhuah chhan lah an harh lutuk avâng a ni bawk si, Dsa nên chuan thil ho pui pui sawiin kan nui leh hak ṭhin.

Keiai a naupang na chu mipa keiai u te aia a naupan chhiatna hmuh tur a awm hauhlova, lan chhuah châng awm mahsela keiai a naupan zâwk vâng hi nge mawni a cute ka ti ṭhina. A kianga awm pawh hi ka hlimpuiin ka thlamuanpui a ni ber mai, ka thusawi a hnial ngai zen zen lo a, a ngaihdan nilo erawh chu min hnial hreh hauh lo thung.

“Kan inneih hunah chuan tûn ang reng hian a khât tawkin i nuam tih zawng ka tihpui ṭhin ang che. Hlim taka ka siam theih nân che hna ṭha tak nei turin ka in zir anga, nuamsa taka kan fate nên in awm theih nân ka theihtâwp ka chhuah ang” a ti ve sap sapa, ngaihthlâk a nuam viau mai.

Keichu mipa nilêng a engmah ti ngailo ho hian min hip a, hna ṭha tak thawk lo mahsela nilenga awm awl ve ngai mai mail hi ka duh bawk. An theih tâwk a an hnathawh kha ka ngaisanga, lehkha an zir sâng lo a nih pawhin an theih ang tâwk thawk ṭhin mipa chu ka hmusit ngai lo.

Chutia ka mipa duh em emin ka tâna a thil tih tur a sawi chhuak ve dap dap mai chuan awm a tinuam ve veng veng mai. Rawng kan bawl zawh tâkah chuan kan ṭhiante chu kan ko chhuak a, an rawn vûng lêk lûk mai. Hmuh an hrehawm rualin a nuihzatthlâk tho bawk sia, insûm a ngai ngei mai.

An mar pung hlawm bawk nên mihring pângngai bula awm pawh kan ang lo, ramhuai an ang lek lek te hian ka hria.

Chaw ei lai te chuan an inhnial leh ṭhin. Inhauh hi a sim thei dâwnlo ni berin ka hria, an ei khamah an mu lût leh veka. Dsa nên chuan kan en liam ringawt bawk, an ṭhu chhuak peih ngang lo pawh ania'ng.

Keini pahnih ei rawh kan thil ei ruahna chu sil leh tête in meilum chu kan ai duna, phone chu phawrhin  thla kan la leh thul. Tih tur em em a awm lo na chu a nuam viau tho si, van lamah chuan thlasik kawng a rawn lang ṭan tawha, thlasik ni leh tak tak tawh sela chuan heiai hian a mawi zual ngei ang le.

“Van mawi zia hi tiraw? Mihring hi kan vânnei a sin, hetiang Pathian thil siam mawizia hrethiam tura chhia leh ṭha hriatna kan nei hi a thilsiam zîngah chuan kan vânnei ber âwm e. Ramsa te chuan hetiang mawizia pawh hi an hrethiam ve âwm siloa, mihring kan ni hi chu engkimah kan vânnei a nih hi, kutdawh kut ke kim biai ka hmuh te hian ka ngaihtuah chu kutdawh ringawt lo hian an thawh theih ang hna a tam dawn si a tihte hi ka ngaihtuaha, kut ke kim thluak leh tisa pêng hrang hrang te'n an thawh tur ang an thawk chunga kutdawh tlat ho hian hetiang khawvêl hmachhawn dân hi an thiamlo nge maw ka ti ṭhin” tiin ka phun sep sepa.

“I ti dik e, kan taksa peng ten an thawh theih ang an thawh tho si chuan eng hna pawh hi a vâng lo, hna sâng leh sawrkar hna kher kan zawng ṭhin hi tam tak hian hna a vâng an tih phah ṭhin alawm. Hna duh tak tak chuan eng hna pawh a thawk mai, eng hna mah hi rinawm leh dik taka kan thawh chuan zahawm lo a awm lo, a zahthlâk miah loh bawk mahni kan inchawm theihna a nihchuan bawlhhlawh paih mai mai pawh hi a zahawm lutuk tlat, sawrkar hna kher kan zawn tlatna hian hna chu a ti vâng mai mai zawk“ tiin a châwl data.

“Thingtlang aṭanga rawn awm te'n hna an hmuh zung zung te hi ṭhenkhat chuan kan han fakin kan han sawia, mahse an thawh ang chu kan thawk leh peih chuang miahloa. Fak em em si khân keini a khawpui chhûnga chêng te hian khatiang thawh kha an zahpui leh tlat nia, nu leh pa châwm hlawm nih zahpui miahloa mi insak leh hna dang hlawh sâng vak lo thawh kha kan zahpui leh si a, kan nundan tam tak hi chu a ṭha lo rêng a ni” a tihchuan a dik ka ti viau mai.

“Nangni pahnih kha mut in tum ve lo em ni? Khua a thim vek tawh hi, ramsa te an rawn kal thei rawn mu vat rawh u” Maramin a rawn tihchuan in enin kan nui haka, kan la tum chiah lo aniang.

“Hetiang hun neih hi a khât êm hi maw, kan han am ve ange. Kan haw hunah chuan kan nei leh thei mai mai dawn siloa“ a tihchuan ka pawmpui chiah mai, zirna leh hna ṭul dang a tam leh dâwn si a, hetianga hun fâl leh thawveng hi kan nei zen zen dâwn lo tlat a tin ni.

A dar nghêng chuan ka phun sap sapa, a chânga Rochhunga a ṭhiante pahnihin an hau leh ṭhin chu ka hre leh ṭhin a. Ka lo nuih pui leh hak zel, “Nangmah avânga kan hmelchhiat zia hi i hmu em? Kan bialnute ila tawrh tir ve zui, hmeichhe awm lai phei chuan ât hi insûm tur a sin, ka hmai hi ka khawih zâwng ringawt pawh hian a na a, ka mu hleithei lo a nih hi“ Thanzuala chuan a ti leh hluk ṭhin.

Khuai zuk hi chu a tirah hi chuan ana ve êm a, ka hriatthiam pui khawp mai. A thu hrimah khawia khuai bu nge tûn hunah te an lo va hmuh ni, hetiang hmunah lehnghâl, an inhnial chu Dsa nên chuan kan ngaithla renga. 

An inhnial thinrim mai dawn te hian ka hria a, ka en leh ha ha ṭhin. A tâwpah chuan Dsa chuan inhnial tawh lo tur chuan a ti zuia, an ngawi ve ta hrâm e, inrual vek mahsela Vanrongura thu hi an ngaichâng ve hlawma, a thusawi chu an tilo mai mai ngai heklo.

Ṭhian zîngah pawh a thu fal an awm ṭhin ang hi a nimai, mahsela a ṭul tâwpah lo chuan a inrawlh ngai hauh lo thung.

“Ka kekawr i pawhthlak ni kha i la hria em?” a rawn tih thut avâng chuan ka lu chu siam remin amah chu ka ena, a lo nui var var mai. Bu nghatin ka nuih lêt ve saka “Hria e mawle, min pawhthlak sak ve phêt kha i tuma, nangmah avânga mipa in ks emaw min tihkha ka la theihnghilh lo“ ka tihchuan a nui haka.

“Ka vênhim hneh em che kha maw, kha ni kha a vawikhatna atâna ka nuna hmeichhe rawn luh hmasak ber ni a ni. I hmêl ka hmuh khân ṭha ka ti lutuk che a, mahsela i ṭawng dân kha ka duh loh êm avângin khatiang khan ka ti ta mai che a nih kha, nang lah kha ilo huaisar em em mai lehnghâl” a tihchuan ka nui lo theilo.

“I kekawr ka pawhthlak laia i hmêl awmdân kha ka la theihnghilh theilo, min khawih châk hmêl deuh khân min ena” ka tihchuan ka hnârah chuan a rawn piai zauha.

“Ka zak ve êm alawm, a hmeichhia zâwk khân boruak i ngam bawk si a. Khatianga ka chêt mai loh te chuan, nangni lah kha in lo tlânchhe nal nala, ka hmuh leh châk êm che avâng khân ka ṭhiante pawh i chanchin ka zâwt a, mahse zawn chiam ngailo in ka ṭhenawm ah ilo awm renga“ tiin a nui suk suk mai, a nui hmêl chu hmuh a nuam viau lehnghâl. 

ZAWMNA.....

Kan haw tawh dâwn avângin bûk tualah chuan mei aiin kan titi ho nak naka, chutianga hunthawl kan nei thei chu nuam kan ti hlawm vek a nih hmel. Sawi khâwmin kan nui leh dar dar ṭhin, a tira zahmawha min fiam peih nên hetia kan inkawm khâwm hnu hi chuan mi an fiam ta meuhloa, ṭawngkam mawi tak zawkin mi an fiam ṭhin.

“Kan haw dawn sia, ghost hunting te ti ve ila, pakhat hi thlahrang lemah chang sela, kan Mizo ghost hunter te pawhin an thlahranga ṭang tur an hruai ṭhin alawm, pahnih khat vêl an ruaia. An hrân tir a, Mizo mipui kan hawk dâk zia chu hriat sa a nia, en tu kan ngah dâwn lutuk. Tûnlaiah te chuan sum lakluhna ṭha pâwl a nia, kan ghost hunter ho pawh hian thlahrang an hmu tak tak lo, mihring an hruai chawp mai mai a lawm” Timothy-a chuan a ti zat zata, kan lo nui hak thung.

A sawi dik bawk sia, kan ghost hunter ho thlahrang fiah ve chu an ṭhiante pawisa hlawhin an hruaia, an hran der tir vak vak ringawt. Man chhuah tâwk an lo awm ṭhin bâkah a lem ve bawk nên hian âwih a har ṭhin.

“Nang lo ṭang nghe nghe teha, mawmrang tlâng thlahrang. Engvanga hrâng nge a nih? te kan ti anga, a fuh viauin ka ring” Dsa chuan a lo ti ve zauha, ka kâwngah chuan a hmer salh bawk. Eng emaw hnung lama min do tu pawh ka hre chiang viau bawk, kan ṭhiante kârah kan awm bawk nên engmah ka sawi duh lêm lo.

“Keichu ka mut a chhuak tawh, zîngah kan tho hma leh dâwn si a. Kan mu hma ange, muttui u” tiin Marami chu tent chhûngah a lût leh ta daiha. Thanzuala leh Siampuii pawh an awm reilo, “Tirawh kan haw tawh dâwn si a, thla êng hnuaiah hian kal kual lawk ila” ti a ka bengbula Dsa rawn phun sar sar chu hnial duh bik lovin ka zuia.

Thla a êng bawka, engkim fiah takin hmuh theihloh mahsela kalna tur leh hnim leh thingvel erawh a lang chiang thunga. Chetsual a hlauhawm vak loh, naktukah kan haw tawh dâwn bawk nên keipawhin fan kual chu ka pawi ti lêm lo. 

Phûl lo awm deuh chungah chuan min ṭhut thlâk pui a, alamah min kuai herin chiang zet hian min ena. Eng thil tak chu tih tum ang maw? A chêt dân ang ang chuan ka dawh tawpa, ka nghâwnga a hmuia a rawn nawr rual chuan ka taksa chu a rawn za chhuak chuaia, ka hmer vak mai.

Thâwk ka la ham hama, a chêt dân chu min chawh phûr a tum ni berin ka hria. Ka nghâwng chu fâwp deuh ṭawk in ka hmuiah chuan a rawn fâwp zui ta chata, ka lo hnar biklo. Duhthawh zet chuan min fâwp a,  zanin chu nidang a ang lo takzet, a mi fawh-na chuan phût lêt a neiin ka taksa chu a chûl kual ruaia.

A taksa rawn sa chhuak vur chu ka hriat hmaih bik lo, a thaw lum ham ham pawh ka hre vek bawk. “Ds“ ka phun sap rual chuan rum hak hian ka kawr chhûngah a rawn zen lût a, a chêt dân chuan mak min tih tir lo theilo. Mahsela keimah ngei pawh hi ka sa pup pupa, ka hnuailam danglam pawh ka hre chiang viau.

Hetiang khawpa ka danglam theih hi ka ring ngailo, insûm a har takzet. Phûlah chuan min mutthlak puia ka chungah an rawn bawka, a hnuai lam chuan min nawr na sauh bawk. Mit chhingin ka rum haka, hetianga awm tur kan nilo tih hre reng mah ila ka dang thei mai silo, chubâkah keimah ngei pawh ka danglam chu a ni si a.

“Ka mamawh che Duati” tiin a kawr chu a phelh sawk sawk a, mipa tleirawl hrisêl ṭha em em tân chuan insûm a har tur zia ka hailo. A kekawr phelh leh mai a tum chu ka dang ta vata “Hetiang chu ti lo ang, a ṭha lo. Insûm rawh” tiin a kutah chuan ka dawm bet tlata, ka lu ka thing nar nar bawk.

Keimah ngei pawh ka kawr leh kawrhnuai chenin a inphelh vek tawha, thla êng hnuaiah kan taksa chu kan inhmuh chian sak thei viau mai. Min nâwk na sauhin “Khawngaihin ka insûm thei tawh lo ang, ka châk lutuk” a rawn ti a, ka taksa ruak deuh thaw a a rawn bawh rual chuan keipawh ka rilru a nu bulh bulh tawh.

Amah ang tho hian tihmai chakna chu ka neia, mahsela ka rilru hian a pawm theilo. A ṭhat loh zia min hrilh tu a awm a, ka thinlung erawhin ka mipa duh em em khawihna chu a hnar theih loh zia ka hre chiang viau thung si.

“Duati timai ang, i rai leh ka nei nghal ang che” a rawn ti leh sar sara, ka mit ka chhing vang vanga. Hnar tlat hi ka inthlahrung a, chutih rual erawh chuan tûna kan thiltih hian nghawng a neih thui theih zia ka hailo.

Insûm harsa ti zeta a rum leh hak ṭhin chu a biangah chuan ka vawn saka, keimah min en turin ka kuai dâk zuia. Thu âwih zet hian ka khawih dân ang ang chuan a awm ve mai bawk “Ka hmangaih che” ka tihchuan a phu deuh zawka.

Ni e, kei ngei pawhin he thu hi ka sawi chhuah ka ring ngailo. Mahse tûnah chuan ka in hrechiang tawha, tûn hun hi a hman ṭangkai hun tak a ni bawk “Ds ka tih chhan che hi i hrelo tiraw? A chhan chu ka DUHAISAM LALPA i nih vâng a ni. Ka tân chuan ka mipa hnaih hmasak ber i ni bawk, i tân ui ka nei reng reng lo, mahsela dân khatna ngeia neih che ka duh a ni. Kan pahnih tân pawh, ka hmangaih che a min hmangaih ve bawk chuan tûnah hian he thil kan tih tum hi a ṭhat loh zia i hria tiraw? Pathian pawi kan sawi mai ang” ka tihchuan a thaw haka.

A ngawi ta vang vang mai, eng thu tak rawn sawi ang maw ti a ka ngaih chân lai chuan thâwk ala ham hama, a taksa pawh tlêm chuan a thlah dul ta deuh bawk “Min tih tâwp i duh avânga min hmangaih thu kha sawi i ni nge, min hmangaih tak tak avânga sawi i ni zâwk?” a tihchuan ka nui saka.

“Tih tâwp che ka duh avânga sawi ka nilo, ka rilru i hrethiam ve tawhin ka ring. Ka mamawh lo che in, hetiang thil hi ngaihtuah lo ka ni bik lo a, mahsela kan pahnih tân vek zâwk a ni. Ka hmangaih che ka tih kha chu he thil ti tawp tura ka duh avâng mai che a sawi ka nilo, ka bialpa i nihna ang leh i hmêl te, i mizia te i chêt zia engkim ka hriat avânga hmangaih che ka ni, ka tân chuan i hlu lutuk” ka tih tâkah chuan nui deuh hakin ka sirah chuan a awmsawna.

Ka thawmhnaw amah ngeiin a pawh hlim chu min hâk ṭhat tir mawlh mawlha. Chutia a insûm thei mai chu ka lâwm viau mai, a la naupang si a a ni lo zawnga a lâk tlat ka hlauh laia puitling tak maia ka thusawi a zâwm chuan min ti lâwm lo theilo.

Kan inhak fel hnu chuan in kuah chialin kan la ṭhu duna “Zanin ang reng hian ka ta ni reng rawh aw Duati, ka kiangah hian awm reng la. Ka ta chauh ni reng rawh aw, mipa dang tân i engmah hi ka phallo” ti a a phun sap sap chu ka bûk pui nghat nghata, engvanga a ni mi hausa fapa chutah hmelṭha tho si hian kei ang thingtlâng nula, chhuan tur neilo hmêlah lah nise Aizawlah phei chuan keiai hmelṭha leh ngo, vun no nalh tak tak awm kârah chutianga vun no nalh pawh nilo hi min thlang mai nge maw a nih ni.

Mahsela a kiangah hian ka lâwm tho bawk si a, ka ta a ni hi ka lâwm êm ani. A âwmah chuan beiin a hrawk bâwk a chil lem zâwnga che leh khalh ṭhin chu ka khawih saka, a inhmeh hluah hluah bik hian ka hria, insûm theilo in ka hmui chuan ka tawka, a rawn phu nghal zawk mai.

Min namsawn deuh zawkin min en vung vunga, kei erawhin engmah sawi lo in a nghawng bawk chu ka fâwp leha, min dang ta bik lo. Love bite an tih fo ang kha siam ka tum a ni ber mai, ka la ti ngailo bawk nên chutia ka bialpa ngei han siamsak ve chu ka châk a ni ber mai, a nghâwngah chuan ka zuk dek deka.

Thâwm kan chhuah lo a, ka kâwngah chuan nghet zet hian a kuah thunga, a thaw leh ham ham ṭhin. A mah hmachhawn zawng chuan a mal chungah ṭhu in ka kapkalaka, ka fâwp duh thawh sauh bawk.

Ka awmsawn a, ka phone light chi êng a ka en chu a lo duk ta kalha. Ka nui nghal ver ver mai, a nghawng a ngo bawka, lang chiang tak a ni “I lawm zâwng a va ho reuh, naupang chhia reuh lutuk” a tihchuan ka lei ka chhuah têt a.

“A mawi alawm, thlir a nuam ka ti. Tikhan ka ta chiah i nihzia lanna a nihkha, ka ta liau liau ka bialpa i nih hi hre reng rawh” ka tihchuan a bu ve ta nghata, min kuah hnaiin ka âwmah chuan a hmai a phûm vang vanga “Zanin hun hi ral theilo sela, hetiang hian awm dun reng ila” a tihchuan keipawhin ka châk takzet.

Mahsela kan hma hun kan ngaihtuah ve angai si a, duh duha la awm ve theih hek loh le. “Nakinah chuan hetiang hian kan awm ve reng tawh ang, tumahin min ṭhen hrang thei hei tawh lo ang. Ka nghâk thei che ka tihkha, kan nih tum ve ve te ni phawt ila, keichuan zirtîrtu niha kan khuaah ngei thawh ka duha, kan khaw naupangte hian zirtirtu ṭha tak an nei ngailoa, thingtlâng chu an thawh rei peih loh avâng hian zirna hi a chhe bawk si a, kan khaw mite tâna zirtirtu ṭha tak nih ka duh a” tiin ka phun sep sepa.

Ka nghâwnga khawih neuh neuh pah chuan a nui deuh saka “Keichuan infiamna lama kal hi ka duha, mahsela ka tuina lam hi ka chhûngte hian an duh chiah lova, an duh ang ngeiin MCS emaw ka try ve ang chu, chutiang ka nih kher loh pawhin min nei duh tho angem?” a rawn ti chu ka nui lo theilo.

“Nei duh tho ang, taima em em la a nimai. Keichuan mipa thawh hreh neilo hi ka ngaisang, sawrkar hna kher i neih pawh ka tilo, engkim i thawh theih ang ang i thawha, rim taka i thawh ve tho chuan chu aia ṭha a awm hleinem. Eng hna pawh hi taima taka kan thawh chuan kan nghei ngai bik lo ang, ka tân chuan chu aia hlu chu a awm chuang lo, mi hausa kher ka duhlo-a. Min enkawla, rinawm taka min nghâk thei tur mi alawm ka duh” ka ti ve sap sapa.

A ngaithla uluk viau mai, ka thusawi hi ka thinlung zawng zawnga sawi ka ni bawk. Eng hna pawh thawk sela, taima taka a thawk a nihchuan ka zahpui ngaiin ka ringlo, min hmangaih a nihchuan hrehawm ti taka ka awm a phal dâwn lo tih ka hria. Mipa chuan an hmangaihte tih hrehawm hi mipa dik tak chuan an thei ngailoa, hmeichhia te pawhin kan hmangaih tawh chu eng dinhmunah pawh ding se kan thlahthlam ngai heklo, hei hi kan danglamna a ni.

Ṭhenkhat erawh chuan kan tûnlai nula te sum chiah duh an ti a, mahsela hmeichhia zawng zawng hi kan in ang lo ang bawkin mipa te pawh hi an in ang loa. Hnathawh tum miahlo, nu leh pa thawhchhuah ringawt ring chu hmeichhe tân chuan ngaihtuah loh theih a ni bik lova, tûnlai nula te chuan mahni kut ke ngeia ding thei kan ngaihsân vâng zâwk hi a ni berin ka hria, kan mipa tam tak te hi chu socila media a hman êm êm kan tam tâk êm avâng hian hmeichhe tam tak hi chuan an ringngam lo nimaiin ka hria. 

DUHAISAM DUHLAI ZORINPUIA S2 

CHAPTER 19 

Christmas hun kan thleng chho a, ṭhianho in tlaivar zânah chuan ar kan kang ve a, tûn ṭum chu kan khaw lamah haw lo a helama hman ka thlang bawk nên ṭhianho in kan awm chawt ti ila a sual lo ang, kan ar hem vil pah chuan Thanzuala te in chungah guitar perhin kan zai ho a, a nuam kan ti viau mai.

Vêng ṭhenkhat aṭang chuan halpuah leh halmawi an rawn hal chuah chuaha, keini erawh chuan sawrkar phalloh thil hi chu tihluih ka tum lo. Bâkah a ri hi keipawh hian ka hua a, lung hian a zo meuhlo, lung ṭha lo ho tân phei chuan a hrehawm thei ngawt ang ka ring.

Ṭhalai lah hi kan thil châk zawngah chuan tar leh upa te ngaihtuah lo in kan ṭawng zawt zawta, vai ho pawhin an diwali ah an hal a lawm tih châng chawiin kan thil tih avâng hian midangin an tuar ange tih ngaihtuah ṭhalai an awm ta meuhlo.

A duh duhin tuar sela keiniin nuam kan tihchuan a tâwk tih hi kan thupui hlawma, ka thu thu an han ti a. An nuna an thu loh zia chu an thih dâwnah meuh chuan an hre chiang leh si, tûnlai mi hi chuan aia upa zahna leh midang ngaihtuahna kan nei tawh meuhlo.

“Kha a bawp hi ei rawh” Dsan a rawn tih avâng chuan ka ngaihtuahna aṭanga harh chhuak zawkin arbawp lian ṭha zet min rawn pêk chu ka en renga. “Hetiang ka ei sêng nâng, a lian bawk si la ṭhen rawh” ka ti chu a nui haka “I ei vek mai ang chu, tikhan i puar dâwn a lawm. Kha ei vat la“ ti a min pêk nawn leh tâkah chuan ka keih nghal hmarha, a tui lutuk tlat.

Sikri ai pah chuan a kapkarah ka ṭhu a, tûn thleng hian kan chhungte'n kan in kar an la hreloa. Engtikah emaw chuan lan chhuah hun ala nei ngei dawn tih pawh ka hria, kumkhat dâwn lai chu kan inkawp ve ta reng mai. Inhauh châng chu nei ve ṭhin mahila kan inkar ti tâwp duh khawpa inhauhna nasa erawh kan la nei lo thung.

Arsa chu ka keih deuh reng mai, an siam tui lutuk chu min pêk len ang aiin ka ei heka. Dsa pawhin ka heh leh lutuk si chu a nuih a za nge a nui deuh hak hak mai, ka biangah chuan rawn piai zauhin ar thla chu a niin a eia. Kan ṭhiante pawh an infiam leh nak nak tawh mai.

“Tihian kan inkâwm khâwm ve a, kan â hlawm ropui si a. Engtin nge kan inkawm khawm theih zâwk ni? Tunangah te chuan tihian midang ho chuan halmawite an hala, keini ve tihian in chungah ṭhu in ar kan pet ngawr ngawr chu a ni sia“ Timothy-an a rawn tihchuan kan lo nui haka.

“Heti hian a nuam daih zâwk a lawm, en ula an bengchheng êm êm a. Mawi viau mahsela keichu ka ning a nia, a ri hriat hian lu a tina, lo châk ve vak suh. Reilotea ral thei ai chuan hetia kan puar theih hi a ṭha ber, â min ti tel lo la nangmah chiah i â” Rochhungan a lo ti ve chu Timothy-a chuan a bawhthlu nghal rawka.

An bengchheng leh tawh ngei mai, chutih lai chuan kan thlang kawngpui lamah chuan in tibuai thâwm a rawn chhuaka. Thinrim zeta mipa rual in cho ri avâng chuan in chung aṭang chuan kan dâk thla ṭhapa, zu rui pawr tih hriat tak hian tlangvâl ṭhian ho an ṭhiante lam ve ve ṭang ni âwm tak hian an lo in thliar hranga, an lo in kâwk sawk sawk mai.

Kan en ṭhap a, an pawr in an aw rawl a ring nasa mai sia chu ringawt pawh chu hlauhawm tham a ni. Khawpui hi chu mi chêng an tam ang bawkin misual leh tualthah hreh lo te hi an tam tawh si a, hmeichhe tân phei hi chuan zânah hi chuan vah chhuah vak chi pawh a nilo.

Rin ang ngeiin an in khawih rawn luai luaia, tunlai rawlthar ho hi a huho lo hian mi hi an sual ngam meuhlo nge a huhoa insual hi an chîng ka ti ṭhin. Ngam leh ngam, cho leh cho te chu ṭhiante pun lo hian mal leh mala inbeih ve mai âwm.

Pasalṭhate pawh an incho chuan mal leh malin an inbei maia, tûnlai mite erawh ka chak loh palh chuan ka ṭhiante'n min rawn pui rawh se tih rilru pu hian kan ṭhiante kan puna, kan fuih pawrha. He thil hi chu keichuan dawihzepna ah ka ngai, mi huaisen chuan a ngam tawh chu ṭhiante tello in a sual mai turah ka ngai.

“Tel ve a va châkawm ve” ti a Thanzuala ri dut dut chu kan lo khap vata, khap lo ila chuan an tel leh duh tak tak ang. Vanrongura lah chuan a en ulukin insual chu a châk tih ka hre reng. A hma ah pawh an ṭhianho in mi an lo sualpui tawha, mahse khutiang ang nilo in fair takin a ni thung. 

“Zu tel vaih teh aw, a en pawh en tawh suh u.” tiin Vanrongura chu ka pawtsawn zui daiha, min zui ve mai bawk. Insual bur bur ho nun hi chu entawntlâk a awm lo viaua, hetiang mi hi ka ngaina miahlo bawk, Vanrongura pawh ka khap nasa viau rêng a, tûnah chuan tlêmin a sim deuh tawha.

Mahsela amah chotu an awm anihchuan a chhuah ngai hauhlo thung. “Ka tel dâwn lo, i hlauthâwng lutuk a nih kha” a tihchuan ka thaw haka “I insual ka duh tawh lo ka tihkha, tel ve tum vaih teh. Ka ṭhen daih ang che, hetiang tlangvâl sual tih tâwk a ni, a tel pawh tel angai lo sawi pawh kha sawi tawh suh” tiin midang awmlohna laiah chuan ka hau hlak hlaka.

A nui suk suk chu ka beng nghâl hlak mai, chutah thim kârah chuan min pawt lûtin a âwmah chuan min pawm beta. “Hetia awm hi anuam, zanin chu kan pahnih chauha hun hman dun ka duh ani” tiin ka chalah chuan a rawn fâwp vang vanga. 

“Kan pahnih chauhin maw?” ka tihchuan a bu nghata “Tirawh le heta ṭang hian kalsawn teh ang” tiin min chhuahpuia, kan ṭhiante chu kan haw tawh tur thu hrilhin an ni pawh chuan min lo mangṭha sap sapa, “Zanin chu khawiah emaw hruai che ka duh” a tihchuan zawhna ka zâwt tawh bik lêm lo.

Ka ring tâwk a, ka chungah eng thil ṭha lo mah a ti dawn lo tih ka hria. A bike chuan in phur chhuakin khaw pâwn lam min panpuia, engmah ka zâwt buai lêm lo. Chutah ramhnuaiah min tlan luh pui tâkah chuan “Enge hetah kan tih dâwn? Ka hlau ania” ka tihchuan ka kut chu a rawn hmer zauha.

“Kan huanah kan riak dûn ang chu ka ti, i ṭhiante hnênah khân an bula riak anga sawi tûr che in ka ti tawha, hlauthâwng suh. Engkim a ṭha, thawveng takin i awm thei ang, kan pahnih chauha hetiang hun kan hman dun leh hun tur a hriat siloha” a tihchuan mak ti zetin ka ena, chutiang thu chu engvanga sawi nge maw a nih le?

“Enge i sawi awmzia? Awmbo i tum em ni?” ka tihchuan engmah sawi rih lo in a bike chu a ti dinga “Kan thleng e, chhuk la. Hetah chuan tumahin min rawn tibuai lo ang” a tih tâkah chuan chhuk vatin ka hawikual ruaia, ka hmuh theih chin chu a thim mup mai. 

Sava leh rannung hrâm nên chuan ka awm a nuam chiahlo, ka kutah a rawn vawn tâkah chuan tlêm chuan thla a muang deuh. Chutah a phone light chu chhiin kawng zîm tê ah chuan min kalpuia, reiloteah kan hmaah chuan thlam ti ila in lian vak lo a sakdan erawh nalh ru tak lo ding hmaah chuan min dinpuii a kekawr ip chu a zen rak raka, chahbi a rawn phawrh rual chuan kawngkhâr chu hawngin inchhunga light chu a chhi zuia.

Ka âng pam mai, mihring mamawh tur thil chu a awm kim ve veka. Chu thil ka hmuh chuan ka nui nghal ver ver  mai “A nuam takzet” ka tihchuan ka bulah rawn kal hnaiin room lamah min hruai lût zuia “Ds nichina i thusawi kha sawi chiang tawh rawh, enge ka bulah hun hmang rei lo tur ang maia i insawi awmzia kha” ka tihchuan min rawn en ta vang vanga.

A awmdân hi ka ngaih a ti ṭha miahlo, “Ka pa an sawn dâwna, mahsela keichu khu lamah ka chhuk leh ang, ka pass a nihchuan ka nu leh pa hian khulamah min chhuhtir leh an tuma” a tihchuan ka hlimna chu a reh nghal riai riaia, ka nui hmêl pawh chu an tâwp vek bawk.

Chu thil a hmuh rual chuan ka bulah a rawn kal hnai vata, ka khabeah chuan dawmin min kuai dâka. “I....i awm leh char char dâwn tihna em ni?” ka ti sepa, a awmbo tur anga ka ngaihtuah chuan ka ṭah a chhuak ṭun mai. Kan hlim ve dâwnin thinlung tak tak ka hlân dâwn chauha, kumkhat chiah maw kan inzui dâwna.

Ka mittui tla tur chu a hmuh duh loin hmundang ka hawi sawn daiha “Duati” a tih pawh chuan ka chhâng duhlo, ka chhâng anihchuan ka aw aṭangin ka ṭah chhuak insûm hi a hre ngei ngei dawn. Thâwk la ham hamin ka insûm hrâm hrâm a, mahsela a har takzet, kum a liam anga an exam anga chuan ka hnên aṭangin a bo vang vang tawh dâwn.

A lo kîr tawh lo mai theia, hmeichhe dang a tawng mai thei bawk. “Min en teh, ngati nge khatia i awma? Ka rawn haw zeuh zeuh dâwn alawm, rei tak ka awm bosan dâwn lo che” a tihchuan ka en duh chuanglo. Ka ṭah a chhuak zual deuh deuh, ka mittui chu ka hru zauh zauha, insûm thei tawh lo in ka ṭap nghal hlawp hlawp mai.

Chuveleh rang zeta min kuai herin min pawm bet vata “Min ngaihtuah ve miahlo” ka ti sapa, tûnah ka thinlung zawng zawng ka hlân a, ka hlim ve dâwn chauh emaw ka tihlaiin hetiang thu ka hre leh bawk si.

“U Sangpui ṭap tawh lo la, i ṭah chuan tihdân tur che ka hrelo. Kan innei mai dâwn em ni?” a tihchuan ka thaw ta haka, “I la naupang lutuk, bâkah ka sawi tawh kha. Mahsela ka hmuh phâk loha i awm tur chu ka ngaihtuah duh lo, hmeichhe dang i tawng leh anga min theihnghilh mai ang tih ka hlau” ka tihchuan ka chhîpah chuan a khabe rawn nghatin min kuah nghet sauha.

“Chutiang zâwngin ngai suh, ka kal a nih pawhin nangmah lo hmeichhe dang an awm ngailo ang. Ka lo lêt leh vat dâwn a lawm, ka sawi kha zanin hun angah hian ṭap turin ka duh lo che. Hlim takin awm zâwk teh ang, i ṭah chuan tihdân tur ka hre ṭhin lo che a, i hlim loh chuan ka hlim thei bik lo ania. Le ka bialnu hmelṭha nui tawh rawh le” ti a min nuih tâk sakah chuan keipawh chu ka nui lui ve haka.

Khumah chuan min ṭhut thlâk puia “A fai vek a nia, a khât tawkin kan kal renga, a me lo ang” tiin ka samah chuan a chûl hliau hliaua, chu chuan ka awm a tinuam deuh huai mai. Khumah chuan mu dunin kan titi sap sapa, mahsela a awmbo hun tur a sawi mawlh khân rilru a luaha, ka awm a nuam thei tak tak lo.

Amah pawh chuan a hrethiam a niang, min pawm leh vang vang ṭhin a, ka ngawi chawi a ti ta deuh nge min en vung vungin “Duati” a rawn ti ta chiah rêng a, ka bu nghat ringawt. A âwmah chuan beiin ka thaw dep depa, ka ṭawng peih meuhlo, heti em em hian ka lo thlahlelin ka lo duh tawh ang tih ka ring pha lo. 

ZAWMNA....

“Awm bo nghal mai turin min ngai lo la, ka lo kîr leh thuai dâwn a lawm. Hna ka zawng anga, ka rawn lêt leh vat ang” a tih pawh chuan ka chhâng duh meuhlo, tûn a rawn haw ve chauha a awm leh nghal tur chu ka phallo bur mai. Nge ni a a nu leh pa hian hriatruk an nei nge tihte lam lam chu ka ngaihtuaha, hetianga awm bo tir leh an tum thut nachhan hi ka hrethiam meuhlo a ni.

“Min chhâng la, hetianga i ngawih reng hian a nuam ka ti miahlo ania. A nih innei mai ang” a tihchuan ka thaw haka, innei pawh ni ila a nu leh pa hian an pawt lêt tho tho in ka ring. Hna nei ngei turin an duh a, an mahni châwmtu tur ber pawh a ni bawk, “Inneih ringawt a nilo” ka ti hapa.

“Ds dik takin min chhâng rawh, i nu leh pa hian kan inkar hi an hria em?” ka tihchuan min rawn en vata, a hmêl danglam zawkah chuan ka thusawi chu a nih ngei pawh ka ring. 

“Ka nu in hmanni a ka fawh lai che kha a lo hmu a” a ti ta hapa, ka rin dân chiah a ni. A nu leh pa hi ka chungah ṭha viau mahsela an monu ni tur êm chuan min duh hauh lovang, chutah eng hna mah ka la neiloa, ka nu leh pa lah thingtlâng mi mai an ni bawk si. 

An ni ang mi hlun leh chhungkaw khawsak lian em em tân chuan ka iaiawm ve rêng ani. “Chuvang a nimaw thawn bo che an tum, chuan nangpawhin ilo pawm bawka” ka ti ta sapa, a mi kuahna ata chu awm sawnin ka tho chhuaka. Khumah chuan ṭhu in ka hmalam ka en ta vang vang bawk.

“Ih i thinrim em ni? Ṭhen che ka tum miahlo ania aw, mahsela ka nu leh pa thu hi ka tân pawh hnial a har ve a, min hringtute ngei an ni bawk si a ka tân pawh hnial an har ve a” a rawn tihchuan ka hrethiam lutuk, a nu leh pa châwm mai a la ni ve a, a tân pawh an thu hnial kalh a harsa viau ang.

“Chutiang a nihchuan kan inṭhen mai hi a ṭha in ka hria, i nu leh pa chuan min pawm dâwn lo tih a lang chiang tawh viaua, hetiang chuan engmah kan ni tak tak dawn lo” ti a kal mai ka tum chu rawn ding chhuak vatin min kuah bet ta thuaia.

“Eng maw i sawi kha? Min ṭhen ang maw? Engvangin nge khatiang thu kha i sawi? Min kalsan chu i tum tak tak lo tiraw?” tiin min zâwt nghal mawlh mawlh a, engmah ka la sawilo. Ka ngaihtuahna a buaia, keipawhin ka hma hun ka ngaihtuah ve angai ta in ka hria.

“I hriat chian viau kha i nu leh pa in min duh loh avânga thawn bo che tum an ni tih ka hai bik lo, keipawhin ka hma hun ka ngaihtuah ve tawh a ngai ani. Keiai i naupanga, tin kan innei thei tak takin ka ring lo bawk, hetiang reng ai chuan tûna kan tâwp hlen mai hi a ṭha in ka hria, chutilo chu khawi hmun mah kan thlen hi ka ring lo a ni” ka ti ta sepa.

Ka thusawi chuan a ṭhawngin a hriat duh ang a nilo tih pawh ka hria, mahsela a sawi ang tak hian keipawhin ka hmalam hun leh ka chhûngte ka ngaihtuah ve an ngai a ni. 

“U Sangpui min kalsan dâwn tihna maw?” a aw chu a hnawk deuh ṭuaka, a ṭah a chhuak hle tih ka hre thei. Keimah pawh ka ni ve tho “I sawi kha, kan hmalam hun leh kan chhûngte kan ngaihtuah ve ve angai si alawm, i chhungte'n min duh miau siloa, tûnah inṭhen lo pawh ni ila i nu leh pa i hnial theiloa, nakinah keima tâna natna tur tho tho ani. Chuvang chuan tûna kan tâwp mai hi a ṭha zawk” ka ti chu ka hmaah a rawn ṭhingṭhi rawka.

“Khawngaihin inṭhen ka duhlo, tûnah chuan i sawi ang khân ka enkawl theih nân che hna ka neih ve angai si a, chuvang zawka kal tum chu ka ni asin. Ṭhen che ka tum reng reng lo, hna ka neih chuan ka nu leh pa thu thu a ka awm angai tawh dâwn lova. Thlamuang taka ka kianga awm tir che ka duh vâng chauh a sin, inṭhen ka duh lo i tello chuan ka awm thei lo ang” a mittui chu a far zui fapa.

Keipawh ka insûm theilo, ka mittui chu a luang ve zung zung tho. Hetianga kan awm thut ngai hi keipawhin hriatthiam har ka ti a, ka tân pawh a buaithlâk in ngaihtuahna hman dân tur pawh a hriat meuhlo.

Ani vuan leh ila a nu leh pa rilru ka hre ta bawk nên min pawh ṭhen an tum tho thoin ka ringa, thlah ta ila ka hlim angem ka hre hek lo.

Hmangaihna hian hlimna chauh nilo in channa leh natna te pawha lo keng tel ve a lo nih hi. Hun hlimawm leh nuam lam chiah nilo in hun harsa leh hrehawm tak tak tawh tur a lo awm ve reng bawka, ngaihtuahna tibuai map thei khawpa mi sal bet tu ngei chu.

“En teh Ds, hetianga kan awm reng chuan nakinah kan pahnih tâna kan natna tur tho a ni. I nu leh pa in enge an sawi chu ka hreloa, mahsela min duh lo tu inah chuan ka lawi lût thei bik dâwn em ni? Buaina leh harsatna a rawn thleng ngei bawk ang, na tak chunga inṭhen ngai lo turin tûnah kan nat tak tak hma hian kan tawp a ṭha in ka hria” ka ti leh sepa.

Kan hmangaihte chu thil ṭha zawng zawng kan duhsak ṭhin a, an natna tih kan duh ngailoa. Mahsela an natna kan duh loh avâng vêkin kan tihnat hmasak a ngai leh fo bawk, hmangaihna chuan mahni hma a siala, a hmangaih chân a phal ngailo, a vawn theih chhûng chu vawn a duh ṭhin. Chu hmangaihna tho chuan mahni hmasial duhlo in a hmangaih hlim nân amah nat ral raih a thlang ṭhin bawk, a tuartu zâwk nih a hreh hek lo.

Hmangaihtu chuan a hmangaih a kaltîr theia, a hmangaih a vuan reng ṭhin bawk. A hmangaih dinhmun a zirin a insiam rem mai ṭhin

“U Sangpui min kalsan suh, aih ka duhlo i tello chuan ka awm thei lo ang“ min pawm bet tlata, a ṭap ri ta hak bawk. Hetianga awm pui hi ka duh ngailo, mahse zanina ka thu hriat te hian min tina êm ani. 

“Ds“ engmah ka sawi thei tawh biklo, a âwmah chuan ka hmai nawrin ka ṭap khûr dar dara. “Kalsan ka duh che avânga ka nu leh pa thu kha pawm ka nilo, kan pahniha kan awm vat theih nân zawka pawm ka ni, tûnah hian hetianga awm tur pawh kan nilo, kan pahniha Lal pian hun hi hlim taka hman ka duh vâng a ni, tihian awm lo ang aw. Ka kalsan ngai dâwn lo che“ a tih tâkah chuan ka inthlah dul ve ta riai riaia.

Ka biang tawn tawnah chuan rawn vuanin a mitmeng cool raih chuan min ena, ka mit ka chhing ta daiha, a mitmeng hi ka melh lêt ngam ṭhin lo. Ka hmuiah chuan rawn fawpin khumah chuan min kuai mu riai riaia, kan lungphu in thum rawn tluk tluk te chuan kan inhipna nasat zia chu a ti lang chiang viau bawk.

A hnungah chuan nghet taka kuahin ka thinlungah chuan ka lo lâwm lût a, zanin hun hi ka theihnghilh ngai ka ringlo, kan pahniha hun kan hman dunna hmasa ber a ni si a. Chutih rual erawh chuan kan thianghlimna erawh kan la vawng dun ve ve thei thung, a âwmah chuan bei thlarin a lung phu dat dat chu ka ngai thla a.

Thawmhnaw a ha loa, a taksa lum thar thar chu ka hrechiang viau bawk. Ka kâwngah kuahin ka hmai vel chu a rawn chuk leh ta dan dana, ka nui deuh hak mai.

TI ZAWNG HI NI RIH MAI RAWH SE AW