DUHAISAM DUHLAI ZORINPUIA S2 CHAPTER 1-7

DUHLAI ZORINPUIA 

CHAPTER 1 

“Ehem! Chhelo deuh ve” rawlthar higher zir lai ho bawk chuan kan college kal tur chu min lo chhaih leh peka. Nidangah chuan ka enliam mai ṭhin kha ania ka en liam thei ta tlat lo, an ni ai u fe lehnghâl hetianga min chhaih ziah hi ka duh hauh lo bawk.

“Aia u khatianga chhaih fo kha sim ang che u, nula pawh ni ila nangni ai kan upa tih hria ang che u. In lo tih leh vaih chuan ka ngawi tawh hauh lovang” ka tihchuan an ngawi ṭhapa “Naupang nghal lutuk, nula chhaih rual pawh in la nih loh kha” ka ti leh hrama.

Kei hi Zosangliani ka ni a, Zorinpuia leh Zohmingsangi te fanu upa ber ka ni bawk. Keima tâwkah ka induhtawk ve viaua, nimahsela chapo erawh ka ni ngai lo thung, hêng rawlthar ho erawh hi chuan ṭawng khum loh theihloh turin min nawr miaua, ka ngawi reng theilo animahna.

“Kan fiam duh mah che hi lâwm ta che, i mawng dep tehlul nên hmeichhe in duhtâwk lutuk, keini ai upa pawh nila hmeichhia i nih kha hmei.....chhia....” rawn ti tu chu ka ena. Nidangah chuan ka hmu ngai hauhlo, nge ni a ka en lutuk ṭhin loh avâng khân ka lo hmu ngai lo ni zâwk dawn ni.

A sam chu a buk hle a, a hmaifang chu a naupan ngaihtuahin a pa hrak lehnghâl. A ṭhiante lâk aṭang chuan a awm hrang deuha, duhdah zeta ṭhu hian keichu thatchhiat hmel zet hian min en bawka, a ṭhiante laka ka awmdân ang lo takin ka danglam. Min ti zâm lek lek mai.

Chutah inthing harhin “Ka mawng lam ka sawi lo, khatiangin vawikhat mah min lo chhaih tawh suh u, chutilo chu a pawi khawp ang. Naupang lehnghâl” ti leh hramin amah chu ka melh ngheka, a nui suk ringawt. Ka thusawi chu a ngaih pawimawh hmêl loh viau lehnghâl.

“Nula ṭhing tak i ni, thingtlâng mi i ni ngei ang maw? Ka ṭhiante'n an chhaih duh che kha lâwm zâwk tur i ni, keichuan en pawh ka en peih loh lai che in an ni chuan an en duh che hi inchhuang tur zâwk i ni asin” a tihchuan ka sa phat mai, hlauhna nei hauh lo chuan ka pan hnaia.

A hmaah tak chuan dâk vaha va dingin ka en chho ha a, min lo melh lêt ve ran bawk. “Ṭhing min ti maw? En teh naupang, aia upa zah dân lo zir tawh rawh aw, thingtlâng nula hian nang ang khawpui tlangvâl inla milian satliah hi enga tân mah ka ti bik lo che a nia, zaktheilo lutuk, i nu leh pa in nungchang mawi an zirtir ngai lo che em ni?” tiin ka ṭawng khum zui hlak hlaka.

Ka insûm theihna zawng zawng a tichhia a ni ber mai, thingtlâng mi chu nimah ila hetia hmusit taka min ṭawng khum ṭhin an awm hi ka duh hauhlo. Khawpuiah an awm avânga han ngaihsan chiamna tur ka hre biklo, tribal kephahhlai an ni ve tho tho a, in atam mai avânga eizawnna ṭhatna hmuna an awm avânga an han chapo chiam ṭhin hi ka ti thei ṭhak biklo.

Khawpuiah pawh hian a mâwl tâwk leka inla changkâng hi an lo la tam a nih hi. 

Ka thusawi avâng chuan a rum nghata, rawn ding ngilin min chhuk bih ta rûn mai. Ka rin ai daiha a lo len khanglang chu le, mahsela hlau duh bik lo chuan ka melh lêt ngara “Nang hmeichhia zahna châng hrelo, mipa hlauhna châng pawh i hre nange ka khawih hrep zâwk dawn che emaw ni” tiin min melh ngura.

Ka ṭhiante chu rawn in rawlh vatin “Sangpui kal ang u, mipa an nihkha. Keini ai nau mahse hlauhna châng hre teh, kal mai ang u an lo tih leh tawh leh Police ah kan report tawh dâwn ania” an rawn tihchuan ka bula mi chu a nui haka.

“Police maw? Ka hlau hleinem, tûnlai hmeichhia hi in in lu ling ta mah mah, hmeichhe thlavang hauh anat tawh mai avanga FIR in han ti sek te hi sim rawh u, hmân aṭang tawhin mipa hnuaia kûn tur, hmei a kara chhia in nih hi, in duh chuan Police chu han pun ula mahse min man theilo anihchuan in chantur ngaihtuah hmasa ula” a tihchuan ka rap lek lek tawh.

A inchei dân a awm dân aṭang hian mi rethei zawk zawk chu a ni dâwn lo tih ka hria, tin, a ṭhiante ang mai maia vau zâm theih lah a ni dâwn lo tih pawh ka hre chiang viau. 

“In lo ti leh a nihchuan kan ti tawh khawp ang, kan dikna a ni. Aia upa zahna châng pawh hrelo” ti a kal mai ka tum lai chuan min pawt lêt thutin bangah chuan min nem chilh rawka. Ka hmai bul chetah chuan rawn kûn hniamin chiang tak chuan min ena “I ṭawng tam ta mah mah, hmeichhia i nihna chu i hre hle mai maw? I hriat ang khân mipa ka ni tih hi hre bawk la, ka duh loh thleng thleng min nawr palh hlauh ange, kut ka thlâk hreh dâwn hauh lo che ania” tiin ka nghâwng chu na vak silo hian a rawn hmer chata.

Midang lah chuan min pui ngam tawh derlo, rum taka en bâk chu tih theih ka neilo. Chutah min thlah thutin a inhera, “Kal nal nal rawh u, hmeichhe ṭhing zet kutthlak duh tur khawp chuan ka nêp lo” tihluka min hnungchhawn zawnga a ding lai chu rum taka enin ka in hûm ruh sauh sauha.

Chutah a inrin loh lai chuan a kekawr chu pawtthla thutin ka ṭhiante chu ka tlanpui zuia, kan tlân liam hma a ka hawi lêt chuan a kekawr a pawt chho lai leh a ṭhiante'n an nuih vak vak chu ka hmu hman hrâm a.

Min rawn ûm zui ka ring kha a nia mahse min ûmzui lo hlauh, mipui an awm vâng te pawh animahna, kan din hnuah ka ṭhiante chuan min hau mawlh mawlha “I huai ṭhin lutuk, naupang mah nise kan hneh dâwn hauhlo ania, an lian hlawm ropui si. Mipa an nihkha hlau ve tawh ang che” Siampuiin a tihchuan ka ner saka.

“Awi a pa ka lo tih nên a boxer ah khân barbie lem a awm daih maw le” Marami chuan a rawn ti ve bawka, kan ṭhian li chuan kan nui vak vak mai. Keipawhin dik tak chuan a awmdân kha ka hlau ve tho, mahse a ṭawng duh dân kha ka ngei êma hmeichhe tiha mawilo khawpin ka che zui a nihkha, a chawh ve chiang emai.

“In la pa deuhin barbie a la lâwm a nih kha” ka ti ve chu ka ṭhiante chu mittui tla phungin an nuia “Mahse keichu hmelṭha ka ti e, min bem se chuan ka aw duh hial ang. A naupanna lam chu ka en teuhlo khatiang khawpa hmelṭha te chu keiai naupang pawh nise ka duh tho tho, tak takin tunlai naupang hi an hmêlṭha bik e, keini lah hi kan chul rup bika, ṭhang thar rawn chhelo sâwt lutuk hian kan hmêl pawh kan sit rum rum dâwn a lawm” Marami bawk chuan a rawn ti leha.

“Ilo inla upa ve deuh em ni? Nangpawh ṭhang thar tho i nihkha, insit na tur a awm lo emai, kal vat ang u College kan tlai dawn lutuk” tiin hma chu ka hruai zuia, khapa hmêl lah kha ka mitthla ah a châm reng lehnghal, ka huat lutuk avâng nge pawh ka hrelo, chutia ka mitthla a a châm tlat chu ka thinte hi a rim hlur mai.

Thingtlâng nula ṭhing min ti vela, ka ngaisang bik tawp silo a. Hmuh leh pawh ka duh tawh lo, khatiang mi chapo lutuk, naupang lehnghâl a hmêlṭha mahse a nungchang a vâng hrim hrim pawh khân a hmelchhia.

College kan thlenga kan ri leh nuaih nuaih tawh mai,  “Sangpui kha hei ka lo ken che a” kan college mister chu rawn kalin chocolate min rawn pe a, SU a ni bawka duhtu pawh a ngah ve viau, mahse engvang nge mawni min duh thu min hrilh nulh a nihkha. Kei erawhin bialpa han nei turin ka la in dah chhin lo hrim hrim, bâkah ka nu leh pa hian mipa laka fimkhur tura min hrilh tam êm avâng hian hnaih tumna ka neilo.

Tûnlai ah phei chuan a hmei a pa hian rinawmna neilo, in sawi rinawm hi kan tam êm a, ngaihzâwng avânga rilru nat kha ka peihlo a ni ber mai. Hetia awma single mai mai hi nuam ka ti zâwk.

Lâksak loh chu a mawi lo bawk nên SU a lo nihna ah pawh ka zah ve bawk si avâng chuan ka lâk saka, ka ṭhiante lah chuan an aw an lo la thian vak vak zui. An over thei ania, nihpui rawh lah hi an ti ziaha, mahse ka duh miahloh nihpui kha ka theilo.

Min duh viau mahsela ka pawm theilo a ni ber, min duhna avâng erawh chuan ka lâwm a, mahse keichuan rilru ka pêk theih loh tur lakah a dera inzawmna siampui ka duhlo. A mah kha hlim mahsela a rei anga rilru ka neih theihloh miau chuan  kha a hlimna kha rilru natna leh ka lakah beisei sâng si mahsela ka pêk theih miahloh tur duhna rilru in a chên chilh anga, chu chuan hmelma ah min siam thei tih hre reng chung chuan bul ṭanpui ka duhlo.

Ka ngaihzâwng tur chu rilru ka pêk theih tur ngei, keimahin ka ngaihpawimawh theih tur ni ngei sela ka duha, ka duh theih miahloh tur tih ka hriatsa ka nihpui khân keimah ngei pawh ka intichhe tel dawn tih ka hai bik hauh lo.

“Ka lâwm lutuk aw, mahse hetiang hi ti tawh lo la ka tân pawh anuam lo a, i thil neih ei sak che ka ang ka ti ṭhin a, chuvang chuan khawngaihin rawn ti duh tawh suh” ka ti sapa. A ngaihthlak hmêl vak chuang lo.

Ni lêng chuan college lamah ka awma, ka ṭhiante erawh an bialpa te nên lên an duh avângin min haw san mai tur in ka ti kha ania. Kei erawh ka nu leh pa in ka lakah beiseina an neihsan êm avângin an beiseina neih hi tih thlawn ka duh ngailo. Ka pa têt tê aṭanga min fuiha, kan unau leh ka nu tâna theih tâwp chhuaha hnathawk ṭhintu hi ka zah a ni.

Ka ṭhiante chuan pa sawrkar hna thawk hlir an neia, an nun pawh a nuam viau mai. Kei erawh thingtlâng a seilian niin ka pa pawh kuthnathawk mi mai a ni, mahsela ka zahpui ngai lova, rual awtin min siam ngai hek lo. Ka nu nên theihtâwp chhuaha an beihna hi keipawhin lo tih chhiatsak ka duh bik lo a ni ber mai.

Class 1 ka nih aṭangin pakhatna dinhmun ka luah chho ngar ngara, ka nu leh pa zâr ka tilo theilo. 

Ka pi leh pu bulah ka awma, putea te pahnih pawhin min duat viau mai. Pute Remrema phei chuan nupui neiin an indang ve tawha, pute Bawiha leh pute Tlangpuia nên kan panga in kan awma, min duat bawk nên ka nu leh pa hmuh phâk loha awm pawh hrehawm ka ti em em lo.

Zânah chuan kan vêng dâwrah ka zân ei tur lei turin ka chhuaka, zan dangah pawh ka kal fo avângin ka hlau lêm lo. Dawra ei tur ka lei zo ka haw leh chu ka hmaah tak rawn ding an awm avâng chuan ka phone ka en lai chu dah in ka hawi chhuaka, chutah mipa sâng zet lo ding chu a hmêl ka hmuh chian theih loh avângin hlauthâwng deuh tak chuan ka en kara.

“Tunge i nih?” tiin ka aw khûr tur chu ka vêng hrâm hrâm a, mi thah hmang a ni angem tihte chu ka hlau riau lehnghâl. Tûn angah tualthah hmang an tam tawh si a ka hlau riau mai “Tunge ka nih a? Tukina a kekawr i pawhthlak sak kha ka nih hi” rawn tihmuk tu avâng chuan ka thaw deuh huai mai.

“Kalsawn rawh ka haw duh ania” ti a kal pelh mai ka tum chu min dang tlatin ka dar tawn tawnah chuan a rawn vuana, “Teuhlo mai phuba ka la dâwn” tiin ka  kekawr chu rawn pawh a tum ta mai. 

“Hey i mâwl ami? Enge i hriata, min pui ru min pawng” ka sawi zo hman lo ka kâ a rawn hupa, keilah insûm ka tum der lo. A samah chuan ka kehsak nghal ngawng ngawnga, a ni pawhin min kêk ve ta mai.

“Min thlah rawh hmêl a, min thlah nghal rawh” tiin ka au ṭhat ṭhat a, a sam a sei ve bawka ka kêk nghet ngei mai. “Hmeli min thlah rawh chuti lo chu ka hnek ang che” a tihlai chuan mipa thâwm a rawn awma, “Wow helai chu hei ks a nih hmêl, bawiha kalsan teh maw kan lo buaipui ve tawh ang chu. I khawih tumna a lo hnar ve animaw? Kan lo pui ang che” tih aw rawn chhuah rualin kan inthlah zawka.

Ka hlauthâwn ang ngeiin maw? Mipa pahnih lo ding reng ka hmuh chuan ka in seh ruh ṭeuh a,“Enga ks a? Ka ni aw zâwng lo, min rawn hnaih hauh suh u” ka tihlai chuan an nui hak haka. An awmdân aṭang chuan tlangvâl fel tak an nih hmêl loh khawp mai,  hepa vâng vek hi a ni.

A hming ka hre der silo “Ks a nilo, kalsan rawh u” a rawn tih avâng chuan ka en haw a, tûnah khân min chhan tihna em ni? A mak zâwk a lawm le, mahse chutia a pui duhlo ringawt pawh chuan min ti thaw huai thei.

“Enga i sawia naupang? Kalsawn nghal rawh, aia upa zahna châng i va hrelo ve, kan khawih hrep che i duh loh chuan kalsawn nal nal rawh” tiin keichu min rawn khawih mai an tuma, a mah bawk chuan lo dangin a hnungah min din tira.

“Tikhan ka hliahah khân awm la, rawn hawi chhuak miah suh. I mit kha chhing rawh, thâwm bengchheng i chhuah chuan miin an rawn hria anga an ngai diklo ang che” a tihchuan a ngaihtuahna thui zia ka hre mai. Ni e a sawi ang tak tak hian hmeichhe khaw lo tak ah min ngai ang tih a hriat sa veka, hnial duh bik lo in ka mit ka chhinga, chuveleh thil ri sawk sawk ka hre zuia.

Ka mit pawh chhing ta lo chuan hlauthâwng zetin ka meng chhuaka, an khawih rawn a nih ringa kha râwlthar ka en chu amah zâwk chuan chu mite pahnih chu a lo hnek thlu dera, a kawr chu a lo siam ṭha mual mual chu niin.

Mak ka ti lutuk chuan engmah pawh sawi lo leh zâwt lo chuan ka en reng ringawt. “Hey nula senior nu khati khân ding reng lo khân min rawn zui rawh, vawikhat mah min ngam lutukin ṭawng tawh suh ang che. Midang ngam tawp silo” tiin ka mit zâwnah chuan a kut chu a rawn ti ri kerh kerh a.

Ka harh chhuak zawk mai, ka en chu a ni pawh a hmui vêl chu a lo thi ve ser sera, “Rawn kal rawh ka lo thlah ang che” tiin min kaisawna, nichinah khân ka sual thiam ang tâwkin min ti lêt ve mai mai tih ka hre chiah, tûna a mi khawih te ang khân min khawih ve sela chuan ka bui chêr chur dâwn a nih kha.

“Khawi i hmui kha ka lo hru ang” ti a ka rawmawl ka phawrh chu min lo dangin “I hnap hrukna te a ni ange ka duhlo” a rawn ti anihchu! He mihring chimawm leh sual zet hi engtin nge ka hmuh fuh zel ni.

“Hnap hruk nân ka hmang ngailo, dawh mai mai teh kha a thi a tam tawh ania” ka tih tâkah chuan in pakhat sumhmun thim laiah chuan a ṭhu a, keipawh chuan ka hnaih nghal vat bawk. Êngin a hmai a chhun avâng chuan a hmêl chiang takin ka hmu theia, a hmui mai nilo a mitbul pawh a lo vûng ve deuha. 

Pahnih an ni miau a an khawih fuh loh chu ka ring lo hrim hrim, a hmui chu chhêm pahin ka hruksaka, a thi duh phian lehnghâl. A mah pawh en lo in a hmui ringawt chu ka ena, chutah ka hru zo ka hawi chhuakin min lo en reng tih ka hriat chuan ka hawisawn vata.

A naupan anga en a har riau mai, eng emaw ti taka mi siamna a neia. A mi uap a na ru riau lehnghal, ka thaw haka, “A zo kan in a hla tawh lova, a nih mangṭha phawt. Tin, vawikhat mah hmeichhia sual tawh suh ang che” ka tihchuan a nui haka “Min cho tawh miah suh, ka thil tih theih chu i hmuh kha. In inthleng ka thlah ang che, kha keimah avângin ks emaw an ti lehnghâl che a, i haw vat chu angai ang” tiin ka bulah chuan a rawn ding leha.

Ka hnial duh ta biklo, zânah chuan mahni a vah chhuah tam loh a him a nih hi. Mahse ka la vah chhuah leh tho chu ka ring, kan khua ah kha chuan hetiang a tlangvâl sual hi an awm ngai lo mawle. Thingtlang nawm ve na pakhat ani, zu rui an awm pawhin hmeichhia ti buai zawngin an awm ve ngai lova, mipa leh mipa in tibuai erawh an awm ve fo thung.

Kan in a hlat lêm loh avâng chuan step bul thleng chu inthlah tirin “Kan thleng tawh e, lêt tawh rawh” ka tihlai chuan kan in chu a en vung vunga, chutah nui sukin kan in bul chiah inah chuan a lût ta mai. Enge a awmzia “A nih muttui aw nula senior nu” a la rawn ti zuia, awi a va zak lo tak..

Miinah a lût ringawt nia, nge ni a keihian hepa hi ka lo hmu ngailo ni zâwk dawn ni? 

DUHAISAM (DUHLAI ZORINPUIA S2)

CHAPTER 2 

“Sangpui tukina rawn thlah tu che kha nimina a kekawr i pawhthlak sak pa kha a ni lo em ni?” Marami chuan class a lehkha ka zir mawlh mawlh lai chuan a rawn ti a, kha maw an lo hmu leh hmana tûn hi an vawinga min zawhna a ni tawh. 

Engvanga hre châk em em nge maw an nih ni. “Aw a nihkha, kan ṭhenawm mihausa fapa a lo nihkha” ka tihchuan an rawn ngaih ven nghal hle. “Tunge? IAS Pu Ruata te kha i tihna em ni? In inbul chiah te kha” Siampuii pawh chuan a rawn ti nghal zata. Ka bu nghat nghat mai.

“A hming mak zia chu maw hmanlai putar hming ang mai ani, a nu leh pan putar hming an pe a ni ringawt” ka tihchuan min rawn hnaih zual sauha. An hre châk hle tih ka hre mai, an star tihchu nimina an hmuha an awmdân aṭang khân ka hre vek tawh.

“A hming chu, sawi vat teh kan hre ve châk ania” tiin min bêng deuh awk awka, ka nuih an ti za ngei mai. “Vanrongura mawle, a tûnlai hming lo ve chiang e” ka tihchuan an ner nâng a.

“A mawi êm chu, vânah ro a nei dâwn a nimai a lawm. A hmelṭha bawk si, awi in inah rawn lên reng mai ka duh keichu” Marami chuan a rawn ti a, an va han over tak. Ner nawng nawngin ka lehkhabu chu ka bih san leha.

Thlaleh hian kan exam tawh dâwn a, chuvang chuan ṭan ka ngai zual hle. Chawlh chhunga kan khua a haw ka duh bawk nên ka phur tawh takzet, ka nu leh pa leh ka naute ho ka hmu châk tawh. Ka pa bula hnathawh leh te pawh ka châk, khawpui chu a nawm viau rualin ka âwl leh em em lutuka, têt tê aṭanga nu leh pa lo pui ṭhang ka ni bawk nên hnathawk lo a awm hi hrehawm ka ti.

Ka ṭhiante pawh ka hmu châk tawh hrim hrim, in lâwm khâwma lui kal ho leh te kha ka châk a ni ber mai. An ni chu kan khaw lamah an awm deuh veka, a ṭhente erawh chuan pasal an nei tawh thung. Thingtlâng chu tlêmin inneih kan duh hma a vâng hian nula pawh hi kan tlêm pharh zel.

Bânah chuan College pâwnah kan inzui chhuak diah diaha, kan vêng a inhlat deuh hlawm avâng hian haw lam hi chu kan haw rual ngai meuhlo. Kal lam erawh a chângin kan innghak khâwm ve ṭhin thung, Taxi phar tur ka zawn lai tak chuan ka hmaah Vanrongura bike chu a rawn ding chata.

A haw daih tawh ka rin laia a lo la awm chu mak ka ti ngei mai. Ka ṭhiante lah in taxi ka hmuh hun an lo nghak ve bawk nên an insik nghal nawk nawk mai “Rawn chuang vat la ka hmanhmawh a nia, football khelh ka duh, pitar che muang lutuk” a rawn tihchuan rum zetin ka ena.

Englai maha ṭawngkam mawi hmang theilo reng reng mai “I pi rual ka nilo aw naupang, khatiang khân min ko ziah suh. Ṭawngkam mawi i thiam lo em ni?” ka ti hlawk hlawka, chutah min rawn melh vutin “Ṭawngkam mawi ka hriat avâng in a lawm ka koh che, pitar leh nu ho chiahin naupang min ti ṭhin, ka nu ti tur che chuan ini bawk siloa ka pi ka ti che a nihkha, rawn chuang vat mai teh. I piin min ngên lo se la chuan maw ka nghâk miah lo ang che” a rawn ti leha.

Chhan ka tum uk nangin taxi ka lâk chuan pawisa chawi leh ṭeuh a ngai dâwn si a, sum khêk ve ka duh bawk nên a remchâng tihna a nimai. Chhâng duh tawh lo chuan ka ṭhiante chu mangṭha in ka lâwn kai zuia, ka ṭhiante pawh chuan min bye bye lauh lauh mai.

Ka kuah duhlo na'ngin a tlân chak thei lutuk hi kuah loh theih pawh a nilo, jamah kan tâng ta hlauha a vânneih thlâk. Motor an tam tâkah chuan nin hmêl tak hian a en leh vung vung ṭhin, “Va han kham e aw, kawngpui tê sa nên hian a in sa thar apiang lah hian kawngpui hnaih loh hlauin kawngpui an nek tê bawk. Mizoram hi chu” ti a a phun hluk hluk lai chuan “In tel ve tho ania aw, in in pawhin kawngpui a hnaih tho” ka tihlai chuan rawn hawi lêtin “I chhe zêp zuap, lo ṭawng ve sek suh. Bawp tawi ropui si, ar mawng ang mai lo phun ve nuap nuap zel mai” a sawi zawh rual chuan a tukkhumah ka beng bu lâwp a.

Kan la tlu ṭhelh zui “I â em ni? Engvanga min rawn bêng nge i nih? Accident ila i chawi vek thei em?” tiin min rawn melh khur khura, ka hlau lo ve chiang e keiaia naupang daih lehnghâl. “Mahni aia naupang thusawiah ka zâm ngailo” ka lo ti ve hmaka.

A ṭawng dân ṭhin hrim hrim hi ka ngai thei hauhlo, chuvang pawh aniang hnial reng hi nuam ka ti tlat nia mawle. Hlauhna pawh ka nei leh tawh chuang lo.

“A ni ang, nula thi hul nu. I upa tawh lutuk a i thi pawh a hul tawh a nih dâwn kha, i ro rup mai alawm. Nang ang nula senior ho hi chuan Minister emaw hi in inti ṭhin a lawm” a rawn ti erawh chuan min ti lâwm hauhlo.

Hetiang ang a ṭawng thei mipa hi engtin nge an awm theih zâwk ni! Na lutuka ben ka châk ngei mai “Hmela ka thi a hul bawk lo, tin nula senior ka la nilo, kum 23 chiah ka la nih hi aw” ka tih lai chuan a rawn nui haka.

Tlân chhuah leh pah chuan “Nia kum 23 nula senior siak nei chin” a rawn ti leh kher a. Awi he mihring aia huat hi ka nei leh tawh pawhin ka ringlo, engtin nge hetiang khawpa mipa ṭawng thei hi an awm theih zâwk. 

“I siak kha a sei tawh ngawt lo maw?” nuihza âw zet chuan a rawn ti a, chutah a hnungah chuan bêng in “Bike hi ti ding rawh” tiin ka au zui tuara, a ni nên a in hnial reng ai chuan ka ke a haw pawh ka duh daih zâwk.

“Ti ding rawh ka tihchu” a tih din duh loh avâng chuan zuan thlâk tumin ka che a, chuveleh a brake chu rap ri tuarin kawnglakah chuan kan ding zui ta dawta. Kan la tlu teuh em em zui, in rah khalh hneh hle lo sela chuan kan tlu ngei ang.

“Mami in va â ve, kha tlêm a tlêmah kan rawn su lo chauh cheu alawm, fimkhur ta che u. I bialpa nên khân in intithiamlo anihpawhin lir tlân laiah chhuk an tum ngailo” kan hnunga car khalhtupa in a rawn tihchuan ka zak ngei mai.

In ngaizawng kan nilo tih sawi châk viau mah ila kan dinhmun nên hian a rem tih ṭeuh lo, “Fimkhur tawh ang che u, tûnlai ṭhangthar ho hi chu a hmei a pa hian in huaisar lutuka, in hlauhna lah hi innei silo” ti a a phun zui leh hlak hlak lai chuan Vanrongura chuan min tlân chhuah pui leh ta daiha.

“An sawi kha a dik chiah, khatiang i chin dawn pawhin i duh leh nangmahin i ti tawh dâwn ania. I ruala thih tir min tum ve hauh suh, thih i châk chuan nangmahin thi mai la. Keichuan thih ka châk ve viau lo” a rawn ti leha, ka chhâng peih tawh nek lo e. A duh duh chu sawi sela in thlen ruala luhsan nghal nal nal ka duh.

Be duh tawh lo chuan ngawi reng chuan a hnungah chuan ka ṭhu ngawi renga. A ni pawhin min be tawh bik lêm lo a, an in kawt kan thlen rualin rang zet hian ka chhuk a, “Ka lâwm e” ti bul hmakin kan in lam pan chuan ka kal zuia, midangte chu nise ka nuih sâng thei mahna le.

In chhûng ka luh rualin ka room ka pana, ka inthlâk mawlh mawlh laia Vanrongura room lam ka va hawi chu parda a lo zar phui lo nên a kawr phelh a a lo awm ka hmuh chuan ka meng kawka. Six pack a nei nia, a pian chu a nalh lo tih phal chi a ni hauhlo, a sam buk lam mah chu a chula, min rawn ngaihven hauh loh avâng chuan a pian chu ka en kuala.

A naupan anga en chi a ni hauhlo, a pian a mawi lutuk tlat. Chil lem khalhin ka ngaihtuah neuh neuha, movie en fo ṭhin ka ni bawka. A changtupa te pian ang kha a nei ni berin ka hria, chutia ka lo en reng lai chuan ka lam a rawn hawi ta thuta, lo hawisawn hmanna a awm lo bawk nên ka lei ka chhuah vak ringawta.

Mit san ukin “Min it chiang mai, ila hmuh belh duh em?” tiin a rawn au lung lunga, ka room lam a rawn hnaih tih ka hriat rual chuan ka parda chu ka zar phui zui ta daiha, a nui kur kur ri pawh ka hre reng. Naupang nghal lutuk mai, hmai sa hat hat chung chuan inbual turin bathroomah chuan ka lût zui ta daiha.

Kan room a inhnaih bawk si a, duh chu nise a ni phei chu a rawn lawn kai thei zung zungin ka ring. Ka inbual zawh chuan inthlâk leh te te in lehkha chu ka zir lehnghala, awmpui ka neih avâng hian rawngbawl lam chu ka âwl thei viaua. Tukin erawh kan awmpuinu a dam loh avângin ka pi nên kan bawl kha a nia.

“Nula senior nu a nih phawt aw, zanin chu i room tukverh bulah hian ramhuai a rawn kal mai thei ania” tiin thâwm chu a reh zui hmaka. Hmelchhe lutuk mai, chimawm thiamna zawng zawng a nei emaw tihtur a ni, engtin nge nu Mapuii hian hetiang fapa hi a neih theih zâwk le.

A ni te chu a fela min duat tehlul nên, an ina ka va lên châng pawh hian min lo be siam siam zela. An hausak ang aiin mi hausa ka hriat tawhah chuan an la zauin an in ngaitlawm berin ka hria, induhtawkna an nei lo ka lo ti ṭhin.

Mahsela an fapa hi chu a chimawm mah mah a nih ber hi, ngaihven duh tawh lo chuan lehkha chu ka zir zawm mawlh mawlha. BA ka zawh hi chuan kan khaw lamah zirtirtu hna dîl ve ka duh tawh dawna, chu chu ka nu duhthusam a ni a, ka pa erawh chuan a aia sâng kal turin min la duh thung.

Mahsela keipawhin ka pa rim taka hna thawk a, kei leh ka naute zawng zawng enkawla a la buai reng ka hmuh hian ka khawngaih tawh. Heti chung hian ka nu emaw ka naute emaw pawh tumah ṭawngkam vinin a be ngailo a, ka nu a hmangaihna lah kei leh ka unaute zawng zawng hian kan hmuh hmaih ngailo.

Pa hmelṭha tak a ni a, mi hian ka nu nên an vanglai an sawi ṭhin a, an inhmeh thu leh an buai nasat ve zia te pawh ka hre ve tawha. Bâkah ka pi hian ka pa hi a hma chuan an duhloh thu min hrilh tawha, an lo rinsual zia hial an sawi a nihkha. Mahsela tûnah chuan ka pa an duat zia leh kei ngei pawh ka college kalna zawng zawng hi ka pi te hian an tum vek tawpa, ka nu leh pa pawh an hahdam phah deuhin ka ring.

Lehkha ka zir duhtâwk meuh chuan khua a lo thim vek tawha, ka pi in chaw ei turin min rawn kauh tâkah chuan ka chhuak vata. Keini hi chu thingtlâng lam ang deuhin chaw kan ei tlai ngai lova, midangte erawh hi chuan dar 9 rik dâwnah te an ei chauh zela, keini erawh ka nu leh pa te tihdan zirin hma takah kan eia, a hnuah mahni duh zâwng ṭheuh kan ti leh mai ṭhin.

Chaw ei lai chuan kan college chungchâng te chu ka sawi mawlh mawlha, ka piina Vanronguran min phurh haw leh haw loh min zawh chuan ka bu nghat ringawta.

“Mipa a nia, nangai nau mahsela a pumrua a liana, a vêng thei dâwn che a. I putea te lah an buai ve bawk si a kawmngeih tum la, mipa ṭhian neih tluka hlu a awm lo ania. Tlangvâl sual tak tak ruihtheihthil duh an tam tawh si a, chuvang chuan fimkhur hle rawh” a ti zuia, ka chhâng tawh lêm lo thung.

ZAWMNA 

Zân mut hma chuan lehkha ka zir leh tê tê a, lehkha zir lo hi chuan ka awm ngai meuhlo. Chutia ka lehkhabu ka en mawlh mawlh lai chuan thâwm rawn awmin “Pitar lehkhazir peih deuh, tar a hnu lamah lehkha i zir ṭha vêl a nimaw? A thawk tawh âwm lo e, eng hna mah i chelh thei chuang lo ang, thih dâwn a ruaiah IAS te kha nih i tum ve ange” rawn ti tu avâng chuan ka lehkha chhiar lai chu tâwp datin ka ngawi kara.

Mai mai chuan saw nau sawn min be lo in a awm thei lo emaw ni? Lungawi lo zet chuan ka awma, ka la chhâng duh ṭhak lo,chutah rawn nui leh hukin “Tar hnuah i han officer tur chuh! A dangdai ve e” a rawn ti leh chu insûm theilo in ka tui bottle chu la in parda chu ka hawng thuta, a lamah ka vawm phei rualin a lu a ri nghal lawlh mai.

“Chawh lutuk” ka tihlai chuan a intuai zui vut vuta “Kutthlak i va hmang reuh ve, min thah i tum em ni?” tiin a rawn hawi chhuak chu rum fe hian ka lo melha, khua thim tawh mahse current êng in kan hmêl a chhun bawk nên chiang takin kan inhmu ve ve a, a ni pawh a meng no lo viau mai.

Kan bathlar ve ve aṭang chuan rum zet hian kan in en duna “Khatiang khân min ti leh vaih teh aw kha ai a na khân ka vawm tawh ang che. Pitar kha min ti tawh bawk suh, pitar i hmuh duh chuan i nu hmêl kha en rawj” ka ti chu a lâwm vak bik lo nge “I pi ang kha pitar, i pi hmêl i chhûna nulât lai aṭangin nangpawh i tar” tiin a nui deuh hawka.

“Taka i kutzungpui kha satel lu a ang tawp, a tâwi bung nghut” tiin a nui leh vak vaka. Awi he mihring hi! Engtin nge ka tih dawn, ka kutzungpui hi a piangsual ti dawn ila a tin hi ka kut ṭang dang ang lo takin a tawi in a hlai zawngin a ṭhang a, ka taksa ah chuan ka duhloh lai ber a ni bawk.

“Naupang deuhin pathlawi zâng hâng an sawi ṭhin hi i ang, i hria em? I chhiat zia kha keichu ka hmêlṭha tal” ka tih leh lai chuan a rawn nui leh suka “Keichuan hmelṭha ka tilo phawt che a, mi zawng zawng tân i hmêlṭha lo phawt pitar, nula chunga pitar thei ka hriat leh hmuh hmasak ber i ni” a ti leh chu ka chhâng peih tawhlo.

Parda chu zar phui hmakin lehkha chu zir leh ka tuma, he ṭhenawm tlangvâl ṭawng thei leh nghal zet avâng hian ka zir thei tawh der lo. Ka thinrim ṭun bawk nên thinrim chung chuan engmah thluakah a lût theilo, lungawi lo zet chuan ka lehkha bu chu khupin ka phone ka phawrha, thinrim tih reh nân Mobile legend chu ka khêl ta ringawta.

Tlêm chuan min chhâwk ve deuh, a rei hnuah phei chuan ka pângngai leh vek tawha. Dar 11 vêlah mut tuma ka insiam rem lai chuan ṭhenawmnu in a fapa a hau ri ka hriat avâng chuan thâwm miahlo in ka ngaithla kara, “I rawn haw ve hi ṭawng theih lamah hma i rawn sawna, lehkha te hi zir ṭha hle rawh. I pa hmingṭhatna tichhe tu ni miah suh ang che, nula chhaih i hmang an ti lehnghâl, thu âwih deuh te hian awm ve teh. Saw ṭhenawm a i u Sangpuii hnênah sawn tuition kal tawh la a ṭha ang, an ni an lo zir hrep tawh a ni a, i hlawkpui deuh ang” a tihlai a Vanrongura lo phun bul bul chuan enge a sawi ka hre thei chiah lo.

“Khatiangin ti suh, Sangpuii phei chu thingtlâng aṭanga rawn awm ania, a fel zia saw. Sawtiang saw nupui atân pawn an ṭha, nula party ngaina lutuk leh khawvêl thil ngaina lutuk te hi ilo ngaizawng ange. I u Sangpuii sâwn nau a neih phei chuan i nupui tur hian be hial ila a ṭha ang, kum i tling ve tawha. I hma hun ngaihtuah la, lehkha hi ṭha deuhin zir phawt mai teh” tiin a chhuahsan zui aniang thâwm chu a reh zui ta dâk a.

Nu Mapuii min fak dân chuan min tih zah rualin chutia ṭhenawm te meuhin min han fak chu nuam ka ti ve veng veng nia, zîngah chuan tho in bathlarah chuan ka va zi mar leh ar ara. Khaw thlir theih hek loh hmalam Vanrongura room lam chu hawiin ka mit ka chhinga.

Zing boruak thianghlim tak chu hip lutin ka nui var vara, kan khua a awm ang maiah ka in ngai. Kan in kha helaia kan in angin lian in ropui ve lo mahse a chhûnga chêngte, ka hmangaih te kha ka ngai a ni. Ka nu thilsiam tui tak kha ka ei leh châk a, ka pa aw dam dup hriat leha, a thang kamnaa kal leh te kha ka châk a, tin ka naute leh ka ṭhiante ka ngai hle bawk.

An ni chu khuaah hlim takin nu leh pa bulah an awm anga, hlim takin an nui ho ngei awm si a. Chutia kan khaw lam ngaihtuah paha mitchhing chiala ka awm ka meng chhuak chu Vanronguran min lo en reng tih chu ka va hmu thuaia, a hmêl a tak rana. A mit chu a meng zîm deuh sana, chutia ka meng chhuak tih a hriat ve leh chuan ngeiawm zet hian min nuih zuia.

“Pitar hi an lo lunglêng ve thei elo? Khatia mit chhinga i han dâk kual vêl kha chu Bâwng hnim pet tur dâk chhuak hi i ang a sin, i thla ka la ṭep a ni” a rawn tileh tawh.

Tinge kan inhmuh apiang hian ngeiawm zeta ṭawng hi a chîn em em mai ni “Nang phei kha i hmêl kha zîng kâr a hmuh atân chuan a rapthlâk mah mah a ni. I lu a buk ropui si, ui hmul kîr i an hri hre nên” ti a luh mai ka tum lai chuan “Vawiin chu pheikhawk sâng lo bun teh aw, hmeichhe bawp tawi deuh phurh chu ka bike hian a duh chiah lo” a rawn ti leha.

Ka luh tum uk tawh chu han ding khawmuang leh in “Nanga phurh kher ngai lovin ka kal ve thei” ti hmakin ka chhuahsan zui ta daiha. He naupang ka biak reng chuan min ti thinrim mai mai dâwn, mipa nghal lutuk engtin nge hetiang hi nu Mapuii hian a hrin chhuah theih zâwk ni, ngeiawmna zawng zawng hi a kal vek ni berin ka hria.

Chaw eikham chuan insiam sawk sawkin tshirt ka taksa phuar ṭang mai a var ha in jeans kekawr chu ka ha bawka. In aṭang chuan muangchanga chhuakin Taxi ka zawng paha, kha Vanrongura in phurh tir leh ai chuan Taxi to fe a hman pawh ka duh daih zâwk. 

An in ka kal pelh dâwn lai chuan “Pitar i hman tawh em ni? Lo chuang la” a rawn tih avâng chuan ka ding deuh data, rum taka amah en pah chuan “Ka rawn chuang bawk lo ang” ti a kal pelh mai ka tum lai chuan nu Mapuii a rawn chhuak thuta.

“E Sangpui i hman tawh em ni? Hei i nau hi in phurh tir rawh, phurh tur a nei chuang hleinem. Haw lamah pawh inhruai tir zel rawh, unaute chu hetiangah chuan kal rual zêl tur, inthlahrung hauh suh. I mamawh hunah chuan rawn ko chhuak bawrh bawrh rawh, taka lehkha te hi zir dûn ula a ṭha ang, nang lehkha i thiama, i bula a zir chuan a result pawh a ṭha ve deuh ang chu” a rawn ti zung zunga.

Ka chuang duhlo han tihna chi a ni tawh lo, min lo duatin kan lo innel ve bawk nên phur lo ru zet chuan Vanrongura bike chuan kan inphur chhuak leh ta nge nge chu a nia. 

“Haw lamah in college gate pâwnah ka lo nghâk leh dâwn che a nia, reilo la,” a la rawn ti khanglang zuia. Upa zâwk ang maia thu min hrilh chu ka ngaina hauh lo “I hruai kher ka ngailo, keimah pawhin ka haw ve thei” tiin ka tûm hmaka.

“I haw thei lo ka ti hleinem, ka pi bulah ka lo tiam tawh avângin ka thutiam hlen ka tum. Inhnial reng lo teh ang, a upa zâwk lehnghâl i thinrim reng chuan a fuhlo. Miin pitar thinchhia an timai ang che” ti a a nuih hawk rualin a hnung zangah ka chum sak awka.

A thûm ṭha duh ngei mai, “Pitar min ti leh vaih teh. Kha aia na in ka chûm leh ang che” ti kha kha in college kan thlen dâwn tâkah chuan ka insiam ṭha zui thuaia, a ni pawhin engmah a sawi tawh lêm lo.

Ka chhuh rual a kal mai ka tum lai chuan kan college queen te chu rawn kal hnaiin Vanrongura chu ei tur eng emaw an rawn pe a “Kan ṭhiannu hian a duh teh mai che ania aw, hei zak chung chungin kan rawn kal a nih hi, i inkhel hi kan lo en reng zel che ania” tiin Vanrongura chu no thei ang ber hian an ena, tenawm hlawm chuan.

A nilah chu nichina a nui sâng hmêl kha bovin a hmêl chu a muk rana. Chûng hmeichhe ho chu a nuih lêt ve hauh lo, a thinrim emaw tih turin a awma. Mahse hmêl hmuh nuam lo lutuk chu a pu hauh lo thung.

Chutia a mizia a thlâk daih chu mak ka ti viau mai “Ka kal ania, haw lamah chuan min lo nghâk la” tiin a bike chuan a tlân chhuak zui ta daiha, Vansangi te ho biakna chu a ngaipawimawh vak lo tih a hriat.

Kal mai ka tum lai chuan Rinpuii chuan “Engtin nge Vanrongura nên khân in rawn in phurh theiha? In in ngaizawng em ni?” a rawn tihchuan ka kal tum tawh chu ka ding leh riha, teh ngawt chuana. Khatiang keiaia naupang lehnghâl engtia ngaizawng duh turin nge maw min ngaih ni.

“In hriat sual a nihchu, nu Mapuii fapa a nihkha, ṭhenawm kan nih avângin kan inphur mai ani zâwk, ka hmanhmawh a ka kal phawt ange” tiin ka kalsan zui nal nala. An awm dân aṭang khân an lawm vak lo tih a hriat theih, an ni aia naupang an han star chu ania, hahthlâk hian a.

Ka ṭhiante pahnih bul ka thlen chuan an lo inhnial deuh bap bapa, an inhnial chhan lah chu an movie en our fault lek chu niin. A changtupa an mahni pawh hre miahlo tu star tu zâwk nih an lo in chuh chu niin! Hahthlâk ṭhin teh e, an thu tak nasa bawk sia.

Ngawi reng chuan an bulah ka ṭhu thla ve a, chutia keimah ka han ṭhut tâkah chuan an inhnial pawh chu an tâwp zuia “Nang hi tûnlai phur tu i nei chhelo bawka, kan rual pawhin i kal duh ta miahloa. I ti mak hle mai, mipa chhelo tawn vâng ngawta” an rawn ti chu ka ner nâng a.

An ni pawh chu eng ngaihdan maksak lutuk nge an lo ngaihtuah chhuah leh hi? “Nang ni pawh hi in mak, khatiang ngaihdan kha engtin nge in neih theih? A chhelo ka ti thlâwt lo, ka pi leh a nu in kal rual ru an tih avângin kan kal rual mai ania, nang ni leh zêl chuan ngaihdan maksak tak kha lo neilo hrâm teh u” tiin ka ṭhu thla hnaka.

“Kan college ah in lar tawh teh ania aw, rinai hretu a lo ngah ania, Mizoram aiawh te pawhin a lo chhuak tawh renga. Helamah a awm ngailo nângin khu lamah a hming a chher viau a ni âwm e, star tu angah lutuk. A naupan ang aiin a luck ania aw” an rawn tihchuan ka ner deuh saka. 

Khatiang thluak aia lei leh hmui chak kha enga tân mah ka ti ve lo e a.

DUHAISAM DUHLAI ZORINPUIA S2 

CHAPTER 3 

“Pitar i hman tawh em ni?” gate pawn kan thleng chiah chu Vanrongura chu a lo awm leh ran tawha. Engtia hma tak taka rawn bâng thei ziah nge maw anih le? Mahsela sana ka en chuan an ban chu a lo hun ve tawh tho mai.

Midang chuan min en leh ha ha tawha, hmeichhe ho in a hmêlṭha an tih thu an phun pui sep sep chu ka hre pha renga. A ni pawh hian a hai ka ring lo, a nui suk suk lehnghâl “Hmelṭha hi chu khawiah pawh hian entu kan ngah ania” ka bengbulah chuan ala rawn ti sur sur zuia.

A va han zâm lo mai mai tak, rum zeta en pahin ka ṭhiante pahnih chu ka mangṭha a “Lo tel ve ula ka ṭhiante'n an thlah thei ang che u, dâwrah an kal lawka lo nghâk rawh u” Vanronguran a tih tâkah chuan ka ṭhiante pawh chu an lo phûr phian lehnghâl a.

Kan pali chuan ding ṭhap in ka ṭhiante pahnih chuan zawhna eng eng emaw an zawh pah char chara. A ni pawh chuan a chhâng ve mai zel bawka, rei nghah an ngai lo. Min lo chhaih ziahtute ho chu rawn lang phak phakin an la meng phâwk em êm zuia.

Thlarau hmu ang mai an ni, “Freddy hei pitari ṭhiante pahnih hi phur ve teh u, kan thlah phah mai dawn ania. Kan inah rawn lên in tum tho chuan a rem châng a, taxi lâk tir ai chuan phur ve mai rawh u” a tih tâkah chuan an ni pawh chuan an hnial biklo.

Inphur chhuak diah diahin keini chu a hnung berah kan tlân a, bike khalh a thiam bâkah a ngal a sei bawka min tluk pui ka ring lo. Jam vela han din pawhin a mawng tih sawih ve ngai miahlo hian din rualin a inrah khalh zung zunga, kan bula two wheeler khalh ṭhenkhat erawhin an mawng tisawi meuha tlu ṭep ṭep a an din hrâm laiin a ni erawhin in rah khalh ah harsatna a nei hauh lo.

A hnungah chuan ngawi reng hian ka bawka, a chhan pawh ṭhut tun awt kha a bike nên hian a inmil theilo, ka tla a ni nghâl mai. A hnung a sâng ropui si a, “Dawr pên i ngai em?” a tihchuan ka ngaih loh thu chuan ka chhâng ṭha ve maia. Tûn hi ṭawngkam pângngai taka kan vawikhat inbiakna a ni.

“Zanin chu ka lo kal mai thei ania, ka nu in i bula zir turin min ti tlat bawk si a,” a rawn ti zuia, nu Mapuii hian kan exam a ka result vêl a lo hriat ve ṭhin avâng hian min fak ṭhin a, tûnah pawh a fapa hi ka bula a zirtir duh chhan ka hai biklo, chu lo ah kan chungah an ṭha ve bawk nên a thu hnial hi ka hreh ṭhin.

“I ṭawng theih tawh dâwn loh chuan i rawn zir dâwn ania, mahsela lehkha zir laia intihbuai ka duh hauhlo ania” ka ti chu a nui haka. Min chhâng tawh lêm lo, ka ṭhiante pahnih chu an vêng lamah kan thlah hmasa a, ina an luh hnuah kan vêng lam panin kan inzui diah diaha.

Rawlthar khawvêl nuam ti tâwk lek an la nih avângin an bengchheng viaua, chutih rual erawhin ṭhenkhat anga bike a chak tak taka tlân an tum ve hauh lo. An infiam pah bawrh bawrh renga,  nula kawngsira lo awm chu an chhaih leh pah zuk zuk tawh a, a lerh hi chu an lerh ve mawle.

In kan thlen rualin ka chhuk vata, mangṭha in kan inah chuan ka lût zuia. Ka pi a lo lên daih avângin pâwn lamah awm khawmuang lo in ka room-ah ka lût zuia, inbual leh sawk sawkin ka nute ka be zuia, thla leha ka haw tur thu ka sawi chuan an ni pawh an lo phur khawp mai.

Ka naute pathum nên chuan kan in be paha, an ni pawhin min ngai tawh viau aniang haw vat vat tur chuan min rawn ti ve bawka. Keipawhin ka ngai takzet “Ka rawn haw hunah in fel chuan thil ṭha deuh ka rawn hawn ang che u, mahsela ka nu leh pa thu in lo âwih viau angai ang. Insual chuan engmah ka hawn lo ang che u” tiin ka hrilh pah paha.

An ni pawhin an fel tur thu an rawn sawi ve bawka, “Nu ka pa a rawn la haw lo em ni?” ka tihchuan a bu nghata “Tunlai chu hlo thlo in a buaia, thlai pawh kan thar ṭan a, kan rawn thawn thei ṭep ang che u, i pa pawh a chau thei khawp mai” a tihchuan a mahin a feh leh tih ka hre mai.

Awm ila chuan keimah talin ka pui thei tur ania, ka khawngaih ṭhin. Kut hnathawh hahthlâk zia leh chauh anat zia ka hre chianga, hetia kan unau tâna theihtâwp chhuah a hna a thawk ṭhin tih ka hriatna hian a lawm lehkha zir min ti taima tu chu ni.

Ka puih theihna awmchhun chu lehkha ṭha taka zira result ṭha tak neih hi a ni tih ka hria. Nu leh paten hah taka hna an thawh laia lehkha zir peihloa lo awm mai mai ang kha ka duh ve lo, rim tak a an thawh man keimahah hian lang sela ka duh.

“Ka ngai a sin le, a pawilo naktukah ka lo be mai ang. Zânah chuan a chau leh dâwn si a naktuk Chawlhni a ni tho a inkhawm bânah lo awm sela ka lo bia ang” ka tihchuan ka nu pawh a nui haka, ka têt tê aṭang hian ka pa hian min enkawl nasa in kan inzui tama, hei vâng pawh hi a niang ka naute ai hian min duata, min ngai ve thei hle ṭhin.

Keipawh hian ka ngai ve tho a, haw vat vat ka châk chhan pawh a ni. 

Zânah chuan Vanrongura chu a rawn kal ta ngeia, ka piin ka roomah zir dûn tura min tih miau avângin kan inzui lût duna, a rawn kal tak tak pawh ka rin loh laiin a rawn kal leh nulh si chuan mak min tih tir viau mai.

Kan awmpui nula chuan kan intur a rawn daha, Vanrongura pawh chuan a thiamloh lai chu min zâwt ve mual muala. Amah ang lo takin chimawm a la chhuah lo hlauh bawka, tûnah hi chuan inngeih tak te pawh kan ang ve in ka hria.

“Tikhan i hrethiam tawh em?” ka tihlai chuan bangbo tih hriat zet hian min ena. Awi! Angaihna hi a awm thlâwt lo, vawithum ka sawifiah tawha a la hrelo cheu chuan min ti beidawng a ni ber, engtiang chiah a thiam theilo nge maw a nih le.

“Eng thluak nge i neih bika? I lu burah khân enge awm?” ka tihchuan lâwm loh hmêl zet hian min ena,  “I thluak aia lian fe kha ka nei tih hre rawh, helaiah hian eng dang nge awm a i rina, nge thluak i nei ve lo zâwk?” ala rawn ti lêt vak zuia.

Zâwk zamah chuana, “Keimah aia thluak nei lian si i va han thiam theilo em em ve, i thluak te kha hmang ve ta che. Thluak lian pui nei si chu tinge ngaihtuahna tawi deuh i neih theih?” ka ti leh vaka, a mitmeng lah chuh! Min hnek thlûk tawp duh tur hmêl a pu.

Chutah ka chalah chuan a rawn pen zui fawka, ana êm êm mai lehnghal. Insûm duh bik lo chuan a lu buk zetah chuan ka kehsak nghal hmiaha, kan in sual leh chu a ni nghal der. Pâwnlam a miten kan thâwm chu an rawn hre thei dâwn lo tih ka hria.

Tum loh lutukin khumah chuan kan in keuh thlu dawp a, ka la kêk ve ngar ngar tho. Ngawi reng chuan kan insual ngat ngat a ni ber mai, chutah tâwp thutin ka hmai bul chetah chuan min ena, kei erawhin ka la kêk ngawng ngawng thung.

Mahsela min en reng tâkah chuan inthlah dulin ka thaw zui haka, a rawn awm hnai lutuk chuan min ti awm nuam lo, keiaia naupang mah nise mipa a ni miaua. Ka lai viau bawk “Awm sawn vat rawh” ka ti deuh ṭhat a, ala awm sawn duh mai lo lehnghâl.

Min en reng bawk nên nuam ka ti hauh lo ka zâm lutuk chu mak ka inti. A ni lah chuan awmsawn pawh tumlo in ngawi reng hian min en char chara, min fiam a tum nge mawni. 

“Awmsawn teh” tiin a âwmah chuan ka nam data, a awmsawn ve mai bawk. Chutah engmah pawh sawilo chuan a lehkhabu chu la sawk sawkin a chhuak zui daiha.

Keiin a awmdân chu mak ti zetin ka en zui vung vung mai, engvanga khatianga awm thut kha nge maw a nih le? Hepa mizia hi amak a nih hi, a â deuh nge mawni dâwn ni? Mahsela mi â chu a ni bawk si lo, nge ka hau kha a thinrim zâwk ni dâwn ni.

Ka ngei lek lek mai, nungchang maksak reuh lutuk mai. Ka chhir hrep dawn emaw ni zâwk ni? Khatianga awm thut kha a chîng ṭhin nge ni zâwk ni? Mipa mak tak a nih dâwn kha.

VANRONGURA POV...

Ka lung la phu dat dat zâwnah chuan ka kut dahin ka thaw chhuak zui ham hama, ka lehkhabu chu ka room dawhkanah chuan dahin khumah chuan ka ṭhu thla a. Hetiang hian ka awm ngai hauhlo, engvanga u Sangpuii bula thinphu rang nge ka nih? 

A taksa ka tawha, a hmêl chiang taka ka en apiangin ka danglam ṭhin. Ka hmuh tirh aṭang tawhin hmelṭha ka ti a, mahsela a mizia kha ka lo ngeihlo ve laklawh tawh bawk nên inhnial pui nuam ka ti a, thinrim taka min en vel ṭhin hi hmuhnawm ka ti bawk.

Hmeichhe dang laka ka awm dân ang lo takin a kianga awm nuam ka ti a. Amah khân min ti danglam ṭhin a ni ber mai, hmeichhe dang keiai a u pawh nise ka lak a an awm dân ang lo taka a awm vâng te pawh animahna. 

Hmeichhia hian ka naupan ngaihtuahin min bem nasa tawh viaua, mahsela ngaihzâwng neih ka la tum chhin ngailo. Ṭhenkhat phei chuan ka tuai emaw an ti tih pawh ka hria, ka ṭhiante erawh chuan chutiang ka nih loh zia an hre chiang viau thung.

Kum 13 ka nih aṭangin ram dangah hlir ka awma, Mizoram lamah ka haw khât viau bawk. Hnam dang hmeichhia te chenin min star tak tak tu pawh ka hre nual, mahsela tu hmeichhia mahin ka mit an la thei hauhlo, bâkah bialnu neih hun ka la in ti lo bawk.

Mahse u Sangpuii ka hmuh aṭang khân keimahah hian danglam riau a awm ṭhin. Duhna a ni thei mai angem? Tihchu ka in zâwt a, kei ian keiai a u daih ka duh ang maw? Ka â tawh ani ngei ang, mahsela a khum chunga bawh beta a hmêl ka en lai khân fawh châkna in ka khat a nihkha.

Thawk chu ka la zui ham hama, a room lam ka en lai chuan ala êng va va a. A mut mai chu ka ringlo, kei ang lo takin lehkha zir a taima a, ka nu leh ka pa pawh hian a chanchin hi an sawi fo tawha, a hma kha chuan a hmêl ka hmuh loh avângin ka lo uksak ngai lêm lo.

Chubâkah Mizoramah ka awm lo bawk nên in biak chânga an rawn sawi khân ka lo ning thei hle a nih kha. Mahsela a taka ka hmuh tâkah chuan hmeichhe hmêlṭha tak a ni tel tih ka hria, a taimakna avâng hrim hrim pawh hian ka nu leh pa ten an lo fak kha a âwm lo ka ti hauh lo mai.

“I aia u i duh thianglo, a duh ve kher lovang che” tiin ka phun supa, he ka thinlung a tihdanglam avâng hian a hma ai zawnga ka insûm angai ngei ang le. Ka nu leh a pi lah hian inphur turin min ti bawk si a, hetiang reng chuan alaka ka rilru hi a dang tial tial ang tih pawh ka hlau hlel lo ve.

ZAWMNA...

Zîngah chuan ka tih dân ngai te in ka room bathlarah chuan dingin a room lam chu ka hawi vang vanga, atho tlai ngai hauh lova. A thawh veleha a lehkha zir ri hi ka hre ṭhin a, hmeichhe taima leh mahni invawng tak a ni tih ka hre tawha, a tira a thingtlâng nihna ka lo sawi te kha tûn hnuah hian ka inthiam lo viau mai.

Rin ang ngeiin reiloteah ham buai buai chungin a rawn dâk chhuak a, ka en tih a hre lo nge ni in hup pawh a tum lêm lo. Ka nui deuh haka, ka nui ri a hriat rual chuan phâwk zet hian min rawn ena, a hmêl a hlauhthâwnna lang chu ka hmuh hmaihlo, a hlauthâwng hmêl pawh a ṭha tho mai.

Ka nute sawi danah a nu hi pi Mary fanu a ni tih ka hria a, ka hmu hman lo nângin an in ka kal khân a thlalâk erawh ka hmu tawha. A pa thingtlâng mi a ni tih pawh ka hria, chuvang a nimahna a taima in a che fel thlarha, a nunah in lâk changkanna hmuh tur a awm hek lo.

Ka nuih vâng chu nge ni a inhupa, a roomah bawk chuan a lût lehnghâl nal nal mai. Tukin chu nidang a ang tlat lo, a zia a dang riau bawk; nidang ang kha chu nise rum zeta min enin min hnial leh tawh ngeiin ka ringa, nizân vâng khân a danglam ti dawn ila a danglam erawh ka ring hauh silo.

Nizâna ka bawhbeh lai kha chuan a lai ve deuh ngeia, mahsela naupang ena min en miau avângin ka laka a danglam vak erawh ka ring lo thung.

Ka hmai phihin ha ka nawt zuia, room aṭanga chhuakin gym room-ah ka lût a, in sawi zawi leh te te in ka inbual a, ka nu pawhin nidang ang bawkin thu min hrilh leh malh malh tawha. Chhûngkua ah hi chuan nute hi an lo phunchiar ber zel a nih dâwn hi, khawiah pawh kal ila nu ber phun âng hi ka hre tam ber zel. 

Chaw ei lai chuan ka pa chuan a zin chhuah tur thu a sawia, ka bu nghat ringawt. An fa naupang ber ka ni bawka min duatin ka duh neih loh ka nei ngailo, ka ute erawh nupui pasal neiin an in dang vek tawha, hna an nei vek bawk. 

Thlah tu aṭang rêngin mite zah kan ni a, a ṭhat rualin mite zah rawn nihchuan chapo a lo awl ania nge ka ute miin an sawi dân ka hre leh zauh ṭhin a. Mahsela chutianga langsâr erawh chuan an awm lo thung “I nu hi ṭha deuhin lo enkawl la, tlangvâl i ni ve tawha, duh duh dana awm tur pawh i ni tawh lo bawk. I nun uluk la, ruihhlo lamah te i tlân ve hlauh ange, i nu leh pa hian kan dampui reng dawn lo cheua, kan nihna avâng hian midangte hmuhsit hauhloh tur, hre reng ang che” a tihchuan ka bu nghat ringawt.

Chaw eikham chuan ka nute chu inkhawm turin an insiam zui malh mawlha, kan awm pui pahnih erawh chaw eina vêl seng fel chuan an la buai viau thunga. Kei erawh ka roomah lûtin khumah chuan ka mu dar dara.

Pawnlama hmeichhe ṭawng thâwm ka hriat rual chuan tho chhuak vatin ka tukverhah chuan ka dâk chhuak zuia, an in tuala u Sangpuii lo ding ka hmuh rual chuan ka en vang vanga, a inkhawm dâwn tih hriat takin puan a bih thlapa, a inchei dân chu uchuak awm miahlo a, makeup a uar loh zia ka hre tawha, hmeichhe makeup inbel tam lutuk hi mawi ka ti ṭhin lo va, an hmêl pângngai hliah vek khawpa an han in bel ṭhin hi chu en an hrehawm ka ti ṭhin.

Chu ai chuan makeup an inhnawih pawhin nasa lo sela, an mawi pui mah zâwkin ka hria.

A nui sâng a, a pi leh pu chu a be pah siam siam bawk. Ka en tih a hriat loh avâng chuan keilahin hmun dang en duh lo lêk chuan ka ena, a hmêlṭha lutuk tih tur chu a ni hauhlo, mahsela mipa duhzâwng tak tur mizia a neia, a nu hnâp tih tur ang chi hi a ni.

Mahsela a thinchhe bawr lawk hle a, a mi ngainat zawngte bulah erawh mi ngainatawm tâwp khâwk a ni thung. Ka hmuh tirh aṭang khân hetiang a ni dâwn tih ka hre lâwk loa, hmeichhe dang anga enliam mai mai ka tum kha ka enliam thei ta hauhlo chu a nih ber hi.

Inkhawm tur a ka nute nên an inzui chu ka en vang vanga, ka nui suk mai. Ka bulah lo chuan tute tân pawh ngainatawm tak vek a ni a, ka bulah erawh chuan ui kawlh ang hlauh, min bauh reng  peih tih tur ang a ni thung.

Enge ka duh chhan tidawn ila sawi tûr ka hre hauhlo ka hriat loh karin ka nunah bu alo khuar dêr tawh chu a nih hi. An kal liam tâkah chuan khumah bawk chuan mu thla lehin ka phone ah chuan thil ka en mual muala, mahsela rilru ah erawh thildang engmah a lang thei hauhlo.

Hetiang tak hian ka vei ka ring lo, mahsela reilo tê chhûng pawhin ka ngaihtuahna zawng zawng a la bo vek chu a nih hi. Hetianga min siam hi ka ring hauh lova, keiai a u daih duh phei chu ka lo ngaihtuah ngai hek lo, he nu hian zûn a nei zâwk nge heti khawpa ranga a zûna ka uai theih ni.

Games chu khelin kan ṭhianho chuan kan khêl ho a, lên chhuah ai chuan nuam ka timaha. Ka ṭhiante erawh chuan nula rim leh ride vel nuam an ti thung, kei erawh ka tuina a dang hlaka, mahsela ṭhiante'n min sâwm miau hi chuan ka kal ve mai zel bawka. 

Ṭhian hi ka ngai hlu a, Mizoram a ka awm loh chhûng zawng pawha min thlah duh lo tu an ni a, keipawhin thlah ka tum lo. 

SANGPUII POV

Biakin kan thlen rualin kan lût zui vata, pâwna awm reng ang hi ka thiam ve lova. Biakin thlen tawh hi chuan luh nghal mai hi ka duh ṭhin, ka nu leh pa pawhin min hrilh ngun ber a ni a, tûn thlengin ka la vawng reng chu ania.

Inkhawm bânah chuan awm khaw muang lo in in lam ka pan vata, ka pi leh pu erawh kan upa pakhat damlo an kan dawn a nih hmêl. An upat tawh ang aiin an la chak ṭha a, damlo kan pawhin an la chhuak peih renga, ka fak ṭhin. Keini unau leh ka nu leh pa tân lah buaina leh harsat châng pawhin kan pan mai thei zela, ka pite an lo awm hlauh hi chu kan vanneih pui viau mai.

In ka lût dâwn tihah thur buma Vanrongura rawn chhuak ka hmuh leh avâng chuan ka ding deuh data. A inkhâwm lo emaw ni? Tlangvâl ve si a inkhawm lo chu mak ka ti ngei mai, tukinah lah khân ka ham buai buai lai kha chiang lutukin min lo en a nih kha.

Mu tho hlim tih hriat tak hian a sam chu a thur fara, a mit chu a ti zîm deuh sun bawk nên a awmdân chu a nuihzatthlâk lek lek a ni. Nui deuh hak hian ka ena chutah min rawn hmu ve ta nge a mit a sân uk a.

“Kha pitari chu i inkhawm ve ṭhin a nimaw? Nula senior nih hi chuan pasal zawn nân chuan kohhran a inhman te hi angai ve a lawm tiraw? Neih tur hmuh loh chuan kohhranah hian active ila Pathian hian min pe mai zel an tihkha, chutiang tur chu i zawng deuh animaw?” tiin a nui haka.

Ka va han beng châk tak, a thusawi lah chu miin an lo sawi fo tawh a ni lehnghala. Chutia a han sawi ve kher chu in ngaihbel a awl em em mai lehnghâl, tûm bur chuan inah ka luhsan ta daiha. 

Biak reng chuan kan thinrim tam mai mai, a ni hi chu be tam lo ila kan hlim a nimai. Ka roomah chuan lûtin ka inthlâk zung zunga, ka nute pawh an haw tawh ringin ka call zuia, rin ang ngeiin an inkhâwm banna a lo rei tawha, ka pa pawh a lo awm ngei e.

Be nghal zaton ka ngaih thu vêl chu ka sawi nghal mawlh mawlha, a ni pawhin min ngai tawh aniang engtikah nge ka haw theih dâwn tih te chu min zâwt ve a, ka naute pawhin min rawn be ve pah bawka kan rak chel chûl mai.

Ka pa hi chu ka têt tê aṭanga ka hero kha a ni ve a, kan chhûngkua ah rau rau pawh kan inngai zual bika. Ka naute erawh hi chu ka nu duatte ka ti thung, “Ka lo haw thei ṭep, hei thla tir ah kan exam anga, kan châwl rei ve deuh dawna ka rawn haw ang, pa Fanghma ei tur a awm ṭep tawh em?” tiin ka zâwt nghal zata.

An rah ṭan tawh thu a sawi chuan ka phûr ngei mai, helai chu hahdam takin awm mah ila ka sawi ang khân ka seilenna hmun ka lo tih ṭhan tawh thil hi ka la thlahlel fana, mahsela kan hma hun atân ka insiam rem a ngai ve bawk nên tihian nu leh pa bulah pawh awm thei lo in ka han awm bo chu ania.

Chutia ka pa nên kan inbiak lai chuan pâwnlamah mangang au ri ka hria a, phone chu kengin pâwnlam chu ka pana. Kan inchhak deuhah accident an lo awm chu niin ka pan hnai vata, Vanrongura pawh ka hmu nghal zat mai. 

Inkhawm bâng ṭhenkhat te nên chuan buaipuiin damdawi in lam an pan zuia, lirthei a tam tawh bawk nên accident hi chu a la thlen belh zêlin ka ring. 

An na lutuk lo hlauha an vânnei a nih kha, bike kan khalh te hi ṭhenkhat hi chuan intih theih nân kan hmang emaw tih turin chak deuh deuh hian kan tlân leh ṭhin a, chu chuan a tâwpah kan nunna a la leh mai ṭhin.

Chhuh leh mai ka tum lai chuan Vanrongura chuan ka bânah rawn vuanin an in lam chu min panpuia, eng thil tak chu hria ang nimaw? “Enge i hriata?” ka ti deuh ṭhat a, kan buai deuh avâng khân call ka dah ta kha ania, chuti nilo se ka pa ten ka au ri hria in min zâwt leh ngei ang.

“Vanrongur” ka ti leh chu a ding deuh data, keiin rum mangkhengin ka lo en thung. Engmah sawilo a hetianga in pawh kual tih vêl hi ka ngei zâwng tak, chutah ka hriatchian em em loh ala ni zui.

“Lehkha min en pui lawk rawh, keimah chuan ka hrethiam lo, in ina rawn kal dawn lahin ka duh chiah bawk siloa” a aw chu a inthlahrun hmêl ve deuha, tûn ataka chutiang a rawn sawi chu a mak ka ti ngei mai.

“Nizanah khân enga tinge i haw dawk dawk ni? Mut hahchawlh te ka duh asin” ka tihchuan “A reilo ang” a ti tlata, phur vak lo chuan an in chhûngah chuan kan inzui lût a, an in hi a zau bawk a a thawveng nuam phian mai.

A room ah min hruai lût tih ka hriat rual chuan ka hai kual nghal ruaia, ka room aṭanga ka en ai khân a hmunah chuan a zau daih lehnghâl. Mipa room tih hriat loh khawpin a room chu a felfaia, a in enkawl uluk hle tih ka hre mai.

Chutah a lehkhabu chu rawn la chhuakin a hriatthiam loh lai te chu min zâwt mawlh mawlha, keipawh chuan chutia ka puihna ngên chu tiin ka thiam ang tâwk chuan ka hrilh fiah ve mawlh mawlha, beisei loh deuhin angaithla ṭha phian lehnghâl. 

Ka bul chetah chuan rawn awm hnaiin sahbawn rim anam ram rama, a inbualna a la reilo anih ka ring. A rimtui phian mai.

DUHAISAM DUHLAI ZORINPUIA S2 

CHAPTER 4 

Ka haw a hun ṭep tawh bawk nên ka pi nên kan bazar dûn a, tûn lai hi Vanrongura hian enge a hriat pawh ka hrelo. A ṭawng tlêmin min en vung vung a chîng ṭhin a, ka ngaih a ti ṭha lo lek lek zela, ka chungah thil ṭha lo a ti duh mai ang tih ngaihtuahna chenin ka nei ṭhin.

Mahse chutianga ka hlauh thawn thil a ti ngai chuang bawk silo, a zia a zawiin a tira mi hnial peih em em kha tûnah chuan a dang hlawk ti ila ka sawi sual lo vang. 

Ka haw a hnaih tawh avângin ka ṭhiante nên chuan lên kan tuma, rinloh lutuka Vanrongura te kan in pâwna an lo ding ka hmuh chuan mak ka ti ngei mai. 

“Enge in rawn tih dâwn?” ka ti deuh haw chu an nui deuh haka, “Ele kan rawn tel ve dâwn, in lêng dâwn a ni lo'm ni? Kalna tur pawh in neih loh kha” an rawn tinghal zat chu ka ṭhiante pahnih chu ka melh zawka, an rawn in bât lût nghal ringawt chu nuih te lam lam a ti za.

Vanrongura erawh chuan engmah sawi lo in a bike ngheng hian min lo en reng thunga. Enge tûn lai hi a inlak cool em em mai le, thla khat chuang kan inzui tawha, a ṭawng duh theih tehlul nên tûnlai a zia hi ka hrethiam lo, min hua ti dawn ila chutiang chuan a awm bawk siloa rilru a tibuai ve map thei.

Marami leh Siampuii hmela phûrna chu ka hmuh hmaihlo, tûnlai chu kan inzui nasa hlawm bawk nên an innel riau mai. Ngawi reng chuan kan inphur chhuak hlawma, lênna tur em em pawh hrelo kha kan nia Durtlang lamah tlân chho zêlin eitur te kan lei phaha, khaw pâwn deuh in awm lohna lai kawngsir thingbuk hnuaiah chuan kan ṭhu a.

Iskut an chîng nasa bawka hawina lam apiang chu iskut zâm hlirin a khata, an mawi phian mai. Midangte chu inbia in an nui leh dar dar ṭhin a, kei erawh ka bula ṭhu pa ngawi thei lutuk avâng chuan han sawi tûr mai ka hre biklo, hmalam en chuan a ṭhu ngawi rûn reng bawk si a, sawi tûr a vâng ngei mai.

Reife kan ngawih hnuah “Engtikah maw i haw dawn?” a rawn ti ta sapa, a aw ah chuan eng emaw riau hi a awm ka timai. Huphurh deuh sawi chhuak a ang ka ti, a hmêl chu ka en leh zawka, tûnah tak hian ka hmu hmelṭha zual. A awmdân cool lutuk vâng hi nge pawh ka hrelo.

“Naktuk tuklehah ania'ng haw vat ka duha, chawlh chhunga ka pa puih ve vat ka duh a.” ka ti deuh duaha, ka nui deuh sâng bawk. A ni erawh a nui ve hauh lo “I awm rei dâwn em ni?” a tihchuan ka bu nghata “Chawlh chhûng zawng chu ka awm ang, ka pa chiah a ni bawk sia ka naute'n an la pui thei bawk siloa, ka chawlh chhûng tala ka puih loh chuan” ka ti chu a thaw deuh hawka.

Kei ka nuih sâng laiin a nui ve duh hauh lo “I va ngaihawm âwm ve chu, rawn lêt mai i tum dawn lo tihna a nimaw?” a rawn ti khauha, a awmdân chuan ka nuih a ti za lek lek mai.

Nui deuh chung chuan “Chu, min ngai dâwn tihna em ni?” tiin ka fiam zauha, ala nui chuang lo. Enge maw a hriat ni dâwn ni “Ngai viau mai thei, khi lamah bialpa i nei em?” a rawn tih leh chuan ka nui haka, a thil min zawh chu mak ka ti thei tak tak.

“Nei mai thei” ka ti chu min rawn melh vuta, ka lo nuih var var laiin a tûm deuh hmuk mai. Enge maw a hriat reuh ni “Tinge i lâwm lo em ni? I va meng rum teh ul ve, ka fiam mai mai che anihkha. Bialpa neih hi ka la ngaihtuah ngai lo, ka chhûngte duhthusam ka tipuitling phawt dâwn” ka tih tâkah chuan a thaw huai reuha.

Engvanga hetianga awm thut nge maw a nih le? Hriatthiam a har reuh hle mai “Nang bialnu i nei ve tawh em?” ka tihchuan a lu a thing rang ngei mai “Tlangval te chuan i neih tawh ka ring ania, ava mak ve. Kha kan college queen te pawhin an duh viau che kha i duh ve lo em ni?” ka tihchuan ka banah a rawn hmer vaka.

Ka au deuh ṭhat rual chuan “Khatiang makeup uar lutuk kha ka ngaina lo, thlahrang a ang si. A mitmu lang theilo khawpin a mit a line nasa lehnghâl” a ti deuh duah chu ka nuih zui hak haka. A la naupang ve bawka thil zêp ṭit ṭet pawh a thiam vak lo, mahsela a thusawi chu a dik phian bawk sia nuih a za lo theilo.

Rinpuii te ṭhian ho chu makeup uar tak an nih bâkah an awm thei bawka an incheina pawh a sâng thei viau mai. Kei erawh makeup lam hi ka inhnawih thiam thlâwt lova, ka têt tê aṭanga ka ngainat lutuk loh vâng nge tûn thleng hian ngaiah ka neiha, cream ka tat ve ṭawk a tih theih ang.

“An hmelṭha hlawm a sin, an hausa bawka. Star tu an ngah teh ania, i duh zâwk lo em ni? In dinhmun pawh a in âwm tâwk viau a sin” ka tihchuan ka chalah a rawn pen fawka “Khatiang khân sawi tawh suh, ka hmeichhe duhzâwng an nilo, tin sum chu ka nei ve hmeichhe sum it chi ka nilo” a tihchuan chhân mai dân tur ka hre hauh lo.

Ka ngawi deuh vang vanga “Inkhua chu a hla êm?” a rawn tih leh avâng chuan alam bawk chu ka en leha, ka chhânna ngai châng tih hriat tak hian min en kar mai. Naupang dilchhut takin a nu bula thil a zawh a nu chhânna nghaka a en kar ang hi ka tehkhina, ka nui leh deuh pât pât a.

A tira ka thin a tihrim ang reng kha chu a ni bik lo “Hla ve e, darkar 9 tlân vel a nia. Chuvang a lawm ka haw zen zen loh, hetia examte kan zawh tâkah chuan luh leh hma haw kha ka duha, ka chhûngte ka ngai ve tawh bawk sia” tiin ka phun siam siama.

“A nawm dâwn chu, keichu thingtlâng ah ka la kal ve ngai lova, engtia nuam nge tih pawh ka hrelo. Mahse i sawi danah chuan a nawm ka ring” tiin ka lam chu a rawn hawia, min en reng tawh hi chuan eng emaw tak awm ang hian ka ngai tlat zêl a, awm a ti nuam lo lek lek ṭhin.

“Ila zin ve ang chu, i duh chuan i nute ka dil sak ang che anga, kan khuaah ilo kal ve thei reng alawm. Kan feh ṭhin anga hna thawh ve kher pawh a ngailoa, lo i hmuh duh chuan hmuhna hun remchâng a ni dâwn a. Mahsela i peih loh chuan a pawi chuang lo ania” ka tih zawm zata.

Eng han thawk thei chu a nih ka ring bik lo, amah lah têt tê aṭanga nun nuam leh hnathawk ngai lo ania, thingtlâng hna han thawk tur chuan a rintlâk lua in ka ring lo. 

“I dil ngam tak tak ang maw? I dil theih dâwn chuan ka lo kal ve ang, sumo ticket lâk kher ngai lo in kan car pawhin kan kal thei ang chu. Chutiang a min lo thlen theih phawt chuan rawn kal ka hniallo” tiin kan ṭhiante'n min rawn auh tâkah chuan sawi chhunzawm tawh lo in eitur an lo siam sa chu kan va ei pui ve a.

In tur kan ken chu in hlawmin kan nui leh dar dar ṭhin a, a tira ka ṭawng khum dân ka ngaihtuah lêt hian ka inthiam lo ṭhin. Tûnah phei chuan kan ṭhian ho tân an ṭha in an ṭangkai bawk nên kan in kawmngeih viau tawh chu a nia, motor rawn tlân leh zeuh ṭhin nên kan insawna.

A ṭhiante pathum leh ka ṭhiante pahnih chu an ṭhu khâwm a, keini pahnih erawh a hranah kan ṭhu leh tawha. A ṭhiante hi chu ka lo hau hrep tawh bawk nên pawh deuha biak hi ka la harsat tlata, ka la tim ani ber mai.

“Tinge helamah i rawn haw a, i awmna hmasaah zir zawm i duh lo em ni?” ka tihchuan a bu deuh nghata “Mahni hnampui te bul ai bâka nuam a awm hleinem, hnam dang kâra awm reng chu mahni hnam nunphung kan theihnghilh mai dawn a, ka duh chiahlo. Chubâkah mahni ram aia nuam a awm hleinem” tiin lungte chu chharin kan hma lama dil lian vaklo chu a vawm zauh zauha.

“Tak takin kum engzât nge i nih?” ka tihchuan min rawn melh rûn rûn phawta “Ka naupan zia sawi leh i tum a nihkha” a rawn ti leh nghal thawr mai. Miin ṭha takin kan zawh laia chutiang ngaihtuahna chu engtin nge a neih theih zâwk ni.

Hahthlâk hian, pângngai deuha biak tum pawh hian a tih tauh loh leh ngeiawm deuh deuh hian min bia a “Ṭha deuhin ka zâwt che a lawm, i naupang tih sawi ka tum lo, i kum zât ka hrelo mai ania” ka ti leh sepa, engvanga a kum zât pawh chu sawi ui viau nge maw a nih le, chutia ka sawi chung pawh chuan min la chhâng duh mai lo, a va han luhlul ve chiang tak. 

“Min chhân chu a har viau em ni? Ṭha deuhin ka zâwt che a, tihel tum che in ka zâwt lo che” ka tih leh hlaka, pângngai deuh hian a inbiak theih reng mawle. Hetiang zawnga ngai reng mai, mipa an puitling har an tihchu alo dik a nih hi, a ni phei chu keiai a la nau zui lehnghala.

“Kum 18” a rawn tihchuan ka nui haka, ka rinai a la nau tak tak. Kum 19 tal a tlin tawh ka ring kha ania, ka lo ringsual chiang hle mai. 

Ka nui chu a duh vaklo nge rum fe hian min ena, ka nuih a tiza lek lek ani. “Min nuih hauh suh aw, nang ai ka lian tho tih i hriat kha” tiin min melh ang khur khura, ka hlau tawp siloa. A awmdân ngêng ngalh hi ka nuih pui leh ṭhin, tlangvâl hre ṭan intipa rual a ni ve tawha a mizia nên chuan a inhmeh phian mai.

“Ka nuih lo che, ka rinai ilo nau daih. Keichu kum 22 ka nia nangai ka u fê a nihchu” ti a ka ṭawng siam siam chu ka sir lam chu ka ena, Pangang lian lutuk ka hmuh tâkah chuan ka au deuh ṭhawt a, Vanrongura chu ka bawhtlu nghâl rawk mai. 

“Awi ka duh theilo, la bo vat teh u” tiin ka rak vak vaka, Pangang hi chu ka hlau bawk nên hmulo tawp pawh ni ila ka hmuh châk chuan ka ringlo.

Chutah an rawn laksawn tâkah chuan ka thaw deuh huai mai. Ka kai teuh zia ka ngaihtuah hian ka la ṭim ur ur thei mai. Khatiang khawpa pangang lian kha ka hmulo.

Vanrongura chungah chuan ka la bawk renga “Awm sawn vat teh i rit ropui si, min delh per i tum em ni? I têt ang aiin i va rit ve” a rawn ti leh hrama, a va han ngei awm ta. Awmsawn duh bik mai lo chuan ka runluih hrâm a, a lungawi loh hmêl tawh nasa mai.

Kan ṭhiante lah chu kan awm dân avang chuan an nui dar dar renga, min rawn kaih thawh pawh an tum chuang lo. Chutia min puih an tum loh tâkah chuan muangchangin ka tho chhuak zuia, Vanrongura erawh rang zetin a rawn tho thunga.

Kan inbeng fai nghal thuak thuaka mai “Haw tawh ang u, kan vak rei hman lo ania kan chhûngte phal lo chung in a nih hi kan vahchhuah” ka tih tâkah chuan an rawn tho chhuak phak phaka. 

ZAWMNA...

“A la hma viau lo maw?” Vanrongura chuan a rawn ti khauha, ka ner nghal nâng mai. Hma chu a la hma a, mahsela putea te leh ka pi ber hian min ngaihtuah ṭhin bawk nên ka ngaihtuah lo theilo. Ka haw tlai vaih chuan zawhna min zâwt leh ṭeuh emaw a ni dawna, ka peih vaklo.

“Nia a la hma reng, enge i haw ṭep tawha. Kan thlah ve em em che a, hetianga kan haw leh nghal chuan awmzia a awm lo âwm e” tiin midang chuan an rawn tui hnih zata, Valpuia lah chuan haw a duh bik loh thu a lo sawi bul bula, ka ṭhiante pahnih pawh chu ti tho.

“A nihchuan enge kan tih tawh anga? Helaia awm reng hi ka ning alâwm” ka tih tâkah chuan phur zet hian “La lêng kual ang u, ride ila a nimai a lawm chuan kan duh hunah kan haw mai anga” tiin phur zet chuan bike lam chu an pana.

Ka en vung vung ringawt, an va han hahthlâk hlawm tak. Vanrongura ka en chu a lo nui suk suka “I peih ve chiah nange?” a rawn tihchuan ka nui ringawta, “Kal ve ang hmiang, kan hnung fâl lutuk ange” a tih tâkah chuan ka zui ve mai bawka.

A bike ah chuan hnehsawh zeta ṭhu kaiin a helmet chu a khuma, mipa chhe lo tak chu a ni ve chiang a lawm. Keiai naupang chu nilo se ka star hle ngei ang, tûnah pawh a mah hmutu chuan en zui lo tu vak a neiloa, hmeichhe ho hian an en zui vawng vawng hi ka hmu fo mai.

A hnungah chuan muangchangin ka ṭhu kaia, ka insiamrem zawh rual chuan chak deuh taka tlân chhuakin midang chu kan ûmzui a, bike khalh kher kher hi chu ka ring tâwk bawka. Ka hlauthâwng lêm lo, min tluk pui hi ka ring lo ve tawp a, chuvang chuan hahdam takin ka chuan theih phah ṭhin.

Mit chhingin thli chu ka inchhem tir a, ka bân ka phar deuh chial bawk. Tlai lam a ni tawha, boruak chu a vâwt deuh var bawk. A khat tâwka a perfume rim rawn lêng ṭhin chu ka hip leh ṭhin a, a rimtui takzet. 

“A nuam i ti em?” a rawn tihchuan ka lo aw ve maia, kan ṭhiante ho chu a khât tâwkin kan hmu pha leh zauh tih loh chu a tlanchak lutuk duh ta lova, hmun fâl deuh kawngsir in an lo sakna zâwnah chuan min din puiin zawhna nên ka en lai chuan “Hetah hian lo nghâk mai ang, an rawn let har lovang, an rawn lêt har pawh leh a pawilo” a ti awlsam then a.

Engvanga ding ringawt nge a nih ka hre hauh lo “Timaw? An ngaih a ṭha lo ange?” ka tihlai chuan in te lam  chu a pan zuia, ngawi reng chuan ka zui ve leh ta ringawt bawk. A bulah chuan va ṭhu in a mi chhan hun chu ka ngai châng rana, a ngawi rauh rauh chuan min ti ngaih ṭha chiahlo.

Hepa hian ka chungah thil ṭha lo tih a tum a nih ka ring, mahsela chutiang tur ni se hun ṭha a hmu hnem tawh bawk si “Min ngaihtuah vak lovang, thui lutuk tlân ve chiam chiam kha ka peihlo, tihian a nuam zâwk. Zui ve chu i duh tihna em ni? Ride nuam i ti ve nge?” a rawn tihchuan rang zet hian ka lu ka thinga.

“Hetia awm mai mai hi a nuam a lawm, mahsela a reh êm a” ka tihlai chuan min rawn en vang vangin ka bul hnai chetah chuan a rawn ṭhu zuia, ka lungphu rang nghal dat dat chu engvang nge a nih ka hrethiam hauhlo, mahsela ka zâm a, eng emaw thleng dâwn tlat hian ka hre bawk.

“U Sangpui” tiin a ngawi leh daiha, ka hawi chhuah ruala min lo en reng avâng chuan ka hmui ka pet zauha, ka hawisawn thei bik der lo. A mitmeng chuan min aikaih nimaiin ka hria, ka mitah tak chuan min melh ngar ngara, a tu amah mahin kan in melhna chu kan ti tawp hek lo.

Lungphu a rang zuala, a ri ring hle bawk. A hre pha hialin ka ring, a hmui sen no chêk te, a mithmul buk lam leh a hnar ngul nalh zet te chu ka en renga. Tûnah tak hi chuan ka hmu hmelṭha takzet, naupang ang mai mai chuan ka en lo tih ka hre chiang bawk.

Ka lamah rawn awn hnai leh zualin ka biangah a rawn dawma, ka dang lo. Chêt ka la theilo a ni ber mai, ka taksa hi tihchet a har lutuk tlat, chutah ka hmuiah chuan dim tê hian a rawn fâwp a, ka taksa chu a ṭek chhawk nimaiin ka hria.

A tirah chuan dam raih hian min fâwp a, ka hnar loh vâng nge a duhthawh sâwt ta riau mai. Ka tukkhumah chuan dawmin a hma aia na zâwk mah chuan min fawp tawn tawna, keipawhin ka thiam ang ang chuan ka chhâng ve bawk. Mahsela harh chhuak zawkin ka namsawn vata.

Ka thaw a chham mai dâwnin ka hria, boruak chu duhâm zetin ka hip lût a, engvanga min fâwp nge a nih? A ni hian min fiamkual a tum a ni thei angem? “Engvangin nge khatiang thil kha i tih? Nang hian min bâwl kuala fiamthu thawh nâna min hman i tum em ni?” ka tihchuan a mit a ti chuar tapa.

Ka thusawi avâng chuan lungawi loh hmêl tak hian min en bawk, “Khatiang ngaihtuahna kha ka put ring suh, ka duh che a ka fâwp che a nimai” a rawn ti deuh hmuka, eng thu nge a sawi kha? Kei hi min duh amaw? 

“Vanrongur” ka ti deuh ṭhat a, lâwm lo zeta ka en laiin a ner suka “Min duh ve tih ka hre reng, chuti ni lo se ka fawh-na che kha kha ti khawpa ṭha khân min chhâng lêt hauh lovang, tin ka hming pum khân min ko tawh suh” a rawn ti zuia.

Keihian ka duh ang maw? Keiai a naupang lehnghâl, hetiang chuan a theih loh. “Haw ang, khatiang thu kha sawi tawh suh” tiin ka ding chhuak a, kal mai ka tum chu min pawt lêt lehin a hma ang bawk chuan ka hmuiah chuan rawn fâwp in inte bangah chuan min nawr beta, a mi fawh-na lah chu hnar a har hrep lehnghal. 

Ka mawngah chuan dawmin min chawi kâng deuh in min nek hnai salha, ka thaw hak mai. Hetiang hian awm duh lo mah ila ka hnar thei silo, keihian ka duh ve tihna em ni? Tinge ka hnar miah loh? Mipa dang chu nise ka hnar daih tawh ang.

“Ka duh lutuk che” tiin ka hmui bulah chuan a rawn phun sapa, ka meng ngam lo hetianga kan awm hi ka ring pha lova, ka zâm em em ringawt “U Sangpui” a rawn tih leh chuan lu thing ringawtin a âwmah chuan ka hmai ka phûm zuia, a rimtui zet chu ka hip vang vanga.

“Min duh ve tiraw? Ka duh ang che hian min duh ve em?” a rawn tih leh pawh chuan ka chhâng theilo, bialpa ka nei lo ang ka lo ti ṭhin. Ka nih tum ka nih hma chu bialpa neilo turin ka lo intiam ṭhin, mahsela tûnah chuan ka chiang tawh hauhlo. Ka tum loh ber mai, ka hmuh tirh ah phei chuan a mizia ka ngei êm êm kha tûnah?

Ngaihtuah chhunzawm duh lo chuan ka lu ka thing nawk nawka, ka biangah rawn dawmin min kuai dâk a, “Min en la” a rawn ti leh ngata. Hepa hian ka lai tih a hre chiang viau ang, chuti nilo se en turin min ti miah lovang.

“I rawn men vat loh chuan ka fâwp leh ang che” a tih leh tâkah chuan ka meng chhuak zui vata, a nui hmêl ka hmu nghal zat bawk. A hmui chu a la hnawng chhapa, a sam hma chu a thur sang bawk.

“Min duh ve em sawi la, keichuan i room-a kan awmdun aṭang khân ka duh tawh che” a rawn ti leha, “Min chhâng la min duh ve tiraw?” chhâng ngei turin min duh tih pawh ka hria.

“Kaaaa kei ai i naupang tih i hria em? Hetiang kan ti theilo” tiin ka nam deuh data, a awmsawn duh der lo. Hepa hi chu aw a luhlul bawk si, a duh a hmuh hma chuan a bansan lehin ka ringlo.

“Kum 3 kum thum chauh hi upa maw? Kha chu inhnarna chhan ṭha a tling lo, min duh ve lo tak tak em? Chuti nisi tinge ka fawhna che kha i chhân?” a rawn ti leh a, awi min ti â zo dâwn. Bialpa nei turin ka la inring lo, keiai naupang phei chu ka ngaihtuah pha lo hrim hrim. Bâkah ka chhân nghâl mai chuan ka easy a ti viau ang ka duhlo hrim hrim.

“Ngura” ka ti ta ṭhat a, engtia khatianga ko thei mai nge ka nih pawh ka hrelo. Mahse a rawn lang tlat miaua. Min rawn enin ka kut chu a hûm nghet salha “Min chhâng la, min duh ve em?” chu bawk chu a rawn sawi leha.

“Aa tûnah rih chuan ka chhâng thei rihlo che, awm ṭha ang” tiin bike ri ka hriat tâkah chuan ka namsawn vata, a nipawh a insiam ṭha mawlh mawlha, ka lâi deuh ṭut mai. Kan ṭhiante ho chu an rawn lang zui phak phaka “Nang ni pahnih chu enge in lo tih hrana, ṭhiante thlim ziah mai” a tihchuan ka nuih ringawta.

Engmah sawi tûr pawh ka hrelo, ka awmdân chu a lâi kual vêl vek tawh. A ni pawh chuan engtin mah a chhâng tawh biklo, ngawi reng chuan kan inphur haw zui ta hlawma. In kan thlen hnu pawh chuan kan in be lo ve ve a, mahsela a thusawi leh a mi fawh-na ringawt kha rilruah a awm thung.

Ka ngaihtuah lo theilo, eng emaw ti taka nuam tihna ka neih rualin bialpa chupawh keiai naupang lehnghal han nei tur chuan ka tim deuh a ni. Engkimah ka puitlin zâwk angai mai angem tihte thlengin ka ngaihtuah ve a, ka hma hun atân pawh ka chhiat pui vek ka hlau a ni ber mai.

Thawhleh ni ah chuan kan khaw lam panin sumo ah ka chuang ta vâng a, khaw ṭhenawm te an tel ve nawk a. Ka nu leh pa hria pawh an lo awm ve a, kan inkawm pah mawlh mawlha, kei erawh ka ṭawng tam lova, an zawhna chu aw leh aihin ka chhâng tam bera, midangte erawh an ṭawng duh barh barh hlawm viau mai.

Kawngsir thing ding te, kan piah tlâng cham dul tê leh tlâng chhîpa khaw lo lang leh iarh ṭhin te chuan chuan lung a ti lêng veng veng mai. Mizoram ai bâka lung ti lêng thei tu thildang hi an awm bik ka ring lo. Khaw tam tak ka la kal lova, sawng ka khaw hmuhah te pawh sâwn tu te emaw chu nuam ti taka chengin an lêng ve ngei dawn tih ka hria.

Khua chu a thiang kak a, mahsela ni eng erawh engtin emaw tak hian a awma, lung ti lêng vawng vawng thei turin kan ram thing leh ruamte chu a ên a, thlir nin a har viau. Hla an play nên zawng zawng chuan kan khua thlen mawlh ani ka nghahhlelh ni, ka chhûngte kha lo dam hlawm tak ang maw?

Ka nu leh ka pa fehin ka naute school an kal ngei ka ringa, ka haw thu pawh an hriat ngei ka ring bawk. Ka pa pa a zawnga hmelṭha leh fel êm êm mai kha hmuh leh ka châk a, ka nu nu azawnga nelawm leh fiamthu duh tak, fate duat em em tu kha hmuh leh ka châk bawk. 

Nikum lamah Christmas ka haw loh avângin tûna ka haw tur chu ka phûr viau mai. Kumin chu ka dama Pathianin rem a ti anihphawt chuan thingtlangah kan khua ah ngei Christmas hman leh ka duha, khawpuiah chuan thingtlâng angin a Christmas bik riau na tur ka hmu ve thei meuhlo, thingtlangah zel hian a lo nuam zâwkin ka hre ṭhin.

YOUTUBE LAM THAWNTHU KA TYPE RIH AVANGIN KA HAN CHAWL REI DEUHA, TÛNAH CHUAN KAN REGU TAWH ANG AW.

DUHAISAM DUHLAI ZORINPUIA S2 

CHAPTER 5

“Nu, pa ka lo thleng e” pâwn aṭang chuan ka au lâng lâng a, ka naute ho chu inchhûng aṭang chuan rawn tlân chhuakin an hnungah ka nu leh pa an rawn lang zui zata. Chutia dam taka ka chhûngte ho ka hmu chu ka lâwm ngei mai, ka nu leh pa chu panin ka kuah zui vata.

Ka ngai tawh takzet bawk nên an bula awm leh theih hi a ni ka nghahhlelh em em ni. “In rawn thleng hma hlauh chu a va lâwmawm ve, i pa hian a nghakhlel ber che a nih hi, vawiin pawh hnathawh a laklawh dah duh ngai miahlo khân i rawn haw dawn tih a hria a, chaw hnuah haw a rawt chûk chûk alawm, i pa hian a lo ngai ber che anih hi” ka nu in a rawn tihchuan ka nui hak haka.

“Keipawhin ka ngai a lawm, pa Fanghma chu an awm tawh ang tiraw? Ka ṭhiante pawh hawn ve ka duh dâwn a, rawn zin ve an châk viau nân an chhungte'n an la rem ti rihloa, kum tâwp lamah Christmas an rawn hmang mai thei ania aw” tiin inchhung lamah ka inzui lût a.

Ka pa leh ka naute chuan ka thil hawn chu an rawn khai lût ve bawka, kan inchhûng ka hmu chu ka thaw huai mai. Aizawla kan in aiin lian in changkâng ve lo mahsela helai hmun ai bâka hahdamna leh nuam tih ka nei chuang lo, a chhan chu kan in a ni miaua.

Ka thawmhnaw hawn sak chu ka nu leh pa chu ka pe a, ka naute pawh ka pe ve bawka. An lâwm thiam hlawm viau mai, ka pi leh pu kha la dam ve ni sela chuan ka lâwm a kim zual ang, an ni erawh an nupa in pialral an lawi tawha, pi leh pu la nei tho mah ila ka têt tê aṭanga min awm tlei tu ka pa nu leh pa kha a ni ka ngaih ṭhin ni.

An thlalâk in tar chu ka en vang vanga, lâwm viau mah ila ka haw châng apianga min lo hmuak ziah tu ka pi leh pu an han reh ta vang vang hian min ti lunghnûr lo theilo, “Bawihte tinge i pute thlalak chu i thlir vang vang ni?” ka nu chuan a rawn ti dam dapa.

“Timah ka ngai deuh mai maia, ka rawn haw hun an nghahhlelh theih zia te kha ka ngaihtuah mai maia” ka ti sepa, ka nu leh pa chu in melh zawkin an ni pawh an hmêl ngui deuh nghal riai chu ka hmuh hmaih biklo.

Hna engmah thawk thei tawh lo mahsela in lama an theih tâwk lo khawiha, min be siam siam reng ṭhin han reh ta daih hi chu hriatthiam a har ve êm ani.

“Khatiang chu sawi tawh lo ang u, bawihte i hahdam deuh chuan va inbual fai la, chaw ei ang u. Zanin chu sakhi sa rêp kan chhûma, i ngainat ber a nihkha. I ei leh ṭeuh dawn ania” ka pa in a rawn tihchuan ka phûr ngei mai, sa a kâp thei bawka. Ramsa hi chu kan ei tam khawp mai, chuvang aniang kan unau hi kan chak ṭha in kan rilru pawh a chak hlawm viau mai.

“BA hi ka zawh veleh kan khua a thawh theih dân tur hi ka zawng anga, zirtirtu ka nih theih hlauh chuan a ṭha dâwn em a sin. Khawpuia awm ai chuan ka duh zâwk hrim hrima, bâkah in hlata awm reng chu ka duhlo, lung a lêng thei emai” ka tihchuan ka nu leh pa chu an nui haka.

Keipawh chu ka roomah chuan lût in ka inthlâk sawk sawka, ka inbual zawh meuh chuan a lo tlai ve duai tawha. Inthlâk sawk sawkin ka room chhûng chu ka en kuala, ka chhuahsan dawna a awm dân ngai reng kha a lo la nia, banga ka thil tar vel pawh an lo la awm vek bawk.

Room aṭang chuan chhuakin ka naute chaw eisiam chu ka va pui vata, mipa pawh âwl tum lo in kan che mawlh mawlha. Kan chhûngkua chu heti reng hi, ka nu leh pa ten thu min hrilh tam bawka, ka nau mipa te pawh an fel in thu an âwih viaua, ka pa hian ṭawngkam vina min hauh lutuk ngai loh avâng te pawh hi a niang, thil sual tih luih hi a har ṭhin.

Sakhi sa hâng chu kan ti thak hluaha, a hâng ka hâwp leh nasa viau mai. Hmeichhia mah ni ila chaw ka heha, heta ka haw chuan ka ei tam thei viau. Aizawl lamah erawh chutiangin a lutuk chuan ka ei duh biklo, chaw ei pah chuan ka zirna chungchâng te ka pi leh pu in min duat zia te chu ka sawi mawlh mawlha.

“Nu, pute Tluanga pawhin nupui neih a tum hnai deuhin ka hria, ka pi leh pu khân an sawi lang zawk tawha. A neih dawn chuan in rawn kal ngei ngei angai ang, a nupui tur pawh high school teacher a nia, a hmêlṭha lutuk” ka tihchuan ka nu chuan a rawn phûl pui hluta.

Putea te hi chuan ka nu hi an ngaiin a chanchin an sawi reng ṭhin a, ka pa nên an inruk dâwnah pawh an lo thlâwp viau a nih hmêl. Ka pa pawh chuan a lâwmawm a tih thu chu a lo sawi ve bawka, ka naute pawhin Aizawl hmuh an châk bawk nên an tân chuan zinna tur hun ṭha tak a nih ka ring.

“Ka ngai tawh lutuk che u a, rawn haw vat vat ka châk sia bazar pawh ka bazar hman vak lo. Ka pi lahin ka haw a phallo lutuka, ka pu in min lo thlâwp tlat lo phei sela chuan ka pi chu a titau nasa ang chu; mahsela lo haw hrim hrim kha ka duha, pa naktukah loah min hruai ve rawh aw” ka tinghal zat chu ka naute chuan an ni pawh hruai ve tur chuan an lo ti leh nghal zata an ni hi chuan ka tel tawh chuan khawiah pawh min zui an tum ṭhin a, ka naute hi ka duat bawka, ka bula awm pawh nuam an ti viau mai.

“U, khawpuiah i awm sia bialpa chhelo tâwk te pawh i nei ve lo em ni? Mi chuan an bialpa te an rawn post chuai chuai ania aw, hmanni ah pawh u Ramtei chu a bialpa khawpui tlangvâl nên an rawn zin dûn vêl a nia” ka nau chiahin a rawn tihchuan ka nuih haka.

Chutih rual erawhin ka mitthla ah Vanrongura a rawn langa, ka naute hi hmuh chiah ila chuan hmelṭha an ti dâwn tih ka hria. A mi fawhlai kha ka mitthlaah chuan a rawn lang nghal zata, ka lâi leh ṭut tawh. Kei ai a naupangin ka first kiss a ru a nia, “U tinge i hmai a sen vek ania, bialpa chu i nei em ni?” Duhsaka chu ka melh zawka.

Ka tin nghal uaih mai “Nei mai mai lo, i duh duh sawi suh” ka tihlai chuan ka nu leh pa chu an lo nui haka “I ute chu a patil deuh alawm, mipa a hlau lo bawk si a tumahin bialnu atân an duh lo ang” ka nu chuan a lo ti ve chu lungawi lo zetin ka ena.

“Nu, ka duh chuan ka hmu lutuk aw, ka nei peihlo mai mai, ka hmu ve reng. Bialpa hi maw duh ni ila chuan ka hmu lutuk” ka tihchuan ka nu leh ka naute ho chu an nui dar dara, tûm luau pah chuan chaw chu ka bar tau deuh sawk sawka.

“Dik chiah ka fanute chu a hmelṭha a, a duh chuan tlangvâl ho hi atân an tam dâwn lutuk, hmeichhe fel leh a pa fanu alawm a nih, a patil reng reng lo. Fanu hmelṭha ber a nih hi” ka thlenga sa ti rawn dah paha ka pa in a rawn tihchuan ka nui leh nghal vur vura, ka pa hi chu englai pawhin ka lam a ṭang ka tihkha.

“A nihchuan a hringtunu hi ka hmêlṭha ve tho lo em ni?” ka nu in a lo tih fiamthu chuan ka pa chuan a mitmeng de sar sar a en pah chuan “Nangte chu englai pawhin a hmasa ber alawm i nih, i hmasa ber reng bawk ang” a tihchuan ka nu lâwm tâwk a tling leh viau mai.

Fate tân pawh nu leh pa inhmangaihna hmuha hriat tluka nuam a awm biklo, nu leh pa an in hmangaih hi chuan chhûngkua chu a hlim em em ṭhin. Ka nu leh pa in hau kan hmu ngai zen zen lova, an inhau kan hmuh pawh hian thinrim taka inbiak ai chuan ṭawngkam nêm takin an lungawi lohna an sawi dûn mai ṭhin.

Hei vâng te pawh hi aniang kan unau hian kan zahin an thu kan âwih a, keimahni pawh sual lama kan kal tur an thunun ṭha viau. Tam tak hi chu nu leh pa inhau reng neih avânga inchhûng khura hlimna hmulo, khawvêl lama hlimna zawn tum avânga ruihhlo bawihah emaw tâng ta an nih hi ka ring, in chhûng khûr a nawm loh miau chuan fate tân chuan tihtheih a tlêmin inrawlh ve a rem ṭhin silo, nu leh pa in hau reng te, fate hau reng ṭhin nu leh pa te hian kan fate hi nun kawng dik lo zawh turin kan hruai phah ve thei tlat.

An inchhûng an himna leh hlimna hmuna an ngaiha an hlim miau loh chuan khawlaiah ṭhiante zîngah hlimna an zawnga, an ṭhian kawmte an lo fuh leh lo a. Chu chuan an tum loh tawp kawng a dai tir avânga ṭhalai tam tak hi ruihhlo bawiha tâng an nih ka ring ve ṭhin, an duh thu chu ani hauh lovang le.

Chaw ei kham chuan ka naute chuan kan lo âwl ang che tiin thleng seng leh sil pawh min âwl thlapa, ka nui var var reng mai. Mahni in ngei thlen tluka nuam leh hlimawm a awm bik chuang lo, ka nu leh pa nên chuan ṭhutthlengah ṭhu ho in kan titi mawlh mawlha.

An la ṭhalai dun bawka ka titi duhzâwng sawi pawh an thiam “Bawihte fimkhur viau la aw, khawpuiah phei chuan thingtlanga awm pha lo thil a tamin sualna pawh a tam zuala, i nun uluk hle reng ang che. I naute entawn tlâk hian awm reng la, i pa nên hian min ti beidawng hauh suh ang che. Kan in nghahna ber i ni a, ngaihzâwng i duh anih pawhin nangmah hmangaihtu ngei nei la, tin pasal i neih hma loh chu mipa lakah in vêng ang che. Hmeichhe tân chuan kan zahawmna ber a ni tih hria la, chutih rualin a lo tlusual tawh te hmu sit ngai lo la, tam tak chuan an hmangaih avângin an in phal fo a, an inphalna ten an neih leh duh siloh avânga mualpho leh hmingchhia an ni tih theihnghilh suh, mipa chu an rilru tak tak hriat a hara, an duh an neih theih nân chuan a kum a kum pawh an inthup thei ania” ka nu chuan a rawn ti dap dapa.

Keipawh ka bu deuh nghat nghata, ka nu leh pa hian ka tâna ṭha tur bâk an sawi ngai dâwn lo tih ka hria a, ka theih phawt chuan an thu hi zawm hrâm hrâm ka duh bawk.

“Ni e i nu sawi ang khân mipa chu kan duh chuan sual leh hlauhawm tak kan ni theia, nêl chin tâwk hria ang che. Tûn angah nupui pasal in that te, an ngaihzâwng te'n an sawisak hlum te an tam tawha, i nu nên kan vêng pha ve lo che a, mipa hi nêl lutuk loh a ṭha ber. Chutih rual erawhin hlauh lutuk tur pawh an ni chuang lo, ngaihtuahna hmang thiam rual i ni tawha, i tâna ṭha tur ngaihtuah thiam rual i ni tawha, i inveng thiam turah kan ngai” ka pa chuan a rawn ti veleha, ka bu nghauh nghauh a.

Ni e keipawhin ka ngaihtuah ve fo mai, chutia mipa chungchâng an sawi tâkah chuan Vanrongura bawk rilruah a rawn lang leha. A chêt dân vâng kha nge ni hetianga ka ngaihtuah tâk reng ni? 

 

ZAWMNA..

Ka chauh ringin ka nu leh pa te chuan mu hma turin min ti a, keipawhin ka hnial lêm lo. Khuma ka mutthlak rualin ka phone chu ka ena, Vanrongura message alo awm tuara, ka thleng tawh em tih leh enge ka tih tih bâkah ka chhân loh chhan te chu min lo zâwt tuar a.

Hepa hian a bialnu treat in min treat nghal der tihna em ni? “Ka mu dâwn, ka thleng tawh hei. Tin tinge ka bialpa ang a i awma?” ka tihchuan a rawn seen rang ngei mai, ka message lo châng reng te pawh a ang a lawm. Nuih a tiza lek lek mai.

“Ka bialnu chu i nia lawm, i bialpa ka ni ve lo mai chauh ania. Ka tân erawh ka bialnu ini tlat, duhlo mah la i ni tho tho” a tihchuan ka thaw haka. A va han buaithlâk tak “I duh avâng ngawtin i bialnu ka ni theilo aw” tihchu ka thawna, a duh duh a sawi ringawt chu a nghal ka ti zâwk dawn nge mawni.

“Thei e, keichuan hmeichhe dang ka melh lova, nangmah chauh hi ka bialnu atân ka pawm bawk che. Ka duhthlanna a ni a, thu i nei hauh lo, ka thu thu ka thinlung ah chuan thu i nei lo, a duh che a i thunun theih a ni lo” a rawn ti leha.

Huiham ka chhâng peih tawh lo e a, youtube video chu enin ka mit ka chhing zui riai riaia. Ka motor chuang ka chau ve bawk nên ka muhil rang viau mai lehnghâl.

Zîngah chuan ka ṭhiante au ri ni âwm tak ka hriat avâng chuan meng chhuak vatin ka ngaithla chianga, an lo ni ngei e. Keipawh chu tho chhuak vatin ka room aṭang chuan ka chhuak zuia, ka ṭhiante pali ka hmuh tâkah chuan ka nui nghal var var mai.

Nau an rawn paw ṭhap a, an fate tih hai rual a nilo. College kal theilo in pasal an nei kha a nia,  chutia kan inhmu leh chu ka lâwm ngei mai. Ka thil hawn te chu ka pe ve a, an lâwm thiam hlawm viau lehnghâl, chutia kan han inhmu leh chu kan ri chel chûl reng mai.

Ṭhenawm khawvengte pawh an rawn lût phak phaka, naupang nên thingtlâng chu a nawm ve na deuh pakhat chu kan la in ngaihlu tawn viau te hi ani ve a. Ti hian hmun dangah han awm bo ila, kan haw veleh hian ṭhenawm khawvengte bâkah khaw mipui a hria leh hmu apiang hian min bia in min rawn hmuak ve ṭhin a, a nuam ve ṭhin.

Min hmuaktu apiang hnenah chuan sweet chu ka sema, ka awmna chanchin leh ka zirna chungchângte chu min zâwt ve liam liam hlawma. Rei erawh lêng lo in an haw phak phak a, ka ṭhiante erawh an haw ka la phal mai loh avâng chuan an la awm thung.

“I no tawh khawp mai a, i hmêlṭha zual sawt mai. Khawpuiah pawh i zu luck ngawt lo maw? Nang hi bialpa te i nei ve em? Ramtei pawh in ti thei zeta a bialpa a rawn zinpui vel kha, a inchuang bawk sia a bialpa kha a ngo tih lohah chuan a ṭhatna pawh a awm miahlo. Kan pa te hi chu tluk lo tak a ni, amah lah chuan khawlaiah hmai vân hawi vukin a nia a rawn lênpui ṭhin” Latei chuan a rawn ti a, kan lo nui deuh hak mai.

A zia a lo la ngai reng a nih hmêl, sawi hreh nei lêm lo ri phawng phawng kan tih ṭhin kha a lo la ni reng a nih dâwn hi. 

“Bialpa maw? Nei nâng, nei hman pawhin ka la khaw sa lo, heta zirtirtu hna hi dil ka duh sia ka theih tâwp ka chhuah alawm. Khaw hmuna awm ho leh vat te ka châk a, ka theih tâwpin ka ṭang a, bialpa neihna hun pawh ka nei vak lo” ka tihchuan an ner nâng nâng a.

“Nei vat rawh, pasal neih i hun tawh, neih hun lo i ni tawh miahlo a nia. Pasal nei chung pawhin lehkha chu a zir theih lutuk, pasal i thlan fimkhur angai thung anga, tûn aṭang hian in zawng ve sa rawh. Upat hnuah chuan hmeichhe tân phei chuan a buaithlâk ve ania, tar hnu lama fate châwm ngai lo in ṭhat lai hian sang chhuak pawp pawp ila a ṭha mai” tiin an nui ham hama.

Pasal neih chu nuam an tih hmêl viaua, keiin ka han châk loh tehlul nên. An mahni ka hmuh ringawt pawh hian ka chau sa, englai pawha fa te puak leh awrh reng an ngai anga, in chhûng chêt zawng zawng nên chuan ka tlin pawh ka ring ve lo e a, bâkah ka nulât zalenna hi chên hman lo a pasal neih te chu ka duh teuhlo mai.

“Ti hian a peih ho chu duh ang pawhin in awm theih tawh loh hi, khatianga min awm tir ve kha chu tum lo mai teh u. Nula te chu tihian kan duh duh in kan awm theia, bialpa hi nei kual vel mai mai rih ila a ṭha ber. 420 leka hrehawmna hmuna in tah luh te chu a, tikhan naute hnap ngah deuh deuh in han pua ang dial diala, an zun leh êk then nên, in chhûng chêt ngai bawk. Khatiang tur chuan ka la in phallo, keichu nang ni anga mi kara tel châk si, tel ngam tawh lo a awm kha ka duh ve loh avâng alawm tihian lehkha ka zir” ka ti chu an la na ngang mai.

Ka nuih an ti za ru viau lehnghâl, nui deuh têt têt in chaw hmeh tur anṭam vêl chu ka thian pah mawlh mawlha. “Nuam hi i ti sia maw? Pasal neih te chu a nuam a sin, vanram kan tem reng mai ani” Zualtei chu kan en ṭhap a.

“Awi Lalngaizuali zahtheihloh zia hi, khatiang engtin nge i sawi ngam zâwk. Tenawm reuh lutuk” ka lo ti hlak chu midangte chu an lo nui dar dara, ka nu erawh choka lamah a awm daih avângin kan thusawi tam zâwk chu a rawn hre kher lovang.

Ka pa erawh a thang kam a en leh tawh a nih ka ring, thingtlângpa a ni bawka. A awm mai mai thiam lova, ina a awm ve pawh hian eng emaw tal thawh tur a zawng ṭhin a. Ka nu nên kan hauh tamna ber pawh a ni, ka ṭhiante pawh chu rawngbawl te an la ngai bawk nên min haw san zui ta phak phaka.

Keipawh ka thawmhnaw ka la dah fel loh chu thlep ṭha in ka almira ah chuan ka khung zui mawlh mawlha. Ka room tukverh aṭang chuan dâk chhuakin pâwnlam chu ka thlir vang vanga, khawlaia ui leh ar vâk vêl te. Mihring in kâwm bawrh bawrh chunga an kal te chu ka en renga, khawpuiah kha chuan ran khawlaia hmuh tur an vâng pharh ṭhin.

Nui var varin boruak chu ka hipa, mahni khua tluka nuam hi a lo awm lo a nih ber hi. Awm hlen theih tawh sela ka ti, chhûngte hmuh phâk loha awm reng zawng lung a lêng leh ṭhin a. Bâkah mi khuaah chuan ṭhiante han nei ve mah ila kan thlamuang famkim theilo, nu leh pa bula thlamuanna a lo nasat bik zia hi ka hrechiang ve ta in ka hria.

Room aṭanga ka chhuah hnu lawkah ka pa pawh a rawn haw a, rin ang ngeiin ramar leh vahrit tih vêl chu a rawn hâwn leh nuala. “I pa Sâwma te ho va kan kual ula, zanin tlaiah chaw rawn ei rawh se. An vaiin rawn sâwm kim la aw” tiin ka nau mipa chu a tir zuia, a ni pawh a kal nghal vat bawk.

Kei erawh a thil rawn hâwn chu enin ka thai leta, ka ṭhiante hmuh ve ila tiin an thla chu ka lâk saka, status chuan a humhalh pawlin an lo hmuha chuti khati an rawn tih leh a hlauhawm si a ka hmang duh lêm lo.

Marami leh Siampuii chu thawnin tu mah hmuha hrilh lo tur chuan ka ti a, an ni lah chuan an ei châk ve thu chu an rawn sawi nghal char char mai. An chhungte'n rawn zin phal se chuan an ei ve thei nimai tur, an chân duai dâwn a nih hi.

“In lo zin ve duh loh avâng anih kha” ka ti chu an la na dûn ngang mai. “Ngawt a che, kan nute vâng vek hi a lawm,  chhungkua ah chuan nute hi an thu si a, a châng chuan ka ning ania. Fa ka neih hunah chuan engkim ka khap bur hauh lovang” Siampuii chuan a rawn ti a.

A dik ve tho mai, nute hi chuan fate ngaihtuah hi an pe na zuala. Chu chuan fate min khuahkhirh nghet êm a, a châng chuan chhuak rûk mai te hi a awl ṭhin. Ka nu pawh hi a ni ve tho a, mahsela ka nu erawh ka tih tum ka sawi chuan min khap ngai hauh lova, keima tâna ṭha lo tur thim tilo tur erawh chuan min hrilh nasa viau ṭhin thung.

Ka nau a rawn lêt hnu lawkah chaw eiin chaw eikhamah chuan ka pa thil awh ho chu a hmulte kan pawt zuia, pa Sawma te ho pawh an rawn lang har lo. Kan vai chuan infiam pahin kan pawt ho a, ka Aizawl haw vêl chu min fiam leh ṭhin, ka pa ṭhiante an ni a. Kan naupan têt aṭanga min duhsaka min duat em em tu an nih avâng hian kan unau pawhin kan ngaina viau.

An fate nên pawh unau pianghmun nen kan danglamna a awm tam kher lovang. Vawiin chu kan feh thei dâwn rih lo a nih hmela, pawi pawh ka tilo, kan châwl rei ve dâwn tho nên fehna hun chu ka la ngah viau mai.

Nilêng chuan inah in khungin kan nui leh dar dar ṭhin a, ka pa te ṭhianho in card denna bulah chuan awm ve in an ṭang lutuk chu ka nu nên chuan kan lo nuih leh ṭhin. An tih ṭhan a ni bawka, lam ṭang tur bik te hi an insiam sa thlap zel.

Tlai lam a nihchuan ka nu nên chuan choka lamah inzui lûtin chaw hmeh chu kan siam zui mawlh mawlha. Kan titi dûn malh malha, ka nu nên kan awm tlân tawh hi chuan nufa titi ai ṭhian dûn titi hi kan ang ber ṭhin, ka pi leh pu chungchâng te, putea te chungchâng nên lam chuan ka hrilh pah mawlh mawlha. 

A ni pawh chuan ka pa nên an inngaihzawn lâi vêl an inhmuh hmasak bera ka pa awmdân a sawi chu ka nuihpui leh hak ṭhin. Ka pa chu a tlangvâl lai aṭanga Pasalṭha tak a ni tih ka hriat thar phah bawk.

“Ka ngei ṭhin ania aw, kan inhmuh tirh kha chuan ṭawng tam silo khân a ṭawng chhuah chhun kha a ngeiawm thei bawk sia. Kan inhnial nasa ṭhin ania” tiin a nui hak haka, an hunlaia awm ve chu ka châk ngei mai. Ka pa mizia ka ngaihtuaha, a ṭawngtam lo tihchu ka ringhlel lo, ka nu a bem dân mawlh hi ka hre châk.

“Nu, nangmahin nge ka pa hian a duh hmasa che?” ka tihchuan a nui har hara. “Kan induh nghâl ve ve a nimai ang chu, i pa chu a tlangvâl laite chuan a luck bawk sia, buaina pawh kan tâwk ve nasa ania” tiin a ngawi deuh vang vanga.

An nunhlui a ngaihtuah kir te pawh aniang, keipawhin ka pa tlangvâl lai thlalâk chu ka hmu tawh a. Hmelṭha tak ani a, nula laka a tla na pawh chu ka ringhlel lêm lo.

“I nu nulât lâi te chu kawlh tak ani. Min kuk nân a lawm ka lu te hi a sâwl zawh ni” pa Sawman a rawn tihchuan ka nui haka “Dawt sawi reng suh Lalmalsawm” ka nu chuan a lo ti nghal hlak bawka.

An inpawh tlâng bawka, ka haw châng pawh hian an zingah ka khawsa tam ber ṭhin. 

DUHAISAM DUHLAI ZORINPUIA S2 

CHAPTER 6 

Ka pa nên lo ah kan feh dûn a, a ṭang ṭhin bawk nên hlo thlawh tur a lo ngah vak lova. Titi mawlh mawlh pah chuan kan thlo dûn a, kan nui leh hak ṭhin. Ka pa nên hi chuan engkimah kan inlungrual a, ka tân chuan ka ṭhianṭha ang mai a ni bawk.

Nu leh pa ka nei fuh ka ti dawn nge engkimah min phûr pui thiama, ṭawngkam vinin min la hau ngai lo. Hei avâng hian ka zah loh phah lova, ka zah zual sauh zâwk, ka pa hi chu pa zaidam tak ka ti ngam sak. Ka nu a duatna leh hmangaihna te, an nupa infiam dân ṭhin te leh an fate min enkawl dânah hian sawiseltur ka la hmu lo hrim hrim.

Ka pi leh pu awm loh hriatloh khawpin min enkawl ṭha bawka, chawlh hahdam pah chuan Fanghma chu ka ei hmarh hmarha, tui angah bawk a tui in belh vak a ngai lo chiang hle bawk. 

“Bawihte bialpa hi ila neilo tak tak em ni?” a rawn tih khauh chuan ka bu nghat nghata “Pa nei turin min duh em ni?” ka tihchuan a nui hak a. Chutah ka lan rawn hawiin “Duh lo e, ka duhdân phei chuan pasal neilo hian i nu nên kan bulah awm reng thei ula tih hi kan duhthusam a nia, tûn angah chuan pasal in neih fuh loh te pawh kan hlau ve a, mahsela engtikah emaw i nu ka hmuh a ka awmdân ang chiah khân tu emaw chuan i mit an la la ngei ang tih erawh ka ring” a tihchuan ka bu nghata.

“Aaaa pasal ka neih pawhin in bulah ka awm pui mai ang” ka lo ti chu ka pa nên chuan kan nui dûn hawk hawka, pasal neih lam hi ka la ngaihtuah ngai lova. Ngaihzâwng neih erawh chu ka la hre chiang lova, neih te chu ka la nei mahna le, ka mitthla ah chuan Vanrongura a rawn lang uar uara.

Ka chhâng ṭha duh lo nângin min biak a ṭhulh hauh lova, a châng leh ka thik atân a ti emaw tih tur hian a hmeichhe phurhte nên an thlalâk hi a rawn status kher zela. Enga tân mah ngaih loh luih ngar ngar erawh ka tum thung, mipa hmêlṭha leh chhelo tak a ni a. A sâng hle bawk, hmeichhia te duhthusam ang chu amahah khân a kim ngei ang, an la hausa tel cheu zuia, keimah ah erawh a naupanna hi ka ngaihtuah lo theilo.

Hmeichhia chu kan upa chakin kan tar hma si a, mahni aia naupang han nei tur kha chuan ka in ngaihtuah hah ve ṭhin. Mahni aia naupang neih chu kawng tam takah puitlin a ngai dawna, chubâkah fate kan han nei anga hmeichhia phei chu fa neih tawh chuan kan mawilo chak si a min iai leh ka hlau bawk.

Chuvang chuan keiaia naupang hi chu ngaizawng lo hrâm ila ka duh. 

Kan haw tlai duh lova, haw kawngah chuan midang te pawh ûm pha in kan in be mawlh mawlh hlawma. A châng leh an fiamthu thawh chu kan nuihpui leh hak ṭhin, pa Dama bulah hi chuan a tûm reng theihloh, kan naupan lai aṭang tawhin an inah a fiamthu thawh ngaithla turin kan lêng ṭhin.

Chawlh hmunah chuan chawlin fanghma bawk chu ka ei leha, ka awm rei lutuk thei dâwn lo nên ka awm lai hian a theih ang a tam ei ka duh. Aizawlah chuan awm ve bawk mahse a to thei bawk nên chubâkah helama kan chin nên a lo in ang lova, ka ei tui tak tak theilo.

Bâkah khawpui a bazar ṭhu ho hi an sual ka tihna nilo in Mizo te hi kan lo phakarin hlâwk kan lo duh hi ka tia, thingtlangah tel lian pui pui chêng 20 man lek lek kha a tlâwm leh zuala lâk an dil ngar ngara, chutah an niin midang te hnênah thingtlâng mi ta tlâwm te a an lei 20 man lek lek te kha midang bulah 200, 300,man angah te an han chhuah leh daiha.

Ringtu inti si hian hnamdang sumdawng hi kan tluk lo ni berin ka hria, an ni chuan hlêp nei ve tho siin keini in thei leh thlai 200 kan tih ang te kha an ni chuan 50 ang lek lek ten an lo zuar leh daiha. A ringtu inti zâwk hian sum kan lo duh hlum lo chauh ni hian ka hre ṭhin.

Kan nunna atân chuan kan duh veka, mahsela a âwm tâwk hi a awm ve in ka hria. Hlêp neilo an ni bik hauh lova, a âwm tâwk khân han zuar ve mai sela hnamdang kan dawr an thika, an sawisêl leh duh tho si a, dawr regu duh hi chuan fair takin thil hi timai sela ka ti ṭhin.

In kan thlenga, ka naute ho chuan min lo bawr leh nak nak tawha. Kan thlai hawn ho chu phawrhin ka nu chuan min lo buaipui mawlh mawlha, kan unau hi pali kan ni a, kan tê ber phei chu kum 7 a pum ve awrh chauh a ni.

Kan la chhangchhe ve viau mai, chaw eia chhûngkuaa kan titi mawlh mawlh laiin ka nu chu tho thutin toiletah chuan a va uai zui ṭhat ṭhata. Ka pa te nên chuan kan in en kual hrek hrek mai, ka nu leh pa hi ka sawi tawh angin an la upa lutuk lova, nau a pai leh a nih ka ring.

“Pa anu chu a rai aniang a? Naute kan nei leh dâwn e” ka nau chiahin a rawn tihchuan ka pa pawh a nui suk suk mai. Keipawhin nau neih leh chu ka châk reng, unau tam reng reng chu an têt laiin enkawl han harsa deuh ṭhin mahsela an puitlin hnuah nu leh pa tân hahdamna an ni ṭhin tih an sawia, kan khaw mite ngei dinhmun en pawh hian a dik ka ring.

An unau in a ṭhen ramdangah an awma, a ṭhen an inhlawh reng thei bawka. Tûnah chuan kan khua a mi awm thei ber an ni hial ang chu, ka nau Kimkima pawh tûnah chuan a rawn râwlthar ṭan tawh bawka ka nu leh pa pawh ka ngaihtuah lutuk tawh bik lo.

Ka nu pawh zun testna nên a in test hnuah a rai ngei tih kan hriat avângin kan lâwm hlawm ngei mai. Unau kan la tlêm bawk nên chutia naute kan han nei leh tur chu kan phur tlâng ngei mai, chhûngkhat laina ho in ko khawmin lawmthusawina te kan neia, ka pi leh pu kha la dam ve ni sela a nuam dâwn hian ka hria.

“Sangpui ilo haw animaw? I ngaihawm ṭhin hle mai” ka lêng haw lam chu Jeremy-a ka hmu hlawla, chutia khawchhunga ka hmu chu mak ka ti. Sipai a ni a, khuaah a rawn haw ngai zen zen tlat lo. Kan tleirâwl chhoh tirh khân min fiam ve zeuh zeuh ṭhin a, chutia ka hmu thut chu ka lai lek lek mai.

Keiai kumli in a u a, mahsela kan têt tê aṭanga kan koh ṭhan a nih avâng nge ka u thei tawh meuhlo. “Aw a nih hi, exam chawlh lai a ni bawk sia ka hun neih lai ka rawn chuh ve a nih hi. Nang teh, chawlh i la em ni?” ka tihchuan a bu nghata.

“Thla khat chu khuaah ka awm tawh, zânah ka rawn lêng thei tihna a nihchu. I zirna lam i tluang maw?” tiin ka bulah chuan a rawn ding hnaia, ka en reng ringawt. Dik tak chuan a chhelo ve a, kan tleirâwl tirh pawh khân kan star ve thei lutuk,chuvang nge mawni engtin emaw tak hian ka la awm. 

“Um tluang chu a nimai” ka ti leh ringawta, biak dân tur vak ka hrelo. A zâm awm ve em bawk a ni, “I hmelṭha zual sawt a nih hi, khawpui nula tak tak ho nên in danglamna a awm tawh hleinem” a tihchuan ka nuih ringawta, chhân dân tur ka hre der lo.

Sipai a ni bawka, a sa chu a muk ṭala thau chuangbang hmuh tur a awm hauh lo bawk, “Tunah chuan nula tak tak ilo ni ve tawha, kan bem ngam ve tawh ang che chu” a rawn tihchuan hawi chhuak zawkin ka en zuia.

Min lo en ve reng avâng chuan hnuailam ka en leh vata “Ka haw phawt ange, ka nute'n min lo ngaihtuah tawh ang” tiin ka kalsan zuia. A mi chhânna pawh ka nghâk hman tawh lo, a tlanin a ni ka tlân haw nal nal ni, ka lungphu a rang a, chuan ka zak takzet bawk.

Tleirâwl laia star tawh chu tûnah pawh danglamna chu min la thlen chiang a lawm.

A sawi ang tak takin zânah chuan a rawn lêng ta ngeia, amah lo pawh in lêng ka nei nual mai. Thingpui chu sem zung zungin titi phung leng kan sawi ho a, kan nui leh hak ṭhin. Pathlawi rawn lêng ve an awm bawk nên zahmawh deuh ni si fiamthu deuh reuh bawk si hian an titi leh ṭhin a, hmeichhe tân chuan lo nuihpuia lo sawipui ve vak chi pawh a nilo.

Mipa ho hi chuan an lawm zâwng hi a in ang deuh vek a nih hi. Ka nu leh pa erawh room-ah an mu lût tawha, an la mutthilh erawh ka ring lo, ka naute pawh an mu lût diaka. Lehkha an zir pah bawka, ka in lêng te pawh ka nau te lehkha zir avângin thâwm bengchheng lutuk chu an chhuah hauh lo thung.

Midang chu rei pawh lêng lo in an haw zui phak phaka, Jeremy-a erawh a la awm reng thung. Eng tak chu ka tih tum nimaw? Phone sana ka en chuan zân dar 9 a lo ri der tawha. Vanrongura message pawh a awm leh vang tawh mai, ka chhâng duh lêm lo, a la naupang si a a luhlul rual lek a ni tih pawh ka hailo.

Ka hnar a nih loh chuan ka tân a la ṭhat loh mai ka hlau bawk, bâkah a ni nên chuan kan dinhmun a inthlau lutuk tlat. A nu leh pa hi fel viau mahse mi rethei fa chu an fapa nupui atân hian an duh ka ring hauh lo, a chhan pawh ka pi bulah an fate zawng zawng chu an hausak pui leh sawrkar hnathawkte ngei neih tir vek an tum tih an sawi ka hre tawh tlata.

“I va ngawi thei ve a” Jeremy-a chuan min rawn ṭhut hnaih paha a tihchuan ka en vata, min rawn ṭhut hnaih mah mah a ni.  

“Sangpui hrilh duh che ka nei” a rawn tihchuan ka beng chu ka chhi deuh kara, ka kut a rawn hûm rual chuan amah chu ka en vata. Min lo en reng mai, ka lamah rawn hnai leh zualin “Hman aṭang khân hrilh che ka duh ṭhin a, mahse ila nau deuh si a, hetia kan han nulât tlangvâl dun tâkah chuan ka duhzâwng tak ini. Ka bialnu ni thei la ka duh khawp mai” a rawn tihchuan phâwk zetin ka ena.

Tûnah khân min bem tihna maw? Ka zama, lungphu a ranga. Chhân dân tur mai ka hrelo bawk nên ka nuih ta ringawta.

“Nui lo in min chhâng la, ka bialnu ni turin ka duh takzet che. Tûnah chuan nula puitling tak i ni ve tawha, he hun hi a sin ka lo nghah reng ni” a ti leha, a thusawi chuan min ṭhawng dawt dawt reng ti ila a dik ang.

Chutih rual erawh chuan ka chhûngril lamah a mah iai bik lohna ka neih chu ka hre chiang hle bawk. Hmân aṭanga ka lo star em em kha a ni miaua, mahsela tûn tut tuta chhan chu ka duh hauh lo 

“Ih ala hma mah mah, tûnah chuan kan inhmu ve leh chauh a ni a. Ka tân pawh in ngaihtuah phawt angai ang, ngaihzâwng lam hi ka lo la ngaihtuah ngai miahloh a nia” ka tihchuan a bu nghata, a hmêlah chuan min nawr luih a tum bik hauh lo tih ka hre thei.

“A ṭha e, hun kan la nei turah ngai ila. Ka awm chhûng chu ka rawn lêng ziah ang, tin, khulamah ka chhuh leh hma ngeia i chhânna hriat pawh ka beisei dâwn a nia. Ngaihzâwng i nei a nihchuan min hrilh la, i neilo a nih erawh chuan i bialpa nih ka duh ber ania” a rawn ti leha.

“Neilo e, mahsela inngaihtuah ve phawt te ka duha. Bialpa neih hi ka lo la suangtuah chhin ngai lova, chuvang zâwk chu ania. Ka lo inngaihtuah ve phawt ange” ka tih tâkah chuan a nui ta var vara.

“Thu lâwmawm lam ka hriat vat ka beisei, ka haw ve phawt ange anih muttui aw” tiin a ding chhuak zuia. Keipawh chu tho chhuak ve in pâwn thleng chuan ka thlaha, ngaihtuahna a nu bat mai. Vanrongura ka ngaihtuaha, a ni ka hnar theih nân chuan bialpa ka neih mai hi a ṭha dâwnin ka hre bawk.

“Ngura ṭhian angin emaw a awm theih a lawm, bialpa ka nei ka tih tawh kha. Kei nên chuan kan kum a inthlau lutuk” hrehawm ti viau mah ila ka hnar ngei ngei a ngai, an la naupanga an vei zâwng vei tlut mai an ni tih pawh ka hria, chuvanga hnar ṭang ṭang pawh ka ni.

Keimah avânga a rilru a nata thil ṭha lo a tih duh mai erawh ka hlau hle thung. “Tunge i bialpa chu” a rawn tihchuan sawi mai tur ka hrelo, Jeremy-a nên lah thu bulfuk tak kan la sawi dûn bawk siloa. Ka tân pawh tunge han tih fak mai tur an awm bik tlat lo, ka thaw ham hama.

Rilru a insual buai nuaih mai bawk, bialpa neih loh tawp mai hi ka duha. Tûnah chuan ngaihzâwng nei turin ka la in peih chiah lo niin ka hria, Jeremy-a pawh ka tân chuan a ṭha mah mah tih tur a ni a, sipai a ni bawka. A lerh chu ring chiah lo mah ila sipai nungchang leh hmeichhe lama hlei tak tak an awm an tih ka lo hre ve bawk nên rinngam harsa ka ti bawk.

Bâkah tleirawl ât laia star mai kha a nia, tûnah tut tut han nih pui chu ka thei pawhin ka ring lo. An pahnih hian hnar ve ve ila a ṭha berin ka hria, Jeremy-a ka nih pui chuan Vanrongura rilru a na ngei anga, Jeremy-a lah han nihpui ila eng ruai kan nih ka ring lo. Kar hla lutuk tur ngaihzâwng neih hi ka tum ngai lova, keichuan englai pawha ka hmuh theiha awm tur ngaihzâwng ka duh ṭhin.

“Tunge i bialpa chu ka tihchu, tinge i sawi duh miahloh? Min hrilh chu a har em ni? Min hnarna chhan mipa chu hriat ve ngei ka duh” a rawn ti leha, ka hrilh loh chuan ka thusawi chu a âwih dâwn lo tih pawh ka hria.

“Hetah kan khua a mi, Jeremy-a ania, keiai kumli in a upa bawka. Khuaah pawh a awm zen zen lo” tihchu ka thawna, a seen tawpa, min chhâng tawh lo. Chuta ṭang chuan a reh ta vang vang ti ila a dik ber ang.

Jeremy-a erawh zantin a rawn la lenga, bialpa neih ka la duh loh thu ka sawi chung pawhin min hlatsan duh meuhlo. Engkimah min ngaihsaka, a rawn lên dâwna thil min rawn lei sak a hmang hle bawk, chutiang avâng ngawta nihpui erawh ka tum chuang lo.

A tîrah kha chuan ka nihpui mai dâwn nge tiin ka ngaihtuaha, mahsela bialpa han nei tur chuan ka la in peihlo nge amah ka duhtâwk lo tih hi ka ngaihtuah nasa a, chutah chuan ka star mai mai ṭhin a ni a, ka thinlungah a lo thawk tak tak lo a nih pawh ka ring.

“Sangpui min duh ve lo tihchu hre tho mah ila keichuan ka duh viau che a sin, min duh lêt ve thei mai lo em ni? Tûnah chuan keipawhin hna ka nei tawha, hrehawm chuan ka siam hauh lo ang che, min iai bik lo niin ka lo hria a, mahsela ka lo hriatsual zâwk nge maw ni dâwn ni” a tihchuan ka nuih ringawta.

“Bialpa nei tur hian ka la in peihloa, bâkah keiai ṭha tam tak an awm a lawm. Keini te chu eng kan nih loh hi maw, nakinah min ning vat mai ang” ka tihchuan min rawn hnaih zual sauha. A awmdân hi a huaisar mah mah ka ti ṭhin, min zuam riauin ka hre bawk.

Chutah rawn kûn hniama min rawn fawh mai a tum chu ka hawisawn vata. “Hetiang chu tilo teh ang, ka ngaihdan chu ka sawi tawh kha. Bialpa neih hi ka la duh rih lo min hrethiam mai rawh” ka ti leha, dik tak chuan tûnah hian ka rilru a hrehawm ve takzet. 

Mi rilru tihnat hi ka hlau ṭhin a, mahsela keimah pawh ka in vên ve angaia. Ka hriat chian em em mah nisela mipa chu an hriat chian tak tak theih siloha, bâkah a zia hian min hip lo nge pawh ka hrelo. Ka laka ngampa taka a awm vâng te pawh hi aniang, ka nêl lo riau bawk.

“Duh dang i nei em ni? Engvanga min hnial tlat nge i niha? I tleirâwl lai kha chuan min star ṭhin tih pawh ka hria a, beiseina ka lo nei sâng ve viau a sin. Mahse i rilru a mak hle mai” tiin lâwm vak lo chuan min ena, ka nuih deuh hak ringawt.

“Tleirawl ât lai thil mai mai a lawm, tu pawhin star chu kan nei thianga. Mahsela kan duh bur tihna pawh a ni chuang loa, tûnah chuan hun a inthlak danglam ve tawha. A ngai ang rengin kan awm theilo tihchu i hriat ve tho ka ring” ka tihchuan a ngawi rauh rauha.

Chutah ding chhuakin kawngka lam chu a pana “I haw dawn em ni?” tiin ka tho chhuak ve vata, a bula ka va din rual chuan “Ka haw phawt ange, beisei bo turah beiseina ka lo nei sâng mah mah a ni, min hrethiam rawh” tiin a chhuak zui ta daiha.

Ka en zui vang vang hnuah kawngka chu kalhin ka room lam pan ka tuma. Ka nu rawn chhuak ka hmuh chuan ka ding leh riha “Bawihte i u Jeremy-a chu i duh lo em ni? In thusawi ka lo hre ve a, a duh viau che niin ka lo hria a sin” a rawn ti dam dap a.

Ka nui hak ringawt “Nu tûnah rih chuan ngaihzâwng la nei hman pawh ka nih loh hi, lehkha zir te pawh ka la ngaia, bâkah ngaihzâwng neih chu buaina a tam mai mai a lawm. Inhauh te a ngai anga, lehkha zir ṭha theilo a ka awm te ka hlau ve tho a lawm” ka tihchuan a rawn nui haka.

“Ni e, engpawh chu nise i thinlung nghawr nghing dawt thei ila tawn hunah chuan i thunun theih phâk bakin a zûnah i intat lût mai ang. I pa pawh a tirah chuan ka hnar ve ṭâng ṭâng a, duh ve reng chung khân ka han hnar ve a, rei erawh ka hnar thei lêm lo” tiin a nui hak haka, keipawh chu ti tho.

Ka pa hi chu tu hmeichhia tân mah hnar phal chi a nih ka ring lo ve tawp. “Nu ka pa hi a tlangvâl lai aṭangin a fel viau ang a?” tiin room-a lût mai lo chuan ka nu nên chuan ka la in be leh riha. 

Chutah han bu nghat nghatin “A ngeiawm ve ṭhin, mahse a ni aia fel leh ṭhiante ngaihsaka, mi zaidam tak hi chu an awm kher lovang. Mipa zaidam tak leh hmangaihna ngah tak mai hi a nia, chuvang a niang a zûnah ka uai hneh em em ni. Mahsela a châng hi chuan ka ngei ve ṭhin ania, vawikhat phei chu a bialnu hlui avângin kan buai ve hrep tawh mawle, ka lo hriat chian loh lutuk avângin mipa dang ka lo neihsan ṭep a, i pi te lah khân kha tih lai khân i pa ka neih hi an phallo a, min khuahkhirh nasa a lawm” tiin a nui hak haka.

Nui mahsela an nunhlui angaihtuah letna chuan a lung a ti lêng hle tih ka hre thei. “Kha tih lai kha chuan ka na a nia aw, kan inneih hi ka ring pha lova, i pa pawh hian a ring pha kher lovang. Mahsela khuanu ruat chu engtin tin emaw kan awm dûn leh thei a nih hi” tiin a nui zui var vara.

Tûnah hlim taka an awm theih na chhanah hian thawnthu sei tak chu a awm ve ka ring. An kawng pawh a rualrem bik vek dâwn lo ang tih pawh ka hria, a chhan chu hmangaihna dik tak kawng a rualrem ngailo an lo ti fo ṭhin a, an ni pawhin an sawi lutuk lo nângin an sawi aia nasa daih hian an tawrh ka ring.

Rei erawh meng tawh lovin mu tur chuan kan in mangṭha zui a, ka mut hmunah pawh ka in ngaihtuah ngar ngara. Muhil mai thei lo chuan ka in let kual sek bawka, Jeremy-a ai mah chuan Vanrongura reh vang vang chhan chu ka ngaihtuah nasa zawka.

A hnawltu ni siin chutia min be miah lo a a reh ta vang vang chuan min ti hlim chuang hauh lo. Zantin nitin min rawn text avang pawh a nimahna a message hmuh tur awm ta lo chuan engtin emaw hian min ti hnîm ve ruih mai.

Mitchhingin ka thaw leh halh ṭhin, ka rilru an tibuai takzet. Mipa bemtu chu lo nei ve ṭhin mahila tûna min bemtu te nên erawh tehkhin chi ah ka ngailo, an inthlau lutuk tlat.

Vanrongura last seen chu ka check a. Ka hnâwl zân aṭang khân ala online miahloa. Chûngte hlei hlei chuan min ti awm nuam meuhlo, keimah avânga thil ṭha lo a tih ve mai ka hlau ru bawk si, tinge mawni min lo duh kher kher le? Ka hnial tur khân la awm mai mai sela a ṭha asin le.

“Ka ning min ti â zo takngial dâwn mu phawt ang” tiin ngaihtuah zui tawh loh tum chuan hla playin ka ngaithla zuia. Ka hla play lah chu ka hun tawn nên ngaihbel theih tur a la ni zui, huiham! Engmah hi a fuh thei thlâwt lo, mahsela reilote-ah erawh ka muhil ve thei ta hlauha.

Mitthi kan neih avângin ka insiam malh malha, tlaivâr a ngaih dâwn avâng erawh chuan ka phûr lêm lo thung. Zân menrei lutuk hi ka zo ve vak lo va,  lehkha pawh hma laiah âm takin ka zir mai ṭhin, mitthi ah erawh tlaivar loh bik kha a mawi siloa. Ka tuar lutuk lo turah ngai ang.

Ka nau chiah hian kum a tlin tawh avângin amah nên chuan kan inzui chhuaka, ka nau leh Vanrongura hi an inrual chiaha. Chuvang animahna a mi bem pawh khân keimahah danglam a siam a, mak tihna in ka khat bawk.

Ka nau ka ena, a ni phei chu a kum upa ve uaih tawh mahsela inchhungah chuan naute ang maiin ala khawsa ania. Vanrongura pawh eng ruai a nih ka ring biklo, mitthi in kan thlen chuan mi an lo awm nual tawha. Tlaivâr tur kan nih avângin kal hma duhlo in dar 10 vêlah kan kal chauha, ṭhalai erawh an lo tam hman phian tho mai.

Chutah Jeremy-a chu khawilam aṭang nge pawh hriat loh hian a rawn lang thuta. “In rawn thleng tawh maw? Lut ila?” ti a ka bula a din tak tlat avâng chuan hnar chi ni heklo bu nghatin hma ka hruaia, ka nau erawh a ṭhiante a hmuh avângin min kalsan daiha, a va han hahthlâk tak 

Jeremy-a nên chauh kan luh chuan kan khaw ho in ngaihdan mak sak pui pui an lo neih leh ka hlau bawk si. Kan in a a rawn lêng ringawt mah lo sawi darha inngaizawng chhuaha min chhuah tawh mah tihnak alai chutia han inzui leh chu a nuam fahran lo khawp mai.

Tih theih dang awm heklo kûn deuh chal chung chuan hma hruaiin in chhûng kan luh rual chuan rin ang ngeiin min lo melh ṭhap hlawm a. Hawi kual deuhin hnunglam ṭhutna la âwl ka hmuh chuan ka lâwm ngei mai.

Pan vatin ka ṭhu zui ta vata, ka thaw huai mai. Ka bulah chuan Jeremy-a chu ṭhu in kan hnung lawka rawn kal ve tlangvâl pahnih pawh chu an rawn ṭhu ve a, chutia kan pahnih chauha kan ṭhu lo chuan awm a ti nuam huai mai.

Thingtlangah chuan sawi kan kai awlsam si a, mipa zui vak chi pawh a ni meuhlo. Inngaizawng miahlo pawh in ngaizawngah mi la chhuah duh kan la tam avâng hian hmeichhe tân phei chuan in vên a ṭul viau zel.

Hla chu sa ve in a chânga mitthi chhûngte ṭap ri hriat leh ṭhin erawh chuan min ti hnîm ve ruih mai. Thihna hi chu a tâwp chiang êm a, ṭah hi an phu rêng ani. Engtikah mah kan inhmu thei dâwn lo tih hriatreng si chuan ngaihtuahna hi a tawi ve tup ṭhin. Ka pi leh pu an thih khân chu channa nat zia chu ka lo hre ve tawh tlata, kumkhuaa hmu leh tawh lo turin an liam ṭhin a ni si a.

DUHAISAM DUHLAI ZORINPUIA S2 

CHAPTER 7 

“Engtikah nge ilo haw dawn?” Marami call ka chhân rual chuan a rawn ti lâng lânga. A aw chu a zângkhai phian mai, karhnih ang chu khuaah ka awm ve tawha, kar thar lamah chuan chhuh ve tawh ka tum kha a nia. 

“Ka rawn haw ṭep, khalam teh in ṭha maw? Siampuii teh hi min va be duh lo ve” ka tihchuan a rawn nui hak haka.

“Bialpa a nei thara, nuam a ti riau. Thanzuala nên khân an ni a lawm, a la rawn hrilh lo che em ni?” a tihchuan ka lâwm lo lek lek mai. “Hrilh lo an nihna a rei tawh em?” ka tihchuan “Ala reilo, a la rawn hrilh lo che maw? A hrilh che ka ring asin” a tihchuan ka thaw haka.

Thanzuala chu Vanrongura ṭhian a ni a, engtik laiin nge an lo in bem hman ni. A aia naupang a nihpui tihna a nia “Hrilh tlâkah min ngai lo ania'ng, a ṭhian ka lo ni ve lo a ni mahna. Ka dah phawt ange, Vawk chaw pêk te ka la ngaia, nakinah ka lo text ang che” tiin call chu ka dah zuia.

Vawk panga kan vulha, châwm an hautak ve riau tawha. Mahsela pahnih hi a leitu tur nên lam kan in be fel tawha, an rawn la har tawhin ka ring lo. An lian tawh bawka an to ve fatin ka ring, Vawk chaw ka pêk zawh hnua phone ka en chu Siampuii chuan min lo text tuara, an nihna a la reilo nên a zah thu vêl a rawn sawi duaha, ka chhâng lêm lo.

Ka lungawi lo tu ve tlat, ka ṭhianṭha te anga ka neihte an ni a. Hetianga thuruk an neih hi ka duh vaklo, kei ngei pawhin an lakah thuruk ka nei ngailo, engkim kan inhrilh ngam hian ṭhianṭha kan nihna a ti chiang zâwk ka ti a, kan laka sawi hreh an nei a nihchuan ṭhian tak takah min ngailo a ni ang tih hi ka ngaihdan a ni.

Mahsela chutianga thinrim khum vak vak erawh ka tumlo, ka chhân loh vâng nge ngaihdam te chu mib rawn dil char chara, a hnu a a thu rawn sawi chuan min ti danglam viau thung.

“Vanrongura hi tûnlai a mak reuh lutuk, zu te a ina, Thana hian a duhzia che min hrilh tawha. Nangmah avâng aniang, hmeichhia te hi a chhuahpui zuk zuk lehnghâl, hetiang chuan naupang tê in fa a la nei mai ang” tihvel a rawn sawi chuan mak min tih tir.

Vanrongura chu chutiang zâwng chuan maw alo awma? Ka rin loh lam daih a ni, chutianga a awm ka ring lo “Keimah avâng anilo ang, a naupanga an hausa bawk nên nundan a thiamlo zâwk aniang, ka dah rih phawt aw. Ka buai deuha” tiin phone chu ka dah zui daiha.

Vanrongura awmdân chu ngaihtuah zui duh lo mah ila chutianga a awm thu hriat chu a nuam miah lo, kha mi zân aṭang khân min rawn be tawh miahloa. Naupangtea chutiang thil ṭha lo a ti anihchuan a duhloh tawp thil a tawng ang tih chu ka hlauhthâwnpui lo theilo.

Engvanga ngaihtuaha midangin a fa chu a pai hlauhpui em em nge ka nih pawh ka hrethiam chuang lo. Mahsela chutiang tura ka han ngaih ringawt pawh chuan ka awm anuam miah lo nia, nei hian ka duh ve tihna em ni ang? Nge ni a ṭhian anga ka en vâng zâwk tih pawh ka hre hrang teh nuaih tawh lo.

Thawk la ham hamin a number chu ka hmet chhuaka, call tumin ka tin leh zuau ṭhin. Mahse ka hreh tlat bawk si, tûnah zân dar 9 a ri tawha, ka inngaihtuah buai takzet, a tâwp a tâwpah chuan ka call ta tho a.

A ring rei phian lehnghâl, ala lêng a ni ngei ang. Ka dah ṭep tihah chuan a rawn ti ta khepa, mahsela a ṭawng hauh lo. Thâwm eng emaw erawh chu ka hre leh zauh ṭhin,“I hre thei em?” ka tihchuan a rawn khuh kharha.

“Pawimawh a awm em ni?” a rawn ti khauh chu sawi tûr ka vân ngei mai. Eng thu nge ka sawi ang ka hre hauh lo “Ka lo haw ṭep tawha, enge i tiha?” ka tihchuan a ngawi vang vanga “Chuan” a rawn ti leh ringawta, ka sawi tûr zawng zawng a ti bo vek.

Chhân tuma ka kâ ka ân leh zuau lai chuan “Tinge phone i hman renga, tirawh in tawh ang u” ti a hmeichhe aw ri rawn chhuak avâng chuan ka tâwp leh riha. Siampuii khân a sawi dik tihna, a hma kha chuan zân a vâk chhuak ngai lo tih ka hria, a chhan chu min tihbuai reng peih avâng khân inhnial nân zân hun kan hmang ṭhin a nihkha.

“I sawi duh chu sawi la” a rawn ti leh chu ka inhum ruh ngheka, engvanga hmeichhe aw ka hriat avânga lungawi lo em em nge ka nih pawh ka hrelo. Mahsela a awmdân chuan min ti lâwm lo takzet “Engmah a awm lo, hlim takin hun i hmang dâwn ania” tiin phone chu ka dah zui daiha.

A rawn call nawn tih ka hriat avâng chuan dah hmakin khumah chuan ka mu thla hnawka, ka let leh hunah chuan ka be tawh lo anga. Keimahin college pawh ka kal tawh ang, a awmdân chu ka duh loh ber thil a ni, bialpa ka nei ve tak tak dawn nge tihte chu ka ngaihtuah a.

Chu thil chu engvanga ngaihtuah nge ka nih? Kei hian kha hmeichhia kha ka thik tihna em ni? Hahthlâk hian, keimah aia naupang avâng hian ka intibuai tur a nilo hrim hrim, amah lo min duh tu an tam ve viau laia engvangin nge keiai naupang chu ka ngaihzâwn tehlul ang? 

Engtikah mah chutiang thil chu a thleng ngai lovang, ti a mahni infuih sauh sauhin ka mit chu ka chhing zui ta thuaia.

Ka muhil mai thei lo lehnghâl, engtin nge kha hmeichhia nên khân an awm ang tih mawlh chu ka ngaihtuah a, a mutpui tak tak ṭhin angem le?

Chutiang a ti anih vaih chuan ka hnaih tawh hauh lovang, kei min runluih nâna chutiang a ti a nih vaih phei chuan keichuan ka duh ve lo.

Thawhlehni ah Aizawl ah ka chhuk thla a, ka chhûngte ho pawh chuan kawtah min lo nghâk ṭhap a. Ka chhuah rual chuan ka pi leh pu nên chuan kan inkuah vang vanga, an upat tawh avâng hian min ngai thei viaua. Ka hrethiam ve tho, putea te ho lah hian nupui neih vat an tum silo, tu te han nei leh se la chuan an zia deuhin ka ring.

In chhûngah ka bungrua te chu putea te pahnih chuan an la lût a, kei erawh pâwnah dingin ka thawmhnaw chu ka bêng fai mawlh mawlha. Luh mai tuma ka inher lai chuan min be ri ka hriat avângin Vanrongura te in lam chu ka hawi vata.

Min lo en reng tih ka hriat rual chuan ka thaw haka “Ilo haw tawha?” a rawn tihchuan ka bu nghata, ka lût nghal daih bawk. A hmêl ka hmuh hian kha hmeichhia in a rawn biak dân kha ka hre leh ṭhin a, ka thinrim leh hlur zel. Hetiang em em a ka ngei chhan hi ka hrethiam bik lo.

Ka roomah chuan lût tlangin ka inbualfai zuia, chaw pawh ka ei peih ngânglo. Motor ka chuan hi chuan ka puar ul zela, thil ei chakna hi ka nei ngai lo a tih theih ang, ka pite erawh ka pa in Sakhi leh Saza rêp an thawn an hmuh khân an phûl hluai a nihkha.

Ka inbual zawh rual chuan inthlâk sawk sawkin ka room tukverh chu ka hawnga, ka awm lo rei veleh tawh bawk nên phiat fai hmasa te te in pâwnah chuan ka ding chhuaka, Aizawl han awm leh tâkah chuan thâwm a tam leh tawhin motor tlân ri a in dawt leh zuta, a bengchheng leh dâwn hian ka hria.

Chutia ka din chhuah rual chuan min lo châng reng emaw tih turin Vanrongura chu a rawn chhuak zuia, chuveleh luh leh tumin ka inher chu rang zet hian “Ding teh, la lût suh” a rawn ti vata. Keipawh ka pên lui tawh bik lo,  eng tak chu hria nimaw? Ka be châk vak lo a sin le.

“Hman zân kha i ngaih ang thil engmah ka tilo ania aw, engtin mah kan awm lo. Hmeichhia ka la khawih lo hrim hrim ania” a rawn ti tawla, engvanga chu chu min hrilh kher nge maw a nih le? Chutih rual erawh chuan a thusawi chuan min ti thâwl huai thung si.

A hmuh loh lamah chuan ka ṭhen saka “I sawi angai lo, i nun a lawm. Hriat ka mamawh hek lo, i duh duh dânin awm rawh, hmeichhia i mamawh te chuan an tam a lawm” tiin luh leh mai ka tuma, a rawn au leh rualin eng emaw hi a ri ṭhata.

Ka hawi phei ruala tlâk dana kan siam thirah chuan a lo uai der tawh lehnghâl, phâwk lutuk chuan ka ena. A intihnat a hlau lo emaw ni, rang zet chuan ka va puia a rawn lâwn chhuah rual chuan “I mâwl em ni? I intina mai tur a sin” ka tihchuan a thaw haka.

“I room leh ka room chu a inhnaih hi, ka che sual dâwn lo. Chu ai chuan min be duh lo hian rilru a luah zawk” a rawn ti leha, engvanga ka be duh lo pawh chu la na viau nge maw a nih le. Amah zâwkin ani reng sia min be lo a awm hmasa zâwk chu.

Ka mitah chuan chiang takin a rawn ena, a hmêl ka hmuh hian ka thinrim tlat nia. Khâng hmeichhia a fâwpa a khawih tur anga ka ngaihtuah zâwng ringawt pawh hian ka ngei hlur mai “Let leh vang vang rawh, ka lût dâwn ka room-ah rawn kal hauh suh ang che” tiin ka inher nghata.

Pên thum vêl ka pên hman ang tihah ka ban rekah chuan rawn vuanin alamah min pawt zui dawrha. Kan awm na hmun pawh ngaihtuah hauh lo chuan a âwmah chuan min kuah bei zui thlawp bawk, nghet tak chuan min kuaha.

Ka che thei lo hrim hrim “Enge i hriata? Vanrongur min thlah vat rawh, i hmeichhe chhuahpui ho emaw min ti hauh suh. Min thlah nghal rawh” tiin ka tal deuh nawk nawka, ka thei der lo a tha a chak lutuk tlat.

“Ka duh lo, hlat che ka duha ka theilo. Nangmah theihnghilh nân zu leh hmeichhia pawh kawp ka tum, mahsela zu ka ruih poh leh ka mitthla ah i lang chiang tulh tulha. Hmeichhia awmpui ka tum apiangin i hmêl ka mitthla ah a châm leh ṭhin. Hetianga awm hi ka duh tawh lo, theihnghilh che a biak tawh loh che ka duha, mahsela ka thei lo” a rawn tinghal mawlh mawlha.

A thusawi chuan min ti danglam ve lo theiloa, mahsela chumi avâng chuan a lakah ka rilru ka pe ta tihna pawh a ni chuang lo. Tinge ani nên hian kan lo inhriat kher le? Ka ngaihtuahna a tibuai hneh bawk si a, ka tum loh tâwpin ka awm ang tih pawh ka hlau hlel lo.

“Min thlah teh, min theihnghilh i duh te chuan keichuan pawi ka tilo. Hetiang hian awm fo lo teh ang, ka sawi tawh kha bialpa ka nei, hetianga awm hi ka duh lo, nang ai ka u tih hria la min tibuai tawh lo teh. Mipa tih atân pawh a mawilo, mite'n min lo hmu palh ange i room-ah phei tawh rawh” ka tihrual chuan min kuah nghet sauh sauha.

Ka thaw theilo lek lek mai “Aih ka duhlo, hlat che chu ka duh lutuk. Mahsela ka hlat theilo che, ka hlat poh che leh ka ngaihtuahna leh thinlung hian a hnaih zual zel che, keiai i upatna a tam hauh lo. Keini lo pawh aia naupang ngaizawng an tam lutuk, min duh loh vâng a nih kha” a tihchuan sawi tûr ka haih chham der.

Ka duh nge duh lo pawh ka hre chiang tawh lo a, hetiang thu sawi tûr phei chuan ka inring tâwk heklo. He mipa hian ka rilru a ti â zo dâwnin ka hria.

ZAWMNA...

Ka lamah rawn awm hnai thutin ka hmuiah chuan a rawn fawpa, ka ṭhu ngil nghâl âwt mai. Ka kut chu rawn vuanin a kâwngah chuan min kuah tira, ka kâwngah rawn dawmin min pawm kâng a, a mal chungah ka ṭhu fel der mai. Min zo tak chu ani, ka rin ai daihin tha a angah bawk. 

Ka hmui chu rawn nawr kauin a lei chuan zei zet hian ka ka chhûng chu a hawl kuala, tihdân tur ka hre ve lo bawk nên ka meng kura, ka dawh mâwl tawp ringawt. Mi chu an in kiss laiin an mitte an chhing diar diar ṭhin kha ania, kei erawh chhin chu khawi lam mipa in min la fâwp ngai lo nên ka meng kur ringawt.

Ka biangah chuan rawn dawmin min fâwp duhthawh sauha, keipawhin ka chhâng lêt ve ta bawk. Ka hriat chian tâk chu,kha ti taka ka hnar nasat kha, ka hriat loh chhungin ka lo duh tawh tih hi a ni.

Ka hlima, nuam tihna riau ka neih chu keimah pawhin ka hailo. A âwmah chuan chûl dân danin a hnungah ka zen lût a, ka kuah bet nghal thlap bawk, thaw halh halhin ka awm sawna. A mita ka en rual chuan a mitmeng de sar sar chu ka hmuh hmaihlo, nui ver ver hian min ena.

A hmelṭha em em mai lehnghâl, naupang duhawm deuh a ang. A nui mawi bawk sia hmuh a nuam lutuk tlat, ka hmuiah chuan a kut zungpuiin a rawn tuai heuh heuha “I thlum tui lutuk” a tihchuan min ti lâi chhia va a ni. 

“I lerh” ti vaka ka lei ka chhuah zuk chu a rawn nui hawk hawka, chutah min kuah hnai leh sauhin ka hmai bulah chuan hnai lutuk tak mai hian min rawn ena “I hmelṭha ka ti, ka hmeichhe hmuh tawhah i la hmelṭha ber” tiin min nuih leh ver vera, hepa hian a zûna min uai tir a tum chiang lutuk, a duh ang ngeiin tûnah hian a zûnah ka uai nawn awn awn ani ber mai.

Chutah a âwmah chuan min kuah bei vang vangin “Min duh ve hi ka lâwm lutuk, a tirah kha chuan keiai i u avâng khân ka hnaih mai ngam bik lo che a. Duh che pawh kha ka tum miah lo bawk, mahsela i hmêl ka hmuh apiangin ka duh zual zel che si a, ka inthunun thei ngang lo ani, zah pawh ka zak ve lutuk, mahse keiai u daih hian ka mit i la tlat bawk si a” a tihchuan ka nui saka.

Amah ang chiah hi ka ni bawk, mipa tam takin min lo bem ve fo va. Mahsela tumah ka uk sak ngai lêm lo, ka ṭhiante ngei pawhin ka dik lo emaw an ti fo ṭhin, kan college ah ngei pawh khân bem tu chu ka nei nual, mi hausa tak tak leh hmêlah pawh zahpui awm loh tak vek an ni a, mahsela ka duh ngai miahlo.

Tûnah keiaia kum 5 a naupangin ka thinlungah hmun a chang tlat chu keima dik loh nge pawh ka hrelo. Ka en vang vanga, taksa ah leh pian engkimah keiai a liana, a rilru erawh a kum ang bawkin a la naupang chhia dâwn tih lah ka hailo, mahsela ani aia u te ai ka thinlungah a tla na tlat bawk si a, ka dik lo nge pawh ka hrelo.

A lungphu ngaithla chuan a âwmah chuan ka bei ngawi kara, enge ka sawi ang ka hrelo ani ber mai. Ka hnungah chuan a chûl hauh hauha, ka chhipah a khabe rawn nghatin a thaw chhuak ham hama. 

“Ds, tinge min duh tlata? Nakinah min iai leh zâwk lo ang maw? Keichu i hmuh ang hian thingtlâng nula thiam neilo, hmêlah leh pianah pawh chhuahtur ka nei loa, nang erawh i hmêltha in i hmalam hun pawh a êng a, tin, i upa tial tial anga keiaia ṭha tih pawh i nei leh ngei ang. Chûng hunah te chuan keichuan nat ka duh dâwn hauh lova, chuvang chuan bul ṭan loh mai hi a him zâwk angem tih ka ngaihtuah” ka tihchuan ka bânah chuan a rawn hmer salha.

“Khatiang zâwng ngaihtuah suh, tûnah pawh hmeichhe hmêlṭha chu an tam alawm. Min be tu ah pawh an tam mai, mahsela khatiang hmelṭha satliah ka duhlo. I hmelchhia kha in ti ziah suh, i ṭha ka tihchuan i ṭha a nimai, hmelṭha in hmelṭha an inti duh hleinem” a rawn ti chu ka nui hak mai.

Mi hnial dân tur lah chu a hre phian lehnghâl. Amah en tur chuan ka dâk chhuaka, min rawn en ve rengin a nui leh saka, rawn kûn hniamin ka hnar hmawrah chuan a rawn fâwp zauha “Ka mitah chuan nangaia hmelṭha an awm lo, i hmêl chang nilo in i rilru pawh a ṭha, khatiang lam zâwng chuan engmah sawi tawh hauh suh” a tihchuan ka nui ve ta hak haka.

A naupang zâwk chuan min ti dang dera, ka zâm bawk nên engtia han chhân vak tur nge pawh ka hrelo. A chêt hmang hi a puitling khak reuha, a ṭawngkamah erawh chuan a la naupanna a lang ve zeuh zeuh thunga. 

Chutia kan lo awm lai chuan pâwnlamah ka pi leh pu thâwm a rawn awm tâk avângin kan insiamṭha sawk sawka. Ka pi leh pu rawn lût chuan min rawn be nghal bawrh bawrha “In pahnih chauha in lo awm, khawiah nge in ṭhiante?” ka pi chuan min rawn en ha pah hian a rawn ti a, min en dân chu min ringhlel hmêl te pawh a pu.

“An haw chiah a nihkha, hei Api u Sangpuii hi amah chauhin a awm dâwn sia ka lo la awmpui rih anih hi. Chubâkah lo lêng ziah rawh i tia, ka lo lêng ve em ema min duh vak nange.” a ti zuia. Ka pi pawh a nui ta hak hak mai, kan bulah chuan rawn ṭhu in Vanrongura chu a bêng nghal thak thaka.

Ani tar rawh tha chutah thinrim pawha beng lo chu Vanrongura chuan enga tân mah a ngaih ka ring lêm lo. Kan bulah rawn ṭhu in chanchin an inzâwt mawlh mawlha, “In rawn awmna kha a la rei lo hlea hriat laiin hei nang lah chu i tlangvâl ve ta der mai. Hun hi a lo kal chak a nih hi, bialnute hi i nei ve ngam tawh anga? Nangpui hi ka ring riau mai, i taksa te lah hi a lian ṭha theng thuang bawk si a, fimkhur hle rawh. Hmeichhe lakah te i hlei hlauh ange, naupang tê a nupui i neih vaih chuan a nuam i ti dawn lo ania, tûnlai ṭhalai chu kum tling lo a innei te hi in tam tawha. Nuthlawi leh pathlawi in tam phah a nih hi” tiin ka pu chuan a zilh pah mawlh mawlha.

A ni pawhin ngawi reng hian a ngaithla a, ka pi leh pu thusawi erawh chuan min ti ip ru deuh ṭhin. Tûnah hian naupang anga an la biak hian min duha, keipawhin ka hnar lo tih an hre lo chu a ni si a, an hriat hunah engtin tak awm ang maw? 

An sawi dânah Vanrongura te hi Aizawl a awm nghet an ni bik lo tih te pawh ka hre zela. Khawi aṭanga rawn kal tak ni ve ang maw? Nakinah la zawh ngei tur a ni, naupan lai aṭanga ka awm bîk loh avâng hian hriat ka la ngah lova, keimah ka hawizau lutuk lo bawk nên chutiangin Aizawl pawh hi ka la hrechiang hek lo.

Lên chhuah ai chuan ina awma lehkhabu chhiar mai mai hi ka duh ṭhin a, ka lêng ngai meuhlo ti ila a sual tam hauh lovang. 

Vanrongura pawh chu rei lêng tawh lo chuan a haw zuia, u Nunpuii pawh a rawn thleng leh tawha. A ni hi kan inhnuai a luaha, tihian ka pi te hian hlawh pe tho in inluah man pawh an lâk sak duhloa. Amah hi thingtlâng lam mi ve tho a nih avâng hian an khawngaih anih ka ring.

Chhûngkua ang tak taka an en avâng hian ani pawhin nuam a ti tih ka hria a. Christmas vêlah pawh haw loh châng a nei zeuh zeuha, a chhûngte lam pawhin an rawn ngaihtuah lo bawk nên a chhûngte nên pawh kan inpawh hlawm viaua, an ni pawhin an thlai thar ang ang hi ka pi leh pu ei tur hian an rawn thawn ve ṭhin a, an lâwmthu sawi ve na ah ka ngai.

Zânah chuan lehkha ka zir leh malh malha, a khât tawkin Vanrongura nên chuan kan in text paha, ka nui leh hak ṭhin. Min ngaih thu leh rawn phei leh mai a châk thu chu a sawi seka, keilahin ka phal rih lo a. A lungawi lo lek lek tawh mai, mipa dang min be tu an awm nuala, kan college SU u Remruata pawhin min rawn be leh tawha. 

Mahsela beiseina pêk ka duh loh avângin ka chhâng ngai meuhlo, kan duhloh hi chu be reng lo ila ka duh zâwk. A chhan chu kan biak zel kha chuan beiseina an lo nei leh ṭhin a, kan nihpui tak tak leh ṭhin siloa midang rilru kan tina mai mai zel a, hei vâng hian ka duh vak loh biak ṭhat hi ka ti ngai meuhlo. 

“Tunah chuan bialnu ka nei tawh bawka a nuam hle mai, lerh phal a ni miahlo ania. Mipa dang han melh vaih teh, ka khai zâi ang che” tih a rawn thawn ka chhiar chu ka ner nâng mai. A thusawi dân kher kher chu lerh deuh te pawh ka ang a lawm.

“Ka lerh bawk lo aw, lehkhate zir ve phawt teh. Khatiang chuan college i rap ve lo hlauh ange” ka ti chu min rawn call zui zata. Ka lâk rual rualin “Ka zir reng aw, hei be pah che in ka zir alawm ka rawn phei i phal bawk silo a. A vawt si, i bula awm mai mai ka châk” a rawn ti nung nung mai.

Nui hak hian sana chu ka en zauha “Lehkha kha zir ṭha hle rawh, pasal lehkhathiam lo ka duh miahlo ania” ka ti chu a rawn la na ngang mai “Lo en reng rawh, distinctionah ka pass ang. Ka pass anihchuan ka duh duh min pêk tiam la” a rawn ti zuia.

“Tehreng mai, kumtawp exam a i nih phawt chuan ka pe ang che. Mahsela i distinction chauhin ka tih kha aw” ka ti chu “College pawh i bulah ka kal ngei ang, i intiamna hi hre reng ang che” a ti a, hetia ka tih chhan pawh amah ka hmusitin ka hmu hniam lam nilo in lehkha hi zir taima sela, result ṭha tak nei tura ka duhsak vâng a ni zâwk.

Chutilo chu keimahah ringawt a rilru a pêk chuan, kan tum loh tawpa kan awm dâwn bâkah a hma hun ka tihchhiat sak vek ka hlau a ni ber mai. Keimah avânga a zirna a tlâk hniam phaha, a tum loh dâna ka awmpui ka hlau a ni ber mai.

“A nihchuan ka zir phawt dâwn, nakinah ka lo bia ang che. Lo muhil hauh suh, ruahsur lâi hian ramhuai an hrang duh bik ania” ala rawn ti zuia. Min tih ṭhaih a tum ve ngei emaw ni, ve reuh chuan a.

“Ka hlau lo emai, zir phawt la i zir zawh hunah kan in be leh dâwn ania. Keipawh kan zir phawt ange, naktuk lamah test ka nei dawna, ka hman ṭep” tiin phone chu ka dah zuia. A lehlam zawng tak hi chuan biak a nuam ka ti ṭhin,  a rilru naupanna tak hi a lawmawmna ka tia, ka tum loh tawpin ka lo ngaihtuah leh ṭhin.

Lehkha ka zir zawh meuh chuan dar 10 a lo ri leh der tawha, Vanrongura pawh a la zir nge mawni min la rawn be hauhlo. Chutia ka lo ngaihtuah rauh rauh lai chuan a rawn call ta hlauha, ka lâk rual chuan a zir zawh tawh thu chu a rawn sawi zui zata.

Reife kan inbia a, a châng leh kan inhnial leh rap rap ṭhin. A mizia hi ka duhzâwng tak a ni bawka, biak a nuam ka ti viau mai.