DEMON KING CHAPTER 10 (LAST)

DEMON KING 

CHAPTER 10 LAST

“A vawt lutuk” Thani chu a rawn khur deuh hlawk hlawka, luiah kan kal ho a thlasik a in  ṭan tawh bawk nên daihlim hnuaia awm phei chuan a vâwt lam mah tawh ania. Tui chên phei chu keichuan ka ngam lo hrim hrim, nui hak in midang ho tui chêng chu ka thlir sana.

Mipa ho tui inhleuh siak chu an hmuhnawm phian mai, lui a lian lo bawka hnehsawh tak an ni kei erawh tui chên ka thiam vak lo nên ka chêng duh lêm lova, chhûn ei tur chu siamin keima tâwkah ka buai ve viau mai. 

“In ha lum la i hritlang ange, khawnge Engi leh Rami pawh hi an awm?” ka tihchuan nui vur vurin an inthiar thu a sawi chuan ka bu nghata “Sawi miah suh mipa ho hriat saw an hlau teh ania, mikhual an nuam khawp mai. Martin-a pawh ka chhûngten an ngaina ania aw, an nundan hi a ngaihsânawm, an hausak dâwn nên kan nunphung anga awmdân tâwk an thiam hle lehnghâl” tiin mipa ho lam chu a ena.

“I duh mai lo em ni? Ngaihzâwng a neilova, bâkah a fel ania. An vai mai sawn an ṭha em em vek, keipawhin ka hmuh tirh kha chuan Damian-a hi ka hlau a nia, mahse amah in min kâwm a, college pawh an mahni avângin nuam ka tih phah teh a nia. Ṭhian ka neihloh laiin an ni chuan min kâwm a, chuti nilo se chuan hrehawm ka ti viau ang” ka ti sapa.

Damian-a rawn hawi chhuak in min zawng tih ka hmuh chuan ka bân ka vai zauha, a nui nghal suk mai. Tui aṭanga a rawn chhuah rual chuan a pian nalh zet chu a lang chiang ngei mai. A taksa huh hlap chu thingkar aṭanga ni êng rawn lût chuan a chhun tle sep sepa, a ngal sei zet leh a taksa in phût mawi lutuk chu thlir loh phal chi anilo.

“Awi a chhiat loh zia saw, i vânnei lel lawl ngawt mai. Mipa hmêlṭha leh mitmeng mawi bawk si, chutah an la hausa zui. Thawnthu te pawh a ang alawm, hnamdang pasal nei hi chu tam ve viau tawh mahse nangmah anga nei hmelṭha leh hausa tur hi chu an la awm miahlo ania aw, in chhuang hle rawh. Youtube channel siam kher pawh i ngai lo ang” Thani chuan a rawn ti leh zata.

Ka nuih a tiza ṭhin, thil hi a sawi phawng phawng zel bawk sia. Mahse a sawi dik ve tho, Damian-a ka tawng hi keipawhin vânnei ka inti nawn fo dâwn a nih hi, kan bulah chuan rawn ṭhu thla in ka hmuiah chuan a rawn fâwp zauha. Ka ṭhiannu lâi nasa lutuk lah chuan a aw a lo thian lui vak vaka.

Midang pawh Damian-a a rawn chhuah tâkah chuan rawn chhuak ve vekin rawngbawl chu min puia, noodles leh arsa vel mai mai kan keng kha ania siam chhûng a reilo viau mai. Rami leh Engi pawh an rawn lang har lo, an la zah hmêl em em zuia, kan sawi an ring nge mawni.

“Enge in tiha? In ram hi a nuam riau mai, hmun dang dai hi ka ngaina. Hetiang hmun khawkrawk vela han awm te hi anuam mawle, awm rei thei phei ila chuan duhthusam” tiin Sammy-a chuan Engi chu a siai zauha, a nilah a hmai a sen nghal ṭawn ṭawn mai.

“In mak ka ṭhiante hi chhaih laih phêt tum suh u aw, sual lutuk mai. Bialnu pawh in neih theih loh kha, hmeichhia in hmuh lai hian duat rawh u” ka tihchuan an ner nasa mai “A ho hei kan inkawp kim chiah a lawm” an tih ruala ka ṭhiante zak hmêl chu hmuhnawm tak an ni.

Damian-a kuah chung chuan ar bawp chu ka ei pah mial miala, intur kan ken chu a ṭangkai viau mai. Sprite chu in khalh khalhin “Chhuh leh pawh ka peihlo ngei mai, ka ṭhiante tal hi rawn kal ve thei sela duhthusam mawle. Christmas dâwnah ka haw chho leh ang” ka tihchuan Damian-a chuan min rawn melhin “Kan innei tawh ang, nghah rei ka tum lo che, in zui rei leh reiloh hian hmangaihna a ti dang chuang lo, midangte anga rei tak in ngaihzâwn kha ka duh ve lêm lo, in ngaihzâwn reina hi inneih reina a ni chuang lo” a tihchuan ka lei ka chhuah zuka.

Chutia inneih a sawi chuan min ṭhawng ngei mai, chutah mak ka tihna belhchhah turin ka hmaah chuan a rawn ṭhingṭhi ta mai, a sira a bag chu dap rak rakin zungbun a rawn phawrh zuia. Kan ṭhiante chu an lo au nghâl dar dar bawk.

Phâwk zeta ka en lai chuan “Fiona min nei duh angem?” tiin min en rana, a awm dânah chuan a zâm ve hle tih pawh ka hria. A kut leh taksa vêl chu a khûr ve dar dara, a tui hleuhna avâng mai chu a nilo tih ka hria. 

Ka chhânna ngai châng tih hriat takin min en renga, tûnah hian ka hnar a nih chuan a zah dân tur leh kan inkar ngei pawhin a chhiat phah thei tih ka hria, tin, ka hnar a nihchuan ka â hle tih na a ni'ang, a sawi ang khân rei tak inzui kher hi hlimna a niloa, inneih reina leh in hmangaihna a ni kher lo bawk.

Thawk la ham hamin ka nuiha “Aw ka nei ang che, ka nei ngei ngei ang che” tiin ka kut chu ka dawha, a rawn nui deuh hawk a. Kan ṭhiante pawh chuan kut an lo bêng ve dar dat bawk, engkim hi an lo ruahman sa tih ka hrechiang ta bawk. Min pawm nawlhin min vir puia, ka hmuiah chuan a rawn fâwp nghal vawng vawng bawk.

Reilote ka la hriat si hi keichuan ka pasal ni turin ka pawm chu a ni si a, ka tihsual erawh ka ringlo. A chhan chu a rintlâk zia la hre tawh tlata, an thawmhnaw te chu thlâk te te in chhûn chaw chu kan fâk zuia, min fiam zuk zuk reng bawk.

“Keini ho pawh hi inngaihzawn vat kan ngai, in hnam hmeichhia te hi kan duhzâwng in ni tlat, chuvang chuan insawi fel ve mai ang u” Martin-a chuan Rami en pah chuan a ti a, ka ṭhiante chuan sawi mai tur pawh an hrelo. Min rawn en rual chuan “In ngaihdan kha sawi tawp rawh u, ka sawi tawh kha an rintlâk ang” ka tih tâkah chuan an in en kual leh phawta.

“Min duh tak tak dawn em ni? Keini chuan kan hnial hauh lovang” Thani chuan a ti ta hrâm e, Tyler chuan rawn hnaih vatin a nuih zui var vara “Kan rinawm ang tih kan tiam cheu ni rawh se. Keipawhin ka pian a hnu lamah nangmah anga min hneh tu ka la hmu lo, in ina reilote ka awm chhûng pawh khân ka bêl chiang hman viau che a ni, keichuan inneih ve ngei pawh ka duh” tiin Thani kut chu a vuan zuia.

Sammy-a leh Martin pawh chuan Engi leh Rami chu hnaih ve in an innuih tawn hlawma, keipawh ka hlim . Ṭhian leh ṭhian kan inkawp dâwn chu a nia, a nihchuan inneih hnu thleng pawhin kan awm tlâng thei dâwn tihna? Chu thil ka ngaihtuahna chuan min tihlim lutuk tlat.

“I hlim a ni tiraw? I tân chuan a ṭha ber zel ka ngaihtuah ka tihkha, tikha chuan ka bula i awm hunah pawh i ṭhiante nên in inhmu thei tawh anga, engkim kan ram mi in nih theihna tur thil chu keimahin ka buaipui vek ang. Ka kutah engkim nghat la tûn aṭanga kan buaipui nghal a ngai ang, ka nu leh pa pawh inneihna hmang turin kan chah chho mai ang chu” a tihchuan ka bu nghata.

Ka nu leh pa erawhin a hma an ti angem tih erawh ka hre lo thung, keimah pawhin ka biak ngei angai ang. “Damian ka nu leh pa hian an rem ti angem ka hre chiah lo, kan inkawp chu an rem ti ngei ang mahsela innei tur chuan an la phal chiah angem ka hrelo a ni” ka tihchuan ka chalah a rawn tauh data.

“Ka dil vek tawh, an rem tih avânga vawiin ni ah pawh he thil hi ti ka ni, ka bulah awm vat la tihai bâka duhthusam dang ka nei chuanglo. Kum tak tak ka duhthusam ang hmeichhia nghâk in ka lo awm tawha, tûna ka hmuh hi chhuah mai mai che ka phal hleinem” a tih chuan hlim zual tak ka ni.

Amah chu kuah thlawpin ka nuih ver ver renga, ka hlim lutuk hi au vak vak mai ka châk ani. Kan ṭhiante erawh a hran ṭheuhvin an kalsawn ve a, mahsela kan hmu pha reng tho. High school kan nih lai khân movie leh thawnthu kan âtchilh nasa a, m&b ngaina em em in sap pasala neihte kha beisei ngam silo khân kan suangtuah nasa ṭhin.

Tûnah erawh chu kan suangtuahna chu a thleng dik ta mai a nia, a taka thleng tur a kan beisei phâk loh kha tûnah chuan kan ṭhianho ngei maiin kan han tawng chho a. Mumang mai a ni ang tih hlauhawm khawpin tûna kan hun tawng mêk hi a nuam ka ti a ni.

“Ka hmangaih zia che hi i hria em? Hun reilote chhûng ka nuna i rawn lan chhûng hian ka thinlung i nei nghal der ania, dawithiam inih ka ring hial mai” a tihchuan ka nui haka.

“Chutiang chu ka ngaihdan ve tho ini, dawithiam te hi i ni hial lo maw? Ka ngaina che a, i kianga awm tluka nuam tih lah ka nei hek lo, keipawhin ka hmangaih tak zet che, mahsela kan inneih hnuah i danglam daih ang tih erawh ka hlau thâwng ve deuh” tiin a kut chu ka khalh sak niap niapa.

A sual chu ring hauh lo mah ila a zia a thup ve thei tih ka hriat miau avâng hian ka ngaihtuah tello theilo “Chutiang thil a thleng ngai lovang, min ring rawh. Ka ta i nih phawt chuan i hlimna tur thil apiang ka ngaihtuahin pêk che ka tum ang” ka chalah chuan a rawn fâwp leh zauha.

Ka lu ah chuan a chûl hliau hliau mai bawk, ka ringa min tihnat duh lah ka ring phal hek lo. Hetiang mi ṭha lutuk hi engtin nge ka tawn theih tih hi ka zawhna la inzawh nawn fo tur niin ka hria.

Rei awm tawh lo chuan kan haw zuia, in kan thlen rual chuan insûm theilo vin ka nu leh pa bulah chuan ka tlân vata, ka zungbun mawi zet mai chu hmuhin ka kuah nghal nawk nawk mai.

“I hlimna kan duha, i lehkha zir chu duh viau mah ila pasal neih hunlo i ni tawh bik lova. Damian-a pawh kan ring ngama, chutih rual erawhin alakah pawh kan sawi tawh a, nang hi ṭha taka a enkawl theilo che a nihchuan i rawn haw pawh a phal thlap tawha. Kan fanu i ni a, i hnampui ngei nei theila tih erawh kan duhthusam nimahsela rinloh tak maia hetianga in awm tâkah chuan i hlimna chu tihchhiat sak che kan duhlo, i ute pawh kan hrilh tawha. Inneihna nghâk reiloa tih a duh bawk nên keini lam pawh kan inpuahchah deuh chu angai dâwn a ni” ka pa chuan a rawn ti dap dapa.

Engkim an sawi chu chiang takin ka ngaithla a, helamah kan innei dâwn a nih hmêl. Duh nise chuan America lamah kan inneih ngei ka ringa, mahsela keimah min ngaihtuah bâkah ka chhûngte zahthiam in helaia inneih a thlang tih lah ka hailo, pastor leh kohhran hruaitute ka pa chuan a be nghal tih pawh ka hria.

Zânah chuan Damian-a nên kan lêng chhuaka, ka pate erawhin kan chhûngte ho ko khawmin ro an rêl dâwn thunga, chhungkaw rorelna ah lo awm ve dâwn ila Damian-a tân a nuam dâwn lo tih ka hriat avângin ka vah chhuah pui ta kha ania.

Skywalk ah chuan kan kal duna, Damian-a hlau lutuk khûr nasa chuan min ti nui lo theilo. A pên ṭha ngam lo hrim hrima, lâwn an awm ve nuala zân thil mah nise mipui awm ve te chuan min en duh viau mai. Ka bula awm vâng hi a ni tih pawh ka hria, min kuah chungin a hmâwr lamah chuan kan ding phei thei hrama.

“Ṭhiannu i ṭhianpa hi thla kan lakpui thei angem? Hmêlṭha kan ti lutuka” nula panga hi kan bulah rawn kalin an rawn tihchuan Damian-a chu ka en vata, a ni erawhin kan thusawi a hrethiam lo bawk nên ka hrilh leh riha, an hmêlah ngaihzâwn tum hmêl a an en loh avânga rem ti ka ni pakhat.

Hmeichhe ṭhenkhat hi chu zaktheilo deuh kan awm ṭhin a, chutiang nise chuan ka pasal hual a ni tawha ka phal hauh lovang. Thla an lâk chhûng chuan an sira ding chung chuan ka lo ena, midang rawn kal belhin an rawn tih tâk zêlah chuan nuam a tih loh hlauin ka kalsawn pui ta vata, thim chinah chuan awm dunin khawpui chhûng chu kan thlir duna.

“A mawi hle mai, helaiah pawh ngaihven tu ka nei thoa, mahse ka nihna erawh an hrelo a nih hmêl” a tihchuan ka bu nghata “Kan hnam chuan kan ngaisang cheu alawm, chuvang a nihkha” tiin ka nui haka, ka hnunglam aṭanga min rawn kuahin ka biangah chuan a fâwp zauha.

“Nakinah chuan ka ta liau liau i ni tawh anga, ka tân ui i nei tawh lovang chu tiraw?” a rawn ti supa, ka nuilo theilo. “Damian mutdun ringawt em ni i ngaihtuaha?” ka ti ta thlâwt a, chutiang ringawt a ngaihtuah a nihchuan ka lâwm lo viau in ka ring.

“Nilo e thil tam tak ka ngaihtuah, nangnena inneihna leh fa neih dunte, nitina i kianga hun hmana kan dam dun chhûng zawnga ka nu leh pa ang maia inhmangaiha awm hi ka duh a ni” a tihchuan ka thaw huai mai. Chutiang thil a ngaihtuah tih ka hriat chuan min tihlim, dik tak chuan an hnam milâr tam zâwk nundan hriat ve reng chuan min ṭhen leh vat ka hlau ru lo theilo.

“I rilru tak tak ani em? Ṭhenkhat ang hian reilote inneiha min kalsan leh dâwn chuan chutiang a nih hma chuan min kaltîr zâwk la ka duh ania” ka tisepa, ka rilru zawng zawng hi sawi chhuak ila a lâwm lo a nih pawhin a pawilo. Nuthlawi nih ka duh loh chuan ka hma hun pawh ruahmanna fel tak nên ka siam a ngai miau a.

“I hlauhthâwn ka hria, mahsela milâr ṭhenkhat nundan ang hi ka nihna avâng hian ka ni ve dâwn tihna a nilo. Ka sawi tawh kha ka kumkhaw kawppui atân ka duh che a, chu chu hun reilote chhûng pawha khân ka chiang tawh bawk. Ka kalsan dâwn lo che a, ka fa i pai ka duhber a ni bawk, mipa leplerh tak ka nih i ring anihchuan” tiin a thaw haka.

Ka lu chu ka thing nar nar mai, “Chutiang a nilo, ka ring che alawm, leplerh takah pawh ka ngai lo che. Mahsela ka hlauhthâwn thil ka sawi mai ania, keipawhin pasal ṭhen leh mai mai tur neih ka duh biklova, kumkhua a i kianga awm tluka châk ka neilo, danglam ngailo la tih hi ka dil duh che a ni” tiin a kut chu ka hmer vang vanga.

Min chhâng mai lo hian thaw ham hamin hmalam chu a melh rana, keiin a taksa lumna chu ka nêk hnai talh talha, khua a vâwt tawh bawk nên a hrehawm lam mah tawh chu ani. Mahse min kuahtu hian pangtilum angah êm a, ninawm ka ti phallo.

“Ka tiam a che, i taksa a mawi loh hun a thleng a nih pawhin ka danglam ngai lovang, thu hian ka sawi thiam lo. Mahsela nakinah i la hre chho zêl turah ka ngai, thu a sawi ai chuan a tak ngeia hmuh chu i duh zâwk lo em ni?” a rawn ti ta nghata, keipawh ka bu nghat nghat mai.

“Duh e, ka duh a lawm. Ni e ka ring ang che, kumkhua a i kianga awm tluka thlakhlelh ka nei hleinem, ka hmangaih che” ka tihrual chuan alam hawi zâwnga min kuai herin min pawm vawng vawnga, a awmah chuan beiin ka kuah lêt chiala, hetiang a nun hlimna hi ka pian a hnu lamah ka neih âwm pawh ka hrelo.

Engkim hi Damian-a nên chuan a nuam vekin ka hria, kan haw meuh chuan ka chhûngte pawh an lo mu vek tawha. A roomah a kal mai dâwn emaw ka tihlai chuan ka room-ah min zui lût tlata, a hahthlâk ṭhin ania. 

“Damian inneih hma chuan riak dûn tawh lo teh ang, ka chhûngte lung a awi lo hlauh ange” ka tihchuan a lâwm loh hmêl viau lehnghâl. A thinrim leh chuan thlem harsa leh dâwn si a, hrilh fiah leh vat chu a ngai dâwn a nih hi.

“Inneih hma hian keini chu kan in serh hrang ṭhin a, midangte ngaihdân tur hi ngaihtuah a ngai ṭhin. Dân khatna ngeia kan inneih dâwn avângin kan fimkhur a ngaia, chuti lo chu midangte hian kan mudun emaw an tih vaih chuan kan mualphona tur leh buaina min thlen thei a ni dawna, kan fimkhur hrâm hrâm a ngai tih hre turin ka duh che, nupa kan nih hunah chuan engmah in min dâl tawh lovang” tiin a biang tawn tawnah chuan ka dawma. 

Keimah min en tur chuan ka kuai kûn ta bawka, ka nuih ver ver tâkah chuan thaw huai hian min kuah ta hlu hlua. “In hnam zia hi hriat a har dâwn anih hi min hrilh ngun a ngai viau ang, hetiang chuan ka hrethiam lo reng mai ang che. A nihchuan inneih hma chu ka insûm ang” a tih tâkah chuan keipawh ka thaw huaia.

A chhuah hma chuan min fâwp leh vang vang phawtin min mangṭha zuia, ka room aṭanga a chhuah rual chuan keipawh ka ruak deuh huai hian ka hre thei.

Damian-a sawi ang tak takin a chhûngte ho pawh an rawn zin veka, chutiangin mi erawh an hriattîr tam loa. An mahni lam aṭang phei chuan ngaihven tu an ngah avângin tluang taka kan inneih theih na tur zâwkin a ruk thei ang berin an ti a, keini lam erawh Biak ina innei kan nih miau avângin ngaihventu kan ngaha, a darh chak viau mai.

Media lam thlengin Mizo nula hnamdang nei tiin ka lara, mahsela sap pasal nei chu tlêm chuan sawisêlna a tlêm deuh. Mipa comment chhe tak tak erawh hmuh tur a tam leh viaua, hei hi chu ka rinsa ania. Hnamdang lo pawh nei ila Mizo mipa ṭhenkhat hi chuan sawisêl tur hi an hmu thei tawh lutuka, eng post pawh a ṭha lam leh chhe lam pawh nise Mizo mipa hi chuan sawisêl an uar thar emaw tih turin comment ṭha hi an ti thiamlo ni ber in ka hria.

Sawisêl tur an hmu thei bawka hmeichhia aia an ṭawng theih tawh miau avângin keipawhin an comment tam tak chu hmu ve bawk mah ila ka ngai haw duhlo. A chhan chu ka duhtak leh min hmangaihtu ka nei miaua, ka hmangaih ka neih avânga sawisêlna ka tâwk a nihchuan a lawmawmah ka ngai zâwk mai aniang chu.

Engtin pawhin awm ila sawisêl tur an hmu reng dâwn tho tih hi ka ngaihdan a nih miau avângin ka tawrh ve pawh angai a lawm. Ka hnam ka phatsan chu a ni ngei maia, mahsela ka hmangaih chân ai chuan ka thlang zâwk fan, hmanlaia kan pi leh pute pawhin hmangaihna hlut zia an lo tihlan fo tawh kha maw.

Kan ṭhiante pawh nuam an ti bawka an lam vut vut renga, engkim chu kan hnam dan angin kan ti a, ni hnih hnuah America lamah kan chhuk leh dawna, Damian-a ten thil an ti thei bawka an ram mi nihna pawh ka nei har dâwn lo tih ka hre tawha, an mahni kutah engkim ka nghat a ni ber mai.

Kan chhuk dawn chuan ka nu chuan mittui tla chungin min thlah a, lehkha zir tura an tihkha tihian pasal ka nei ta thut sia a rang teh thut êma an tân pawh hriatthiam a har ang tih ka hria. Mahsela Damian-a nu leh pa in engkim an buaipui tur thu leh ka nu leh pa pawh an ngaihthah loh tur thu an sawi khân min ti thlamuanga, bâkah ka u te an la awm bawk nên ka ngaihtuah lutuk duh ta bik lo.

Mizoram kan chhuah san meuh chuan keipawhin ka ngai nghal vawng vawng mai, ka ṭhiante lahin mittui nên min thlah ve bawk nên ka ngai veng veng mai, Martin-a te pawh hian an neih ve vat chu angai a ni. Damian-a dâr chu ka nghenga, ka ṭawng peih meuhlo.

America kan thlen rualin nutei te'n min lo hmuaka, rawn zin a buaithlâk deuh avâng khân helama min lo buaipui mai kha an ti kha ania. Keipawhin pawi ka tilo zawk, helama hmuaktu ka neih ve loh khân ka awm anuam bik dâwn lo tih ka hria.

“Rinloh lutuka in lo inneih thut chu aw, in inzui chauh emaw tia in va hmanhmawh reng reng ve” nutei chuan alo ti bawrh bawrha, za lo zetin ka nui suk suk ringawt. 

Damian-a te in lamah kan insawn lût nghala, engmah ken luh angailo timahse kan dan alo nihna sa nên nutei chuan ka nu leh pa pawisa thawn hmangin engkim an buaipui veka. Keipawh ka inthlahrun loh phah bawk.

Zân mut dâwnah chuan ka inbualfai leh te te a, a vawt viau lehnghâl. Mut kawr nên ka chhuah leh meuh chuan Damian-a chuan min lo nghâk ran a, kan innei tak na in nupa nun kan la hmang hauh lova, chuvang te pawh chu nge ni dâwn ni ka zâm lutuk tlat.

Muangchang a a lama ka phei lai chuan a mitmeng pâwl phat chuan ngawi reng hian min lo ena, khawdang a hawi lo hrim hrim. A bul ka thlen rual chuan nui suk hian ka bânah rawn vuanin amalah chuan min pawt ṭhu zuia, ka ṭawng hma chuan ka hmuiah chuan a rawn fâwp zui ta chata.

Keipawhin ka lo chhang ve vat bawk, a vawikhat nân nupa kan nihna ang ngeiin a ta ni tur chuan min siam zuia, na chu ti viau mah ila ka pasal a nihna angin amamawh tih sak chu ka duh ber a ni. Thawk la ham hamin ka kuah nghet sauh sauha, a tâwp lamah phei chuan na tihna ka nei tawh bik lo.

Ka thawk sa up up chu tih pângngai tumin ka thaw ham ham renga, ka sirah chuan rawn muthla in min kuah zuia. Nui sakin ka kuah bet chiala.

“A la na em?” a tihchuan ka zêp buai peihlo a la nat thu sawiin ka ner deuh saka “A lehpekah chuan ana tawh lo ang, chuan tûnah chuan insûm mai mai ka tum tawh hauhlo ania, ka ta liau liau i nih tawh hi. Kumkhuain ka bulah awm reng ang che, ka hmangaih che” a tihchuan ka hrilh lêt ve sapa.

Hun te chu liam ve zêlin ka rin ang ngeiin Damian-a chhûngte chuan min duatin engmah ka tih an phal hauh lova, college pawh ka la kal zawm ve renga. Damian-a erawh Company lamah a hun tam zâwk a hmang ta thunga, kan university a mite'n kan innei tih an hriat hlim phei kha chuan thiktu ka ngah hle a nihkha.

Nau ka pai ta bawk nên keipawh ka in dim zuala, Damian-a lah chuan nitin min vêngturin mi a ruai ziaha, College vêlah min lo tihnat duh an awm a hlau a ni ber mai.

Ka rinloh lutukin kan inneihna chu a ngheta, a sawi ang tak takin inzui rei leh rei loh hian hmangaihna dik leh diklo alo hril ber lo tih hi ka hre chiang viau mai. Kumkhat dâwn kan innei tawha, rinhlelhna tur pakhat mah ka nei ngailo, min hmangaihna chuan keimah pawh min tihlima, ka chhûngte leh ṭhian te pawhin pasal neih ka ngeih thu an sawi fo ṭhin.

“A rawn pian vat chu angai ani” tiin ka dul puar ak tawh chu a chûl heuh heuha, mipa kan nei dâwn tih kan hria a, kan chhûngte pawh an phûr viau tawh. Nu Daisy-i te ka fakna leh pakhat chu naute hming sak lamah pawh kan hnamdan ka sawi pawmin ka nute sak turah an daha, mi hausa ve si an nun hi a inngaitlâwm ka tilo theilo, hei vâng a ni ngei ang Pathian pawhin mal a sâwm em em ni.

“A rawn pian hunah a nu zâwk hi min thlahthlam mai angem?” ka tihchuan a nui haka “Ka sawi tawh kha ka nunah chuan number one zel i ni, engkimah a hmasa ber zel tur alawm i nih” a tihchuan alamah inherin ka kuah a “Ka hmangaih che” tisepin ka nui ta var vara.

I hmangaihna kha a rei tawh lam emaw, in inzui rei lam ai mah chuan kha in inhmangaihna kha a dik em? A rin tlâk em? Tihkha ngaihtuah ṭhin zâwk ang che, hmangaihna dik chuan hun rei a mamawh vek silo.

A TÂWP TA