DUHLAI ZORINPUIA CHAPTER 22 LAST

DUHLAI ZORINPUIA 

CHAPTER 

22 (LAST CHIANG TAWH E)

Ram riak turin car keng chuan kan chhuak zuia, Sawma te ho pawh bike nên an bâwr ve viau, riah kan tum tih kan sawi tâkah kha chuan an ṭhianho a rêl khâwmin rawn riah ve vek an tum a, an awm chuan a reh lo deuh ang chu. 

Mawii te nupa erawh kan car ah an chuang ve a, thâwmhnaw ken tam vak a ngailo nên kan tâwt lêm lo, mut mu erawh kan keng duhthawh viau thunga. 

Car tlân theihna chinah chuan dingin u Rinpuia chuan a hûng ṭha zuia, kan bungrua chu phawrh sap sapin bawr zet chuan kan in phura, kei erawh thawmhnaw leh bel vêl ka kenga, u Rinpuia erawhin mutbu vêl a phur thunga, kan zavai chuan tumah bâwr lo kan awm lo.

“Duati fimkhur la aw, muangchang khân kal rawh u, in in ak bawk si a, in tawlhthlu palh hlauh ange” a rawn tihchuan ka bu nghata, kawngpui aṭang hian ke a kalna tur a thui tawh lêm lova, ka huphurh lutuk lo.

Kimkima leh Sawma chu an zai pah luah luaha, a châng leh kan lo nuih leh hak ṭhin. An zaithiam lêm lo, an aw ṭial leh ṭhin chuan nuih a tiza bawk nên hah pawh a sawi theih loh, kan nui leh dar dar ṭhin. Lo kan thlen tâkah chuan mahni lo lam ṭheuh kan pan zuia, u Rinpuia nên chauh kan nih leh tâkah chuan ka ṭawng zui leh barh barha.

A ni erawhin ngawi reng hian min zuiin hnung a dâwl a, fimkhur tura min hrilh reng erawh chuan nuih a ti za lek lek. Nau ka pai hi keimah ai mahin a fimkhur zâwk in ka hria, Chutiangin kan chhiat mai mai thei bik lo tih te hi an hre ve lo a nih ka ring.

“Ka ṭha em em ang lungngai suh, ka na fe a nih loh chuan i fa hi a awm reng dawn. A pa ang maia tuarchhel a lawm a nih, bâkah tûnah chuan tetakte chiah ala nia a ngaihtuah awm loh lutuk zâwk” tiin thlam kan thlen tâkah chuan ka phur chu ka nghat vata.

U Rinpuia phur chu hlân sakin kan in rem fel zung zunga, “Tikhan lo awm la, vau kawrah sawn inbualna tur ka va siam lawk a nge, bungbêl vêl hi lo rem fel la” a tihchuan ka bu nghat nghata, chem nên a a chhuak zui vut chu ka en vang vanga, ka nui sak bawk.

Pasalṭha thawnthu ngaina a vei ṭhin tih takah Pasalṭha, ram lam mai nilo in lam thleng a sawisêl tur ka hriat loh ka nei thei chu vânnei ka inti, ka hmangaih hluah hluah bawk. Khawpui tlangvâl pawh nei ni ila u Rinpuia min duat ang aia min duat tu tur hi chu an awm bik lovang. Sum lam in min vur thûr thûr lo mahsela chêtzia a min hmangaihna leh duatna a tih lan tluka hlu a awm lova, ka thlakhlelhna hi an pung zêl zâwk a ni.

Che zung zungin bungrua chu ka rem fel mawlh mawlha, kumkhat thlam tur lek mah nise a siam ulukin a zaua, chhuar a siam thlap bawk. Kan pahnih thleng leh fian tur vêl chu rem mawlh mawlhin ka nui leh ver ver ṭhin, thingtlâng awm hi hahthlâk ka ti lova, hetia feh ve a thlai an ṭhanglian lai hmuh hi nuam ka ti bawk.

A ni pawh a rawn lêt har lo, mei ka lo chhêm na bulah chuan rawn ṭhu ve in Vangvat a kai a ni ngei ang a kekawr hlîm in a rawn hâl zuia, phâwk zetin ka lo en a, “Kan inbualna tur ah Vangvat an awm dâwn tihna em ni?” ka tih phâwk hra lai chuan a rawn nui haka.

“Kal kawngah zâwk, a kawrah chuan a awm lovang. Lungngai suh ka vêng ang che” a tihchuan ka ner nâng a, ka phûr lo ngei mai. Vangvat hi chu ka ti an ti za tlata, ka hlau lo theilo.

“Kan insiam ange, lo thawh ve i duh pawhin a zâwl laiah zêl hian lo thawk la aw” tiin a insiam zui mawlh mawlha. A bula hnathawh ve chu chak viau mah ila a phal miau loh avângin ka thlir liam ta tawpa, keipawh chu ka hnathawh thawmhnaw tura ka ken chu in bel sawk sawkin thlam bul chu ka theih ang ang chuan ka lo thlo ve a.

Buh leh sawhthing an lian tawh bawka, hmuh an nuam ngei mai. Sawhthing lah bul khat ringawt pawh pêng an tama, hetiang chuan nakumah sum a la lût leh ṭeuh dâwn tih pawh ka hria, nui var varin duat deuh chuan ka vur sauh sauha, thlaite pawh hian duat taka enkawla, biak an hria an lo ti ṭhin a, chu chu ka zir ve tawp a ni ber.

Phûr zet chuan ka thlo turh turha, keima tâwkah ka thlo zau ve viau lehnghâl. Chhûn chaw fâk a hun dâwn tâkah chuan thlam ah chhukin bai ka chhuang zuia, thlamah ke thluang diaia ṭhu in mai ang chu ka hîk malh malha. Ruah sur peih viau e tilo in vawiin chu ni a sa vura, thlifîm a rawn thaw heuh heuh bawk nên a nuamin thli tleh zawnga buh kûng kûr siau siau chu hmuh a nuamin hah a dam sawng sawng mai.

Maian chu ṭhuai sawk sawkin ka thlâk zuia, thlam piah sawntlunga bawrhsaibe(Bawrhsaiabe ti pawh an awm tho) chu lo in berul leh changkha vêl nên chuan ka veh zuia, changkha ka ngaina lutuk lo bawk nen ka lo tam lêm lo, u Rinpuia hian ei duh lo phei se chuan ka lo kher lovang.

“Pa a, chaw ei ka peih tawh e” hetia ka tih châng hian a lâwm thei riaua, kei lahin ka ko ngai meuhlo. Mi hriatah phei chuan ka ko ngailo. Mi an awmloh erawh chuan ka ko ve ziaha, kan inneihna a la reilo nên ka zak a ni ber mai.

A ni pawh a rawn chho ve nghâl maia, thlawh tur a tam êm êm tawh lova, tûn kar tluang taka kan thawk thei a nihchuan kan zo theiin ka ring.

“I va rang ve, ka nupui hi a lo che rang hle mai. Pasal te duat nachâng pawh i hria e” tiin a rawn nui lût suk suka. Ka nui ve hak ringawt, chaw ei chu siam zung zungin ka mai an bai rûnhmui(remhmui) thlâk rim nên zawng zawng chuan ka ei châk zual.

“A tui dâwn lutuk ei vat ang” tiin ka hâwp zui hlak hlaka, ka si pah hlarh hlarh bawk. Ral lêng purun(heihi khawthlang lam ṭhenkhat hian an ching ve ngai lêm lova, hrelo pawh in awm mai thei bawka purun a ni e, a tui hle bawk) chu ka ei pah hlak hlaka.

“Awi a tui zia hi, tlai ah pawh ring tlang mai ila a ṭha ang, a tui riau. Chawhmeh dang siam kher pawh a ngaih loh hi, tihian chawhmeh lo pawhin a tui thoa. Ring char char mai ang” ka tihchuan min chhâng lêm lo, keimah ka ṭawng tam em em laiin a ni erawh a ngawi ngar zela, a ṭawng ai ka ṭawng kep hi a ni ber zel.

Chaw ei kham chuan ṭhu chawlin thingpui chu ka pe leha, a lo in ve leh mai bawk. Thlam aṭang chuan lo chu kan en kuala, hmun dangah pawh feh ve an awm nuala, a khât tawkin an in au leh ṭhin. An in pawh hlawm hle tih a hriat, nui var var hian ka hawi kuala, “A nuam hle mai, tûnah chuan thingtlâng nu tak tak niin ka in ngai tawh” tiin ka pasal dâr chu ka nghêng ar ara.

Hetiang ang hi ni reng thei sela, tar theilo va u Rinpuia nên hian hlim taka awm zêl hi ka châk a ni. 

Lo chu kar khat zet kan thlawh hnuah kan ram riak pawh chu kan haw zuia, ka naute pawh an haw thla veleh tawh bawk nên a khât tawkin an rawn phone ve renga, he lama rawn zin leh vat an châk thu an sawi reng bawk.

Timothy-a pawhin Nunui chu a nei tih ka hre leha, ka ṭhiannu chu ka lawmpui bawk. Timothy-a mizia ngeih lo viau mah ila ka ṭhiannu fa paina a nih angin ka ṭhiannu tân pawh midang neih ai chuan ka duhsak zâwk bawk. Kan nun hlui chu eng pawh lo nisela tûn hun hi a pawimawh tih ka hre miau.

Hun a liam ve zela, keipawhin fanu duhawm zet mai ka hring a, a pa in a âtchilh nghal bur bawk. A hrisêl ṭha in a fing hle a, nau chak tak anih thu a mah pawm a hmutu ten an sawi fo ṭhin, u Rinpuia a chhûn hle a. A sam a kîr deuh chiat bawk nên mi lawm a hlawhin a pi leh pu lahin an duat.

A buaithlâk ber erawh u Rinpuia hian a chîk hlek pawhin a thlavang a hauh hlur bawk sia, chu chu hre ve ni âwm tak hian a pa bula a awm tawh chuan sual thiam tak hi a ni ringawt.

Nitin a ṭhang lian lai hmuha, a ṭawng zirtir a ka ṭang ṭhin chu ka ning ngai lova, ka fanu aṭang hian hringnun awmzia chu ka man chho ve zêlin ka hria. Zorinpuian hmangaihna leh dawhtheihna te, zaidam na leh hriatthiamna min neih tira, ka fanu in eng ang mihring nge ka lo niha, chhûngkua chu engtiang chiaha pawimawh nge a nih tih leh fanau kan enkawl dân in chhûngkaw nun a nghawng theih dân thlengin min hriatfiah tir thung.

“A pa a pa” kawngka rawn in hawn rualin kan fanu Zosangliani chu a pa ko chung chuan a tlân pheia, keipawhin ka pan ve nghal vat bawk. Kum hnih a ni ve tawha, ṭawng a thiam chak viau lehnghâl, a len deuh hma chu nau kan neih tuyr lovang kan ti kha a nia, u Rinpuia nên kan thutlûkna a ni. Bawihtei hnute kham lova nau nei nghal tura kan phalloh vâng a ni pakhat, ṭhenkhat fate kumkhat an tlin hma a naupai leh ṭhinte kan hmuh hian an ute khawngaihthlak zia kan hmu ve bawk nên chutiang dinhmuna kan fanu dah kan phallo a niber mai.

“Ka lalfanu chu a pa min lo hmuak a nimaw? Min lo ngai em?” tiin bawihtei biangah chuan a fawh sak zauha, a ni pawhin a lo chhâng ve vata, ṭawng zawng zawng a la thiam lo nângin a tlâng lâwn chu sawi thei tawh tak a ni.

“Ka nupui duhtak, enge ilo an?” a tihchuan pan vatin a âwmah chuan ka va bei ve a, duat zet chuan ka samah a lo chûl nghal hliau hliaua. Bawihtei pawh chu a khêk ve chûl mai “A ngai ang chiah, nilêngin kan fanu harh zet vêng hian ka tlân kuala, chuan ka ngai leh em em bawk che?” tiin ka nuih ver vera.

Mawi lutuka a rawn nui chuan ka taksa chhûng lam a fan raih raih bawk. “Zanah ka duat ang che” ka beng bula a rawn tih chuan ka nui chhuak haka, a ippui chu lâk sakin a thlai rawn hawn chu ka chhuah zuia.

Ka nu chuan min lo pui ve bawk, tûnah chuan an upa ve tawh hle a. Mahsela ka pa nên min la dampui ve reng hi kan thlamuan phah viau thung.

“Tlaiah khân engtin nge ka sawi kha?” Bawihtei kan sira mu chu ka melh zawka, “Ka in peih reng” ka tih tâkah chuan phur zet hian ka chungah a rawn innem khalh zuia “Tunah chuan naute dang nei turin in puah chah leh tawh ang hmiang, Bawihtei pawh a tlei ta viauin ka hria” a tihchuan ka nui deuh haka.

Keipawhin nau pai leh vat chu ka hnial lêm lo“I thu thu a lawm ka pasal duhtak, min châwm tu berin i inhuam tawh chuan keichu ka in peih var var e, i nupui ka ni a, i thu thu a awm tur a lawm ka nih” tiin a nghâwngah chuan ka kuah zuia.

Nui sukin mitmeng de sar sar leh hmangaihna a khat mitmenga min en leh tâkah chuan ka hmuh hmasak ber ang chiah khân alakah ka tuiral nawn leha, he KA DUHLAI ZORINPUIA lo hi chu tu mipa mah ka hmu mawi leh thei pawhin ka ring lo, vawikhat duhthlan a tâwka, vawikhat chauh he lungphu in a duhthlan hi a tâwk bawk. Engdang mah a mamawh belh lo, tu thinlung mah a mamawh belh lo bawk.

TÂWP FEL E, STORY THAR RAWN POST LEH ṬEP E