DUHLAI ZORINPUIA CHAPTER 17

DUHLAI ZORINPUIA 

CHAPTER 17

Hmangaihna chuan hma a siala, amah chauh in ngaihtuah châng a nei ṭhin. A chelh tawh a thlah phal leh tawh ngailo, chu chu hmangaihna nunrawng a nih chhan a ni. Chu hmangaihna vêk chu inpumpekna a ni a, a hmangaih hlim nân chuan a kal tir leh thei thung. Chu chu hmangaihnain  hma a sial loh zia ti lang chiangtu a ni thung, chu thil chu kan inkârah hian awm tawn thei tura ka duh a ni.

“Tun ang hian min hmangaih reng thei angem? Ka tân i awm reng thei ang tiraw?” tiin a âwmah chuan ka bei vang vanga, keimahah hlauhthâwnna a awma, ngaihṭhat lohna lian tak ka nei bawk nên ka awm a nuam theilo a ni ber mai.

“Ka kalsan dâwn lo che ka tih kha, i nu leh pa pawh lo hmuah kan ngaih kha, chuvang chuan mu phawt ang. Naktuk ah ka rawn lêng dâwn ania, nilêngin kan awm dûn ang, i nu leh pa ka hmachhawn dâwn si a, ka kianga i awm ve reng a ngai a lawm” a tihchuan ka nui haka, a zâm ve hle a niang.

Keipawh a nu leh pa ka hmuh tirh khân hetiang tho hian ka awma, ka hriatthiam pui lutuk tlat. 

“Aw le, mahse nangmah i nihna ang ang khân hmachhawn la, an ni chuan an pawm vek ang che. An iai dâwn lo che tih ka hria, i rintlâk zia an hria anga ngaihngam takin i kutah pawh min hlân theiin ka ring” tiin ka nuih ver vera.

A ni pawh a khi ve suk mai “A nih muttui aw, mangnuam tak mang la i mumangah min hmu ngei ngei dawn ania” tisupin ka chalah chuan a fâwp vang vanga, a bula awm hi chuan hun hi a tawi bik riau hian ka hre ṭhin a, ka thlakhlelh lutuk vâng nge ka hrelo, amah hi hmuh reng ka châk a ni ber hian ka hria.

“Muttui le naktûk chu hma deuhah lo kal rawh aw, kan bazar anga chuan eitur te kan lo siam ang chu” tiin a biangah chuan ka fawhsak ve vang vanga, ka bân chu ka vai zauh bawk.

A kal liam chu ka thlira, ka lungphu rang lutuk leh hlauhthâwnna ka neih tlat erawh engmah ka hrilh duhlo, ka hlauthâwng satliah a nih ka ring a. Engah mah ka ngai duh lo a ni ber mai.

Ka in chhûngah chuan lût in hmun chu ka phiat leh te te a, a pangpar min pêk chu enin ka nui var var bawk. Thil ru nimahila kan pahnih awmdân nên chuan nuam ka ti a, ka lâwm lo theilo.

Khuma ka mut fel meuh chuan a tlai tawh viau a, u Rinpuia message a lo awm leh vâng tawh mai. Chhâng lêtin ka mu zuia, tûnah chuan pasal nei turin ka in peih ve ta tak takin ka hria, mi tawn tam leh ngaihzâwng neih tam pawh hi a lo ni hauhlo tih ka hria a, thinlungin a milpui tak a tawn tawh chuan engkim a inhuam tawh ṭhin tih hi ka hre chiang ta in ka hria.

U Rinpuia nên chuan khaw ṭhenawm ah kan bazara, sa leh thlai kan lei nual bawk. Nunzuali te kan hmu ve nawlh a, enge an tih ve dawn ni. Kan haw lam chu bike pathum hian min zuia, an rawn tlân chak hle bawk. Tute nge an nih ang le? Ti a ka ngaihtuah lai chuan kan bike chu an rawn nek sawka, ka rak nghâl ṭhat mai. 

“Hrep chuan” tihlukin u Rinpuia chuan nêk lêtin a ding zui chawta, chûng ho pawh chu dingin an in khawih zui sawk sawk mai, u Rinpuia pan mai ka tum chu mipa pakhat hian min rawn panin min khawih mai a tum chu a bânah vuanin ka lo seh sak vaka, a au nghâl ṭhawt mai.

Engvanga min rawn tibuai ve ngawt nge an nih ka hrelo, u Rinpuia chu ka ngaihtuah bawk si, mipa thum in an sual rawn a nia, ka phone phawrhin mi call ka tum chiah tihah ka lu a rawn ri bura, ka mit nghal chhawk mai. 

Chutih laiin u Rinpuia khawih tu zînga pakhat chu a pum dawmin a ṭhingṭhi zui hnawka, leiah chuan a tlu tawp bawk. A thi ni ngeiin ka hria, u Rinpuian tual a that! Engmah sawi thei tawh lo chuan ka mit ka chhing zui riai riaia.

Thâwm ri nak nakah chuan mengchhuakin in chung vâr vo mai ka hmuh chuan ka awmna ka hre nghal mai bawk. “Bawihte i ṭha em?” ka nu aw ka hriat rualin thil thleng chu ka mitthla ah an rawn lang zut zuta, ka ṭhu chhuak nghal vat bawk.

U Rinpuia kha, engtin nge a awm ang “Nu khawiah nge u Rinpuia?” ti a ka nu ka en chu a hmêlah lungngai hmêl a rawn langa, chu chuan ka ngaih a ti ṭha hauh lo, u Rinpuia kha misual ho khân an that ta mai em ni? Nge, ka lu chu ka dawma.

“Bawihi hahdam takin awm phawt rawh, i ṭhianpa chu a ṭha, Police ho in stationah an kawl mêk” ka pa in a rawn tihchuan a ngaihna hrelo tak hian ka ena, u Rinpuia chu an man maw? Engvang nge ni ang? Chutah a mi khawih pa tlu lai chu ka mitthla ah a rawn lang zuia, ka mit ka chhing sawk mai.

“Ka hmu duh” ka tihlai chuan kawngka rawn inhawng in Police an rawn lang zuia, “A harh tawh maw? Mami zawh duh che kan neia, Police stationah min rawn zui lawk ta che” an tih chuan ka nu  leh pa chuan an lo phallo nghâl viaua, mahse u Rinpuia chu hmuh ngei ka duh.

A ṭha em tih hriat ka duh bawka, hlauhthâwnna ka neih tlat pawh hi tihreh ka duh a ni. Ka hnial tâk tlatah chuan ka nu leh pa ho in station lam chu kan pana, u Rinpuia chu engvanga man nge an nih? Khapa kha a thi tak tak em mi ni ang? Ka ngaihtuahna a buai nuaiha, engtia awm tur nge pawh ka hrelo.

Station kan thlen rual chuan u Rinpuia chu ka hmu zuia, Police te chuan thu an lo zâwt mawlh mawlh bawk. “I that ngei niin an sawi tlata, i ṭhiannu chu kan ko tawh a, hei an rawn thleng a lawm” ti zuiin ka lam an rawn hawia, u Rinpuia ka en chu a lo pilh ve phung mai.

A hmai te chu a duk chûr bawk nên hmuh a nuam viau lo, ka pan hnai vata.

“I ṭha em? I na lo tiraw?” tiin a kut chu ka vuana, a ni pawhin min lo vuan lêt ve vat bawk. Thil thleng mêk hi ka beisei loh lam hlir a ni a, engtia han hmachhawn tur nge pawh ka hrelo, ka hlauthâwng a Police ho in min hual khup bawk nên thla a muang lo takzet.

“Mami i ṭhianpa nêna in bei zînga pakhat kha a thi a, nang hi a thu hre tu awm chhun tur i ni a, kha buaina a tel ho erawh hrên vek an ni. Thu dik chiahin min chhâng la kan duh bawk, khapa thi lai kha i hmu em?” an tihchuan u Rinpuia chu ka en zawka.

“Engmah hlau suh, i hriat ang ang kha sawi rawh. Min ring tiraw? Hlauh tur a awm lo a nia i hmuh ang ang kha sawi la, kei hian tual ka that miah lo tih i hriat kha” a tihchuan engmah ka chiang lo, khatih hun lai khân an in bei lai tak kha ka hmu loa, khapa tlu lai zawng kha a nih kha ka hmuh chhun chu ni.

U Rinpuia chuan ka kut rawn hmer salhin “I hmuh ang ang kha sawi tawp rawh” min nuihsak chunga a rawn tihchuan ka thaw haka “Ka pu, khâng ho khân min rawn tibuai hmasaa, chuan kan bike kha an rawn su bawka, an insual zui chu a nimai. Ka chi ai lutuka, pakhat khân min rawn tibuai bawk si a, engmah chiang takin ka hre lo, mi pakhat pum dawm chunga tlu kha ka hmuh hnuhnun ber a nia, ka hnunglam aṭanga vuak ka nih avâng khân engmah ka hmu zui lo” ka tih lai chuan min vuan mêk tu kut chuan min thlah riai riaia.

A ngaihna hrelo taka ka en lai chuan a hmêlah chuan ka hriatthiam loh thil a langa, min en dânah chuan ka chungah a lâwm lo niin ka hre tlat bawk nên a ngaihna hrelo lutuk chuan ka en ringawta.

“Tlangval i that lo a ni tih fiahna tur pawh i nei tlat lo, hei i thu hre tu ber lahin engmah a hreloa, a tlu lai a hmuh thu chiah a sawia, jail tâng thei i ni tih i inhria tiraw?” Police inspector in a tih tâkah chuan u Rinpuia chu ka ena, tûnah khân u Rinpuia jail tâng turin an sawi maw?

“Ka pu a that lo ang, an in khawih lai kha ka hmu hman loa, ka lu ah vuak sak ka nih avângin engmah” ka sawi zawh hma chuan min lo pawt chata  

“Mami inthahna a ni tawh tlat, i ṭhianpa hian eng insawifiahna tur mah a neilo, buaina chawk chhuak tu nilo mah ula tualthahna a thleng tlat” a rawn tih chuan ka nu zâwk chuan min lo khap vata.

U Rinpuia min en dân mawlh chuan ka rilru a tina, tûnah hi chuan a hmelah min huatna bâk ka hmulo. Ka thusawi kha ka sawi sual em ni? Sawtianga a awm chhan saw ka hrethiam lo “Ka pu lo ding lawk teh u, hei hmeichhe pakhat hian video a nei tlat mai” tih rawn ri ah chuan kan hawi chhuak ṭhap a.

Nunzuali hmêl kan hmuh rualin keichu min rawn en zawka, a nui sak bawk. “Ka pu, keimah hian fiahna chu ka nei e, Zorina hian engmah a tisual lo, an insual lâi kha hla deuh hlek aṭangin kan hmu ve renga, video in ka la ngei bawk. Kan va pawh ngam loh avângin a ṭhiante hmuh turah thawn ka tuma, hei hi en la i hrethiam mai ang” tiin officer hnênah chuan a phone chu a pe a.

Kei erawhin ka lo en reng thung, u Rinpuia bulah chuan va kalin a va kuaha “I ṭha em? Ka ngaihtuah lutuk che a, rawn puih che duh viau mah ila keimah mai ka ni bawk si a, ka ngamlo a ni. Mahse saw thil sawn i thiam zia a tilang ngei ang” tiin a nui var vara, u Rinpuia pawh chuan a lo nuih suk bawk.

“A ṭha e, an mahni chhûngte lam pawh kan biak angai ang, tlangvâl tûnah rih chuan in haw thei ang. Mahse zawhna kan la rawn zâwt ṭhin dâwn che a nia” an tihchuan u Rinpuia pawh chuan lâwm thu lo hrilhin nu Âsangi leh Nunzuali nên chuan an chhuak zuia, kei erawhin ngaihsak ka hlawh ta hauh lo.

Ka ûm chhuak ve vata “U Rinpui ka lawm hle mai, ka lu ah an vaw bawk sia engmah ka hrelo tak tak a nia aw” ti a a bân a ka va vuan chu ka kut a lo dahsawna, chu chuan min ti hamhaih viau bawk.

“Haw ang u ka nu” tisupin a kal zui nal nala, vawikhat pawh a rawn hawi lêt tawh lo. Nunzuali chuan min rawn enin a nui saka, kei erawh ka hamhaih bawk nên han chêt sawn maina châng pawh ka hrelo, nu Âsangi chuan min rawn en zawkin “A lungawi lo deuh a nih kha, nakinah in inbe dâwn a nia haw phawt ang u” tiin an ni pawh car lam panin an kal zuia.

Sâwma te ho pawh an lo awm vek tawh a nih hmêl, u Rinpuia chu an lo buaipui zung zunga, kei erawh ka dinna ngaiah chuan ka ding renga, u Rinpuia chu ka chungah a lâwm lo tih ka hria, mahse engvang nge? Ka hriat ang ang sawi turin min ti a, ka sawi mai kha a ni si a.

Engvanga ka chunga thinrim nge a nih ka hrethiam hauh lo, engmah kha chiang takin ka hmu lo miaua.

“Bawihi kal ila” ka nu in a rawn tihchuan ka bu nghata, kan carah chuan lût in u Rinpuia te tlân chhuak mêk chu ka thlira, tinge khatianga a awm le? Keihian sawi dik loh ka nei em ni? Tihsual ka neih âwm ka hre siloa, ka thil hriat ang te ka sawi mai a ni si a.

Khua kan thlen thleng chuan ka ṭawng leh tawh lova, ka in luahah lûtin ka nu leh pa chuan an bungrua chu an dah fela, kei erawh ka rilruah u Rinpuia ringawt a awm thung. Min hua tih ka hria, ka biak ngei a ngai a ni.

“Nu u Rinpuia kha ka han hmu lawk ang” tiin an chhânna pawh nghâk tawh lêm lo chuan u Rinpuia te in lam chu ka pana, heti ringawt chuan kan awm theilo. Kan in biak ngei ngei a ngai a ni, ka laka lungawi lo in ka siam thei lo.

An in ka thlen chuan mi an lo awm nak naka, Nunzuali pawh a lo la awm bawk. Rawngbawla a lo che mêk chu ka hmuh hmaihlo “Nu khawiah nge u Rinpuia” ka tihchuan “Roomah a awm a nih kha, va lût rawh. Kha ngatinge maw ni, a rawn chhuak duhlo a ngawi reng bawk si” a tihchuan ka thaw haka.

Min lo be duh angem ka hrelo, muangchanga lût in khuma a lo mu chu ka pana, a bulah ṭhu in a hmai duk raih chu ka chûl bawk.

“U Rinpui” ka tih tâk sapah chuan rawn meng chhuakin min rawn melh nghal vuta “Ka chungah i thinrim em ni?” ka tihchuan a la ngawi renga, min chhân pawh a tum chuang lo. Chu chuan ka ṭah a ti chhuak zual, ka thaw haka, a bulah mu thla in ka kuah zuia.

“Ka lu ah an vuak avâng khân engmah ka hmu chiang theiloa, min ngaidam rawh. Ka chungah thinrim suh aw, ka nu leh pa te pawh la hmuh dun kan ngaih kha” ka ti sepa, a awmdân ah chuan enge a ngaihtuah ang ka hre theilova, min chhâng lo chuan ka ngaih a ti ṭha thei hek lo.

Ka ṭah a chhuak ut ut maia, ka thaw a ipik hluah hluah bawk. “Min ṭhen i duh em ni?” ka tih leh sapa, ka aw chu a zawi viau tawh bawk. Ka mittui chu a far fapa, hetianga min be duh lo anga a awm hian hrehawm ka ti.

“Kan tâwp hi a ṭha in ka hria, vawiinah khân engmah i hmuh loh thu tal i sawi ka ringa, ka tualthah loh thu tal i sawi ka ring a sin” a tihchuan ka lu ka thing nawk nawka.

“Nilo ka theilo ang, sawi chu ka tum alawm. Mahse engmah ka hre” a kut a rawn vai hluk avâng chuan ka ṭawng lai chu ka tawp leh data, a rawn ṭhu chhuaka. Ka biangah vuanin “En teh duati, vawiin avâng khân kan tâwp dâwn lo, keimaha ka danglam avâng zâwkin kan tâwp dâwn, tunah hian Nunzuali hi a na mêk, ka puih angai, a damlai tal hi chuan a bulah ka awm a ngai a ni” a tihchuan ka na nghal vawng vawnga.

Eng thu nge ka hriat kha? Nunzuali vâng maw? “A nih chuan i kir leh dâwn tihna em ni?” ka ti leh sapa, ka thâwk chu a rawn hara, ka kawchhûng chu a tâwt vek bawk. Hetiang hian inṭhenna thu hriat hi alo na a nimaw? Ka thu hriat tawhah a la rapthlâk berin ka hria, tûnah hian ka kehchhia a nih loh chuan ka â vek a ni ngei ang.

“Kan pahnih in kan enkawl thei mai lo em ni? Min ṭhen chu i duh takzet em? Tûnah hian ka nu leh pa chuan kan pahniha inneih an phala, an rawn kal hial a sin. Tinge chutiang thu chu i sawi theih zâwk?” ka ti leh sapa, sawi tûr ngah hle siin ka kha a chilh tlata, engmah reng reng ka sawi belh theilo.

“Min nghâk thei ang, tûnah chuan Nunzuali ka enkawl angai” a ti leh chu ka insût hraiha “I la hmangaih tiraw?” ka aw chu a chhuak che che chauh a ni, aw khuanu tinge hetianga min siam tâk? Khuanu i nunrawng mah mah a ni, inneihna thu hriat tum laia inṭhenna thu hriat chu ka tân chuan a rapthlâk mah mah a ni.

Min chhâng lo, chu chuan a ti chiang ta viau in ka hria “Ka nghâk theilo ang che, ka ring che a sin u Rinpui, kei hi engtin nge ka awm ve dâwn? Min hrilh rawh, engtin nge ka awm ve ang, kha chen ka nghâk che a sin, hlim taka kan awm tur thu min tiam a ni lo'm ni?” ka ṭap chhuak haka.

Hetiang thu inhriat hi ka beisei lo lutuka, ka â vek nimaiin ka hria, min rawn kuah betin “Duati ka tihpalh, mahse min puia, amah avâng chauha jail tâng lo ka ni bawk, min mamawh hunah ka tlânsan theilo” a tihchuan ka mittui chu a âwmah ka tat nawk nawka.

“A nih kei hi, tlai palh ta la kumkhua a inṭhen chu i duh chiah em?” ka tihchuan min namsawn deuhin chiang tak hian min rawn ena, ka mittui chu a hru faia, a mitmeng chu nilo ka en rei ngam lo. Hetiang hi ka duhlo, ka â mai dâwnin ka hria.

“Ka hrelo, min nghâk turin ka ti ngam lo che. Mahse tûnah chuan kan tâwp rih a ngai a ni, Duati min en teh” a tih pawh chuan ka en duh tawh lo, ka mit ka chhing a, hei ai hian ka kehchhe leh thei tawh dâwn em ni. Ka lung na lutuk chuan thâwk thlengin a ti harsa a, a tello a dam zolo tur ang maiin ka inhre bawk.

“Min en rawh ka tihchu” ka lu ka thing nawk nawka, “Tinge? Tinge tiang hian ka chungah i tih?” pâwna awm ten an hriat leh hriat loh tur lam ka ngaihtuah thei tawh lo, tûnah hian ka kehchhe mêk tih zawng ka hria.

“Kan thutiam te kha, kan suangtuahna vete kha engtin nge ni dâwn?” tlêm chuan ka insûm ta deuha,  min en vung vungin ka chalah a chal a rawn nghata.

“Ka tello pawhin i hlim dâwn tih ka hria a ni, keichu min theihnghilh tum rawh” ka chhâng tawh lo, khuarkhurum thûk takah ka pil vawng vawnga, ka ngaihtuahna chuan thil hrang hrang a ngaihtuah zui bawk, aw...hei bâk hian ka na leh thei tawh dâwn em ni, tûnah hian ka zung chawpa phawi ang mai hian ka awma, ka tha an bo zo bawk.

A ṭha e, kal a duh a nih chuan ka kal tir mawlh ang, a kut chu humin ka nui lui haka “A ṭha e” tiin thâwk ka la ham hama, ka ṭah chhuak chu ka insûm fan fan bawk.

“Mahse hei erawh hria la ka duh, Thla êng mawi zia i hria a, mahse a pawimawhna i hmuh hmaih thung. Hmangaihtu i duha, hmangaih tu tak erawh min  hnar thunga, lunghlu i zawnga, lunghlu tak nilo in a lem i thlanga. Ngaihsaktu i duha, ngaihsak tu che erawh i en kân a, par chhuah tum in i beia, mahsela mâwi taka i pâr theih nâna beitu hnarin, i zung chawpa phawi duh tu che i thlang leha, kumkhua a i kianga awm tura ka inhuam laiin, vawikhat pawh i kianga awm duh lo tu i thlanga, hmangaihna dik tak hlan che ka inhuam laiin, hmangaihna der hlân tu che i thlang leha, engkim hi a ṭha vek e, i hlimna ka duh ber a lawm” tiin ka nui haka.

“Beiseina pe tu che hmuh kân in i beiseina zawng zawng tihchhiatsak tu che i thlanga, hlimna pêk duh em em tu che hnarin, i mittui ti tla fo tu i thlang leha. Dawhthei taka enkawltu che tina in, hriatthiamna nei lo tu che tih hlim ila tum fo a, ih maw, hmangaihtu hlutna i hriatfiah hunah chuan a tlai tawh ang. Rawn kir leh pawh tum nila a rem tawh dâwn lo, ka theihna zawng zawng in i hmangaih nih theih nân ka beia, i thinlung neitu nihna ka chelh theih nâna ka beih naah hian ka thinlung zâwk pawh ka ti chhe ta vek a nih hi.

Ka pangpar tur nilo chu chawmin, huan danga par tur lek duat takin ka lo enkawla, a vuai a a thih mai hlauin tui in ka lo châwm hliau hliaua, tûnah chuan chu mawi taka ka par tir tum Hlîng chuan min chhun ta a nih hi” min rawn khawih mai a tum chu ka lo awm sawn hreta.

“Ka duhthusam ka neih theihloh zînga ka ui ber i ni fo ang, ka thil duh leh neih châk ber ber zînga nei tura ka beih nasat ber, ka neih theih chuang siloh tiin ka hre fo ang che a, thla a rawn ên a, arsi an rawn lan apiangin ka hmuh theih si, ka neih phâk miah lo lunghlu i ni tih ka hre leh fo bawk ang, thla êng mawi tak ka hmuh chângin i thutiam i hlen theih tâk loh kha an rawn thar leh ṭhin dawna, ka tuar chhuak thei angem ka hrelo, mahse ka na reng bik lovang” tiin ka mittui chu ka hru a.

“I duhthlanna ka zah sak ang che a, ka kaltîr ang che. Thu min tiam zawng zawng te leh kan suangtuahna zawng zawng te kha thleng tawh ngai dâwn lo mahsela, nang leh kei kan awm chhûng chuan keimah aṭangin an bo ngai lovang. Ka hriatrengna a awm chhûng chuan an bo ngai dâwn lo, i duhthlanna ka zahsak ang che hian i hlimna tur ni a i hriat lam chu pan mawlh ang che” tiin ka ding chhuaka.

En pawh ka en duh tawh lo, tûnah hian hmangaihna ka nat puia, hmangaihna avângin thinlûng thlêr awmzia dik tak ka hre ve ta. Hnawl nih nat zia te, beiseina meichher thih chian dân thlengin ka hrethiam ve ta e, pâwnlam chu ka pan hlawk hlawka.

“Hmingte enga tinge?” nu Âsangi rawn au pawh chu ka chhâwn tawh lo, tlân chhuak hlawk hlawk khawlaiah chuan ka in lam panin ka tlân a, ka in luah ka thlen rualin ka nu ṭhutthleng a lo ṭhu chu ka kuah thlawpa, ka ṭap chhuak nghâl rawih rawih mai.

“Bawihi enga tinge? Enge thleng?“ ka nu chuan a rawn ti a, min ngaihtuah tih hriat takin ka pa pawh a rawn ṭhu hnai vata, kei erawh ka ṭah chhuak lutuk chuan engmah min sawi tir theilo, ka nu kuah chung chuan ka ṭap rawih rawih ringawt.

“Nu a tâwp, in rawn kal chhan a tâwp. U Rinpuia chuan tâwp a duh a ni” tiin ka ṭah zawm leha, ka nu leh pa hawi hai hmêl chu ka hmuh hmaih lo, an mahni ang bawkin keipawh hian mak ka ti a ni, khati maia tâwpna a siam kha ka ring lova, ka beisei phalo a ni ber mai, engkim chu a reh duka, ka ṭap ri bak hriat tur a awm lo.

Reife ka ṭah hnuah ka pa chuan a aw a rawn thian kharha “Enge thil awmzia, ṭap lo khân sawi teh le. Inṭhen a duh tih chu a chianga, enge a chhan? Vawiin vâng kha em ni?” a rawn ti dam dup chu thâwk la kawkin ka mittui chu ka hru a, mahse insûm har zia chu ka taksa chu ka kân leh ak ṭhin.

Rilru natna chuan min luah mup mupa, eng ber nge tih tur ka hrelo a ni ber mai. Ka na a, ka ngaihtuahna a bing chûk chûk mai bawk, hetiang khawpa hmangaihna avânga ka nat hi ka ring ngai lo, u Rinpuia thusawi te kha ka bengah chuan an rinawn tluk tluk mai bawk.

“Bawihi ngawi tlat lo khân sawi teh, kan hriat ve theih nân, i ngawih reng chuan i pa nên chêt lâk dân tur kan thiam dâwn hauhlo ania” ka nu chuan a rawn tileha, keipawh in fuihin ka insûm a, chutah u Rinpuia thusawite ka hrilh chuan an ngawi ran a, an rilru ah enge awm ka hre lo.

Kei erawh ka thusawi pah te chuan ka tâwt ṭûna, sawi chhuah harsa ka ti tak zet bawk. Hetiang maia tâwp tur hian suangtuahna ka nei ngailo a sin, ngaihtuah pawh ka ngaihtuah pha hek lo, ka beisei loh lam aṭangin an rawn thleng mawp mawpa. Nimina khawvela hmeichhe hlim ber kha vawiinah chuan khawvêla hmeichhe vanduai ber ka ni a, thâwk leh khata engkim danglam chuan min ṭhawng nawn awn awn a ni ber mai.

“A nu leh pa pawh kan han bia anga, kan rualin lêt la a ṭha ang, heta awm reng chu a ṭha lo” ka pa chuan a rawn ti a, chutiang lam chu ka lo la ngaihtuah hauh lova. U Rinpuia hlat takah ka awm tawh dâwn tih ka hriatna chuan min ti hnîm rawih thei, “Lo insiam la naktûkah kan lêt nghal ang, heta i awm reng chuan i na mai mai dawn, zanin chu kan riak ang, rawngbawl vat ila zânah i nu nên kan han kal ange” tiin ka pa chuan ro a rêl zung zunga.

A hnial theih dâwn loh tih ka hria, thutlûkna a siam tawha. A sawhsawn dâwn lo tih ka hre bawk, ka nu nên chuan ka chawhmeh lei ang ang chu kan siama, kan sa lei pawh kha khawiah nge an awm pawh ka hre tawh lo, engmah ngaihtuahna fim ka hmang thei meuhlo, ka vai ruaia ka ṭah a chhuak em em reng bawk.

Hmalam hun ka lo suangtuah zawng zawng te chu thâwk leh khatah vawm bovin an awma, duhthusam ka lo neih ṭhin te pawh an bo ta veka, tûnah chuan natna leh hrilhhaina chiah ka chan an ni ta thunga.

Hriatthiam har ka ti a, hlimna ka duhsak rualin ka telloa a hlim tur erawh chuan min ti na em em thung.

Ka nu leh pa chu an sawi ang ngeiin chaw eikham rualin an chhuaka, kei erawh tumah an awm tâk lohah chuan tukverhah dâk chhuakin vanlam chu ka thlira, mittui tla zung zungin thla chu ka thlir ngar ngar bawk.

Thâwk harsa ka ti a, au chhuah châk si thei bawk silo in keimah ka in hnawh tawnga, ka hnang lek lek bawk. Mumang ni se ka ti a, a tello a nun hmang turin ka in dah chhin ngam lo, mahse a tello-a ka nun erawh a ngai tawh dâwn si.

Mi tam takin an tawrhna ka lo hrethiam ngai lova, tûnah chuan ka hrethiam ta in ka hria. Ana a, hliam nei silo in taksa chhûngah hian an na ngut nguta, thâwk a saka. Dam chhuak lo mai tur anga inhriatna ka nei bawk.

Mitthla ah nunhlui a rawn lang zut zuta, nimin mai a ka ta kha zaninah erawh hmelhriatloh a ni a. Nimin maia ka hlimpui kha vawiinah chuan ka ṭah puia, nimina suangtuahna ka din pui kha vawiinah chuan natna nên ka thlir liama, khuanu hi a nunrawng ve hrim hrim nge ka hlim hi a phal lo ti a inzawh loh theihlohin ka chunga a chêt dân hi a nunrawng mah mah tlat si.

“Hei hi kan thawnthu tâwp theilo tur, zawmna awm tawh lo tur si chu em ni ni ang? Nge ni a, kan bul ṭan na chauh zawk? Hei erawh engtiang pawhin i lak aṭang in kal hla mah ila maw, i rim ka hnara châm reng tawh tur te, i aw ri ka benga ri nawn fo tur te leh, i sakhmel leh hlimthlâ ka mitthla aṭanga reh thei ngailo tur avâng hian ka na nawn fo reng dawn a, na chung si a tuar angai tur erawh ka tuar chhuak thei angem ka hrelo, Zorinpui hetiang kher lo hian min thlah theilo em ni? Khuanu leh nang hi ka nunah chuan mi nunrawng ber in ni” tiin ka phun sep sepa.

“Khuanu khian intawng turin min duha, awmdun tur erawh chuan min duh lo a nih ber hi, in hmangaih turin min duha, kan inhmangaih tak tak erawh a phal lo a nia nge, min hmangaih lo ka ti phalloa, mahse i tân khân ka lo tling lo êm a ni tiraw? I hmangaih hmasa ber chu theihnghilh a har a ni tiraw? Ka dem lo che, tumahin an hmangaih hmasa ber an theihnghilh thei lo, nang chuan ani kha i hmangaiha, keiin nang ka hmangaih che a, mi pathumin hmangaihna in chuhin keichu ka chak zo ta lo a” tiin ka ṭap khûr dar dara.

Hetiang bâk hian ka na leh thei chuang dâwn em ni?  Hmangaihna chuan a tâwpah chuan min hliam ve ta e, tâwpna hlimawm ka lo beisei ṭhin chu a thleng mai dawn emaw ka tihlaiin tâwpna lungchhiatthlâk zâwk in rawn luah lan in hneh theih rual lohin a liam pui ta vang vang mai si a.

A lo kîr tawh dâwn lo, a ni kha a lo kîr tawh dâwn lo. Chu thu ringawt chu ka bengah a rinawn tluk tluka, ka lu chu dawmin ka au ta vak bawk.

“Duati“ chu aw te chu hriat tawh loh ka duh, chu thil chu ka tân chuan khawvêla ka tâna aw hriat hrehawm ber a ni tawh. Kawngka chu a rawn ri dawt dawt renga, ngaihtuahna mai a nilo tih hriat takin Zorinpuia chu ka hmaah a rawn lang zui ta bawk.

Enge a rawn tih dâwn? Tûnah hian enge rawn tih a tum? “Min rawn hnaih suh“ ka aw chu hrelo ang mai chuan min rawn kuaha, aw Lalpa tinge ka hmaah a rawn lan leh “Hetiang hian awm suh aw, engkim hi i hriatthiam angai, hetiang hian ka hmu duh lo che. Hmeichhe chak tak i ni tih ka hria, ka tello in awm tum rawh” a thusawi zawh rual chuan a âwmah chuan ka chum dawt dawta.

Engtin mah min tih tumlo in min kuah bet tlata, chu chuan ka thaw a tipik zual “Aih nangmah ka duh, hetiang hian awm lo ang aw u Rinpui, ka tihpalh. I lungdum lohna ka neih chuan sawi rawh ka insiam ṭha vek ang, engtin nge hre reng chung che a hmalam ka pan theih ang, min kalsan suh. I tello in ka awm thei lo ang” mittui luang zung zungin ka ena.

Hmangaihna hian mi a lo va ti tlâwm thei ngai êm, nêp min ti mahse ka pawi ti tawh lo. Tûnah chuan nêp min tihna aiin min kalsan ka hlauhna hi a nasa zâwk.

“Duati“ a rawn ti leh chu lu thing nawk nawk in ka ena “Engtin nge kan duhthusamte kha, pakhat mah kan la tihman hleinem, hetiang chuan awm lo ang aw. Kan suangtuahna zawng zawng te kha kan la ti hleinem, ih ti hian tlânbo mai ang, min kalsan ka phallo“ ka ṭap leh haka.

Ka chalah rawn fâwp vang vangin “Kan theilo, Nunzualin min mamawh, nang chuan engkim ila nei, a ni chuan a nei ve tawh lo. Nang chuan i tuar chhuak thei dâwn tih ka hria, ka kal a ngai, min theihnghilh tum la hmalam pan rawh” a thawh chhuah tum chu nghet lutukin ka kuaha, ka na vawng vawnga, tih theih ka neilo lutuk chuan min ti ipik ṭûn bawk.

“Min kalsan suh, i nui hmel leh i thusawi zawng zawng te, ka tâna i tih zawng zawng te kha. Ka taksa leh ka hriatna zawng zawnga i sûlhnu awm chung hian engtin nge hmalam ka pan theih ang, min lainatna i nei ve miah lo em ni?” tiin mittui nên ka ena, tlâwm ka in ti a, â ka in ti bawk. 

Min hnar ṭang ṭang tu ka ûmzui reng pawh hi ka tlâwm tawh a nia, mahse min kalsan turin ka phal tlat silo.

Chutah min rawn kuahin a tâwp nân ni awm mai hian min rawn fâwp a, ka mittui hru in “Keiai ṭha i phu, hlim takin awm rawh. Dam takin, min theihnghilh ang che ka tih tawh kha” tisupin ka kuahna chu a thlaha, vawikhat pawh a rawn hawi lêt tawh lo.

Pâwnah chuan ûm chhuakin a kutah chuan ka va vuana “U Rinpui” a thaw hâwk a, heti mai a a kal ka phallo, tâwpna hlimawm lo siam tur hian ngaihtuahna ka la sêng chhin ngai lova, ka kianga awm reng turin ka duh.

“Min hmangaih tawh lo tak tak ang maw? Chuan ilo kîr tawh miah lo tak tak angem? Tûna min kalsan a nih chuan keichu ka lo kîr tawh dâwn miahlo a nia aw, khuareiah i inchhir miah dâwn lo tih sawi la, tûna na taka min hliam ang hian nakinah i nat hunah lo kîr i tum miah lo ang maw? Kei min kalsan avânga i hlim dâwn a nih chuan ka kal tir ang che, a hma a i awm ang khân i awm tawh lovang tih min tiam la ka kal tir ang che” ka tihsap chuan a rawn inher ruai ruaia.

“Ka thei ang,i hlimna kha ka ngai pawimawh zawk tih hria ang che. Khawlaia min hmuh pawhin min hre lo angin awm la, keipawhin i nat thar lehna tur thil tih ka tum dawn lo, Nunzuali ka enkawl angai ka tih tawh kha. Ka hmeichhe tawn tawhah i la danglam ber ka tih fo kha a ngai reng, i puitlin zia pawh ka hre bawk, keichu kum a liam anga min theihnghilh thuai mai ang. Kan la inkâwm reng thei a lawm” a tihchuan za lo takin ka ṭhen saka.

Tûn hi a tâwpna a sin, u Rinpui min hmu tawh dâwn lo, engtikah mah min hmu tawh lovang. Keichu ka bo tawh dâwn rilru chuan a ti mawlh mawlha, he khuaah ka awm a la ringa, mahse keichu naktukah mai hian ka haw tawh anga, ka lêt leh tawh lovang, hei hi kan in mangṭha hlenna tur chu a ni tawh, one side love an tih chu hei ngei hi a lo nih dâwn hi, tûnah chuan ka hmangaih chu a kala, engtikah mah kan awm dûn leh thei tawh hek lovang, reilote atâna kan sûlhnu erawhin kumkhua a daih tawh anga, koh kir châk leh mittui nên ka la ngai fo ang, mahse tûnah chuan ka chelh reng châk rose par chu a hlîng a zum ta lutuka, ka chelh zo ta ngang lo a ni.

“Reilote ka kuah thei che angem?” ka ti sapa, amah chu ka hnaih nghâl bawk. Heti maia kal tir tur chuan kumkhua in ka tawng tawh dâwn silova, mangṭha tih tal chu ka sawi ve thei tawh mahna.

Engmah a sawi hma chuan ka kuaha, a âwm hlim tak leh thlamuang taka ka lo bei ṭhinna chu tûnah chuan mittui nên ka nghen a ngai tawha, a pangtilum te pawh a tâwp nân tak tak ka nghêng tawh dâwn tih hre rengin ka duhâm hle bawk.

“Mangṭha aw, hlim takin awm la. A hma anga awm tawh lovin hlimna nên i nun hmang ang che, kei ang erawh chuan tu thinlung mah tih kehsawm sak tawh suh aw, i hlim ka duha, ka kal tir ang che. Lungngaia i awm ka hlaua, keiin duat taka ka enkawl hi miin an tihnat chuan ka kal tir man che a awm dâwn lo tihna a nia, i sawi ang in theihnghilh ka tum ang che. Ka thei kher angem ka hrelo, mahse kan khawvel pawh hran i duha, kan suangtuahna i thâmral tira, kan duhthusam i liampuia, khâng zawng zawng te khân keinen chuan engtikah mah a thleng tawh lovang, dam takin mangṭha le” tiin ka thlah zui riai riaia, a hmel pawh en duh tawh lo in in chhûngah chuan ka lût zuia.

A kal mai lo nge a pên thâwm ka hreloa, keipawhin thâwm ka chhuah bik heklo, rei vak lo hnuah a pên ri ka hria a, chu chuan ka in luah chu a hlat tial tial bawk. Tûnah chuan pên sâwm mai nilo mual tam takin min daidan tawh anga, engtikah mah kan inhmu leh tawh lovang.

Helaiah ka la awm a ring tih ka hria a, mahse a ni silo. Keichu ka liam anga, ka duhthusam leh suangtuahna neih te ngaihtuah lêt chungin ka la na fo dâwn a, ka mipa hmangaih hmasa ber nêna kan sulhnu hi a bo mai ka phal hek lo ang, engtikah emaw chuan hlim takin ka la hmachhawn thei mahna.

A fa neih hnu emaw a upat tawh hnu ah pawh a nimai thei, kei erawhin amah hre reng chunga hmalam pan harsa ka tih tur zia ka hre thung.

Ka nu leh pa chu an rawn lêt a, an hmêlah engmah a lang lo bawk. Kei erawh ka ṭhut ngai reng chuan ka la ṭhu a, insiam pawh ka la insiam hek lo, ka nu chu ka bulah rawn kalin min rawn kuaha.

“Bawihi i nu nên khân insiam rawh u, i bungraw dang chu nidangah i inluahna pa in a rawn thawn mai ang, Motor kan tir chho anga” ka pa in a rawn tihchuan ka bu nghata, ka nu nên chuan room-ah lûtin ka thawmhnaw vêl chu kan siam mawlh mawlh a.

Ka thawmhnaw thun phah chuan ka mittui chu ka hru leh zauh ṭhin, ṭah loh tum mah ila ka ngaihtuahna a chhuahsan theiloa, ka mittui chu ka hriat loh karin an rawn tla a ni ber mai. 

“In zawh rualin mu ila zîngah kan chhuak dawn a nia” a tihchuan ka bu nghata “Nu pâwnah ka va kal lawk aw” tiin ka chhuak zuia, ramhnuai chu pan hlawk hlawkin ka thlen rual chuan leiah ka ṭhu thla hnawka. Ka ṭap leh nghal zawih zawiha, ka vanduai lutuk nge ka vânnei zâwk pawh ka hre thiam tawh lo.

“U Rinpui ka tello in i awm theia, mahse kei ve hi engtin nge ni ve ang le. Engtin nge i sûlhnu leh i hmêl ka mitthla a châm reng chung hian hmalam ka pan ve tâk ang, theihnghilh i har dâwn a nih hi tiraw?” ka ṭap chhuak hawk a, ka âwm chu ka chûm dawp dawp bawk.

Duat taka ka sam a chûl lai te, ka bulah titi a a duhthusam a sawi ve bul bul ṭhin te, a nupui ka nih huna min duat dân tur te, hmalam hun kan suangtuah zawng zawng te kha ngaihtuahnaah a rawn thara, ka hrawk te chu ana urh tawhin ka hria.

Ka phone rawn ri chu ka en zawka, Mawii tih ka hmuh chuan ka la nghal vat bawk “Zo i ṭha em? Chanchin ka lo hria a, kan Nunzaktheiloi vâng bawk maw? Khawiah nge i awm? Ka lo kal ang” a tihchuan ka aw ka thian kharha.

“Ka in piah ramhnuaiah khân ka awm” ka tihchuan a rawn kal tur thu sawiin phone chu a dah zuia, lei lam bih ngar ngar chuan phun sep sepin ka mittui chu hruk sên rual lohin a tla a, in tih thinrim avânga inṭhen chu ni ila ka tuar thei mai ang.

Mahsela kan inṭhen dân hian min ṭhawng dawt dawta, hmachhawn dân tur ka thiam lo. Engkim hi a rawn thleng phut phuta, ka beisei loh lamah engkim hi a kal nimaiin ka hria, “Zorinpui tinge ka lo tawn kher che le, tinge min ngaihtuah miahlo a hetia tâwpna i siam? Kan inhmu tawh dâwn lo a sin, engtin nge hmalam ka pan ve tawh ang?” ka ṭap leh hlawp hlawpa, tûna ka in ṭah thâwl loh chuan hrehawm ti takin ka awm dâwn tih ka hria.

“Zo” Mawii aw ka hriat rual in ka bulah a rawn ṭhu thla a, min kuah nghâl bawk. “Tinge hetah i awm? U Rinpuia chu ava timak em em ve, ka feh ka rawn haw ah Fakan thil awmzia min hrilha, an ni pawh an ṭhawng aniang u Rinpuia te in lamah an kal a” a tihchuan ka nui haka.

“Engkim a tâwp tawh, awmzia a awm tawh lo ang. Kei leh a ni chu kan tâwp tawh” tiin Mawii kuah chuan ka ṭap khûr leh dar dara “Ṭap rawh, ṭap vak la i zân phah zâwk ang, kan natna kan up beh reng hian keimahni kan hrehawm mai mai a nia, engkim a ṭha leh vat mai ang” a tihchuan lu ka thing nawk nawka.

“Mawi ka haw dawn, naktuk zîngah kan haw ang. Ka nu leh pa in ka awm an phal tawh lo a, ka haw tawh dâwn.  Nang nên pawh kan inhmu tawh lo mai thei, u Rinpuia chu hrilh miah suh aw, ka haw hunah a hriat hun hunah hre rawh se, a mah ngeiin tâwpna siam a duha, ka dang theilo. Keichu a tân ka pawimawh ve loh zia ka hre tawha, ka inthiarfihlim pawh hi a ṭha, ka hmuh reng chuan ka tân ka natna tur vek tih i hria tiraw? Ka ngai ngawt ang che” tiin ka phun sapa.

“Tinge i haw leh daihin kawm tur ka nei tawh nâng, hrilh tur che ka ngah a sin” a tihchuan ka nuih saka “Phone aṭangin kan la in be thei a lawm, i tân i mamawh hunah ka awm reng ang” ka tihchuan a rawn ṭah nuih haka “Nunzuali avâng vêk, ka haw e. U Rinpuia chu ala châk lo viau ang, nakinah pawh kîr duh tawh miah suh aw, zanin chu ka riah pui ang che, ka nute chu ka hrilh mai ang. Naktûkah i haw tawh dâwn sia ka thlah pah che a nimai” a tihchuan ka hnial lêm lo.

Ka in luah lamah chuan in zui pheiin ka nu leh pa nên chuan ka in hmelhriattir a, an ni pawh chuan an lo be nghal bawrh bawrh mai, mut mai an tih tawh avângin ka nu leh pa chu chhuatah an mu a, kei leh Mawii erawh ka roomah kan mu thung, kan titi dun mawlh mawlha, min huat pui zia ka hmuh chuan ka nui leh hak ṭhin.

“Nunzuali chu a nat tak tak pawh ka ringlo, an chhuanlam mai mai a niang, mipa hi chu hmangaihtu pawh an hreloa, an hmangaih an thlanga, an tisual leha, hmeichhe dang rinawmloh chhuahin min chhuah leh a, nakinah a rawn inchhîr leh tho ang, kîr tawh miah suh” a tihchuan ka nuih ringawta.

“Ka haw phawt anga, engkim chu a ṭha leh vat turah ka ngai, ka hlauh ber erawh a tisual leh anga, ahma aia na in a awm ang tih ka hlau a ni. Tu emaw in na takin an hliam leh anga, a hringnun hrehawm takin a awm ang tih ka hlau” tiin ka phun sapa, tûnah chuan ka ṭah pawh a chhuak tawh lo.

Ka hun tawn mêk chu mumang ang mai ni hian ka hria a, hriatthiam phâk khawpin engkim hi a thleng zut zut nimai hian ka hria a, u Rinpuia ka ngaihtuaha. A zia nên a in mil hlawl lo niin ka hre bawk, reilote mah nise ka tân chuan a ni tluka hmangaih kha ka nei leh thei tawh lovang, ka pêk ve theih loh hlimna tak tak chu tu emaw chuan lo pe mawlh rawh se.

“A thlan sual chuan a tawrh tur a ni tawh a lawm, nangin i kalsan pawh a niloa, a duh thu ngeiin a kal a lawm. Niminah buaina in tâwk tih ka lo hria a, kha vâng te kha a ni lo maw? Eng pawh chu nise han haw phawt la, khuanu'n a ruat cheu a nih chuan in la intawng leh mai thei a sin” a tihchuan ka nui saka.

Ka beisei ngam tawhlo, khuanu hian min in tawn tir in ka ringlo. A chhan chu kan chunga a chêt dân hi a nunrawng a, hriatthiam a har bawk, intawng leh pawh ni ila na leh tur chuan tawn tawh loh ka duh zâwk.

“Engtikah emaw chuan kan la in tawng leh mahna, mahsela tûnah rih chuan a duhthlanna zahsakin ka kal tir ang, ka theihnghilh ngai dâwn lova, mahse a ni nên a kan thawnthu kha hriatreng erawh ka tum tawh dâwn lo, min lo en sak ṭhin rawh aw, a damloh chuan ka ai ilo va enkawl anga, a harsatna tawh hunah khawngaihin Sawma te ho nên min lo buaipui sak ru aw, a chanchin erawh hriat ka duh dâwn lova, khawngaihin chu chu min hriatsak dâwn a nia, a chanchin ka hriat reng chuan ka na rei lutuk palh ang” tiin ka phun sap sapa.

“I haw kher a ngai em ni? I awm loh chuan ka khua a har dâwn e” a rawn ti sapa, keipawh in chu chu ka ngaihtuah chiah bawk. Kan inkawmna a la reilo, mahse keichuan ka ṭhianṭha tak tak angah ka ngaia, ka unaunu ang maiin ka en bawk.

“Ka pa hian a ti tlata, ka rawn zin zeuh zeuh ṭhin ang, engtikah emaw kan la inhmu leh ngeiin ka ring, i pasal neih hun angah te pawh” ka tihchuan kan nui dûn hak haka, zin erawh ka tum tawh hauh loa, mahse Mawiin pasal a nei te a nih chuan kal ngei ngei ka tum thung.

“Aaa tûn bul kan ṭan ve chauh a lawm, ka la hrilh lo tak ang che. Fakan min duhthu a sawia, a tîrah chuan mak ka ti lutuk, kan in hnial reng bawk si a, mahse maw mak leh zual chu” tiin a nui pat pata, a lâi deuh tih ka hria.

“Bialpa kha Mk-a nên kan inṭhen hnu kha chuan ka nei tawh lovang ka tia, mahse hei rinloh leh tum ai hma in ka nei leh si a nih hi, Faka hi ka hre biklo, ka ngei viau emaw ka tia, mahse min han bem chiah kha chu maw keimah hi ka danglam veka, ka sawi fiah thiam miahloh hlimna ka nei tlat kha mak ka inti, a danglam ka ti tawp. A mah hi, khatia a vin pûng pûng ang kha a nilo, min ngaihsakin min duat thiam lutuk” a tihchuan ka lo nuih pui ve a.

Ka lawmpui viau bawk, chutia hmalam an pan dûn thei a nihchuan a ai ṭha a awm lo, Faka lah a hmêlṭha in mipa fel tak a ni a, Mawii pawh a enkawl thiam viauin ka ring, mipa thinchhe deuh hian bialnu te an duat thiam an ti lehnghâl, “Faka chu a fel a lawm, star tu pawh ka hre ve nual a nia aw, kumkhat êm pawh ka awm hma in kan inkâwm nasa sia, amah avânga ngei tu ka nei ve hial ania, a ṭha lutuk alawm, nang ni chu inkawp reng rawh u” ka ti a.

Ka lawmpui tak tak bawk, chutih rual erawh in an ni pahnih inkawp rualin kei leh ka hmangaih erawh kan inṭhen a ṭul a, ka chelh tumna zawng zawng in awmzia a neilo a nih kha.

“Ka hrelo le, kan nihna pawh a la reilo, zânah a rawn lêng ṭhin a, tui ka tlâk hnu aṭang kha chuan ka en dân pawh kha a dang tawh hrim hrima, amah awm lo se ka thi ngei ang tih kha ka hria a, ka tui hâk rawn harh chhuaha a hmêl ka hmuh aṭang khân ka dang vek tawh, tak takin tûn kan ni ve ṭan dâwn chauha u Rinpuia nên in inṭhen hi pawi ka ti e, ṭhianhoa lên te a châkawm a sin le” a ti leh sapa.

Min tuar pui ve tak tak tih pawh ka hria “Mawi Pathian ruatah kan ngaih mai angai a nih hi, ka sawi kha aw min lo enkawl sak la, a hrisêl ṭhat a a hlim chuan keichu ka ṭha, ka hmuh phâk a a awm lo tur erawh in min ti hnîm ruih thunga, Nunzualin a tihnat leh loh nân min lo vên sak dâwn ania, a ṭhiante in ni a, nang ni lakah chuan engmah a zêp tehchîam dâwn loa, chuvang tak chuan min lo enkawl sak dâwn a nia, ka sawi ang khân a chanchin erawh hriat zawm ka duh loa, a ṭha a nihchuan chu chu ka tân a tâwk lutuk dâwn, muhil tawh ang, zîngah kan chhuak hma dâwn sia” tiin ka insiam rem sat sata.

A ni pawh rei meng lo in a muhila, kei erawh ka muhil thei lo chiang hle. A teddy bear min lei chu ka ena, ka khawih neuh neuh bawk, he thil min leina pawh kha a la reilo a, hlim taka ka thil dâwn kha tûnah ka ṭahpui ang tih rin ngaihna pawh ka hrelo, Teddy bear mai mai pawh chuan ka mittui a ko chhuak leh zung zunga.

Mutthilh theih ka inrin loh avângin ka tum buai lo law law bawka, “U Rinpui, min ngaihtuah ve angem le? Naktûkah ka haw dawn a sin, engmah i hrelo ang tiraw? Hria pawh nila min rawn ngaihven tawh hauh lovang, tinge hetianga tawp leh mai tur si a bul kha min lo ṭanpui le, ka ngai che. Ka ngai lutuk che, zân dangah chuan i rawn kal ziaha, zanin erawh i reh vawng vawnga, kumkhua a hmu tawh lo tur che a ka indah ringawt pawh hian ka na ngawih ngawih a nih hi” Teddy bear chu pawmin a hmul nem thepah chuan ka hmai ka phûm a, Mawii tih harh hlau tak chuan ka ṭap khûr dar dar bawk.

Hetiang khawpa hrehawm tawrh hi ka neih ka ring ngai lova, hetiang khawpa ka natpui tur hi tawn ka in ring ngai lo bawk. Engpawh hmachhawn thei turin ka chak tâwk kha ka lo inti ṭhin a, mahse hmangaihna meuh chu ka beisei phâk bakin a lo na a, a nunrawng bawk. Tawrh chhuah mai mai chi pawh a nilo, chhûngril lam thlengin a na a, taksa hliam ai chuan thinlung hliam a dam har zâwk tih chu ka hrechiang ta viau mai.

Khua a rawn vâr ṭan dêt dêt ah chuan tho chhuakin tukverh lam chu ka hawi vang vanga, thla lah chu de kalhin arsi an lang de sep sep bawka, a mawi takzet. Khing hming chhâl meuh khian thu min tiam a nih kha, khâng te erawh tawnmangah pawh ka tawn duh tawh loh tur vek an ni. Khâng thutiam tu kha a awm tawh lova, a thutiam hriatpui tu erawh nghet takin an la awm thung.

Ka nute thâwm ka hriat tâkah chuan ka tho chhuaka, Mawii pawh a rawn harh ve nghal bawk nên pâwnlamah chuan kan inzui chhuaka, kan bungraw hawn theih ang ang chu kan carah chuan dah lûtin Mawii nên chuan kan in kuah vang vanga.

“Lo biak fo che ka tum ang, ka lâwm e he khua ka awm chhûnga ka chunga i ṭhatna kha ka theihnghilh ngai lovang, ka thu chah mawlh kha aw. Ani kha min lo enkawl sak dâwn ania” tiin a bengbulah chuan ka phun sapa, a ti ngei dawn tih ka hria a, a tâwp nân ka in luah tereuhte mai, tu dang mah ngai lova hlim taka a ni nêna kan lo nuih dun na ṭhin chu ka en vang vanga, tûnah chuan in ruak mai a ni leh dâwn ta e.

Sâwma te ho pawh engmah ka hrilh duh lova, u Rinpuia nêna kan inkar erawh an hriat tawh ka ring thung, an ni pawh ka ngai dâwn takzet. Hmalam hun kan suangtuah nasaa, tih tum kan nei nual a nihkha, kei erawh ka tel ve thei dâwn ta silo, Mawii chu mangṭha in car ah chuan ka ṭhu lût zuia, ka pa leh ka nu erawh a hma ah ṭhu in ka pa chuan car chu a khalha, kei erawh a hnungah keimahin ka ṭhu thung.

Kan tlân chhuah rual chuan Mawii nên chuan kan in vai lauh lauha, u Rinpuia te in kan tlân pelh lai chuan an la tho lo tih hriat takin kawng a la inkhâr ṭhiap a “Mangṭha aw ka hmangaih, hlim takin awm la. Fa duhawm leh ṭha tak tak nei turin ka duhsakna sâng ber ka hlân a che, i hma hunah hlimna in hmuak che sela, ka pêk theih loh che  leh ka neih theihloh thil zawng zawng kha i hmangaih hnên aṭang chuan hmu mawlh ang che” ti a phun sapin a lan theih chhûng chu ka thlira.

Saw inah sâwn ka ngaihtuahna leh suangtuahna zawng zawng hnutchhiah niin, ka hlimna leh lâwmna pawh ka hnutchhiat tela, hlim tak leh phûr taka ka luhna khua chu mittui leh thinlung kehchhe chungin ka chhuahsan ta thung a.

A khaw in ding te chu melh kualin khaw pâwna hmun mawi tak tak leh kan thingphurh dunna te chu ka thlir kuala, engkim chu natna vek an ni a, rilru tina tur thil chauh lo chu hmuh ka neilo.

Khua a lan theih tâk lohah chuan car tukverh ah chuan dâk chhuakin ear phone chuan hla ka ngaithla a, ka hla ngaihthlâk te chen chuan mittui ti tla tu vek, hla phuahtu in mitin ngaihthlâk theih tur hla mawi leh ril a ziak chhuaka, a ngaithla tu in mittui leh suangtuahna tam tak nên a ngaithla thung.

Hla phuahtute lo ril zia ka hriat chhuah phah bawk, holam mai maia kan lo ngaih thil te kha an ni chuan tu tân pawha suangtuah theih tûrin an ngaihtuahna hmangin an thai kuala, a ngaithla tu te'n mâwi ti takin kan lo ngaithla ṭhin, eng hla pawh mahni dinhmun nêna ngaihthlâk chuan mawi lo rêng rêng a lo awm lo.

Mawimawian KAN TÂNA RUAT A NI SI tih hla a sak ngei chu ka ngaithla a, a châng tin chu mittui ti tla tu vek a ni a, hetiang khawp hian he hla hi ka ṭahpui nasa ang tih ka ring phalo. Keimahni ah ka châna, a châng tin chuan keimah ni ang mai a nun chu a en tir nimaiin ka hria, thâwk a tâwt up upa, ka nu leh pa hriat hlau si insûm thei silo chuan ka ṭap zawih zawih renga.

Ni e a thu min hrilh  hnuhnung ber khân thinlung chhûng a fana, bengah a ri nawn tluk tluka. Thluakin a sawi nawn leh âwn âwn ṭhin, hun hi her danglam thei ila chuan keipawhin ani nêna bul ṭana, a hmangaih hmasa ber nih kha ka duha, kalsan ve lova a kianga awm tlat ka duha, mahse engtikah mah ka nei ve thei ngai dâwn lo.

Khuanu hi a nunrawng tak tak anih hi, kan duhthusam zawng zawngte kha engtin nge an awm ve tâk ang tih pawh ka ngaihtuah thiam tawh lova, an thâmral hlen ang nge an rawn kîr leh ang? Chu erawh beiseina ti beidawng zual tura khuanu ngaihtuahna min pêk bawk, khuanu, khuanu rilru tina êm êm siin a mah bawk koh a ngai leh ṭhin si.

Car seat ah chuan ka tukkhum chu nghatin ka mit ka chhinga, a rimte a aw te kha tûnah ngei pawh hian ka hria in ka hnar ah a châma, ka bengah hian an la ri tluk tluk bawk. A âwm a bei ang maiin ka la in ngaia, chu erawh suangtuah tu mâwl berin a duhthusam a suangtuah hnuhnung ber mai chauh a ni.

“Bawihi ei châk i nei em?” ka nu in a rawn tihchuan ka lu ka lo thing maia, engmah ei châk ka neilo. Tûnah chuan mi pakhat chiah mamawh ka nei, chu chu amah ka DUHLAI ZORINPUIA ngei kha, helai hmunah hian awm ve se ka duh a ni.

A ni chu Chhimbâl angin a thâmrala, kan duhthusam leh suangtuahna te pawh a mah a thâmral rual khân an thâmrala, ka suangtuahna zawng zawng a kal bopui bawk. Ka nunah chhûm ang maiin a rawn langa, muangchanga rawn lêng delh delh in ka taksa pêng tinah a zâm darh vela, ka nun khawhar tak leh ro tak mai kha a ruahtuiin a rawn châwm a, mahse chhûm chu rei tak an rawn lang ngai lova, chutiang chiah chuan reilo chhûng in ka khawih theihloh leh hmuh theih lohvin a thâmral a. Reilote chhûnga a sulhnu erawh ka theihnghilh tawh ngai dâwn lo.

Aizawl kan thlen lai te chuan engmah han hlimpui tur ka hmulo, ka naute min biakna pawh ka chhâng ṭha meuh lova, ka nu leh pa chuan min hrethiam takin ka room lama hahchawl turin min ti a, ka hnial bik lo.

Ka room, thlakhlelhna reng rêng ka neih tawhlohah chuan lûtin ka tukverh chu ka hawnga, tûnah chuan ka thinlung aṭang mai nilo ka taksa aṭang ngei pawhin a hla ta vang vanga, engtikahmah a tawng tawh lovang.

Ni chu tla lovin kan ral tlangah chuan a la lang dêt dêt a, thla pawh a lang tela. Arsi êng mawi em em pakhat a lang tel bawk, ni leh thla an lêng dûn ngailo an ti ṭhin a, mahse tûnah erawh ni leh thla chuan lan dun hun an nei ve tih chiang takin ka hre bawk.

Hei hi vanram chu ani thei mai angem? Arsi, ni leh thla te chu ka hmuh theihin hetah ka kiangah an awm veka, mahsela khing Thla leh arsi, ni te hming chhâla thu tiam tu erawh kha chu a bo tawh. En teh van leh lei te pawh an in si a, vân hnuai lei chunga chêng dun si engvangin nge kan hran bîk tlat? Kei chu khawiah pawh i hmuh theih ah awm tumin langsâr takin ka awma, nang erawh ka hmuh theihloh turin hmun chêp lai i thlang a ni tiraw?.

Thla in chanin ka tân mawi taka êng a i awm reng tur thu i sawi a, mahse ka hmuh theihloh turin thlamuang lai ang maiin i awma,, tûnah chuan ni leh thla lêng dûn ka hmu a. Nang leh kei erawh kan hrang ta thunga, vân boruak zau tak chu mawi takin a awm renga. Mahse khawvêla ka mita mawi ber erawh i bo a, engtikah nge ka hmuh leh theih ang che.

Ka mit ka chhing a, thâwm dang reng reng ka bengah an leng lo, ka bengah chuan kha aw thûk pa ruih maiina min kalsan dâwn loh thu a sawi lai kha a rawn ri nawn awn awna, ka bengah chuan fiah taka rawn ṭawng ang maiin ka hria a, thla chuan bo châng nei ṭhin mahse a rawn lang leh thuai ṭhin a ti a nih kha, a nih chuan chu thla rawn lan leh hun chu ka nghâk zâwk dawn tihna em ni? Nge kumkhua in ka tân a mang hlen dâwn zâwk.

A Teddy bear min hawn mi chu ka khumah chuan ka muta, ka en leh vang vang bawk.

Nimina thutiam kha a la ngaia, thutiamtu erawh a bo thunga, nimina ka ta kha a la awma. Vawiinah erawh ka ta a ni ta lova, nimina min hmangaihtu kha ala dinga, vawiinah erawh a hmangaih chu ka tlu thunga, nimina hriatrengna kha vawiinah pawh a la pângngai renga. Mahsela theihnghilh luih tum a ni thunga, engkim hi khuanu ruat ngei chu a lo ni a, dan theih lah a ni hek lo.

Khumah chuan mu thla hnawkin hahdam tum tak chuan ka thaw suai suaia, mahsela ngaihtuahna aṭang hian ka paih bo theilo. A hmêl te, a hmingte, a aw leh a taksa engkim mai kha ka ngaia, ka la feel thei vek bawk. 

Hetiang kher lo hian thlahna thu sawi se ka pawm thiam deuh tur, tûnah erawh mi zawng zawng hmaah kan tâwp nimaiin ka hria a, khâng kan pahniha duhthusam leh suangtuahna te kha zawng, tu emaw chuan a lo suangtuah ve tawh mahna le.

Ka phone chu phawrhin a tâwp nân “Hlimna zawng zawng nei turin ka duhsak che a, ka neih theihloh thil zawng zawng neitu erawh kha chu mi vânnei ber a ni. Dam takin mangṭha le” tiin status chu ka up zuia, tûnah chuan keipawh hmalam pan luih hrâm hrâm ka ngai tih ka hria.

Chak taka ka awm angai bawk, ka sim ka thlâk anga, engkim ka hmachhawn thiam theih nân tawrhchhelna ka mamawh tih pawh ka hailo. Harsa dâwn mahse a ni kha ka theihnghilh theihna tur a nihchuan a pawilo, mahsela ka theinghilh mai mai thei chuan ka ring hek lo.

Hun a liam ang chiah leh ni a tla a a rawn chhuak leh ṭhin angin, ni rawn chhuak chuan a rawn chhuah pui leh ṭhin anga, mittui ti tla tu bawk a ni leh ang tih erawh ka hlau viau thunga.

Mi pahnih hmangaihna chu a mawia, hlimna in a tuam a, mi pakhat hmangaihna erawh natna leh mittui ko chhuaktu mai an ni, chu chu kei ka ni bawk.