DUHLAI ZORINPUIA CHAPTER 16

DUHLAI ZORINPUIA 

CHAPTER 16

“Vawih uiha in ur i duh a nih chuan kan in ur lêt ve zel tawh ang, a rim kha maw a uih satliah pawh anilo a ṭeng chhe khat tlat, uak” tiin Faka chu a uak zui khera, midang erawh mut hmunah kan nui khûr ngat ngat mai.

U Rinpuia pawh a nui ve huk huk mai “Tho chhuak ang u, zingkarah khatiang boruak uih hmuar nên chuan in kaihthawh tam a chi loh ang. Mama, pakhat chiah i ur emaw i tih lai khân keini pawhin kan hip vek a nia. A tih nawn fo chi loh, tho vat teh ang u, mi zîng kâr boruak thianghlim hip tumin an tho hma a ni ngaia, keini zawng zîng kârah kan hip uih huk mai a nih hi maw” tiin Sawma chu a tho chhuak zuia.

A ni pawhin a lo hip reng a nimaw? Tho phak phakin zanlama sangha kan chhum chu chhuanglumin artui kan ken vêl chu kan kanga, mipa ho pawh an awm mai mai lo, tihtur ṭul ang ang chu an lo thawk ve mawlh mawlha.

“Awi! Saw Bawng chêr chhiat khen khawn zia saw” Kimkima chu a rawn au hluta, a la nui huk huk lehnghâl. “A chaw ei man chu a awm lo ve bawk a ni, mihring chu nise a pian a mawi lo ve chiang ang chu aw” a la ti zuia, kan lo nui deuh hak mai

Thil mak pui pui lah hi an hmu thei bawk sia, chaw eikham chuan luiah chuan in chiah daih tumin kan inzui phei ṭhâm ṭhâm a, phai buh khup chen chen ni tawh ho kara kal chu a nuam ngei mai. Thla la kualin Mawii nên chuan kan in post mawlh mawlha.

Tui chhûng kan lût a, keini erawh a thûk lohna laiah chuan kan awm thung, a thukna laiah chuan mipa ho in kal phal hek lo. A tui luang a mar bawk nên keini pawhin kan ti lui duhlo.

“Vansangkim” aw rawn chhuak ṭhat lam kan hawi nâk chuan Mawii nên au chûl chungin kan mit kan hupa, mipa ho lah an nui uar uar hlawma, Mama kekawr Kimkiman a pawhthlak sak kha kan hmu ve vuai bawk nên a zahthlâk lam mah zâwk.

“In va han ṭhing tak, hmeichhia kan awm ve hi zak ve deuh ta che u” tiin ka kut chu ka la thla a, “Engah ngawt maw? In hmu vek tawh tho a lawm, in tih zah thar vel kha a ngailo, naupan laiin in hmu vek” Faka chuan a rawn ti a, Mawii nên chuan kan melh rawm rawm ringawt.

“Naupan lai chu puitlin hnu nên a in ang em ni? Ṭawng thei si, nangmah kha kan pawh thlâk sak ve mai tur che a nia” tiin u Rinpuia lungpui chunga ṭhu vûng lam chu ka pan pheia. Faka erawh Mawii nên an inhnial zawm leh char char tawh, an in hnial tam ang hian in be tam se an in bem tlu tawh ang tih tur vêl a ni.

“I hleuh peih tawh lo em ni?” tiin u Rinpuia bana ka kut rawlh lût chuan a mah si chêt chuan ka ṭhu a, “A vawt emai ka peih tawhlo” a ṭawngkam kher kher chuan ka nuih a tiza bawk nên ka nui hak haka, midang ho infiam rak chûl chu enin kan nui dun var vara.

“Ehe Mawii a tla a nia, Mawii a tla” tiin lung chung aṭang chuan ka chhuk dâwn a u Rinpuia chuan min dang vat mai “Lo awm rawh” tiin Mawii tui tlâkna lam chu a pan phei zui thuaia, Sawma te ho pawh Mawii awmna lamah chuan an hleuh phei nghal bawk. 

An in aua, kei pawh lung chung aṭang chuan hlauthâwng zetin ka lo au ve bawk. Mawii lah a pil hmak tawh bawk si, u Rinpuia chu hmanhmawh turin ka tur seka, chutih lai chuan Faka chu Mawii pilna ah chuan liluhin a bo vang vang hnuah a thlang lawkah chuan Mawii chu a rawn pawm chhuak ta nawlha.

Vau kam lam chu a pan pui nghâl bawk. Rang zet chuan lungpui chung aṭang chuan chhukin an lam chu ka pan zuia, midang pawh an rawn chhuak phak phak bawk. 

“A ṭha em Faka?” tiin Sawma te chu an rawn au pah lauh lauha, Faka erawh Mawii âwmah nemin thaw a pe zuia, tumah a chhâng lo. An bulah chuan va dingin hlauthâwng zet chuan Mawii chu ka au mawlh mawlha, a tui tlâk lai ka hmu chiang bawk nên ka tha te chu a khûr dar dar mai.

Midang pawh chu an rawn thleng phei har lo, tih theih vak awm heklo kan vai chuan Fakan Mawii tih harh tuma thaw a pe chu kan thlir ṭhap a. “A thi a mi? Awi ka hlauthâwng emai, engtin nge kan tih dâwn?” tiin u Rinpuia chu ka ena, chutih lai chuan Mawii chu a rawn khuh chhuak ta bawrh bawrha.

Tui a hâk ho chu a rawn khuh chhuak bawrh bawrh mai, Faka pawh hahdam huai ang hian leiah chuan a ṭhu thla hnawka. Mawii rawn meng siar siar ka hmuh chuan ka hnaih nghâl vat bawk “I ṭha em Mawii, awi min ti hlauthâwng lutuk” tiin ka kuaha.

“Ka ṭha e, tunge min la chhuaka?” a tihchuan “Faka, kan rawn thlen khalh hman hleinem, tlêm a tlêmah kan in chân lo chauh a nih kha, min ti hlauthâwng a lawm” Maman a lo tih lai chuan Mawii chuan Faka chu a en zauha “Ka lâwm e” a tinghal sap bawk.

Faka pawh a lo bu nghata, a hah ve hle a niang a la thaw hle hle mai. A lehlamah a tui hleuh thiam avângin Mawii nun kan chhan theih phah ka tilo theilo.

“Engtin nge i tlâk theih reng reng” ti a an zawh na chu thawk lâk hak pah hian “Ka rahna kha a rawn pil thut sia ka in vêng hman tawhlo, a thûk lohna laiah ka awm reng emaw ka tia, rin loh lutukin a thukna lai a lo awma” a tihchuan mipa ho pawh chu an bu nghat nghata.

“Phei phawt mai ang u, Mawii i kal thei angem?” ti a an zawh chuan a ni pawhin a kal theih mai a rin thu in a lo chhâng a. A hmêlah erawh a tha a zuai ru hle tih a hriat “I kal thei tawp lovang” tih hluk pahin Faka chuan a paw nghâl nawlha.

Mawii lah a phu nasa êm êm mai lehnghâl, Faka chuan a kalpui zui nul nula, a hnung lam aṭang chuan kan en ṭhap mai. “An ni pahnih hi eng emaw thleng te a awm a nilo maw? A ngaihsak riau, nichin lah kha khatianga a tui hleuh chak kha ka la hmu lo, tûnah lah heti bawk, mak riau mai. An inngeih lo viau emaw tih lai hian an lo in ngeih lutuk mah mah te hi ani ange” Sawma chuan tiin an hnungah chuan muangchangin kan zui phei hlawma.

Kei erawh ka la hlauthâwng bawk nên u Rinpuia si chêt chuan ngawi reng hian ka kala. Mawii nun kan chhan thei chu ka lâwm ngei mai, tui hi chu nunna a la tam êm a, nêl lutuk chi a nih loh zia ka hre chiang hle bawk.

Kan in nghahna kan thlen chuan an ni pahnih pawh an lo ṭhu ngawi renga, kan boruak chu a rit churh mai. “In va ngawi thei ta ve, kha Mawii pawh hlauthâwng lutuk tawh lo la, a changtupa a chêt tawh chuan a chhan hman zêl ang che. I superman a awm ve hi maw, khatia in dawm kûn ngawih ngawih zawng a hrehawm, hlim rawh u nui rawh u” tiin Kimkima chu a rawn au lâng lâng a.

“Ngawi mai mai teh Kima, a changtupa ka ni kher lo” Faka chuan a lo ti nghâl hluka, kan nui nghal dar dar bawk. An ni pahnih lah an chêt dân, an inchhan dân vêl an zir sak peka, chu chuan kan boruak a vaw zâng leh vek tawh mai.

An ni leh ni lo ang mai an thil tawn vâng nge Faka leh Mawii erawh an ngawi reng thung, an in en leh zeuh zeuh ṭhin erawh ka hmuh hmaihlo. U Rinpuia sawi kha a thleng dik dâwn riau hian ka hria, mipa leh hmeichhia in hnial peih deuh hi an induh tawh chuan an nghet thei lutuk an ti lehnghâl.

Inhnial inhnial ta chu thinrim silo in a rûkin an induh tual tuala, a tâwpah an in ngaizawng hmak zêl. Hetiang mite hi keichu an in ngaihzâwn dân hi a ril ka ti riau zel lehnghâl, hmelma aṭanga hmangaihna a lût hi chu an tâwp ve mai mai ngai lo tlat.

Zân riak duh tawh lovin kan haw zui ta diaka, sangha kan vawikhat ei ṭheuh tur a awm bawk nên mahni tâwkah kan hlim viau mai. Bike an nei ṭheuh bawka, chûngin kan bawr lo bawka, kal fo tlâk a nih rualin vawiina kan thil tawn avâng erawh chuan ka kal châk tawh vak lo.

Tlêm a tlêmah ruang nên kan haw lo chauh a ni bawk si a, khawchhûng kan thlen chuan inhmu khâwm tawh lêm lovin kei leh u Rinpuia erawh an in lamah kan tlang nghala, a nu leh pa in an inah chaw ei turin min ti leh bawk nên ka hnial duh ta bik lo.

Inchhûng kan luh rual chuan min lo chiau au nak naka, u Rinpuia nu leh pa hi chu ka fak thlâwt. An nupa in enkawl dân te, an fate an enkawl dân ah te hian sawisêl tur ka hrelo. An fate enkawl dân in a zir bawka, u Rinpuia te unau pawh mi rilru tluang tak leh fel tak vek an ni a. A nu leh pa an hmangaih thiam hlawm hle bawk.

Nu Âsangi pawhin kan sangha man te chu min lo phûl pui ve hluta, keipawhin thil thleng vêl ka sawi chuan a rawn hlauthâwng thar leha. “Ava pawi ve aw, tlêm a tlêmah chu in va chesual teuh ve le, mipa kal pui lo phei ula chuan a pawi khawp ang le. A ni lah an chhungkaw hnathawktu ber a ni tawha, a u te lah nupui pasal an nei zoa, a mah a awm loh leh zêl chuan a nu leh pa an ngaihtuah awm viau ngei ang. Mahsela chu vânneihthlâk lutukin Faka a lo awm hlauh chu a ṭhat nasat chu, tui hi chu ngam miah loh tur a nia, vanduai palh chuan khup pil lekah pawh a thih theih a nia” a ti ve dap dapa.

Keipawh ka lo bu nghat nghat mai, luia kan kal leh a nih pawhin tui chên ka tum tawh lo bur.

Tlai hmeh tur chuan saza rêp vêl an lo siama, khuaa la awm awm chhun u Rinpuia u chiah te nên chuan chaw kan ei khâwm laih laiha, an fate lahin min nel bawk nên keipawhin ka ngaina bawk, kan ri nak nak reng mai.

Chaw eikham chuan ka la inti fai lo bawk nên haw mai ka tuma, u Rinpuia chuan nghâk turin min ti leh tlat tawha. Rawn lên nghal a tum nge mawni? Mawii te inah lên ka tum bawk nên engtin nge ka tih dawn pawh ka hrelo, engpawh chu nise ka kalnaah min zui ve zel mai aniang chu.

A hman rual chuan ka in lam kan pan duna “Mawii kha va kan ka tum a sin, vawiin lah kha a la hlauthâwng viau in ka ring. Va lên hrim hrim ka duh, bâkah a thla hual te pawh angai ang, a ṭhiante kan nihna ang in kan tih tur a niin ka hria” tiin ka sawi pah mawlh mawlha.

A ni erawhin min chhâng leh chuang lo, ngawi reng in a kal mawp mawpa,heti êm êma ṭawng hreh mihring hi ka duh êm êm bawk sia, a eng hian nge min hip pawh ka hrelo. Ka duh ber bawk sia, lungpui ngaizawng ang vêl ka ni.

Mite chu an bialpa te an ṭawng thei mah maha, an khap ṭhin a ni ngaia. Keichu ṭawng tir tuma biak luih ṭâwng ṭâwng a ngai thung a nih hi, hmeichhe dangin bialpa fiamthu thiam, che nuihzatthlak leh ṭawngkam thiam zik zek, dang nal deuh deuh an neih laiin keichuan chengkawl bialpa ka nei hi a ni ber mai, mahsela ka hmangaih ve tho bawk sia, keimah hi ka â nge a mah hi a mâwl pawh ka hre teh hrep lo e.

Ka in kan thlen rualin châwl khawmuang lovin ka sangha hawn te chu mei chhemin rapah chuan ka rêp zuia. Ka zawh rual chuan in bual leh nghal sawk sawk in ka insiam zuia, u Rinpuia pawhin engmah sawi lêm silo in ka mei chhêm chu a lo chhawm ṭha ve zela, hetianga ṭawng tam loh zual lai hi a neia, thil eng emaw ngaihtuah muk riau a nei ṭhin tih pawh ka hria.

Engmah ka zâwt duh lêm lo “Kal ila ka hman tawh ania” tiin pâwnlam chu ka pana, min rawn zui ve mai bawk. “Lo hawi lawk teh” a tih leh rih avâng chuan zawhna mitmeng pu chung chuan ka ena “I hmui kha” tiin ka hmui chu a rawn tuaia, lipstick ka in hnawih a piangin a ti reh ngei ngei.

Enge hnawih sen in hnawih pawh chu a ngaih theih loh em em ni. “I mak thei e, hnawih sen tello chuan ka mawi hleinem, ka in chei ve em em a i tih reh zêlin” tiin Mawii te in lam pan chuan ka kal zuia.

“I inhmeh lo ka tih tawh kha, hnawih sen tello khân i hmêlṭha, hnawih sen nên khâ chuan misualnu i ang” ka va han ngei tak e aw. Khawia misualnu mah hi ka ang hian ka ring lo, “Misualnu ka nih leh i changtunu tur chu zawng la tinia” tiin a hmaah chuan ka pên nghal hlawk hlawka.

A rawn nui huk huk mai, kei erawh ka tûm bûr thung. “Ka tân chuan ka changtunu leh misualnu i nih kawp a lâwm, i nuih leh i ṭah hian ka changtunu i nia, i tihtauh leh i thinrim hian ka misualnu i ni leh mai” tiin min rawn kuah thaka.

A kutah chuan ka sih sak nghâl vâwt mai, nui hak hak hian ka biangah chuan a rawn fâwp zauha.

Mawii te in kan thlen dâwn chuan namsawnin ka intuai mâm thuak thuaka, chutia ka awm chu ho hi an tih hmêl em em mai lehnghâl, mi hmuha lan mawiloh a hlauhawm tih te hi a hre ve leh pek lo aniang.

“In awm maw?” tiin kawngka chu ka kik dat data, inchhûng lam aṭanga min rawn chhâwn rual chuan lût nghal zatin Mawiin min lo hmuh rual chuan min lo chiau au zung zunga, a nu leh pa pawh an lo awm a nih hmêl.

“Lo lêng rawh u, Hmingte vawiin chu thil thleng kha kan lo hre ve a, nang ni nên in kal tlâng hlauh chu a vânneihthlâk hle mai. Chuti nilo se kan fanu hi kan chân dâwn a ni sia le” a nu chuan a rawn ti zung zunga.

“Keiniin kan ti hleinem, Faka kha che hmanhmawh lo phei se chuan keini chuan engmah kan ti hman hleinem, Faka vâng liau liau a ni, zanin chu hei thlahualna tur rawn buaipui kan tuma. Ar lei tur nei te hi an awm angem le?” tiin ka sawi nghal zung zunga.

“Aaa a ngai hleinem, keimah ni zâwk hian lo talh kan tuma, a ngai reng reng lo a nia” a pa chuan a rawn ti ve zung zunga, Mawii pawhin a ngaih loh thu a lo sawi ve bawk.

“Hnial âwih loh, ṭhian kan nia. Ṭhian chuan lungngaihna leh harsatna, hlimna leh lâwmna te pawh kan inṭawm vek ṭhin a lawm. Nang pawh ka ṭhian i nia, i tân tih pawh kan la neih loh hi, he thil hi chu ka tâna i hlutzia hriatrengna angah ngai rawh. Ṭhian kan ni a, engkimah ṭhian nihna kan lan tir a ngai a lawm, inthlahrun a ngai miah lo a nia” tiin ka sawi zung zunga.

“Nu keimahin ka lo lei tal ang, pawm mai teh u. In duh loh pawhin ka dah tho dâwn, in fanu hi ka ṭhianṭha ber a nia. Helaiah min kâwm duh tu leh min hnaih duhtu an awm vak loh lai pawhin ka tân a awm renga, ka ṭhian hian englai mahin min kalsan ngai lova, vawiinah lah kei hi a tân ka ṭangkai loh zia ka hriatchhuah phaha, ka inthiamlo lutuk reh nân tal min pawm sak rawh u” ka tih leh tâkah chuan an la ta hrâma.

“ A va lâwmawm dawn ve aw, nang ang ṭhian a lo tawng zâwk che hi kan vânneihna a nih hi, i chanchin pawh a sawi nasa a sin, tikhan lo awm rawh u ar chu kan zuk man ange” tiin an tho chhuak zuia. U Rinpuia chuan puih tumin a zui chhuak ve bawka, a hnung lam aṭang chuan ka nuih sak mai.

“I ti zahthlâk e, lei angai kher hleinem. Keimahni in kan talh mai dawn a lawm, ar chu kan ngah lutuk” a tihchuan ka nuih saka.

“Nang chu ka ṭhian mai bâkah ka unaunu ang i ni ka tih tawh kha, ka lungngaih chângin ka kiangah awm in min hnema, min fuiha. Kal dân tur leh tih mai tur hre lova ka awm châng leh ka chhûngte ngei pawh ka hrilh ngam loh laiin nang erawh engkim ka hrilh theihna leh min hnem tu i ni a, ka tân ṭhian mai nilovin unau ang i ni. Ka ṭhian te ngei ngei in min kalsan hnuah pawh nang chu ka tân i awm renga, nang anga ṭhianṭha hi chu ka tawng tawh kher lovang, kan inhriatna a la reilo chungin ka tân englai pawhin i awma, vawiinah pawh khân ka inthiam lo a sin, i nun i chân ang tih kha ka hlau ngawih ngawih” tiin ka sawi dap dapa.

A ni pawh a ngawi ta daiha, thudangah a pakai thuai bawk. Ṭhian pawh hi kan thlan thiam a ngai viau rêng a ni, kan han awm hrang chiaha mi rêl nghal thei ṭhian neih hi alo hlauhawm berin ka hria.

Mawii erawh kan inhriatna a la reilo, mahsela ka awm loh laiin min rêl ve ngai lova. Ka bulah mi han rêl vak pawh a nei ngai hek lo, ama nunah hian a buai tâwk em em a, midang va sawisêl vak peih lo ta chu keipawhin tumah ka sawi chhe ngailo, ṭhianṭha chuan min hruai ṭha a, ṭhian ṭha lo kawm erawh chuan min hruai sual ṭhin.

Ṭhianṭha chuan kan diklohnaah min hau ngama, kan beidawn hunah kan tân an awm leh a, ṭhian sual erawhin thil a punlun zâwngin min tawrhpui anga lang si mahse midangte nêna in rem theilovin min siama, kan mamawh tak tak hunah erawh an tlân chhe leh daih ṭhin.

Ka phone rawn ri avâng chuan ka kekawr ip aṭang chuan ka phawrh vata, Sawma hming a lo lang va mai. Rawn lên an tum leh tawh nge rinloh lutuka min rawn call thut chu le.

Ka lâk rual rual chuan “Khawiah nge i awm ve kir kera, i inah kan rawn kala i awm silo. Enge itih? Kan rawn lêng duh, rawn haw rawh” a rawn tinghal tawng mai. 

“Mawii te inah hei a thla hualna tur vel kan buaipui dâwn, rawn kal ve rawh u. Khata awm reng ai chuan ṭhiante awmnaah hian awm tur, nang ni ngat phei chu zaninah hian awm ngei ngei tur zâwk a sin in nih” tiin phone chu ka dah zui ta daiha.

An rawn kal ngei ngei dawn tih ka hre chiang viau thung. “Tute nge?” Mawii chuan a rawn ti ta rênga.

“Sawmauringa te bawk mawle, an rawn lang thuai ang. Zanin chu in in pawh a ri nuai nuai dâwn a nih hi” kan nui dûn hak haka, u Rinpuia pawh ar pawm chungin a rawn lût hlawla, ar pahnih an talh dâwn a nih hmêl.

“Va pui ve ang” tiin Mawii chu a rawn tho chhuaka, chempui chu va la in pâwnlam chu kan pana, keiin ar pakhat chu ka pawma. Mawiin pakhat chu a lâksak ve bawk, u Rinpuian a sât hlum dawn a nih hmêl.

Khu lamah kha chuan talh sa hlir kha kan lei ṭhin a, engtin nge an talh dâwn ka hre lâwk hauh lo. Chutah Mawii chuan a thla leh taksa chu nem kawpin a kut leh lam chuan ar nghâwng chu a pawt fân deuha, thingah chuan a nghah chhan bawk.

U Rinpuia chuan a sât bung nghal hmawka. Ka ner deuh sak mai, ar pawh chu an tal nghâl phur phura, Mawii chuan a ke ah khaiin a thi far zawh hun leh a thih fel hun chu a nghaka.

A tih ang chiah chuan tih ve tumin u Rinpuia chu ka hnaiha, chutah leh ar nghâwngah a rawn sât ve chiah chu a rawn tâl phut bawk nên ka inring lo si chuan ar chu ka chelhna ka thlah peka, lu bung chungin a tlân ta vak mai.

“Kha a tlân chhuak ania ûm rawh u” tiin keimah chuan ka ûmzui a, chu ar lubung lah chu lu bung chung pawhin a la tlân chak em em lehnghâl. Mawii leh u Rinpuia pawh chuan min rawn ûm pui vata, hnim kârah a lût bawk nên kan hmu thei mai lo.

“Engtin nge lu bung chung khân a tlân chhuah theih?” tiin mak ti em em hian u Rinpuia chu ka ena “A tîrah an thi mai ngai hleinem, lu bung chung pawhin rei deuh hlek an la dam thei a lawm. An thisen a la luma” Mawii zâwk chuan a rawn ti a.

A nui pah uar uar lehnghâl, keilah ka zak bawk si. Ar lubungin ka tlân chhuah tir chu a ni sia, “Enge in tih?” Sawma te ho rawn au lawng lawng chu Mawii chuan thil awmzia hrilhin a ko vata, an ni pawh an rawn hnai nghal vat mai.

Min zawn pui mai dawn emaw tih laiin min han nuih fe phawta “Ar lubung pawh i ûm pha lo chu ania le, tikhan zânah i mutna sirah lu bungin a rawn hran khum ngei dawn che a nih kha” an la tizuia, min ti thlamuang lo zo vek.

Chutah ar luhna zâwn chu ka kawh hmuh leha, zân zânah nula leh tlangvâl ar lu nei tawh lo zawngin hnim kârah kan kûn kût kût chu a ni sia. Keipawh a rûk tak chuan ka nuih a za ve tho bawk si, ka inthiam lo tho bawk nên ka awm dân chu a lai zo vek.

“Ka hmu e” u Rinpuia chuan rawn ti dût in ar lubung ngei chu a rawn khai chhuak nawlha, a lo thi fel tawh a nih hmêl. Thaw huaiin in lam pan chuan kan inzui hlawma, in chhûng kan luha Mawii nu leh pa thil awmzia an hrilh chu an ni pawh an nui hawk hawka.

Kei erawh tawi tak tak hian ka nui ve tawp bawk, ar puahna tur chu an chhuang sa bawk nên kan puah nghal zung zunga, kan han kal hma a ṭang tawh khân lo talh an tum tawh hrim hrim a nih hmêl.

Mawii nu leh pa pawh chuan midang ho chu lâwmthu an hrilh ve mawlh mawlha. A bikin Faka hnênah chuan Mawii a chhanchhuah avânga an lawmzia chu an hrilh nasa hle mai, a ni lahin chhân dân vak hre lo hian “A ho lutuk, keimah ka lo awm hnai bera, chuvang chu a ni e, a hun takah kan chhan thei kha a lâwmawm, tûn a chinah erawh lui kal pawhin tui chu dai ve tawh lo sela a ṭha ang” a tihchuan kan lo bu nghat nghat hlawma.

Keipawh lui te ah lo chuan ka chêng tawh hauh lovang, “Naktuk chu chaw rawn ei vek rawh u aw, in ei ngei ngei angai ania. In ṭhiannu thla hualna a ni bawka, tin, in ar lubung zawnna avâng hrim hrim pawhin” an ti leh chu ka lo ner nasa tawh mai.

“A rawn che phut sia ka inring hman lo alawm, ka hlauhthâwn zia kha e. A chak nasa mai si, ar ve si khatianga chak kha ka la hrelo” tiin ka phun sapa, ka ar tlân chhuah tir chu an lâwm hle aniang an sawi zui nak naka. 

An puah zawh rual chuan a chhum siam leh te te in guitar nên pâwn lamah kan chhuaka, thla a bial ṭêp tawh bawk nên a êng fiah tulh tulh mai lehnghâl. 

“Tihian mei kan vil pah mai dawn ania, zai ho ang u. Thla êng lawm te hi a khât tawh êm mai hi maw” tiin tualah chuan ṭhutthleng sei chu in zâwn chhuakin kan ṭhu ṭhap a, u Rinpuia chu guitar an pe leh nghal chat tawh mai.

“Perh la zai ang u, thla êng te pawh kan lâwm ve ang chu” tiin an phûl zui hluta, keipawh ka phûr ngei mai. Hetianga thla êng lâwm hian ṭhianho in kan awm ve ngai hauh lova, he khuaa ka kal chu ka tân chuan thil thar tawn tur leh ka tih ngai loh leh hriat ngailoh tam tak ka hriat phah a ni ber mai.

“Khuangchawi thla  tih hla kha aw” tiin an la zuia, kan hla sak leh thla êng chu a in rem vêl vek. Daduhi hla chu sa in kan zai rual ṭhap ṭhap a, a nuam ka tiin hetiang hun kan hmang thei te hi hriatreng tlâk tur an niin ka hria, nakinah chuan hetiang hun te hi kan la ngai ngawtin ka ring a ni.

Mawii nên pawh theih tâwp chuan kan zai ve a, mipa ho erawh an au ring luah luah viau mai. U Rinpuia pawh chutia an nawr tâk tlatah chuan a inzai tui ta a niang, a rawn zai tak tak chu a aw a fawn nalh leh tawh lutuk tlat.

Hla dang kan sakai leha, C. Vansânga hla Derthiam mi u chu sa in kan duh hlawm bawk a niang kan zai ring ṭha hlawm viau mai “I tiamthu hre tu chhawrthlapui, a êng ruai e piallei mawiin, chhai thar belin i liam ta maw?” kan zai tui chho ṭan chiah tihah Kimkima aw a rawn chhe peka, zai thei a bar kan awm tawh lo, kan nui nghal vak vak mai.

“Feel ve tawh tehreng nên i rawn tichhe vek a lawm, he hla phei chu an phuahtu ang mai hian ka lunglên pui thei a sin. A châng hnihna la ṭha leh ngat teh ang u, tumah aw tih ṭial leh zai sual phal a ni tawhlo” Mama chuan ti hmakin a zai chhun zawm leh nghal zata.

Mawii nên chuan in enin kan nui ru char char mai, mahse kan zai ho chu nuam ka tiin hetia ṭhian ho a thla êng lawm hi ka hlimpui lutuk tlat. Kei phei chuan vawikhat mah thla êng hi ka la lâwm lova, lehkha zir loh leh ṭhianho khân Karaoke te'n hun kan hmanga, hetianga awm dial dial hi kan nei ngai lo.

Thingtlâng nun meuh zawng ka awm rei tual tual a, nuam ka ti telh telh bawk. Zo nun zemawi tam tak an la chhawm nungin, pi pu te nun tam tak hmuh tur a la awm bawk nên nuam ka ti telh telh mai.

“Ka hun hman tawh zawng zawngah a la nuam ber” tiin thla chu ka thlir vauh vauha, midang pawhin an rawn tui hnih sap sap bawk.

“Hetianga awm ho dial dial te hi kan nei leh mai mai tawh lo ang, chuvâng chuan duhâm taka hman tur. In chhûnga in khung ngawt ngawt chu a nuam lo, hetia zân boruak thiang tak leh arsi lang thlir te, zân hrâm chi hrang hrang nêna hun han hman te pawh hi a nuam a sin, nakin lawkah fur pui a rawn in ṭan tawh anga, thla êng leh ni êng hmuh tur a khât leh pharh mai ang” an tihchuan dik ka ti viau mai.

An ni phei chu ruahsur pawh pawisa lovin an feh ṭhin tih ka hria, tûnah pawh u Rinpuia hian maian vêl chu min rawn hawn ziah tawha. Ka Fanghma tuh te pawh kha an pâr ṭan ve tawhin ka ring bawk nên hmuh leh ka châk viau mai.

“Nia zanin chu duhâm takin hmang ang u, hmakar chu Pathian zara dama kan awm te a nih chuan ka haw thlâk leh a ngai dâwna, training tê nau an rawn ko leh bawk sia. Ka peih lo tak tak” tiin ka lo tui hnih ve a, u Rinpuia chuan min rawn en nghal vut mai.

Ka bulah a ṭhu bawk nên a hmêl chu hmu fiah thei vak lo mah ila a chêtzia aṭang chuan a danglam tih ka hre thei, ka haw leh lawk angai tih ka la hrilh lova. A lungawi lo leh êm lo'ng chu maw? Bâkah a la hla bawk nên ka hrilh duh lutuk lo kha a nia.

“A va ngun ve, i hna lah hi ka peih lo chi. Nau chhar te phei chu a teuh hian a hnailo mai, engtin nge i peih zawk? Hêng ai chuan e hetia hnathawh reng hi ka thlang” Faka chuan a rawn ti a.

“In tui zâwng a in ang lo a nimai a ni, mi tinin nuam tih zâwng kan nei a lawm. Bâkah a rawn awm hi khua pawhin kan vânneih phah êm hi, damloh pawhin a na zual tih loh chuan kan pan zung zung thei a, damdawiin kan hlat bawk sia, a rawn awm lovang tih a hlauhawm zâwk” Mawii chuan a lo ti ve vata.

Faka ṭawng a tum leh chiah tihah u Rinpuia chuan “A dik chiah, rawn awm lo se ka nupui tur ka tawng har mai dawn a sin” a lo ti ve khauh lehnghala, a sawi dik tho bawk sia awm lo ila keipawhin ka tawng hauh lo anga, tu emaw awm lo ngaiin ka lunglêng awm tho si a.

“Bialnu chhan hi chu a na a ni e, keipawh bialnu chhan tur hi nei ve ila, ka chhan chiang mai mai ang chu” Faka chuan a rawn ti hluka.

“E. I chhan si, vawiinah i pawm chhuah nawl bawk mai kha maw, kha bâk bâka bialnu chhan na kan la hmulo, kan rawn chêt ve hman reng reng loh kha maw” Sawma chuan a lo ti leh peka, Faka chu rin ang ngeiin a rawn pawr leh nasa tawh mai.

“Midang pawh tla sela ka chhan tho ang, a hrim hrimin ka bialnu a ni ziah lo. In duh duh in sawi leh chuan ka haw san ang che u” a tih tâkah chuan midang pawhin an ti lui duh ta lo, a ti duh leh tak tak dawn a ni tih an hria te pawh aniang.

Mawii erawh a ngawi leh ngal tawha, tui a tlâk hnu aṭang kha chuan a zia a zawi riaua, a la hlauthâwng viau te pawh a nimai thei a ni. Hla dang chu la leh daihin kan zai ho dial diala, tumah min rawn khap pawh an awm lêm lo.

Vêng ṭhenkhat aṭangin ui bauh ri hriat tur a awm leh zeuh zeuh ṭhin a, in ṭhenkhat atanga tlangvâl lêng ho nui ri tih loh chu thâwm dang hriat tur erawh a awm tawh hauh lo thung. “Zai a va nuam ve, tih ziah tawh tur a nih hi a, mei chhêm lawk ang ila, a vawt ṭan riau” tiin mei chu an chhêm zuia.

Mawii te thing chu an hmang hmiah hmiah lehnghâl “Thing chhe deuhte a awm lo em ni? An phurh hah dâwn nên” ka lo tih lai chuan “A pawi lo tuah rawh u,  kan ngah a lawm. In hnuaiah pawh kan la khawn ṭeuh a nia” Mawii chuan a lo ti zung zunga.

Keipawh chuan engmah ka sawi tawh lêm lo, zai ho lehin a châng leh kan nui leh dar dar ṭhin. U Rinpuia nghêng chunga ka zai lai chuan Mawii leh Faka in melh ka hmu fuh peka, an ni pahnih lah midangin an en loh lai a nih ringin an lo in en veng veng mai. Ka nui saka, an in ngaizawng a nih vaih chuan an ni pahnih aia inhmeh tur ka hrelo, Mawii tân pawh kha a bialpa hlui lâk tlâk loh zet kha a theihnghilh theihna tur khawpin Faka hi a ṭha dâwn in ka hria.

Faka lah tlangvâl hmêlṭha leh fel êm êm a nia, a ṭawng hluk hluk ang hi ani der silo. En duh tawh lo chuan midang zai chu ka zawm leh vata, zân a rei tâkah chuan tho chhuak phak phakin haw tur chuan kan in tin tuaha.

“Naktuk zîng chu rawn ei ngei ngei ru aw, chaw ka lo chhum kep vek dawn cheu ania” Mawii rawn tihna chu chhâng hlawmin kan in mangṭha zui sap sapa, u Rinpuia nên chuan ka in lam panin kan inzui hnak hnaka.

“En teh, i sawi kha a dik tak tak dâwnin ka hria. Faka leh Mawii kha Mawii tui tlâk hnu aṭang khân an awmdân a danglam tlat a nia aw” tiin a bânah chuan ka chelh saka.

“Chuan” a rawn ti tawp chu ka sik nghâl sawk mai “An in ngaizawng dâwn a niang chu, zeilo thei si. Thil hrilh ve che pawhin tawi deuh deuhin min chhâng ṭhin suh, an inhmeh i ti ve em?” tiin ka en ha a.

“A ṭha a lawm, an inzui theih te chuan. I ṭhiannu tân pawh hmalam a pan theih nân a ṭha viau tak ang chu, Faka lah hmeichhe duat thiam tak leh rintlâk tak tur a ni bawka, mahsela la ngawi rih la. An inkâr hriatchian phawt i tum dawn ania, tûnah rih chuan keimah chauh hi min ngaihtuah rawh” a ti nghal zat chu ka nuih hak mai.

“Ka ngaihtuah reng che a lawm, a nih mangṭha phawt aw” ka in pêng kan thlen tâkah chuan chhuh mai ka tuma, ka kutah a rawn vuan bet lehnghâl chat tawh mai. “Ka lo riak ang” a ti chu ka en renga “In inah riak ve la, i rawn riah ngun lutuk chuan i nu leh pa mai pawh nilo, midangin mak min ti lutuk ang” ka tihchuan a rum nghuta.

“A ho lutuk, kan in ngaizawng tih an hre vek, chubâkah an ngai dik lo hauh lo che a nia. Chûngin mi ngaih dikloh an hmang lêm lo, a hrim hrimah nangmahin i awm tih an hria a, tumahin an rawn ngaihven lovang kal ang” tiin amah zawk chuan ka in lam pan chuan min kai thla dat data.

Ka hnial peih tawh lo, a tih tawh chu a ti tlang leh bur dâwn tih ka hria. In ka hawn rual chuan min nawr lût nawka “Enge i hriat ka” ka sawi belh hman lo ka hmuiah chuan rawn fâwp zeuhin “Engmah ka hrelo, mu ang le, ka chau riau mai” tiin room-ah chuan min luhpui zuia.

A rawn riak hi a lehlamah chuan ka thlamuan phah viau mai, bâkah vawikhat mah a mawilo zawngin min awmpui ngai lova. A insûm thei ka ti ṭhin, insûm a harsat tur zia ka hria a;  mahsela vawikhatmah min nawr lui ngai rêng rêng lo te hi ka fak.

Kan riak dûn ngun ve tawha, mahsela sual lam kan ngaihtuah ngai hauhlo. Kan inhmangaihna hian rinawmna leh insûm theihna te, dawhtheihna leh hriatthiamna nên min awm tir a ni berin ka hria.

Ka beisei ang ngeiin Aizawl lamah ka haw thla a, ka chhûngte pawhin min lo lâwm viau mai. Ka nu leh pa biak ngei ka duh avângin an room-ah ka kal chilha, u Rinpuia nên kan chungchâng chu ka hrilh dap dapa.

“Keini chuan Timothy-a hi nei ngei la kan la duh fan a ni” ka pa in a rawn tihchuan ka thaw haka. “Nu, pa in mi ngaihtuah vâng tih ka hria. Mahse maw, u Rinpuia hi mipa rintlâk tak a ni a sin, vawikhat tal chu belh chian tum ve ula. In rin ang hi ani miah lo ania, englai pawhin min ngaihsaka, tin in hriata ka duh chu kan la chesual hauh lo. Min nawr lui ngailo te hi amah ka zahna tizualtu an ni, ka nu leh ka pa in nia, ka tâna ṭha ber tur in duh tih ka hria. Min hmangaihna vâng a ni tih ka hre bawk, chutihrualin u Rinpuia hi sawrkar hna chu a thawk lo a nimai thei; mahsela rethei bakberh chuan min dah ngai dâwn lo tih ka hria a ni. Vawikhat tal chu hmu ve ula” tiin an bulah chuan ka ṭhu thla a.

An ni pawh an ngawi vang vang mai, chutah ka nu zâwk chuan “Ni e, rawn zin chu a la ngai ani. Kan fanu i ni a, i hlimna tur leh i hmakhua kan thlir ber a ni tih hria la. I mipa duhzâwng tak i hmu chu i nu pawh hian ka hrethiam lutuk che a nia, kan hmangaih leh duh tawh lakah chuan rilru dang put hi a har a lawm, kan rawn hmuh ve ngei a ngai a nih chu. Hun thâwl vêk vâwk hunah kan rawn zin dâwn a nia” a tih tâkah chuan ka nu chu ka kuah thlawpa.

“Nu, pa ka lâwm e. Khawvêla nu leh pa ṭha ber in ni, kan rawn pian hma aṭangin hmangaihna nên min paia, khawvel êng kan rawn hmuh rualin mite awt leh an neih ang kan neih loh hlauin rim takin in thawka, mite ruala ke kan pên ve theih nân lehkha kan zir theih nân theih tâwp in chhuaha, tûnah hmangaih kan nei ve a, mi in hriatthiam avângin ka lâwm e, nang ni ang nu leh pa hi ka neilo ang tih ka hlau” tiin ka ṭah nuih haka.

“Kan fanu i nia, i hmakhua tur kan ngaihtuah ve tih hria la, chutih rual erawhin i hlimna tur ni a i hriat chu dan bur che kan tum lo ania. Fimkhur tur erawh chuan kan duh che, in inneih hma chuan mipa lakah in phal ngai suh ang che. Mipa chu an inthup thei a, min duh tak tak ang leh hmangaih tak angin an awm thiam a, chu chu hmeichhiate kan in vên zawh loh phahna leh kan mualpho phahna a ni fo ania, kan ring tâwk che a. Kan lo ṭawngṭai pui reng che a nia, i mipa duh em em chu a hmêl te pawh hmuh ve kan duh a lawm” an tihchuan lai deuh takin ka phone a u Rinpuia nên kan thlalak chu ka hmuha.

“A va hmêlṭha ve, i dawi te a nilo maw? Kan fanu meuh han duh chu, i dawi â a nih ka ring tlat” ka pa in a rawn tihchuan “Ka dâwi bawk lo, ka hmêlṭha ve tho” tiin ka tûm bara, ka nu leh ka pa chu an nui hak hak mai.

“Tak takin kha a ṭhat dâwn kha, a hmêl aṭang pawhin mi rintlâk tak tur chu a niin ka hria. Mipa hi chu kan hmêl leh mitmeng aṭang hian keimahni vêk hian kan inhre chiang ania. Kan fanu in Doctor meuh thlang lova a thlang tlat pawh hi a lo âwm lo hauh lo mai, kha a mitmeng te reng reng kha i mipa duhzâwng i sawi tam em em ṭhin ang kha a lo nih vâng a nih kha” ka pa chuan a rawn ti leha.

Thawnthu ka chhiar peih zia leh lehkhabu ka lei tam zia hretute an ni bawka. Ka mipa duhzâwng ka sawi nasa ṭhin bawk nên an thusawi chu a dik lo hauhlo, ka nui hak haka. “Ih e, a pa ka tihzia ka hmuh tirh ah chuan silai a rawn pu ngauh ngauha, a sakhi kah naupangin an rawn inzâwn haw bawka, awi tv a a changtupa sipai hmêlṭha leh chhelo tak ang mai hi a ni” ka ti leh kher chu an nui nasa ngei mai.

Chutia ka nu leh pa in min pawmpui ta chu ka lâwm ngei mai, ka hnuk lam lam a ulh thei. Min hnial in min duhpui lo bur ta se chuan u Rinpuia nên pawh kan hlim famkim dâwn hauh lo. Mi pahnih hlim tak leh thlamuang taka awm famkim tur chuan kan chhûngte hi an pawimawh tlata.

Kan faten duhtaka an pawm miau chuan lâwm takin pawmpui mai ila, mo sual, mona chhûngte sual tih te pawh hi a tlêm ve deuhin ka ring.

Ka awm chhûng chuan kan training ta zak zaka, ka nu leh pa in u Rinpuia nêna kan inkar an pawm tawh bawk nên ka thiltih engkim mai chu anuam vêl vek mai. Doctor Timothy-a rawn lên tum erawh ka phal hauh lo, u Rinpuian hmu pha kher lo mahse thuruk chu a thup reng theih loh bawk nên nakina kan pahniha buaina tur thil tih ka duhlo.

Bâkah a rawn lêng leh a nih chuan ka chhûngte a be thiam ropui si, buaina kan tawh leh ka hlau. Tûnah erawh ka thla chu a muang tho bawk, kan inkâr ah kan chhûngte ber kan hmin tawha, haw vat vata u Rinpuia ka kâ ngeia hrilh ka duh bawk nên haw vat chu a ni ka châk reng ni.

Tûnah pawh hian ka bulah awm reng angin ka ngaia, a rauthla hi ka bulah kal ve zêl angin ka suangtuaha, pangpar rimtui tak ang mai hian min zem chiai chiai te hian ka hre ṭhin.

Kan kâr a hla rih nângin ka ngaihna leh thlakhlelhna pawh a pung ve zêla, kan inkar a hlat poh leh a mahah ka rilru hi a nghet telh telha. Midangte angin a kut vuan thei rih lo mah ila englai pawhin ka suangtuahna chuan ka bulah a awm tira, ka bia a. Ka bulah awm ang maiin ka ngai ṭhin, a aw ri ka bengah a châm a, chu chu ka suangtuahna vêk in ka bia a, a rim ka hnârah a châm a. Boruak ka hip luh zâwng te hian a rim kha ka hre tel tlat nia, khawi hmunah pawh kan hmangaihte chu kan rilruah kan dah reng phawt chuan kan bulah englai pawhin an awm ṭhin si a.

Ral hla tak lam chu ka thlir vang vanga, kan inchung aṭang chuan a lang chiang hle bawk. “Ka suangtuahna zawng zawng kawl tu, rinawm takin lo awm la. Kan inhmuh hma zawng ka tân englai pawhin lo awm reng rawh aw, kan kâr hla rih mahse i tân ka dil renga, nangmah ngaihtuah chung vekin engkim ka ti a nia aw, heti khawpa ka thinlung i neia, ka ngaihtuahna zawng zawng nei thei tu khuahmun loh di ni chung si kha ka hmangaihna zawng zawng i nei tih hre reng ang che” tiin ni tla tur sen phût chu ka en renga.

He tlai ni tla tur ka thlir liam ang hian a lo thlir ve ngei ang tih ka hria, he ka thu chah hi naktûk zîng ni chhuah rualin saw ni ngei sâwn a hnênah a thlen ka beiseia, zânah thla rawn êngin ka hnênah a thu sawi te a rawn thlen ngei ka beisei bawk. Atân Ni ka nih thu min hrilh a nih kha, saw Ni ngei saw ka lehkhathawn keng tu a ni a, zân thlaêng erawh a lehkhathawn keng tu a ni thung.

Hotu lam hnênah chuan naupiang leh nu nau pai dinhmun te chu ka theih ang angin ka report ve bawka, an ni lam pawhin engmah an sawi lêm lo. Dik tak chuan ka vawikhat thawhna a ni si a, ka zei viau lêm lo. Vaccine ka lâk tir phei kha chuan naupang kha an ṭap nasa em em lehnghâl. A lehpekah erawh tihsual ka tum tawh hauh lo thung.

Pathian zârah ka hna te pawh zo in châwl khawmuang tawh lo hian u Rinpuia ka hmu châk tawh bawk nên haw tlang ka tuma, ka chhûngte lah chuan mi fiam nân tak an la hmang zuia. Keipawhin ka haw duh lêm lo, a khua mai bâkah ka ṭhiante pawh ka ngai tawh bawk nên Aizawl lam thlakhlelhna ka nei ta reng reng lo hi mak pawh ka in ti.

Bâkah ka chhûngte tih loh hi chu thlâkhlelh tur ka neilo ve êm bawk a ni. Zânah insiam sa thlapin a tuk zîngah sumo in kan chhuak leh nghâl zata, chawlh hahdam leh vel kha ka duhlo. Haw chhoh zung zung ka duh zâwk.

U Rinpuia pawh ka hrilh sa thlapa, a ni pawhin min ngai tawh ngang a niang. Ka zin rei a tih thu a rawn sawi ve bul bul zêla, chûngte erawh chuan min tihlim ṭhin viau thunga. Keipawh hian ka ngai takzet, in video call ve ṭhin mah ila a bul a awm ngei kha ka thlahlel a ni ber mai.

Khua chu zân dar 6 vêlah kan thlenga, ka in chhakah chuan min dahin ka bungrua tlêm chu hlâng thla in u Rinpuia pawh a rawn lang nghal thuai mai. Amah chuan ka in lamah chuan ka thil hawn ho chu a dahthla nghal zung zunga, midang an la awm ve nên kan la in be hauh lo.

Chuan man te pe a kan in mangṭha hnu chuan in lamah chuan ka chhuk thla ve chhet chheta. Kâr khat dâwn lai ka awm ve bawk nên engtin emaw hian ka awm ve lo theilo.

In chhûng ka luh ruala u Rinpuia rawn inher ruai ruai chu hnaih vatin ka pawm zuia, ka nuih nghâl ver ver bawk. Chutia a taksa ka kuah leh thei chu ka hahdam nghâl sawng sawng hian ka hria, a ni pawhin nghet zet hian ka kâwngah a chelh rân bawk.

“Min lo ngai em? Keichuan ka ngai lutuk che a, hei chawlh pawh nei hman lovin ka rawn thlâwk haw lehnghâl a nih hi” tiin ka nui chhuak hak haka, “Ka ngai lutuk che. I rawn haw har mah mah a ni, khatianga rei kha chuan i zin mai mai ka phal hauh lovang, helai hi i khua a ni tawha. Khulam chu khual i channa tur hmun mai ani tawh” tiin ka nghâwngah chuan a hmai a rawn phûm zata.

Ka thaw nghal suai suai mai, a bula awm hi chu a thlamuanthlâk hliah hliah hian ka hria. 

“Ka bungrua te hi dah fel ila hrilh tur che ka nei a nia aw, i lâwm ve ngei ka beisei” tiin a lak aṭanga awmsawnin ka thil hawn ho chu ka dah fel zung zunga. Ngawi reng chuan min rawn pui ve bawk

“Sawhthing pawh kan hralh ve hlawm tawha” a rawn tihchuan ka thil tih lai châwl in amah chu ka ena, ka lawmpui takzet. An lâksak tawh dâwn lo emaw tih hnuah an rawn lâksak chu a lâwmawm em bawk a ni. 

“Ka lawmpui lutuk cheu” tiin ka kuah ṭha leha, “Car lâk kan tuma, ka bike khi duh tâwk viau mah ila ka nu leh pa te ka ngaihtuah ve bawk sia. Zinchhuah nikhuaah pawh keimahin ka hruai thei zel tawh anga” a tihchuan ka nuih ver vera, chutia an mahni thawhchhuah liau liaua a lei thei tur chu ka lawmpui takzet.

“Ka zin ve lawk angai dâwn tihna a nih chu” a tihzawm zata. “Ummm mahse ka rawn haw ve chauha, mahse a pawilo, i zin rei chuang nâng” tiin ṭhutthlengah chuan ka ṭhut thlâk puia. 

“Ni e, a tûkah ka rawn haw pui nghâl thei ang. Licence ka nei sa a, ka lehkha zir lai khân patea te ta ka khalh ṭhin a, kan siam sa veka a lo remchâng ta phian a nih hi” tiin a dârah chuan min bei tira.

“I sawi duh chu sawi ve tawh la” tiin a mah chu a ṭhu ngawi zui ta daiha.

“Immm ih maw ka nu leh pa in kan inkar hi an pawm tawha, rawn zin te pawh an tuma. Hmuh che an châk aniang, chuan maw i hmêlṭha an ti che” ka ti chu a rawn nui hawk hawka, “Chu mâkpa interview ah hmêlah ka tling phawt a ni maw?” tiin ka biang chu a rawn nul thuak thuaka.

“Chuan i rintlâk hmêl an ti che, mahse kei hi chuan i der dep hmêl ka ti” ka zakah chuan a rawn dêk nghal vaka, ka tâl nghal nawk nawk a, kan rak chêl chûl mai. Chutia kan pahniha kan lo nuih dun hawk hawk lai chuan kan ṭhiante ho an rawn lang phak phaka.

“In lo va hlim hawr hawr bik ve, Hmingek enge min rawn hawn? Nge ni a in pa chiah i rawn hawn leh zâwk?” an ti chu ka nui tawpa, “Tun ṭum chu u Rinpuia pawh thei ka hawn, a dang ka bazar hman lo. Ka nin hman zia, rawn haw vat ka duh sia thei kha ei mai rawh u, dawnfawh leh lakhuihthei vêl ka rawn hawn kha. Litchi pawh a awm ang, kha pawh kalkawngah ka rawn lei tawp a lawm” tiin kan infiamna lamah ka kawr inhlim deuh chu ka siam ṭha zung zunga. 

Thei ei tuma an pan lai chuan kawmthlang lam aṭang chuan patling mangang au ri a rawn chhuaka, rang zet chuan kan tlân chhuak nghal vata. Kawmthlangpa vawk chu a lo tlân chhuaka, an lo in ûm kual ṭeng ṭeng chu niin.

Rang zet chuan puih tumin kan chhuk thla a, mipa ho chuan an hual nghal vat bawk. A vawt lah a lo fit bawk nên an in ûm kual zak zaka, man tuma an bawh apiangin alo awmsawn ṭhin bawk nên an bawh ṭhelh na lamah an mahni pawh an bal phung tawh. 

Chutah Vawk chuan Mama chu a su thal tawpa, a ni lah ke vân vawr suau in a thal huang mai. Nuih a za deuh bawk si, Mawii nên chuan an chhak aṭangin kan lo nuih a, an nilah an au nasa tawh mai. A tâwpah chuan an khung thei ta hrâma, Vawk vulhtupa pawh chuan lâwm thu a hrilh ve mawlh mawlh bawk.

An rawn chho chu an berh hlawm ngei mai “Intihfai vat a ngai a nih hi, tlawmngaih pawh hi a lo ṭha lo. Midangte ai kan chauin kan rima, a hahthlâk mai mai, lâwmman kan dawn phah dâwn pawh a nilo a, tlawmngaih hi chu eee a lo ho emai, lâwmthu min hrilha a tâwk der” ti a Mama rawn phun chho mawlh mawlh chu midang chuan an nghawk deuh sawka.

“Ngawi mai mai teh, hmanlai pipute hunlaiah pawh tlâwmngai thei chu mi fak leh ngaihsân an hlawh a sin, mi tlâwmngai lo lutuk reng rêng a rûkin miin an en dân a dang ṭhin. Lâwmman beiseia mi kan puihin enge ṭangkaina awm? Fak leh chawimawi beiseia thil ṭha tih kan tum a nih chuan mite fak ai mite sawichhiat leh nuih rûk kan ni zâwk ṭhin, tikhan keini pawh kan lâwm a, kan puihte pawh an lâwm bawka. Kan mihringpuite laka kan hmangaihna kan lantir hian vân lam ami pawh a lâwm ṭhin” Sawma chuan a lo ti duaha.

Tûnah erawh kan thil ṭha tih dâwn pawhin mi in min hmu se la min fak rawh se ti rilru ran leh fak phût rana thil ti hi kan ang ber tawh.

“Mama hi chu ngaihzâwng nei chi pawh i nilo, i thinchhe si. Milâr phei chu ngaizawng ta la an hlau ang che, i aw ringawt pawh hi khurhpui tham” Fakan a lo ti chu Mama lah chuan “A ho emai, ka duh bik lo. Milâr hian maw min phulo, tûnah phei chuan milâr ai milâr lo kan luck tawh zâwk, a chhan chu maw milar kan ngah tawh lutuka, ngaihzâwng tur an hmu sêng tawhlo. Bâkah e milâr nih hi ka châk lo, fans te kan han nei ve anga, mi an ṭan na lamah midang kan hmelma nilo pawh a ni chu i tluk lo te an va ti anga, a rûkin hmelma kan nei ve ṭeuh anga, ka duh teuhlo” a lo ti ve bui buia.

Kan lo nui hak mai, an thusawi leh an in chhân ṭhin dân lah hi a dik vei fu ṭhin bawk sia. 

U Rinpuia pawh a sawi ang ngeiin car la tur chuan a zin zuia, ka ngai leh veng vêng tawh. A tello chuan reilo tê awm pawh hian ka lung a lêng nghal zel niberin ka hre tawha, keimah pawh mak ka inti. Ka message a chhân mai loh te hian ka hlauthâwng thuaia, a online leh online loh ka check sek phah ṭhin. 

Ka beisei loh zetin a rawn haw chuan teddy bear lian ṭha tak hi min rawn hawna, min tiat ṭêp a ni. Hlim zet hian lâwm thu te chu ka hrilh ve a “I bulah zantin ka la mu thei silova, ka awm loh lai in ka ai awh tur ka lo hawn che a nih kha, kha kha keimah angah ngai la. Zânah ilo kuah lum ṭhin dâwn a nia” a tihchuan ka nuih ver vera. 

Ka pawm zâwng te chuan keimah zâwk ka bo titih a, hlim zet chuan ka room-ah khumah chuan va dahthlapin ka chhuak lehnghâl vata, “Ka lâwm e aw, a mawi lutuk. Engtin nge ka thil ngainat i hriat?” ti a ka zawh na chu min chhângin “I thil ngainat ka ngaihvena, englai pawhin ka ngaihtuah che a lawm” a ti zuia.

Hun te chu a liam ve zêl a, fur kan han thleng chho erawh kawngpui ṭha tak la awm hek lo. Khawlai chu a diak thei viau mai, u Rinpuia pawh nitin a la feh chhuaka, a rawn haw apiangin Fanghma leh thlai rah min rawn hawn ziaha. Ama zârah thlai thar ka ei ve ta reng mai. 

Fur lai erawhin ka zui ve a phal hauh lo va, bâkah keipawhin ka ngamlo. Vangvat leh Saiṭial a tam an ti lehnghala, ka feh ngam teuhlo mai, an hming ka hriat ringawt pawhin ka tî an tiza tlat. Saiṭial ngat phei chu an bet nghet thei si, vawikhat kan lui kalin ka kâi tawha. Khami hnu aṭang phei kha chuan a hlauhin ka hlau tawh.

Ka hna pawh a ni têlin a tam ve telh telha, a khât tâwkin report ka thawn reng bawk. A lehlamah erawh thingtlâng a ka thawk kher kher chu ka hahdam phah phian thung, ka thawhpui hmun danga awm ho nên kan in biakna ah pawh min awh thu an sawi fo ṭhin a. Ka nuih liam mai ṭhin thung.

Zankhat chu lêng chhuakin u Rinpuia nên chauh chuan hun kan hmanga, in pakhat kan kal pêl tur chu pangpar an lo chîng ṭeuh a. Rose par vul nalh lutuk mai ka hmuh chuan ka kal pêl thei ngang lo “U Rinpui lo ang, a nalh zia saw” tiin min chhân hman hma chuan ka kâi phei zuia.

A ni pawhin ngawi reng hian min zui ve bawk, Rose par sen leh a var inhnaih taka lo par dûn chu thliakin ka buai laih laiha “Hey, engvangin nge kan pangpar inruk? In va han nghal êm êm ve” tih ri rawn chhuah rualin u Rinpuia kai chung chuan chak mang khengin kan hmalam pan chuan ka tlân pui ta dâwr dâwra.

Ka nui pah bawk, a va han den mai mai tak. Hla fe kan tlân hnu pawhin hmeichhe âng ri leh phun hlawk hlawk ri chu ka la hre pha.

“Den ve, ka thlarau a thlâwk chhuak hmanin ka hria” tiin u Rinpuia chu ka ena, a ni pawhin rose a lo keng ve reng tih ka hmuh chuan mak ka ti ngei mai. A lawh lai rêng rêng ka hmu hoh lo, engtik laiin nge a lo lawh ve hman ni, keiai daihin a la lo tam zui. Mahsela kan tlanna lamah a pâr ṭhenkhat chu a ṭil ṭhen tawh tih a hriat.

“Engtik laiin nge i lawh? Nang hi thâwm nei miah lo in ilo lo ve a nimaw?” ka tihchuan “I duhsia lawm, nangmah avângin kan khaw nutling phunchiar ber au ri ka hmachhawn a ngaih phah kha, min hre êm lovang chu maw?” a tihchuan tlêmin ka tim ve deuh,  min hmu hman angem? Mahse khaw thim kârah chuan kan hmêl a hmu chiangin ka ring bik lo bawk nên ka hlauthâwng lutuk duh ta lo.

“Tirawh Sawma te inah kal ang, kan lêng ve ngai silo. Va en reng reng teh ang” tiin Sawma te in lam pan chuan kan inzui duna, fur lai nimahse zanin chu khua a thiangin vân ah thla leh arsi an lang tuara, a thiang mawi em em mai lehnghâl. Fur khawthiang an tih chu hetiang ngei hi a nih ka ring, a hma kha chuan romei a tam ṭhin bawk nên ral lam tlâng phei chu hmuh theih loh khawpin romeiin a bawm ṭhin a nih kha.

Sâwma te in chhûng kan lût ṭêp tihah a mah Sawma ngei chu chak mangkhengin a rawn tlân chhuaka, tualah chuan a rawn phe fua lehnghâl. Hmunphiah nên a nu chuan a rawn ûm chu niin “Lalmalsawm rawn haw nghâl rawh, mi tilui reng mai ka lo vaw tak tak teh ang che, sual lutuk. I naute ti buai reng suh ka ti che a ni lo'm ni?” a nu chuan a rawn ti hlak hlaka.

“Min vaw dawn tih hre reng chung chuan ka rawn haw miah lo ang, enge an mahni hlir thil i lei a nih kha. Ka duh ve tho, i puitling tawh min ti reng bika, hnathawk tu ber ka nia, an ni pawh Inah awmin duh duh in leia, keipawhin ka duh ve a nimai a lawm” Sawma chuan a lo ti ve bawk.

U Rinpuia nên chuan kan en tawpa, “Ngawi hle hle rawh, i ṭawng thei si. I pute Rodangnala i chhûn kher kher hi chu a pawi a nih hi, sawi tûr reng reng haih chham ni neilo, i naute chuan engmah an la thawk theilo, rawn lût vat mai teh. Hei i ṭhiante pawh an rawn kal hi” tiin a au zuia, an nufa inhau chu thinrima inhau an nilo bawk a u Rinpuia nên chuan kan lo nui ringawt bawk.

Sâwma a nu in a sawi dân phei chuan ka nuih a tiza, a dang nal a ti tak khan ka nuih a tiza lo theilo. Keimah ngei pawh hian dang nal ka lo ti ve fo tawha, a chhûngte pawhin an lo ti ve tho a nih dâwn hi.

“Ka hre reng, Hmingek enge in rawn tih dâwn? Ka rawn thlâwk thui thei viau lo maw?” a la rawn ti zuia, kan bulah rawn dingin “Lut ang u, in piangthar em ni? In rawn kal ve teh miala” tiin inchhûng lamah chuan kan in zui lût zuia.

A naute ho chu an la tê tak taka, rumpum an lo eikhawm chu niin. “Lo kal rawh u, Rina nang ni lo anga in rawn kal ve teh mial ni. I ṭhianpa lah hi puitlin tih rêng rêng a neilo, a naute thil ei zawng zawng hi a it emaw tih tur hian a awma, kha hmuh loh tur tur in rawn hmuh phah a nih kha” tiin a nu chu a nui hak haka.

Ṭhut hmun te chu remin u Rinpuia bulah chuan ka ṭhu ngawi renga, an ni erawh Sawma nu nên chuan an in kâwm bawrh bawrh mai. U Rinpuia pawh a ṭawng duh ta phiana, kei erawh sawi tûr ka hriat ve loh avâng chuan ka lo ngawi kar thung.

Rei pawh lêng lovin kan inzui haw leh ta thuaia, kan pangpar lawhna erawh kha chu min hêl pui daih thung. A neitunu kha a den êm bawk a ni, a rawn âng thâwm kha ka hre bawk nên a ân a chhe phianin ka ring.

Nui var varin rose par chu ka hnîma, ama min lawh sak nên chuan khawi tham lawih ani ve lehnghâl. “Zanin chu a nuam hle mai” tiin ka nui var vara.

Vanlam thiang kûk chu thlirin “Hetiang hun hi ni reng thei se, hlim tak hian awm ho reng ila. Ṭhian inṭhen darh hi awm thei tawh lo sela, nang leh kei pawh awm dûn reng bawk ila. Kan zavai mai hian awm ho theih renga, hlim taka in kawm khâwm a, vânglai nun hman zêl theih hi ka châk a ni” tiin ka phun sap sapa.

“Duhthusam thlen tir tu i ni em ni? Tinge ka hmuh apiang che a duhthu ka sam ṭhin, suangtuahna thlen dik tir tu i ni em ni? Ngatinge ka hmuh apiang che a suangtuahna ka neih ṭhin ni?” a rawn ti sapa, a thusawi chuan min fan raih raih bawk.