DUHLAI ZORINPUIA CHAPTER 9

DUHLAI ZORINPUIA CHAPTER 9 

Ni a liam ve zêl a, ka ke pawh a dam ve telh telh bawk nên ka hlim ve viau mai, u Rinpuia ka nat chhûng zawngin ka bulah a awm ti ila ka sawi sual lo ang. Chhûnah erawh buh tuh leh sawhthing lingin an feh chhuak ṭhin a, ka tel ve châk tawh bawk nên sawhthing an lin zawh hma a feh ve chu ka tim bur bawk.

Tûnah pawh ka ke chu a na tawh hauh lova, u Rinpuia hian min la khap lo se chuan ka feh ve tawh hial ang chu. Zânah a hman ve in a rawn lêng a, chhûn lam erawh lo lamah net signal a awm loh avângin kan in be ngai meuh lo.

Ka nun chu a hlima, ka kum 24 chhûng ka lo hman tawha tûna ka hun tawn mêk aia hlim leh nuam hian ka la hmang ngailo, ka nunah lungngaihna a awm ve lo ang mai ni hian ka hre ṭhin, u Rinpuia min ngaihsak êm vâng te pawh aniang, ka bialpa lo neih ve tawh ṭhin ah a ni aia min ngaihsaktu an awm hek lo.

Mawiin min rawn call avâng chuan chhâng vatin a thu rawn sawi avâng chuan ka nui haka, tûn lai chu ani pawh a feh deuh renga. Inah ṭhalai awm an vâng bawk nên keipawh ka vâk chhuak ngai meuhlo, inah ka inkhung tawpa, chhûnah chuan thingtlâng chu a reh tih piahlam a ni.

“Naktukah lo lêng la kan sawi dûn dawn a nia, feh i tum loh chuan lo lêng rawh. Keimahte chauh chuan a ninawm tawh riau mai, ka khua a har bawk si, u Rinpuia lah hian feh ve ka tum pawhin a phal siloa, nizân pawh ka ngên luia, ka chalah min pen sak fawk a lawm” ka tihchuan a rawn nui vaka, 

“A duhloh zâwng in i awm lui a niang chu, bâkah i chauh mai te pawh a hlau ve dâwna, lui kal vat te kha kan duh bawk sia. A ngaihtuah ve che a niang, ṭawng vak lah kha a hreh hmêl thei sia, biak pawh hian min bûk khum ringawt zela ” a rawn tihchuan a dik ka ti ve thoa, mahse feh chu ka châk zâwk tho tho.

 “Ani tho mai, ka bulah hi chuan a ṭawng tam ve thei reuh lutuk. Min han zilh tak tak ṭhin erawh ka inthlahrung duk zel, a thutak thei nasa mai sia. Speaker te hi nise a inhmeh ngawt ang” ka ti a.

“Um a inhmeh viau ang, a thusawiah mi an piangthar duh viauin ka ring a sin, keipawh hei menrei a phallova. Inhlat viau mah ila ka duh ve hlarh hlarh bawk sia a thu ka zawm rih mai a ngai a nih hi, a mu hma thei sia rei ka men a phal ngailo. Kan inṭhen hma pawh khân a ni tho, ka last seen check hi a ti ve ngei zela, a thawh hma in ka thawh khalh leh hman tho sia” a tihchuan ka nuih lo theilo.

Last seen hide a phallo a ni ngei anga, mengrei pawh nise a hmuh dâwn loh tawp chu. “I menrei pawhin zîngah i thawh khalh chuan a hmu hman chuang nâng” ka tihchuan a rawn chhâng leh rang hle.

“I sawi duh, zîngah i thawh veleh in min rawn call rawh hi a tia, mahse a la thei ngai lo. A thawh rualin min rawn call veleh a, a muthlu leh ṭhin” tihchu a rawn sawia, a bialpa mizia chu ka lawm zâwng tak. Kai tho tura ti ve si tho leh thei chuang lo chu ngaihtuah chian hian nuih a za zâwk.

“Kan mu phawt ange, min hre dâwn lo mahse a thu zawm ve hi ka duh sia, bâkah menrei lutuk chu ka chau bawk nen naktuk chu ka rawn lêng dâwn a nia, lo lam kan zo tawha” a tihchuan ka lo aw ve vata, u Rinpuia pawh a message a rawn thleng chiah mai, Mawii nên kan in callna chu ti tâwp in ka seen zui vata.

“Ka inbual leh lawka, i mu tawh em?” tihte mai chu, a aw ka hre leh châk bawk nen ka call ta tawpa, a rawn chhâng rang viau mai.

“Aw duati” a rawn ti supa, ka nui leh sak mai. A aw hi chu hriat a nuam ngawih ngawih, a dam raih bawk sia “I mu tawh em? Min rawn be har ka ti lutuka” ka tihchuan “Um ka thlen veleh ka inbual nghala, chuvang a nih kha. Vawiin chu ka chau deuha”  a sawi pah chuan “Heiha” a ti kher leh nghala.

Ka nuih a za deuh viau mai “I chau viau a nih dâwn kha, thawk nasa lutuk lo la. I taksa kha duat rawh aw, tûnah i tân tih theih vak ka la nei silova, indim deuh khân che rawh aw. I thawh nasat lutuk chuan nakinah nangma tân a la pawi dâwn a nia, nitin i thawk thei thova. Ni khatah hah lutukin thawk suh aw, keipawh naktuk ka awm leh anga ka lo pui ang che,” ka ti zuia.

Thiam em em lo mah ila a tih en tawna ka thawh phawt chuan tlêm tlêm ka lo puihna pawh kha a ṭha tih ka hriat chian êm vâng a ni, a nu leh a pa lah hna thawh tir a phal tawh der bawk silo. Amahin engtin nge kumtin lo a enkawl peih zâwk ni? Kei chu ni ila kâr khat pawh ka nei peihin ka ringlo, an lo neih dân phei chu a hahthlâk hmel si.

“A ngailo ka tih tawh kha tunkar ah chuan kan zo thei ang, inah khân awm mai mai rawh. Hna hrâm thawk chi pawh i ni ve lo, khua a lum lutuk tih i hriat kha, bâkah puak i ngai leh palh ang” a sawi pah chuan a han nui ri suka, kher chuana sual lutuk mai.

A va han ngeiawm ṭhin tak “Ka ngai tawh âwm lo emai, ka infuih nasa a lawm. Mawii te ho pawhin an tih theih chuan ka ti thei ve âwm emai, bâkah thil chu thiam tur leh ngaia neih tur chuan thawh tam angai an tihkha. Ka tum a ruh ve emai, ka thiam âwm hrim hrim, vawiin chu hotute lamah report te ka pe leha, a khât tâwk bakin a ngai lo bawk a ka hman leh var var tawh ania” tiin phûr aw chu ka chhuaha.

“Duati ka bula hnathawk turin ka duhlo che a ni miahlo, mahsela ka ngaihtuah che tih hria la. I dam loh leh chuan ka duh dâwn hauh lo a nia, tikhan in lamah khaw mipui te ban reng theih tur khân awm la ka duh zâwk, lo a zau lutuk lo tih i hriat kha” a rawn tihchuan ka ner saka.

“A zau reng, ka hmu ve bawk. Ka feh chu phal mai rawh, min ngaihtuah ang chiah khân ka ngaihtuah che. Nangmah chauha khawhar taka hna i thawk kha ka khawngaih che a lawm; keimah ka tel ve chuan a rehlo deuh anga. Lo a hla si a reh zia ka hre ve reng a lawm, thu awih deuhin awm mai la” tiin ka hrilh dap dapa.

A ni reng bawk, a khua a har dâwn si. Engtin nge nilenga mahnite chauha hnathawk tura ka dah theih ang ni? A thawk ṭhang tihchu hre mah ila chau taka a rawn haw ṭhin hi ka khawngaih bawk si, a duh leh over pawh min ti rawh se pawi ka tilo, ka ngaihtuah miau a lawm.

Duh mai nilovin ka hmangaiha, a hrehawm lai hmêl hmuh hrehawm ka ti lutuk tlat “Mingming” a mi koh dân avâng chuan a lung a awi leh vak tawh lo tih ka hria, a aw chu a la dam dap reng tho. “I chhungte ngaihdan pawh a nilo ang, keiin lo chhawr chiam che ila an hauh phah thei che” a tileh chu ka chek hlaka.

“A ho emaia inah ka inkhung tar ṭêp tawh a nih hi, engmah an sawi dawn lo. An hre vek a lawm, ih maw i chau hmêl hmuh hi hrehawm ka ti a lawm, i sawi kha in ngaizawng satliah kan nilo tih i sawi fo kha. Keipawhin ka ngaihzâwng satliahah ka ngai thei lo che, ka hmangaih che a. I dai chin daia, i ruala ke pen ve zel ka duh ania, kan awmdun tama, engkim kan tihdun hian kan kar a nghet zêl dâwn a lawm”tiin ka sawi zawm leh zata.

Ni e, mi pahnih inkârah chuan inrintawnna leh awmdun tam te hi kan inkar ti ṭha tu a ni. Inhmuh khât leh inbiak khât te hian ngaiah neih chin a lo awma, kan inthlakhlelhna bovin dân pângngai anga ngaih hun a awm a. Chu chuan mi pahnih inkar a tichhe ṭhin.

“I luhlul ngil ngel bawk sia maw” a rawn ti ta ngawta, ka nuih lo theilo. A thiam ang tâwkin min hnial ve hi a tuma, keilah ka lo ṭawng thei bawk sia hahthlâk chu min ti ve thei ngawt ang.

“Luhlul e, ka duh loh zawngah chuan ka luhlul lutuk. Tumahin min tilui theilo, nangmah pawhin duhlo tur che in min han ti la maw, ka zawm miah lo ang. Nangmah duhloa hmangaih lo tur che pawhin min tilui theilo, muttui phawt. I mut a chhuak tih ka lo theihnghilh palh, mangnuam deuh mang rawh aw” tiin a chhânna pawh ngaichâng tawh lem lo in call chu ka dah zui daiha.

Thawveng zeta khumah chuan let huar huarin in chunglam melh chuan ka nui var vara, tûnah chuan thawnthu a mi ang chiahin thingtlâng tlangvâl zûnah ka uai ve ta chu a nia, suangtuahna mai mai chu a ni biklo a lawm.

Khawiah emaw kan suangtuahna ang mipa chu a la biru mai mai anga, thawnthu mai nilo in a tak thawnthu ngei min ziahpui turin kan la tawng mai thei a sin, tiin ka ngaihtuah fo zêl. Mihring kan tam tawha, mizia hrang hrang, hmêl inang lo tak tak kan awmna khawvêlah hian thawnthua kan hriat ṭhin mipa hmangaihna leh dawhtheihna ngah mi chu an lo inphûm ru ve in ka ring tlat bawk.

Ka mipa suangtuah ṭhin chuan ka kutah chelhin phûl hmun leh pangpar mawi zet zet parnaah min kal puia, hlim zetin ka suangtuahna ramah min chenpuiin ka nun chu a tak ram aṭangin a hruai pênga, suangtuahna. Lungngaihna leh ṭahna awm ve ngai rêng rêng lohna hmunah chuan kan pahnih chiahin min awm tir ṭhin.

“Muttui, vawikhatmah chhân lêt hma che in phone dah tawh suh” chu message ka hmuh rual chuan ka nui chhuak haka. A ṭawng ve hmaa ka dah chu a la na ngang a nih ka ring, a lungawilo tur hmêl ka suangtuah thei. A mengrum thei nasa mai sia, keimah te pawhin ka nui ka nui mai.

Ni e zan dangah khatiangin ka ti ngai lo miaua, mak a ti rêng ang chu. “Aw le, ka dah tawh miahlo ang muttui le” tiin ka thawn zuia.

A seen leh tawh chuang lo, a mu nghal a nih ka ring. Chunglam hawi vang vangin ka ṭawngṭai zuia, ka tân mai bakah ka chhûngkaw tân leh ka bialpa tân chuan ka dil bawk, a duhzawng leh a duhdân ang taka nun kan hman zêl theih nân a ni ka dil ni.

“I tho tawh em? Zo, Zoi” Mawii aw ka hriat avâng chuan ka mutui lai chu mengchhuakin ka innuai chat chata. “Aw ka lo kal” tiin ham buai buai pah chuan room aṭanga chhuakin ka pan zuia, kawngka ka hawn rual chuan tumbu leh Khanghu vêl hi a rawn khaia.

“Kha hei hi la rawh, chawhmeh tur ka ute lui kalin an rawn hâwn a, i duh ve ringin ka rawn pe tawp che” a tihchuan ka lâwm ngei mai. Ka chawhmeh ngainat ber ber lehnghâl, tumbu phei chu ka va han siam châk tawh tak.

“Awi ka lâwm lutuk, chawhmeh tur a vâng sia dâl hlir mai han hmeh chu e a buaithlâk” ka ti chu a rawn nui haka. “Dal hlir a nih loh kha aw, in pa in sa a kah zauh zauh kha. Hleh lo che chuan an awm dâwn lo hrim hrim” tiin a nui har hara, ka nui veleh ta ringawt bawk.

Ni e sa a kah a piangin min pe ngei ngeia, a mahin a nih loh chuan a nu in min rawn pe ṭhin. An mahni avângin ramsa sa chu ka nghei lo tluk a ni, a nu lah in fanu ang tak takin min ena, u Rinpuia ai pawhin min duat zâwk ti ila ka sawi sual kher lovang. Min iaina an nei hauh lo tih a chiang bawk.

“Nangpawh i bialpa nei leh ta chu i chimawm sâwt riau mai, in inhmuh har hmêl mai sia maw” tiin ka mit chu ka siai zauha.“Awi sawi suh, ni ṭha chiah e tilo in kan inpawh lehnghâl em ema, tukin pawh hei kan in be zo chiah, chhûnah hi chuan kan inbe hman ṭhin lova, hna kan thawk ve ve bawk sia. Tlaiah leh zânah a ni leh tlawng mai” tiin inchhûng lamah chuan kan inzui lût a.

“Hlauhthawnna erawh ka neilo theiloa, a hma ang mai khân min awm sanin ka nat leh ka hlau ber. Keichu mi hi ka duh mai mai ngai lova, ka mize milpui tur hi ka duha, min bemtu naran han nihpui nghal ngawt te. Ngaihzawng te ṭhen ruala runluih nân midang han nihpui te hi ka theilo, ka thawnthu ziah vâng leh chhiar ṭhin vâng hi nge ka duh miahloh nihpui te hi ka theilo” a tihchuan dik ka ti viau.

Keipawhin ka thei miahlo, tam tak hi chuan kan duh tak tak loh pawh ngaihzâwng neihloh ai chuan tiin kan han nihpuia, rei kan tlin leh lova. Kan nihpuia ten min lo duh viau phei chuan an rilru kan tihnat sak mai maia; chuvâng chuan rilru kan pêk theih loh tur hi chu nihpui lo mai ngam ila ṭha ka ti.

“I duh viau a nimaw?” ka zawhna a vâng chuan lai zet hian a nuia “Um duh mai nilo ka hmangaih ni ber in ka hria. En teh maw, keichu hmangaihna hi in kâr hlat leh hlat loh hi a nilo ka ti ve tlat, in hmu pha reng in hmangaihna chu a tam, mahse khua hmun miahloh hmangaihna pawh hi a nêp bik ka ti phallo, inthlakhlelhna hi a nasa daih zâwk, keimah aṭang hian ka hrechiang khawp mai. Khuaah hian ngaihzawng chu ka nei ve tawh; mahse tuna ka mi tawn nên a ka hlimna ang leh ka duhna ang hi ka nei ngailo” tiin a phone a en zauha.

(A MIPA HMING HI KA ZÊP DAWN AW😄KA TRUE STORY KA TIHKHA, IN HRIAT VE CHILOH, ṬHENKHAT CHIAH HRIAT CHI🤭) 

“Kar hla mahse ka hmangaihna hi a nêp bik miahlo ang, ka thlahlel lutuk te hi a mak zâwk. Keichu mi phone a biak reng te hi ka ninga, message pawh ka seen ṭha peihlo. Mahse a ni hi chu ka be châk renga, a message ka châng ngar ngar zel, ka nun a thlâk danglam vek a ni ber mai, ka mizia ni ngai miahlo min neih tir tu a ni ka ti ngam sak” tiin an inbiakna chu min hmuha.

A mipa zia langtlang reng rawng tak chu ka duh chi tak a ni, zêp hauh lovin engkim a sawi ngam lehnghâl. Mawii lah a hlim hle tih a hriat reng bawk si, ka lawmpui tak zet “Chhuah tawh miah suh, man bet tlat rawh. Vawikhat tal hmaichhanah in hmu thei ula ka duh pui che u, in inkar pawh a nghet sawt in ka ring” ka tihchuan a bu nghata.

“Kan inhlat mah maha, in hmu dâwn ila a kual thui ve reuh sia. Sumo chuan man ringawt pawh hi a sâng sia, inkhawl phawta in hmuh chu kan tum ve alawm. Amah phei chuan hna neih phawta inneih a duha” tiin a nui ver vera, “Kan inrual chiaha innei ila kan naupang mah mah angem le? Mahse kum 22 chu a hun ve tawh thoa, kum 15 ah pawh inneih an ngam tawh a lawm tiraw? Ka hmangaih tho chuan ka hnial duh tawhlo” a tihchuan ka bûk pui nghat nghata.

Tûn angah chuan kum tlin hma a innei hi kan tam tawh emaia, a ni phei chu a hun chiah zâwk.

 “Nei hmiah rawh, kum 20 kan tlin chhauh phei chuan kum hi a in up chak sia, upat lutuk hma a neih vat vat hi a him ber. Pasal neih har lutuk pawh nau neih lamah a harsat tawh bâkah, Sawrkar hna nei kan pasalte an nih loh phei chuan tar a hnu lamah fate châwm a la ngai dâwn a, a peih awm loh emai” ka ti chu a bu ve nghat nghat mai.

“Nia, mahse chu eng emaw buaina a awm leh ang tih ka hlaua, neih chu ka hnial miahlo. Midang lakah ka rilru ka pe thei chuang silova, hetianga kan awm leh a nih rau rau chuan inneih mai pawh ka pawi tilo, mahse ka chhûngte hi ka ngaihtuah ve ṭhin a. Kei leh ka nau bak kan ni tawh siloa, ka awm loh leh zêl chuan ka nu leh pa te an rethei dâwn lutuka, ka nau lah rin chi a la ni silo, a lehlamah chuan pasal han neih pawh ka hreh phah ṭhin” a tihchuan ka hrethiam viau mai.

A nu leh pa an upa ve tawh si a, an unau lah hmeichhe rual niin pasal an neihsan vek tawh lehnghâl. A mawhphurhna a sâng ve rêng a ni, ka khawngaih zâwk tihian lehkha pawh zir zawm theilo in a chhûngte enkawl a ngai chu a ni sia le.

“Um mahsela engtikah emaw chuan i la neih ngei ngei a ngai dâwn a lawm, i hmangaih phei chuan midang tân i phal dâwn silova, hringnun a ni miaua. Kan hman thiama, huaisen taka kan hmachhawn a ngai fo asin, mahni hma hun atân a ni ve a, i nu leh pa pawhin an hre ngei ang” ka tihchuan a bu nghat nghata.

Kei ngei pawh kum 24 ka hmang ve mêka, thingtlângah phei chuan mi an ngai senior hma sia kohhrana in hman ngat phei chuan a ni leh zual. Bâkah naupang te te a pasal kan neih fur avâng hian thingtlangah phei chuan kum 20 pelh chhoh chuan mi an ngai senior duh lutuk an ti rênga.

“Nia mi lah hi pasal nei tawh rawh, pasal neih i hun tawh an tiseka, a châng chuan ka ning ṭhin. Neih an châk viau leh an mahni in nei mai sela, mi nei duhlo nei tura in ti reng ringawt. Ka ngei thei a nia aw, tihlet hrep ka duh ṭhin, mi nulât nuam ti pasal nei tura in nawr reng hi chu an ngeiawm ve thlâwt alawm, an mahniin duh leh nei sela, mi nei peih rihlo na na na lo in nawr ve sek te hi ka ninga, han ti lêt ila mi an rêl hrep zel lehnghal” a ti duah chu ka lo nui hak mai.

Kan vawisawm thil ṭha tih aiin vawi khat tihsual hlek pawhin mi mit a la in, mi hian an hre thei zâwk si. Mihringte hi kan mak ka ti ṭhin, mi ṭhatna lai hmuh sak duh hauh lovin an chhiatna lai chiah kan inhmuh sak hlawma, midang faka an tlinlohna lai hmuh kân mai kan theih ṭhin loh avâng hian kan buai lohna tur ah kan buaia, kan hmelma leh mi rawn sawichhe tu pawh nilo nen kan inhuat phah fo a nih hi maw.

“Ka haw phawt ange, chhûnah chuan ka rawn lêng dâwn a nia. Ka chhungte'n chaw ei turin min lo nghâk reng tawh ang, ka awm loh rei hi chuan mi an rawn phone vat zel bawk sia, chaw ei tui phawt aw” a tihchuan lo chhâwn ve in kan in vai liama.

A haw hnu lawkah u Rinpuia a rawn lang veleh hlawl mai, zawhna nêna ka lo en ha chu min rawn enin “Zawh duh che ka nei” a rawn ti tawi taka. Eng tak chu ni ang maw? A lungawi loh hmêl bawk sia ka awm a ti nuam lo e a.

“Rintluanga nên in inhmu em?” a tihchuan ka hawi hai hle, engvanga chutiang thu rawn sawi nge maw a nih le? “Enga tinge?” . ka tihchuan a rum nghuta “Niminah i hnathawhna ah a pui che a, in nui dûn vêl ani lo'm ni?” a rawn tih tâkah chuan ka hrechhuak zawk mai.

Hna kha ka inkhawih pui mawlh mawlha, chungin ka lo ngaihven vak lo bawk nen ka lo bo deuh chu a âwm ve tho mai. Tunge lo hrilh kher kher ni, thik chhan tur a awm lo ropui si.

“Eeeee ka hre leh si, min pui mai mai a lawm. Tûm hmukin bia ila in khaw mite'n mak min ti dawn a sin,  bâkah chutiangin ka nuih vêl lo” ka tichu inchhûng lamah min pawt lût dawr dawra, a ngaihna hrelo zetin ka zui ve zel ringawta.

“A bialnu hual te a ti che, ka duhlo i hria em?” a tileh chu ka nui ta saka, hepa pui hi thik a neilo emaw ka tia. Mahse thikthu chu a lo pe chhe ve tho a nih hi, “Nui suh ka ngai ho ve hauh lo a nia” a tihchuan ka nui tâwp riai riaia, chutah thutak zâwk hian “Ka bialpa hual a ni ve hleinem, a niin min bialnu hual ringawt a nihchu, bâkah ka duh chi pawh a nilo” ka tileha.

A hmêl chu tlêmin hmuh a nuam ta deuh “A hrim hrimah a beisei theih tur in i lo awm te a nilo maw? Ka ute bulah te a lo sawia, ka duh miahlo. Hnaih leh tawh suh ang che” a tihchuan ka bu nghata.

“Khawi maw min lo en teh, ka duh chi a nilo ka tihkha; chubâkah nang i awm tawha mipa dang ka mamawh lo. Ka thinlung ka pêk tawh che hi tu tân mah hlan leh ka phal hleinem, i kiangah ka awm reng dawn a lawm. Ka hmangaihna che hi a ngheta, hmuh hnuhnun apiang duh mi ka ni ve lo, ka thlâk danglam ngai lovang, chumi avâng chuan i lo thinrim vêl a maw? A nu ai a rawn awh mai mai a lawm” tiin ka kuaha.

A la tûm bur mai “Ka thik tho tho” a rawn tichu ka nuih leh hak mai. A va han duhawm tak, ka piai nawk nawk châk lutuk, thu tam sawi silo hian a lawmawm tawp hi a nimai, a che dangdai thei bawk si hi min ti hlim tu ber a ni.

“I cute e, thiktur i hmu lo lutuka min duh lo emaw ka lo ti a sin, mahse tûnah chuan i thikthu chhia ka hmu ve ta a lâwm” tiin a mita en chuan ka nuih var vara, a hmêlṭha leh pek tawh hle. Zîng karah pawh a chhelo tho a nih hi.

“A chhe reng, ka sawi duh lo mai mai a lawm. Ka thikthu a chhiat viau chuan min nina min kalsan daih te ka hlaua, mipa thikthu chhe lutuk kha i duh siloa” a tihchuan a hmaa ka thusawi a lo la chhinchhiah reng tih ka hre mai, thil a hre rei thei zek lehnghâl.

Lehkhathiam tih takah a thluak pawh a ṭha narawh, “Um i nihna ang angin lang rawh, chuan tia i thikthu a chhiat hian i lawmawm ka ti,” tiin a khabe ruh kual vêl chu ka chulsak riak riaka, a hmaifang hi a fuh thlâwt a ni.

Ka bialpa mahnise ka phulo te hian ka hre fo mai “Ka hmuh tirh aṭang khân ka ta ni tur atân ka awt che a, i mizia ka hriatchian tâkah phei kha chuan hmeichhia ka ngaihdan i thlâk danglam vek bawk. I nui hmêl leh zak deuh taka min ena min be ṭhin te khân min hneha, ka ta ni tura ka awh leh hmasak ber i ni, ka tân i pawimawh zia hi in hre fo la, ka duh lo che in ka ngaihsak lo ah che ngâi ngai suh ka tih che kha, keimahah rinna nghat tawp la. Ka rinawm zia i hre zêl mai ang” a tihchuan ka ring lo phallo.

Zîng kârah mipa dang ka nuih vâng ringawtin a rawn kal hial a nia, min duhlo ka ti ngam teuhlo. Min duh lo chu nise engah mah a ngai tawp nâng, “I hmangaih hmasa chu tluk kher dâwn lo mahila ka theihtâwpa hmangaih che ka tum a nia aw, a ni nilovin keimah ngei hian ka hmangaih zâwk zia che ka fiah zêl ang. Tina tu che khân a phu loh zia che ka hriatnawn tir ṭhin ang che, i hmangaih chu tluka khûm ka tum kher lo, mahsela englai pawha i tâna awm ṭhin nih ka tum tlat a ni” tiin a âwmah chuan ka beia.

A châng chuan mipa chêt hun nghâk lo hian hmeichhia kan chêt hmasak fo a ngai ve ṭhin. Englai pawha bul ṭan hmasa tu zâwk nih kan hreh em em reng chuan pakhat tân ninawm tih hun a lo awma, ninawm chan kan chan tawh chinah chuan thil a hma angin a awm thei tawh lova, inthlakhlelhna a kiama, induhna kha a dai ta thuai ṭhin. Kan inhriatchian tawna, kan inbelhchian pauh leh keimahniah kan mizia nên zawng zawnga indawh tawn turin kan infuih thar leh ṭhin si a.

Ka hmangaihna hi engtiang chiaha thûk nge a nih ka la hrelo va, mahsela chân ka hlauh hluah hluahna hian a nêp loh zia erawh a ti chiang viau thung. A harsatna chhâwk zângkhai tu nih ka duha, a lungngaihna leh manganna ṭawmpuia a tana awm reng thei nih ka duhna hian hmangaihna in engkim a huam thui zia min hriat chian tir leh ṭhin.

“Nizan chu i mutui em?” tiin thudangah chuan ka pakai puia, a ni pawh a rawn bu nghat mai. “Nang zâwk, ka mut hnu khân i meng em?” a tihchuan ka lu ka thing nak naka, ka rilruah Mawii leh a bialpa an rawn lang nghâl, Mawii thusawi ka ngaihtuaha u Rinpuia nen hian an inan hmêl riau lehnghâl.

“I thu ka âwih a lawm, bâkah men rei ka theilo, ka mit ana zela. Vawiin chu i feh dawn ta em?” ka chaw chhuan a hmin tâk avâng chuan mi chhan hma in ka han suan thla thuaia.

Kan awmdân hi nupa kan ang ka ti riau zel, ngaihtuahna mâwlmang tak nimahse a ni nêna inneih chu ka duhthusam ber a ni bawk sia. 

“Feh leh ang,fur a thlen tak tak hma hian thawh zawh zung zung a ngai a nih hi, nupui neih chu ka mamawh riau mai” min fiam tih ka hre mai, a chhan pawh in hriatchian tawn phawta inneih chauh kan tum miau a lawm.

“Chu palai i rawn tir mai dâwn em ni? Mahsela miin zui pawh inzui reilo in an innei nghala ’te min tih a hlauhawm sia, chubâkah min ma rang leh lutuk anga a chi loh ang, tihian han inzui phawt ila nakinah hlim takin kan la awm zâwk ang chu. Tûnah rihchuan hetia awm mai mai hi a nuam a lawm” tiin ka fiam lêt ve saka.

A lehlamah a naupang zawk zawk tawh bik lova, nupui neiha fa neih a châk ve tawh pawhin ka ring, mahsela kan zia in hrechiang tak tak lova inneih ka duh teuh silo. Inngaihzawn lai hi chuan kan in zah tawnin thup ṭhen kan nei ṭhin a, inhre chiang tak tak tur chuan kan inzui rei ve te pawh a ngai.

“Mi sawiah hian buai loh tur, kan pahnih inkar chiah ngaipawimawh ila a ṭha mai. Midang kan ngaih pawimawh lutukna hian kan nih tur ang leh kan nihna ang ah min siam thei ṭhin lo, keimahni min tichhetu hnar a ni ṭhin. Mi thusawi kan ngaihven tlat chuan mahni bakin kan tuar lo, chuvang chuan tumah hi va lungkham vak loh tur, chutih rual erawhin kan zah ve tur an ni bawk. Ka haw phawt ange, mipa dang kha lo hnaih tawh hauh suh” a rawn ti leh hrama.

“Ka hnaih tawh dâwn lo, nangpawh hmeichhe dang hnaih ka phal hauh lo a nia aw. Ka hmuh dun vaih cheu chuan nang ai ka rapthlâk ang” ka tichu za tak mai hian a rawn nuia, pâwnlam a pan phah bawk. Ka thusawiah khan nuih tur chiam a  awm pawh ka hrelo a sin mawle.

A kal liam tur ka thlir reng lai chuan a bân rawn vaiin a mit min siai khera, a va han chimawm ṭhin tak, nui hak hakin inchhûng lamah chuan ka lût zuia.

Amahah hian sawisêl tur ka la hre hauh lova, miin ka hmuh dân min zâwt se hetiang hian ka chhâng ngei ang, a duh loh zâwngah chuan sakeibaknei pa ang mai a ni a, a aw erawh zawhte note hrâm ang maia duhawm a ni thunga, a nui hmêl chu thla êng ang maiin a mawia, a thawhrimna chu tlâng ang maia nghet a ni bawk, a hmêl rorum hmêl tak phêna a thinlung erawh lunghlu ang mai a ni thung tiin.

Ka chaw ei kham chuan phûr zetin Mawii lenga va sâwm tumin ka kal chhuaka, ka ke a dam tawh bawka chu chuan min ti hlim bawk nên ka tlân titih a, ka sawt pah euh euh bawk. Min hmu a piang chuan min lo bia a, hlim tak chuan ka chhâwn ve zel bawka.

Ka kal leh tur chiah in pakhat tual ka kal lai chuan ka hmaah arpui nohruai a rawn lang thuta, ka lo kal chak bawk nên ka in vêng hman tawhlo. Ar note la tê zet mai chu ka rapa, a la puak ri pep zui, “Awi leh! Ka duh theilo” ka ti chhuak sapa, arte chu a thi chiang hle tih ka hria, chutah a pui chuan min lim tumin min ûm zuia, ka au nghâl tuar tuar mai. A ni lah chuan min ûmzui char char lehnghâl, a neitupa in min lo hmu ve renga, arpui chu min rawn ûm sak tâkah chuan ka thaw huai mai.

“Ka....pu...ka tihluih ..a nimiahlo” ka ti bah deuh nak mai, min rawn hau dâwn emaw ka tihlai chuan “Aaaa.a pawilo, kha kawng laiah an lo awm bawk si a, mahsela tûn hnuah chuan fimkhur tawh la aw. Kha ar pum khat i rap hlum der a nia” tiin a nui vur vura, ka inthlahrung zual ngei mai, ka vah chhuah apiang hian ka che chhe thei lutuka ka awm pawh a nuam tawhlo.

“Ka tlân laklawh sia a lo lang thut bawk nên ka tihpalh lutuk” ka ti nawn leha, engtin tak min rawn hau ang maw ti a ka ngaihchân lai chuan a rawn nui hawk hawka.

“A ho lutuk, i hmêlṭha emai ka ngaidam ang che. Bâkah Zotea ṭhiannu te i ni ve si a, he khaw mo tur chu kan duat i ngai a lawm, kha a pui in phuba a lâk tawh tho kha maw. Ngaihṭha deuhin awm rawh” a tihchuan ka lâwm ngei mai, lawm tak chuan ka kal sawn zuia, helai chu khawpui angin ran khuahkhirh a awm ve lêm lova, eng ran pawh an zalên bawk nên fîmkhur a ngai tawh viau ang.

Mawii te in ka thlen rual chuan in chhûngah ka lût vata “In awm maw ka lo lêng Mawii a awm em ka nu Than” tiin ka zâwt zuia, a awm ngei chu ka ringa. Ka hawi kual nghâl thuak thuak bawk, an in ah ka lêng ngun ve tawh bawka a nu leh pa nên pawh kan in pawh viau mai.

“Awm e, lo ṭhu rawh Vawk chaw a pe lawk a nih kha” nu Thani chuan a rawn ti a, keipawh chu ṭhu thla nghâlin “Vawiin chu lo lêng sela ka tia, in phal em? Keimah chauha in awm reng chu a khawhar thlâk bawk si a, an feh daih zêl bawk sia. Vawiin chu ka in lamah lo lêng sela ka tia” tiin ka sawi dap dapa.

An nupa chuan an in melh zawka “A pawi na pawh a awm chuang lo, chutia nang berin ilo sâwm te chuan va in kâwm rawh u, helaiah chuan ṭhian a nei vak bik lova. Nang i rawn awm hi a vânneih thlâk, a ṭhiante lah hmun dangah an awm vek bawk si a, ṭhian hi a ngah lo khawp mai” nu Thani chuan a rawn ti zui zata.

Mawii pawh a rawn lang har lo, in chhûng a rawn luh chuan a kawr vêlah chuan Vawk chaw ni âwm tak chu an kai fura, amah pawh a kut nên a berh vek lehnghâl.

“Ilo kal elo? Tikhan lo ṭhu rawh kan inti fai lawk ange aw, ka reilo ang, nu vawiin chu Zoi inah kan inkawm mai mai dawn ania aw. Tih tur a awm rih chuang lova, ka lo haw har lovang tlai lam ei rawngbawl hunah ka lo haw dawn a nia” a ti zung zunga.

A nu pawh chuan a lo aw ve mai bawk, a tu a te pawh hi ka chungah an ṭha êm êm veka, khawlaiah han chhuak ila tumah ka biak hmasak an ngailo, an hming ka hriat lohte chenin min lo hria a. Ka inthlahrung zâwk, keiin an hming ka hriat loh laiin a khaw pum hian ka hming hrelo chu an vâng viau in ka ring.

An tlangvâl te lah an fel, a ṭhen rilru kawi deuhte chu awm mahse tumahin ṭawngkam mawilo in min la be hauh lova, u Rinpuia nên kan in ngaihzâwn thu pawh hi an hre leh deuh vek tawh tih ka hria, thla a tling ve lek lek tawh bawk nên hetiang khawlian lo ah chuan nikhat chhûng lek pawhin thu a darh chak a, a ṭha zâwng leh a chhe zâwng pawha lâr a awl viau ngei ang.

Mawii rawn chhuak leh chu hmanhmawh zet hian a che zui mawlh mawlha, a hmanhmawh lutuk chu a nu chuan a hau leh rih ṭhin. Keipawhin chutia a awm chu mak ka ti ru viaua, engmah erawh ka sawi lêm lo thung.

“Kal ang” a hman rual chuan pâwn lamah min kai chhuak zui dâwr dâwra “Tinge i va hmanhmawh ve a” ka lo tih lai chuan ṭawng ring lo tura min tiin “Ka khawvel nutei a rawn kal dâwn a, a awm loh laia chhuah ka duh a lawm. A awm chuan min khap leh anga, nula lêng chuti khati a ti leh anga, ka nu leh pa hian ka rawn lên an phal lo nghal a nimai, chuvang chuan kal vat ang, a rawn zin peih sia min hau tur ringawt te hian a rawn zin ṭhin mawle” tiin a nui zui kar kara.

Keipawh ka nui lo theilo, a nutei chu ka nitei nên an in ang vêl dâwn hian ka hria. Ka nitei pawh ṭhian ho a kan lêng chhuak te kha min hauin nula tih atân a mawi lo kha a ti sek ṭhin a, ka nu leh pa bulah a sawi peih bawk nên a châng kha chuan biak hrep ka châk ṭhin, hetianga thil tih apiang min sawisêltu an awm hi chuan an ngeiawm hi ka ti a, runluih ka châk zual sauh zel, a in lâk fel thlâk ka ti.

“A nih chuan kal vat ang, tukin chu u Rinpuia a rawn phun nasa mai, Rintluanga nên kan hnathawk tlâng infiam vêl kha tunge lo hrilh leh hman ni, a rawn thinrim lutuka, mahse ka hrilhfiah tâkah chuan a hrethiam veleh mai. An ngeiawm ka ti a nia aw, mi hnathawk tlâng mai mai pawh an lo sawi duh ania” tiin kal pah chuan ka phun hlak hlaka.

“Aaaaa ṭawng thei tak tak hi an tam a lawm, mi chanchin sawi lama dang nal deuh hi kan kawl ve nuala, a zawng zawng chu an ni bik lova. Nu ṭhenkhat mi fate nuna buai deuh te, mahni fate nundan hmu miah lova mi fate va control phêt duhte hi kan nei ve dil del sia, chûng ho bâk an ni lovang, Remdangnali a nih ka ring hial mai, a ni kha nau a pai ve tawh kha, a nulât lai pawha mi bihthlak a sawi mualpho chîng deuh hi a nia” a tihchuan a tu a ber nge ka hre chuang lo, mahsela ka ring ve tawp.

“Nia a fel chu an fel lutuk, mi te hi an be hmasa bawrh bawrh zêl a. Mahse ṭawng fimkhur a ngai a nih hi, tiang chuan mi kâra titi ve pawh a ngamawm nâng” ti a kan kal leh chu kan hnung lam aṭang chuan tlangvâl pakhat hian min rawn leh pêlin a tlân titih chu Mawii nên kan ena, tunge tih ka hre mailo.

Chutah a chhuk kal lai chu a nâl deuh nge ke vân vawr suau hian a thal ṭhuai mai. A mah lah chu a au ṭhawta, ka pan hnaih laiin Mawii erawh za tak hian a lo nui awr awra, chupa bul ka va thlen chuan Faka a ni tih ka hre nghal.

“Ehe nang chu, tinge khatia i rawn tlang fua a?” ti a ka en laiin ner nawng nawng chung hian a rawn tho chhuaka. “Ka tlu a nih hi, Lalthanmawi min nuih awr awr suh” ti vin hlukin Mawii chu rum zet hian a va melha, a ni lahin a lo hlau lo nasa mai.

“Ka kâ a nia ka duh leh ka nui ang chu, thal mawi hêng huang ve” tiin a nui leh haka. Faka lah chuan a kalsan mai dawn emaw tih laiin Mawii chu ava pan leh ngata “Ka thal tir ve mai ang che, hmeli” va tiin hnai takah chuan a va ena.

“I thei nge theilo en ila, hmeli pawh ka nilo hmêla” an in melh rum leh nasa tawh mai. An insual mai ang tih a hlauhawm bawk nên ka pan zuia, ka tlai ta tho. Faka chuan nam tluk tumin a kut chu a phara, Mawii chuan a kawr âwmah lo ṭhâm in an thal dûn tawpa, Mawii chu a ‘Aiah!’ tuar mai, rei a nilo an in kêk leh nghal zata.

Hmun dangah pawh an in khawih lo, an samah an in kêk tawn ngawng ngawng ringawta, an inhnial pah char char tho. Mawii lah tlâwm duhlo, Faka lahin hmeichhia a nih hi tihlam ngaihtuah miah lo hian leia mu chung chuan an in kêk ngar ngara.

“Inthlah teh u, khawlai a nih hi a zahthlâk, Faka thlah rawh mipa i nih kha” tiin va pawhsawn ka tum ve bawk. Kan bul vêl in aṭang chuan mi an rawn dâk fara, min rawn puih pawh an tum lo an lo hre ṭhang tawh nge an nui ṭhaw hlawma, kei erawh pawhsawn tumin an kutah chuan ka chelha, an in man nghet bawk nên ka pawt sawn thei der lo.

“Inthlah teh u in mak emai, kha in bâl vek dâwn a nia” ka tih leh ṭhak tâkah chuan ka aw ka vin deuh bawk nên la in melh tawn ngar chungin an rawn ding chhuaka “Hmeli mipa hlauh na châng te hre ve tawh rawh aw” Fakan a tih laiin “Hmela, midang nunah buai kha sim rawh aw” Mawii chuan a lo ti ve bawk.

“Hmela kha min ti suh hmeli” “Hmeli kha min ti bik suh hmêla” chu thu chauh tê mai chuan an inhnial leh ngar ngara, a tâwpah ka ning lutuk chuan Mawii chu ka pawtsawn zui nawk nawka, ral aṭangin an la in au zui hrâm a. He mite pahnih in mil lo lutuk hi engtia tihchi nge mawni, inkâwm khâwm ve mahse an in kawm man hi a awmlo tih theih a ni.

“Mipa khatin ti tawh suh, a buaithlâk in ngeih taka awm te hi tum ve ula, in inhmuh hlek hian in in cho ar zêl mai” ka tih laiin “Amah a nih kha mi nui mai mai pawh rawn hua, lû buk ropui si, Fakluliana a nih kha” tiin a la tûm bûr mai. A awmdân chuan ka nuih tiza viau mahse a hmuhah erawh ka nui duh hauh lo thung.

A sam a thur bawk nên lehlam hawiin ka nui ka nui maia, chutah nichina ka Arte rah hlumna kan thlen chuan ka tim deuha, a neitupa pawh kha tualah a lo awm tawha. Hnâng a lo hlai mawlh mawlh bawk “Kha i Arte rah pawh kan nu in ui zeta a phûm ve thlap kha” ti a a rawn nuih kur kur chuan min ti awm nuam lo zova, Mawii bân chu ka hmer ngawt ngawt a.

“Ka tihpalh tak tak, chawi in tih pawhin ka chawi thei a nia aw” ka tihchuan a rawn nui leh hawk hawka, pa fel tak anih ka ring. “A ho lutuk, a dang an la tam a lâwm. Ka fiam mai mai che a nih kha, ngaih ṭha deuh khân awm rawh” a tihchuan ka thaw deuh huai mai.

Kan kal pelh hnuah Mawii chuan min zâwt ta chata “Ka rawn kal lam khân ka rawn tlân titiha, ka in break hman tawh lo, ka zuang deuh khân ar note ka ke hnuaiah a rawn tlân lût thuta, ka rap puak pep a lawm, ka inthlahrun zia a pher vek lehnghâl” ka ti chu za tak mai hian a rawn nui vak vaka, a nui ring bawk si ka mitmei chuan ka khap mawlh mawlha.

“A fuh si chu, keipawh kan ar pui ka vawm hlum tawh, ka buh pho vêng kha a nghal fâl lutuka, lunglian deuh khân ka vawma, a sahuatna ka vawm nge a tâl phur phura, ka nu in min hau char chara, tlaiah ui deuh chung leh tui ti deuhin an ei a nih kha, chêt sual man hi a awm teh a nia” a tihchuan ka nuih a za ve tho.

U Rinpuia te in kan kal pelh dâwn lai chuan a rawn chhuak nên kan in tâwk chiaha, feh tur tih hriat takin hnathawh thuamhnaw nên a rawn in bel thlap mai. Min hmuh rual chuan a mit a kân uka “Hei vawiin chu Mawii nên hian ka inah kan inkâwm dâwna” tiin a bulah chuan kan phei zuia.

“U Zorin i zo dâwn tawh em? Inrin chu rawn feh ka lo tum dâwn a nia, Zoi pawh hruai tel la, inah i awm tir char chara. Sawhthing linna ah pawh a la tel nâng” a tihchuan u Rinpuia chu ka lo en kara, feh ve chu phal se ka ti ngei mai. Tûnah pawh min khap char char avângin ka zui duh lo kha a nia.

“Kan la ngaihtuah ṭha dâwn a nia, i ṭhiannu kha lo vêng ṭha la, mipa a melh rualin i rawn report vat dawn a nia” a la ti zuia. Kher kher chuana.

Mawii chu nui har harin ka in lam pan chuan kan inzui pheia, ka in kawng hi an feh kawng a nih avângin feh kal phah hian an rawn lût kawi ṭhin a, ka tân pawh lo thlir liam a rem hle bawk.

Mawii chu kan hma deuhah kal in miin an lo biakna chu a chhâng pah mawlh mawlha, a sam thur chu hrilh duh viau mah ila a ṭawng tui bawk nên engmah ka sawi ve theilo.

“I ṭhiannu sam chu ṭek den hlim a va ang ve” u Rinpuian a rawn tihchuan ka nui haka, chung lamah an thur chho sung bawk nên a sawi âwm ang ka ti lutuk “Faka nên an insual leh pek a nih kha, ka rawn ṭhelh zo chiah a lawm, hetiang reng hi em ni an niha” tiin ka melh chho ha a.

“An têt lai aṭangin an zia ve reng a lawm, an inṭhenawm bawk sia an in kâwm nasa a, in ngeih lo rêng rêngin an ṭhang liana, inhuatna pawh an nei chuang lo, nakinah chuan an la in ngaizawng ang” awlsam zet hian a timaia.

“A âwih awm loh emai, Mawii chuan bialpa a nei a lawm, tûnah pawh a duh lutuk” ka tihchuan a nui maia, min chhâng tawh lêm lo. Ka in pêng kan thlen tâkah chuan ding dûnin ram lam chu kan hawi zuia, “Lo in enkawl ṭha la, zânah ka lo lêng ang, a nih ni hman nuam aw” tiin ka kutah chuan a hmer vang vanga.

“Ni hman nuam le, fimkhur rawh aw. Chetsual te a hlauhawm, ka lo nghâk reng ang che” tiin ka nuih ver vera, a bu nghata. A kal liam chu ka thlir reng bawk, hnathawk rim em em chung pawh a a hmêlṭha reng thei hi a mak zâwk.

“Bialpa nei hmêlṭha nu” ti a keimah leh keimah chu inbia in nui var var hian in lamah chuan ka chhuk thla zuia.

Mawii nên chuan thu ho tak tak sawiin ni chu kan tum tawi dûn a, sawi tûr a hre bawka kan nui uar thei ngei mai. Pahnih chauh kan ni chungin kan thâwm erawh a ṭha viau lawia, chutia kan lo nuih bâwk bâwk lai chuan kawmthlangah hian hmeichhe pakhat a in chei dân leh a chêt dân aṭang chuan mi ang pha zân lo tih hriat tak mai hi a rawn pheia, kan lo en reng laiin a mah tâwk zâwng chuan nula pahnih hi an rawn phei ve bawk.

“Kha u Hlimi chu i va chhelo ve, in chei nalh thei hle mai, khawiah nge i kal dâwn a?” ṭawngkam mawi leh nem thlapa tiin an be zuia, an ṭawngkam aṭang chuan nula fel tak an nih ka ringa, Mawii nên kan en reng lai chuan an in kal pêl zuia.

“Awi mi an loh sa nên a han lerh ve êm êm a, hetiang mi hi chu an hnawksak tlat, a chhûngte lah hian vên ṭhat an tum bawk silo, tlangvâl ho in zirna a nih ber kha. Mi ang lo lehnghâl lerh ve lutuk” ti a an sawi zui chu mak ka ti ngei mai, nichina an ṭawngkam aṭanga mifel tak tura ka lo ngai erawh kha chu ka demawm hauh lo.

Chutah an rawn hawi chho in min hmu chu an nui sâng a “Eee Mawii kha in in kâwm a nimaw? Lo lam in zo tawh em ni? Hmingi pawh i hmêlṭha suah reng maia, tlangvâl ho in an sawi nasa thei teh che a nia” nichina mi tho chuan rawn tiin an nui sâng renga, an aw chu hriat a nuamin a nêm hle nângin ka hmuh dân a dang zo vek tawh.

Chhân pawh chhâng lo chuan Mawii zâwk chuan “A nih hi, hna kan zo tawha ka lêng mai mai. Nang ni zâwk kha enge in tih dâwn a?” ṭha tak chuan a lo ti ve a, a ner ru sawk chu ka hmu reng mai.

A ei lo viau tih ka hre thei “Hei dai hnaiah kan kal lawk dâwn a nih hi, a nih u aw” tiin an kal liam zuia. Ka lo thaw ve huai ringawt.

“Tenawm mai mai, hmui khawizu thinlung kha si, rilru rûl tur nei an nihkha” a ti zui hlaka, a sawi thiam ka ti lutuk chu ka lo nui hak mai. “Nel sual an va hlauhawm ve, kha an ṭawngkam lah a felin a dam si a, rilru chhia an pu ang tih pawh hriat thiam a har dâwn a nih kha” ka lo ti ve a, a ni pawh a bu nghat nghat mai.

“Mi hi an ṭawngkam leh hmêl landan avâng hian rin nghâl ngawt loh tur a ni rêng a sin, hmêl rorum leh ṭawngkam nêl awm loh deuh te hi an rilru a lo ṭha in an lo nelawm leh viau thei a nia, mi fel leh ṭawngkam ṭha em em te hi rilru chhe deuh an lo ni leh daiha, mi hi rin dân kan thiam hi a ngai rêng a ni, ṭawngkam chiah ṭha hnunglam aṭanga min sawichhe duh hi an tam a nia, kan rinloh deuh deuh mizia hi an pu ṭhin rêng ani” a tihchuan ka lo bu nghata, hmêl leh ṭawngkam vâng maia mi teh hi a dik loh zia ka hrethiam ve telh telh in ka hria.

Nilenga kan inkawm hnuah ei rawngbawl a hun tawh avângin kan in mangṭha zuia, zanin chu keipawh chaw ei hma ka duh bawk nên dar 2 vêl ah chaw ka chhûma, dal leh alu ka kang leh tlawnga,a bâk han siam tûr chiam hi ka hrelo bawk nên ka hmeh ngun ber an ni.

Helam chu khawpui angin thlai leh sa lei tur a awm ve reng lova, an rawn zuar tawp te a nih loh chuan an vâng viau mai. Khaw ṭhenawm ah erawh kal ila chuan chawhmeh lei tur ka nei ṭeuh chuan ka ring.

Zanriah ka eikham chuan ṭhut thlêngah ṭhu in movie ka en mai maia.

Ka phone rawn ri avâng chuan ka en vata, ka nu tih ka hriat chuan chhângin “Aw nu" phone ka lâk rual chuan ka nu aw ka hre nghal zat mai. “Bawihi i putea a dam lova i rawn haw lawk mai dâwn em ni? Hei chhûngkua lam kan in ko khâwm a nih hi maw, a dinhmun hian hniam lam a pan zel bawk si a, i theih chuan rawn haw la a ṭha khawp ang” a rawn tihchuan ka ngawi deuh vang vanga.

“Ava zia lo ve putea chu engtia nâ nge?” chutianga ngaihtuah awm a nihchuan a ṭha lo viau a nih ka ring ve tawp bawk. “A lo cancer a, a hma a kan in entir khân Doctor te khân engmah an hmu bawk si lo, tûn hnua kan in entir khân an lo sawi a, a pawi a nih hi. Tûnah chuan in enkawl ngaihna vak a awm tawh lo” a tihchuan ka thaw ham ham mai.

Doctor tam tak pawh hi natna tak hre hauh lovin an duh duh damdawi an han chawha, a tlai hnu feee ah an han hrechhuak leh chauh zêla. Doctor meuhin hetianga damlohna dik tak pawh hre thei lova an han awm ṭhin hi an mak ve deuh chuan ka hria, a châng leh nau vei an zai hlum thul. Kan Mizoram Doctor te hi enga ti bik nge ni dâwn ni.

“Um chawlh ka la anga ka rawn haw dawn a nia, helam chu ngaihtuah awm em em a awm chuanglo” tiin phone chu ka dah zuia. U Rinpuia te nên sawhthing lin kan tum lâwk pawh ka tel ve leh thei dâwn lo a nih hi, patea lo damlo kher kher chu ka ngei lek leka, mahsela kan nunah thu kan nei der bawk silo.

Ka haw chuan ka chho leh thei mai dawn lo tih pawh ka hria, putea awmdân a zirin ka châm rei pawh a ngai mai thei. U Rinpuia ka hmu lo vang vang tûr anga ka ngaihtuah chuan ka huphurh lâwk ngei mai, ka bula zin turin sâwm ringawt ila helamah a hna lam a buai zia leh puitu a neih loh zia ka hre chiang bawk si.

Chutia ka lo in ngaihtuah lai chuan kawngka chu a rawn inhawnga “Tadaaaaa Birthday lâwm turin kan rawn kal, kha chhûm nghal rawh” Sawma chuan spicy bâwm nga vêl chu rawn dahin an mahni chu an inthiar fihlîm leh hmak tawh mai.

“Tu Birthday nge kan lawm dâwn? Engmah in va sawi lo ve” tiin ka melh kual dan dana “Hei helaia kan naupang neih chhun birthday hi mawle, ti zung zung teh. In pa hi a la rawn lêng nange, tûn angah te chuan a lo awm hman kur ṭhin sia” Fakan a rawn tihchuan ka lo bu nghata.

“A bialnu hlui a rawn haw an tihkha a rim aniang, ka” Kimkima thu rawn sawi chu a sawi zawh hma in midang chuan a hmui an hup sak vata. Kei erawh kha a thusawi tawi te pawh khân min ti danglam hneh lutuk tlat. Bialnu hlui maw? A rim tak tak em ni ang? Engvanga tûn thlenga la reh hmak nge a nih?

Ka ngaih a ṭha thei ta hauhlo, a la hmangaih tih ka chiang a. Chu thil ka hriatna ringawt pawh chuan min tina tawh a nia, tûnah a bialnu hlui a rawn lêt a a rawn kal lo nghal pang chu a nia.

“I ti tak tak em ni Thante? Min hrilh rawh u, a bialnu hlui a rawn haw a maw?” ka tihchuan an inmelh hrek hreka, an sawi mai loh avâng chuan ka rum nghat mai.

“Min hrilh vat rawh u, ka hre leh dâwn tho tho. A bialnu hlui chu a rawn haw em?” ka tih leh tâk fakah chuan Mama chuan “A rawn haw ngei kha, a zak lo sia in pa a zar leh chung ang chu, hmeichhe zaktheilo vêk vêk hi chu an nasa ania aw, midang an ngai pawimawh tawh teh chiamlova, an duhzâwngah hi chuan mualpho pawh an pawi tilo” a tihchuan dik ka ti viau mai.

U Rinpuia chu a lêng nge ni ang? Ka ring nghal bur mai,a tâna a la pawimawh tur dân pawh ka hria. Ka ngawi ta renga, an awm a nuam leh silo nge mi an rawn hnêm leh nghal sap sap mai.

“A kîr tawh lovang, ṭhian an lo nih tawhnaah a hmuak mai mai pawh a ni ang, rilru ti hah lutuk duh suh. Chutianga rilru thlâk zung zung mi a ni lo ang” timahse ka ngaih a ṭha thei tak tak tawh lo. Engvangin nge engmah min hrilh lova a awm? A tân hian ka pawimawh ve tak tak lo em ni ang?

Spicy chu ngawi rengin ka chhûm a, midang erawh rilru hahna tur nei ve hek lo inkâwm khâwmin an nui leh dar dar tawh. Ka rilru hahna hre ve âwm pawhin an awm leh tawh lo, ka awt zâwk e a ngaihzâwng an neih loh chuan an tân rilru hahna tur a vâng ve bawk êm ani.

Ka zawh hnu chuan a bêl chawp chuan chhawp pheiin ka thlêng kum neih ang ang chu ka dah pheia. Mipa ah chuan spicy ngaina tak an ni ve in ka hria, mipa thak ngam loh tehlul nen an ni chu rinai thil thak an ngaina. Keimah pawh ka ni tho, thlum ai chuan thak leh al lam hi ka ngaina hrim hrim, thlum lutuk chu ka puar nghal ul zel.

Cola nên chuan in in kan insut leh hruih ṭhin, a tu amah erawhin ka kham tih thu kan sawi lo. Keilah thinrim sa nen a thakna tak chuan ka thinrimna ti alh zualin ka ei pawp pawpa, ka hnap tui lah lo chhuak ve sek bawk, kan in hruk pahin kan nui leh ringawt ṭhin.

Chutia thil kan lo ei mawlh mawlh lai chuan kawngka rawn inhawng ve lehin u Rinpuia ngei chu a rawn lût a, a rawn luh tirha ka melh bâk chu ka melh duh tawh ṭhak lo. Ngawi reng hian rawn pheiin ka bulah chuan a rawn ṭhu a, ka en duh chuanglo ka thin a tirim miau a lawm.

“Tinge hetiang te in lo ei leh tâk in pum a chhe vek mai tur a sin, thil thak lutuk ei tawh reng reng suh u. Duati duh tâwk teh kha i hnap a dawk a nia” rum zet chuan ka ena, midang erawh an lo nui hak hlawm mai. An ni pawh a dawk ve tho sia, engvanga min lo nuih nge maw an nih ni, mi thinrim lai laia.

Hrelo ang mai chuan ka ei zawm leha, a ni pawhin engmah a sawi tawh lêm lo. Fian pakhat chu la in a ei ve leh tho, a ner nasa lutuk hmêl chu nuihzat viau mah ila ka insûm ṭang ṭang thung. Ka nui chhuak a nih vaih chuan ka thinrimna a reh leh vek dâwna, ka duh teuhlo.

Thil ka palzam ngun lutuka ngaiah a neih a ni ber in ka hria, tûn aṭang chuan ka khauh ve ṭang a ngai tawh ani. Ngawi reng chuan kan thil eizawhna ho chu ka sil leha, Sawma te ho chuan ka thinrimna an lo hrilh nge ka luh leh lai chuan u Rinpuia chuan khawdang hawi lêk lo hian min lo en ngar ngar a nihchu.

Min en tih hre duh hauh lo chuan thleng rem fel pah chuan ka zai rat rata, Thangromawia hla KA THIK MAWLH TAWH LO'NG CHE tihchu sa in “I lungdumtu ṭângah beiin, hmangaih biahthu hlân dûn ang che u. Ka thik mawlh tawh lo'ng che” tihchu ka sa rat rata, chutih laia ka va en pheiin a lo ner suk ka hmuh chuan ka ṭhen saka.

A ni pawhin ka duhdân ang diak diakin thil a ti bik lova, ka tih bîkna chhan tur ka hrelo. A thik tur zêlin ka awm ve tawh ang, a bulah pawh ṭhu duh tawh lovin Sawma te bula ṭhu chuan ka ti ti zat zata. Thik deuh anga lan chu ka duh teuhlo, ka dahsang mai mai dawn, min duh ve tak tak a nihchuan amahin hma a la hmasa ve tawh tur hi a ni ringawt.

Midang lah chuan kan awmdân haider hmakin titi dang an vawrha, Bial khawmpui hnaih tawh zia leh thleng vat vat se an duh thu sawiin nula rim tur an ngaihtuah lâwk nasa mai, hmeichhe chung châng leh an zeizia in ti hre viau si hian ngaihzâwng erawh an nei thei der lo lehnghâl, a sa seh tak takah an ngam pawhin ka ringlo.

Engmah sawi ve lovin u Rinpuia nên chuan kan inmelh tawn leh ran ṭhin. Rei en duh lovin ka hawisawn ta daiha, a hmêl te hi ka ngei thar riau nia, ni lah chuan hmun dang a hawi duh der lo, keimahah chuan a mit a fu ngar ngar ringawt.

Na lutuka sawh sawk mai ka châk, mahsela ka thei der silo. Midang hi awm lo se chuan ka khawih hrep duh mai thei a ni, a hmêl te chenin ka ngei zo vek tawh.

Midang chuan thil sawi fel turin min duh nge “Kan haw phawt ange, kan mut a chhuak tlâng tawh a nih hi, naktuk zânah kan lo lêng leh dâwn a nia” an tihchuan ka ka ka âng zuaua, mahse engmah ka sawi duh leh ta lo.

Mangṭha in kawngka thleng ka va thlaha, Kimkima chu a Birthday lawmpui nân 500 pe in ka vai liama, a ni pawh a lâwm hmêl vur vur viau mai. Zorinpuia hetiang hian awm daw daw lo se chu hlim taka lawm sak a châkawm a sin mawle, inchhûng ah chuan lût leh in engmah sawi lo leh en lêm lo chuan a awm lohna lamah ka ṭhu leh hmaka.

Ka biak loh vâng nge a awm a nuam chiah lo a niang a rawn khuh khak mai “I thinrim em ni?” a rawn ti ta renga “Rimlo” ka lo ti tawi tak thung, chiang zeta min en pah hian a bawp a khawkherh ûta “I in seh ruh ṭûn danah i thinrim chu a nih si kha, enga tinge khatiang bûr a i awm?” ka chhâng duh tawhlo.

Ngawi reng chuan phone ka en sana, naktûk insiam nâna hmana a tuk lehah haw thlâk ka duh bawk nen sumo ticket ka book sa a, chutilo chuan ka rui bawk nên seat ṭha chan loh a awl ve bawk si. Zorinpuia pawh engmah ka hrilh lovang, a ni pawhin a tih tur sawiloin a bialnu hlui a hmuak ve tho a lâwm.

“Ka bulah hian rawn ṭhu la, i lungawilohna chu sawi teh. Ka rawn kal har vâng em ni? Ka buai deuha chuvang a nia” a ti leh te phei chu ngei tawh tak ka ni, chhuanlam siam phêt lovin thudik min hrilh sela ka lâwm fe zâwk ang.

“A nih chu, helai hi nuam ka ti zâwk” tiin ka ṭhutna chu ka chûl zauha, hahthlâk min tih hmêl taka min enna chu ka hmuh hmaih lo, nge maw ni a bialnu in nghâkhlel taka ka thlir laia bialnu hlui va hmuh awt awt ni.

“Tinge hetia i awm tlat?” a rawn tileh chu ka nui leh haka “Engtin nge ka awm vaka, engtin mah ka awmlo ka ṭhu mai mai a nih hi, ka ngaihzâwng hluiin min rawn be ve te pawh ania'ng” ka tih tâkah chuan a mitmeng chu a dang ta daih mai.

A alh ka ti dawn nge a rawn êng thei hialin ka hria, ka bulah chuan a rawn tawlh hnai ruaka “Engmaw i sawi kha, nang hian hriat i nei tiraw? Chuvang em ni hetianga i awm?” a ti chu a kut chu ka ben thlâk saka, ka en lêt kar bawk.

“Hriat chu ka nei ve si a nih hi, bialnute pawh ngaihtuah lova bialnu hlui hmuak thiam pa, Zolerh, Rindiriallova i nih hi a, va rim leh rawh. Hetah enge i rawn tih? I second choice mai mai ka ni te hian ka hria, ka lakah i zêp tlat hi ka duhlo, ka hre vek tawh” ka insûm thei tawh lo chuan ka ti ta ngheka.

Chuveleh ka bânah rawn hmerin ṭhutthleng nghen chhanah chuan min nawr bet ta hmaka “Ka ṭhian a nihna ang bakin ka en tawh lo, khatiangin ngai kawi suh. Tin, ka awm rei hauh lo bawk, ka buai deuh avângin ka rawn kal har a nihkha, ka taksa chau nên nang tal chu lo thinrim lo teh” a tihchuan lungawi lo zetin ka ena.

“A ṭha a nihchu, i ngaihzâwng hlui chu i ṭhian angin ila en thei bîk a nia. I ropui hle mai, engmah ka sawi tawh lovang, i duh ang angin awm rawh” ti a thawh ka tum chu min man betin a âwmah chuan min kuah bet ta hmiaha, ka tâl ve tak nangin ka tâl chhuak thei hauh lo.

“Thinrim lo hrâm teh, a nu leh pa in min rawn ngên nasa sia a bungrua vêl ka va dah fel pui mai mai a lawm, a rawn inhawn bawr sia thildang engmah a awm lo. Engvanga second choice in ti nge i nih? Englai mahin a pahnihna i ni ngai lo” a tihchuan ka nui leh haka, ka lungawi thei hlawl lo.

“Ka mut a chhuak tawh, haw tawh rawh. Engmah ka sawi peih lo, inbiak pawh ka duh rihlo inhmu tawh rih lo ang. A khat tawkin in khaw mi ṭhenkhat ten an fiamna che zawng zawng hi ka hre ve reng, ka tân pawh a nuam lo. In lo inzui nasa hle tih a hriat bawk, engtikah mah min duh tak takin ka ring lo bawk” ka ti sap a, ka vin tawh lêm lo. Thikna hian mihring hi min va tidanglam thei em em ve tihchu tûnah hian keimah ngawi chuan ka in zâwt a, keimah ngei ka danglam bawk.

“Ka sawi tawh kha, ka ṭhian a ni, a bâk engmah a awm lo. Min ring turin ka ti lui dâwn lo che, hmeichhia ka kalsan tawh lakah kîr tur ni ila bul ka ṭan pui hma che khân ka nei lêt tawh ang” tiin a tho chhuaka, a hmêlah chuan a lâwm vak lo tih ka hria.

Engmah sawi pui emaw pawh ka tum tawh bik lo, ka dik bik lova, mahse ka thik thu chhiat avâng a ni tihte min hriatsak ve ka ringa, mahse a kal nul nul bawk si, ka en liam tawpa. Kawngka a rawn khâr ruala tho chhuakin ka va kalh ta vata, a awmdân chuan min ti lâwm lo zual, min thlêm pawh a tum miahlo ania, ka lâwm lo ve lek lek mai, kei chuan a duhloh zâwng a awm ka duh loh avângin Rintluanga emaw mipa dang hrim hrim pawh be lo tura min tihchuan ka be lo maia,a ni erawh ka hrethiam tawhlo.

Ṭhian pângngai ang mai maia an awm theih ka ring lo tawp a.  Khumah chuan mu in ka in let kual seka, engvanga khatianga ti vak nge ka nih pawh ka inhrethiam biklo. Mahsela ka haw miau bawk sia, a rawn kal har bawk nen lungawi a har em bawk a ni.

Ka in ngaihtuah rei poh leh ka thin a rim tulh tulh mai lehnghâl, a tawpah phei chuan ngaihtuah zawm duh tawh lovin Pasalṭha thawnthu chu ka ngaihthlâk san leh ta daiha, rilru hah hi chuan han ngaithla ila ka hahdam phah sawt zel.

Mutthilh tum chuan ka in siamrema, a message pawh ka dawng tawh lêm lo, nidangah kha chuan mut dâwn apiangin min rawn mangṭha ṭhin kha a nia. Khati khân a ngaihtuahna tur chu ka hrethiam mai, a bialnu hlui rawn haw avânga a danglam a, min kalsan a nih chuan ka dang dâwn lo, a mah tina a kalsan tu a la duh anihchuan keia thunun phâk a nilo.

Ka mittui chu tuai pawkin muhil tur chuan ka in tintuah zuia, Zorinpuia awmdan ngaihtuah rêng rengin ka mut lah chu a chhuak thei der lo a, ka in let kual sek ringawt.

Naktûkah ka insiam anga, Putea lo na hlauh chu a lehlamah chuan vânnei ka inti leh hnu hnawh. Rei tak ka hmu lo anga, ka tân pawh rilru siam a rem deuh ang, kan inzui chhûng reilo mahse keichuan ka hmangaih avângin chân ka hlaua, ka thikthu ka lo pe chhe mah mah pawh aniang.

Amaha ka ngaihdân te pawh an kiam ve tial tial mai. Kan tâwp na tur pawh a ni thei tihchu ka ngaihtuaha, kan tawpna tur nge kan bul ṭanna tur ni ang?