DUHLAI ZORINPUIA CHAPTER 11

DUHLAI ZORINPUIA 

CHAPTER 11 

“Tiru chaw ei vat ang u, ril a ṭâm tawh a lawm. Ramar sa hi a tuiin a hâng a sin, Hmingte i ei tawh em?” u Rinpuia nu in a rawn tihchuan ka lu ka thing nar nara “Ka la ei ngai miahlo, lui lam sa leh ranvulh ho hi kan ei nguna, ramsa lam tak hi chu kan ei ngai miahlo” ka lo ti chu a nui var vara.

“A ṭhat nasat chu, kan inah chaw rawn ei zêl rawh. Hei bawiha hi rinai takin a kut a hmuia, sa hi lei ngai em em lovin tihian min ei tir reng theia, kan vânnei a nih hi. Ramsa kan ei tam vâng nge i nu nên pawh hei kan la hrisêl ṭha viau a nia, tin, pa min ti la ka duh. Helaiah chhûngkhat nei miah lovin i rawn awma, keini hi i chhûngte angah min ngai dâwn a nia aw” tiin a pa zâwk chuan a rawn ti a.

Ka bu nghat nghat mai, a nelawm bawk a keipawhin ka ngaina “Kan monu hual ania , chhûngte neilo a ni rêng rêng lo, a theih phei chuan innei vat sela ka duh, kha tu emaw lah kha a rawn lâwr sek bawk si a, Hmingte ilo thik hlauh ange. Bawiha hian i duh loh zawnga a lo awmpui a nih chuan i nu bulah hian rawn sawi zêl ang che. Khatiang hmeichhia kha ka mo a tân ka duh hauh lo a nia, ka fapa rilru na taka siama zahthlâk taka kalsan tu kha, a la rawn lêng ngam lehnghâl” a nu in a tihchuan ka lo nuih ringawta.

“Khaih khaih nu i insûm teh, khatiangin midang tih loh tur. Kan fate pahnih hma hun hi a pawimawh ber, inrintawnna leh in ngaihsakna hian mi a vêng ṭhin. Rinawmna in nunah pawimawh ber rawh se, bawiha i nu kha ka khap tak nangin hre reng ang che. Mipa chu kan induhtawkna hian hmangaihtu aiin min hmangaih lêm lo tu, min uiresan mai thei thlan palh a awla, i nupui tur thlan kawngah fimkhur hle ang che. Hmingtei a ṭha lo kan ti a nilo, in pahnih hian in hma hun atân in pawimawh ve ve tih hre reng ang cheu” a rawn ti ve dap dapa.

An sawi chu a dik chiah, u Rinpuia nên chuan kan in melh zawka. “Nu zawm ngei kan tum ang, nang ni in lo awm hi ka lâwm lutuk a nia, in fapa hi bum leh kawp mai mai ka tum lo a nia aw. Chu chu min hriatsak ve tur in ka duh cheu, zaktheilo pawh min timai thei, mahse in fapa aia duh hi ka la nei ngai miah lo ania” tiin ka sawi ve sapa.

A nu leh pa pawh an hmêl aṭang chuan an hlim hle tih ka hria, Nunzuali kha an duh lo hle tih ka hriat avâng chuan keimah pawh ka thlamuang, chaw ei chu siam zuiin ka puia, u Rinpuia erawhin ram ar sa chu a lo ṭhet mawlh mawlh thung. A rim lah chu a tui êm êm lehnghâl, ka pum a rawn ri kuar kuara.

Nu Âsangi te chu an lo nui hak mai “Bawiha hmanhmawh la, Hmingtei hi a ril a ṭâm tawh a nih hi, a pum lamin chaw an au ruah ruah tawh a nia ei vat ang u” an tihchuan ka nui ta ringawta. 

“Nizanah chaw ka ei tam vak loa, chuvang ania'ng” ka ti ta ringawta, an nui leh hak mai. “Chuvang chuan kan kil thuai thuai angai a nihchu, i pa hian ṭawngṭaina hun hmang sela kan ei nghal mai dâwn ania” tiin dawhkân chu kan kil ṭhap a.

Pa Sena chu ṭawngṭaiin a ṭawngṭai zawh chuan chaw chu kan eizawma, u Rinpuia bulah ka ṭhu bawka a ni pawhin min ngaihsak viau mai. Ram arsa chu a ti ṭha lai lai min rawn pe leh zung zunga, an in ka kal a piangin hetiang hian a tiziaha, a nu leh pa hmaah pawh min ngaihsakna chuan min tihlim lutuk tlat.

Nu Âsangi pawhin a fapa chêt dân chu pawmpui tih hriat takin hnuailam en chuan a nui sak saka, kei erawh ka ngawi leh kar tawh. An bulah hian chaw ei lai hi chuan ka ṭawng vak ngam lo hrim hrim, “Ei ṭeuh rawh, ei zawh vek tum tur. I ei tlêm thei lutuk, nupui chaw ei tlêm deuh ka duh lo ka tihkha, ka nupui tur chu chaw ei thei deuh ka duh, khatiang nin nen chuan tha i nei thei dâwn lo” u Rinpuian a rawn tihchuan ka melh zawka.

A nu leh pa chu an lo nui hak mai, “Ka ei ṭeuh tawh hi, ka ei leh dâwn a lawm. Ka kham pawh ka tihloh kha, i sual lutuk min tihzah in tum char char ringawt, nu an sual tiraw?” tiin a vawikhat nân u Rinpuia nu chu ka nu tiin ka ko a, a nilah alo lâwm em em lehnghâl.

“Dik chiah, i pa leh bawiha hi chu an over mah mah ṭhin. Hmeichhe biak dân leh fiam dân pawh an hrelo, nula te chu chaw ei ṭeuh ṭeuh te a mawi lo ve a, vawk ang maia hap hluk hluk chu nise i duh leh chuang nâng, a hrim hrimah feh kal hma pawh i mgai, hman hma tum la, lo zawh zung zung a châkawm, kan feh pui thei tawh silo che a. Nang lahin i phallo bawk nên i pa nên hian kan rilru a hah ve teh mai a nia” a nu in a tih laiin u Rinpuia chu a khi suka.

Chutah amah lo ang maiin “A ṭha leh vek mai ang, dont worry ka nu duhtak, fapa hmêlṭha, fapa fel. Fapa chhelo leh chak i neih hi, naktûkah chuan kan zo êm êm ang. I lungngai a nih kha, han thaw hawk teh; i zâng huai mai ang” a rawn ti duai duai chu ka nui chhuak ta vaka.

Ka insûm thei tawh lo, ka chaw ei ka la hak zui, khuh ṭhat ṭhat in tui an chhawp chu ka ban vata. “I va han chhe tak e aw, khatianga dont uar i ti mi? Khatiang sawi duai duai a ngailo, enge i hriat? Khatiang khân ṭawng tawh reng reng suh, tuai ang mai, ka vaw nghek mai ang che” nu Âsangi chuan a ti bawk.

U Rinpuia erawh a nui vur vur mai,  “Ka nu hmêlṭha, ka ngawih leh i lâwm silo, ka ṭawng leh i lâwm chuang silo. I fapa hi a lu i ti hai” a ti leh khera, nu Âsangi chuan a melh rum ngei mai, chhungkaw inhmangaih tak chu an ni ve in ka hria.

A bikin u Rinpuian a nu leh a pa a zahna hi ka ngaisang, a upa ve tawhin mahni thu a awm rual tawh lehnghâl. Tihian an bulah chengin an thu a hnial ngai hauh silo.

“I va han mâwl tak êm, Hmingte ṭhen daih rawh. A â tawh a nih hi, hetiang fapa hi engtin nge ka neih theih?” ti a a sawi chu ka nuih a za ngei mai. Pa Sena nên chuan an nufa in fiamna leh in hauhna chu kan lo nuih puia, chaw pawh a ei ṭhat theih tawh loh.

Puar zet hian ka tho chhuaka “Ka pum hi chaw leh sa hlirin a khatin ka hria, taka nu vawiin chu in loah ka feh ve ang ka tia. Hei nizânah u Rinpuia ka dila, ka thlai tuh te an ṭo ve tawh em ka en pah duha” tiin ka kut sil mawlh mawlh pah chuan ka ti a.

An ni erawh an la kîl ṭhap mai, “Bawihi a chi dawn em ni? A lum bawk sia, inah hian awm mai mai zâwk rawh, bâkah damlo te pawh an awm theia. Ilo awm loh chuan a chi loh ang” a tihchuan ka lo nui haka.

“Vawiin chu hotute lam aṭanga chawlh min pêk ni a ni hrim hrima, chuvâng zâwk chu a nia. Bâkah in khua hi khaw hrisêl tak in ni in ka hria, nang ni te hi in la rawn in entir miah lo, in dam loh chuan rawn sawi hreh suh u aw. Damdawi pawh ka kawl ve nual a nia” tiin ka kam chu ka ṭhuah zuia.

“Aaaa kan hrisêl vâng êm êm pawh a nilo, in entir hi kan peih lo tlanga, tawrh a har ngang a nih loh chuan damdawiin te hi kan pan ngai meuhloa, kan intih hmuh zo a nih hi, bâkah damdawiin kan lo hlat bawk nên kan kumkhaw tihdan ṭhan a lo ni bawk sia ti hian mahni in in lama in enkawl hi kan la uar a” a tihchuan ka rindan chiah.

Doctor emaw Health worker pawh pan lêm lovin in lamah damdawi an leia, an in enkawl dam ve mai zela. A ṭhen phei chu Doctor ni kher lo mahse damdawi lam mihring ngeih zâwng hre tak tak an awm ve nuk mai.

Chaw ei kham chuan seng pui zung zungin thleng chu ka sil leh sawk sawka, u Rinpuia erawh feh turin a lo insiam thung. Nu Âsangi chu ka bula awmin kan titi paha, a châng leh kan nui leh ṭhin. Ka bialpa chhûngte fel leh mi biangbiak thiam lutuk hian min ti tlangnel lo theilo, tam tak chu ngaihzâwng kan neih hian kan chhûngte lakah ve ve sawi lêm lo leh in hmuh tir lêm lovin kan awma, kan innei leh tawpa.

In hriat chian loh phei chuan mosual emaw mona te sual emaw tih an sawi leh mai ṭhin. Inneih hma a mona tur chhûngkua leh keimahni ngei pawh inhriat chian tawn hi a ṭul in ka hria, tun angah pasal nu sual lutuk tih te hi kan sawi leh mai ṭhin a.

Mahse tam tak hi chu keimahni mote zir loh hi a ni ve in ka hria, mo ni si a mona chhûngte biak emaw han kawm tlangnel emaw pawh tum lem lo in kan awma, a ṭhen te lah engmah tih tum lo in mo kan nih hre miahloa awm pawh kan awm ve bawk. Chutiang mo nei tân chuan dawh theih reng loh hun pawh a awm ve ngei ang.

Mote hmu theilo hrim hrim an awm rualin a tam zâwk hi an nih ka ring hauh lo, tûnlai mi chu kan no ta lutuka, khawvêl changkanna in a ken tiin awmpui neih kan uara, keimahni in engmah ti peihlo in pawisa hlawhin mi kan chhawra. Kan fate'n nupui pasal an la nei dâwn a ni tih ngaihtuah miah lo in mi hausa tam tak chuan in chhungkhur chêt ah kan chhawr ngai lova, chu chuan kan fanu te an va mona inah inthlahrung taka awm turin an siam ka ti mai.

Rawngbawl pawh an thiam loh chuan an mona chhûngkua khân an hmuh dân a dang lo thei dâwn lo, hetiang lamah chuan thingtlâng lam hi ka fak. Khawpuiah pawh an awm tho nângin thingtlâng lamah hi chuan a tam zâwk hi inchhung leh ram lam thawk kawp thei vek an nia, an itawm ka ti bawk.

Khawpuiah chuan lo nei mi kan vâng tawha, office ah kalin khawl hmangin engkim deuh thaw kan ti tawha. In lamah che turin awmpui kan la leh zêl bawk nên kan fate hi dem ngawt theih pawh an ni biklo, awmpui ringa engkim an tih miau chuan engtin nge inchhûng chêt kha an thiam vak ang ni.

“I hman tawh em ni?” u Rinpuia aw rawn chhuak zawk a vâng chuan ka phu zuk mai. Inherin amah chu ka en ha a “Ah..aw hman e, i hman tawh zâwk em ni? Kal ila” tiin ka kut chu ka hru hul sawk sawka, a ni pawhin min zui ve mai. 

Nu Âsangi te hnênah chuan kan kal tur thu hrilhin kan chhuak zuia,an intual chhuk lai deuha ka kal lai chuan thawk leh khatah lung rap hrualin mawng sawh dawtin ka tlua, a na ngei mai. Rang zet hian min rawn pawm tho nawlha, ka mawng chu lungte ka ṭhut bawk nên a thip sa ham ham lehnghâl.

“I na em? I in tina lo maw?” min ngaihtuah zet chuan a rawn ti a, ka taksa vêl chu a enkual zung zung bawk. “Aih na lo, ka ṭha kal ang” tiin ka mawng chu ka tuai vat vata, a la thip zêk lehnghala, ka va han ngei tak. Bialpa te hmaah lehnghâl mawng sawh dawta tlûk chu a mawi viau lo, a rûkin zahthlâk duh tak a ni.

“Nang ni pahnih kha rawn kal zung zung rawh u” ka in thlen hma deuh ah chuan Mawii te bâkah Sawma te ho an lo ding ṭhapa, hnathawh thuamhnaw an inbel ṭhap lehnghâl. Feh ve an tum tih a hriat, an la zo hlawm lo nge mawni.

“In feh ve dâwn em ni? Ka insiam leh phawt angai, vawiin chu u Rinpuia bulah ka feh dawna” tiin ka be nghal bawrh bawrha. “Vawiin chu u Rinpuia Birthday te a ni sia, a birthday pualin kan pui ang kan ti a nih hi, hêng ho hian min rawn sâwm a ka hre ve chiah” Mawiin a tihchuan u Rinpuia nên chuan kan in melh haw a.

“In ti tak tak em ni?” ti a ka zawhna chu “Ti tak tak lo ila kan nghah cheu in ring em ni? Hmanhmawh khân zuk insiam vat la a nihchu, zanin chu cake lian tâwk nên lawm angai ang. An inah nge i inah kan lawm dâwn? Kha kha sawi chiang sa ang che u, vawiinah zawh tum nghe nghe ila a ṭha ang, pa Sena tepawh kan lo hrilh ta lo mai, surprise inah kan haw hunah kan hrilh mai dawn a nia” an rawn ti zung zunga.

An va han fel tak, u Rinpuia amah chauh a ni tih hria a an rawn puih duhna hrim hrim chu ka lâwm. Hmanhmawh zet chuan ka in lamah chuan chhuk in ka hawng zuia, reipawh ka insiam lo, nu Âsangi khân u Rinpuia nen kan chhûn chaw tur alo fun vek bawk nên rin ai ka reilo phian mai.

An bul ka thlen chhoh rual chuan kal kan siam zuia, Mawii nên chuan kan titi a, mipa ho pawh zahmawh rawngkai nên an infiam leh tawh. Mipa awmkhâwm hi chu an nih dân ve reng a niin ka hria, tûn pawh hmeichhe hnute lian, mawnglian tih velah a nih saw an buai leh tawh.

Engvanga hnute leh mawng hi lâwm em em nge maw an nih dâwn ni? U Rinpuia erawhin engmah a sawi ve lêm lo, a ṭhiante thusawi chu a nuihpui suk suka, an zîngah chuan a kal ve tak nângin han titi luam a nei lo.

“Awi tûnlai chu ka rilru a hah lutuk, enge a chhan ka hre bik lo. Mahse eng emaw tak ka tawng dâwn hian ka hria” Mawiin a rawn tihchuan ka melh zawka, a lo in ngaihtuah muk hmêl hle. 

Engtak chu ni ang maw? “In inkar a la ṭha maw? In inṭhen leh em ni?” ti a ka zawhna chu lu thing nar narin hmalam a ena, “Ṭhen lo, kan la in be reng a lawm. Hna zawna hei khawpui lamah interview a tuma, a tlin veleh palai lo tirh a tum thu a sawia” a tihchuan ka nuih var vara.

Ka lawmpui ngei mai, a hmangaih ve zia ka hria a. Innei ngei se ka duhsak bawk, chutia hlim taka a awm tluka duhpui ka nei lo. 

“Ava lawmawm ve, a la naupan ve dawn nên a rilru a puitling hle mai. Aw ilo pawh tihna em ni?” ka zawhna chu a buk pui nghata “Dik tak chuan bialpa chu ka lo nei nual tawha, mahse pasal neih châkna ang kha ka nei miahlo, mahse tûna mi hi chu a dang ka timai. Neih ka hnial miah lo a nihchu, mahse tûnlai chu keimahah hian min mawlhtu a awm reng mai” tiin Faka te ho nui dar dar chu a ena.

“An va han thawveng tak, vawiin chu an bengchheng leh hle dâwn a nih hi, u Rinpuia birthday nilo se chuan ka rawn kal miahlo ang, min tilui leh char char tawh. Faka hi ka ngei a nia, mi tih luih a peih lutuka” tiin a sawi chhunzawma.

Ka lo nuih pui hak hak mai, an inrunluih peih ve thlâwt alawm. “Um rilru ti hah duh lutuk suh, chu chutia amah berin palai rawn tirh a tum te chuan ngaihṭha deuhin awm la, nangmah pawh lo in puah chah i ngai a nihchu, awi ka nu! Ka duh theilo” Pangang hmul neilo lian zet mai  kawnglaia lo vak ka hmuh chuan ka zuang zawka, ka au nghâl tuar bawk.

Mipa ho chu rawn hawi lêtin u Rinpuia chuan min rawn hnaih vata “Enge nita? Tinge thil hmuh i nei em ni?” a rawn tihsup chuan ka hmazawn chu ka kâwk ringawta, a hringin mit lianpui a nei te hian ka hria. Ka ti a tiza bawk nên u Rinpuia chu la sawn vat turin ka au chula.

“Khu mitlian pui a nei lehnghâl, ka rap lutuk, la sawn vat rawh” tiin ka au chûl mai.

Sâwma te ho lah chuan min lo nuih vak vak a nihchu! Mi mah hlauh nak a laiin chutia min nuih chu ka ngei bawk si, mahse ka che sawn ngam tawh lo. Pangang lam kaihhnawih hrim hrim hi chu ka ti thei ṭhak lo, ka ti an tiza tlat zel.

“Uite pangang a nih kha, dah bo thuai teh u Sawma” u Rinpuian a tih tâkah chuan an ni pawh chuan hmawlha rawn pir sawnin kawng thlang lamah an theh thla ta daiha, ka thaw huai mai.

“I hlauh te lah hi an mak thei sia, khatiang vawikhat rap la a pawt zawk mai dâwn alawm. Hlauh hi i ngah hrim hrim, Zohmingsangi chu i ni ve tak nângin i englai mah hi a sâng lo, i dawih em em ringawt. Zodawihi ti tawh che ila a ṭha ang” an tihzawm a.

Englai mah hian sawi tûr an haih chham lo, hming mi phuah lah hi an hnehsawh narawh. “Hlauhzawng a inang hleinem, in hre ve reng. Bâkah kha pangang kha a mit kha a va lian em em ve” ka ti chu za tak mai hian an rawn nui leh vak vaka.

“A mit a nih loh kha.....” an nuih zawm lehnghâl, an mittui a tla phung tawh. Mawii lah a lo nui ve bawk, chutia an vaia an nui ka hmuh chuan lawm lo zet hian ka ner nâng a.

Ka tum hmak bawk, u Rinpuia leh zêl a nui chu ka lawm lo zual. “In sual hle mai ka kal dawn” tiin u Rinpuia mi chelhna chu la thla hmakin ka kalsan nghal nal nala, min rawn ûmzui leh vat tho.

“Kan tihpalh a nihkha, a mit a ni hleinem. An pianzia ve reng a nia, tikhan mit ang tak lianpui kha an nei ṭhin a lawm, titau lo la.  Nula fel leh hmêlṭha an tau ngai lo” Mama chu a rawn ṭawng nghal zat zata, ka chhâng lo ka la tum luau ringawt.

“Sangte min lo nghâk ve teh u” kan hnunglam aṭanga aw rawn chhuak avâng chuan kan hawi lêt ṭhapa. Rintluanga tih kan hriat rualin u Rinpuia chuan ka kutah a rawn kai nghal chat mai, sawi lo mahse a mitmeng danglam chu ka hmuh hmaih lo.

Rintluanga hi a mil lo nghal êm êm kha a nia, a hma pawhin ka chungah a thinrim phah tawh a nihkha “I feh ve dâwn em ni?” kei min rawn en chunga a tihchuan ka bu nghata.

“A nih chuan kal tlâng ang u, khateh Zorina nên hian in in ngaizawng em ni?” a rawn tihzawm zata, u Rinpuia erawh chuan ka kut chu a hum nghet sauh thung. Rintluanga a hmuh a pianga a danglam ziah hi a thik vang tih ka hai biklo.

“Um ka bialpa a nih hi” ka ti ringawta, a meng deuh ak mai “Aw a nihchu, in inhmeh hle mai” a hmêlah erawh a thinlung taka sawi a nilo tih a hriat. Ka bialpa a ni tih ka sawi ruala u Rinpuia nui hmêl erawh ka theihnghilh phal kher lovang, a nui hmêl ka hmuh tawh a zawngah a la mawi zual ber tlat a tin ni.

“Rina ila chhuk lo a ni maw? I va awm rei tawh ve” Sawma te chuan rawn tiin an rawn kuah ang thuak thuaka “Nia ka chhuk ṭêp tawh, kar lehah chuan chhuh ka tum tawha. Chumi hma chu ka chhûngte ka pui ve rih a nih hi, Zorina te loah hian in feh vek dawn tihna nge?” tiin Rintluanga pawh chuan a lo chhâng ve maia.

Ka bula kal tum si kha u Rinpuia ka bialpa a ni tih a hriat aṭang kha chuan a kalsawn leh daih lehnghâl, “Be ṭha hauh suh” ka bengbula rawn phun sup chu ka ena. Ka nuih ringawt, hetiang em em a thikthu pêk chhiat mai chu, ka biak ṭhat loh zia leh midang nên hlir an inkawm tih a hmu ve reng awm sia.

“Ka fel zia hi e, bâkah ka biak vat loh kha. Mawii i va ngawi rei ta ve” ka ti chu a ni pawh a rawn hawi ha a “Nia ka ngaihtuahna ka lo kâwm peka, bâkah hei hla ka ngaithla alawm” tiin a benga a airpods vuah chu a kâwk zauha, a ṭawng tam lêm lo tih ka hre sa hrim hrim bawk nên engmah ka zâwt tawh lem lo.

Ngawi reng chuan Sawma te leh Rintluanga te titi chu kan ngaithla kawng tluana, an school kal lai meizial zuk ruk an hnamzia te chu sawiin kan nui tlâng bawk bawk hlawma.

“Kan head hlauhawm theih zia leh ninawm zia lah kha, a ke phah lah kha a dum thei bawk si” an tihchuan ka lo nui huka “A bal thei tak tak, dawhkanah khân in la lal deuh si khân a ke kha a kutdawh ke daih bawk sia” tiin an la sawi zawma, ka insûm theilo; u Rinpuia bân vuan chuan ka nui khûr dar dar mai.

An va han sual thiam tak “Middle school ah kan han lût chhoa, sir dul kiar pui pui kan han hrawn leh kha chu e, a ngaihna hi a awm tawhlo. Hmeichhe naupai hmu reng ang kan ni” tehkhinna lah chu an hre thei bawk sia, an teacher hluite an sawisak rawn a ni ber mai.

“Taka thingkung aṭanga i tlaka, i kekawr thing zarin a lo tai a vanga i kekawr kap ṭet vek kha chu tûna ka ngaihtuah lêt pawh hian ka nuih a la za, hmeichhe ho au chûl chunga nuihza bawk si a an awm lai te kha. A lo rei ve ta hle mai, nang lah kha mawnglang keng kûng khân i inkhai zuar mai si a” tiin Faka chu an kawka an nui pah hak hak bawk.

An school kal lai chanchin sawi chuan a tihlim hlawm hle tih a hriat, an ngai ve ṭhin viau in ka ring. “Han sawi tâkah chuan Remrema te ho pawh an ngaihawm hle mai, tûnah chuan kan hmeichhe tam zâwk pawh pasal neiin khawdangah min han awm sana, a ṭhente lah hna avângin ram dangah an awm bawk. Inhmuh khâwm ni a awm leh thei ange maw? Tûnah chuan kan kawngzawh a hrang ta nuaih mai anih hi” tiin Mama chuan a rawn sawia.

“Ni e, khân hunlai kha ka ngai ṭhin. Class ah bengchheng in kan nui tlanga, zirtirtute'n min han hrem ho dial diala, a ṭhen nitin hrem tâwk lah bo lo. Thil kan neih in kan insem ho dial diala, class kan tlanbo châng pawhin a ṭhenin min lo sawi mawi saka, khâng hunlai kha a lo ngaihawm ber mai. Rilru hah leh hmalam hun ngaihtuah miah lovin kan nun kan chena, kan hmalam hunah eng mi nge kan nih dâwn tih hre miah lo khân ang khata in enin chhûngkua ang mai khân kan khaw saa, tûnah chuan khâng rawlthar nun te khân min kiansan ve mêk chu a ni sia” tiin Faka chu a châwl zui data.

“Kan la inṭhen hrang dâwn a ni tih hre lo khân kan nun kha hlim takin kan hmang hoa, piang nawn leh dâwn pawh ni ila kha tih hun laia ka classmate te tho kha ka thlang leh in ka ring. Engkim kan ti hoa, kan infiama, hremna kan tuar tlanga, pakhatin thil a tihsual pawha midangin kan han tuarpui thei lai te kha kha aia ropui kha a awm tawh bik kher lovang, in hmangaih takin kan ei tur neih ang ang kan insem a, khâng hun lai kha koh kîr leh ka châk ṭhin, tûnah chuan tlâng hran mual hranah, a ṭhen te lah lei hnuaiah an zal tawh bawka. In tawh khâwm leh ni a awm tawh dâwn lo tih hre reng mah ila ngaih loh lai ka neilo” a sawi zawh rual chuan a khi saka.

Midang pawh chu an ngui ta nghiai mai, nunhluiah an chêng tih hai rual a nilo. U Rinpuia ngei pawh a ni, an hunlaia an ṭhiante chu an ngai hle ngeiin ka ring, keipawh chutia an sawi tâkah chuan ka ngaihtuah lo theilo.

Keini ngei pawh kan ni si, hmalam hun hre miahlo vin kumtluanin class khatah kan awm hoa. A ṭhen lehkhathiam thei deuh te, a ṭhen rilru chak lo, a ṭhen ei duh tak tak kârah class lâk apianga lo muthlu ziahte kan awm ve bawka. Khâng mi chi tinrêng fuankhawm a thisen inzawm miah siloa unau ang maia kan han khawsa thei kha a ropuiin nuam pawh ka ti.

An sawi ang ngeiin keini ngei pawh a ṭhen ramdangah, a ṭhen mahni khuaah awm in, a ṭhenin nupui pasal neiin an awm ve tawh bawka. A ṭhen lah dan rual lohvin thlân khur thûk takah an awm tawha, hun hi koh kir theih se keipawhin khatiang hun lai bâka ngaih kha ka nei bik kher lovang.

School kal turin kan insawma, class ah lah nise mipa leh hmeichhia inthliar miahlova kan han inkawm ho dal dal thei te kha a nawm lai ber leh school kal tinuam tu kha a ni ve in ka hria. Engkim kan neih ui miah lova kan insem ṭhin te kha, ṭhianho a awm khawma kan han nui tlâng bawk bawk ṭhin te kha ngaihtuah lêt chuan lung a lêng duh ngei mai.

“A lungngaihthlak lam chu ngaihtuah lovang u, auh lêt duh mah ila kan hun kal tawh chu an rawn kîr tawh ngai dâwn lo. Kan hma lam hun atân hian kan inbuatsaih a ngai sia lawm,  an ni pawhin an rawn ngaihtuah lêt anga ngaih châng pawh an nei ang. Mahse hringnun kalsiam, khuanu'n a duan lâwk sa a nimiaua, keini siam danglam theih ni hek lo le” tiin ka phun ve sapa.

“Ni e a dik a ni, nakinah a la dam ho hian reunion te hi nei ila a ṭha ang. Inhmuh khâwm leh te pawh a châkawm a lawm, kan hmêl pawh a danglam ve hlawm tawh ngawtin ka ring a sin, an number neih dân ngaihtuah khâwm ila a ṭha ang” tiin thudangah chuan an pakai zuia, ka thaw huai mai.

“I ṭap a nge aw” u Rinpuia en chunga ka ti thut chu a ni pawh a rawn phu zawk mai. Chutah nui hakin “Ṭap ul ul tur hmuhin min hmu em ni? Nang te hi min ngainêp riauin ka hria” a rawn tihchuan ka nui haka.

“Chutiang pawh anilo, in nunhlui te an rawn sawi nasa sia lunglenga ilo ṭah palh te ka hlau ve a lawm. Hetiang lam sawi hi hnuk ulh duh deuh mai a sin” tiin Mawii kal ngauh ngauh chu ka ena, midang thusawi chu hre âwm pawhin a awm lo, henu hi chu amah pawh hian a tlei mah mah a ni.

Chutia kan titi ho vâng nge kawng pawh chu a lo thui lo hle hian ka hria, reilote ah lo thlengin Rintluanga chu a pêng zui ta thuaia. “Ehe! I va zo teuh tawh ve, ka zo har ang chuti khati i tia, i inzep vêl a nimaw? Nang hi chu aw, Hmingeki rawn feh loh i hlauh vâng zâwk te hi anilo maw? In ngaizawng ber ber te u” an ti leh ṭan dâwn e.

Ni lengin an ri leh dâwn a nih hi “A duh leh a ti ve bawk ang chu, nilêngin in hmelchhe leh dâwn a nih hi, in va han ṭha leh phik phek dâwn em” ka ti kher erawh min chûm leh awk awk tawh mai.

“Awi! Ka dethress” Mama rawn au hluai chu Sawma chuan “Laldampui dethress an tilo, depress an ti. Mâwl lutuk suh, English hian thil sawi ve ziah suh kan tihkha, mualphona putu i nih hi” a ti zui hluk hluka, midang erawhin an lo nuih vak vak thung.

“Enge a Mizo in ka sawi peih lo a nimai a lawm. A hrim hrimah a thiam in tih ho pawhin Mizo ṭawng nên belhbawm loh chuan an sawi ṭha thei biklo, ka zir ve a nih kha. A dikna ka hre reng, mahse nangmah hian min lo judge vel kha nuam i ti leh dâwn tih ka hria a, ka sawi sual lui mai mai anih kha, anxiety a neia, a spelling a hrelo an tih ang kha chu ka ni bik lo ania” kawng chho nên nuih loh theih bawk siloh.

Ka nuih nân ka pum ana vek tawh, chutah thawk thlengin a har. Thlâm kan thlen tâkah chuan ka thaw huai mai, an bula awm chu kan nui hlum ṭhak ang tih pawh a hlauhawm zâwk. 

“In va han bengchheng tak, ko ro rual ang mai dâk zawm par par ringawt. In hrawk te kha chawlh tir rawh u, awr puar leh hrawk cancer te in nei palh ang, in ṭawng tam lutuk” Mawii chuan ning tih hriat tak hian a rawn ti a.

“I sambukpresss a nih chu” Faka chuan no hlek hluak hian a lo ti a “Awi thaw! Ka chham fuh em bawih?” tiin tuai tihdan a zir zuia, Thantea chu a va kuah kher bawk. Mawii lah a tum hmuk mai, ka nuih a za ve tho bawk si, an ṭhianho ṭawngthei lutuk hi chu a buaithlâk châng a tam a nih hi. 

ZAWMNA

Thlâm kan thlen rualin kan phûrte chu dah felin thingpui lum tumin Mawii chu a buai nghala, kei feh khat bawk nen engmah ka hre ve der lo. Thlâm tlaitlanah chuan ṭhu in thli chu kan inchhem tir heuh heuha, Sawma te ho pawh an nui chau deuh nge an thâwm a reh ṭhap mai.

U Rinpuia nghêng ar ar chuan an lo chu ka thlir kuala, ka feh hmasak ai chuan lo danglam tawh tak a ni. Thlai ṭo pawh ka hmu chiang ta viau, Fanghma phei chu an zâm tawh lehnghâl, “Awi khu ka thlai tuh kha a ṭo ve a nia” tiin ka fanghma leh dawnfawh tuh ṭo chu thlâm aṭangin ka hmu thei bawk nên ka au nghâl chûl mai. 

U Rinpuia chu ka sawi deuh nawk nawka “Awi ka thlai tuh te a ṭo ve thei, a nuam e. Ka hmuh châk ber a nia, a lo ṭo ve tawh” ka hlim rak vêl chu midang chuan min en tawpa “A ṭo ve bawk ang chu, ṭo tura tuh na na na i bengchheng khawlum nen” Sawma chuan rawn tiin a inzap zui hauh hauha.

Ngawi hmakin ka melh rum ngei mai “A pawilo, a tuh tu i hmêlṭha bawka i thlai tuh pawh an dâwng ngauh mai a lawm. Nakinah a rah hunah i la ei ṭeuh dâwn ania” tiin ka lu ah chuan u Rinpuia chuan min chûl sak hliau hliaua, a mi en dân chu pa in a fa duat taka leh hmangaih taka a en ang mai hi a ni.

“Tak tak maw? Ka lo feh ziah ang” tiin ka nuih ver vera, a ni pawh a nui ve suk mai. Midang ho lah chuan an aw min lo then khum leh vak vak tawh “Tenawm dûn e, single ho hi kan chêp ngawih ngawih a nih hi, mi in ngaizawng em em te u, in in ngaizawng ber e” an rawn ti erawhin ka nuih bâwm a hawlh keh leha, ka nui nghal hak hak mai.

“Nei ve zung zung rawh u ka tih kha, tar a hnu lamah nupui neih chu a sâwt lo khawp ang. In vuai zûn tawh dâwn sia maw, mi vuai ni chunga fa neih tum chu a har tawh ang. Khatia tlangvâl nuam ti a in lên lai khân in ṭhiante chuan fa an kawi duah tawh ania” tileh kherin u Rinpuia bân chu ka hmer zauha.

“A ho emaia, a ṭul hunah chuan kan duh duh an rawn puar pap pap mai ang. Kan vai bik lo emaia, nangmah pawh hian min star in ka hria” Fakan a rawn ti chu u Rinpuia zâwk a lo nui haka. “I duhthusam a nihchu” a lo ti khauh mai chu midang chuan an en nghal ṭhap mai.

“Eh..a bialnu tân chuan khatiang ṭawngkam te kha a hmang vêl a nia, in la zâwng tilmu mai mai” Thantean a rawn ti chu kha ṭawngkam ka hman zâna u Rinpuia hmêl chu ngaihtuah lehin ka nui phuh ṭhawt a, midang lah chu ti tho. U Rinpuia erawh a ner sawk sawk mai.

Nek deuh salh salhin ka mit chu ka sân euh euha, ka chalah rawn nem deuh sakin ka awm lohna lamah a inher nghal daiha. A titau emaw ni, chu chuan ka nuih tiza in ka nui deuh pût pût a, midang lo nui ve erawh ka khap nghal vat mai.

“Aw mengmawi i hmêlṭha chiang, i Man kan ti i mizia rêng hi, kan chîk reng che lânu zawngte'n, vâl zawng i khûm zo ngei e lêngi mitah” tiin hnunglam aṭang chuan ka zai khum rat rata, midang ho lo nui pût pût reng erawh ka melh rum takah chuan hmun dang an hawi ta diaka.

“Tinge midang thusawi avânga ka duhlai hnunglam min chhawn tâk mai. I lungdumtu, ka tling lo nge, i chûn leh zua lung ka dum lo?” zai bawk chuan ka chhunzawma “I over” a rawn ti hluk mai. Nui hakin a hmalamah chuan ka va ṭhu ngata.

Min la en duh miah lo “Tinge min tihtauh san ringawta, keimah pawhin ka sawi loh kha. In la zâwng tilmu pawh ka tih tawh ngai loh hi, Thantea a nih kha, titau lo teh” ka tileh chu “Ka duhlo, i ṭawngkam hman vâng a nihkha khatia min tih, hmang lo la an sawi lovang” tiin min melh rûn rûn a.

A mi melhna chu thinrim vâng erawh a nilo, lungawilo zet hmêl a putna phêna min duatna mitmeng chu ka hmuh hmaih lo. Nui ta sakin midang an hawi sawn bawk nen a biangah chuan ka hmui hian ka va tawhsak ta zauha, midang min hmuh hma chuan ka awmsawn leh ta thuai bawk.

“Le thingpui chu a so tawh em? A so chuan in zung zung ila hna ṭan ang u” ka ti chu midang ho chu an in melh kuala “Mahni bialpa te lo feh ni hi chuan kan duhâm ṭhin ania, lâwm te hi kan nawr chûk chûk reng chu a nih hi. I bialpa tân chuan i ṭha hnem ngai ve al al hle mai, Mawii rawn che vat rawh, nang bialpa nei lo ah” Fakan a ti chu Mawii lahin a lo duh lo nasa.

“Nang bialnu hmu theilo khân khati khân min ti ve hauh suh aw, keichuan ka nei. Ka nei chiang khawp mai, kha ka thli sa vek tawh, ka chhûng durh tuar khawp khân in rawh” tiin no chu a pe zuia, keipawh chuan ka sem pui ta vata.

U Rinpuia thlam sak a zau ṭha hek hawk bawka, kan tam ang aiin kan thâwl ṭha viau thung. U Rinpuia thingpui tur chu a hnung berah pêk pahin a bulah chuan ka ṭhu thla zuia “In ṭeuh rawh, i zun a in ang. Ni a sa dâwn ania, phai khawlum a feh chuan thingpui hi in ṭeuh tur, i zun a in chuan hrehawm i ti ang” a tih chuan ka hnial bik lo.

Vawikhat ka zun a in ve tawha, a hrehawm zia ka hria a. Zun in nawn leh te chu ka duh teuhlo, thingpui chu chhêm hlak hlakin ka in ri leh hlak ṭhin a, mipa ho erawh hma chin tur sawiin ruahmanna an siam nak nak hlawma.

“Tuhlohna a zâu tawh lo bawk a, vawiinah kan zo hman vek ang. Feh kan tam a lawm, dah bân leh laklawh awm lovin kan zawh hma loh kan thawk mai tur a ni. Zanin birthday hlim taka kan hman theih nân kan ṭang tur a ni, keiniin a bi lâi ila. Hmeichhe pahnih leh Thantean lo thlâk rawh se, kan chak dân tur ber zawn angai” tiin an sawi zuia.

An laih sa a lo thlâk chu a hahthlâk lêm loh tih ka hria, u Rinpuia khân min hrilh tawh miau a. Ka phur ve viau mai, chutih rual erawhin ka vawikhat tihna tur a ni bawk nên zawh chawp erawh ka ngai ngei ang. 

Thingpui chu no hnih vêl ka in tâkah chuan duh tâwkin mipa ho erawh an in thei phian mai. Mawii pawhin no thum lai a in, kei erawhin ka in belh theilo, ka hrawk hi a reu vek ten ka hria. 

Thingpui in zawh chuan tho chhuak phak phakin ka lukhum ken ve chuan ka sam chu tawm chho deuhin ka lukhum chuan ka khum hnana, midang ho thlâm chhuahsan chu u Rinpuia nên chuan muangchangin kan zui chhuak ve a.

Ka hawi kual vang vang mai, midang pawh feh an awm nuala. Feh kal mêk ho chu an au kual paha, a reh dâwn lo hle hian ka hria, mipa ho chuan chek nghâl phak phakin keipawh Mawii chu sawhthing dah dân tur zawng chu ka zâwta, amahin thlak paha min hrilh chuan ka man ve nghal mai bawk.

A mit lam chu pâwn lam hawi zâwng zela dah tur a tih avâng chuan a har lêm lo bawka ka thiam nghal mai bawk. Ka ṭuan erawh a muang bik hle, an ni chu an dah zung zunga, leia chhilhin an kal kual zung zunga, kei erawh bi khat ka chhilh chhûng pawh a rei ngei mai. 

Min sawisêl lem lo chuan an titi bawrh bawrha, hna an thawh tâkah chuan inhnial an awm lêm lo. U Rinpuia erawh a tihdan ngai tê in a ngawi leh ngar tawh, hna a thawh lai phei hi chuan a ṭawng duhlo lehzual.

“Hmingek min lo ûm zung zung ta che, hawi veuh veuh lo khân thlanglamah hmuh ṭha an awmlo. Ramhuai te i hmu a nih loh chuan i bawp tawi tê kha kâr ve pâwk pâwk rawh” Sawman a rawn ti lâng lâng chu melh zawkin ka tih ngai chuan muangchangin ka thlâk leha, a lum bawk nên ka thlan chu a luang zawih zawih reng mai.

Mawii leh Thantea lah an thlâk chak bîk bawk sia, ka ûm lo theilo. “Mei zuk chawlh nei lawk ang” tiin mipa ho chu an ṭhu zui diala, keipawh ka in tuai leh ṭhin “Ehe! Kha i biang a tai tûk mai, i no lutuk a nihkha. Hmanlaiah chuan awm la, lalfanu biang tai hlar, no suah hmêlṭha an tih kha i ni ve dawn a nih kha, ve it eta. I lâwm em? Ka sawi dik i ti” Maman a rawn ti chu midang chu an lo nui leh hak mai.

“Lo kal teh” u Rinpuia chuan a bul chu a beng thuk thuka, pan vatin a bulah chuan ka ṭhu thla a, ka in zâp pah hauh hauh bawk. “A lum hle mai” ti a phun sapin a thlan luang zawih zawih chu ka puan ka nghâwng vêl tuam nâna ka hman chu la thla in ka hruk sak mawlh mawlha.

An chau tawh viauin ka ring, an thlan a luang zawih zawiha. Chutih rual erawhin fiamthu an la thawh peih reng thunga, an bula chên a an hnathawk han hmuh tâkah chuan an taimak zia leh tumruh zia ka hre thar ve zel bawk. 

“In chak bîk lutuka, ka ûm pha theilo cheu. Mahse kan ṭan leh hunah chuan ka ṭang tawh viau ang” tiin ka nui var vara, u Rinpuia erawhin tui chu min rawn pe in ka biang tai hlar chu a rawn piai zauha. Engmah a sawi ve lêm lo, ngawi theia ka timai, engtin nge hetiang em em hian ṭawng duh lo hi a nih theih ni.

“Hnathawh hlimah chuan kan ni vek a lawm, in inneih hunah nitin i feh ve anga. I chak tual tual mai ang, inneih vat in ngai tawh, in pa a lêng rei lutuk dawn” ti a an nui dar dar chu enin “In inrual vek deuh thaw a, engah nge a lên rei bik ngawt ang? Nangmah ni zâwk hi a nia ngaihtuah awm cheu, a ni chuan kei min nei tawha. Nang ni chuan tumah in nei lo” ka ti chu an nui liam ringawta.

Lo mawng lam âwih tlân aṭanga thlifim rawn thaw heuh heuh chuan ka hmai a rawn chhêm a, a dai nghal sawng sawng mai. Mitchhingin thawk ka la ham hama “I chau tawh em?” u Rinpuia chuan rawn tiin midang hmuh loh lamah ka kut chu a hum a.

A kut chu ka melh zawk mai, a lei cheh nân a balin a chang deuh hrapa. Mahse hmuh mawi lohna ka neilo, ka mitah chuan a mawi em em tho, hum lêt vatin ka lu ka thing nar nara “A nuam ka ti, pasalṭha thawnthu ka ngaithla tam lutuk, feh reng ka duh zâwk. Ka tha tihpun ve te ka duh a lawm, ina ka awm reng chuan ka zawi nguai renga, a ninawm tihian feh ve reng thei ila duhthusam a ni” tiin lungte chu chharin ka vawm paha.

Ka sira lei thlai tuhna ang tak ka hmuh chuan a ṭo theilo emaw tiin ka hai keuh keuha, thil tui ka hai chhuak nawlh mai. “Ee hei sava tui, ah,a dup leh si. A ruh ve miah lo” ka tihlai chuan midang chuan min rawn en ṭhapa, chutah an la nui vak zui.

Mak ti zeta ka en lai chuan min kâwk in an nui kiah kiaha “Sava tui nilo in Laiking tui a nihkha, ti keh vek ang u. An rawn keu hma in” tiin tih keh mai an tuma, ka lo phal lo chu u Rinpuia chuan mitmeng dam dupa min en in “Dang suh, thlai an ei chhe ṭhin a, a dang hmun dangah an keu mai ang. Lo chhûnga an awm chuan an rawn keua, thlâi an ei chhe ṭhin a, tih keh tir rawh” a tih tâkah chuan ka dang duh ta lo.

Laikingin thlai an ei chhe ṭhin tih ka lo la hre ngai miahlo, “Ṭan leh tawh ang u hmiang, kan zo har lutuk ange, vawiinah zawh hman kan tum chuan kan ṭan ve deuh angai a nia” tiin an tho zui leh phak phaka, u Rinpuia birthday a ni bawka an lawmpuina tihlan dân chu a lâwmawm tâwp khawkin ka hria.

Phût nei miahlo in a thlâwn liau liauin an rawn pui a nia, an ni chuan unau an neiin hna an la thawk ho theia. U Rinpuia erawh a unaute an in dang vek tawh bawk nên an rawn pui hman bik siloa, amah pawh a lâwm viauin ka ring.

Keipawh a hma ai chuan ka thlâk chak ta deuh bawk nen keimah te pawh chuan ka hlim ve em em ringawt, u Rinpuia min zui tir bawk nên ani pawhin ka zai ngai tê in a chêk a, midang chuan min sawisêlna leh nuihna pawh awm hauh lovin an titi bawrh bawrha.

An hnathawh lai chuan an zia a hrang hlak mai, “Duati nang chhûn ei tur lo han siam tawh ta che, dâl leh sangha ṭin ka ken kha, lo han chho tawh rawh” u Rinpuia chuan a rawn ti a, midang pawh chuan an lo sawi ve nghal vat bawk.

A hnathawh lamah ka tha a ṭha lo ber bawka, mi an khawngaih tih ka hria. Hnial duh lêm lo chuan thlâmah chuan chho in ka kawr chung chu ka phelha, a dai nghâl sawng sawng mai. 

Mei chu a la nun ringin ka han chhêm dâwn a, a lo la thi zui. Vânneihthlâk lutukin u Rinpuia chuan khawnvartui a lo riah hlauha, thing ther chu thliak khâwmin ka rema, khawnvartui chu leihin thlâm lighter tur bik di tipa an zeh chu la in ka talh alh ta pawpa, khawnvartui chu ka lo leih tam deuh nge rawn alh vung thutin ka sam hma chu a rawn alh ta chuaia, ka au deuh ṭhat bawk.

“Hmingi enge thleng?” an rawn tihchuan ka sawi ngam lo “Engmah ka intihliam palha, engmah a nilo” tiin thing chu ka tuah nghal mawlh mawlha. Ka sam hma var phurh chu ka hmu thei hial mai, a kâng tih chiang takin ka hre bawk. Ka sam hma tan a ngai ngei ang le.

Ka phone a ka in en chu a lo kâng nasa phian lehnghâl, ka hmêl pawh a tidang dawrh thei nia. Dâl kanna tur chu siam zung zungin ka sam hma kâng lai chu ka lukhum chuan ka khum hnan ta daiha, a kâng nasa bawk si an rawn hmu ngei dawn tih ka hriat vâng a ni pakhat.

Lo nei ṭhang an ni bawka, ramhnuaiah pawh in lam ang maiin hmanrua an inchhawp kima, rawngbawl pawh anuam viau mai. Dâl leh sangha ṭin chu kang zui phar pharin a hmin ka nghah chhûng chuan hmarcha te chu rawtin an hnathawk chu ka en paha.

Ka awm tâk lohah chuan ka awm lai ai mahin an hna a sâwt zâwkin ka hria, an tlân titih ti ila a dik ber ang. In tha zo tak mai hian an tlân kual zung zunga, a chêk tu ho in an hneh bawka Mawii te pahnih pawh an ṭang dûn viau mai.

“A hmin tawh e, lo chho tawh rawh u” tiin ka aua, an ni pawh rei thawk tawh lo in an rawn inzui chho diah diaha, thlam tlaitlanah chuan ṭhu in ka sam hma chu ka en leh ṭhin. A kîr veka, a mawi lo ngei mai, tan rual ringawt dâwn ila a chhing dâwn ropui bawk si, ka inhmeh dâwn lo tih ka hreciang viau.

An bulah sawi ila zeilo min tiin min nuih leh ka hlau bawk si, ka sam chu ka ui ngei mai. Thlâm a an rawn luh rual chuan tui chu lo pe vat vatin an in zui khalh khalh hlawma, u Rinpuia ka bula rawn ṭhu chu ka en ṭha duhlo.

Ka sam hma kâng hi an hmu a nih vaih chuan an nui ngei ngei dawn. Min ti hmelchhe zo vek bawk si, “Chutia chawhmeh tur a hmin tawh si chuan kan ei nghal mai dâwn em ni? Kan zawh tlai lutuk dâwn loh hi a, a tlêm tawh emai. Tiru chaw i bar zui thuai ang u” tiin kei leh Mawii chuan chaw ei chu kan siam nghal zung zunga.

An chawfun chu phawrhin keini angin tiffin an hmang lêm lo, Mawii leh kei tih loh chuan sarang in an fun vek mai. U Rinpuia erawh thlamah thleng a riah bawka chutah chuan a sarang a mi chu a ruak vek mai..

No ah ka chawhmeh kan chu thli chhuakin a ṭhen in an chawma, an bar nghal mawlh mawlh mai. “Tinge lukhum i khum reng a lum tehreng nên i lu a tina ang” ka dan hman hma chuan u Rinpuia chuan ka lukhum chu a rawn phelh ta mai.

Ka in hup nghal vat nangin ka kut chu rawn la sawnin chiang zet hian a ena. Ka zak bawk si chu ka lo kûn chal mai, “Ehe! Tinge i sam chu? I ti kâng em ni?” midang chuan min rawn enin an ti ta rênga, hmu lo se ka ti a sin le aw.

Mawii pawhin mak tih hmêl zet hian min ena, “Min en reng suh u, mei kha a rawn alh na thuta. Ka inring hman lo a lawm, engtin nge ka tih ang le? Ka tan chhîn hle a ngai dâwn bawk si, lukhum ka khum char char a ngai mai thei a ni” ti a ka phun sap lai chuan.

“Nangmah i na em? I inti kâng em?” tiin u Rinpuia chuan a chaw bar mai lo chuan ka chal leh biang vêl chu a enkual zung zunga, min nuih zat miah lo. A mitmeng chu a thutakin min ngaihtuah hle tih ka hre mai, ka chal chu a rawn chhêm heuh heuha.

“Aih ka sam chiah kha a kâng, a dang chu ka kâng lo. Ka inring hman lova, a rawn alh thut sia” ka tihlai chuan Sâwma te chu an rawn nui hak haka, “Pitar te pawh i ang a lawm, kha i inhmeh dangdai phian. A kan nasat vak loh kha a kan na lai te te kha chep thla la, chûngin paih nasat a ngai lo ang” an rawn tih tâkah chuan ka thaw deuh huai mai.

“Fimkhur tawh rawh aw, i inti kâng palh hlauh a nge. Khawnvartui hman phei chuan fimkhur a ngai a nia, a alh ṭha duh si a, tlêm te bâk hman chi anilo ania, chaw ei ve phawt ang” tizuiin chaw chu a bar zawm nghal mawlh mawlha.

Keipawh chutia a kâng nasa lutuk lo a ni tih ka hriat chuan ka lâwm, chaw chu bar zui ve nghâlin chutia ei ho tâkah chuan chaw chu ei lah chu a tui phian lehnghâl. Ramhnuaiah hian chaw ei a tui bik hrim hrim, ina kan ei ṭhat peih vak loh pawh hi ramah chuan a lo tui êm êm zêl.

“I kang thiam hle mai, rawngbawl hi chu i thiam ani. Hnathawh i thiam lo mai pawha, mahse i ei rawngbawl thiam na hrim hrim pawh hi nupui atân awhawm tham chu i ni ve hrim hrim a nih hi, hnathawh theih loh pawhin inlamah tal hian ṭangkai em em mai ila nun chu a nuam tlâng ngai e” in la puitling zeta Faka ṭawng chu midang chuan an eilo tlâng teh e.

An in sawisêl chhâwk ta rêng bawka, nui hak hakin kei erawh rei ei lo chuan ka kham zui ta thuaia. Mawii pawh a ei rei lêm lo “In va ei tlêm ve, a hmeichhe awmchhun pahnih in nih kha, ei pûk pûk ta che u. Khatiang te chuan engtin nge in chak theih ang? Rawn ei leh rawh u, in lo in ti zak kual nge maw ni” tiin an phun nâng nâng zuia.

Chawhnu lamah chuan tam thawh tur a awm tawh lo bawk nên rei thawk tawh lovin kan zo thuaia. Ka thaw huai mai, a mah chuan nithum vêl lai a la thawh tur a nia, mahse Sawma te ho zârah a zo thei chu ka lawm pui, enghelh nei lovin tihian in lamah a awm ve thei rih dawn tih ka hria.

A ni pawh a lâwm a niang a ṭhiante chu lâwm thu a hrilh ve sup supa “A ho lutuk, ṭhian chu in puih tur. Bâkah nangmah chauh i nia, keini chuan thawhpui tu kan la nei a lawm, hlo thlawh vêl pawh in lâwm chho ila a ṭha ang. Eng nge in ngaih dân?” Sawma chuan tiin midang chu a enkuala, a ni pawh hi u Rinpuia tih lohah rilru puitling ber a niin ka hria.

An lo aw tliar tliar tâkah chuan pawm tlangin thlam lam chu kan pana. “Haw nghal mai ila a ṭha lo maw? Cake lam te kha in order a ni lo'm ni? Va lâk a ngai ang chu, zanin chu nuam ti deuha lawm tur, Thantea birthday kan hmang nuam lo nasa si” tiin an phûl zui hluta.

An sawi ang rêngin an khuaah cake siam thiam an awm loh avângin khaw ṭhenawm a mi chah a ngaia, ka buaipui sa vek tawh bawk. “A ngai lêm dawn em ni?” ti u Rinpuia lo ṭawng chu midang chuan an khap thuaia, a ni hi chuan a birthday lawm a ti vak lêm lo, ka upa tawh birthday lâwm rual ka nilo a ti leh tlat tawh mai.

Midangin engah mah an ngaih tâk lohah chuan a ngawi liam ve maia, reilote chawlin kan inzui haw diah diaha, haw lam chu kawng a chho bawk nên tumah han ṭawng ṭha peih an awm lo. Mawii nên chuan kan titi zauh zauha, mipa ho erawh an chau bawk aniang ngawi reng hian an kal mawp mawp mai.

“In ka a chih ta em ni? In va han ngawi thei ta ve, hetiang reng hi ni ula a ṭha ang, a nuam zâwk daih mai” ka tichu min rawn melh nghal ṭhapa. An ner sawk mai, nui hak in Mawii nen chuan hma kan hruai zawm leha.

“Kawngpui kha chhuak vat vat ila aw, Mawi saw sunhlu lo ang” tiin sunhlu rah tlêm lo awm chu ka kâwk a, a rah a hun tawh chiah lo nen a tang rah a ni tih a hriat. Hnaih thuaiin a awm chhun chu kan lo veka, mipa ho chu kan pe ve bawk. 

“Ei vat ila tui in leh ila a tui bik, a thlum dep dep lai tak hi a tui” Mawii chuan tiin kan ei zuia, tui kan han in leh chu a sawi ang tak takin a thlum dep dep mai. 

Kawngpui kan chhuah chhoh tâkah chuan ka thaw huaia, châwl sap sapin tui chu kan in a, chutia kan lo chawlh lai chuan lo feh ṭhenkhat haw hma te pawhin min rawn ûm pha zuia, an in be bawrh bawrh mai.

Zân a rawn thlenga, u Rinpuia ka pêk tur thil chu ka tuam ṭha thana, hei erawh midang awm loh hunah ka pe ang ka tihkha a nia. Cake chu chhawp sa vekin intur lam nên chuan kan chaha, kan ṭhianho bâk sâwm vak duh hek lo tumah midang an tel ve dâwn lova.

A lehlamah chuan mi tam lutuk pawh hi buaithlâk châng a tam ṭhin. Amah u Rinpuian a duhlo bawk nen midang tello in kan ṭhianho chuan kan awma, Mawii nên chuan in tur chu kan buaipuia, mipa ho erawh games khelin an au chêl chûl mai, a châng leh an inhau leh ṭhin.

Games vâng mai maia an han au vak vak chu an bengchheng ka ti bawk nen ka hau hlaka,“An bengchheng tak tak, keini pawhin kan khêl ve tho a saw ti vak vaka au, an thiam lo hle a niang. Tirawh va pe ang” Mawii pawh chuan rawn tiin theitui chu kan va chhawpa, u Rinpuia erawh a khêl ve lo nângin a phone a en mual mual reng thung.

Ka va bih dêk dêka, cartoon a lo en a nihchu! Awi hepa hi kum 30 a tling dawn tawha cartoon ala en mai mai chu ania, a hriat loh vêk chuan ka kalsawna, a awmdân avâng chuan ka ngaih a ṭha vêng vêng ringawt mai a ni, mi biak a nei emaw ka ti kha a nia. Larva lek a lo en chu niin, patling pui en atân chuan ho viau angin lang mahse keipawh hian ka en duh lutuk tlat.

Lungngaih châng phei chuan mi an ti thâwl hawk thei miaua, film pângngai en ai chuan hmuhnawm ka tizawk. 

“Tiru dah tawh rawh u, hei dar 9 a ri takngial dâwn cake zai tawh ang u,” tiin cake chu dawhkânah chuan hungin a hmaah u Rinpuia chu kan ṭhut tira, duh lo viau mahse birthday lukhum chu khum tirin êng ti thimin bati chu kan chhi a, kan zai rual nghal ṭhap ṭhap mai.

A ni erawhin naupangchhiat thlâk a ti leh viau tawh, birthday hla kan sak zawh chuan bati chu a chhêm hluma. Kut kan beng nghâl dar dar mai, “Zai vat ang u ka ei châk tawh teh mai a nia, ka ei hmasa ber duh” Thantea chuan a lo ti ve bawk. 

An hahthlâk ṭhin, puitling tak hian an awm theilo hrim hrim. Keimah chuan zaiin u Rinpuia chu ka barha, alo âng ve mai bawk, midang te pawh barh kualin a tâwpah an hmaiah an in tah saka, kei leh u Rinpuia erawh min tat ve lo thung. Mawii pawh a hmai a var luai mai, mipa ho chuan an tah rawn ani ber mai, a ni pawh a nui ve ta tawpa.

“A nuam hle mai, ka birthday thlen ve hunah chuan ar kan talh ang. Chaw ei khâwm ang zawngin kan che ang u, kan haw mai dâwn em ni? Hmingeki hian tih duh te a nei ang, haw san ang u. Keini a ngaihzawng neilo te chuan hetiang ni khuaah chuan chance te pêk ve tur” in la zei fahran hian an chhuak zui veka.

Ka dang duh lêm lo, hei chu ka haw hma aṭanga ka sawi sa kha a ni hrim hrima. Room-ah lûtin u Rinpuia present tur ka dah chu ka phawrh ta vata, midang awm laia pêk kha duh viau mah ila a zia ka hria a, midang awm laia pêk kha a duh dâwn lo tih ka hriat avângin engmah ka hrilh lêm lo.

A hmaa va dahin “Happy birthday” tiin ka nuih ver vera, a en nghal vut mai. “Eng thil nge?” a ti ta reng a “Hawng la i hre mai dawn a lawm, i birthday present a nih kha, la ngei ngei rawh aw. I duhzâwng ngaihtuahin ka rilru a insual rei tehmai a nia, i duh ngei ka beisei” ka tih tâkah chuan engmah sawi tawh lovin a hawnga.

Tshirt leh sana ka leisak a hmuh rual chuan a ngawi ta renga, a lâwm lo em ni tih ka ngaihtuah hman tawh. Thin phu dep dep hian ka en a, a duh lo angem, nge ni a lâwm lo viau zâwk ang ti a ka ngaihtuah lai chuan rawn dâk chhuak lehin “Ka lawm e” a ti ta supa.

Ka thaw nghal huai mai “I duhzâwng a ni em?” tiin a bulah chuan ka ṭhu thla a, a lo bu nghâl nghat bawk. Ka kutah chuan rawn humin ka lamah a rawn awm hnaia “Hetiang hi a ngai kher lo a sin duati, a mipa zâwk hian engmah ka tihsak ngai che siloa, hetiang kher lo pawh hian ka lâwm tâwk tawh a sin, a to dâwn tih ka hria. Ti tawh miah suh” a tihchuan ka lei ka chhuah zauha.

“Ka duh a lawm, i ni bik liau liau ania, heiai ṭha pawh hi i phû. Ka tân thil tam tak min tihsak tawh zâwka, kei hian engmah ka la tihsak lo zâwk che a, khatiang thil ho tham lutuk a nih kha. Heiai ropuia tihsak theih che ka châk zâwk a sin, khawvel eng ilo hmuh ni? Ka tân a mi pawimawh ber ni tura i lo pian ni hi ka tân chuan a ho theilo, lo piang lo ta la ka tawng dâwn lo che a sin” tiin ka kuaha.

“Engmah sawi tawh suh, i piancham pual liau liau a nih kha. Kum dangah i lâwm ngai lo tih ka hria, chuvang chuan tûnah chuan i birthday kan lâwm zêl tawh ang. Ka hmangaih piancham hi lawm ngei ka duh, i nunah ka tel ve zia leh ka hmangaih zia che lan tir zêl hi ka duh ani. Kha thil pêk avâng khân inthlahrung hmêl nilo vin i hlim hmêl zâwk hmuh ka duh, tin phût lêt neiin ka pe lo che. Ka phût awm chhun chu min hmangaih la tih chauh hi, ka nawr lui ngai dâwn lo che ka tih kha” tiin ka phun mawlh mawlha.

Tûn thleng ka hmangaih che tih a la sawi lova, keipawhin sawi turin ka phût lui ngai dâwn lo. Amahin a sawia min hrilh hun ka nghâk tawp tawh, nawr luih ka duh ngai lovang, a duhthlanna ngeiin min hmangaih sela, kha hmeichhia kha a theihnghilh a, kei min hmangaih hun a ni ka nghahhlelh ber ni.

Ka thusawi zawh chuan min rawn kuahin ka nghâwngah chuan a hmai a phuma, a zak hnuaiah kut rawlh lûtin ka pawm nghet sauh bawk. Mipa a ni a, mipa ah pawh Mizo mipa ngei, mahni thu duh ve tak. In la pa em em a rilru zawng zawng sawi chhuak mai mai lo tur tih ka hre chiang, hnamdang mipa anga hmangaihna sawi chhuak zung zung chi a ni ve lo.

Hmân aṭang tawha lu la hnam, ṭawng zen zen lo. Hmangaihna leh in ngaihzâwnna thilah pawh hmeichhia han ngaihsak khu chûk chi a nilo tih ka hre chianga, chuvanga nawr lui duh lo ka ni bawk. Thlahtu thisen ṭawm tu a ni tih ka hre chiang, a mah mai nilo in Sawma te ho pawh kha an ni vek ang.

Mizo mipa chu hetiang lama an luhlulna hian tam tak chu a tina zâwk ṭhin. An duh vâng ni hauh lovin hnam zia la chhâwmna lai an neih na hian hnamdang te anga nupui leh bialnute han duat hliau hliau leh ngaihsak hi an la thiam lutuk lova, an in la pa leh tlat ṭhin.

“Min hmangaih rawh ka ti lovang che, mahsela min hmangaih erawh ka duh ber bawk si.” ka samah chuan rawn chulin a nui ringawta, ka hmuia dam dapa a rawn fawh chuan ka chhâng lêt mai lo, mak tizeta min enin min fâwp lui leh ngata.

Ka chhân lêt tâkah chuan a duhthawh ta riau lehnghâl. A che chu nidang a ang miahlo, ka taksa chu a khawih kual dan dana, chûngin a che vut vut chuang hek lo, a tih ang ang chuan ka awm ringawta, a chhan pawh a hunah a insûm theih ka rin vâng a ni pakhat.

“U Rinpui duhtâwk ang” a chêt nat tâk êmah chuan a insûm theihloh hlauin ka namsawn ta vata, dik tak chuan keichuan ka hmangaih lutuk, a tân ui ka neilo. Mahsela ka laka a rilru put hmang ka hre bik lova, chubâkah a hun hma a kan che sual a nih chuan nakina ka tâna natna leh inchhir kumkhua a ka awmna a ni thei tih ka chiang viau bawk.

“Tihpalh, insûm a va har ṭhin ve” tiin a nui haka, ka chhâng lo. Keipawhin insûm har zia ka hre chiang miau a lawm, kan induhtawna, kan pahnih inkara in hipna nasa tak chu ka hmuh hmaih in ka hriat hmaih bik dêr silo.

“Ka hria alawm, mahse insûm hrâm hrâm kan tum kha. Ka hrethiam lutuk che a nia, mahsela kan innei ngei angem pawh kan hriat loh lai hian thil sual kan ti theilo, ka hmangaih che a i tân ui ka neilo. Chutih rual erawhin ka zahawmna erawh nangin min hum pui loh chuan tumah in min hum sak tur dang an awm lo tih i hriat kha” tiin a âwmah chuan ka bei a.

A ni pawh a thaw huai mai, insûm theilo in min nawr tlat se chuan ka dang reng theiin ka ringlo.