DUHLAI ZORINPUIA CHAPTER 10

DUHLAI ZORINPUIA 

CHAPTER 10

Zîngah chuan luna burin ka tho chhuaka, ka mit lah nise a kham urh mai bawk. Zorinpuia chungah ka thinrim hluah hluaha, biak hmasak erawh ka tum hauh lo. Ka thinrima min thlêm pawh tum lova a reh hmak te chuan min tina zual.

Ka thawmhnaw tlêm a zâwng chu khung fel sa in ka thawmhnaw tam zâwk Aizawl lamah a awm tho bawka hawn vak ngai tur an awm lo bawk nên ka insiam rei lêm lo viau mai. Ka nu nên pawh in be lehin patea dinhmun pawh a tla hniam telh telh tih a rawn sawi chuan ka rilru a hah ve det mai.

An fate an la naupang ve si a, cancer kher kher hi chu a nunrawng mah mah a ni. Lo in hre hma deuh se chuan in enkawl dân a awm tur a nia, a pawi tih bâk tih theih vak a awm tawh chuang silo.

Chhûnah pawh Zorinpuia chu a rawn lang hauh lo, a message lah a awm hek lo. Mawii rawn lêng hnênah chuan kan awmdân vêl chu ka sawia “A va timak ve, ngaihzâwng hluite nêna ṭhian anga awm leh tlat hi a ṭha vak lo a sin, ṭhian nih hnua in ngaihzâwn chu a awm theiha; mahsela in ngaihzâwn hnua ṭhian nih leh hi chu a dân a dang a nia, a hma angin a awm theih tak tak loh” a tihchuan ka ngaihdan chiah.

An mahni ah inzawmna a lo awm tawh miau dâwn avângin an inkârah danglam a awm ngei ngei dawn. 

“A duh thlanna a ni tawh mai, hmangaihtu kalsana a hmangaih a vuan duh a nihchuan a pawilo, kal mai rawh se. Ka hmangaihna avâng tingawtin ka chelh reng thei dâwn lo, a hmangaih a thlanna lamah hmangaihtu a chân a, a hmangaihin a tina a nih chuan a tawrh tur ve rêngah ka ngai, kan hmangaihte chu kan duhsaka, hlim turin kan duh ṭhin. Hmangaihna chuan hmasial châng leh nunrawn châng a neia, mahsela chu hmangaihna vek chuan hmasial theilo turin min siam leh thei bawk, a duhthlanna a ni tawh mai” tiin ka nui saka.

Na lutuk anga lan ka tum bik der lo, ka rilru a hria a, a tâna ka inhuam thui zia leh ka hmangaih zia pawh a hria. Chuti chunga min kalsan duh a nih chuan ka dang ngai dâwn lo, ka hmangaih a, a hlimna tur ni a a hriat a pan duh a nih chuan keichuan ka hmangaihna avâng pawhin ka kaltîr mai ang, tuar dâwn pawh ni ila ka hmangaih a hlim dâwn chuan a pawilo.

A lakah ka thikthu a chhia a, ka lakah engang rilru nge a put ka hre bawk silo. Min ngai pawimawh tak tak chu nise tûnah pawh min rawn hmu em em ang, mahse a rawn kallo chu a nih hi, kei min ngaihtuah lêk lo in kha a bialnu hlui bulah khân a nui hawr hawr te pawh aniang, ka thik na chuan ngaihtuah loh tur min ngaihtuah tir lo theilo, ka tâwt ṭeuh bawka.

“Nghak phawt teh, bialnu te han thlêm hauh hauh chi a ni silova, a rilru pawh a buai ve viau mai thei a sin. I thinrim sia i thinrim reh hun a nghâk te pawh a ni'ang” a tihchuan a dik ka ti ve tho bawk si. Mahse ka lungawi thei chuang lo, message tlêm tal pawh a rawn thawn ve tur a ni dâwn lo'm ni? 

Min rawn biak hma chu ka be bik awm lo emai “A bialnu hlui a hmu hrim hrim pawh kha ka duhlo, min rawn biak hma chu biak hmasak ka tum lo. Chutilo chu alakah ka nem hma zia hria in min zuam mai mai ang, ka khauh hun a awm angai. Awlsam taka ka ngaidam zel a nihchuan nakinah ngaiah a neih anga, keimah bawkin ka tuar dawn” tiin rilru hah zet hian ka thaw leh hak ṭhin.

Ka bulah awm se chuan ka vaw tlu tawp tawh ang, hmangaih mah ila mihring chu min hmangaihzia leh min duhzia kan hriat chinah chuan keimah niah in duh tawkna leh min kalsan phal tak tak âwm lo emai tih ngaihtuahna kan nei a, chu chuan keimahni min hmangaihtu lakah kan induh khum fo a, kan kar a hlat phah ṭhin tih ka hre ve kar tlat.

A hlimna tur ni a a hriat chu ka pan tir mai ang, a thlang suala a na a nih leh a tawrh tur a ni tawh mai. Ka hmangaih avâng ringawta neih tuma beih chiam kha ka tum ve hauhlo, keiin ka hmangaih ringawtin engtikahmah kan hlim dûn ngai lovang.  

“Nia kan duh zia kan tihlan reng hi chuan min ning daih theia, hmeichhia zâwk kan nihna avâng pawh hian min ngai nêp viau thei, chutiang hunah chuan insiamrem hun a ngaih châng hi a awm ve alawm, englai pawha a dawhtu leh hrethiamtu zâwka kan ṭan reng chuan nakinah kha khân kan lâk aṭangin a la hrang a nga, keini chu hnawksak leh duh duh a tihkual theih ang lekah min ngai ngei ang. Chuvâng chuan a tâwk a awm thiam hi a pawimawh, mipa emaw hmeichhia emaw kan ngaihzâwng te lakah duap kai taka kan awm fo chuan kan rilru hrechiangin phatsan duhna rilru, min ngaidam leh tho ang ti a tihsual luih tum an awm phah ṭhin” a rawn ti ve dap dapa.

Keiai nau mahse ngaihtuahna sên lamah erawh ka phâk lo tihchu ka hre chiang hle bawk. Dâwrah kalin chhûn ei tur kan lei duna, tlêm chuan ka awm pawh a nuam ve deuh.

 A khât tawkin ka phone chu ka check leh ṭhin, message hmuh tur a awm lo, a feh ka ring chiahlo a, a chhan pawh a feh chhuak ka hmu hauh loa, nidangah chuan a feh a nih chuan ka hmu ngei ngei ṭhin.

Zorinpuia awm dân zet chuan min ti thinrim ngei mai, engvanga min biak tum reng reng lo nge maw a nih le? A message chângin ka nghâk ve ngar ngara, thumal khat tê mah a rawn thawn lo chuan ka ṭah te lam lam a tichhuak, biak hmasak lah ka tlâwm a la ve bawk si.

“Vawiin hi Sawma te ho hi an va rawn lang lo ve” a tihchuan ka en vata “Ka hre bik lo, vawiin hi in awm chu an tum vekin ka hria, group-ah an sawi ngei kha. Nakinah lêng chhuak ve ila, enge an tih tih te pawh en ve an ngai, mi an rawn tibuai renga kan enthlak ve te pawh an ngai a lawm” ka tihchuan pawm tih hriat takin a bu nghat nghata.

 “Naktuk chu Aizawlah ka chhuk dâwn a, u Rinpuia lo hrilh miah suh aw. Hawi hai ve rawh se, ka thin a tihrim man, engtiang chiaha rei nge min be lova a awm theih hriat ka duh” ka tihchuan ka haw na chhan tur chu min lo zâwt a.

Thil awmzia ka sawi chuan a chek tlak tlak mai “A va pawi ve, damlohna hi chu kan thu a ni silova, siamtu hian ka tâna a ruat sa hi chu kan dân theih a ni silova le. Eng pawh chu nise eng êm in tilo turah ngai ang, i awm loh chhûng erawhin a reh hle dâwn a nih hi, u Rinpuia chu a hawi hai âwm. Engmah ka lo hrilh lovang, hlauthawng suh, a rawn biak ngei ngei nân che i awm a ngai alawm” tiin a mit chu a rawn sân auh auha.

Ka thaw huai mai. Ni e min rawn be lo cheu a nih chuan keipawhin ka tibuai tawh bik lovang, in zui chhuakin Sawma te in lam kan pana, kan va thleng chu midang pawh u Rinpuia tih loh chu an lo awm vek bawk a, card lo dêngin an lo in chawi a anih hmêl.

“Pawisa ka nei tawh lo ka pi hi ka thawh e, a chak chakin in hâwn mai dawn a nia” Sawman a ti ri kan hriat rualin pitar lam tawh  aw hian “Lalmalsawm i pi ka nih hi, khatiang khân game in khelh a piangin min lilâm ṭhin suh, tel tawh lo in pâwnah min dah chhuak teh” a ti ri chu kan hre zuia.

Mawii nên chuan kan nui hak mai “Enge tar pho ngai reng hi ka ning, pitar vun chuar tawh lutuk pawm reng ai chuan nula tituai nalhte pawm ve ka duh. Peih lo deuhin i vun chuar tawk kha thlir a ngaia, ka mit hian nula thlir a duh, hêng ka mit te hian pitar ngawt nilo in nula melh a duh ve tawh” Sawman a ti ri chu pâwn lam aṭang pawh chuan a hriat chian theih viaua.

Mawii nên chuan lût duh mai lo hian ngaithla in kan nuih insûm chu kan khûr dawt dawt mai “Lalmalsawm i pi khatiang khân ti ziah suh, hmeichhe vun nalh i duh chuan zu ri ngawt buaipui lo hian hmeichhia te zawng zâwk ta che u, in inkâwm khâwm ve lah hi card in denga, nangmahni pawisa ni lo in in chhûngte pawisa in ru chhuak thul, hmanniah pawh kawmchhakpa in ka ar a bo a tih leh tawh kha, nangmah ni bâk in nilo ang, mi mâwl tak tak hi in inkâwm khâwm a, mahni mâwl pui kawm chuan fin ngaihna a awm lo, nula in duh chuan fel takin awm ve rawh u” tihlak hlak tu chu nutling aw a ni a, Sawma nu a nimai thei.

“A ho mai mai, hmeichhe tê si, thinchhe bawk, thu duh bawk si nangmah ang te hi kan tawng anga, ka pa ang hian nupuite pawnfên fêng lo chauhin kan awm ve ang tihmah hlauh nâk a lai, zu pawh kan in lo. Hmeichhia chu kan duh, pawm tur pawh duh, fawh tur pawh duh, mahse kan bem peih lo a nih hi, ih maw ka khawvêla ka nu, khawvêlah hian hlim tur chuan mâwl ve te a ngai, mi fing vek inkâwm khâwm hlim tak i hria em ni? An muk rûn a, ṭhian boring deuh neih kan duhloh vâng a lawm kan inkawm ni, khawiah pawh an ni nên hi chuan thih leh ruam khatah, dam leh hmun khatah an tia mi” a ti tak ang zuah zuaha.

A aw aṭang chuan a rui a nih ka ring hial mai, ka ina an rawn lên kha chuan an rui ngai hauh silo. “Khatiang kha sawi ve suh dam leh hmun khatah an tilo, tlâng khatah an ti. Mi lah hi in han chhâng ang zawt zawta, bialnu in neih lahin in bialnute in sawisêl rawna, tumahin khatiang kha chuan an nih pui rei peih nâng che u, fing ve deuh ula chuan fa innei tawh ang” a nu bawk chuan a ti leha.

“Kan fin avâng zâwkin a lawm fa kan la neihloh, kawmchhakpa khi i hmu em? Sek deuhin a thaibawih a nih khi, sek man a awm lo emai. Nupui neih hi finna a nih loh zia chu khi lai pa pa sek ṭeng ṭung khian a ti chiang viau lo em ni. Zu te chu in tur a nia, kan in loh in an siam in awmzia a nei nâng, ruih turin an siam a, kan ruih loh chuan zu a nihna a awm theilo” insûm thei tawh lo in kan nui chhuak haka.

Inchhungah chuan kan inzui lût nghal bawka, min hmu chu an lo meng phâwk hlawm hle lehnghâl. “Ehe enge in rawn tih dâwn?” Mama chuan a rawn ti a, an in melh kual hrek hrek bawk nên an zu ruih vâng tih ka hria, ka hriatah an in ngai siloa an inthlahrung ve te pawh ani mahna.

“Kan rawn lêng ve a nih hi, vawiin chu in va in la âwl ve a, hna in zo tawh em ni?” ka tih chuan an bu nghat hlawma, Sawma pawh chuan a pi chu pâwn lamah a pawm chhuak nawl nawl mai. A nu chuan min lo be sawk sawkin thingpui chu min rawn chhawp zuia.

“In ṭhiante ve hi chu a hahthlâk a nih hi, bialnute hi zawn pui teh u, an fel ve deuh ang. Hetianga an awm reng chuan an lêng tar mai dawn, tu hmêl hmuh châk tawh nên” a nu chuan a rawn ti a, “Lungngai suh nu Rêng, monu hmêlṭha leh fel deuh deuh hlir kan hmuh tir ang che, keichu ka hmu tawh, mahse a induh ve khanglang a, ka zûnah kan uai tir tak tak a nge, hmanni ah a inbual lai ka hmu lawm. No tak ani, a vâr heih heih a sin” Mama chuan a ti ham hama.

An rui chu sual lamah kal lo in an nawi em em ringawta, an bulah ṭhu in kan lêng ve ta renga, an bengchheng bawk nên Mawii nên chuan kan nuih kan nuih ringawta.

Tlailamah haw in zanriah tur ka bâwl nghal mawlh mawlha, zikhlum châng chawr chu antui atân chhumin ka che zui rak raka, ka awm loh chhûng chuan eng êm a lo thleng lo turah ka ngai. Chaw ei vat vatin theihnghilh ka neih leh neihloh chu ka inenkuala, ka chhûngte hawn tur pawh ka lei lêm lo, khulamah lei tur a tam zâwk a. Bâkah an phal leh dâwn lo tih ka hria.

Ka mut har vaih chuan mut ka kham lo ṭhin bawk nên ka mut hma leh ka tân a ṭha a nimai, zîngah harhin ka intifai zung zunga, sumo pawh ka kawmchhakah chuan rawn dingin a driver pawhin min lo la hre reng a nih hmêl, chhoh lam khân amah tho kan hmanga, a mah a polite in a fel bawk nên chuvanga a sumo bawka haw duh ka ni bawk.

Ka in chu kalh ṭha in ka bungrua hawn tur tlêm azâwng chu sumo chungah a hlâng chho va, kei erawh ka seat tur driver hnung tukverh bulah chuan ka ṭhu leh ran tawh mai, pâwnlam chu thlirin u Rinpuia te in kan tlân pelh dâwn chuan ka en vang vanga.

An in pawnah chuan pâwn light an chhit chu ala êng va va a, an kawngka erawh a la in khar ṭhap thung. Ka awmlo tih a hriat hunah engtin tak awm ang maw? A thinrim viau ang nge min ngaihtuah zâwk ang? A tâl buai ve tho angem tih te chu ka ngaihtuaha, biak châk viau mah ila amah pawh a la ngawih tlat avângin bul ṭan hmasa tu nih ka tim bau lo.

Khua kan chhuahsan fel meuh chuan ka lungte pawh a lêng ve rum rum mai, ka awmna la reilo mahse ka thinlung neitu lênna a ni miau a, ka lêt leh har phei chuan kha a bialnu hlui rawn lêt nên khân an ṭha leh turah ka ngai tlat lehnghâl, ka ngaih a ṭha thei mawlho.

Ka bula chuang te titi nak nak kârah kei erawh ka ngawi renga, kawng sir a thing leh pangpar ding te chu melh vang vangin ka suangtuahna ramah ka chêng a ni ber mai.

Tûnah chuan kan hlat ve ta vang vang viau mai, nau pawm kan chuan pui bawk nên a khât tâwkin naute chu an ṭap leh al al ṭhin, a nu inthlahrung hmêl chu a khawngaihthlak zâwk, tumah erawhin a ninawm ti a sawi kan awm lêm lova, an hrethiam viau hlawm a nih hmêl.

A ṭhen chuan pawm chhawkin an in lawm chhâwk a, chutianga an tih tâkah chuan naute pawh chu tlêmin a tlei ve deuh. Kei erawh ka ngaihtuahna ka chung chuan hmun dangah ka chêng daih thung, Aizawl ka thlen hunah eng in nge min lo hmuak dâwn ka hrelo, Putea chu a dam chhuak kherin ka ring lo bawk.

Heta ka lêt leh a nih pawhin engin nge min lo hmuak dâwn tih ka hre bik hek lo, eng pawh chu nise châwl lovin ka hmaa thil awm apiang chu ka paltlang mai tur a ni, engpawh huamin ka bei ang, thil tum chhin hmaa beidawn emaw ve kha ka tum lo bawk, a tak ngeia fiah loh chuan keichuan thutlûkna siam nghal zung zung ka duh lo bawk.

Thlifim chu inchhem tirin ka ngaihtuahna nên chuan mit chhingin hla ka ngaithla paha, a lunglên thlâk viau bawk. Engtikah nge u Rinpuia nen kan inhmuh anga, engtin tak min hmachhawn ang maw, a bialnu hlui a hmangaih em em rawn kîr laia kei min thlan chu ka ring lo.

Engpawh chu nise tûnah chuan ka chhûngte lam ka ngaihtuah phawt angai a ni, a nichuan uap tu a la nei ṭeuh a, keichuan ka nei tam tawhlo. Putea a awm leh loh zel phei chuan ka nu leh pa unaute chu an tlêm tawh viauin ka ring, unau an tam silo. Ka nu lah a hlauthawng tawh hle tih ka hria, putea nên hian an inkawmngeih bawka, an titi pawh a rual ber zel.

Kei erawh school ram dangah ka kal daih avângin a tu amah han nêl chiam ka nei lêm lo thung.

Nu Putea chu enge a an?” tiin ka nute kawta min lo hmuak chu ka kuah vata, ka naute ho pawhin min lo lâwm nghal laih laih mai. Ka thil hawn ho te chu pe in in chhûngah kan in zui lût a, ka ṭhiante pawh an rawn lang harin ka ring lo, Zorinpuia pawh ka la be lova, min rawn be bik hek lo.

Kan inkar chu a duh thlanna a ni tawha, keiin va nawr luih leh min kalsan lo tûra ngen pawh ka tum lêm lo, mipa a ni a a tâna ṭha tur a a duh chu a hre ve turah ka ngai.

Ṭhu hahchawl in ka thawmhnaw tlêm chu ka naute ho in ka room-ah an keng luta, ka hahdam deuh hnu chuan chaw ei min siamsak chu eiin ka ṭawng pah mawlh mawlha. Ka awmna hmun lama kan awmdân ka feh vêl ka sawi chu an nuihpui uar uar mai, u Rinpuia thlalak te chu ka naute ho ka hmuha hmêlṭha an tihzia an sawi nghal laih laih mai.

Ka ṭhiannu pawh a rawn thleng har lo, a rawn au lût lâng lânga, room-ah rawn lûtin u Rinpui chanchin kan lo sawi lai a ni nên a rawn en ve a.

“Awi a ngo lo, mahse mipa ngo deuh ai a hmêlṭha fe, bâkah a pa lutuk. Hetiang hi a lawm ka duh êm em, mipa ngo deuh chu an tenawm zâwk” a rawn ti nghâl hluta, he nu hi chu mipa hmêlṭha hi a lâwm em em ringawt.

Keiai kumhnih in a u a, a kawm lah kan inkâwm nasa. Kum inrualpui deuh reng kan ni bawka têt tê aṭanga ka kawm nasat ber pawh a ni, “A pasalṭha reuh lutuk, sa pawh min rawn hleh ṭhin. A fel a nia aw, mahse ka nu leh pa chu la hrilh miah suh u, an ngaihdan in hriat kha” ka tihchuan an bu nghauh nghauh mai.

Ni e ka nu leh pa hi chuan kan têt tê aṭangin khawpui tlangvâl leh hna nei, a nih loh leh mi hausa fate nei turin min hrilh ṭhin. Kei erawh ka ngaihdan a dang hlak thung, hausakna ai chuan hmangaihna hi a pawimawh ka ti ve tlat. Tin, dinhmun inthlâk thei reng a ni a, hma hun a hriat loha, rethei pawh an hausa thei, hausa te pawh an rethei leh thei bawk.

Hausakna, sum leh pai leh hna ṭha pui pui pawhin hlimna leh nun zahawm min pe chuang lo, rethei tê pawh a rinawm a, a sum lâk luh dân a zahawm phawt chuan miin an zah tho tho. Hausa lutuk, sum lakluhna dik lo chu pawisa ngah hle mahse tumahin an zah tak taklo, an sum ngah a vangin thinlung tak tak nilovin an zah der mai ṭhin zâwk a ni.

U Rinpuia ka duh chhan pawh a ni, a nu leh pa avângin zir zawm lo vin tûn dinhmun a thleng thei a nia, a ni chuan hah tak leh a ma thawh chhuah ngeiin a in enkawl thei a. A hna ah a chianga, a zahpui hek lo, a khât tâwkin ka phone chu ka check leh ṭhin.

Ka va han ngei tak, engtin nge chutiang chen chen min be lo a a awm theih zâwk le?

“U hmeichhe hmêlṭha deuh an awm lo maw? Keipawh thingtlâng nula ka duh ve. Helam chu fel tak tak an awm rualin an induh bâkah ruihhlo khawih an tam sia, fimkhur a ngai emai. Thingtlâng nula hi an fel an tia, keipawhin hmelhriat sa chu ka nei nuala, an ṭawngkam a zângkhai thei si, an taima bawka ka duh ve” ka nau chuan a rawn ti duaha.

“Bialnu nei rual ila nilo, hna te han neiin i kum te han u leh deuh sela nupui tur zâwk i zawng dawn a lawm, mo ṭha deuh tur in zawng dawn ania, nu leh pa min hmangaih pui thei tur mipa chuan zawn a ngai, chhungkaw huikhawm hi a pawimawh” ka ti ve duaha, ka naute hi ka hmangaiha mipa vek mah nise ka nu leh pa ai pawhin ka thu an âwih zâwk a, ka tirh an hnial ngai heklo.

“Zanin chu putea te chu ka va awmpui ve ange, helamah awm rei thei ka ni silo, ka hna ka ṭhulh rei lutuk chuan a chiloh. Ka awm chhûng chuan putea te chu ka lo awmpui ange” tiin ka nu kan lam pana rawn phei mêk chu ka lo ti a.

A ni pawh a bu nghat mai, zân a mu ṭha lo tih a hriat. Putea nên phei chuan an in kawmngeih bawk nên a âwm ve tho, natna rapthlâk Doctor te tihdam theihloh hi a tam si a, keini ngei pawh kan hmalam hun tur kan la hre der silo.

“Ka pa hi khawiah nge a awm leh tâk daiha, a buaithlâk ṭhin e. Tûn angah te chuan awm ve âwm” tiin ka hawi kuala “An hna lamah an rawn ko leh a nihkha maw, inah hian a awm hman meuh lo. Hriatthiam hi a har a nia, eng hi nge an tih sên ni. An pute lah hian tirhna tur hi an hre thei sia maw, tûnlai phei chu in lam uap turin ka duh ania, i pa ve zawng inah pawh a awm hman meuhlo” ka nu chuan tiin a phun hlak hlaka.

Ka pa pawh ka dem em em chuang lo, a chhungkaw châwm nân hei chen a thawka, ka fak zâwk. A fate lehkhathiam kan nih theih nân rim takin a thawk a nia, nu leh pa mawhphurhna hi a lo namai dâwn lo tih ka hrechiang viau mai.

Engah nge engmah min hrilh loh?” a tâwp a tawpah chuan u Rinpuia message chu a rawn thleng ta nge nge e, chhâng chuang lo chuan ka nui saka. Ka ṭhiante ho an rawn thleng zui bawk nen kan ri le lu mai, inhmuh a khât tawh tiin thla kan la ho a, mipa an tam bawka kan bengchheng hneh viau mai.

Status upin caption erawh ka dah duh lêm lo, u Rinpuian a view dâwn tih ka hria. Rin ang ngeiin reiloteah a view ta ngei mai, engmah erawh a rawn sawi chuang lo, ṭhiante nên chuan damdawi in lam kan pan ho a “Engvanga ka message chhâng duh miah lo nge i nih Zohmingsang? I ṭhiante bula haw chu a nuam bawk em?” tih a rawn thawn leh nghal zat mai.

“Damdawiinah ka kal dâwna, ka buai rih dawn a nia. Ka dah phawt, ilo in enkawl ṭha dâwn a nia” ka la lungawi chiah lo bawk nên ka offline zui ta daiha. Thinrim mahse tûnah rihchuan engmah kan sawi fel tak tak thei dâwn lo, kan inhlat rih si a, râlkhat aṭanga inhnial chiam ka peih ve lo.

A ṭhat dâwn leh dâwn loh chu ka awmlohna hmuna a awm hian a fiah ber dawn. Ka fiahna a paltlang zo ta lo a nih leh ka tibuai tawh bik lovang, ngaihzâwng hluite thlah hleithei lo ka hre ve fo tawh a, khatiang avânga buai fo ka duhlo. An thlah hlen theilo a nihchuan midang lakah beiseina va pe miah lo sela, an ngaihzâwn mêk te tân rilru hahna leh natna bâk an pe ngailo.

Damdawiin kan thlenga, Putea pawh rinai takin a lo ṭha viau mai. Nu Lawmi chuan min lo kuahin ka haw chhan chu min lo zâwt mawlh mawlha, ka ṭhiante erawh rei awm lovin an haw zui leha, putea vânga haw ka nih thu ka sawi chuan nu Lawmi pawh a hmêl a êng deuh sar mai.

“In chhûngkua avâng hian ka thlamuan phah teh a sin, i putea lah zia lam a pan thei silo. Engtin nge kan tih zêl dâwn ni, Dâktawr lahin beisei tur a awm tawh loh zia min hrilh bawk si, rilru hi a hah ngawih ngawih. I naute ho lah ramdangah an awm vek bawk si a, i nu te ho awm lo se chuan ka buai viau ngei ang, in chhûngkua in lo awm ve hi chu kan tân chuan vanneihna a nih ber hi” tiin putea muhil chu a en vang vanga.

A rilru a hahin a mu ṭha lo hle tih a hriat, ka khawngaih ngei mai. “Lo mu rawh, ka awm tawh hi. Putea tân chak taka i awm a ngai a nia, ka lo men chhâwk ang che. Kha i mit aṭang pawhin i chau tih a hriat a lawm, thlamuang takin mut tum rawh. Thil thleng a awm leh ka rawn kai tho zâwk dawn che a nia, ka rawn haw tawha ka awm chhûng chuan keimahin ka lo pui tawh ang che u” tiin ka nuih var vara.

“Um nia kâr khat vêl chu ka mu ṭha tawhlo, thil thleng a awm chuan min rawn hrilh hreh suh aw, min rawn kai tho vat mai dawn a nia. A nih i awm chuan kan mu ange aw, i rawn haw lovang tih a hlauhawm hle mai” tiin khum pakhat damlo awmpuitu mutna atâna an siamah chuan a muzui ta thuaia.

Be tawh lêm lo chuan putea chu ka en vang vanga, oxygen an hip tira, a hmêl chu a tla kuam tawh bawk. A hma a ka hnathawk tur min thlah lai te kha chuan hetiang em em a niloa, a la thauin a la hmêlṭha vuah kha a ni si a, chutia reilote chhûnga a danglam chak lutuk chu kei ngei pawhin mak ka ti.

Natna hi chu a han lan chhuah tak tak chinah chuan mihring taksa hi a lo ei chhe chak a nih hi, ka phone rawn ri zauh chu ka ena. “I lungawilo tih ka hria, chuvangin i lungawi hun nghâkin ka rawn hnaih duh lo che a, mahse mi haw san zawngin maw i lo awma, ka lâwm hauh lo a nia. Ka bialnu hlui vângin buai ka duh hauhlo, enga tân mah ka ngai tawh lo ka tih kha” a tihchuan ka thaw ham ham mai.

Keipawhin thinrim reng chu ka duh biklo, ka chân phalloh tak tak zia ka hria a, thinrim khum reng ka duh biklo “Ka thinrim tawh hleinem, Putea a damloa ka haw ngei ngei a ngai a lawm, i la mu lo em ni?” ka thawn rual chuan a rawn seen nghal zata, ka message châng reng te pawh a ang zâwk.

“Mulo, chupawh nise min rawn hrilh tur i ni asin, i thinrim avângin i haw emaw ka ti a lawm. I ṭhiannu in sawi lo phei se engmah ka hre nâng, khatianga engmah sawi lova awm kha chîng tawh suh ang che” a rawn tileha, chhân dân tur pawh ka hre chiah lo.

A rawn call nghal zata “I duh sawi la, ṭha deuhin in be teh ang, heti renga awm zawng a buaithlâk, kan inhlat rih bawk si” a rawn tihchuan keipawh ka ngawi vang vanga.

I hmangaih nih tum chu tlâng lianpui leh sâng tak, chelh chhan leh rah chhan awm miahloa, lâwn chhuah tum ang vêl nimaiin ka hria u Rinpui” ka ti sapa, ka thusawi avâng chuan a rawn thaw deuh hawk a “Chu tlâng chu i lâwn chhuah theih nân rawn chim tir ila a la har sa tho angem? I tum chhin dâwn lo em ni? Tlâng i lâwn theih nân ngati nge tui in i chîm tir mai loh ang? Tui in a chîm sân poh leh min hnaih dâwn a, tui inkhawl, muang chânga an tlina, a tam telh telh ang hian muangchangin i tuipui chuan min chîm tir la, min chîm pil mai dawn a lawm” a rawn ti sapa.

A thu sawi ril thei lutuk hi ka tân chuan chhân lêt mai a har sa ṭhin.

“Ih maw dik tak chuan ka thikthu hi a chhia a, duh vâng nilo in i lakah chuan ngaihsakna leh duatna ka phût ve a, ka thinrim hian min thlêm a engtiang chiaha dawhthei nge i nih hriat ka duha, ka tihtauh hian min ngaihsak zia hriat ka duh a, ka biak loh che hian i tân eng chiah nge ka nih hriat ka duh vâng a ni. Ka kiangah awm reng thei la ka duha, i ngaihsakna leh duatna ka thlakhleh vângin a sin pangchang taka ka awm ṭhin, min kalsan daih ang tihte ka hlaua, kei nilo in a ni kha i thlang mai ang tih pawh ka hlau, keichuan nat ka duhlo” ka ti leh ringawta.

Enge sawi tûr ber pawh ka hrelo, ka thusawi hi a dik ber em pawh ka hre chuang lo, mahsela sawi ngei ka duh bawk si. “Tinge ka duh lo che anga i hriat tlat le” a rawn ti sap a. A aw ah chuan a beidawn hmêl hle hian ka hre lehnghâl.

Amah vêk chuan “Min chhâng vat ta che” a rawn ti leh hrâma, tut tut ṭhin hian “Rim vêl kha a ngailo, tin, min hrilh thei reng. Bialnu hluite kâwm leh mi ka hre ngailo, a phatsan dân che pawh i hre vek, kha ti chunga i la duh a nih chuan sawi theih ka nei ve tawhlo. I duhthlanna a ni tawh, u Rinpui khawngaih dil che a ka kianga awm tur a tih luih che ka tum ngai lovang” tiin ka sawi dap dapa.

“Enge i sawi awmzia? Kei hian lêt ka duh tih ka sawi hauh loh kha, pawimawh a awm a tih avângin ka va kal mai anih kha. Thinrimna tur a awm lo, ka bialnu i ni tawha, min phatsantu bula lêt chu ka tum bik hauh lo a nia” a rawn ti dam dup mai.

“Mi thlêm pawh i tum lo, mi biak lah i tum heklo. I reh zui hmak a nih kha” ka ti leh hrâm chu a rawn nui hak mai. “I thinrim sia ka thlêm che chuan i phun nasa deuh deuh dawna inhnial vak ka duh lo a lawm, nangmaha i lungawi hun nghah tawp kha ka tuma, i lo duh chiah nange” a rawn tileh chu ka hmui ka ti pawrha.

“Duh lo, ka tih tauh rêng rêngin min thlêm ziah rawh, ka thinrimin ngawi reng tawh suh. Chutilo chu ka thin i tirim zual zel a nimai, tûna i awm ang te kha ka duh miah lo a nia aw. Dik tak chuan i hmangaih a ni tih ka hre ve kura, ngaihzâwng hluite avânga an ngaihzawngte kalsan ka hre ve fo a, khatiang avânga nat kha ka hlau a lawm” tiin putea lam chu ka melh zauha.

Tui taka a la mutthilh avâng chuan ka thaw huai mai, a harh vaih chuan a chi loh viau ang. “Um in thleng tluang reng reng em? Engmah min hrilh lovin thil tingawt tawh suh ang che, ka ngaih i ti ṭha lo tih hre reng rawh, vawiin lah nilêngin call che ka tuma i call tlang theihloh lehnghâl” tiin a lungawilohna chu a rawn sawi dap dapa.

Keipawh ka thinrim tawh bik lem lo, a thusawi chu dâwt a nih ka ring lo bawk. “Um kan thleng tluang e, min rawn be siloa ka hrilh duh lo che a nih kha, patea awmdân a zir a nimai. A tlai tawh sia ka dah phawt dâwn a sin, ka chau riau mai” ka tihchuan min hnial tawh lêm lo.

In mangṭha in phone chu kan dah zuia, ward danga awm ho thâwm leh ṭhin chu a hriat chian theih viau mai. A reh deuh ruih tawh bawk nen damdawiin hi chu ka ngaina ngai lo hrim hrim, a boruak hi a hrehawm ka ti ṭhin, putea chu a harh lêm loh avâng chuan ka ṭhutna bang nghêng chuan ka mit ka chhing diar diara.

Ka lo muthlu a ni ngei ang, naute ṭap ri avâng chuan ka harh zawka. Ka hawi kual nghâl vat mai, nau neihna ward ah kan awm siloa, khawi a naute ṭap nge ni dâwn ni? Tho chhuakin tukverh lam ka pana, tukverh aṭanga ka dah chhuah rual chuan damdawi in kawt kawngpui lehlama mi intibuai chu ka hmu nghal zat mai.

Tlangvâl rual in sual tih hriat takin an thawm a bengchheng êm êm mai lehnghâl. Thingtlâng lamah kha chuan hetianga intibuai hi hmuh tur an awm meuhlo, khawpui a inla changkâng zâwk hi kawng tam takah kan la ṭhing zâwkin ka hria.

A vêng leh vêng te hian kan inhua a,  mi thil rûk leh tualthah hial pawisa lo lah kan tam mai si. Kan thawmhnaw leh incheina a changkâng ang hu in kan mizia hi a ṭhing tu tlat zel.

A tâwpah security te chuan va hauin an kalsawn ta diaka, inhliam na fe fe an awm leh in ka ring. En rei duh lo chuan ka phei sana.

Ka ei tur lei sa chu phawrhin ka ei mial miala, zân ka menrei chuan ka ril hi a ṭâm ngei ngeia, chuvanga in lei sa pawh ka nih. U Rinpuia chu ka ngaihtuah chhuak leha, a thusawi te kha a sawi liam mai mai bik dâwn lo tih pawh ka hria.

Min duh lo hlâwm tawp chu a nih ka ring biklo. Intibuai an awm tâk lohah chuan thâwm a reh leh ta deuh, ka phone chu phawrhin cartoon chu ka en mai maia, tûnlai chu larva hi hmuhnawm ka tia, ka hlimpui riau zel.

Putea te nupa lah an mutui bawk nên thâwm chhuah rin hlau tak chuan ka nui leh hak ṭhin a, hunawla hetiang en hi chu a hlimawm ve riau zêl, a siamtu te hi an fingin an thiamna hi a sâng ka ti ṭhin.

“Enge in an? Nizân lam te in mu thei em?” Doctor ṭawng ri avâng chuan ka muhil chu ka mengchhuak riai riaia, min lo en reng lehnghâl. Pitei zâwk chuan a lo chhâng a, kei erawh ka tho hlim a ni bawk nên ka ṭawng ṭha peih meuhlo.

“Hei nula thar in nei a ni maw? A hmêlṭha hle mai” tiin min nuih saka, a naupang zawk zawk tawh lo tih a hriat. A hmêl erawh a ṭha viau thunga, nuih ringawtin hmun dang chu ka en san ta daiha, “Nimin lam ai chuan kan zia deuh a nih hmêl e, darkar tin in ka rawn check dâwn a nia, nula tunge i hming?” tiin min rawn nuih sâng a.

Pitei lah chuan hrilh vat vat tur chuan min lo ti ve bawk, a phur thei ania “Zohmingsangi ka nia Hmingi min ti mai rawh Doctor Timothy maw?” tiin a kut min pêk chu banin ka chibaia, nui var var chungin a bu nghat mai.

Nurse rawn zui tu te lah chuan min en haw haw lehnghâl, ka kut lah chu a vawn rei tâk êm avângin ka la sawn vata, “Nakinah ka rawn kal leh dâwn a nia, inkawm chian tepawh a châkawm a lawm. Lo ṭha zel rawh u, midang enkual tur ka la ngah sia ka kal phawt ange” tiin an inzui chhuak leha.

“A duh viau che a nih dâwn kha, nidangah pawh a rawn kal fo va, khatiang khân a awm ngai miahlo. Lo be ṭha hle rawh, doctor lehnghâl i nun a nuam dâwn teh a nia” pitei lah chuan a la rawn tizuia, ka nute a lo hrilh leh ngei ngei dawn a nih hi.

“Pite, sum hi hlimna a ni ber lova, nunnawmna a ni kher chuang lo. Hmeichhia chu hmangaihtu leh duattu bulah kan hlim ber tih putea aṭang hian i hre mai lo em ni? Keichuan sum ai min hmangaihtu ka duh zâwk, bâkah engmah pawh a sawi loh kha, mipa duh dang ka nei ania” tiin ka phone chu ka en san daiha.

“I va han â tak e aw, khatiang Doctor lehnghâl i nei a nih chuan i hlim a ni mai, a duat dawn che em pawh i hriat loh kha. Doctor fello an awm lo, an zaidam tlângpui” a tileh chu chhân pawh ka chhâng peih tawh lo, u Rinpuia min rawn biakna chu ka chhân san daiha.

Ringlo mite anga fate duhzâwng nilo mahni duhzâwng fate neih luih tir ang hi ka huat ber an ni. Ka duh loh chu ka nei ngai lovang, u Rinpuia ka thlang tawha, mipa dang lo biak ṭhat tumna lah ka nei hek lo.

“Enge i tih dâwn?” Dr Timothy bawk chu ka hmu leh tawh, ka hmaah a lo dinga a nui leh sâng tawh mai. Mi fel tak chu a ni ngei ang, mahse ka nute thusawi avâng khân ka ngei zo “Toilet ah ka kal dawn a nih hi, a awmna min hrilh thei angem? Kal vat ka duha” tiin ka mit chu ka chêt ralha.

A sâng vak lo, mahse a hmel erawh hmeichhe tam tak duh chi. Hna a la nei leh zêl bawka, an nurse te ah hian duhtu an awm nualin ka ring “Sawtah sâwn, zânah kan inkawm thei angem? Ka lo be leh ang che” a tihchuan chhâng tawh lêm lo in ka bûk khum nghata, lo biak chhiat vak pawh kha ka duh chuang lo.

Min bem a nih leh bialpa ka neih thu ka hrilh tawh mai ang chu, toiletah chuan lûtin ka inthiar zuia. U Rinpuia pawh sawhthing an tuh leh dâwn a nih hmêl, a chau ngawtin ka ring. Kâr leh lamah bial khawmpui an dawng dâwn bawk nên keipawh haw leh vat ka ngai a ni.

Khawmpuiah u Rinpuian guitar vêl a perh dâwn tih ka hria, ka hmu châk lutuk. Ala solo dâwn zui, a zaithiam zia an sawi ṭhin a, ka hmu châk riau mai a zai ber chu ka hmu châk tawh.

A mah a cool bawk nen a hmuhnawm viauin ka ring “Lo haw vat tum ang che, i châm rei chuan ka lâwm hauh lovang” a rawn tichhar chhara, putea natna ka la hrilh lo bawk nên engmah hre ve heklo, chiang deuh chuan putea natna chu ka hrilh ta nge nge a.

“A va pawi ve, mahse ngai in awh a nih chuan i rawn haw zawk ang chu. I tello-a khawmpui hman ka duh hauh lo a nia, i thikthu a chhe ve si a pic ilo hmuh leh chuan ka tuar leh mai mai” a rawn tikher erawh ka ngei teh e, ka bialpa a nia thikthu a chhiat ve bawk lohin. Tu dang nge thikthu chhe chuang ang, a ho emaia.

“Ka thikthu a chhiat lohin kan ṭhenawm nu thikthu em ni rawn chhia ang? A ho emai, thik thu hi chhe hle sela a ṭha animai. Thikthu a chhiat lohin ngaihzâwng neih man a awm leu” ti duahin lei chhuah vak emoji chu ka dah tela.

Kan in be tui bawk nên toilet-a awm ka ni tih ka theihnghilh, mi an rawn kal avâng chuan ka harh chhuak chauh a ni. In tleuh sawk sawkin ka chhuak zuia, ka lo ṭhu rei bawk nên ka ke a mu chum chum mai.

Toilet-a awm rei thei hi sawi se ka tel ve ngei ngei ang, ka nute bula ka lêt leh chuan an lo la ti ti mawlh mawlha. “Bawihi lo ṭhu teh, vawiin chu i putea a zia deuh bawka inah ka va lêt lawk a nge, intihfai te ka duh dâwn sia, nangmaha lo awmpui i hreh em?” a tihchuan ka lu ka thing vata.

“Haw rawh  ka lo awm pui ang, reilo la. Keimah chuan ka buaipui thiam dâwn miah lo ania” ka tihchuan a thaw huai mai, a rei loh tur thu sawiin a chhuak zui ta thuaia.

U Rinpuia a feh ka ring tawh nên message dang pawh en lêm lo vin Youtube lamah bawk lûtin mukbang chu ka en mai maia. Tlai lam chu a reh ruiha, ka thil en lah chuan ril a  ti ṭâm rawih rawih thei “Ka lo ṭhu ve thei angem?” tih ri rawn chhuak avâng chuan ka hawi chhuak zawka, hepa bawk chu! Doctor ve si a va han hman âwm êm êm.

Chhâng lêm lo chuan ka bu nghat ringawta, “Min va ngeih loh hmêl ve, ka rawn ṭhu ngam meuh ang maw?” a tih leh tâkah chuan ka thaw haka “Chutiang pawh a awm lo lo ṭhu rawh, ka thil en hi a tui deuha chuvang a nia” ka tih tâkah chuan ngawi reng hian a rawn ṭhu a, ka en lai chu a rawn en ve bawk.

“I ei châk em ni? Zanin ka Night zân ania, ei dun ang hmiang” a tihchuan ka bu nghat ringawt. A lei peih phawt te chuan ka ei peih reng a lawm, mahni insen a ngaih loh te chuan thil a tui leh zual bik.

“Aw le, kan chah dâwn a nia. Keipawhin ka ei ṭhin alawm, thak lam hi Doctor ee tilo hian ka ngaina phian a nia, taka kum engzât nge i nih? Ṭhian kan ni thei angem?” a tihchuan ka bu nghat nghata, ṭhian nih a duh a nih chuan pawi ka ti lêm lo.

“Kum 24 na ka hmang ve mêk a, zân chu i hman hunah min lo sâwm mai dawn a nia, a hrim hrimin siamna tur hmanrua a awm dâwn em ni?” ka tihchuan a mit sân ukin “Awm tehreng mai, ka office ah in lam haw lo va ka awm ṭhin avâng hian bungrua vêl ka dah a lawm, a siam theih mai ang” a tihchuan ka bu nghat nghata.

“A nih kum engzât nge i nih ve? I naupang zawk zawk tawh lo tihchu ka hria a” tiin ka nuih ve var vara, a tukkhum a hiat nauh nauh mai. “Kum 30 chu ka ni ve tawh, nang ai kum 7 in ka upa zawk tihna a nihchu” kan nui dun hak haka, chutia han kawm a zawngah chuan kawm a lo nuam phian mai, u Rinpuia ai kum 3 in a upa a nih hmêl, engkimah u Rinpuia nên ka tehkhin vek tawh a nih ber hi, Zorinpuia hi chuan ka ngaihtuahna zawng zawng a luah ni ber tawhin ka hria.

“Bialpa teh i nei ve em?” thutak deuh zawk chuan min rawn zâwt a, u Rinpuia ka mitthlaah a rawn lang nghal zawk mai. Hmalam melhin ka kut chu ka tlir dat data “Aw, ka hnathawhna lam a mi a nia” tiin ka nui var vara, a hmêl danglam zawk chu ka hmuh hmaih bik lo.

“A va vânnei ve, nang meuhin i thlan chu mipa ṭha tak a ni ngei ang, ni e thingtlâng mipa hi an fel a sin. Ruihlo an ti vak lova, an rinawmin an taima bawk a, hmeichhe tân chuan an ṭha a nia, ka lawmpui hle mai che” tiin a nui zui var vara. A thinlung takin a sawi tih ka hriat avâng chuan ka thaw huai mai.

“Nia a zaidama, mi pawh a duat. Sawrkar hna a thawk ve lo nângin a taima hle bawk, a theih ang ang chuan min duat ve a nia” tiin ka phûl hluta, u Rinpuia chanchin sawi chu nuam ka ti a ni ber mai, Timothy pawh chuan min lo nuihpui ve a.

“A ṭhat nasat chu hmeichhe tân chuan hmangaihtu leh duattu hi an hlu ber a nia, mipa ṭha tak a ni ngei ang. Nakin lamah la zin ve tur a nih chu, engpawh nise harsatna i tawh chuan min lo hrilh ve ṭhin la, ka pui hreh hauh lo che a nia” a tihchuan ka bu nghauh nghauh a.

“Ka rawn râwn zêl ang che, ṭhianṭha tak ka chhar thar che a ni maia, ka lawm tak tak. Helamah ka awm hman reng dawn si lova, putea lakah hian i theih tâwp lo chhuah rawh aw. Pathian lamah chauh beiseina kan nei tawh nangin nangin theihtawp min lo chhuahpui hrâm la aw, kan in nghahna neihchhun in nitawh ania” tiin putea lam chu ka ena.

“Tehreng mai, Pathianin engkim a ti thei alawm. Cancer damdawi an la hmuchhuak lo hi a buaithlâk a nih hi, hmuchhuak thei se chuan hetiang em em hian thihna a tam lo tur, natna lah hi a thar an hmu chhuak zela, khawvel pawh hi a buaithlâk a nih hi. Mitthi tawhte hi an awhawm rum rum mai, indona a rawn chhuak a, hri kan ti thûl, damlai tân hi chuan rilru hahna tur hi a tam a sin” a tihchuan dik ka ti. 

Ala dam lai zêl tân hian tawn tur leh tawrh tur hi a tam telh telh a nih ber hi. Kan hma lam hun kan hre lova, Bible in a sawi ang a a thleng zêl a nih chuan hri thar leh natna danglam pui puite hi kan la tawrh tur zêl a nih hmêl si a, dam reng pawh hi a châng chuan rilru hahna mai mai niin ka hria.

“Ni e, putea pawh keichuan beiseina ka nei tawh lova, mahsela kan beisei luih a ngai bawk si a” tiin ka phun sapa, pitei nêna tui taka an mu chu ka en vang vang bawk, putea thi ta se pitei tawrh dân tur ka hre bawk nên ka ngaihtuah lâwk lo thei lo.

“A ṭha leh vat mai ang, ṭawngṭai nasa la Doctor te aia thiltithei zâwk chu Pathian a nia, a ni hnêna thlen hi a him ber” a tihchuan ka ngaihdan chiah a ni.

“Ni e, beiseina hi a lawm kan nunpui ber ni, beiseina a awm tawh lo chinah chuan nun a beidawnga, kan tâwp tihna a ni tawh ṭhin. Beiseina nên awm zêl phawt ila” tiin ka nui hak haka.

Ka nute pawh chu rawn kalin pitei chuan a lo be bawrh bawrha, Timothy a hmuh chuan ka nu pawh chu a phûr tih a hriat, an beisei leh ngei dawn a nih hi.

Doctor Timothy nên kan ṭhu a hmuh chuan a meng phâwk viau lehnghâl. 

“Ehe Doctor hetah enge i tih ve a?” a mitmenga phûrna chu ka hmuh hmaih lo, ka nu hi chu a mak ṭhin. Ka bialpa hmuhin a hmu leh dâwn tih ka hria, ka lo ner lâwk nasa mai.

Pitei pawh rawn harhin ka nu chu a rawn pan zuia “Hei Hmingi hi kawm a nuam riaua, ka rawn kal mai mai a nih hi, hna a awm rih silova, kan chhuak rih phawt ange. Zânah kan inhmu leh dâwn ania” tiin min rawn nuih sanga, a chhuak zui nghâl bawk nên ka chhâng tawh lêm lo.

“Tunge a va hmêlṭha ve, a fel hmêl bawk si bawihi i bialpa em ni?” ka nu chuan a rawn ti nghal zat mai, ringawt ṭhin hiana. “Teuhlo bialpa ka nei tawh, a ni tân chuan ka rinawm dâwn bawk” ka lo ti chu pitei nên chuan an ner dûn nasa maia, enge maw Timothy pawh chu an duh viau ni.

“Bawihi chu a hmelte hi a ṭha a, Doctor mai nilo pawhin a chanchin min rawn zâwt fo a nia” ka nu thusawi avâng chuan ka zak ngei mai. Midang an awm ve reng si a, a buaithlâk ṭhin a nih hi, kan hmêlah hmangaihna leh duh duh neih theihna a awm lo, hmêl hian zahawmna a keng kher lo bawk

“Kha lam kha sawi tawh lo teh u, bâkah ka mipa duhzâwng pawh a nilo. Ka duhzâwng tak ka ngaizawng tawh, pite nang pawhin lo sawi vak vak lo la, mipa duh tak ka neia, ka duh miah loh neih ka tum miah lo a nia” ka ti nghata.

“A sawi pawh sawi suh, thingtlâng mipa ai chuan khawpui lam hi an ṭha fe zâwk, hna nei lehnghâl, i bialpa ai chuan i nun a nuam zâwk ang” a rawn ti a, ka rin sa rêng nimahse u Rinpuia an ngaihdan chuan min ti lâwm lo takzet.

“A dik chiah bawihi Timothy khân a duh che tih kan hre ve renga, thingtlâng mipa mâwlmang leh thiam neilo ai chuan khawpui tlangvâl hna nei an thlanawm zâwk ania, i bialpa ai thlâwt chuan a ṭha ang” piteiin a rawn ti ve bawk.

“A mâwl lo, lehkha keiai a zir sâng bawk, tin, Timothy-a ai fe chuan ka duh zâwk. A fela, a finga, a rintlâk bawk, ka ṭhen dawn lo, a sawi pawh sawi suh u, thingtlâng mite in hmuh dân kha a dik hauhlo. An taima in an hna ah an chianga, khawpui tlangvâl hian a lêt tam takin an tluk lo zâwk, sum hi hlimna a nilo, kumkhua a daih lo bawk. Hmangaihna erawhin eng dinhmunah pawh hlimna min pe in hahdam takin kan awm thei, mi hausa fate hi in hmu em, sum an nei an duh duh an ti thei bawk, chuvang rêng chuan a sin addict te, chhûngkaw hlim lo te a tam êm êm, sum chiah ngaihtuah mi chuan an fate an ngaih thaha, chhûngkaw hlimna a bo tawh ṭhin” ti ve hmakin ka chhuahsan daiha.

Thingtlâng mi an hmusit lutuk kha ka hua a ni ber mai, an hmuh anga hniam an ni hauh silo. Khawpui mi aia an ṭhat lohna ka hre hauh lo bawk, mi hausa pui pui awm ve lo mahse an nghei bik lova, an nun hlim zâwk zia ka hailo. 

Pitei te pawh ka sawi duh lo mai maia, an fate money an pe ṭeuh ṭeuha, an ngaihsak zuilo. Pawisa neih miau chuan tihchhin tur an zawnga, ruihhlo ah an tlân a, tûnah chuan ka cousin te ho chu ruihhlo bawih ah an tâng vek tawh, tumah hi in hmusit tur chuang kan awm lo.

Hausa te pawh in chhûngkaw hlimna an lei theilova, retheite pawh chhûngkua an in hmangaih tlat chuan chu aia hlimna dang a awm heklo, keichuan u Rinpuia hi a nihna ka hre chianga, ka iai phah hek lo.  Eng hna pawh thawk sela rinawm taka a thawh chhûng chuan min nghei tir bik dâwn lo tih ka hria.

Heti khawp hian a thlavang ka hauh ang tih ka ring phalo, ka lakah a lo thawk na hle tawh tih ka hriat phah bawk.

Damdawiin kawtah chuan ṭhu in pangpar vêl chu ka en kual mai maia, ka nu leh pitei bula ka awm reng chuan Timothy kha min hmehbel phêt an tum dawn tih ka hria. Têt lai aṭang rêngin ka nu leh pa hi chuan Sawrkar hnathawk ngei hi nei turin min ti ṭhin a, min hmangaih vâng tihchu ka hria, mahse keichuan ka hmangaih loh leh min hmangaihtu ni miah lo hi pasala neih ka tum lo.

Sum aia hmangaihna ka thlan vâng te pawh hi a niang, u Rinpuia chu ka call a, a feh a haw tawh ka ring bawk nên ka be châk sia ka insum theilo, “Aw duati” a awm dup mai ka hriat leh tâkah chuan ka hahdam sawng sawng mai.

Hepa hi chu a aw chauh pawh hi ka thlamuanpui theia, a bulah awm phei ila chuan tûn ai hian ka hahdam leh zual bawk ang. Ka nu leh pitei thusawi te chu ka ngaihtuah lêt a, ka zak zâwk, u Rinpuia hi an rin anga mâwl a ni hauh silo.

“I haw tawh em? Ka ngai lutuk che a ka lo be tawp che” ka tihchuan a nui ri ka hria a, hriat a nuam viau leh nghal. “Hei ka haw mêk a” chutih lai chuan nuam tuar thâwm ang chiah lo chhuah ri ka hria a, an va han tenawm tak.

“Tute nge?” vin deuh ṭhat chuan ka ti a, mipa nui kur kur ri ka hre bawk nên ka ngaih a ṭha miah lo. Chutah no hlek hluak hian “A bialnu ka nia...” pherh duaiin an rawn ti leh a nihchu, an va han tenawm tak.

“Mama” u Rinpuia chuan a lo khapa, ka hre ta chiah. Chûng ho mai mai chu an va han châk dâwn lo tak “In va han zak lo tak, ka rawn haw hunah in châk lo viau ang aw, tenawm lutuk, tuai em ni in nih?” ka sawi zawh rual chuan an nui vak vak ri ka hre zuia.

U Rinpuia chuan speaker ah a dah tih ka hre chiang bawk nên ka hau zui chu “Rawn haw vat mai teh, i tello chuan Zawlpala a hlim theilo, a nun a nguai, a rilru ana. A lung a lêng, nang lo a thinlai hnemtu an awm lo” an rawn Rap tak ang zuah zuaha, an bulah awm ila chuan ka beng thlawp duh ang. Chhe dei duai hlawm lutuk mai.

“In hmelchhia kha a nih mai chu a” ka ti vin hlara, ka ngei tlat an thu rawn sawi duh dân chu a ngeiawm êm bawka. Khatianga rawn tih vak mai.

“Kan hmêlṭha tih te chu kan hria a lawm, nula ho hi bem duh ila an tlu phawk phawk tawh ang, val luck kan nih hi. I bialpa ai pawhin kan luck zâwk, i bialpa luck loh zia chu nang ang châwn ping lutuk, mawng leh châwn in hnaih tê tê an tih ang chi a neih dânah che hian i hre mai em?” Sawma aw in a rawn tihchuan ka ner nasa mai.

“Nang ni ka be peih lo cheu, u Rinpui an hlatah kal rawh” ka ti zuia, “Kallo e, tihian inbiak te pawh a nuam ve a lawm” an rawn tileh hrâm a, huiham! He mite ṭhianho an awm chhûng chuan ṭha takin kan in be thei dâwn hauh lo, “Zanah ka lo bia ang che, khâng ho an awm chhûng chuan engmah a sawi theih dâwn loh” tiin phone chu ka dah zuia.

Enge an rawn sawi dawn tih pawh ka nghâk peih tawh lo, an ngeiawm ngat ngat bawka. Khatia dah hmak mai kha a ṭha, u Rinpuia erawh ka la be châk takzet, ka chhungte'n an ngaihdan hi hria se a lâwm hauh dâwn lo tih ka hria, mahse a nilo neih ka tum lova, ka chhûngte ai ka dah hmasak a ṭul dâwn tih ka hre bawk.

Zânah chuan amah zâwk in min rawn be hmasa teh khiaha, ka la rang ngei mai. Pitei chu melh zawkin damdawiin verenda ah chuan ka chhuak zui ta daiha, a lo ngaithla leh anga. A sawi buai leh mai mai, u Rinpuian a aw a hriat ka duh hauhlo bawk, a chhûngten min duha min iai miah loh laia ka chhûngte rilru hriat tir rih ka duhlo.

“Enge i tiha?” a rawn tihchuan khawpui êng ut lam chu thlirin “Damdawiin ah putea ka riah pui leh ang, i mu tawh em? Nge i lêng zâwk?” ka tihchuan “Leng lo e, ka ngaihtuah mek che, ka mu tawha, ka lo bia che a nih hi. Vawiin lah kha kan in be ṭha thei silo a” a rawn ti leh sapa, a aw hi chu hriat a nuam ṭhin ania.

A bulah awm leha a âwm nghêng a titi dun leh tawh ka châk takzet.

“Um ka ngei hlawm a nia, khatiang kha chîng tawh miah suh se, an tenawm” ka ti chu a rawn nui hak haka, “An zia ve reng a nih kha, hmeichhia pakhat in a biak tawh chuan khatiang ngei ngei kha, hriatthiam an ngai ve a nia” a tihchuan ka nui ve ta ngawta.

“Um min ngai tawh em?” ka ti chu “Ngaih pawh ka hrelo” a rawn ti a nihchu! Ka ner nasa maia, ka ngai che a rawn tih ka ring ve kha a nia, ava hla deuh ve.

“A nih tak chu a, keichuan ka ngai em em che a nia” tihlakin ka phun zui nâng nâng a, “Tak takah ka ngai khawp mai che, i tello chuan a reh. I zin rei dâwn tlat, lo haw zung zung rawh” lo haw tih lai tak chuan thinlung chhûng a fan raih raih maia, keipawhin Aizawl hi ka khualzinna ang maiin ka ngaih phah.

“Ka zinkawng zawng zawng hi nangmahah an tâwpa, khawiah pawh kal ila ka tâwpna hmun tur chu i thinlungah a ni, nang chu ka khawvêl i ni a, ka hahchawlhna leh ka natna pawh i ni, ka chak lohna i ni a, ka chakna pawh i ni tel bawk.  Ni tin hian nangmah vângin ka nunga, pangparin nunna atâna a zung a mamawh ang chiah hian ka tân chuan ka zung i ni a, ka zung tello chuan ka ro thuai ang, chuvâng chuan nangpawh lo rinawm reng la, ka lo haw leh vat ang” ka ti ta sepa.

A thaw ham ham ri chu ka hre thei “Ka bulah awm la chuan ka fâwp ngei ang che, kha i thusawi ang chiah khân ka tân awm reng ang che. Ka hlatah kal tum lovin min hnaih lui ṭang ṭang zâwk ang che, ka thlamuan phâk a i awm loh hian ka ngaihtuah che a, ka vên phâk a i awm loh hian ka hlauthâwng a nia, rawn haw leh vat la. Hetah rinawm takin ka lo nghâk reng dawn che tih hria la, i châm rei lutuk chuan ka ngai lutuk palh ang che” a rawn tih ri chu ka thu hriat tawhah chuan hriat nuam ber a la ni.

 

Haw vat min ti châk zo vek, engtik laiin nge Aizawl thlahlel lova ka awm tâk ka in hre hman lo, tûnah chuan ka hnathawhna khua zâwk hian ka lung a lên em em chu a ni si a.

“KA THINLUNGAH RAWN LÛT LA, KA THINLUNGAH CHUAN TUMAHIN AN TEHKHIN THEILO CHE, KA THINLUNG I ṬAWM TAWH MIAU CHUAN, TUMAHIN AN HMUH PHÂK LOH HMANGAIHNA I CHANG TAWH TIH IN HRE RENG ANG CHE” a rawn ti ri chuan min fan raih raih mai.

He mipa hi a danglamna bik sawi tur chiam ka hrelo, ka tân erawh a thusawi tinte, a chêt dân nên zawng zawng hian a danglam tho bawk si. Ka tello a a hlim ka hlaua, ka tello-a a lungngaih ka hlau a, ka tello in a tlei lutuk ang tihte chenin ka hlau vek, ka tello in awm thei lo sela tih hi ka duh, ka nunrawng mah mah em ka hrelo, mahse ka tello-a hlim turin ka duh miah lo, a tân a awm chhun nih renga, a hlima ber nih ka duh bawk.

Mi zawng zawng lung chu a dum kher lovanga, mahse ka lung erawh a dum chiang a ni.

 A kianga ka awm hian ka hlim bawk, ka thlamuang hluah hluah ṭhin, mipa pakhat buaipui awm tâk chu a ni ve in ka hria.

“Thildang zawng aiin i thinlung kha a lâwm ka duh” ka ti ve sapa, reilote nimahse haw leh vat ka châk tawh.

“Khalamah tlângval hmêlṭha deuhte an tam si a, ka tân i rinawm reng thei meuh ang maw? Tlangvâl hausa pui pui te an tam si a, ka dinhmun a derthawng riauin ka hria” a rawn tihchuan ka ner saka, ngeiawm thei lutuk mai; ka tilui hrep dawn mawni.

“Ka rawn kal hma pawhin an tam a lawm, tûnah pawh ka hmu mai thei. Doctor ngat lehnghâl” ka ti chu min rawn chhâng mai dawn emaw ka tihlaiin a ngawi vung vunga, ka ngaih a ti ṭha chiah lo.

“Mahse enga tân mah ka tilo, ka rawn chhoh hma pawhin mipa chu an tam a lawm. Mahse an ni ai chuan ka duh fe zâwk che, chuvang a lawm i bialnu pawh ka nih, Doctor meuh pawhin an tluk lo che” ka tihzawm leh zata, ka thusawi avâng khân a lungawi vak lo a nih ka ring.

“A va lâwmawm dawn ve, chu Doctor chuan a duh deuh che tihna em ni? Fimkhur la aw, ka ta i nih kha, ka vêng pha silo che a, ka hlauthâwng riau a nia, keimah lo in an nei ang che tih ka hlau” a rawn tihchuan ka nuih a tiza ru viaua, mahse ka nuih chuan a lâwm loh ka hlau bawk nên ka insûm ta hrâma.

Tûnah chuan ka lakah a thikthu pawh a chhe ve ṭan ta a lawm.

“Lungnhai miah suh, ka lakah chuan venthawn tur i neilo. Tu mipa mahin ka mitah chuan an tluk ngai lovang che, ka ngai em em bawk che a nia” tiin ka nui haka, ka thusawi chuan a tihlim tih ka hria, ka ti tak tak bawk. A mah aia ṭha leh hausa chu insawi theih lam ni hauh lovin ka hmu in min bemtu pawh an tam, mahse hêng ho zîngah pawh chhuan tur tehchiam neilo, thingtlâng tlangvâl in ka mit ala nalh hi keipawhin mak ka inti a, hei vâng hi a niang Pathian hian ka tâna a ruat a nih ka ring.