DUHLAI ZORINPUIA CHAPTER 10

DUHLAI ZORINPUIA 

CHAPTER 10 

“Zohmingsang, engtikah nge rawn lêt i tum? Khatah khân awm hlen i tum em ni?” u Rinpuia call ka lâk rual rualin a aw bung nghet nghut chuan a rawn ti nghal hluk mai. Ka ngai che tih tum lai laiin min rawn hau vak chu a va han intu ha lo tak êm.

“Awww ka buai ve alawm, bâkah ka chhungte'n la awm turin min duh sia ka lo haw thei mai biklo, chubâkah ka khua ania ka awm angai a lawm” ka thusawi zawh leh hma chuan “A nih tak chu.” bung nghet nghawt tak bawk chuan a rawn tileha.

A ṭawng tlêm sa nên chutia a thinrim ṭawng phei chu a hrechiang lo tân phei chuan a nelawm loh viau ang. “Ni tak lo e, ka ngai che tih ka tuma mi i rawn hau vaka, a chiloh ṭhin emai. Khatiang ti tawh reng reng suh, bâkah lo haw pawh ka tum chiah lo, eng emaw ka hria a nia, ka lâwm vak lo i sawi angin tinge i awm loh?” ka tihzawm zata.

“A enga chu maw ka sawi anga ka awm loh?” a aw ah chuan a hre lo tak tak te pawh a niang “I bialnu hlui hmu tawh suh ka tih che kha, in Inah pawh alo lêng ṭhin tih ka hria a nia aw, keichu u Rinpui ka sawi tawh kha ngaihzâwng ka neih chuan ka rinawm ṭhin, mipa dang ka ṭhiante emaw pawh nise ka bialpa huat tur zawnga awm pui ka duh ngailo, ka ngaihzâwng a nihna angin ka ngaihsaka, a duhdan ka zah sak a ngai tih ka hria. Ṭhian te chu an pawimawh, mahse ngaihzâwng kan neih chuan kan ngaih pawimawh hmasak ve pawh an ngai, in ngaihsak lohna leh in ngaih pawimawh loh na hian in ngaihzâwngte in kâr a ti hla ṭhin” ka châwl deuh data.

Ka rilru natna ka sawi leh tâkah chuan ka tlâwm a la leh ta riau mai; mahsela chutianga han vin pûng pûng erawh ka tum lo. A hmeichhia zâwk ka ni a, rapthlâk taka thu sawi ka duh lo “Kan in ngaihzâwn hian kan pahnih inkârah hmangaihna leh in laichinna thar kan chhûngte nilo aṭangin kan siam thara, in pawh tak leh in zahthiam taka kan awmdun na in mi pahnih inkar chu hlimna in a siama, ngaihzâwng aṭangin nupa kan insiam ṭhin, kan in ngaihzawn lai hi kan inneih hnu ai pawhin a pawimawh zâwk. Engkim in ngaihzâwn laia inhriatchiana in siamṭhat tawnna hian kan inneih hnu thleng nghawng a neia, nupa nun a nawm phah ṭhin” tiin ka sawi leh dap dapa.

Min chhâng lêm lo na in a ngaithla tih erawh ka hre chiang viau thung “A nihchuan ka ngaihsak tâwk lo che iti deuh em ni? I ti dik e, mipa ka ni thiam lohna tam tak pawh ka nei ang, keima induhtawkna nên mahse ka sawi tawh kha, thu ka tiam tawh che a kalsan leh mai mai che emaw; phatsan che emaw ka tum lo tih hi hre phawt la, ka thutiam hi tuifawn ang mai mai anilo, tuifawn chu a rawn thleng hluaia, a reh leha, a ngai ang bawkin a ṭan ṭha leh ṭhin. Chutianga ngai leh ngaia kualpui reng tur che chuan min ngai suh” a rawn ti lêt ve ta dap dap mai.

“I tân tlâng lianpuiah min ngai la, thlipui natak a lo tleha, chhem thlûk che a tum a nihchuan i tân nghet takin ka ding ang, tlâng a insawn ngailo, a dinna ngaiah nghet tak leh rinawm takin a ding reng ṭhin, chutiang chiah chuan i tân ka dinna ngaiah ka dingin ka rinawm reng dawn tih hi hria ang che. A ni chu rawn lêng mahse keimahah engmah a awm tawh lo tih hi ka hrilh nawn leh che ni rawh se, a duhthlanna a nia keiin lêng lo turin ka ti ngawt theilo, i rinhleh ang erawhin ka awm lo tih hria la ka duh, ka sawi fo kha. Min rin ngam pauh leh ka rinawm zia i hmu chiang zel ang, tikhan i lungawi tawh em?” a rawn tihzawm zata.

Ka hmui ka pet zauh mai, sawi tûr pawh ka hre tawh lo e a “Lungawi a nimai, sawhthing chu in ling zo tawh em? Nge in la zo lo?” tiin thudangah chuan ka pakai san ta daiha “Ka zo ṭep e, hlawhfa ka ruaia. Kan zo ve thuai mai ang, chu zawng ai chuan rawn haw vat la animai” a rawn tileh tawh.

Ka awm loh chuan min lam ve reng mai a lawm “Min ngai tawh em ni?” tiin ri lo chuan ka nui sen sena, min hmu pha lo mahse a hmêl awmdân tur ka ngaihruat thiam. A hawi leh vual vual mai ang, hetiang lama ka tih hian a lai sawi tur hrelo in a hawisawn daih zel.

“Ngai e, chuvang chuan lo haw tawh rawh. Khalamah i tlei ta mah mah, hna i neih kha rawn haw vat la a nimai” insûm thei tawh lo in ka nui ta hak haka. 

“Um ka duatan min ngaih tawh te chuan ka lo thlawk haw vawk vawk dâwn a nia, min lo hmuak ngei ngei ang che. Min ngai reng bawk la, khata ka awm chuan min ngai hmêl i pu ngai silova, haw san zeuh zeuh i ngai anih hi. A thawk ṭha emai, min rawn biak hmasak phah ṭhin a, a ṭha dawn riau mai” tiin ka bula pangpar hnah chu ka khawih pah melh melha.

“Bawihi i phone hman apiang hian pangpar kha sawisa ṭhin suh, a pâr te kha ilo pawt kawlh leh vek a nge” ka nu chu a rawn au leh nasa tawh mai. Ka nui leh haka, chutih laiin u Rinpuia pawh a nui ri ve suk mai.

“Min nuih ve kher suh, ka tum pawh anilo hmanni min lo biak khân ka tih tur hrelo khân a pangpar khawi pakhat ka lo mal char chara, a lo kawlh vek a lawm” tiin ka phun nâng nâng a, a ni rêng bawk. Phone a kan inbiak apiang hian ka tum em em pawh nilo in ka awm mai mai theilo, khuma ka awm leh ka let kuala,ka din leh khawih tur ka zawng sek bawk si, keimah chauh pawh ka ni in ka ringlo, call a inbiak a khawih tur zawng reng hi kan tamin ka ring.

Thil nihphung ve rêng ah ka ngai “Min biak chiahin awm ang che, i rawn haw dâwn hunah lo sawi la ka lo hmuak dâwn che a nia” tisupin a ngawi leh daiha, keimah ka ṭawng loh hi chuan sawi tûr a vâng chu a nih ber hi, a ni lah a insawifiah a nih loh chuan sawi tûr hre lutuk tih tur chu a ni lo chiang a ni.

Keimah hian duh hmasa lo ila chuan hmeichhe bem pawh a thiam hi ka ring lo. Amah a rinawm êm avâng tepawh a niang, hmeichhia han kawp kual zût a nilo bawk nên ka hrethiam viau tho, kei tihlohah a tleirawl tirh aṭangin hmeichhe pakhat chiah a la ngaizawng miaua, han zei lutuk tur chu a nilo, mahse a zeilohna tak hian ngaih a ti ṭha thung si.

Mipa zei leh ṭawngkam thiam lutuk nise chuan ka ten zo vek ang, hetiang ṭawngkam hnehsawh lutuk hi chu an lerh ngei ngei, han insawi rinawm viau mahse an rinawm hlawl loh.

“Ka lo haw veleh kan pahnihin i birthday kan lawm ang, i birthday ka hria a nia aw. Midang nen kan lâwm tho anga, mahse an haw hnuah kan pahnih chiahin” tiin ka sawi leh sap sapa, tûna ka haw pawhin a sneaker tur vel ka lei vek tawha. A birthday huna pêk tur erawh a hran ka lei thung, ka sum khâwl sa bâkah,keimahin ka hlawh ka nei ta bawk nen ka duhzâwng pawh ka thu in ka lei ve zel thei tawha, a ṭha phian mai.

“Ummm, ilo haw phawt angai a nihchu. I tello chuan a reh” a ti leh tawpa, a thiam tâwka min ngaih thu a sawi ve na tih ka hriat avâng erawhin ka lâwm viau thung. Ka surprise thut teh ang, an khua ka thlen hunah chiah ka haw tih ka hrilh anga, a thinrim êm lovang chu maw?

Ka tum dân chuan naktuk in buatsaih nana hmanga a tuk leha chhoh ka tum tawh hrim hrima. Mahse engmah ka sawi duh ta lo, surprise vekin kal rawh se “Aw le, ka khua ni ve lo mahse ka lo haw vat ang. Ka ngai tawh che a, bâkah ka vêng tlat tawh dâwn che, i kiangah i mei ang in ka bet reng dawn, a nih muttui phawt aw” tiin a ni pawh chuan min rawn mangṭha zuia.

Ka hlim leh ta viau mai, hmangaihna ah chuan kan â veka, hoteah kan thinrim fova. Thumal pakhat lek hmangin kan lungawi leha, duat phût avângin thinrimna tur kan zawnga, hote te ah kan titau kuala,  hetiang feelings a awm tawh chinah hi chuan inzawmna satliah mai mai ani tawh ngailo, min ti danglam theitu hi mi satliah an ni ngailo.

Kan ngaihzâwng kher emaw, kan nupui pasalte kher lo pawh rinawmloh vâng nilo va min ti danglam tu hi chu an awm chiang a ni. Tute pawhin kan nei ang, kan hmangaih te kan nei vek lo a, chu avâng pawh chuan mihring thinlung hian duhzâwng leh ngainat zâwng a nei miaua, min tidanglam theitu kan nei ṭheuh a, mahsela kan nei thei vek chuang lo.

Kei erawh u Rinpuia lakah ka danglam ang bawkin ka tân pawh a danglama, mi inang chuan kan duhna kan tilang mai thung. Siam chawp ngai hmangaihna a awma, chutiang bawkin duan sa hmangaihna a awm ve bawk. A nei thei tur erawh chuan kan bawhzui ngam a ngai thung.

Tam tak chuan kan duh leh hmangaih kan neih theih loh chhan chu kan dawihzep vangte a ni ve fo, duh leh vei em em siin kan hrilh ngam ṭhin lova, kan duha kan hmangaih takzet a nihchuan hnawl nih huama hrilh mai tur, kan laka an rilru put hmang hre hauh lova ngawi renga na tuar ai chuan kan hrilh avânga kan rilru na a nêp zawk in ka hre ve tlat.

Nupui pasalah pawh a ni, chân huam silo chhûngte hlauh avânga hmangaihte nên natna tuar reng siin midang kan han neih sana, mahse rilru a dam thei tak tak tawh lo. Ngaihtuah chhuah hun leh inchhir a, ngai em em a awm hun a in her leh ṭhin, kan hmangaihte kan theihnghilh ngailo, chutih rual erawhin kan neih theih vek loh zia chu tupawhin kan hria ang.

Mahsela kan hmangaihten kan hmangaih tih kha an hre ve ngei tur niin ka ngai, chumi hre renga min hnar a nih leh hmangaihtu an chân a, an duh an thlanga. Hlim taka kal tir mai tur, min lo duh ve reng thei bawk, chutiang a nih avâng chuan keichuan duh leh hmangaih kan nei a nihchuan huaisen taka kan lan tir phawt hi ṭha ka ti ber.

Khumah chuan let huat huatin ka nui leh vur vur ṭhin, u Rinpuia mi rawn biak dân mawlh chuan min tihlim. Ka lakah a thikthu chhia in min ngaih thu te a sawi ve tawh a nia, he mipa kulmuk lutuk hi ka la siamṭha dâwn khawp, kei ka harh zek zek min ti ṭhin a, mi harh chuan mi zawi awi ka nihpui ta daih chu a nia.

A lehlamah chuan ka lo inhmeh letling phian bawk si, ka nute ka la hrilh ngam chiahlo. A chhan chu thingtlâng mi fak ve viau ṭhin mahse mâkpa atân êm chuan an duh ka rin loh vâng a ni, chutih rual erawhin an zia en chhoha hrilh ngei erawh ka tum thung, u Rinpuia lo chu ka nei dâwn hauh lo.

An pawm lo a nih pawhin keichuan thlah ka tumlo, ka nunah a vawikhat nân duh leh hmangaih ka nei ve a, hmangaihna thawnthu a an chân ang mai maia midang laka chân ka tum lo bawk. Ka theih tawpin ka ta ni turin ka bei ang, a ni pawhin ka lakah rilru a neilo a niloa, inngeih tak leh hlim taka kan awm dûn zel theih nân ka bei ngei ang.

Zîngah tho in ka hawn tur ho chu ka siam peih sa veka, haw zung zung ka châk tawh ngei mai. Ka haw thut tih a hriat huna a awmdan ka hmu châk tawh, a nu leh pa tân pawh thil ka lei sak sa thlap bawk. Amah mai niloa a nu leh pa thlenga ka ngaihtuah a ni tih tihlan ka duha, ka zak lêm lo bawk.

Hmeichhe zaktheilo pawh min ti mahse pawi ka ti chuang lo, a nu leh pa a amah lo pian tir tu lakah hian ka lâwm em a sin. Kan innei thei kher dâwn em hrelo mah ila tûna ka ta a nih lai hian a hriatreng tur a awm ka tum tlat a ni.

Ka nute lah chuan ka che phur lutuk chu min en leh haw haw ṭhin “Nang hi khilamah te i lung lên tu an awm anilo maw? Doctor Timothy khân a duh viau che kha, keini pawh min rawn be hial a nia, Doctor ngat phei chu nei ngei la kan duh pui che, in nun nawmna tur hi kan duh ber a nia, rethei taka in awm kan hlau a, mipa ṭha leh enkawl thei ngei tur cheu hi thlang ula kan duh, hna neilo te in lo thlang hlauh ange” ka pa chuan a rawn ti charh charha.

Ka nu pawhin alo bûk pui ve bawk, ka en zawka. An thutak zia ka hmuh hmaih lo “Pa tûn angah sawrkar hna thawk kher lo pawh awm thei tak tak leh nupuite duat êm êm an tam a lawm, bâkah sum hi hlimna a ni ber lo. Hmeichhe tân chuan min hmangaihtu leh an theih tâwk a mi duat tu hi an hlu ber, nitei te hi an ṭha lo ka tihna nilo in sum chu an nei lutuk, mahse an hlim chuan miahloh saw. An fate ka ṭawng huat thu suh ah addict ah an chhuak zo va, saw pawh hna chiah ngaihtuaha an fate an duh duh dana an awm tir vâng ka tilo theilo, an mamawh em em pawh nilo in pawisa an pe ṭeuh ṭeuha, tûnah chuan an chhûngkua an kehchhe mek a nihsaw” tiin ka sawi ve ta fak faka.

A ni rêng bawk, rethei zâwkte hmuhsit hi ka duh ve ngai hauhlo, nitei te emaw ka nu leh pa pawh an châng hian mi rethei deuh an biak dân ka hmu ve fo, ka lo zak ṭhin. Malsâwm dawngin hetiang dinhmuna kan awm thei hi ka lâwm lo a ni lo; mahse Pathian hian min hrem ve ka hlau ṭhin, nitei te nupa pawh an hmuhsit em em te aia hniam an ni ka tilo theilo.

Sum chu an nei, mahse an fate nun an dah zalên lutuka tûnah chuan home-ah an fapa ngei pawh a awm tih ka hria. Zângkhua hi a bungbu thei tih hriata midang hmuhsit hi ka duh ve ngailo, ka nu leh pa pawh an ngawi ta ran mai.

“Nu, pa keichuan min duh satliahtu leh mi neinung an nih avângin ka en ve ngai dâwn lo. Ka nun a nia duhthlan theihna ka nei ve a, ka thlansual leh ka tuar tur a ni, keichuan thlamuang taka ka awm theihna tur leh min phatsan mai mai lo tur ka duh, Doctor in sawi pawh kha a ṭha lo ka ti hauh lo, mahse ka duhzâwng a ni lo a tin ni, thinlung thlamuang taka ka awm theihna hmun leh thinlung taka ka nuih theihna hmun ka thlan kawngah min dâl loh hrâm ka beisei” tiin ka room lamah chuan ka luhsan leh ta daiha.

U Rinpuia pawh a feh thu a rawn sawi bâk chu a reh leh ta vang vanga, a hah ṭhin viau in ka ring. Sawhthing lin phei chu lei a khu dâwn sia, ni sa tur nên ka khawngaih ṭhin, chhâwk thei ila ka duh takzet. 

Tihian chhûnah rim takin thlan luang zawih zawihin hna a thawka, zânah a hun neih chhunah chau leh mut chhuak chung chungin dawhthei takin min rawn la be thei zawk a nia. Ka fak lo theilo, khawpui tlangvâl angin a vun a ngo in a no ve lova, lirthei changkang pui pui khalh tur a nei heklo. Mahse zahawmna a mahah a beta, rinawmna in a nun a kaihruai thung si.

Iaina ka nei reng renglo, a nihna ah a chianga, a zahpui heklo. Sawrkar hna thawk miahlo in tûn dinhmun a thleng thei a nia, ka ngaisang zâwk. Kei nu leh pa chawmhlawm niin school ṭha ber berah ka luta, hahdam taka ka awm thei chungin ka la vui thei a nia, ka tluk loh zia lah ka hailo.

Ka insiam zawh chuan bazarah kal leh in thingtlâng lama la awm lo thei ṭhenkhat chu ka lei sa a, Sawma te ho khân theithur an ngaina hle tih ka hria. Ka haw chuan min rawn hmuak leh ngei ngei dawn, chuvâng chuan an ei duh zâwng tal ka hawn loh chuan an vui leh nasa dawn si ka ngaithla peihlo.

Ka bazar zawh chuan khawiah mah kal kawi tum tawh lo in taxi zawn tuma ka kawng kân dâwn lai tak chuan nu pakhat hi a rawn au thut a “Min pui teh u, khapa khân ka bag a ru a nia” a ti ri ka hriat rual chuan ka lam pana mipa rawn tlân chu ka hmuh hmaihlo.

Min tlân pel dâwn tihah a zâwnah chuan ka ke lo khamin a tlu ta thlawrha, chulaia bazara awm ve mipa ṭhenkhat chuan an rawn man bet thuai bawk. 

“Awi bawihi ka van lâwm tak, hetiang mi hi an lo awm thei animaw? Ka fate châwm nâna hah taka ka thawh chhuah sa ka chân ṭep a lawm le, tlangvâl i duh chuan rukru kher lo hian hna thawh tur i hmu dâwn a sin” tiin a bag rûk sak tupa chu a melh vang vanga.

A hmêlah thinrim hmêl a lang lova, khawngaih hmêl a lang zâwk chu mak ka ti, nu fel tak a nih ka ring bawk. “Ka pi Police kutah kan pe dawn ania” an tih lai chuan “Keichuan ka ngaidam e; mahsela in thu thu a nimai, khatiang thil a tih tawh loh nân ṭha in tih ang khân ti tawp rawh u. Tlangvâl, tûn hnuah sim hmak tawh ang che, rim takin i theihna ngeiin hnathawk la, chu chuan zahawmna leh hlimna a pe ang che, mi thil rûksak khân rei tak a tihlim dâwn lo che a nia” tiin chupa chu a en rana.

Midangte pawh chuan mak an tih hmêl hlawm viau mai, kei ngei pawhin ka ngaihdam theih ka ring miahlo. Ka pi chu a piangthar ṭha hle anih ka ring, ṭhenkhat chu nise an sawisak tir duh leh ngei ang “Bawihi ka lâwm lutuk aw, in zavaia chungah ka lawm e, kutthlak kher lo khân Police kutah chuan in pe mai dawn a nia, in zavaia chungah ka lawm takzet” tiin a kalsawn zuia.

Keipawh rei awm tawh lovin kalsawnin taxi la chuan ka haw zui ta daiha. Rukru lo hian ka pi sawi ang khân hna a tama, a zawng duh tân chuan hna hi a vâng reng reng lo, thingtlâng lam aṭanga rawn kal te mahin an hmuh theih chuan helaia awm sa phei chuan kan hmu thei dâwn lutuk, kan peih loh vâng leh sawrkar hna lo chu kan iai deuh tlat avâng hian a niin ka ring.

Eng hna mah hi hniam tih nei lovin thawk bawrh bawrh ila, rim tak leh dik taka kan thawh chuan Pathian pawhin malsawm tlâkah ngaiin mal a sâwm mai ṭhin. Hnathawk peih lova mi thawh chhuah sa lo rûk chingte hi an huat awm ve em a ni.

In ka thlen chuan tumah an lo awm lêm lo, lût vatin ka thil lei ho chu ṭha tak chuan parcelah ka khunga, kalkawng a thui tham ve bawk nên an chhiat hman loh hrâm ka beisei.

Ka naute ho school an kal bawk si a, mahni chauha han awm tâkah chuan a khawhar thlâk ve phian mai. Tv enin ka mu ta mai maia, naktûkah ka chho leh tawh dâwn bawk nên ka châk zek zek tawh, ka pian leh murna ngei ai pawha ka ngainat chhan leh haw ka châk chhan hi ka hrethiam biklo, u Rinpuia vâng chu nitho mahse a khua khân ka lung a lên ve hrim hrim te pawh a niang.

Tum lâwk ang ngeiin zîngah Aizawl aṭang chuan chhuakin u Rinpuia chu ka hrilh lo ta ngeia, putea pawh rinai taka a ṭhat chhoh leh tâk avângin pitei pawhin ngaihtuah lo turin min ti kha a nia. Bial khawmpui ka hmang hman ve dawn bawk nen ka phûr ngei mai.

Thlen vat vat ka châk ngei mai, ka chuanpui ṭhenkhat te nên chuan titi in chanchin kan inhrilh hlawma, an ni pawh a ṭhen u Rinpuia te khaw ṭhenawm a haw tur te an nih hmêl, a ṭhen erawh chhûngte tlawha zin mai mai tur an ni thung.

Pa pakhat fiamthu duh zet mai kan chuanpui avâng chuan kan nui leh uar uar ṭhin, pa fel leh kawm nuam tak a ni ngei ang. Amah lah a tê fel ata, a mizia a harh vâng phian bawk, chungte hlei hlei chuan nuih a tiza.

Fiamthu sawi tûr a hre si, kawng tluanin kan nui a ni deuh ber mai. Kal lam angin nau nawi pawm an awm lêm lova, tlêm chuan kan zângkhai ta deuh. 

Tlai dar thum leh a chanve vêlah khua chu kan lût ta ngeia, u Rinpuia te pawh an la haw in ka ring lo. Ka in chhak kawngpuiah chuan min dinpuiin driver chuan ka bungrua hawn chu ka in luahah chuan min dah luh puia.

“Ka lo be thei che a ngem?” a thusawi avâng chuan a ngaihna hre lo tak chuan ka en ha a, a tukkhum ala hiat nauh nauh zui. Eng tak chu sawi tum nimaw? 

“Engtia bia in maw?” ti a ka nuih lai chuan “Ih...phone ah, nge biak i rem lo” tiin a lei a chhuah ta zuka, a thusawi tum ka hre chiang bawk nên ka nui ta hak mai.

“Um biak te chu theih e” ka tih takah chuan nui var var hian ka pawisa pêk chu la in mi a la tlâwm ngei lehnghâl. A chhuah hnu chuan in dah fel sawk sawkin u Rinpuia tâna ka hawnsak pheikhawk vêl erawh ka dah chhuak sa a, a birthday present tur erawh ka dah ṭha rih thung.

Inbual leh te te in rawng ka bawl zuia, antui vila ka buai rak rak lai chuan ka kawngkhâr chu rawn in pawt hawng thutin ka hawi phei rual chuan u Rinpuia ka hmu nghal. Ka hmu thut bawk nên ka melh mâwl tawpa.

Ka lam pana rawn pên phei pawk pawkin min kuah mai a tum chu hnathawh thawmhnaw nen ala awm bawk nên a tim deuh tih hriat takin a tâwp zui ta daiha, a ding tlâwn ta reng mai. A hmai leh a kut vêl a bal bawk nen min tih balh a hlau tih ka hria, keimah zâwk chuan ka kuah ta thuaia.

A âwmah beiin ka nuih ver ver bawk “Surprise, min lo ngai em?” ka ti chu a nui ta suka, ka kawngah rawn kuahin “Dawt min hrilh a? Ngeiawm reuh lutuk, mi an lût emaw ka ti a lawm” a tihchuan ka nuih haka, ka haw tur ka hrilh loh avângin a ngaihdan chu a âwm tho mai.

“Tu misual nge lût ang, chahbi ka hâwn daih a lawm. Bâkah rawn surprise che kha ka duh sia ka hrilh duh lo che a nih kha, khawnpui hmang ve ngei tur khân min duh sia, hei i thu ngai pawimawh in ka lo haw a nih hi, ka fel i ti em?” ka thusawi avâng chuan a nui ta haka.

“Um min ṭhawng mah mah a ni e, nidangah chuan chîng tawh hauh suh. Lungphu ṭha lo min neih tir i duh te a nih loh chuan” a thusawi avâng chuan ka nuilo theilo, a vawikhat nân fiamthu a thawh ve ngei a nia, hepa hi.

A hmai bal niauah chuan chûl sakin “Ka ngai tawh che a, bâkah hetia rawn ṭhawn thut che hi ka duh alawm, i hriatsa kha chuan a ṭha dâwn lo tlat. Surprise a ni theilo, chuan a tâwp berah chuan ka ngai tawh lutuuuuuuk che ........” ti deuh duahin ka antui chhuan rawn so liam pur pur avâng chuan ka thlah vata.

Ka chawk nghal rawk rawk mai, ka thuk vut antui liamin a zu far bawk nên vut chu an lêng chum chuma, ka chhin nghal vat bawk. Gas ah chhuang lo in meichhemin thukah ka chhûma, u Rinpuia vângin ka lo theihnghilh leh hman alawm le.

“Min ngai rei hle mai” nui chunga rawn tiin ka bulah chuan a rawn ṭhu thla a, “I zu awm no leh hmana a hma aiin i ṭha leh sawt” a ti ve ngei lehnghâl, ka awm loh chhungin ṭawng dân a lo inzir emaw ni?

“Ka hmêlṭha sa hrim hrima, min star tu hi an tam asin. Mahse nangmah ka star daih che sia, i vânnei ania aw, mi tam tak star rawn i nei daih bik a nia” ka ti chu a ner suk suk mai, ka hmaiah chuan min rawn piai sak ta vaka.

A kut bal vêl enga tan mah ka ngailo tih a hrethiam ta te pawh animahna, titi dûn in putea chungchâng a ṭhat leh deuh thu ka sawi chuan a ni pawhin a lâwmawm a tih thu vêl a lo sawi ve a.

“Ka haw phawt ange, ka la in tifai silo a, zânah ka lo kal leh ang. Ka chhûngte ngaih a ṭha lo palh hlauh ange” tiin a tho chhuak zuia, tho ve vatin ṭhutthlenga ka dah a sneaker tur leh a nu leh pa tâna ka kawrlum phiar leisak chu la in a kutah chuan ka pea, zawhna mitmenga min en chu hrethiamin, “I nu leh pa ta tur, chuan pheikhawk erawh kha chu i tâna ka lei a nia, i duh ngei ka beisei” a duh loh ka hlau lutuk chu ka khûr deuh der der mai.

“Duati, hetiang i tih kher a ngai hleinem. I buai dâwn tehlul nen” a thusawi zawh hma chuan ka lo pawt chat vat a “Ka duh a lawm, ka bialpa i nia ka thil hawn ve che a nih kha, thil dang hawn tur che ka hreloa, i ngainat zâwng ka la hre lutuk lo bawk nên, la rawh aw. Nangmah inthlahrun a ngai miahlo a nia” tiin ka sawi nghal zung zunga.

Thaw hak hian ka chalah chuan a hmuiin a rawn fâwp vang vanga “Ka lawm e, mahse nidangah chuan tihfo a chi loh ang” tiin a awmsawna “Zanah chuan ka lo kal ang, chaw ei tui le. Ka nu leh pa pawh an lâwm dâwn tih ka hria, monu hual fel tak an nei tih an hre thar leh dâwn a nih hi” tiin a chhuak zuia.

A hmêlah khân nuam tih chiahlohna ka hmua, a hmeichhia in thil ka lei vâng te pawh a nimahna. Ka hrethiam lutuk tho, mahse thil hawn kha ka duh miau si a, zânah ka sawipui mai ang chu, khâng te avânga inthlahrung turin ka duh hauhlo bawk.

Chêt zawm leh mawlh mawlhin chaw chu hma takah ka eia, Sawma te ho pawhin ka haw tih an hriat tawh hial ka ring, a chhan chu sumo a ka chuang khân khaw mipui ṭhenkhat leh naupangin min hmu miaua, an hriat loh ka ring tawh lo.

Rin ang ngeiin zân dar 7 vêlah ka kawmchhak aṭang chuan an rawn au leh lung lung tawh mai, an la ri khut khut zuia, “Enge min rawn hawn, va awm rei thei ngat ngat ve. In pa i ngai lo hle mai, i awm lo kha chu a hnîm ve ruih a lawm, kha a ex zamlothangi lah chuan a lên chilh haih haih mai sia, i ṭan hle a ngai a nia, zah theihloh hle tur” an la rawn ti zui.

Sawi tûr hi an haihchham ngailo reng reng, mi nên inhnial nikhuaah kan ai awh tura din tir atân an ṭha hian ka ring a ni.

“In ninawm kha hei ka lo hawn che u, a tui dâwn a nia. In ei châk thu in sawi kha ka la hria a lawm” tiin ka thei chi hrang hrang hawn chu ka phawrha, an la au vak zui.

“Chhei! A tui dâwn lutuk, Thanherh lo khawih thawt thawt suh, naupang ber lehnghâl u te thu ngai châng lo in naupang ber an awm ngailo” Thantea serthlum lâk tum chu Faka chuan a lo tizuia, a ni pawhin a ṭhulh leh phah, a châng chuan ka khawngaih ṭhin.

A naupang ber bawk nên tihluih berah an hmang ṭhin bawk sia, heti chung hian a ruk tak erawh chuan an duat leh em em bawk si. Hriatthiam an har tlâng a nih ber hi, chemtê la in lakhuihthei vêl nên chuan an ei par para, ka mipa hmuh tawhah chuan ei an theiin duhloh an nei pawhin ka hrelo.

Ka hriat tirh aṭangin ka thil ei apiang an la ei duh veka, ngainat loh an nei pawhin ka hrelo. Dangdai ve tak chu an ni “A va han tui tak, i haw zawk lo ang tih a hlauhawm, hei thil tui tak kan ei phah a nia. Helamah hi chuan duh hunah ei tur a awm lova, an rah hunlai zel hi nghah a ngai sia, mipa mah ni ila rai no ang reng hi kan ni” Maman a tihchuan keipawh ka nui hak hak mai.

U Rinpuia erawh a la rawn thleng lo thung, ala hman lo te pawh aniang, a haw tlai sia chaw an ei hma ka ring lo hrim hrima; ngaihṭhat lohna ka nei lemlo.

“A changtupa a lo thleng e” kawngka rawn inhawng in u Rinpuia chu a rawn pên lût chhat chhata, kan lo en ṭhap bawk nen a mit sân ukin “Enge ni ta?” a rawn ti chu midang an lo nui haka, anilah a hawi buai deuh deuh lehnghâl.

“Lo ṭhu rawh an lo rêl che a, i rawn lang thut bawk nên an ngawi zui ta daih a nih hi” tiin ka bula ṭhu tur chuan ka pawta, a ni pawh a rawn ṭhu ve mai bawk. Kan inkar an hre vek tawh tho nen chubâkah an zia ka hrechiang bawka ka tilui châk chuan u Rinpuia dâr chu ka nghêng a, ka nui ver ver bawk.

Rin ang ngeiin an ner nasa hlawm teh e, tlangvâl a pumpa an hmêl chhia pawh ni silo engvanga bialnu neiloa lêng mai mai nge maw an nih le? Engtin nge hetianga ho deuha an awm peih zâwk ni, an ni ai nau daih daih in an neih khalha, duat an tih khalh tawh chu ania, an ni erawh tihian an in kâwm khâwm a an ho em em ringawt.

“In va han zak lo dûn tak, nang ni lo pawh an in ngaizawng ṭeuh, khatiangin an awm huar huar kher lo. Nei ber emaw in inti em ni? Awi Zohmingsangi zah theih loh zia hi” Sawma chuan a rawn ti nghal bul bula.

A hmêl nên zawng zawng a pe chhe lutuk chu ka nuih a tiza “Ngaihzawng neih tum lo chuan tihian kan in awhfik zêl ang che u( Awhthik ti a lam pawh kan awma, ka râwn ah chuan a dik ve ve aw) nei ve zung zung ula khatianga tihluih reng kha in ngai lo a nimai, nula te hi rim ve ula” ka tichu an in enkuala.

“Chu min lo ning hle a nimaw? Kan lo lên chu i phal chiah lo a nih hmêl, nula chu i ni reng lo em ni?” an thutak bawk nên ka thusawi chu ka sawisual emaw ka inti tawh.

“Chutiang lam zâwngin ka sawilo, keimah hlir min rima. Hmeichhe dang in lên luh chaka lo thlir reng tu cheu pawh in nei thei a sin, a hriat miahloh. Sâwma phei chu hmeichhe pakhat in a duhzia che an sawi ka hre thawi a nia aw, in upa tawh. Nupui tur in zawn ṭan a ngai ve tawh  a nia, lên tui laklawh hi a  awma, an lêng tar duh” ka ti duah chu an ner sak mai.

A ni reng a lawm, nupui pasal neiloa awm rei lutuk te hi nulat tlangvâl nuam ti laklawha ten an awma, chutianga an awm ve chu ka hlau.

“Kan lêng tar kher lovang, a ṭul kan tih hunah kan nei ve mai ang. Nang ai chhelo vek kan nei ang” an rawn tihchuan ka nui hak a“Tehreng e, mahse keiai hmêlṭha hi chu in hmuh chu ka ring chiahlo, ka hmêlṭha êm” tiin ka nui hak haka, ka mit ko ka sân zauh zauh bawk.

“I hmelṭhat kha in chhuang viau suh, hmêlṭhatna chu a entu a zir zêl a ni; tin, hmêl chu vawikhat tawhsual tawhah ah a chhe nghal vek thei” Faka chuan a rawn ti ve zat zata, inhnial leh intai renga awm hi nuam an ti nimaiin ka hria.

“Chu nang pawhin hmêlṭha min tia, a entu a zir i ti bawka. Hmêlṭha min ti ve vek tho chu a nih hi, tiraw u Rinpui” tiin ka nui har hara, u Rinpuia pawh a lo ṭhen suk suk mai. A ṭhiante ho ka tilui peih lutuk leh an ni tlâwm la si hmêl chu a nuihzat a ni ber mai.

“Zak lo tak, haw ang u. Henu hi a ṭawng thei si ka ning” tihluk hlukin Sawma chu a ding leh ur ur tawh mai. “Tikhan awm ziah suh, i titau reng mai. Ṭawng theih chuan fiam dâwl ve tur, ṭhu mai mai teh, haw pawh a la hun lo” ka tichu a tih tauh loh thu a rawn sawi ve ngei a.

“Tak takin kan haw tawh ange, in lamah tih tur kan nei. Naktuk lam lo zawh kan tum tawh sia ar talh tur vel puah sa a ngai, kan haw hma loh chuan a buaithlâk, chance kan pe leh cheu nimai rawh se” tiin an inzui chhuak leh ta diah diaha.

Ka dang duh ta biklo, dang pawh ni ila an haw lui leh dâwn tho tih ka hria. Tihian zantin deuh thaw an rawn lêng ve a, an lêng rei ngai lêm hlei lova, u Rinpuia nên chauh kan awm tâkah chuan ngawi renga a kut chu lâksakin a durh keh sen tuar ho chu ka chhem sak heuh heuha.

A na viauin ka ring “A nuam em?” tiin ka en chho zawka, mitmeng dam dup hian min lo en ve reng bawk. A hmêlah chuan ka chêt dân chuan a ti lâwm hle tih ka hre thei, a kut leh lam chuan ka lu ah a rawn chûl zauha, a nui suk bawk.

“Um i chhêm dai sawng zawng mai a lawm, i rawn haw chu i chau em?” a ti ve zata, ka chauh loh thu leh ka ruih vak loh thu hrilhin a kut bawk chu ka chhemsak zuia, ka khawngaih takzet. Hetianga hnarim a thawk reng hi an kumkhaw tihdan mah nise an chauh ṭhin tur zia leh hrehawm an tih ve tur zia ka ngaihtuah lo thei lo.

“Duati” ka hming chu a rawn lam sapa, ka en lai chuan engmah a sawi leh tawh chuang silo chu mak ka ti viau, sawi duh nei hmêl a pu bawk si. A kut durh lai chu ka chuk sak a, a rawn nui nghal hak mai.

“Kei ang hi min iai miah lo em ni, ka taksa thap leh kei kut hnathawktu mai mai hi min sit lo em ni?” a rawn ti ta nge ngea, a aw ah chuan a inzahpui te pawh a ang. Kei lah kan chanchin ka hrilh aṭangin kan chhûngkaw nunphung a hre ve vek bawk si.

Ka thiamlo lêm lo, chiang tak chuan a mitah ka ena “U Rinpui, ka hrilh tawh che kha. I hnathawhna avângin i kut thapin, chang hrup pawh nise pawi ka tilo, he kut ka chelh hian keichuan hahdamna, thlamuanna ka neia, tin i hnathawhna avângin i vunte danglam pawh nise he taksa ka nghen theih chhûng hi chuan engdang mah ka ngai pawimawh lo, i rualin i kiangah i chauh châng apiangin awm ka duh. Ka zahpui ngai lovang che, he ka kut hnathawkpa taksa hi ka duh vek, ka zahpui che in ka iai ngai lovang che, ka hmangaih che ka tihkha, ka hmangaih che avângin a sin hetianga ka awm” tiin ka nuih ver vera.

“Ka lakah in zahpui ngai suh aw, ka tân chuan ka mipa duh ber. Khawvêla mipa hmêlṭha ber i ni tho tho, hêng taima kut, awm âwl mai mailova zahawm taka a awm ve theih nân hnathawk ṭhin kut hi engah nge ka zahpui ang, a taima tih a lanna a nih hi. Ka ngaisang in ka zah em em zâwk che a sin, keiin ka nu leh pa thawh chhuahin nuamsa takin daihlim hnuaiah ka duh duh lamin ka awma, ka la vui ṭhin te kha ka inzahpui zâwk asin, nang erawh nangma kut khawih liau liauin ani engkim i neih ni. Ka ngaisang in ka zah em em che tih hi hre reng rawh” tileh duahin a âwmah chuan ka beia.

Ka rin loh dân deuhin a rawn che ta tlat, ka khabe ah dawmin min kuai dâk a, mitmeng de sar sar leh hmêl dam dup pu chunga ka lama a rawn kûn hniam rual chuan ka mit ka lo chhing ve vata, ka hmuiah chuan dam raih a rawn fawpin a duhthawh zui ta tial tiala.

A âwma ka kut chu pharhin ka chhâng lêt ve mial mial bawk, kan in ngaihzawn hma a min fawhna vawithum kan infawhna chiah ani, chuan tûn hi ka danglam ber ṭum a ni hial ang, keimahah hian ka hriatthiam silohin danglam a awm chiang ani.

Ka taksa te chu a sa pup pup lehnghâl, a nghâwngah kuahin a mal chungah a mah hmachhawn zâwng chuan ka ṭhu a, ka awm sawn deuh dat chu min rawn enin ngawi reng chuan kan in en tawna, kan infawhna avânga a hmui huh hlap pawh chu ka hmu chiang viau mai.

A biangah chuan ka kut pahniha chelhin ka nuih sen sena, hnuailam a eng emaw min do tu pawh ka hre reng. Mahsela ka hrelo der tlat thung “Kan vawithum infawhna chiah tih i hria em? I hleilo lutuk hi mak ka ti zâwk che, i danglam. Hei vâng pawh hi a niang i zûnah hian ka uai nghet telh telh maiin ka hria” tiin ka nui haka, ka kâwnga rawn dawm chuan a nui a.

“Chu ka khawih tlêm mah mah che i ti deuh em ni? Ka tihpui fo che chuan a hun hma in ka chetsualpui ang che tih ka hlaua, ka zah che a lawm. I hma hun tihchhiatsak che ka duhlo, kan inneih hma chuan ka khawih lo ang che ka tih tawh kha, tûnah pawh ka insûm hle tih i hria em?” tiin hnuailam chu a melh zuka.

Ka zak leh lai sawi tur hrelo chuan ka lei ka chhuah têt ringawt, a pa lo deuh emaw ka tia tûnah hian a pa ngei tih ka hrechiang ta hle bawk. Ka awmdân lai kual lutuk chu min nuih sukin a âwmah chuan min kuah beta “Ka duh êm êm nu, keipawh hian a ni têlin ka duh che” a tihchuan min ti hlim ngei mai.

A chêt dân, a ṭawngkam engkim hi tûnah chuan ka hlimpui em em vek, min duh ve tak tak tih ka hre ta bawk nên chu ringawt pawh chuan min tihlim, a kut chuan ka lu ah a chûl hliau hliau renga, a lungphu dup dup pawh ka hre chiang hle bawk. A chil lem zâwnga a hrawk bawk che ralh te chu mawi ka ti takzet.

Insûm theilo in ka khawih saka, mipa hrawk bâwk hi nalh ka ti tlat peka, a bikin mipa hmêlṭha leh pa zet ho hian an inhmeh zual. Ka kutzungchal chuan thai neuh neuhin ka nui leh vur vur ṭhin, chutia a hrawk bâwk ka khalh neuh neuh lai chuan a phone a rawn ri a, ṭhutthlenga a dah chu ka en nghal vat.

Nunzuali hming ka hmuh rual chuan ka hlim hmêl chu a reh nghal hmak. U Rinpuia chuan a en zawka, lâk pawh a tum chuang lo, lâwm lo zet chuan keimah chuan ka la a, ka lâk rual rual chuan “Rin, lo lên i tum lo em ni? Ka sawi tawh kha min ngaidam la bul ṭan leh ang” a rawn ti chu rum zet hian u Rinpuia chu ka ena.

“A bialnu ka nia, khawngaihin ka bialpa hi lo tibuai tawh lo ta che. Ka lâwm viau ang, nang pawhin i bialpa hmeichhe dangin an biak sek i duh bik ka ring lo” ka insûm peih tawh lo ka ti chhuak ta faka, an inah hial a lên chilh tawha. A number te hial a lo la nei chu ka thinrim leh zo vek.

Phone chu dah hmakin u Rinpuia chu rum fe hian ka ena “A phone number te i la nei vel a maw, hmela Zolerh” thinrim zet chuan ka au khuma. Ka lungawi thei hlawl lo, a mal chung aṭanga awm sawnin kalsan ka tum chu rang zet hian ka kawngah rawn chelhin min chawi nawlha, a mal chungah bawk min nghat leh chu insûm thei tawh lo in a samah ka keh saka.

Min hauh emaw min dan emaw pawh a tumlo, ka khawih ang ang chuan a dawh tawpa, kei lah ka thinrim in ka ṭah te a chhuak ṭun thei. Ka bialpa ex tih ka hre ve kura, a niin ka duh tawh lo tifo mahse ka thik lo theilo, ka tal chhuah tum lah min man nghet bawk si ngawi reng chuan ka insual ti ila a dik ber ang.

“Inṭhen ang” ka ti ta tawla, a rawn rum nghal nghut mai “Chutiang sawi tawh hlek suh, a number ka la neih vâng ringawt chuan min ṭhen i tum amaw? Ka ṭhen dawn lo che” tiin a ngawi zui leh ta daiha, min thlah duh bawk silo chu a samah kekin a âwmah ka chûm thûl, ngawi reng chuan ka tih ang ang chuan a dawh tawpa.

Ka thinrim bawk nen kei erawh ka thaw halh halha, ka thaw a sa pup pup bawk. A ni lahin min enin a ngawi ngul mai bawk si “Inṭhen ka duh ka tihchu, ka sawi chian viau kha, lêng tur ten a la rawn sâwm lehnghâl che a. Ka lâwm miahlo a nia aw Zorinpui, ka sawi tawh kha i duh chuan amah kha thlang la kei min vuan tawh suh, kal nghal rawh. A hnênah chuan va kal ta che” tiin ka vin ṭhat ṭhat a.

“Ka peihlo engvang in nge ka kal ngawt ang? A bulah tih tur ka neilo, kan inṭhen dawn lo ka tihkha, khatiang vâng mai maia min kalsan tum suh, bawlhhlawh bawma ka paih hnu, chuta karah ka hal ral tawh thil siamṭhat a lak lêt leh duh mi ka nilo e, kan inṭhen lovang, awm hle hle teh” tiin min kuah nghet sauh sauha.

“Ka ning, min thlah rawh. Ka lung i ti awi lo a nih hi, ka thinrim teh a nia aw” tiin ka melh rawm rawma, a la nui suk duh chauh lehnghâl. Ka thinrim laia a lo nui mai mai chuan ka thin a tirim zual, ka tâl zui leh phata, chuveleh ka tukkhumah rawn dawmin ka hmuiah chuan a rawn fâwp ngheka, ka lungawi lo bawk nên chhân pawh ka chhâng lo.

A tâwpah chuan ka inthlah dul ta tawpa “Thinrim tawh suh, ka ṭhen dawn lo che. Min ṭhen pawh nila ka ṭhen ngai lovang che, khanu avânga inhauh ka duhlo, a call pawh ka chhân loh kha. Zanin chu ka riak dawn” a la rawn ti zuia.

“A teuhlo emai, i riak lovang. Haw rawh ka hmu peih tawh lo” ka hmui chu ka thusawi zawh hma hma chuan a rawn hup chata, ka chalah a chal chuan rawn tauh datin a thaw zui ham hama, ka biangah chuan a chûl zui heuh heuh bawk. 

“Aih, ka haw dawn lo i lungawi loh chuan thlêm tur che in min duh kha, ka haw leh daih chuan Aizawlah ka hriat lohin ilo haw leh palh ang. Chuvang chuan ka awm reng dâwn, i bulah ka mu ang” a ti chu tihngaihna hrelo lutukin ka en ta tawpa.

Aizawl ka haw pawh chu a va han hlau âwm em êm, “Haw vat mai teh, tûnah chuan min thlêm pawh nila ka lungawi mai mai dawn lo, ka thin hi i ti rim lutuk. Kha nu kha maw thik chikimin ka thik, a hnaih ah emaw a hming emaw hmuh leh hriat ka duhlo, nangma lak aṭang ngat phei chuan, ka thikthu hi a chhe teh a nia aw, a bikin i ex lakah, ka duh miahlo” tiin ka tâl leh buan buana.

A ning ta deuh nge min pawm tawm ka timai, ka khup leh ka lu chu inhnaih tak a ni ka che thei tawh lo. Ka thawk te a harsa zo vek, chutianga min dah rei duh lo in min thawh pui zui nawlha, ka room-ah lûtin khumah chuan min muta, a haw dawn emaw tih laiin a kawr chung phelhin ka bulah a rawn mu nghal tak tak a nihchu!

Hepa hian enge a hriat ni? Ka haw san leh chu a hlau tak tak a nih ka ring, a rawn mut thlâk rual chuan min kuah leh hmakin a ke chuan min khan zuia. “Ka bialnu thikthu chhe êm êm leh ka duh hnup hnup nu, i thil min rawn hawn pawh ka bun hma in min ṭhen mai te chuan ka bun ngam nâng, thil thlâwn pêk erawh min pe fo lola ka duh, keimah pawhin engmah ka la lei loh lai che hian min chêt khalh tawh suh” ka ner sak mai.

Min tihsak ṭeuh tawh zâwk a, a thil tih hre loa ka thil tihsak a sawi ziah chu ka duhlo. “I daw pawrh a nihchu, min lei ngun fe zâwk, lei kher lo pawhin ka tân thil i ti hnem lutuk, a hrim hrimin thu dangah pakai tum miah suh. Ka thinrim hlaua i chhuanlam kha ka hre vek” ka ti leh hlak chu a rawn nui haka.

Nuihzatthlâk ka sawi ngai loh laia a nui hi ka ngei tâwk a tling êm êm tawp, “Ania lawm ka nu leh pa pawh an lâwm viau kha, taka naktuk zîngah chaw lo ei rawh se an tihkha, ramar ka kâp a, i la ei pawh ka ringlo. Zîngah kan chho dûn dawn a nia, tûnah chuan mu phawt ang, i pheikhawk min hawn kha ka bun tâwk engtin nge i hriat hmana?” a tihchuan keipawh ka thinrim reng duh ta biklo.

Ka chân phal tak tak der siloa “Ka bialpa i nia i size te ka hriat ve bawk lohin ka chîk che a lawm, ka en liam mai mai che i ring em ni?” tiin ka sawi sapa, chutah sawi zawm lehnghâl in “Khatiang mai mai avâng khan ilo inthlahrung ange, thil tam tak pawh anih loh kha, ka thil hawn che ka tihkha, nangpawh zin la chuan thil min hawn lo a i awm ka ringlo” tiin ka sawi dap dapa.

A rawn bu nghat nghat mai, “Ka hria a lawm, chuan ka lâwm e a nalh lutuk” amah ang lo taka a ṭawng ve duah chuan mak min tih tir zâwk. Nui hakin ka kuah ta nge ngea.

“Ram ar chu a nu nge a pa? A va tui dâwn tak, ka lo ei ngei ngei ang, ka la eilo tak tak, i nu leh pa hi chu an fel e” ti a ka ṭawng phur leh ta lutuk chuan ka thinrim a reh tawh tih a hria te pawh aniang a thaw nghal huai chu ka hriat hmaihlo.

“Ka thinrim tho a nia aw thaw huau vêl suh, khanu hnaihah emaw i be leh tih ka hriat chuan ka be tawh lo ang che. Ka ti tak tak dawn a nia aw, kan hma hun atân engkim hi a ni tih hre rawh, nakina ka natna turin engmah tih ka duhlo, nat pawh ka duh heklo, chuvâng chuan tûn aṭangin ka inveng tih hria ang che, ka natna ni turin ka hnaih lo che a, min tihlim tu ni turin ka beisei che” ka ti leh dap dapa.

“I rilru in chiang deuhin in ngaihtuah la, nakina min kalsan leh dâwn ai chuan tûnah min thlah la, nakina min tina lo in tûnah a hunlai hian min tina zawk la. I lungdum lohna ka nei a nihchuan nakina min sawisel nân hmang loin tûnah min sawisêl la, i hlimna ka niloa midang i thlang duh a nih chuan tûnah ngei hian min hrilh ang che” ti dap dap hian ka en kara.

A mit a lo chhing tih ka hmuh chuan engtak chu ngaihtuah ang maw? Tiin ka en renga, chutah rawn mengchhuak ruai ruaiin “Nakina kalsan tur che in tûnah bul ka ṭan pui lo che a, nakina i natna nilo in ka hlimna leh i hlimna thlentu nih ka tuma, sawisêl ngai lo in tûnah ngei pawh hian ka lung i dum tih hre reng zâwk rawh. Dâwt thu mai mai ka tiam lo che a, rilru lem leh thinlung tello in ka hnaih hek lo che, ka hlimna nilo in in ngâi ngai suh, ka beiseina neih chhun leh ka hlimna min pe lêt tu i nih hi in hre nawn fo zâwk ang che” ka kut chu a rawn huma.

“Ka sawi tawh kha he khawvêlah nangaia thlan tur dang ka nei chuang love, ka tân chuan ka hlimna leh ka hma hun, ka nun kaihruaitu ṭha ber i ni. Sût leh mai mai tur in thu ka tiam ngai lovang che, ka rilru leh tihtak zetin i kiangah ka hlimin ka hnaih che tih hre reng rawh, hun kal tawh leh kan nunhlui avâng chuan inthlah ka duh hauh lo ania, a ni chu ka tân mi pakhat ka hmelhriat pakhat angah ngai rawh, hlauthâwng lo la, min chân hlau ngai suh. A chhan chu engtik lai mahin min chân ngai lovang” a thusawi avâng chuan ka thaw huai mai.

Ni e, chân ka hlau takzet. Mahsela na taka awm ai chuan tûna ka tawrh theih laia min kalsan hi ka duh zâwk. 

“Ka nunhlui chu ka siamṭha thei tawh lo, mahsela nang nêna kan  hma hun erawh kan siamṭha thei thung, nang kalsan che a min duh lo tu pan leh tur khawpin ka mâwl lo e, bâkah engtin nge ka kalsan phal ang che. Hmeichhe hmêlṭha leh min hmangaihtu ka kalsan chuan nakinah ka la inchhîr dâwn a sin” tiin a nui suk suka.

Thaw huaiin a âwmah chuan ka bei nghâl kak bawk, kan riak dûn hi tam tak tân chuan ngaihṭhat lohna tur leh min sawisela min rêlna tur a ni tih ka hailo; mahsela in ngaizawng kan ni a, mi ngaihdan zawng zawng kan ngaih pawimawh chuan keimahni hrehawmna tur a ni tih ka hria, kan inkar a ṭhat hi a pawimawh ber. Chubâkah Pathian duh loh zâwng kan ti pawh a niloa, ka ngai thutak lutuk duh bik lo.

“Khatiang rilru kha pu reng ang che, keipawhin put reng ka tum ang. Taka naktuk chu i birthday a ni bawka lêng ila” tiin keimah zâwk chuan phur zetin ka ena. A hna a la ṭul viau tih hre mah ila ka châk miau bawk sia “Duati zân lama lawm pawh a pawi dâwn em ni? Chhûn chu min hriat kha” a tihchuan ka bu nghata.

“A nih zânah aw, chhûnah erawh ka rawn feh ve i phal leh phalloh a nimai” tiin ka en rana, phal ngei se ka ti. A sawhthing linna ah ka la feh ve reng reng hleinem, hmuh ve hrim hrim pawh ka duh.

“Aw le a ṭha a lawm, mahse fîmkhur la. I intihnat leh ka phal hauh lo a nia” a tih tâkah chuan ka thaw huai mai, hlim zet chuan ka nuih ta var vara.

Ka thu a ngai pawimawh ṭhin hian min ti lâwm lo theilo, amah avâng hian engkim mai hi a nuam in ka hria. Mi pahnih induhtawnna leh in ngaihsak tawnna aia hlimna bik tur hi a awm lo, in ngaihzâwnna chu mihring nuna hlim lai ber ka ti a, kan chhûngte kiang aṭanga kalhranga hmangaihna kawng kan zawh chhoh chiah hian mihring nunah hlimna thar a rawn awm leh ṭan a, keimah ni nihna kan hloh ṭan chiah bawk.

Min thununin min khuahkhirh tlata, kan nun pângngai kalsan thei tur khawpin a chak tâwk bawk.  Misual tak pawh thlâk danglam thei tu hmangaihna hi chu a mak a nih ber hi.

“Ka lawm e” tiin a zakhnuaiah zen lûtin ka mit ka chhing zui ta chiala.  Rei pawh meng lo chuan ka muhil zui siai siai bawk.

“I pa hian min lo tilui leh angem le?” an in pana kan kal lai chuan ka phun sapa, a pa kha a nghal ropui sia ka zak zo vek tawh. Min tihluih kha nuam a ti ropui bawk nên a enga mah hma in ka huphurh ṭûn mai.

Mi pâwna lo awm ho chuan min lo en ha ha hlawma, kan in ngaizawng tih an hre ṭhûm tawh bawk nen ka zak duh tawh lêm lo, thup eng ang mah ila engmah zêp leh thuhrûk reng theih a ni ngai lo. A lang chhuak leh nge nge ṭhin, thil ṭha lam leh chhe lam pawh a thup bo theih tak tak loh an tih kha .

A chhe lam a langsâr ṭhin mai pawha, “A lo tilui tawh êm lovang che. A tih luih che pawhin zak miah lo ang khân awm la a tilui reilo ang che, ka pa zia ve reng a ni ka tih tawh kha. Bâkah ka bulah i awm hi zah miah loh tur, i tân ka ding zel dawn a lawm” tiin min nuih var vara, ka nuih lêt ve sak bawk.

An intual kan thleng a, intuala hmeichhe lo awm avâng chuan u Rinpuia chu a rum nghut a, keipawhin rindan ka nei thiam mai bawk. Nunzuali chu a ni ngei ang, a lo vei tawn sek lehnghâla, a lêng leh pawh animahna, Sawma te ho sawi chu a lo dik tak tak a nih hi.

A hmaiah makeup a hmang nasa hle a, a hmêlṭha viau lehnghâl. U Rinpuia nên min lo hmuh dun rual chuan a ding data, min en dûn ta ngar ngar mai, a hmêl a thikna lang chhuak chu ka hmuh hmaih hek lo.

Zâm duh bik hauh lo chuan u Rinpuia bana vuan chung chuan ka melh lêt ve rana. “Rina enge i tiha? Zingkarah i bo daih?” zaklo zet chuan a la rawn tizuia, nizânah khân a bialnu ka nih thu ka sawi chiang viau sia, ka va han ngei tak. 

Hmeichhe zaktheilo ber chi a nih dâwn saw “Zaklo e a” tiin a hriat phâk loh tur chuan ka phun sapa, u Rinpuia erawhin ka thusawi chu a hria tih hriat takin a nui suk mai. Hepa pawh hi ṭawng mawh leh lutuk, ti lêt hrep se henu pawh hian a hnaih reng lo ang, a mit te re ru saw ramhuai a ang, duh tawhlo tu zarbuai reng, mi bialpa tih hriat te chuan inthiarfihlim ve mai âwm, a â deuh a nih ka ring tawh.

Ka ngei bawk nen rilru ṭha pawh ka pu peihlo, ka bialpa kher hi rawn tibuai lo se chuan ka rilru pawh a lakah a dang deuh ang.

“Ka bialnu ka hmu” u Rinpuia lah chuan a ti teh deuh tawpa, a bâk sawi tum hmêl pawh a pulo, hepa êm êm ṭhin hi chuh. Nunzuali erawh u Rinpuia thu tlêm sawi chuan a ti danglam ve zawk mai.

“Min hnar nâna i neih mai mai a nilo maw? Ka tihdik loh zia ka hria a lawm; min ngaidam tawh la. A hma ang khân hlim takin kan awm leh thei a lâwm, min hmangaih ṭhin êm kha, ka tello pawhin i awm theilo a nih kha” a va han zak lo tak. 

Hmeichhe zaktheilo vêk vêk hi chu kan lo nasa a ni, mipa ai pawhin kan nasa fe tih lanna a nih dâwn saw. Kan duhzâwngah chuan zah kan hre loa, kan hmeichhiatpui rêl leh sawichhiat lamah lah kan ṭha narawh, hmeichhe rilru chhe vêk vêk hi chu rûl tur nei ang chiah kan ni.

“Nuni hei hi ka hmeichhe duh chu a nih hi, ka nunhlui kha rawn sawi tawh lo teh. Tin, mipa inah hmeichhe lên fo hi a mawi lo tih hrelo rual i ni tawh lo, i rawn haw zânah pawh ka hrilh chian viau che kha. Ka kalsan dâwn lo, tin ka hmaah rawn lang sek suh, ka dawhtheihna a tâwp hlauh ange” u Rinpuia thusawi avâng chuan amah chu ka en ha a.

Ka lo thinrim khum vak zân khan chutiang chu a lo sawi amaw? Hepa hi, ṭha deuhin min hrilh se ka thinrim âwm tawp silo, thil zêp thei leh lutuk mai. Ka chhu harh zawk zâwk dawn emaw ni le? 

“Ka beidawng dâwn lo, ka ta i ni a i ni reng ang. Nang hmeichhia kha i la châk lovang, khawpui nula satliah engah mah ka ngai lo a nia” tihlawk hlawkin a kalsawn zuia, ka en zui vang vanga.

“A va nasa piap piap ve kasauti a Komolika kha a ang” ti a ka phun nâng nâng lai chuan ka bul a mi chu a lo nui hawka. Ka en chho chu a mit a lo de sawr sawr mai, ka thusawi chu a lâwm viau te pawh aniang.

In beng daih tumin thlifîm rawn thaw heuh heuh chu ka inchhem tira “Lut tawh ang le, ka nu leh pa in kan rei an lo tipalh hlauh ange” a tihchuan ka hnial bik lo. Inchhûng lamah chuan muangchangin kan inzui luta, an in pawh ka kal fo tawha chutiangin ka zak lutuk duh ta biklo.

“Eee in lo thleng tawh maw? Bawiha i duh hunah riah chilh ṭhin suh ka tihkha, mite'n an sawi nasa lutuk ang che u. Hmingtei tân a hrehawm ang, mi ṭhenkhat fel tak tak an awm rualin a tam zâwk hi mi sawichhiat pawi timiah lo an ni tih i hriat kha, taka Hmingte, i kawr lum min rawn hawn kha i pa nên kan ha a, hak a nuam em em mai leh nghal. Kan lâwm hle mai, mi rawn ngaihtuahna châng i hria a, keini lah kan zinchhuak khât si a, thil thar neih hi a har a nia” a tizui bawrh bawrha.

Ka nuih ringawt, chhân dân tur vak ka hre ṭhin lo. U Rinpuia bula sawi tûr ka hriat nên a nu leh pa bulah hi chuan ka ṭawng theilo emaw tih turin keimah ah hian thusawi tur a bo vek zel. “Eee bawiha riak zêl rawh, a mahin a awm si a, i nu thusawi kha chu ngai pawimawh hauh suh. Hmeichhia mahni chauha awm chuan tawhsual tawh palh te a awm theia, a ṭha lo emai. Hmingtei zâwk te hi rawn riak daih zel la a ṭha nân, tûn angah chuan mihring sualna hi a nasa tawh si a, engah mah ngai rêng rêng suh u. Amaherawhchu, insûm theihna hi a pawimawh a, insûm theih in tum dawn ania” tiin a nui sanga.

Chutah a mah vêk chuan “In insûm theihloha ilo puar ta a nih pawhin a pawilo, tu hmêl hmuh zung zung ka duh ania” arawn tihzawm a, ka zak lutuk chu u Rinpuia en chuan ka kûn leh daiha.

“A mak ṭhin, khatiang zâwng khân lo fiam ziah suh. An la naua, an zak tihte hre ve la, khatianga tih reng kha a ngai lo. Hmingte i pa hi chu duat tawh miah suh” nu Âsangi chuan a lo ti ve vata, ka thlavang a hauh ṭhin avâng hian a mah pawh ka ngaina.

Pakhat pa lah hi a pa in min tih luih hian min chhan emaw, ka thlavang hauh hi a tum ngai lo rêng rêng mai.