DUHLAI ZORINPUIA CHAPTER 4

DUHLAI ZORINPUIA 

CHAPTER 4 

“Tunah chuan ka laka i rilru ti lang zêl tawh rawh aw, tin i lungawi lo a nih chuan ṭha deuhin sawi zêl la, ngaihzâwng nei ve ṭhin mah ila khaw hmuna mi an ni ngailova. Mi duat leh tih hliau hliau hi ka thiam vak lo a nia, keichu ka zei lo” ka ti chu a rawn nui suka.

A khabe ruh kual in vuah fuh lutuk chu chûl sakin ka nuih var vara “I hmêlṭha e” ti tawlin chiang zet chuan ka ena, a rawn ner nâng mai, ka biangah chuan rawn piai zauhin “Min tihlaih i tum reuh emaw ni? Ka lai ve thei tho ania khatiangin min en reng suh” a tihchuan lei chhuah zukin ka inhera.

Ka ṭhut dân siam rem deuh in a âwm chu ka nghêng leh ar ara “Khua a var ṭan a nih hi, ka phûr tawh e, Chakai te ka khawrh anga, sangha an awm bawk an tia ka kal châk tawh lutuk. Lui hi khulamah pawh ṭhiante nên kan kal ṭhina, mahse helam nen chuan a inang lo deuh. A lian mah maha ka hleuh ngam ngailo, tûn chu luite deuh a ni lâwm ni? An sawi dân in khâm vêl te a awm ve a, li lian deuh pawh ka kal châk lutuk” tiin ka titi zui siam siama.

Ka thusawi chu dawhthei takin min ngaithla a, ning hmêl pawh a pulo “Um a tui a vawta, a in theih bawka a nuam iti viau mai thei a ni, mahse fîmkhur la, i tlûk sual chuan insawh a na bik ania” a tihchuan ka bu nghauh nghauha, ka kutah rawn humin “Rawng kan bâwl tawh mai dâwn em ni? Kan tlai lutuk ange” a ti zuia, keipawhin ka lo hnial bik lo.

Tho chhuakin a niin mei a lo chhêm a, keiin chaw chhum chu siamin gas ah chuan ka chhuang zuia, a sa rawn ken chu silin thukah chuan a chhuang zuia, a che vêl chu ka en renga. Rawngbawl chu a tih ngun hmêl riau mai, thingtlângpa tih takah a chê reng reng chu a fel in a Mizo pa hliah hliah hian ka hria.

A phone phawrhin a nute chu ka ina chaw a ei tur thu a hrilha, an rawn chhan lêt na avâng nge a nui nghal suk mai. Eng tak chu rawn sawi ang maw? Zawhna mitmeng leh hre châk ve zeta ka lo en reng avâng chuan loud ah a dah zuia.

“Hmu lo in i awm rei theilo a nimaw? Hetah rawn ei zawk mai tur cheu a lawm, i hleh ve te te a i va ei pui nghâl in nidangah enge a ei anga, tlai chu hetah rawn ei ang che u. Kan lo chhum kep ang lo hrilh rawh aw, i bialnu chu belh chian te kan duh a lawm, ka dah a nia” a nu in a tiri ka hriat chuan ka lai ngei mai.

A chhûngten engkim an lo hre vek tawh a nih hmêl, ka rin sa hrim hrim ania. Hrilh lo chuan a awm dâwn lo tih ka hria, zak viau mah ila a lehlamah chuan ka lâwm zâwk. A chhûngte hmaah pawh min zahpui lo tih a hriat, in ngaihzâwng hlim tê mah ni ila a chhûngte bula kan kar a sawi hrim hrim chuan min tithlamuang viau mai.

Zêp ta se an hre dâwn tho tho a, bâkah min ngaihdan pawh a dang daih thei bawk. Chhûngte hriatpui leh phalna ngeia ngaihzâwng neih hi chu a nawm dân a dang ve tlata, keipawh ka nute ka hrilh ve chu a ngai ngei ang, keiin ka pawm chu min hnial burin ka ring bik lo.

“Ka zak e a, in ina chaw rawn ei nghal ngawt chu” tiin ka phun sapa “Zah tur a awm hleinem, monu interview i nei dawna, zei taka chêt kha tum la, i lo chesual hlauh ange. Vawiinah i awm dân tur ngaihtuah char char rawh” fiamthu a a rawn tihchuan ka lei ka chhuah vaka “I ho e a, ka nula tawh. Ka thiam ve mai ang, ngeiawm miah suh aw” tiin a bulah chuan ka ṭhu thla a.

“Sawma te ho chu be chhin la in nghah khâwmna tur chu zâwt ang, nizânah khân sawina châng an hre silo. An phûr em em ringawt” tiin ka phun chhuak sapa, “Ka nuam lo riau mai, mahse bialnu ka nei ṭha bawk che a, min enkawl zêl mai ang chu” tiin a rawn nui saka, ka nui ve ta ringawt.

Amah vêk chuan Sâwma chu call in in nghah khâwmna hmun tur te chu a zâwt a, a be rei lêm lo. Phone a dah hnu chuan kan ngawi dûn rauh rauha, sawi mai tur ka hre bik tlat lo. A ni pawhin a hriat bik vak ka ringlo, in ngaizawng inkârah hi chuan inzahna hi a nasa bik ka ti mai, ka tha a khur der dera, be châk si sawi tur hre silo inkâra awm chu a hrehawm ngei mai.

“Tikhan lo awm rawh aw, pâwnah Phuihnam vêl ka va zawng lawk ange, ka rawn lêt har lovang” a rawn tihchuan ka bu nghata, sa thlakah hi chuan phuihnam hi a tui deuh berin ka hria. Engmah sawi teh lêm lo chuan a chhuak zuia, keipawh antui rawn so liam tur chu chawkin ka che rak raka, kan awmdân chu nupa kan ang ka ti tak tak.

Eng emaw ti riau hian a nuam ka ti, a chêt dân ṭhin hian min hneh telh telh mai. Ka chaw chhuan a hmin tâkah chuan suan vatin chawhmeh kan tur chu ka buatsaih a, ka chêt mawlh mawlh lai chuan a ni pawh a rawn lêt leh tawha. A phuihnam lâk chu silin a rawn keng lût a.

“I va rang ve, pasal tlâk i ni chiang a lawm” ka lo ti chu a rawn nui thum haka “Tihian min nei nghal mai dâwn em ni? Nupui neih pawh ka duh ve tho a lawm, nupui thuawih deuh ka nei dawn che a, ka phur viau a sin” a tihchuan ka lei ka chhuah zuka.

“A chi rih lo ang, kan in hrechiang chho zêl anga, kan la innei ve ang chu. Tûnah te chuan miin mak min ti lutuka anga an thidang lo chauh dawn a sin” tiin ka nui zui hak haka, a ni erawh a lo thutak phian mai.

“In hriatchian hi a har viau a sin, kum tam tak kan lo hriat, kan hriatchian em em emaw kan tih te pawh hi kan lo hrechiang tâwk lo fo a nia, chuvangin in hrechiang tak tak tur chuan a theihloh tluk a ni. Mihring chu ze in ang lo tak tak kan nih avâng hian kan in hrechiang tak tak theilo” a rawn ti khauha, ka chhâng mai lo. Chhan dân tur a vâng riau lehnghâl.

“Lo kal teh” ka chawhmeh kan chu rawn suanin alamah min pawt hnaia, ngawi reng chuan ka hnaih ve mai bawk. “I thinrim deuh em ni?” ka mita chiang taka rawn melh chunga a tihchuan ka lu ka thing nak naka.

“Teuh lo mai! Chhan dân tur che ka hre tawh lova chuvang chu a lawm, ka rin ai i ril zek” tiin a a kut min kuahna chu ka khawih zauha.

“Ka upa ve tawh a lawm, ka hmeichhe duh bulah ka ṭawng lohin tu bulah nge ka ṭawng ang, ka hmeichhe duh ka neih theih nân chuan ṭawngkam ka thiam ve a ngai a lawm, chutilo chu mipa dang keiaia ṭawngkam thiam leh zei zâwk lakah ka chân ang che tih ka hlau ve a, chân che ka duh der silo” tiin ka chalah chuan a rawn tauh data.

“Ngatinge ka lo tawn vat loh loh che, ka kum 26 hman hun chhûng zawng zawng khân khawiah nge i lo awm?” a rawn ti leh sapa, amah chu ka en ṭhin. Ka lung a awi hliah hliah mai, a mitmeng rum lam leh pa hrak si te, a vun hâng lam pang pâwl lek lek te chu ka mit la tu ber an ni a, a ṭawngkam nem leh dam dap mai erawh ka thinlung hneh êm êm tu a ni thung.

“Keipawh star ka neih lai te khân lo hmu che ila chuan mipa dang kha ka star duh tawh miah lovang, khawiah nge i lo bihruk char char dâwn ni? Keichu school ka kala, a châng leh ramdangah ka kal bawka, ka chhûngte hian min hmuh mai an lo phal lo anga min lo dah bo rih a nimahna” ka tihchuan kan nui dun hak hak mai.

Kan pahniha hun kan hmang dûn thei chu nuam ka tiin kan in pawh sâwt zia ka hai lova; a ni pawhin an hai bikin ka ring lo. In duh tawnna a lo awm tawh chuan engkim tih duna, awmdun fo kan duha, vawitam awmdun mah ila kham tih rêng a awm chuang lo. Kan duh miah lohte bulah chuan engkim kan ninga; rilru bet lo puia awm luih a ngai ṭhin. Kan duh tak tak bulah erawh eng anga harsa pawh nise awmluih tumin chêt kan la a, reilote pawh nise kan lungawi tâwk em em thung.

Keichu ka zia hi a dang ka ti dawn nge ka thinlung leh rilru taka ka hnaih theih loh nihpui te hi ka thei ve lo, in ngaihzâwnna mai pawh nimahsela keichuan ka duh tak tak dâwn an nih loh chuan midangte awh avânga duh duh nihpui ang te hi ka thei ve lova, ngaihzâwng ka nei a nih chuan a nghet tûrah ka ngaia, ka rilru zawng zawng pêk ka duh bawk. Ka duh miah loh ka nihpui khân a duh ang ngaihsakna ka pe thei dâwn chuang lova, ka lakah vuivaina tur a ngah dawn tih hria in ka duh tak tak loh chu ka nihpui ngai lo.

Chu ai chuan ngaihzâwng nei lo a awm ka duh zâwk ṭhin, ka duh tak tak tawh erawh phatsana ṭhen mai mai ka tum ngai lova. Ka theihtâwpin ka chelh zâwk ṭhin. U Rinpuia lakah pawh chu chu ka nihna a ni, ka duh in ka ngaina a, a bulah chuan ka nihna ang angin ka lang ngam bawk, a bulah ka thla a muanga. Thu thlum tak tak leh thilpêk ṭha tak tak dawng dâwn lo mah ila ka bula a awm phawt chuan ka hlim dawn tih ka hria.

“Tun aṭang chuan keimah hi i star, i bialpa i thinlung neitu ka ni duh tawha. Chûng zawng zawng chu min pêk ka phût bawk, i thinlung neitu nih ka duh tih hria ang che” tiin ka lung zâwnah chuan a rawn kâwk zauha, ka lo bu nghal nghat mai.

“Ka lakah chuan hlauhthâwnna tur i neilo, ka thinlung in a thlang tawh che a. Ka thinlung Lalpa dinhmun ka pe daih tawh che tih hi ring tawp rawh, keichuan tumah a derin inzawmna neih pui ka duhlo, i lakah feelings ka nei thei lo a nih chuan ka hnaih hauh lovang che” tiin tapah chuan ka ṭhu thla a.

“U Rinpui dik tak chuan maw ka kum 23 hman chhûngah nang anga duh ka la neilova, keimah pawhin mak ka inti. Mipa hian min lo bia in in sawi theih lam nilo in hmêlṭha pui pui leh mi hausa fapa tam takin min lo be ve tawha; mahse tumah ka chhâng ngailo, an hmelṭhatna kha hmêlṭha ka tih ve loh vâng nge keichuan ka duh thei miahloa, nangmah ka lo tawn dawn vâng che hi a niang, heta ka rawn kal hma lawk pawh khân kan ṭhenawm tlangvâlin min bema, mahse ka hnara nang ka tawn dâwn vâng che hi a niang” tiin ka sawia.

Thaw huaiin “I duhzâwng ka ni tak meuh maw? Keichuan nun nuam tak ka pe thei dâwn lo che a, nitin daihlim hnuaiah ka awmtir reng thei kher lovang che, mi hausa faten hahdamna an pêk ang che kha ka pe thei ve dawn lo che a, mahsela heti chunga min pawma min chelh a nih phawt chuan rinawmna leh hmangaihna, ngaihsakna ka pe thei thung ang che” chiang tak hian a rawn sawi fak faka.

A awmdân leh a aw chhuak aṭang chuan a ti mai mai lo tih ka hria “A pawi ka tilo, nitin daihlim hnuaiah awm kher ka duh lova, mi hausa fa i nih kher pawh a ngailo. Min enkawl theiin rilru hah reng reng chuan min dah duh dâwn lo tih ka hria alawm, i insawi angin hmangaihna leh ngaihsakna min pêk chu ka tân chuan a tâwk em em, thingtlâng tlangvâl i nihna avâng hian keichuan ka iai hauh lo che a nia aw, hre reng rawh. Chûng vânga iai tur che ni ila ka duhthu ka hrilh nâng che” tiin antui chu ka chawk pah rak raka.

Min chhâng tawh lo, mahse a hmêl êng sarah chuan ka thusawi chuan a hneh hle tih ka hre thei, ka ti tak tak bawka. Keichuan a nihna ka hre sa a, in lianpui pui leh bungraw manto tak tak leh sorkar hna nei kher lo mahsela thingtlâng tlangvâl chu ka nu aṭangin ka lo hrechiang a, an taima in an tlâwmngai tel tih ka hre khiau bawk, chu chu heta ka awm tirh khân a tak ngeiin ka tawng a, ka ringhlel tawh lo. An rintlâk tih chiang takin ka hria a, keichuan khawpui tlangvâl aia ka dah hniamna chhan tur ka hmu bik lo.

Nun mâwlmang te nei mahsela eiruk leh dik lo taka sum lâk luh tih vêl an neilo va, an mahni thawh chhuah ngeia an lâk na pawh hian min hneh sa hrim hrim. Rim takin thlan tla zawih zawihin an thawka, hlim hmêl an la pu sang thei te hi an fakawm ka ti, ni sa leh ruahsur pawh thliar lovin an ei tur thawkin hlo an thloa, an nunah vuina hmuh tur a awm hauh silo.

“A hmin tawh angem?” ka tihchuan amah chuan sa hrang khat chu suakin a sik chhina, “A suan theih a nih hi, le thlêng kha lo la la ka lo suak ange” tiin a suan thla zuia, keipawh chuan thlengkum lian ber chu la in ka pe a, tui vawt chu ka suahsak bawk.

“Chaw ei ka lo siam dâwn a sin” ka tihchuan a bu nghata, a ni in sa chu a ṭhet mawlh mawlh thunga, ka phûr tawh bawk nên chaw ei thuai thuaia insiam vat ka duh. Bâkah amah pawh an in lamah inthlak leh a ngaih dâwn avângin ka hmanhmawh lo theilo.

Thleng vêl chu la zung zungin chaw chu ka khawrh zuia, a ni pawh a ṭhet reilo. Thlêng chu rawn kîl ve in kan bar zawm mawlh mawlha, sa ti ṭha ṭha chu min rawn pe in min duhsakna chuan min tilâwm em em ringawt mai. 

“Ka lawm e, nangmah pawhin ei ve rawh. Kha keichu ka puar dâwn” tiin a sa min pêk ṭhenkhat chu ka pe lêt ve a, “Ei ṭeuh rawh, kham a ngailo chhûnah chaw kan fak har phei chuan i ril a ṭâm ang, a hâng te kha hâwp tam la. Ramsa hâng chu a hriselin a chak ania, hâwp ṭeuh rawh, tlêm deuh i ei ka phallo” tiin amah chuan chaw chu min pêk belha.

Ka lo helhhawlh bawk nen ei tlêm ka tum ve kha ania, ka thei dâwn lo a nih hmêl. Ngawi reng chuan ka ei leha, sa hâng chu a sawi ang tak takin ka hâwp ṭeuh mai, lungawi hmêl lutuka min en chu ka hmuh hmaih lo, ka puar âwk nia.

“Ka ei thei tawh thlâwt lo, ka puar lutuk ka pum a puak mai dâwn” tiin ka tho kâng a, ka ṭang bawk nen ka chau in lum ka ti ngei mai. “Aw le, chaw tlêm deuh deuh ei loh tur i chak lo lutuk palh ang, chaw ei tam chuan tha pawh an nei bik nge nge a nia, nupui chaw ei tlêm thei deuh ka duhlo” a ti kher chu ka ner pui nasa mai.

“Lungngai suh ka heh viau ang, inchhungkaw ei ai zawng zawng pawh ka ei zo thei maithei a nia. Chaw te chu ka heh reng” tiin tui hmun lamah kalin ka kam chu ka ṭhuah zuia, a ni pawh a ei rei tawh lem lo. Thlêng ka sil laiin a niin hmun a lo phiata, keimah te chuan ka nui leh ver ver ṭhin..

Ka mipa duhthusam ang zawng zawng chu amahah hian a kimin ka hria, hnathawh a hrehlo a a ṭul chuan hmeichhe thawh ang pawh thawk thei mai mi. Mipa tam tak hmeichhe tih tur a lawm ti a inchhung khura chêt tum miahlo, nupui emaw farnute an buai em em lai pawha lo awm mai mai hi an tam ania, u Rinpuia erawh tûna a mizia ka hmuh aṭang ringawt pawh hian chutiang mi a nih ka ring lo bur.

Ka thlêng sil zawh chuan insiamin kekawrbul nen tlawng chuan ka awma, a bulh lutuk loh avângin ka zahpui lem lo, ka khûp a thleng ti tih miaua, inthlâkna tur te chu keng sa in ka bagah chuan ka khung mawlh mawlha.

“Ka hman e, kal ang” tiin kawngka lam pan chuan ka kala, ngawi reng chuan min rawn zui ve mai bawk. Kawngka kalh fela an in lam kan pan lai chuan ṭhenkhat min lo hmutute chuan u Rinpuia chu an lo fiam zauh zauh hlawma.

“Bem tlu ngei ngei rawh, mo hmêl kan hmu châk tawh a nia” te chu an lo ti thul, kan nuih liam ringawta. An hriat lohin kan in ngaizawng tawh tih hre phei se hei ai hian min fiam nasa ngei ang.

An in kan thlen chuan tlêm in ka tim deuha, a ni erawh a awmdân a pangngai thlup reng thung.

“Nupui ka rawn ru e” a la ti lût zuia, ka zak lutuk chu a hnungah ka biru titih, a nilah chuan a nu bulah “I monu tur saw va fiah ta che, a ṭha dâwn em? A hmêlṭha em tih te va en la” ala ti zuia, a va han sual tak, room-ah min la luhsan daih zui.

A unaute ho lah chuan min enin an khi ṭha hlawma “Hmingte lo ṭhu rawh, luiah chuan em ni in kal dâwn?" a nu in a rawn tihchuan bu nghatin an bulah chuan ka va ṭhu a, hmeichhe naupang u Rinpuia u fanu chuan min rawn panin “Apatea nupui tur i ni tak tak em? Â u, patea nên chuan innei tak tak dawn em ni?” a rawn ti reuha, amah chu a hma pawha ka in a rawn lêng tawh kha tih ka hre mai.

Chhan dân tur mai ka hriat loh avâng chuan ka nui leh ringawt, ka zâm lutuk chu ka kut chu ka mal chungah dahin ka in sik tawn chhên ringawt. “Bawihte khatiang an zâwt ngailo i nute bulah va phei rawh, i patean a tilai tawh mah tih nak a laia, a rawn lêng duh tawh lo mai ang” u Rinpuia nu chuan a lo ti zung zunga.

Naute pawh chu a kalsawn zui ve mai bawk “Bawihan engkim min hrilha, engtin nge i duh theih zâwk ni? Nang ang nula hmêlṭha te chuan a aia ṭha i hmu âwm si a, ka fapa ve hi chu a puitling lo riau ania” a tihchuan ka lu ka thing nar nara.

“I fapa anga fel hi ka la hmu lo zâwk, a fel êm hi. A ni ang fapa nei chuan vânnei an inti viau ang” ka lo ti ve sapa, thu tam sawi erawh ka ngamlo. Ka zak tlat a nihchu, u Rinpuia lah chu a rawn chhuak har phian lehnghâl, zah tawh sa nak a laiin chhuah vat vat ka duh a sin mawle.

“Ni e, hlim deuhin hun in va hmang dâwn ania fimkhur ula, chetsual palh te a hlauhawm. Bâkah ramsa hlauhawm pawh in tâwk palh thei a, va fimkhur viau rawh u” a nu chuan rawn tilehin chutih lai chuan u Rinpuia pawh chu a rawn chhuak zuia, ka tho chhuak nghal vat mai.

“Kan kal dawn em ni? Nu kan kal a nia” tiin pâwnlam ah chuan kan inzui chhuak zuia, an in tual kan thlen rual chuan a bânah ka hmer sak nghal vak mai.

“Min tizak lutuk, khatiangin titawh reng reng suh, ṭawng pawh ka ṭawng ngam ngut hleinem. Ka zak lutuk kha i rawn chhuak har bawk nên tlanchhuah ka châk zia chu” ka ti nghal hlak hlaka.

Min rawn vuanin “Zah tur a awm lo, ka chhûngte nakin lawka i chhûngte ni ve tawh tur an nih kha, zah a ngai rêng rêng lo. Nel takin be bawrh bawrh la i ngaina thuai mai ang, ka nu kha chuan mo atan a awt hle che a nia, monu interview naah i mark i score nghal phawta” a uang bawk si ka ngei tak tak.

Mahse a nu khân min ngaina tihchu ka hre ve tho, ramhnuaiah lutin bung kûng lian zet a zâr pharh duai mai chu a lo awma, mawi ti zet chuan ka thlîr dauh dauh mai. A hnuaiah chuan min chawlh puiin “Hetah hian lo nghâk ang aw, helai hi in nghah khâwmna tur chu a nia an rawn thlêng ṭep ang” a tihchuan ka bu nghata.

Ka phone phawrhin bung kûng chu thla ka la kuala, sava an chiar nak nak bawk nen a hahdam thlâk ngawih ngawih mai. Thawk la ham hamin ka nui ver vera, sava mawi tak tak kan bul hnaia rawn fu te chu kawkin an hming ka zâwt a, rinai a lo hre daih lehnghâl.

“Nang ni pahnih chu in va phûr fâl awm ve, min lo kalsan thawt thawta” Mawii aw ka hriat rual chuan ka hawi pheia, Sâwma te ho nên chuan an dawn inzui diah diah mai “In va tlai ve, keini chu kan tho hma a, mi nghah ngaia awm kan duh hleinem” ka tihchuan an rawn ner nasa mai.

“Kal nghal mai ang u hmiang, kan thleng har lutuk ange” u Rinpuian a rawn tihchuan tumahin an hnial lêm lo, muangchang chuan inzuiin Mawii nên chuan kan titi paha, kal pah chuan kawng sir thing leh pangpar kan hmuhte chu kâwk kualin kan au chûl reng mai, ka tan thil thar vek a nih avângin zawhna ka ngah bawk nen mi fiam nân tak an hmang lehnghâl.

Kawng chhe lai deuh kan kal lai chuan a âwih bawk nen ka kal ṭha ngam meuh lo, chutah hnahthel ro tla khâwm chu rap tawlhin ka au nghâl tuara, ka hnunga kal u Rinpuia chuan min rawn chelh hman lo se chuan mawng sawh dawtin ka tlu ngei ang, hlauthâwng zeta ka en lai chuan midang ho pawh chuan min lo en ṭhap a.

“A hlauhawm a nia muangchangin kal rawh, chutilo chu i chesual palh ang” rawn ti supin ka kutah chuan a rawn kaia, amah chuan hma hruaiin ka zui ve nghal zat mai. 

“I ninawm Faklulian min runluih reng suh aw, ka tlawh thla mai ang che. Kawngthlangah hian i liam thla vawn vawn mai tur a sin” Mawii chuan Faka chu a rawn vin ṭhat a, midang lah chuan “A duhzia che a ti lang ve a, khatiangin lo ti mah ta che in zeilo emai” an li la tizuia, Faka nên chuan “Ka duh aw zâwng lo” an intirual ṭhawt mai.

Mama te ho lah an nuih a za, kawkin an nuih nghal ngat ngat mai. Vawiin chu kan thâwm a reh vak dâwn lo a nih hi, an ni pahnih lah an inhnial leh nghal char chara, an thin erawh a rim tak tak lo thung, mihring in hnial peih deuh hi an awm ṭhina, in haw hauh siloa inhnial pui nuam tih deuh hi kan nei ṭheuh in ka ring.

An ni pahnih pawh hi chutiang chiah chu an niin ka hria, inhnial hrim hrim hi nuam an ti tih a hriat. “I chau em?" u Rinpuian a rawn tihchuan thaw la halh halhin ka chauh loh thu chuan ka chhâng ve tak nangin ka awm dân aṭang chuan a hrethiam vek tih a hriat.

“Kan châwl lawk dawn em ni? Ṭhu châwl lawk mai ang u” tiin kawng sirah chuan min ṭhut puia, mipa ho chuan min en ṭhap mai. “I rawn kal ve duha, i thau lutuka chuvang a nihkha i chauh hma êm êm ni. Nang chu hetah lo awm mai rawh” Sâwma bawk chuan a rawn tileh ta.

He mihring pa hi chu mi sawisêl hi nuam a ti mawle “Nang ni angin kawng thui lutukah ke in ka kal ve ngai hleinem, min lo sawisêl ve ziah suh. Keiai i thau fe aw, i lu buk leih luih nên” ti vakin ka in zâp pah hauh hauha.

Dik tak chuan ka chau ngei mai, hetianga kawng thui hi ka la kal ngai lo tak tak, lir vek kan hmang bawk nên thingtlâng mite zînga kal meuh zawng a lo chauhthlak zia ka hriat phah. Engtin nge an hah ve loh zâwk ni.

Mawii chu ka bulah rawn ṭhu in “Engah mah ngai duh suh, kal ngai loh chuan a hahthlâk alawm. Keini pawh kan kal ngun nângin kan chau ve tho a nia, tlêm in kan zia bik tih chauh a ni, i chauh chuan kan châwl zel mai ang, an mahni min sawm a nia, min sawisel tur pawh an nilo, kan rawt chhuah pawh ni hleilo” a ti chu Sâwma te ho an lo eee nasa mai.

“In duh leh haw leh daih rawh u, mipa ho kan kal a nga a nimai, keini chu kan chau ve lova” Fakan a rawn tihchuan Mawii chuan rum zetin a ena “Lo ṭawng ve ziah suh, nangmah a ni lâwm ni ka hman lo ka ti chung pawha min sâwm lui tu, kal ang u an ni pawhin an theih chuan engah nge kan theihloh bik ang” tiin a ding chhuaka, hma a hruai nghal zat bawk.

Engmah sawi tawh lem lo chuan kan zuia, u Rinpuia chuan ka kutah min kai char char bawk nên keipawh ka tlu tawh êm bik lo, chutah kan hmaa thinglian pui pui din khupna ruam lai chu kawkin “Khu khu a nih khu kan kal na tur, kan thleng ṭep tawh a nia, thlen hunah i inchiah dai vat dawn ania” tiin ka thlan luang zaih zaih chu min rawn hruk saka.

Ka thaw huai mai, min duatna chu nuam ka ti bawk, muangchanga kal leh in kan kal tumna luite chu kan thleng zuia. Ka hawi kual nghal vauh vauh mai, tui chu dam zet hian an luang ri kerh kerha, sava leh thehlei vêl pawh an tam ngei mai.

A kamah chuan keini lama kan khawi ṭhin hnim nalh tak tak a awma, aidu leh changel tih vêl pawh a awm ṭeuh mai. A kawr ruam hrim hrim chu a thim deuh khapa, a dai nghal sawng sawng bawk nen nuam ti zet chuan dingin ka mit ka chhinga, hah a dam sawng sawng thei nia.

Thing kâr aṭanga ni êng rawn lût bak chu eng dang vak a awm lova, chutah a kam zâwl tlêm awmah chuan in nghatin kan che zui sang sanga, ka bag chu thingkung tê deuhah chuan khaiin mipa ho erawhin thuk an lo siam thung.

Mawii nên chuan tih tur em em kan neih ve loh avângin luia sangha zâwng ek sangha an tih mai ṭhin ho chu thlir in man tumin kan buai ve nasa mai. An tam bawk nen kan rak chel chûl a, tui a thûk loh bakah a zau lêm loh avângin tlân kual vêl pawh a nuam viau mai.

Tui chhûng lungahte chuan chengkawl an bet ṭhap bawk, mipa ho pawh chu rawn inchiah ve in an thawmhnaw an phelha, Mawii nên chuan in melhin kan nui ringawta. U Rinpuia pian chu ka en leh ṭhin, abs a nei lutuk lo nangin a kiar hauh lova, pian nalh ka tihchi tak a ni.

A kekawrbul nên chuan kan lamah rawn pheiin ka bulah a rawn ṭhu a, lungpui chungah ṭhu in kan mal a chin chu tui chhungah a awm thunga. Midang erawh kan thlang deuha li lian deuh awmah chuan an in liluh nasa mai, Mawii pawh a tel ve bawk a ni erawh a hran deuhin a awm thunga.

“Nuam iti em? Tui te khu i hleuh ve duhlo em ni?” a tihchuan ka bu nghata “Nakinah ka hleuh ve ang chu, tûnah rih chuan hetia in chiah hi a nuam rih, nangpawh i duh leh zu hleuh rawh. Nakinah ka rawn chhuk ang” ka tichu ka kutah a rawn hmer salha.

“ Teuhlo mai nangmahin ka kalsan lovang che, kan pahnih in kan hleuh zâwk dawn a nia, a chhak lamah hian li dang a awm alawm, tirawh han chho ang hmiang. An ni khu chu an awm awmin awm rawh se, Chakai khawrh te kha i duh a ni lo'm ni?” a tih takah chuan engmah sawi buai lovin ka zuia.

Lui kam thing vêl chu ka en ṭhin, hetianga thing lian leh sâng hi ka la hmu ngai hauhlo. Ka titi pah zat zata, a ni erawhin min kaiin ngawi rengin ka thusawi chu a ngaithla thung.

Chutah a li sawi chu thlengin ka en chianga, kham ang reng deuh sâng vak lo fit ruk âwm vêl aṭang hian tui a rawn khawh thla a, a hnuaiah chuan zau vak lo in tui chu a tling khâwm a, a mawi ngei mai. 

“Tirawh le” tiin tui chhûngah chuan a lût zuia, keipawh chuan ka zui ve nghala, a tui chu a hik ṭha bawk nen ka khûr nghal bauh bauh mai. Min rawn pan hnaiin ka kâwngah a rawn kuaha, hnai zetah min en bawk nen ka hmai chu a rawn sa pup pup mai.

Chutah min phei puiin a tui rawn khawhthla hnuaiah chuan min awmpuia, a nuam ngei mai. Thawk la ham hamin ka sam chu ka tuai puata, a ni erawh chu lung bang nghenga dingin min lo en reng thung, hleuh emaw pawh a tum chuang lo.

Kei erawh a châng leh hleuh kualin ka li luha, ka au chûl reng bawk. A nuam ka ti ngei mai.

ZAWMNA

“Awi ka nu! Ka duh theilo” ka au chûl mai, rang zetin tui aṭang chuan ka chhuaka, ka ke ka per dawt dawt bawk. U Rinpuia chuan min rawn panin “Enge ni ta? Tinge enge i hlauh?” a rawn tihchuan ka kut ka vai vak vaka.

“Pangang ka hmu, pangang sawlaiah sâwn tui chhûngah a awm” tiin ka au ti tiha, ka ka rawn hupin a nui nghal vur vur mai. 

“I thil hlauh chu ava lian ve, aw le tikhan lo awm la ka va dah bo a nge” tiin hnah hlai deuh chu la in tui chhûngah chuan a lût zuia, pangang chu zuk la in hla deuh takah chuan a paih zuia, ka thaw huai mai. Ka lungphu pawh ala pangngai theilo, hmul neilo chi a ni bawk nên ka hlau lo theilo, ka ti a tiza tlat zel.

A rawn lêt leh chuan thaw huaiin ka lo hnaiha, “Hlauh tur a awm tawhlo, tirawh Chakai chu khawrh ang hmiang” a tihchuan phur zetin ka zuia, kawr chu zawh chho in lung chu kan phawka, aikam lianpui pui chu an lo awm leh nawlh ṭhin. Ka au chêl chûl mai, man ngam ve hek lo awm hmun aṭang chuan man vat vat turin ka lo ti thul.

Kan ṭin kenah chuan dah zelin keiin ka khaia, nuam ka ti ngei mai. An bawp lianpui pui ka hmuh chuan ka chil thli a tla lo chauh, ka va han ei châk tawh tak “An van tam em em, keini lam chu lui kal pawh ni ila man tur an vâng thei lutuka, a nuamlo. Helai chu an la tam tawp, man ṭeuh ang aw” tiin a hnungah chuan phur zetin ka zui sauh sauha.

“Awi ka duh lo!” ka au leh vak, ka au ring bawk nen a ni pawh a phu zawk mai. “Enge ni leh ta?” a rawn tihchuan inthlahrung deuh tak chuan “Tihpalh ka au tawh lovang, Changpat kha ka hmu leha, ka au tawh miah lovang” ka tihchuan a thaw haka.

“Rawn au tawh miah suh aw, hlauh tur an awm lo nia, i hlauh vânga thi tur nilo in i au rin lutuk avângin lungphu châwl te'n kan thi hlauh ange” a rawn tihchuan ka ner nâng mai, a va han sual tak.

“Awihawmloh eeeeemai, Chutiangin thi ngawt lovang. Ka au tawh dâwn lo ka tih kha” tiin a bulah chuan ka ṭhu tûm bûr a, rawn nui hakin ka biangah chuan a rawn piai nawk nawka. Ka au ṭhat ṭhat mai “Ana a nia min dim ve la, ka biang kha piai thlâk i tum em ni? Min naute chei ziah suh” ka hmui chu ka tipawrh vaka.

Chutah ka hmuiah chuan rawn fâwp zauhin a awmsawn lehnghâl daiha “Ka tân chuan ka naute a lawm i nih, ka duat che i duh lo em ni?" rawn tisupin a Chakai tê deuh man chu min rawn pe zuia “Hei êm chu i man ngam ang chu tiraw?” nuih suk paha a rawn tihchuan ka la vata, ka kutzungpui tiah ngawr ngawr a ni bawka ka keng ngam ve mai bawk.

En chiangin ka nui haka “A mit a van pâwng” ka tichu “I tiahpui lek ania, a la tui tham lovang i chhuah leh mai dawn em ni?" a rawn ti kher chu a hnungah ka chum awka, tinge mi pawh chu a runluih reng ni? Sual lutuk mai, ka chhuhsan daih zâwk dawn nge mawni.

“Min tilui ziah suh aw, ka chhuhsan daih mai ang che” tiin ka ke chu ka per dat data, chutah rawn ding chhuakin min rawn kuaha. Kan thawmhnaw huh vek bawk nen a pangtilum chu ka hrechiang hle, ka taksa chu a tilum nghal thar thar bawk. 

“Hetia ka tih loh chuan biak dân tur che ka hre lova, i duhzâwng pawh ka la hre em em lo tih i hriat kha. Ngawi reng dawn ila i ning dawn si a, i tha ti tho zak thei thil tihpui che ka tum ve a nih hi, khati khân per ve dat dat lo la lung hriam te i rah chuan i ke kha a nia na dâwn” tiin a ngawi zui ta daiha, a âwm zâwna bei chuan ka khap fak fak ringawt.

A sawi dik chiah, a ṭawngkam hman ṭhin aṭang hian sawi tur hre tak leh ṭawng bawrh bawrh chi a nilo tih ka hre chianga, a zia a ni hek lo. Kei min tih hlim tum leh ka khawhar hlauin min be ve hrâm hrâm tih ka hre ve bawk, engmah sawi zui tawh lo chuan a mah chu ka kuah lêt a.

“Sorry mahse ka tê min ti tawh suh” ka ti chu a rawn nui hak mai “Aw le i tê lo i khal lutuk, kan chhuk tawh mai dâwn em ni?” a tihchuan ka hnial lêm lo, amah chuan hnung dawlin a hmaah min kal tira, li kan inchiahna chu kal pel in midang awmna lam chu kan pana, kan in be leh tawh lova, a ni lahin sawi tûr a hrelo nge ngawi reng chuan ka hnungah chuan min zui ve zel ringawt.

“Nang ni pahnih kha rawn chhuk vat rawh u, in va rei bik em em ve. Enge in tih? Midang zawng zawng in rawng kan bawl laiin in lo vâk bo daih ringawt, in ei ve duh lo em ni?” Sâwma chuan a rawn ti nghal hluk hluka, kil khatah Mawii leh Faka pawh an lo la inhnial ngat ngat mai.

A va han hahthlâk tak, in ngeih taka an awm lai ka la hmu lo hrim hrim. Faka chal ka en chiang chu a lo pawng ul mai, “Ehe! Ngatinge i chal kha?” ka tihlai chuan midang chu an rawn nui nghal haka, a ni lah chuan chutia ka zawh rual chuan Mawii chu rum zetin a han en nghâl a, ka hrethiam mai bawk. An va in khawihna awm rêng rêng vele.

“He patil nu hian lungin min vawm mawle, mawl lutuk” a ti bul hmuka, Mawii lah lo duai lo “Patil ka nilo, engah nge min tihluih reng ni, midang pawhin min fiam nang angin khatiangin mi thil hlauhin an intih ṭhaih lo, i mâwl man i hmu a nih kha” a lo ti pawr ve hlar bawk. A va han hahthlâk ṭhin tak em.

An insual lo chauh tawh chu u Rinpuia chuan duhtâwk turin a ti a, an ni pawh an ngawi zui ve mai bawk. Kan Chakai man chu rawn enin an awh hmêl hle “In duh leh khawrh ve rawh u, hei chu u Rinpuia nên kan in sem tur, nge tui in hleuh mai mai ni” ka lo ti chu min ngei hmêl teh e.

Kan man tam over siloa, u Rinpuia ka duhsak vâng a ni pakhat, aman hah si a midang kan sem leh chuan pahnih vêl bakin kan chang dâwn lo. “Kan hria min pe ru pawh kan tih loh kha, chaw ei khamah kan khawrh ve dawn a nia, Hmingeki te ai tam daih kan man ang” tiin an in fuih phur sauh sauha, ka lo nuih mai mai thung.

Kan wai wai ken vêl chu chhumin chhûn chaw chu kan fâk zuia, rinai ka ei tam daih mai. Hetianga waiwai ka ei tam pawh ka hrelo, ramhnuaiah chuan engkim hi a lo tui duh bik a nih hi.

“Khawi i ei duh lo a nih kha” Mawii waiwai zawng zawng chu a thleng chawpin Faka chuan a lâksak hmiaha, Mawiin a rum zeta a en rualin “I ei peih loh kha tikhan awm mai mai rawh, bâkah ka chal i vawm pawnna hi i rulh angai” tiin Waiwai chu a ei sak nghal zata.

“Lalfakzual i va han nghal tak” Mawii pawhin a ti ta tawpa, Faka lah chuan engahmah a ngaih hmêl loh nasa, ngawi reng hian a ei zawm mawlh mawlh mai. An inhau ngunin kut inthlak awk awk mahse an in nel em em tho sia, hetiangte chu in ngaizawng ta se an inhmeh phianin ka ring.

Na tak takin inkhawih mahse a tu amah an in hua in an thinrim chuanglo, ngaiah an neih nimai in ka hria. “Hmeichhia zâwk pawh dawm nachâng hrelo, i kha tih avâng in a nihkha bialnu pawh i neih theih loh” pakhat in a tih laiin pakhat lah chuan “Mipa zâwk pawh kutthlak hreh lo, i kha tih vângin a nihkha bialpa pawh i neih theih loh” a ti ve bawk.

In hnial rêng rêngin ni an chhiar liam leh dâwn a nih hi, hnial khân lah an hre si “Duh ni ila chuan maw bialpa ka nei tawh ang, nanga kekawrte mawngpar kha tumahin an ngaizawng peih lovang che, hmeichhia dimna châng hre bawk silo, hmeichhia i fiam ve pawhin i chûm ang ṭhuai ṭhuai a, vir ropui si” Mawii chuan a tileh hlak hlaka.

Faka thil ei lai chu a phuh ṭhawt a, a bula Mama ṭhu kutah chuan a va bet thlawrh mai. A nilah a lo tenchhe bawk nen an in melh rum teh u “Lalfakzual tenawm lutuk, i thil ei lai kha i hmuam sên loh chuan ei ve lo mai ta che, awi ka nu ka ten lutuk” tiin  Mama chu a tho chhuaka, tuiah chuan a kut a va sil nawk nawk mai.

Faka lah a nui ṭhaw a, a inthlahrun hmêl vak chuang loh. Midang lahin eng sawi lo in thil ei pahin an lo nuih kiah kiaha “Nang nu vâng vek hi, ka ni hman i ti tluang lo zo, i rawn kal ve duh ani” Mawii bawk chu a va perh leh.

“Tunge min rawn sâwm rawh ti che a, ka peihlo ka ti chung pawhin kal tura min nawr phêt tu i nihkha, kha ti khân min ti rêng rêng suh aw. I bula awm hi ka duh bik teuhlo, i lu kîr buk chhep chhup nên” an inhnial leh nghâl char chara.

U Rinpuia chu a rawn thaw hawk a, a kham zui daih bawk. Bengchheng a ti ngang a nih ka ring, kan piah deuh lungpui chungah chuan a va ṭhu a. Midang lah chuan chutia a kalsawn pawh chu ngaihven lêm lovin Faka te inhnial chu lo fuihpawrhin an la khêk chûl reng mai.

An va han mâwl chhah hlawm tak, kham ve daihin u Rinpuia lamah chuan ka pheia “I ning deuh em ni?” ka tihchuan min rawn enin a lu a thing a, a bulah chuan ṭhu thla in lung chu ka chhara, tui chhûngah chuan ka vawm lût keuh keuh bawk.

“An thâwm a ṭha hle mai, hetiang reng hi em ni in nih? Hmul râlmuang lo ah awm ila chuan kan thi hmasa ber dawn a nih hi” tiin ka nui haka, “An zia ve a nih saw” a rawn ti tawpa, a dang sawi belh tur a hriat hmêl chiam chuang lo. Keipawh ka thusawi tur a ti tâwp leh vek tawh, a ṭawng tam lutuk silo keilah mi titi thiam nih loh bâkah a bulah chuan ka zâm zuala ka dang a âwk vek zel.

Mahse a zia hian min hip riau bawk si, mipa ṭawng tam lo na na na hi chuan mi pawisawi leh buaina pawh an tâwk lo nge nge a, keichuan ṭawng tam lutuk hi ka duh theilo. An hlauhawm ka ti ṭhin, hmeichhia aia ṭawngthei an tam tawh si a, ka mil lo riau zêl.

U Rinpuia pawh ka rin ang chiahin a ṭawng tam lova, midangte sawisêl emaw an nun khap emaw a nei khât khawp mai. A duh loh zâwng an tihchuan a kalsawn tawpa, tumah va tihbuai pawh a nei ngai hek lo.

“I puar em?" ka hawi kual vauh vauh lai chuan a rawn ti ve khauha, ngawi renga min awmpui chu nuam a ti chiah bik lo a nimahna. A lam chu hawiin “Um puar chu a nimai, nang zâwk i ei tlêm riauin ka hria, i ngaina lo em ni?” ka ti a, a ṭhut dân siam rem hian kan ṭhiante lo la inhnial mawlh mawlh lam chu an hawia.

“An ngaina sia, an kham loh ka hlau a. Puar lo deuha an awm chuan saw ai sâwn an bengchheng anga, kan tuar lovang” a tihchuan ka nui lo theilo, an lo inzui rei tawh dâwna. An zia chu a hrechiang hle ang chu.

“A nuam an ti ve a nih saw, enliam tawp chi. Mahse duh ai chuan an thâwm ana mah mah a ni” ka lo ti ve sapa, an ei zawh rual chuan Chakai man ang u tiin an liam leh diaka, u Rinpuia nên erawh chuan kan awmna ngaiah awmin kan in nghêng riala, thu tam sawi lo mah ila kan chêtzia chuan engkim a ti chiang vek thung.

Chutia engdang mah ngaihtuah lova kan awm lai chuan a phone a rawn ri ral rala, a en nghal vut mai. “Ka nu a nih hi” tiin a la zuia, a ngawih vang vang hnuah “Aw le rawn haw vat kan tum dâwn ania” a tihchuan ka en ha mai, eng tak chu ni ang maw?

Phone chu dah zuiin “Kan haw mai a ngai a nih hmêl, midang han ko ang hmiang ” a tihchuan ka hrilh hai ngei mai, eng thu nge a nu khân a rawn hrilh ang? Thil pawimawh tak chu a ni ang tih ka hria “Thil thleng a awm em ni? Engvangin nge kan haw thut angaiha?” tiin ka zâwta.

Ka hre châk bawk nen a hmêl awmdân ah hian thil lâwmawm lam a nih ka ring lo ringawt “Kan kawmchhakpa lui kal a chesuala, zawn a ngai a nih chu” a tihchuan ka mengkawka, ka lung a phu dup dup mai.

“A thi tawh tihna maw?” tiin ka en chho ha a, a rawn bu nghat mai. Keini lah engmah hrelo in kan lo hlim em em a, hmanhmawh kan ngai tihchu a chiang hle bawk, an hmuh har phei chuan ni eng emaw zât an zawn leh ngei a ngai âwm si a.

Tui tla chu hmuh an har zia ka hria a, u Rinpuia te chu ka ngaihtuah nghal hle. An mahni pawh an chesual ve palh ang tih hlauhna in ka khat bawk “Faka kan haw mai dâwn em ni? Pu Dina lui kal a chesual a nih hmêl, ka nu in min rawn hrilha, hmanhmawh ang u hmiang” a tihchuan an ni ho Chakai khawrh pawh chu an rawn tho chhuak phak phaka.

“A va pawi ve, a kal tur nen khân kan intawka, a phur tehlul nên” tiin Sâwma chuan a rawn sawia “Hmanhmawh ang u, ke a kal ngai a ni bawk sia, kan hmeichhe pahnih hi rawn chhawm tur kan insiam dâwn nge? An ruala kan kal zêl chuan midang in min dem lutuk palh ange” Mama chuan a rawn ti ve bawk.

Mawii nên chuan kan in en ringawta, sawi tûr a vâng duh ngei mai  “A hmanhmawh thlâk sia min kalsan mai rawh u, kan pahnihin muangchangin kan rawn haw mai ang” Mawii chuan a ti ta tawpa, mipa ho chuan an lo rem ti lo nghal hle.

“A hlauhawm in chesual ang, hmeichhia in pahnih chauhin kalsan cheu ila, in chungah thil ṭhalo thleng ta se miin engtin nge min ngaih a nga, Faka hian rawn chhawm mai rawh se, a ni a kal chak thei chuanglo ” an tihchuan a nilah a lo tlâwmngai ve tum hranga, mahsela a ṭhiante an ṭan rual vek avâng chuan a hnial thei lêm lo.

Mipa ho chu insiam sawk sawkin an haw zuia, keini pawn kan bungrua ho chu khâwmin muangchang chuan kan chhuak zuia, u Rinpuia nen kan Chakai man chu ka ak bawk, tikhan hah chawlhna hun pawh nei miah lovin an tlang nghâl awm sia. An chau viauin ka ring.

Muang chângin kan kal bek veka, Faka lah chu a phun leh nâng nâng ṭhin “Phun reng lo la, mi thih lai laiin an ngaihtuah che a nih kha” Mawiin a lo tih tâkah chuan engmah a sawi tawh bik lo.

“Pa Dina chu a khawngaihthlak hle mai, a fate an la tê bawk si. Hma hun hi chu kan va han hrelo tak” tiin a sawi zuia, kei erawhin ka la hre ve lo bawk nen eng han sawi tûr vak ka hrelo, ngawi reng chuan ka kal mawp mawpa.

“A thla te hi a hrâng mai anga, sâr thi hi chu an thla a hrâng duh an ti leh nghal. Keichu an ina ka riah ngam pawh ka ring lo” Fakan a rawn tihchuan Mawii nen chuan kan in melh zawka, kan ngaihtuah loh lam daih a rawn sawi chu nuih lam lam a tiza dâwn.

“A hrâng êm bik lovang, thlahrang hi chu mi dawihzep leh zu ruih hmang deuh bâk hian an hmu ngailo, thlahrang sawi tur hre thei deuh hi belchiang mah ila inkhâwm khât tak an nih loh chuan zu rui mi hian an hmu duh bîk, harh fim vawka hmu hi ka la hrelo, thawnthu i ngaithla tam lutuk a nihkha. Keichu kan thlahrang thawnthu a tak tak tawn an tih ṭhenkhat hi chu a lem ka ti ve thlâwt” ka lo tihchuan an pahnih chuan an bu nghata.

“Mi hip duh hian thil hi kan phuah belh nasa thei lutuka, keipawh ramhuai hi an awm lo chu ka ti ngam hauh lova; mahsela Pathian a kan rinna kan nghah phawt chuan engmah hi hlauh tur a awm lo ka ti ve tlat, thlahrang hmu ṭhin tam tak hi chu ka awihlo, a hrim hrimin hmeichhe thla hi an han ti thla zen a, hmeichhia chiah hrâng thei kan ang ka ti. Tinge hmeichhia kawrfual vâr ha vek an nih?mipa te hi hrân ve tur a lawm, hmeichhia chiah kan thi pawh nilo” ka ti chu an rawn nui haka.

“Ania lawm hmeichhia hi kan sual hmêl bik e, thlahrang hi an damlaia thil la tih zawh loh nei emaw a nih loh leh misual tak hi an hrang duh an tia, keichu hmeichhia hlîr an han hrâng tir hi chu ka awihlo, mipa pawh an thi ve tho a. Thlahrang thawnthu ngaithla ila, hmeichhe samsei leh kawrfual vâr ha, huh hnuang te hi an han ni deuh veka, mipa hian thlarau an nei ve lo ti dawn ila mihring hmasa ber an ni bawk sia” ka ti leh niah niaha.

“A dik chiah, mipa in thlarau an neilo ti dawn ila thih hnua tho chhuak leh tur, kum sâng rorelna a inlan a, siamtu hmaa in puang vek tur kan ni si a. An nei ve tho ang, nge an zakzum viau ni'ang le? Thlahrang mipa hmêlṭha zakzum deuh hi ka hmaah rawn in lan se, awi! Ka nihpui vêl châk” a rawn tihchuan ka nui hak mai.

Faka lah chu hnap dawk zawkin a rawn nuia, ka hmu chiang lutuk. “Ehe! I hnap a dawk sei ve” ka lo ti chu “Hmingek ka hnek ang che, kal mai mai rawh khawi a thlahrang mah kha ngaihzâwn tur in hmu lo ang, in thinchhe dûn si, in tê bawk si thlahrang tak ngial pawhin an hlau ang che u” a rawn ti zui zata, kher kher chuana.

“Kan duh bulah chuan kan fel dâwn a lawm, awi keichu ka suangtuah nasa thei tawp. Movie vêl a mi te ang hian thlarau khawvêl piahlam ram a lalfapa ṭawng ila, a ni nen chuan hlim takin awm ila tiin, thlarau hmêlṭha leh mi ngaihsak deuh, khawih thei vêl ila chuan rawn nung leh ngei se” Mawiin a tih lai chuan a hnung bera kal Faka bawk chuan “I ti rapthlâk kha a nih chu, i duh leh pu Dina thlarau zawng la inzawmna siam pui rawh” alo ti hluk mai.

Mawii thusawi pawh a tâwp chata “Mi thihna khatiangin lo hmang ṭangkai suh, suangtuahna mai a nih chu ka sawi, suangtuahna neih chu a thiang alawm” a sawi dik chiah, suangtuahna chu a nuama, a hlimawma. A taka kan tawn loh zawng zawng kha chu suangtuahnaah chuan a thleng veka, natna leh lungngaihna in hmun an chang ve tawh ngailo, suangtuahna tello chuan mihring nun chu engmah lo mai ani.

Kan suangtuahna avângin hma lam hun êng takin kan thlir theia, suangtuahna avâng vêkin kan lungngaihna leh buaina zawng zawng rengin ataka kan ta ni ngai  rêng rêng lo nên khân suangtuahna ah chuan kan lêng dûn ṭhin a, a taka min ngaihsak ngai rêng rêng lo tu in chu kan suangtuahna khawvelah chuan min ngaihsak in min ngaihlu ber tlat a ni. A tak ram ai chuan kei ngei pawh hian suangtuahna chu ka thlang ngei ang chu.

“Chuvang em ni thawnthu i ziah? I suangtuahna mipa kha chu engtikah mah i tawng lo ang. Mipa perfect lutuk hi nang ni thawnthu ziak leh chhiar ho chuan in zawnga, thawnthu a mi ang tur in zawn nân tam tak chu an lên tar phah hi, sim hmak rawh. I hmuh hmuh neila i ni hlawh zâwk ang, vawikhat pian ve naah pitar virgin nih chu a hlâwk lo khawp ang” Thantea chuan a rawn ti leh fak faka.

Mawii chuan a chûm nghal awk mai “Ṭawng thei viau suh aw, duh leh kan virgin thi ṭhak anga a nimai a lawm, pasal nei kher rawh u tih inziak a awm lo” a lo ti ve leh “Inthlah pung turin min ti tih kha i hria em? Lêng tar rawh u tih pawh a inziak lo” an inhnial leh char char tawh, pathum te lek e tilo in kan bengchheng êm êm ringawt.

He mite pahnih hi chu an in mil lo mah mah nge an in mil mah mah zâwk ni. Kawngtluanin hah pawh an hrelo, an inhnial tluan parh mai, ṭawng tawh lo in an pahnih thusawi chu ngaithla in ka lo nui leh hak ṭhin. A châng leh an in sual leh pah bawk, kawngkal chu sâwt lêm lo tak a ni.

Khua kan thlen meuh chuan a lo reh duaka, u Rinpuia te in pan hmasak ka duh avângin chulam pan chuan kan kal a “Zo, inthlâk ila mitthi in lamah kan kal ve nghal ang chu, in lama khawhar awmpui tute ho kan buaipui angai ang chu, u Rinpuia te inah chuan pêng phawt la, ka rawn sâwm ang che” a tihchuan ka hnial lêm lo.

Inṭhen darhin mahni in lam ṭheuh chu kan pana, u Rinpuia te in ka thlen dâwn chuan an kawmchhak ani bawka, nutling ṭap rawih rawih chu ka hre thei, ka awm anuam lo riau bawk, mi ṭap ka hriat hi chuan keimah pawh hi ka lo hrehawm vek thei, in chhung ka luh chuan a nu chiah a lo awma, a lo buai viau lehnghâl. Han koh mai ka tuma, a hming ka hre miah lo, a va han buaithlâk tak. Ka koh loh chuan min hmu mai bawk silo, ka aw chu ka thian ta ringawt a.

A ni pawh rawn hawi chhuakin min rawn en a “Eeee in lo thleng tawh elo? Lo ṭhu rawh, vawiin chu a zia lo hle mai. Hun pawh in hmang nuam hman dâwn lo a nih kha, mi chhiat tawha lo intihhlim lah kha a mawi siloa” tiin min be sawk sawka.

Ka bag chu la thla in kan Chakai man kan funkhawm chu ka pe a “Kha u Rinpuia man mi a nia, ka haw phawt ang aw. Khawhar in lamah kal ve ka duh sia, in tih fai hmasak ka duh sia ka kal phawt mai ang” tiin kawngka lam chu ka pan zuia.

“Aw la ve la, keimahni chauh chuan kan ei sêng nâng, la ṭhen rawh.” a rawn tihchuan ka lu thingin “A ngailo mai, ka buaipui hman dâwn chuang lova, tui ti deuhin lo ei rawh u” tiin ka chhuak luia, chak deuh tak chuan ka in lam chu ka pana, ka thlen rualin kawngka chu hawng sawk sawkin ka inthlâka, towel nên chuan bualin lam chu panin ka in bual nghal zung zunga.

Ka zawh rual chuan inthlâkin t-shirt dum chu ha in ka sam chu ka tawm tawpa, “Zo i hman em?” Mawii aw ka hriat rual chuan chhâwn vatin ka chhuak zuia, pawndum ka keng chu a lo ṭha ngei mai, hetiang nikhûaah hi chuan bih ngei hi a mawi ka ti.

“Ka hman e kal ang” tiin kan chhuak zuia, “Taka Mawi, u Rinpuia nu hi engtia koh tûr nge? A hming ka la hre miah lo a nia” ka ti chu a kawngkal chu dingin a rawn nui vaka, a hmui chu a hup lehnghâl vat mai. 

“I va han dangdai ve tak, i bialpa nu hming pawh i hrelo a nia, a common lo ṭhin nu Asâng” timai rawh. Chutiang hlir chuan kan ko ṭhin, kal vat ang a tlai pâwl kan ni dâwn a nih hi” tiin hma chu a hruai leha, mitthi in kan thlen chuan pitar putar pawh an lo awm nuk mai.

Inchhûng chu an khat veka, nula ho chu an lo che mawlh mawlh bawk. Ka rinai mi an tam daih mai, Mawii nên chuan thingpui lum ho awmna lamah chuan kalin an lo lum so tawh avâng chuan a sem tu ah kan ṭang zuia.

Kan buai ve viau mai, ṭhenkhat erawhin min en duh bawk nen ka chê an ti khawr ṭût mai. Thingpui sem zawh meuh chuan ka kal kual nân ka chau ve hnawk mai “Tirawh ṭhu phawt ang, nakinah an inna noruak chu kan seng dâwn ania, tlêm te te a khâwm chu a buaithlâk” tiin ṭhutthlengah chuan a ṭhu zuia, a bulah chuan ka ṭhu ve bawk.

Khua a lum bawk nên ka in zâp pah hauh hauha, ka thlan chu ka biangah a luang zaih zaih bawk “An hmu tawh a ngem le?” midang hriat loh tur chuan ka zâwta “Ka hrelo le, tui tlêm lai a nia an hmu vat chuanin ka ring, ka hlauhthâwn zâwk erawh a zawngtu lam aṭang an chesual palh ve ang tih a hlauhawm, lui lian phei chu tui tlêm mahse a khauhna lai hi a awm reng si a, a hlauhthâwnawm riau zêl” a tihchuan ka ngaihtuah dân chiah ani.

Rawn in hmu haw thei hrâm se tih ka ngaihtuaha, hman kuma mipa naupang leh a pa tui tla an hmuh har dân kha ka ngaihtuaha, a tui tla chhûngte hrilh hai dân tur leh a nupui rilru nat dân tur ka ngaihtuah pui thei, tûnah pawh a la ṭap hâwm hâwm renga, a pasal chu an in nghahna tak tak a ni ve dawn tih lah a chiang, ka khawngaih lutuk chu ka lung a chhe ve hial mai.

Chaw ei tûra kan haw dâwn chuan a zawngtute lam aṭang chuan an rawn call hlauha, ruang an hmuh thu an rawn sawi chuan in lama awm te pawh kan thaw huai hlawm mai, Mawii nên chuan haw in ka in lamah chuan ka pêng zuia, ka awmna hi ramhnuai a hnaih bawk nên kan hun tawn nên chuan thla chu a muang lo ve khawp mai.

Ramhnuai nên in tawk pha reng ang tak tak ka ni bawk nên mahni tê chuan in ngaihtuah hlauh a awl ngei mai, a mitthi hmêl ka hria pawh a nilo. Vawiin lama kan thil sawi vêl nen ka dawih zo vek mai, min awm pui thei tur ber u Rinpuia lah ruang zawnna lamah a awm daih bawk si.

An inah chaw ei tur kha nimahila a mah ber a awm lo bawk nên ka kal duh ta lo, a mah ber a awm chuan loh chuan ka zak. Ka chaw hmeh ṭhing chu chhuang lumin chaw pawh zînga kan chhumsa chu ka ringa, chaw eikhamah chuan chhuak leh nghâl vatin Mawii te in lam chu ka pana, khawlai chu a reh ruai bawk nên ka hmanhmawh viau.

An in pâwn aṭang chuan ka au lâng lânga, a rawn chhuak har lo. “Rawn lût rawh, thlêng ka sil lawka. Ka hman ṭêp ” tiin an inah chuan kan lût zuia, a nu leh pa chuan min lo be nghal bawrh bawrh mai, an nelawm bawka ka tlâng nel har lo, ka nuam tih leh tih loh te chu min zawtin fiamthu nên kan nui leh hak ṭhina. 

An rilru a zau chhungkua hle in ka hria, “Bawihtei nên hian inkâwm zel rawh u, a ni pawh a ṭhiante hmun dangah an awm zo sia tihian a mah hian a awm tawp zela, ṭhian thar siam hi a harsat sia, lo inkâwm zêl teh u. Nang i awm chuan a khua pawh a har lo deuh ang” a nu in a rawn tihchuan ka lo bu nghat nghata.

“Min kawm duh phawt te chuan, helaia a lo awm chu ka lawm a sin, keipawhin mi biak hmasak te hi ka hreh sia, amahin min rawn be hlauha, tûnah chuan hei ka mal tawh bik hleinem, hmelhriat ka la nei êm êm silova, mi kâra awm pawh ka inthlahrun phaha, mahse Mawii awm a chin chu a nuam ka ti teh a nia” tiin ka lo tui hnih vea.

A ni pawh a thleng sil chu a sil rei lêm lo, rawn lût thuaiin a rem mawlh mawlha “Puan bih tur kan la lawk ange, an rawn thleng har tawh lovang” a tihchuan ka lo bu nghata.

“Hmanhmawh la, nula che muang lutuk chu mi hmuhah pawh a mawilo, a thleng hmasa pâwl nih zêl tum rawh u” a nu chuan lo ti ve in an ni pawh ruang rawn thlen hunah rawn kal ve an tum thu chu a sawi zuia.

Mawiin pawh chu a rawn lang har lo “Kal ang” a puan bih pah chuan a ti a, a inchei miah lo a nih hmêl. Kei lêm ka inchei leh vek tawh kha a nia, a hmaiah makeup a hmang lo hrim hrim, ka zak zâwk rum rum mai.

“Zanin chu tlaivâr a ngai anga” ka tihchuan a bu nghata “Tlaivar ngei ngei chu a ngai ang, nu Rovi ka khawngaih ngei mai, a ṭap ri ka hriat te khân ka ṭahpui lo chauh, a fate a mah chauhin a enkawl dâwn chu a nimai sia” tiin an hawi kual zak zaka.

“Chhungte an neilo em ni?" ti a ka zawh chuan thawk la hakin “Khawdang aṭanga rawn awm a nia, a pasal chhûngte chu awm e, mahse hmeichhia chu i hria ang, kan fate nên chuan khawiah mah mahni in chhûngah ngei pawh kan hnawk tawh an tihkha” a thil sawi chu dik ka ti, nuthlawi hmuhsitna leh hnawk tihna te hi kan la pe na si a.

Engtin tak awm zêl ang maw?