LALHRIATPUIA CHAPTER 35

LALHRIATPUIA 

CHAPTER 35

THLA 5 HNUAH

“Lo che sek suh u, heti em em a harh Malsawmpui i pa ka nih hi" ka hma a ka pasal a fate diaper thlak tum a fate che kual peih lutuk avanga hak that tir hlei theilo phun mawlh mawlh chu nuih hakin ka pana, kan fate pawh an changkang ve tawhin a pa an hre em em mai lehnghal, “Hau vak vak lo la, kha an en kiau che kha. Khawi keimahin ka lo ti ang" tiin ka puia “An harh si, thla nga chiah a hetiang em em a harh mai" a tihchuan nui ar arin kan fate chu ka lawm a.

“I thusawi kha hre reng rawh, keiai enkawl nasat i tum kha. Khatianga i hauh reng chuan keimah zawk min duh daih dawn a nia" tiin Hluhlui zawk chu hnute ka pe a, Sawmpuia erawh a tawng tawnga rak ve in a pa chu a bana, ka lawm takzet. An hrisel chakin thenawm khawveng te pawhin an hawiher changkang chak lutuk kha mak an ti fo a nihkha “An hmeltha takzet, a chang chuan fa kan nei mai hi ka awihlo fo thin. Mahse a tak ngei a ni bawk si" tiin Hluhlui zawk chu ka lawm a.

Hnute hnek pah chuan a rawn nui hek heka “Ka fapa hi chuan min ti chau, a harh si hetiang mipa ka nih awm pawh ka hrelo. " a tihchuan “I school kallai ka hmuh chhunah pawh khati kha i nia, a chhun che a nihkha" ka tihchuan a hmui tipawrhin ka biangah chuan a rawn piai vaka. “A tai tai tai, a pai pai pai" a fapa tawng dan a zir chuan Sawmpuia lah chuan a en kar lehnghal, chutah an pafa a an inlawm tawng dun nasa lutuk chu nui chungin ka en a.

An la inkhing tawk dawn khawpin ka hria, pakhat lah hian ka fate an nih hi ti a tlawm mai a tum dawn der silo. Kan in kan luah lut tawh bawk nen tunah hian khaw field ah Hriatpuian hlawh neiin football a train thina, a khat tawkin Mumbai lamah a chhuk zeuh zeuh bawka. An couch te pawhin an hrethiam hle a nihkha, keipawh ka zirtirtu hna zawm leh tawhin kan fate pawh ka hruai mai zela. Nunkimi leh Sangsangi bakah school naupang ten an lawm bawk nen ka tan hruai an hahthlak lem loh.

Hnute ka pek chhung leh an class lak chhung a nih loh chuan ka chang ngai meuhlo, class ka neih chhungin min lo awmsak ve mai zela. Tiang khawpa thian fel leh thawhpui nuam ka nei hi ka lawm takzet, Hriatpuia pawh in football chawlhsan chhauha, helamah dawr siam bakah a mahin football zirna tur hawn a tum bawk nen kan inkhawl lawk nuala,  kan nu leh pate ho pawhin sum thawh ve an tum bawk nen kan tan chuan thu lawmawm lam ani.

Khua hi a lian ve tawh bawk nen zirduh khawpui lam atang pawhin an awm nual a nihkha. Keimah avanga football a chawlhsan leh mai tur chu phal lo viau mah ila a mahin a duh miau bawk nen ka dang theilo a ni ber. Ni e training duh an awm nual bawk nen kan hlawhtling thei a nihchuan kan chhungkua in enkawlna tur chu a daih dawn hle tih ka hria, a theih tawpin hna a thawka. Vawikhat pawh thinrim in min la be lova, kut pawh min thlak hek lo.

Ka tan chuan pasaltha ber a ni ka tilo theilo, zu a in ngailohna hrim hrim pawh hian min tilawm bawk. Dina te ho pawh an rawn haw changin an rawn kal ziah thina, Hriatpuia football training na tur hawn tum chungchang vel an hriat phei kha chuan an phur hle a nihkha. Zira erawh zir peih tawh hek lo le, lo neiin sawhthing a ching a, ala phur em em leh ta nghal. Ni e tunangah chuan sawrkar hna tam tak aiin lo neih hi a hlawk tawh zawka.

Mi thenkhat thingtlang mi hmuhsit ching tak tak ho hian an tluk kherin ka ringlo, nisa hnuaiah thlan tla zawih zawih in an eitur an thlo chhuaka, an taima viau zawk. Chutih rual erawhin thingtlang mi zawng zawng hnathawk erawh an awm bik chuang lo, hmeichhe kut hno hler hlur lo feh ve chhuna kut tilang ngeia post, miin min fak rawhse ti a in post hman reng an awm ve bawk. 

Thla lak loh tur chu ka ti lem lo, mahse kan kut no leh no loh atangin hnathawktu kut chu a hriat thin. Thenkhat lah hian midangin an thawk ve lo emaw tiin an han post darh vaka, chutah an hnathawh aiin an hmeltha tihzawng an nih vang a la ni hrim zui, tun ang lai kan thil thlir dan hi chu amak sawt khawp mai. Hmeltha kan hre hlura, hmeltha kan tih loh zawng kan hmusit leh em em a.

Mahni hmelah thu nei thei ni ila tumahin mi hmelchhe tih tura awm an duh bik lo vang. Mahsela siamtu siam dana lungawi thei mite hian nun awhawm tak an nei thung. “Min ngaihsak hun" ka bulah chuan rawn inthawlh thukin min kuaha, ka hmuiah chuan a fawp nghal zat “Bawihtea te an mu tawh em ni?" ka tihchuan a bu nghata, a duh ka hriat em avang chuan dang duh lo in phur tak chuan ka lo chhang leta.

Ka sira a rawn mu thla chu a biangah chuan vuanin ka chul heuh heuha “Kan couch khan chawl lo turin min duha, nupui nei chung pawhin thui tak a kal theih tih vel a rawn sawia, enge i ngaihdan. Kei chuan nang leh kan fate bak hi ngaihtuah vak ka tum tawh lova, mahse i ngaihdan apiang ka pawmpui che a nia" a rawn tihchuan ka nuih var vara “A that nasat chu, keichuan inkhel reng la ka duh. Nakinah kan faten an pa hi ram tana a thil tih hi an hriat ve theih nan, chubakah i tuina ber a ni a. Keichuan ka dang dawn lo che" tiin a samah chuan ka tham sak neuh neuha.

“Khel reng la ka duh, i duh ang takin i awm hman lo ang tih ka hlau, chuvang chuan keini min ngaihthah miah silo in khel char char la ka duh, i inkhel ena i pet goal ka hmuh hian ka thinlung takin ka lawm thin, a chhan chu mi tan ropui tehlua lo pawh nise ka hmangaih ber hlawhtlinna hi ka lawmpui zel ang che" tiin ka hnaih sauh sauh va, a hlim hmel chu ka hmuh hmaih lo. Ni e kumhnih tha em pawh a la inkhel lova, a bansan leh mai kha ka uipui vang a ni pakhat.

Keimah avangin pa dinhmun a chelh nghal si a, a hnenah sawi chhuak ngai lo mahila chhungril lam atangin inthiamlohna ka neilo theilo. “Ka lawm e, ka hmangaih che " tiin ka chalah chuan a fawp vang vanga. A mutthilh takah chuan tho chhuakin in tihfel ngai ho chu ka tifel zung zunga, kan fate avangin in pawh zan tlai lo ah chuan a tihfel theihloh. Ven reng an ngai bawk nen phir an ni leh zel bawk sia, kan buai zual lo theilo.

Ka zawh rualin in bual leh phawtin ka mu zuia, ka chhungte nen pawh tunah chuan kan in ngeih tawhin ka pa ngei pawhin zu a thlah a, nimahsela kha chen a lo in tawhna khan effect neiin a pum ana ta fo mai. Ka nu in a damrei tawh a rin loh thu a sawi thin chuan ngaihtuahna a luah lo thei thin lo, zu hi chu a tha lo in chhungkaw kehdarhna hnar a va ni chiang tak em. A in nasa telah dam rei tak ka la hre hek lo.

Chhungte tan mi kara inkiltawiha min awmtirtu a niin, zak takin kan kun fo phahna a ni si. “Lalhriatpui titau tel ve ziah suh " an pafa thumin an awm tlang thapa, Malsawmpuia lah a tahbelh narawh. Hauh a hre lutuk chu ka ngei lam lam, ka fanu erawh a fel hlauha a zia, mipa pahnih titau leh sual lutuk hi an hahthlak “Pa i ni tawh, ti tau reng rual pawh i nilo" ka tihlai chuan “Ka duh leh ka titau ang, keilo pawh thenawm pa Rina pawh a tau ziah, chumai nilo a nupui ai a mah a tlan thin ve tho" a tihchuan a lu ah chuan ka kuk tawlha.

Thenawmpa el chi pawh nilo, a sawi ang tak takin kan thenawm te hi an nu tlan lo in an pa zawk hi zuk tlan zawk thina. Mi mak tak an ni ve in ka hria, hmeichhe ina awm vang a ni pakhat ang. “Chung chu el chi pawh an nia mi, hetiang reng chuan ka tlansan ve ang cheu" ka tihchuan a rawn zuang tho nghal zawka “Khatiang sawi leh vaih teh, i awmna apiangah kan awm zel tho vang. Sawi pawh sawi chhin suh, khawi leng ang u " tiin kan fate chu pawmin pawnlam a panpuia.

“Tihtauh ve apiangin mi hau ziah mai, duat pawh ka dawng ve theilo" ti a la phun bul bul hnungah chuan nui sen senin ka zui ve zela, min hmutu ho chuan min lo be nghal zela, kan fate an lawm hlawm bawk nen naupang ho chuan pawm an rawn ngen leh nghal sap sapa “Kan leng dawna, kan rawn haw hunah in rawn awm dawn a nia aw" tiin an luah chuan ka tuai sak zauh va.

Naupang hi an lawmawma, an rilru thianghlim takte hi ka awt thin, puitling zawng in er leh in sawisel chak reng rengin kan awm a ni si a, nutei te inah chuan lengin kan ti ti nak naka, Hriatpuia pawh vaihlo an chil tira, a changa rap piala a pai leh nawk thin chu kan nuih leh thin “A her na te hi awm se a tha tur a nia, a va han chauh thlak tak em" ti a phun bul bulin a chil zel tho va.

“A ru tui teh a nia, i zuk duh ve tho kha chil hle hle teh" nutei chuan tiin a nui zui hak haka “U Tha, Sawmpuia hi a sual bik lutuka" Nautei rawn lut in a tihchuan ka laksak vat “A pa a chhun lutuka, tahbelh lutuk mai khawi Hluhlui kha va buaipui rawh, Bawihtea hi chu ka bulah awm mai rawh se" tiin Malsawmpuia uar lutuka tap chu ka hnute ka barha “Ka tah belh ziah lo, tikhan min ti bik suh anu a chhuna, a sual lutuk a nihkha"a rawn tihchuan chhang duh lo in Sawmpuia chu ka lawm pah paha.

Tap rei duh silo hian a tap tam em em thung hi natna a nei emaw tiin damdawiin hial kan kal puia, a that vek thu min lo hrilh khan ka thaw huai a nihkha. Tunah chuan a sual ve hrim hrimah ka ngai tawh, Hriatpuia vaihlo chil zo chu bathroom lamah lutin a intifai a “Ka rin ai daihin a lo puitling reuha, Makpa nih dan pawh a thiam khawp mai, a naupang zawk bawk nen khan i pa te nen pawh kan hlauhthawn pui deuh che kha a nia, mahse hei khua leh veng ho pawhin puitling an tih thu min hrilh ta fo mai" ti a nutei thusawi chuan min tilawm veng veng mai.

“Ni e ka rin loh dan deuhin a awm thin, a ti tau ve fo va, mahse ninawm khawp leh thinrimna tur ang zawngin a awm duh ngai hauhlo. Malsawmpuia sual lutuk zan tah pawhin amah hi ania ka rin deuh zel, ka thlang sual lo hi ka lawm. Ani ang hi chu tun anglai mi ah chuan an vang tawh bawk nen, u Chhana ka ngaihtuahna zawng zawng a ti bo vek thei lehnghal, mipa danglam tak a ni" tiin ka ngaihdan dik tak chu ka sawi chhuaka.

Nutei pawh chu a lo bu nghat nghata, Hriatpuia rawn chhuak chu kan bulah a rawn thu a. Tv a on nghal zat “Engtik nge khulamah i chhuh dawn?" nutei zawhna chu rawn chhangin “Thlaleh lamah a niang, ka chawl ve rih deuh ang chu. Kan fate an sual si a, Taitaii choh chuan a chauh pui lutuk ang" tiin inkhel chu a en lehnghala, a meng nur nang mai, Nutei pawh chuan zawhna zawt duh lem lo in Bawihtea chu a rawn lawma.

Malsawmpuia pawh tap zo chiah e tilo chuan a nui leh iar iar tawh mai. Han hah pui viau mahila nun tihlim tu ber an ni lawi bawk si lai hi fate lo danglamna a niin ka hria. Nu leh pa tan hian hmangaih an lo na bik ngawih ngawih, nu ka nih takah chuan ka nu leh pa ngaihtuahna tur awm ang ka hrethiam ve ta in ka hria.

ZAWMNA 

Ni leh thla an liama, Hriatpuia pawh inkhel turin a chhuk leh ta bawk. In lamah training a neih reng tho avangin an hruaitupa pawhin kan nau nei hlim nen a hrethiam viau a nihkha. Thlahnih te zuk awmin a kar lakah a rawn haw thina, lungawilohna ka nei lemlo. A fate nen min chawm theih nana a theih tawp a chhuah zia ka hriat pui miau a, amah avangin a khat tawkin kan chhungkaw pic chu media lamah an post ve reng a.

Mi hriat hi duh em em lo mah ila Hriatpuia vangin kan nilo thei silo, milar nihchu chapo a awl bakah hmang thiam lo nihchuan nun chhiat phahna a ni in mite sawisel kan kai nasat chhan a ni ka tilo theilo, tunlai kan mizo milar tam tak chu chapo tak tak leh mahni in duh tawk lutuk kan ni a, mipui te lahin kan sawisel reng bawk nen. A then te phei hi chu mipui in an bawl at avanga nundan mak pui pui nei an ni berin ka hria, an video kan theh lar saka. Kan youtuber thenkhat lahin an sum hmuh nan thup sak lo in a post chak ber ber an ni bawk si.

Mizoram hi chu a tha lam aiin a chhe lama lar nan a hun kan hmanna hian a tireh hman lo a ni ber, chuvang chuan keini pawh hi miin min ngaihven lutuk lo se tih hi ka duhdan a ni. Tam takah milar chhungkua chu miin an hmu sangin an theih phak bak ti thei tur in an ngai tlat bawk nen chung avanga ka fate hma hun a chhiat hi ka hlau a ni ber mai. “I va han tahbelh em em ve, Malsawmpui i nau zawk pawh a tap ngailo, tap reng suh " tiin ka vin deuha.

Min en kar leh tawh hi, nau phakar lutuk. Tu hi nge a chhun dawn ni, a tahbelh em em a. A luhlul leh em em tho bawk si hi ka hauh ngunna a ni, thla 9 na lekah duhtawk in an tlan thei tawha. Ka lawm viau mai, tunah chuan an taksa te lutuk kha rawn lianin an thang tha in an chak tha phian bawk nen mi lawm lah an hlawh narawh, vah chhuah hi chuan thil pe tu neuh neuh kan nei ziah mai.

“Taitai ka lo haw a nia, i fapa i hau nasa lutuka i pasal rawn haw pawh i hre lo a nimaw" tihri a rawn chhuah na lam chu ka melh vat. Hriatpuia lo ding nui var var chu panin ka kuaha “Ilo let hma hle mai " ka tihchuan “Rawn haw vat ka duh sia, kan elpuite kha an inhnuk dawk hlauha. Chubakah tun bak chu inkhelh a awm rih em em lo ang, chawlh kan la ve dawna " a tihchuan ka bu nghat nghata.

“Fate u min lo ngai tawh em" a fate lam pan chuan a pena, an ni pawh chuan apa chu an hnaih vat mai “Apa, apa" ti a an inkoh chhawk teng teng chu a ning leh si nge “Ninawm, lu in ti hai khawi khumah infiam ang u, au zawm reng loh tur " tiin a luhpui zuia, a bag chu la in ka zui ve nghal vat. Khuma an pafa thuma an infiam chu ka ena “In pa hian ka ngai tawh lutuk cheu a, ka lo haw a nih hi aw " tiin a fate chu a dek nui iar iara.

Ding chung chuan nui var varin ka thlir reng ringawt. A fate a awm peiha, keiai mahin a pa bula awm nuam an ti zawk, mahsela a pa in a tih thinrim chuan ka bulah an rawn tlan vat zel thung. “Ka fate hi chuan min chhun a nih hi" ti a nui huah huah chu panin “Ni e a pa ang maia tahbelh fapa kan neia, a tha khawp mai. A pa pawh then dawn a piangin a tap kha a nia" ka tihchuan min rawn kuah thutin khumah chuan min pawt mu a.

Ka au that mai, kan fate lah chu an lo au chul bawk nen kan bengchheng leh tawh viau. “Ngeiawm lutuk" a rawn tih hluk chuan ka nui har har a “A nilo em ni, i thinrima kalsan tum che leh i mittui a nihkha i hman thiam em em " ka tihchuan ka chalah a rawn pen fawka, ka tuai nghal vut vut mai “Lalhriatpui, ana a nia aw " tiin ka chum pawp pawpa “Kan fate hmuhlai chuan kut thawh zawngin infiam lo teh ang, keipawh ka nu leh pa intibuai lai ka hmuh fo avang khan ka tleirawl chhuah thlengin insual ka hrat phaha, nang i rawn langa ka sim ta chauh a, kan fate hian kan nun atang hian thil tha lo zirtur hmulo se ka duh" puithu zeta a rawn tihchuan ka hnial bik lo.

Ni e fate hi chuan nu leh pa chetdan hi zirin an thanlenna tura an entawn ber a ni bawka, nu leh pa inhau bur bur reng chhungkua atanga fa tha leh thu awih dim dem chhuak ngailo tih hrechiang turin atakin ka tawngin ka hmu miau a lawm “I ril a tam tawh em, ilo haw tur min hrilh lawk lo vela chawhmeh pawh ka siam hleinem, an tam leh Alu kan hmeh tlawng anga nimai" ka tihchuan a nui haka, ka pum chul dan dan chung chuan ka bengbulah a rawn phun sapa.

Chu chuan min tiza chiai chiai lehnghal “Le fate u chaw ei phawt ang u aw" tiin a fate pahnih kai chung chuan choka lam an pana, ka zep lo ka fate leh a pa hlim taka infiama inkai rial han hmuh hian a hmuhnawmin mi a hneh takzet bik in ka hria, an hnungah chuan ka zui zela. Hepa hi tinge a famkim em em mai le, tam tak tan chuan famkimlohna chu a ngah ang. Mahse ka tan leh a fate fan hian a famkim tlat bawk si.

Chaw ei ka siam lai chuan an pathum chuan an lo inchhaih pah paha, thleng an vaw ri leh bur bur tawh mai. Kan dan ve reng a ni a, chaw ei dawn hi chuan thil hman an thiam tawh bawk nen kan ri le lu zel, chaw eilai erawh chuan ngawi rengin an ei ve mial miala, antam kuang chu a pa an then tir pah bawk nen Hriatpuia meuh pawhin chaw a ei tha theilo, mahse a hmelah pawi ti hmel leh ning hmel hmuh tur a awm lo thung.

“Sawmpui i pa a puar hman lo ang, ei tawh rawh u" tiin Hluhlui zawk chu ka lo then sak mawlh mawlha, tawng la thiam em em lo mahse an hrethiam tawh viau thung. “Ama" ka lamah chuan a ban a rawn phara, ka pawm nghal vat. A u ai a pangchang nangin a fel viau thunga, hmeichhia nge nge hi chu enkawl an lo nuam deuhin ka hria. Kumkhat an tling ve tep tawh bawk nen tunah chuan keini pawh a hma ang chuan kan hah ta lutuk lo deuh.

Chaw eikham chuan an unau khumah chuan mut tlan tirin ka zai saka, rei pawh meng lo chuan an muhil lehnghal mai. An samah chuan ka chulsak hliau hliaua “Nu leh pa nih hi hahthlak chang tam mahse ka fate hmel hian hahdamna leh chakna min pe thar thin" tiin Hriatpuia kut vuan chuan ka tho chhuak taih taiha “Khawvela fa fel leh hmeltha ber an nih hi, zin san reng cheu pawh hi ka hreh thin, nitin an thang hmel hmuha, an thil zir chho hmuh hi a nuam em maia" tiin a fate chala fawp chuan room atang chuan min chhuahpui zuia.

“Tih tur kan nei tih i hria tiraw" ka bengbul chetah chuan a rawn phun sar sara, alamah inherin ka kuah nghal thak mai. Zah sit set kha ka tum tawh lem lo, nupa kan ni miau sia lawm. Khum lamah chuan min pawm phei nawl nawla, nupa nih tawh miau chuan a pawina awm tawh heklo, ka pasal duhdan chu ka zawmpui mai tur a ni. Ka sira a rawn leh thlak tap chuan ka nuih var vara “Nau ka pai leh nghal mai ang a " ka tihchuan a nui haka.

“A pawilo, upat tak tak hma hian sang chhuak teuh ila nakinah kan hahdam a nimai" a tihchuan ka nuih ve haka “Ni e, Pathianin rem a tihchuan kan hring zut zut mai ang chu" fiamthu nen chuan ka lo tuihniha, alama min pawt hnaiin min kuah nghal thuka, “Ka upa tulh tulha, ka duhzual tulh tulh che in ka hria. Tunah phei chuan putar ang mai niin ka inhria, ka mitah hian nang bak thlan tur an awm tawh lo, i fate nena min enkawl danah hian ka duhthu i sam hluah hluah,ka tha biangno " hepa over thei lutuk hi chuh.

“Over thei lutuk suh, mi karah te min ko riau riau ange keini aia upa innei an tam lutuk, khang chuan miin lutuk min ti ang" tiin a dul phiar fat chu ka khalh sak neuh neuha, a ni chu pa a ni tawh chung pawhin a pian a la nalh renga. Kei erawh ka dul rangin a kiar deuh luah reng mai, a nilahin chu chu khawih nuam a ti ve bawk. A chuar avanga nem thap chu khawih nuam a ti a ni ber mai, kan mut tawh chuan a khalh muhil thak thei.

“Aizawl lamah engtikah emaw remchangah kan la zin thla ang chu, a pi leh pute pawhin hmuh an chak tawh ang. Champhai lam pawh kan la kal dawn a nia, kan chhungte hi an awm darh nasa sia " a tihchuan ka bu nghat nghata. Ni e hetah kan awm daih bawk nen kan chhungte hian bawihtea te unau hi an pawmin an lawm khat hle a, video call bakin an inlawm pha meuhlo.

Keipawh zirtirtu nimahila ka nau pawm nen tumahin min phut lutuk lo a, ka kal chang pawhin ka nau min lak chhawk ngei ngeia, ka hahdam phah viau mai. Khawpui lam ai thingtlang lamah hian mizo tlawmngaihna hi an la chhawm nungtha ka tilo theilo.