LALHRIATPUIA CHAPTER 33

LALHRIATPUIA 

CHAPTER 33 

“Then turin kan ti che sia" Hriatpuia nu leh pa chu kan hmaah an ding ran mai. Hriatpuia pawh chuan min chelh ranin a nu leh pa thu chu zawm a tum loh thu a sawi ve zat bawk. “Lalhriatpui engvanga he hmeichhia hi thlah thei miah lo nge i nih? Ani aia tha an tam lutuk" a pa zawk chuan a tileh hrawka. A nu erawh a tawng lo hrim hrim “A chhan chu maw ka hmangaih a ni, ka nu i hmangaih ang chiah khan ka hmangaih, ka hlawhtling a nihchuan ka duhthlanna min zahsak tur thu in sawi kha" Hriatpuia chuan a ti ve hmaka.

“He nu kher lo pawh hi an tam a sin, i thlang lui leh a nihchuan kan tuithlar ang che" a tihchuan a nu zawk chuan insum turin a lo ti vata. “A pawi lo ka pa, ka hmeichhe hmangaih in pawm theih loh ai chuan a tha a lawm, ka fa a fahrah ai chuan a pa hi fahrah zawk mai rawh se. A nu leh pa kan awm dawn tho a lawm, keichuan khawvel hmachhawn dan leh ka nupui fanau enkawlna tur ka thawk ve thei tawh a lawm. I puihna ka mamawh bik love" tiin min chhuahpui a tuma.

A pa in a rawn koh leh a vang chuan ding datin kan inhera, keimah vanga a pate nen a an buai fo hi ka inthiam lo takzet “Awle a tha e, in innei thei ang. Mahse ka fapa i ko a mawhphurhna kha i hlen ngei tur a ni, in inhmangaihna kan hmu fiah ta e. Kan dang tawh lo ang che u, i nu nen hian i la nau bawk nen i hmangaih nilo i then leh mai mai tur i nei ang tih kan hlauhpui vang zawk a nia. I lerhsan leh mai mai tura nupui i neih kan phalloh vang zawk a ni e" a rawn tih takah chuan ka tah nuih hak mai.

Ni e keimah zawk min lo ngaihtuah vang lek alo nihchu. Hriatpuia aia ka upat avangin min kalsan leh mai an hlauh vang zawk a lo ni tih ka hriat chuan ka lawm lo theilo, tunah chuan kan chhungte ve ve in an rem ti ve ta.  Chu chuan min tihlim takzet, Hriatpuia nu leh pa chuan malsawmna min hlan mawlh mawlha “Tunah chuan kan fapa lo puitlin zia kan hmu tawha, thlamuang takin awm tawh rawh u. In inneih niah chuan kan lo kal ngei ngei ang" tiin min thlah zuia.

Hriatpuia nen chuan nui var varin car lam chu kan pana, tunah chuan kan tuar tang tang na leh kan beih tang tang na rah chu sengin hlim takin kan awm ve thei dawn ta. Mumang te a ang rum rumin ka hria, in kan thlen rualin inkuahin kan in nuih dun sen sena, naktuk lamah Dina te ho pawh an rawn thleng khawm dawn bawk nen thianho kan han inhmu khawm leh tur chu ka phurlo theilo. Kan inneihna tur hmun pawh siam fel vekin kohhran hall ah kan innei tha dawna.

Dan khatna tlin lo mah ila amah nen kan inneih hrim hrim chuan ka lawm tawk em em tho. Duh chuan dan khatna chuan kan innei thei dawn tih ka hailo, mahsela midang buma Pathian hma a thil sual tihkha ka duhlo, kan mualpho tawh tho tho a. Kan nihna dik tak anga lan mai hi ka duh zawk, ka inneih kawr tur nen lam kan lei vek tawha. Ka pum a ni tela rawn pawng ve tan det det chu enin ka hlim ve em em ringawt.

Dina te ho rawn thleng chu an bengchheng leh nghal luai luaia, Zira leh Hminga pawh a ngai te bawkin an inhnial leh tawh. Roland leh Dina erawhin ka naupai vel chu min zawtin hming phuah an inchuh lehnghal zat, eng ang pawhin lo ti lawk mahse an phuah dawn chuan loh avangin ka nuih liam mai maia “Nupui vawihnih ru pa chu khawi maw, a ngai tho nei ve leh tur siin i tlanchhe dawk dawka. Min rawn tlawh ve tur cheu lawm, Aizawl ah kan awm tih in hre renga" tiin Hriatpuia sekah chuan an hnek dat data.

Ka lo nuih hak hak ringawt “Miss chu i nalh tulh tulh maia, hei vang a nih hi Hriatpuia pawhin hmeichhe dang melh reng reng a tum loh. In inhmun tur pawh vc te kan dil fel tawha, inneih zawh lamah rawn chho mai ula a tha ang. A theih phei chuan sa tan nghal thei ula, keini pawhin sum lamah kan pui thei ang cheu chu" Dinan a rawn tihchuan ka lo bu nghat nghata “Sum lam kha chu a buaithlak loh, ka nu leh pa te bakah kan hlawhin kan inchhawr thei a lawm, ka teacher hna kha ka la chawlhsan bik hleinem, an mahni lamin min rawn bia a. Kan ei khawp tur chu kan vai bik nang" tiin ka sawi ve sapa.

“Ni e khuaah kan awm dawn a, Roland hi mistiri ah in hmang nghal thei ang.  Ani a tuina lam a lawm, keini pawh kan rawn haw zauh zauh dawna, thian ho a inhmuh khawm a khat ta riau mai. Zanin chu kan inhmuh khawmna pualin ar kang ang u" tiin Zira chu a rawn phul hluta, midang pawh chuan an lo pawmpui ve tliar tliar bawk. Ka nute in lamah awm rih duh viau mah ila an mahni lam an buai bawk nen tihian kan awm tlang ta tawp chu a nia.

Zanah ar kangin sting vel nen chuan kan hmeha, zu pangngai an in ngai lova. Hei hi an thianho ka ngaihsanna a ni bawk, tun ang lai tlangvalah zu in lo a bar pawh an awm loh laia an ni thian ho rui hmuh tur awm lo hi chu an chhuanawm ve thlawt a lawm. Ar sa ti chu ka ei hlak hlaka, ka riltam reng mai nen Hriatpuian fridge ah ka eitui min dahsak sa vek zela. Thil ka ei thei bawka ka taksa chu a thau lam lek lek a niin ka vun pawh a nung surh mai bawk nen miin nalh min tih thu min hrilh ta fo mai.

Chung lah chu Hriatpuia huat tawk a tling ziah lehnghal. An thian ho chuan an chanchin in hrilhin an nui leh dar dar thina, khap ka tum lemlo. An inhmu lo rei bawk nen an peih chen chen meng teh se, ka mut a chhuah tawh avangin room lamah ka luhsana. Tawngtai hmasa te te in kan hlimna chu min laksak lo turin ka dil mawlh mawlha, ni e buaina leh harsatna kan paltlang tam tawh bawk nen tawrh leh ka zuam tawh lo a ni ber mai.

Inneih ni chu lo thlengin zam zet hian Hriatpuia nen chuan kan thudun khara. A ni erawh a phur hmel lutuk chu a zahthlak lam mah a ni, pastor in inneih thutiam min chham tir lai te chuan ka khur dar dara “Mahni tihsual hria a an kal ngamna hi ka ngaisang hle a ni, tam tak chuan Pathian leh kohhran hmaah dawt hmang in an innei fo va, tuna mite erawhin an tihsual ang ngeia dan hnihna a an innei ngam hi a ropui ani" ti a thu a sawi lai te chuan ka lo lawm ve em em ringawt.

Ni e tam tak chuan chesual reng chungin dan khatna a inneih phet tumin an awm fo thin. Mahse kan bum theiloh Pathian a awm tih hi hriatreng tur a nia, inneih zawh lama inlama programme kan siama young fella leh smiley ka hmuh chuan ka au deuh hliai a “Hriatpui Young fella leh smiley ka hmu a nia aw, awi a nuam e" ka kut chu bengin Hriatpuia chu ka ena, a lo nui var var mai “I tan liau liau ka sawma, an zai dawn a lawm. Mahse a dang erawh thuruk" tiin nupa bik thutna turah chuan kan thu dun rana.

Dina te ho in hla min rawn sak sak chuan mipui lam chu an nui dar dar mai, ka rinai daihin rawn kal an tama. A football khelh pui te chenin ka nu leh pa leh a nu leh pa chenin, kan inneih ni a an awm chuan min tihlim takzet. Chutah Hriatpuia chu chhuak daihin Young fella te chu an rawn ding chhuaka, hla sak ve an tum chu mipui lam in an lawm viau mai. Ni e thawm an nei lian em a ni, chutah LEI LEH VAN tih ngei mai chu rawn sa in ka kut chu ka lo beng ve a.

Mipui pawh chuan kut an beng thuau thuau bawk “Engvanga min hmangaih nge i nih ti a min zawh chuan, hetiang biahthu di ka chhawn nang che " smiley zai zawh rual chuan Lalhriatpuian Mike nena rawn lut chunga “Ka chûn nunnemi iang thei khawpa fel, pianthiam sakhmeltha nang ngei hi i ni" ti a ka bianga a rawn piai chuan mipui chu an lo au dur dur a, heichu ka beisei piah lam a ni. An pathum chuan rawn ding tlangin an zaia “Kumtluang di a tan ka thlang ber tawh che a, Lei leh van ral hma chuan inthen lo'ng aw" tihchu an sa rual thap thapa.

Hlim zetin ka lo nui sen sen mai, hetiang hi ka beisei phalo hrim hrim an aw a inang tlangin an zaithiam takzet. “Famkim theih ni hek lo he lei hringnunah hian, in hauh thinrim chang a tam kan inkarah hian" chulai thuchuan kan nunhlui min ngaihtuah chhuah tir lo theilo, ni e buaina leh harsatna zozai kan tawh te. Kan pahniha Hminga te huan thlama kan tlan lai zawng zawngte, inthen hnua hmundanga a awm a ka ngaih thin zia te chu ka ngaihtuah chhuak lo theilo.

A hla chuan mittui lam lam a ti tla, Dina te ho pawh chu rawn chhuakin Hriatpuia chuan min pawt chhuakin kan lam duna, nui har harin vir kual chuan ataksa chu ka bawh chata, an lo au dur dur. An zai zawh chuan thilpek petu tur in ko chhuakin Hriatpuia nen chuan kan lo dawng dun zela, thilpek pawh kan dawng tam hle. Mite thatzia ka hriatchian phah bawk, ni e a hun hma in kan chesuala, a duhloh zawnga kan awm chung pawhin kan Pathian chuan min lo ensan ve ngai chuang reng reng lo.

Ngaihdam theihloh lah a nei hek lo, mitena an thinhrik leh hmuhsit pawh kha alakah erawh chuan mi pawimawh leh a fate kan nihna a bo ve ngai reng reng lova, min sitin min hnawl ve ngai heklo. Khawvel mite mithmuha hmuhsit awm leh misual ber pawh inchhira a lam hawi duhtu hnar ngai lo Pathian tha ber kan nei hi kan va nihlawh em. Zan lamah chuan chhungkua leh thiante nen bak kan awm tawh lova.

Ka nu leh pa chuan Hriatpuia nen ngaihdam min dil mawlh mawlha, Hriatpuia rilru thatzia ka hriat belh a ni ringawt “Ka pu, ka haw reng reng lo cheu ania. In fanu nen kan inkarah khati khawp khan awm lo ula tuna kan in hmangaihna aia nasa hian kan in hmangaih loh phah zawk ang, hmangaihna dik kawng chu a rual rem ngai lo an tihkha. Harsatna leh manganna te hi mi pahnih thinlung tichaka hrual puitling tu an ni zawk. Nang ni in lo rem ti mai ula kan pahnih khan in nin hun te pawh kan nei theia, mahse hei in zarah hmangaihna dik leh dawhtheihna te, rinawmna zawng zawng kan zir chhuah phah zawk a sin" tiin a nui ver vera.

“In fanu hi ka hmangaiha, tin hetiang khawpa hmeichhe fel leh tha, nunnem leh entawn tlak hringtu in ni hi ka lawm zawk a sin. Nang ni awm lo ula a piang kher angem? Kan intawng kher angem tih pawh hriat a nih loh hi, khang kan harsatna tawh zozai te khan kan pahnih hian min tinghet tawna, nakin hun zel thleng pawha inthlahlel taka min awmtirtu tur leh inthen theilo tur khawpa min awm tir tu an ni zawk a lawm. Tunah chuan inthen hrehawm zia kan hre ve ve tawhin ka ringa, a thlen nawn tawh loh ngei ka beisei, in fanu ka kuta min hlan phal avangin ka lawm e" ti a ka nu leh pa a biakna khan a hneh hle a nihkha.

Midang haw hnuah Dina te ho pawh an mu zui thapa, kan pahnih chuan kan nupa roomah chuan awmin kan titi dun sep sepa “Tunah chuan khawiah mah kan in pensan tawh tur a nilo, kan inkalsan theih tak tak loh zia kan hre tawn tawha. Kan harsat lai leh thinrim ber lai pawhin inthen rawt mai lo in i invuan tawn zel ang aw" ti a a thusawi chu ka buk pui nghat nghata.

Khumah chuan mudunin ka pum chu a chul hauh hauh va, tawngtaia kan dilna chuan rah tha a chhuah zel ka beisei bawk.

ZAWMNA

Dina te rualin khuaah kan let ve leha, Hriatpuia chuan inhmun te chu enin a sak dan tur vel an rel ho mawlh mawlha. Lian em em a sak kan tum lem loh avangin rei pawh sak a ngaih hmel lem loh, concrete vek duh mahse keimahin a ka duh vak loh avangin kan tiduh ta lova.A chhan pawh lirnghing kan tuar zeuh zeuh si a, a nghin nat phei chuan a tuarna tur ber te zinga mi kan ni dawn bawk nen chubakah ram changkang te tih ang deuhin thing tha leh nalh takin sa ila ka duh zawk.

A khawtlang deuh thaw in a hman apiangin min pui thina, Hriatpuia pawh a lawm thiam thei hle. Keipawh chu an bulah awmin thingpui velte ka lo luma, nutei ten min tawiawm bawk nen hahdam deuh zawkin ka awm theih phaha. Hriatpuia lahin ka naupai nen min vengthawngin hnarim leh hahthlak ka thawh a phallo a ni ber, achool ah pawh ka thawk leh tawh dawn a, tumahin ka awmdan avanga min sel tawh lovin tha takin min be ta vek chuan min ti hahdam huai bawk.

 

“Kan khua a teacher hna dil fuh ber i ni in ka hria, hei hriat loh khanah i zirlai hmeltha leh hlawhtling tur i thur chhuak nalha" ti a min tawngkhum tawk erawh awm mahse chhan enah ka en ngailo thung. “Ka chau lutuk" khumah chuan thu in ka thaw ham hama, ka ke kham ut ut chu chum in ka kun hniama “Khawi maw, mu teh ka lo ti ange " Hriatpuia chuan khumah chuan min mut tirin ka ke chu a hmet nghal zat. 

Ka naupai lian ve tan nen ka ke vung thin chu a niin min lo ngaihtuah chhawng veleh em em thin bawk nen min ngaihsakna leh duatna chuan min tilawm ve em em ringawt. “Hna pawh hi kal tawh lo mai la ka duh, i nau neih hun hnaihah phei chuan chawlh la mai ang che. Ka ngaihtuah che a nia, kan in pawh hei an sa zo tep tawha. Ka ngaihsak hman deuh ang che " a rawn tihchuan ka nuihsaka.

“Khulamah chhuh leh te i ngaihkha, min ngaihtuah suh hei nutei te an awm a lawm" ka tihchuan a nui deuh haka “Ka hna thlan ve hi i bula min awm tir theilo tu a niziaha, ka bansan leh daih dawn emaw ni. Tak takin helamah training na hmun ka hawn theih chuan chawlhsan leh mai pawh a pawilo, hna dang ka nei tawh dawn tho va. Khawtlang hruaitute pawh ka dil tawha, an fate tan an duhbawk nen bul kan han tan ve ang chu " a tihchuan a luah chuan ka tuaisak zauh va.

“I hna hi ram tan ania, hetianga awlsam taka i bansan leh mai chuan i thil tih te kha an thlawn vek dawn a sin. A tul leh khulamah i awm anga, keichuan helam hi ka lo enkawl thei tho ang, min ngaihtuah miah suh ka tihkha. Keimah avangin i nihtur ang i thleng pha lo ang tih erawh ka hlau viau thung, tihian nau ka pai leh mai si nen i thianten tha takin training an nei renga, nang erawhin min buaipui nan engmah i ti thei silo" inthiam lo zeta ka tihchuan ka bulah rawn mu thla in min kuaha.

“A pawilo, ka tuina chu lo tha mahse ka nupui hmangaih em em lak atanga min lak hrangtu a nih dawn ai chuan ka bansan mai ang, i kianga awm theih hi ka duh ber a lawm. I telloa awm hrehawmzia ka hre tawha, tunah chuan i telloa awm ka tum mai mai tawhlo" tiin ka chalah chuan a fawp vang vanga. “Ka hria a lawm, mahse rei ani dawn lova ilo haw leh vat dawn a lawm. I thiante pawhin an rawn be reng che bawk nen helam chu nutei te bakah i nîte an awm a, min ngaihtuah reng reng suh." tiin a kawngah chuan ka kut ka rawlh luta.

Mutthilh tum chuan ka chhing nghal siar siar bawk, zinga ka harh a ka tho chhuak chu ka putea te bakah Dina te ho chuan Miss Mizoram an thlan chu an lo en thap chu niin, Lalhriatpuia lo thu ve ka hmuh chuan tum hmakin “Khatiang en en suh u, Mizoram chuan Miss chiah kan in chher chhuak, chutah Miss Mizoram nungchang tha lo tak tak kan thlang fuh a, khatiang an thlan an thlan lai khan kan northeast puite chu upsc ah an inziak tlinga. Kan Mizoram ve chuan upsc aiin Miss vel mai mai kan la buaipui chu a nia" tiin ka phun hlak hlaka.

“Ni e a dik khawp mai, state dang chuan officer lian pui pui leh thil ti thei tak tak an neia, kan Mizoram erawhin changkanna tha leh hlawhtling zawk buaipui aiin tihian miss mi pasal chhuhsak leh mai mai tur awm ang te kan chher chhuak leh ang tih a hlauhawm, Miss leh model kan ngah hlura, kan northeast pui te chuan lehkha zir tauh tauhin hnasang leh tha, an damchhung daih tur neih tumin an bei a. An hlawhtling sup supa, chutihlaia Mizoram chuan Miss leh zaithiam, model vel emaw bak kan nei thei lo a nih hi maw. A ringtu ram nisi hian changkanna lam hawi lo in mahni taksa mawina lam kan hawia, India ramah hian sawrkar hnathawk tlemna ber kan ni hial awm a sin" putea chuan a rawn ti ve bawk.

Ka ngaihdan chiah a ni, hnamdangte chuan an ram tan theihtawp chhuahin an zira, Mizoram erawh a hminga lehkhathiam tamna, mahsela officer lian tak tak leh thil ti thei tak hmuhtur erawh tlem te bak an awm lo. Kan buaipui ber chu milar niha inlak kual vel a ni berin ka hria, hnasang tak thawk thei tura inchherchhuah aiin keini aia ram lian zawk leh hausa zawkten an tih thin Miss kan inthlang kum tina, zirna lama kal tam em em siin IAS, IPS tih vel hmuh tur kan awm tha thum meuh lo chu a nih hi.

Kan hmingthatna chhun hnamdang hmaah kan chhuang leh em em a, heng ai hi chuan India sawrkar hnuaiah hian hna sang tak tak thawkte hi nei fur ila hnam dang mite hian min ngaisang hlauh ang le. Kan mizo pui tlemte hlawhtling, an tumruhna leh huaisenna avanga India ram mai ram dang chenin a an hriat te kan fakin kan chawimawia, mahse an hlawhtlinna leh tumruhna ang kha put leh kan tum thin silo. Kan mihlawhtling neihte an chanchin a chhe zawng a awm deuh leh kan sel luai luaia, a hnuah hnamdangin han post se  kan lo fak leh luai luaia.

Hmasawn hi a har dawn hian ka hre thin “Chaw ei ang u, khatiang en mai mai lo khan" nuteiin a rawn tihchuan an nui hak hlawma. Chaw ei tur chuan an tho chhuak nghal thap thap bawk “Nu ho in min han hauh hi chuan kan tlanchhe duai duai chu a nih hi, Chaw chu i va ei teuh ang u hmiang, zo ar buhchiar ngei kha aw" ti a putea chu au lauh lauhin chaw ei dawhkan chu kan kil zui thapa. Tawngtaina nute in hmangin tawngtai laia Dina rawn rak thawt erawh chuan min ti dik lo zo vek.

“Aiah engah nge Hminglerh min sih ringawt" ti a a rawn au chhuah avang chuan nutei tawngtai lai pawh tawp chatin “Laldinlian tawng lo in i mit chhing hmak rawh" ti leh rihin a tawngtai tha leha, nuih rik ngam a ni tawh silo.  Kan awm hmunah chuan kan nuih insum chu kan taksa chhung lam atang chuan a ri leh awp awp thin, insum a har takzet. Nutei tawngtai zawh rual chuan insum theih tawh hek loh le kan nui chhuak nghal hawk hawk hlawma.

Dina lah a thiante chuan an hau pah mawlh mawlh mai “Engah nge min sih teh vei, Hmingluliana vang vek a nihkha" tiin a phun zui bul bul mai. An ni pawh Nautei nen an la ni tluang zel tih ka hria a, ka lawm viau Dina puitlin vang a nihpawh ka ring, an thian ho hi tunlai mipa ang lo takin an lerh lova. Pakhatah an rinawm thei viau hlawm mai, hei vang te pawh hi a niang an bialnute an hmeltha tlang viau mai.

Ni a liam leh chuan Hriatpuia zin tur pawh ka vai liam leh lauh lauha, a kal hma in thu min chah leh mawlh mawlh phawta. Mipa be miah lo tura min ti erawhin ka nuih a tiza viau, nau pai puar luah tawh hi tu in nge min bem ngam reng reng ang ni. Chakna an chan leh ngei ka beisei “Him tak leh i hnehna nen rawn haw leh ngei ang che aw Hriatpui, ka lo nghak reng ang che" tisapin inchhung lamah ka lut zuia.

Ka ngai nghal veng veng mai, tunah hian ka kiangah awm leh nghal mai se tihte chenin ka ngaihtuah, a tello chuan ka kim tawh lo a ni ber mai.

CHAPTER DAWT LEHAH TIH TAWP KAN TUM ANGA, CHUMI HNUAH AN FATE STORY NEN KAN CHHUN ZAWM LEH ANG AW, YOUTUBE LAMA PEK KA TUM DEUH AVANGIN KAN KUAL LO MAI ANG.