LALHRIATPUIA CHAPTER 26

LALHRIATPUIA

CHAPTER 26

“A vawt lutuk" luiah kan inbual duna. Ni a tla tawh bawk nen a vawt lutuk chu ka towel sinin ka khur bauh bauh mai. Hriatpuia erawh vawt ti ang pawhin a awm lo, a zai pah hlurh hlurha tui chuan a in leih miah miah mai “Ka lo kuah lum dawn che a nia" ti a a rawn hawi let zuk chuan “Inbual zung zung mai rawh, a vawt ka ti tawh teh ania aw, hetiang anga tlaiah vawikhat mah ka inbual tawh lo ang" khur hlak hlak pah chuan ka ti a.

A ni pawh uang duh tawh bik lovin a rawn phei thuaia, ka kutah kaiin hma hruai chung chuan chhoah chuan min pawt chho a ni ber mai. Keilah hmun rual rem lo deuh laiah chuan ka kal chak theilo bawk nen ka zai ngai tak chuan a kal ve zela, kawr atanga tlang pawng hmun thengthaw lai kan chhuah chhoh chuan a lo eng deuh uara. Kawr a zu thuk bawk nen a lo thim lutuk kha a awm lo lem lo.

Kan awmna kan thlen rualin mei chu ka chhem tha sawk sawka, ka ai nghal hauh hauh mai. “Lalhriatpui zai hlawrh hlawrh reng suh" ka sawi zawh rualin a rawn zai ring sauh va. Ngeiawm thiam ngat ngat tak chu a ni “Lirthei changkang leh sum tam neite thlang lovin, thil pek man tam leh hlu tak tak kha thlang lovin" tih te chu a rawn zai nawk nawka, tu sak nge pawh ka hre nek lo e a.

Ka bulah a rawn thua, kalsawn ka tum chu min kuah betin “Khawilam lanu nge maw i nih le? Tu hrai leng chawi nge maw i nih le, tiang renga ka dawn lungruk min tibuai tu ka tawng ngailo nang lo chu, aw Taitai aw Taitai i zunleng ngaih reng a na e" a rawn tileh hram chu hmui tipawrh in ka ner khum nawnga. “I ho emai, khatiangin min zaikhum thin suh awm tha teh" tiin namsawn ka tuma.

A duh thaklo “Tihian awm ang, ka thu anga i awm hun ka nupui i ni tawha. Ka duhdan i zawm ve angai alawm, khawi ka kuah lum ang che ka tih kha, kei neih engmah nei rihlo hi min thlanga ka lawm emaia ka fawp ral nawk dawn che emaw ni " a rawn tihchuan ka nuih hak. A bulah hi chuan a hlim loh theihloh, a lawmawm chi a ni hi keiin ka hlimpui. Hmeichhe tam tak chuan a naupang chhia pawh an timai thei, mahse ka nun nena inrem tura Pathian in min pek ka tilo theilo.

Ka pa avang hian ina ka awm chuan hlim tak tak lai ka nei khata, ka hun hmasa lo tawn tawh zawng zawng a ka lungngaihna te kha Pathian hian tawk a ti ve tawh te pawh a niang. Ka nun chawk hlim tura Hriatpuia min tawn tir ni “I kal na tur hmunah chuan i kal loh ka rem ti dawn miahlo a nia, innei chung pawhin sang tak a thlen theiha. I awm reng dawn pawh a nilo va, ka lo nghak zel ang che" ka tihchuan a ngawi rauh rauh va.

“Nia ka lo be tawh bawk nen nakumah chuan ka kal ngei a ngai ang le. Keimah vangin Christmas thingfawm pawh i tel thei dawn silo va, hrehawm i ti em? Dama kan awm chuan nakum lamah kan tel ngei ngei tawh ang tih ka tiam a che" inthiamlo aw zeta a rawn tihchuan ka lu ka thing nak naka, kan dinhmunin a zirlo ema a ni thiam loh a ni heklo. Keima thiam loh zawk a ni, ka pa ten hetiang in min tilo se chuan nuam takin kan hmang thei tur.

“Dina ten chanchin an lo sawi dan a zirin Christmas tal chu khawchhungah kan hmang dun ang chu. Tunah chuan kan fimkhur a ngai rih si a, inthiam lo miah suh aw keimah vang zawkin ramhnuaiah i awm phaha. Ka inthiam lo zawk" tiin a kut chu ka khal neuh neuh va, nui ver ver hian “A nuam ka ti daih zawk, nangmah i awma kei ka awm bawka, khawchhung ai a nuam zawk. Tuma chim buai loh in nang nen a thiang ten kan lengdun si a, awi aw ka nupui en chimloh hmeltha" a lu ah ka kuk nghal tawlh.

“Uang reng suh, cool raih te hian awm vela, thawveng lutuk mai Mawitei bawitlung ang chiah i ni" ka tihlak a, a nui vur vur mai. “Biak a nuam dawn a nihchu, ka lungngaih changin ka va be thin ang, mi thawveng tak chu misual a ni dawn lo tih a chiang" a ti deuh deuh lehnghal “A that chu, in pahnihin Kel in veng thin dawn a nia" ka tihchuan za lutuk hian a rawn nui hawk hawka. “An khua ah kan la zin anga kan va venpui ang chu, a story i chhiar peih bawka" engtin nge chutiang lam lam a lo hriat ni.

“I peih phawt a hnu, an khaw lam hi ka la kal lohna lam tak a nia ka kal chak, khawchhak lam tlangdung hi a nuam lutuk an tia; ka kal chak tak tak" ka tichu a bu nghat nghata. “Awle kan la fang vek dawn a nia, kan thawnthu te pawh kan la ziah tir ve ang chu" a tihchuan ka ngawi rauh rauh va “Kan hma hun hi kan hre silo va, chuvang chuan tun hun hi a pawimawh ber. Hlim taka awm hi ka duh a ni keichuan, buaina leh harsatna te hi tawk miah lo ila ka ti, mahsela kan tawk reng tawh zawk si a" tisapin a lamah ka in hera.

“Kan hringnun hi thawnthu a hlim taka an tawp ang hian tawp ve thei ila, a zawm zel tur awm lo in kan hlimlaiah hian tawp daih thei ila" ka thusawi hi ka ti tak tak. Hun a kal zel anga Hriatpuia hian min kalsan ve daih ang tih ka hlau takzet “Nilo e kan hringnun tak tak tur kan la paltlang chho dawn a lawm, engtiang pawhin lo awm mah ila ka nun leh ka hmangaihna awmchhun hi chu nangmahah chiah a tawp ang Taitai, nangmah bakin tawp i khar ngai chuang lo vang" a mal chungah chuan min thut tir a.

“Thil a lungchhiat thlak zawngin ngaihtuah lo la, ka bulah hi chuan i ha kha lang reng rawh se. Nui ro vek mahla a pawilo" nui tut tut chung chuan a rawn ti a. A thutak rei thei thlawt lo “Chutiangin dang ro in ka thi mai dawn a sin, thutak ve thin teh" tihlakin ka pum ri kuar kuar avang chuan ka harh chhuak kawka. Chawhmeh ka la chhuang lum reng reng lo “Min thlah teh chaw hmeh kan ti lum a nge" ka tihchuan min thlah ve mai bawk.

Kan chawhmeh neih ang ang chu tilumin zanriah chu kan bar zuia, tih tur a awm em em lo bawk nen mut tawp hi kan hna a ni ber mai. Khauchher hram chiah chiah leh tukloh rawn hram lauh lauh te lo chu hriat tur a awm lo. Tukloh sava hi zanah an hram thin tih ka lo hre ngai lem lova, mahse thingtlanga awm takah chuan engkim kan hre chhawm ve zel mai, Hriatpuia angchhungah chuan hlauh nei lo in ka mu hle hle a.

A pangti lum chuan thlasik lai mahnise vawt tilo in min siam lum tha viau mai, kan titi melh melha. Fa neih chungchang te thleng chuan sawi dunin kan nui leh hak hak thina, football a khelha India national team meuha a khelh chuan a thiam dan a zirin a hlawh pawh a tha ve thawkhat viau ang le. Hausak chu chak em em lo mah ila ama tan zawk leh kan hma hun kan siam ve angai tih hailo tu ka ni a, keiin hlawh nei mah ila Hriatpuia hian nupui te zawkin an chawm nih a duh loh zia ka hrechiang viau bawk nen a tuina bera a kal hi ka duhpui.

Lehkha pawh zir chho zel pawh nise a ngaihtuahawm dawn loh tih ka hria. Mahse kan inneih hnu phei hi chuan lehkha zir ai min chawm vat vat theiha a awmna tur a ngaihtuah ve nasa tih ka hailo. Keiin ka nawr em em ngailo in an lo koh tawhna sa lama liam mai kha a tan a fuh hle bawk ang, ngai dawn viau mah ila rei a cham angai dawn lo bawk nen englai pawhin an inkhel bik dawn lova, chumi chhunga a rawn haw thei ringawt tur pawh chu ka tan chuan a lawmawm tho tho.

Ka mut a chhuah takah chuan ka ham bai baia, a ni erawh chuan games min khelhsan thung “Ka muhil mai dawn aw, tikhan khel rawh. Mahse ka hriat loh laiin tho miah suh ang che" tiin ka chah leh thlap a, ramhnuaiah kan awm bawk nen a tello chuan ka thlamuang thei meuhlo.

ZAWMNA...

“Kal suh" ka tap a, kallo tur chuan ka ngen ve tang tang bawk. Ka hmuhlaia hmeichhe dang kaitu chu ka melh tlawk tlawka, thawk leh khatah ka taksa chu rawn che dawtin Hriatpuia hmel chu ka hmu nghal zat. “I tha em? Enge i hmuh " chhang lo chuan ka kuaha, ka la insut faih faih bawk. Ka mangah ka tap bawk nen ka ngaihtuahna nen ka lungchhia a ni ber ”Tingea? Taitai i na em ni" a rawn tileha.

Kuah chung chuan ka lu ka thing nawk nawk ringawt, ka mittui lah chu a la tla reng lehnghal. A tak nilo mahse ka rilru ana em em tho, tikhawp hian Hriatpuia hi ka hmangaih dawn tih hria ila a hma te khan lo tawn tawh tur hi a nia, “Tinge ka tawn har em em che le, ka hmangaih che Hriatpui, ka hmangaih lutuk che" tiin ka la insut faih faiha. Ka hnunga ben thek thek pah chuan “Keipawhin ka hmangaih che, tap tawh suh min hmangaihna ai a nasa khan ka hmangaih che, i mangah enge i hmuh" tiin min zawt leha.

“Min lo kalsan a " chu thu zawng chu ka sawi thei, thawk la hakin ka khur dar dara. “Hmeichhe hmeltha tawk nen hian mipui hmaah in lo in lan duna, keichu min hre tawh lo ang maiin i awm. Khang kha a thleng dawn lo tiraw" ka aw a hlauhthawnna chu a hria pawh a niang ka biangah a rawn dawma. “Ka kalsan ngai lovang che, chuvang mai mai chuan i tap amaw? Ka duat em em i nih hi, ka kalsan theih che chuan ka â tawh a ni ngei ang " tiin ka bekah chuan a kut a rawlh luta.

.

Ka thaw ham ham ringawt, ka la insut faih faih chu min kuah hlu hlua. Tunah hi chuan mipa puitling zia tak takin a ni a chet ni; a awma bei chung chuan ka ngawi kara, ka thaw dep dep ringawt.

HRIATPUIA POV...

A khât tawka a taksa la che ak thin chuan a la lungchhe hle tih a tilang chiang viau mai. Mumang mai avanga a tap chu a ho pawh a niang, mahse ka tan chuan ka chaklohna a ni a. A mittui hi min tichak lo tu ber ani, a ho ka ti ve heklo, a ruk tak chuan keimah avanga a hlauthawng te hi ka lawm zawk. A thinlung ka nei tawh tilang tu a ni miau va.

Mumang that loh avang hian mi tam tak an mu theilo fo tih ka hria, Taitaii erawh a nih loh hram ka beisei. “Ka kalsan ngai lovang che, mangchhia mai mai a nihkha.  A takah a thleng ngai hleinem, mu leh rawh" tiin khumah chuan ka mutthlak puia. Thu awih tak chuan a mu ve mai bawka, mahse ka kuah loh erawh a duh hauh lo thung. Keipawh chuan a duhdan hria in ka bawp inkarah chuan a ke dahsakin ka kuah nghet sauh va.

A chhungte duhlo chunga kei min pan ngam pawh hian a mah ka hmangaihna a tizual, ka ny leh pa ngei pawhin ka la naupang tiin then turin min rawn ti a. Taitaii erawh ka hrilh duh lo thung, then ka tum lo bawk nen hriattir kher kha ka duhlo, a chhungte heti hi an ni a. Ka chhungte thusawi lehzel a hriat chuan engtiangin nge a tawrh ang ka hrelo va, hrelo se atan pawh a tha zawk.

A tul chuan ka indan pui mai ang, hei chen kan thleng tawha. Kalsan mai mai ka tumlo, a engkim min hlan hnua kalsan leh hni hne hi mipa zia ah ka ngailo. Mipa tam tak mahni bialnute mutpuia sawi mualpho leh hrat, in tih theih nan taka hmanga nuihsawh ching hi ka huat ber an ni. Ring em em tu hmeichhia tikehchhia a an timualpho leh thin hi chuan hmangaihna neih an phulo ka ti ve tlat. Mipa ti a chhiar tlakah ka ngai hek lo.

Tin mahni bialnu hluite chungchang inthen hnua sawi vak vak te hi mipa dik tak chuan an ti lem lo vang, mipa rilru pu pha lo chapo ve ar si chiah hian an ti in ka ring. Mipa dik tak chuan hmeichhe hlutna leh zahawmna tihbawrh a duh ngai lo, inthen pawh nise ngawi rengin a en mai thin. Tun ang laia mipa tawng tam ta lutuk hian hmeichhia ten tuai an tih phahna an tawng ta fo chu a nih hi.

Emergency light chu on in ka bula mu chu ka ena, a lo muhil leh daih tawh.  A thaw sek sek chu enin ka nui saka, a duhawm hliah hliah hian ka hria, keiai a upat avang hian thenkhat chuan min relin min sawichhe fova. Mahse he hmeichhia hmu a belchiangtu mipa chuan an kalsan theiin ka ring lo, a nu hnapa, a tul hunah a puitlingin a awmdan mila in siam rem a thiam em em te hi ka duhna lai tak zing a mi a ni bawk.

A duh loh zawngah chuan a tawp thlenga tang ngam a nihna te hi ka ngaisang, chuti nilo se chuan tunah te hian min zui tawp nang. A chhungten an nawr ta mah mah pawh a niange, kuah tha in mut tum chuan ka in tin tuah ve a, a chhungte haw hma chu khawchhung lamah haw ka tum lo va. Ka awmna hi ka thiante leh Hminga nu leh pa bakin an hrelo va, an sawi mai mai ka ring lo bawk.

Chuti nilo se chu tunah hian min rawn hmu tawh ang. Ka bula muhil thaw sek sek ngaithla chung chuan ka muhil zui ve ta thuaia, “A na" hmeichhe au that ri avang chuan ka muhil lai chu meng chhuak kawkin aw lo chhuahna lamah chuan ka tlan vata “Taitai i tha em?" hlauthawng lutuka ka au lai chuan ka thlanga serthlum kung chu a rawn che laih laiha “Enge i tih?" kei pawh chu a thil tih ka hmu ve reng sia ka zawt leh kher chu a tullo ti viau mah ila ka zawt tawh tlat.

“An hmin tan a nih hi a then chu, lo kal rawh a tui lutuk" tiin serthlum kung zikah chuan a kûl dulh dulha.  A tlak a hlau lo nge mawni, a bulah chuan zu chhukin ka en chho dauh dauh va, engtin nge a lawn theih zawk ni. Hling a ngah ropui si, he hmeichhia hian theih loh pawh a nei lo emaw ni, ka rin loh pui pui hian a che ziah mai.  A rawn chhuk chuan a serthlum lawh pakhat chu min rawn pe a.

Ka lo la ve mai bawk “Min ti hlauthawng a lawm, i rawn au bawk nen " tiin a taksa chu ka enkual thuak thuaka. “Nia a hlingin min chhun palha, tunah pawh a la sa hal vet vet mai, mahse a hrehawm loh" ti zat zatin thlam chhungah chuan a lut zuia. Rawng a lo bawl fel thlap tawh tih ka hmuh chuan a hmuh loh lamah ka khi sak, chet ve tum viau mah ila hmeichhia a nihna leh mo a nihna hre takin min chhuh nghal zung zung zel.

Keichuan khawchhung ngaihna em em pawh ka neilo, helaia kan pahnih chauha kan awm theihna hian nuam min tih tir zawk mah. Midang chim buai lohin kan awma, lungngaihna leh mi selna ri hre phak loha awm chu a lo hahdam thlak bik ngawih ngawih mai. Chaw eikhamah chuan thlai hmun chu kan tihfai saka, a ni erawh a la zei lem lo khawp mai. Mahsela engmah sawi bik lo chuan a hnathawk chu hmuhnawm tizetin ka ena.

A hah a vanga a biang taitek te chu a inhmeh hliah hliah maim

(NAKTUK LEH NILAI THAWHTAN THLENG KHIAN SILVER JUBILEE KAN LAWM DAWNA, STORY A AWM DAWN LO AW, TIN FB COMMENT TE HI MIN TAIMAK SAK ULA KA LAWM HLE ANG, ZIAH HAH MAN A AWM LO THIN EMAI