LALHRIATPUIA CHAPTER 12

LALHRIATPUIA

CHAPTER 12

“Ka awk a nia " ka Sangha awh chu in ti thei fe hian ka khai lang va va a, Hriatpuia lam hawi chuan ka nui ver ver bawk. Ani pawh chuan ka bianga rawn piai zauhin a dahna tur siamah chuan min khung saka, midang ho awmna atanga fal deuhah kan kal a, a thiante pawh an bengchheng bawk nen kal ve lo turin a ti a, tum burin an kalsawn kha a nia. Sangha an tih tlan zawh a hlau te pawh a niang.

“Le changpat kha min dahsak leh rawh" tiin ka nawr nghal zat, ka khawih ngam ve miau lo. Changpat ka hmuh hian ka ti an tiza tlat zel “Awle, kha hei chiah ti tawh ang aw min ngaihsak lo in Sangha lawng lawng i buaipuia ka duhlo" tichungin changpat chu ka kuaite ah chuan a thiat leh malh malha. Ka lo nuih ringawt, enge hetiang ti ngailo tan chuan a nuam ve em bawk a ni.

“Aizawlah Christmas hman i tum em?" tiin ka zawt a, a ngawih vung vung hnuah “I hman dawn chuan ka hmang ve ang chu, i bulah ka hmang duh alawm" tiin ka bulah chuan a rawn thu thla a. “Nia mahse keichu helaia hman hi ka chak zawka, thingtlangah hian ka la hmang miahloa. Khawpui chu nuam ve viau thin mahse thingtlanga an hman dan hian ka hmang chak" tiin ka thu tha sauh sauha.

“Um a nuam a lawm, helamah chuan mas thing phurh te an nei thina, thlenin nei bawk in tah chuan an lengkhawm thin. I duh chuan kan hmang dawn a nia, nakum lamah dam chuan ka kalsan rih che a ngai dawn sia" a tihchuan ka bu nghat ringawt. Dik tak chuan a awm lo tur anga ka ngaihtuah hian ka ngai nghal ringawt nia, a bula awm a hlimawm em vang te pawh hi a niang.

Mipa a huna fiamthu duh leh mi ngaihsak em em tu bula awm hi hmeichhia tu tan pawh a nawm loh ka ringlo. Min ngaihsak miahlo tu ngaihzawn ai chuan a nuam hrim hrim bawk, midang an in auh khawm takah chuan kan inzui chho va “Report pe turin an tih che kha aw, kan hun hman dan vel hi i inziak sa em?" ka tihchuan a ner nung mai.

“Khawiah pawh kal ila hetiang hi ngai ziah mai, school naupang nih hi ka ning. Lehkha te hi zir ngailo se a nia ka tih, kumin bak ka zir tawh lo ang" a tihchuan ka nui kar kar a, “Pakhatna i ni sia i tih a mawi a lawm, second term ah pawh i nih leh ka beisei, tin board exam ah distinction a i pass a nihchuan inthlahna ni pah fawmin ropui ve deuhin kan lawm dawn a nia" tiin ka fuih phur sauh sauha.

Dik tak chuan an ni ang rual hi chu hmeichhia pawh nise mahni in dahsan lai leh luhlul lai an nia, mahni thu duh hunlai an ni bawk. Chuvang chuan an phurna tur zawnga fuih thiam pawh an ngai bawk, mihring tute pawh hian mizia kan nei hrang theuh va, chu kan mizia chu kan inhmuhsak thiama in dawh thiam a pawimawh bawk. Mi sual kan tih fo te pawh hi a kawm dan kan thiam phawt chuan kan tan thiantha an ni daih thei bawk.

Chuvang chuan keichuan mi sawi ringawta midang nun lo va sawi ve chiam leh mahnia ngaihdan lo siam ve ringawt hi ka duh lemlo. “Enge i ngaihtuah vung vung, i thusawi kha ka hre reng dawn a nia. Kan ram pawh hi board exam hi siam kher lo hian a tih theih loh emaw ni, hlawhtling zolo nasa taka bei ve tho si an awm leh ngei anga. Zirna a hlawh tling zo ve lo in that an awm leh thin hi ka duhlo" a tihchuan ka melh haw mai.

“Chhungte lakah kan in kil tawih phaha, lehkha zir hi a tha lo ka tilam nilo keichuan hriam tel miahloa mihring taksa eichhetu ka tilo theilo, kan zir ve reng chung pawhin vanduai chuan khutah kan ni tho tho, rilru hah reng renga exam dawn a pianga awm a, mutmu pawh tuah tha hmanloa kan zir hi, a chang chuan zir loh hlir te a rawn chhuaka ka ning tlat" a tih bul bul chuan nui hakin a lu chu ka tuai zauha.

A ngaihdan chu a lehlam zawng tak chuan a dik ka ti ve tho, tam tak chu nasa takin an zir ve thoa. Mahse hlawhtlinna chang zo ta lo chhungten an hauh hlau em em a mahni taksa in a chhiat phah hial an awm ve tho. Nu leh pa te pawh hian kan fate zirna lamah hian kan nawr mah mah em aw ka ti thin, chutih rualin lehkha kan zir a nihchuan kan theih tawp erawh chu kan chhuah ve angaia.

Kan theih tawp kan chhuah tih an hmuha mi la hau tang tang nu leh pa hi chu an vang khawpin ka ring “Um i thusawi chu a dik e, mahse kan nakin huna kan nun a nawm theih nan chuan kan beih ve angai alawm, chutih rualin kan ramah hi chuan hna avan bakah hna hmu tur chuan mi thiam filawr leh mi hausa fa, sawipuitu nei tha an pawimawh thung, nang erawh i thiamna hmang ngeiin hlawhtlin i tum ang chu. Pasal phakar deuh ka duh lo a nia" tiin ka fiam zauh a.

A nui hak ringawt, a va han duhawm tak. Keiai a nau na hi tunah chuan ka hlimpui phian, a chhan chu ka thu a ngai pawimawh thiamin mi hnial let chiam a nei ngailo, a duhloh zawng leh ka dik lohnaah erawh min hrilh ve thin tho a. Huat ka tum bik lo, tin ka upat zawk avang hian ka thu hnuaia dah lah ka duh heklo. Mipa zawk in an nupui te an ngam lo fo hi keichuan ka duh lemlo.

Siamtu min siam dan ngaihtuahin mipa in a nupui fanau a chawm anga, hmeichhia chuan a pasal a zahin inchhung leh an fate an enkawl turah ka ngai bawk. Pasal neih hma erawh chuan mahni in enkawl theih hi a tha ber, tunlai mipa tam tak chuan hna neiloa mahni nupui zawk inchawm tir tum tlat te hi zuk awma. Heng hi chu nupui nei tlakah ka ngailo, an pa lo riau hian ka hria.

Mipa chu mipa an nihna ang ngeiin pa rawh se, hmeichhia pawh hmeichhia kan nihna ang hian awm mai tur, siamtu min siamdan hi kan tan a tha in a malsawm ber bawk. Kan in nghah khawmna kan thlen leh takah chuan kalsawnin ka tent ah chuan ka lut a, ka insiam nghal malh malh bawk. Naktukah kan haw tawh dawn bawk nen zinga buai chiam ngailoa awm ka duh.

“Tha-i, i insiam der elo?" Nunkimi chu ka melh zauh a “Um zinga hmanhmawh chuk chuka insiam kha ka peihlo a, ka insiam sa ta mai, i va huh nasa ve " ka tihchuan a rawn nui hak haka. “Khawlum chho tan hian tui hi a tinuam bawk sia lawm, ka hleuh loh chuan ka alh mai dawn in ka hria, chubakah kan haw tawh dawn sia vawikhat tal hleuh kha ka duh alawm, zirlaite awm lai hian ka zir angai ve a, kan lian tawh sia tuihleuh thiamloh chu enge emaw palh a awm thut takah ka tia" tiin min rawn pui mawlh mawlha.

Zirna bakah mahni mimal chanchin sawi chuan kan phul zui hluta, ka teacher pui rau rau ah chuan ka kawm nasat ber a ni bawka. Hriatpuia nen a kan chungchang tih loh chu ka zep em em bik lo, Hriatpuia nena kan inkar erawh engtin nge a ngaih ang ka hriat loh avangin ka la zep rih thung, nakinah chuan zep theih loha a lan chhuah hun a la awm ring mah ila tuna lo sawi thawt thawt kha ka duh lemlo.

ZAWMNA

Zanlamah chuan kan vai in meipui chhepin kan ai ho a, fiamthu thawhin kan nui leh dar dar thin. 12 chin hi chu puitling ang an nih ve tawh avang hian khuah khirh lutuk kan tum lo bawka. An mahni pawhin nuam an ti tih a hriat “I mut a chhuak tawh em?" titu chu ka melh zawka “Um chhuak ve tawh e" tiin a dar chu ka nghenga, tumahin min ngaihven em em lo bawk nen ka pawi ti lemlo.

Rintei erawh chuan min thik hmel viau mai, ka zirlai nimahse a chang chuan a awmdan avang hian ka ngeih lo lek lek zel,Hriatpuia a bem tihte thlengin ka hria a, mahse a mipa bemin kei bak min ngaihven loh avang hian ka insum mai mai a ni. “Tikhan muhil rawh, midang mut dawnah ka lo kai tho dawn che a nia" tiin a thut dan chu a siam rem deuh va. Keipawh chuan ka nghen dan chu siam remin ka thu mu nghal ar ara.

Ka mit ka chhing zui riai riai chu thawm avang chuan mutthilh a har lam mah a ni. “I muhil thei nange?" ka tal sek chu a rawn hrethiam a ni ngei ang “Um thawm hi " tiin ka nuihsaka, midang rawn hawi loh lai chuan min kalsawn pui daih bawk. Min hmu tawk awm mahse engmah an sawi lem lo, ka tent kan thlen chuan min thut luh puiin eng chu a off nghal daiha.

Engmah sawi buai lem lo chuan ka mu zui nghal sat sat “Riah veleh i tum em?" ka tihchuan rang zet hian a rawn inthawlha, inthup em em ka tum tawhlo, sawi darh vak ka tum chuanglo. Kan awmdan atang hian ngaihtuahna hmang deuh ho chuan an hrethiam vek tho tih ka hria, min ngai diklo tawk an awm ngei bawk ang. Mahse an mi ngaih ang kan nih lohzia chu kan inhre chiang viau thung.

“Ninhleilo khan mu rawh" ka dul a hmet a hmet chu ka ti chhuak hlaka, nui ring ngam silo in a nui thum deuh hak mai “Khawih a nuam e, hei ai hian keichuan la kiar se ka ti, dul thep deuh sak tung ai chuan dup deuh hi khawih a nuam" a rawn tisupa. Ka nghawk zauh mai “Ka la nula ve a, dul kiar ka duh teuhlo mai muhil vat ang naktuk thawh hmat a ngaih kha. Ka tent hi min tihfel pui rawh aw" ka tihchuan a lo aw ve mai bawk.

Engmah sawi tawh lo chuan kan muhil zui a, riah tlan tha ti vak lo mah ila an thlahrang sawi atang khan ka dawih ru riau bawk nen ramhnuaia la awm lai hi chuan pawi ka ti em em lo. Zingah chuan tho in kan insiam sap sap hlawma, chuti chung pawhin dar 9 velah haw turin kan in peih thei chauh mai. Motor ah kan bungrua dahin kei erawh Hriatpuia chuan a bike in min phur thunga.

Midang hma ah bike keng then khat nen chuan kan tlana, thui fe kan tlan hnu khua luh hma deuh chuan mipa an lo awm khawm thupa. Bike chu tidingin Hriatpuia chuan a pan pheia, midang pawh chu an phei ve nghal, accident a awm a nih hmel. “Kawng thlangah an lum thla a " tih an sawi vel chu ka hre pha a, ka pan phei ve vat. Thi an awm angem tih chu a ni ka hriat chak ber ni.

An awmna ka thleng phei tep tihah chuan Hriatpuia chu rawn pheiin min hruai sawn vata “Tinge" tiin ka awmsawn deuha “En ve lo la a tha zawk, a chhan chu hmeichhe tan a hmuh a nuam chiahlo. I awm a nawm loh phah ka duh lo, chuvang chuan va hnaih suh" a tihchuan a thusawi awmzia ka hrethiam. Mitthi an awm ngeia, a inhliam nasa viau tih a chiang bawk. Midang chu an rawn thleng ve a, mipa ho chu chhukin ruang vel chu puan nei chuan an khuha.

Hmeichhe ho erawh in kan hmuh ve an phal miahlo thung. Motor pawt chhuak tur a rawn thlenga, ruang chu pick up ah hlangin khawchhung lam an panpuia “Haw ve ang hmiang,thlan kha laih a ngaih hmel si a, hmanhmawh a ngai ania" Hriatpuian a rawn tihchuan ka lo bu nghata. Bike ah chuan chuangin in lam pan chuan kan tlan zuia, midang pawh chuan min rawn umzui ve vat.

Ka awm a nuam thei meuhlo, mitthi an awm hi chuan ka nunphung hi a buai ve nuaih zel. Ka chhungte nilo mahse keimahah hian danglamna a awm ngei ngei, in kawtah chuan min dinpuia, “Ka haw tlang mai ang, zanah ka lo sawm ang che" a tihchuan bu nghatin kan motor a rawn thlen zui ve mai avang chuan ka bungrua la in inchhung lamah ka lut zui a, Nautei chiah a lo awm avang chuan nutei te awm na tur awm ang chu ka hre nghal mai.

“U in lo haw elo? Ka nu te chu mitthi in lamah an pheia, keini pawh i hman hunah kan phei ve nghal mai dawn em ni. Thingpui sem velte a ngai dawn bawk nen ka nu in hmanhmawh turin min ti a" a lo tihchuan keipawh chu indah fel sawk sawkin ka inthlaka “Tihian ka hman chu a nimai, chaw chu ka eilo mai ang tirawh kal thuai ang" ka tihchuan a ni pawh chu a rawn tho chhuak vata.

Mitthi chu kan veng mi a lo la ni lehzel bawk nen kan hmanhmawh viau mai. Kan thlen chuan mi an lo awm nual tawh a, inchhung lam atang chuan tap rawih rawih thawm a rawn chhuaka. Chu chuan min ti hnim rawih mai, ka tah a lo chhuak ve ringawt, mitthi hi ka ngaina ngai lo hrim hrim a. Mi tah hla ka hriat hian hrehawm ka lo ti ve em em zel, Nautei nen chuan tih tur tul ang ang chu kan ti zung zunga.

Midang pawh chu an buai hlawm viau mai, mi an thahnem bawka a mitthi chhungte tan pawh a lehlam zawng tak chuan a nawm ka ring ve ringawt. Aizawl lam ang lo takin a khua deuh thaw in an rawn kal ka ring, veng hla lam pawh motor nen lam an rawn thawk chhuaka. Chhiat tawh meuh chuan an in pui tawn tha viau mai, thingpui a so takah chuan kan sem kual zung zunga. Awmawlna hun a awm rih meuh lo.

Tlangval lam erawh thlan laihna lamah an awm deuh vek a nih ka ring, helamah chuan an vang viau mai. Nutei te pawh ka hmu a, an ni erawh inchhung lamah an awm thung “ An mitthi hmel khu ka rap tawp, a hmai vel kha a chhe nasa si" Nauteiin a rawn tihchuan ka lo nghawk zauh mai. Midangin an hriat loh hram ka beisei, nileng chuan awm ve in ruang phum a nih takah chuan inlam panin kan haw ve thei hrama.

Zan lama lenkhawm tum chuan kan haw darh sap sap hlawma, mi thenkhat leh mitthi lam chhungte erawh an la tha hnem viau tho. In kan thlen rualin ka thu hnawka, Nautei erawhin rawng a bawl nghal sawk sawk mai, ka motor chuang nilengin kan che bawk nen ka taksa chu a rawl thum mai. Ana ut ut bawk nen a nuam lem lo khawp mai, zan lamah chuan Hriatpuia te thian ho chuan min rawn sawma.

Jacket dum rawng sen tlemin a pawlh chu a rawn ha a,a hnuaiah tshirt dum a hma tial chu a rawn ha a, a chhelo leh pek tawh hle. Mitthi in lam pan chuan kan inzui dam dama“Vawiin chu thlan khurah Zira a tanga, kan buai ania aw. Hriatpuia lah a kekawr thlan hungna palin a lo awka, kan che buai lutuk kha midangin min nuih min nuiha, a zahthlak thei ngei mai" Dina chuan a rawn ti a.

Kan lo nui hak ringawt, Chet chhiat hi chu an peih ve ngawt mai “Kan duh vang a ni bik hleinem, ka ruangin a tlin loh vang a nihkha. Khatia min nuih leh dawn chuan vawikhat mah a khurah ka lut ve tawh lo ang" Zira chuan a lo tihluka, kan nui leh dar dar mai. An thian ho ah a te deuha, mahse te chhia erawh a ni lo thung, Hriatpuia erawh ka bulah ngawi rengin a kala, a thiante thusawi chu a lo nuihpui ve leh zauh thina.

Kan pahniha kan awm loh chuan a ngawi chawi lam mah a ni. Kan thlen phei chuan mi an lo tam leh tawh bawk nen hnung lamah chuan kan thu hlawma, an hla zai chu kan zawm ve a. Hriatpuia te ho erawh ngawi rengin an thu thung, an hrelo te pawh a niang. Khawhar hla thenkhat hi chu keipawhin hriat loh ka nei nual a, mahse ka inzir ve bawk nen tunah chuan ka zia tawh viau thung.