REMRUATKIMA CHAPTER 18

REMRUATKIMA 

CHAPTER 18 

“Theihai ka ei châk lutuk zuk lo ang u” kan ṭhianho awm khâwm kârah chuan ka ti chhuak hlawla, an rawn hawi nghal ṭhap mai.

“I ti âwm ang lo, ruah a sûr hi ruahsur kârah i lo peih bik em ni?” Ruthi chuan a rawn ti hlaka, a peih loh hmêl lutuk chu a khawngaihthlak zawk. “U Remruat” ka tih lai chuan “I ei châk viau em ni?” a rawn tihchuan ka bu nghauh nghauha, ka ei loh chuan ka mutthilh theih pawh ka ring lo.

“Ka ei ngei ngei angai“ ka tih lai chuan “Raino ang mai” an ti chu an rawn meng phâwk nghal hraw a “Nang hi! I rai chiang lutuk” an rawn ti rual ṭhawt hlawma, kei erawhin ka awihlo lutuk chu ka lo pha nasa mai.

“A awihawm loh, raino luak chhuak pawh ka neiloa, rai tir ho awm dân an sawi ang zawng zawng hi keimahah a awm lo. Ka ei châk mai mai aniang” ka tihchuan “I rai ang, naktukah in entir rawh u, damdawiin kan hnaih hlauh chu a tihzia e, va in entir rawh u, i rai dâwn chiang lutuk” an rawn ti leha.

U Remruata lah chu chu thu a hriat rual chuan a phûr hmêl nghal hle lehnghâl, kei erawh naupai chu châk viau mah ila thu chiang hriat hma loh chuan engmah ka sawi duh bik lo, ka rai ka ring lo a. Ka la period reng bawk nên in en tir pawh ka tum lêm lo.

“Theihai chu zu lo ang u hmiang, kan nu in a ei châk miau si a. In duh leh nang ni chu hetah lo awm ula” ti a min kalpui mai a tum lai chuan kan ṭhiante chuan a nuam an ti chiah lo nge an rawn tho chhuak phak phaka “Kan ei veleh duh dâwn tho si a, kan rawn zui mai ang che u” an tihchuan ka nui hak mai.

Theithur ei châk vak hun hi ka nei ṭhin a, chuvang a ka  rai pawh kha ka rin lêm loh, chubâkah thla hmasa lawkah pawh ka period renga, rai hi ka inring lo hrim hrim.

Kan kawmthlang lamah chuan ni hliap nên kan inzui thla diah diaha, kan khua hi metal road a ni ve lêm loa, khawlai pawh a nâlin a diak viau lehnghâl, midang zawng chu hmaah kan inzui thla diah diaha, Dorothyi leh u Puia chu chance an inti pe ve nge maw ni hnungah an rawn kal fala, nihliap an in zawn ve ngei bawk nên nuih te lam lam a za.

Theihai hnuai kan thlen rual chuan kan lo nghâk ṭhapa, an titi ve ni ngei tur ani an hmui phun chu ka hmu renga, chutah an rawn thleng thla dâwn tihah Dorothyi chu a ke hmalamah rawn khai kangin a thal ta ṭhuai a, a tluk pah chuan u Puia a pawt ve bawk nên an pahnih chuan an thal dûn ta tawp mai.

An nihliap chu an piah deuhah chuan a lêng deuh dawrh bawka, an awm dân chu a nuih loh theihloh. Kan lo nuih vak vak lai chuan mawng leh lu berh luau in an rawn tho chhuaka, an in ena an zak ve nge mawni hnuailam an en rang ngei mai.

“Nupa tur te chu tlûk rual dial dial te pawh hi a ṭha a nia, hmangaihna tlûk hmasak ber, hmangaihna kuh mum ṭan tir chu a nih kha” u B-a chuan a lo ti zuia, an ni pahnih lah an lai chu an lei an chhuah vak vak ringawta, an khawngaihthlak zawk, midang lah hian tihluih an peih ve bawk sia e.

“In berh ta rau rau a kungah hian lâwn nghal ula a ṭha ang, Vannunhlui vir lutuk man hi tel hmasa ber tur in ni dâwn a nih hi“ u Kiman a rawn tihve chuan ka nui haka, huatah pawh a kal lo. Keimaha avângin khaw chhe hnuaiah an awm chu a ni sia, haw thei pawh ka ni lo hrim hrim.

“A hniam a hi a rah ṭeuh alâwm, lâwn kher pawh a ngai nâng. A hniam a hi a tam lutuk” tiin a rah lian chu an ban nghal zata, an thûr ṭan chauha, chutiangin a lian pawh an la awm vak lo, kan lawh zawh chuan in zui chho leh diah diahin a tawlhthlu pahnih erawh chu an khûr deuh bauh bauh mai.

A vawt an ti bawk a nih ka ring, in kan thlenga mei lum an pan nghal vat chu ka khawngaih bawk nên Dorothyi chu ka room lamah hruai lutin ka thawmhnaw la hâk loh ka lei sa ka dah chu ka hak hawh tira, mei lum a pan ve leh vat tho. 

U Puia pawh a lo inthlâk fel vek tawh a nih hmêl, theihai chu bâwlin kan ei hlawma. “A va tui ve, kan lo peih lo em em a, a lo tui leh hle si a” tiin an nui dar dara, kei erawh a ei châk ber e tilo in ka ei tam leh thei der lo.

“I duhtâwk der em ni?” u Remruata chuan a rawn ti a, ka bu nghat mai. “Ka duhtâwk leh tawh, ka ha a ṭim dawn” ka tihchuan a nui suka “Naktuk chu va in entir tak tak ula” an tihchuan ka lo hnial vata “Ka rai dâwn lo, thla hmasa khân ka period alawm. Raina hun ala awm hman lo hrim hrim, ka period na ala rei lo a, ka rai dâwn lo tih ka hria” ka tihchuan engmah an sawi tawh êm bik lo.

Ka ṭhiante chu rawngbawl turin an haw zui sap sap a, pâwn thleng va thlahin in chhûngah chuan ka lût zui leh ta thuaia “In entir tura khawpui lama kal hrim hrim chu kan ngai a ni, i dik lo palh thei. Chubâkah ka nu leh pa pawh kan ve tawh ila a ṭha ang, ka ṭhiante rual hian kan chhuk dâwn ania, hna kan ṭul tawh lova, hna awm loh lai hian chhuk vat ila a ṭha” a tihchuan ka hnial duh ta bik lo.

A nu leh pa pawh a ngai ve tawh ang tih ka hria, chubâkah mahni seilenna hmun chu kan ngai lo theiloa, helamah kan awm rei ve tawh bawk nên zin thlâk chu ka pawi ti em em lo.

“A nihchuan naktukah thlai rah dap ila kan hawn dâwn ania, car a awm tho a. Kan hawn ve hrim hrim ang chu, i unaute pawhin an ei ve duh ang” ka tihchuan a ni pawh a lo bu nghat nghata, fa an nei ve nual tawh bawk nên an fate pawhin an ei duh dâwn tih ka hria.

“Kan chhuk thla rual dâwn a nihchu, ṭhianho a lên leh te pawh a châkawm alawm”u B-an a lo tihchuan melh nghekin “Len lam kha chu lo phur viau suh, nupui nei tawh a nih hi lên mai mai a hman lo, heti hian awm mai mai rawh se, pa nih tawh chuan tlangvâl angin awm reng angai lo” ka ti hlak chu an in melh hrek hreka.

“Remruatkim, lên kha chu tum vak suh aw. Khatianga awm kha ka phal hauh lo ania” ka tihchuan an ngawi ṭhap a, min chhan pawh an tum lo, nupui an neih tawh chuan khatianga awm reng kha an tum ve lo turah ka ngai, nupui neih hnu a lêng lêng ṭhin mipa hi chu a tâwpah an uire duh chawk tih ka hria.

ZAWMNA....

“Tikhan min en reng suh ka lêng dâwn lo, ṭhianho inhmuhkhawm mai mai alawm. Chhuh pawh kan la chhuh loh hi, chubâkah lo lêng pawh ni ila hmeichhia ngaihsak theiin min ngai em ni? Nupui ka nei tawh che a, hmeichhe dang hnaih turah kha chuan min ngai lo phawt rawh” a rawn ti chu ka chhâng tawh lêm lo.

Mipa meuhin thu a tiama a sawi chuan a sawi ang ngeiin a awm turah pawh ka ngai. Ngaihsak duh tawh lo chuan chhuat chu ka nawt mawlh mawlha, naktukah chuan lo a kal ngei angai ang le. Fanghma vel an rah tam lai tak a ni a, a unaute'n an ngainat zia pawh ka hria a, bâkah kan thlai thar ho hi tem ve hrim hrim se ka duh a ni ber mai. 

A tûkah chuan kan sawisa ang ngeiin lo ah kan kala, berul changkha leh Bawrhsaibe tih vêl chu vehin a awm ang ang chu kan lo zo veka, a sên an la awm ṭeuh bawk nên lawh zawh vek pawh ka pawi tilo, kan awm rei palhah an lo chang vek dawna, hetia hawn mai hi a ṭha ber.

“Kan awm loh chhûngin a lo hnim lutuk em lovang chu maw? Ka sawi tawh ang khân in entir hrim hrim ila a ṭha ang, diklohna kan lo nei pawh ani thei. Doctor râwn ve hrim hrim kha a ṭha” a tihchuan ka pawi ti lêm lo, mahsela nau ka pai theilo tih an lo sawi anga ka pasal rilru hi ka hliam ang tih ka hlau ber, fa a awh zia ka hria a.

Kan inneih tirha keimah nên fa neih duh lo kha, tûn hnuah erawh fa neih a châk tih ka hre renga, nau pai ila chuan min duat viau ang tih pawh ka hria. Mahsela keimah ka in hrechiang a, nau ka la pai lo tih hi ka hre chiang êm a ni.

Zân lamah chuan kan inah kan lêng pheia, ka nu leh pa hnênah Aizawl lam a ngaih ve thu leh reilote zin thlâk lawk a duh thu chu a sawi dap dapa, ka nu leh pa pawhin an lo hnial lêm lova, an pawmpui viau zâwk a nih hmêl.

Keipawh nu Ahlimi te chu hmuh leh ka châk hrim hrim, kan chungah an ṭha si a. An mahni avâng a u Remruata pawh tawng ka ni a, an chungah hian ka lâwm êm a sin, an ni awm lo se u Remruata hi ka ta a ni thei kher angem? Ka hmangaih kher angem tih pawh ka hre silo.

“Tluang deuhin in zin dâwn ania, khua in a la zir rih siloa, fimkhur ula. Lei min leh thil dang tam tak chhiatna hi a thleng thut thut bawk si a, kan ring chea kan fanu rilru hi i tihnat loh hrâm kan beisei, tlin lohna a ngah dâwn a. Hmun danga a rawn awm dâwn pawh khân a nu nên hian kan ngaihtuah em em renga, mahsela i nu leh pa kha an ṭha êm a. Kan ngaihtuah lutuk ta lo kha a nia, tûnah nupa in nih dân kan hre renga, kan fanu hi i lo hmangaih lo a nih pawhin kan kiangah him dam takin min hlân lêt leh ang che” an tihchuan u Remruata chu a bu nghat nghata.

“Ka tiam a che u, ka tina ngai hauh lovang, ka tân chuan a ni aia pawimawh an awm tawh lova. Thim lak aṭanga êng a min hruai chhuak tu a ni a, in fanu hi ka thinlung zawng zawngin ka hmangaih tih hi hria ula ka duh, ka kal san ngai hauh lovang” a tihchuan keipawh engmah sawi lo mah ila ka lâwm veng veng mai.

“In in leh ran leh dâwr pawh rawn ngaihtuah lo ula, in naute an awma an lo buaipui vek mai ang. Thawveng tak khân zu awm tum ula, in lam chu rawn ngaihtuah hauh suh u” ka nu pawh chuan a lo ti ve a.

Kan haw meuh chuan dar 10 a ri der tawha, khawlaiah vâk chhuak hmuh tur an vâng pharh tawha, thingtlâng hi chu chhûnah ram hnathawk kan nih avâng hian dar 9 a rik tawh hi chuan mi tam zâwk hi an mu tawh tlângpui ṭhin a, tûnah pawh thâwm a reh leh viau tawh mai.

Chhûn lam ang lo takin zanin chu boruak a thiangin vânah chuan thla a rawn êng kalha, a eng emaw tih nawm phian mai. A lunglên thlâk hle hian ka hria a, lunglenna tur chhan nei hauh silovin chhunglamah hian châm veng veng a awm tlat a ni.

Khau chher hrâm chiah chiah te, chingpirinu hrâm leh ṭhin te chu hlauh a nekin engtin emaw zâwng taka boruak tinuam riau tu ah an ṭang a, zanin boruak chu nuam ka tihchi tak a ni.

“Thla êng hi kan lawm rih dawn em ni, fur khawthiang boruak hi a nuam bik ania” a tihchuan ka hnial lo chiang lutuk tlat. Kan ṭhiante awm hnu aṭang hi chuan kan nupa a han titi dunna hun hi a awm lo tluk a ni a, zanin boruak nên chuan phurawm tak chu ani ve in ka hria.

In lam pan lo in khaw pâwn lam kan pana, ka kutah a kai tlat bawk nên ka thla a muang hliah hliaha. Zân khaw thim leh nungcha hrâm thâwm te chuan min ti hlau pha hauhlo, ka bulah ka pasal ka rin em em a awm tih ka hriat avâng te pawh hi a nimahna.

“Hetah hian ṭhu ang hmiang” kan khaw field phûl hnim ṭo tiar chungah chuan min ṭhut thlâk puia, boruak chu a vawt deuh sara. A thiang nuam êm êm mai bawk, vanlam ka en chu chhûm hmuh tur a awm lova, vawiina zîng phui chûk te kha khawiah nge an awm zawh tak pawh ka hrelo.

Ka pasal dâr nghêng chuan ka ṭhu âwn diaia, zanin ang hun hi kan nei khât bawk nên hetianga awm hi a nuam ka ti a, inngaihzawnna hun pawh awm miahlo in kan inneia, lên duna han chhuah dun kan nei lo kha a nia.

Hetia inneih hnu a han lên dun chu a nuam dangdai riau hian ka hria, thli rawn thaw heuh heuh chuan min chhêm dai sawng sawnga. Ka pasal chuan ka kut chu rawn vuanin a hum vang vanga.

“Hetiang hun hi a nuam i ti ve em? Hringnunah hian mi hrang hrang kan tawnga, a ṭhen min tina ngawih ngawih tu, a ṭhen min tihlim em em tu ni si te. Ṭhian ṭha leh ṭha lo kan han tawnga, a ṭhenin min hliama, a ṭhen te erawh kan tâna thih huam khawpin an awm bawka, in hre ngai miahlo kan intawnga, tûnah hetiang khawp hian kan induh leha. Khuanu hian rem hi a lo ruat fel tak zet chu a nih hi tiraw?” tiin ka phun sap sapa.

A taksa lum thar thar chuan khawvawt kârah pawh khûr miahlo in min awm tira, awm sawn deuhin a kapkarah chuan min ṭhut tira. Ka awm a tinuam huai huai mai “A rêl thiam khawp alawm, nupui ṭawng thei deuh, kawlhsen deuh hlauh nei miah lo. A pasal Vawk pu leh Ar pu a chhuah thei min pe ania, i vânnei ngawt mai, kei ang mipa zaidam min tawng hi chu lawm hliah hliah tur i ni” a rawn ti kher chu ka ngei bawk nên a nâkah chuan ka nghawk deuh saka.

“Ka ṭawng thei lo aw, keiai i ṭawng thei fe tih hre rawh, khatiang khân min ti tawh miah suh. Zanin chu kan pahnih chauha kan hun hman dun hmasak ber anihna angin hlim takin hman tum teh ang” ka tihchuan engmah a sawi tawh bikloa, min kuahin ka biang vêlah chuan a rawn chuk ang zauh zauha.

A awmdân chuan ka nuih a ti za lam lam, hetianga a awm hi ka beisei pha ngailo. “Zanin chu i êng mawi khawp mai” a rawn tihchuan a thusawi awmzia ka hrelo bawk nên alam hawi chuan ka inher deuha “Ênga?” ka tihchuan a bu nghat mai, “Ka êng thei bawk lo” ka ti chu a nui deuh hawka.

“Ni chiang e, zân khawthim hi kei ka ni a, nang chu chu khawthim hnawt kianga ên dân zirtirtu thla khi i ni thung. Ka chhunglama cheng min hnawh tâwt up up reng tu enkawl turin ka taksa chhûngah enna i rawn kenga, chuvang chuan ka tân chuan i hlu lutuk tih hre reng rawh” a ti ri chu hriat anuam ngei mai.

“Ka hre reng ang, nangpawhin i êng kalsan hian thim hlen tum lo la, kei lo êng dang mamawh bawk hek suh. Kalna tur lam i hriat loh châng apiangin kawng hrilh tur che in i tân hma ka hruai anga, ka chelh zêl ang che” tiin ka nuih ta var vara, a awmdân engkim hian min hneh ṭhin.

A ni hi awm lo sela hetiang dinhmun hi ka thleng thei angem tih ka ngaihtuah, amah ka tawn avânga ka nun danglam ve tho te hi tu mah hian an hmuh hmaih bikin ka ringlo.

“A vawt ti dawn ila a nuam bawk si a, tihian la awm reng mai ang aw? Zanin hi kan pahnih hun tâwpna tur nilo mahsela he thil hi bo nghal mai turin ka duhlo” tiin a âwmah chuan ka bei ta hlân a, a nuam ka ti. A rim tui tak hip te hi a nuam bik hliah hliah mai, amah nên vek engkim ka suangtuaha, thleng dik ngei bawk sela tih hi ka duhthusam a ni bawk.

Chutia kan ṭhut dûn lai chuan kan thlang lam ngaw chinah chuan sihal nge ni dâwn ni kal ri a rawn awma, ka en rang viau mai. Dai hnaiah hian sihal vêl hi an awm duh bawk nên chutiang an nih chu ka ring ber, “Hahdam deuh khân awm rawh, hmangaih i nih tawh hi. Hmangaih i nihna huam chhûng ata hi tumahin an la sawn lo ang che” a tihchuan chhungrilah min khawih er era.

A ni tel hian a zunah ka uai thûk tulh tulh ni berin ka hria, a kianga hian ka hlima. Ka him dâwn tih pawh ka hria a ni “Engmah ka hlau lo, ka pasal khawvêla ka mi rin ber bula ka awm laiin eng thil nge ka hlauh ang? Hlauh tur ka nei reng reng lo, ka kiangah i awm chhûng chuan engpawh ka hmachhawn ngam ang” ka tihchuan min kuah nghet sauha.

Keipawhin ka lo kuah lêt ve bawk “Hetiang hian ka la duh dâwn che a ni tih hria ila chuan kha chen kha ka hnar lo tur che, nangnu te reuh hian engkim hi i thunun ta a nih ber hi. Hmeichhe hmelṭha leh chhelo tak tak an tam, chung zîngah chuan i zûna uai hi a na ber hial ang chu” tiin ka hnar hmawrah chuan a rawn chuk zauha.

Ka nui hak hak mai, a chetdan tam tak hi chuan ka nuih an ti za ṭhin, kum 29 ni âwm pawh hian a lang ṭhin lo. Eng emaw châng hian tlangvâl chhuak tir rilru hi a pu leh khauh ṭhin, hetiang khawpa mi hneh thei mipa hi awm leh tak ang maw? An awm ka ring loa, ka duh lo bawk.

Piang nawn leh dâwn pawh ni ila a mah tho hi ka thlang leh ang, ka tân chuan a ni tluk an awm siloa.

“Lo thiin lo piang nawn leh ila, ka tawn leh hma che chu ka rawn zawng duh ang che u Remruat, a hma khân lo haw viau che mah ila ka hre chiang tawh che a. Ka tân chuan hnar theih loh khawpa ṭha i ni, i engkim hian hmeichhia zâwk mah ni ila min hip vek, ka tân chuan i hlu ber” tiin a mal chungah chuan ka ṭhu ṭha sauh sauha.

“Kan haw tawh mai dâwn em ni? Naktuk kha zîngah chhuah kan ngai dawn si a” a rawn tihchuan ka hnial duhlo, “Thlai pawh kha la pack fel kan ngai tak e, hmanhmawh ang hetiang te chuan a chi nâng, kan ṭhiante lah khân engmah tih an tum hmêl siloha” tiin kan tho chhuak zui thuaia.

Khaw chhûng lam pan chuan kut in kai rialin kan lêt dûn a, nuam ka ti ani. Hetiang hian engtikah nge kan awm leh anga, engtikah nge kan lên dun leh ang, kan buai chhoh viau chuan hun thâwl kan nei leh mai mai dawn lo tih pawh ka hria.

Perhpawng hrâm chiah chiah te chu ngaithla in ngawi rengin kan kal duna, kan ngaihtuahna ve ve kan seng a nih hmêl, a awm dân chu ka en leh zawk ṭhin a. Eng emaw ngaihtuah bing tak nei ang mai hian a awm lehnghâl.

In kan thlen tâkah chuan lût thuaiin kan thlai lawh hi chu a dahna tur ka buaipui nghal zung zunga, a ni pawhin min rawn pui ve bawka. “In rawn haw tawh maw? In va rei em em ve in châm hlen dawn emaw kan lo ti tawh a sin, Puia pawh a rawn haw daih tawh ania, hepa lah hian haw a châk hlawl lo” u B-a chuan a rawn tinghal bawrh bawrha.

A sawi ang tak takin u Puia chu a phur hmêl miah loh, a ṭhiante erawh chuan haw an châk tih pawh ka hre reng “Awm hlen mai te ania ka duh, ka chhûngte ka bia anga Ruata te rual hian ka chho leh tho ang, khulama awm reng thei ka nilo. Bul ka ṭanpui ve dâwn chauha, kalsan lehnghâl chu ka duhlo” a rawn ti nghal ta rêng a. 

Ka hriatthiam pui lutuk tlat, an in pawh ve dâwn tân chauha, chutianga an han awm hrang leh tur chu keipawhin ka khawngaih tak zet. Dorothyi pawh a khua a har ngeiin ka ring, u Puia lah hi zantin a lêng lût tih theih lehnghala, chutia an inṭhen angai tur chu ka lainat lutuk tlat.