REMRUATKIMA CHAPTER 1-4

REMRUATKIMA 

BY MAWITEI BAWITLUNG 

CHAPTER 1 

“Tenu i u Ruata hi i nei thei angem?” titute nupa chu ka en kara, an thusawi chuan min ṭhawng hle bawk. U Ruatkima chu ka ngaihtuaha, a thinchhia in ka chungah a sual bawk si a. Ka pasal ni tur atân ngat phei chuan ka duh miah loh chi mizia a nei bawk, insual a hrât bawk si.

“Mahse pa Muan, min duh ve ringawt dâwn em ni? Chubâkah pasal nei tur phei chuan ka lo la inngaihtuah ngai miahlo, keichu in awmpui mai ka ni bawk si. Ka nu leh pa thu lo phei chuan” ka tihlai chuan pa Muana chuan min lo pawt chat vata. 

“I neih angai, i nu leh pa pawh kan be tawha, in chhûngkua pawh in sumdawnna tur kan buaipui sak ang che u. I u Ruatkima hi i hria anga, hmeichhe inzuar ṭhin a kawp aṭanga chhûngkua kan buai zia pawh, kan hmingchhiat lutuk hma hian innei ula, in khuaah awm dûn ula kan duha. Ks a neih ringawt ai chuan nang kan hriat chian i ni a, khawngaihin min hniallo hrâm ta che, i duh chuan in inṭhen leh thei tho va, mahsela a nun siamṭhat nân in khaw lamah awmpui la kan duh ani” an tih leh lek phei chuan hnial dân tur ka hrelo, kan chhûngkaw chungah an ṭha ropui bawk si a, an mahni avânga mite hmuhsit tuar lo a awm kan ni bawk. 

“Khawngaihin Tenu, kan fapa hi i duh lo anih pawhin kan hrethiama, mahsela hetiang reng chuan kan ngaihtuah lo theilo ani” nu Ahlimin a rawn tih ve leh lek phei chuan hnial harsa tak an ni tawh.

An inah hian kum hnih ka awm tawha, ka hlawh pawh Mizoram a mi in a awm ro ro ah chuan hlawh sâng pâwl ka ni bawk. Mi in sangriat lek te an hlawh laiin an ni bulah chuan thla khatah singhnih daih ka hlawh pha a, ramdanga awm ngai lova hetiang ka hlawh pha hi ka lâwm viau bawk. 

An nupa hian sawrkar hnathawk an ni a, tin damdawi dawr lian tak an neih bâkah motor siamna hmun an nei bawk nên hêng te aṭang ringawt pawh hian sum chu an la lût hnem viau bawk. U Remruata erawh hnathawh em em neilo, zu duh ve tak leh zân ah lêng chhuak reng mai a ni a, an hlauhthâwnna hi a âwm ve tho.

Keipawh ka hlauthâwng, chutianga ks kawp phei chu natna ṭha lo te pawh alo kai reng thei tih ka hre ve miau bawk si a.

“Pa Muan, inneihna chu hnial ka hreh a, mahsela chutih rual erawh chuan nangni pawhin ngaihloh lamah ngai lo ula. Inneih dâwn chuan chutianga hmeichhe kawp ṭha vak lo chu thisen test ka duh a ni” ka tihchuan an thaw huai zâwk mai.

An nui zui ta var vara, “Ni e, chhûngkua ngeiin kan kal ho dâwn a nia. Amah pawh rawn haw sela kan lo hrilh ang, a duh lo ngei dâwn a, mahsela a ni thusawi chu engah mah ngaihloh hrâm i tum dawn ania. I hmuh ang hian Kohhran leh ṭhenawm khawvengte pawhin an en kan ni ve a, hetianga kan fapa ber a awm tlat hi kan hmingchhiatna a ni lo theiloa, nang erawh kan hre chiang che a, hetianga a nun a hmanral ai chuan i siamṭhat beiseia ngên tawp che kan nih hi” an rawn ti leh dap dapa.

Keipawhin chu erawh han sawi ve tur chiam ka hre hauh lo, chutia kan lo ṭhut khâwm ṭhap lai chuan kawngka chu rawn inhawngin u Remruata chu a rawn lût ta chhat chhata. Rui chhia hian a rawn haw ngai hauh lova, mahsela zu rim erawh a nam ngei ngei ṭhin thung.

A room lam pan tlang mai a tum chu pa Muana chuan “Remruatkim hetah rawn ṭhu teh” a ti chang faka, u Remruata pawh a rawn hawi lêt zawka, chutia kan lo en ṭhap tih a hriat chuan peih loh hmêl zet hian a rawn phei hnu hnua.

Ka nuih a za lek lek mai, peihlo deuh chunga a kal a ngai tho sia. “Enge ka mu vat duh ania” a ti bul bul chu nu Ahlimi chuan a malah a chum sak nghal sawk mai. A na ve ang chu, a ni pawh a ner ta sawk rêng a, kei erawh ka lo nui ri têt têt mai, a hmêl chu a ṭha mahsela mipa nungchang ṭha leh mipa mizia ka lo duh ṭhin ang kha hmuh tur a awm lo.

Pasal atân ka duh zâwng chu a ni hauhlo, mahsela pa Muanate nupa hi kan chhûngkaw chungah an ṭha bawk si a. An duhdân ang chuan ka awm phawt a ni ang chu, in duh lo na na na chu nupa nun pawh kan hmang kher dâwn lova, mahsela thisen test tir ngei kha chu ka duh. Kan chêng tlâng tawh dâwn miau sia.

“Naktukah thisen test turin damdawiinah kan kal ang, kha hmeichhia kha hmu tawh suh vawi engzat nge ka tih che? Enga tinge i la hmuh fo ni, khatiang mipa duh duhin an mutpui theih kha i la hmuh fo ni?” pa Muana chuan a ti chang fak faka.

U Remruata chu a thinrim hmêl ta viau mai, “Mipa duh duhin an mutpui thei bik lo aw, khatiang khân Maria-i chungchâng sawi tawh suh” a rawn ti ve ta hrawka. Kei erawh ka lo ngawi kar thung, sawi ve tur êm êm ka hre hauhlo, chubâkah an chhûngkaw chungchâng a ni a lo inrawlh ve vak ka tumlo. 

“Ngawi hmak rawh, mi hian nangai an hre chiang zâwk. Tenui nên hian in innei ang, i duh emaw duh lo emaw in innei dâwn tih hria ang che” pa Muanan a tih leh chuan u Remruata chuan mak tih hmêl tak in min rawn ena. 

“Enga! He thingtlâng pitar hi ka nei anga maw?” a rawn ti chu ka lo ngei bawk nên ka ner sak mai, ka duh viau bîk turah a ngai emaw ni? Pitar min la ti lehnghala, ka ngei chi tak a ni. Thingtlâng pitar min ti kher kher chu ka lâwm lo ngei mai, ka hmêl hi ala tar hauh lo, mahni tâwka hmelṭha intih ve em em laia chutianga min ti chu a lawmawm viau loh.

“Khatiangin ti suh, i bialnu ai kha chuan kan thlang zâwk tih hria ang che. In innei khawp ang, i pawm lo a nihchuan he in aṭang hian chhuak la, kan ṭanpuina beisei bawk suh ang che” a ti leh fak faka, u Remruata chu a meng kâwk kâwka, duh lo lutuk hmêl erawh a pu hauh lo thung.

“A ni lo pawh hi neih tur dang an awm lo em ni? A thu hrimah Maria-i in hmuh dân kha a dik hauh lo ania, khatianga duh duhin an mut pui theih a ni rêng rêng lo, ka hre chiang ve tâwk” a ti leh chu nu Ahlimi zâwk chuan ngawi turin a lo ti vata.

A ni lahin a duh silo chu keimah min rawn en in “Kha nu kha neih ka duh hauh hleinem, kan awmpui mai mai lehnghal. Eng thu hmangin nge a lo thlem che u, hetiang hmeichhe ṭhing lutuk chutah mi rethei fanu, kan chhiahhlawh ni bawk” a tih lai chuan a biang a ri sawka.

Kei leh a nu chu kan lo au nghal ṭhat mai, pa Muana chêt dân chu ka rin loh dân ve tho a ni. Keipawhin khatianga a ṭawngkhum kha ka duh hauhlo, mahsela a sawi dik ve tho si a. Neih ka duh bik loh zia hi hrilh chiam mai ka duha, mahsela a nu leh pa ka hmaizahna avângin ka sawi theilo mai zawk a ni.

“Khatiangin i nupui tur zahlo takin ti hauh suh, neih che a duh bîk vâng nilo in kan ngenna avâng zâwkin a nih hi. An khaw lamah in inneih ve in in awm nghal ang, min hnial buai tawh hauh suh, nang leh i hmeichhe kawp avâng hian mite nuihzat leh sawichhiat kan kai tam ta mah mah, hetiang fapa neih hi ka duh lo tih hria ang che” pa Muana bawk chuan a ti leh charh charha.

U Remruata erawh thinrim takin a room lamah a lût zui ta daiha, nu Ahlimi chuan a ûmzui vat bawk. 

Kei erawh tih mai tur leh sawi mai tur hre lo in ka ṭhu ngawi renga, pa Muana chuan min rawn enin “Engah mah ngai suh aw, i nu leh pa pawh kan lo bia anga, in inneih avâng khân i duh lo chung erawh a khawih lui ngai lo ang che, kumkhat chhûng kan en chhin anga chuta a mizia a zirin in inṭhen leh ka phalsak ang che u, chutih hunah chuan a thil tih ṭha lo te pawh a sim ve mahna“ pa Muanan a rawn tihchuan ka bu nghata.

Chutiang a nihchuan keini pawh min thlahthlam dâwn lo tih ka hre bawk nên neih chu ka hnial ta lutuk lo. “Va mu tawh rawh, naktûkah chuan damdawiinah kan kal dawn a nia. A rang lama in inneih theih hi ka duh ber, tûna kan dinhmun en hi chuan inneih vat kha a ṭha a ni” a ti leha, ka bu nghat ringawt.

Engmah a sawi tawh lêm loh avâng chuan ka room lama mu turin ka kalsan zuia, ka room ka pan hnak hnakaj chuan ka inngaihtuah ve nasa mai. A ni khân min nei ta se, lo sualin lo thinchhe viau ta sela ka chân chuan maian chan pawh a tluk dâwn lo tih ka hria, mipa zawkin min duh loh zia a tlângaupui bâwng bâwng tawh bawk nên ka tân chuan awm nuam duh lo tak a ni.

Ka khumah chuan ka muthla a, ka inngaihtuah neuh neuh bawk. Inneihna ka pawm ta mai hi ka tisual ang tih erawh ka hlau viau thung, a zia ka hriat chin lah hi a rawva in a kawlh ropui si a, keimah hian ka tuar phah hrep ang tih ka hlau ṭhin.

In let kual sekin ka inngaihtuah char chara, mutthilh lam pawh rilru ah a awm theilo. Pasal nei tur chuan ka in peih hauhlo, ka kum pawh a la u lutuk hei lo, mahsela an mi ngenna leh ka chhûngte hmakhua erawh ka ngai ve tho si hian ani rilru ti buai ni. An nu nupa lah hi kan chhûngkaw tâna an ṭhat zia leh an mahni avânga mite rual pâwl phaka awm kan nih zia lah ka hai lo.

Chuvanga inneihna pawh kha pawm ka ni berin ka hria, ka muhil theilo chu ka in let kual seka. Engmah ka ngaihtuah thui thei hauhlo, u Remruata lah khân min huat hmêl nasa si a, inneihna pawh kha a pawm chiah ka ring lo bawk. 

Zîngah engkim a chiang mai tur ah ka ngai, ka duh vâng pawh a ni bik lova. Ka lo hlauh viau tur chhan ka hre lo miau a tin ni, chutia ka inngaihtuah reng tâkah chuan ka hriat loh karin ka lo muhil ve maia. 

Zîngah chuan tho chhuakin rawng chu ka bâwl leh mawlh mawlha, Thingpui ka siam fel leh meuh chuan an ni pawh an rawn tho chhuak ve a, u Remruata pawh a nu in a va kai tho a, peihlo tih hriat lutuka tûm bûra a rawn chhuak chu ka nuih a tiza lek lek a ni.

Nidangah kha chuan dar 9 hnu lamah a tho chauha, chutah thil eiin room lamah a awm lehnghâl char chara. Zânah erawh hma takah a lêng chhuak ṭhin thung.

“Tenu chaw ei kha peih hma tum la, hmalaiah damdawi inah chuan kal ang u. A ranglama in test kha a ṭha zâwk, innei vat ula tih hi kan duhdân ania, khi lamah in khaw lamah pawh palai tur kan inzawng hmu tawha. I nu leh pate pawh kan hrilh tawh kha, an pawm lo viau nângin kan ngênna zahin aw min lo pawha, a lâwmawm khawp mai” an tihchuan ka lo bu nghat ringawt.

Pasal nei tur hian ka la in peih bik hauhlo, mahsela kan chunga ṭha em em te kan rulh lêt ve theih hun a ni bawk si.

ZAWMNA 

Chaw ei lai te chuan u Remruata chu a tûm bûr renga, a hlimna zawng zawng an lâk sak ta emaw tih tur khawpin a hmêl chu hmuh a nuam hauhloa. Mahsela pa Muana chuan a ngaipawimawh lo tih hriat takin kan inneih dân tur vêl chu a sawi mawp mawpa, kan khaw lama dân ang ngeia inneihna buatsaih tur a nih thu a sawi chuan ka thaw huai mai.

Hetah nei ngawt ila ka chhûngte an rawn kal kim vek thei dâwn siloa, chutia kan khaw lama inneihna hman an tihchuan min ti awm nuam huai mai.

“A hmeichhe khuaah inneihna maw? Chutah an inah ka awm bawk anga? Ka nu leh pa in ni meuh amaw? In fapa hi hmeichhia emaw min ti em ni? Hmeichhe inah a mipa zâwk ka mo tihna a nih ber dawn chu, ka duh hauh lo a nia” u Remruata chuan thinrim takin a rawn ti a.

Lungawi lo lutukin a chaw bar lai pawh a ṭhulh hmak mai bawk. Nu Ahlimi chuan a lo khap vata, pa Muana bawk chuan “I va mo dâwn a nilo, Tenui te khua a in inneiha i awm avâng ringawtin mipa i nihna a bo dâwn lo. I pa hian engkim ka ruahman sa tih hi hre bawk la, kha hmeichhia i hmuh reng kha ka duhlo tih nên lam, helamah awm ringawt pawh ni ula kha hmeichhia a awm chhûng chuan i nupui i phatsan fo ang tih ka hria, khatiang hmeichhia avânga ka hmingṭhatna i tihchhiat hi ka rem tilo, min hnial dâwn a nihchuan ka sawi ang khân in hi chhuahsanin ka fapa i ni tawh lo thei ang“ a ti bur mai.

U Remruata pawh chuan a hnial ngam tawh lo nge a ngawi zui ta daiha, unau hi pali an ni a. An hmeichhe neih chhunin pasal a nei tawha,  a u mipa te pawh nupui neiin an indang vek tawha. U Remruata hi inpui luahtu tur nimahsela a nundan an duh miau siloa, pa Muana te pawh hian kumkhua a kan khuaa awm tir chu an duh bik ka ring lo.

Mahsela a insiamṭhat theih nâna hetiang ti hi an ni tih pawh ka hria, hmeichhe inzuar ṭhin phei chu duh duh an mutpui ṭhin bawk si a. Hri ṭha lo an kai palh ang tih a hlauhawm bâkah pa Muana te lah mite fak leh awh an nih phâk ve miau avâng hian an thutlûkna hi ka hriatthiam pui lutuk tlat.

Chaw ei khamah chuan pa Muana car khalh ah chuang ṭhap in u Remruata nên chuan a hnung lamah kan ṭhu a “Nang nu hian inneihna hi i tihtawp a ngai, hetiang thil ṭul lo lutuk hi ka nu leh pa te bulah ilo sawi tiraw? Nang hian min duh avânga hetiang ruahmanna lo siampui hi em ni i nih? Ka nupui nimahla ka khawih ngai hauh lovang che” a rawn ti sar sara.

Ka nui sak mai, a ṭawng kam chapo leh induhtawk lutuk hi dah hniam rawih rawih ka châk tlat. “Ka nei duh bik reng reng lo che, nang mi hausa fapa duatsual, awmngaihna hrelo. Zu duh ropui bawk si, i mizia ang hi ka mipa duhzâwng a ni bik lo aw, pa Muana te hmaizah lo phei ila chuan ka nei hauh lo ang che, hri ṭha lo i kai lo ang tih pawh ala hriat loh zui” ka tihchuan a thinrim hmêl ta hle lehnghâl.

“Nang hmeichhia i kâ hi vêng ṭha hle rawh aw, chutilo chu” a tih lai chuan “Bawiha khati khân Tenui kha vau tum hauh suh, ngawi reng khân awm rawh u“ nu Ahlimin a rawn tihchuan a thusawi tum chu a tâwp zui hmaka. Mi sawisak lah chu a châk hmel zek zek mai, ngeiawm taka nuih sawngin “Min nei duh lo viau mah la i mi tih dân avang hrim hrim pawh khân ka nei ang che, mahsela min khawih ngai hauh suh ang che” nu Ahlimi te hriat phâk loh tur chuan ka ti leh hrâm a.

Kan innei a nih phawt chuan hetianga min hmusit reng dâwn a nih phei chuan ka ti duhdah viau ang. Ka chhûngte bulah kan awm dâwn bawk nên ka sual ka chhuah vak mai thei ani.

    Hospital kan thlenga, thisen testna tur lam chu kan pan tlanga, rei a niloa. Rinloh takin u Remruata chu a lo fihlim ve khauh mai, ka thaw deuh huaia, mutpui kher tum lo mah ila chên pui tur a ni miaua, eng emaw palh te pawh a awm theih avânga thisen test duh ka ni a. Ka tisual lo viau bawk, hetiang min hmangaihtu nilo, ka hmangaih pawh ni chuang lo vânga natna tawrh kha ka tum hauhlo.

Pa Muana te pawh an thaw huai tih ka hria, u Remruata erawh ala tûm luau renga, hmelchhe deuh chu nise a hmuh tlâk loh leh zual ngawtin ka ring. 

Damdawi in aṭanga kan haw lamah chuan inneih thuam min en pui nghala, hetiang anga an hmanhmawh ka ring lo bawk nên ka rinloh lam daiha an che chuan keipawh min ṭhawng lo theilo. Inneih kawr lah chu an lo nalh hlawm em em mai lehnghâl, ka duhzâwng min thlan tir tlat avângin keipawhin a puk laih mai leh a bân tlawn chu ka thlang chata.

Aman pawh a tlâwm hauh lo, u Remruata pawh pa Muanan thlang tur a a tih miau avângin lâwm lo zet chung hian a thlanga. A awmdân chu ka nuih a za viau tawh mai, min nei duh lo hle tihna a nia, kei erawhin a mizia avâng hrim hrim pawh hian neih ka duh, a chapona hi tih reh sak ngei ka châk.

Rei pawh awm lo in kan haw zui thuaia, zanin lamah kan in lamah pawh palai an kal dawn a nih hmela. Ka nu leh pa chuan an lo pawm dânah pa Muana te hian thil eng emaw tak an tiam a nih ka ring, chuti nilo sela chuan an fanu hi a hriatchian pawh nilo mipa hi min neih tir hauh lovang.

 In thlen rual chuan room lamah ka indah fela, in bal lâi a awm leh awm loh chu en leh thuak thuakin ka ti fai zui zung zunga. Reilote tal ka mut loh chuan ka mit hi a thip bawk nên ka chauh chhiat pui mai ka hlau a ni.

Chhuat ka nawh zawh leh meuh chuan ka ke tha zawng zawngte chu an na sup sup maiin ka hria a, in chûm dat dat chungin nu Ahlimi chuan châwl turin min lo ti ve bawk nên ka mut lawk tur thu hrilhin ka kalsan zuia, ka room ka lût chiah chu u Remruata lo awm leh avâng chuan ka phu zawka, ka zuang deuh dawrh bawk nên a ni pawh a ner nghâl nung mai.

“Inneihna hi titawp rawh“ a rawn ti lehnghâl panga, kei erawhin ka chhâng mai lo thung. “I hria em? Inneihna hi ti tâwp vat rawh“ a rawn ti leha, a duh leh a mah hian ti tawp mai sela engvanga keichu min ti chiam nge maw a nih le?

“Ka theilo, i nu leh pa in min ngen avâng chauh a nih hi, i duh leh nangmah khân ti tâwp mai la. Min neih i hlau viau a nihchuan i duh leh i bialnu te chu ru mai la” ka ti chu rum zet hian min rawn en leh tawh avângin ka tâwp zui ta daiha.

“Ruk kher ka tum lo, a ni avânga inneihna pawh duh lo ka ni hek lo. Tûnah nupui neih ka la duh lo hrim hrim, kei hian engmah ka ti theilo, ka nu leh pa thusawi kha i hre ve reng a ni lo'm ni? Nang hian i lo duh hluah hlauh zâwk nge?“ a rawn ti leh chu ka dawh thei tawh vak lo.

“En teh ka sawi tawh ang kha i nu leh pa avânga hetiang dinhmun thleng kan ni a, an chunga ka bat ni a ka hriat avâng chauhin ka pawm aw, han duh hluah hluah tlâk i nilo hrim hrim. Nang ang mipa hi chu maw an tam lutuk, ka duh che emaw te i lo ti ange, ka duh bik ṭhak lo che a nia, i mizia leh i hmêl pawh hi ka mipa duhzâwng i nilo nghal” ka ti chu a kut a rawn phar uai tawh chu a tâwp leh chata.

“Nang ang thingtlâng nula ṭhing lutuk hi ka duh bik che ring suh, nang ang tam tak nilo nangai ṭha tam tak hnâwl ṭhin tu ka nih hi. Inneihna hi pawm lo la chuan ka nu leh pa hian min nawr lui hauh lovang, kan innei a nih pawhin ka duh ngai dâwn lo che tih hre reng rawh. I hmêl hi e a tenin ka ten“ a ti leh duaha, a va han ṭawng thei tak.

“A ṭhat chu, min duh rawh pawh ka tilo. I ngaihtuah ang chiah kha ka ngaihtuahna pawh a ni, innei pawh ni ila a hming chauh ni rawh se, mahsela innei kan nih miau avângin uire kha chu tum buai duh suh. Kan inneih chhûng chu uire lo la a nimai, inneih i duh loh viau te chuan i nu leh pa thu awih ve mai la a ṭha tur, i thuawih loh rah chu kei nêna kan tawrh angai a nih hi, ka duh bik vak lo che” tiin ka melh chho ve ar a.

Insual tur kan ang ber tawh, mahsela hmeichhia ka nih avâng nge mawni min khawih duh bik hauhlo. A insual peih zia leh pem a neih ngunzia hailo tu ka ni a, chuti chunga min hnek thal tawp lo hi mipa mâwl chu a ni bik hauhlo, hmeichhia kut thlâk chu a hreh ve hle tih ka hre thiam ve tho.

“Khatiang rilru kha pu reng ang che, ka duh lo chung che a ka neih dawn che avângin uire suh tihvel chu sawi ve lo mai teh. Ka duh duh dânin ka awm ang, sawitheih i nei dâwn hauh lo” tiin a chhuak zui ta daiha, thâwk ka la ham ham mai.

Keipawh hian neih hi ka châk rêng rêng lo, pa Muana te hi zahin an thu hnial harsa viau lo sela chuan ka pawm hauh lo bawk ang. Min hmusit ropui si a, hetiang mipa hi tunge duh bik ang? Kan duh rêng avânga thingtlanga pianga seiliana, kan duh rêng avânga rethei kan ni bik lo tih hi a hrethiam lo nge.

A ni chu a vânnei animai, a pian tirh aṭangin retheihna awmzia a hre ve hek lo. Hei vâng a nimahna min hmuhsit em em ni, duh rêng avânga rethei kan ni bik lova, siamtu in kan tâna a ruat a nih avânga rethei mai kan ni zâwk si a.

Ka mo kawr chu ka en vang vanga, inneihna hi tihtawp leh mai te ka duh rum rum mai. Khatiang khawpa min neih duh lo tu lo neih luih tlat kha ka châk bik viau lo, a chapo in a thinchhe ropui si a, han innei chiah ila min khawih duh maiin a nia ka rin ni.

Thâwk la ham hamin thildang ngaihtuah thui duh lo chuan ka khumah chuan ka mu thla a, hla chu playin mutthilh tum chuan ka chhing zui ta diar diara.

Ka muhîl dâwn tihah u Remruata room lam aṭang ngei chuan thâwm na zet a rawn chhuaka, woofer a ri dum dum mai. Ava han ngeiawm tak, ka va vawm chhiat sak hial dawn nge mawni, ka ngei tak tak a ni.

Lukham chuan ka lu khuhin mutthilh ka tum ngiala, mahsela room lehlam bengchheng lutuk chuan min ti mu thei ngang lo, a va han châk dâwn lo tak em. Ka pasal han ni vaih sela hetiang reng chu kan ni hauh lovang, hmeichhe innocent zawk zawk ka ni bik lo nên a hre dâwn khawp mai.

Nupui sual tak a duh a nimahna, chutiang ngei chuan ka awm dâwn khawp mai.

Muhil thei heklo, lungawi lo zet chuan ka ṭhu chhuak leha, ka chau ngawih ngawih mai.

REMRUATKIMA 

CHAPTER 2 

A thâwm a bengchheng êm avâng chuan lungawi lo zet hian a pindan lam chu ka pana, hetianga a bengchhen reng chuan ka muhil thei hauh lovang. Thâwm bengchheng lutukah ka awm theiloa, ka lu hi a na ngei ngei zel, bâkah ka lung hian a zo ve vaklo, chuvâng chuan punkhawm lam thil reng rengah ka tel ngai lo tih tluk a ni.

A kawngkhâr chu ka va bêng dawt dawta, a la rawn hawng mai lo lehnghâl. Zan dangah pawh zai ngaithla ngai lovin chutia ring lutuk maia a ngaithla chu min runluih duh vâng a ni tih ka hailo, ka bêng ring zual sauha, an inah ka awm rei tawh bawk nên ka hmaizah duh ta bîk vak lo. 

A tâwpah chuan kawngkhâr chu a rawn ri khepa, a hmêl rawn lan rual chuan “I woofer kha i off thei em? A bengchheng lutuka ka muhil thei hleinem” ka ti chu a nui sâwng mai. Ka thusawi chuan a ti hlim tih hriat tak hian a mitmeng te chu a de sawr sawr lehnghâl. 

“Ka room ania ka thu ber, ka duh leh ka play anga ka duh leh ka off anga, engnge sawi tûr i neih? Ka thu thu, va mu mai mai rawh. Nanga mutthilh leh mutthilh lohah ka buai teh chiam lo, kal mai teh” a rawn ti chu lungawi lo zet hian ka ena, ka vaw thlu tawp zâwk dawn emaw ni.

“I pindan nimahsela ka pindanah a rawn ri tel miau a lawm” ka tih lai lai chuan pawi tih hmêl lutuka han awm derin “Aw haw! A va pawi ve, i chawh ve hrim hrim a nihchu.” a rawn ti leh chu ka kut chuan ka tin zuaia.

“Ka nupui nih i châk bawk a, zantin i hre ziah ang. Engmah sawi theih i neilo, min neih i duh lo tih i sawi theih dâwn chuan ka ti tâwp mahna. Nge ni a sum avânga min neih tum i ni tiraw? Ka nu leh pa in dawr siamsak cheu an duh tih ka hria ania” a rawn ti leh chu chhân pawh ka peih tawh lo.

Inher nghata kal ka tum chu ka bânah rawn vuanin a room chhûngah chuan min pawt lût zuia, bangah chuan min nawr betin ka hmai zâwnah chuan a rawn kûn hniama. 

“Min chhâng rawh, sum chu ilo va duh âwm ve a, kan ina i awma i hlawh pawh hi a tam tawh viau i ti lo em ni?” a rawn ti leh khur khura, ka hmui ka pet sâwi nghal nâng mai. Min va han ngai chhe em em bawk ve, mahsela a tân chuan sum duh tihchu a âwm ve tho mai.

“Sum duhlo mihring kan awm hleinem, kan dam khaw chhuah theihna tur chuan sum a pawimawh miau si a lawm. Tikhan a tâwk em? Tin ka neih dâwn mai che avâng hian sum ka duh vâng chauh a nilo tih hria ang che, i nu leh pa in kan pahnih hma khua tur ngaihtuahin an sawi mai mai a nih hi. Min neih duh loh viau te chuan tinge i nun sima, i hmeichhe kawp chu i bansan mai loh?” ka ti ve ta faka.

Ka thusawi tawp lam avâng chuan a bek chu a pawng nghal ṭalh ṭalh a. A thinrim hle tih hriat tak hian min khawih châk hmêl zet hian min en bawk “Nang hian ka duhloh zâwng sawi leh vaih teh, ka hnek duh mai ang che. Maria-i chungchâng khatianga sawi ve ngam tur pawh kha i nilo, in dinhmun a inthlau mah mah. Nang leh a ni chu lei leh vân ang vêl in ni” a tihchuan ka nui hak mai.

Hlauh lam pawh ka rilruah a awm lo, a mize chapo zet hian hlauh pawh a phulo. Melh lêt ve ngatin “Lei leh vân ang chu kan ni rêng alawm, kei vân ka nia i bialnu chu leiah pawh lei chhe chi, khatiang nên min tehkhin ve reng reng suh. Ka rethei chu a nimai thei, mahse i bialnu ai kha chuan mi tam tak nunah ka hlu zâwk tih hria ang che” ka ti lêt ve ta fak faka.

Ka tlâwm duh bîk ṭhak lo, zahlo tak leh hmusit taka min be reng pawh hi ka duhlo bawk. Ka lungawi lo viau mai bawk, thingtlâng ka nihna hi ka zahpui ngailoa, thingtlâng mi ka nih avânga hetianga min hmusit tur hi a ni bik hauhlo. A ni pawh a nu leh a pa avânga hetiang dinhmun thleng thei mai hi a ni, nu leh pa hi kan duhthlan theih a ni miau lova, kan nun hmandan tura Pathian ruat sa chu kan tih danglam theih a ni miau siloa.

Ka lu bul bang chu a rawn bêng dawta, kut min thlâk chu a hreh ve hle a nih ka ring, “Nang hmeichhia leili hriam zet hi, i dinhmun hre rawh aw” a rawn tih leh chuan ka nui leh haka.

“Hria e, ka dinhmun ka hriat avângin alawm hetianga ka awm theih. Ka dinhmun ah hian ka lungawi tâwk hle bawk, inneih i duh loh chuan i nun chu sim la i nu leh pa rinna chu hlawhchhuak rêng ta che. Hetianga awm reng lo hian, i duhthlanna a nih tawh chu” tiin a kut chu dahsawn sakin ka room lam chu ka pansan nal nala.

Rinloh deuhin woofer pawh chu a rawn ti tâwp daiha, ka thaw huai mai. A bengchheng ropui si a, chutia a han reh tâkah chuan beng hriatna a reh nghal duk thei, a play ring ve bawk êm a ni.

Khumah chuan hahdam zetin ka mu a, ka nu leh pa in min rawn call avâng chuan kan in be leh riha. U Remruata nên kan chungchâng te neih ka duh tak tak em tih te chu min rawn zâwt a, mak an tih thu an sawi chuan ka pawmpui viau, in duhna lam pang kha kan inkârah a awm lo miau a, ka nu leh pa pawh hian awmpui ka nihna anga an bula ka awm bâk hriat em em an nei hauh lo.

Mahsela ka tân chuan pa Muana leh nu Ahlimi te hi ka nu leh pa ang tho an ni a, ka chunga an ṭhat zia ka hai miau siloa. Chuvanga tûn a an mi ngenna pawh hi tihhlawhtlinsak tum ka ni, u Remruata erawh ka mipa neih châk chu a ni hauhlo, mipa fel tak leh ṭha tak a nih loh zia ka hmu ve kura, mahsela thinrima hmeichhia kutthlak mai mai chi chu a ni lo tih erawh ka hre chiang viau.

A zu in leh a ngêng lutuk hi a ni ber mai iaina tur chu, chubâkah a duh loh lakah chuan a chapo mah mah bawk. Ka nu leh pa bulah chuan thil nihna dik tak chu ka sawi nawn leh ngata, chutia kan khaw lama kan awm tur thu ka sawi chian tâkah chuan an ni pawh an lung a dam ve deuhin ka hria.

An ni pawhin pa Muana te hi min khai dingtu an nih miau avângin hnial an hreh tih ka hria a, chuti nilo se an fanu hi hetiang in hmangaihna avâng pawh niloa pasal nei tur hian min duh bik dâwn hauh lo tih chu hriat sa a nia. Mahsela pa Muana te avâng liau liauin kan khawsak a nawm phaha, ka naute pawhin school an kal theih phah bawka, kan chhûngkua pawh kan lâwm viau a nihkha.

Ka pa hi a hrisêl loh avângin hna a thawh theihlohna a rei tawha, chuti nilo sela chuan mi ina ka awma ka inhlawh kher hi a ngai bik hauh lovang. Mahsela kan tâna Pathian remruat hi kan dang thei siloa, hmalam hunah erawh chuan thil ṭha tak min buatsaih sak ve hi ka ring a ni.

Call kan dah hnu lawkah chuan hahdam zetin ka muhil zuia, mang nuam zet ka mang lehnghala. Ka harh laklawh lutuk erawh ka ui viau mai, mutthilh leh nân chuan a tlai laklawh tawh bawk nên ka tho chhuaka, ka ha te nawtin ka hmai te chu ka phih faia, thingpui lum leh te te in chaw chu ka chhuang zuia. 

Ka buai leh tawh viau, an inchhûng a lian ve pângngai bawk nên pakhat tân hi chuan rawngbawl leh inchhûng chêt vel nên zawng zawng nên chuan an hahthlâk ve takzet.

Mahsela ka awmnate hi an fel êm a, hrehawm tihna erawh ka nei ngailo. Nu Ahlimi pawh reiloteah a rawn tho ve a, min pui ve leh nghal bawrh bawrha, kan pahnih chuan kan titi mawlh mawlh bawk.

“I chunga kan thil tih hi a ṭha lo viau tih hre mah ila keichuan kan mo atân hian kan iai hauh lo che ania, i u Remruata hi duh tum la. Nang chuan ṭha takin i enkawl thei dâwn tih ka hria a ni, ani pawhin a la duh vat che ka ring, ka fapa hi sual thiam in ngêng viau ṭhin mahsela chhûngril lamah chuan a nemin a rilru te hi a na hma a, a rilru te hi a chhe miahlo ania aw. Nakinah chuan a hmeichhe kawp ai hian ala duh ngei ang che, tûnah rihchuan a duh emaw a inti mai mai a nih hi, hmêl in hipna satliah hi a awm ve ania, a mizia ka hre chianga, hmangaih avânga kawp a ni hauh lo ania” a ti dap dapa.

A sawi dikin ka ring, hmangaih chu nise an innei daih tawh ang. “A pa in a tuina lama kal a phalsak loh aṭang khân zu hi a in ṭan a, a duh avânga in chu nimahse i pa Muana a runluih duh avâng zâwk hi a nia. A hma te chuan mipa naupang fel leh thu âwih thei tak kha a nia, Basketball khelh hi nuam a ti thei em em a, mahsela i pa Muana hian a phal silo kha hetia a awm chhan hi a ni ber ang chu” a tihchuan ka bu nghat nghata.

Chutiang lam daih daih chu ka la hriat ngai hauh loh thil a ni, a sual ve vang hrim hrima zu in ṭhin hi a nih ka lo ring ve kha a nia. Ka rin ang chu a lo ni chiah lo a nih hmêl, a pian leh amah ka ena, Basketball player tur atân pawh a ṭha ta khawpin ka hria.

Mahsela amah ka ena, chûng a nunhlui chu tûna mi nên hian an dang khawpin ka hria, mahsela ka hriat chin chauha ngaihdan siam tur ka ni lo miaua. 

A pa nên an rawn thawh ve meuh chuan chaw ei kan lo peih vek tawha, u Remruata chu nimin lam ang bawkin a tûm leh bur tawh mai. Tlangvâl hmelṭha tak a ni a, hetianga awm mai mai tur hi chuan a inhmeh lo hle hian ka hria.

Puitling tak a ni tawha, a kum ngaihtuah phei chuan a mizia hi a inhmeh lo ka ti. “I nute'n vawiin lam aṭangin kohhran lehkha an lo tar anga, keini hmakarah kan chho dawn ania. Indawr tur te chu kan buaipui hmasak angai ang chu, in khaw mite pawh lo inhmelhriat tir sa a ṭha ang, tlangvâl fel deuhte zawng ila a ṭhian kawm pawh thlâk vek rawh se” pa Muana chuan a timawlh mawlha.

Kei erawhin engmah ka sawi lêm lo, “Ka awm lo ang maiin ka chanchin sawi suh” u Remruata chuan a tihmuka, kei erawh ka lo nui ru têt têt mai.

“I awm leh awm loh thusawi a ngaih reng avânga sawi ka nihchu, nupui ṭha tak leh chhungkaw ṭha tak i nei dawna, a kawhmawh bâwl zawngin awm hauh suh ang che. I chanchin ka rawn zâwt reng dawn ania, chuta ila ṭha theilo a nihchuan home-ah dah mai che pawh ka hreh lo, nupui i neih chuan tûna i nun zawng zawng hi kalsan ang che” a ti leh hmaka.

“Ka kalsan lovang, ka duh ka neih theih loh laiin engvangin nge ka duh miahloh hmeichhia chu duat takin ka enkawl lêm ang ni” u Remruata bawk chuan a ti leha, ka chaw ei lai chu ka tâwp data.

“I duh hmeichhia kha kan duh bik lo tih hi hre rawh, sawi nawn fo ngai suh se. Khatiang hmeichhe inzuar ṭhin i neih dawn ai kha chuan he in aṭang hian chhuakin ka ṭanpuina beisei suh ka tih tawh kha” khauh far hian pa Muana chuan a ti ta bawla, a aw chu nelawmna reng reng a tello, u Remruata pawh chuan a chhâng tawh hauhlo, thinrim zet hian a tho leh ta nge nge e. 

ZAWMNA....

U Remruata chuan engmah sawi buai a nei ta loa, a tih tauh pawhin a nu leh pa rilru a thlâk theilo tih a hria te pawh animahna engmah a sawi buai ta lo, keipawh ka inngaihtuah nasa lutuk duh ta lova, misual tak a ni bik lo tih ka hre tawh bawk nên ka pasal pawh nimahse a pawi ka ti ta bik lo.

Chutih rual erawh chuan a zu in hi bânsan thei sela chu ka ti, kan khaw lama kan chhoh dâwn tawh avângin a ṭhiante chu a ko nge an rawn lêng hlawma. Inah chuan an ri nuaih nuaih reng mai, kha a bialnu ngeia an sawi pawh kha ka hmu a, a chhan pawh an inkuah deuh chawta, nuam an tih hmêl hliah hliah bawk. 

Pa Muana leh nu Ahlimi lah hna an kal daih bawk nên an tân chuan a nuam viau rêng ang chu. Mi tirh ve phêt an tum erawh ka ti duh bik hauhlo, pa Muana te ka hrilh an hlauh vâng nge min tir lui duh bik hauh lova, in ka tih fai zawhah keipawh chu ka room lamah ka in khung daiha, an kianga awm chu ka peih meuhlo.

Ka muhil dâwn siar siar tihah tu emaw hian min rawn sawi nawk nawka. Ka men chhuah rualin u Remruata ka hmu nghal zat bawk, enge a duh leh pek ni “Enge a?” ka tih rualin ka bulah a rawn ṭhu thla a “Ka mitah hian eng emaw a lût en teh maw, hmanhmawh rawh a hrehawm ania” a rawn ti leh chûl a.

Vak vak chuan a, ka chhêm parh hawk dâwn emawni. Ka ṭhu chhuaka, a mit ka en rual chuan lung nawi hi a mit hnuai lamah chuan a lo awm nuala, chutah ka kuttin chuan dim te in ka lâk saka. Thil danga lâk chhuahna tur remchâng awm heklo, a mah lah chu a mit a lo khap zêl bawk nên kan han inhau leh rih thûl.

Hetiang em ema mit dawih mai, ka kutah chuan a rawn vuana. “Ana lutuk, dim ve ta che” a rawn ti bak hluka. “Ka dim ve reng, i mit kha khap zawm reng lo la a na lo mai ang, i khap reng chuan lâk chhuah a har a lawm” ka ti ve ṭhat a. 

Mi mah buai ve nak alaia chutia min vin reng chu ka ning, ka lâk chhuah zawh fel tâkah chuan ka mu ṭha leh sat sata. 

“Chhuak tawh rawh a awm tawhlo, tikhan min rawn tibuai hauh suh, rawngbawl hun hma ka mu ve duh“ tiin ka insiam rem sauh sauha, an ina ka awm rei tawh bâkah amah ka hre chiang bawka, chutianga han hmaizah vak ka tum tawh lo.

Ka ngei ve tlat bawk nên zah taka biak ka tum tawh der lo, an ina ka awm tirh kha chuan ka be hlau ṭhin a. Amah kha a nelawm loh bâkah mi han be lum lâm chi a nih loh avâng khân ka be duh ngai meuhloa, a ṭul tâwp ah lo chuan thil zawh pawh ka nei ngai lo.

Mahsela tûnah chuan ka awm rei ve tawh bâkah kan inneih tur boruak hian alakah pawh min ti danglam ve deuhin ka hria, a chhuah hnu chuan ka phone ah chuan hla ngaithla in ka mit chu ka chhing zui leh ta thuaia.

Ka inngaihtuah leh neuh neuha, tihian mi inah inhlawh in ka awm ve tawpa. Chutah ka beisei ngai miahlohin pasal ka nei thut dâwn chu a ni sia, chuta kârah ka awmna te fapa ala ni zuia, hetiang thil hi a awm khât viauin ka ring. Chutah hmangaihna avâng a la nilo zui! Ngaihtuah chian hi chuan ka â ka inti a, mahsela min ngên ve miau bawk si.

Ka inngaihtuah chhûng chuan hriat loh kârah ka lo muhil veleh maia, ka harh leh meuh chuan rawngbawl a lo hun mah mah tawha. Tho chhuak vatin ka in phih harh sawk sawka, chaw hmeh erawh zîng lama ka siamsa kan ring thei dâwn bawk nên chutianga siam tur a tam lo hlauh chu ka vânnei.

Che zung zungin chhuat an rah balh leh tawh chu ka hrut nawn leh thuak thuaka. U Remruata ṭhiante pawh an hawna a rei tawh a nih ka ring, chutia chhuat ka lo nawh lai chuan a ni pawh inchung lam aṭangin a rawn chhuk a, a sam a thur hiang mai. 

A muhil ve tho tih ka hre nghâl, a lên loh hi chuan a mu reng zela. Tlangvâl chutah pawh naupang lutuk tawh bik lo chu hna te zawna thawh ve âwm tak ania, mahsela a nu leh pa hi a ring nge mawni hna thawk hian a chhuak ngai lo rêng rêng. Ka hriat dânin lehkha a thiam theiin a ti ṭha ṭhin hle tih pawh ka hria a, chutiang a kârah hetianga a han awm mai mai chu mak ka ti.

Keichu ni ila chuan hna ka zawng anga, mi in a awm kher ngai lo hian ka awm thei tur. Mi chuan lehkha zir te kan châk a, hna ṭha tak neihte pawh kan châk em em laia, ṭhenkhat tân hi chuan lehkha zir pawh hi an ti ve mai mai niin ka hre ṭhin, hna nei chuang silo hian an hunawl hnawh khah nân an hmang ni berin ka hria.

Keini in tihian vawikhat mah college la rap ve lo chu mi college kal tur kan hmuh te hian kan thlir zui vawng vawng ṭhin kha a nia. Ṭhenkhat anga ṭhiante nên lên ho ve a, hlim taka awm te pawh hi ka châk ve ṭhin, mahsela dinhmunin a zir miau loh hi chuan rualpawl lo a chhûngte tâna theihtâwp chhuaha kan thiamna in a phâk tâwk thawh mai hi a ngai bawk si a.

Miin ei sen loh an neih laiin ṭhenkhat erawh hi chuan ei khawp ngawr ngawr kan nei leh ang lawia, hmeichhia ve ve pawh hi dinhmun avâng hian mipa te mit kan la in kan la lo ve nimaiin ka hre ṭhin. Mi hausa faten thawmhnaw changkâng leh nalh tak tak an inbel theih laiin keiniin hak atân pawha an duh zen zen loh kan inchei nân kan hmang thunga, an pheikhawk chhia an tih tawh pawh keini tân erawh ala bun theih chhûng chuan bun a ngai ṭhin si.

“Enge i siam? Artui leh tomato kha kan pawlh rawh aw” hnunglam aṭanga rawn ti tu avâng chuan ka inher zawka. Min lo din hnaih mah mah avâng chuan a âwmah chuan ka in tauh lo chauh a ni, dâk ha hian ka en chho a, mit siai nâng hian min lo en ve bawk.

“Zing lama siam sa kha a la awm ṭeuh a, chawhmeh siam belh pawh a ngai dâwn em ni?” ka tih lai chuan a kut a rawn vai hluka “A chhawrtu che ka ni a, ka tih ang chu timai rawh. Ka nupui i la niloa, kan awmpui i la ni tlat“ a rawn ti chu ka chhâng tawh lo. Mahsela ka ngei takzet, chutiang zawng khera a rawn sawi leh chuan ka tha a ti na et et bawk.

“Aw le pu Remruat, ka lo siam dâwn ania. Ka pu aieng ka pawlh dawn nge ka pawlh dawn lo?” ka ti ve saka, ka thusawi avâng chuan a ni pawh chuan lâwm loh hmêl zetin min en ve bawk

“Pu a? I pu rual ka ni em ni? Engvanga khatianga min ko kha nge i nih?” a rawn tihchuan ka nui deuh hak haka, enge maw a ni pawh a ngeiawm thiam chuan keipawh ka ngeiawm thiam loh ang ni. A in la thu bawka hetianga tih ve hrim hrim pawh hi a phu, kan khua a a awm hunah chuan a châk lo mai mai ang chu.

A thawh theih loh tur hlir ka thawhpui dawn khawp mai, engtiang pawhin thiamlo mahsela ka thawh tir tho tho ang. 

“Ni e awmpui chuan a awmna te chu ka pu ka pi an ti ṭhin alawm, chuvang chuan in awmpui ka nih thu i sawi ngun bawka ka pu i ni mai a lawm. Pu Remruat lo awmsawn la, i artui leh tomato chu kan kang tawh ange aw?” ka ti kher chu ka dâr ah rawn vuanin min thing ta nawk nawk mai.

Ka ring lah chu a ri ṭhawk mai lehnghâl, ka aiah ṭhat mai. Min thlah rual chuan lâwm lo zet hian ka ena “Tinge khatianga min thin vaka? Ka sawi dik lo em ni?” ka tihchuan a thaw leh deuh hawka, “I hmui hi i chip tir lo a nihchuan ka chip tir khawp ang che” a rawn ti deuh hmuka, a aw chu a chang ṭha beng bawng viau mai.

Mahsela ka hlauh phah der lo “Engah nge ka chip tir kher ang, nangmahin i sawi avânga ko mai che ka nihkha. Ka tân chuan ka pu i ni rêng alawm, khawi ka hmanhmawh a nia, a tlai tawh” tiin ka inher san nghata, a ni pawhin min ti buai tawh bik lo.

Thildang chu chhuang lum hmasa in a thil duh pawh chu ka kan saka, nu Ahlimi te an rawn haw chuan ei rawngbawl ka lo peih fel vek tawha. Vawiin tlai chu mikhual kan nei dâwn a nih hmêl, nupa hian an rawn zui haw a, mahsela chaw ka lo chhûm tam hlauha, chhum nawn a ngai dâwn lo hlauh mai.

Chaw ei chu ka siam zui sawk sawka, zanlamah an lên chhuah leh dâwn avânga hmanhmawh an ni bawk nên keipawh ka buai viau mai. U Remruata chu min puih tira, a nilah chu chaw ei siam pah chuan a phun char chara, lungawina hi chu a neilo ve thlâwt.

Lungawi lo thei ber award hi siam sela a dawng chiang viau in ka ring. Chaw ei lai chuan nu Ahlimi te chuan an lên chhuah chhan tur chu an sawi mawlh mawlha, chhûngkhat laina ho kan inneih tur hrilh hriat an tum a nih hmêl, an duh ran êm avângin an la hrilh hman lo a nih hmêl a, kei erawh chutianga chhûngkua nên zawng zawnga han hrilh chu ka duh chiahlo.

Kan inneih chhan tur lah chu induhna leh hmangaihna avâng pawh a nilo lehnghala, chutianga chhûngte nên zawng zawng chuan a zamawm ve riau hian ka hria, kan inṭhen leh nghal theia, u Remruata awm dânin a zir ngat phei chuan kan inṭhen rang viau thei bawk. 

Chutianga mi tam tak hriata inneih chu ka huphurh riau mai, hre tu tam lo sela kan inṭhen pawhin mualpho a na lo nge nge in ka ring bawk.

Mahsela engmah ka sawi chuanglo, an mahni ngaihdan a ni a. Keiin a lo sawi theih chiam ka nei miau silo a, chaw eikham chuan thleng chu sil leh sawk sawkin hmun ka phiah fai zawh chuan mu turin ka room lam ka pana.

Zanin chu u Remruata pawh pa Muanan lêng chhuak lo tura a tih avângin lâwm lo zetin a room lamah a awm ta kha a nia. Nui hmêl hi chu a pu khât ve bawk a ni, a hmêl en hi a hahdam thlâk miahloh. Tunhnai tê aṭanga chu chu inṭan a ni bawk, a bialnu chu a hmangaih viau a nih ka ring, mahsela a nu leh pa hian an pawmpui thei miau siloa.

Keimah min hua pawh hi a âwm ve tho, a bialnu nên an inṭhen phah chhan tur ka ni miaua. Min haw viau pawh nisela a demawm hauhlo, pa Muana te hi kan lakah felin min pui nasa viau lo sela chu inneihna hi ka pawm kher lo ang. Mahsela intiam kamna ṭha tak nên a an tih avâng hian ka tân pawh ka chhûngte bula awm ka châk ve bawk nên ka hnial ta lo kha a nia.

Room lehlama hla play leh vak vak tawh avâng chuan ka muhil thei meuhlo. A hla play lah chu hla dukdak lo pui pui tenawm deuh deuh hi a playa “A lungphu ka hria ka ding lamah dimte in ka hmer ṭan” a dang chu sawi chi pawh a nilo, hla rapthlâk tak aniin ka hria.

REMRUATKIMA 

CHAPTER 3 

“Vawiin aṭang hian nupa in ni tih ka puang a che u, Pathianin a zawm tawh chu mihringin ṭhen suh se“ ti a kan pastor thusawi chuan engtin emaw tak hian min khawih danglama. A innei a te lah hi induhna leh hmangaihna awm lo in kan innei chu a ni si a, Pathian leh kohhran hmaah ngei thu kan tiam chu a ni sia le.

Kan khaw chhûng mite tih loh chu u Remruata te chhûng an rawn tel ve nuala, Biakin chu kan khat ve tho mai. Kan inneih chhan chu eng pawh lo nise mipui rawn tam lutuk chu ka beisei loh lam daih a ni, kan khaw mite lah chuan pasal ka neih ṭhat thu leh hmêlṭha an tih thu te, a fel an tih thu te an sawi nak nak reng lehnghala.

He michimawma mizia hi an la hre chiang lo a, a âwm ve tho mai. A hmêl hi a ṭha vawra, a fel hmêl ve êm lah taka, mahse a mize chimawm lutuk hi tumahin an la hmu tlat lova, an tan chuan tûnah rihchuan pasal nei ṭha tak leh awhawm tak ka ni miau ani.

In lamah pawh hun rei hmang lo in ruai kan ṭheh zuia, u Remruata nên chuan mi hmuhah kan inbe lui a ni ber mai. A ni pawhin mi hmuhah chuan in biak chhiat a duh bik lo ania'ng, ṭawngkam ngeiawm a la chhak chhuak hauhlo. 

Zanlamah erawh pindan khatah kan awma, khum khata mu siin kan in hawi lo ve ve a, mahsela khum a lian lutuk lo nên taksa erawh a intawk lo theiloa. A taksa lum thar thar pawh ka hre chiang viau mai, keichuan ka pasal a nih tawhna angin engkimah a thu ngaihchân ve erawh ka tuma, mahsela a ni rilru hi engtin tak awm ve ang maw.

Zîngah chuan kan chhûngte ho chuan ro an rêl nak naka, dâwr tê pawh kan siam tawha, tûnah hian kan nupa in tur ka putea te in luah tawh loh kan thawm ṭhat chu kan luah dawn a, chu erawh naktuk lamah kan in sawn lut dawn thung.

In leng kan la nei renga, min lawmpui paha u Remruata hmuh nawn leh tuma rawn lêng pawh an tam viau mai. Nula ho ka ṭhiante takngial pawhin min thik thu an sawi leh ṭhin, kan inneih chhan ka hrilh lêm loa, ka ṭhiante mah nisela tûnah chuan sawi loh hi a him berin ka hria.

Ṭhian pawh hi in tithiam lo thei kan ni veleh ṭhin a, tûna tân chuan ngawih rih mai hi a ṭha in ka hria. U Remruata nên chuan pâwnlamah midang chu kan kâwm a, a nin hmêl tawh viau nângin engtin mah a sawisêl lêm bikloa, mi kârah chuan a lo inthup thei viau mai.

A ṭhiante pawhin an rawn zui veka, mi hausa fapa duh duha awm thei an ni hlawm bawka, haw vat chu an tum hmêl loh. A ṭhen kan inah an la awm anga, a ṭhen kan nupa in luah thar lamah an awm ve dâwn thunga, tûnah pawh kan in puiah chuan kan khat ṭha viau mai. 

Chutiangin an ni angin in zau ṭha tak kan neilo bawk nên kan in chu a têt hmêl leh zuala, mahsela naktukah an haw nghal dâwn avângin kan tân chuan a lawmawm lam mah a ni. An ni anga in ṭha kan nei ve siloa, a lehlamah chuan a zahthlâk ve tak zet, khawpui mi hausa hetiang inah vawikhat mah la chêng ngailo, kan bungruate pawh in thlau tak tak a nihzia ka hriatchian tawh avâng hian tlêm chuan a zahthlâk ve deuh.

Ka ṭhiante nên in kawma kan nuih hak hak lai chuan u Remruata pawh a ṭhiante nên chuan hmun fâl deuhah awmin an in be khâwm a, eng thu tak sawi hlawm ang maw? Thil ṭha tak erawh an sawi ka ring lo bur, min neih chhan hi an hre ve vek dawna a ṭhiante pawh hian min ngei viau mai thei a ni.

“Mo fel tak kan hriatchian em em mai kan nei tur hi kan lâwm hle a sin, nakinah fate an la neih ve phei chuan kan fapa pawhin puitlin lam a pan awk awk mai ang. Naupang ber a nihna ah hian duat rawn a ni ṭhin si a, tûn thlengin a rilru hi a puitling thei tak tak lo a, in lâk hrethiam hrâm hrâm zel a ni ang chu. Chutianga enkawl har erawh a ni bik lo ania“ tiin pa Muana kha ka nu leh pa bulah a sawi nghe nghe a nih kha.

“Ka awt che e, hetiang hi chuan keipawh tlangvâl hmelṭha awmna inah awmpuia awm pawh ka hnial ta miahlo mai, mahsela nangmah ang hian ka vânnei kher awm siloa. Kan khaw ho hian an awtin an fak teh mai che a nia aw, i pasal hmelṭhat zia leh  chhiat loh zia hi an sawi reng tawh ania” Dorothyin a rawn tihchuan midang pawh chuan an lo sawi zawm zata.

Kei erawh ka nui liam mai thung, a hmêl chu a ṭha lo ka ti biklo. Mahsela min hmusitin min ngei êm a, hetianga awmpui hi châk viau bik lo mah ila ka tâna ṭha em em te dîlna hi ka hnar thei bik silo a le, “Sawi tawh ang u, khawvêlah a ni aia ṭha pawh an tam a lawm, a ni te chu engmah a nilo”  ka ti chu in en hrek hrekin an mitmeng chuan an in hrilh nimai hian ka hria.

“Khatiangte chuan sawi lo mai teh, mipa hmêlṭha chu tam mahse an neih vek theih bik loh hi. I vannei alawm, an la hausa em em zuia, helamah in awm dâwn chuan hnathawh i zirtir nasat hle a ngai ang a? Engmah a thiam ka ringlo, amah lah saw a no sur bawk sia” an tihchuan ka nui ve ta haka.

Chu erawh sawi loha chiang sa a ni, hnathawh ve ngei ngei ka duh dâwn si a, chubâkah ka laka a thusawi ṭhin avâng khân hrehawm taka awm tir ve chhin chu ka châk zek zek mai.

“Tihian mi inah i zuk inhlawh emaw tih laiin an fapa i rawn thur chhuak nalh mai ania, i vânnei ngawt mai. Hetiang hi han ti ve dâwn ringawt ila kan tawng ve kher dâwn bawk silo, saw tiang anga pasal hmelṭha ka neih dawn chuan lên tar ka tum pawh hi ka ṭhulh huam zak” Amuani chuan a rawn ti ve bawka, an ni hi chu thawnthu an chhiar in an ngaithla tam lutuka, thawnthu mipa ang tawn an tum tlat bawk nên an lêng tar ang tih ka hlau ṭhin.

An mahni lah hian lên tar an inhuam nasa mai bawk si a, hmeichhia thawnthu tuipui reng reng hi chu ngawi chet chet si hian an duhtuia, thawnthu mipa ang kha tawn an tum tlat avângin an mahni bem tu satliah te hi an duh hauhlo, a châng leh bad boy, a châng leh mafia, a châng leh pathlawi, a châng leh zirtirtu, an duh zâwng hi an ngaihthlâk mil hian a inthlâk zuta, bad boy leh mafia phei chu han nei ve tak tak dawn se an thinchhe ve bawk nên an duk chur zêlin ania ka rin ni.

“Thawnthu ang kha chu an awm tak tak dawn lo, kan Mizo mipa mizia ngêng leh mahni tâwka in la pa, thu duh ṭawng thei leh engkimah hmeichhe hna ti zet zet awm âwl em em ṭhenkhat te ho nên phei chuan maw khatiang thil kha chu in tawng lo ang, keipawh ka sim tawh. Thawnthu ang hi chu kan tawng ngai dâwn lo, kan tûnlai mipa hian hmeichhe rilru pu an tam tawh lutuk, chuvang chuan famkim lutuk chu zawn ka peih tawh lo” Ririi chuan a rawn ti ve bawka, a sawi dik ve viau mai.

Ngêng leh thu duh tihah chuan tûna ka pasal nita, Remruatkima hi a tel chiang ang chu. Hmaih phal chi pawh a nilo, a tel chiang lutuk tlat, a lam ka hawi lai chuan ka lam a rawn hawi ve chiah lehnghala. Kan inmelh fuh rual chuan rum mangkhenga in en dunin kan ṭhiante ve ve hmuh loh lamah chuan kan intin nasa mai.

Hepa hi ka chenpui dâwn chu a ni si a, nitin kan insual anga kan duk cher chur lo ang tih pawh a sawi theihloh, tûna a mizia nên phei hi chuan e ka duk chur zêlin ania ka rin ni. In luah hran an ti ve tlat bawk nên chutiangin ka phûr hauhlo, mahsela a mizia ka hriat dânah erawh hmeichhia kut a thlâk ngailo tihchu ka hre ve a, chu erawh chuan tlêmin ngaih a ti ṭha deuh.

Ṭha tak te chuan han awm sela pasal atâna iaiawm miah loh chu a ni ve a. Mahsela a mah hian min hua in a ngeiawm thiam êm a, hei hian keimah pawh min ti hel leh ṭhin, ti chung hian min châwm ve dâwn chu a nia. Rilṭamin kan thi em bik lo turah ngai phawt ang, ka nute bâkah a nute an la dam ve ve bawk nên an ni an awm chhûng chuan ka lungngai lutuk duh biklo.

Ka thaw haka, ka nute'n inchhung lama lût tura min auh tâkah chuan kan inzui lût ta diaka, “Hei naktukah hian i pate hi haw an tum tawh si a, vawiin lam chu in nupa bungrua tur te pawh en ho ila, naktukah in dah luh zawh veka in luah luh nghal mai te pawh a ngai ang chu, zaninah in ar vulh tur te pawh kan man anga, Vawk pawh vulh tel ula, tûn ang laiah chuan Vawk vulh a hlawk ania, Remruata lah hi thingtlâng hnathawk nghal tur chuan a laktlak rih dawn siloa, chutiang chu kan ngaihtuah hmasak a ngai ang” an tihchuan ka bu nghata.

Hnial buai em em pawh ka tumlo, an duh duh han ti phawt sela, pa Muana te rawt chhuah leh a nih ka ring zâwk. An fapa hi hrehawm taka a awm chu an phal dâwn lo tihchu hriat sa a ni a, hetia ka pa thusawi hian a ti chiang lehzualin ka hria.

“Vawk vulha? Ka peih teuhlo mai” rawn ti nghal hlar tu u Remruata lam chu kan en ṭhapa, a pa chuan a melh rum leh tawh viau mai. 

“Lo neiin hlo i thlo thei nghal dâwn em ni? Fuu lo mahla i vulh tho ang, in nu ringawt te hi i ring a nge, pawisa kan rawn thawn mai mai dawn hauh lo ania. Mipa i ni a, i nupui chu hahdam leh nuam sa taka a awm theih nân hma i la thei tur a ni, ngaihtuah sa lehnghâl pawh i tih peih loh chuan chaw in nghei reng a nimai” pa Muana chuan a ti leh fak faka.

Mihring an awm tawh lo a, ka nu leh pa bâkah ka unaute leh pa Muana te, kan ṭhiante chu an ni tawh mai.

U Remruata chu a lâwm loh hmêl takzet “Dawr in siam tawh renga, saw pawh sâwn min enkawl thei hle ang chu. Chutiang Vawk leh ar pu nih ka duh rêng rêng lo” a lo tih leh lai chuan a ṭhiante bâkah ka ṭhiante chu an lo nui deuh haka, an nui ring ngam hauh lo thung.

Ka ṭhiante phei chuan an hmui an hup bet far mai “Zo artui hi a ṭha a sin, i zu in kha sim hmak bawk la. Patling taka awm tum ang che, naktukah kan haw nghal dawna, pu Hming a sual deuh chuan min rawn hrilh hreh lo ula aw, thu âwih deuhin Remruatkim awm ang che, sawi nawn ngai tawh suh se. Naktûkah chuan in thiar lût nghal thei ula a ṭha, in dan nghal kha a pawi reng reng lo” a tih leh chuan u Remruata chuan a chhâng tawh lêm lo.

Kei erawhin engmah sawi buai ka tum loa, an remruat chu hnial chhin eih ka tum lo. An sawi dik vek miaua, bâkah ran vulh kha chu ka tum sa hrim hrim a ni bawk.   

ZAWMNA...

A tûk lamah chuan kan in thar tûrah chuan kan insuan lût a, bungbêl kan ngah ve bawk nên in luah thar chauh e tilo in kan inchu thil a awm chikim nghal viau mai. Kan dawr pawh kan inbul maiah a awm sa bawk nên in nên pawh a in kal pawh zung zung theih dâwn avâng chuan a remchâng takzet.

Damdawi kan zuar tel dâwn bawk nên kan khua hi a la len loh avâng hian dawr lian a awm mumal lova, kan inhralh theih ka ring ve tawpa. Anuam phian in ka ring, ar vêl pawh a in sak sa ah dah lûtin kan buaipui mawlh mawlha, Vawk erawh chu a in sak hmasak a ngaih avângin putea te ho in muangchanga la tih tur in an la sa loa, nakin lamah a in sak zawh lamah kan la chauhin ka ring.

Midang haw hnuah u Remruata erawh a ṭhiante nên chuan engmah tih tum lêm lo in games an khela, an au vak vak mai. An puitlin ve tawh tehlul nên an  rilru hi ala naupangchhia ka ti tak tak, hetiang renga an awm phei chuan an hahthlâk viauin ka ring, u Remruata phei chu mipa puitling tak a ni a, hetiang lâwm rual a nih ka rin loh nên.

Hma hun hi a lo hriat loh takzet a, kan mi tawn tur leh neih tur pawh kan hre sa ngai siloa, rinloh lamah hian a rawn lang thut zel a nih hi maw. 

Tlai lam ei tur chu ka siam zui mawlh mawlha, chhûnah kan buai rei bawka khua a lo tlai leh ruih tawh mai. Zanin aṭang chuan inkhatah nu ber dinhmun ka luah ta dâwn chu a ni si a, ka pasal lai a engkim ka hre chiang tawha. A thil ngainat chenin, “Rin loh deuhin Dâl hi a duh bera, bai thak a ngaina hle bawk, mipa tam takin thak an ngam loh viau laiin a ni erawh thingtlâng mipa ang mai hian thak a ngam viau mai.

A duh ber tih hria in dâl chu ka kan sak leha, an ni erawh games chu an la khêl char chara. An lu leh mit te a na ve lo nge mawni, kei erawh ka en zâwng ringawt pawhin lu ana bur mai. Ar chaw chu an in chhûngah pe in chhuah an la ngam awm loh avâng chuan ka la khunga, nihnih tal khung an ngaiin ka ring. 

“U Remruat chi hi lei angai a” ka tihchuan min rawn en zawka “Dawr i neih kha, dâwrah te chuan a awm ve lo em ni?” a rawn tihchuan ka hre chhuak zawk mai. Keipawh hi dawr ka nei ngai siloa, hetia ka han nei thut tur hi ka lo theihnghilh leh ṭhin.

Hmanhmawh zet chuan dawr chahbi chu la in ka va la sawk sawka, ina ka let leh chuan an lo infiama, an nui dar dar reng mai.

A tu amah chuan min puih an tum hauh lova, an mahni phûr phûr chuan an phur tih ka hre mai. “Kan va phei phawt ange, mikhualte kan ni ve si a, kan lên reng chuan mi min sawi dân a ṭha lo lutuk palh ang” tiin a ṭhiante chu ka nute in lamah phei tumin an tho phak phaka, ani pawhin a dang tawh lêm lo.

Pâwnlamah chuan va inthlahin an nui leh dar dar ṭhin a, an thâwm a reh tâk ṭhiap hnu lawkah u Remruata chu a rawn lût a “Ka inbual duh tui kha min lo lum teh” a tihchuan hnial buai lovin tui chu ka chhuan saka, engmah a sawi tawh lêm lo.

A thawmhnaw phelhin tukverha dâk chhuak chuan kawmthlang lam chu a en vung vunga. “Hetiang khaw tê lutuka min dah hi an duh chu ania, an ṭhing hlawm si” ti a a phun bul bul chu hre reng mah ila ka chhâng duh hauh lo thung.

Tih tur a hrelo lutuk chu a vâk kual seka, keilahin biak vak ka tum bik silo nên a phone bawk chu enin a mu ar ara. A nupui buai em em a ka awm laiin a ni a mu dar dar reng a nia, “I tui a lum tawh ania” ka tih lai chuan a rawn tho chhuak ṭuah ṭuaha, a zawi hmêl ngawih ngawih lutuk chu ner nângin ka en leh thin.

Sawtiang em em a mipa ngeiawm ka la hrelo, a engkim mai hi a ngeiawm. A ngeiawm ang aiin a hmêl lah hi a ṭha vawr lehnghala, a hmelṭha in hausa lo se chuan mi hian an sawp nek duhin ania ka rin ni, a mah lah hian a hmelṭhat hi a inhre ve kur bawk nên a ngeiawm ver vawr ania.

Tui chu bathroom lamah chuan chawi lûtin reiloteah a inbual ri ka hre zuia. A phun leh bul bul ṭhin, Aizawla a inbualna nên chuan a dang viau renga, shower hnuaiah nuamsa lutukin a ding tawp a. Hetah erawh bel leh ṭin nên amaha a in leih chawp a ngai miau sia.

Nui leh hak ṭhinin “Chawh e, i inla changkâng bawka. Tikhan i tih ngailoh hlîr tiin buai ve vat vat rawh” tiin ka nui var var renga, khawvêlah hian a va han chawh ber tak. Ka pasal mah nise a zia hi ka ngei hluah hluah, kan khaw nula ho lah khân an star êm êm mai lehnghala, zahthlâk ṭhin hian.

Rawng ka bâwl zawh chuan phone enin ka ṭhu ve ta mai maia, recap chu enin duhlo chunga innei ve ho chu ka ena. Kan ang hi ka ti khawp mai, u Remruata nên hian kan inngeih bik hlawl siloa, englai pawha insual peih ât kan ang bawk nên chû recap ah chuan keimahni ka inhmu a ni ber mai.

Ka nuih leh hak ṭhin lai chuan ka bulah rawn ṭhu in ka thil en chu a rawn melh ve zawka, chutah rawn ner sakin “Khatiang mai mai i en chu ania, ka âwih theilo. Hetiang nupui hi ka nei ang tih ka ring pha lo” a rawn ti chu ka melh ve ngheka.

“Keipawhin pasal games chiah khêl thiam ka nei ang tih hi ka ring pha ngailo, thiamthil neilo mipa ka hriat awm chhun i ni” ka tihchuan min rawn hnaih ruak a “Thiam thil neilo ka nilo aw” pawr lutuka a rawn tih lai chuan ka lo nuih ver vera “Ni chiang e, in ina ka rawn awm aṭangin i thil tih ka la hmu lo a, engmah thiam thil neilo i ni rêng alawm. Mut leh chaw ei, games khelh leh lên bâk i thiamlo” ka tihchuan hmui pet chungin min rawn hnaiha.

“Nang hmeichhe ṭhing leh ṭawng thei zet hi” tiin engmah sawi duh tawh lo chuan a chhuak zui nal nala, a rawn luh leh mai loh avâng chuan a lêng dâwn a nih ka ring. Tumah ala hre vak awm siloa, khawiah nge lên a tum dawn ni, a va bo êm lovang chu maw?

Chaw ei ka peih vek tawh bawk nên a ni lungawi lo ka nghah reng chhan tur a awm lo, zanriah chu ka eisan hmaka. A duh leh a rawn haw hunah a ei ve mai ang chu, thlêng te ka sil zawh chuan ka mu lût ta daiha, pindan hranah kan chhungte'n mut an phalloh miau avângin khum pawh pakhat chiah kan neia, engvanga heti em em a luhlul nge maw a nih le?

Dar 7 vêlah a rawn haw hlawla, a rawn rui em em mai lehnghâl. “Chaw ei min siam teh” a tihchuan hnial lovin ka siam sak zung zunga “Khawia zu nge i ina? In tawh hauh suh aw, tlangvâl sual ho i tawng fuh lo hlauha i vânnei, zu in mi ka duh hauh lo ania. Khaw mite hian min nuihzat dâwn a nia“ ka tihlai chuan a rawn nui huka.

“Chu chu ka pawi tih i ring em ni? Engvangin nge ka tih ang? I duh leh i mualpho anga animai alawm, Biak in ngeiah dân khatna in an in neia, an pa erawhin zu a in nghal an ti ang che” a sawi zawh rual chuan a samah ka keh sak ta nawka, hepa hi thu ṭha hian a inbiak pui theih hlawl loh.

A chaw ei tur chu rawn tho in min dang leh riha, kan in kêk kûn ngawr ngawr mai “Nang hmeichhia min thlah vat rawh, chutilo chu kut ka thawh ve ang” seh chilh nak chuan a rawn ti a, a sam keh nuam tâwk leka sei chu thlah mai mai ka tumlo. A ni zurui lehnghâl chu kan pai dun khawt khawt mai.

Chutah dawhkan chu va su dun chawrhin kan in ring hman lo min rawn bawh rawka, chhuatah kan leh dûn tawp rualin a sama ka lo kehna nen ka hmuiah chuan a rawn fâwp ta chawta. Ka hmui chu a thip deuh sak bawk nên a pilh a nih ka ring, a awmsawn dâwn emaw ka tihlaiin awmsawn mai lo chuan min en renga. 

A hmui la sawn deuha chiang zeta min en lai chuan ka en ve kar mai, tûnah chuan thinrim hmêl leh mi ngei hmêl kha a pu tawh loa. A mitah chuan eng emaw danglam awm tlatin ka hmu, a mit chu a de sar sara, a lungphu a rang hle bawk. 

Kei ngei pawh ka lungphu chu rang tak a ni, a rawn chhuak mai dawn hian ka hria. Rawn kûn hniam leh in ka hmuiah chuan a rawn fâwp leha, ka chhâng lo

 Ka menga, ka khap fuk fuk ringawt, ka kut chuan a âwmah chuan nemin a mi fawh-na chu ka dawh tawpa.

Chutah ding chhuak thutin “Ka rin ang chiah, nang thingtlâng nu hian in fawh pawh i thiam hi ka ring lo sa rêng a ni“ a rawn tihchuan alaka ka lo ngaihtuah tawh te chu a rawn ṭhiat leh chiang hle. He mihring pa hian ṭawngkam mawi a hre thlâwt lo a nih hi, thinrim tak chuan room-ah ka luh san hmaka.

“I thlêng kha sil vek ang che, i sil loh chuan hetah i riak theilo, ka in a nih hi. Thingtlâng nu hian thiam ka nei siloa thleng sil pawh ka thiam lo” ti hmakin khumah chuan ka muthla a, kan chhûngte hian kan inhau ang tih hria in rizai dang pawh min pe duhloa, duhlo chunga mut tlân a ngai tur chu ka peihlo takzet.

Ka thusawi chu a ngai thutak ve nge mawni thlêng a sil ri chu ka hria a, ka nui pât pât mai. Tihian thingtlâng min hmusit bawka ala hre dâwn chauh mai, a rawn mut ve rual chuan puan ka sin lai chu na zet hian a rawn pawt khera, a inhlim nghal pawk mai.

A rawn vawt nghâl vara, chuveleh pawt lêt ve nghek in ka delh zui hmaka. Kan in pawt tawn ngar ngar mai “Puan a len êm hi, tikhan i mut ṭhat hle hle peihloh chuan ṭhutthlengah khân va mu mai rawh”  ka ti deuh ṭhat a.

A ni pawh a tâl tawh biklo, ngawi reng chuan kan mu ta kara. Kei erawh recap bawk chu ka en leha, ani in games a khêl thung, khum khata mu ah chuan kan inngaihsak lo berin ka ring. Pawi pawh ka ti chuanglo, be tam lo ila kan inhau tlêm a ni mai. 

Reiloteah mut chhuak chuan min rawn zemin ka phone chu ka lukham bulah chuan dahin ka mit ka chhing zuia, engtik laiin nge ka mutthilh pawh ka hrelo.

Zinga ka harh chuan u Remruata chu ka lo khan nasa chu niin, a mah lah chu a lo meng kur tawha. A tûm bûr mai, a hmêl chu a nuihzatthlâk lek lek mai, min hau bik mai lo in ka muhil bawk nên alo tuar ngar ngar a nih hmêl. Chu chuan misual lutuk chu a ni bik lo ang tih min rin tir mai.

Awmsawn vatin ka tho chhuak zuia, ka inphihfai hnuah rawngbawlin ka che zui malh malha, a ni pawh exer la tur tih hriat tak hian a rawn chhuaka, min be lo bawkin a kal nghal nal nal mai.

MITTHI KAN NEI SIA, HETI HI NIMAI AW, COMMENT TE MIN LO PÊK LEH HRAM ULA 

REMRUATKIMA

CHAPTER 4

“U Remruat kan arpui saw buhfai hi keng la lo va chhuah ta che, an ngam tawh ang. Ka buai bawk sia tûna kan chhuah loh chuan a tlai tawh riau mai” ka tihchuan “Ninawm i pasal ka nih hi min tir reng suh, pasalte tir reng ṭhin hmeichhe ṭha an awm ngailo” a ti chu ngei deuh hian ka ena.

Thilsawi ve apianga hetianga min chhâng reng hi tuk thlûk tawp mai te hi ka duh ṭhin. “Engmah i tih ngailoh kha, va ti mai mai rawh phun reng mai. Ar mawng ang chiah hi ni ṭhin suh,” ka ti chu min rawn hnaih ruaka “Min chhâng ve ziah suh, nang duh lo chunga ka neih mai mai lehnghâl min zahlo viau ṭhin suh aw i pasal ka nih hi” a rawn ti pawr hlara.

“Nang zâwk hi a lawm, engmah thawh thiam i nei silo, duh lo chunga ngenna avânga ka neih mai mai i nih hi. Min hmusit viau suh aw i nupui ka nih hi” ka ti ve saka, a ṭawng thei lutuk hi ka ngei ve ṭhin êm ani. 

Min chhang tawh bik lo in no chu la in buhfai chu a suaka, pâwnlam a pan nghal nal nal chu ka en zui renga. Chutianga kan awm reng chu a châng chuan ka ning ve ṭhin, reiloteah mangang au ri ka hria a, arpui in mi a lim ri nên ka hriat tâkah chuan ka tlân chhuak vata.

Tuara kan ar in hûn bula u Remruata lo au tuar tuar leh arpuiin a lo ûm ka hmuh chuan ka nuih a za bawk si insûm ngai bawk si chuan ka pan hnaia. Min hmuh rual chuan min lo panin ka hnungah chuan a rawn biru zuia, arpuiin rawn lim a tum leh chu ka lo tlawh awk tâkah chuan ṭuk dut dut chunga a note te chu panin a kalsawn pui zuia.

U Remruata pawh chuan ka hnung aṭang chuan a rawn bih ve duk duk mai. “Engtin nge i va tiha?” ka tihchuan a no min pêk pah chuan “Ka chhuah rualin min rawn lim ringawt a nihkha, saw tiang ar kawlh lutuk saw vulh chi pawh ania mi? Ar chhia a nih saw hralh daih ang, sawtiang vulh reng pawh a ngailo” tiin arpui kalsawn chu a en vang vanga.

Kei erawh ka nuih ala za tlat, khatiang em em a a hlauthâwng hmêl kha ka vawikhat hmuhna a nih bâkah a thil hlauh chu a ho ka tih êm avângin ka nuih a za lo theilo. 

Nuih la insûm chung chuan “Lut ang, nu tân chuan fate chhan hi a na rêng a sin. Mihring pawh kan nih hi, a note te tihnat i tum ah angai aniang, lût tawh ang. Vawiin chu dâwrah rawn awm ve la a ṭha ang, inah i ṭhiante i awm puia, thil nilo lo in tih phaha ka duh miahlo ania aw, kan khaw nula te in lo hruailut lehnghala, khatianga i awm dâwn chuan pa Muana te ka hrilh anga, sum min rawn thawn tawh loh chuan” ka ti chu min ngei hmêl tak hian min ena.

“Khatiang khân min vau hauh suh aw, nang hmeichhe mâwl zet hi i ṭawng thei zek lehnghâl. Khatiang zâwng khân vawi khatmah min vau tawh suh” tiin min luhsan daiha, ani nên hi chuan engtikah mah inngeih taka kan awm ka ringlo. 

Kan engkim mai hi a inmil lova, chhûngte thu âwih avânga innei kan lo ni bawk nên in mil viau chi kan nilo tlat a tin ni. Ka laka a lâwm lo em em pawh hi ka dem hran lo, a hmeichhe duh miahloh min nei ve tho a ni a, mipa phei chu in la pa tak mai leh mahni ngaihzawngte takngial chungah pawh inla ngêng chi an ni bawk nên chutia a hmeichhe duh loh lutuk min nei chu lawm a har viau ang chu.

Thâwk la ham hamin ka zui lût ve a, chaw chu hma takah eiin dawr lam pan chuan kan in zuia, tûnlai chu a ṭhiante an la cham ve bawk nên kan khaw nula awm ṭha duh vaklo zu pawh in ve thei mai ho inah an lo awm pui ṭhin a, mi hian an hre ve zel bawk nên ka lâwm vak lo.

Thingtlâng phei chu mi chhungkaw nun leh awmdanah an inrawlh peih si a, hetia kan awm pawh hi an sawi leh neuh neuh tawhin ka ring. Ring mai nilo in an sawi leh tawh ang, u Remruata hi ka ngei ṭhin. Ama mualphona tur hi a ti leh ṭhin a, hetiang renga a awm chuan pa Muana te ka hrilh tak tak tawh ang.

Hetiang chuan kan mualpho vak ang tak tihte pawh ka hlau ve bawk. Dâwrah chuan ṭhu leh khâr tawhin ani erawh ṭhutthlengsei kan hûn telah a mu leh zuar tawha, ka phût lui ngai lêm lo. Dawrtu kan nei leh nak nak tawha, dawr dang vak la awm lo chu a siamtir chauh e tilo in kan inhralh thei viau mai. 

Pa Muana te chungah ka lâwm viau bawk, ka chhûngte pawh hetiang chuan tlêm tlêmin kan la pui ve thei reng dawna. Chubâkah ka naute ho pawh hna an rawn thawk ve thei ṭan ta bawk nên ngaih a ṭha ve deuh tawha, u nei ve bawk mah ila amah chauh chuan in dawm kan ala har si a, kan naute school an la kal ve bâkah an la naupang bawk nên chhûngkua kan la leikang hlei thei meuhloa.

Tûnah erawh chuan chutianga chhungkaw bak berh erawh kan ni tawh biklo. Keima lo inhlawh ve na nên kan khuaah phei chuan in pawh a ṭha pâwl kan ni ve tawha, khaw mite an taima mai pawha chhungkaw rethei lutuk erawh tumah kan awm hauh lo thung.

“Mama kha min lo pe teh ka ei duh” games khelh paha rawn ti tu chu melh zawkin ngawi reng hian mama pakhat chu ka pe a, a ei ri nghal ruap ruap mai, an awmpui emaw min la ti reng hi a anga. Mi tirh hi nuam a ti ve hrim hrim nge pawh ka hrelo, a tih ve theih rengah pawh min tir ṭalh zel. 

“Kan dawr thil i ei nasa si, hlêp tur ai zawng zawngte hi i ei zo ange aw” ka tihlai chuan games khelh pah chuan “Kan pawisa a i lâk tho ania, enge pawi? Ka ei pawhin kan ta a nia ka ei a nimai” a rawn ti chu ka ngei tak tak a ni. 

Tinge ngeiawm tak tak hian min biak reng mai ni? “I nupui ka ni tawha, tin in pawisa zawng zawng kan hmang bik lo. Rim taka ka thawh aṭanga ka khâwl kan hmang ve tho tih kha hria la, khatiang kha sawi reng suh, mipa zâwk lehnghâl. I phun peihin i kâ hi a kal mah mah a nih hi” ka tih lai chuan ka hnungah a rawn bêng awka, a thip ngei mai.

Thinrim taka ka hawi lêt rual chuan a hmaiah chuan ka sih sak ta vaka, a au nghal chûl chu nuih hakin “Kut min thlâk hmasak man a nih kha, kutthlawn ka tuar ngailo a nia, ka duh lo bur bawk. Tikhan i mut mai mai dawn chuan tlâi chaw i ei thei lo ang, Bible pawhin thawk peih lo chuan ei pawh ei suh se a tihkha, i thawh loh chuan i ei lo ang ka in anih hi” ka ti ve ta faka.

Ngeiawm tak taka min biak a hmang bawka, ka tih lêt ve zêl loh chuan ka hlauah ngaiin min hmusit reng mai ang, “I pasal ka nih hi, i ta chu ka ta ka ta pawh i ta, ta bik kan neilo ve ve” a rawn tichu nuihpui hakin “Kha i sawi zawh chiah kha i hre reng ang chu maw? Ta bik kan nei lo ve ve a, nangpawhin i neilo, engkim hi kan inṭawm vek tur a nih hi,  awm mai mai chung chuan ei tur a hmuh theihloha, chuvang chuan ka bulah hian rawn ṭhu la, midangte hi lo chhâwn ve rawh” tiin sawi fuh inti ru zet chuan ka nuih saka.

Engmah sawi bik lo chuan a rawn ṭhu hnai ve maia, mahsela tumah chu han ngaihsaka enge an duh zawh pawh a nei chuang lo, tihian nitin kan inzuia nitin kan inbiak chuan a zia pawh a dangin kan inngeih ve zêl ka beisei bawk, a ze ngai reng hi a put chu ka ring bik lo.

Pa Muanaten ka lakah beiseina an nei sâng bawk nên an beisei ang an hmuh theih nân hian theihtâwp ka chhuah ve chhin phawt ang chu. Kumkhat chhûnga ka hlawhtling theilo a nihchuan kan inṭhen dâwn tho a, u Remruata pawhin hma lam a pan ve thei tawh ang chu.

“In khua chu a têt ang aiin sum an nei a nimaw?” a rawn ti chu “Nei ve bawk ang chu, an taima a lawm. Nitin hna an thawk a, kuthnathawktute hi chu kan rim a sin, nitin ni sensa hnuaiah thlan tla zawih zawih a kan thawh hnuah haw kawng hrehawm leh chho zet paltlangin thui tak tak kan kala, sawrkar hna thawk te hlawh ang erawh thlatin kan hlawh ve theilo, an ni chu hahdam takin daihlim hnuaiah tal an la thawka, thlatin hlawh an la la bik ania, keini erawh tihian sawrkar ṭha neih loh phei chuan kan thawh rah tam tak hi chu seng lohin an riral leh mai mai ṭhina” tiin ka sawi duaha.

Mak tak maiin min hnial bik lova, a lo bu nghat nghat mai “Mizoramah hi chuan eng sawrkar mah hi ṭha leh rintlâk an awm dâwn lo, tlin loh hlau hian inthlan dâwnah thu an tiam vak vaka, mipuite lah hi party hrang hrangah awmin mahni party bil ṭan hlur vek kan ni a, kan ram tâna ṭha zâwk ngaihtuah ai chuan kan party tih avânga a dik leh dik lo pawh ngaihtuah lo a a dik lohna lai hliahkhuha party dang puh chîng zêl hi kan nia, chuvang chuan mahni chhûngkua din chhuah theihna tur chauh hi ngaihtuah ila a ṭha mai. A dang chu angai vak lo, engtikah mah kan ram hi kan siamṭha dâwn chuang lo” a rawn ti ve khauha.

Tûn hi puitling taka kan titi dunna hmasa ber ani, hetianga thu kan sawi dun ve te hi ka ring ngailoa, mahsela tûnah hian a thleng mek chu a ni sia. Mumang te pawh a ang zâwk a lawm mawle, ka nuihte lam lam a za a, a nuam ka ti riau bawk.

“I sawi dik chiah, keini in kan duh zâwng te kan ram ṭhatna tur lo sawi ve vak vak mah ila awmzia a awmlo. Ṭawng thei deuh deuh, mahni party ruihchilh ho in min chîl rawn leh hrep emaw a nia nga, mahni chhungkaw hlâwkna tur hi buaipui tawp ila a ṭha ber mai tiraw? Tumah hian kan thusawi hi an bengkhawn dâwn chuang siloa, mahni hlâwkna tur hi zawn ve mai tur“ tiin ka nui hak haka.

Amah pawh a rawn nui ve suk suk mai, “School hi i kal lo hrim hrim nge ni a i kal ve ṭhin?” a rawn ti chu ka aw ka thian kharha, hetiang thu kan sawi hi ka rin loh lutuk avâng hian engkim hi ka tân chuan a phûr awm em em vek mai.

“Nia class 8 thleng ka kala, mahsela ka nu leh pa an upa ve tawh nên ka u lah kha kha tih lai khân 12 a kal mêk a, a chhuah ve law law kha kan duhpui bawk nên keimah kha ka châwl ta tawpa, kumhnih chhûng hna ka thawk tihah ka u pawh tihian a zirlaite zo in hna a zawng ṭan a, tûnah hian kan khaw Primary ah hian hna a dil ve leha, a hmuh hlauh chuan ka nu leh pa pawh an awm nuam leh zual tawh ang chu. Kei erawh zir leh turin min ti ṭhin mahsela ka lo châwl laklawh tawh bawk nên tihian ka châwl tlang ta a nih hi“ ka tihchuan min rawn melh vuta.

“Tunah pawh kal leh la, i la upa hauh hleinem” a rawn tichu ka nui lo theilo. “Min en la, pâwl 9 ah lût leh turin ka kum leh hmêl hi a chal tawh laklawh bawk sia lawm, a chi tawh lo ang. Nula puitling tawh pawl kua lek han nih leh chu a âwm ang lo emai” ka ti chu kan nui dun vak vaka, a ngaihtuah ve aniang chu ka inhmeh loh tur zia pawh a hre ngei ang.

ZAWMNA...

“In khua chu a tê nângin a nuam ve a nih hi” tiin a hawi vung vunga, thingtlâng khuaah chuan kan tê chhe bik hauh lova. Mahsela an ni Aizawl a awm reng tân chuan tê tak tur chu a ni rêng ani, a thusawi pawh a dik lo hauh lo, mahsela ka tân chuan kan khua aia nuam a awm bik lo.

“Kan lo kala in awm siloa, hetah a nimaw in lo awma?” a ṭhiante rawn langin an rawn au nghal lung lunga, boruak an ti chhe leh zo ang tih pawh ka hlau hlel lo e. Kan inkâwm ve thei ṭan dâwn chauh a, an rawn thleng chuan boruak an ti danglam leh zo vek tak taka.

An ri leh le lu tawh mai, kei erawh naupang ho thil rawn lei chu ka lo buaipui leh mawlh mawlh tawha “Naktukah kan haw ve tawh ang, duh lo viau mah ila chhungkaw chawmhlawm kan la ni bawk si a, haw ngei ngei angai a nih hi” an tihchuan u Remruata chuan a huphurh deuh nge “A la reilo e” a lo ti bul bula. 

“Kan rawn zin leh vat dâwn alawm, nangpawh nupui i nei tawha. Patling taka awm tum la a ṭha, in nu pawh kan en hian misual a ni dâwn lo tih kan hria, Mary kha chu theihnghilh tum rawh, bâkah i duh tak tak loh kha. Khatiang hmeichhia ai kha chuan keini pawh hian tûna i nupui hi kan duhpui zâwk che ania, a hma kha chuan kan duhpui bik lo che a, mahsela hei belhchian alo dâwl phian hi. I ṭawngkam ngeiawm zet pawh a dodai thei zel ania” an tihchuaj awm hmunah ka lo nui ve haka.

Ka hriat hlau in an phun ru ve sur sur nângin an ni zurui lehnghâl chu an ṭawng a la ring tho bawk nên hriat loh theih pawh a nilo. “In haw chuan tunge ka kawm tawh anga, a nihchuan zanin chu lêng chhuak ang u” a tihchuan a ṭhiante pawh chuan an lo pawmpui viau mai.

Kan khaw nula ho sâwm chhuah tur an hmu leh ngei ang le, nula awm ṭha duh vaklo. Zu pawh in ve thei mai hi thingtlangah pawh hian kan awm ve zeuh zel bawk nên an ni lah khawpui tlangvâl an niin an hmêlṭha bawka, nula chuan an zui lo theilo ang.

“Len chhuah angai lo” ka lo ti chu min rawn melh rum nasa mai, keipawh ka lâwm hauh lo bawk. “Pathian leh kohhran hmaah thu kan tiam tawha, min hmangaih lo a ni tihchu ka hre chiang khawp mai, keipawhin ka hmangaih chuang lo che. Mahsela kan thutiamna ngei Pathian leh kohhran hi ka zaha, kan inneih thutiam hi vawn reng ka tum angin nangpawh hian i tum ve tur a nilo em ni? Hmeichhe dang i kawp vaih chuan maw ka lâwm lo khawp ang, i uire dâwn a nihchuan inṭhen ila i pa leh i nu nên in sawifel ve tawh mai dâwn ania, kan inṭhen chuan thil thleng tur i hriat chian kha” ka ti chu min huat hmêl tak hian min ena.

Mahsela engmah chu a sawi chuang lo, keipawh chuan thil dang sawi belh ka tum tawhloa. A ṭhiante chuan min melh tawn zak zak mai, min duh loh miau avânga ka thu pawh pawm ngai lo ani a. Nawr luih chiam ka tumlo, mipa a ni a a thinrim tâwp ka tawng ang tih pawh ka hlau ve tho a, nimahsela pa Muana te thusawi ka hrechiang bawk nên vau lêt ve ṭhin mai ka ni zâwk.

Tlâi a nih tâkah chuan rawngbawl angai bawk nên dawr chu kharin inah kan inzui pheia, rawng ka bâwl mawlh mawlh laiin an ni ṭhianho erawh chu games bawk khêl in an au leh chûl tawha, an in khawih ri leh awk ṭhin. An thinchhiat hlawm nên engtin nge an inkawm reng peih zâwk ni, keichu ṭhian kutthlak hmang deuh kawm chu ka peihlo, fiamthu a awm ve a. Mahsela na tak zawng hlira infiam hi ka peih ve lêm lo.

Chutih rual erawh chuan ṭhian neihloh erawh ka duh hauh lo thung. U Remruata chu rawn pheiin “Pawisa min lo pe teh” a rawn ti ringawta, zanlam chu vah chhuah tho a tum a nih hmêl. Enga tinge hetiang em em a a luhlula a tihmawh mai ni? Hetiang em em a mipa luhlul hi ka la hmu ngailo, chutia pawisa min lo dîl lai chuan kan khaw nula upa lam pahnih zu duh zet hi rawn lûtin u Remruata ṭhiante ho chu an rawn ko nghal lung lunga.

Lungawi lo zeta u Remruata ka en lai chuan a ni pawh chuan min lo en ve reng bawk. “Kha hei hi la rawh, rawn haw nghal ang che. Hetiang reng chuan pa Muana te ka hrilh tak tak ang, inchhunga i ṭhiante zu rui i rawn hruai luh hi ka duh miahlo ania. Inchhûng zahawm lo a siamtu a ni“ ka ti fak faka, ka thusawi chu a ngai pawimawh leh chuang pawhin ka ringlo.

Ṭawng in chan lo chunga an chhuak chu ka en zui renga, engtikah tak a zia kalsana puitling taka awm ve tak ang maw? Vawiinah te kha chuan pângngai taka kan inbiak a, ṭhianṭha ang tala kan awm ve te ka beisei a, mahsela a ṭhiante an rawn langa engmah lo maiah a chang leh ta chu a nih hi.

Kawmchhakah chuan Lawmi chhakchhuak sak VALA THAWNTHU tihchu an zai phei lung lunga, englai pawha rui reng ang an nih avâng hian an zai aṭang pawhin kan ṭhenawm ho chuan an rui tih an hre chiang viau ang chu. 

“Vala thawnthu lungchhiat thlâk chu hei ani, a di a hmangaih leh a lunglai luahtu chuan, nang nên chuan kawp rem tur kan ni mawlh love, tiin puan ang a hnawl val lungmawla chu“ tiin an zai phei luah luaha, an zai thiam lo em em mai lehnghâl. 

Mikhualnaah zah tih vêl lam chu a awm lo, khawi hmunah pawh it's my life ti thei kha an ni tlata, ṭhian tur dik tak in kâwm khâwm, zah lah an hre miahlo. Hetiang tân hi chuan khawi lai hmun pawh hi wow tih tawp chi a ni.

An kal liam hnuah chuan chhuat chu phiat faiin ka nâwt leh te te a, hetianga a nungchang hi a awm reng a nihchuan ka dawh reng thei angem ka hrelo, a luhlul bawk si.

Reife ka nghah hnuah pawh a rawn haw mai loh avângin ka chawhmeh siam chu an dai hman ang tih hlauin chaw chu ka ei san leh ta nge nge a. Ṭha deuh hian a awm ve tawh dâwn emaw tih lai hian beisei loh dânin a awm leh ṭhin.

Hetiang mipa hi an awm theih ka ring lova, mahsela an lo awm chiang a nih hi, khâng hmeichhe zahna châng hrelo zet zet lah khân an la kuah thuak thuak lehnghala, ka lâwm lo takzet. Tikhan khaw mite hnênah an sawi leh anga, ka tân chuan mite min sawisêlna tur leh ka pasal ka ti lungawi zo lo anga an ngaih ka hlau ber a ni.

Remruatkima hi heti em em hian engtin nge a sual thiama, a luhlul theih bik le? Amah ah hian mi nung pali lai an awm in ka hre tawh, a châng leh a fel thuta, a châng leh a thinrim leha. A chângin a ngêng in tih a har em em a, a châng leh thu a âwih leh em em bawk si. Amah tawp hi zir tham a ni nimai hian ka hre tawh.

Zânah chuan ka nghâk ve bawk nên ṭhutthlengah chuan mu in movie ka en mai maia, ka pasal a nih na anga ka ngaihven hi ka tih turah ngailo ila chuan ka mut san daih tawh ang. Pa Muanate nupa ka hmaizah bawk nên ka ngaihsak lo thei silo, ka mipa duhzâwng mizia ka sawi ang kha amahah ka hmu lo bawk nên a awm dân hian min ti thinrim ṭun mai.

Pa Muana te ngaihtuah lo ila chuan ka ṭhen nghal vang vang tawh ang, an lakah thu ka lo tiam ve tawh si a. Kumkhat chhûng chu ka tuar mai ang chu, mahsela ka tuar chhuak thei ange maw? A mizia a ngai reng phei chuan engtin nge kan awm ang tih ka ngaihtuah pha lo zâwk, amah leh savawm hi ka tehkhina, an in ang dâwn riauin ka hria.

Mâwl tak leh thinrim in peih ât reng mai, Savawm pawh a mi hmuh apiang bei duh mai, thinrim reng ang ania. U Remruata pawh chutiang chiah chu, englai pawh hian mi a seh dawn emaw tih tur hian a awm reng nimaiin ka hria, Remsavawma ti tawh ila a ṭha nghe nghe ang chu.

Dar sarih vêlah chuan kawngka chu rawn inhawngin rui tih hriat tak hian a rawn lût chhur chhura, ka lo en kar mai. Pasal zu in mi ka neilo ang ka lo ti ṭhin a, mahsela ka hma hun hi ka va han hrelo tak em. Tûnah chuan ka tum loh leh neih ka tum loh mizia pu vek mai pasal pêk ka ni ania, Pathian pawi hi ka sawi nge tihte ka ngaihtuah rum rum mai.

“Zu in tawh suh ka tihkha, nangmah avânga mualpho ka duh hauh lo ania aw, khâng hmeichhia te kha ilo kawp ange. Khaw mite hnêna an sawi chuan i thangmawilo khawp ang, ka lâwm hauh lo ania aw. Min duh lo mahla i nupui ka nihna ang chuan min zah ve ta che” lungawi lo zet chuan ka ti a.

“Sum vanga min nei ani lo'm ni i nih? Ka duh duh ka kawp ang nang hian ṭawngkam khat pawhin ka nu leh pa bulah sawi suh ang che. Keimah avânga inchhûngkua pawh hetianga awm thei in nih hi” chapo zeta tichunga hnunglam min chhawn hmaktu chu thinrim taka enin ka zuang kâng zawka, a hnungah ka tlawh awk rualin hmalamah a bawk nghal thlawp mai.

Thingtlâng nula ka nihna a hmusit bawk a, thingtlâng nun tak tak ka tem tir dâwn khawp. A ni zi rui lehnghâl chu a rawn la tho chhuak thei mai lo zui “Min lo pui teh, engvangin nge min tlawh ringawt, min ngam viau suh aw” ti nung nungin min rawn ban leh lawia.

Minung pali amah ah an awm ka tihkha ka tih dik ka ring, a thinrim dawn emaw tih laiin ṭha deuhin min la be leh lawi bawk si nên ka rin loh hlir mizia hi a pu mai.

Kai tho in chaw a ei thei dâwn lo tih ka hriat chian avâng chuan pindan lamah chuan ka kuah lût a, a rum ṭuah ṭuah reng mai. Khuma ka mutthlak rualin min pawt mu tel hnawka, ka bawh deuh rawk mai “Ka haw miahlo che, mahsela ka nu leh pa hi ka hua a ni. Hetiang dinhmuna min din tir pawh hi ka hua” tiin a phun deuh bul bula.

A awmdân chu ka en renga, tûnah chuan thinrim hmêl kha nilo in inthiamlo hmêl ka hmu tawh zâwk “I tân pasal ṭha tak ka ni thei dâwn lo tih hre chunga engvanga min nei nge i nih?” a tih erawh ka chhâng ta lo, ka mitah tak en reng chung chuan ka hmaiah a rawn chûl a, ka dawh tawp ringawt.

Chutah a mit chhingin a chatthla zuia, rang taka tho chhuakin a chapal chu ka phelhsaka, puan sin tirin a bulah chuan ka mu thla ve vata. A ṭawng vai leh nuah nuah ṭhin, a thusawi kha ka ringhlel lo, min huat lutuk hi chu ka ring bik lo hrim hrima, hetianga kan awm ta mai nên a hmeichhe duh a neih theihna tur ka lo dâl ve leh zêl bawk si hi min hua pawh nise ka dem em em lo.

Mahsela a nun ṭha lo tak hi chu kalsan thei hrâm sela ka ti,ka nute lo min sahphel turin ka dil anga. Hna ka thawhpui tal loh chuan zu a in bawk si a a taksa tân a ṭhat ka ringlo, kan dawr chu ka naute pawhin an nghâk thei dawna ka ngaihtuah em em lo bawk nên feh pui zêl tawh ila a ṭha ang, thlai chin ve hrim hrim pawh ka duh bawk.