DEMON KING CHAPTER 7

DEMON KING 

CHAPTER 7 

“Tiru i haw tawh ang u, a tlai tawh riau mai” ka tihchuan an la peihlo tih hriat takin ka sawi zawh rualin phûlah chuan an mu thla ṭhapa. Damian-a tak ngial pawh a mut ve avâng chuan ka ngei ngei mai “Tho teh u kan haw hma ang in tih kha, hetiang te chuan engtin nge ka rin tawh ang che u, tho vat rawh u” tiin Damian-a chu a bânah ka pawt a.

A nilah a inti zawi bawk nên ka kai tho thei der lo lehnghâl. “Ala hma lutuk, khua te hi thlir ve teh. Khatiang kha chuan i nun i enjoy ve thei lovang, englai pawha chhûngte ngaihdan hi ngaichâng renga awm bik loh tur. Kan duhzâwng leh nuam tih zâwng hman nân kan damchhung tawite hi hman ve tur, kan thih hun tur kan hriat loh hi” Sammy an a rawn tihchuan a dik ka ti viau bawk sia.

Engmah sawi tawh lo chuan Damian-a bulah chuan ka ṭhu thla ve a, engmah pawh ka sawi hma chuan a bula mu turin min pawt tlu hnawka. Min kuah bet nghal hmiah bawk “Hahdam takin awm teh, khatiang te chuan kidnap che a vau bet che kan ang lutuk, hawi phâwk hru reng lo khân pângngai deuh in awm la nuam i timai ang” ala ti zui.

A va han ngeiawm thei tak, amahin min tih thut thut avânga mak ti ṭhin ka ni reng sia. A hre leh duh tawp lo anih hi “Khatiang khân che thut thut lo la ka hlauthâwng lo a nimai, min pawt thut zela ka phu ṭhin a lawm. Khatiang khân ti tawh miah suh” tiin engmah sawi tawh bik lo chuan vanlam hawi chuan ka en vang vanga.

Vân boruak thiang kûk mai leh sava pêm chi vansang taka awmze nei taka an thlâwk chu ka en vang vanga. Mizoramah kha chuan hetiang sava pêm ṭhin ang hi hmuh tur an vanga, a lian phei chu kan ngah lo hle anihkha. Kâwlhawk takngial pawh kha hmuh tur an vâng ania, helamah erawh sava lam pawh hmuh tur an la tam viau thung.

Anni lamah hi chuan nungcha humhalh an in tih hmuh tawh zâwka. Ran vulh thlengin zalên takin an awm tir ṭhin, Mizoramah erawh hriam hmangin nungcha kan pêl a, ranvulhte thlengin a neitu tân lo chuan hnawksak mai an ni bawk. An chêp ani ber mai, hetah erawh ramsa te pawh khawchhungah an tla lût fo a, tumahin tihnat an tum ngailo.

“Boruak anuam hle mai” tiin Damian-a chu vawt ka tih deuh avângin ka nghêng hnaia, tlai lam a nih tawh avângin kan awmna chu niin chhun tawh lovin a dai dup tawha. Boruak a vawt lam pang zâwk, min lo kuah vatin a bân chu min kham tira, a rimtui zet hnim chung chuan a âwmah chuan ka bei chial bawk. 

“Hei vâng a lawm ka hruai che, helai hmun hi kan ṭhianho hmun bik ania. Midang chu an kal khât, keini tân erawh kan nun tam zâwk kan hmanna a nih hi” a tihchuan ka bu nghat nghata. “Anuam ka ti, khawthlir a nuam bawk si. Hetiang hmuna awm ai bâka hahdamna a awm chuang nâng, ka lawm e” tisepin ka mit chu ka chhing zuia.

An mahni awm lo se hetiang hmunah hian ka kal kher ka ringlo, anmahni avâng hian thil tam tak ka hriat phah bawk. Hetiang hian min lên pui ṭhin lo se chu kawtthler tam tak pawh hriat ka la neiin ka ring lo, an mahni min hrilh chawp zêlin engkim hi ka hria a ni ber mai.

“Nangmah hian duh phei la chuan hmun tam tak fan pui che ka duh, helaia i awm lai hian a tam thei ang ber hun hman dun ka duh bawk. In rama kan kal hunah kan tih ang chiah hian min tih pui ve dâwn ania” a tihchuan ka bu nghat nghata.

Mi hausa fa nimahsela an nunah hian inchhuanna emaw chapona emaw ka la hmu hauh lova, keini lam nên chuan inthlau tak kan ni. Keini lamah kha chuan eng emaw hlekah mi hausa fa kha chu kan in la sâng fâl nalha, kan incheina leh kan thil neih engkimah khân a lang ṭhin.

Hnathawk lêm lo in nu leh pa thawhchhuah in kan duh duh kan leia, chapo nân kan hmang leh ṭhin bawk. Kan thawh mil a inchei chu kan vâng pharha, incheina ṭha neih leh lirthei changkâng neih kha kan in tihhmuh a ni ber mai.

Hetah erawh tute pawh hian an theih tâwkin hna an thawka, an thawh chhuahin an duhzâwng an in lei ve chauh ṭhin. Hnampui zia hi chu tluk an har dâwn hian ka hria a, kan tluk ngai pawhin ka ring lo bawk.

Damian-a chuan a kawr chung a sira a dah chu banin min sin tira “I khûr beuh beuh reng mai tikhan sin la min kuah bawk la i lum vat mai ang, i chêr lutuk a chuvang a nihkha vawt i tih” a la ti zuia, ngatinge maw ṭawngkam ngeiawm deuh deuha mi biak hi a chin viau ni.

“A nih tak chu kha i kawr hi la rawh, i kawr tello pawhin ka lum ang” tiin ka tho chhuaka, a kawr chuan ka vawm chawrh bawk. Lungawi lo zet chuan ka kalsawn zui vawk vawka, kan ṭhiante lah chuan nui ṭhaw chungin min lo la en zuia.

Damian-a erawh a kawr chu chharin a rawn tho chhuak a, min rawn zui tih pawh ka hria. En duh hauh lo vin thing hmun lam chu ka pan ngat ngata “Hey baby ka fiam mai mai che anihkha, thinrim lo la. Kha ha vat rawh i dam lo palh ang, i chêr ka ti reng reng lo i khal nalh lutuk tlat, ding la kha ramhnuaiah khân ramsa hlauhawm deuh deuh an la tam ania” a tihchuan ka ding ta chata.

Ramsa a tihchuan Savawm leh Sakei vêl ka ngaihtuahna ah a rawn lang zuia, ka kal zawm ngam tawh dêr lo. Chuveleh ka bulah rawn kalin min rawn kuah zui vang vanga, kei erawh ka la hawi tau hmak thung.

“Tau tawh lo la, i tauh chuan a nuam ka ti ṭhin lo. Min en teh maw? Ka fiam mai mai che anihkha, nang chu i thinrim zel a, khatiang te chuan engtin nge ka fiam ve ngam ang che? I bialpa hi min khawngaih ve lo em ni?” a rawn tihchuan a hma aia rumin ka ena.

“Khatiang lo a min fiam thiam loh leh min fiam lo la a nimai alawm, tê min tih loh leh chêr min ti reng a. Khatiangin tumahin an bialnu te an ti lovang, nangmah chiah i ni min khawih bawk suh” ka hmaiah rawn khawih a tum chu a kut chu ka vai sawn saka.

Ka thinrim êm êm pawh a nilo, mahse kan ngaihzawngte bula awm hi chuan awlsam te hian kan ti taua, nuam kan ti niber in ka hria. Chutah ka biangah chuan rawn dawm luiin ka hmuiah chuan duhthawh zet hian a rawn fâwp zuia, ka dang hman thlâwt lo.

Khap fak fak chungin ka dawh mâwl tawpa, han chhân lêt mai hi ka thiam ṭhin lo. Mipa ka la fâwp ngai lova, ka zei lo dawn tih hre reng chunga chhan lêt kha ka duh teuhlo. An ni lam phei chu an zei nasa mai sia, engmah thiam thil ka neilo tih a hriat chuan min hmusit lutuk ang tih ka hlau zâwk.

A awmsawn rual chuan ka hmui chu a tuai zui heuh heuha, “Thinrim tawh suh aw, i titau hmêl hi hmuhnawm ka tih êm avâng zâwkin ania ka fiam ṭhin che. Ka hmuh tirh aṭang che a ka mit i lâk chat aṭang khân i hre mai lo em ni?” tiin ka chalah chuan a rawn tauh data.

“I mit ka lâk âwm pawh ka hrelo, keimah min tihnat tumtu chiah i melh a nih kha” ka tihchuan a nui suka, “Ka ngaihven vâng zâwk che in alawm tihnat tumtu che kha ka chinfel” a ti ngei lehnghal a. Inla zei ve lutuk tlat.

“In inla ṭawngkam thiam kha anihchu, tirawh lêt tawh ang u. Nuteiin a rawn call ṭep tawh ang, min hauh ka duh miahlo ania, ka nu leh pa bulah awm chu ni ila thu hran, hetah an inah engmah pawh tum lovin ka awma, ka theihna ang anga puih ve ka duh ania” ka tihchuan a bu ta nghata.

Min kaiin a ṭhiante awmna lam chu kan pan dûn a, an ni pawh rock, paper, scissor an lo ti a. An lo in pen fawk fawk mai, an chal te chu a lo sen vek tawha. Damian-an haw a sawi tâkah chuan an rawn tho phak phaka “Zanin chu Fiona hi hruai ve la, i kawppuiah a ṭang nghal mai dâwn a lawm” Martin-a chuan a rawn ti a.

A thusawi awmzia ka hre hauh lo, eng thil nge tih an tum leh dâwn ni? Zawhna nên Damian-a ka en chuan “Infiamna hlauhawmah tel turin ka duh ve lo, sawi pawh sawi suh u. Kal ang u, bâkah a chhungte'n an rem ti dawn lo, an chungchâng ka sawi tawh kha” a tih tâkah chuan engmah sawi tawh lo in bike lam chu kan pana.

An tlân chhuah hnuah Damian-a nên chuan muangchangin kan zuia “Martina thusawi kha enge a awmzia? Zaninah chuan enge in tih dâwn?” tiin ka zâwt ta nge nge a, ka hre châk miau alawm. Thil ṭha lo tak te hi an lo ti ang tih ka hlau, chu zawng aia ka hlauhthâwn zual chu ruihhlo ṭha lo tak te hi Damian-a hian a ti ve angem tih te chen chuan ka ngaihtuaha.

Amah ka en erawh chuan ka ring phal hauh lo thung, “Racing mawle, kan tih dân ṭhin ania. Rawn kal ve i tum lo ang chu tiraw? A hlauhawm lutuk tlata, hruai ve che pawh ka duhlo” a tihchuan ka ner ta nâng a “A hlauhawm i tihchuan ngatinge tel i tum si? I chesual a nge aw, tello mai la ka duh zawk. Enga tinge a tir te khân i sawi loh, chutiang in in tlansiak dâwn a nia, chak ber nih tumin theih tâwpin in tlân dâwn tihna a nia, i nunna te i hlut ve lo em ni?” ka tihchuan a kut chuan ka kuahna kut chu a rawn hûm vang vanga.

“Min ring rawh chutiang thil a thleng lovang, ka khalh thiam zia i hriat reng hi. Ka lo chak ziah tawh ṭhin a, ka tello a nihchuan ka hmelma pa tân min diriamna hun ka siamsak tihna a nimai, ka tel ngei ngei a ngai. Nang erawh i nunna hlauhthâwn awmah dah ka duhlo, chuvang chuan inah lo awm ang che” a tihchuan ka lâwm chiah lo nângin ka sawi buai duh ta biklo.

“Fimkhur ang che, i inhliam vaih chuan ka lâwm miah dâwn lo ania. Naktûkah ka check vek dâwn che a, hliam i nei tur a nilo, chuan in zawh veleh i haw ang tih min tiam rawh” ka tihchuan a bu nghata.

“Hlauthawng suh, ka ṭha dâwn alawm. Ka haw veleh ka rawn bia ang che, min lo ngaihtuah lo la, ka chak ngei ang tih ka tiam a che, chuan ka haw nghal ang a ṭha em? Ka chungah engmah a thleng dâwn lo ka tihkha” a tih leh tâkah chuan tlêmin ka awm a nuam deuh.

Accident avânga thi te hi an tam tawh bawk si a, ka  hlauthâwng lo theilo an ni lam phei chu Mizoram lam ai an thiamna leh engkim ah an sângin an huai bawk nên ka hlauhthâwn pui lo theilo.

Kan in kawta kan din rual chuan ka chhuk vata, helmet pêk ka tum chu min en rûn rûn mai. A lâwm hmêl viau loh “I la lêt dâwn lo em ni?” ka ti chu a phun bul bula “I tâna ka lei ania engah nge ka lâk ang? Tikhan haw rawh, naktukah rawn khum leh ang che, ka rawn lût lo mai ange i nuteiin min chelh leh palh ang” tiin bike aṭanga rawn chhukin a helmet chu a phelha.

Min mangṭha mai dawn emaw ka tihlai chuan duhthawh zetin min fâwp leha, nuteiin min hmuh ka hlau bawk nên ka namsawn rang ngei mai. In lam ka hawi chu tumah ka hmu lo hlauh, a ni lah a la nui vur vur duh chauh leh nghal. Ngeiawm lutuk mai.

Kan in thlah lian hnua inchhung ka lût chu nutei chuan mit min lo sân khum euh euha. “A va nuam âwm ve, i nute ka hrilh dâwn nge mawni? Bialpa i nei bawn riau, mak an ti teh ang chu” a rawn tihchuan “La hrilh rih suh” ka lo ti vata, tûna an hriat ka duh rêng rêng lo.

ZAWMNA

An hriat chuan an ngaihdan tur ka hre silo a, ka pa lah hi Mizo pa dik tak. Hnamdang ngai sâng miahlo mahni hnam ṭan rum rut ang chi a ni bawk nen hlauhthâwnna chen ka neilo theilo. Damian-a hi an pawm kher angem tih pawh ka hre lo miaua.

“Aw le i tih tlat te chuan, mahse i bialpa hian la biak vat a duh ka ring. Helam chu an chhûngte hriatpuina thlap hian engkim tih an duha, an nundan zalên ang bawk hian kawppui lam pawh an chhungte'n hria se chim buai tu awm miahlo hian awm sela tih hi an duh dan ania. Nakinah a la sawi ngei pawh ka ring” a rawn tihchuan ka bu nghata.

Chutiang a nih leh ka hrilh ve pauh ania'ng chu, ka zêp kumkhua thei dâwn miau lova. Mahse tûnah rihchuan kan la inzui rei lo êm a, hriattir nghal thawt thawt kha ka duhlo, kan inṭhen leh thut theia. Kan inzui rei a nihloh chuan ka chhûngte bulah sawi ka duh hauh lo.

Zânah ka mut laiin ka ṭhiante pathum chuan min rawn call in Damian-a te ṭhianho chungchâng bawk min zâwt leh tawha. An la phur em em mai lehnghâl “I awmna a la reiloh nên engtin nge khatiang khawpa chhelo i nihpui theih? Taka i bialpa kha ka hmu tawh than in ka hria, khawiah emaw news vêlah a ni thanin ka hria” Thani chuan a rawn ti a.

A nih ka ring an ni ang mi hausa fa chu mi hian an chungchâng an ngaihven dâwn tih ka hria. Chutah Damian-a te chhûngkaw nihna ka sawi chu an mengphar nasa mai, Engi tak ngial pawh a mit a pâwt lo chauhin ka hria.

“I ti tak tak em ni? Awi ka van thik che, mahse a ṭhiante pawh kha an chhelo e” Rami chuan a rawn ti ve thunga, ka bu nghat mai. “An ni pawh mi rethei fa an awm lo, an lir thei phei chu maw nalh tak an ni. Keipawhin âwih har ka la ti, midang hrilh ila chuan min nuihzat hial ang chu, kan hnam zia chu in hriat chian kha. Mi thil tawn âwih lêm lo, mita hmuh erawh chuan in sawisêl lehnghâl mai ṭhin” ka tihchuan an bu nghat nghata.

“Mi hausa fa ve si an va han induhlo ve, chapona an neilo tih a hriat. Hetah te chuan college ah hian e kan MLA fa te, kan Doctor fa te ho hi an in la high hlawm a sin. Pate nihna chhuang rana khawsa hi an tam tawh ania, rawn kal ve theih ka châk e” an ti nâng nâng hlawma.

Hetah chuan khua a thim ṭan chauha, Mizoram lamah erawh ni a chhuak ṭan chauh thunga, khawvêl pakhata awm si hian kan awmna hmun erawh a lo inang lo veka. Hetiang ringawt pawh hi ka tân chuan thilmak leh thil thar vek a ni.

“Rawn kal ve thei ula chu duhthusam, Mizo an awm ve an tia. Mahse ka la hmu miahlo, ka awm ve tih pawh an hrelo aniang, Damian-a te ho bâk ṭhian pawh ka nei rihlo. Ka awm rei anga ka nei ve zêl turah erawh chuan ka ngai” ka tihchuan an bu nghat nghata.

“Mizo pawh khawvêl hmun hrang hrangah kan awm tawh a lawm, mahsela an rawn ngaihven loh che chuan ngaihven duh bîk lêm suh. Tikhan ṭhian i nei tho a a nuam daih zawk ang, bâkah mahni hnampui chu i bialpa nei nên i mualpho lutuk zâwk ang. In post mualpho kan hreh hlawm siloa, mahni hnam phatsantu te an ti ve nghal ang che a, tikhan a ṭha mai alawm” an tihchuan a dik ka ti ve tho.

Mizo mipa in hnamdang an neih chuan hnam ai awhin chuti khati an tia, hmeichhia erawh a mipa zâwk in hnam phatsantu, hnam hlutna châng hrelo. Hnam timualpho tu min han ti leh luai luaia, mipa in hnamdang an neih khân hnam phatsan lo an ni bik lo. An fa kha hnamdang thisen kai a ni ve tho thoa, keichuan hmangaihna vâng a nihchuan tumah hi thliar ka duh lem lo.

Hnam tlêm kan ni tih hre mah ila hnam nunchhe tak chu kan ni vein ka hria.

“Ni e, ka nu te lo hrilh suh u aw. Nakinah keimahin ka hrilh ang, tûnah rih chuan nangni pawhin min lo zêp pui rih ula” ka tihchuan an hrilh loh tur thu chu sawiin hmêlṭha an tih thu bawk chu an sawi leha. Nuih an ti za zâwk, ni e Damian-a chu tumahin hmelchhia an tih ka ring lo.

Amah hi a pa ngawih ngawih bawk, Damian-a message a rawn luh avângin a haw tawh a nih ringin call chu ka dah riha. Ka rin ang chiahin a haw tawha, a chak thu a sawi chuan ka thaw ve huai mai, ṭha tihpui vaklo mahila a chakna chuan min tihlim ve lo theilo.

“A va lâwmawm ve, hmeichhe dang i hnaih lo ang tiraw?” ka tihchuan a seen nghal a, vid call in a rawn ti nghâl zat mai. Puan chuan intuam ṭha sauh sauhin ka la zuia, a ni erawh a inbual zo chiah a ni ngei ang a sam a huh hlap mai.

A hmêlṭha leh vûk tawh mai, a ni hi chu chhiat lai aneilo emaw tih tur hian englai pawhin an hmêlṭha reng mai hian ka hria.

“Hmeichhe dang ka biak hman i ring em ni? Inah nghakhlel taka min nghâk reng tu a awm tih hre chunga hmeichhe dang ka melh i ring amaw?” tiin a hmui hmeichhe hmui ang maia senno châk chu a tisawi zauha, chu chuan ka nuih a tiza viau lehnghâl.

Chutih rual erawh chuan a thusawi chuan min ti lâwm viau tho si. Lâi deuh taka ka en lai chuan “Min chhâng la ngatinge i ngawih reng?” a rawn tileha “Ka ring pawh ka tih loh kha, hmeichhia an awm ve ka ringa, ka zâwt mai che a nia i be ngei ang pawh ka tihchuan loh kha, i mu dâwn tawh em?” tiin thudang ah chuan ka pakai zui ta daiha.

“Hei ka mu dâwn chiah, ilo muhil tawh emaw ka tia. Ilo la muhil silo a” a tihchuan ka ner nâng a “Mi kan ngai ve che a, ka lo mutsan che i ring amaw? Min va ring chhe ve a” tiin lâwm loh hmêl taka ka en avâng chuan a hmêl chu a rawn dang deuh zawka.

“Min ngai tak tak em?” a rawn tihchuan ka bu nghata, ka ngaihloh a ring reng reng emaw ni. Ka thusawi avâng chuan a hlim hmêl ta hle lehnghâl, khumah mu thla in a kut pakhat lukham chuan min en zui ran a. “Keipawh hian ka ngai lutuk che, naktuk chu weekend a ni bawka kan pahnihin lêng dûn ang hmiang, a tam thei ang bera hun hman dun ka duh” a tihchuan ka pawi ti bik lo.

“Sahuanah min hruai thei angem? Ka kal châk lutuk a, chuan tuipui kamah te pawh ka kal châk tho” ka tihchuan a rawn bu ta nghata. Chu chuan min ti phûr ngei mai, ka nui hak hak renga, keiin thu ka sawi mawlh mawlh laiin a niin a lo ngaithla a, a chângin a  rawn ṭawng ve zeuh zeuh tih chauh a ni.

In call hi chuan a ṭawng tam lêm lo, call loh pawhin a ṭhiante bulah leh ka bulah bâk loh a ṭawng ngai âwm ka hreloa. Hei hi ka duhna tak a ni bawk, ka bulah nelawm takin awm sela midang bulah chuan nelawm vak loh mahsela ka pawi ti lêm lo viau mai.

Call dah lo chuan kan in be char chara, lehkha zir pawh rilru ah a lang theilo. Bâkah hmalaiah ka zir tho a ka duhtâwk rih viau mai, a mut a chhuak ṭan tih hriat takin a mitmeng chu a dul deuh raih tawha.

“Mu tawh mai rawh i mut a chhuak a nihkha, i muhil hmêl ka lo thlir ang” tiin ka nuih ver vera. A ni pawh a rawn nui ve suk mai, a chau viau pawh aniang a mut a chhuak hma lutuk hian a ti chiang viau bawk “A nih ka muhil ang aw, zîngah ka lo be leh ang che. Call erawh dah kher lo la” a tihchuan ka bu nghata.

A mutna chu a nuam dâwn tih hriat takin a puan ka hmuh ringawt pawh chu a than ringawt pawh a to dâwn tih a hriat. Ngawi reng chuan mit chhing chiala a mu chu ka thlira, a duhawm takzet, an ni lam hi chu an mithmul hi a tamin a sei ka timai, an mit hmul hi ka awt ve ṭhin.

A muhil zui a ni ngei ang a thaw zui sak saka, keiin hmuhnawm ti takin ka thlir reng bawk. Tûnah hian ka phu phâk bâk a ṭha bialpa ka nei tih hi âwih har ka la ti lek lek ani, phone vela ka lo hmuh ka lo awh em em ṭhin te dinhmunah khân ka ding ve mêk in ka hria.

Tin, hnamdang hi chuan keini angin hmêl an awm ve lêm lo tak hi in ngaihzâwnna ah pawh hahdam taka min awm tir thei tu tur aniin ka hre bawk. An ni chuan hmêl ai chuan nungchang an en tak taka, sum ai chuan an pahnih hlimna kha an dah pawimawh zâwk bawk ṭhin.

A muhil hmêl chu ka thlir renga, mitchhin san ka phallo a ni ber mai. Engtin nge min duh ve mai theih tih hi ka zawhna hmasa ber a la ni fana, kan inhmuh tirh te ka ngaihtuaha. Ka hlauh lâwk zia lah kha zêp theih rual a ni heklo, tûnah pawh hian a mah hian eng emaw tak a bul hnaia awma mi tidanglam thei eng rau emaw tak chu a keng chiang a lawm.

A mah en reng chung chuan ka mit ka chhing zui riai riaia, zîngah ka harh chuan call chu alo la awm renga, Damian-a chuan min lo en reng tawh mai. Chutia ka tho phangin ka hmu thut chu a zâm awm viau lehnghâl “Morning” tiin a rawn nui deuh saka.

Ka wish lêt ve nangin a mitmenga min en reng avâng chuan ka lai bawk nên ka hawi sawn leh ṭhin a, a hrethiam nge mawni a nui ri hak lehnghâl. “Min lo en ve la, ngatinge i hawisawn zêl a, ka hmu châk che ania” a tihchuan ka en zauha.

Mahsela rei pawh en lo chuan ka hawisawn lehnghâl mai bawk. Mi mitah tak hian en harsa ka ti ṭhin, a bikin Damian-a hi, a mitmeng pâwl phat leh melh na zet vâng pawh hi animahna. Ṭawngkam a sawi kher lo pawhin a mitmeng hi a zahawm ngawih ngawih te hian ka hre ṭhin.

“Baby ka ngai che ania, khati khân awm zêl lo la nizân chu i mutui em?” a rawn tih leh chuan ka bu nghata, enge ka sawi ang pawh ka hre mai lo. Amah tawp hi ka buaina chhan tur a tling.

“I harhna a rei tawh em?” ka tihchuan a sana en zauhin “Gymah reilote ka lût a, ka inbual fai leh tawh zâwk. I muhil hmêl kha rei fe chu ka thlir tawh bawk” a tihchuan ka bu nghata. An ni lam chu an in ulukin in sawizawi an peih bawka, hei vâng hi a ni ngei ang an pian a nalh em em reng ni.

Kei erawh exer lâk ka peih ve meuh lova, lâk ai chuan ka dul hi kiar mai rawhse tih hi ka ngaihdan a ni. Lâk chu ka tum ve ṭhin a, zîng tina ti tur chuan ka thei dâwn lo tih ka hriatchian avânga bansan ka ni bawk, mut hi ka duh êm avâng hian exer lâk hi ka peihlo a ni ber mai.

“Kan in phih fai ange aw lo chelh rawh ka reilo ang” tiin bathroom lamah chân ka luhsan zuia. Ka hnaite chu phihin ka ha chu ka nawt zuia, nakinah ka inbual mai ang chu tiin ka chhuak a, Damian-a pawhin min lo la nghâk renga. Vawiinah kan lêng dâwn tih ka hriat avâng chuan ka phur ngei mai.