DEMON KING CHAPTER 6

DEMON KING 

CHAPTER 6 

“I lungawi lo em ni baby? Tinge min en duh miahlo a?” tiin ka hnunglam aṭang chuan min rawn kuahin ka dârah chuan a khabe chu a rawn nghat zuia. A ṭhiante pathum erawh ka ṭhiante bia in an la bengchheng nasa mai, an in mil viauin ka ring, ṭawng duh leh fiamthu duh lutuk vek an nia an number min dil a nihchuan ka pe khawp ang.

“Duhtawk tawh ula professor te an rawn lût ṭep tawh ang. An ni erawh zân a ni tawha an hman lutuk, dah rih rawh u in duh leh an number ka pe dawn cheu ania” ka tihchuan “Kan la vek tawh, keimahniin kan be mai ang, biak an nuam riau. Nang ai an hmêlṭha zâwk anihkha” Tyler-an a rawn tihchuan ka ner nanga.

Ka awmdân an hmuh chuan an la nui ṭhaw zui, Damian-a takngial pawh a nui nia. “Nia ka hmêlṭha hleinem, kan ṭhian zîngah chuan ka chhe ber alawm,” tiin Damian-a nui suk suk chu ka melh ngheka. 

Chutia ka awm tâk avâng nge “Lungngai suh, ka mitah chuan i hmêlṭha ber, ṭhian zînga hmêlṭha ber min nei dâwn thung a lawm. A ni lo'm ni? Ka hmêlṭha ber tih i hriat kha” a tihchuan a ṭhian te chuan an rawn chum pawp pawpa, kei ka lo nui ve vur vur thung.

Damian-a biangah chuan ka fawhsak zauha, tûnah chuan ka mood a fuh leh mah mah tawh. Professor a rawn luh tâkah chuan alam chu kan hawi ṭhap a, an ni ṭhian li erawh an ṭawng leh sur sur tawh. Professor te thusawi an ngaihthlâk ṭhat dim diam lai hi ka la hrelo va, chu ai chuan ṭawng nân leh inhnial nân hian an hmang tam zâwk ti ila ka sawisual lovang.

“Ngaithla ve tawh teh u, a tâwpah min rawn hau leh ang. In bengchhen leh vaih chuan maw hmun dangah ka ṭhu tawh dâwn ania” ka tih tâkah chuan Damian-a chuan a khap hlawma, an ngawi ve ta ṭhap mai. Mahse ngaihthlâk chu sawi loh thâwm nei miahlo in lehkha bu chu pen chuan an ziak hnawk leh ngat ngat nia! 

Heti em ema mipa harh hi ka la hmulo, tih tur hi an hre thlâwt ka ti. “Damian nang tal chu awm mai mai teh, ngatinge in awm mai mai thiam miahloh a? Pass in duh ve miahlo em ni? Keichu result ṭha tak neih beiseiin ania helaiah hian ka lo kal, ṭha deuh te'n ngaithla ve ula, in bengchheng thei bawk si, nang ni phei chu mi thlir rawn in ni leh nghal” ka ti chu an in melh kual hrek hreka.

“Chu min ngaihtuah deuh tihna em ni? Lungngai suh, nang ai kan ti ṭha hial mai thei ania. Tikhan âwih loh hmêl deuhin min en suh, nakinah result a chhuah hunah i hre mai ang” rinloh hmêl taka ka lo en chu an duh vak lo aniang an lâwm loh hmêl em em mai lehnghâl.

“Ni e ka hre mai ang, ka luak a chhuak e a” tiin dawhkan bawh chuan ka muthla deuh hnaka. Damian-a chu rawn ṭhu hnai leh zualin ka hmai bul chetah chuan an rawn awm hnaia “I nuam lo em ni?” a rawn tihchuan ka lu ka thing nar nara, ka pumpui hi a ṭhat vak loh avâng hian luak chhuak hi ka nei leh ṭhin a, ka nu leh pa pawhin hei vâng hian ania min ngaihtuah êm êm ni.

Ka u mipa pahnih lah hian engmah an ngaihtuah siloa, ruihhlo an duh êm avângin kan chhûngkua pawh kan buai phah fo va. Chuvanga ka nu leh pa pawhin nutei bia a America lama min awm tir an ni pakhata, sum chu nei ve mah ila ka u mipa te ber hetiang an nih avâng hian kan chhûngkua chuan hlim taka nuih ho hi kan nei khât khawp mai.

Mi chhûngkua hi ka awt ṭhin a, ka ṭhiante an unaupa te'n duat taka an enkawl ka hmuh te hian ka thik ṭhin lutuk.

“Ka ṭha Damian ka ṭha tak tak ania, ka pumpui hi a ṭha vak lo va chuvang mai mai chu ania” ka tihchuan a hmui a ti kawi zauha. A ngaih a ṭhat hmêl chuang lo “Damdawiinah kan kal dawn ania, i damdawi tur pawh an hre zâwk ang. In enkawlna ṭha i mamawh a nih kha, kan chhûngkaw Doctor a awm alawm,” tiin sana chu a en zauha.

Hepa hian min hruai duh leh tak takin ania ka rin ni, a thusawi tih loh lai a nei tlat lova. “Chutiang angailo damdawi ei lai ka neia, ka ei zawhah chuan ka ṭha mai ang. Chutianga ngaih thutak lutuk tir chi a nilo, ka ṭha tak tak; Doctor chawh tho a lawm ka ei, min ngaihtuah suh ka ṭha” tiin professor a chhuah tâkah chuan dawhkân bawh chuan ka mit ka chhing zuia.

“Ka muhil châk lutuk, class ah hi chuan a bengchheng bawk si” ka tihchuan min kai tho nawlhin a ṭhiante chu kan chhuah tur thu a hrilh zui a, khawiah tak min kalpui tum ang maw? Ngawi reng chuan ka zui ve zel ringawt a.

Chutah kan inhmuh hmasak bera a lo awmna room tuma luh ngai lohna ah khân min luhpuiin kawngka chu a kalh zui daiha, “Class kan la neih kha, enge hetah kan tih dâwna? A reh bawk si” ka tihchuan ṭhutthleng lo awm khâwm lam chu panin pathum chu a hûng rem sauh sauha, min kai pheiin “I nawm loh kha class chu ngaihtuah suh, hetah hian mu ang. I zia hunah kan lêt chauh dawn ania” tiin min pawt ṭhu in amah vek chuan min nem mu zuia.

Ka bulah chuan rawn mu in min kuah nghâl hlun bawk, keipawh mut ka châk ve tho nên hnial duhlo chuan ka mu ṭha ve maia. Helai chu zirlai dang an awm lo bawka reh nuam tak a ni “I chauh châng apiangin hetah hian i kal ṭhin em ni?” ka tihchuan chauh hmêl tak hian min rawn chhâng a.

A mut a chhuah hmêl êm avâng chuan inherin amah chu ka en kara, a mit a lo chhin avâng chuan ka en tih a hre miahlo. “Ka room bik anih hi, tumah an lût mai mai ngailo, hetah hian ka rilru hah châng te chawlh hahdam ka duh apiangin ka kal ṭhin, nang chu englai pawha i kal ka phal” tiin a rawn meng chhuaka.

Ka lo en reng tih a hmuh rual chuan a nui nghal suk mai, min kuah nghet sauhin ka chalah chuan a rawn fâwp vang vanga.

 

“Muhil rawh, keipawh ka mut a chhuak lutuk, i ṭawng reng chuan kan muhil theilo ang” a tih tâkah chuan thil dang sawi duh tawh bîk lo lovin amah khan chial chung chuan ka mit ka chhing zuia.

Mut hi chu kham a lo har em a nih hi, mut kham lai hi ka neih âwm pawh ka hrelo, englai pawh hian ka mut a chhuak em em zel mai chu a nih hi. 

Ka harh leh chuan Damian-a chuan min lo en leh reng tawha, a khabe dawm chung chuan mitmeng sexy lutukin ani min lo en ni. Lai deuh tak chuan ka nuih ringawta, “I mutui em?” a aw chuh! Hriat a nuam hliah hliah, hetiang hian engtin nge sâp tlangvâl chu pawh hmêlṭha lutukin min duh theih? 

Mahse an ni chuan hmêl an thlir lo an tih fo kha, a dik zia ka hre ve zêlin ka hria. “Mutui lutuk nang zâwk i muhil ve miah lo em ni?” ka tihchuan a nui haka “Muhil e, mahse i muhil hmêl duhawm zet kha ka hmu leh châk sia ka muhil reilo” a tihchuan ka nui haka.

“Ka duhawm ziahlo, ka muhil hmelchhe lutuk tih te chu ka hre ve reng, duhawm min ti tak tak lo” ka ti chu a nui leh hawk hawka. Keiin a dâk zawnga a hrawk bâwk rawn lang chu nalh ti zet hian ka thlir thung, mipa hrawk bâwk hi chu a len pauh leh hian an inhmeh ka ti zual ṭhin.

Nui seihin a dâk lai tak chuan ka khawih saka, a nui lai chu tawp chatin min rawn melh vuta “A nalh ka ti, a tipa zual che” tiin ka khalh sak neuh neuh a. Ka kut chu dah sawn tum lo hian naupang thu âwih thei tak ang maiin ngawi reng hian a dawh heuh heuha. 

Insûm theilo in phone vela ka lo hmuh fo tawh angin a nghâwngah chuan ka chuk sak dan dana, ka zuk deuh chu min namsawnin a mit a sân uka “Engthil nge tih i tum ni? Insûm theilo a min siam i tum nge?” a rawn tihchuan ka lu ka thing nar nara.

“Chutiang ka tum a nilo, mahse ka fâwp châk a. Thil tih ka tum mai ania” ka tihchuan a nui ta suka “Love bite” ti a phun supin “Han ti ta che, ka châk zâwng tak a lawm” tiin ka kâwngah chuan a rawn kuah zui chata, keipawh chuan ngawi reng chuan tih ve chhin ka châk bawk nên a nghawng chu ka zuh sak dek deka.

Chutah a rawn thaw hak ka hriat chuan ka nui sak mai, a lungphu rang ta sauh chuan alaka awmzia ka neih zia a ti lang chiang hle in ka hre bawk. Nui var varin a mitah tak chuan ka ena “A mawi ka ti, hetiang hi ka la ti ngai miahlova. Ka tân chuan thil thar vek a ni zêl, chuan nang hi ka mipa hnaih hmasak ber i ni” tiin a âwm vêl chu ka tuk sak karh karha.

A âwm hlai deuh hlap te chu bei a nawm hmêl bik hliah hliah hian ka hria a, hetiang mipa famkim lutuk hi ka ta a ni chu ania. Mumang te pawh a ang lek lek zâwk a lawm, zaktheilo in ti viau mahila amah ka duh na hian zak lo theilo in min siam miau si a.

“A dang pawh ka kal phal, mahse tûnah chuan ka hun ve thung” tiin min lehthal in ka nghâwngah chuan a rawn bur ve ta chata. A fawh rual chuan ka thaw hak mai, keimah ah hian eng emaw danglam a awm a, ka khûr der der bawk.

Mit chhing chungin a thil tih chu ka dawh ringawta, a thip zek lehnghâl. “Damian a na a nia, duhtawk tawh la” ka tihchuan a rawn hawi chhuak a, a hmui chu a hup deuh hlapa, a sexy viau bawk. Ka nghâwng a fawh-na lai chu enin a hmui a pet zauha, “Tikhan a mawi, i inhmeh hle mai” tiin a nui suka.

Chuveleh ka phone chu phawrhin ka nghâwng chu ka en zuia, ding lam pang ka beng zâwnah chuan a lo sen duk kalha, a langsar viau lehnghâl. Phâwk zet hian Damian-a chu ka ena “Miin an hmu vek dâwn a sin, tinge hetiang em em a i tiha? Ngaihdan ṭha lo zet te an nei thei a sin” tiin ka nghâwng chu ka tuai ringawta.

Mahsela ka sam in ka hliah theih hlauh avâng chuan ka thaw huai mai, Damian nghâwng erawh hliah theih pawh a nilo. Amah lah chuan a la chhuang zâwk emaw ni a nui vur vur reng mai, ka lo siam duh palh palh a ni.

Thaw hakin ka ṭhu chhuaka “Tirawh chawhnu class tal kan lâk loh chuan kan attendance a chhe lutuk ange, ka chhungte'n an hriat vaih chuan a tihchi loh dâwn lutuk, chuvang chuan kal vat ang.” tiin ka pawt chhuak lui dawr dawra.

A ni pawhin ngawi rengin min zui ve bawk, class kan thlen leh chuan a ṭhiante pawh kha an lo la awma. Hmeichhia an lo chhaih leh zuk zuk tawh mai “Wow bro in thil tih ava hriat deuh ve” tiin Damian-a nghâwng chu an en saka.

Kei erawh ka lo kûn chal mai, thil ka lo ngaihtuah thui loh lutuk vâng vek. Min ngai diklo vek dâwn anih hi, keichuan hetiang lam hi ka lo ngaihtuah thleng pha lo hrim hrima.

ZAWMNA.

“Ngawi reng khân awm teh u, hei a awm in ti nuamlo. Engmah kan tilo bawk, hetiang thil mai mai buaipui suh u, tirawh u class lâk tur kan nei tawh lo lêng ang u” ti zuiin Damian-a chuan ka kutah a rawn kaia.

“Damian keichuan ka la nei, in duh leh lo va lêng mai rawh u. Kei chu ka la awm dâwn, class ka ṭhulh thiang lo” ka tihchuan min melh deuh rûn runa, a thinrim deuh emaw ni. Nge class bunk ka duh rêng rêng lo, ka nuteiin a hriat phei chuan ka nu leh pa a hrilh anga engkim a chhe vek a nimai.

“Kha ti khân min en suh, ka nute'n an hriat vaih chuan min ko haw nghal a nimai. I duh em ni chu chu? Helaiah hian lehkha ṭha taka ka zira, thiamna leh finna lamah pawh hma ka sawn theih nân a sin min rawn kal tir, an rin anga ka awm loh chuan an rilru a na ang” ka tih tâkah chuan a in ngaihtuah nge ni dâwn ni; hmalam melhin a ngawi rûn rûna.

Rei fe hnuah chuan a ṭhiante chu enin “A ṭha e, kan nghâk ang. Mahse ban ve in kan lêng thung ang, rei kan lêng dâwn lo a min hnial tawh suh ang che, kan ṭhianho tihdan a nia bialnu ka neih tâkah chuan hruai ve ngei che ka duh” tiin a nui suka.

Chutia a pawm thiam ta chuan min ti thawveng huai mai, a lungawi lo hmêl hi a hlauhawm ṭhin bawk sia a lungawi loh hi chuan ka awm a nuam ṭhin lo. “Aw le, mahse kan haw tlai thei lo tih i hriat kha nutei leh pa Chris-a te'n min lo hauh leh chuan nangmah bawk ania hrehawm ti tur” ka ti chu a ner sawk sawk mai.

“Chhungkaw strict lutuk, midangte hi en rawh zalên takin hun an hmanga, an duh duh dânin nun an hmanga. Hetiang mite hi i awt ve lo em ni? Kum i tling tawh, nangmaha in enkawla engkim i thu a ti ngam tur chu i ni ve tawh” a rawn tihchuan an hnam zia a nih avângin mak ka ti lêm lo.

Ka hrethiam viau bawk, mahsela kan hnam angah chuan a la ni tlat lo a, nupui pasal kan innei te a nihloh chuan nu leh pa hi chuan min la ngai naupang tlat miaua.

“Kan hnam tihdân a ni ve lo, keini chu pasal kan neih hma chu kan nu leh pa te bulah kan chêng ṭhin,  hmana ṭanga kan tih tawh anih avângin kan bawhchhe ngai lo. Chu chu nangpawhin i hriatthiam a ngai, helam mi nên chuan kan nundan a inthlaua, nakinah chuan i la hrethiam ve mai ang.” ka tihchuan a bu nghata.

“A ṭha a lawm, kan haw tlai lovang. In hnam zia chu ka duhloh chi tak a ni, mahni duhdân pawha han nun theihloh chu” a rawn ti deuh hluka, a ṭhiante pathum lah chuan an lo thlawp em em mai lehnghâl, an ni hi chu Damian-a thu thu hian an awm ni berin ka hria.

“Keichuan ṭha ka ti viau asin, kawng engkimah nun zalên lutuk pawh hman thiamloh chuan keimah ni tân chhiatna a ni leh daiha. Keini lam chuan nupa a insiam te, in ngaihzâwnna reng reng pawh kan la thutaka, in la thutak lo ka tihna lam nilo in kan lo hmu ve ṭhin a, in milâr kan ngaihsan tak tak te ah hian innei zung zunga, inṭhen leha midang lâk luh leh zung zung hi a hluar bawk sia, helamah hian keini chu kan fihlim ve thunga” ka tihchuan an eee nasa mai.

“I sawi dik tho mai, chutiang chu sawi tawh lo ang u. Kawppui thlâk kur zut mi ka ni ve lo, nih ka tum lo bawk, i mi ngaihdan tur ka hre mai, mahse mihring kan in ang vek bik lo an tih hi i ring anihchuan khatiang mi ka nih ve kher ring suh ang che” a rawn ti zuia, ni e mihring an in ang lova, min lo hmangaih viau pawh a ni theia, hmalam hun chu Pathian kutah ka dah tawp tawh.

Class chu min awm pui ve ta renga, an ning hmêl erawh ka hmuh hmaih lo. A rûk chuan ka nui leh ṭhin, Damian-a phei chu a tûm kawh nasa mai, ka awm loh hma in engtin nge an awm ṭhin ang hre lo mah ila an tlânbo ngun hian ka ring a ni. Kum laklawhah ka kal miau avângin ka tân erawh tlânbo mai mai a thiang ve lo.

Engkim hi ka zir char chara, midang ka ûm phâk ve ngei a ngai miau si a. Class kan bân tâkah chuan thaw huai hlawmin an zi mar ar ara, ka inkhung mawlh mawlh lai chuan “I rei” tih hluk pahin Damian-a chuan min kai chhuak zui ta dawr dawra.

Midang min lo hmutu te chuan min en leh nasa tawh mai, a mak lêm lo. He university ah hi chuan an larin hrelo an awm lovang, he university a lût hi mi rethei an awm lova, mi vantlâng chung lam vek an ni. Chuvang pawh a ni mahna lirthei lah Mizoram lama kan hmuh phâk loh a changkâng ber ber ang chi hlir an nei fura, keini tân phei chuan hmuhnawm a tling zel mai.

A bike bul kan thlen rualin a helmet chu a khum nghal mawlh mawlha “I ta tur lei ve angai a nih hi, ka ta ang hi kan lei nghal dâwn ania” tiin a ṭhiante chu kan awmdân tur vel a hrilh mawlh mawlha. Khawiah tak chuan min hruai ang maw? Ka rin êm avâng hian min tihnat duh ka ring pha lo hrim hrim bawka, hlauhthâwnna ka nei lêm lo.

Bâkah ka ṭhian neih chhun te an ni miaua, Mizo an awm ve thu chu hre mah ila min rawn ngaihven lêm loh avângin keipawhin ka ngaihven biklo, khawvêl changkâng zêlah Mizo te pawh kan in zar pharh nasat zia ka hai bik lova, ka chanchin chu an hre ve ngei turah ka ngai.

Damian-a hnunga ka ṭhut kai rualin chak zet hian a tlân chhuak leh fua a, ka phulo theilo. He mihring hian lungphu ṭha lo min neih tir takngial dâwn, ka mit chhingin a hnungah chuan ka beia, kan ṭhiante chuan hnung lamah min rawn ûm ve bawk.

Dawr pakhat zâwnah chuan min dinpuia, ka en chuan biker ho mamawh tur an zawrhna hmun a nih hmêl. Chutah min luhpuiin a dawr nghâktute chuan min lo buaipui vata, hetah pawh an lo hre leh tawh. Hepa hian hretu a ngah dâwn anih hi.

“Ka bialnu helmet tur hi lo en teh u, a nalh ber ber ka duh. Amah hi duhthlan tir ula, ka helmet ang deuh hi in lo en pui dawn ania” a tihchuan chûng ho chuan hmeichhe helmet an dahna lamah chuan min hruaiin ka en chu reels vela ka lo hmuh ṭhin helmet zawhte beng ang chiaha an siam ang vêl te a chi hrang hrang ang kha a lo tam mai.

A beng nei a dum Damian-a ta ang chu ka la zuia “Hei animai, adang chu a ngailo” tiin Damian-a lam chu ka pan zuia, “I duh i thlang tawh em ni?” a rawn tihchuan ka bu nghata.

“Hei hi ka duha, a dang chu angailo tihian a nimai. Kal vat ang u, kan tlai lutuk palh ange” tiin a bulah chuan ka ding zuia, a ni pawh chuan a man zât chu zawtin a card chu a pe zuia. Rei a nilo, la lêt leh thuaiin pâwnlamah chuan kan inzui chhuak zuia.

Bike bulah chuan min dinpuiin Martin-a te ho pawh an lo la awma “Changtunu nat chu i hlau bawk maw kha i lei nghal mai a lawm, midang i ngaihsak loh tehlul nên i duh ber lah hi a bawp a tawi nên” an rawn ti kher erawh lawm lo zet hian ka ena.

“Ka bawp hi a tâwi thlâwt lo aw, keiai tê an tam lutuk. Kal vat mai ang u, khawiah nge min hruai in tum reng renga?” tiin Damian-a chu ka en ha a “Thuruk a ni rih, kan ṭhianho hmun bikah ka hruai ang che. Nuam i ti viau ang” a tihchuan ka phur ta phiana.

A nawm ka ring ve ringawt bawk, helmet chu min khum tirin ka mitah chuan min rawn ena. “I inhmeh lutuk, i mawi pui dawn hle mai, kan tlanchak pawhin hlau lo la, nghet deuhin min kuah la. Ka chetsualpui lovang che, min ring rawh i nat ka duhlo” a tihchuan ka bu nghat nghata.

Ni e a bike ah chuan lohna a awm te a nih loh chuan min chetsual pui chu ka ring biklo, a helmet chu khum ve in a mitmeng mawi zet chiah chu ka hmu thei tawha. A pa hliah hliah mai, a bike ah chuan hneh sawh zeta kâr in a ṭhu zuia, keipawh a hnungah chuan a dara vuanin ka lâwn zuia.

Midang chu tlân hmasak tirin an hnungah chuan kan umzuia, khawpui pâwnah chuan tlân zêlin tlâng lam pang kan pana. Thingkung a tamin a hnuai erawh phûl vek a ni thung, phone a kan lo hmuh ṭhin ang chiah chiah kha a nimai. A nawm hmêl takzet, hawi kualin ka bân chu ka phara, ka nui var var bawk.

Damian-a pawh chuan ka awmdanah nuam ka ti tih a hria a niang rawn hawi lêt leh zawk ṭhin in muang deuh zawk chuan a tlana. “Vanrama awm ang mai niin ka inhria, a nuam lutuk. Hetiang hmunah ka awm ang tih hi ka ring pha lo, Damian a nuam takzet” tiin a dârah chuan ka va bei zui than a.

Chutah tlâng chhîp ah chuan dingin phûl leh Fir an tih mai, douglas fir mawi tak tak chu ka thlir kuala, chutah a tlâng hmawr lam chu min panpui in kan hnuaiah chuan khawpui chu a lo lang pe ut a. A mawi ngei mai, kan panga chuan ding khawmin kan thlir ṭhap a.

Hnuailam aṭanga thli rawn tleh heuh heuh chuan min rawn chhemin Damian-a chuan ka kutah a rawn kai zuia. Ka en nghal ha mai “Ṭhu ang u, in tur kha in keng em?” Tyler-a chuan a rawn ti nghal zata, engthil nge ti a ka en chuan beer bur an rawn phawrh ta mai.

Phâwk fe chuan ka en a “Kha kha in in dawn maw?” ka ti chu Damian-a chuan min rawn enin “Kan tih dân a nia, mahse rui khawp chuan kan in ngai lo a nia. Ka in tam lovang, i duh ve ka ring siloa kha nang chu theitui hi lo in mai rawh” tiin fanta hi min rawn pe a.

Ka hnial duh ta biklo, a thil tih apiang ka hnial zêl anihchuan min ning thuai ang tihte pawh ka hlau ve bawk nên a zawng zawng chuan khap ka duh biklo. Hmeichhe sual tak chan ka chang ang tih pawh ka hlau hlel love.

An thil in chhûng chuan an piah deuhah chuan keimaha ṭhu in theitui chu ka in khalh khalh a, Damian-a pawh a rawn kal har lo. Ka bulah rawn ṭhu in ka dârah chuan a rawn beia, ni tla ṭan tur nên chuan kan awmdân chu a romantic takzet hian ka hria, nui ver verin a kut chu ka khalh sak neuh neuha.

“Kan ramah chuan hetiang in ram thing ang hi a awm ve meuh lova, helama thil awm ang hi a awm mang lo tih tur ani, nawm hmêl kan ti thei lutuka. Ka ṭhiante awm ve phei sela chuan nuam an ti ngawt ang, kan kal châk thei lutuka. Keipawh hei ka vânnei hlauha ka rawn kal thei hi ka lâwm ania aw, nuamlo tihna chen chu nei mah ila khawvêl zau zawk ka thlir theia a nuam ka ti“ tiin ka phun niah niaha.

“In ram pawh kan la kal dûn dâwn ania, sâwng ho pawh sâwn an peih ka ring. Kan hmu ve châk alawm, chawlh veleh kan kal dawn ania” a tihchuan ka phur ngei mai. Chutih rual erawhin kan chhûngkaw nundan avâng erawh chuan ka tim ru deuh thung. Ka unaupa te a hmuh chuan a mi hmuh dân a dang vek ang tih ka hlau a ni.