DEMON KING CHAPTER 5

DEMON KING 

CHAPTER 5

Zîngah ka harh chuan khua alo êng uarh tawha, sava chiar nak nak ri pawh ka hre thei. Damian-a chu min kuah chungin alo la muhil a, tih harh hlau tak chuan tho chhuakin inhnuai lam chu ka pana, mi ṭhenkhat chu lo la awmin a ṭhen sofa ah te chuan an lo mu nuaiha.

Zân lamah an in tam hle tih a hriat, thâwm dim tak chuan choka lamah pheiin Damian-a in tur coffee siam tum chuan ka buai rak raka, ka zai rat rat bawk. Hmanrua chu hmuh harsa an awm loh avângin ka inzawng hmu thuaia, ka siam zo ka kal dâwn tihah Damian-a lo duh ve tu kha ka tâwk nawlha.

Min hmuh rual chuan a meng rum lehnghâl hle bawk, thah châk hmêl tak hian min ena. A in pet ruh nghâl ṭun bawk “Nang nu leh bawk maw? Nizânah Damian-a bulah i mu a, i taksa mawina hmang khân thlêm i tum em ni? Hre rawh Damian-a hi ka ta a nih hi, i rawn lan hma khân vawi engzat nge nuam ti taka min lo siam tawh i hria em?” a rawn ti chu ka ner saka.

Boruak a va ngam deuh ve, a thusawi chuan min ti thinrim phat bawk “En teh Annie, in mu dun tawh em tihchu ka lo buaina tur a nilo. Tûnah chuan min duh tih ka hria a, chu chu ka duh tâwk, tin in mutdun thu kha sawi chiam chiam suh a rawn kîr phah lo ang. Nangmah i indah hniam mai mai ani, taksa in itna satliah hi chu a tlo lo rêng ania” ka ti ve ngata.

Ka thusawi chu a thawk ṭha bawk aniang a mitmeng a rawn danglam nghal vek mai. “Nangnu hian khatiang khân min ti ngam a maw? Damian-a hi ka ta a nih hi ka ta chauh, i va zak theilo em em ve. Nang ang mi ṭhing lutuk hian min chuh pui ngam a maw?” tiin ka samah chuan a rawn kêk a.

Keilah insûm thei tawh bik hek lo, lo kêk lêtin chhuatah chuan kan tlu dun rawka. A la au tuar tuar bawk nên midang chu rawn harhin min en ṭhup a, mipa ho chuan min ṭhelh an tum bawk mahsela kan in kehna a nghet êma min pawt hrang mai thei bik lo. 

Ka kawlh bawka mi ka sual tam ve tawh bawk nên a hmai vêl chu ka ham thi sak nual tawh “Engthil nge thleng teh hrep a? Kha kha tute nge?” Damian-a aw chang zet a rawn chhuah rualin Annie chuan min thlah nghal a, ṭap pûrin Damian-a chu va panin a zualko nghal zawt zawt chu ka en tawpa.

Ka tih hmasak a nih thute chu ala sawi ta deuh deuh, dâwt sawi thiam award hlan hial chi a nih dâwn saw. Engmah sawi lo chuan ka kut kuangkuahin ka ding ât a, Damian-a chuan min rawn panin Annie thusawi avâng khân min hau dâwn emaw ti a in ring taka ka lo awm lai chuan a rawmawl chuan ka hmui thi ser ser chu dim tak hian a rawn hru a.

“I ṭha em? Sawnu phiangsen sâwn enge a lo hrilh leh che, nangmah chuan i tih hmasak ka ring lo bur. A dik em?” a tihchuan ka bu nghata “I coffee tur ka siama, a rawn kala in mutdun tawh thu leh a ta chauh i nih thute min rawn sawi khum vaka” ka tihchuan midangte chu an lo thum zui haka.

Annie erawhin ngei hmêl tak hian min la en reng a, ka thusawi chuan a ti zak chuang lo tih a hriat. A kut a kuangkuah a, a bulah a ṭhiante pahnih kha an awm ve ta bawka “Nizanah khân haw turin ka ti tawh che sia, engvanga helaia la awm ve nge i nih le? Ka bialnu bulah thil nilo lo ilo sawi bawk a, tunge min pan hmasa ṭhin tihchu i inhre chiang ang chu maw? Tin khatiang thu i sawi avâng khân ka lâwm lo viau bawk, in Company nên a kan thawh ho avâng chauhin ka ngawi a, i ṭawng tam lutuk chuan ka tum loh thlengin ka kal dawn ania” ti chang fakin Annie chu a melh rûn a.

Midang chuan engmah an lo sawi lo, ngawi reng hian keini ho chu min en ṭhap renga. Hmeichhe tlêm la awm te chuan Annie rapthlâk an tihzia chu an sawi sep sep bawk, a ni pawh Damian-a thusawi vâng nge ṭap chungin an kalsawn zuia, kei erawh kan lo insual rei bawk nên kan inkehna lamah khân ka nghâwng vel hi a na ṭhûm mai.

“Martin, Tyler midang hi lo haw tir tawh rawh u. Ka zîng boruak chu a fuh lo hle mai, tirawh Baby room-ah awm leh ang. I coffee pawh chu ka lo in ange” tiin coffee no a ka thlit sa chu la in ka kutah a kaia, a room lam bawk chu min pan pui lehin khumah chuan min ṭhut tira.

Coffee chu a tlâk nghal pawp mai, ngawi reng chuan a che vêl chu ka en renga. Ka chungah a lawm lo emaw ka ti hman hial tawh mai “Damian ka chungah i thinrim em ni?” ka tihchuan a lu a thing nar nara.

“I hmai pem hmuh hi ka duhlo, hmeichhia chu nilo se ka sawisa khawp ang. I hmêl ti danglam khawpa an siam che ka phal hauh lo” tiin ka hmui thi laiah chuan a rawn fâwp zauha. A thip zek lehnghâl min hnek fuh ve deuh bawk nên a na ve phian mai, “Ti tak khân insual ilo thiam ang tih ka ring pha lo a” tiin a nui suk suka.

Ka insual a hmu chu a hlim zâwk emaw tih tur in a ni a awm ni. “Min nuih suh, ka nuih a za ve miah lo ania keimah lo hmeichhe dang hnaih vaih teh ka kalsan nghal nal nal ang che, keichu in kawp midang lo mutpui tih vêl kha ka duh miahlo ania. Min duh anihchuan ka tân rinawm la, i rinawm thei dâwn lo a nih chuan min hlat rawh. Chu chu ka sawisa a nih chu” tiin a mitmeng pâwl phat a en chung chuan ka sawi fak faka.

Min en rûn rûn mai, mahse engkim hi kan thlen thui tak tak hma hian sawifel ka duh. An ni hnam phei chu ka lo hmuh fo tawh hmangaihna lamah pawh inṭhen ngun em em, midang kawp lehnghâl zel mai thei an nihna hi ka hre chiang bawk nên hlauhthâwnna chen ka neilo theilo.

“Chutiang chu maw i ngaihdan? Ka phatsan che i ring tihna em ni? Chutiang mipa ka nih chu i ring reng reng em?” a rawn tihchuan ka en ringawt a, ka thusawi kha a hrethiam chiahlo tih a hriat. Lu thing nar narin “I ni dâwn tih ka hreloa, mahse in vên thu hla ah ka sawi mai ania, keichuan nat ka duhlo. Tin, puitlin ka ngaihna hmunah nilo in duat taka enkawl ka nihna tur thinlung ka duha, kalsan mai leh thei tu thinlung nilo in ka tlin lohna nên zawng zawng a min pawm thei tur thinlung ka duh, ka sawi sa a nihchu, hetiang hi ka iai vâng che leh ka duh loh vâng che nilo in ka ngaihdan engkim hre sa in min hnaih la ka duh mai ani” ka tihchuan a thaw ta huaia.

Ka hmui na lai chu tuai heuh heuhin a nui suka “Bialnu kawlh deuh, chhan ngai miah lo ka nei dawna ka lâwm hle mai. I huaisen ang tih hi ka rin sa a nia, buaina i tawh pawhin kei ka rawn lan kher ngailo in i chingfel thei ang tih ka ring” a tihchuan ka ner nâng a.

Ber kher chuan, ka huaisen pawh ka intilo, mahse a ṭul chuan an tâwp thleng ka ṭang ral peih. Hmeichhe zaidam zawk zawk ka niloa, dik ni a ka hriat leh ka dikna ah chuan ka tlawm ngailo. Tute pawh nisela tlâwm mai mai hi ka tumlo a ni tawp mai, ka diklohna ah erawh chuan ka tlâwm hreh leh hauh lo thung.

“A nihchuan tumah ka khawih lêt tawh lo anga, min chhan zêl ang che, mipa te ka hneh dâwn siloa a hma ang khân mipa lakah chuan min hum dâwn lo em ni?” tiin ka en chho ha a, ka lama rawn kûn hniam pah chuan ka nghâwng chu a rawn hmeta, chutia a rawn hmeh tâkah chuan a luh leh a tha chu alo na deuha.

Ka ner sak sak mai, hmeichhe insual hi chu ka peih vaklo. Insual aṭanga hun eng emaw tichhung hi nghâwng hi a na vek zela, chu ai chuan mipa anga inhnek mai hi ka duh ṭhin.

“Tehreng mai, tihnat tumtu apiang che chuan an inchhirna tur thil an ti a nimai, haw i duh tawh em? I chhungte'n an lo ngaihtuah tawh ang che, ka inbual fai lawk anga University a tlang nghal thei turin ka insiam law law ange min lo nghâk lawk la ka reilo ang” a tihchuan ka bu nghat nghata.

Chutah a thawmhnaw chu a phelh ta sawk sawka, phâwk lutuk in ka lo en thung. Ka hmaah a inphelh ka ring miahlo ania, ka lo ringsual chhia va a ni ka awmdân a rawn hmuh chuan a mit a sân zauha “Bathroomah in phelh mai ta che, helaiah in phelh kher angai em ni?” tiin ka mit chu ka hup pah paha.

Mahse a piannalh zet kha ka hmu hman vek tho, an mahni hnam ho uar em em tattoo a nei hauh lo chu mak ka ti a. A rûk tak chuan ka hlim bawk, keichu tattoo hi ka ten ru riaua, hmêlṭha deuh pawh tattoo an ngah chuan ka hmuh dân a diklo vek zel, bâkah an upa anga an vun a rawn chuar anga a nalh lamah pawh nilo in a ṭawp lamah a kal ang tih a hriat reng.

 “A ho emai min it ka ring ania, khatiang daih kha maw i ngaihdan ni a? In phelh sexy man a va awm lo ve, min ti ho vek” a ti anihchu! Hepa hi a va han ho tak, chutiang a duh vangin maw a lo inphelha “Va inti fai vat mai teh, kan tlai ange tlai ka duh hauh lo ania aw. Nutei te'n min ngaihtuah tawh ang, ka haw vat loh chuan vah chhuah an phal tawh lo animai” ka tih tâkah chuan bathroomah chuan a lût zui ta thuaia.

Keipawh a inbual chhûng chuan ka bungrua chu lo khung felin ka sam chu ka khuih mâm thuak thuaka, a tla nasa ngei mai. Khanu vâng vek kha a ni, ka sam hi ka enkawl uluka, a tla hi ka ui thei hle bawk. Chuta kârah insual avânga a tla chu khanu kha sual nawn leh mai ka duh rum rum mai.

Ka sam tla nasa lutuk chuan ka lung a ti awi theilo a ni ber, ka kutah a tla chu ka chhar khâwma. Ka taksa nat vâng pawh nilo in ka sam ui vâng zâwk chuan ka mittui a tla mai dawn hian ka hria, ka en ngar ngara.

“I ṭha em? I va reh ve” Damian-a aw rawn chhuak avâng chuan hnunglam chu ka en nghal thuaia. “Um ka ṭha i zo tawh em ni? Inthlâk la i hman chuan kal ila” tiin ka sam chu a room chhûnga bawlhhlawh bawmah chuan ka paih zuia, a ni pawh a reilo. Tshirt dum ha in a chungah denim jacket a dum tho a ha a, jeans kekawr dum bawk a ha a, a sneakers erawh a var ve hram e.

Mipa hi chuan rawng thim an ngaina an tihchu a lo dik a nih dâwn hi, thawmhnaw rawng lar lam ha hi chu an vâng pharh zel. Mahse a dum hi an inhmeh ka ti a, an pa ka ti ṭhin, an pian a nalha an hmêlṭhat ngat phei chuan thawnthu leh movie vela changtupa te ang maiah hian ka ngai ṭhin

ZAWMNA..

In kan thlen rualin nutei chuan min lo chhâwn vata “In va rawn haw har ve, kan ngaihtuah hman che alawm. Damian-a khân sawi chiang viau lo phei se chu i chhuah hi ka phal vak lo nân, tûn chinah chuan zân riah chhuah loh hrâm i tum dawn ania” a lo ti zung zunga.

Pa Chrisa pawh chuan a lo sawi ve bawk. Ani pawh hi nutei zia a la zo tawhin ka hria, an fate hmun dangah an awm vek bawk nên an fa ang tak taka min ennaah erawh ka lâwm viau thung. “Mr Johnson chutiang a ni hleinem, ka insiam sa duh sia, College kal tura rawn sâwm leh ai ka tia ka insiam nghala” Damian-a chuan a lo ti vata.

Ka chhûngte thusawi chuan a ti awm nuam bik lo aniang, inthlahrung deuh tak chuan a sawia. Nutei chuan en vang vangin “A nihchuan breakfast pawh ila eilo anga, hetah ei ve nghal mai rawh. Mizo chaw ka siama, ila tem lo ang tiraw? Ei ve nghal la, hnamdang chaw ei chhinna a nimai a lawm” a tihchuan Damian-a pawh chu a lo bu nghata.

Kei erawh inbual fai turin ka room lam chu ka pana, khumah chuan ka thawmhnaw chu thlâk mawlh mawlhin bathroomah chuan ka lût zuia, ka inbual nghal sawk sawk mai. A tlai tawh bawk nên zîng chaw kan la ei siloa ka hmanhmawh a ni ber mai.

Room aṭanga ka chhuah chuan nutei chuan chaw ei alo siam peih diam tawha, Damian-a chuan min lo la nghâk a nih hmêl, ka chhuak a hmuh rual chuan ka kutah a lo kai vata. Nutei ka va en chu a mit min lo sân khum euh euh mai, kan in ngaizawng tih a hre chiang tawh viau ang chu.

Damian-a lah hian a thup der silo, zak deuh tak chuan dawhkân chu kan kil duna. Maian bai vêl ka hmuh chuan ka lâwm ngei mai, vawksa chhûm nên hmarcha vêl nên chuan ka ei châk tak tak vek an ni. Helam mi hi chuan chungin hmarcha an ei nasa lova, an eitur siamah pawh a hming tak tak chauhin an telh ṭhin.

“Hmarcha hi i ei ngam ve em? Kan bai hi a thak deuha, kan pa hian a ei ngun tawha ka fate pawhin an ngaina tawh viau ania” nutei chuan a ti zung zunga, Damian-a erawh a bu nghata. A ei châk loh hmêl ngang mai, keimah chuan hma hruaiin ka ei zui nghal mawlh mawlha.

“A van tui tak, ka ei chakna a rei tawh. Helam thil chu a thlum te hi a tam sia ka ei thei vak lo, Asian food hi an lo tui nge nge a nih hi” tiin ka nui var vara. Damian-a chuan ka tihdan zirin hmarcha chu a pira, a ei rual chuan a rawn sen nghal ap ap mai, a hnâr te chu thlanin a rawn bawl ṭak ṭaka.

A hmêlah erawh engmah a ti lang duh ṭhak lo, thâwm a chhuah hauh lo bawk. “I ei ngam loh chuan ei lui suh aw, i pum ana ang. Antui hi a thak tho a, hâwp zâwk rawh, kha i sen vek ania” tiin a beng bulah chuan ka phun sar sara.

“Ka ṭha a lawm, a tui mahse a thak mah mah a nih hi” tiin a hmui chu a tuai zauha, ka nuih hak mai. Vawksa chu a ti vêl chu suah sakin ka pe zêl a, a inthlahrun hmêl êm avâng chuan ka khawngaih a ni ber mai.

“Tui iti em? Ei ṭeuh rawh aw, in ei ngai ka ring siloa tui i ti vak lo mai thei” nutei pawh chuan rawn ti ve in chaw chu min khawrh belh zuia. “A tui lutuk, a dangdai bawk. Thil thar ei ve te pawh angai a lawm,  hnamdang chaw hi ka ei ngai hauh lova ka nu leh pa hian an duhlo a ni ber mai, mahse alo tui a nih hi” ti ve luamin chaw chu kan tih dân ang zêlin a kut ngeiin a bara.

Ten ang pawhin a awm lo, an ni hnam phei chu an thianghlimin an ei tur reng reng pawh fork leh spoon nên vek an ti ṭhin sia, chutia a kuta a bar ve mai chu a hmuhnawm dangdai riau lehnghâl.

Chaw ei kham chuan ka room-ah ha te nawtin a ni pawh ka ha nawhna la hmanloh chu ka hman tira, ka inchei leh lai chuan a nin hmêl tawh viau mai “Makeup nên lo khân i hmêlṭha zâwk, tinge hmeichhe ho hian inchei hi in peih em em mai le. Tlai i hlau a ni lo'm ni? Hei kan tlai ṭep ania” a tih tâkah chuan hmanhmawh zet chuan ka insiam sawk sawka.

A sawi ang tak takin a tlai ve tawh reng mai, pâwn kan chhuah rualin a bike chu a ti nunga. Ka ṭhu kai nghal vat bawk, a kâwngah ka kuah rual chuan tlân chhuak nghal fua in kan thlâwk ni berin ka hria. Hetiang em em a a khalh chak ṭhin hi mak ka ti, kawng pawh ka hmu ṭha hman meuhlo.

“Damian tlân muang deuh teh kan accident ange aw, ka hlau ania tlân muang rawh” tiin ka au deuh chula. Chuveleh tlân muangin “Hlauthawng suh, ka chêt sual pui ngai lovang che. I nat ka phal i ring em ni? Ka bike a chiang lo te a nih loh chuan kan chesual hauh lovang” tiin ka kut chu a kut pakhat chuan a rawn hmer salha.

A tlân muan tâkah chuan keipawh ka hahdam huai mai, college kan thlenga. Kan ṭhiante pali chu an lo awm leh ṭhap tawh mai, gate bulah chuan Ganza nge mawni an lo pak khu luai luaia, Damian-a chu ka en a. A ti ve angem tih mawlh chu ka ngaihtuaha.

Hetiang lam chu tilo hrâm se ka duh, “Hi in ṭha maw?” Sammy chuan min lo hmuh rualin a nui nghal sunga, a kut chu a lo vai zauh bawk. Damian-a chuan an bulah min phei puiin an in kuah thuak thuaka.

Kei erawh an bulah ngawi rengin ka ding thung, an thil zuk lai Damian-a pêk an tum chu a lâk hma in ka lo dang vata. “Hetiang thil chu i tilo ang tiraw? A ṭha lo” ka lo ti chu mit chuar deuh nângin min ena, a hmêlah chuan a lawm chiah lo tih a hriat.

Mahse a taksa tâna ṭha lo hi chu a bialnu ka nihna anga khap zêl ka duh. A ngawl a vei tawh a nih phei chuan engtin nge bul ka ṭan pui ngam ang? Hetiang ti reng reng an thluak a nghawng thei tih ka hre chiang ve bawk si a.

“Eu bro, hei a khap ṭan nghal der che elo? Hetiang te chuan party pawh kan party thei tawh dâwn em ni?” Tyler chuan a rawn ti zuia, min inti thlahrung lek lek tawh. An vai maiin min en ṭhup bawk si, Damian-a chuan banin a zu lui ta tho a chu chuan min ti lâwm vak lo.

“Ka kal dawn ania, tikhan zu rawh u tih tur ka nei tlat” tiin kalsawn mai ka tum chu ka kutah a rawn vuan bet chata. “I thinrim em ni? Min lo nghâk la kan lût rual vek dâwn ania, hetiang te chu kan tih fo ania, ngaiah kan neih tawha hrethiam ve mai la” a tihchuan ka chhâng lo.

Ngawi reng chuan tâl pitin ka kalsan ta daiha, ruihtheihthil duh lutuk hi keichuan ka ngaina lo. Kan chhûngkua kan keh darh chhan a nih avâng hian ka haw bur ti ila ka sawi sual lovang, sum kan neia mahse chhungkaw nun erawh a hlim phah chuang silo. Chuvang chuan ka pasal tur atân emaw ka bialpa tur atân chuan ruitheihthil khawihlo ni ngei se tih hi ka ngaihtuah dân a ni ṭhin.

Damian-a pawh ka rin loh deuha a awm avâng hian min ti hamhaih a ni ber mai. Class room ka thlen hma chuan min rawn ûm pha ta tho a, en lo leh be miahlo chuan ngawi reng hian ka kala, an ni pawh an awm anuam chiah lo aniang an in hrilh ru leh su su ṭhin.

“Mi hmuh lai khân fâwp tawp mai rawh, a ṭha ber ang. Khatiang te chuan a hmeichhia zâwkin a ṭhen an ti dâwn che a sin” Martin-a tih sur sur ri pawh ka hre reng, min va han fâwp awm lo tak ka kal chak zual sauha.

Class ka lût dâwn tihah chuan min kuai her lâwp in mi hmuhah chuan min fâwp ta hmiaha. Ka che ngam tawh lo, hetiang hian tumahin mi hmaah min la fâwp ngailo, an tân chuan thil thar a nilo ang tih ka hria, ka tân erawh thil thar vek a ni. Ka ding khawng awt renga, hetianga a chêt duh tak tak hi ka ring miah lo a sin mawle.

A awmsawn hnu pawh chuan che châng loin ka melh ngai melh chuan ka ding renga, “I ṭha em? Baby, tinge khatianga i awma?” tiin a ṭhiante chu a ena, an ni pawhin min rawn hnaihin ka hmai bul chetah chuan an rawn awm hnaia.

“Hey Fiona i ṭha em?” an rawn tih leh tâkah chuan rum zet hian ka ena “Khatianga tihkha a ngai em ni? Min rawn zui tawh suh u” tiin ṭhutna ah chuan ka ṭhu a, ka thusawi chu hrelo ang maiin ka bulah an rawn ṭhu leh ta tho a, ka thinrimna pawh chu hria ang pawhin an awm lo.

Damian-a lah chuan min en ngar ngar mai, ka be awm lo emai. Ka phone chu phawrhin ka ṭhiante ka text pah mawlh mawlha, min ngaih thu an sawi nasa mai. Ka nu leh pa an ngei thu chu an sawi châm chi lehnghâl, kei erawhin ka puitlin zirna tur a nih avângin ka pawi ti lêm lo thung.

An rawn vid call avâng chuan la in ka nuih zuia, an ṭawng nghal mawlh mawlh mai. “Khawi maw ṭhian thar te i nei em? Sâp ho kârah i awm bika kan hmu ve duh ania class chhûng kha lo ti lang teh” tiin an rak nghal chula, ka nuih hak ringawt. 

Chutia ka nuih var var lai chuan ka darah Damian-a chuan a khabe rawn nghatin mit chuar nang hian ka phone chu a ena, ka ṭhiante'n an hmu chu an ngawi nghal ṭhapa. Engi phei chu a biru nghal zuk mai, mahse rei erawh anilo.

“Lalpa leh! Kha kha tunge? Awi a hmeltha lutuk, tunge awi i dârah te a bei vêl ania” tiin an au chula, an bengchheng lam mah a ni. Mizo vek a an ṭawng miau avângin Damian-a tân chuan hriatthiam ngaihna a awm lo.

“I ṭhiante em ni?” a rawn tihchuan ka bu nghata “Fiona sawi vat teh, nang hi i bialpa a nilo maw?” an rawn ti ta rêng a, ka buk nghat rualin an au leh nghal chûl mai. 

“Awi vanlalvanneinu, ka va awt ve tak. Midang an la awm em? Ṭhiante a nei em?” an tihchuan hriatchhuah ka nei, Martin te ho pawhin ka ṭhiante an awm em tih leh ka hnampui ṭhian an duh thu an sawi tak kha, Martina te lo infiam mawlh mawlh lamah camera ka lek rualin Rami leh Thani chu an rawn au leh hluta, Engi erawh a ngawi kar mai.

Chutia thâwm a awm tâkah chuan an ni pathum pawh rawn hawi chhuakin ka phone chu ka entir a “Ka ṭhiante chu an nihkha, be ve ula” ka tihchuan ka rin loh lutukin an phur ngei mai. Ka phone chu la in an chhaih nghal zuk zuka, an inchhaih lâi zo ang tih pawh ka hlau hlel love.

A phone neitu ber pawhin biak tur ka chang ta lo, mahse ṭhian thar an inchhar na ang turah ka ngaia. Ka lawmpui viau thung, kawppui neilo vek an ni bawka ka ṭhiante tân pawh ka iai pui lêm lo, Mizo nimah ila duhzâwng kan neih vek avângin keichuan hnamdang neih loh tur tih hi chu ka pawm theilo.

Kan inhmangaihna aia hlu a awm lo ka ti ve tlat, Damian-a chuan min kuahin ka nghâwng leh biang vêl chu a nul dan dan renga. A nihna avâng pawh hian tumahin an sawisêl ngam ngailo, a hriat lai chuan tute pawh hian an enin a awmdân an sawisêl duh ngai hauhlo. A ṭhiante tih chauh lo chuan.

“Mi an awm ve reng hi, awm ṭha teh ka lungawi miahlo ania” ka tih tâkah chuan a thaw haka. “Ka zu tawh lo ang a ṭha em? Mahse ka tuina lam apiang min khap hi ka duh vaklo ania” a rawn tihchuan ka chhâng mai lo“I tuina zawng zawng ka khap lo che,Nimahsela i taksa tâna ṭha lo chu tilo la ka duh mai ania” tiin inherin ka lehkhabu chu ka en sana.

A sawi ang tak tak hian a nun zawng zawng khuah khirh chan ka chang nghal chu ania, mahsela chu chu ka tum a ni hauhlo. Thil ṭha lo tilo se ka duh mai chauh ani.