DEMON KING CHAPTER 4

DEMON KING 

CHAPTER 4 

“Damian tihian kan ding reng dawn em ni? Ka ke hi ana tawh, mut mai mai ka châk” ka tih rual chuan a ṭhiante a biak mawlh mawlhna ata rawn hawi chhuakin min rawn en nghal vuta, ka ti tak tak. Sneakers bun mah ila din reng tâkah chuan ka ke hi a na lutuk tlat.

“Min lo zui rawh, min lo nghâk lawk ula ka bialnu hi ka roomah kan hruai lawk ange” tiin min rawn kai zuia, in chung lam min panpui lai chuan ka hawi kual ruaia, in chung lamah hi chuan tumah an chho lo a nih hmêl. 

Kawngkhar pakhat hi hawngin a chhungah chuan min luhpui zuia, khum nawm hmel zet lo awm chu panin min kai zêla, “Tah hian lo awm la lo mu rawh, i chhûngte chu ka be mai ang. A ṭha em? Ka ṭhiante kha ka zuk mangṭha anga ka rawn lêt leh vat ang aw” a tihchuan ka bu nghata.

Nutei te a biak theih chuan keipawhin haw chu ka peih tawh thlawt lo, ka mut hi a chhuak tawh lutuk tlat. Bâkah he khum nuam leh dup zet a mut hi ka châk a ni ber mai, ka chalah chuan rawn fâwp leh vang vangin ka hmuiah chuan a insawna, a duhthawh leh viau tawh.

A rimtui zet hnim te hi nuam ka ti, mi hausa fapa hi ka zûnah a uai mek chu a ni si a, mumang te pawh a ang lek lek mai. Nui sakin a nghâwngah chuan ka kut suihin a mitmeng pâwl phat mai chu ka ena, a ni pawhin min en ve reng bawk.

“Ka lo mutthilh pawhin a pawilo tiraw? Ka mut hi a chhuak tawh lutuka, ka meng lui thei tawh lo” ka tihchuan a nui suka, a sam kir lam lek lek chu tuai zauhin a ding chhuak zuia “Pawilo, ka rawn mu ve vat ang. Ka kal ania, ka rawn lêt har lovang” tiin a chhuak zuia, kan inhriatna a la reiloh ngaihtuahin a bulah erawh ka hlim viau thung si.

A chêtzia engkim hian min hneh a ni ber mai, star te pawh ka hnampui ngeiah ka lo nei ve ṭhin a. Movie ka en aṭang pawhin mipa hmêlṭha tih deuh deuh chu ka nei ṭhin, mahse khâng ka lo duhna kha chu Damian-a lakah hi chuan nêp te hi ani ringawt, a ni nên chuan engkim hi a nuam ni berin ka hria.

Ka ring tâwka, a bula riah pawh ka hlau hauh lo. A chhan chu ka duh lo chung chu min khawih luih ka ring lo, a chêtzia hian a tilang chiang miau si a. Ṭawngṭai leh te te in ka mit ka chhing zuia, rei pawh ka meng lo, tu emaw in min kuaha “Duhawm lutuk, hmeichhe dangdai tak ini. I rilru a thianghlim hle bawk” ti tu aw chu ka mang hriat ruai chauh ani.

Zanlaiah ka harh chuan ka hawihai lek leka, mahse min lo kuaha muhil sak sak ka hmuh rual chuan ka thaw huaia. Min kuah chunga tui zeta Damian-a lo muhil ka hmuh chuan ka nui sak mai, a thaw sak saka, a muhil lai pawh a hmêlṭha tho. Keichu ni ila ka âng leh phuah anga, chu thil ka ngaihtuah chhuah avâng chuan ka hmui chu ka hup chawta.

Ka muhil hma si a, ka muhil hmêl lah hi ka pe chhe thei lutuk tih ka hria, a nih chuan Damian-a hian ka âng phuau a ka muhil a hmu hrim hrim. A hmu dâwn chiang lutuk, chu thil ka ngaihtuah chhuah avâng chuan au rin hlau zetin ka hmui hup chuan ka au vaka.

Keimah leh keimah chu ka inhau mawlh mawlh bawk, bialpa te hmuh laia ka âng phuaua mut chu a mawi dâwn miahlo. Damian-a chu ka en leh ṭhin, hmelchhia min ti ve angem le? Nge min hmu lo zâwk? Nilo nilo, min hmu chiang dâwn lutuk, ka nu in ka mutthilh rual apiangin ka âng phuau ṭhin a tia.

Zak bawk si chuan ka che kual seka, min duh tawh loh phah mai angem tih te thleng te chuan ka ngaihtuaha, ka awmdân chu over ka inti lek lek mai. “Enga tinge? I awm a nuam lo em ni?” mut chhuak aw zeta rawn tih pahin Damian-a chuan ka kâwngah a rawn hmer zui chata.

Ka che lai chu ka tâwp nghal chat a, a âwma in nem ṭai chung chuan ka dâk chhuak ha a “Chutiang pawh a nilo” ka ti ringawta, ka sawi duh bik der lo. Rawn insiam remin ka hmuiah chuan a rawn tuai zui heuh heuha “Rilru hahna i nei em ni? Engtin mah ka khawih hauh lo che ania, chuan i chhûngte pawhin an rem ti vek bawk, chutiang vanga rilru hah i nihchuan rilru hahna tur i neilo” a tilai chu ka lo pawt chata.

“Chutiang vâng a nilo, thil dang daih. Mahse ka sawi duh lo” ka ti chu a ner deuh nâng a, a duhawm viau lehnghâl. Ka hnârah chuan rawn hmetin “Sawi vat teh, i awmdân hi a dik lo” a tihchuan ka thaw haka “Ih ka muhil hmelchhia iti em?” ka tihchuan a rawn nui ta hawk a.

Nuih turin ka sawi miah silo chutia a nui chu ka ngei lek lek mai “I hmelchhe hleinem, i duhawm ka ti zâwk. I muhil hmêl kha a cute lutuk” a tihchuan âwih vak lo chung chuan ka ner nâng a, ka cute hian ka ring thlâwt lo.

“Dawt vek” ka ti chu a nui leh haka “Ka ti tak tak, ka hmeichhe hmuh tawhah chuan i la hmelṭha ber. I muhil lai hmêl pawh a ṭha tho, chuvang chuan khatiang ngaihtuahna mawlmang lutuk kha chu nei tawh suh, i vun leh i accent a dang ang bawkin i mizia pawh a danga, mahse khatiang kha ka duhna chhan che an ni leh daih thung, i engkim hian min hip em em vek” a tihchuan ka nui ta var vara.

Chu aia thil hriat nuam dang a awm tawh kher lovang, “Um ilo lêt har em?” ka ti ta daiha, thawk huai pah chuan a awmah chuan min kuah beia, ka hnunga chûl hliau hliau pah chuan “Ka rawn lêt lehnghâl, ka sawi vek kha mahsela ka rawn lêt leh chuan ilo mutui tawh lutuka, ka kai tho duh ta lo che a nihkha, titi dun pawh ka duh viau nân” a tihchuan ka chhâng lo.

Ka ngawi renga, engtia han chhân tur nge pawh ka hre chuang lo, dik tak chuan bialpa ka han nei thut hian min ti hamhaih ve bawk. Chutah hnamdang a la ni zuia, ka hnampui te'n hriat hun an nei leh ngei anga min dem leh nasa viau in ka ring bawk.

Mahse Damian-a hian min hip ve êm a, kalsan nghal tur chuan ka phal lo chiang bal. Bâkah hnamdang pawh lo nise mihring ve tho kan ni a, induhna chu a piang thei miau si a. A kut chu hûm sakin “Enge sawi i duha? Sawi la tûnah chuan ka harh deuh tawh a lawm” ka tihchuan a bu nghata.

“Enge min ngaih ve dân? Kei hi min duh ve tak tak em?” a tihchuan ka en ha a, a thutak zia ka hmuh chuan fiamthuna chi a nilo tih ka hria “I ṭha ka ti, chuan ka phulo che ka inti bawk. Kan dinhmun ngaihtuah phei chuan lei leh vân ang vêl kan ni, kan inthlau lutuk. I kawppui ni tur atân min duh meuh ang maw? Nang ram zau leh lar em em ropui lutukah pawh mi hriat i hlawha, kei erawh ram zîm te, tu khaw kha in an hriat ngai lohna hmunah ka chêng ania” tiin ka phun sapa.

Ka ngaihtuah chian phei hi chuan mak ka tihna a la reh theilo, kan ram mipui te pawhin hria se an âwih lo hial zâwk ang chu. Mahse tûn ang laiah thil thleng theilo a awm tawh lo tih chian nân kan hnampuite ngei pawhin hnamdang hausa tak tak chu an lo neih ve tawh si kha.

“Engvangin nge kan inkar chu a hla riau anga i hriat tlat ni? Tûnah ngei pawh kan awmdun mek a, chu aia pawimawh a awm lo. Min phulo niin i inhria a? Kei hi enge ka nih ve? Ka nu leh pa thawhchhuah chu ka thawh chhuah a ni hleinem, han in dah sâng tur ka nih bik loh hi. Ka hmuh tirh aṭang che khân thinlung takin ka duh nghal che a, nang lo han hnaih châk em em pawh ka nei hek lo, ka mit la hmasa ber tu i ni.” a rawn ti dam dapa.

Dâwt a sawi lo tih ka hria “Engvangin nge university ah hian an hlauh em em che a? Insual i hrât lutuk tih an sawi hi a dik em?” ka tihchuan min en vut a, “I ring em?” a rawn tihchuan chhân mai dân tur ka bang bo, ka hmuh lai chuan tumah a han sual leh a khawih awm vak ka la hmu lo.

Mahsela ṭhenkhat titi aṭangin a insual thiam zia leh a hlauhawm zia hlir an sawi ṭhin a, kei awmna la reilo chuan âwihna chin ka neilo theilo “Ka hrelo, ka la hrechiang ve lo che a. Mahse i hlauhawm hmêl” ka tihchuan a nui suka, a ke chuan min rawn khan thakin “A dik mahna le; mahse nang chuan min hlauh loh dânah ka hlauhawm vak lo a niang chu ka timai” a rawn ti daiha.

Ka thusawi chu a ngaih thu tak hmêl tehchîam loh, mahsela ni e a sawi ang erawh hi chuan ka hlau ve miahlo. A hmêlṭha lutuk hian min hlauh tir theilo a ni ber mai, “Ka hrelo le, mahse hlauhawm rukna riau chu i nei chiang a lawm. Mahse i hlauhawmna ber pawh ka sawi thei chuang lo” ka ti chu a nuih a zat hmêl viau lehnghâl.

“Chutiang chuan maw min ngaiha, ni e a ṭul chuan ka insual mai ṭhin. Tumah han hlauh em em ka neilo bawk, ka hmangaihte ka vênhim theih nân chuan engpawh ka ti mai ang. An himna ka duh ber, mahse an sawi ang em em chu ka nih i ring lovang chu maw? Ka bungrua te ka vênhim nân chiah ka insual ṭhin” tiin ka hmuiah chuan a rawn fâwp leh vang vanga.

Ka chhân lêt ve rual chuan a phûr zual sauh tih hriat takin ka chungah chuan a rawn innem khalha, a tawnzau hak nên chuan a pian nalh leh sek lam deuh chu a lang nalh viau lehnghâl. Ka kut chu ka lu chungah nem bet tlatin ka biang vêl chu a nul kual dan dana.

“Damian a za a nia, awmsawn teh. Engtin mah awm ka duh miah lo a nia aw, awm ṭha ang, hey a za a nia” tiin ka nui deuh hak haka. Ka nghâwng a nul kual avâng chuan za ka ti ani ber, ka nghâwng hi keichuan ka sa huatna lai ka ti ṭhin, zak dêk ai mah hian ka haw zâwk.

“Awm ṭha teh, khawi maw i rit emai, hetiang chuan awm lo teh ang” tiin ka nam deuh data. A ni pawh a awmsawn ve leh mai bawk, mahse min kuahna erawh a la phelh chuang hauh lo. Ka lam hawi zâwnga rawn inherin chiang tak hian min en a “Fiona ka bulah hian i awm reng thei angem?” a rawn ti khauha.

A hmêl chu a dang ta daih bawk, tûnah hi chuan lungngaihna thûk tak tuar ang mai in a ni a awm ni. “I ṭha em?” ka tihchuan a bu nghata, ka lamah rawn tawlh hnaiin ka âwmah chuan a hmai a phûm ta daiha.

A awmdân chuan min ti ham haih takzet, ni chin lawka min nuih pui tu kha a ang leh tawh lo. Mihrang hlak ang mai a ni “Ka nu leh pa chuan ka tân hun an neilo, nang tal chuan ka tân hun i nei ṭhin ang tiraw?” a rawn tih leh chuan ka hrethiam ta chiah ani, sum leh pai leh khawvêl thilah chuan mamawh leh awh a neilo, mahsela hmangaihtu a mamawh thung tihna.

ZAWMNA..

“Damian i bulah ka awm reng ang tih ka tiam a che, i tân i mamawh hun apiangah ka awm ang. Ka theih phawt chuan, i mamawh leh puitu i mamawh apiangin i tân ka awm ang.” ka ti sepa, a awmdân chuan min ti hamhaih a, engtia han hnem tur nge tih pawh ka hre mai lo bawk.

“Ka kiangah awm reng la a bâk duh dang ka neilo, engtikah mah min kalsan suh ang che” tiin a rawn dak chhuaka. Za lo zet in a nui suka, a hmêlah chuan mal intihna ka hmu thei, a sawi ang tak takin an ni ang mi hausa leh sumdâwng lian chu a nu leh pa chu an buai viau ang tih chu ka ring, mahse enga tinge hun reilote tal an fapa tân hian an pêk ve mai loh tihte thleng chuan ka ngaihtuah a.

Mizoram chauh pawh kan lo ni tawh lo a nih hi, mi rethei nun hi hetiang zawngah chuan alo awh awm zâwk. An ni chuan an hun neih ang ang kha chhûngkua in in hmangaih takin an hmanga, mi hausa te erawh fate pawisa pe in an duh duha awm turin kan ti tawpa, chu chuan ka fate nun khawharna leh ṭul lo ah khawvêl nawmchenna hmunah a hruai lût ṭhin.

Sum nei mahsela an nun a khawhar miau chuan sual lamah an tlân leh mai ṭhin. Kan fate hi chu englai pawha kan enzui reng theih loh pawhin engnge an tih a, engtin nge an nun an hman tih tal hi kan ngaihven ve a ngai a. A tlai tawh hnua in ngaihsak chuan awmzia a nei tawh ngai heklo.

“Damian i mal hauh lo ania aw, kei ka awm a, i ṭhiante an awm bawka. Tin, i nu leh pa pawhin an hmangaih em em ang che, an theih tâwp in nun nuam zawk in neih theih nân an bei zâwk alawm, thawk rim lo sela tûn dinhmun pawh hi in thleng kher lo mai thei a sin” ka tihchuan a bu nghata.

Chutah thawveng deuh hawk tih hriat taka min rawn kuah lehin a thaw chhuak zui ham hama “Ka rindan chiah mizia i nei ani, ka hmuh tirh aṭang che khân hmeichhe zakzum tak, mahsela inringtawk ve tho. Midangte hmangaih thei tak tur hmuh in ka hmuh che kha a lo dik chiah, i danglam bik ka tihkha. Hmeichhe ṭhenkhat chuan min mutpui phêt tumin an taksa lang tam thei thawmhnaw ha in ka hmaah an rawn langa, nang erawh chutiang pawhin i awm ve ngai lo, i nundan mâwl mang tak hian min hip” tiin ka nghâwngah chuan a rawn fâwp zauha.

A thusawi chu ka ngaithla renga, keimah ka danglamna em em ka inhre lêm lo. Ka ṭawng tam vak lo tihchu ka inhria, ka mi nêl te bulah erawh chuan ka ṭawng tam veleh viau ṭhin thunga. A hnungah chuan ka bensak thek theka “Keichuan ka hmuh hmasak ber che khan pa ka ti che, chuan min lo chhan pawh kha ka lâwm lutuk, nang awm lo la chuan khâng mipa ho khân min khawih hrep duh hi ang” tiin a samah chuan ka ṭhâm sak neuh neuha.

A hahdam tawh tih ka hria, ka chêt dân chu naupang thu âwih thei tak ang mai hian a dawh heuh heuha, min lo dan emaw pawh a tum chuang lo. A mah tawp hi a cool ka ti a, a hmêlṭha zet leh a mizia hi a inhmeh ka ti viau bawk.

Nui sakin a hnungah chuan ka ben sak thek theka, a ṭawng lova han sawisêl emaw eih pawh a neilo. Pâwn lamah chuan thâwm a awm leh ṭhin tih loh chu kan awmna erawh a reh ta viau mai.

Rawn dâk chhuak thutin chiang zet hian min ena, rawn innem kâng ruai ruaiin “Ka insûm thei tawhlo, ka mamawh che” tiin ka hmuiah chuan a rawn fâwp zui tawn tawna. Ka lo chhâng lêt ve vat bawk, ka chungah chuan rawn bawk kai lehin a tawnzau chu a phelh zuia.

A piannalh zet a rawn lan rual chuan ka chil ka lem zui khalha, ka hmui bul chetah chuan rawn awm hnaiin chiang zet hian min ena, chu chuan min ti khûr dar dar thei hial mai. “Damian eng thil pawi mah tilo ang aw, hetiang hian kan awm ringawt theilo. Ka la in peihlo bâkah a ṭha lo” tiin ka hawi sawna.

Min en reng hi chuan ka lai tlat zel, mi mita en ngat phei chu ka theilo leh zual. “A pawi em ni? Kan pahnih hlimna kan tihchu a pawi maw?” a rawn ti a, a aw chu a tawi ṭha viau mai. 

“Aw inneih hma chuan a ṭha lo a lawm, inṭhen thei kan ni a. Bâkah kan inzui ve dâwn ṭan chauha, hetiang tihnghal ringawt chu a mawilo, ka chhûngte rin dân anga ka awm loh chuan ka inthiam leh thei tawh lovang, min hrethiam rawh” tiin a mitah pawh en duh lo chuan hmun dang chu ka melh lui ngar ngar a.

A thinrim mai angem tihchu ka ngaihtuaha, an ni hnam chuan sex pawh hi engah mah an ngai lo emaw tih tur in milâr kawppui inthlâk thleng zut te, fate pa in ang lo nuaihte hi an tama. An ni tân chuan infiamna ang lek emaw tih tur a ni tlata, tûna a awmdân pawh hi ka dem em em chuang lo.

“Aw le ka nawr lui lovang che, i mak hle mai” tiin ka sirah chuan a mu zui leha, a ṭawng leh tawh loh avâng chuan ka inthlahrung zual ngei mai. A lungawi lo emaw tih tur in a ngawi ngar chuan min ti awm nuam hauh lo.

“Damian i thinrim em ni? Thinrim suh aw, ka duh loh vâng che pawh a nilo. Mahse kan hnam chuan kan thianghlimna hi kan ngai pawimawha, a theih hrâm chuan pasal neih hma chuan kan invawng thianghlim ṭhin a, ka duh loh vâng che a ni miahlo” ka ti nawn leha.

Hetia a ngawih tlat hian nuam ka ti bik hauh lo “Ka hrethiam e, ka insûm tawh ang. Mahse mipa tân chuan kan duh em em te bula insûm chu a har lutuk, kan lo tih tawh phei chuan hmeichhia min hnar hmasa ber tu i ni” a tihchuan ka ring hlel lo, a hmêlṭha a. Chumai bâkah a hausakna hi nula tam tak en tur chu a ni.

Footballer hmelchhe pui pui pawh an lara sum an ngah phawt chuan hmeichhe kawp tur an vai hauh lo. Hmeichhe ṭhenkhat hi chuan sum hi kan lo en ber tih a chiang reng, mahsela kei erawh ka ngaihdan a dang thung. Ka hmangaih a niha min hmangaih bawk chuan a bâk chu a tih zêl theih mai.

Tûnah pawh hian Damian-a ka kawp hi tam tak chuan sum duh vâng min ti ang tih ka hria, mahsela hei erawh a mahin min duh miaua. Ka duh ve tho avângin ka hnar lo mai a ni zâwk, reilote chhûng pawhin duhna hi a lo piang thei tih ka hrechiang lehzual.

Phone aṭang pawhin hmangaih leh vei em em kan nei thei ania, atakah kan duhzâwng tak kan hmuh chuan engvangin nge kan hnar reng theih ang ni. 

“Ka hria alawm, hmeichhe tam takin i bialnu nih an châk tih pawh ka hria, mahsela ka laka ka thianghlimna chiah i duh a nihchuan a rei hma hian min kalsan mai la ka duh, i duh apiang puitlin pui thei tur che chu i duhzawk chuan ka dang lovang che. Keichuan ka taksa chauh nilo ka nihna, ka mizia leh ka nungchang ṭha lo lai thlenga min hmangaih thei tur ka duh zâwk“ ka tih tâkah chuan a ngawi rauh rauha.

Ka thusawi chu a hua angem tih pawh ka ngaihtuah bik duh ta lo. Kan kal thui tak tak hma hian ka nihna engkim ka duhzawng leh ka duhloh zâwng thleng hian hria sela, chuta min kalsan a duh anihchuan ka dang lovanga, min chelh reng a duh anih thung chuan keipawhin ka hnar bik lovang.

Ka duhzâwng chu hriatthiamna leh nawr luihna tello in zawmna neih a ni. “Chu, kalsan tur che in min duh tihna em ni? Min lo duh ve tak tak lo nge?” a rawn ti khauh va, ka thusawi kha a man chiah lo tih ka hrethiam mai.

“Ni lo e, ka sawi awmzia chu maw keichuan tisa in itna avânga inzawmna kha ka duh ve lo va, chu ai chuan thinlung tak aṭanga inzawmna ka duh. Reilote a bo leh mai mai thei inzawmna kha ka duh ve lo, chu ai chuan damchhung pawha ka hlim pui theih leh tlâng ang maia nghet inzawmna kha ka duh ka tihna a nihchu, in itna satliah chuan rei a daihlo va. An in ning thuai ṭhin, chhûngril tak aṭanga induhna erawhin dawhtheihna, rinawmna leh hlimna a keng tel thung” tiin ka sawi dap dapa.

Engtin tak ngai ang maw? Engtiangin nge ka thusawi hi a dawnsawn ang tih ka hrelo, tûnah ngei pawh hian kan inzawmna hi a tâwp nghal thei tih pawh ka hria.

“A nihchuan ka nghâk ang che, tin, i duhlo chung chu ka khawih lui ngai lovang che tih ka tiam e. Mahse zau taka ka tân pawh i inhawn ve ka beisei, a tâwp erawh ka thleng ngai lovang. Ka insûm thei em em ang, mahse mipa ka ni a insûm har tih châng ka nei dâwn, chutiangah te chuan min puih ve ngei angai ang. I thianghlimna erawh i phal lo chung chu ka lâksak lovang che” a rawn tih takah chuan hlim zetin ka nuih ver vera.

Ka thusawi hrethiama chutia rilru zau tak leh hriatthiamna nêna min dawng sawng chuan min ti hlim a ni ber mai. Kuah nghet sauh sauhin a awmah chuan ka hmai chu ka nawra.

“Ka lawm e, keipawhin ka theih tâwp ka chhuah ang tih ka tiam a che” tiin ka nui ta var vara, dik tak chuan keiai ṭha leh nalh. Hmêlṭha leh hleitling pui pui pawh a hmuh zia ka hailo, engvanga kei min thlang hi nge anih lah ka hre hek lo, mi hausa fapa. Hmêlṭha leh chhelo lutuk a ni a, duhtu angah dâwn lutuk tih ka hria.

Kan university lo ah pawh an awm ṭeuh dawn tih lah ka hailo, kei kan University ah pawh a tê pawl ka ni a. Mizoramah kha chuan ka sâng ka ti ve ṭhin, mahse hnampui bulah meuh chuan an hmeichhiate pawh kan Mizo mipa te ah hian tiah lo tur an awm nual ang tih tur vel an ni.

Hmeichhia pawh an lianin an pian a dik thlarh veka, a tê deuh chu awm ve bawk mahse a tlângpui hi chu mi lian tak vek an ni. Mizo an awm ve ngei chu an ti a, mahsela kan University hi a len avâng nge ka la awm reiloh vâng zâwk. Tumah Mizo âwm ang ka la hmu hauh lova, an ni pawhin ka awm tih an hre kher lo mai thei a ni.

“Muhil leh tawh rawh, zîngah ka thlah loh che chuan i nutei te ngaih kha a ṭha lo ang. An rem ti chiah lo a, ka hrilhfiah tâkah chuan an pawm hrâm a nihkha, an ngaihtuah bik hle mai che. Hetah chuan tu te pawh hi an duh duh dânin an awma, an chhûngte hian an ngaihtuah ngai lo. Nang erawh an ngaihtuah khawp mai che” a tihchuan ka bu nghata.

“Kan hnam zia a bet pakhat ania, keini chu kan puitlin hnu thlengin nu leh pa leh chhûngte hian min la ngaihvena, mahse tûnah chuan kan nun dân pawhin in nundan a ang deuh tawh. Khawpui lamah phei chuan a in ang deuh reng tawh, ruihtheihthil leh party, ṭhian ho a riah chhuah tih vêl te kan nun dân tam tak chu a ṭawp ve viau ania, mahse a tam zâwk erawh an la fel viau thung” ka tihchuan a bu nghat nghata.

Keipawh engmah sawi tawh lêm lo chuan a âwma bei chung chuan ka mit ka chhing zui riai riaia. Damian-a hi ka ring tâwk a, a thusawi pawh hi a hlen ngei pawh ka ring bawk.