DEMON KING CHAPTER 3

DEMON KING 

CHAPTER 3

“Fiona lo kal lawk teh” Damian-a chuan ka hmaa rawn din pahin a ti a, eng thil chu hria nimaw? Ka en deuh ha a, ka bula a awm tawh hi chuan midang hian min ngaihven nghal vat ṭhin a. Chu chu nuam ka tilo, a lâr a mi hausa fapa meuh chu a bialnu nih châk an tam tih pawh ka hria.

“Engah chuan maw? Lehkha ka zir a nih hi khawiah mah ka kal hman lo” tiin ka lehkhabu bawk chu ka bih sana. A ṭhiante pathum chu a hnungah an rawn ding ṭhap bawk, englai pawh hian an inzui kual reng maiin ka hria.

“Zir rih lo ang, zirna hun a la tam lutuk i thiamloh leh kan hrilh dâwn che a nia” an la rawn ti ta deuh deuha, an ni lehkha zir ṭha peihlo. Class lâk lai pawha teacher te thusawi ngaithla ngai miahlo hian engtin nge min hrilh anga, an â deuh a nih hi.

“In thiam hi ka ring silo, angailo mai ka lâwm e“ ka tihchuan an in ena, an ner suk suk mai. “I pass na tur khawp kan hrilh ang che lo kal mai teh, kan lêng dâwn” tiin Damian-a chuan ka kutah rawn kaiin min kalpui zui dawr dawra, hêpa hi chu hnial ve ṭhin mah ila engah mah hian a ngai ngai lo rêng rêng.

“Damian min thlah teh ka ti fiam lo ania aw, hetiang ringawt chu ka duhlo. In mak emai, enge kan tih dâwn?” tiin ka phun hlak hlaka, min kal pui dân a ngai reng tho. A ngalah hian ka chhuih sak chawrh zâwk dawn emaw ni.

Chutah room pakhatah min luhpuiin an pali chuan min ṭhut hual ṭhapa “Le khêl tawh ang u, chu mi hma in in tur kha lo phawrh ula” tiin an che zui sawk sawka, “Games kan khêl ang, lehkha zir ai chuan a nuam zâwk. Nangpawhin nuam i ti zâwk ang, kan bulah awm tam la i him a nimai” an la rawn ti zuia.

Huh! Heng hi hi an â tak tak chu anih hi “Games khel mai mai turin maw min lo hruaia? Hetiang ka peih ve lo, lehkha zir ka ngai” ka tihchuan an nui ringawta “Class an la tawh ang. I lêt chuan an man chhuak mai mai zâwk ang che, tikhan awm ve mai mai rawh. Kan in daih lova, hmeichhia kan neilo midlane thei tur kan mamawh” tiin ml ah chuan an lût zuia

Huiham games lawng lawng buai pui mai thin an ti rim lek lek tawh. Chhuahsan dawn ringawt ila an sawi ang tak takin class ah professor tu emaw ber a awm leh tawh âwm si a, “Ka hua che u nang ni hian min hruaisual in tum chiang lutuk, ka ning ania aw tûn bâk hi chu ching tam hauh suh ang cheu” tiin ka phun niah niaha.

Hetianga in tih reng hi ka duh lo, ka chhungte'n min ringin helaiah min daha. An rin loh lutuk hlir in he mite avâng hian ka awm phah lehnghâl, ka lungawi theilo a ni ber mai.

Thawk la ham hamin ka phone chu ka phawrha, ka khelhpui hma chu ka chhuahsan an phal leh dâwn lo tih ka hria. Thinrim ṭun chung chuan ka khelhpui a, sawisak nawk nawk mai te ka duh, mahsela khelh leh tâkah chuan a nuam ti leh a au ring berah ka ṭang zuia.

Ka hau phah bawk, mahsela an thiam bawka khelhpui nuam tak an ni. Lehkha zir lam pawh ngaihtuah tawh lo chuan kan khêl char chara, an zarah mythic ka thleng ve hram e, a tâwp a tâwpah chuan ka mythic ve thei ta a lawm. Ka ṭhiante bulah ka in ti thei viau ang.

“A van nuam tak, in chunga ka lâwm e kan ṭhianho chuan mythic kan kai theiloa, kan buai ru fo ania” tiin ka nui pah var vara. Intih theih hmêl lutuka min en hlawm in “Kan thu i zâwm duh lo lawk vela, tûnah chuan kha a nuam ti ber ber i nih kha i hria em?” Martin an a rawn tihchuan ka nui ringawta.

“Zanin chu party naah lo kal ve rawh aw, Damian-a hian a buatsaih dawna a mah hian rawn hruai nghe nghe che sela a ṭha ang. A nuam dâwn a nia” Tyler-a chuan a rawn ti a “A teuhlo mai chutiang ka ti ve ngailo, keimah pawh hian ka buai teh ania, chutiang party mai mai” ka tih lai chuan Damian-a chuan min lo melh runa.

Hepa hi enge a hriat dâwn ni? Awm a ti nuamlo lek lek mai “Engvanga kan thusawi apiang hi hnial kalh nge i nih le? Ṭhiana siam kan tum che a, kan sâwm mai ṭhin che a nge min mamawh lo zâwk? Ṭhian atân min duh loh te chuan kan sâwm lo ang che a nga a nimai” a rawn ti hmuka.

A ngaihdan chuan min intithlahrung ngei mai “Chutiang pawh a nilo, in thinrim nân ka sawi lo. Ka lo kal ang, mahse min ngaihsak loh ka hlau a lawm mipa sual te an awm thei a, ka hlauthâwng ve tih te hria ula helamah tumah hmelhriat ka la neih loh hi” ka tih chuan an dâr an sân uka.

“Keimah ni hi i hmelhriat te chu kan nimai a lawm, hlauthâwng lutuk duh suh. Kan vêng him lutuk ang che, Damian-a bulah hian awmla i him a nimai” tiin amah chu an melh zawka. A ni erawh nichin aṭang khân a hmêl a nelawm loh leh vek tawh, biak pawh ka ngam tawh meuh lo.

“Um le min lo sâwm dâwn ania, ka kal phawt ang” ti a chhuah mai ka tum chu Damian-a chu rawn ding chhuakin ka bânah chuan a rawn vuan zuia, engthil tak chu sawi leh dâwn nimaw ti a ka en reng lai chuan ka hmuiah a rawn fâwp thuta.

Ka mak ti lutuk chu ka ding khawng nghal awt mai, a ṭhiante pawh chuan mak an ti ve tih hriat takin an awmsawn rual chuan an lo âng phuau mai. Keipawhin sawi mai tur ka hrelo, khatianga a rawn chet kha ka ring lo hrim hrim bawk.

Min fâwp maw? Damian-a min fawp ngawt nia, engvanga min fâwp nge a nih? Ka mak ti lutuk chu ka ding khawng awt renga, ka hamhaih vek “Tun aṭang chuan ka bialnu i ni tawh ang” a tih phei chuan ka mit hi a pawt mai dâwnin ka hria, tûnah khân enge a sawi kha.

He mipa hmêlṭha leh chhelo zet hian a bialnu ka nih thu a sawi maw? Ka âwih theilo “Eng...engmaw? Engvangin nge i bialnu ka nih ang?” ka tihchuan a nui suka “A chhan chu ka duh che avângin, kal tawh ang u haw lam pawh ka rualin haw la i nutei kha kan dîl nghal dâwn ania, a phal chu ka ringa” a tihchuan ka ngawi renga.

Ka chunga thil thleng mêk chuan engtia awm tur nge tih min hriattir theilo. Ka tha te a khûr vêl thei mawle, ka hmai chu ka khawih ringawta “Bialnu maw? I â em ni?” ka ti chu a rawn nui haka “Â lo ka sawi chiang viau tawh ka duh che, hmeichhe dang ka duhlo, nangmah chiah ka duh che” a tihchuan ka thaw haka.

Engtin nge ka chhan dâwn tih pawh ka hrelo, a hmêlṭha in chhân loh ka duh bawk silo. Chutih rual erawhin ka chhân nghal chuan easy min tih ka hlau bawk si, ka rilru a ti buai vek.

“Thil ngaihtuah hah vak vak suh, tikhan ka bialnu i ni tawh hre reng ang che. Tin mipa dang i duh a thiang miahlo bawk, ka ta ni turin ka duh che a ka hauh tawh bawk che. Mipa dang i hnaih chuan ka lâwm lo khawp ang” tiin min kai chhuak zuia, a hnungah chuan ngawi rengin ka zui ve zel ringawt.

Hetiang ringawta kan awm hi ka ring pha lo, bialpa ka nei der chu ania. Chu pawh ka rin loh lam lutuk hnamdang lehnghâl, ka ram mite'n hre leh se mipa ho phei chuan min dem leh in min sawisêl leh luai luai anga. Ka hming leh hmêl pawh hre ngai lo ho khân ka chanchin hre âwm ang berin an sawi leh tawh ngei ang.

Chutiang ka ngaihtuah lâwk chuan ka zâm ve deuh, chutih rual erawhin hnampui nei ho chu an sawisêl lutuk lo tih ka hriatna erawh chuan tlêmin ka awm a ti nuam ve deuh. Ka hma hun ka hreloa, Damian-a hian awlsam taka a sawi ang hian awlsam takin min kalsan leh si angem tih te hi ngaihtuah tham fee chu a ni.

Class room kan luh rual chuan a bulah min ṭhut tir leha, hetiang reng hi an ni. An ṭhianho chu ka bulah an awm deuh ziah ti ila ka sawi sual lovang, hmeichhe ho hian keimah nih an châk ru hle tih pawh ka hria, a chhan chu an star rûk em em ho hian min ngaina miau sia lawm.

“Vawiin chu anuam hle mai, hmeichhia kan han kawm tâkah chuan tlêmin ni hman pawh a nuam deuh, ngaihzâwng tur hi zawn ve an ngai a ni. Fiona i ṭhiante ah ngaihzâwng neilo an awm ve em? Ka duh ve riau mai, helam hmeichhia ngaihzâwn ai chuan an ṭha ang, nangmah ang an nih ka ring tlat.

Helam chu thil hi kan ngai serious thei tak tak tawh lova, hmeichhe ṭha tak tawn kan duh” Sammy chuan a rawn ti a, a sawi chu a dik ve tho. An ram milâr ho en hian an kawppui an inthlâk thleng vêl mai maia, hmangaihna hi an la thutak vak pawhin ka hrelo, Damian-a hi chutiang chu ani ve angem le?

Ka thil ngaihtuah avang chuan ka melh zawka, “Damian i bialnu ka ni i tihkha i ti tak tak lo tiraw?” ka ti ta tawpa, ka ngaih a ṭha theilo. An ni ang milâr lehnghâl chu a kawp mai mai turin min ngai ang tih ka hlau, chutiang tur chuan ka in phal bik siloa.

“Engvanga chu zawhna chu min zâwt nge i nih? Ka ṭhiante thusawi vâng kha em ni? Kan in ang vek lo ania, ka duh hma mai avâng che hian awlsam taka ka kalsan che ring suh. Ka duh tak tak che, chu chu ka hmuh tirh aṭang che khân ka chiang tawh, chuti nilo sela ka hnaih lovang che” a rawn ti fiah fak faka.

A aw leh a hmêlah chuan fiamthu hmêl a lang lova, a thusawi chu a ti tak tak ang tih pawh ka ring ta riau. Ni e, a ni ang lar leh hmêlṭha si chuan min duh lo se ka ṭhian niha ka bula awm pawh a duh tawp nâng, ka hmaiah chuan a rawn chûl zauha.

“Nang ang hmeichhia ka la hmu ngailo, i dangdaia i hmêltha hle bawk. Hetiang hian tu hmeichhia mah ka la be ngai lo, nang chu i danglam ka tih fo kha. Ka kiangah awm reng turin ka duh che, chu chu hre reng rawh, kan pahniha hlim taka awm dun hi ka duh ber” tiin ka chalah chuan a rawn fâwp zauha.

Class chhûng mi awmte chu an thum nghal hak mai, Damian-a chêt dân rêng rêng hian min hneh ṭhin, tûnah chuan amah avângin hre tu ka ngah tawha. Ka hmelhriat miah loh pawhin ka hming an lo hre thei zel te hi amak ka ti zâwk. An ṭhianho vâng vek hi a nih ka ring.

Miin an ngaihven si a, ka bulah an awm tlat bawk nên ka chanchin an ngaihven pawh hi a mak lêm lo. Class bân veleh in zui diah diahin Damian-a bike hnungah chuan ka ṭhu a, “Damian min thlah ve tawh la, tinge khanu kha i zui tlat zela? I nu leh pa pawhin kan inneihna an buaipui mek tih i hriat kha” hmeichhe pakhat chhelo zet hi kan bulah chuan a rawn dinga.

Damian-a chu ka melh nghal zawk mai, tûnah khân inneih tihlam an sawi em ni? Amak ka ti tawp theilo, nge Damian-a hian nupui hual a lo nei reng zâwk.

“Ka sawi tawh kha Annie ka nei dâwn lo che, ka nu leh pa chuan ka duh lo chung min tir lui hek lovang, ka hmeichhe duh ngei nupuiah chuan ka nei dâwn. Chu chu ka thutlûkna siam a nihchu, nang kher chu ka nei lovang che, i duh chuan i driver i inhruai tir thei a lawm” tiin en pawh en lo chuan a tlân chhuak zuia.

A duh lo hle tih ka hre mai, nakinah kan buai phah ang tih erawh ka hlau. Ka la hre chiang siloa, tûnah lah a bialnu ang maiin min chhuah tawh bawk si rilru a ti buai vek mai, Damian-a kâwngah chuan kuahin a hnungah chuan ka bei than a.

Tûnah chuan ka nu leh pa hmuh phâk lohah ka awm a, thil reng reng puitling tak leh ngaihtuahna fim taka hman ka ngai tih ka inhria, chutilo chu ka nu leh pa beisei ang thleng lova keimah ka intihchhiat vek ka hlau a ni.

Mipa avângin ka la na ngai lova, nat pawh ka tum ngai heklo. Mahsela Damian-a nên erawh ka hrelo, ka duh ru ve tho a, mahse hei hian nakinah natna ruamah min hnut chhiah ang tih ka hria.

Kan in kan thlen rual chuan inzui lût in nutei chuan eitur min lo chhawp sak zuia “Ehe i rawn thlah leh elo? Helamah lo ṭhu rawh u, i va fel ṭhin ve amah hi a zak zum bawk sia lo kawm ve zel ula. University ah pawh buaina a tâwk thei bawk si a, kan ngaihtuah viau ania, nang i awm chuan kan ngaihtuahna pawh a nêp deuh ang” ka nutei chuan a lo ti zung zunga.

“A ho lutuk, ka bula a awm chhûng chuan ngaihtuah suh u ka venghim dâwn a lawm. Kan pahnihin kan inkâwm reng tawh zâwk, amah hian ṭhian a duh tlat lo mai pawha, chutia i sawi tâkah chuan ka lo kawm bawrh bawrh dâwn a nia” a ti zuia, hepa hi chu aw.

“Taka MRS Johnson Fiona hi zanin chu ka birthday party naah lo kal ve sela i rem ti em? Ka vêng tlat ang, ngaihtuah lo la a tâna ṭha lo tur ka tih pui miah dâwn lo, ka ṭhian a nihna angin hun min hmanpui ve turin ka duh a” a tihchuan nutei chuan min en tawn a.

Eng tak chu ngaihtuah ang nimaw? A phal ring lo deuha ka awm lai chuan “A pawi hleinem, intihhlimna ṭha tak a nih dâwn chu. A tân pawh hmelhriat ṭha zawn nân te pawh a ṭha ang, mahse chutih rual erawh chuan ruihtheihthil lam a tih ka phal hauh lova, nangmah pawhin tih a tum chuan ilo dang vat dâwn ania, ka ring dawn che ka tih kha. Helamah a la vâk chhuak ngai siloa ka ngaihtuah teh ania” a rawn ti ta hlauha.

Damian-a thawveng huai hmêl chu ka hmuh hmaih lo, a phalloh a lo hlau ve tho a nih ka ring. A awmdan chuan ka nuih a tiza lek lek mai, ngawi reng chuan thil chu kan ei zawma, nutei chuan eng eng emaw a zâwt mawlh mawlh renga. Rinai Damian-a pawh chuan an chhâng ṭha phian lehnghâl.

Nutei a chhân paha duh hmêl deuha min rawn en ṭhin chuan min tihlim veng veng thei. A haw hnu chuan nutei pawh a phûl hluta “Nang ni hi in in ngaizawng te a nilo maw? In in en dân kha ka hmu ve reng a nia, mahse fimkhur la mipa chu nêl chin tâwk hriat a ngai ania, a fel hmêl kha. Mi hausa fa a ni si a, a lehlamah chuan in dinhmun a inthlau deuh chu ani” a rawn ti zuia.

“Nute chutiang a awm lo, kan inkawm mai mai a lawm. Zanin pawh a birthday a nihchuan kal ve ngei chu ka duha, mahse i phalloh chuan a pawilo ania” ka tihchuan ka lu ah a rawn chûl zauha.

“Nula i nia, engkimah dan beh che ka tum hleinem, ṭhian pawh kawm la. Helam mi chu an zau ania, an fel bawk, ṭhian atân chuan duhthusam in an ṭha, ṭhian ngah chu helamah chuan a pawimawh leh zuala, nangpawh kâwm bawrh bawrh la a pawilo. Mahsela ruihhlo an ti nasa ve a, chutiang lakah chuan fihlim hrâm i tum dawn ania, Damian kha ka ringa, nangpawh hlim takin hun va hmang rawh” a tihchuan ka hlim ngei mai.

Pa Chrisa a rawn haw hnu lawkah zanriah kan ei zuia, ka nuteiin insiam tawh tur a min tih miau avângin keipawh chuan hnial buai lovin ka room lamah chuan ka lût a, engtia han inchei tur nge ka hrelo, ka thawmhnaw chu ka hai kual seka, chutah a tâwp a tâwpah kawrfual paw dal chu ha in ka sam chu ka thlah tawpa.

Makeup pawh ka inhnawih tam lêm lo, heels ka bun peihloh avângin sneaker vâr chu ka bun tawpa. Ka hman chu a nimai, Mizoram lama ka awm lai pawhin ka inchei ngai lêm lova, ngaiah ka neih tawh ni ber in ka hria.

Ka inchei thiam meuhlo “Bawihi i hman tawh em? Damian-a a rawn thleng tawh ania i rei lutuk ange” tiin nutei chu a rawn au lâng lâng a, keipawh ka purse phawrh chuan ka tlân chhuak zui vata. Pa Chrisa nêna Damian-a an lo titi mawlh mawlh la hmuh chuan ka ding chata.

A inchei dân chuan ka mit a la zar mai, amah ang lo takin suit nên alo inthuam zarha. A inhmeh takzet, a pian nalh tak chu a suit hâk chuan a ti lang chiang lehzuala, inhmeh tak chu ani. A dum vek in a inthuama, a ngal sei zet chu a lang chiang hle bawk.

Ka lam a rawn hawi rual chuan a hawi sawn leh tawh lo, keimahah chuan a mit a fu ngar ngara, nalh lo min tih ka hlau lutuk chu ka lung te chu a phu dawt dawt mai. “I hman tawh maw? I mawi lutuk, i pian a nalh hle a nih kha” nutei chuan a lo ti zung zunga, mipa pahnih erawhin engmah an sawi lêm lo.

Damian-a chuan mawi min ti ve angem tih ngawt chu ka ngaihtuaha “A nih kan kal nghal mai dâwn em ni? Kan thleng har lutuk ange” tiin a kut chu min rawn pe zuia, keipawh chuan ka lo ban ve vat bawk..

Nutei te chuan fimkhur tura min chah chungin min vai liama, zanin chu car nalh zet ferrari car blue ngat chu a rawn kenga. Ka hmuh rualin ka âng nghal pam mai, ka ring theilo, hetiang Carah hian ka chuang dâwn amaw? Lalpa leh! Ka mumang a ang zâwk, mi hausa ho car ah ka chuang dâwn ania.

“I duhzâwng a ni em? Zanin chu i kawr hak nên pawh a inchawih dâwn khawp mai” tiin Daniela chu ka beng bulah a rawn phun sapa, ka chhâng mai theilo. Ka hmaa car nalh zet chu ka en reng ringawt, hetiang hian a mawi ang tih ka ring phalo, a taka ka hmuh pawh ka beisei lo ania.

A ropui tih piah lam a ni “A mawi lutuk thla ka lâk pui thei angem?” ka tihchuan min en vung vunga, chutah ka lamah rawn kûn hniamin ka hmuiah chuan a rawn fâwp leh zauha “Zaninah hian i mawi ber, chu chu hre reng rawh. He car ai pawh hian i mawi zawk, khawi i phone lo phawrh la ka lo lak ang che, ka bialnu in i duh miau chuan kan mawlh ang” a tihchuan ka lâwm ngei mai. 

Ka phone chu pe vatin ka in post kualzuia, kan nui leh hak ṭhin. A thlalak ka en chu min lâk nalh sak lemlo, mipa a ni bawka thlalâk chu a thiam viau lo, mahsela a nuam a ni.

Thla te kan lâk zâwh hnu chuan kan in khalh chhuak zuia, car changkang taka chuan chu a nuam dangdai viau lehnghâl. Hahdam tak chuan ka ṭhu er era, Damian-a chu ka melh leh zawk ṭhin, a hmêlṭha takzet, zân in hian ka hmu pa zual.

A engkim hian min hip vêl vek ni ber in ka hria. “Mi an tam tawh em? Nge ni a an la awm vak lo” ka tihchuan a lu a rawn thle zauha “An thleng kim thawkhat tawh ang, an nuam tih zâwng an bawlh pelh rei ngailo, nang erawh ka bulah awm reng ang che. I chhûngten ka chunga an rinna an nghah kha min tih reh sak hauh suh ang che” a tihchuan ka bu nghat nghata.

“Min kalsan miah suh ang che, hmelhriat ka la nei ṭha lo tih kha hre reng la, chutilo chu ka tlân haw san nal nal duh ang che. Keimaha awm ka duh hauh lo ania” ka tihchuan a bu nghata “I kiangah ka awm reng ang thlamuang tak khân awm rawh, tumahin ka phalna la lo chuan an tawk hauh lovang che, a ṭha em?” tiin a nui suka.

Keipawh ka bu nghat nghat mai, chutah khawpawn deuha villa nawm hmêl zet thâwm lo awm nuaih nuaihna zâwnah chuan min dinpui zuia, ka âng phuau mai. A kawtah chuan pool lian deuh tak a awma, a bul vêl chu an chei mawi hle bawk.

“Chhuak ang hmiang, ka bulah awm tlat ang che” tiin ka sam chu a rawn siam ṭha a. Chhuak hmasa in ka lama kawngkhâr chu min rawn hawnsak zuia, a kut min pêk chu vuanin muangchang chuan kan inzui lût zuia. 

Tyler-a te ho pawh ka hmu nghal, mi chu an lo zi mup mupa, an thâwm chu Damian-a nên kan lan tâkah chuan a reh deuh duk a.

Damian-a chuan dawhsan lamah chuan min chhohpuiin a Birthday lawmpuitu te chu chibai buk pahin a bialnu ka nih thu leh tumah min hnaih lo tur chuan a ti zuia. Mipui thâwm chu a reh duk bawk nên ka awm a nuam lo lek lek, tihian mi tupawhin a bialnu ka nih thu an hre dâwn tihna?

Lalpa leh! Hepa hian min ṭhawng dawt dawt reng dawn chu a nih hi, ka thaw ham hama. Ka zâm lutuk chu Damian-a bân chu ka hmer ngawt ngawt tawpa, ka hawi chhuak leh ngam tawh lo.

“Zak suh, dâk deuh vah rawh. I kiangah ka awm hi, engmah hlauh tur a awm lo ania” a rawn ti supa, ka chhâng mai lo. Ka zak a ni ber mai, hetiang hian tumahin mi hmaah a bialnu ka nih thu an la sawi ngailo. 

Stage aṭanga kan chhuh rualin eitur lo inhunna lam chu min panpuia, in tur chu la in ka kutah a rawn hmeh bela “In rawh hei chu zu a nilo, thei tui a nih kha, zu lam erawh in miah suh ang che. Miin an pêk luih che pawhin a ngai lo ti ang che. I nutei te laka ka thutiam bawhpelh ka duh hauh lo ania“ a tihchuan ka bu nghat nghata.

Keipawhin zu lam chu in ka duh biklo, eitur an chhawp chu ka in barh pah mawlh mawlha. A tui hlawm phian lehnghâl, “Damian hei hi keiai i thlang amaw?” tih rawn chhuahna lam chu kan hawi dûn ṭhawt a, vawiina mi bawk kha a ni, rilru nat hmêl tak hian Damian-a chu a melha.

Kei erawh chu huat hmêl takin min en thung. “Ka sawi tawh kha Annie, ka thin tihrim tum hauh suh, ka dawh thei vak lo ania, keichuan ka hmeichhe duh ka thlang mai anih hi. A tir aṭangin ka duhlo hrim hrim che” a tihchuan Annie chu a tlansawn zuia, a ṭhiante chuan an ûmzui vat bawk

“Khatiangin i ti khera, awm i ti nuamlo a duh ve hle che a nih kha” ka tihchuan a ner deuh naka “Chu ka bialnu ni turin i duh tihna em ni?” a rawn ti khauh chu min ti dang chiang hle. “Min duh tu zawng zawng chhâng ila nang kher ka thlang lovang che” a rawn ti zuia.