DEMON KING CHAPTER 2

DEMON KING.

CHAPTER 2 .

“Tirawh rawn lut ve vat la, kan haw tlai lutuk ange, nakinah i ui leh si ange aw” tiin a nui vur vura, thaw hakin ka tshirt chu ka phelha, min lo en ve reng bawk nên awm a ti nuam lo takzet. An ni hi chu an vun ngo dân hi a chiangin an langsâr vuka, keini vun eng lam mah tân phei chuan tluk har tur tak an ni.

Muangchang chuan ka pan pheia, ka kutah lo kaiin a thukna lai chu min pan puia, tui chên hi chu ka ti ngun bawk nên ka thiam ve viau mai. Hleuh kualin kan hlim ta phiana, a tui chuan inthenin kan nui dûn hawk hawk renga, kan aw chu chulai ramhnuaiah chuan a khâwk rum rum bawk.

Nuam ti zet chuan ka hleuh kuala, khawlum hnuaiah phei chuan dai nuam tak a ni. Hah a dam nghâl sawng sawng thei, thing kâr aṭanga ni êng rawn inkhawh lût te chu an mawi hle bawk. Vau kam lam pan tuma ka hleuh dâwn chiah tihah chuan Damian-a chuan min rawn pawm nawlha, ka au nghâl ṭhat bawk.

“Damian min dahthla rawh, kan chesual ange aw, ka hlau a nia vatin min dahthla vat teh” tiin ka au chula, a nilah chu nui hawk hawk hian min dahthla mai duh bawk silo, ka chêt vak chuan kan tlu anga kan in ti khawlo ang tih ka hlau bawk nên che ṭha ngam lo chuan ka dawh tawpa.

“Ka hmeichhe ngainat zâwng tak ini Fiona” a tihchuan ka nuih ringawta, han chhân ngaihna pawh ka hrelo. “Haw tawh ang” ka ti ta ringawta, a dang han sawi tûr chiam ka hrelo a tin ni “Aw le, kan haw dâwn a nia, zânah kan hnenah rawn tel ve ta che?” a rawn tihchuan a ngaihna hre lo tak hian ka en renga.

Eng thu nge a sawi chu ka hrethiam hauhlo, mahsela lenpuiah min sâwm a nih ka ring bur thung. “Zanah ka vâk chhuak ngailo, nutei pawhin a phallo ang, haw vat zâwk ang. Bâkah ka la hrechiang lo che a, ka chungah enge i tih duh ang tih pawh ka hrelo” ka tihchuan a nui haka.

“A nihchuan ngatinge min zuia? Min hlau a nihchuan tinge min zui?” a tihchuan ka melh mâwl tawpa, chutah mawi zeta rawn nuiin ,“Fiona i rilru chuan min hlauh i tuma, mahse i thinlung khân i tân ka hlauhawm lo a ni tih a hrilh che tiraw? Chuti nilo se hetah hian min zui hauh lovang, min hlau lo la, min hriatchian lutuk pawh tum suh, i hman loh chuan sâwm luih che pawh ka tum lo ania, haw phawt ang hmiang” a tihchuan tui aṭang chuan ngawi rengin ka chhuak hnak hnaka.

Ka thawmhnaw chu ka inbel nghal mawlh mawlh bawk, nutei chuan min lo hau êm lovang chu maw. Min ngaihtuah thei si a, helai ka thlen hnu ngat phei chuan vawikhat mah min thlah fâl ngai lova, ka bo a hlau a ni ber mai. College ah lehzêl chuan min zuilo tura ka tih avang chauhin min zui lo kha a nia.

Keimaha puitling taka khawvêl hmachhawn ka duh ve tawha, kum ka tling tawh tho a keimaha in hai kuak ve ka duh a ni ber zâwk. A bike bul kan thlen leh meuh chuan ni sa chuan min rawn em leh at tawha, thawmhnaw huh pawh a hil hman leh vekin ka ring.

Ngawi reng chuan khawpui chhûng lam pan chuan kan inzui leha, kan awmna lai min zawh chuan ka lo chhinchhiah ve thlap bawk nên a vêng hming chu ka hrilha, manhattan lamah chuan tlanin tuipuiin a hual vêl a ni bawk a a nuam ngei mai. Mizoramah kha chuan lui te takte tê bâk kha hmuh tur an awm lova, sâp ram ti a kan lo hriat meuh zawng a zawl dupa, tuipui mâwi tak takin a hual khup bawk nên hmuh a nuam hliah hliah mai.

Damian-a hnungah chuan beiin ka hawi kuala, tûnah hian mipa chhelo leh hmêlṭha em em maiin min phur kual mêk a chu a nia, Mizoramah chuan awm ila chuan ka in ti thei viau ang. Dâk vahin ka chuang anga tih vêl ngaihtuah chuan ka nui haka, sap tlangvâl hmêlṭha pui pui kawp kha kan lo awt ṭhin a, tûnah chuan ka bialpa chu nilo mahse mipa chhelo lutuk phurh chu a nuam hliah hliah mai.

“Khatah khân ding rawh” ka tihchuan a ding ve maia, ka chhuk nghal vat bawk “In in em ni?” a tihchuan ka bu nghata “Coffee i lo in duh em?” ka tihchuan a hnial dâwn emaw tih laiin min rawn zuia, keipawh chuan engmah sawi tawh lêm lo chuan in lam pan chuan ka kal zui hlak hlaka.

Nutei pâwn rawn chhuak nên chuan kan intawk chiah bawk “I va rawn haw har ve a, ka ngaihtuah che a lawm” ti a ṭawng leh mai a tum lai chuan ka hnunga Damian-a rawn ding chu a en ha a “Tunge?” a rawn tihchuan ka ṭhian chhar thar a nih thu chu ka hrilha, Mizo ṭawng veka kan in biak avângin Damian-a chuan a hrethiam bau lo tih a hriat.

“A va hmêlṭha ve, nangte hi i luck dâwn riauin ka hria, ngawi teh a hmêl hi hmuh tawhna ka nei chiang a ni” tiin Damian-a chu a en zui vang vanga, a ni pawhin a lo en ve reng bawk, a hmêlah chuan zâm hmêl pawh a lang lo. A ngai thlup reng mai.

“Bawiha ka hre tawh ngai che em?” tiin Damian-a chu a en chho ha a, an in len hleih lutuk chuan min nuih tir lo theilo, keini Asian lam hi American mite ai hian kan ruangâm a tê hrim hrima, an ni hi chu a tlângpuiin ft 6 hi chu an tling ngei ngeia, Damian-a phei chu ft 6'4 lai a nih ka ring, a zak ka thleng ṭawk ania.

Kei hi ka sang ve hle a, Mizo hmeichhia ah chuan ka tê chhe lêm lo, mahse an ni ang hnampui lakah chuan tiah pui pawh nei ila an sâng ṭha hlawm bawk nên khawlaia vah pawhin kan lang lian tehchîam lo, Mizoramah kha chuan a lian pâwl ka nih avâng khân keimah aia tê lakah chuan ka in ti thei ṭhin lutuk tlat.

“Aaaa min hre dâwn em ni ka pi?” a lo ti liam puata, nutei lah chu a dâk ar mai bawk sia ka nuih a za ru takzet. “Ka hmu tawh tlat che, tv ah a ni thanin ka hria ngawi teh. Apple Company neitu fapa kha i ni chiang lutuk!” phâwk zeta en chunga a tihchuan keipawhin phâwk zet hian ka en ve leh hnuhnawh a.

THAWNTHU A NIHNA ANGIN AWIHAWMLOH CHUTI KHATI TE IN LO TI LEH ANGE, DUBAI LALFAPA NEI CHUTI KHATI TIH HMANG TE KHA IN AWM KHA, TÛNLAI ANIH TAWH HI, THLENG PALH THEI VEK, THAWNTHU ANIHNA ANG NGEIIN A TAK EMAW TIH TLAT LOH TUR, A TÂKAH PAWH A THLENG THEI THO, KEIMAH PAWH KA LA NILO ANG TIH SAWI THEIHLOH 🤪😆

Tûna nutei thusawi kha enge a awmzia? Damian-a hi Apple tûnlaia lar em em mobile phone te, Laptop eng eng emaw lar ber ber siamchhuaktu fapa hi maw a nih a? Lalpa leh! Ka thu hriat chuan mak min tih tir chiang lutuk tlat, Damian-a ka en reng lai chuan a hmui a pet zauha “Ka pi min hriatsual aniang, Fiona ka kal mai ang naktûkah chuan kan inhmu leh dâwn a nia” ti a kal mai a tum chu nutei zâwk chuan a lo chelh bet vata.

“Coffee tal rawn in rawh, bawihi i rawn thlah bawk si a, rawn zui ve te te a i lêt leh nghâlin a mawi pawh a mawilo, lo kal rawh” tiin an in pawt lût zuia, ngawi reng chuan an hnungah ka zui ve zel bawk. Ka thu hriat chuan mak min tih tir lutuk, university ah pawh khân an zahin an hlauh em em chhan ka hre ta chiah, mi hausa fa a lo nih vâng a nih dâwn hi 

Inchhûng kan luh rual chuan nutei chuan coffee chu a siam zung zunga, kei erawh ka bag chu room-ah va dah lawkin ka chhuak leha, Damian-a chuan nuamlo a tih ka hlau ve bawk nên a bulah chuan ka ṭhu pheia, a ngawi ngula a phone chu a en zauh zauh bawk. A hma a a hmêl nelawm kha a bo veka, tûnah chuan a nelawm loh ka ti riau.

“I hmanhmawh tawh em ni? Nutei in a siam zawh veleh i in anga i haw dawn a nia, ka sâwm laklawh che sia in lova i haw kha chuan ka awm anuam bik dâwn lova, chuan ka lâwm lutuk aw. Nang awm lo la chuan ka la thleng miah lovang” ka tihchuan a nui suka, ka ti tak tak bawk. Taxi ka hmuh mai loh phei chuan bus vêlah chuan ka peih chiah siloa, ka bo ka hlau a ni ber mai.

Nutei pawh chuan a siam zo har lo, rawn chawi phei thuaiin kan hmaah chuan a rawn chhawp zuia, “Bawihi i thawmhnaw chu a hnawm deuha ka hriat chu, enga tinge?” a rawn ti nghal zata, ka bulah a rawn ṭhut tâkah chuan ka thawmhnaw huh deuh chu a rawn hre nghal chata.

“Nia khua a lum sia tui ka chênga” tiin coffee chu ka in zui hlak hlaka, Damian-a erawh ala ngawi reng thung. A nelawm loh ta riau hian ka hria “Tun ang nisa ah tui an chêng ngailo, i lu te a na dâwn a sin, hei ṭhian thar lah chu i chhar bawn ropui si a, kan inthlahrung duk mai alawm” a ti zui hlak hlaka.

Damian-a pawh chuan min rawn melh leh zawk ṭhin, kan ṭawng a hriatthiam loh avâng erawh chuan a hawihai hmel thei viau thung. “Ka haw phawt ange, naktukah kan inhmu dâwn a nia” tiin a ding chhuak hluaia, ka zui ve vat bawk.

Pâwnah chuan inzui chhuakin vanlam chu ka en vang vanga, chawhnu lam a ni tawhin ni eng pawh a zuai ṭan a, a nuam tâwk vêl viau in ka ring. Damian-a bike a ṭhu chunga ka lam rawn hawi chu ka kut ka vai khum zauha “Tluang takin i kal dâwn a nia, min thlah avângin ka lâwm lutuk” tiin ka nuih var vara, a ni pawh a kut rawn vai zauhin a tlanchhuak zuia.

Tlaiah chuan nutei chuan ka university kalna vêl te chu min zâwt mawlh mawlha, hriat duh lah a ngah nasa. Damian-a nên kan inhriat dân chu a ngaihven zuala, ka nunna a chhan avâng a nih thu ka sawi chuan a thaw huai a, a lo hlauthâwng leh hle tih ka hria.

Ni e helam phei chu hnampui an nihna ang leh mihring an tam ang ngei hian tualthah hmang an tamin suamhmangte an tam bawk nên a ngaihtuahna chu a hriatthiam awm tho mai.

Thawk la ham hamin “Fimkhur hle rawh, hmeichhia phei chu min thah hreh miahlo hi an tam tawha, mahnite te hian tlat hran mai mai loh tur, rukrûk hmang leh tualthah hmang an tam si a nangmah chauhten vâk fo suh ka tih kha, helai chu Mizoram ang a nih loh hi, tumah i hre hek lo, chuvang chuan a hlauhawm zual, mipa sual tak hi chu sual tak an ni ania” a ti zui hlak hlaka.

Kei erawhin ka chhâng lêm lo, chhân vak pawh ka tumlo, ka invenna tur tâwk chu ka thiam ve  mai. Bâkah tumahin ka kawng kal mai mai chu min tih buai ka ring lo hrim hrim. Khualzin an nei ve reng dâwna  tu misual mah ka tawn fuhloh ka beisei bawk.

Chaw eikhamah chuan ka room-ah lutuk ka ṭhiante chu vawiin ka thil tawn vêl ka hrilah, rawn kal ve an châk nasa mai. Damian-a chungchâng ka hrilh te chuan Tetei zâwk phei chu a au tuar tuar lo chauh a ni. Ka hlimna ah min hlimpui theite ai bâka hlu an awmlo

ZAWM LEH TUR