DUHLAI ZORINPUIA CHAPTER 21

DUHLAI ZORINPUIA 

CHAPTER 21 

Kohhran hall ah kan insuih ṭha a, u Rinpuia suit nêna nalh tak a inchei chu hmuhnawm ka ti a, ka nuih sâng reng mai. A hmêlṭha hi ka ti em asin, ka nu leh pa pawh an rawn kal ve a, ka nu erawhin min la be duh meuhlo, mahsela kan inneih min pawmpui hrim hrim chu ka lâwm tâwk em em tho.

In lamah chaw kan eikhawma, ka naute pathum lahin u Rinpuia an tibuai ti ila a bulah an awm chawta, sairawkherh a siam sak chu perh dân an inzir tir leh ṭhin. An bula awm chuan ka thlir renga, ka nau chiah Remrema lah hian a ngaina zuala, u Rinpuian a kum mila kawm a thiam bawk nên a star te thlengin a hrilh vek tlat.

Nui ver verin u Rinpuia che chu hmuhnawm ti zet hian ka thlir renga, ka nauten an nêl lutuk te chuan ka ngaih a ti ṭha zual. Kei mai nilo ka chhûngte thlengin a ngaihsak zia a ti langa, min hmangaih pui tih ka hria. Ka pasal hi ka hre chiang tulh tulha, ka hmangaih zual tulh tulh bawk, a nunah hian zir tur tam tak ka hmu bawk.

“A u, i pasal hi a fel e, en teh hei sairawkherh perh pawh ka thiam tawh lutuk, nakinah thing tawlailîr min siamsak dâwn” kan naupang ber Tluangpuia chuan ka bula rawn kalin a rawn au chûl a, a phûr lutuk chu ka lo nuih leh ṭhin.

“I thiam hle mai a, nakinah Tetea te nên sava in va veh dâwn a nia aw, i perh thla thei hrim hrim ang” tiin a lu ah chuan ka chûl sak zauha, phûr zeta a u te bulah va kalin sava veh chu a va sâwm zuia, u Rinpuia u fate nên an lo in kâwm rual hlauha, an in zui chhuak diah diah chu thlir in ka pasal bul chu ka pana.

Min lo kuah nghâl thak mai, “Ka lâwm e aw, thingtlânga zin hi an châk thei lutuka, nang lahin an tui zâwng i hre mai hi a mak e, ka naute hian i hmêl an hmuh hma hauh aṭangin i thlavang an hauh teh mai a nia” ka tihchuan a nui suk suka.

“Keipawhin ka ngaina alawm, naupang fel leh thuawih tak an ni. An duh leh helamah pawh an rawn zin zeuh zeuh thei ang chu, kei chuan ka pawi ti hauh lo ania. I nau phei chu a rawn puitlin hunah chuan mipa rintlâk tak a ni ngei ang, tûn aṭanga enkawl ṭhat a ngai lehzual a nih saw” ti a ka naute ho ramhnuai lam pana inzui diah diah chu a thlîr ve vung vunga.

Chutah rawn in herin ka dulah chuan a kut a nghata, “A rawn puar ve ṭan in ka hria” ti a nui sukin a hlîm nghal zata, a lâwng a a hmuh tâkah chuan ka dul tlêm a rawn puar ve ṭan chu a lang chiang leh zual bawk nên hlim zeta a zût hauh hauh hmuh chu anuam ngei mai.

Kan chhûngte pawh in chhûngah an in kâwm khâwm a, va tel ve duh lêm lo in room-ah kan nupa chuan kan lût zuia, “Ka hmangaih zia che hi, ka nei thei dâwn lo che emaw ka ti tawh a sin. Mahse Lalpa remruat hi kan lo hre miah siloa tiraw, beidawn tawh hnuah pawh beisei tur dang alo la awm zia ka hriat hian beidawn mai loh tur tih hi ka hre chiang leh zual ṭhin” tiin a âwmah chuan ka beia.

Ka taksa rawn zuta ka thawmhnaw a hlim sawk sawk avâng chuan mak ti deuh tak hian ka ena “Tunah maw? Kan chhûngte an awm ve reng saw, u Rinpui” ka hmuiah chuan a rawn fâwp nghal hmaka. “Thawm i dim angai a nimai, tûnah ka mamawh che alawm” tiin a kawr chu a phelh zuia, ka dang duh ta biklo.

Thâwk la hakin keipawhin ka mamawh ve tho bawk nên ka lo puia, a kekawr hmanhmawh lutuka a tlawh thla chu ka nuih hak mai. “Min nuih hauh suh aw, ka nupui i ni tawha, ka insûm mai mai tawh dâwn lo, kan in ngaihzawn lai khân hrehawm ti in zân ka mu fo a, tûnah chuan khâng ka insûmna te kha ka ti reh vek dâwn” tiin anui zui suka.

Keipawh ka nui ve tho, ni e kan in ngaihzâwn lai khân insûm harsa a ti ṭhin hle a. Mahse keimah min hmangaih avâng bawkin a duhna te ti puitling loin a insûm leh ṭhin a nih kha, ka hnuailama ka thawmhnaw in bel pawh chu hlîp ve in bengchheng lo tur chuan min hrilh leh sapa.

Room kawngka kan kalh bawk nên keipawh tûnah chuan u Rinpuia mamawhna hlirin ka khat tawh. Dim tê chuan ka taksa ah rawn lût zuiin chêt a la zuia, thâwm chhuah ka hlau bawk nên ka hmui ka pet fan fan mai.

Thâwk la ham hamin ka nghâwngah chuan a rawn fâwp vaka, ka kuah nghet sauh sauh thung. Insûm hman lo a ka rum chhuak chu in hre chhuak thutin ka hmui ka hup vata, ka meng phâwk deuh hra chu min nuih hakin “Insum suh” a rawn ti kher chu a bânah ka hmer sak vak ringawt.

Ka taksa rawn sa chhuak pup pupin ka zawi ta hnawka, khumah chuan mu zawi ngiaiin a ni erawhin ka mita melh kalh chung chuan a la che sauh sauh thung. A kutah chuan humin thawk ka la haka, a ni pawh a zo dâwn a niang a rawn che na sauh mai.

Chutah ka chunga a rawn bawh hnawk rualin kawngka chu an rawn kik dat data “Hmingte” u Rinpuia nu, ka nu nita aw a ni. Ka meng phâwk vaka, kan thil tih an rawn hriat loh hrâm ka beisei, thâwm lah chu a reh ṭhap mai lehnghâl.

“Aw nu” ka aw ṭial deuh ruan avâng chuan ka aw ka thian zui kharha, u Rinpuia pawh ka nghâwng zâwnah alo nui lum hak mai. “Lo chhuak ula, hei thil sawi ho lawk ang u hmiang” a rawn ti leha, kan chhuah vat tur thu sawiin u Rinpuia chu ka namsawn zuia.

Ka zak bawk nên ka sa pup pup mai “Nidangah chuan chhûngte men laiin a tihchi tawh miah lo ania aw, insiam zung zung rawh chhuak ang” tiin ka sam chu ka chûl mâm thuak thuaka. Ka thawmhnaw chu ka inbel nghal sawk sawk bawk.

A ni erawhin ka che vêl chu ngawi reng hian khuma mu chungin min lo en renga, “Hmanhmawh rawh ka tih chu Mûnga” a hma a ka koh dân a ka ko chu a duh lo nge a rawn ner nghâl suk mai “Khatiang khilam hming lutuk khân min ko suh, Mizo hming pawh a nih loh kha, round dang ka tih pui leh che i duh loh chuan” a rawn ti chu rang zetin room aṭang chuan ka tlân chhuaka, a nui hâwk ri pawh ka hre reng.

Kan chhungte'n min lo en ṭhap tih ka hriat avâng chuan lâi zet hian ka sam chu ka bengah ka zep ta ringawta, “Enga tinge min en ṭhup a?” ka tihchuan an rawn nui hak hlawma “Engmah nilo e, i inthlahrun hmêl ema, in pa chu khawiah nge eng nge a la tiha” ka pa in a rawn tih rual chuan u Rinpuia pawh chu a rawn chhuak a.

“Heta hi ka awm e, enge nita?” tiin an bulah chuan min phei pui zuia “Hei naktuk lam chu kan haw tawh mai dâwn emaw ni kan tia, khulamah hna kan nei ve bawk si a, bawiha te ho erawh an la awm dâwn em ni kan ti deuha, haw an la hreh bawk si a. Nangmahni lam phur hi a rit lutuk angem kan ti mawle” ka pa in a rawn tihchuan u Rinpuia zâwk chu ka melh vata.

Ka nu erawh a la ṭawng lova, chutiang bawkin u Rinpuia nu leh pa pawh an la ṭawng bik lo. “A pawina tur a awm lo ang, an duh chen chen awm rawh se, keimahni tân tak pawh inchhûng ah naupang an la awm silova, duati pawh a naute an awm chuan a khua a har lo deuh ang chu. A nau pai nên feh lo turin ka duh bawk si a, chutia bawihpuia te ho an awm chuan atân tak pawh a nuam zâwk ang, chaw kan ngah a lawm” a tih tâkah chuan ka pa pawh chu a thaw huai mai.

Keipawh a rûk tak chuan he in chhungah hian ka lawina a la rei lutuk lo nên inah u Rinpuian min awm tir tlat zel bawk sia a reh chu ka ti reng, “A lâwmawm viau ang, tihbuai lutuk cheu chu kan duh bîk hauh lova, in buai dâwn ai chuan kan hruai haw lui mai ang” ka pa chuan a rawn ti leha.

Ka nu pawh tûn ṭum chu a rawn ṭawng chhuak ve ta nge nge a, a hma in keimah leh u Rinpuia chungchângah u Rinpuia nu leh pa an biak dân ka lo hre tawh bawk nên an inthlahrung pawh chu a âwm ka ti viau mai.

“Ni e, in buai phah dâwn chuan tûna hruai haw nghal pawh a pawilo a nia, an mahni hian helama la awm an châk viau bawk si a. Keini lah hna kalsan reng chu hotu nei kan nih ve avâng hian a rem ṭeuh siloa, in ngaihdan te pawh pu Sen kan hre ve duha, kan fanu in lo enkawlna leh a chunga in ṭhatna zawng zawng hi kan hmuh hmaih bik lo a nia” a rawn ti ve a.

A rûk chuan ka thaw huai thung, kan lakah a thinrim reng khân nuam ka ti bik lova, ka nu phei chu kan naupan têt aṭangin min hauin min thinrim khum ngai lova. Tûna a awm dân hi reilote mah nise keimah ngei pawh hian hrehawm ka ti a ni.

“Inthlahrung suh u, an mahni in an duh phawt ahnu, an fel bawk nên keini tân pawh inchhûng khura naupang bengchheng tur han neih chu a lâwmawm zâwk a nia. Kan tute lah hi an rawn chuang kai mai mai duh bawk siloa, kan khua a har zâwk viau a sin, an ni unau an awm chuan kan lâwm daih zâwk ang. Rilru hahdam deuhin haw rawh u, fimkhur ula ruah tui hi a tam telh telh bawk si a” pa Senan a lo tih ve tâkah chuan ka lâwm viau mai.

U Rinpuia chu ka en zawka, a hmêlah a ni pawh a hlim tih a hriat. Kan chhûngte ve ve hi an in be thei lovang tih kan hlau ru viau kha a nia, tûnah erawh kan nghah peihna leh kan pahnih luhlulna chuan a hma aiin kan boruak a ṭha chho zel tih ka hailo.

Bawihtea te an rawn haw tâkah chuan zanriah ei turin kan in buatsaih zuia, kan tam tham ve tawh bawk nên kan ri laih laih reng mai. 

Zânah ka nu nên chuan kan nupa room-ah kan in bia a, ngaihdam min dilna inthlahrung taka a sawi chuan ka hnuk a ti ulh hial mai. “I nunnawmna tur leh kan chhûngkaw zahawmna tur ka lo ngaihtuah lutuk vâng zâwk a nia, i nu hi min ngaidam hrâm dâwn ania, tûnah chuan i pasalin a hmangaih zia che leh a chhûngte pawh an rintlâk zia ka rawn hmu tawha, ka ngaihtuah tawh lo che. Sum hi hlimna a nilo tih ka hre thar ta bawka, i nu hi ngaihdam tlâk nilo mah ila min ngaidam hrâm dâwn a nia” a tihchuan ka kuah vata.

“Ngaihdam i ngai hleinem, ka têt tê aṭangin ka tâna ṭha lo tur i sawi ngai loa, tûn ṭum ah erawh ka thinlung ngei duhthlanna hnar theilo in i thu ka hnial angaih phah a nih hi. Mahse ka ṭhiannu nun tichhe tu kha chu neih ka duh chuang lo, u Rinpuia hi ka hmangaiha, ka kalsan thei lo a ni. Ka lâwm e aw nu, ni e mi rintlâk tak a niin kha chen min nghâk tu bula awm loh hi ka duh lo” tiin ka ṭah nuih haka.

A ni pawh a thaw huai mai, ka rilru chuan Pathian hnênah lâwm thu ka sawi mawlh mawlha, ka nu nên kan inkar a ṭha leh ta chuan ka hrehawm rûkna te kha an ti reh duak bawk. Thâwk la vang vangin ka nu chu ka kuah a, a chhuah hnu pawh chuan hlim zet chuan ka nui leh ver ver ṭhin, hetiang hian kan awm ngailo a nilo, mahse ka pasal neihnaah nu leh pa in an rem tilo tih hre chunga nei lui ka ni a, ka chunga an thinrim reng kha chuan keimah pawh ka awm a nuam hek lo.

U Rinpuia rawn lût chu ka lo ban vata “Enteh ka nu pawh a nêm tawh a nia aw, chuan a fak viau bawk che. Keimah ang maiin i ṭhatna leh felna, i zaidamna leh i rintlâk zia te an hmu a, tûnah chuan inrem takin kan awm thei tawh ang, ka lâwm takzet. Ka nunah nang ilo lang hi Pathian hnênah pawh hian lâwm thu hrilh mawlh mawlh mai ka duh” tiin ka phun sapa.

“Engkimah a tlai ngai hleinem, nghâk peih te tân a fiah leh zual ṭhin. Tûnah chuan kei, ka chhûngte leh kan fa lo la piang mai tur tân hian i nu leh pa te kalsanin ka kiangah i awm tawh anga, i nu leh pa bula i awmdân ṭhin ang khân he inchhungkhurah hian awm la, hmangaihna nên kan vaiin min enkawl ve thung tawh ang chu, tûnah chuan ka nupui,ka ta i ni tawha, i mawhphurhna i hlen ve a hun tawh tih i hria em” tiin ka nghâwng vêlah chuan a rawn chuk dan dana.

Ka nuih hak mai, a mah a zaidama, a thinrim ngai loh na phênah hian mipa thikthu chhe zet a ni tih pawh ka hre tawha. Mipa min rawn be tu an awm châng hian min hau ngailo, mahsela a rûk hian a lo titau ngat ngat zela, kei lahin a tir chuan ka hrethiam mai lova, a hnathawk chau ṭawng mawh ni turah ka ngai mai zela, mahse a hnuah erawh ka phone a lo check lai ka hmu peka, kha mi ni a a ṭawng ṭhat duh loh aṭang khân mipa dang in min bia tih a hmuh apiangin a ngawi ngar zel.

“Lungngai suh i nin hlui thlengin ka hmangaihna ka ti lang anga, a tâwpah min tlânsan leh nal nal mai ang, ka hmangaih lutuk che avânga ka nat zia ka awm lai kha ka ngaihtuah a, a châng chuan ka haw leh lek lek zel che” tiin a nghâwngah chuan ka seh sak zauha.

A rawn nui ve hak mai, ka kâwngah kuahin khumah chuan min lehthlak pui tawpa, ka nui nghal har har bawk. A samah chuan ṭhâm sakin ka chûl heuh heuha “Ka kalsan tawh dâwn hleinem che, ka hmangaih lutuk che hi ka chân duh tawh lo che. Mipa in tûn thleng an rawn la bia che tih hi ka hria a nia, ka lâwm hauh lo. Pasal i nei tawh tih hre rawh se” a tihchuan ka nuih sen sena.

“Aw lo block leh vek mai la, an mâwl deuh aniang. Kan dp aṭangin an hriat chian dâwn tehlul nên, taka vawiina kan inneih thlalak kha ka dp anga, an sim mai ang, nangpawhin hmang ve rawh, nula in an la be tam tlat che” tiin ka phun ve niah niaha.

Thinrim erawh chuan kan in be ngailo, a kut chu hûm sakin a chungah ka bawka “Feh ve tawh ka châk e, i phal ngai bawk silo, ka pum a len tak tak hma hian feh ve leh ka duh a sin. Inah ka awm renga, ka khua a har i bulah ka awm duh zâwk, phal ve tawh rawh” ka tihchuan a ngawi vang vanga.

Thil ka dîl hian min tihsak loh a duh ngailoa, min tihsak theih loh hian hrehawm a ti ṭhin tih pawh ka hria. 

“Nau i chhiat ang tih ka hlau a lawm” a ti chu ka ner nâng a “Aw i khawhar hnêm an ka rawn feh ve ṭhin dâwn a lawm, ka hnathawh i phalloh leh thlamah ka lo awm mai anga, Mawii te lah an feh vek zel sia ka tân pawh a nuam lo a lawm, a ni pawh a feha, an pa in engtin mah a tilo. Kei ve chu” ti a ka phun nâng nâng lai chuan ka hmuiah rawn fâwp zauhin a insiam rema 

“An ni chuan nau an la keng hleinem, tihian ilo awm hian ka ngaih a ṭha zâwk” a tihlai chuan ka hawi tau hmaka, a bul aṭanga awm sawnin khum kil lamah chuan ka tawlh phei daiha. Ka lâwm lo, min ngaihtuahna chu ka hrethiam lutuk, mahsela ina awm reng chu ka khua a hara, kawm tur an awm bawk silo, ka nu leh pa chu awm ve mahse tar mai an ni tawha, a zawng zawngin engmah kan ti thei lo bawk nên ka khua a har ngawih ngawih zel.

Bâkah midang zawng zawng feh kawnga inzuia an titi leh an nui leh dar dar ṭhin ang te hian ka awm ve châk a, mahse engmah ka ti thei der bawk silo. U Rinpuian feh a phalloh miau chuan ka tân pawh lo va tihluih phêt kha a ṭha miau siloa.

“Duati” a rawn tih pawh chuan ka chhâng lo, bang lam chu ka hawi ngar ringawt. Ka kâwngah rawn kuahin ka biangah chuan a rawn fâwp zauha “Engkim hi ka ngaihtuah vâng zâwk che a nia, i intipalh ang tih hlau rêng rêngin ka awm a, che sual palh ta la, kan fa kan chân theih bâkah nangmah ngei pawh ka chân thei che tih i hria tiraw? Ka hmangaih che a, him taka i awm ka duh ber” a tihchuan ka mittui a rawn tlinga, ka insût nghal hraih bawk.

“I bulah ka awm duh a lawm, ka hmuh loh che chuan ka ngai zel che a, inah chuan ka khua a har lutuk a lawm. Kha chen kan awm hranga, tûnah kan awm dûn veleh ṭan chiaha, zânah bâk ka hmu leh ngai lo che. Keichuan i bula awm reng ka duha, ka ngai ngawih ngawih che a lawm” tiin ka rilru a lang ang ang chu ka sawi chhuaka, ka mittui chu a luang zung zung bawk.

Ka rilru a no lutuk hi keimah pawhin mak ka inti, ka ṭap faih faih chu hmun dang en miah lo hian min en renga, kei erawhin ka en duh miah lo thung.

A thusawi chu dik ti tho mah ila a bula awm reng ka duha, a hma ang khân min kalsan leh daih ang tih pawh ka hlau.

“Aw le, ilo tel tawh dâwn a nia, mahse fîmkhur takin i awm ang tih min tiam la, hnathawh luih i tum tur a nilo, thlâmah ilo awm tawp ang a ṭha em? Keimahin hna chu ka thawk thei, midangte anga i thawh ve kher a ngailo, naupai dangten hna thawk mahsela nang chu ka nupui i ni a, ka enkawl tur i ni bawk. I naupai lai chuan hahdam taka i awm ka duh vâng zâwk a ni tih hria ang che” tiin ka hmuiah chuan a rawn fâwp vang vanga.

“I ti tak tak em? Thlâmah chuan ka awm char char ang, ih dik tak chuan khuaah chuan a reh lutuka. Bâkah i hmêl hmuh reng ka duh, ka ngai che ka tih kha” ka tih leh tâkah chuan a thaw huaia, a rawn nui ta var var bawk.

“Aw le, chuti khawpa min ngai a nihchuan min zui zêl tawh dâwn ania, ka nupui hian min thlahlel em em a ni tih ka lo hrelova” tiin a nui vur vura, a hlim hmêl em em lehnghâl. 

“I intithei, ka ngai duh mah che hi lâwm hle rawh. Min ngai ve ngai tawp silo” tiin ka phun niah niaha, ka zakah chuan a rawn dêk nghal vak mai.

“Nang tereuh hian engmah i hrelo aw, nitin, darkar tin hian ka ngai che a, tui leh chaw tel lo a kan awm theilo ang hian i tello chuan ka awm theilo tih hi hre reng rawh, ka taksa pêng pakhat a tello a ka awm theih loh thil, ka tâna thil hlu ber i nih hi” tiin a âwmah chuan min kuah bet zuia.

Vânneihthlâk takin raino huat ka nei ve lêm lova, keimahah buaina a awm heklo, nurse a ka lo ṭan ve tawh na nên engkim keimahin ka in ngaihtuah zung zung theia, chu chu kan vânneih pui tel bawk.

“Muhil tawh rawh, i mengrei lutuk dâwn. Naktukah i nu leh pa an haw tawh dâwn kha, i thlah ve hman lo hlauh a nge” tiin puan chu min rawn sintîr in min kuah nghet sauh sauha, ruah a sur leh tawha, khua A vawt vur mai bawk nên keipawhin a pangtilum chu ka nek hnai talh talh bawk.

Zîngah ka nu leh pa chu kan vailiamna, ka naute ho pawhin haw an ngên lêm lo, helama la châm an châk zia chu an awm danah pawh a hriat reng mai. Ka nute an liam rualin u Rinpuia pan leh in thing eh an inzir tir a, an zeilo bawk nên u Rinpuia pawh a nui hawk hawk reng mai.

Ka nau te hi an ṭhang duh bawk nên, an kum phulohin an liana, an rilru a puitling bawk. U Rinpuia pawhin a naute ang tak takin a en tih pawh ka hria, ka nu rawngbawl puiin in chhûngah ka luhsan ta daiha.

“I tho dam maw? I rawn che ve duh a lawm, naute hi rawn piang vat vat se ka hmu châk tawh hle mai, fimkhur la aw. Bawihan i feh duh thu min hrilha, kalkawng kal te kha fimkhur la, naupai lai chuan in dim a ngaihzia keiai i hrechiang zâwk ang, bawiha pawhin a ngaihtuah viau che a, mahse in lama i awm reng pawh khân boruak danglam deuh hip ve te i duh kan ring ve bawk nên, fimkhur ula. I naute ho erawh in lamah awm rawh se, in feh vek chuan in buai lutuk ang” a tihchuan ka hnial lêm lo.

Ka naute lah ram an kal ngai lova, u Rinpuia tihbuai lutuk ka duh bik lo. Bâkah an awm chhûng hi chuan in lamah ka nu leh pa khawhar an hnêm thei zawkin ka ring.

Chaw ei kham chuan chuan feh turin kan insiam malh malha, u Rinpuia chuan inthuam phui ṭha turin min hrilh mawlh mawlha. Vangvat leh vaihmite an tam tur thu a sawi avângin keipawhin thawmhnaw chhah lam leh ka taksa tuam phui thei ang ber tur chu ka in bel ve bawk.

In aṭanga kan inzui chhuah rualin Mawii te pawh an rawn lang zuia, u Rinpuian ka feh ve tur thu a lo hrilh a nih hmêl.

“Kal ang u, keini ai innei hnuhnung siin nau lah chu min ken khalha, kan lâwm lo hle a ni. Chi chak lutuk mai, kan fa a upa ber dawn emaw ti a kan lo hlim ve tawh nên” Faka chuan a rawn ti a, keini kan lo nui hak thung.

“Pa ti a min ko tu tur ka duh vâng a lawm ṭan ka lâk nasat em em, kan heti mai reng ang chu. Ka fa a lo pian hunah chuan in pai ve tawh em em ang” u Rinpuian a lo tih laiin Faka chuan an pai ve thu a rawn sawia, Mawii lam chu ka en nghal vat mai.

Ka la hre hauh loa, a kar a la tam vak dâwn lo tih ka hre nghal “Niminah kan hre ve chauha, thla pawh a la tling lo, hei feh a phallo lâwka, mahsela hna hahthlâk lutuk thawh tur a awm lo bawk nên ka tel pui ve leh tho a nih hi” a rawn tihchuan ka nuih nghâl var var mai.

Nau a pai ve chuan kan pawm dûn thei dawna, a nuam viau ang chu. U Rinpuia pawh chuan a lawmpui thu sawi ve supin kan inzui leh diah diaha, kan pasal te pahnih lahin lei nal nên min vengthawng lutuk chu Mawii nên kan nui leh ṭhin, keini pawh kan fimkhur ve viau tho.

“Ehe khu vangvat a khap duai duai mai, la vat rawh u” ka kekawr a vangvat lian lutuk rawn khap vak vak ka hmuh rualin ka au chula, ka ke ka per vak vak bawk. U Rinpuia chuan min rawn kuah betin a lan vata.

“I chesual ang, khatiangin awm vak vak suh, kha a bo tawh. Hei vâng a lawm lo feh ve suh ka tih che” a ti leh ṭan tawh chu ka en zawka “Ka duh leh ka lo feh ang chu, engah nge ka feh loh ang? Hei Mawii pawh a feh ve renga, Fakan engtin mah a tihloh hi aw, tinge min hauh bik reng? I sual si” tiin tûm hmakin hmalam chu ka pan leha.

A lo chhûng kan luh tâkah chuan a lo ber ka hrelo bawk nên ka hawi kual vut vuta “Hetah hian kan pêng dâwn, kan inri alawm. Kumin chu kan inhnaih hlawm lutuk, Sawma te ho pawh kan ri a, ṭhianho a in lo neih khâwm an tia, Mama te pawh an hla over lo, lo number pawh a fuh lo deuha” tiin Mawii chuan kalna tur chu min hrilh zela.

U Rinpuia leh Fakan kan hnungah ngawi reng hian min zui ve bawk. “Saw in lo chu” tiin a piah ber thlam chu min kawhhmuha, ka thaw huai mai. Mawii nên chuan in thlahin lo lam chu ka pan zuia “Duati i thinrim em ni?” rawn ti dût dût tu chu chhân pawh ka chhâng peihlo.

Thlâm kan thlen rualin ka lukhum chuan ka inzap nghal hauh hauha, ka hnunglam aṭanga min rawn kuah rualin a kutah ka sik nghâl vak mai. “A lum ropui si min rawn kuah suh, khawi teh ṭhu ṭha rawh Zorinpui ka ning” ka biangah rawn fawpin ka zakah a dêk leh vaka.

Hepa hi chuan ka chak lohna lai hi a hria a nia, ka nui nghal uar uar mai. “Ka tlâwm ka tlâwm, ka peih tawh lo. Awi ka pum” tiin ka pum chu ka dawma, chuveleh rang zet hian min thlahin ka pum chu a rawn dawm ve a “I ṭha em? Engtin nge i awm? Ana em ni?” tiin zawhna hlir chu min rawn zâwt a, ka nuih a ti za ru viau lehnghâl.

“Tikhan ka dam ka DUHLAI ZORINPUI” tiin a biangah chuan ka fawh sak ve zeuha, ka thinrim khum rei theilo. Hetiang khawpa min hmangaihtu leh ka hmangaih bawk hi engtin nge ka thinrim khum reng theih ang ni. Chân leh ka hlaua, kumkhua a ka hmuh phâk loha a awm leh ka hlau hluah hluah bawk.

Thlâm namthlakah chuan ṭhu dunin ka lum tih pawh an reh leh tawha, fur lai hi chuan ni sa chhûn hi a sa em em a, khua a lum viau tawh hi chuan chawhnu lamah ruah a rawn sur dâwn tih a hriat hle bawk.

“Ka pasal hi ka ngaisang a ni, hetiang khawpa zau i nei chungin ka puih i duh miah loa, vawiin chu thlâm bul tal hi ka lo thlawh pui ang che. Zo vat vat la, inah min awm tawh rawh, i tello chuan inah awm reng ka duh lo ania, ka hmuh phâkah awm reng la, ka ngai lo deuh ang che” ka ti chu nui sukin ka dul chu a chûl hauh hauha.

Tûnah chuan a rawn puar ve ṭan bawk nên ka pasal hlim hmêl leh a fa pian hun nghakhlel lutuk hi keimah hian hmuhnawm ka ti leh chhâwng a. Kan chhûngte ho pawh an bâng chuang lo, an vai maiin nau ka neih hun an nghakhlel em em vek mai.

“Hetia ilo awm mai mai hian ka ngaih a ṭha zâwk a lawm,lo a âwih si a, i lum palh ang tihte ka hlau a. Tihian lo awm la, ka rawn haw pahin Fanghma leh dawnfawh ka rawn hawn dâwn che a nia” a tihchuan ka lâwm ngei mai, hlim zet chuan ka nui ar ara.

“Ka lo nghâk ang che, bai tui tâwk ka lo chhum dawn ania” tiin mei chhêm tum chuan ka che zuia, thingtlâng pa a ni bawka. Thingpui hâng a ngaina tih pawh ka hria, chuvâng chuan ka theih tâwk a duat a puih ve ka duh bawk, min duatin ka lakah a ṭha em em renga, ka tân chuan a ni tluk hi an awm ngai lovang.

Thingpui ka lum pah chuan kan titia, hmalam hun kan sawi dûn a ni ber mai. Ka hlim a, chutia ka feh pui thei chu nuam ka ti bawk, inah kha chuan a reh in ka nu leh pa nên in kâwm ve mah ila ka pasal ka thlakhlelh êm avâng nge ka hlim famkim theilo, chubâkah ka ngaihtuah êm êm bawk.

Thingpui a so tâkah chuan a in zui a, a chhuak zui vut chu zui châk viau mah ila lo a âwih bawk nên ka chetsual tak tak chuan keima thiamloh a ni dâwn tih hria in ka tilui duh ta bik lo.

Ka theih ang ang chuan thlam bula hnim vêl chu ka lo pawt ve a, vaihmite lah chu an tam em em mai lehnghâl. Engtin nge hetiang kârah nitin an feh peih zâwk ni, an mi seh a na in a thak thei ropui si, keipawh ka thawk rei peihlo. Thlâmah chuan lût leh vatin ka in hiat nauh nauha, ka phun pah bul bul bawk.

U Rinpuia chu au lâng lângin zawhna ho zet zet ka zâwt chu ani pawhin a hnathawhna aṭang chuan min rawn chhâng ve zela, a rei tâkah erawh a nin ringin bai ka chhuang zuia. Thlâm bul châ a maian dâwng ngauh chu va la sawk sawk in ka hik zuia, thlai lah ka hmuh ang ang chu ka thlâk bawk.

A hmin tâkah chuan u Rinpuia chu ka au zuia, a ni pawh a rawn chho a, thlam a rawn thlen rualin Fanghma leh dawnfawh chu thlam chhuatah chuan a rawn dah zuia, ka au nghâl hliai mai. 

Fanghma chu velin ka ei zuia, chaw ei chu ka siam pah bawk. “Chaw te i ei theilo hlauh ange, dah rih la nakinah i ei leh zawk dawn a nia” a tihchuan ka en ha a, thu âwih tak chuan ka dah ve mai bawk, chaw chu kan fâk zuia. Ka ei tui ngei mai, hmarcha chu pir tân tân in ka si pah hliam hliam chu u Rinpuia chuan min nuih leh suk suk ṭhina.

Engah mah ka ngai duh lo thung “Riak lût mai ila i tân pawh a nuam zâwk ang chu, naktukah riak ila midang pawh an riak tih ka hria ania. Keiin thlam bul hi kak tifai ve zel anga, kan zo hma thei zâwk ang, bâkah a hma pawh khân min riahpui i intiam tawh kha aw” tiin kan inngaihzawn lai thil chu ka sawi chhuak a.

A hma kha chuan kan innei ang tihkha ka ring phaloa, tûnah erawh chuan a fa hial ka pai ta chu a ni sia.

“Duati, vaihmite an tam viau hi maw. An seh pân zo ang che tih pawh a hlauhawm a lâwm, keimah chauhin ka riak mai dawn a, hrehawm i ti lutuk ang” a ti chu chaw kham pah chuan “Ka riak ve duh, a hrehawm dâwn loh. A hma in min tiam vek tawh kha aw, nau ka neih hunah chuan ka duh duhin ka zui thei tawh dâwn lo che a, inah ka awm reng a ngai tho tho dawn. Tûnah nau ka neih hma hian riah ve chu ka duh” ka tih leh tâkah chuan min hnial ta biklo.

“Aw le, ka nu leh pa kan be dâwn a nia” a tihchuan ka nui var vara, fur a ni a atân pawh lâng a kal reng ai chuan a hahdam deuhin ka ring. Ka riahpui loh chuan ka ngaihtuah a, bâkah a bula ka awm loh chuan min ngaihtuah leh dâwn tih ka hria a, chuvanga hetiang pawh hi ti ka ni bawk.

Chaw ei khamah chuan dawnfawh chu phel leh in ka ei leh hlap hlapa, nau ka pai aṭang hian ei ka thei zuala. Ka sawi tawh angin rai huat ka nei lêm lova, ka thil ei a tui reng bâkah luak chhuak pawh ka nei ngai em em lova, a chânga ka uak leh ṭhin zeuh zeuh tih loh chu ka hrisêl ṭha viau bawk.

Ruah a rawn sur leh avângin a ni pawhin hna a thawh zawm thei bik lo. Thlâmah chuan awmin mei lum ai chuan a âwm nghêng ar ar-in ka ṭhu a, kan phun dun sep sep bawk. “Kan riah luh chuan a nuam viau ang, ka pui ve zêl ang che a, chuan keiin rawng ka lo bâwl anga, lo zawh vat kan tum dawn ania aw, naute te a lo piana a leikan veleh kan pahnihin kan feh thei tawh anga” tiin ka titi siam siama.

Chhûm a zîng nasa bawk nên khua chu a thim deuh khupa, haw pawh a châk awm loh viau mai. “Tihian kan riak tlang daih mai dawn em ni?” ka ti chu a rawn nui haka “Sin tur kan neih loh hi, zânah thosiin an seh nasa lutuk palh ang che” tiin ka hmuiah chuan a rawn fâwp zauha.

“Ka neih theihloh tura ka ngaih, ka ta ni ta si, ka ban phâk lohah ka dah, ka ban phâka rawn hniam hrehlo, ka hmeichhe hmangaih em em i nih hi” ti a thusawi chu hote mah nise ka hlimpui takzet.

“I ta ka ni reng ang, ka pangpar hlîng neilo mawi em em i nih hi” tiin a kut chu ka hûm saka, ka ham nghâl bai bai mai “Ka mut a chhuak luruk” ka tinghal zat chu “Muhil rawh, hna pawh a thawh theih tawh dâwn loh hi, haw dâwnah ka lo kai tho dawn che a nia” a tihchuan ka hnial bik lo.

Ruahsur laia mut hi a nuam bikin ka hria, insiam rem sat satin meilum ai pah chuan a mal khamin ka muhil zuia, vâwt pawh ka hre meuhlo. A bula awm hi nuam ka ti a, ka thla a muang hliah hliah bawk. A chhan pawh min kalsan ngai dâwn lo tih ka hriat avângin a ni.

Mang ka neih lai taka min rawn sawi nawk nawk avâng chuan ui zetin ka mengchhuaka, ngei zet hian ka melh nghal hrep mai. Thawh phan pawh neilo in a samah chuan ka keh sak a, “Ka mang a nuam dâwn chauh a sin, engah nge khatia i rawn tiha, ka ui lutuk ka thlâwk dâwn chiah a sin” ti a ka phun hlak hlak avâng chuan a rawn nui haka.

“Tihpalh, mumang i neih ka ring lova, ruah han lai hian kan haw mai dâwn em ni? Naktûk riah luh kan tum chuan insiam sa angai dâwn a, car tlân theihna thleng kan keng anga, haw lamah pawh car in kan haw thei ang chu. Chutilo zawng kan bâwr lutuk palh ang” a tihchuan ka hnial lo viau.

Muangchang chuan tho chhuakin kan insiam zuia, Mawii te chu kan sâwm pheia, an ni pawh an lo in peih ve mai bawka. Haw pah chuan titi nak nakin kan feh kawng pawh a tawi leh riau tawh mai. Titi tui tak tak hi chuan chauh pawh a sawi theih meuh loh.

Fanghma kan hâwn bawk nên ka nu leh pa pawhin an ei châk viau in ka ring, kan pasal te pahnih erawhin kan tlûk sual ngawt an hlaua. Min vêng leh rûn tawh, kawngpui kan thlen phei chuan mi kaiin muangchang hian min kal puia, an zia inang dûn lutuk hian nuih a tiza zâwk.

Faka pawh vin hluk hluk leh Mawii runluih peih hle si kha an inneih tâkah chuan a duatin a ngaihsak leh hle sia, u Rinpuia pawh a thinchhe lo. Mahse a ṭawng tam ngailo a, a ṭawngkam hman chhun erawh a ngeiawm thei hle anih kha, tûnah erawh an ze letling ve ve an pu a, rin phâk bakin an zaidamin min duat thiam bawk.

An ni bula awm hi nuam ka ti a, thingtlanga awm hi ka inchhîr meuh lo.