DUHLAI ZORINPUIA CHAPTER 20

DUHLAI ZORINPUIA 

CHAPTER 20 

Inneih dâr rik rual chuan Mawii nên kan in ena, kan innuih ver ver mai. Ka pasal neih ni nilo mahsela u Rinpuia nên a innei tur ṭhiana kan ṭang tur chu ka phûr a, hetiang chiah hian innei ve thei ila ka ti a. Mahsela ka nu leh pa zia ka hria a, min rem tih sak mai ka ring lo, tin ka laka lem changa an fanu min tawrh tir duh kha ka haw bawk.

Kawr pink fual hnalh ka ha a, Mawii erawh kâwr var nalh taka ṭhui leh puan chei ngei a biha, a inhmeh hle bawk. Mizo thuam ngei a inbel a, mawi ka ti. Mahni hnam thuam hi chu khawiah pawh zahpui lo hian ha ila, hnamdang mahin an hnam thil an rauh em ema, sâp ho anga inneih kawrfual vâr kher hâk ngai ka tilo bawk.

Kan mithmul an siam bawk nên ka khap zâwng te hian a ri fuk fuk maiin ka hria, ka men pângngai pawhin ka mithmul ka hmu pha veka, ka mit a thip ṭhum bawk. Hrehawm ti viau mah ila ka inhmeh êm avângin ka tuar hrâm hrâm a ni, darthlalang hmaah chuan kan in en dûn leh zawka. 

Chutah u Rinpuia rawn thlengin a car a rawn keng a, hei pawh ka vawikhat chuanna tur. A lei tirh khân kan inṭhen avângin ka chuang hman lova, an rawn chei nalh viau mai. A coat suit hâk chuan a ti lang ṭha lehzuala, a pian nalh zet nên chuan a inrem thlap bawk.

Pindan aṭanga kan chhuah rual chuan min lo en vung vunga, min ti lâi lek lek bawk. “Ehem! In inneih ni a la ni ve lo, ka mawi em min en zâwk la” Mawii chuan rawn ti in a nui haka, u Rinpuia pawhin analh thu in a chhâng ve mai bawk.

Ka bulah rawn kal hnaiin “Mi mit i la dâwn tlat, ka duh miahlo a nia, mipa ho in an en nasa dawn lutuk tlat che” a rawn tihchuan nui hakin a âwm ah ka chûm data, “Keichuan nangmah bâk ka en dawn lo, kum thum chhûng pawha ka thluak luaha, min tibuai reng tu hi mipa hmêlṭha leh chhelo naranin an luahlan thei mai mai lovang che, kal vat ang u kan tlai lutuk dâwn” tiin keimah chu ka chhuak zuia, Mawii lahin a zâm thu kawng tluanin a sawia.

A kut leh a ke khur aṭang chuan a hriat hle bawk, keipawh ka pasal neihna tur nilo mahse ka zâm ve em em tho, mi an tam dawna khawpuma an sâwm bâkah khualkhua aṭang te pawha rawn kal an awm nual avângin mi kan tam dawn lutuk tlat, Biak in kan luh chuan mi an lo awm ṭan tawha, keini pawh maichâm hmaa ṭhutna tur an dah chhuahah chuan ṭhu ṭhapin Faka pawh alo nalh viau mai.

Mawii chu a thaw leh hak ṭhin a, keimah pawh min ti zâm zo vek tawh. Mipui an rawn lût khup khupa, an tam chak bawk nên hawi pawh ka hawi chhuak ngam tawh lo.

Ṭan hun hma chu kan ngawi ṭhap hlawma, a chânga mipui lam khuh tih loh chu thâwm a awm hek lo, Pastor a rawn din chhuah tâkah chuan ka thaw huai maia, inneihna hi zo zung zung se ka duh. Ka vawikhat tihna a ni bawk nên monu ber nilo mah ula ka zâm ve em em tho, thutak a ngai ropui bawk nên ka tih chi a nilo.

A tâwpah inneih thutiam chham tur chuan Mawii te chu an ding chhuak zuia, a chham zawi lutuk chuan ka nuih a tiza, a bulah ka ṭhut miau avângin a taksa khûr reng chu ka hmuh hmaih hek lo, u Rinpuia ka va en chu a lo ngawi ran a, zâm ang pawhin a awm ve lo. Faka chuan a chham sual ta ngeia, mipui lam an nui huk bawk.

Keipawh ni ila ka chham sual loh bik ka ring lo, zungbun te in bun tirin hmingte chu kan sign zuia, Bial zaipawlte an rawn zai zawh chuan banna pastor in a siam zuia, a ruk chuan ka thaw huai mai. Mipui hmaah kan din miau avângin mi in min en ṭhup bawk nên a nuam lo ka ti a, ka zak chu ka hawi kual duh vak lo.

Biak inchhûng aṭanga kan chhuah rualin thlalâk kan ṭan a, Sawma te ho pawh a vawikhat nân ka hmu ve ta hrâm e, Mawii te chuan lakpui tu an ngah bawk nên hmun dangah keini ho pawh chuan kan la a, u Rinpuia nên kan thlala dûn chu khual lam aṭanga rawn kal ṭhenkhat chuan inhmeh min tih thu leh innei ve mai tur te chuan min chhaih zuk zuk renga.

Khaw mite lahin min lo la hre ve vek bawk nên min chhaih reng lehnghala, ka nuih liam ringawt bawk. “I ke a kham tawh em?” ka bengbula u Rinpuia rawn phun sup chu enin ka bu nghata “Ka tha hi a zâwng ngawih ngawih mai, ṭhut mai mai ka châk tawh” tiin ka ke chu ka per dat data.

“Hmingek, tikhan in ru ve daih rawh u, kan hriat lohah ilo haw daih lehnghâla, kan lâwm lo viau a nia. Rawn lên kan tuma, i inluahna pa lukawlh deuh kan thlir kan thlir ringawt” Sawman a rawn tihchuan ka nui ve hak mai, an zia ala ngai reng a nih hmêl.

“In ngaihawm hle mai, ka rawn lêt leh tawh a lawm. Hei in ṭhianpa hi hau zâwk rawh u, a mah in a lawm min ṭhen hmasa, tûnah chuan min ṭhen tum pawh nise ka kalbo mai mai tawh dâwn lo” tiin u Rinpuia bânah chuan ka kuaha.

An ni pawh an ṭawng barh barh renga, ka awm lo chu lên na tur an lo hre ngai lo viau a nih hmela, tûnah erawh chuan bialnute pawh an lo nei ve tawha. Ka lawmpui takzet, an lêng hlen dâwn emaw ka ti tawh a nia.

In lama programme awm leh nên Biak inah pawh awm reilo in ṭhalai lam in tih hlimna te kan neia, thil pêk pawh an dawng nasa hle lehnghâl. Mipui inthlâk tura an haw tâkah chuan ruai ṭheh a hnai tawh nên hmun dangah thlala tu nen u Rinpuia chuan car khalhin a hma ah kan ṭhu duna.

U Rinpuia car vek hi mo hruai nân an hmang dâwn tih ka hria, khaw lu tlânga phûl hmunah chuan kalin Mawii te chuan thla an la zuia, kei erawh u Rinpuia nên an piah deuhah kan lo ṭhu dûn thung, kawrfual leh pheikhawk sâng bun reng kha ka ning bawk nên ka inthlâk daih kha a nia.

“An lawmpui awm tiraw? Mawii hi ka lawmpui takzet, Faka pawh ka lawmpui tho, mi ṭha tak an intawng dûn a, an hlim dâwn tih ka hria. An inzui rei ngaihtuahin buaina nei miahloa hetianga an awm thei hi an fakawm takzet, sum nilo hian hmangaihna hi a lo thlanawm fo a nih hi” tiin u Rinpuia dâr a bei chung chuan ka phun sap sapa.

A niin ka ṭawng chu ngawi reng hian a lo ngaithla thunga, Pathian thu pawhin sum tam tak ai hming ṭhat thlang turin min lo ti a, kan nunah erawh Pathian thu ni chiah lo mahse hming ṭhatna nilovin hmangaihna ka thlang thunga, ka inchhîr in ka ring lo.

Hausakna ûm tu chuan chân hun a nei leh ṭhin, hlimna leh zahawmna hi sum hmanga lei theih a nilova, tûn angah erawh ṭhenrual kan inzawn dân pawh sum ngah dân ah teh a ni tawha, ṭhian tur pawhin mi lar leh sum ngah kan bawr tuau tuau tawh chu a nih hi.

Sum hlimna a nilo ti ti ṭhin mahsela tam tak tân hi chuan lâr châk in kan hman hlela, mi lar sa hlir kan ṭhian leh biak ṭhat turah kan dah mai ṭhin bawk. Mi lar lo leh mi hriat hlawh lo chuan duhsak pawh an hlawh tawh meuhlo chu a nih hi.

“Sawtiang saw i duh chuan palai ka rawn tir tawh dâwn em ni?” a tihchuan ka nui haka, mahse a rûk erawh chuan ka châk takzet. “Lo tir mai la, ka nu leh pa ka zuk hrilha, Timothy-a awmdân leh ka ṭhiannu in a fa a pai thu ka sawi chuan an ngaihdan pawh a dang ve tawh mai thei a sin” tiin a bânah chuan ka kut ka rawlh lût zuia.

“Tirawh thla la ve ang, i number pawh ka duh, ka sim ka thlâk daih sia ka nei tawh miahlo” tiin ka phone chu phawrhin ka selfie pui zuia, a ni pawhin ka dârah lu rawn nghatin camera erawh a en duh leh miah tawhlo, hepa hi chu a hma aṭangin thlalâk pui dawn chuan camera hi a en duh ngai miahlova, mahse ka tilui ngai lêm lo thung.

Ka hmeh mawlh mawlh lai chuan ka nghâwngah a rawn fâwpa, ka la phu zawk zui chu a rawn nui haka.

“Lo nghal suh aw" tiin ka nui ve ta thoa, tûnah hian ka hlim takzet, hlimna ka neih lêt leh pawh ka rin tawh loh leh ka mipa hmangaih ka nei thei dâwn lo emaw ka tihkha tûnah chuan a pahnihin ka nunah an rawn awm leh mêk chu a ni si a.

“In hman tawh em? Chaw ei a hun lutuk tawha, in lamah miin min lo beisei tawh ang. Kan haw tawh mai dâwn em ni?” Mawii te ho rawn pheiin an tihchuan keini pawh kan tho zui ve vata, in kan thlen chuan mipui lam chuan chaw an lo ei mup mup tawha, keini pawh inchhûng lamah a hrana eiin kan nui leh dar dar ṭhin.

Sâwma leh Mama fiamthu thawh chu kan nuihpui nasa in an bialnu te an rawn hruai ve bawk nên nuam an ti ham ham hlawm viau mai.

Zânah pawh haw mai lovin Faka te inah kan inkâwm khâwm a, Mawii rawn lâwi tur an auh dân leh lawichal thil tih vêl sawiin kan nui leh dar dar ṭhin, keipawh u Rinpuia ka awm hlat san phal meuhlo, a bialnu nei anga a insawi pawh kha a lo nei lo tih ka hria a, hmeichhia bem tu erawh chu a phone ka check khân a nei nual tih ka hria.

A hmêlṭha a, star tu hi chu a nei reng mai dawn a nih hi. Hlim taka kan nuih lai chuan Timothy-a call a rawn lût a, ka status a u Rinpuia nên kan thlalâk ka up kha a hmu tawh a ni mahna, thu tâwp siampui ka duh bawk nên pâwnlam ka pan vata.

“Hello” ka tih rual chuan lehlam aṭanga a rawn thaw hak ri chu ka hre zuia “I status hi eng nge a awmzia? Khapa nên khân min kawp tih sawi miah duh” a rawn ti chu ka khi saka “U Tim engkim ka hre tawh, Nunui nau pai chenin, ka lakah ilo thupa. Tin, u Rinpuia nên kan inṭhen theih nâna ruahmanna siamtu pawh i ni tih ka hria a nia, tihian kan inkar chu a tâwp, ka rawn haw hunah ka nu leh pa pawh engkim ka hrilh ang, min rawn tibuai tawh lo la, Nunui kha nei ngei ang che. I fa a pai tawha, i mutpui ngam chu nei ngam ang che, mipa le lo ang maiin awm hauh suh” tiin phone chu ka dah zui ta daiha.

A rawn call lehna pawh ka la duh tawh lo, u Rinpuia thah an duh hial tih ka hriat hian ka thinrima, lo thi ta se min bumin keiin ka hmangaih that tu ka nei dâwn tihna a nia, ka nu leh pa pawh an thu ang diak diaka awm ka tum leh tawh lovang.

“Kan haw mai dâwn em ni? Ka nu leh pa in kan ina rawn riak turin an duh che a, chuan i châm chhûng chu kan inah awm turin an ti che a nih kha” u Rinpuia chuan ka hnunglam aṭangin min rawn kuaha, ka lo bu nghâl nghat mai.

“Mahse ka zak e, ka nu leh pa in an tihdan a vâng cheu khân ka hmachhawn hreh deuha, min ngai dik lo vek ang tih te pawh ka hlau” ka tihchuan a nui ringawta.

“Chutiangin an ti hauh lovang che, hman aṭang tawhin an monu awh em em kha i la ni renga, i la pângngai reng” tiin min kaiin a car ah chuan min luhpui zuia, thawmhnaw ka keng vak lo bawk nên Mawii te inah pêng zâwkin kan inzui chhuak leha.

An in kan thlen chuan ka zâm lutuk chu ka tawlh hrut hruta, u Rinpuian ka awm dân a hmuh chuan a nui haka, ka kutah kaiin an kawngkhâr chu a hawng zuia “Nu, nupui ka rawn ru” a tih phei chuan ka zak lutuk, ka kûn nghal daiha.

“Tikhan ti ṭhin suh, Hmingtei hi in pafa hian chhaih ziah suh u, Hmingte i dam maw? Inhmuh a khât hle mai, lo ṭhu rawh u” tiin a rawn ding chhuaka “Ka dam a lawm, nu in lo dam zâwk em?” nu ti a ka ko chu lâwm tih hriat takin a nui var vara, a hma khân nu Âsang tih a phal ngailoh avâng khân nu tiin ka ko tawp zel a, ngaiah ka neih tawh bawk nên nu tih loh chuan ka ko thiam tawh tlat lo.

“Kan dam ṭha a lawm, kha bawiha nên a room-ah i bungrua kha dah ve mai ru aw, amah hi ṭhutthlengah hian mu mai rawh se” a tihchuan ka lo hnial vat a “A hrehawm lutuk ang, ṭhutthleng a sei vak siloa, keimah ka lo mu ang” ka tihchuan min hnial viau nâng in ka tih ve tlat avâng chuan an pawm ta hrâma.

U Rinpuia room-a kan inzui luh rualin an ni pawh ka puan sin tur an lo dah tur thu chu an rawn sawia, kei erawh inbual ka duh bawk nên ka thawmhnaw phawrhin towel nên chuan bathroom lamah la lût zui thuaia.

Rei pawh ka inbual lêm lo, fur a in ṭan chho bawk nên thingtlâng chu a vawt sa bawk sia inbual rei chi pawh anilo.

Ka chhuah leh chuan u Rinpuia chu a khumah a lo ṭhu a, min lo en reng bawk nên ka lai lek lek mai. Kekawr bul leh kawr ko bah te lek ka ha bawk sia, ka awm a nuam chiahlo. Mutnaah thawmhnaw ka in bel hnem ngailoa, kekawrbul ka ha ṭhang bawk nên chutiang chuan ka inthuam leh sa tawp kha a nia.

Rawn ding chhuakin alamah min pawt hnaia, engmah sawi lovin min kuaha, keipawhin a zak hnuaia zen lûtin ka kuah lêt vata, a engkim hi ka ngai a ni. Ka bula a awm reng chung pawh hian ka la ngaia, ka thlakhlelhna a zual sauhin ka hre bawk.

“Ka hmangaih che, min lo nghah reng avâng pawhin ka hmangaih lehzual che” ti sepin a âwmah chuan ka nawr vang vanga, kan pahniha awmdunna hun ṭha kan la nei meuh lova, tûn hi kan intawn leh hnua a vawikhatna a ni.

Engkim hi mumang a ni leh mai ang tih ka hlau a, an bo leh mai ang tih ka hlau. “Mumang a nih chuan ka harh chhuak duh tawh lo, mumang ni tawh suh se. Ka harh rualin i bo daih zela, khatiang kha ka duhlo” ka ti sapa, a tello a ka hun hman liam hrehawm zia ka ngaihtuah lêt a, ka hlim avâng zâwkin mittui a rawn tling leh pam tawh.

“Ka thinlung i nih kha hre reng la, i in pên sana i kalbo hlen loh avângin ka hmangaih che a, ka hmangaih nawn fo ang che. Ka thinlung aṭang hian i pên bo leh ka phal leh tawh lovang” a rawn tihchuan ka nui saka, ka kuah nghet sauh sauh bawk.

Ka khabe ah rawn vuanin min kuai dâk a, kan mit chuan kan in en tawn ran bawk, rawn kûn hniam ruai ruaiin ka hmuiah chuan a rawn fâwp zuia. Ka chhâng lêt nghal vata, chutah duhthawh tial tialin a khumah chuan min delh mu a, dan tumna ka nei tawh lo. A tân ka engkim hi ka phala, kal san pawh ka duh tawhlo, a kiangah awm reng ka duh.

Ka taksa a a kut a chêt kual pawh chuan dang duh lo in ka dawh tawpa, mahse a mah zâwk chu rawn tâwpin min en vang vanga “Ka nupui ila nilo, ka nupui i nih hunah, nupui nihna min pêk a pasal nihna ka pêk hunah che kan tih tawh kha, ka hmangaih che. Ka tân ui i neilo tih ka hria a, ka hmangaih zual sauh che, kan inneih hma chuan ka insûm leh thei mai ang” tiin ka sîrah chuan rawn mu in min kuah zuia.

A danglam ve tho tih ka hria, mahse kei min hmangaih avângin a insûm thei chu ka ngaisang zâwk. A ni tel hian ka duh telh telh bawk “Keipawihin ka zahawmna min hum sak avâng hian ka hmangaih in ka zah zual sauh che ania aw, nang ka tawng che hi vanduai ka inti ngai lova, khawvêla hmeichhe vânnei ber ka ni, nangmah hlatin kalbo ṭhin mah ila ran a nei tu bula a kîr leh ṭhin ang hian i kiangah bawk ka rawn lêt leh ṭhin ang” tiin a kut chu ka hûm vang vanga.

“Ka va mu phei tawh ange aw, muttui” ti a kal mai ka tum chu a phal tlatlo, zawhna mitmenga ka en chu min rawn en in min kuah mu leh a. “Mut hran a ngailo, ka bulah riak rawh. Ka mumangah ka kuah ziah che a, ka ṭhan harh ruala ilo bo leh daih ṭhin khân min ti thinrim ṭhin, chuvang chuan engkim hi a tak a ni ngei tih min hriattir rawh, i bo leh daih dawn lo a ni tih pawh hriat ka duh, ka kiangah hian awm reng la, rauthla mai nilo in a tak ngei i ni tih ka hre duh” a rawn ti a.

Ka hnial duh ta bik lo, nu Âsangi te pawhin engmah an sawi leh dâwn lo tih ka hria. Bâkah eng ang pawhin min ngai dâwn pawh nise keipawhin he mipa hi a hlimthlâ chauh a nih tawh loh thu hriat ka duh, a lamah inherin ka kuaha, ka khan nghâl chial bawk.

“Ka haw daih khân min ngai ve em?” ka ti sepa, ka haw tih kha ka hrilh lova, ka hre châk tlat. “Um, ka ngai lutuk che a. Rawn zui che a, ka nupui ni tura hruai leh daih che kha ka duha, hetah i awm reng ka rin laia ilo bo ta daih si kha ka hamhaih bawk, nitin i rawn lêt leh hun nghâkin i inluah kha ka thlir ṭhin a, i zin thla leh mai mai a nih kha ka ring tlata. I kawngka inhawnga a lo awm leh hun nghâk in vawi engzat a tam nge saw kawngkhâr chhakah sawn dinga ka en pawh ka hre hek lo, ka inchhira, rawn zui che duh mah ila i mittui leh i na hmêl ka hmuh avâng khân ka beisei ngam tawh lo che, i reha, i rawn kîr tawh lo, kumhnih chhûng kha ka nghâk reng tho che” a tihchuan ka mittui a hnam sawk mai 

Keimah chauhin ka tuar emaw ka ti a, mahse a ni hian keiai a tuar nasa daih zâwk a nih hi. Ka haw leh ringa ka inluah a thlir tur leh nitin a beidawng tur anga ka ngaihtuah ringawt pawhin ka khawngaih lutuk, “Ka lo haw tawh a lawm, ka awmna tur dik takah ka rawn haw tawh. Min nghâk chhuak ta e, engtikah mah ka kalsan tawh lovang che, ka lo haw tawh a nia aw u Rinpui, i tân ka thinlung kawngkhâr hi ka khar leh tawh lovang, ka hmangaih che, min lo nghah reng avâng pawhin ka lâwm e” tiin ka ṭah nuih haka.

Ka hlim êm a ni, “Keipawhin ka haw hnu thleng khân ka ngai che a, kumhnih chhûng zawng kha chuan nangmah ngai rêng rêngin hun ka hmang ti ila a dik ang, thla ka en châng apiangin i thutiam kha ka hre chhuaka. Arsi ka hmuh apiangin i kiangah awm leh chakin duhthu ka sama, i hlimthlâ ka be ṭhin, i teddy bear min pêk pawh kha zantin ka mutpuia, ka hlat ngai lo, a chhan chu kha Teddy bear kha nangmahah ka chana, ka khawhar hnêm tu ber a nih kha, nangmah angin ka ngaia, ka kuah ṭhin” tiin ka phun sep sepa.

Ka hun hman liam tawh hrehawm zet kha ka ngaihtuah chhuaka, ka mittui chu a luang zung zung bawk. Duat taka min hruk sakin ka chalah te, ka mit leh hnârah chuan a rawn fâwp dan dana, “Kal bo tawh suh, ka ṭhan harh hunah pawh lo awm reng tawh ang che. A hma anga i thâmral leh mai kha ka phal tawh hauh lo ania” a tihchuan ka bu nghat nghata.

Kuah betin “Muhil tawh rawh, ka lo vêng ang che. Ka rauthla mai ni tawh lovin i kiangah ka awm reng tawh a nia aw” tiin a chalah chuan ka fawhsak vang vanga, tûnah chuan eng buaina pawh tâwk ila, ka hmangaih neih loh ai chuan pawi ka ti tawh lo.

Ka nunnawmna tur ai chuan hlim leh thlamuang taka ka dam chhûnga ka awm theihna tur ka hmangaih kiang hi ka thlang zâwk a, retheih duna. Dinhmun a ṭhat pawha kan pahnih ngeia engkim din chhoh ka duha, hausa sa hlim siloa inneih ai chuan ka hmangaih nên ngeia hausakna kawng zawh chhoh dun chu ka duh zâwk.

U Rinpuia pawh rei a meng lo, min kuah chung chuan a muhil zuia, a hmêl chu ka en reng thung. Mutthilh san ka phallo a ni ber mai, a bo leh daih ka hlaua, a vai hian ka suangtuahna mai ni a an thâmral leh ka hlau a ni.

A hnar, a hmui leh mit chu ka khawih kual dan dana, a engkim hi ka ngai vek. Thlamuang tih hriat tak hian a muhila, a thâwk dân chu a hahdam tih piah lam a ni. Ka pasal a nih hunah chuan a tân engkim ka ti tawh anga, a tân nupui ṭha ber nih ka tum ngei bawk ang, amah chauh a a awm ka phal dâwn hek lo.

“Heti em em hian ka hmangaih dâwn che tih hria ila chuan hei ai hma hian tawn duh che in ka khawvêl pawh ka kalsan mai tur. Engtin nge heti em em a ka hmangaih theih che, eng zûn zozai nge i neih bik le Zorinpui, ka tân thawnthu ang mai i ni. I hringnun tinin zirlai min pe a, i hlim in ka hlima, i ṭah in ka ṭahpui bawk che a, ka tân chuan ka hringnun thawnthu i nih hi, i phêk tin ah hian zir tur ka hmu a, i thawnthu ka hriat hnem poh/pauh(hei hi a dik zâwk lo sawi leh mai teh u) leh i zûnah ka uai nawn âwn âwn chu a nih hi” tiin ka nui ver vera.

A hmêlṭha zet te, a taksa min kuah bet mêk tute hi ka mutthilh san phallo. Khâng kum thum chhûng khân ka ngai êm a sin, ka tawrhna te, ka thlakhlelhna te kha tûnah hian mutthilh san atân chuan a uiawm lutuk tlat.

Pâwn lamah khuh kharh ri leh “Bawiha bulah a mu aniang, va tihbuai an ngailo. An in hmu lo rei tawha, an in ngai ve ang, i fapa nun nguai zia leh khawhar ṭhin zia i hria, Hmingtei a rawn lêt leh avânga a nun danglam chak zia i hmuh ve tho kha, mu rawh se. An inru nghal a nih pawhin a pawilo” ti tu chu pa Sena a ni tih ka hria, ka thaw huai mai.

Min huat ka ring kha a nia, mahse mi fel tak tih takah engkim ah min la hrethiam em em reng a nih hmêl. U Rinpuia chu ka en leh ṭhin, min ṭhen kha a duhthlanna ngei a nih ka rin avâng khân a tawrh ka ring lo kha a nia, mahsela ka hmuhte apiangin keimah avânga a tawrh nasat zia an la sawi zat zata, he mipa hi keimah avângin a lo na in min ngai takzet tih ka hriat hian ka lâwm a, ka khawngaih bawk.

“Keimah avângin i awmdân leh i tawrh dân zawng zawng hre lo mah ila tûn aṭang chuan ka kalsan tawh lovang che. Ka haw anga, chuta thil awmdân a zirin engkim huamin ka vuan tawh ang che” tûnah ka haw nghal lo a nihchuan ka chhûngte an thinrim ngei anga, ka mamawh thil a la awm vek bawk nên zu lâk hrim hrim ka duh.

“Ka lâwm e aw, ka phu loh zia che hre reng mah ila ka kalsan phal tawh dâwn lo che. I tân engkim ka huam ka tih kha hre reng rawh, ka engkim, ka nunna hial chân dâwn mah ila i tân chuan thih pawh pawi tihna ka neilo” tiin ka ṭawng hre thei tawh hleilo chu ka bia a.

Engtik laiin nge ka lo mutthilh ka hrelo, ka harh leh chuan khua a lo var uar tawha, u Rinpuia pawh a lo awm tawh lo.

Choka lamah bêl a ri rak raka, nu Âsangi a tho tawh a ni tih ka hre nghal. Ka chhuak mai ngam bawk silo, ka ṭhu chhuaka, khumah chuan ka ṭhu reng ringawta, u Rinpuia pawh chu khawiah nge a awm daih ni.

Keimah te in ka chhuak ngam dâwn lo tih te hriat ve tur ania, sual lutuk mai. Ka lo ṭhut ngawih reng lai chuan room kawngka chu rawn inhawng in u Rinpuia chu a rawn lang zuia, ka lo en kar bawk.

“I harh tawh maw” tiin ka bul ah chuan a rawn ṭhu zuia, ka bu nghat mai. Nui sukin ka biangah chuan a rawn piai a “A tak ngei i ni tawha, ka harh tirha ka taksa kuaha i lo muhîl sak sak ka hmuh khân a tak i ni tih ka nem nghet leh chiah, he ka tawnmang lasi hi a bo leh daih kha ka hlaua, ka chelh theih loh turin a thâmral leh mai ang tih hlau em emin ka rawn harha, ka bula ilo mu ka hmuh khân min tih hlim zia i hre kher lovang, ka neih chhun, ka hmeichhe hmangaih awm chhun i nih hi hre reng rawh” tiin ka chalah chuan a rawn tauh zui data.

Ka ringhlel lo, “Keipawhin ka mumang mai i ni leh ang tih ka hlau ve tho a lawm, ka intifai ve lawk ange, keimahin ka lo chhuak ngam lo a” ka tihchuan a nui huka. A ding nghal vut bawk “Zahna tur a awm hleinem, he inchhunga mite reng reng hi i chhûngte an ni tih hi hre tawp la, he inchhunga bungrua zawng zawng pawh hi i ta vek an nih hi, tirawh le chhuak ang hmiang” a tihchuan ka bag a hmai phihna leh ha nawhna vêl chu la zung zungin ka zui chhuaka.

Nu Âsangi pawhin min lo be lehnghâl bawrh bawrha, keipawh inti fai zung zungin rawngbawl chu ka va puia. U Rinpuia erawh pâwn lamah thing ek turin a chhuak leh tawh thung. Pa Sena erawh zingkarah a lêng a nih hmêl. 

“I pa hi chu he ti reng hi, zîngah hmuh tur a awm lo, chaw ei hunah a rawn haw a. Lên nuam a ti laklawha, a ṭhiante kan kual reng rengin a la vak peiha, a châng chuan ka ning ve teh a nia. Bawiha lah a ṭawng tam silo, i awm loh hnu aṭang phei kha chuan a zia a zawi leh zuala, biak ṭawng te kha a har leh zual. A khawhar lutuka, a mah a a tei ruk ruk ṭhin ka hmuh khân nu thinlung aṭang chuan a na duh a sin, tûnah erawh i rawn lêt tawha, ka fapa hi kalsan tawh lo turin ka ngên duh che” a tihchuan ka en vata.

“Nu keipawhin kalsan kha ka duh lo a sin, mahse amah khân engmah min hrilh duh lovin min kalsan tawp bawk nên keilahin ngaihtuah chiang lovin ka nu leh pa ka lo zuia, nu ka tihpalh aw. Ka chhûngte khân an rawn ṭawng khum cheu ka ring lova, an aiawhin ngaihdam ka dîl duh cheu a, ka nu leh pa hi chuan kan nunnawmna an duh luatah an thluak a kalsual deuhah lo ngaihsak mai rawh u aw” ka ti sapa.

A rawn nui nghal var var mai “Khawpui mi tân chuan thingtlâng mi chu iai an awl ve alawm, sawrkar hna kan nei bawk siloa. Kan kut hnathawh aṭanga sum kan lâkluh hi a nimaia, bawiha hi i hmangaih tak tak em?” a rawn ti chu zahna hun a ni tawh lo tih ka hria, bâkah an chhûngkua hian ka chhûngte tak tak angin ka ngai tawha, engmah zêp a ṭul na ka hre tawh lo.

“Um ka hmangaih takzet, chuvang a lawm tûn thleng pasal pawh ka la neih loh. Nu, tih tur a awm tawh vak lo a, u Rinpuia kha ka va pui ange aw” tiin ka kut chu ka silfai sawk sawka, a ni pawh chuan a lo aw ve maia, pâwnah chuan ka chhuak nghal vat bawk.

Tuala hreia thing lo ek mêk chu panin ka tui ûm ken chhuah chu ka pe zuia. “I tui a hâl ang, kha i thlan nasa tawh lutuk. Châwl phawt rawh” tiin a thing eh sa a dah khâwm chungah chuan ka ṭhu tawpa, a ni pawh rawn ṭhu ve in tui chu a in zui khawlh khawlha, “Nupui nih pawh i thiam dâwn e” a ti erawh ka ner nâng mai.

Reuh ṭhin hian, hetianga mi fiam zauh hi a chîng lehnghâl. “Naute enkawl dân thlengin ka thiam tawh mawle, tûnah chuan pasal tur chiah ka ngai tawh” ka ti ve zat chu a nui suka, hmalam a thlir vung vung chu hnaihin a biangah chuan ka chuk sak zauha.

Ni hnih ka châm leh hnuah haw tumin ka insiam mawlh mawlha, u Rinpuia pawh ka haw tur a huphurh nge ka bulah a awm renga. Ka nuih a tiza ru viau mai, ka thawmhnaw ka khung mawlh mawlh reng chu min en vung vunga.

“Haw tawh lo mai la ka duh, hetah ka bula i awm hian ka ngaihtuah lo deuh che a. Ka khung bet mai dawn che nge mawni?” tiin alamah chuan min pawt hnaia, ka nui ve hak mai. Ka haw tur a hreh ang hian keipawhin ka hreh ve tho, mahsela ka chhûngte biak a an ngaihdan hriat ka duha, chubâkah ka thil pawimawh zawng zawng Aizawl ah ka la dah bawk nên hetah ka awm hlen ringawt theilo.

“Kan inhmu leh vat dâwn a lawm, palai te pawh i rawn tir ang chu. Ka chhûngte ngaihdan kan hriat ve phawt angai a lawm, an la rem ti chuang lo a nihchuan min rawn hruai dâwn ania” ka ti ta hmaka. A ni pawh a thaw deuh huai mai.

“An phallo a nihchuan lo insiam tawp la, ka rawn hruai ang che” tiin ka samah chuan a chûl zauha, keipawh ka bu nghat nghat mai. A bula awm tluka thlakhlelh leh duh ka nei tawh lova, ka chhûngte pawh min hringa, min enkawl seilian tu an nihna ah ka la zah ve a nimai zâwk, chuti nilo se u Rinpuia nên ka laka an chêt dân avâng pawh khân ka ngai dam hauh lovang.

Ka bula min tawrhpui anga an awm lai pawh khân an ruahmanna avâng hian an lo hlim viau zâwk dawn chu a ni sia. Tûnah chuan min bum tawh hauh lo bawk ang, ka hmui chu tuai neuh neuhin a fâwp leh zauha.

“Nangmaha i inkhalh haw tur chu ka ngaihtuah hle mai che, fimkhur la thu thin ṭhawng lam hriat ka duh hauh lo a nia. I car khalh ka la hmu lova, ka ngaihtuah che tih hre reng rawh, i mutthluk dâwn ai chuan châwl mai ang che” a ti a, keipawh ka bu  nghat nghat a.

“Min ngaihtuah suh, ka rawn kal lam pawh khân keimahin ka rawn inkhalh thleng ṭhak tih i hriat kha, ngaihtuah ka ngai hauh lo ania aw. Ka khalh thiam lutuk, ka mutthluk loh nân min rawn be reng la a nimai” tiin ka nui haka, tûnlai chu an hlo thlawh âwl lai a ni bawk nên a feh ngai lova, bâkah Mawii te inneih boruak nên feh a la tum lo a niang.

“Aw le ka rawn be dâwn che a nia, mahse kawngtluanin kan in biak chuan eng nge kan sawi ang, min ning leh si ange” tiin ka kut chu a hmer vang vanga, sawi chhuak dawt lo mahse ka haw san tur hi a huphurh hle tih ka hria, keipawh ka ni tho.

Tûnah kan inkar a ṭha ve leh chauha, inṭhen hi a huphurh awm rêng lah taka. “Nu Âsang khawiah nge Zoi te hi? A haw dawn a ti sia, rawn thlah kan tum a nih hi” Mawii aw ri kan hriat rualin u Rinpuia nên chuan kan chhuak zui ta thuaia, a niin ka thawmhnaw dahna chu a rawn khai chhuak thunga.

Sâwma te ho pawh an lo awm veka, kan chhuah rual chuan min lo fiam leh zuk zuka “In ru nghal daih ula a ṭha mawle, hei tu emaw lah a huphurh tih a hriat. A zia a zawi ruih mai a lawm, i haw san leh chuan lunglêngin a awm leh reng dawn a nih hi” ti a Mama rawn ṭawng chu u Rinpuia chuan a lo khapa.

“Ka sawi dik rêng a lawm, ṭhiante pawh hre chang lo leh kâwm ṭha duh lo khawpin i lung a lêng leh anga, chuvâng chuan innei ve vat rawh u” an rawn tih zui leh tâkah chuan “Kan innei vat ang, min rawn thlah ula, a tlai tak tak hma in kan haw tawh ange, in ti lâwmawm lutuk a nia” tiin u Rinpuia chu ka ena.

“Ka thawmhnaw kha min lo ken leh mai” tiin pâwn lam chu ka pan zuia, an ni pawh chuan min rawn zui ve maia. Ka carah chuan in dah lût in kan in Chibai sap sapa, u Rinpuia ka hnaih rual chuan min kuah vang vangin ka chalah chuan a fâwpa, kalsan a hlau lutuk hi keipawhin kalsan ka hreha, ka awm a tinuam meuh lo.

“Fimkhur deuhin khalh la, tluang deuhin i kal dâwn ania aw” a rawn ti ri chuan min fan raih raiha. Haw san ngai lova a bula awm theih ka châk zual sauh bawk “Lo in enkawl ṭha la, kan inhmu leh vat dawn a nia, a hma ang chuan ka bo san leh tawh lovang che” ti a nui sen senin a biangah chuan ka fawh sak zauha.

Kan ṭhiante chu ka ngai pawimawh tawh lêm lo, engkim an hre vek tawh tho a. Hetiang mai mai chu anni pawhin engah an ngai lovang, “A nih tluang takin i haw dawn a nia aw, rawn kal leh vat la, helama i awm hun tur ka nghakhlel tawh tehmai a nia” Mawii chuan min rawn kuah vang vangin a ti a.

Keipawhin an bula awm ka thlahlel lutuk tlat, ka haw tur pawh hi ka hreh lutuk. Mahse kan hmalam hun atân a pawimawh bawk si, in vai liamin ka tlân chhuak zuia. Ka lan theih chhûng chu u Rinpuia chuan min thlir tih ka car darthlalang aṭang chuan ka hre thei “Dam takin lo awm la, kan inhmu leh vat dawn a nia” tiin ka phun sapa.

Zîng chaw ei lova chhuak ka ni bawk nên kawng kam restaurant ah chuan chaw eiin ka chhuak leh nghala, u Rinpuia nên pawh a khât tawkin kan in be renga. Min ngaihtuah lutuk chu keimah zâwk in ka hnêm leh ṭhin, fur lai a ni a Mizoram chu fur lai chuan lei min a tamin chhiat tâwk an awm reng bawk nên min ngaihtuahna chu a âwm ka tihpui a.

A khât tâwkin leimin avânga thi an awm reng bawk nên fur lai a zin chhuah hi chu an hlauhawm ve êm a, mahsela tûn chu ruah tui a la tla tam lutuk lo nên ka hlauthâwng lêm lo.

Aizawl ka thlen chuan khua a thim tawha, ka nu te chuan kawtkaiah min lo nghâk ve reng bawk. Zaninah hian engkim sawi fel sa ka duha, u Rinpuia te lamin palai rawn tirh vat an duh bawk nên zaninah sawi pui nghâl ila ka duh.

In chhûng kan luh chuan ka naute hawn tur a Fanghma mi in min rawn pêk chu phawrhin ka naute chu ka pe a, helam Fanghma nên a in ang lo bawk nên an ni pawh an lâwm viau mai.

“Nu ka pa nên khân ka be duh cheu a, a rem chuan in room lamah in bia ila” ka tihchuan ka pa nên chuan ka lam an rawn hawia. Ka thutak tih an hriat chuan an rawn tho chhuak ve maia.

“U Rinpuia nên inneih kan duh tawha” ka ti ta tawng a, a dang sawi mawi chiam dân tur pawh ka hre lo. “Enga in inzui leh tihna em ni?” ka nu in mak ti taka a rawn tihchuan ka bu nghal nghat.

“A theih loh, Timothy-a nên in innei dâwn kan tih tawh kha” ka nu bawk a ni. “Ka nei dâwn lo, ka ṭhiannu in a fa a pai tihte in hria em?” ka ti nghal faka, ka nu rawn ṭawng leh tum chu a tâwp deuh data.

“Enga! Nunui khân a fa a pai tihna em ni bawihi” ka pa zâwk in a rawn tihchuan ka bu nghat nghata, “Kan nih reng lai pawh khân an lo inzui char char zâwk a, kan vaiin min bum tihna a nih chu, keichuan neih ka tum hauh lo” ka ti leh hmiaha, hlau anga awm ka tum lêm lo a, zahlo taka biak pawh ka duh chuang lo.

“Anih Nunui chu Timothy-a chuan a nei duh tihna em ni?” ka nu bawk ani. “Tilo e, mahsela neih ka tum lo, ka ṭhiannu nun tih chhiat sak tu a ni a, tin engkim ka hre tawha. U Rinpuia hi ka kalsan tawh dâwn lo, a kiangah ka awm tlat tawh dâwn” ka tihchuan ka nu chu a rawn ding chhuak phata.

“I rawn haw hma khân Timothy-an engkim a sawi vek tawh, In innei ang kha thingtlangpa kha i neih ka phal dâwn hauh lo. Hre reng rawh, Timothy-an palai a rawn tir dâwn a, Minister fapa a ni a, kan chhûngkaw zahawmna tur a ni bawk, i nei ngei ang. Kha thingtlângpa avânga i ngaihtuahna danglam ta hi ka hai hauh lo a nia” a rawn ti chu lâwm lo zet hian ka nu chu ka ena.

“Ka nei lovang, sum ringawt chu em ni i ngaihtuah, u Rinpuia thah in tumna pawh kha a duh chuan jail-ah a khung thei cheu a sin. Mahse ka nu leh pa in nihna ah kei min ngaihtuah avângin engmah a sawi duh lo zâwk a nih kha, min bum tih hi ka hriat chhuah loh in ring em ni? Ka nu Minister fapa ka neih avânga i zahawmna tur chu enge, kei chuan zahawmna chu mihring rilru leh a awmdân ah zâwk ka teh ṭhin, zahawmna hi nihna leh hausakna hmanga lei theih a nilo, a thlir tu a zir zêl, hmeichhe dang laka fa nei tu chu ka nei hauh lovang, i fanu ka ni ve tak zet em?” tiin ka ṭawng chhuak ve ta fak faka.

Ka pa erawh a ngawi reng thung, a châng chuan a nêp ka ti ṭhin. Ka nu thu thu hian a awm ni berin ka hria, “Ngawi hmak rawh, ka châwm ka hrai len i nih hi ka thu chu i zawm mai tur a ni. A lo che pelh deuh pawh a ni ang, a niin neih a duhlo-a, sâwn man pêk a duh chuan i tân buaina tur a awm lo” ka nu chu mak ti leh thinrim bawk siin ka ena.

“Ka nu i hmuhsit em em mipa kha min hmangaihtu leh ka hmangaih a ni a sin. Chuan thingtlâng mi i ti maw? Ka pa i neih hma khân thingtlâng mi ve tho i nih kha, ka nei hauh lovang. Keichuan sum hmanga zahawmna lei ai chuan mizia nên a zahawmna hlawh chhuah chu ka duh zâwk, ka nei dâwn lo” ka biangah chuan a rawn bêng ta siaha.

“A tâwk Hlimpui, fate duh lo chung nawr luih lutuk tur a nilo, bawihi nang pawh ngaihtuah la. Rinpuia chungah pawh kan ti dik lo ngei e, mahse nu leh pa hian fate hma hun tur kan ngaihtuah tih hre reng rawh” an tihchuan ka chhâng peih tawh lo, chhuahsanin ka room lam chu ka pan nal nala.

“Rawn chhuah kha i tum ange, kha mipa kha i pan tawh hauh lovang” ka nu aw rawn chhuah rualin ka kawngka chu pâwn lam aṭanga chuan a rawn kalha, thinrim zet chuan ka thaw hak ringawt.

Ka phone chu phawrhin u Rinpuia chu ka call zuia “Aw duati” a rawn tih rual chuan ka mittui a hnam sawka, ka nu avânga ka thinrim lutuk vâng a ni pakhat. He mipa a hmuhsit em em mizia hi a hre chiang mawlh silo, an fanu in ka hmangaih a ni tih pawh an hre duh lova, keipawhin an ni ka ngaih pawimawh rengna tur chhan a awm tawh bik lo

“Min rawn hruai rawh” ka ti ta khawla, “An phal chuang lo a nimaw?” a rawn ti chu a aw chu a zuai ruiha, dân khatna ngeia inneih kha kan duh dân a ni ve a. Mahse tûnah chuan duhthlang lo theilo in min siam miaua, u Rinpuia ka neih theih nân chuan Pathian leh kohhran hma a inneih chu ka ngaihtuah loh mai a ngai ta a nih hi.

“Aw sum avângin an â zo tawh, an fanu zahawmna pawh sum avânga hralh an pawisa tawh lo. Chuvâng chuan min nei duh a, min hmangaih tak tak a nih chuan min rawn ru rawh, tûnah hian min kalh khum mêk” ka ti ta tawla.

Engmah ka pawisa tawh lo, Timothy-a neih ka duh loa, ka ṭhiannu chan ka ngaihtuah phei chuan ka tenin ka nu leh pa pawh ka haw bur tawh bawk. Hetiang tilo theilo hian min siama, keipawhin ka ngaihtuah rengna tur chhan ka hre bik lo.

“Aw le lo insiam la, naktûk zân zanlaiah ka rawn hruai ang che, duati nangmah i ṭha em? Keimah avângin i chhûngte i do angai ta a nimaw?” a rawn ti dam dupa, a aw ah chuan hrehawm a ti ve takzet tih ka hre thei.

Mahse a ni demna tur a awm lo, ka chhûngte avâng zâwk ani. “Nangmah vâng a nilo, an mahni vâng zâwk a lawm, an fanu min ngaihtuahna nei miahlova an chêt vâng a nih hi, ka lo nghâk reng ang che. Min ngaihtuah suh, rawn fimkhur la ka room tukverh aṭangin min hruai mai a ngai ang” ka tihchuan a rawn kal tur thu sawiin thil dang kan sawi duna.

Tûnah chuan engpawh huamin ka vuan tawh ang, ka kalsan phal tawh lova. Ka nu leh pa chuan eng pawh ti rawh se, u Rinpuia kalsan ka duh tawh lo.

Phone kan dah hnu chuan ka mamawh tur zawng zawng chu ka suitcase ah ka khung veka, ka thawmhnaw pawh bag hnihah ka khung a, a vai chuan ka keng duh lêm lo, ka mamawh zual pui tak tak a ni ka ken ni, ka insiam zawh chuan ka khum hnuaiah ka dah lût veka.

Ka nu in a hmuh chuan engmah ka ti leh thei dâwn lo tih ka hria, phur lo zet chuan ka mu zuia.

Chhun lam erawh min kalh khum êm bik lova, Timothy-a rawn kal chu ka haw hluah hluah mai. Phûr zeta ka nu leh pa bula a titi zat zat chu ka hmu ten zo vek tawh, Nunui ka ngaihtuaha ka khawngaih tak zet.

Hetiang hian a le lo ang tih ka ring pha lo, a lo inthup thiam hle tih ka hriat chuan ka tenna a zual, min biak phêt a tum erawh ka chhân duh miah loh avângin ka nu leh pa biak ṭhat ah a tlâk a, ka nu leh ka pa pawh tûnah chuan ka haw lo theilo, hetiang thil hre reng chunga sum leh Minister an nih na avânga an tlawn huam reng hi ka hua a.

Nu leh pa tih atân chuan a mawilo hle bawk “U i bialpa kha in rûk tir daih rawh, keichuan i lam ka ṭang tlat ania. Ka la tlangvâl ve dawn a lawm, kum tam a ngaih tawh loh hi, ka nu leh pa chu ngaihtuah an ngailo, sum it na leh milian nêna chhûngkhat nih an châk na in an mit a ti del zo tawh a nih saw, ngai pawimawh suh, i duhthlanna kha a pawimawh ber, helam chu ngaihtuah a ngailo, ka awm tawh hi, kha chen ka mamawh hunah che ilo awma, ka nu leh pa ka dil ngam loh pawhin nang chu engkim ka hrilhin ka dil ngam che a, ka puih lêt hun che a ni tawh, engpawh tila ka support zêl ang che” a tihchuan ka nuih saka.

“I tlangvâl ve tawh tih ka hria a lawm, ka awm loh pawhin Bawihtea leh Tluangtluanga hi lo enkawl tlat la, ka rawn be ziah ang che u” tiin a lu ah chuan ka tuai sak zauha. Ka nuih var var bawk, chaw eikham chuan ka room-ah ka lût ta daiha.

Ka nau te hi chuan engtik lai pawhin ka lam an ṭang a, u Rinpuia pawh an ni chuan an nêl viau bawk. Ka nu leh ka pa hetiang hian awm tlat lo sela chuan ka naute nên u Rinpuia pawh ka inhmuh tir tur ania, dama Pathian in rem a tih a, u Rinpuia nên kan innei tluang thei anihchuan u Rinpuia te khaw lamah zin tur in ka hruai chho ngei bawk ang.

Zân a nihchuan ka thawmhnaw chu tukverh bulah ka dah sa veka, chhûnglam aṭang chuan kawngka chu ka kalh lêt ve hmak bawk. An duhthlanna a ni tawha, kîr leh ka tum lo, u Rinpuian min hmangaih tih ka hria a, ka duh tâwk. A bâk engmah beisei dang ka neilo bawk.

Ka chhûngte mutthilh hun chu ka châng ran a, zân lai a nih chuan u Rinpuia message rawn riin ka call zuia, kan in awmna lai vêl ka hrilh chuan a rawn thlen vat tur thu a sawia, a hma khân kan vêng ka hrilh bawk nên Aizawla lehkha zir a lo awm char char ta chuan keiai mah in Aizawl khaw chhûng chu ala hre chiang zâwk in ka ring.

Darkar chanve hnu vêlah min rawn call leha, ka chhâng nghal vat. “I sawi naah khân ka awm tawha, step-ah hian em ni rawn chhuh tur” a tihchuan ka lo aw vata “Um rawn chhuk deuh la, dinglama in thumnaah khân kan awm, tukverh ka lo hawng anga ka thawmhnaw vêl hi lo hlâng thla mai rawh aw” tiin ka tho chhuak sawk sawka, tukverh chu ka hawng nghal bawk.

Ka hawi chhuak vauh vauh a, kan in be pah reng bawk nên a rawn thleng har lo. A rawn lan rual chuan ka bag chu hlan thla in a Teddy bear min pêk pawh chu ka hlân tel a, ka tukverh a sâng lo hlauh chu kan vânneih phah ka tilo theilo.

Ka chhuk tur chu ka kâwngah min lo chelhin tukverh chu ka khar leh thlapa, rukru an tam bawk nên pâwnlam aṭanga ka kalh lo tih an hriat bik ka ringlo. Leia min hlân thlâk rual chuan kan inkuah vang vanga “Kal ang hmiang, kan haw leh nghal a ngai dâwn si a, kan thleng har lutuk ange” tiin ka bag chu amah in a khai dun nawlha, step-ah chuan a chho nghal bawk.

Zui chho in Teddy bear chu ka pawm ran a, a tâwp nân kan in chu ka thlir vang vanga. “Nu, pa min ngaidam dawn a nia. Tilo theilo in min siam vâng a nih hi, ka ṭhiannu nun tichhia a, mutpui a a fa ngei pawh pawm theilo mipa hi keichuan ka ring zo loa, hmangaih lah ka hmangaih hek lo, ka tihpalh” ti leh sapin u Rinpuia chu ka zui chho a.

A ni pawhin ka chhak deuh aṭang min lo en reng tih ka hre thei, ka chhoh tâkah chuan thaw huai hian hma a hruai leha, kawngpui kan chhuah chhoh rualin a car pawh kan hmu nghâl zata. Ka car erawh nidangah kan in rem thei a nih chuan ka la leh mahna, ka bungrua ken ve chhun te chu dah lûtin min kuah leh vang vanga.

Aizawl chu zan reiah pawh a reh tak tak ngai lova, lir a tlân reng bawk nên kan in khalh chhuak thuaia, khawi emaw laiah chuan addict tih hriat tak leh ks vêl te chu hmuh tur an awm leh nawlh ṭhin. Thingtlâng lamah kha chuan hetiang hi hmuh tur an awm ngai lova, khawpui meuh chu mihring kan tam ang bawkin holam taka nung duh pawh kan tama, ṭhalai sual lama tlân pawh kan tam viau a, hei hi kan nun suat tu tam ber pawh a ni rêng a.

“I ṭha tiraw?” tiin u Rinpuia chuan ka kut a rawn hum vang vanga, ka bu nghat a, “Ka lawm e aw, min rawn hruai duh tak tak ka ring lova, ka nu leh pa hian ka rilru an tina takzet” tiin ka phun sapa. 

“Engah nge ka rawn hruai loh ang che? Ka hmangaih ber i ni a, i mangan hun apiangah ka hming lam la, ka rawn lang vat zel ang. Nangmah hlatin ka awm ngai dâwn lo tih hre reng rawh” a tihchuan ka ringhlel lo, kawngtluan chuan muhil bik lovin kan titi renga.

Mutna hun pawh a neilo tih ka hriat avângin keimahin car chu ka khalh chhâwk ve bawka. Min hnial duh biklo, mu tura ka tih miau avângin ka car khalh lai chuan a lo muhil ve maia. A chauh tur zia ka hriat avângin keipawh mutthluk ka tumlo, him taka kan thlen tluka pawimawh a awm hek lo.

Khua a var ṭan ah chuan khua kan lût ti tih der tawha, u Rinpuia pawh a rawn harh ta bawk. “Kan va thleng thui tawh ve, i car khalh chuan chu a hahdam thlâk hle mai, thiam thil ngah tak nupui ka nei dawna ka vânnei hle mai” tiin a nui suka, keipawh ka nui ve hak lo theilo.

“I tân chuan engkim ka zir thei, ka la zir zêl bawk ang. I tân nupui ṭha ber ka ni ang ka tih fo kha, ka tân pawh pasal ṭha ber i nih ka beisei” tiin amahin khalh a duh tâk tlatah chuan kan inthlâk leh te te a. An in kan thlen meuh chuan ka nute pawh an lo tho tawha, chutia kan lût chu min lo lâwm hle bawk.

Kan chau dâwn tih hria in room lamah mu turin min ti zuia, kei ni pawhin kan hnial lêm lo.

Room-ah chuan lût in in be tawh lêm lo chuan kan mu zuia, rei pawh ka meng theilo. Ka muhil zui ta vata.

“I pute ramah khân va awm phawt mai rawh u, an rawn ûmzui ngei ang che u. Chuvâng chuan an haw hma chu lo va awm ula, in chawhmeh tur lei sa vek ula, palai kan tirh hnan nghal mai dâwn a nia” ti a ṭawng ri ka hriat avâng chuan ka meng chhuak zui vata, u Rinpuia leh a pa an ni tih ka hre mai.

Tho chhuak vatin ka chhuak zuia “Hmingte ilo harh chuan muangchang lovin chhuak nghal mai rawh u, in chawhmeh tur chu nakinah in ṭhiante kan rawn pêk tir mai ang che u, miin hre tam rih lo se a ṭha ” pa Sena chuan a rawn ti zung zunga, ka bungrua pawh car ah dahin u Rinpuia nên chuan kan chhuak zui leh vata.

Keimah avânga an buai lutuk chu ka inthlahrun rualin u Rinpuia lo neih ka tum miau siloa, zahah pawh a lak theihloh.

Min hruaina tur lam pawh ka hre lêm lo, bungrua vêl a awm sa vek tih a sawi avâng erawhin ka thaw huai thunga. Reife ramhnuaia kan tlân hnuah, thing lian pui puiin a hual vêl kârah chuan huan tih hriat tak hi lo awm in thlai leh thei kûng chi hrang hrang hi a lo awma, a huala thing awm chu an lian bawk nên a hlauhawm ru riaul lehnghala.

Thlam lian ṭha zet lo awmah chuan in dah lutin u Rinpuia pawh chuan a thawmhnaw ka harh hma khân a lo dah lût hman veka, tûnah chuan ka hahdam huai mai.

Thlâma bungrua awm ang ang chuan kan chaw leh chawhmeh tlêm midang min rawn pêk hma a kan ei tura min ken tir chu siam zuiin ka che zui rak raka, u Rinpuia pawh in min lo pui ve bawk.

 Fur lai a ni bawka, ruah chu a rawn tla ṭan phuar phuar lehnghâl. Chaw eikham chuan tih tur dang awm heklo mutna phahin kan mu duna, ka pasal a ni tawha. Keipawhin engmah ui nei lovin ka engkim ka hlân a, inchhirna pawh ka nei chuang lo.

Ka tân a hmasa ber a ni a, a tân pawh a hmasa ber ka ni bawk. Hlim taka inkuah chial chung chuan kan muhil zuia, ruah a sur bawk nên mut a tui zual.

Tlai khaw thim dâwnah harh chauhin zînga kan rawngbawl sa chu ka chhuang lum leh tawpa. U Rinpuia erawh a la mutui viau thung, kai tho duh lo in ka che rak rak renga,bike thâwm ka hriat avâng chuan ka mengphawk nghâl hra mai.

Tute tak ni ang maw ti a pâwnlam ka thlir dâk dâk lai chuan bike rawn ding ri leh Sawma te aw ka hriat rualin ka thaw ta huaia, ka chhâwn nghal vat bawk.

An rawn luh rualin buhfai leh purun bâkah kan chawhmeh tur alu, dâl leh sangha ṭin tih vêl chu an rawn keng lût zung zunga. U Rinpuia silai an rawn keng tel erawh mak ka ti viau thung, enga tan tak rawn keng ang maw?

“Hmingeki nangmahni avâng hian kan hah teh a nia, milâr te kha i zuk kawm zuk zuk a. Khâng te kha in puih tir dâwn teh,an peih emaw chu” Sawman a rawn tihchuan ka nui haka.

“Milar, lar lutuk emaw in ti, chapo, biak har, lâr puite bâk loh be ṭha duh lo leh induh, sum duh bawk si lutuk bula awma, tlawn ngai rêng rêng a khawsak ka ngaihna hmuna awm ai chuan nang ni, lar ve lêm lo. Lar lo chung pawha midangte thliarna neiloa, tute pawh ang khata kâwm bawrh bawrh thei te bula awm hi a hahdamin a nuam fe zâwk, larna chuan rei a daihlo, khua a han reia, hmingchhiatna hlawh a awl bik, in hriat ve tho kha tihian lar lo te nun hi a nuamin a hahdam thlâk daih zawk” tiin ka nuih var vara.

An ni pawh an rawn nui ve hak mai“Kan haw lehnghâl mai ang, i nu leh pa te an rawn kal si a, fimkhur a ngai tlat. Zorina pawh nupui rûk a ngeih bawk a niang maw, a mutui emai” tiin an nui chhuak hak hak hlawma. Ka lâi ve em em ringawt, pâwnah va ding chhuakin ka mangṭha zuia, an liam rual chuan in chhûng lamah chuan ka lût lehnghâl vat bawk.

Emergency light an rawn ken chu chhiin rawng ka bawl zawh chuan u Rinpuia chu ka kai tho zuia, ka nu leh pa erawh ka ngaihtuah duh tawh lo. An duh duh dânin awm sela, kei erawh chuan ka pasal chiah hi ka ngai pawimawh tawh ang tiin ka intiam ru sauh sauh thung.

Mite min sawi dân tur pawh ka ngai pawimawh lêm lo, miin min sawi avânga mahni inthlâk a, ka mizia hloh khawpa inthlâk danglam tumna lah ka nei lova. Ka nihna, ka mizia keimah ngeiin ka duh dân taka ka siam hi, midang te, vawikhat pawh min puia min hmangaih ngai rêng rêng lo tu te avânga mahni nihna tibo khawpa chân ka duhlo, mi dangte an tumna ka neilova, an ni aia hniama in dah pawh ka duh heklo, ka nihna ah hian ka lâwm a ka lungawi bawk.

Mahni nihna hloh khawpa midangte thusawi kan ngaihpawimawh ṭhinna hian keimahni dik tak hliah bo in min ti chhe ṭhin. Eng kawngah pawh, keimah ka ṭha tâwk a ni tih in hrilh nawn fo a ṭul a, mi thiamna leh theihna ang te, an larna leh an dinhmun ang pawh kan thleng pha lo pawh ani ang, mahsela tluk tum ai chuan keimah ka nihna ang ngeia din chhuah ka duh zâwk, engkawngah pawh chu chu ka duhdân a ni.

“Duati” u Rinpuia min koh ri ka hriat avâng chuan a lam chu ka hawi vata. “Enge nita?” ka tihchuan a lu a thing nu nua “I in ngaihtuah nasa lutuka, ka ko che a nih kha, chaw kan eikham chuan kan mu leh mai dawn em ni? Nupui ka nei ta bawka, mut pawh a nuam riau“ a rawn tichu ka lei ka chhuah khum zauha.

“I rilru a hmul mai e a” ka ti chu a rawn nui hawk hawka, keipawh ka nui veleh tho. A bula ka awm thei chu ka lâwm takzet, a sawi ang chuan kan mu leh nghal daiha. A âwma bei chung chuan kan titi dûn melh melha, fa neih a châk viau a nih hmela, keipawhin ka châk tho, amah ang deuh deuh fa neih ka châk a ni.

Zîngah chuan vâk chhuakin huana Phuihnam vêl chu ka zawng kuala, ruah avângin hnim hnah a huh bawk nên ka thawmhnaw pawh a huh vek tawha, chutia hnim ka keu kat kat lai chuan eng ramsa nge pawh ka hrelo, a hmêl sihal ang deuh, dum ther thur hi ka keu chhuak nawlha, a lian phian lehnghâl.

Min hmuh rual chuan a rawn hrâm vaka, ka hlau bawk nên au chul chungin thlam lam pan chuan ka tlân zui dawr dawra, a ni pawhin min rawn ûm ve zel bawk nên u Rinpuia chu ka ko tuar tuar mai.

Silai nên a rawn tlân chhuak ka hmuh rual in ka tlân chak sauha, a bul ka thlen pawh chuan chu sa chuan min la ûm tho nia. U Rinpuia silai chu a puak zui dura, ka phut zawk rualin min ûmtu ramsa chu a thal nghâl tawpa.

Ṭi deuh dâk a ka en lai chuan “A thi tawh, engtia helaiah te lo awm nge maw a nih ni” tiin u Rinpuia chuan a pan hnaia, “Eng ramsa nge, Savawm atân chuan a tê bawk sia, Savawm note em ni?” ka tihchuan a rawn nui haka.

“Zamphu a nih hi, a sa kan ei dawn a nia. Kan buaipui ange” tiin a che zui zung zunga, ka lo pui ve vat bawk. 

“A van huai em em, min hlau miah lo mawle” ka tihlai chuan a ni erawhin a vun a lih tawh sa chu ramhnuai lamah chuan a va paiha.

“A puitling ṭhan kin tawh a nia, mihring an hlau hleinem. An huai zek ania, tirawh le thlam chhûngah kan chan tawh dawn a nia” a tihchuan phur zetin ka zui luta, a hming ka hriat tâkah chuan a hming chu Pasalṭha thawnthu aṭang te pawhin ka lo hre fo bawk nên a taka ka hmu chu nuam ka ti viau mai.

Chan zung zungin kan rêp a, a ṭhen chu tlai lam hmeh turin kan chhûm nghal bawk. Ni lêng chuan thlâmah chuan kan awm chawta, u Rinpuia pawhin ka hlau bawk nên min vah chhuahsan bik lo, chuti nilo se ram chhuakin a kal daih tawh ang.

Ni a liam ve zela, in lam aṭang chuan chanchin an rawn sawi ve zela, ka nu leh pa bulah pawh palai an tir a. A tâwpah chuan ka pa zâwk chuan palaite chu ṭha deuhin a lo chhâwn a, engkim an sawi tâkah chuan keini pawh khaw chhûngah kan haw zuia, khaw chhung ah kan inruk thu chu a khat leh vek tawh tih Mawii chuan min hrilha.

Ka rinsa kha a ni hrim hrim, a ṭhen lah mothar lâwm in an rawn chuangkai âwl lova, u Rinpuia pawhin lawmpuitu a ngah. A ṭhen te nên phei chuan kan lo innel sa nên kan nui ho dar dar renga, u Rinpuia ka nei chu ka inchhîr lo viau bawk 

Kan hringnunah khatiang khawp khân buaina tâwk nasa mah ila beidawng lo leh in phatsan mai lova kan in nghah tawnna chuan tûnah chuan rah ṭha chhuahin kan chhûngte pawh an nem ve ta a, ka nu erawh ka la be thei lo fo a, keipawhin biak luih ka tum ta bik lo.

Heti khawpa sum a duh chu nakinah a la inhmuh chhuah ve erawh ka ring tlat thung.

“Ka nupui duhtak, min lo ngai em?” ka pasal rawn haw ka lo hmuak chu min hmuh rual chuan min kuah leh chat tawha, a ippui hlân thlâk sak pah chuan ka ngaihzia ka hrilh ve sapa, room-a kan inzui luh rual chuan “U Rinpui thil hrilh tur che ka neia, i mit chhing teh” tiin a mit chu ka chhin tir a.

Thu âwih tak chuan ka tih ang angin a awm ve bawk “Meng tawh rawh le” tiin a hmaah ka test kid chu ka tilang zuia, a en deuh vung vung mai. “I khua a sik em ni?” a rawn ti dût chu hahthlâk ti zet hian ka chek hlaka.

“Khawsik tehna a nih loh hi, nau ka pai i hria em i fa ka pai“ ka tih tâkah chuan a nui ta suka, chutah min rawn kuahin ka chalah chuan a fâwp zui vang vanga.

“Ka hmangaih che” he thu hi nitin sawi mahse englai pawhin ka ngaithla ning ngai lovang, nau ka pai ta bawk nên ka hlima, ka chhûngte pawh engtikah emaw he ka fa lo piang tur hian a la hruai khâwm leh ngei ka beisei bawk. Ka nunah Zorinpuia ka tawng hi ka lâwm a, mipa hmangaihna ngah leh zaidam em em ka tawng hi ka vânnei pawh ka in ti.

Hmangaihna in min ti ṭap a, min ṭhen darh ṭhin. Hmangaihna in min tlûk tira, min tung ding leh ṭhin bawk, chu hmangaihna vêk chuan min hruai khâwm leh in hlimna min pe leh ta, ka DUHLAI ZORINPUIA kha a ni miaua.

A TÂWP TA