DUHLAI ZORINPUIA CHAPTER 19

DUHLAI ZORINPUIA 

CHAPTER 19

Engmah an sawi dang ka hriat tawh loh avâng chuan ka room lam chu ka pan a, u Rinpuia em ni an sawi kha? Vau an tih khân ka rilru a luah ngar bawk. Engkim ka hriat chian a ngai tih ka hria a, Mawii te an in sawi fel thei a nih chuan hmuh ngei ka tum ang, min be duh lo pawh nise ka biak ngei a ngai tih ka hre bawk.

Zorinpuia khân a duhthu in min kalsan nge keiin ka hriat loh lamah hian thil thleng a awm zâwk? Ka ngaihtuahna a buai mapa, ka nu leh pa awmdân hian ka ngaih an ti ṭha miah lo bawk, u Rinpuia ka ngaihtuaha. Nunzuali avângin nge min kalsan anga, thildang vâng zâwk? Ka hnêna a thusawi ṭhinte chu ka ngaihtuah lêt a, thu zuk leh hni hne chi a nilo tih chiang takin ka hre bawk.

Engpawh chu nise thil thleng a awm a nih chuan ka la hrechhuak em em ang tiin mut tum chuan ka insiam rem zui sat sata.

“Zo kan innei ngei dawn a nia aw, ka nu leh pa pawhin an rem ti a, thlaleh ni 15 khi an rêl nghal law law a nihchu, keipawh ka rawn zin har lovang. Mo kawr chu min lo ngaihtuah pui ngei ngei rawh aw, ka nu nên kan rawn kal dawn a” zînga Mawii call ka lâk rual chuan a rawn ti lâng lâng a, ka nui nghal saka.

Ka lâwm pui lutuk tlat “Tehreng mai in lo kal chuan kan inah in rawn thleng dâwn ania, lo sawi la ka lo hmuak ang che u. Hmun dangah thlen ka phal dâwn lo a nia, bâkah mo ṭhian a ka ṭan dâwn rau rau chuan kan pahnihin thawmhnaw te kan en fel ang chu, Faka teh a lawm ve em?” ka tihchuan a rawn nui zui hak haka.

“Chiang ele, nizânah a rawn phûl hlut a lawm, ka beisei aiin keipawhin ka hmangaih tawh. Ka lakah a dawhtheiin min duat êm êm a, Mka lakah kha chuan danglam tak a ni. Khapa avâng khân mipa hi ka hmuh mawi leh pawh ka ring lo kha a nia, mahse hei ka lo ring sual chhia va a ni, Lalfakzuala hian min thlâk danglam hlawk maiin ka hria, nizân phei chu a hlim lutuk kha a tlai a tlaia rawn lên a tuma, ka haua a rawn lêng lo hrâm a lawm” a tihchuan ka nui haka.

Faka chu rin ang tak takin a rintlâk a, a mizia a nghet hle pawhin ka ring. Kumthum an in zui na turah an innei ve dawn ta hial chu a nia, an vânnei hle hian ka hria. In hauh châng nei ve ṭhin mahse vawikhat mah an inṭhen lova, Mawii pawhin mak a tih fo thu a rawn sawi ṭhin a nih kha, mipa dawhthei tak a niin ka ring bawk.

Chuti nilo se chuan hetiang dinhmun an thlen theih ka ringlo, hmeichhia chu kan pangchanga, kan dil chhût hle bawk. Mipa dawhthei tak tân lo chuan hmeichhe hi chu enkawl kan har ve renga, u Rinpuia nên pawh khân la tluang ila chuan tûnah hian nupa niin fa kan nei tawh hial mai thei tihte chu ka ngaihtuaha, hepa ngaihtuah lo hian awm har ka ti tawh ni ber hian ka hria.

Room aṭanga ka chhuah lai chuan ka naute ho chu an lo infiam rak leh chûl tawha, ka nau chiah pawh tlangvâl hre ve ṭan e tilo hian a la puitling thei tak tak lo a nih ber hi, ka pa chuan min lo en rûn a “Zorinpuia te khuaah kal i tum em ni?” a rawn ti a, a aw chu a dam dap nângin a lâwm chiah lo tih a hriat.

“Aw ka ṭhiannu in pasal a nei dawna, mo ṭhianah ka ṭang dâwn a, an mahni pawhin nakinah an rawn la bia ang che u. He lamah rawn zin an tum bawka” ka tihchuan a bula ṭhu turin min ti zuia, engvanga u Rinpuia te khuaa ka kal pawh chu rem ti lo viau nge an nih tih ka hre lova, an rem tilo bur tih sawi lo mahsela an awm dân hian a ti chiang viauin ka hria.

A bulah ṭhu in ka ngawi renga, “I ṭhiannu chuan tunge a neih dâwn a?” a rawn ti zuia “Faka, an khuaa ka thawh lai pawha rawn lêng ve ṭhin ania. An fel lutuk, mi an pui nasa a sin, an mahni vângin khua kha nuam ka tih phaha, chuvâng ania an ni pawimawh ni ah tel ve ka duh chhan, ka ṭhiante an ni a, kal ngei pawh ka duh” ka tih leh lai chuan ka nu zâwk chu a lo ṭawng hlak hlaka.

“A ngai kher lo mawle, nangmah lo pawh ṭhiante chu an ngah lutuk ang, han kal tawh lo tawp la ka duha, khatiang mipa ṭhing leh thingtlâng mimâwl lutuk lehnghâl in khatiang khawp khân a hliam che a nia, i han kal anga i rilru a lo tibuai leh ang tihte hi a nia ka hlauh ni“ a rawn ti zui hlak hlaka.

Ka nu ngaihdan hi chu a mak ṭhin, thingtlâng mi ve tho a ni tih inhre miah lo in hetiang hian a ṭawng fo chu ania. “Nu nangpawh thingtlâng mi tho i ni a ni lo'm ni? Tinge i hmuhsit viau zel a, bâkah an mâwl hauh lo a nia, i ti mak ṭhin emai, mi hi an awmna hmun avânga hmuhsit ngawt tur an nilo, khawpui mi aia hausa an tam lutuk” ka lo ti chu rawn ṭawng leh a tuma, ka pa chuan a lo khap a vangin a ngawi leh riha.

A awmdanah erawh a la lungawi lo viau tih ka hre theia, engah mah ka ngai duh lêm lo. Khawpuia kan awm avângin tribal kan nihna a reh phah lova, thingtlâng a mite pawh hetah rawn awm se khawpui mi an nimaia, mihring kan niin Mizo vek kan ni a, tumah in hmusit tur chuang kan awm lo.

Thingtlangah an awm a nimaia, keini khawpuia kan awma, in a tam vâng chauha lo in lâk len vak leh lehkhathiam bik riaua inhriat ang te hi a lehkha zirsan loh thlâk ka ti daih zâwk bawk.

“Aw le i kal dâwn a nia, ṭhiante hi an pawimawh a lawm. Nangpawh pasal a chhia a ṭha te ila neih ve angai dawna, ṭhiante mamawh lai hi chuan in kalsan loh tur, nakinah ila mamawh lêt ve ang” ka pa in a rawn tih tâkah chuan ka thaw huaia, a ni hi chu ka nu ai pawhin a chang chuan ka nêl zawka, ṭawngkam vinin min be ve ngai heklo.

“Ka lâwm e pa, ni e i sawi ang chiahin nakinah ka la mamawh ve leh theia, ka mamawh hun chauha ka hriat bik khân a ṭha nâng tiraw? Vawiin chu kan car hi ka keng dâwn a nia aw, ka khalh khât bawk nên keimaha lên ve te pawh ka duh“ ka tizuia, ka pa chuan a lo rem ti ve mai bawk.

Aizawlah ka haw hnu hian ka lêng khât bawk nên lên khaw thawna ka rilru hahdam taka awm tir tluka châk ka neilo. Ka duty hun a ni lêm lo bawka, reilote bâk va lan ka tum lo. 

“U kan zirtirtupa in maw min lo biak rawh a ti che a” ka nau chu ka pa nên ka en vata, a lo thutak zia ka hmuh chuan ka nuih a za deuh hlek a, a khât tâwk hian min star tu hi an rawn sawi leh nawlh zêl a, ka vah chhuah tam loh nên hian min lo hmu tu hi an awm ṭhin nge mawni.

“A hmêlṭha em?” ka tihchuan a ner nâng a “A hmêl chu a ṭha mahse duh miah suh, a sual si mi hrem s peih lutuk, a duh che a nih chuan min hrem tawh lo turin ka ti ang” a ti chu ka pa nên in enin kan nui hak haka, a taksa lian uaih tawh si hian a rilru erawh a la naupanga, kan naupang pahnih ai mahin a pangchang zâwk bawk.

“Chu min duh tih pawh i hriat loh chu, bâkah i u chuan bialpa ka neih hi” ka tih lai chuan “A ho emaia, u Timothy chu ka duh miah lo. Hmanniah pawh i ṭhiannu nên khân an inzui ka hmu” a tihchuan ka en nghal vata, keipawhin nimin khân a office lam aṭanga Nunui rawn chhuak kha ka hmu a, mahse rinhlehna ka neih lêm loh avâng khan Timothy-a pawh engmah ka zâwt lo a nih kha.

An ni pahnih hi ka hriat loh hian an lo inkâwm nge, chutiang han ngaihtuah dâwn ila an inhre miah bawk siloa. Nge ni a keimah avângin an lo in hre zâwk ni ang tiin ka ngaihtuah neuh neuha, Nunui lahin min be ṭha duh tawh lova, engvanga u Timothy-a nên chuan inhmu nge an nih ang?

“Andy i hmu chiang a maw? I hmuh sual te a ni ange” ka tih lai chuan ka nu pawh a rawn inrawlh vata, “Hmu sual lo, dawr pakhat aṭanga an rawn chhuak dûn ka school bangin ka hmu a lawm, engah nge dâwt ka sawi ang. Keichu hmana min hmuh mipa kha ka duh ber, la hmu ve lo mah ila a hmangaih hmêl ber che” a rawn tihchuan ka nu chuan a lo vin ṭhat a.

U Rinpuia a sawina tih ka hria, ka nau hian beisei loh takin u Rinpuia kha la hmu hauh silovin a ngaina tlata, vawihnih vêl chu kan in ngaihzâwn lai khân an in be ve tawha. U Rinpuia pawh khân a tuina lam sawi pui a thiam bawk nên Andy-an a ngaina viau pawh hi a âwm ve tho mai, u Rinpuia kha chuan mi hneh theihna riau a nei tlata.

“Khatiang i u sawi pui reng reng suh, i u duh lovin hmeichhe dang a pan san tawh a nih kha, a hmeichhe pan ber lah a thi tawh an ti lehnghala. I u hian han hnim hnaih tum leh vaih rawh se ka duh hauh lo ania, khatiang tak khân a tlâwm tawh che a, i la ngaidam duh a nihchuan ka lâwm lo khawp ang, a sawi pawh sawi suh u. Inneihna buaipui tumin kan rawn kala, khatiang khawp khân kan fanu damlo pawh a kalsan duh ania“ a ti zui hlak hlaka.

U Rinpuia chungah a la lâwm lo hle tih ka hriat avâng chuan engmah ka sawi ve duh lêm lo, mahsela an thusawi ka hriat aṭang khân u Rinpuia chu thil zawh fiaha, hmuh leh ngei chu ka duh. Min hmu duh angem ka hrelova, keichuan tûn thleng ka la ngai reng bawk.

Chutih rual erawhin Timothy-a leh Nunui chungchâng chu ka zawh fiah ngei an ngai ang, engvanga in hmu nge an nih? An inhmelhriat lo tih chiang takin ka hria a, in hmelhriattir tur pawhin Nunui hian min be duh tawh lo miaua, ka nau in a hmuh dun chuan dâwt a nih ka ring lo bawk.

“Ka kal phawt dâwn ania, a nih u” tiin car chahbi chu la in pâwn lam ka pan zuia, ṭhenawm nu chuan th chah duh min nei leh tawh a nih ka ring, a lo awm leh vâng tawha. “Enge nita nu Hriat” ti a ka biak chuan a rawn kal hnai vata.

“I rawn haw hma angem ka hre duha, i rawn haw hma dâwn chuan damdawiinah i kal tho dawn bawk nên i pa Dampuia damdawi tur hi rawn hawn pahela ka tia, nghei chi a ni siloa. A hriselna pan zia chu i hriat kha, natna ben vawn neih chuan damdawi hi a hek lutuka” inthlahrungt taka a rawn tihchuan ka nuih var vara.

“Khawi pawisa chu min lo pe la, kal kawina tur ka neia, chutih lohah chuan tihtur dang ka nei rihlo, ka rawn hâwn dâwn a nia. A damdawi hming kha lo sawi bawk la” ka tih tâkah chuan lâwm tih hriat tak hian an mamawh ang ang chu rawn sawiin pawisa min pe zuia.

Ka nghâl vatin car ah chuan ka ṭhu luta, hei hi chu keima ta tura ka nu leh pa min lei a ni a, hlawh ka lo khâwl ve bawk nên ka hlawh a ka lei a ni zâwk maha, ka nu leh pa chuan tlêm te chu an tum ve thunga.

Ka inkhalh chhuak a, rin ang ngeiin jamah ka tâng leh tawh, khawpui awm ka ninna ber chu khawiah pawh kal dawn ila lir tam lutuk leh jama tân ngai reng hi ka ning ṭhin, thingtlangah kha chuan zalên takin kan duhna hmunah a hun ah chat kan thleng theia, helaiah erawh chuan tum aia tlaiah thlen a awl bawk nên ka ning lek lek ṭhin, hei vâng pawh hi a niang vah chhuah vêl ka peihloa, ṭhiante'n lên min rawn sâwm pawhin ka duh ngai lo.

Damdawiin ka thlen rual chuan ka ṭhiannu chu bia in  Timothy hmuh ka duh avânga kal ka ni bawk nên a office lam chu ka pana, kalkawnga damlo ka hmuh ho chu be zêlin ka wish kual sap sapa, mi fel tak tak an ni bawka damlo ni chunga hlim hmêl an pu sâng reng thei hi an fakawm ka ti a, a ṭhen te phei chu damchhuah beisei awm tawh lo tak tak te an ni hlawma, mahse vui hmêl an pu ngai lova, ka ngaisang zâwk. 

Cancer te hi ṭawng huat thu lo ah nei ve ta ila hlim hmêl pu reng chunga ka awm theih ka ring lo, Timothy-a office ka thlen rual chuan a pâwn lam aṭangin ka kik karh karha, nizân lamah a duty bawk nên a chau viau chuan ka ring.

In chhûng lam aṭanga min rawn chhân rual chuan muangchang hian ka lût a, chaira lo ṭhu a min rawn hmuh rual chuan a rawn tho chhuak vata “Hmingte ilo thleng tawn a nimaw? Tinge vawiin te chu i châwl dâwn a ni lo'm ni?” a rawn ti vata, ka bula a rawn din rualin min kuahin a rawn phun zui sapa.

Amah hi chu a sual lo mawle, mahse thil zawh fiah ngei ka duha, Nunui nên an chungchâng chu hriat ngei ka duh avângin ka namsawn deuh data.

“Nimin khân Nunui nên in inhmu tiraw?” ka tihchuan a mitmeng danglam zawk chu ka hmuh hmaih lo, a hlauhthâwn hmêlin a hmêl buai nak chuan rin dân min neih thiam tir mai bawk.

“Thudik min hrilh rawh, dâwt ka ngainat loh zia i hriat kha“ ka tih leh tâkah chuan a rawn nui saka, ka kutah chuan vuanin a thaw zui ham ham bawk. “A rawn in entir ṭhin a, tûnlai chu a dam sam lova chuvang mawle, thil dang a awm lo. I ṭhiannu kha a ni tiraw?” a rawn tihchuan ka bu nghata, a hmêlah chuan engmah a lang leh tawh lo.

“A hma pawhin ka nauin a lo hmu tawh cheu a, enge in inkârah awm? Ka ṭhian a ni tih kha ka hrilh miah lo che a, nge nang ni hi ka awm loh chhûng in in lo in hre zâwk?” ka tileh faka, dâwt min hrilh a nih chuan ka lâwm lo viau bawk ang.

Chutah min rawn kuah leh te te in “Ka hmu a lawm, mahse i ṭhiannu a ni tih ka hriatna erawh a la reilo, a mah khân a sawia, ka damlo a nihna angin a natna erawh ka sawi chhuak thiang lo tih i hria in ka ring” tisupin ka chalah chuan a rawn fâwp a, kei erawh ka awm sawn vat thung, a ni pawh hi ka ring tawh lo.

Ka nu leh pa thusawi leh heti khawpa an in pawh dânah hian a tu amah hi ka ring hlawl lo. 

“Duati” a rawn ti chu ka inhum ruha “Khatiang khân min ko suh ka tih kha” ka ti fak chu a nui suka, Zorinpuia min koh dân a ni a. A mah chiah khân ngaihzâwng ang chuan min ko thiang bawk, u Timothy-a pawh ka bialpa nimahse Zorinpuia min koh dân kher a min koh ka duh lo. Amah pawh ka hrilh tawh hiala, hetianga a tilui ziah hi ka ngaithei viau lo bawk.

“Tun thleng ila hre reng chu a nih hi tiraw? Inneih vat ka duh ka tih tawh kha, palai rawn tirh ka duh tawha, i rem tih ngei ka beisei” a tihchuan a mah chu ka en a, alo thutak leh ran tawh. Engvanga inneih pawh hi hmanhmawh viau nge maw a nih ni, kumkhat êm pawh kan la in zui lova, a zia ka hriat chian loh a niin hrechiang hmasa lova inneihna pawm tawp ka tum hauh lo bawk, a ma bulah pawh chiang takin ka ngaihdan ka sawi khân a pawm avânga nihpui chauh pawh ka ni.

Hetiang hian a rawn ti leh ang tih rin ngaihna pawh ka hrelo “Ka sawi tawh kha, tûnah chuan ka la in peih lo tih, chubâkah ka ṭhiante an innei dâwn a, chu chu rawn hrilh mai che ka tum a nia. An khuaah ka kal a ngai dâwn a, hmakarah emaw ka ṭhiannu a rawn chhuk dâwn a. Chawlh dîl sa che ka tum mai a nia” ka tihchuan a chal a chuar deuh nâng a.

A phal leh ngei erawh ka ring a, chawlh ka dîl khât zia pawh a hria ang. An damdawi in mah nise amah ngei pawh a damlo tawp te a nih loh chuan a châwl ngai lova, a hna a tui chilh hle rêng bawka.

“Engtia rei nge i châm dâwn? Ka rawn kal ve dawn em ni?” tiin min hnaih leh hruka, ka dâr tawn tawnah chuan rawn vuanin ṭhutthlengah chuan min ṭhut tir zuia, keipawhin ka hnial lêm lo, ka ke a kham hma bawk nên ṭhu chunga titi pawh a nuam deuhin ka ring.

“Ka awm rei lovang, rawn kal kher pawh a ngai chuanglo, hmelhriat i nei ve dawn chuang lova, bâkah helamah i awm loh chuan i nu leh pa lungte kan ti awi lo hlauh ange, nitin damlo an rawn lût ve reng bawk si a, nang ber i awm loh chuan an buai lutuk ang. Châm rei pawh ka tum lêm lova, ka rawn haw leh vatin ka ring” ka ti sapa, ka châm rei dâwn leh dâwn loh erawh ka la chiang lova, u Rinpuia hmuh ngei ka duh bawk nên chu erawh Timothy-a hriattîr ka tum lo bur thung.

A thik ngei anga, ka nu leh pa bula a sawi chuan engkim a buai leh dâwn tih ka hria, “Rawn tel ve ka châk viau a sin, i ṭhiante chu hmelhriat te pawh ka duh ve a, helam chu an ngaihtuah awm loh ang” a rawn ti leh chu ka nui ta haka.

“Lungngai suh, hetah an rawn kal chuan ka hmelhriattir em em ang che, mahse ka sawi tawh ang hian damlo ten an mamawh che. Kei chu nurse mai ka nia, ka nurse pui an awm ṭeuh bawka, nang erawh Doctor damlote in nghahna ber i ni bawk“ ka tih leh tâkah chuan a hre thiam ve ta hrama.

Haw hma ka duh thu sawiin kalsan ka tum lai chuan min rawn man bet leh te te a, ka hmuiah a rawn fawh rual chuan ka mit ka khap fak fak ringawt. Ngaiah ka neih theiloa, u Rinpuia min fawh erawh kha chuan ka taksa pumin ka danglama, Timothy-a min fawh-na erawh feel har ka ti a, a châng chuan alakah hian ka nunrawng mah mahin ka hre ṭhin bawk.

Ka lakah a ṭha in min ngaihtuah êm êm reng laiin ka thinlung tak a ka hnaih theilo hi alakah ka inthlahrun phah bawk nên a rûk chuan hrehawm ka ti a, ka ṭhen leh mai dawn nge ti a ngaihtuah châng lah ka ngah. Mahsela keimaha a rinna a nghah zia leh min ngaihsakna te hian min ti tim leh ṭhin a, tûn thleng ka la tuar ve zêl chu a nia.

“A nih ka kal phawt aw” tiin a biangah chuan fawh sak ve zeuhin ka chhuahsan zuia, damdawiin piaha dâwrah chuan nu Hriati damdawi min chah ho chu leiin ka car chuan khawpawn lam ka pan zuia, Aizawl khawchhûng lan theih na chinah chuan dingin car aṭang chuan ka chhuak zuia.

Ka car din tirna piah deuha khâm deuh reuh chu panin lungpui lo in pharh duaiah chuan ka ṭhu zuia, ka intur leh ei tur ken chu phawrhin ka ei nghal mawlh mawlha, thlanglam ruam aṭanga thlifim rawn thaw heuh heuh chuan min rawn chhêm in ka mit ka chhing vang vanga.

Heti hian thingtlanga awm leh ang mai khân ka in ngai ṭhin, a boruak vawt raihte. Lo kan feh chânga khawlum lutuk laka min tidai tura zo thlifîm rawn thaw heuh heuh te kha ka feel leh ṭhin. Kawngpui aṭanga ka pên avângin motor rawn tlân hriat tur leh hmuh tur a awm lêm lova.

Sava hrâm chiah chiah leh thli thaw ri bâk hriattur a awm hek lo, ka phone chu phawrhin a thlalâk kan pahniha kan lâk duh tûn thlenga delete ka phalloh avânga ka la kawl reng chu ka en vang vanga, a hmêlṭha zet ka en leh tâkah chuan ka ngaih zia ka hre thar leh bawk.

“I dam ṭha ang tiraw? Min ngai ve angem le? Keichuan mi thar ka lâk luh pawhin nangmah nên ka tehkhin zela, tûn thleng rilru pe thei lovin ka awm phaha, min ngaihtuah ve hauh siloa tiraw? Ka ngai lutuk che, i dam ṭha angem le? Mawii thusawi kha dâwt mai a nih ka ring bik lova, min la hre ve reng a ni tiraw?” tiin thlalaka nui sâng chu ka en renga.

A enga mah ka la theihnghilh lova, kum thum hial a liam tawh chung pawhin engkim nimin a mi ang mai khân ka la hrechiang veka, chu chu hmalam pan min harsat tir tu a ni bawk.

Lungpui chungah chuan mu thla in vân lam thiang kûk mai chu ka thlir chho vang vanga, thlawhna rawn thlâwk leh ṭhin te chu enin khitiang khian thlâwk thei ila an khaw chunga thlâwk kual vêlin ka en thei nimai tur.

Ka mit hup chuan ka in ngaihtuah neuh neuha, ka nu leh pa thusawi kha hre tam lo mah ila fiah vat ka duh bawk. Mawii a rawn kal a nih chuan u Rinpuia chanchin zawh chian ngei ka duh, an khua a ka kal dawn a nihchuan engkim hriat hmasaka biak ngei ka tum bawk.

Reife chu ka mu a, dar 2 vêlah ka haw ta hrama, phurna ka nei miahlo lehnghâl, nu Hriati te damdawi chu pe kawiin inah chuan ka lût zuia, ka nu leh pa pawh vawiin chu hna lam aṭangin an rawn haw hma a nih hmêl.

“Hetah lo ṭhu teh” ka nu in a rawn tihchuan muangchangin ka pana, an bula ka ṭhut thlâk rual chuan ka nu zâwk chuan “Timothy-an palai rawn tirh a duh tawha, i pa nên kan ngaihtuaha, nula naupang zawk zawk i ni tawh bik lova, innei mai ula kan tia, i ṭhiante inneih zawh lamah palai chu an rawn kal mai dawn nge?” ka nu in a tihchuan phâwk zetin ka melha.

Chutiang thu min hrilh duh vâng chu em ni vawiinah hian an rawn haw hma ang? Timothy kha ka hrilh chiang viau si a “Nu, pasal neih ka la hmanhmawh lo, bâkah kan la in hrechiang tâwk lo bawk. Pasal thlan fimkhur tur khân min ti fo a ni lo'm ni? Engvanga tûnah chutiang thut thut a ruahmanna siam nge maw in nih le?” ka ti a, ka aw chu a dam viau nângin a rûk tak chuan ka lâwm lo takzet.

Timothy hi ka duh lo bur chu ka tilo, mahsela hmangaih miahloh han neih nghal ngawt chu nakinah kan buai leh ka hlau. Tûn ang laiah nupa inṭhen leh uire tam tak hi chu hmangaihna vâng niloa kan inneih avâng hi a ni tlângpuia, kan hmangaih tak tak leh tak tak loh hriat loh laia lo inneih kha ka duhdân a nilo bawk.

“A nghâk rei tawh che, kha mipa ai kha chuan a lêt in a ṭha zâwk. A ni pawh kha neih i tum tho kha, Timothy-a te chu kan hriatchian lehnghâl, i nun a nuam dâwn tih te hre ve la, hei chen a nghâk tawh che a, a lakah pawh a inthlahrun awm” ka nu bawk chuan a rawn ti leha.

Engvanga Timothy-a pawh hi duh em em nge maw an nih le, a pa Minister a nih vâng nge an hausakna ṭawmpui an duh vâng ni ang? Hei vâng hi a nih ka ring bur bawk, ka nu hi mak ka ti lek lek ṭhin. Thingtlang mi ve tho a ni a, hetiang khawpa hausak a châk mai hi ka hrethiam theilo.

“Nu sum hi hlimna a ni ber lo, retheite pawh an in hmangaih phawt chuan chhûngkua a hlim ṭhin. Pathian tello phei chuan hausakna chu engmah lo mai ani, chhûngkaw hlimna chu nupa in hmangaihna ah a in nghat, nangpawh hian ka pa hi sum vangin em ni i neih?” ka ti erawh ka biang a ri nghal sawka.

“I va zak theilo em em ve, ṭha taka thil sawi pui tum lai che a chutianga min tih? I pa nên hian kan in hmangaih avânga innei kan ni, i hmalam hun, rethei a i awm loh nân kan ngaihtuah che a, khatiang zâwng khân maw ilo ngaiha? Engang fanu nge maw i nih le” a ti chu ngaithla peih tawh lovin ka ding chhuaka.

“Tun dinhmunah chuan pasal neih tumna ka la neilo” ti leh hmakin ka room lam chu ka pan nghal hlawk hlawka, ka nu min benna avâng chuan ka rilru a na hle bawk. An sum it lutuk ka sawi tumna mai a ni si a, khatiang teh vaka a rawn lâk nat ka ring heklo, tûnah pawh mi harsa kan nilova, engvanga nunnawmna hi ngaipawimawh em em nge maw an nih ni.

Ka khumah chuan bawk thlawpin u Rinpuia Teddy bear bawk chu ka kuah leh tawha, ka enkawl uluk bawka. Tlêmin a hmul te pawr tawh mahse a la thar ṭha viau thung, duhdah taka dah ka phallova, ka naute khawih lah ka phal hek lo.

“Ka ngai che Zorinpui, tûnah pawh nangmah avâng bawkin pasal neih ka la hnial fana, keima tâna ṭha tur pawh ngaihtuah lêk lo a i thlavang ka la hauh fan leh i duhloh zawnga awm ka la hlau em em te hi ka huat phah che a, mahse ka ngai tho che” tisepin ka hmai chuan ka nawr zui ṭawk a, amah tak tak kha ka bulah awm sela engkim sawi puia, engkim a ṭhat leh vek thu min hrilh turin ka la beisei fana, a ni erawh tûn thleng a la reh chu a ni sia.

Mawii pawh sawi ang ngeiin a rawn zina, kan inhmu chu kan in kuah nghâl thlawp mai. Amah leh a nu chauh an nih avângin kan in lamah ka hruai zuia, kalkawngah pawh a ṭawng duh leh barh barh viau mai.

“Awi i vun a êng lehzuala, i hmêlṭha zual sâwt. Mo ṭhian a i ṭan chuan ka lang chul vek dâwn a nih hi” a ti chu kan nui dar dara, “Tinge Faka te nên in rawn kal loh? An ni pawh bazar an ngai âwm tho sia” ka tihchuan “Nia Champhai lamah an bazar dâwn a nihkha, u Rinpuia ṭhianah hman a tuma, heta rawn kal a duh lo tlata” a tihchuan ka ngawi deuh vang vanga.

Tûn thleng min pehhêl dân ala zawng chu a thanat thlâk viau nângin biak ngei ka duha, engkim hre hmasa lo chuan pasal ka nei hek lovang.

Kan in kan thlen chuan ka nu chuan a lo be bawrh bawrha, kei erawh kan inkar a ṭhat vak lêm loh avângin Mawii chu ka room lamah ka hruai lût zui daiha, u Rinpuia chungchâng zawh ka duh vâng a ni pakhat bawk nên khumah chuan ka nam ṭhu rawk rawka.

“A dam ṭha em? Tinge hetah i rawn hruai luih loh, biak ka duh a sin“ ka ti chu a dâr a sân aka. “Hmuh che a duh rih loh thu a sawi tlata, tûnlai chu ka sawi angin a zia a dang lutuk, a ṭawng tlêm sa nân a ṭawng tlêm lehzual. A hlim hmêl phei chu hmuh tur a vâng, enteh in inkar hi siamṭhat in tum tawh lo em ni? Bialpa i nei tihchu ka hre thoa, mahse u Rinpuia awm dân hi maw a ngai che ni berin ka hria, tûn thla ringawt ah pawh i inluah bula a ding ka hmu ngun lutuk” a tihchuan za lo tak hian ka ṭhen saka.

“Keipawh hian biak ka duh a sin, chuvang a nia hetah ka hruai luh che. In khuaa ka rawn kal pawhin min pehhêl a tum ngei ka ringa, mahse nangmahin rem min ruat pui la ka duh, thu zawh ngei ka duha. Chu erawh engkim ka hriat chian hunah ka hrilh ang che” ka tihchuan min zâwt lui bik lo.

Nithum châmin inneihnia a hâk tur bâkah keipawhin zân mut kawr tur ka lei saka, a lâwm thiam viau lehnghâl. Ka chhoh ve vat tur thu ka sawi hnuah an haw chhova, an awm loh rual chuan kan inchhûng boruak chu a reh leh tlawk tlawk tawha, pasal nei tura min tih aṭang khân kan in be ṭha meuh tawh lo bawk.

Thla a rawn thara, keipawh ka kalsan tâk Mawii te khaw lam pan chuan ka tlân a, zaninah man hlan a nih tawh dâwn avângin zîngah ka chhuaka, thim hma a thlen hman loh ka hlau a ni ber mai. Hma laiah chhoh duh viau mah ila hun ka neih loh bâkah kan chhûngkaw lam boruak nên ka duh ang pawhin ka chho hma theilo kha a nia.

Dâr thum vêlah chuan khua ka luta, engkim chu a lo la ngai deuh veka, in erawh a lo pun belh nual tawh thung. Kum thum liamtaa ka chhuahsan tâk khuaah ngei ka luh leh tâkah chuan engkim chu an rawn thar uar uara, ka mittui chu a rawn luang leh pap mai. 

Tûnah hian ka biak ngei a ngai bawk, ka haw leh chuan kan in hmu mai mai tawh dâwn lo tih ka hria.

Mawii te chhûng chuan min lo lâwm a, an inah chuan ṭhenrual ṭha lo awmkhâwm luih luih tawhin tualah mei an lo chhêm thluaha, chaw eikhâwm an tum a nih hmêl.

“I rawn thleng tluang thei maw? Zanah an rawn kal dâwna, biak ngei i tum dawn a nia” a tihchuan ka bu nghata, ka lungphu rang ta dat dat chu engvang nge tih ka hre chiang viau mai. Ka phûr rualin huphurh rûkna ka neia, a hma ang bawk khân min be ṭha duh lovin a awm leh mai angem? Tih te chen chuan ka ngaihtuaha, engpawh chu nise engkim a sawi hma chuan ka be lui tur a ni ti a in fuih sauh sauhin Mawiin te in chhûngah chuan ka lût zui ta thuaia.

“An rawn thleng dâwn a nia, Mawii rawn chhuak rawh u” Mawii nu rawn au lâng lâng rual chuan Mawii chuan a aw a thian kharha “Chu le! An rawn lût dâwn, kal vat ang” tiin a room aṭang chuan min chhuahpuia, chutih lai chuan kawngka ah Faka te chhûngkua lam pawh chu an rawn lût ve mêk bawk.

Ka en renga, ka lungphu pawh a rang leh tawhin kawngka lam ngawt chu ka thlira, chutah kum thum liamtaa ka hmangaih, tûn thlenga ka la theihnghilh theih loh a ngei kha a hnung berah chuan a rawn luta, ka taksa chu a che nghal dawt mai. Engmah a la danglam lo, amah ka Zorinpuia ngei kha ala ni, tûnah hian ka ngaih em em mipa chu ka hmaah a dinga, a mitmeng fiah kak chu keimahah a fu nghal ngar bawk.

Ka zama, ka taksa a khûr dar dar bawk. Tûnah hian ka mipa hmangaih, mittui nêna ka kalsan tak kha ka hmaah a ding mêk a ni.

“Nakinah man hlan zawhah biak tum rawh aw” Mawii chu ka bengbulah a phun sar sara, naktûk inneihni a ni anga, ka nu leh pa in châm rei an phallo nên ka haw leh vat a ngai dawna, chuvâng chuan zanin tluka u Rinpuia biakna hun ṭha hi a awm dâwn lo tih ka hria.

Puitling ho an inbiak lai leh thusawi lai chuan kan ngawi kara, u Rinpuia ka en leh ṭhina, ani erawhin min en duh hauh lova. A khât tâwk a a phone a en leh ṭhin chuan ka ngaih a ti ṭha lo, ngaihzâwng a nei tawh em ni ang? A phone a en a a nui leh suk ṭhin chuan min rinhlelh tira, ka zâwt dawt ngam silo.

A rûk chuan ka awm a nuam lo hle ringawt tawh, kum thum a liam tawha. Nunzuali a thi tawh bawk nên ngaihzâwng dang a nei tawh te pawh aniang, kei ngei pawhin bialpa ka nei tawh tak chu ania, thâwk la ham hamin ka hawisawn zui daiha.

Min ngaihtuah ve loh zia ka hriat hian biak loh tawp zâwk tur em ni tih chu ka ngaihtuaha, man in hlan zawh ah chuan a chhuak daiha. Khawiah nge a kal tih pawh ka hre ve lo, ka hmui ka pet a, a rûk chuan ka ṭah a chhuak takzet. Khatiang khawp khân kan lo in bia in min hmangaih thu te pawh a sawi ve ṭhin a nih kha, engtin nge ka awm ve lo ang maia a awm theih zâwk?

“Inhnungah a awm, tumah midang an awm lo. I duh chuan va kal rawh, tûn hi a remchâng ber ang” ka bula Mawii rawn phun sar sar avâng chuan ka harh chhuak zawka, amah ka en chu kal vat tur chuan minl mitmeia, keipawhin biak ngei ka duh bawk nên midang min ngaihven loh lai chuan ka chhuak ta vata.

Pâwn ka chhuah rual chuan a thim khapa, a awmna ka hmuh theih mai loh avâng chuan ka mit chhing vang vangin ka mengchhuak leh riai riaia, tlêm chuan mit pawh a fiah ta deuh. Chutah huan lam pan chuan muangchangin ka kal pheia, hla play ri ka hriat avâng chuan ka ding deuh dat mai.

A hla play lah chuan min tidanglam leh veka, K. Hminga hla KA DAMCHHUNG ṬAH HLA tih a tâwp châng kha a lo play meka, va pawh mai lo chuan a hla chu ka ngaihthlâ a ‘Ka tihtur kha lo ti ila, eng nge maw kan nih ang le? Ka sawi tûr kha sawi ila, eng nge maw min thlen ang le? He nun ai hian kha nun kha kan nei mahna, ṭah mittui pumpelhin kan hlim mahna, mahse kan suangtuahna leh beiseina kan natpui ta, tûnah zawng nunhlui leh nang ngaih hi damchhunga ka ṭah hla an ni tawh ang’ tihchu.

Ka tâwp data, a hla chuan ka mittui a ti hnam leh ṭiam ṭiam tawha, ṭahbelh nih ka duh ngailo. Mahse he mipa avâng hian hote ah pawh ka mittui a tla ta fo chu a nih hi, ka hnaih zela. Tûnah chuan a ruangâm pawh chiang takin ka hmu thei tawh, theihai hnuai ṭhutna an siamah chuan lo ṭhu in a mi in aṭanga êng rawn in kâp chhuak chuan a hmêl hmai chu a ti lang ruaka.

Vanlam hawiin a dâk vang vang bawk, ka pan hnai a ni tih pawh hrelo ang mai chuan a awma. Meizial chu a hip leh vang vang ṭhin a, a awm dân chu ka en reng thung.

Koh mai ka tuma, mahse ka ka aṭang engmah ka sawi theilo. Kum thum chhûng khân nitin hmuh ka châk a, tûnah ka hmaah a ding ta chêng a, ka ko hreh tlat bawk si.

Hnaih leh hretin ka infuih a, “U Rinpui” ka ti ta sapa,  ka aw chhuah rual chuan a taksa chu rawn chêt ruai ruaiin ka lam a rawn hawi ta chata, min hmuh rual chuan a ṭhut dân siam rem deuhin a hla play lai chu a ti tâwp zuia. Kei erawh in amah ngawt chu ka en thung.

“Nangmah maw? Eng nge i rawn tih dâwn a?” a rawn ti ringawta, eng nge tise min tih ni. In ti huaisen luiin a hmaah chuan ka va dinga “Ilo danglam tawh hle mai” ka ti chu a nui ri suka, “I dam maw?” ka thusawi hrelo ang mai chuan a rawn ti leha, min ti â zo mai dawn.

Min tihnat zia ngaihtuah lovin tûn hunah pawh ka la be hmasa ania, he mihringpa hian tinge min ngaihven duh ngai miah loh le. “Dam e, i dam zâwk maw?” aw ki pângngai tak chuan tiin a bulah chuan ka ṭhu thla a, a taksa ka tawh leh tâkah chuan ka danglam leh tawh, he pangtilum ka thlakhlelh ṭhin zia kha ka ngaihtuah lêt uar uara, a âwm nghenga ka thlamuan ṭhin zia te pawh ka ngaihtuah lêt bawk.

“Ka dam a lawm, mo ṭhian ah i ṭang dâwn tih ka lo hre miahlova, nang teh pasal neih i tum hnai tawh em? Leh si a, bialpa Doctor i nei tak e” a tihchuan ka melh haw a, engtin nge a hriat? Mawii takngial bulah pawh bialpa ka neih thu hrilh mah ila Doctor a nih thu ka hrilh hauh lo.

Zorinpuia hian hriat a nei em ni? “Engtin nge i hriat? Chuan nang ngaihzâwng i nei ve tawh em? Nunzuali chungchâng kha ka lo hria a, a pawi hle mai” a bula ka awm tâkah chuan sawi tura ka ngaihtuah lâwk te kha an bo veka, ka rilrua awm pawh ka sawi chhuak thei lo chu ka inhau ru mawlh mawlh mai.

“Ka hriatna a pawimawh hleinem, nei ve e. A la naupang deuha” a tihchuan ka thin chu a rawn thip veng venga, bialnu a neih loh thu a min chhân kha ka ringa, mahse alo nei tak tak tih ka hriatna chuan min tina leh tlat tawha, he mipa lo hi hmangaih thei ila chuan ka nat reng hi a ngai lo tur.

“A nih chu” ka ti hniam raiha, a ni erawh engmah sawi lovin a ding chhuaka “Ka haw phawt ange, Faka chu ilo hrilh mai dawn ania“ ti a kal mai a tum chu “Ka ngai lutuk che” ka tih rual chuan a ding data, kal mai lo chuan vân lam hawi chuan a dâk chho a, eng emaw sawi hian a phun sup bawk.

A ṭawng zawih êm avângin enge a sawi erawh ka hre thei mai lo.

“Min theihnghilh tawh tak tak em ni u Rinpui” ka tihrualin ka lam a rawn hawia, kei erawh ka mittui luang chu ka hru zauh thung. “Nitin ka ngai che a, theihnghilh che tumin mipa dang ka nunah lâk luh ka tuma, mahse ka thei silo, engkimah nangmah ka hre chhuak che a, mahse hetiang chauh hian maw min lo chhâwn a, min lo hmangaih ve tak tak lo tiraw?” tiin ka ding chhuaka.

Engmah ala sawi lo chuan min ti thinrim viau bawk nên a hmaah tak chuan ka va dinga “Tunah hian ka nu leh pa in pasal nei turin min ti tih i hria em? Chu ti chung chuan helaiah nang ka hmuh duh che avângin an phallo chung ka rawn kal luia, i insawifiahna ngaihthlâk ka la duh fan a sin, hetiang chiah hian em ni min lo chhâwn dâwn? I nunrawng takzet” tiin ka en chhoa.

“Ka lawmpui a che, pasal ṭha tak i nei tur chu keiai fe chuan a enkawl ṭha thei zâwk ang che. I nu leh pa pawhin an duh zâwng tak mâkpa an nei dâwn a nih chu” a rawn ti leh tawpa, eng emaw tal a sawi ka beisei kha a nia, mahse ka duh ang chhânna ka dawng lo chuan min tina.

“Tinge min dang dâwn lovem ni? Kum thum chhûngin khatiang chiah kha maw min hrilh tur i neiha? Ka nu leh pa avânga min kalsan i ni em ka hre duh, ka thu hriat rûk hi a dik em? Min chhâng rawh, engvanga min kalsan nge i nih? Nge min hmangaih tak tak lo zâwk?” ka ti chhuak ta ṭhat a, ka insûm thei tawhlo.

Engmah sawi lova kal leh a tum chu mittui nên ka ena “Ka la hmangaih reng che a sin, u Rinpui khâng hun kan hman dun laia i thusawi te kha dâwt vek an ni tihna a lo nimaw? Kei chuan tûn thleng ka la hmangaih che a, mualpho leh zah pawh dâwn lovin ka rawn pan leh che a, i hmangaih chu ka lo ni tak tak lo a nimaw? I kal hma erawhin hei hria la ka duh, kei hian tûn thleng ka la hmangaih che a, ka bialpa ngei pawh ngaihsak lo khawpin nangmah avâng hian ka buai mek a sin, khatiang thu chiah kha em ni min hrilh tur i neih? Min hmuh hian min ngai ve miah lo em ni? Keichuan ka ngai lutuk che hi ka thi dâwn hialin ka hria a sin“ tiin ka kûn a.

Inher a kal ka tum lai chuan min pawt lêt dawrhin ka biang tawn tawnah chuan min vuanin ka hmuiah chuan a rawn fâwp a, ka mittui chu ka biangah a luang ngiai ngiai thung.

He hmui, he kut leh taksa hi engtianga rei nge ka khawih a ka tawh loh tâk pawh ka hre lo, mahse ka thlakhlelh ngawih ngawih taksa ka tawh leh tâkah chuan ka lungphu a rawn rang leh dat data, ka hahdam sawng sawng bawk.

“Mi â nu, he hmunah hian lo kal tawh lo la ka duh a sin, i hria em? Ka phu tawh lo che, na taka ka hliam chung che pawhin min la hmangaih a maw? Mâwl viau suh, midang nei la hlim takin awm zâwk rawh, kan pahnih inkar chu tihian tawp rawh se, i hria em? I tân ka tling tawh lo, na takin ka hliam tawh che a, i hmaa inlan ngam tur pawh ka ni hek lo, tûnah chuan mipa dang ta i ni tawha, keiai ṭha i phu ka tih fo kha, kal tawh rawh” a tihchuan ka lu ka thing nawk nawka.

Amah chu ka kuah bet tlat bawk “Thu dik ka hriat hma chuan ka kal dawn lo, ka hmangaih che ka tih kha, thu dik i sawi loh chuan ka kalsan dâwn lo che. Engvanga min kalsan nge i nih? Ka nu leh pa in an vau che tih hi a dik em?” ka ti a, ka aw chu a ring lêm lo. 

Miin kan ṭawng an lo hriat chuan ka duh bik hauh lo, “Chutiang engmah a awm lo, kal tawh rawh. Pâwna awm reng chu a ṭha lo” a ti chu lawm lo zet hian ka en chho a, zaninah hian engkim sawi fel vek ka duh. 

“Teuhlo thu dik min hrilh hma chu ka lût dâwn lo, nangpawh i haw hek lovang. Ka nu leh pa thusawi ka hre ru a, nang hian an vau vâng che in min kalsan tiraw? Chu chu a dik em? Dâwt ka duh miahlo, u Rinpui min chhâng rawh, min kalsan i duh takzet a nih chuan thu dik i sawi hunah ka kalsan ve ang che, min hmangaih tawh lo a nih chuan keipawhin hmalam ka pan ve tawh ang, mahse thudik hreloa kalsan che ka duh lo” ka tih leh tâk tlatah chuan hahthlâk min tih hmêl zet hian min ena.

Chutah thâwk la leh hluaiin ṭhutthlengah bawk chuan min ṭhut puia, “A dik a lâwm, kha ni a min sawisa tute kha i nu leh pa rawn tirh an nih kha, i bialpa cousin te, helamah cousin a nei tih pawh i hrelo ang a“ tiin za lo zet hian a khi suka, a thusawi chuan min ṭhawng lutuk tlat.

Khâng mi min sawisak tumtu te kha ka nu leh pa ruahmanna maw? “Maw? Kha mite kha ka nu leh pa ruahmanna vek maw?” ka ti sapa, ka thil hriatin min ṭhawng lutuk chuan engtia han sawi mai tur nge tih pawh ka hrelo, ka nu leh pa ka ngaihtuaha, chutianga ti duh tur khawp an niin ka hre bawk silo.

“Ni e kei hi an makpa turin min duh lo miaua, tin kha Minister fapa kha an makpa atân an awh zia an sawi hial asin” tiin a ngawi leh data, kei erawhin hriat belh châk zetin ka en reng thung. 

“An thlir dânah chuan a dik rêng bawk, kei thingtlâng tlangvâl mai leh a ni Minister fapa, chutah Doctor niin an damdawi in ah ngei ala thawk zuia, an tân chuan keiai thlâwt chuan a it awm zâwk bawk” a tih leh chuan ka hnaih vata.

“Ka nu leh pa ruahmanna tih i chiang maw? An ni te chu kha mi ni khân an rawn thleng ve chiah a nih kha, engtin nge chutiang an tih ang. An fanu ka ni a, min tihnat an duh ka ring lo” ka ti chu a kut a vai puata.

“I ngaihdan dân le, thu dik i hre duh a ka hrilh mai che a nih kha, kei min neih chuan eng sum mahin ka vur ve thei dâwn lo che. Heta an rawn kal kha min hmuh an duh vâng nilo vin hruai haw che an duh vâng a nih kha, an duhdân chuan min thah an duha, mahse thil kalsualin an mi tirh pakhat kha amah a in ti palha, a thi zui a nih kha. Ni khaw hrelova i awm lai khân nang hi hlat tur che leh tual thah hmang mâkpa an duh loh thu min sawi khum ti ila i âwih angem? I nu leh pa an ni a, i ring chhe phal dâwn lo tih ka hria, sawi pawh a sâwt lo bawk” ti a lungawi lo zeta thawh chhuah mai a tum chu a kutah ka vuan bet tlata.

“Sawi vek rawh, ka ring che ka tih kha. Thudik hriat vek ka duh, Timothy-a pawh he thila a in rawlh a nihchuan ka ngaidam ngai dâwn lo, engkim hriat vek ka duh, u Rinpui khawngaihin” ka tih tâk tlatah chuan a rawn ṭhu ṭha leha.

A hmai a tuai pawk bawk “Duati i hriat belh chuan i na mai mai dawn?” a tihchuan “A pawilo, hriat vek ka duh, ka na vek tawh zâwk. Nang ka chân ni aṭang che khân na leh tur chuang ka awm lo zawk a sin” tiin chiang zet chuan ka ena, kha ni kan accident ni leh min kalsan tur a thutlûkna a siam tih min hrilh lai kha mitthla ah a rawn lang nawn leh uaih uaih bawk nên ka nu leh pa thiltih chuan min ti na bawk.

“Min thah tumna a tlawlh tâkah kha chuan jail-ah min dah an tum leha, mahse Nunzuali khân min lo puiin fiahna a lo nei hlauh a nih kha. Kha mi hnuah khân tih theih dang an neih loh avângin mahni intipalha thi a ni tih a chian tâkah kha chuan Police lam pawh khân thupa an rawn chawi hiala, zâna ka rawn hmuh che a thu tâwp ka rawn hrilh zân che kha i la hria em?” a tihchuan ka bu nghata.

Chiang takin ka la hria, kha zân aṭang khân hlim takin ka nui leh tawh ngai lo bawk. “Kha mi zân an rawn kal pawh kha, kan pahnih chungchâng chu ni tho mahse eng thu lâwmawm mah rawn sawi lovin ka nu leh pa bulah ka phu loh zia che leh beisei tawh lo tur che a min rawn hrilhin ka nu leh pa zâwk an bia a nih kha” a tihchuan phâwk zetin ka ena.

Ka hriat loh phêna thil thleng rapthlâk lutuk chuan thâwk a ti har hial, ka nu leh pa ngeiin tualthah pawh pawisa lo khawpin sum an lo ûm tih ka hriat chuan ka zak bawk. “Min hua em? Keimah vâng vekin engkim i tuara, i nunna i chân phah ṭêp bawka” tiin hnuailam chu ka biha.

A vawikhat nân ka nu leh pa ang ka nei hi ka zak takzet, engtin nge hetiang khawpa an awm theih. “Haw lo e, tihsual i nei ve hleinem. Nunzuali kha chu ka hmangaih vâng nilo in min puihna avâng khân lâwmthu sawi nân a hun neih reilo tê chhûng ka enkawl mai a nih kha, a bâk engmah a awm lo. I nu leh pa in ka nu leh pa hial an biak tâkah kha chuan kaltîr mai che kha i hlimna tur ni a ka hriat avângin ka kalsan che a nih kha“ a ti leh sapa.

Engmah ka sawi thei mai lo, kei hian engthil mah hrelo in ka lo ṭawng khuma, ka kalsana. Tûnah lah min ṭhen hrang tu zînga tel ngei ka la ngaizawng zuia, “Ka tihpalh“ hrehawm ti lutuk chuan ka hmai ka hupa, ka nu leh pa huatna leh demna in ka khata, engtin nge khatiang thil kan chungah an tih theih zâwk? Ka bulah lêm u Rinpuia pawm ang mai khân an awm si a, he khua kal an rem tih loh viau chhan ka ngaihtuaha, engkim chu hetiang vâng vek tih ka hrethiam bawk, u Rinpuia hian dâwt a sawi dawn lo tih pawh ka hria.

“Lo kal teh, hrehawm timah ta che, tûnah chuan ka dam vek tawh a. Pasal dang i nei a nih pawhin a pawilo, i hlimna ka duh ber, i nu leh pa pawh dem suh. I hma hun an ngaihtuah vâng a nih kha” a ti dam leh dapa, kei erawh sawi tûr ka hreloa, ka zak hluah hluah bawk.

“Ka haw phawt ange, nangmah in dem hauh suh ang che” tiin a tho chhuaka “Min hmangaih ve tak tak em?” ka ti leh sap chu a kut a hum ruh chu ka hmu thei “Midang nupui tur i nih tawh kha, Duati min theihnghilh tum rawh, ka phu lo che tih hre renga bul ka lo ṭanpui che kha keimah zâwk hi ka thiamlo a ni, ka chelh leh che a nih chuan i chhûngkua i chân ngei ang” a rawn tileh chu ka chhânna duh a ni hauhlo.

“Khatiang ka zâwt lo che, min la hmangaih em? Min chhâng rawh, chu chauh chu ka hre duh, min hmangaih lo a nih chuan sawi mai la, sawi chu a harsa viau em ni?” tiin ka ena, hetiang mai maia thusawi ka duhlo, tûnah hian a thutlûkna a zirin ka awm dâwn, Timothy-a emaw ka nu leh pa thlengin ka ngai pawimawh lo.

“Ka hmangaih che” a thusawi chu ka hriatsual emaw ka ti hman hiala, min chhâng har bawk nên ka lo beidawng hman tawh kha a nia “Ka hmangaih che ka tih kha dâwt a nilo, khawvêla hmeichhe mâwl ber ini. Min nghâk reng turin ka duh lo che a sin, kha mipa nên a in chungchâng ka hriat ringawt pawh khân ka na a, nitin ilo kîr leh hun ka nghâk reng zâwk. Mahse i reha, i hmêl pawh ka hmu ngam tawh hek lo, ka tina che tih hre reng chung khân ka nghâk che a, mahse beidawnna mai a ni” ti a min hnung chhawn zâwnga ding chu ka hnaiha, a hnung lam aṭanga kuahin a hnungzangah chuan ka hmaiin ka nawra.

“Keipawhin ka ngai lutuk che, nitin ka nghâk ve tho che a sin. I thu sût a, ka kianga lo kal i duhthu i sawi ka la beisei fana, nangmah avâng vêkin a sin hmalam ka pan, tûnah chuan engmah ka hre duh tawh lo. Ka kalsan tawh dâwn lo che, ka nu leh pa in an rem ti emaw, tilo emaw ka pawisa lo, i bula awm chauh ka duh, min kalsan tawh suh aw. Zaninah hian engkim ka ti fel ang, Timothy-a pawh biak ka duh, a inrawlh tih chiang takin ka hre tawha, tûnah chuan an tawrh ve a hun tawh” tiin ka phun sapa.

A rawn inhera, chiang taka min enin ka hmai zâwnah chuan a rawn kûn hniama, ka hmai zâwnah chuan a rawn thaw lum hak bawk. Tûnah chuan ka hmuh hmasak bera ka awmdân ang khân ka awm leh tawh, zâm ru tak siin ka lungphu a ranga, he a mitmeng thûk ruiha min en tawh hi chuan ka danglam vek ṭhin.

“I â takzet tih i hria em?” a rawn ti supa, ka nui sak a “Nang ka hmangaih che avânga ka â a nih chuan pawi ka tilo, ât hlen pawh ka duh zâwk” ka sawi zawh rual chuan min rawn kuahin ka nghâwngah chuan a hmaiin a rawn nawra, hahdam ta huai ang mai hian a thaw chhuak ham ham bawk.

Ka phone rawn ri avâng chuan ka kut lehlama kuah lêtin ka phone chu ka phawrha, Nunui hming ka hmuh chuan mak ka ti riau lehnghal. U Rinpuia chu kuah nghet sauhin phone chu ka chhâng zuia.

“Aw Nunu” ka tihrualin a rawn thaw haka, kan in be ngai tawh lova, chutia min rawn call thut chu mak ka ti viau mai.

“I zin tih ka lo hria a, thil sawi dun ka duha, ilo awm siloa” a rawn ti a, a aw ah chuan a rilru a hah hmêl viau lehnghâl. “Um ka ṭhiante an in nei dawna, ka zin a lawm. Enge nita? Ti hian kan sawi mai dâwn em ni?” tiin u Rinpuia awm sawn chu en zawkin ṭhut thlengah chuan ka pawt ṭhu a, a ni pawh thu âwih tak chuan a rawn ṭhu a, chutah in siam remin ka malah a lu rawn nghatin a mu nghâl than lehnghâl, ka nui saka.

“Ih eng lo a nia Timothy-a nên in neih in tum niin ka lo hria a” a tihchuan a hmuh loh lamah ka ner saka, keichuan neih ka tum hauhlo. Mahse sawi chhuah kher ka tum lo bawk, ka nu leh pa pawh ka haw thlâk hunah engkim ka hrilh anga, chuta an awm dân a zirin engpawh huamin u Rinpuia ka vuan ve tawh ang.

“I hriatsual a nihchu, ka tum ve hauh lo mai. Amah khân ka nu leh pa bulah a lo sawia” ka ti a, u Rinpuia erawhin ngawi rengin kan thusawi chu a lo ngaithla thung. A lu ah chuan ka chûl sak hliau hliaua, tûnah chuan hlimna ka nei lêt leh ta niin ka hria a, ka hlim takzet.

“Chu chu a nia, dik tak chuan ka hlat chhan che kha englo a nia,” tiin a ngawi data “Timothy nên i awm loh lai khân kan inzui ṭhin a, chuan kan chesuala, i rawn haw leh si kha kei min kalsanin i bulah a awm a, dik tak chuan ka thianghlimna hial ka hlan hnuah i bulah a rawn kal leh kha ka thinrima, ka hmuh duh loh phah che a. Kei ai a thlan thu che a sawi khân min tina lutuka, i bialpa bulah pawh khân Timothy nên in chungchâng ka hrilh ṭhin a” a rawn tihchuan u Rinpuian Timothy-a nêna kan chungchâng a lo hre em em pawh kha ka dem ta lo.

“Chuan engtin” ka ti ta faka, ka lâwm hauh lo . Timothy-a pawh ka haw takzet, chutianga ka ṭhiannu a lo ngaizawnga, ka haw veleha a kalsan leh si chu ka ngainêp viau bawk. Ka haw tirh te kha chuan min la nghah reng thu a sawi luam a nih kha.

“Tunah hian nau ka paia“ a tihchuan ka phu deuh zawk mai, chu kher kher chu ka lo beisei loh lam daih a ni lehnghâl. Nunuin nau a pai tihchu âwih harsa ka ti, mahsela ka hriatsual chu a ni silo.

“Maw? Nau i pai maw?” u Rinpuia pawhin min rawn melh nghal vuta “Um Timothy-a pawh ka hrilh tawh, damdawiin a min rawn hmuh ni khân ka naupai kha min tih tlâk tir a tuma, ka duhloa” a tihchuan ka thaw haka, ka rilru a na lêm lo. Ka lâwm zâwk, a hun takah ka hre chhuak chu ka lâwm a nimah, tûnah chuan u Rinpuia nên kan inkârah tumah an in rawlh ka phal tawh hauh lo vang.

“Ka hria e, ka rawn haw hunah kan sawi ṭha dâwn a nia aw, tin nau kha ti tla rêng rêng suh ang che, ṭhian kan ni emaw ka tia. Engvanga ka lakah zêp nge i nih? A tir khân min hrilh nila chuan hetiang hian kan awm kher a ngailo tur” lawm lo zet chuan ka ti a, a ni pawh sawi mai tur a hre lo nge a rawn riat nawi zui niah niaha, thil thleng tehnuaih avâng hian ka chhûngte ka demna a zual.

“Nia, mahse tûnah ka hre ve chauha, Timothy-a khân min ṭhen kha a duh miau sia, ka tân tihngaihna a awm silo a lawm, nau ka pai tih ka hre mai bik lo nên. I rawn haw a i bula a awm reng avâng khân kan in be tamlo, mahse in nih hnu thleng pawh khân ka bulah rawn riah châng a neia, i hriat angin alakah ka in phal tawha, mualpho ka hlau ve bawk nên ka hnial ngam lova” a tihchuan a rilru tur chu ka hrethiam viaua.

Timothy-a chu ka haw hle bawk, kei min duh thu sawi kur zuta ka ṭhiannu a lo bum kual chu ka lâwm viau lo bawk. “A nih ka dah phawt aw, ka rawn haw hunah ka nu leh pa ka lo sawi pui ang” tiin phone chu ka dah zuia, ka ngawi rauh rauh mai.

U Rinpuia pawhin kan thusawi zawng zawng kha a hre ve veka, zawhna min zâwt lo chu mak ka ti viau. “I rilru ana em?” rei fe kan ngawih hnuah a rawn ti ta supa, ka ner nghâl nâng bawk. “Teuhlo mai, engah nge a nat ngawt anga, ka thinrim zâwk. Ka ṭhiannu chunga a chêt dân kha mipa nêp leh tenawm ber zia a ni” ti hlakin a samah chuan ka ṭhâm sak neuh neuha.

“I nei ṭep chu a nih si hi maw?” tiin a rawn ṭhu chhuaka, a nui tih ka hriat rual chuan a âwmah beng datin ka kuah leh nghal thlawpa, a pangtilum hi ka la nghêng kham lo. Ka bulah awm reng tawh se ka duh.

“Nangmah lo neih ka tum lo hrim hrim aw, ka chhûngte pawh ka hnial vek tawh. Nang lah chuan min rawn biak i tum bawk silo” tiin ka vui zui niah niaha, rawn nui hakin a âwmah chuan min pawm beta.

“Ka biak châk zia che hi i hre hauh lovang, i number ka nei ta silova, nangmah avângin arsi leh thla ka biak phah fo zâwk a sin, nangmah ah ka châna, ka inhnêm ṭhin zâwk a lawm. I tello chuan ka kim lo va, kalsan tur che a rilru ka siam lai khân thinlung na em em chungin ka thlah ve tho che tih hre reng rawh, ka hmangaih che a. Ka hmeichhe tawn tawh zîngah chuan ka thinlung tina rei ber i ni” tiin a nui suka.

“Nitin ka ngai che a, i thusawi naupang chhia tak tak te kha hriat chakin vawi engzat nge i phone number ka neih chhunah khân ka rawn call pawh ka hre sêng lo, min chhâng dâwn lo tih hre reng chung khân i aw hriat chakin i rauthla ka biak châng lah a tam. Khing vâna thla leh arsi te khi nangmahah ka chana, ka inhnêm hrâm hrâm ṭhin zâwk, kha ka hmeichhe hmangaih kha ka hmaah vawi khat tal rawn lan tir leh rawh tiin khuanu ka dil hial a” tiin min kuah nghet sauh sauha.

Keipawh chuan a nghâwngah ka hmai nawrin ka hmui chuan ka nul zui na na a, keipawhin vawi engzat a tam nge khing arsi leh thla bia a hmuh leh ka châk thu ka sawi kha ka hre sêng tawh lo, keimah ang tho in a lo awm ve reng tih ka hriatna chuan lungngaihna kârah min ti hlim riau bawk.

“Thla chu a bo a, a lo lang leh ṭhin i tih kha. Chutiang chiah chuan kan in tawng leh ta a nih hi, bo tawh lo la, ni leh thla hi lêng dûn ngai lo mahse nang leh kei chu khawiah mah kan in kalsan leh tawh tur a nilo, arsi an awm a, ni a rawn chhuah leh chhûng chuan i kiangah ka awm reng tawh ang. Ni a tlâk a, mawi taka a rawn chhuak leh ṭhin angin kan nunah inṭhen hran châng awm mahsela, i tân mawi takin ka rawn chhuak anga, ka rawn lêt leh ṭhin ang” tiin ka nuih ta var vara.

Mumang emaw ka ti hial zâwk, hetianga kan awm leh hi ka beisei pha lova, mumang atân chuan ka phal hek lo, ṭhutthlengah chuan inkuah chial in kan in ngaihthu chu kan inhrilh tawn renga, kum thum chhunga kan hun hman dân kan inhrilh tawna, ani pawhin keimah ang bawkin a lo tuar a, keimah ai mah in a tuar nasa tih ka hriat chuan ka khawngaihin ka rilru a khawih takzet bawk.

“Ka kalsan leh tawh lovang che, ka hmangaih lutuk che” tiin a hmui lum ham hamah chuan ka tawk da daa, aw rawn thian kharh ri ka hriat rual chuan ka awmsawn nghal dawrha, Mawii leh Faka aw kan hriat rualin u Rinpuia chu a phun nghal hluk mai.

“Kha in lo insawi fel thei maw? Vawikhat mah inṭhen ve tawh suh u, in tuar na thei si, inneih ve vat in ngai a nih kha. Chutilo zawng in rilru na engmah ti ṭha theiloa in awm hmêl hmuh hi a ninawm, Zorina phei chu i awm loh chuan miin an ti thinrim reng emaw tih tur in a hmêl hmuh a hrehawm, tikhan in kalsan tawh reng reng suh u” Faka chuan rawn tiin kan bulah chuan an rawn ṭhu ve a.

“Ka kalsan tawh dâwn hleinem, chu a lo tuar viau a nimaw? A mah lah hian min ngaih loh thu a la sawi ve ṭang ṭanga, aiah” min lo hmer vak a vâng chuan ka in tuai zui vat vata, kan nui dar dar bawk. “Sawma te in rawn hruai ve lova” ka tihchuan “An hnawk mai mai, bâkah an bialnu te an rîm ve duh ang, an upat tak tak hma in nupui neih ve an hun tawh” an ti maia, kan pali chuan titi in kan phûl hluta.

Tûnah chuan ka kaw chhûng lam aṭanga min ti hrehawm reng tu kha lak kian ang mai in a awma, ka hlim takzet. Ka bula mipa phun ve sup sup leh a chânga nui leh suk ṭhin, nitin maia ka ngaih reh theihloh hlim hmêl chu ka ena, ka ngaih a ṭha hliah hliah bawk.