DUHLAI ZORINPUIA CHAPTER 18

DUHLAI ZORINPUIA 

CHAPTER 18 

Hun a liama, kum hial a vei ta, hriatrengna erawh a reh ve tawh ngailo, kum thum kum thum chhûng teh meuh a ngawia, vawikhat pawh min rawn be heklo, a ni chu a reh vawng vawnga, kei erawh chuan nitin darkar tin ka theihnghilh ngailo. Sim ka thlâk hrim hrima, chuvâng te pawh chu a ni mahna.

Mawii hnen aṭangin Nunzuali boral thu chu ka hre tawha, u Rinpuia khân a lo sawi dik tak tak a nih hmela. Mahse engvang nge a ni avâng khân kan inkâr a tih tâwp mai tih hi ka la hrethiam theilo, tûn thleng hian a mah ka hmangaihna kha an la reh lova, mi thar ka lak luh hnu thleng pawhin amah bâk in ka rilru an luah thei lova, Timothy lakah pawh ka inthlahrun phah ṭhin.

Theihnghilh tum in Timothy lam hawi tum viau mah ila ka hriatrengna hian Zorinpuia ah bawk min luhpui leh si, ka mi tawn te nên engkimah ka tehkhina, amah anga min tihlima min ngaihsaktu kha ka tawng leh pawhin ka ring tawh lo.

Vân lam chu ka thlir chho vang vanga, chhum rawn lêng delh delh mai chuan ngaihtuahna hruai pêng in nunhlui mitthlaah a rawn lang zut zuta, kha ka mipa hmangaih ka kalsan tâk kha mitthlaah chuan a rawn lang zut zuta, a ni chu khi chhûm ang mai khi a ni. Chhûm rawn lêng delh delh chuan nunhlui kha an rawn keng tel nimai hian ka hria a, chhûm hian amah nena kan sûlhnu kha an rawn lên pui nimai hian ka hre ṭhin, mawina rawn keng lût a ka nun châwm tu chu khi chhûm ang mai khian muangchangin a thâmral a, hmuh phâk a ni tawh lo.

Kha khua, khawte reuh tê tu khaw kha in an hriat ngai rêng rêng loh hmunah khân ka duhthusam zawng zawng chu a awma, khawvêla ka ta ni tûra ka duh ber awmin, ka ta erawh a ni thei ta lova. A rimte, a khaw leilung leh engkim kha ka mitthla aṭangin an bo ngai lova, kha hmun ka hriat chhuah châng apiangin ṭhianho a hlim taka kan awm lai te kha an rawn lang zut zut ṭhin, ramhnuai leh a khaw chhehvêl engkim kha ka ngai, chûng zawng zawng zîngah chuan duhthu ka sam zinga ka duh zual ber kha a lang sar ber niin engtik lai mahin ka theihnghilh ngailo.

Kan thutiam te pawh ka rilru in ala vawng renga, vân lam ka en châng apiangin rilru a na thara, khi thla ang mai khian ka hmuh theiha awm siin ka khawih phâkah a awm lova, nasa taka neih tuma ka hnaih poh leh ka tân chuan a hla tial tiala, vawikhat tê mah ka la theihnghilh lo, min hre chhuak ve ṭhin angem? Min ngai ve angem? Nge min theihnghilh tawh zâwk? Tiin zawhna tam tak ka in zâwt a, a chhânna erawh keichuan ka ngai takzet a, tûn thlenga hmalam pan theilo leh mipa dang reng reng la lût theilo tura ka thinlung kawngkhâr khâr tu a ni miaua, a ni chu a hlima, biak pawh min rawn be tawh ngai heklo. Ka DUHLAI ZORINPUIA, englai pawha ka thlir nin theih loh leh ka hmangaih bân theih ngai loh khân, vawikhat tal chu min rawn hre chhuak ve sela, min rawn bia in ka ngai che tih rawn sawi tûr talin ka la beisei a, ka nghaka, a ni erawh a thâwm a la reh ta foa. Ka damchhan tân khân dam chhan ka ni ve lova, kha ka hmangaih thinlung aṭang khân bawlhhlawh ang maia paih chhuah ka ni a, hriatrengna aṭanga nawh reh ka ni bawk. 

“DUHLAI ZORINPUI, ka duhthusam zawng zawng neitu, ka hlimna thlawh bo puia khuarkhurum thûk taka min hnut chhiah tu, i hlim tiraw? Ni e i hlim tawh e, kei erawh nang mah ngai rêng rêngin kumkhua in ka nghâk dawn che a nih hi, DUHLAI ZORINPUI engtikah nge kan intawn leh ang, ka damchhung in vawikhat tal ka hmu leh in ka kuah leh thei che a ngem Duata” mittui luang zung zung chuan ram hla tak, ka hmuh phâk loh hmun lam hawi chuan ka ṭap leh ta zawih zawiha.

Tâwpna siam fel nilo mahsela, chhunzawm tur erawhin a theih tawh loh a,nghah a ni renga, a ni erawh a thâwm a reh vawng vawnga, rilru na chu hunin a dam pui ṭhin an ti a. Kei erawh chuan rilruna chu kum a thara, ni leh thla leh arsi rawn lang leh ṭhin ang in heng ho an awm chhûng hi chuan keimah aṭangin amah kha a bo tawh ngai dâwn lo tih ka hria.

“Bawihi Timothy-a a lo lêng ania” ka nu rawn au lâng lâng chu chhâwnin ka mittui chu ka hru hul sawk sawka, ni e Timothy pawh kumhnih ka in nghah tir hnuah tûnah bul ka ṭanpuia, a lakah ka rilru zawng zawng bet lo mahse min dawhtheihna leh hmangaihna ka hmuh hmaih bik lova, engkim a hre chung pawha min nghâk ngar ngar tu hi tih beidawn ka duh bik lo pawh animahna, chance pêk ka rem ti ta kha a nia.

Ka nu leh pa lahin min duhpui in an be ṭha em em a, an ni hi chuan a tir tê aṭangin Timothy hi an duh zâwk hrim hrim a nih kha. Ka mipa hmangaih ka neih theih tâk lohah chuan keipawhin hmangaihtu ka pan ve mai a ngai tih pawh ka hria, Zorinpuia erawh tumahin ka thinlungah an tluk tawh ngai dâwn lo.

Ka thinlung neitu a ni reng dâwna, a sûlhnu pawh tih reh ka phal heklo. Timothy-a pawhin min nawr lui ngai lova, engkimah dawhthei takin min enkawl zâwk ṭhin, amah a hlim theia fiamthu a duh bawk nên keipawhin ka ngaina viau tawh bawk.

“Zanin chu min ngai lo riauin ka hria” room-a ka nute an luh hnuah chuan ka bulah rawn ṭhu in a rawn vui ve niah niaha, ka nuih hak mai. Mipa puitling tak a ni a, a titau ve ngei ṭhin hi ka lâwm riau bawk.

“Chu ka ngaih loh thu che ka lo sawi em ni?” ti a ka fiam lêt sak chu nui hakin a dârah min kuah beia, a rawn thaw chhuak suai suai bawk. U Rinpuia ai a upa a, mahse engkimah Zorinpuia bawkin ka rilru ala luah ṭhin hi ka inthiamlo ru viau zel bawk.

“Sawi chuang lo ve, i lo in ngaihtuah leh ngut ngut ka hlaua, ka bialnu hian keimah chiah min ngaihtuah sela ka duh mawle, heti hi chuan ka bula a awm reng lai pawhin a ngaihtuahna hmun hla takah a awm ṭhin a, Hmingte engkim min hrilh ṭhin rawh ka tih kha, keichuan ka nawr lui ngai dâwn hauh lo che a. Theih phei se chuan palai rawn tirh mai pawh ka duha, mahse i rilru i siamfel hun ka nghah duh vâng a nia, ka kum a naupang zawk zawk tawh lova, ka chhungte'n min lo nawr ve reng bawk nên keichuan neih ngei che ka duh” a tihchuan a ngaihtuahna chu ka hrethiam viau mai.

Muangchanga ka lamah rawn awm hnaiin ka hmuiah chuan a rawn fâwp zuia, ka chhâng loa, ka hnar hek lo. Ka kut chu ka hûm ruh vak ringawt, a awmsawn rual chuan ka en kara, ka samah rawn chulin a nui nghal suk mai.

“Nang chu fawh che leh i ṭhu khawng awt zel a” tiin a nui vur vura, keipawh ka nui ve ta tawp. Tûn thleng hian alakah rilru ka pe pumhlum theilo hi hrehawm ka ti, a châng phei chuan bul lo ṭan pui lo ila tihte thlengin ka ngaihtuaha, mahsela thil a nih tur ang a ni vek tawh bawk nên tûnah ṭhen leh nghal ila a rilru ana dâwn tih ka hria.

Engkimah Zorinpuia nên ka tehkhin lo theiloa, ka mitah chuan Zorinpuia tluk kha an awm ngai tawh dâwn lo tih ka hria. Min kalsana min ti kehsawm tu nimahsela reilote chhûng pawha a mi ngaihsakna leh duatna ang kha tu hnên aṭang mahin ka dawng ngai dâwn lo tih ka hria, a chhan chu a mah an ni lo miaua, zawng pawh ni ila amah ang kha ka tawng leh tawh lovang.

Siamtuin a duhzâwng takin a siama, mize hran, ngaihtuahna hran leh hmêl pawh danglam in. Ka duhtak ni turin a siama, tumah rêng rêngin an tluk ngai lovang, ka tân chuan englai pawhin a ṭha ber renga, theihnghilh harsa ka tihna a nih phah bawk.

U Tim-an min ngaihsak a piangin amahin a âwma min kuah beia thu a sawi ve sup sup lai te kha ka ngaihtuah lêt a, inneih a sawi apiangin u Rinpuia nêna kan inneih hun tur kan suangtuah ve ṭhin te kha an rawn langa, min duat poh leh Zorinpuia min duat theih zia leh a theih tâwk a min ngaihtuah ve ṭhin lai te chu an rawn langa, Timothy-a bula ka nuih a piangin Zorinpuia kianga ka hlimna famkim zia ka hre chhuak thara, chûng chuan hmalam pan theilo vin min siam ṭhin.

“I thinlung ka neih theih hma chu ka bei dâwn ka tih kha, nakinah chuan min la duh lêt ve em em ang. Kha mipa kha theihnghilh rawh ka tilo che, mahse hre reng lo leh hmalam pan ve turin ka duh che, ka tân hian rilru pe ve thei tawh la ka duh a ni Hmingte” a rawn tihchuan za lo zet hian ka nuih saka.

“I theihnghilh theilo tih pawh ka hria, ka lakah rilru pêk har i tihzia pawh ka hria a, kha mipa kha an ka châk ve fo a sin, tichuan i mittui te hmu tawh lovin i hlim hmêl ka hmu thei anga, i rilru na hmêl hmu tawh lovin i lungawi hmêl ka thu thei anga, mahse kha mipa kha keichuan ka tluk theilo a ni tiraw? I thinlung neih tuma ka beih nasat poh leh khapa kha i hre chhuak leh fo tih ka hria, i mitmeng leh i awmdân hi ka hai ngailo” a tihchuan chhân dân tur pawh ka hrelo. 

An sawi ṭhin, rei tak in ngaizawng tawh te pawh an innei kher ngai lova, in duh êm êm leh in hmangaih taka awm ṭhin te pawh an innei ngai chuang lo. Hlim taka kan awmna hmunah kumkhua in kan awm hlen thei lova, pakhat zawk zawk ah buaina a awm tawh chinah chuan engtianga in lai chinna nghet nei pawh nise an keh darh ṭhin, hmangaih ber neih hi a har a, hmangaih ber kan chang lo fo bawk. Khuanu ruat sa ve reng a niin ka hria.

Chuvang chuan keichuan hmangaih lutuk neih ka tum tawh lova, ka hmangaih lutuk chuan ka kiang aṭanga an hlat leh mai ka hlaua, ka zuam tawh lo bawk. Ka nunah Zorinpuia aia pawimawh awm tir erawh ka tum ngai dâwn lo a, a ni ka hmangaihna erawh reh tir ka tum hauh lo thung, ka duh thu a reh tir thei lah ka ni heklo, ka thinlung in a thlan chu ka rilru hian a hneh mai mai lo bawk ang.

“Ka tihpalh aw, ka tum ve a nia. Mahse a har lutuka, i lakah pawh ka sawi tawh kha, hei vâng hi a nia bul ṭan pui che kha ka hreh chhan, ka rilruah mipa dang awm reng chunga ka nihpui che a nihchuan i na mai mai dâwna, tûnah pawh i na tih ka hria, mahse u Tim, a hma ang em em chuan ka ngaihven tawh hauh lo a nia aw, ka chungah i ṭha êm a, nangmah ai baka min ngaihtuaha min hmangaihtu an awm chuang hleinem, i chungah pawh ka lâwm asin, kha mipa kha ka lo tawng hmasa hi i lakah pawh ka inthlahrun phah ania aw” tiin zak deuh tak chuan ka kûn chala.

Dik tak chuan alakah pawh ka inthlahrunga, thinlung taka ka pawh theilo pawh hi hrehawm ka ti, mahse keimahah hian min dang tu a awm tlata. Ka hriatthiam loh thil hian min chên chilh tlata, Doctor Timothy lakah pawh ka hel phah chhan a ni berin ka hria.

“Ka hria alawm, ka hrethiam lutuk che. I hmangaih chu theihnghilh turin ka ti hauh lo che a; mahse ka tân i nun hi inher rem ve zêl la ka duh, kha mipa tina êm êm tu che nilo in kei duat châk ngawih ngawih tu che hi min en la, hmangaih miahlo tu che nilo in hmangaihtu che hi min en la, ngaihsak miahlo tu che nilo in ngaihsak châk ngawih ngawih che hi min en in min ring ngam la, a niin a pêk loh zawng zawng che kha ka pêk theih nân che i thinlungah ka luh ve phal rawh” a rawn ti sapa.

Chhân mai dân tur ka hrelo, heti khawpa min duhtu hi tinge ka hnaih theih miahloha, ka hmangaih lêt theih miahloh chhan hi ka hrethiam lova, engvanga daidan anga awm tlat nge pawh ka hre thiamlo, mahse pawh ka tum pauh leh bang chhah tak awm ang mai hian ka pawh thei tak tak lo a ni ber mai. 

Chutihrual erawhin Zorinpuia theihnghilh a, a ni nêna hmalam hun thlir chu ka duh ber thunga, ka thei angem hrelo mah ila ka tum ngei tur a ni. He mipa keimah avânga a theihna zawng zawng hlân tu laka ka inthiamloh êm avâng pawh hian ka tum ve thei a lawm.

Kha a thinlunga luta, a lungphu zâwm a, a amah a châwl hahdam tura min ti tu kha bovin, ka lungphu rawn ṭâwma, ka ruala pên tum zâwk a rawn lang thunga, a tân ka thinlung kawngkhâr hi ka khar bur bik dâwn em ni? Thinlung hliam chu thinlung thar chuan a tuam ve chhin chu ka phalsak mai tur ani.

“Ka hria a lawm ka tân pawh i ṭha ber tih ka hria a sin, nang chuan englai pawhin min hrethiam êm êm renga, keimah zâwk hian ka phulo ni che hian ka hria. Ka tân engkim ka hnathawhna tur thlengin min puia, ka tâna i thiltihte avâng pawh hian hnial ngam tur che ka nilo tih pawh ka hria, hei erawh hria la ka duh, keipawhin i lamah hian ka thinlung hi ka her ve zêl ania aw, ka nunhlui kha sawi chhuah fo pawh ka duh lo, kan pahniha ka natna tur phei chuan” tiin ka nuih ta var vara.

A ni pawh a rawn nui ve hak bawk, a zaidama, a dawhtheiin min nawr lui ngai hauhlo, chutih rual erawhin ka lakah erawh a thikthu a pe chhe ve thei hle thung. A thawhna damdawiinah khân nurse hna min hmuh sak bawka, ka hna ka chawlhsan tâk avâng khân tih tur ka neiloa, ka nu leh pa in an lo hrilh a nih ka ring, an damdawiin ah min thawh tir nghal hmaka, private hospital niin a neitu ber an ni bawka, hei pawh kan inngaihzawn hnuah ka hre chiah.

Ka phulo telh telh hian ka ngai hmana, mahse a mah zâwkin min hnaih luih tâk tlatah leh ka chhungte'n min nawr ve bawk nên kumhnih hnuah aw ka pawh ve hrâm kha a nia, khâng kumhnih chhûng erawh kha chuan keimah ka mumal lova, Zorinpuia avânga ka ṭah châng lah a tam, chûng hunah pawh Timothy hi ka tân a awm tlat ṭhin.

Hei vâng te pawh aniang, a lakah hian ka in kharkhip reng duh ta bik lova, ka hmangaih ber ka nei theilo a nih ro ro chuan min hmangaihtu chu ka tân a ṭha ber turah ka ngai bawk.

“Tum reng ang che, theih phei se chuan palai rawn tirh mai ka duh tawha. Ka kum a nau tawh lova, fa neih vata nupui duat tur ka duh ve tawh, hetiang reng chuan ka chi a hût vat ang” fiamthu tih hriat tak hian a rawn ti a, ka nui nghal hak mai. A awihawmloh em em lutuk a, amah chu enin ka nuih vak vak ringawt chu lâwm loh hmêl deuh hian min ena.

“Min nuih kher suh, ka sawi dik lo em ni? Ka tar ṭep tawh, ka chhûngte lahin nupui nei vat turin min tur sek tawha, an ngainat zia che pawh i hriat kha” tiin ka kut chu a hûm runa, zanin chu damdawiin lamah kan duty lo ve vea, zân dangah chuan a rawn lêng khat a, a duty hun a thlen phei chuan kan in be ngai mang lova, amah a hna a in pe chi a ni bawk nên keipawhin tihbuai ka duh ngai lêm lo.

“Lungngai suh, mipa chu chi in thlah theih hun chhûng a rei a lawm, i tar chhe hman em lovang, nakinah chuan kan la innei em em ang. Han dawhthei em em phawt la, ka lên tar tir em lovang che” tiin ka nui hak haka, a bula awm hi chuan a ngui reng theihloh.

A tîrah khân haw viau mah ila tûnah chuan ka ṭhian leh bialpa nih a kawpa, a mah avângin hmalam ka pan theih phah bawk, ka bulah awmin min hnem reng lo sela chuan Zorinpuia vâng hian ka kehchhe vek tawh ngei ang.

Amah reilote chiah ka hriat, ka hmangaih leh ka hlimpui ber ni a, ka natna siam hnem ber tu nisi kha ka hriat chhuah châng apiangin he ka bula awm reng ṭhin mipa min fuihna hi ka hrechhuak leha, hmalam ka pan leh theih phah ṭhin.

“Hmangaih lo turin in fuih ngai lo la, i hmangaihna kha ngai hlu hle zâwk rawh, theihnghilh tum lo la. I theih ngai loh tur chiang sa tih i hria, chuvang chuan a mah i hriatrengna ang ang khân hre tawp la, mahsela kumkhua a natpui erawh tum ngai suh. Hmangaihna kan pêk chhuah avâng in kan tlâwm tihna a niloa, mite laka hmangaihna kan pêk chhuah kha thil ropui lutuk a ni, hmangaihna a awm mai mai ngailova, chuvângin hmangaih kan neih kha inchhîr ngai loh tur, mi hmangaih hi thil harsa ber a ni a, awlsam taka neih theih loh thil a ni tih hre rengin i hmangaihna kha chhuang zâwk rawh” tiin min hrilh a nih kha.

Hei vâng pawh hi a niang a ni ngei pawhin dawn lêt phût hauh lovin hmangaihna nêna min en vang pawh a nimahna, hetiang chen ka bulah awm a min hnem peih ni.

“Ka nupui nih i in peih hma chu ka nghâk thei che ka tihkha, nang bâka duh ka neilo bawk. Hmeichhe ṭha lutuk ka kal tir mai che chuan kumkhua in ka inchhîr tawh dawna, mi pakhatin a duhloh kha keichuan a pumpuiin ka duha, mi pakhatin a hlutna a hriat loh kha keichuan lunghlu ai pawhin ka ngai hlu zâwk, chuvâng chuan min neih vat a ngai a nia, ka duat lehzual theih nân che” tiin ka chalah chuan a rawn fâwp vang vanga.

Ka nui seih ringawt, he mipa hi ka phu thlâwt lo. Ka hnara, ka biak ṭhat loh lai pawhin min nghâk a, dawhthei takin min enkawl bawka. Hmeichhia keiai ṭha pui pui, mi hausa fate pawhin an duh ve tih ka hre renga, chûng ho hmuh kân in min la nghâk fan a nia.

“Ka lawm e aw, ka tân i awm reng a vâng te, ka mangan huna la nghen theih tura i awm ṭhin avâng pawh hian, nang aia ṭha hi chu ka hmu leh tawh lovang tih pawh ka hria. Ka ṭhianṭha ber ang mai i ni, nang chuan englai mahin min kalsan ve ngailoa, ka tân i awm reng ṭhin avâng pawh hian lawmthu sawi mawlh mawlh tur zâwk ka ni” tiin ka nuih ver vera.

“Ka hmeichhe ngaih hlut ber tân chuan hremhmun thleng pawhin ka kal mai ang, ka chân phal tlat lo che” a tihchuan ka nui hak haka, a ni ang hian Zorinpuia khân a sawi ngei a, a ni erawhin a thutiam erawh a hlen zo ta lo thung.

Ka ṭhiannu ngei pawh heta ka haw thlâk hnuah a rawn lêng ngai lova, engvanga ka lak aṭanga inthiar fihlim hmak nge a nih pawh ka hrelo, Mawii nên erawh chuan phone pawhin kan la in be renga, ka ngen angin u Rinpuia chanchin a rawn sawi ngai lova, Nunzuali a thih thu erawh kha chu min hrilh a nih kha.

U Rinpuia chu ka ngaihtuah viaua, Nunzuali avânga min kalsan kha a ni si a. Amah ber a thih leh si chuan engtin tak awm ang maw? A tuar na viau in ka ring bawk, keimah ang chiahin a ni kha a first love a ni a, ka tawrh ang hian a tawrh ve pawh ka ring.

Ka ngaihtuah leh tâk avâng chuan in thing harh vatin Timothy-a chu ka en vata, a ni erawh tv a lo en leh ran tawh mai.

“Ninawm e, football en reng mai. Tlangvâl senior lam tawh hian in uar zual, senior hri a nih ber hi, football ngaina chin hi chu a hmei a pa in nula tlangvâl senior an ni tlângpui” ka ti chu ka kâwngah a rawn hmer salha, ka au nghâl ṭhat chu nui hawk hawkin tv lam bawk chu a en leha.

A rawn lên tawh hi chuan ka pa nên inkhel enin rei tak tak an meng dûn ṭhin a, ka nghâk peihlo hian ka mutsan tawp zel. A ni pawh a vui ngailo bawk, ka nu leh pa hian an makpa ang tak takin an ena, a tir aṭang rêng in an be ṭha em em bawk. U Rinpuia erawh ka sawi fe hnuah an pawm chauha, chutah pawh kan boruak kha khati teh nuaih a ni bawk nên engmah an sawi ta lo kha a nia.

Engkimah Zorinpuia hlir mai ka la hre chhuak chu inthiamlo viau mah ila ka thluakah hian a châm reng bawk si a, a buaithlâk a nih ber hi.

“Ka mut a chhuak tawh a nia aw, i meng leh reng ange, a hmuhnawm loh si” ka ti chu an zawh ṭep thu a sawi ringawta, ka ner nâng thung. Ka phone chu phawrhin Mawii nên chuan kan in text-a, an ni pawh ṭhian ho in thil an eikhawm a nih hmel, keini ang lo takin Faka nên khân an ni tluang phiana, tûn thleng an la in zui bawk nên inneih thleng an sawi kai tawh thu a sawi chuan ka nui saka.

An lawmpui awm viau bawk nên ka lo phur ve em em tawp “Inneih tak tak kan tum chuan ṭhian ah ka duh che a nia aw, nang bâk ṭhian ka neilo tih i hriat kha. Rawn kal ngei ngei turin ka duh che, i intiam vek tawh kha” tiin min rawn sawi khalh zung zunga.

Message type a chak lutuk hi a mak zâwk, thawnthu a ziah ṭhin vâng te pawh aniang. Ka hnial hman hma in thu a sawi ṭeuh hman tawh ṭhina, a tâwpah aw ka pawh leh nge nge zel.

“Nang meuhin chutiang a pasal neih te i tum chuan ka rawn kal mai ang chu, mahse ka châm rei thei dâwn lo a nia. Kan pa a khua a har lutuk ang” ka ti erawh eilo hmêl lutuk sticker a rawn hmanga, ka nui leh hak mai.

A châng chuan sticker ringawta in hnial châng te kan neia, mahse kan in pawh zual phah em em thung. Ar an hem thu leh Sawma birthday a nih thu a sawi chuan ka harh chhuak zawka, an ni ho pawh ka be ngailova, ka number ka thlâk miau avâng leh Mawii hnênah pawh ka number pe lo tûra ka tih tlat avângin a la pelo a niang tumahin min rawn be ngai hek lo.

Sâwma chu a birthday present tur ka pay anga, amahin lo pe tur a ka tihchuan a lo aw ve maia, an au leh dar dar tawhin ka ring. An bula ka awm chhûng ngawt pawh khân an thawven zia leh birthday lawm nuam an tihzia ka hre ve bawka, zaninah pawh an ri leh laih laih tawh ang chu.

“Ih Zo, ka sawi tûr chu a ni em ka hrelo, mahse u Rinpuia nên hian in be leh ula ka ti e, tûnlai phei chu kan bulah pawh a awm ngai tawhlo. Amahin a tla hranga, a ngawi chawi bawk sia tumahin an be ṭawng ṭha hleithei lova, ih maw. Keichu a awmdân hi amak ka ti, vawikhat pawh i inluah bulah dingin i in luah kha a thlir renga, a lunglên hmêl lutuk, ka hnaih ngam siloa, ral aṭang ka thlir renga, a la hre ve reng che a niang” tih thu a rawn sawi chu ka chhiar nawn seka.

Ka in luah a thlir maw? Min la hre ve reng em ni ang? Mahse tûnah chuan thil a nih tur ang ang a ni tawh “Mawi i hriat kha, tûnah chuan bialpa ka nei tawha, ka kalsan theilo. Min ring em em a, ka lakah a beiseina a nghat nasa hle bawk, bâkah u Rinpuia chuan min hrechhuak pawh nise min ngaih vâng chu a nilo ang, a bialnu thih vâng mai mai aniang” ka ti a.

Ka ngaihdân dik tak pawh ani, a duhthu ngeiin kan inkar a ti tâwp a, chuan kumhnih chhung pawh khân min rawn biak a tum hleinem. Min kalsan duh lo tak tak chu nise min rawn be em em ang, Mawii nên kan in bia tih a hai bikin ka ring lo.

“Aaa nia ka hre tho a, mahse ka khawngaih lutuk. I awmloh hnu phei kha chuan ka sawi duh lo mai mai, a nui hmêl ka hmu ngailo, Nunzuali kha a enkawl chawt a, mah a ni bulah pawh khân a hlim hmêl chuang loh. Tûnlai phei chu a chêr lutuk, chaw a ei ṭha lo a niang, keichu ka khawngaih riau tawh, in bia ula chu ka ti, keini chuan engmah kan sawi pui theilo” a rawn ti leha.

Chutiang chuan a awm maw? A dam lo em ni? Nge thildang vâng zâwk, mahse chumi avâng ngawt chuan ka nêm leh theilo. Amah pawh a ngawia, vawikhat pawh min rawn be hleinem, min hnawl hnu a keimah zâwkin biak leh chu ka duh teuhlo.

“Sawi tawh lovang, bialpa ka nei tawha. A ni rilru hi ka tihnat sak theilo, u Rinpuia chu Nunzuali thihna a la tuar pawh a niang chu, a hrim hrimin zanin chu ava nuam âwm ve” tiin thudangah chuan ka pakai pui ta daiha, hetiang lam sawi hi nuam ka tilo.

A ni pawhin ka tum hria in a rawn sawi lui bik lova, tûnlai chu an hlo thlawh âwl lai a nih hmela. U Rinpuia tih loh an ṭhianho an kim vek thu a sawi chuan tel ve ka châk takzet, kha khua kha la awm rei lo mah ila ka khaw pakhat ang maiin ka ngai.

“Min va ngaihsak lo ve, ka awm tih pawh i hre tawh miahlo” Timothy chu ka en zawka, min lo en reng tawh chu niin. A inkhel en lai chu an zo tawh a ni ngei ang.

“Tihpalh inkhel kha i en tui sia ka ṭhiannu ka lo be mai maia, pasal neih a tum hnai tawha. Mo ṭhianah min rawn sâwma” ka tihchuan a thaw nghal huai mai, a eng tak chu lo ngaihtuah leh tawh ang maw?

“Um khawia mi nge a, chu i ṭhiannu ber pawhin pasal a nei dâwn a, nangpawhin neih ve vat i ngai a nihchu” a tihchuan ka nui leh haka, inneih a chak thu hi a sawi na a rei tawha. Keimah zâwk hian ka la zuam loh avângin ka la hnar ṭang ṭang thunga.

A chhûngte pawhin min ngaina a, min duat hle bawk. An vai maiin ka chungah an ṭha em em a, Timothy-a nên a kan inzui hnu phei chuan an fapa tâna min duhzia an ti lang âwl hek lo, mi hausa ni siin an in ngaitlawm em em a, kawm an nuam hle bawk.

Induhna leh in dah sânna lam an neive lova, Timothy-a ka duh chhan tak pawh ani bawk.

“Keini chu ka fiah phawt che anga, chu mi a i tlin dân a zir a nimai, an ni chu an in zui rei tawh a lawm, ka hnathawhna khuate kha an nia, kal ve ngei chu ka ngai ang, ka lo intiam tawh bawk nên” ka tihchuan min rawn en nghal vata.

Ka thusawi chuan a ṭhawng te pawh aniang “Khapa awmna ah khân maw? A ṭha dâwn em ni? I va châm hlen daih ang tih pawh s hlauhawm a lawm“ a rawn tichu a bânah ka ben sak nghâl hlaka, “Lungngai suh, a ni nên chuan kan in be kher lovang, ka rawn haw leh vat dawn a lawm, i la awm dâwn nge?” ti a mit ka sân ak chu a sana melh vutin a ding chhuaka.

“I mut a chhuah hmêl tawh ema, ka haw mai ange. Tui deuhin i mu dâwn a nia aw, naktukah hospital-ah kan inhmu dâwn a nia, tho tlai lo la” ngeiawm zet chuan a rawn ti a, ka melh nghek ringawt.

Mi runluih hi ka pa nên hian an ching bawk nên a châng chuan an bulah awm peihlo in room-ah ka in khung daih zel.

“A nih muttui aw, tui deuh in mula, in ngaihtuah hah vak tawh lo la. Keimah nên hmalam hun ilo suangtuah tawh dâwn ania, pâwnah chuan lo chhuak duhlo mai rawh, zân a rei tawha. Mut vat a ṭha” a tih tâkah chuan keipawhin ka hnial tawh lêm lo.

In vai liamin a chhuah tâkah chuan kawngka chu ka va kalh sawk sawka, ka room-ah chuan ka lût nghal bawk.

Ka ngaihven tawh lo emaw pawh ti ila Mawiin a chanchin a rawn sawi erawh kha chuan min ti hrehawm leh ṭun tawh maia, engvanga chutianga awm chu nge a nih ang.

Tukverh-ah chuan ka dâk chhuaka, thla chu a lo êng leh kulh tawha, amah bawk ka hrechhuak thla nên in tehkhin in, a bo daih hunah pawh a lo lan leh ṭhin tur thu a sawi sup sup laite chu ka bengah an rawn ri leha, ka theihnghilh theilo. An rawn thar leh zêl, hriat tawhloh ka tum pawhin a thusawi nghet leh a aw dam dup reng te, he zân thlaêng ang chiaha kha khua a thla êng thlira ka hnunglam aṭanga min kuaha a thusawi te pawh kha tûnah hian ka feel leh thei nia, a pangtilum pawh ka hre thei hialin ka hria 

“Tinge theihnghilh i har em em? Hriat tawh loh che ka duh a sin, thlapui i rawn lang lo thei mai lovem ni? I en zual poh leh a ni kha ka ngaizuala, ka hrehawmna a zual ṭhin, êng tawh lo la ka hre tawh lo mai ang. I en zêl chuan kha mihring min hnâwl tu zûnah khân uai lehin nunhluiah ka kir leh fo phaha, ka duh tawhlo a sin, ka tân êng tawh suh Zorinpui” tiin vân a thla pui chu ka hau mawlh mawlha, thla mai mah nise Zorinpuian a mah a nih thu kha a sawi miaua, ka hau lo theilo, ka hriat chhuah leh phah zêl si a.

“Tinge i ngawi reng chung pawh hian ka ngaih reng che, vawikhat tal i aw hriat ka la beisei fana, ka hmangaih vâng vek che a ni. Hmangaihna vâng vek” tiin thla êng kulh chu ka thlir renga, zân reh tak a ni tawha, zanin chu zan dang ang lo takin thâwm bengchheng hriat tur a awm lova, zan dang anga bike ri bengchheng tak tak hriat tur a awm lo bawk.

Kan piah hla taka tlâng chhîp thla êng hnuaia lang dum paw ngak lam chu ka thlir renga, lunglenna chuan min tuam leh hlup hlup bawk. An khua ka awm tirh te, ka hmuh hmasak bera a awmdân te kha chiang takin ka la hre thei, ka hmuia a fawh-na te, a taksa a min kuah beh ṭhin lai te kha, a rim te. A âw ka dam dup mai te kha, a nupui ka nih hun tur sawi paha thla êng thlir chunga duhthu a sam ve ṭhin lai te kha.

“I dam ṭha ang tiraw? Dam lo miah suh aw, hlim takin i awm ka duh ber a nia, keipawhin tûnah chuan hmangaihtu ka tawng ve tawha. Nangmah tluk kher lo mahsela ka tân chuan a ṭha lutuk a sin, mahse ka la ngai tho che, ka bialpa lakah pawh ka inthlahrun phahna a ni fo a, mahse ka inthunun thei bawk silo. U Rinpui vawikhat tal kuah leh che ka châk a, engvanga min kalsan nge i nih tih pawh chiang takin ka la hreloa, mahse ka biak che a rem tawh silo” ti sapin thâwk ka la haka.

Tukverh aṭanga thlifim rawn thaw lût heuh heuh reng te chuan min rawn chhêm dai sawng zawnga, Aizawl khawpui in leh mihring zo zai te hi ka tân chuan ram reh ang tho mai an ni. Hetiang hi ngaihtuah reng lo tur ka ni tih pawh ka inhria, mahse ka ngaihtuah lo thei bawk silo.

Mawii thu rawn sawi te khân min ti na a, hrisêl taka a awm ka duh a sin. A hlim nân ka kalsana, mahse a hlim lo tih hriat chu kei hmangaih ngawih ngawih tu tân chuan a ngaihtuah loh theihloh, mi hmangaih a har ang bawkin theihnghilh pawh an har tawha, duh duh hunah hmangaih loh theih an ni miau silova, Pathian meuh pawhin keini min hmangaih avângin vawitam a lo tuar a, a siam mihringte pawhin kan tawrh ve tur a ni miau si a.

Khuma ka teddy bear dah chu va la in tukverh bulah chuan ka ṭhut pui leh rana, thla ên chhûng a rei dâwn lova, a mang leh vat anga. Ka hmuh phâk loh turin a awm leh vat dawn tih ka hria, chuvâng chuan a lan theih chhûng chu thlir ka duh.

Ka teddy bear chu ka ena, rilru ana leh vawng vawng bawk. A hlawh neih hmasak ber rualin min hre chhuakin he thil hi min lei ve ngeia, hlim takin ka lo dawng sawng a nih kha, a car thar pawh ka lawm pui hman ta siloa, tûnah te hian enge a ngaihtuah ve ang le. Nge ni a a muhil tawh zâwk? 

“I sual viau chungin ngaihtuahna i luah renga, haw viau chung che in ka thlahlel reng bawk che a, kalsan tu ni si kha lo kîr leh turin ka la ngai tlat che hi ka â nge ka nêp pawh ka hre tawh lo. Mahse DUHLAI ZORINPUI, kei hmeichhe mâwl leh nêp ber hian midang ai a la thlahlel tho che” ti sepin van lam chu ka en chho dauh dauha.

Zaninah hian arsi leh thlate chu an rawn in lara, mawi em em in an êng an chhuah leh tawha, ka êng ve erawh a bo tawh thung.

Zîngah chuan ka nu in min rawn auh lâng lâng avâng chuan peih lo zet hian ka tho a, nizân ka mengrei bawk nên mut ka kham hauh lo, ka mit nuai chat chatin bathroom lamah ka intifai leh te te a, vawiin hospital lamah kal ka ngai bawk nên ka phûr lo viau bawk.

Hnathawh hi ngai miah lo se ka ti ṭhin a, mahsela dam kan duh chuan kan thawh ngei a ngai bawk si.

Ka phone rawn ri ka en chu Mawii a nih avângin ka la vata, “Aw hello” ka tihrualin lehlam aṭang hian phûr zetin a rawn au nghâl chula, a eng tak chu hria ang maw ti a ka in ngaihtuah lai chuan “Fakan palai a rawn tirh tur thu a sawia, zaninah an lo kal dawn? Awi ka huphurh bawk sia, ka phur tho bawk nên awm dân tur pawh ka hrelo, i lo in ready angai ang, kan inrem theih chuan khalamah rawn bazar a ngai dâwn a” a tihchuan ka phûr viau maia.

An innei tur chu ka hlim a ni ber mai, Mawii nun ka hre ve a, Faka anga mipa rintlâk a tawng chu ka lawmpui viau mai bawk. A rawn phur lutuk chu ka nuihpui hak haka, “Ka lo in ring sa ang, lungngai miah suh. Mo kawr hawh tur te chu nalh tak tak a tam a lawm, ka nute pawh ka lo hrilh hrim hrim ange, in in rem chu ka ring” ka ti ve vata.

A rawn phur bawk nên Faka lakah chuan a rilru pawh a bet tawh viau tih ka hre maia, ka lawmpui a ni. Kei leh u Rinpuia anga an awm ve lo pawh chuan min ti lâwm bawk, thil dang rawn sawiin an in rem ngei a rin thute a nu leh pa pawh an lâwm viau tih te chen chuan a rawn sawia, a phûr lutuk chu a nuihzatthlâk zâwk.

Nui hak hakin phone chu kan dah zuia, ka nute lam ka pan chu min lo hau lehnghâl mawlh mawlha. A ni hi chu phun hi nuam a ti ni berin ka hria, a hmêl hmuh rual chuan min hau nghal char char peih bawk. Mahse ka nu a ni miaua, ka chhâng lêt ngai lo thung.

“Insiam vat la, Timothy-a rawn thlen hma in lo in peih ve ṭhin rawh, i mu renga zela a buaithlâk. A mipa zâwk nghah i ngai ziaha, hmeichhe in chei rei lutuk te hi a mawiloa, zing thawh har phei chu hmeichhe tân a zahthlâk leh zual tih hre ve la. Khatiang chuan tumahin mo atân an it hauh lovang che” a rawn ti zuia, a ngai te bawk.

Timothy hian min rawn lam ṭhin avângin ka nu leh pa hian min tur ve sek zela, kei erawh hmanhmawh ka tum ngai chuang lo. A hun taka kan thlen hman chuan ka duhtâwk viau bawk.

“Mo atân min it loh leh mo ka lâwi lo anga a nimai a lawm, pasal neih ka tum vak hleinem. Taka nu ka ṭhiannu in pasal a nei dâwn a, mo ṭhian ah min hman a tuma, a ni vêl an la sawi fel lo na in kal ve ngei chu ka duha, aw ka lo pawh ania. Bâkah ka ṭhianṭha ber a nia, kal ngei ngei ka ngai” ka tihchuan ka nu zâwk chuan min rawn en nghal vata.

“Khawi a i ṭhiannu maw?” a rawn ti a, ka sawi huphurh deuh. Mahsela kal ngei ka duh bawk nên ka sawi ngei chu a ngai ang “Mawii ka hnathawhna khua a mi kha, kha kan haw dâwn ah pawh rawn kal kha, a ṭhian neih chhun ka ni ve a, kal ngei ka duh” ka tihchuan ka nu chu a ner saka.

“A chi dawn em ni? Midang hmang mai sela, nang kher lo pawh hman tur an tam ang chu, bâkah khapa te kha hmuh leh te i tum ange, na taka hliam tu che a nih kha” a rawn ti chu ka thaw haka, ka nu leh pa ngaihdan hi a châng chuan amak ka ti ṭhin.

Ka ṭhian kawm te reng reng an sawisêl reng bawk nên a châng chuan ka nu leh pa an nilo emaw tihmai tur hian an awma, ka hma khua ngai anga lang si hian ka naupan têt aṭangin inah min khung chawta, hei vâng te pawh hi a niang mi kâra awm ka thiamlo in rual ka pâwl lo a, ṭhian siam pawh ka harsat em em bawk.

“Ka nu ṭhian te hi an pawimawh a sin, kei ngei pawhin pasal nei dâwn ta ila a nilo hman tur ka neilo. Mi hi kan mamawh lai chauhin kan hre tur a ni lova, min mamawh huna kan awm theih zelna hi a hlu zâwk, mamawh hun chauha min hre ṭhin mi chu nangpawhin i duh bîkin ka ringlo, kal ngei ka duh. U Rinpuia hmu turin ka kal dawn lova, ka hmu kher lovang, ka ṭhiannute inneihna ah ka kal dawn a nimaia, chu chu sual a ni em ni?” tiin ka melh kara.

Min hringtu te mah ni se a châng chuan an ti lutuk hian ka hria a, ka ṭawng chhuah ve phah fo bawk. U Rinpuia pawh min kalsan tu nimahse an sawi chhiat ka phal chuang lo, kan tâna an ṭhat loh avânga sawisel kher hi keichuan ka duh ve lo, kan pawisawi tu pawh nilo lo huat ve ngawt pawh ka ti ve ngai lova, chutih rual erawhin ka duh loh zâwng leh ka pawi an sawi a nih erawh chuan ka en liam mai ngailo thung.

“A sual kan tilova, kan ngaihtuah zâwk mai che a nia. Na taka siamtu che kha ilo va pan leh ang tihte kan hlau a, i pa nên hian kan vêng thâwng mai che a nia” a rawn tihchuan ka ngawi ta ringawta, engmah pawh hi min ti phûr ṭhin lo.

Chaw ei chu ka siam san ta daiha, awmpui nei tho mah ila keimah ka awm chuan ka pui ngei ngei ṭhin. A ni pawh chuan min rawn pui vata, ka chhûngte erawh an duh hunah an rawn ei ve mai a niang chu, hospital lamah kal ka ngai bawk nên ka hmanhmawh riau tawh bawk.

Chaw chu ka ei zung zunga, ka hmanhmawh tawh riau. Ina ka awm reng chuan ka nu ṭawng hriat reng a ngai anga, ka peihlo, a châng chuan over ka ti ve lek lek zel, mi thununa an duh ang diak diaka min dah an tum hi ka haw ber bawk.

Chaw ka ei kham chuan ka ha nâwt in ka insiam zui mawlh mawlha, ka in chei ngai lêm lo bawk a, ka hman hma viau. Ka room aṭanga ka chhuah chuan Timothy-a pawh a lo awm leh vâng tawha, a hma ṭhin bawk nên a mah avângin ka nu leh pa in min la hauh phah ziaha, a bula ka sawi lah hian a nui kur kur zela, ka nu leh pa nên hi chuan an in ngeih em em bawk.

“Kal ila ka hman” tiin pâwnlam chu ka pana, ka nu chuan haw rual turin min lo ti leh tawha. Ka ngawi kar thung, kei min hau peih viau si hian Timothy-a erawh an be ṭha ṭhinin an duata, hei vâng pawh hi a niang Timothy-a pawh hi ka pawh tak tak theilo, ka nu leh pa awmdân hian min ti zak lek lek ṭhin.

Mâkpa atâna an awh zia hi an ti lang âwl lo miaua, “I nalh leh pek hle mai, vawiin chu keimah chiah min zui ang che” a tihchuan ka nuih ringawta, a car kawngkhar chu min hawn sakin ka ṭhu lût zuia, a ni  pawh a rawn ṭhu lût zui vata. 

“I mood a fuh vak lo em ni? I tûm leh tâk bur bura?” a rawn ti sup chu ka melh zawka “Fuh e, mahse ka nu in nangmah avângin min hau leh hrepa, i rawn hman hma thei lutuka, ka buai phah a nih hi” tûm deuh bara ka tihchuan a rawn nui leh hawk hawk tawh mai. 

Ka biangah chuan a rawn piai nawk nawka, car chu tinung mai lo chuan min en leh vang vang bawk. “Tlan chhuak vat la” ka tihchuan a lu a thing nu nua, min en reng bawk nên ka awm a ti nuam lo ru viau bawk. Ka lamah râwn awn hnaiin ka biangah chuan a rawn fâwp zauha, ngaiah ka nei thei meuhlo ka ṭhu khawng auh ringawt.

“Morning kiss a nih kha, chuan tukin chu i hmêlṭha leh zual. A nih tlân chhuak tawh ang hmiang” tiin a awmsawn a, ka thaw huai bawk, dik tak chuan amahah hian u Rinpuia laka ka feelings ang kha ka nei thei miah lova, ka tum luih ngial pawhin an har sa ka tiin a châng chuan ama lakah pawh ka awm tinuam lo tu a ni fo a.

A niin min ngaihsakin min duat êm êma, ka haw tirh aṭang khân ka bulah a rawn awm chata, engtin nge u Rinpuia nêna kan inkar a hriat ka hrelo. Ka nu leh pa in an hrilh te pawh a niang, ka bulah a awm chawta, keipawhin ka nat lai leh hrehawm laia ka bula a awm tlat avâng khân haw bik reng thei heklo, hetiang dinhmun hial ka thlen pui ta chu a nia, ka tihsual leh erawh ka hlau viau thung.

In be zui tawh lêm lo chuan kan tlân chhuak zuia, a ni erawh a ṭawng mawlh mawlh renga, sawi tûr a hre lutuk hi u Rinpuia laka a danglamna a ni leh bawk. A ni erawh kha chu a ṭawng tam ngai lova, titi bawrh bawrh ang kha a nei ngai lo chungin a bula awm kha a nuam em em thung.

Hla chu Timothy-a chuan a rawn playa, a hla play ber kher lah chuan lung a ti lêng leh tawh. Gnat I tello chuan tihchu a rawn playa, keimah avânga play a nih ka ringa, min tihchhan tih ka hre bawk. Kei erawhin mi pakhat ka hre chhuak leh tawh, ni e an vâng khuaah hmelhriat pawh neilo in ka va awm ve tawpa, ka rin phâk leh beisei ngai miah loh mi pakhat va tawngin hmangaihna ah ka tlu lût a, mahse ka nei thei chuang lo a nih kha.

A châng hnihna a zai lai chuan car tukverh-ah chuan ka dâk chhuak daiha, ka mittui tla tur chu ka khap sak sak bawka, min theihnghilh tawh ang tih hre mah ila kei erawh chuan ka la hre chhuak reng fo chu a nia, eng mi nge maw a niha, hetiang em ema ka nunah hmun a chan rei ni. Zâwlaidi min tat hial zâwk nge tih ka ngaihtuah bawk.

“Hmingte” Timothy-a min rawn koh avâng chuan harh chhuak zawkin ka mittui chu a hmuh loh theih tur berin ka hru zauha “Enge nita?” ti a ka en phei chu a rawn hawi leh zawka, kawng en a ngai bawk nên rawn hawi rei thei heklo. Hmalam chu a en zui leh thuaia.

“Enge i ngaihtuah tukin chu i ngui riau mai, thil thleng te a awm a nilo maw? Ka lakah zêp nei suh ka tih kha, ka tih theih zawngah chuan puih che pawh ka hreh hauh lo a nia”dam dap chuan a rawn ti a, a aw ah chuan min ngaihtuahna ka hre thei bawk.

“Ka ṭha a lawm, mut ka kham lo mai a nia. Nizân ka mang a ṭha lo deuha, a bâk engmah a awm lo” ka ti liam puata, a ni erawh in a awih leh vak lo aniang a rawn rum nghat mai. Mahse engmah sawi ka tumlo, a lungawi lo leh mai mai dawna, a nat leh phahna tur a u Rinpuia chanchin sawi ka tum tawh lo bawk. Keimah hian vawng reng ila ka duh tâwk viau a ni.

“Ka ti tak tak a nia, ka mang a ṭha lo deuh a chuvang mai mai chu” tiin damdawiin kawt kan thlen tâkah chuan ka chhuk zui vata, tûnlai chu ka ṭhianṭha anga ka ngaih a reh hmaka. Engvanga Nunui hian min hlat tlat nge ka hre thiam lo, ka haw hnu aṭang khân a reh hmaka, biak ka tum lahin a biak theih lova, an ina ka kal pawhin min hmuh duh miau loh avângin ka hmu theilo.

Engvanga hetianga awm thut nge a nih ka hrelova, khati khawpa kan in kawm nasat avâng khân ka bun harsa tawn lai khân ka mamawh em em a, mahse min be duh hauh lo a nih kha. A chhan ka zawh lahin min chhâng duh heklo, a tâwpah min blocka, kha mi hnu aṭang kha chuan keipawhin biak nawn leh ka tum ta biklo va.

Chutihrual erawhin chhan awm hauh lova ka lakah a thinrim chu mak ka ti bawk, u Rinpuia nên kan inṭhen a chin kha thil engkim a buai chho mawlh mawlh ni ber in ka hria.

Damdawiin chhûng ka pan dâwn lai chuan Timothy-a chuan min rawn ûm pha leh a, “I inthlâk zawh hunah ka office ah lo kal la, damlo ho kan kan kual dâwn a nia, chhûnah restaurant ah ei chhuak ila a ṭha ang” a tihchuan ka bûk khum nghata, ka inthlâkna tur lam chu panin ka inthlâk nghal sawk sawka.

Ka thawk rei ve tawh bawk nên hmelhriat pawh ka ngah viaua, damdawiin ah ngei thawh tâkah chuan thil hrang hrang ka tawng chhoa, mitthi te, a ṭhen pawisa an neih loh avânga an nun chân phah te ka hmu ṭhin a, Timothy-a lakah sawi mah ila sum a awm miau loh chuan kan chhan theilo, a ti a nih kha. A ngaihdan kha mak ka ti a, khatianga min chhân kha ka ring lo lutuk bawk.

Mahse thuneihna ka neih miau loh avângin engmah ka sawi buai duh ta lova, he laiah pawh a mah avâng chauhin ka thawk thei a, keiin ka lo sawisêl ve vak kha a mawilo bawk. Ka bialpa a nihna ah erawh kha mi ṭum kha chuan ka ngei ve lek lek bawk, pawisa ai chuan mihring nunna hi a pawimawh zâwk niin ka ngai ve tlata.

Nitin deuh thaw thi an awm angin naupiang pawh an awm ve reng bawka, a châng chuan in lamah hahchawl hman lo a nileng zankhua a kan chêt a ngaih châng pawh a tam bawk.

“I hman em? Pu Lalliansanga kha he damdawiinah hian an rawn daha, kan buaipui ṭhat a ngai a nia. Mi hausa an ni bawk nên a chunga thil ṭha lo a thlen vaih chuan kan damdawiin hian a tuar phah thei a nia, i bialpa pawh hrilh la. Mi hausa leh rethei inkâr hi chu a zau a sin, rethei chuan kan tu mumal pawh an neilova, mi hausa te erawh nitin darkar tin deuh thaw rawn kan tu an nei thunga, rethei leh hausa inkar nge nge chu a lo zau chiang khawp mai” ti a ka nurse pui nu u Kimkimi nui hak hak chu ka en zawka.

A sawi dik chiahin ka hria, he damdawiinah pawh mi hausa chuan ngaihhlut an hlawhin ngaihpawimawh an ni a, mi rethei erawhin ngaihsakna leh kantu pawh an nei ve ngai lova, hei vâng hian keipawhin ka theih tâwk in rethei zâwk te bulah awmin ka kâwm hlim ṭhin, Timothy-a ka dem ve na chu hei vâng hi a ni bawk.

A mah chu ka chunga a ṭha in a fela, midang chungah pawh a sual ka ti chuang lo, mahse an hospital a nihna angin damlo mi eng ang pawh hi a endan in ang vek se ka ti ve ṭhin. He damdawi in hi a larin a liana, ngaihhlut a hlawh bawk, sum pawh a thawk chhuak hnem tih ka hria, mahse heti chunga retheiten an ban thei miah lo hi Timothy-a pawh ka dem viau zêl.

A pa a hlau mah mah niin ka hre bawka, “Nangmahin lo buaipui mai rawh, keichu mi hausa ho bula awm hi ka ning a nia. Natna hote pawh fimkhur leh uluk lutuka enkawl sak an ngai a, a ninawm ka ti. Bâkah an chapo thei bawk si ka hmachhawn peihlo, Timothy-a nên chuan damlo ho enkual kan tum hrim hrima, chutiang Liansanga tih vêl chu nangmahin lo buaipui mai rawh, bâkah hei nurse Hlutei te pawh an awm ve hi, ka kal phawt ang“ tiin ka chhuah san zuia.

Timothy-a awmna ka thleng phei ṭep tihah Nunui ka tâwk hlawla, min hmu chu ani pawh a ṭhawng tih a hriat, engvanga helam daih daih aṭanga rawn chhuak nge a nih? Aizawlah a awmk hial khân ka hre si a, engtin nge helai damdawiin ah daih daih a rawn awm chu ka hrethiam hauhlo.

“I dam maw?” tiin a rawn nui lui saka,  hmêlah erawh a nuih a za tak tak lo tih a hriat hle. Vei nei ṭeuh a ang ka ti a, ka en reng avâng nge kalsawn tumin a che zuia .

“Ka dam a lawm, tinge tûnlai hi min biak duh miahloha, i lakah tihsual ka nei nge?” ka tihchuan a rawn hawi chhuak zawka, a mitmenga hlauhthâwnna rawn lang zawk chu ka hmuh hmaihlo.

Engvanga hetianga min en nge a nih? Min hmuh hi a hlau nimaiin ka hria, rawn ṭawng a tum chiah chu a hnung lam aṭanga Timothy-an min rawn auh avâng chuan a ngawi zui daiha, a kal nghal nal nal bawk. A chungah khân engthil nge thleng ang, khatiang khawpa danglam a awm ni.

Timothy-a ka lam pana a rawn phei chu ka lo en renga, a Doctor thuama a inthuam leh thlap takah chuan a nalh leh pek viau tawh. Midangte lakah a nelawm viau a, mahse ka sawi tawh angin mi rethei leh hausa an endan a dang hle thung, sawisêl châk viau ṭhin mah ila ka bialpa a nihna angah leh an damdawiin a nih miau avângin keimah avâng mai mai chuan an kalhmang a thlâk ka ringlo hrim hrima.

“Nunui khân min la be duh miahlo, tûn lai chu call pawh ka call tlang theilo, tûnah khân sawi duh a nei tlatin ka hria. A rilru a hah hmêl bawk si, thil thleng a awm a nih ka ringa” ka tihchuan min rawn melh chhuk ngura “I ṭhiannu em ni? Helaiah a rawn in en tir ve zeuh zeuh ṭhin a” a tihchuan ka lu ka bu nghata.

“Ka ṭhianṭha ber a ni ṭhin a, tûnah chuan kan inbe tawh ngailo. Engvanga danglam daih nge maw a nih le? Ka hrethiam theilo, engmah sawi pui a theih bawk silo, min hmu hreh ni berin ka hria” ka tih leh sap lai chuan ka kutah rawn vuanin ka chalah a rawn fâwp zauha, dik tak chuan he damdawi in a thawk te chuan kan in ngaizawng tih an hre fur tawha, biak ṭhat pawh ka hlawh nasa, mahse kei chuan min be ṭha tu naran kawm erawh ka tum lo thung.

Kan buai hunah kan lam an ṭang leh kher lo tih ka hre chianga, ṭhian dik tak hi chu kan dinhmun lamah in nghat lovin kan mamawh hun apianga awm thei te hi an mai ṭhin.

“Ngaihtuah tawh suh, a in peih hunah a hrilh ve mai ang che. I lak aṭanga hlat rih a duh te pawh ani ang, tûnah chuan keimah chauh min ngaihtuah tawh rawh, kal ang le damloten kan hmuh har lutuk chuan ano thi hman hlauh ange” ti a a fiamthu erawh ka melh rum ṭha viau mai.

“Thihna hi fiamthu na chi a nilo ania aw, tute pawh ṭha takin bia la a hma ang khân awm tawh hauh bawk suh” tiin a sîrah chuan ka kal zuia, a hmain Rawlthar pakhat damdawiin rawn awm nên keimah avângin an insuala, kha tleirawl tê lah kha a kum phulohin a nghal lehnghâl.

Ka inrin hma a ka hnute a rawn khawih avângin Timothy-a nên hian an intibuai zuia, kha mi ṭum a Timothy-a min ṭanna erawh kha chuan min ti lâwm viau thung.

Ward chu fangkual in an dinhmun kan en zela, ṭhenkhat an chhuah theih ṭêp tawh laiin ṭhenkhat erawh a thla chuang la enkawl ngaite, a ṭhen dinhmun derthawng takah an ding bawka. Nun hi chu a tawi riau a nih dâwn hi ka ti tawp tawh, mitthi an awm apiang lah hian keimah zâwk hian hrehawm ka ti ṭhin a, beiseina nên dam chhuah tumin damna rûn an rawn pana, mahse an beiseina bovin mittui nên an haw leh ṭhin hi hmuh hrehawm ka ti bawk.

“I ril a ṭâm tawh em?” a rawn tihchuan ka sana ka en zauha, hun reilote emaw tih laiin dar 12 a lo ri leh der tawh mai. Hun hi a kal chak a nih ber hi 

“Ṭam ve tawh tho e” ka ti ringawt a, ei châk em em pawh ka nei chuang lo. Damdawiin aṭang chuan min chhuahpuiin a kawta restaurant ah chuan min chawlhpui zuia, rinai takin an thil siam a tui zek lehnghâl.

Thil ka ei mawlh mawlh lai chuan Timothy-a chuan min nuih leh suk suk ṭhin, a enga tak chu hre leh ang maw? 

“Enge min nuih renga? Diklo a awm em ni?” ka tihchuan a lu thingin “I hmuhnawm reuh êma, thil i ei ve pang pang kha hmuh a nuam dangdai ṭhin, ei i theih ang hian ṭhang duh phei la chuan kan che lohna che a rei tawh viau ang“ a ti kher erawh ka ner sak sak mai, ngeiawm thei lutuk.

“Ka in châwm thau vek dâwn, nupuia min neih duh ṭalh leh vawkpui nupuiah i nei anga a nimai“ ka ti chu a nui nasa leh tawh viau.

“Inneih vat chu kan ngai a ni, ka upa mah mah dâwn tlat. Hetiang chuan miin doctor ve si nupui tur pawh hmu theilo” min ti vat ang” a ti erawhin min ti nui leh hak mai.

“Nghak fan fan phawt la, nakinah te chuan kan la ti ve mial mai thei asin, tak takah ka ṭhiannu pawh pasal neih a tum deuh tawha, an ni inneihna lamah pawh chuan ka kal angai dawna, nakinah chawlh ka dil hunah che min hauh loh nân ka sawi hmasa a nih hi aw, min hau miah suh” ka ti leh chu za tak mai hian a rawn nuia.

Dâwr chhûnga awm ve te chuan min en hrek hrek bawk si, awm an ti nuam lo lek lek mai.

“I awm loh daih chuan ka khua ava har awm ve, engpawh chu nise i châm reilo turah ngai ila ka lo nghâk thei mai ang che” a ti chu ka thaw ve huai mai.

Zânah Mawii chuan min rawn beleh ta ngeia, palai te nên pawh an in be tluang thei tih a sawi chuan ka lo thaw ve huai, tûnah chuan a hmangaih leh a mah hmangaihtu a thlang tawh dawna, ka lawmpui lo theilo, u Rinpuia nên khân la inzui ta ila kan inneiin fa hial kan nei tawh zâwk ang mawle.

Mahse chutiang chu thleng lovin tûnah chuan kan in mi hran tawha, kan inkar a hla mah mah bawk.

“An rawn kal nawn leh hunah a ni tur kan tuk fel dawna, chumi a zirin ka rawn zin thla ang. Min lo buaipui ngei ngei ang che, mahse ka huphurh leh deuh ṭhin, innei ngawt ila ka nun hi a hrehawm angem tih ka ngaihtuah, tûn ang laiah chuan mona chhûngte hi an pawimawh an ti sia” a rawn tichu ka nui haka.

“I rilru a awm ang khân ti tawp rawh, engmah huphurh tur a awm hleinem, i hmangaiha, a ni pawhin a hmangaih bawk che a, mi pahniha hlimna aia pawimawh a awm lo. I rawn zin veleh kan bazar nghal ang, innei zung zung rawh u. In fate hmêl pawh hmuh a châkawm a lawm, ka rawn zin khât sia inhmuhna hun remchang a nimai“ ka ti chu ani pawh a phûr hmêl ta deuh.

Dik tak chuan kumhnih chhûng khan ka zin lo hrim hrima, ka be pawh ngai heklo. Tumahin ka number thar an neilova, Mawii chiah hian a nei bawk nên tuma chanchin vak ka hre ngailo, an la inkâwm zel tih erawh ka hre thung.

Mawii nên kan in biakna kan tih tâwp hnu chuan ka in ngaihtuah neuh neuha, palai an kal nawn leh chuan a ni tur thleng an ruat tawh dâwn tih ka hria a, ka phur ru viau bawk. Chutih rual erawhin ka kal a nihchuan Zorinpuia ka hmuh ngei a ngai dâwn tih ka hria, ka tuar thei em ang chu maw.

A hmêl ka hmu leh a nihchuan pângngai taka ka hmuh theih tawh hrâm erawh ka beisei, chutih rual chuan ka zâm a, hmuh ka hreh rualin hmuh ka châk bawka, Fakan ṭhianah a hmang dâwn tiin Mawii khân min hrilh a nih kha, a nih chuan chiang takin kan in hmu dâwn tih ka hria.

A chanchin hre zawm tawh ngai lo mah ila a thusawi ṭhin te erawh helaia ka haw a kan inṭhen hnu thleng hian la zawm ṭhin ka nei bawk.

Zân a rei tâkah chuan mut hma in tiin ka room aṭang chuan chhuakin fridge lam ka pana, tui vawt chu ka in nghâl khalh khalh bawka, ka dang ro lutuk pawh a reh ta deuh, helam chu ruah sur reng mahse boruak hi a uap churh renga, a hrehawm lam mah chu a ni.

Ka room ka lêt leh dâwn lai chuan ka nu leh pa room lam aṭangin thâwm ka hria a, an inhau ni ngeia ka hriat avâng chuan kal pêl mai lo chuan ka hnaih zela, tûnah chuan an ṭawng pawh ka hre thei tawh.

Enge an sawi erawh ka hrethiam hauhlo “Kan vau chiang tawha, mi pangngai a nih chuan a hnaih ngam tawh lovang, a nu leh pa pawh in an sawi tawha, an inhmu leh tur erawh a ṭul hauh lo“ titu chu ka pa ani. Enge an sawi hi a awm zia ni ang? Tunge an vau chu? Engthil nge an sawi ka hrethiam hauh lo.

“A buaithlâk emai, hei chen a awm tawha, pasal kan neih tir vat chu a ngai a ni” ka nu in a tihchuan keima chungchâng an sawi niin ka hre tawh. Ka ngaihtuahna a buai mapa, tûna an thusawi kha tu chungchâng nge ni ang? Engvanga ka hmuh hlau tlat nge an nih? Tu nge hnaih loh tur tih an sawi chu ni ang?  Ngaihtuahna an tibuai map mai.