DUHLAI ZORINPUIA CHAPTER 14

DUHLAI ZORINPUIA 

CHAPTER 14

In chhûng kan lût chu an bengchheng leh luai luai tawha, Mawii leh Faka pawh kan hau zo chiaha an in hnial erawh a la ngai reng mai. Midang lah chuan an nuih char chara, khap pawh an tum lo an lâwm zâwk emaw ni?

“Lalfakzual min tilui reng suh aw, ka mood off lai a nia maw ka chhu pâwng lawlh duh mai ang che. Ka ning, mipa hnial hrat lutuk” a tih laiin Faka zâwk lahin a mood off chu a lâwm zâwk nge “Nanga mood off leh off loh ka ngai pawimawh lo, mipa ka nih hi mipa” a sawi zo hman lo “A nih chu nang hnial reng tur che in ka awm peihlo ka haw dâwn” ti a chhuah a tum chu kan lo dang vata.

“Haw a ngai lo, Faka nangpawh hmeichhia khing reng suh, in hahthlâk emai. Inngeih tak te hian awm ve teh u” tiin inthlâk turin ka room-ah ka luh sana, ka chhuah leh chuan an lo inhnial tawh êm love.

“Thil ei ang u pawisa thawhkhawm ila” midang chuan tiin an in chawk phura, ka puar tihchi pawh a ni tawh lo, an lei lui leh tho tho dawn. Mipa ve si heti em em a ei thei hi ka la hrelo, sawi tawh miau hek pawisa chu 20 te te a inchawi ṭawmin Kimkima chu an tir chhuak zuia, a naupang ber a ni bawka tirh berah an neih tawh.

Mawii bulah chuan ka ṭhu nghâl vat, a hmêla lungngaihna la lang chu ka hmuh hmaihlo. A la tir êma ana te pawh an kiang mai mai dawn hauh lo tih ka hria “I ṭha tiraw?” midang hriat loh tur chuan a beng bulah ka zâwt a, a rawn nui nghal var var mai.

“Ka ṭha a lawm, ka tuar lutuk tawh lo a nia. Ka rilru ka tina rei hman lo, hma bâk leh ka koah thil tam tak a tla a, hmeichhe nêp tak leh no tak anga ṭap reng hman ka ni hleinem, ka chhûngkua leh ka hma hun ka ngaihtuah angaia, mipa pakhat avânga in dawm kûn renga ka nun tihchhiat ka tum hleinem” tiin a nui saka.

Ka thaw huai mai “A châng chuan mâwl ka intia, ka lo inbum nawn tir leh kha ka mâwl ngawih ngawih te hian ka hria, ka vanduai a nih hi. Min hmangaih lo tu ka lo hmangaih miau si a” tiin midang in an hriat leh hriat loh a enkuala, mipa ho erawh an lo ṭawng ring leh tawh bawk nên engmah an hre hauh lovang.

“Mawl in ti reng reng suh, inchhîr bawk suh. I hmangaihna kha a inchhîr awm miah loh a nia, amah zâwk kha mimâwl a nih kha, hmangaihtu kalsana a tina duh kha a mâwl fe zâwk, i hmangaihna kha a phulo lutuk zâwk. Pathianin midangte hmangaih turin min ti a, kan hmangaih theihna hi a hlu zâwk ania aw, hmangaihtu hrethiam lova tina a, kalsan duhtu zâwk kha mi mâwl chu a nih kha, nakinah inchhîr hun leh nat hun a nei leh ngei ngei dawn, nupui a nei kher lo thei bawk. Mahse chutih hunah pawh i hriat chian tawh lakah kîr tawh lo ka duh, mi rinawm lo chuan sim hun an nei tak tak lo, nat nawn reng ai chuan kalsan mai tur” tiin ka thiam ang ang chuan ka hrilh ve a.

“Hmangaihtu i nihna kha inchhîr ngai suh, nangmah hmangaihtu zâwk che i zawn a hun tawh zâwk anih kha. Kan hmangaihte ai min hmangaihtu an hlu fo a nia, kan hmangaihte chuan min tina, min hmangaihtu chuan kan hlimna tur an zawng ṭhin, kan hmangaihte chuan engmah kan tân an tingailova, min hmangaihtu chuan an theih ang angin kan tân an inhuam ṭhin. Mi ṭha tak i tawng leh em em ang, i nghah peih a ngai a nihkha, hmangaih lo tu avânga nat chu mahni nun tihchhiatna a ni a, keimahni min tiboraltu a ni fo, i hneh thei ang tih ka hria. Hmangaih lo tu aṭang khân nangmah in fuih hlauh zâwk la, chu chuan i hma hun zêlah pawh tawrhchhelna leh finna a pêk belh zâwk ang che” ka  sawi zawm dap dapa.

A ni pawh a rawn bu nghat nghat mai “Nang ni pahnih kha eng êm êm nge in sawi? Enge in phun sep sep renga, min rêl chiang lutuk” Maman a rawn tihchuan Mawii nên chuan kan melh haw a “I mumang a nihchu, rêlna tur i awm em ni? Mipa hriat ve chiloh a nih hi kan sawi, tikhan titi mai mai rawh u, hmeichhe buaina chu hmeichhia bawkin kan chingfel thei” tiin Mawii nên chuan thudangah kan pakai zui ta daiha.

U Rinpuia erawhin kan thusawi ṭhenkhat chu a hre ngei ang, mahsela mi anga han sawi phawng phawng chi a nih loh avângin hrelo ang mai chuan a awm renga. Kan bulah a ṭhu ngawi rûn reng ringawt, Mawii nên a kan nui leh ṭhin, thudangah kan pakai tâkah chuan a ni pawh a lungngai hmêl kha a bo vek tawha, a hmêl hmuh pawh a nuam suai suai mai.

Kimkima rawn lêt chuan lays vêl a rawn leia, a mipa zâwk chuan nghâk thei heklo. An ṭhet nghal zung zunga, ei tur a awm hi chuan an phûr em em reng mai a ni “Mikhual nula rîm tur te hi in hre ve lo nge, in zui lah kan hmu hek lo. Nang ni hi in lo mipa chiah lo tak tak nge maw ni? Hmeichhe zui emaw bialnu emaw neih tih neilo” ka ti chu u Rinpuia zâwk chuan ka chalah a rawn kuk lawlh mai.

Mawii lah a lo nui nasa êm êm lehnghâl “Aiah! Tinge khatia min kuk kher a, ka sawi dik lo em ni? Nupui neih an tum ve te a nih chuan bialnu tal neih a hun tawh a lawm” tiin an mahni chu ka enkuala, dik tak chuan hmeichhia an ngaihsak lo lutuk hi ka ngaihtuah lo theilo.

Tûn ang laiah mahni mipat pui kawp chîng Mizo ah pawh an tam si, an in ngaizawng ka tilo na chu an ni ve palh ang tih ka hlau. An hmêlṭha ve tho sia, bialnu ṭha tak tak nei tur an ni mawle, tuai kan ngah ta lutuka mipa kan neih tlêm sa nên ka tha a na ve riau zel, mipa ṭhenkhat lah mi hmuhah tuai haw viau si mahse kawp hreh leh miahlo, mahni mipat pui ngei ngaizawng hreh lo hi a rûkin an tam tawh lutuk tlat bawk nên ka hlauthâwng ve miaua.

“Kan tuai kher lo, duhtu nei ila chuan hei chen kan single nâng, kan duhin min duhlova, min duh tu kan duh bik silova kan single mai loh in, kan duhte chuan min duh ve se kan nihpui em em ang” Sawma chuan a rawn ti hluk hluka.

“In be tam tâwk lo a nih chu, ei in thei lutuka an hlau cheu a niang” ka thusawi avâng chuan an rawn khi ṭhaw a “Um engpawh nise mahni hi in hmangaih hle ila kan taksa pawhin a lo ngeih nge nge a nia, ngaihzâwng han nei ila kan han duh ve em em anga, mahse mi lo kawp leh ta si se rilru nat avângin kan chaw ei te a tui lo ve anga, rilru hah reng rengin kan chêr ruak ruak anga, taksa in a tuar anga khatiang tur kha chuan ka peih ve lo, min duh tu chuan min luhkhung tawp mai rawh se” Mama chuan a rawn ti dap dapa.

Midang lah chuan an lo la thlâwp em em zui “A dik chiah, hmangaihna avânga in that leh mu theilo, chaw ei theilo tuar tlawk tlawk sawi tûr an tam lutuk. Single avânga thi ta ka la hrelo, kan chaw ei a tui renga, ngaihtuah hah tur kan neilo, tihian a nuam fe” Faka pawh chuan a rawn ti ve a.

Mawii ka melh zawka, a ni erawh engmah sawilo in kan thil ei lai chu a ei zawm mawlh mawlh thung. Ava han thutak thei bik tak, engtin nge nui miah loa a awm theih ni? 

“Nia a dik tho mai, ngaihzâwng neihchu tih lâwm tum reng renga hmanhlelh angaia, chubâkah kan lung a awilo sam bawk si. Kan inhauh reng phei chuan a ninawm, thikthu a chhe ve bawk nên englai pawha thik tur hmuh phei chuan a nuam miahlo aiah! Ngatinge min lo sih? Ka la sawi zo reng reng lo” u Rinpuia chu rum zetin ka ena.

Ka thusawi lak lawh laia min lo sik sawk chu ka ngei ve êm bawk a ni “Keimah bâk ngaihzâwng ila neilo a ni lo'm ni? Min tih lâwm ilo tum chawp mai mai a maw? A ṭha a nih chu” tiin ka bul aṭang chuan a tho chhuaka, tap lamah a va ṭhu hmak a nih chu.

Midang lah chuan enin an nui leh suk suk ṭhin, huiham u Rinpuia ka lo ngaihtuah tel leh pek lo. Kan inthlêm leh ngat ngat angai dâwn anih hi.

“I sawi dik zia chu saw a lan nghal bûr mai saw, tap pui kawmah a ṭhu tûm luau mai alawm. Kha kan sawi rêng kha, ngaihzâwng neih chu e tûnah rih chuan nahi hi a ni tawp mai. Tih lâwm tum reng renga i buai leh tak tak a ngai dâwn a nih kha, nang ngaihzâwng nei em em tê, keini chuan buaipui tur kan neilo, nang chuan i nei?” tiin an zavai chuan min nuiha.

Mawii tak ngial pawh a lo nui ve hak hak mai, Zorinpuia ker kawr chu ka ngei lutuk, ka thusawi lai laia chutia lo awm. Mi kan titi ve a nimaia, amah ka ti pawh a ni tawp silo, ka thlêm loh chuan a titau rei leh dâwn ropui si.

“In ṭawng thei si” ka tihlai chuan an rawn nui leh haka “Ṭawng theih ve bawk lohin, kâ kan neih man a awm nâng, midangte kan biak ve theih nân Pathian in aw ṭha vêk vâwk leh ring ṭha tak min pe a lawm, kan ṭawng ve loh in, ṭawngtheih lo chu an ngawi reng mai a ni. Awmzia a awm lo, mi in min hauh mawlh mawlh lai pawhin ngawih bâk tih theih a awm lo” an va han rapthlâk tak.

Sawi tur leh mi hnialna tur hi khawi aṭangin nge an hriat sen ni? “Ninawm ka inhnial peih lo” tiin u Rinpuia lamah chuan ka phei sana, thuk vut chu a lo hawlh a lo hawlh a nih chu, mi pawh a en duh lo. Midang lah chuan min rawn ngaihsak tawh der silo.

“Le! Kan puar tlâng ta bawka, i haw ang u. Lo in thlêm rawh se, sawng vâng sâwn alawm ngaihzâwng neih ka peihlo, inthlêm reng a ngai mai a ni. Ngaihzâwng nei lo chuan thlêm tur leh rilru natna tur kan neilo, ngaihzâwng neih nuam a ti bawka. Tisawn in thlêm zankhua rawh se” tiin an vai mai chuan min chhuahsan diaka.

Zorinpuia chu ka haw ngei mai “Keipawh ka mu dâwn, ka ning” tiin room lam pan ka tum chu rang lutuk hian ka kâwngah rawn chelhin amah delh rawk khawp chuan min pawt lêt a, kan la tlu ṭep zui.

Ka phu nasa bawk nên thawh mai nachâng pawh ka hrelo “Engtikah mah min mutsan tum leh tawh suh ang che. Ka titau khatia min mutsan i tum chuan ka thlêm tawh bik dâwn miah lo che a nia” tiin ka bengbulah chuan a rawn phun sar sara.

Ka ngawi kar mai, chutah tho chhuakin kan in tuai mâm thuak thuaka, ṭhutthlengah chuan ngawi renga ṭhu in a âwmah chuan min kuah beta, “Ka hmangaih êm êm nu” a tihrual chuan ka nui leh vur vur tawh, hmangaih tih thu an sawi hi chuan ka hlim em em zel.

“Ka hmangaih em em pa” ti ve zatin ka nui hak haka, “I ṭhiannu kha a ṭha meuh maw? A hmêl kha nidang a ang lo riau mai”a tihchuan ka en haw a, engtin nge a hriat theih? Mi a chîk ru hle tih ka ring nghal mai.

“Nia eng lo a nia” tiin Mawii te chanchin tlângpui chu ka hrilh thuak thuaka, ngawi reng hian a lo ngaithla ve reng bawk. Ka sawi zâwng chuan ka tha a na ṭha leh, a mipa kha he khuaah hian awm se chuan kal chilhin ka ṭawng khum duh ngei ngei ang.

Duh tak tak lo tur leh rinawm thei lo tur chuan midang lakah beiseina leh hlimna va pêk loh tur ania, mihring thinlung hi infiamna mual a ngaih miah loh tur. Keiniin thutaka kan lâk loh kha midang tân erawh an tâna na lutuk leh rinna zawng zawng an nghahna a ni a, midang te thinlung infiam nâna hmanga nei leh duh lo tur leh kawp tur chuan va biak loh mai tur. 

“Mipa a nilo a nih chu, mipa dik tak chuan hmeichhe thinlung a fiamin a tihnat sak ngailo, hmeichhia chu a âwm nem zawk in ni a, mipa thinlung sak tak pawh ti tuiral thei tu in ni thung. Duat taka enkawl in phu hliah hliah, mipa a bialnu bula dawt sawi fo ṭhin chuan hmangaihna dik a dawng thei ngai dâwn lo a nih chu, hmeichhia chu mipa min ti mipa tu in ni a, âwm nem tê si hian mipa thin ram tak pawh tui anga ti nem leh thei tu in ni” u Rinpuia chuan a rawn ti dap dapa.

Chutah sawi zawm lehin “In mittui in mipa thinlung a ti nêma, in tawngkamin a tihlim thung. In che zia in chakna min pe a, in mizia in min chawimawi bawk, mipa hmangaihtu hre lo khawpa â, hmeichhe thinlung buma infiamnana hmangtu mipa chu mipa ah chhiar tlâk a nilo a nih chu, mipa dik tak chuan a hmeichhia chu a hauhva, a venghim ṭhin. A lak aṭangin tumahin an lâk sawn a phal hek lo, bumna thinlung pe lo vin dawhtheihna leh duhsakna nen a enkawl ṭhin” tiin a sawi dap dapa.

A thusawi chuan min hneh takzet, engmah sawi lo chuan ka ngaithla kara. A thusawi chu a ngaihnawm ka tiin hriat a nuam hliah hliah mai

“Nangpawh hre reng rawh, ka lak aṭanga kalsawn i tum chuan seh châk che a lo châng rêng tu che chinghne ko ham tak takin an seh mai ang che. Chuvang chuan ka huang hung chhûngah hian awm la, ka vênhimna hnuaia i awm chhûng chuan tumahin an tina lovang che, ka lak aṭang awmsawn lo la i him a nimai" a rawn ti chu ka ner nâng a.

“Nangmahin min kalsan a nih loh chuan ka kalsan miah lovang che ka tihkha, ka thutiam ka tiam liam ve lo ang che. Nangmah kha rinawm rawh, keichu ka rinawm sa a nimai, ka ring che ka tih kha. Ka rin reng theih nân che chêt lâk erawh i tum tur a ni, ka hmangaih che ka tih kha” tiin a biangah chuan ka fâwp zauha.

“Hmeichhia chuan in hmangaih tawh chu in vuana, mipa chuan kan hmangaih tawh kan kal tir ngai lo” ti a sawi leh chu amah chu ka en tawpa.

Hetiang ang thu sawi tûr hian ka beisei ngai lo, ka beisei loh dân deuhin a ni a awm ni. Amah chu ka en ṭhin, thuril leh ṭha, dik pui pui sawi chhuak tur chuan ka ring chhin ngai miahlo, a ṭhen tân phei chuan kan pahnih nun hi a boring an ti hial ang. Mahse kan awm dânah erawh kan lâwm a, tumah dang kan mamawh bik chuang hauh silo.

“I ril reuh e, khatiang thu sawi tûr phei kha chuan ka ring ngai lo che. U Rinpui, hriat chian i har” ka ti ta thlâwt a, rawn nui sukin a kut chuan ka kut chu a rawn hum hnana, a fâwp zauh bawk.

“I hmangaihna mit nên ngei khân min en la nitin min hrechiang telh telh mai ang, hriatchian lutuk erawh min tum lo la, hriatthiamna nên a min en tum zâwk ang che” a rawn tileh chu ka tih ngaihna hre tawh lo chuan ka bân ka phar vaka.

“Khatiang ka sawi thiam ve duahlo, tak takin Mawii chu ka khawngaih ania aw. Mipa hi chu in mak, hmangaihtu pawh in hre lo der duha, hmangaih lotu hmeichhe nalh leh hmêlṭha, mawnglian leh hnute lian deuh deuh in buaipui êm êm a, a tâwpah chûngte chuan hlimna a pêk loh cheu zia in hriat leh meuh chuan in tlai tawh ṭhin sia. Hmeichhe rinawmna chu e a kumhlun lo in ti leh hnuhnawha, hmangaihtu leh rinawm taka nghâk tu cheu in duh loh avâng tih lam reng in hre lo” ti a a mah ka phun khum titih chu ka hmui a rawn hup vata.

“A tâwk ka tlâwm, mahse khatiang chu ka ni ve lo ka tih kha. Ka niin i hre reng reng em ni? Keichuan hmangaihtu ka hria che a, ka pan rêng che a nih hi maw? I rawn tlai ṭêp mai pawha, ka hmuh tirh che aṭang khân ka mit la nghal nalh lo la chuan ka hnaih hauh lovang che, i ṭhiannu erawh a tâna khuanu ruat a la tawng lo ah ngai rawh. A mah hmangaihtu a tawn hunah chuan a dam leh em em ang, hmangaihna in min ti na, hmangaihna vêkin min tuam dam leh ṭhin. Hmangaih lo tu in ser min pe a, hmangaihtu in a rawn tireh ṭhin” tiin ka chalah chuan a fâwp vang vanga.

A thusawi avâng chuan ka thaw huai huai mai, ka ṭhian a ni a. A hma lam hunah hlimna hlirin hmuak tawh se ka duh, a dinhmun khirh zia leh a nun hrehawm zia ka hria a. Hlawhtlinna nên hlim taka a awm ka duhpui takzet bawk, kan inkawmna a la rei hauh lo; mahsela rei tak ka lo kawm tawh te aia ka tâna a pawimawh loh bîkna a awm reng reng lo.

Ṭhianṭhatna chu in hriat rei leh in kawm reiah a in nghat lova, hmangaihna atân thinlung leh rilru a pawimawh ang bawkin ṭhian ṭha ni tur pawhin thinlung leh rilru a pawimawh ber tho. Rei tak kan kawm tawh hnunglam aṭanga min rêl a, kan chhiatna ngawt duh pawh an awm theia, rei vak lo kan kawm mahsela mi kâra kan awm loh lai pawha min fak em em mi an awm ve thei bawk. 

“I ril reuh e, ka zak zâwk dawn a lawm. Ka duh hmasak chu nilo la i ṭawngkam thiam avângin ka tlânsan nal nal ang che” ka chalah chuan a rawn tauh nghal data “Mâwl mâwl suh,  a ṭul vânga sawi ka nih kha. Ka ṭawng tlêm leh ṭawng tam rawh i tia, ka ṭawng tam leh min ning leh bawk si. Engtin nge min awm tir i tum? I bialpa hi nun laklawhah min awm tir i tum em ni?” a tihchuan ka nui lo theilo.

A sawi dik ve tho bawk sia, a ṭawng tlêm chuan biak dân tur ka hre ṭhin lo miau a lawm. A sawi pawh chu an âwm hliah hliah mai “Um ka hau tawh lo ang che, mahse khatiang thu kha chu ka bulah chiah sawi rawh aw, ih maw? Nizânah ka mumangah ka hmu che a, fate kan lo nei tawh vêl mawle. A tak tak emaw tiin ka lo hlim em em a; mahse ka harh chhuah rualin a bo leh vek, ka ui a nia aw” ti vang vangin amah chu ka ena.

A châng chuan naupang chhia min ti thei ngawt ang, keilah hian puitling deuha thusawi ka tum pawh hian ka thei ṭhin lo, ka nun dân hi a mâwl mang ka ti mai. Ka in siamṭha thei der lo lehnghâl, ṭhenkhat tân phei chuan ka mize langtlang lutuk hi an huat tâwk a tling ṭhin viauin ka ring.

“Nakinah fa chu kan la nei dâwn a lawm, in khatah kan chêng dûn tawh anga. Zantin in haw san ngai tawh lovin ka kuah phakah i mu tawh anga, ka nupui tiin ka ko che anga, nangin ka pasal min ti tawh bawk anga, nitin kan nupa a hmalam hun thlirin ka fa i paia i dul lo danglamte hmuhnawm ti takin ka thlir ang che a, kan fa a pian hunah thlengin i kiangah ka awm anga. Nitin an ṭhanglian hmêl kan thlir dûn ṭhin dâwn alawm, chutiang hun a thlen hunah chuan khâng zawng zawng kha kan ti vek ang” a ti dap dapa.

“Ka châk tawh, inneih thuai thuaia in mangṭha reng ngai tawh lo hian keipawhin zantin i âwm nghenga muta, i hnathawk haw lo hmuah che a hlim taka chên dun ka châk tawh. Tûnah rih chuan kan suangtuahna mai ala ni si a, kumte han liamin Pathianin rem a tih chuan kan duhthusamte chu thleng mawlh rawh se” tiin ka lo sawi ve a, ka thusawi chu ka ngaihtuah zui vang vanga.

Ka suangtuahna chu ka mitthla ah a châm reng bawk nên nupa kan nih hun tluka thlakhleh ka neilo. Hlim taka kawngka bula dinga lo hmuaha, fa duhawm leh ṭha tak tak hrin sak ka châk a ni.

Mahsela ka nu leh pa hian palai tir dâwn se an pawm dâwn lo tih ka hria, tûnah pawh a rûk in bânsan turin min ti renga. Doctor Timothy lah khân ka awm lo chung pawhin kan inah lêngin min duh zia vêl a lo va sawi ṭhin tih ka nauin min hrilha.

Ka nu leh pa hian mâkpa atân an awh zia ka hailo, kei erawhin u Rinpuia chu thlah mai mai ka tum lo. Timothy pawh ka biak tawh loh phah, ka haw thlâk khân ngaihzâwng ka neih thu chiang takin ka hrilh tawha, chuti chunga ka chhûngte bulah a lo va sawi leh kher chu ka haw em bawk ani.

U Rinpuia erawh engmah ka la hrilh duh lo, a tlâwm la in kan buai hrep ka hlau. Chutih rual erawhin kalsan tur a ka nu leh pa hian min ti luia, midang neih luih tir min tum a nih vaih chuan, dân khatna kher nghâk duh lovin u Rinpuia hi ka inruk tir mai ang tih te thlengin ka ngaihtuah vek tawh.

Doctor Timothy chu khawvêl lam thlir dâwn chuan pasal atâna ṭha tur leh nuamsa taka daihlim hnuai a ka awm theihna tur a ni tih ka hai biklo. Mahsela khawvel lam nilo in hmangaihna lam thlirin u Rinpuia ka thlang tlat thung, Doctor emaw officer emaw pawh a ni ve hauh lo.

Daihlimah min awm tir mai mai thei hauh lovang, mahsela ka thlang tlat tho. Min enkawl theiin sum nilo hlimna leh hmangaihna min pe thei dâwn tih ka hre chiang a ni. Thla tin sum la lût dâwn lo mahsela ka thlang tho tho.

“Enge i ngaihtuah ṭhin, a taka i ṭawng chhuah ai hian i ngaihtuahna thu hi a thui zâwkin a nia ka rin. I reh vung vung zel mai, nang hi keilo mipa dang vei deuh te hi i nei a nilo maw?” fiamthu titiha a rawn ti chu ka chek hlaka.

“Teuh lo mai, ngaihtuahna ka sên pawhin nangmah tho ka ngaihtuah che. Ka mitthlaah i hmêl a awm renga, ka bengah i hming hlir a ri, keimah ah hian Zorinpuia tih hlir a awm” ka ti chu a rawn nui hawk hawka.

“Phakar reuh lutuk, thil dang ngaihtuah tawh reng reng suh. Keimah hlir hi nangmahah hian awm sela a ṭha, palai rawn tirh mai te hi ania ka duh ni” a tihlai chuan ka thaw ta haka, alakah zêp reng hi ka duh lo. Keimah ka hrehawm mai mai, engkim hria sela mahsela ka kalsan dâwn loh zia hre bawk sela ka duh.

“Ih eng lo a nia u Rinpui, ka nu leh pa hian Doctor pakhat nei turin min ti a, chupa chu ka haw thlak zawk laia ka putea enkawl tu a nia. Min ngaizawng ta tlat si a, nangmah nên kan inkar pawh ka hrilh tawh mawle, mahsela ka awm loh hnu thlengin kan inah a lu va kal ṭhin a. Ka nu leh pa a lo va tlawn lungawi a niang, ka nu leh pa in nei turin min ti a, mahse neih ka tum miah lo a nia aw. Min nawr luih an tum a nih pawhin nangmah bâk ka nei dâwn lo,nangmah pawh ka hrilh tawh che kha” tiin a tâwp lam chu ka sawi zawi viau mai.

A ngawi rauh rauha, eng rilru nge a put ang tiin ka en renga. Ka nu leh pa a vânga a rilru a thlâk erawh ka hlau takzet, an mâkpa ni tura an duh loh thu an hriat hnuah tu mipa nge pângngai taka awm thei ang ni.

Thinphu dep depa ka awm lai chuan a rawn thaw hawk a “A nih leh tuithlar dawn che sela min la vuan duh tho a ngem?” a rawn ti fiah ta kak a, a mitmengah chuan thudik taka chhâng tura min duh zia chu ka hmuh hmaih lo, chuan ka chhâng ngei bawk ang 

Ka lu chu ka bu nghata, “Ka sawi tawh kha, engpawh thleng se ka thlah dâwn lo che. Nangmah zawk hian min kalsan ang tih ka hlau a sin, ka chhûngte avâng hian i thinrim ka hlau hle bawk, mahse an thu zawm diak diak ka tum hauh lo a nia aw. Ka kalsan ngai dâwn lo che, min kalsan duh a nih thung chuan sawi thei ka neilo” tiin ka kûn daiha.

Kan boruak a inthlak leh vek tawh bawk nên ka nui thei tawh lo. Eng thutlûkna nge a siam ang tih ka ngaihtuah a, ka nu leh pa ten an duh loh thu a hriat chuan a tlawm a lâk ka ring ve tlat bawk si.

“Min en teh, tinge khatianga i kûn renga? Min hmangaih tih ka hria a lawm, khalam kha chu ngaihtuah tawh suh. Engtikah emaw an rilru a la hmin em em ang, ka kalsan dâwn hleinem che, nangpawh in min kalsan hauh suh. I chhûngte rilru chu i rilru a ni hleinem, tuithlar pawh huama min vawn tum tu chu engtin nge ka kal tir phal bîk ang ni? Thil dang ngaihtuah tawh suh, i rilru tih hah ka duh miah lo a nia, i chhûngte pawh dem ngawt chi an nilo, an fanu i ni a. I nunnawmna tur an ngaihtuah pui che a nihchu, kei thingtlâng tlangvâl mai mai ai chuan a ni Doctor sum la lût reng thei tur chu a beiseiawm zâwk a lawm” tiin a nui suka.

“Sum ka duhlo, nun nawmna pawh ka duh lo nilo in i bulah pawh ka nun chu a nuam sa a lawm, ka hlim bawk. Doctor nupui ka nih avânga ka hlimna tur leh ka nun nawmna tur vak a awm lo, pawisa hian hlimna leh hmangaihna a lei thei lo. Hausakna a tâwp rualin lei chawp hmangaihna pawh a tâwp mai ṭhin, hmangaihna dik tak erawh kumkhua in a tâwp ve thei tawh lo, thingtlâng tlangvâl pawh nila a pawi ka tilo, nitin sum min pe turin ka beisei lo che, sum ai chuan i hmangaihna leh duatna ka thlahlelin ka duh zâwk” tiin ka sawi leh fak faka.

“Hre reng tawh rawh, hausakna chu engmah lo mai a ni. Dam chhûng a daihlo, kan thih rualin a tâwp vek tawh, hmangaihna leh hlimna erawh kumkhua in damchhung mai nilo khawvel tâwp hun thlenga kan chhawm luh theih a ni. Sum ringawt hian hlimna lei thei sela mi hausa tak tak te hi an inthat in drugs addict mai mai an awm bik lovang” ti leh in a phone a rawn rik avâng chuan ka en zawka.

A tu tak chu ni ang maw tûn ang zan reiah “Ka nu a nih hi, ka haw phawt ange. Ka tân rinawm reng ang che, danglam ngai miah suh” tiin ka biangah chuan fawpin a nui var vara. A nui mawi leh tawh lutuk tlat.

“Ka haw vat loh  chuan ka nu in min ngaihtuah a nih leh tawh kha, muttui aw naktuk chu i thing tuah tur kan phur dûn dawn a nia” a tihchuan ka phûr leh em em tawh mai.

“Muttui le, naktuk chu ngei ngeiin aw ka lo nghâk reng ang che, i mangah min hmuh tum la aw” tiin kan in mangṭha zuia, a haw hnu chuan ka mengrei tawh lêm lo. Youtube ah thawnthu play in ka mutsana, mahnitea awm chu a hrehawm châng a tamin thla hi a muang lo ru riau zêl lehnghâl.

Zîngah tho in u Rinpuia nên thingphurh kan tum bawk nên ei rawng chu hma takah ka bâwla, keimahte chuan ka che leh rak raka, mahni te chuan engkim hi a lo awlsam khawp mai.

Chaw ei vatin ka insiam sa a,“I hman tawh em?” u Rinpuia chuan kawmchhak aṭangin min rawn bia a, keipawh rang zet hian ka êm neih ve kawmthlang te ta ka hawh chu hnam nên chuan phurin hrei leh chempui erawh u Rinpuia ka ring tawp, kei chuan engmah nei ve hek lo.

An khuaa hna avânga awm mai mai ka nia, helam hmanrua an hman ṭhin ka neilo va, ka hmang thiam heklo. “Haih jish, ka hman e kal ila” tiin ka pan chho a, midang tello-a kan awm tur chu ka phûr leh viau tawh mai, ka in lo lam zâwk feh kawng lo lamah chuan min kal puiin khawchhûng chu kan pal pheia.

Min lo hmu tu an awm zeuh zeuh nên aw lo thian tâwk leh mi lo fiam lo rêng an awm lo “Innei ve tawh mai rawh u, kha khual nula hmêlṭha hna nei leh nghal chu Rina châr beh hmiah tur kan tih kha. Kha inhmeh te pawh in inhmeh kha le, nang zawng tluk loh rim i nam leh nghal der. Ngaihzâwng nei hmêlṭha thei emai” an rawn tihchuan ka lâi bawk nên u Rinpuia chhakah kalin a hliahah chuan ka biru ti tiha.

Min fiam ngun viau mahse ngaiah ka neih thei der lo, min fiam ngun pauh leh ka zak zual telh telh tih ang vêl a ni. Bâkah ngaia neih a har, patling ṭhenkhat boruak ngam tawh lak lawh lahin zahmawh lam an telh zuk zuk lehnghâl.

Ngaia neih chu har tak a ni “Awi an nghâl theih zia hi, khawlaia vah chhuah pawh min ti tim zo, hmanni pawh nau nei tur ka buaipui tura ka chhuak kha patling pathumin min lo fiam vaka, an bulah tleirawl tê tê an awm ve bawk nên ka zak a nia aw, an lo nui ṭhaw lehnghâl” tiin an hriat loh lamah chuan ka phun ve nasa mai.

U Rinpuia erawh a nui suk suk ringawt, engmah lo sawi ve pawh a tum lêm lo. Ramhnuai ah lûtin ka la kal ngai lohna a ni bawk nên ka hawi kual ruaia, a nuam phian lehnghâl. Dai hnaite mah nisela thing an lianin a ngaw ṭha hle a, a hnuai chu a thelh han bawk. 

Hnim tâwn ngai a awm meuh lo, “Hetah hian kan in nghat mai dâwn em ni?” a tihchuan ka lo bu ve tawpa, engmah hria in thiam ve heklo. A tih ang ang chu ka pawm tawp mai.

Chutia kan ṭhut na tur a sam fai lai chuan a piahah chuan rûl ka hmu thuta, ka phu deuh zuk mai. A lian lêm lo bawk nên ka hlau ṭhak lo, a lo ding ve ar ar reuha.

A âwm a pho lah bawk, ka nuih a tiza tlat “En teh u Rinpui, he rûl tereuhte hian min cho reuh lutuk, lo en rawh. Kan tilui ange” tiin karate kid a a changtupa in rûl tih dân zir nu a hmuha a awm dân ang chiah khân ka kut chu rûl ang chuan ka ti kual ve a.

“Huah, chu khuah” tiin a lu thlêk ang ang chuan ka awm kual ve a, ka nui pah bawk. A rûl alahin min chuk mai a tum bik lo a lu chu a bu lap lap mai lehnghâl, hmawlh rik pawp rualin ka rûl hmuh chu a invial kual nghal nawk nawka.

U Rinpuia chuan vawikhat vaw lehin a mei hmawr aṭang chuan a khaia, a lu chu a lo vaw keh vek tawh mai. Chutah hla deuh takah chuan a paih zuia “Khatiangin awm tawh suh, i ṭhing reuh si” tiin hmun dang a hawi sawna, a nui suk suk chu ka hmu reng.

“I posi ṭhing lutuk kha ka hmu duhlo, bâkah rûl chu hlauh tur thah vat a ṭha ber.  A chuh che chuan tetakte pawh khân i nunna a la thei, chawngkawr lehnghâl” a tih tâkah chuan ka hlau leh hnuhnawh.

“Tak tak em ni? Rûl tur neilo an awm an tisia, a awr a ti phêk thei ka ti rêng a, ka va â tak” tiin ka chal chu ka beng a, a rawn nui leh hawk hawk mai.

“Khatianga i chêt kha ka lo ring ngai miahlova, ka bialnu chuan rûl emaw a in ti a ni maw? I che ve âr âr bawk sia” tiin a nui pût pût renga. Chutiang anga a nui nasa ka la hmu ngailo, a nuihnan a mittui te a tla phung vêl mawle.

“Tinge min nuih vaka, movie ah pawh khatiang khân a lawm an tih ṭhin. Min nuih tawh miah suh” tiin leiah chuan ka ṭhu thla a, kan chung lamah chuan thingzar chu a in zâr pharh duaia, ni êng tlêm tlêm a rawn lût tih loh chu a daihlim nuam hle.

Nui var varin u Rinpuia rawn ṭhu ve chu ka nghêng a, “Nizan chu i nu chuan a hau ta che em?” ka ti chu a lu a thing mai a. “Tlangvalin nula a rîm a, engah nge min hauh ringawt ang, mo an neih châk tawh thu an sawi renga. Mo neih vat an duh chuan an fapa tân hian hun an pêk ve te pawh a ngai a lawm” an ti ngeiah.

Hepa hi tûnlai chu a ṭawng mak thei riau, midang in an sawi ngailo nilovin a ma zia nên hetiang thu sawi ve duah tur hi chuan a in hmeh ve lo ka ti dawn nge. Ka hmu mak riau zel, mahse ka duh zual zel bawk sia, “Makpa chhungkhungin ka awm pui kûk palh ang che aw, tak takin fur a thleng ṭan sia, tui tam tak tak hma hian luiah kal ka châk, lui sangha ka ei châk lutuk” tiin ka duhzâwng chu ka sawi leh phawng phawng tawha.

Tûnah an hna âwl lai tak a ni nên chuvanga in thlahrung lutuk duh lo pawh ka ni, ṭiau sangha hi Mizo lui sangha ah chuan a hâng tui ber an ti ṭhin a, ka ei châk zual. Lui dang sangha a tui lo an ti chuang lo na in ṭiau sangha ei tawhin a dang bik an ti fo bawk nên chuvanga kal châk ka ni pakhat.

“Midang ka lo be chhin dâwn ania, zân riakin kal ila a ṭha ang. I tih chak chu kan ti vek ang ka tih kha” a tihchuan ka nui vur vura, tûna thu an âwih theih lai hian thil sawi chu a nuam ber. Mipa chu in ngaihzâwn lai chuan a zâwl dawh zawk an niin thu an âwih lai tak a nia, inneih hnuah chuan an dang zar zel an tihkha. Chuvâng chuan in ngaihzâwn lai, thu an âwih ber lai hi chuh thiam angai reng a ni.

In ngaihzâwn lai chuan mipa sual ber an tih pawh hi an kâ pawh zen ila min seh lo ang tih ang zawng zawng an nei ṭhin. U Rinpuia hi a sual ka tihna pawh a ni chuang lo; mipa ho zia ka sawi ve na mai mai a ni.

“A nuam dâwn lutuk, khulamah pawh ṭhianho in tent nên kan riak lût ṭhin a, zânah buk tualah mei chhemin kan zai nasa thei lutuk. Ei tur leh in tur kan keng bawk anga maw, an peihin ka ring, lo sâwm ngei ngei rawh. Hlo thlawh in hun chhoh chuan in thei tawh âwm siloa, lo lamah in ṭul dâwn ropui si” tiin ka sawi zui zat zata.

“Ok, thing chu i han fawm ṭan tawh ang hmiang. Kan haw tlai lutuk hlauh ange” tiin amah chu a ding chhuak zuia, kei erawh chem sah dân chu hre ve mah ila a hriam hmêl si ka in sah palh chuan a na dâwn lutuk tlat.

Ka tih ngai loh zia u Rinpuia pawhin a hrechiang bawka, thing fawm tur pawhin min phût hauhlo, kan piahlamah chuan pheiin rin ai takin mi châk lâkna ro a lo awm nuala, chûngte chu fawmin a tan zung zunga, a bulah dingin a tihdan chu ka en reng bawk.

Zir thiam ve zel ka duh, ka tlaw lutuk chuan min iai ka hlau. A thing tan sa chu Êm bulah chuan ka va dah phei ve zêla, thil dang tih theih ka neilo nên ka buai ve viau mai, fiamthu ka thawh pah zauh zauha, a ni pawh in min rawn zâwm ve ṭhin bawk.

Tûnah chuan kan inhriat tirhah a ṭawng duh lo lutuk te kha an reh ṭan a, a titi bawrh bawrh châng a tam ta mai. A nu leh pa lahin min ring tâwk bawka, ka chungah an felin mi lah an duat, ka chhûngte ve erawh tûn thleng ka la hmin theilo.

Ka naute erawh ka lam an ṭang ṭha viau thung, ka nu leh pa ber hi kan buaipui an ni a. An ni lah an luhlul zia leh an tih lohna lamah chuan an ngên zia keimah ngei hian ka hria a, an rilru an thlâk mai mai lahin ka ring heklo.

Doctor Timothy-a pawh ka biak phah hial, kan chhûngkaw inkar buai theihna tur lam lo ti tawh lo tûra ka tih khân min duhthu a la rawn sawi fan a nih kha. Doctor ve meuh si chuan keiai ṭha a hmuh hnem dâwn tehlul nen kei kher engvanga heti taka min bawh zui mai nge a nih ka hre hauh lo.

Bialpa nghet ka nei tih a hre chung pawhin a beidawn dâwn loh thu min la hrilh ve ṭang ṭang a nih kha, u Rinpuia che vêl chu ka en renga, chutih rual in khaw chhûng lamah chuan thingzai khâwl a ri vuai vuai reng bawk.

Kan bul leh sir vêlah chuan sava an chiar nak naka, khaw chhûng hnaih tê mah nise sava an la tam viaua, an veh ngai vak lo a nih ka ring.

“I ek thiam em?” u Rinpuia rawn phei chuan a rawn ti a, ka melh haw mai “Aih, mahse khawi maw mi ek ah chuan ka hmu ṭhin, ka lo ti ve chhin ang” tiin hrei chu ka ban zuia, a ni pawhin min dang bik lo.

“Fimkhur la, a hlauhawm a nia. I in tipalh hlauh ange” a rawn tihchuan ka bu ve nghauh nghauh a, a thing fawm zînga lian ṭha nelh nawlh chu la in ka dah rem te te a, chutah hrei chu ka lu chung lamah khai chho in kan ek chu ka eh ṭhelh a, a sir lam chu hêk hlawkin ka hrei ha chu a thlâwk chhuak zuia.

U Rinpuia chu a awm sawn deuh dâwr bawk. Inthlahrung zeta ka en lai chuan “Khawi, keimah in ka lo ti ang. I ngal zâwk i ek ang tih a hlauhawm, lo ṭhu rawh. Ka tih dân hi ngun takin en ang che, ngil taka tin thiam a ngai a nia, khatianga i kut i dah kawih sa chuan i ek dik thei lovang” tiin amah chuan a ek zuia.

A ni erawh a vawikhat chehah thing chu a rawn khi nghal phak mai. A ek dik êm êm zuia, mipa mah nise keiai chuan a zei fe zâwk, kei erawh ram lam hna thawk ngailo ka ni bawk nên thiam neilo in engkim ka zir chawp vek a ngai a nih ber hi maw.

Min phût tawh hauh lovin a mah chuan a ek zung zunga, rei eh pawh a ngailo. Ka phûr kham tur khawp chu a ek zo thuaia, vawikhatah ka phurh zawh theih pawh ka ringlo.

“I van chak em em, kha tui hi in rawh. Thiam ka nei ve siloa, min zirtir zêl mai ka ngai a nih hi, hei vâng a nia ka vah chhuah duh mai mai loh. Helama in thil tih ṭhin tam zâwk ka thiam ve silo, a châng chuan a hrehawm, i nu leh i pa pheiin ka hnathawk hi min hmu se min iai phah hrim hrim” ka ti chu nui hakin ka lu ah chuan a rawn tuai zauha.

“Iai lah lo ve, lehkha i thiam thung a lawm. Mi tin hian tih ngun leh tih ngailoh kan neia, chumi avânga in sel chiam tur pawh ani love” a ti dap dapa. “Le! Thing hi ka thawn sak ang che anga, a phurh tal chu i thiam ang chu tiraw?” tiin a nui deuh suka, a va han sual thiam tak.

“Thiam thiam thiam, thawn zung zung mai teh. Min nuih hauh suh aw, nakinah chuan keimahin ka thawn ang” ti ve hmakin ka tûm bûr a, a nui hawk hawk mai.

“Lo titau lo la aw, ka tih dân hi ngun deuhin lo en la i thiam vat mai ang”tiin amah zawk chuan thing chu a thawn mual muala, ka nuih a za ru tlat. Hmeichhe dang ang chu ni ila keimahin ka thawn thei mai tur, mahsela ka thiam miau si loa, mipa zâwkin thing a thawn hmuh chuan a inhmeh chiah lo a ni.

Ka lo nuih pût pût lai chuan a rawn hawi thuta, a mit a chuar nghâl nung mai. “Lo nui lo khân ngun deuhin en la, kan kal leh chuan ka thawn tawh dâwn hauh lo a nia” tiin a thawn zui leha, êm khat erawhin min thawn sak duhlo “A rit i ti lutuk ang” zuk ti tlata.

Keipawhin ka hnial duhlo, rit ka la khât sia ka lu a na leh ang tih ka hlau. Êm chu min chelh sakin keipawh chuan ka phur zuia, a ni pawh thing tuai tê deuh chu a pu haw ve bawk.

Khaw chhûng lam pan chuan kan in zui leh hnak hnaka, ka ṭawng leh par par tawh. Ka thingphurh a rit lo bawka phurh a hrehawm hauhlo “Pate, thing in phur elo? Kan lo tel ve, a u hmêlṭha. Patea hi nei zung zung rawh aw, anu te pawhin i patea leh i u hmêlṭha-i an innei vat dawn a tia, ka phûr tawh lutuk. Patea chu mi pawhin a vânnei an inhmeh si an ti zêl a nia aw” an khua ka kal tirhah rawn lêng ve, u Rinpuia u fa chu kan tâwk hlawla.

A thusawi chuan min ti lâi lek lek mai, engmah sawi lêm lovin u Rinpuia chu ka melh zawka. A ni lah a nuihza insûm chu ka hmu nghal “Um kan innei vat tûrah ngai ang, lo tel rih lo mai rawh aw.” tiin a lu ah chuan a tuai sak zauha, ni a sa bawk nên keipawh ka thlân a luang zaih zaiha.

Ka in luah kan thlenga, tuala ka in keuh rual chuan ka ṭhu nghâl hnawk mai. A ni pawh a thing put chu dahin ka bulah a rawn ṭhu thla a, ka sam ka hmai zar tu chu rawn hui kiangin ka bengah chuan min zeh saka, ka lo nuih seih ringawt.

Tûnah chuan kan inzui rei ve tawha, a mahah sawisêl tur lai ka la hrelo. A ze dam dup reng te, a thinrim lai pawha ṭawngkam vina min hau ngai miah lo te hian mipa zaidam tak a ni tih an tichiang in ka hria.

A ma sawi dân ang takin mipa zei leh kut hlei tak, ṭawngkam thiam em em a ni lêm lo. Keimah ngei pawhin a châng chuan zeilo tih rûk châng ka ngah mai, mahse a zia ka hre chiang a. Pasal atâna ka duh ber a ni thung si.

Tuite in in, a fawm sa la tur chuan kan kal zui leha, a hmun kan thlen chuan a dai nuam bawk nên kan ṭhu châwl leh riha, ani erawh kan bul vêl hnim chu a hnawk bawk nên a sam kurh kurh a, a bungbu kût bawk nên a mawng ka zuzi châk lutuk chu in sum zo lo in ka veh dân dân a, chutah ka kut chu tizum vek vawkin a mawngah chuan ka sawh ta auha.

A phu nasa lutuk chu a ding mar awt in boruak chu a dep auh mai, ka nuih nghâl uar uara. A nilah a mak ti lutuk chu a ngaihna hrelo tih hriat tak hian min ena, chu chuan ka nuih a tiza deuh deuh lehnghâl, kâwk meuhin mittui tla phung hian ka nuiha, ka kut ka bêng bawk, a posi ber khân ka nuih a tiza.

“Nang tê reuh” tiin min rawn man thuta, min chawi lâwp mai. Au ṭhat ṭhatin ka la nui uar uara, a mengphawk lutuk mawlh kha ngaihtuahin ka nuih chu aza zual deuh deuh lehnghâl.

Leiah chuan min bawh rawkin ka chungah a bawk rana, kei erawh ka la nui hak hak thung. “I nghal hle mai, i nghal bawka ka nghal ka chhuah ve dâwn a nia aw, ka chhuah nasa mah mah mai thei ani” a tihchuan a ngaihna hrelo tak chuan ka ena.

A rawn la nui zui vur vur lehnghâl “Ka tlâwm, ka tlâwm, engmah ti miah suh” tiin tâl chhuah tumin ka beia, ka thei ṭhak lo. Nui ar ar chuan a âwmah chuan ka nam ve ṭâng ṭânga, a rit bawk nên ka namsawn mai theilo, a mitmengah lah a sawi awmzia ka hre chiang bawk si.

Ka hmuiah a rawn fawh chuan ka tâwp data, zawi muang leh dam raiha chêt la in a insiam rema, keipawh chuan ka hnar duh bîk lem lo. Ka thiam ang ang chuan chhâng lêt ve zêlin a samah chuan ka ṭhâm sak nak naka.

Hnuailam chuan min nawr na salhin a duhthawh tulh tulha, ka la dang lutuk duh lo. A chhan pawh keimah ngei pawh ka danglama, ka taksa chu a sa pup pup mai bawk, mahsela a duhthawh tâk telh telhah chuan awm sawn tumin ka nama, a nilahin a phallo. A ngaihtuahna a fim tawh hauh lo tih hriat takin a kut a hlei ta hle bawk.

Ka kawr hlîm tum chuan chêt a la a, a thâwk dân aṭangin a insûm theihna a pan hle tawh tih pawh ka hria.

“U Rinpui duhtâwk ang” ka ti tham chhâla, dik tak chuan ka mamawh lo bik a ni rêng rêng lo, atâna in pêk mai duh châng te pawh ka ngah, mahsela tûn thleng ka lo vawn theih ka thianghlimna hlut zia ka hria a, insûm hrâm hrâm hi ka tih tur niin ka ngai bawk.

“U Rinpui, in sum hrâm teh. In ngaihtuah harh rawh, hetiang chu a ṭha lo, kan inneih hma chu kan tih kha” tiin a mi fawhna ata chu ka awmsawna, chiang takin ka melh bawk. A ni erawh a la pângngai hauh lo “Min hmangaih a ni lo'm ni?” a tih chuan ka bu nghata.

“A nih chuan min dang suh” ti a min fawh leh mai a tum chu ka thle sawna, a rum deuh hak mai, ka dem lo, mahse...“Kan sawi tawh kha, kan inneih hma chuan nangpawhin ka insûm ang tiin min tiam a ni lo'm ni? Min hmangaih chuan i insûm thei tur a ni, a ṭha lo. A hun hma in kan che sual theilo, dân khatna ngeia min neih i tum a ni lo'm ni? Insûm hrâm hrâm rawh” tiin a hmaiah chuan ka chûl saka.

Rawn thaw hakin a mit a chhing vang vanga, a thinrim mai ang tih erawh ka hlau hle thung. Chutah rawn meng chhuak ruai ruaiin min delh hnawka “Sual in min va hneh teuh ve le, i ti dik e. Ka tân ngeia neih tlâk lohah ka va siam teuh che ve, nang tê reuh hi i in ngaihtuah fim kar reng mai, min mamawh lo angah te hian ka ngai rum rum tawh” tiin ka chungah chuan ala bawk ta renga.

“I ngaihtuahna mai mai a nih chu, ka mamawh lo bik hauh lo che. Mahsela tûnah che sual ringawt ila ka tâna a nghawng tur min ngaihtuah pui la, ka nu leh pa in min ring em em a, helaia ka rawn kal dawn pawh khân an thu min chah nasat ber a ni a sin. Hmeichhe zahawmna chu kan thianghlimna hi a ni a, a chân ta erawh ka dem chuang lo, an hmangaih lakah an in phala, an hmangaih tân ui an neilo a nimai. Chutih rual erawhin kei erawhin ka hmangaihna che avângin insûm hrâm hrâm ka duh thung, i rilru ka hre lova, kan innei thei kher a ngem pawh ka hre hek lo. Mipa chu induhtawkna in ngahin in theih tawh hmeichhia hmuhsit chîng in awm bawk si a” tiin ka ngawi data.

A ni erawh engmah sawilo in ka chunga bawk chuan a thaw hle hle ringawt “Mipa tam tak hi chuan hmeichhia ten an hmangaihna hma chhuanin an nawr luia, hmeichhia pawhin an hmangaih avângin an lakah an in phala, an rin miau avângin ui an neilo. Chu chu mipa lerh leh hmangaihna hre thiam lo chuan an nawr luih avânga in phal hmeichhia hmusitin an ti mualphoa, mi karah in sawitheih nân an hmang ṭhin, chutiang mi chu i ni ve dâwn lo tih erawh ka hria. Mahse kan insûm theihna hi kan pahnih tân zâwk ani” tiin ka sawi leh dap dapa, a hriatthiam ngei ka beisei bawk.

A rawn tho chhuak ruai ruaia, ka chalah chuan a rawn fâwp zauh mai. “Insum hi a har ṭhin a ni e, ni e ka lakah i in phal zia ka hria e, keimah zâwk hi ka lo dik lo hman ṭhin a, ni e mipa ka nia insûm chu a har viau mai. Chutih rual erawhin i natna tura thil tih luih pui che ka tum miahlo a nia, ka lo insûm theilo ṭhin a, i taksa ka tawh hlek chuan ka dang lam nghal zela, i mipa sawi te anga tihmualpho che erawh ka tum ngai dâwn lo, ka nupui tur i ni ka tih tawh kha. Engthil pawh thleng se keichuan ka kalsan ngai lovang che, i kiangah ka awm reng dawn a lawm, ka hmeichhe hmangaih i nih hi. Awlsam taka ka kaltîr che chu beisei miah suh, inneih vat chu kan ngai a ni” tiin ka biangah chuan a chûl riak riaka.

Ka nui sak mai “Ni e, nang chuan min hmangaiha, keipawhin ka hmangaih bawk che. Min nawr lui ngai dâwn lo tih ka hria, chutih rual erawhin mipa hmangaihtu hmangaihna tih mualpho sak tu ang chu ni ve ngai lo turin ka duh che, i tân chuan engpawh ka huam ka tih kha, mahse chûng zawng zawng chu nupui leh neitu ka nih kim hunah ka hlân ang che” tiin a kut chu ka hûm sak vang vanga.

Ṭhu chhuakin ka sama hnah kaite chu min thensak mawlh mawlha, ka thawmhnaw bal kai lai chu keiin ka thian ve bawk. Miin min ngaih dik loh theihna tur a awm ka tum hauh lo, thingtlângah phei chuan vawikhat hmingchhiatna tawh chuan khaw pumin an hre nghal zel bawk si a, kan fimkhur poh leh kan tân zel a ni bawk.

Ka thiam ang tâwk chuan thing chu thawn ve in u Rinpuia lah chu nui ring ngam lo in a nuih insûm chu ka hre leh ṭhin. Ni e, ka thawn nalh lo ve bawk êm a ni, a hê hu te hian ka hria, mahse ka thiam dân chhun ni ve miau hek.

In chelh tirin ka phur zuia, ka ding chhuak chiah chu min nuih hawk hawk mai. “Ka hmeichhe thing thawn hmuh tawh zawng zawngah i la thiam ber” a ti erawh lâwm lo zet hian ka ena, ka vawikhat thawnna tih a hre ve renga, min nuih leh kher chu ka huat tâwk a tling ve em em ringawt.

“Min nuih kher suh aw, ka thiam ang thiamlo an awm veleh tho ania, nakinah i nupui ka nih hunah meuh chuan ka thiam tawh viau ang. Engmah zirtir ka ngai dâwn reng reng lo, mite'n nupui nei vânnei ber an la tih theih nân che ka che dâwn a lawm, min lo en reng mah rawh, keiai nupui ṭha hi chu i hmu mai mai lo ang” fiamthu chuan ka ti a, kan nui dûn hawk hawk bawk.

Muangchang chuan in zui haw leh bek bekin vanlam chu ka en vang vanga “Ruah a sur dâwn a nih hi, a van peih awm loh tak. Haw vat ang, min nan hman hlauh a nge” tiin keimah zâwk chu ka kal nghal thuai thuaia,  chutih rual erawhin ruah a rawn sur tur erawh thlai tân chuan a lawmawm viauin ka ring.

Rin ang ngeiin in kan thlen hnuah ruah chu a rawn tla ṭan titiha, u Rinpuia erawh haw a tum lo nge ṭhutthlengah chuan ṭhu in thingpui a ina. A mit a chhing vung vung mai, eng tak chu ngaihtuah ang maw? Ka va barakhaih leh thut dâwn maw ni.

Ka chhang lei sa vêl chu phawrhin ka va chhawp saka, “Lo ṭhu ve rawh, che kual reng suh. Ruah a sur dâwn hi awm hle hle hun” tiin a bulah chuan min pawt ṭhu a, keipawh chuan hnial lovin chhang pakhat chu la in ka keih nghal hmaiha,  “A hun lo hle mai, ram vah ka tum a sin le aw” tiin pâwnlam chu a thlîr vung vunga.

“A ṭul lo, chhuak reng reng suh ang che. Khaw chhe hnuaiah phei chuan chetsual te a hlauhawm, lei min leh Sabereka khuangkaih te a awm thei. Ka ngaih tih ṭhat loh i duhte a nih loh chuan inah awm ang che” tiin ka lo sawi nghal zung zunga.

“Ka nupui i ang tawh reuh lutuk” thutak lai laia a rawn ti chu ka nui hak mai, rawn uan thut a hmanga. Mahse ka hlimpui viau zel bawk si, ka tawnglo ang tih ka hlau ṭhin, amah ngei hi nei thei ila ka ti bawk, mipa funny tak hian kei min hip ngai miahlo, thawnthu ka ngaihthlâk tam vâng nge. Cool ruih mai, chêt ze dam dup, ṭawng tam lo leh mize nghet cherh chawrh hi ka duhzâwng an ni.

Hmeichhia e tilo hian love story, romantic comedy an tih lam pang ai chuan pasalṭha thawnthu hian min hneh zâwk, ka chhûngte mak min tihna pawh a ni. Mahse keichu pasalṭha hmêlṭha leh ze zawi em em, mitmeng pa hrak mai an sawi ṭhin hi vei an nâ ka ti.

“I nupui chu ka la ni dâwn a lawm, nakinah phei chuan ee min ngam miahlo ang. Nupui sual ka nimai, mo sual silo pasal chungah erawh ka hawi valh valh mai ang” tiin ka fiam lêt zauh zauha.

“Chutiang a chi dâwn em ni? Ka nupui ka ngam loh che chuan miin engtin nge min sawi ang? Thaibawih ka ni mai dawn a sin” a ti chu ka nui hak haka, a sawi dik phian zel bawk sia, a mah a ṭawng muang leh hriat nuam tak te hian min hip nitin chu a nih hi, khuanu hian ka tân a ruat lo a nihchuan ka vui nasa viau ngei ang, chutih rual erawhin ka ta ni ngei se ti a ka duh ber a ni bawk si.

“Pawi i ti deuh em ni pa a? Ka pasal i ni tawh zâwk a lawm, thaibawih kan awm ngai nem le? Chhungkaw ṭang rual kan ni zâwk tiin hla pawhin a lo sawi kha, i fate i awi dûrh dûrh zêl ang chu, kei in rawng ka bawl anga. Nang talin kan fate i kîl kâwih lohin, tak takah ka fiam che a nih kha, mosual leh pasalte thuhnuaia dah tum hmeichhia chu ka ni bik lo ania, inchhûng khura hmeichhia in Lalna a channa hmunah chhûngkua an buai ṭhin” tiin rawng bawl tum chuan ka che zui sat sata.

Ruah lah chu a la sur char char a, bân reng reng a tum lo. U Rinpuia lah a lâwm zâwk emaw ni, bawp khawkherh hian ṭhu in a ke hmawr chu a then lauh lauha, a awmdân chuan ka nuih a tiza tlat, mipa naupang a ang lutuk tlat. Ho te te pawh hian min tihlim thei zel chu a nia.

“Nu i rawng min bâwl kep la aw, i pasal hi min lo nghilh mai mai ange” a rawn ti leh dût dût mai “Enge i hriata? I tho â em ni? I nghal lutuk, bâkah in inah ei leh i tum lo em ni?” ka lo ti hlak hlak chu a rawn nui deuh hawk mai, tûnlai chu ka bulah chaw a ei ngun lutuka, nu Âsangi te lakah pawh ka inthlahrung ṭhin. An fapa lah hian ka bulah awm a tum reng bawk sia.

“Ka nupui ka be mai ania, nghal lam pawh a nilo. I hmêl te hi ka hmu ṭha sit set lutuk, ka hmangaihna che hi sawifiah dâwn ila, vâna arsi awm zât kan hre lo ang leh kan sawifiah thiam loh ang mai hian ka sawi chhuak thiam hauh lova, mahse nang hi chu ka tâna ruat bik liau liau i ni” a rawn ti leh chu ka tihngaihna hre tawh lo chuan ka bân ka phar hluai ringawt.

Hetiang thu rawn sawi fuk fuk hi a chîng thut zela, keilahin ka thiam ve bawk silo. A châng phei chuan ka lâi awm ngaihna hrelo che buai kual vêl hi a lâwm nge, min tih luih hi nuam a ti êm êm zêl a, ka lai hmêl a hmuh duh avângin a sawi lui ngat zêl lehnghâl.

“Kei thingtlângpa mai mai, hna neilo leh thawh chhuah ṭha neilo pawh min pawm duhtu hmeichhia ka tawng che hi khawvêla mipa vânnei ber ka ni. Mipa laktlak loh lutuk ka ni ang tih erawh ka hlau ṭhin, mahse hei erawh mipa ka nihna ang ngeiin ka tiam ang che. Ka vênhimna leh ka thlazâr hnuaiah him tak leh thlamuang taka i awm theih nân theih tâwp ka chhuah anga, i tâna pasal ṭha ber ka nih theih nân ka theihna zawng zawng ka hlân bawk ang. Sum leh pai ah erawh chuan chhuan tur ka nei lovin hausakna ka tiam thei lo chea, mahse ka neih chhun zawng zawng hi i tân ka huam tih hre reng rawh, chu chu mipa ka nihna angin ka tiam che a nih chu. Bumna nilovin rinawmna ka tiam ang che a, a der nilo in a tak ngei thil ka hmuh tir ang che, i mittui ti tla tu mipa nih loh ka tum tlat ang” tiin ka hnunglam aṭang chuan min rawn kuaha.

Ka ngawi kar mai, ni e, tûn angah mipa laktlak loh leh hmeichhe thinlung tih natsaka kalsan chîng tam tak an awma. Chutiang chu a nih ve loh hrâm ka beisei bawk.

“Ka ring ang che, ka hmangaih che a keipawhin hmeichhia ka nihna angin i rin loh tur leh i thintirima, i thik zâwnga awm turin ke ka pen ngai lovang. Rinawmna ka hlan rual che in hmangaihna ka hlân ang che a, i kut ka vawn ang chiah hian ka thlah mai mai lovang che, ka lâwm e” tiin ka nuih sen sena.

Ka nu leh pa hian he mipa hi han hmu ve chiah se sawisêlna tur an hmu bikin ka ring lo, an hrechiang lova. A hmêl leh mizia pawh an la hmu in an hre hek lo, kuthnathawk mi mai mai an tih hian engtiang chiahin nge a beih nasata, a thawhrim tih an hriatpui hauh lova an sel mai mai hi ka tha a nat pui tlat, he mipa ang hi khawvêlah an tam hauh lovang.

Kan pahnih chungchâng hi ka sawi chhuak thiam hauh lova, thu thiam tak leh hre ril tak ka ni hek lo. Mahse kan pahnih nun aia hlimawm tur chuang ka hreloa, amahah ka hlima, ka himin ka thla a muang bawk.