DUHLAI ZORINPUIA CHAPTER 13

DUHLAI ZORINPUIA 

CHAPTER 13

“U Rinpui” ka mi hmuh dun te avâng chuan rilru na zet hian ka en renga, ka phun chhuak tih pawh ka hrelo. Ka tawlhhnung dat dat bawk, Nunzuali leh u Rinpuia lo inkuah ka hmuh chuan ka rilru ana lo theilo, thikna leh thinrimna a rawn awm nghal bawk nên in her in ka in lam pan chuan ka kal hlawk hlawka.

Ka mittui lah chu a rawn tling nghal pam lehnghâl. Ka insûm hrâm hrâm a ni, a la hmangaih a ni ngei ang, chuti nilo se hmuh ka phallo chung a hmu in khatiangin a kuah tawp nâng “Duati” min rawn ûmzui tih ka hriat rual chuan ka tlân vata, ka in kawngah chuan tlân thla dawt dawt in in chhûngah ka tlân lût dâwn chiah tihchuan min rawn man bet hmanin min pawt ding zuia.

“Min thlah rawh” tiin ka ṭah chhuak lutuk chu ka insûm hrâm hrâm a ni, “Aih, i rawn hmuh ang kha a nilo a nia. In bia ang, khatiangin awm ringawt suh” a tihchuan ka nui haka “Ka duhlo, biak che pawh ka duhlo. Hmu tawh lo tur che in ka ti che a; mahsela i hmangaih hmasa ber chu i kalsan thei ngang lo a nih kha, beiseina min rawn pe tawh suh, min kalsan rawh” tiin ka kut chu thin thlâk ka tuma, a thlah duh bawk silo.

Alamah min kuai herin min pawm beta “Ka kuah lêt lo, ka inrin hma in min lo kuah a lawm. Ṭha deuhin sawi ang aw, khatiang khân thutlûkna siam nghal ringawt suh, inṭhen ka duhlo ka tih tawh kha” awmsawn tumin ka tâl leh vaka. In chhûng lamah chuan min luhpuiin kawngka chu a khar zuia.

“Chhuak rawh, hmân zânah pawh i lêng leh tih ka hria. Dâwt i hrilh mai mai tur ka nilo, ka hmu duh tawh lo che, keichuan vawitam ka hmangaih thu che ka sawi laiin vawikhat pawh min la hrilh ve hleinem. I bialnu awm loh chhûnga i ngaihzâwng tur bakin min duhlo tih ka hria, min chhuahsan rawh nang nên engmah tih dun ka duh tawh lo. Hmeichhe pakhat pawh hnar theilo leh hlat theilo khân min rawn hnaih tawh suh, a tâwk vawi tam tak ka hrilh tawh che. Hmangaihtu hnar chuan i hmangaih chu pawm leh mawlh rawh” tiin ka mittui chu ka hru ṭawk a.

“Aih ka hmangaih che, ka hmangaih tawh che inṭhen ka duhlo, min... ṭhen theilo” amah ang lo takin a ṭawng chu a buai nak a. Rilru nat hmêl zetin min en bawk “Min ṭhen i duh loh vâng mai mai a nih kha, min hmangaih ngai rêng rêng lo, i lakah beiseina neih pawh ka duh tawh lo. Ka en liam thei tawh lo che, i ngaihsakna leh duhna pawh vawikhat mah ka lakah i la ti lang hleinem, a hming a mawiin i bialnu ka ni chauh zawk. Haw rawh, in biak leh pawh ka duh tawh lo” ka thusawi zawh hma chuan min pawm betin ka tâl chhuah leh hlau ang hrim chuan nghet zetin min kuaha.

“Aih, nilo ka hmangaih che. Ka hmangaih tawh tak tak che a lawm, min ṭhen suh aw, vawikhat mah an inah pawh ka lêng tawh lovang, hun min pe leh rawh. Duati inṭhen lovang, khawngaihin min kalsan suh” a aw ah chuan natna a lang chhuaka. Ka kalsan a hlau tak tak tih ka hria,mahse ka na lutuka engmah tih tur ber ka hrelo.

“U Rinpui i lakah ka beidawng tawh, kha chen kan inzui tawh. Thinlung takin ka bulah i awm ngai loh zia hre reng chungin ka hmangaih che avângin ka hlim lui hrâm hrâm a sin, ka thu vawikhat te mah i zâwm duh lova, tûnah chuan min hmangaihtu bulah ka kal ve a ngai tawh a ni” tiin ka namsawna.

Chu thu ka sawi zawh rual chuan a meng buai nghâl nak mai “Ka duh lo, tinge ka thusawi chu i âwih duh miah loh? A ni chu ka duh tawh lo, tinge hetianga i awm tlat. Mipa dang bula awm turin ka kal tir dâwn hauh lo che” ka chhâng tawh lo, ka phone rawn ri chu ka thawhpuinu a ni tih ka hria.

Ka lâk ruala a thu rawn sawi avâng chuan hmanhmawh zetin ka hmanrua ho chu ka la khâwm a,  “Ka lo kal nghal” ti a chhuah mai ka tum chu u Rinpuia chuan min lo dangin “Enge i tih dâwn?” a rawn ti a “Ka hmanhmawh a nia awmsawn rawh, nau vei an awm. Kalsawn rawh” tiin ka tlanchhuak a, min nghah tûr thu a sawi pawh ka chhâng lêt tawh lo.

Nu Thangi sawina lam chu panin an khua ka hre ve tawh bawk nên ka bo lem lo. A sawina in ka thlen chuan an lo in buaipui mêk tawha, ka la ti ngai lo bawk nên ka huphurh viau lehnghâl. A na hmêl ka hmuh chuan ka khawngaih ngei mai, thawk la ham hamin ka pui ta zung zunga.

Reife kan inbuaipui hnuah hmeichhia a hring nawlha, an pa phe buai lutuk chu kan nuihpui leh ṭhin. A vei chhûng zawng khân a kalkual sek ti ila ka sawi sual lovang, a nupui chu a ngaihtuah hle tih ka hre mai, u Rinpuia ka ngaihtuah zawka. Inneih thleng khân kan sawi ve lâwk kha ania, mahsela tûnah chuan awlsam taka nem ka tum tawhlo.

Min hmangaih tak tak a nih chuan bei lêt ve rawh se, chu chu a tih tur a ni bawk. Keimah hlirin ka ûmzui a, ka peih tawh bik lo, kalsan hlen turin ka rilru ka la siam ngai lova. Chutih rual erawhin a duh duha awm thei ka nih loh zia leh hmu zo lo ka nih loh zia hre ve se ka duh bawk.

Doctor Timothy pawh khân min rawn be renga, ngaihzâwng ka neih avângin ka chhâng ṭha ngailo thung. Nau te a neih fel tâkah chuan buaipui ngai zawng zawng buaipui phawt in an buai lutuk tawh loh tâkah chuan kan haw sana, a tlai duai tawh mai.

Zîng chaw pawh ka la eilo kha a nia, ei châkna pawh ka neilo. Ka rilṭâmna zawng zawng chu u Rinpuia te pahnih ka hmuh rual khân a reh nghal vek “Hmingte bawiha nên in awm lo em ni? Ala rawn haw miah lova, i bulah a awm nange?” nu Âsangi chu ka en zawka.

“Um nau vei ka buaipui lawka, ka bulah chuan a awm miahlo” ka tihchuan a âwih ve mai. Zorinpuia kha ka inah a la awm nge ni ang, in chhûngah a awm luih tlat avâng khân ka kalh duh lêm lo kha a nia, a lo la awm a nih ka ring bur.

A luhlul zia ka hailo, muangchang chuan in lam pan chuan ka kal chhat chhata, tlangvâl ho nilum ai paha lu lo mêt ho lah chuan min lo fiam zuk zuk lehnghâl. Nuih liamin ka in lam pan chuan ka chhuk thla a.

Rin ang ngeiin u Rinpuia pawh a lo la awma, ṭhutthlengah chuan a lo ṭhu kûn ngur mai. Chutia a rilru buai hmêl ka hmuh chuan ka khawngaih leh tlat tawh, mahse ka tilang mai mai dawn lo. Englai pawh a ka nem nghal zung zung chuan ngaiah min neih ka hlau.

Thawk la ham hamin a hmaah chuan ka va dinga “Haw rawh, i nu in a ngaihtuah tawh che a nih kha. Engah nge tûn thleng thleng ilo la awm? Mikhual hmuah te i ngai a ni lo'm ni? Haw vat rawh, chuan lo lêng tawh suh” ka thusawi avâng chuan a rawn hawi chhuaka.

A mitmengah chuan ka ṭawng khum avânga a nat zia ka hmuh hmaihlo, en rei duh lo in ka hawisawn daiha. A rawn tho chhuak ruai ruai chu ka mit sir chuan ka hmu reng, hetiang a ka tih hian ka inthiam biklo. Mahsela a bialnu hlui ka hmuh hma hauh pawha ka thik sa em em nên ka hmu dûn ziah leh an chungchâng ka hre ziah hian min tina bawk si.

Ka biangah rawn dawmin alam hawi chuan min kuai dâka “Kal bo rawh, ka hmu duh tawh lo che ka tihkha, min kalsan rawh” ka sehchilh leh nak nak a, ka ṭah a chhuak leh ṭun bawk. 

“Aih, i rilru nat vângin khâng kha i sawi a nih kha, ka kalsan dâwn lo che. Ṭha deuhin sawi ang aw, i thinrim laiin thutlûkna siam suh, kuah ringawt a nih kha, ka kuah lêt lo bawk, hman zân kha chu” a tih leh lai chuan ka lo vai chata.

“Chhuanlam dang leh bawk, engmah ka hre duh tawh lo. Chhuanlam siam angai ziah lo, a hma pawhin a rawn haw hlim ah pawh i hmuaka, ka hrethiam che. Mahse keiin ka ngenna che i ngaithla liama, zawm i tum lova, i intiam hnuah pawh i lêng leha. Ka hrethiam tawh lo che u Rinpui, tûnah chuan kan tâwp phawt hi a ṭha. Khawngaihin min chhuahsan tawh rawh, ka chau riau mai mut ka duh” tiin ka kalsawna.

A beidawng ta nge ngawi reng hian a chhuak a, ka en zui duh lo. Ka en zui a nihchuan ka ṭah mai ka hlau, ka hmangaiha chân pawh ka hlau lutuk. Mahsela a mi ngaihsakna leh duatna aw kâ ka dawng ngai lo mai nilo in ka thusawi a ngai pawimawh tak tak lo tih ka hre chianga, chuvang chuan a duh ang ngeia awm turin ka thlah zalên zâwk mai ang. Ka tuar chhuak thei em em in ka ring bawk, min chân a hlaua min hmangaih ve tak tak a nih erawh chuan min nei lêt turin kha ai nasa khân a bei ve tur a ni.

Zîng chaw pawh ei lo chuan ka mu daiha, ka mood a fuh lo bawk nên ka tum luau mai, engmah tih châkna lah ka nei hek lo. U Rinpuia chunga ka awm dân chu ngaihtuah in ka ti mah mah em aw? Tih chu ka ngaihtuah neuh neuha; rilru a nat tawh chuan kan ṭawngkam kan vêng reng thei lova, sawi duh loh pui sawi a awl ṭhin.

Mihring rilru na tawh vêk vêk chuan hlauh a nei tawh lova, beisei tur chuang a nei tawh lo bawk. Engkim tih tâwp a inhuama, a tum dâl zo thei an awm hek lo, rilru a nat tâwp khawk tawhah chuan kan tum dang thei an awm lo tih ka hre chiang khawp mai.

Hmeichhia ka ni a, ka hmangaihna avângin ka dawhtheiin zahtheihloh pawh ka chhuah fo, lungawilohna ka neih châng pawhin sawi chhuak lovin ka thup bo mai ṭhin. Mahsela, a lo ṭhat ber loh zia chu ka hre chiang ta khawp mai, a tâwpah keimahni bawk kan na. Dawhtheih leh hmangaihna ngah lutuk pawh hi a tâwpah chânnaah a in thlâk duh châwk a nih hi.

Hmangaihna a nih tawh chuan thikthu a chhia in hoteah kan thinrim mai ṭhin. Chumi hrethiam lo tu chuan ngai ho in a tâwpah mi pahnih te an nat phah ṭhin. U Rinpuia nena kan inkar chiah a ni bawk in ka hria, ka dawh ṭang ṭang a, thikthu neiloa ngai zam mai turin min duha, ka hmangaih tih hria in ka thu engah a ngai duh lova, tûnah chuan heti hi kan nih phah reng bawk.

Ni lêng chuan engmah ti peih lo in ka mu tlâwn renga, phûrna rêng rêng ka neilo, ka ṭah lah a chhuak ut uta. A châng leh ka thinrim leh ṭhin, ka period dawn hnai a nih ka ring bur, Mawii rawn lêng chu engkim ka hrilha a ni erawhin “Enga tinge chutianga i tih? I chân huam tak tak maw? A bialnu hlui bulah chuan kal se i na dâwn ania” a rawn ti daih thung.

A sawi dik tho bawk si, rilru hah zetin ka awm reng ringawt “Ka ngaihdam zel chuan a hma ang bawka min palzam leh ka hlau a lawm, mipa chu kan hmangaih pauh leh an induhtawk tulh tulha. Mi ngaihsak lêt na châng hrelo in chapo nân leh kan chunga in lek nân an hmanga, khatiang khân ka awm ve peih lo a lawm” ka tihchuan dik a ti ve tho si.

Min hnem dân a hre bik lo chu a ngawi leh reng ṭhin. In enin kan nui ta tawpa “I ti dik chiah, keipawh hi ka biak tam leh min chhâng hara, ka biak khât leh min ngaihsak lo a ti leh bawk si. Mipa ho hi chu an mak a ni e, han ngaihsak ila min hne a, ngaihsak lo ila mipawh i ngaihsak lo an ti leha. Kan hmangaih zia lan tir ila, min ninga. Thikthu chhia, in la strict min ti leha, lan tir lo ila mi pawh i hmangaih tak tak ka ring lo, enga tan mah min ti tak tak lo an ti leh bawk si. Eng thluak leh thinlung hi nge an neih bik ni” a tihchuan a dik ka ti viau.

Mipa hi chu mi fing mâwl ka ti tawp, an fin dân hi an mâwl hluah hluah. An mahni hmangaihtu hmeichhia chu â an tia, an nuih zata. An mahni duh miah lo tu hmeichhia an ûmzui a, an thu thu in an awm kuala, chutah a hmeichhia in an kawp leha hmeichhia zawng zawng an rinawm lo. Sum duh lutuk vek an ti leh daiha, an mahni lam in hmuh chhuah an tum der silo.

Mahsela an hriat loh erawh hmeichhia, hmangaihna a luangliam, dawhtheihna zawng zawng leh a hmangaihna zawng zawng a hlan hnu pawha hnâwl ṭang ṭang tu lakah a beidawn tawh chuan lung ang mai a ni tawh ṭhin. A thinlung hmangaihna kha a sak tlat tawh bawk, a dawhtheih phâk bâk a nih tawh chinah chuan engvang mahin a hawi kîr tawh ngailo, a na tawrh tur ang zawng zawng a tuar vek tawha, a hmachhawn dân a hre tawh zâwk mai ani.

“Rilru hah ve ve kan nih hi, keipawh tûnlai chu kan in be khât lutuk. A châng chuan an khuaah kal chilha ben sawk mai ka châk ṭhin, be lo dawn ila min be duh lo a rawn tia, ka biak lahin min reply har thei si. Keichu kan in be dâwn a nih chuan kan buai a nih loh chuan in chhân vat ka duh, online reng si a min chhân har te hian keilo biak aniang ka ti ṭhin a, ka rilru a nuam ṭhin lo. Hote anga lang si hian ka rilru a hah vek zel, an online tih kan hmu ve kur sia, an message kan chân reng laia min chhân mai loh hi chuan thil nilo lo ngaihtuah a awl, nangpawh chûngin ti pawng pawng suh. I kal tir phal tak tak lo ang, dawhtheihna neih ve a ngai a nia” a tihchuan ka chhâng tawh lo nângin a thusawi chu dik ka ti ve tho.

Mahse kha chen ka ṭawng ve tawha, a duh leh hma rawn la ve tawh rawh se. Bialnu hluite nên a inhmuh reng pawh kha a ngailo, ka thik tih a hre renga a tawrh ve tur a lawm.

“Ka haw phawt ange, mikhual an rawn thleng tawh ang. A tlai tawh sia rawngbawl te pawh a ngai tawh ang, zanin chu inkhâwm min rawn sâwm rawh aw. An thik tur in mikhual tlangvâl chhelo deuh deuh pawh kan inzui tir ve dawn nia” tiin a nui har hara, ka nui ve hak.

Khawia tlangvâl mah hian min zui pawhin ka ring lo e a, bâkah hmelhriat ka la nei dâwn lo hrim hrima. Tumah han zui tur pawh ka hrelo vang, chutih rual erawh chuan inkhawm ve ngei chu ka duh. Hetiang bial inkhawmpui meuh chu a nawm hi ka ring ve tawp, bâkah ṭhalai te tân fellowship vawihnih an siam dawna, u Rinpuia a solo dâwn tih ka hre miaua. 

En ve ngei ka duh, a zaithiam zia leh music lam a thiam zia an sawia ka hmu ve châk. Kan nih hnu hian a zaithiam zia sawi si hian a zai vawikhat mah ka la hmulo, a inthup thei viau a nih ka ring. Ka bula a awm chuan a ngawi ngul zêl bawk si.

In hau zo chiaha min hmu tawh lo tur a ti si hian ka hmu châk zek zek bawk si. Mahse ka insûm ve tlat, va biak hmasak phei chu ka tum lo hrim hrim, peih lo zet chuan rawng chu ka bâwla, nidangah kha chuan ka phûr theih nên vawiin meuh chu ka hun tawn nen ka eng tihmah a tuilo.

A ni pawh a la reh vawng vawnga, min rawn biak pawh a tum eihloh. A ṭha a lawm, a duh ber a awm leh tawh a, a duh duhin awm mai mai rawh se, engah nge ka lungngaih bik vak ang. Hetiang reng tur phei chuan ka hna bansanin ka haw daih ang, a hmêl hmuh reng ka duh dâwn silo.

Chaw chu tlêm eiin inkhawm tur chuan ka insiam malh malha, in aṭanga ka chhuah chuan dâr a ri vêl chiah chiah a ni. U Rinpuia te in ka thleng phei ṭep tihah chuan mikhual an ni ngei ang, nula pathum nên an rawn chhuaka, an nui har har lehnghâl. U Rinpuia pawh eng emaw sawiin a nui ve te chu ka melh rum ngei mai.

Hmu lo ang hmak chuan kal pêl vawk vawkin Mawii te in lam pan tum chuan ka pêna “Hmingi i inkhâwm ve dawn em ni?”  Hmingi maw ka lo nih tâka, nula ho bula awm chu nuam ati bawk aniang ka hming a min ko ngai hleilo in min han koh tâk chu?

“A nih hi ka hmanhmawh deuha, a nih phawt kha mikhual nula in va nei chhelo ve” ti kher in ka kal zui leh nghal zata. Thui ka pên lo “Ding teh” a rawn ti chu ka phu zawk mai, ka hawi lêt nak chuan a hmeichhe rawn chhuah pui ho kha ka hmu tawh miah lo.

“Enge” tawi beng bawng chuan ka lo ti a, ka mood a ti uih leh vek tawh. “Kal rual ang, khawiah nge i kal dâwn?” tiin ka bulah chuan a rawn ding a. “Mawii ka sâwm dâwn, min lo zui suh. Kal rual pawh ka duhlo, kal bo rawh” ka inrin hma chuan ka kâng nawlh mai.

“Enge i tih dâwn? Zorinpui min dahthla nghal rawh, miin min hmu ange aw, min dahthla vat rawh” tiin ka tâl nawk nawka. “Aih, kan inru ang, zaninah hian kan inru ang, min kalsan lo mai ang. Inkhawm pawh angailo ti hian kan inru ang” a thusawi avâng chuan ka mengphawk ngei mai.

“I ti tak tak lo” ka ti chu “Aih, ka ti tak tak. Kan inru ang, chuan i nu leh pa bulah palai chu ka tir zui mai ang, kan inruk loh chuan engmah a fel dâwn lo. Ka nupui i ni anga engkim a fel vek mai ang” tiin an in lam chu min panpui a, kan thleng ṭêp tawh. Ka hlauthâwng bawk si, hetiang ngawt chuan pasal ka nei theilo.

“Mikhual an awm lai in chutiang sawi suh Zorinpui, min dahthla vat rawh. Neih che pawh ka duh lo, min dahthla rawh, chutilo chu kumkhua in min hmu tawh lovang” ka tih tâkah chuan ding datin min dahthla ruai ruaia.

Engmah a sawi tawh loh avâng chuan ka tlânsan nghal nal nal bawk. Min tih hlauhthâwn zia kha a hre âwm tawp silo, mikhual neih lai laia lo inruk ka duh teuhlo. Bâkah a rilru kha a chi ai ni berin ka hria.

Mawii te in ka thlen chuan tualah a lo hawi kual ruaia, ka va thlen rual chuan “I va han rei em em ve, ka nghâk rei tawh lutuk che” a tihchuan thupha ka chawi mawlh mawlha.

“Thil thleng a awm em?” a tihchuan ka nui saka “Min rûk a tuma” ka sawi zawh rual rual chuan min rawn en a, a mak ti chu a âng pam mai. “Tak tak em ni?” a tihchuan ka bu nghata.

“Awi! Amak e, chuan engtin nge i tih? A van pa” a tihchuan a bânah ka ben sak zauha “Pa tih hun pawh a nih loh hi, ka hlauhthâwn hman zia. Miin min hmu ang tih ka hlauh mai zia chu e, ka hlauthâwng lutuka, ka au ring ngam bawk silo min pu lâwp bawk sia, kal phawt ang” tiin hma ka hruai zuia.

Biak in a hlat vak loh avângin ka hmanhmawh lutuk duh lo thung. “Awi ka duh reuh e, â min ti mahla a pawilo, mahse a chêt dân chu ka duh reuh e. A pa ka ti bawk si, ṭhen che a hlau tak tak aniang” Biak in kan thlen dâwn avâng chuan ka chhâng tawh lêm lo.

Biak in chhûng kan luh chuan mi an lo tam tawh hle a, ṭhutna pawh a hnung bak kan chang lo. Mikhual tlangvâl chu an awm ngei e, min en duh em em lehnghâl, u Rinpuia ka hmu miah lo. Inkhawm tur khân a chhuak ve ngei si a, ka zawn ngial pawhin ka hmu hauh lo.

Enge a tih ang le? Hetiang hian inkhâwm lovin a awm ngai hauhlo, inkhâwm zân a nih chuan a inkhawm ngei ngei ṭhin si a. Ka awm ati nuam lo zo vek, ka kalsan dâwn khân a ngawi reng bawk nên, nge ni a thil nilo lo ka ngaihtuah avâng chuan ka awm a nuam theilo.

A bialnu hlui bulah khân a kal nge, nge a intihlum ni ang? Ka ngaihtuahna a buai vek tawh, ka thaw leh hak ṭhin “Tinge?” Mawii chu ka beng bulah a rawn phun sar sara, “Ka rilru a tihah, a inkhawm bawk silo” ka tihchuan ka hnungah a rawn beng zauha.

“A ṭha em em ang, a puitling a lawm chutiang a ngaihtuah teuhlo, in ngaihtuah hah lutuk suh. Engtin mah a awm lovang” a tihchuan ka thaw ve deuh huai mai, inkhâwm hun chhûng zawng chuan ka in ngaihtuah ngat ngata, ka duh ai ka kal thui chu ka ti ve tho.

Han thlah hlen tak tak tur in ka zuam lova, chutih rual erawhin chêt lâk hmasak ka duh tawh bawk silo. Inkhâwm bân rual chuan Mawii nên chuan hmun danga pêng kawi lovin kan haw zui thuaia, a ni erawh an inah a pêng zui thuaia, keipawh ka in lam ka pan hnak hnak mai.

Tlangvâl ṭhenkhat in ka hming an zawh ri pawh ka hria, mahse tumah in lêng neilo ila ka duh. Ka kawngka ka hawn dâwn lai chuan ka kawmchhakah thâwm a rawn awm laih laiha, Sawma te ho aw ka hre zui nghal bawk.

“Hmingek, in pa hi rawn buaipui teh. Engah nge mi khawmpui lai laia ilo ṭhen? Iti mak lutuk, hlim taka deuha awm duh ve laia inṭhente in loh tih, ka ning. Hei zu no hnih a lema a rui chhe zo” an tihchuan ka meng kawka, engmaw tûnah khân an sawi a? U Rinpuian zu a in maw? 

Rang zet hian kawmchhakah chuan ka chho a “Duati” u Rinpuia aw ka hriat rual chuan ka pan nghal vat, an rawn kuah ṭaia. Miin min hmuh tam ka hlau si “In chhûngah lo luh pui rawh u vatin, hmanhmawh rawh u. Engah nge zu chu in in tir reng reng, a mawi pawh a mawilo lutuk” tiin in lamah chuan ka chhuk thla zuia.

“Engah nge a in loh ang? Engah nge i lo ṭhen duh, i thil tihsual vek anih hi, zu a in ngai lo. Nangmah vâng vek zet zâwt mai, khawi maw heti hian kan kuah ang che” tiin Sawma chuan min rawn kuah thuta, mak ka ti bawk nên ka en ho mai.

“Tikhan min kuah lêt em? Min kuah lêt lo chungin Rinpuia hian ṭhen che sela i duh em?” a tihchuan ka ngawi ta renga.

 

“Sawi fel rawh u, hetianga a tâl buai hi vawikhat mah kan la hmulo. Nunzualin a phatsan lai pawhin hetiang hian a awm lo, hetianga awm tir thei chu nang chauh i ni. Hetianga rilru buai a awm tir thei tu chu nangmah chiah, mipa a nia a hmeichhia in a zâr chhên chuan a ni tân lo tihvak a mawilo, kutthlak dâwn se a ma thiam loh a ni thei” ka hmui chu ka ti kawi zauha.

“An inah pawh a lêng a lawm, ka tuar reng peih bik lo. Ka hmangaihna leh duhna ka tilang reng chungin vawikhat mah min la hrilh ve ngailo, ka nghâk ve reng. Kum chanve a thleng dâwn, mahse maw vawikhat pawh ngaihsak taka min biak pawh ka la hrelo, ka thikthu a chhe ve tho. Hmu tawh lo tur a ka ti chunga a hmu lui reng hi ka tuar thei bik lo” tiin ka ṭawng chhuak ve ta dap dapa.

“A dik lohna lai pawh a awm ve ang, chutiang bawkin nangpawh lo sawi fel ang che u. Zaninah a haw a nih chuan a chhungten an hau ngei dawn, hetah riah tir rawh. Kan haw phawt a nge” tiin an chhuak zui ta diala.

Ṭhutthlenga la ṭhu rûn reng chu ka pana, a hmaa ka va din rual chuan “Ka tihpalh” a lo ti supa, “U Rinpui” a rawn hawi chhuaka, min rawn kuah nghâl thlawp mai “Duati ka tihpalh, khawngaihin min ṭhen suh” a hmêlah chuan a ti tak tak tih ka hria, ka mittui a tling nghal pam mai.

“I rui a nih kha mu rawh, keipawh ka mu dawn” tiin kalsan ka tuma, ka kutah chuan a rawn vuan lehnghâl chat mai “Nangmah vâng a sin, ka tlaw tiraw? Nangmah vângin a ṭha lo tih hre reng chungin ka Pathian phatsanin zu ka in a nia, mipa nêp tak ka ni. Mahse pawi ka tilo, tia ka awm hian a nuam zâwk” tiin a phun leh sapa.

Amah chu ka en ṭhin, ka rilru a tina tlat. Ka hmangaihna hian khawngaihna a hring miaua, chu chu min ti chak lo tu ber pawh a ni.

“I duhzawng ang mipa ka nilo tih ka hria, i duh angin ka ngaihsakin ṭawngkam nalh pui pui chhah chhuah tur ka hre ve lova. Ka zei ve hek lo, ka nelawm lohin ka ṭawng tam lova, mipa dang te angin tih hlim nân che fiamthu sawi tûr ka hre ve hek lo. I tân chuan bialpa neih man awm lo ber ka ni ang tiraw?” ka chhâng duh lo, ka rilru a tina tlat. Zu kher kher hi chu a induh ka lo ring miahlova, engvangin nge amah a in tihchhiat.

“Mu phawt rawh zîngah kan sawi ṭha dâwn a nia” tiin ka room lam chu pan mai ka tuma, min dang leh tlat tawh. “I bulah ka mu dâwn, i bulah lo ka mu duh lo” tiin min zui lût a, ka hau peih tawh lo. A rui bawk nên an tilui dâwn tho tho, ngawi reng chuan kan muthla a.

A hnungchhawn zâwng chuan ka mu ngat bawk, “Tunah hian mu dûn ila min kalsan lovang tiraw? Ka fa i pai anga chuan min kalsan miah lovang” ti a min fawh mai a tum chu a chalah ka tuk ringhal lawlh mai, eng ngaihtuahna mâwlmang lutuk nge a rawn put ni.

“Ngawi hmak rawh, khatiang sawi tawh miah suh. Mut dun phei chu maw a teuh hian a hnai lo mai, pasal ka neih hma loh chu ka thianghlim reng dawn. Mu hil rawh, zu vawikhatmah in tawh suh ang che” tiin ka phone chu ka phawrha.

“I nute ka be dâwn a nia thâwm lo chhuak hlek suh ang che” ti leh  te te in nu Âsangi chu ka call zuia “Aw Hmingte” a rawn ti vara, ka sawi tûr chu ka huphurh ṭûn mai. Inneih hma hauha riah dun reng chu min ngaih dik loh te pawh ka hlau.

“Nu zanin chu u Rinpuia ka inah a riak dâwn aw, ka lo hrilh che. In ngaihtuah ka hlaua” ka tihchuan a rawn chhâng rang ngei mai “Aw le, ka ring sa hrim hrim. Bawihi ka fapa kha dawh hrâm hrâm rawh aw, tlaiah khân engkim min hrilha, a tlin lohna lai kha khawngaihin ngaidam hrâm ang che. A rilru a hah lutuk tih ka hria, anu leh pa hi min hrilh duh lo mahse ka hre thei a ni” a tihchuan chhân dân tur pawh ka hrelo.

“Ka fapa khân nang lo a ngaihsak hauh lo a nia, Nunzuali pawh keimah ngeiin ka lo bia ang. In inkar a tichhia a nihchuan keimah ngei hian ka lo bia ange” a tihchuan ka hnial lêm lo, in mangṭha in phone chu ka dah zuia.

Ka bula min lo en kur tu chu melh lêtin “Muhil vat rawh” ka ti leh hlaka, min la rawn kuah ang deuh deuh lehnghâl. Mipa ngawi chawi lutuk emaw ka tih kha, ka ṭhen dawn meuh chuan a zia a dang ve hlâwk mai a lawm, hetianga a awm hi ka ring pha lo hrim hrim.

A mutthilh dâwn thleng chuan nghet tak hian min kuahin ka âwmah chuan a bei tlata, keipawhin han namsawn emaw pawh ka tum chuang lo. A laka ka lungawi loh hmasak kha chuan a ngawi reng kha a nia, tûn ṭum meuh zawng ka rin loh dân deuhin a ni a chêt ni.

Zînga ka harh chuan min lo en leh reng tawh, a rui hmêl a bo tawha. A meng fiah ta kak mai, ngawi reng chuan kan in melh tawn renga, biak hmasak ka tum lo. 

Chutah a kut chu rawn kân luai luaiin ka biangah chuan a rawn chula “Ka tihpalh, bul ṭan leh ang aw. I tello chuan nikhat lek pawh a hrehawm, a reh vek, i tello chuan engmah a nuam lo, min thinrim khum tawh suh aw, Duati ka tihpalh takzet” a thutak zia ka hailo.

Keimah avângin a tlâwm a, keimah avângin a tih ngai loh zawng zawng a ti veka. Keimah avângin zu a in hial tih ka hriat hian keimah pawh ka na “Ka...tihpalh” a rawn ti leha, ka khawngaih lutuk chu keimah zâwk ka inthiam lo rawih rawih mai.

Ka kuah ta tawpa “U Rinpui, ngaihdam ngaiin awm tawh suh. Ka thik turin awm tawh suh aw, tûn bâk ka ngaidam tawh lo ang che, tûn hi i chance tâwp ber ni tawh rawh se. Ka hmangaih che, keipawhin ṭhen che ka duh lo, mahse na reng tur chuan hmangaih chung che pawhin ka kal tir mai ang che” tiin ka mittui nên chuan ka ena.

Chuveleh rawn dâk chhuakin a hmelah chuan hlim hmêl a rawn lang leha. “Ka tiam a che Duati, ka tina leh tawh miahlo ang che, i thik turin tu hmeichhia mah ka awm pui leh tawh hek lovang” tiin ka chalah chuan a fâwp vang vanga.

“Aaaa ka lungawi leh theilo, ka lungawi hma lutuk ka duhlo. Ka thinrim ala bo theilo, ka thin i tirim leh zêl ka” ka sawi zawh hma chuan ka hmui hupin a kut lehlam chuan a beng chu a pawt zauha.

“Min thinrim khum tawh lo hrâm rawh, i tello chuan a reh vek ka tih kha. Min biak loha min hmuh duh loh chhûng kha i tân chuan reilote mah nise ka tân chuan a rei lutuk, chatuan a daih dawn hialin ka hria a sin. Khatianga i awm chiah khân he thinlunga hmun ilo luah thûk tawh zia ka hria a ni” tiin ka chalah chuan a fâwp zauha.

“Min ngaidam rawh aw, ka lo ngaihsak tâwk loh che a vangin min ngaidam rawh. Tûn aṭang chuan ka theih tâwp ka chhuah tawh ang, i hriat kha hmeichhia hi pakhat bâk ka la ngaizawng lova, chu pawh ṭhian kan nihna avângin ka hre chiang chauh mai a nia, nang hi ṭhian tih hming tellova ka thinlung in a hmuh ruala a thlan hmasak ber i ni tih i hria ang” a châwl data.

A sawi leh tur ka lo ngaichâng reng thung “I lo lan a chinah khân keimaha awm ngai lo tam tak i awm tira, ka dawn ngai miahloh hmangaihna leh ngaihsakna ka hmua. Keimah aṭanga ka la tih loh thil thar min zirtirtu i ni, ka nuna i rawn pên luh rual khân beiseina leh hlimna thar i rawn keng lût a, keimah min thlâk danglam a sin. Chu chu i inhre miah lovang tiraw?” a ti dam dapa.

“Hriat turin engmah ka hmu ngai hleinem, i mizia a ngai reng maiin ka hria a sin” ka thusawi avâng chuan ka dulah a rawn hmer salha. “Nang nên kan nih avâng khân inthlâk danglam vak kha a ngaih chuan ka ring lova, i mizia leh duhzâwng ka lo hriatchian loh vâng a ni pakhat; mahse hei erawh hria la ka duh. Thinlung taka ka ngaihsaka, ka ngaihven reng ni hmasa ber i ni asin, ka nunah êng i rawn keng lût a. Hlimna ka tawn ngai rêng rêng loh min tawn tirin suangtuahna ramah min hruai luta, nangmah avang hian a sin chhûngkua din duhna rilru ka put tâk” ka chalah chuan a rawn tauh data.

Ka nui ta sak mai, a thusawi chu dâwt mai mai ani dâwn lo tih ka hria. “I nunhluiah ka tello ka tih tawh kha, tel duh pawh ni ila ka tel thei dâwn lo, kan nunhluiah kan lêt leh thei tawh lova. Siamṭhat theih a ni tawh lo, mahsela kan hmalam hun erawh kan siamṭha thei ka tih fo kha. Keimah min ringin midang i nunah awm ngai lo sela ka duh, nangmaha hlimna leh lungawina ka neih ang chiahin keimahah nei ve la ka duh bawk. Chutiloa keimahah i lungawi a i bet thei ngang lo a nihchuan ka kal tir ang che ka  tih kha,  duhthlang theilo mi thinlung chu ka duh bik lo. Pakhat tân phu rawh se, pahnih tâna phut a tum a nihchuan kei chu ka inthiar fihlim ang, rinawm rawh. Rinawmna min tiam theilo a nihchuan hmangaihna min hlân bawk suh” ka sawi chhuak ta dap dapa.

“Um ka tihpalh ka tih tawh kha, min rawn pawm thut a, ka kuah lêt lo hrim hrim. Bâkah bawlhhlawh bawma ka paih tawh chhar lêt duh tur khawpa mipa mâwl ka ni bik lo ania” a tihlai chuan “Zu in tawh miah suh, i inkhawm dâwn emaw ka tia engah nge khatiang te i in ve, vawikhat mah in tawh suh” ka lo ti a.

Zu bawiha a tân ve mai ka hlau, zu hian chhûngkua a ti darha, mi ngaihtuahna fim tak pawh ti nu in mi danglam takah a thlâk a, mi chhungkaw hlim lai a tikeh chhe ṭhin. “Ka in tawh lovang, ka thil tih tum a piang min hniala, min ngaidam duh bawk siloa, Sawma te'n ka rilru hah nên min inpui tawp a nih kha, ka ngaihtuahna a buai ve deuha, ka in tawh lovang” a tihchuan ka chek hlaka.

Chûng ho chu nizânah khân keimah zâwk te kha min inti hau vei ara, an châk lo mai mai ang chu aw.

“I rilru buai lai ber pawhin zu chu in tawh suh, ka pa avângin zu in mi reng reng ka hua. Ka Pa pawh a hma chuan mi fel tak a ni ṭhin, mahse zu a in chinah chhûngkua a chawk buaia, harh fim lai a nei tawh lo. A au vak vaka, thinrimna tur a zawnga, chhûngkua kan buai phah nasa lutuk, mualpho na a ni ringawt. Chuvâng chuan zu in mi hrim hrim ka ngaina lo, keimah avânga i na a nih pawhin nangmah in tichhe ngai suh, ka duhlo” tiin chiang zet chuan ka ena.

A ngawi renga, min chhâng tawh lêm lo. Mahsela a in tawh loh erawh ka ring ve ringawt “Tho tawh ang, haw tawh rawh. Nangmah avângin i nu pawh zak chung chungin ka bia a nia, min rawn hau ang tih ka hlauh mai zia” ka thusawi lai chuan a rawn nui suk a nih chu.

Chutah min pawm tho nawlhin “Kan innei nghal mai dâwn em ni? Mâkpa chhungkhung in ka rawn lût anga?” tiin anui vur vur a,min fiam tih ka hria “A sawi pawh sawi suh, i nu leh pa enkawl tu tur i nih tawh hi. Nang leh zêl chuan i in dan san lovang, keimah hian ka rawn luhkhung tak tak mai tur che a nia” tiin ka fiam lêt ve hlaka.

“Pawi miah lo” ala ti zuia, a hlim hmêl chuan keipawh min tihlim, a laka ka thinrim chhûng reilote ah pawh tikhawp khân a tâl buai ania. Min hmangaih thu a sawi kha ka ring hlel ta lo, chutih rual erawhin a hma aia khirh erawh ka tum tlat thung.

“Inah chuan lo kal ve la” a tihchuan ka lu ka thing nak naka “Ka duh lo, enge ka rawn tih ang? Nangmahin haw rawh, mikhualte in nei leh nghal i mawl emai, i nu a buai hle dâwn a nih kha” tiin ka thuk lam chu meichhem tumin ka pana.

“Nula vek an nia, an pui thei zâwk ang. Bâkah ilo thik leh ange, vawiin chu ka rawn lêng ang” a tihchuan ka en phei haw a “Hnathawh tur i neilo em ni? Rorelna lamah te pawh” ka tihchuan lu thing nar narin a tel ve loh thu chuan min chhâng a, a ai upa an la tama. An ruat te pawh aniang.

“Taka khawimaw thla la ang, kan inngaihzawn hnuah ka status pawh ila luah lo, i status pawh ka luah ve duh tho. Tihian miin ngaihzâwng kan nei ve ve tih hre rawh se” tiin a kal tur chu ka pawt dinga, ka phone chu ka phawrh nghal zat bawk.

“In post ve rawh” ka ti chu “Ka thiamlo” ala ti zui, ka sawisêl peih lêm lo. A awm awm chuan ka awm tir tawpa, a sawi ang tak takin han din kual emaw pawh a tum lo, tak ran hian camera chu a en tawpa “I va han zeilo tak” tiin ka nui ta tawpa, a ni erawhin “A ho lutuk ka hmêlṭha tho” a la ti zuia.

.

“Nia i hmêlṭha ber kal tawh rawh” tiin ka nawr chhuak zui dat data. A haw tur lah chuan a hreh em em lehnghâl, engvanga tûna taka haw hreh em em nge maw a nih ni. Ka bula chaw ei a duh thu a sawi phei kha chuan ka hau hial anih kha, bâkah mikhual an neia, an tlangvâl ber a awm loh reng chuan mak an ti lutuk palh ang.

Rawngbawl pah chuan kan pahnih thlalâk chu ka ena, ka beisei loh lutukin a mawi phian mai. A mitmeng fiah deuh tak chu a mawi chiang a lawm, a hmêl pa hrak mai chu ka en renga, ka phulo mah mah hian ka hria, nui ver verin status ah chuan ka up zuia, caption ah “Ka duh em em pa” tihchu ka hmang bawk.

Rei pawh a nilo, ka ṭhiante ho bâkah mipa min be tu te'n min rawn zâwt nghal sup sup mai. Kan ṭhianho group-ah ka ṭhiante lah chuan an rawn post-a “A lo va in zêp thei, en teh u. A phu lohin bialpa a nei ṭha, a cool zia hi ,engtin nge a hmuh bik ka duh ve” tih vêl chu an sawi nak naka.

“Zo-i seen kur lo khân i bialpa a ni tak tak em rawn sawi teh” an tih tâkah chuan ka va lang ve ta chauha “Ni e, nilo se ka hman in ring em ni? Khalamah bike hnung kâng vaw a in in phurh tir vawk vawk lai khân keite chuan mipa hmêlṭha, rintlâk bawk si cool em em hi a lawm ka zawn char char, tikhan ka single char char man chu a tâwpah ṭha deuh a lo chhuak nawlh mai a sin, in bialpa te ho ai chuan ṭha fia fia tak a ni” ka tilui pah bawk nên an rawn haw leh dâwn tih ka hria.

Ka bialpa neih hma a an mi tih dân ang chiahin ka ti lêt chu an tha a na tlâng teh e, “I zak lo, a hmelṭhat a vâng ringawtin rawn in ti thei suh. In la inṭhen thei tih hria la, rawn in ti thei vak suh a hrim hrimin tunge a hming?” Tebawihi chuan a rawn ti a, keipawh chuan ṭha tak chuan hrilhin “Inṭhen dâwn nang, inneih lamte kan hawi tawh mawle, mo ṭhian tur te pawhin in lo in ring ṭhuau dâwn a nia” tiin keimah chuan ka nui hak haka.

“Awi nasa nu, tak takin i bialpa chu a hmêlṭha tawp. Ka thik che, a hmêl kha a ṭha mai anilo, a pa ngawih ngawih. Ka star dâwnin ka hria, a ngo lo mahse a famkim tawp, engtin nge khâng ah te khatiang an awm theih?” ka nui lo theilo, an rawn phûl pui nasa lutuk.

Min bem tu ṭhenkhat erawh chuan an rawn thik nasa mai. Chhâng duh lêm lo in ka en liam tawpa, a chhan pawh ka chhâng leh a nih chuan u Rinpuian ka phone a check leh hunah a thinrim dâwn tih ka hria, a hmuh loh tûrin clear ve ṭhin mah ila ka hriat lohah lo en a hmang bawk nên a thikthu a pe chhe bawk sia, mipa dang han biak vak ka nei ngailo.

U Rinpuia pawhin a rawn view ve ta ngei e,“Ka hmangaihpa tirawh” ala rawn ti zui, nizân aṭang a zia hi a dang riau. A eng hria chu nimaw? “Aaa nidangah tûnah chuan ka up zo vek tawh, nangmah khân timai rawh, i la up ve miah lo a nia” tiin meng rum lutuk sticker chu ka va thawna.

A seen nghal vat, a online khât a, a online chhunah erawh keimahah a lût char char nge mawni a seen nghal chat zela, chu chuan ka ngaih a ti ṭha vêng vêng thung. Mawii sawi ang deuh khân an online renga min chhân mai loh hi chuan ngaih hi a ṭha lo êm êm a, an online hmuh ringawt pawhin thin a rim nghâl ṭûn thei.

Reiloteah status a up a, hei hi kan nih hnua a vawihnih up na chiah. Status nei khât tak chu ani ve in ka hria, kei erawh status ka up loh chuan ka awm thiamlo, ka up ṭeuh ṭeuh zêl. Mi biak vak ai chuan status up mai mai hi ka hlimpui zâwk.

A status chu ka va seen ta ngeia “Ka hmangaih nu” an ti ngeiah, keimah chuan min hmu dâwn lo mahse ka nui vur vur mai, zêp loh chuan kan inhmeh chu ka ti ve reng. Ka ta a ni mai te hi âwih loh châng ka ngah, amah anga hmêlṭha leh fel bialpa atân nei tur phei chuan ka in ring ngailo, ngaihzâwng ka nei ang tihchu ka ring ve ṭhin, mahse hmêl zia awm tak leh zahpuiawm lutuk bîk loh bâk ka hmuh zawh ka ringlo a.

Mahse beisei loh ruamah ka phu bâk aia ṭha ka nei ta chu ka lâwm bawk si. Ka tawng lo ang tih ka hlau ṭhin, ka zia duhawm loh tak mai a hmu chung pawhin min iaina a nei hauh silo, keipawhin iaina ka neilo a, a ni tel hian ka duh nimaiin ka hria.

“Awi Zo, ka mood a off vek” Mawii rawn phun lût nâng nâng chu ka lo ena, eng tak chu nimaw? Ka bulah rawn ṭhu in a thaw haka “En teh, ka nin deuh chu maw? Ran kan vulh tih i hria ang, ran te kan enkawl ve a, kan theih tâwp chuan kan enkawl ve a. A châng chuan ran hrim hrim vulh loh hi ka duh ṭhin” a rawn ti chu ka hrethiam lo viau mai.

Zawhna nên a ka lo en lai chuan “Ran vulh chu kan khuaah chuan maw har tak a ni. Mahni ran lo chu an hmu thei miahlo, an ui hnawksak zia te mi ina lût a duh duh an rawn ei te hi kan sawi bik silo, ran tlatna ah lo an rawn nei luia. Hung duh miahlo in an rawn awma, ran han lût palh se mi an ṭawng khum bawih bawiha, a ṭhen phei chuan min huat vâng hrim hrim nge a lût lo pui te lutah an lo puha, va fiah ila an lût ngai silo, dik tak chuan ka nu leh pa i hmu anga, unau awm pui pawh kan nei tawhlo. Hna kan thawh chuan an ni tar chuan engmah an ti thei lo, mi hi an rilru hi a lo chhia ani” a ti leh tawp a.

A rilru a nat hmêl bawk nên ka khawngaih viau mai, thingtlâng an ni bawka. In rêl leh in sawichhiat an la hmang bawk sia, hei hi khawpui aia a hrehawmna tur chu a la ni. Khawpui lam ai mi chanchin sawi leh rêl an peih zâwk.

“An va timak ve, chutiang te chu a. Ran â an nia, bakah mahni huan pawh hung peih lo te chu an lût ve bawk ang chu, mitinin mahni duhzâwng ṭheuh kan vulha, vawk te, ar leh ui, bawng te chenin, mahni ranvulh an chhan ang chiahin mi pawhin an chhan tih hriat tur a nia. An timak hle a nih chu a” ka lo ti ve a.

A rawn nui hak mai “Kan inthiam lo ve tho a, kan theih tâwk chuan kan vêng ve mawle, rinai kan mira, an pung chak sia. Dik tak chuan hralh vek theih se tih châng ka ngah, he khuaah chuan maw eng ran mah, mahni ran lo chu an leng lo. Midang ran hmu theilo vek an ni, ka sawi tawp mai ang, mahni ran vulh ṭheuh chu kan hmangaiha, kan ran avâng hian rilru pawh a na tam a sin, a ṭhen ramhnuai kawrah te an tla lai min lo vawm hlum saka, an uiin an tla ṭha lai lo va kal chilha seh pawh an nei, a hrehawm. Ran vulh ṭheuh kan nia, a inang lo a nimaia, heti em em a midang ran hmu theilo hi Mizote ah hian kan tam a ngem le?” tiin a thaw haka.

Ka kuah vat mai “Lungngai reng reng suh, ran chunga nunrawng lutuk chu Pathian pawhin a phalloh kha, malsâwm an dawng ngailo. Midang ran vulh hmu theilo, mahni ran vulh thlavang hauh na viau si ho hi an buaithlâk a nih hi, khulamah pawh a ni tho. In theih tâwp in chhuah tih midangte pawhin an hmuh hmaih bîk nâng, i rilru tina suh. Mihringte chu midangte rilru tihnat leh sawichhiat bâk thiamlo kan tam a nia, Pathian in a thilsiamte enkawl tura thuneihna min pêk kan nia, a thilsiam zîngah an tel veka, mite chuan engtin pawhin lo sawichhe cheu mahse Pathian lam zâwk a pawimawh, thilsiamte enkawl tur a lawm kan nih” tiin ka hrilh dap dapa.

A rawn nui sak mai, “Ka rilru hah lehna pakhat chu hei hi a nia” tiin lungngaih hmêl tak hian a hmalam chu a melha, a mittui a rawn tling nghal pam mai. Chu chuan keimah ngei pawh min tidanglam lo theilo.

“Mawi enge thleng min hrilh rawh? Thil thleng a awm em?” ka tihchuan “Zo engkim a tâwp, engkim a tâwp tawh. Kan inṭhen angai” a ti chu a sawi awmzia ka hre nghal, a rawn ṭap chhuaka. Ṭah rin erawh a hlau viau thung.

Ka kuah vata, “Enga tinge? Engvang nge?” ka tihlai chuan a mittui a rawn luang zui ngiai ngiaia “Ih maw a bialnu hlui a lo raia, aaa....engtin nge ka tawrh dâwn ka hrelo, ana a ni, a na ngawih ngawih” tiin a ṭap zui leh hlawp hlawpa.

Chu thu meuh chuan min ti na ve zawk mai, ka khawngaih bawk si. An chhungkaw buaina nên vawikhat a tawrh atân chuan anasa mah mah a ni, a hnungah chuan ka chûl sak hliau hliaua.

Tinge kan hmangaih te hi neih an har em em mai le" tiin a ṭap zawih zawiha, a rilru chu hriatpui vek lo mah ila ka khawngaih lutuk chu ka mittui a tling ve pam mai.

Ni e khawvelah hian in hmangaih tawn tak innei hi an tam  kher lovang, siamtu hian in hmangaih tawn tura min tih ang hian khawvelah erawh ṭhenkhat chuan hmangaih tak kan neia, mahsela kan ta an ni leh thei chuang silo, siamtu demawm châng pawh a tam ang. Kan hmangaih tûrin kan nunah mi a rawn tîr luta, mahse kan neih hlen erawh a phal silo, kan hriatreng turin mi ṭhenkhat chu min pe a, an sûlhnu leh hlimthla in min chenchilh a, chu chuan dam chhûnga ser reh thei tawh lo tur min hnut chhiah tawh ṭhin.

“I tuar chhuak thei em em ang, nakinah mipa ṭha tak i la tawng dâwn pawh a ni thei a sin. Ih maw Mawi, Pathian hian kan tâna ruat min hmangaih tak tu leh tuna i tawn aia ṭha pêk che a tum zawk alâwm, chu mi i tâna mi ṭha chu a lo tîr meka, nghak turin a duh che a niang, i lak aṭangin a ṭhat loh zia hria in a la bo zâwk a nihchu . Beidawng suh aw" tiin ka kuaha.

Ka tawrhpui takzet, a hlim zia kha ka la theihnghilh lo, a ṭah nuih hak a “Ka duh tawhlo, tumah hmangaih neih hi ka duh tawhlo. Hmangaihna a nasat pauh leh min tina tama, kalsan tum pawh ni ila hmangaihna in min dang tawh si, tinge ka hringnunah a ni ang kha ka lo tawn. Huat ka tuma, mahse ka duhna a pung zel zawk si, biak tawh loh ka duha, biak chakna in ka khata, hmuh tawh loh ka duha. Mahse a rûkin ka zawng reng bawk si, rawn kal thut sela ka na hi min hnem sela ka duh, mahse a thleng ngai dawn silo" tiin a ṭap chhuak a.

Anat dân tûr ka hriat pui, tawrh a har viau ngei ang. Insûm  tak in mi hriat a hlauh avangin ala ṭap chhuak duh lutuk lo zawka “Hming, duhthusamte kha kan ngah a sin, a ni nên khân hmalam hun ka suangtuaha. Chu thil chuan min tihlimin ka nitin nunah huaisenna min pe ṭhin. Mahsela tûnah chuan chu ka suangtuahna ngei chuan hmalam pan ti harsa in ruam thûk lamah min hnuk thla dawr dawr chu a nih hi, a thu min tiam i hre duh em? Kan innei anga, zantin kan infiamin min mutsan i tum pawhin ka kuah bet ang che anga, ka tibuai reng ang che. Kan inneih phawt chuan duat tak leh rilru na in ka siam ngai lovang che, min ring rawh. Keichuan ka nihna ang anga min pawm chhûng chuan ka phatsan ngai lovang che ti tu khan a vawihnih nân ka nun chu hremhmun ah a chantir a sin" a ṭah chhuak insûm chu a hnang lek leka.

A hnungah chuan ka chum sak dat data “Aaa keichu hmangaih ka nei duh tawh lo, ka tuar thei tawhin ka ringlo. Nêp pawh min timahla a pawilo, kan mi rin leh hmangaih ber ber te hian midang ring leh tawh lo turin min siam ṭhin, ti hian ka ta ni ve tawh dâwn lo mahse kumkhua in ka nghâk tawh ang. A sûlhnu in min chenchilh anga, a hlimthla leh a engkim ka ngaihtuahna leh mitthlâa awm reng tawh tur avâng hian tumah ka nunah a mah thlâk tu an awm tawh ngai lovang, a hmun ruak luah tu tumah an awm tawh lovanga, chutih rual erawhin hmangaih reng siin a tân ka awm thei tawh bik lovang” a ṭap zui hliam hliama.

“I hmangaihna kha a phu lo a nihchu, kan rinna tihchhiat a nih tawhna hmunah hlimna a awm thei tawh ngai lo. A harsa ang ka hria, mahse theihnghilh tum rawh aw, i thei em em ang. Ka sawi kha, i tân mipa ṭha tak an la rawn lang em em ang, i la naupanga nghâk ṭang ṭang rawh. Pathian hian i tâna a ruat dik tak tur a pêk che ka ring tlat a ni” tiin ka thiam tâwk chuan ka sawi veleha.

“Zo,a ni chuan ka hun ṭha pêk leh chu min tih chhiat sak lehin amaha ka beiseina te chu a ṭhiata, tûnah ngai viau mah ila khuarei in min la hnem mahna. Midang lâk luh ka tum tawh rih lova, chutih rual erawh in amah anga min ti danglam thei tu an awm leh te a nih chuan ka la ngaihtuah leh mahna. Ka thlakhlelhna leh hmangaihna te hi reh dâwn lo mahse hun liam hian tih nêp hun a nei dâwn tih ka hria ani,” za lo zet chuan a khi saka.

“Ka na ka zêp lo, ka chhûnglam aṭang hian min hnawh ut uta, ring taka ṭah chhuah ka châk. Ka mittui hi a phu lutuk, a chhan chu reilote chhûng pawha a hriatrengna tur min hnutchhiahte hian ka mittui hi an phu a ni, tûna ka ṭah loh chuan nakinah chuan ṭap tur ka awm tawh dâwn lo. Keichu a hunlaia ṭaha, na taka awm hi ka duh zawk. Mahsela indawm kun reng erawh ka tum biklo, min tihnat nate hi chakna atân ka hmang anga. Ka hriatrengna hi midang ring nghal mai tawh lo tura infuihnan ka hmang ang.

I hria em? Hmangaihna chu mahni in pumpekna leh natna tello chuan hmangaihna a ni theilo. Hmangaihna chuan tlâwm rawih tur khawpin min siam a, mi â ang maiin min awm tîr ṭhin. Mahse kan âtna tak kha hmangaihna vang a nih chuan a hlu a sin, mi thusawi kan ngai pawimawh tawh lova, min tina em em tu bula kan hlim leh tlat si laite hi a nia hmangaihna mi ti â tu an tih chu, kan tlâwm fo nachhan leh kan ṭahna hi hmangaihna ti famkim tu a lo ni a, min bum tih hre reng chunga haider thei a min siamtu hi a ni midangte min dem khawpa mit ti del tu chu” engmah vak sawi tûr ka hrelo, tihian in sawi thâwl se ama tân pawh a ṭha dâwn tih ka hria.

A thusawi lah chu a dik ka tiin kei ngei pawhin u Rinpuia hi chân dâwn ila ka tawrh nat tur zia ka hailo, engtin nge a tawrh theih zâwk ni.

Chutah a mah vêk chuan a rawn sawi zawm leha “Mi an hmangaihte avanga an na leh an kir leh zêl duhte kha nep ka lo ti ṭhina, an chaklo ka lo ti thei lutuk. Mahse ka han tawn ve tâkah chuan midangte nêp ti em em tu kha nêp ka in ti leh chhâwng"za lo tak hian a ṭhen saka,chutah rawn sawi chhunzawm lehin. “An ngaidam leh mai ṭhin te kha ngeiin ka nuih khuma, mahse tûnah meuh chuan a nat zia leh mi a tih tlâwm theih zia ka hre ve ta. Tûnah chuan hmangaihna thawnthu tuipuia hlimpui ṭhin tu hian hmangaihna nunrawng zia ka hriat chhuah phaha, ka tlâwm nawn awn awn anih hi” hmalam chu a en vang vanga.

Chutah thawk la leh hakin “Tinge ka lo hriat kher, min lo be lo law law sela, cham hlen lo tur chu ka nunah hian ka mamawh lo asin. Ka harsatna tawh te mah ka chauh pui laiin ka nun hrehawmna belhchhah turin ka hringnunah Lalna a rawn hauha, min duhtute hnar kiangin a tan ka thinlung kawngkhar ka hawn saka, mahse midang hnawla ka thlan a khan midang tân min hnawl veleha, midang rilru tina a ka vawn khân midang vangin ka rilru tina in min thlaha. Tûnah chuan tho chhuak leh mah ila tumah lâk luh ka duh tawhlo, ka nun tihchhiat belh leh nan leh chak loh phahna tur chuan tumah lo lût tawh suh se" tukverhah chuan dâk chhuakin a mittui chu a hru pah mawlh mawlha.

“Hei erawh a hnên aṭangin ka hre reng tawh ang, ka tana a thil tihte, a thusawi te, a nuimawi tak ka hmuh leh tawh ngai loh tur te kha, a hmangaihna ka dawn ve zawng zawng te kha. Kan thih hunah chuan kan la in tawng leh chêk anga, chutih hunah chuan hlim takin ka hmachhawn thei tawh mahna, Keimah hnaih tu te duh lo viau si khan enga tinge ka tân hmeichhe dang kha i hnawl theih siloh? Tih hi zawn ngei ka duh ang” tiin a mittui chu a hru zauha.

A awmdan chu ka en renga, a kehchhe mêk tih ka hmu thei. Ka lo insut ve hraiha, ka khawngaih lutuk chu ka chanah riak ngaiin ka mittui chu ka hru mawlh mawlh a.

“Mawi hmangaih phu miah lo kan hmangaih avâng hian a nih hi kan nat phah fo ni, hmeichhia hi chu kan â tiraw? Min hmangaih lo tu kan vawnna lamah kan nun kan tichhia a, min hmangaihtu kan ûm bo va, kan â takzet a ni” tiin ka ṭah pui ve a.

Chutah rawn nui hak in “Nang chuan u Rinpuia hi thlah ve miah suh aw, a kalsan dâwn che pawhin vuan lui ngar ngar rawh. Hmeichhia a ṭhian pawh nise thlah fal ngai suh. Chutilo chu ṭhian tih hming chhâlin a lakah i chân ve daih ang, keichu tihian ka tuar tawha, tawrhchhuah hun chu ka nei mai ang. Amah ang kha ka tawng tawh ngai dawn lova. Ka ngaihna pawh a reh ngai dâwn lo, a hrehawm tur ber erawh ka hlim leh hunah leh ka dinchhuah leh hunah pawh ka la hrechhuak reng tur hi a ni, keichuan ka hmangaih ka chân a, nang chuan chân tum ngai suh” a tihchuan ka bu nghat nghata.

Engtin nge kum naupang te in a tawrh theih zâwk, a tira a na hmêl kha tûnah chuan a pângngai leh vek tawh. Hmeichhe chak tak a ni tih ka hria, ka ngaisang ru takzet, kei erawh u Rinpuia nên kan inṭhen zawk chhûnga ka awm dân ka ngaihtuah leta, ka nêp ka in ti ngawih ngawih mai.

“Ni e, a theih chhûng chu vawn ka tum ang. Nangpawh mi pakhat mai avâng khan in dawm kûn reng tur a nilo a nia aw, khawvêlah mihring kan tam lutuk. Beidawnna leh mahni in khawngaihna hi mihring hmêlma lian ber a ni, luhlulna leh thinrimna, huatna te hian min tih chak châng a ngah zâwk a nia, be tawh suh ka tilo che a, mahse be tawh lo thei la ka duh pui che” tiin ka hrilh dap dapa.

“Nia, a mah pawhin hrehawm a ti. Mahsela naute a awm tawh miau si a, ka kal tir ta mai a nih kha, kha naute hma hun kha ka tihchhiatsak theilo. Chhungkua din sela hlim takin awm sela ka duh, mahsela hmuh erawh a hrehawm dâwn tih ka hria, khuareiah erawh ka la zia awm veleh mahna” tiin a nui ta hak haka.

Ka nui ve ta var var mai, a mitmengah erawh tawrhna lang chu ka hmuh hmaih lo. Hmangaihna nilo in hmangaih lohna hian a nih hi min lo tina ṭhin ni, a kut chu ka hum saka.

“I chak tâwk tih ka hria a lawm, a ni kha chu i hmangaih tur, mahse i neih theih loh turah ngai la. Hmangaihtu tur che leh i damchhunga i hmangaih tur zâwk che a rawn lang leh mai ang, hringnun ah chuan hmangaih hmasa ber hi neih an har châwk an tihkha, kei ngei pawhin hma hun ka la hriat loh hi maw? Kan chunga khuanu ruat kan dang theiloa, tawrh thiam dân kan zir a ngai zâwk, kan ṭhatna tur nilo ah kan tân rem min ruatsak ngailo a nia” tiin ka thiam ang ang chuan ka sawi ve a.

“Ni e, kan tâna mi ṭha lo a la bo ṭhin an tih kha, ka tân a ṭha viau nângin a lo famkim lo pawh animahna, a hun tâkah Pathian in min lâksak ka timai. Pawm thiam dân zir phawt mai ang, mahsela midang han melh leh tur chuan keimahah hian phurna a awm tawh rihlo, keichu ngaihzâwng neih hi ka harsata, mi biak reng te hi ka ninga. Mahsela ka duh vêk vêk tawh chu ka kalsan mai mai ngailo, hei vâng tak hian a nia ngaihzâwng ka neih mai mai duhloh” tiin a nui har hara.

“Ka haw phawt ange ka rawn kal chu ka thâwl hawk mai, harsatna hi a rawn thleng tup tup maiin ka hria. Engpawh nise a tawrh lam kan chhel a ngai a nih hi tiraw? Hmangaih tlâk miah loh hi an lo awm a nih hi, nakinah chuan ka theihnghilh leh mai ang” tiin anui paha, ka lo nuih lêt ve bawk.

Chutia a êng zâwnga thil a thlir thiam chu ka thaw ve huai mai, a chhuah hnu chuan ka in ngaihtuah neuh neuha. Keipawh u Rinpuia a sawi ang khân awm ve se ka tuar thei kherin ka ring lo, ka na viau in ka ring bawk.

Mawii a haw tâk avâng chuan inkhawm turin ka insiam zung zunga, a la hma viau nângin in peih sa ât a awm hi ka duh zâwk; chubâkah u Rinpuian min rawn sâwm hma thei bawk sia ka insiam tlai chuan a phun leh ngei ngei dawn, a phun chiar ropui si.

Tûnlai phei chu mikhual an awmin mikhual tlangvâl in min biak leh rawn lên an hmanga, a lungawi lo ve em em mai a ni, zaninah a zai dawn tih ka hria. Ka hre châk tawh takzet, keiin zai tura ka tih lahin a duh der lo, ka hre dâwn tho tho sia. Zanin chiah an fellowship dawna, Bial khawmpui hi chu ṭhalai ta bik ni hek lo le.

Rin ang ngei ngeiin hma vêk vâwk ah u Rinpuia chu suit nên a rawn induang zaiha, a va han chhelo leh pek tak. Ka lo en reng chu kawngka a rawn luh rual rual chuan min rawn melhin engmah ka lo sawi lo chu mak a ti deuh nge a mit a sân uk a, ka nuih nghâl ver ver mai.

“I va han chhelo sêng sâwng tak, vanlalbialnu nei fuh pa” ka ti leh daih si chu a rawn nui hâwka, ngeiawm min tih hmêl lutuka min rawn panin ka biang a rawn piai nawk nawka.

“I ti dik ang, bialnu nei fuh em ema ka nih hi, bialpa nei fuh nu i nih ve tho hi maw” tiin min rawn kuaha, “I nalh lutuk, i inhmeh hle mai. Ka bialpa hi vên ṭhat hle i ngai dâwn a nih hi, nula in la thleng zui, ka thik riau a nia aw, ka chan loh che chuan....” ka ti duah kher chu ka chalah a rawn pen fawka, tûnlai chu Sawma te ho pawh an rawn lang ngai lo.

An rawn lên loh chhan ka zawh lah chuan “In pa nên in inkar a ṭhat tak tak hma chu kan rawn lang tawh dâwn lo, in duat khu chûk phawt ula. In pahniha hun thâwl pêk ve te pawh in ngai, chutilo chu in inṭhen leh anga, in rilru na thinchhe kual tur kan tuar reng peihlo. In inṭhen chhanah te min puh palh ang, chance nei thei lêk lo in an lo lang te in ti ange” tiin min la chhâng zui.

An sawi dik ve tho bawk sia, zantin an rawn lêng a. U Rinpuia nên phei chuan chance kan nei ngai lo tluk a ni “Min chang lutuk ang, palai ka rawn tirh nghal loh. Ka in peih var var tawh a nia, nupui neih vat vat ka duh, fa neih ṭeuh ka duh bawk” a mizia kulmuk em em kha an reh ṭan a, ka bulah chuan a suangtuahna te pawh a sawi ve nasa ṭhin hle.

Kei lahin ka lo hlimpui leh chhâwng a, a suangtuahna ang chuan awm dûn thei ila tih hi ka duh tak tak, a tello chuan eng tih mah hi nuam pawh ka ti tawh lo. Ka hmangaih leh min hmangaihtu ni bawk ka tawng thei hi vânnei ka in ti a, chutih rual erawhin Mawii thil tawn erawhin ka ngaihtuahna a luah ve reng thung.

Hmangaihtu in min tina ngai lova, kan hmangaihte zâwkin min tina ṭhin, min ngaihsaktu in min kalsan ngai lova, ngaihsak lo tu in min kalsan ṭhin. Min duh lo tu in kan thinlung an hliama, min duh tu in min tuam dam leh ṭhin bawk, mahse hei erawh kan hmangaihte kan hre reng bik lova, theihnghilh a mi thar rawn lan hun a awm ṭhin tih hi.

U Rinpuia nên chuan Biak in lam kan pan dûn a, tûnlai chu mikhual in min rawn rîm aṭang khan min zui chawt ti ila a dik ang, hetianga a thikthu chhia a tihlan hi ka ring pha lo hrim hrim. Mahsela kan in hauh hnu aṭang kha chuan midang hmuh pawh pawi tiloa a thikthu a tihchhiat châng a tam ngang mai.

Vawiin bâk an cham lo tur erawh ka thaw huai thei, hetiang em ema a thik hi ka beisei phalo hrim hrim.

Inkhâwm naah te chuan ṭhut hmunah kan insawi ve nasa mai, mikhual an tam bawka. Lâm tual mawiin an theih tâwpa Pathian an fak hmuh chu anuam ka ti, kei erawh ka lâm ngai lo bawk nên lâm ka tum lo hrim hrim.

Mawii pawh a rawn inkhawm ve a, a hmêlah chuan engmah a lang chhuak leh tawh lo. A chak tâwk tih ka hria, a tuarchhuak ngeiin ka ring bawk, a mipa kha hmuha keimah ngei hian bensak ka châk, rinawm theilo tûr chuan beiseina pêk a, hnimhnaih loh mai tur a nia. Duh ve tho si, rinawm leh thei chuang silo a a awm chu ka haw hlur mai.

Inkhâwm bânah chuan fellowship turin ṭhianho chuan kan inzui ta dam dama, Mawii pawh Faka nên an inhnial leh nasa tawh mai. An awm dun tawh hi chuan khawi hmuna awm nge an nih tih an in hre tawh ngailo, an inhnial ngar ngar peih.

Fellowship an la ṭan lo bawk nên kan lût duh rih lova, kei leh u Rinpuia chu ṭhiante awmna aṭanga fâl deuhah kan dinga, a meizial zu chu en vang vangin “Zu tam hauh suh aw, a ṭha lo. I chuap a chhia ang” ka ti chu a rawn nui haka.

“Ka khawhar hnêm a nih hi” a la ti zui “Chu i khawhar ka lo hnem pha meuh nange” tikherin midang lam chu pansan ka tuma, ka bânah a rawn vuan nghâl chat mai.

“A mak ṭhin, ka fiam che a nih kha. Min thinrim khum vaih chuan ka zai ṭha dâwn hauh lo a nia, ṭha taka ka zai min duhpui chuan min thinrim khum suh” tiin a meizial chu a paih zuia.

“Lut ang u hmiang,” a tihchuan an lo hnial lêm lo, u Rinpuia zai hruaitu zîngah a tel bawk nen a guitar perh lai chu ka hmu châk lutuk, mahsela ka rin loh deuhin keyboard zâwk a tum a. Chu pawh a thiamin a inhmeh em em tho, zai paih chuan ka en leh reng ṭhin, tak rana a thil tih lai ngawta rilru a pe chu hmuhnawm ka ti.

Programme chu han ṭan mawp mawp in u Rinpuia chu zai turin an ko chhuak ta ngeia. Thâwm a reh ṭhuap bawk nen ka lo zâm pui lutuk chu ka thlan ve dap thei, thin phu dep dep hian ka ena. Guitar la in a dinga, a bulah drum vaw tu tur vêl an awm ṭhap bawk.

Chutah le a vawikhat nân a zai ka hre ve ta, Jonathan-a sak KA PÂWNLAM LAN DAN tihchu a aw cool raih leh thum deuh chhak chuan a rawn sa a, tumah rêngin hmun dang an hawi lo. Amah chu an en vawng vawnga, keipawhin thinlung takin ka ngaithla a ni.

A zaithiam takzet, a aw a fawn nalh bawk si. A zai ka vawikhat hriatna a ni a, ka rin phâk bakin a zaithiam bawk, “I mit a tla a nge, ka sawi kha a zaithiam asin, mi a hneh ngawih ngawih zel” Mawii chu ka beng bulah a rawn phun sapa, a dik ka ring.

A hla sak ah a chêng tih a hriata, thinlung taka zai tih a hriat hliah hliah. A thunawn phei chuan kei ngei pawh ka mittui a ti tla thei, a zai zo ka bula a rawn ṭhut leh chuan a rûkin a zaithiam thu chu ka lo hrilha, a nui ve suk mai.

Fellowship kan han zo a, ṭhian ho chuan ka in luah lam panin kan inzui diah diaha, an khuaah ka awm rei ve tawh bawk nên ka tlangnel ve tawhin mi ka be bawrh bawrh ve ngam tawha. An ni lahin min hmuh hmasak chuan min be ngei ngei zela, ka tlangnel lo theilo, u Rinpuia nêna kan chungchâng pawh an hre fur tawh tih ka hailo.

Khawlaia ka han chhuah châng hian pa ho in min fiam an hmang em em lehnghâl, ṭhiante hnungah deuh chuan u Rinpuia nêna kalin kan titi dûn mial miala, “I zaithiam nên i zai duh lo vela, ka hre tho tho sia. Zan dangah chuan zantin min zai sak tawh ang” min chhâng dâwn chiah tihin inhnial ri a rawn chhuak leha.

Mawii leh Faka bawk “I kawlh si, mipa tur hmeichhia a piang i nih hi. Hmeichhe sek nu, a rûkin i khai uai a nia ka rin mi, mipa hlauhna châng pawh hrelo, ṭawng thei si. Thinchhe bawk si, hei vâng hi a nih hi bialpa pawh i hmuh theihloh” Fakan a tih hluk hluk ri kan hriat rualin “I ṭawng thei si, hmeichhe hnial i hrât si, hmeichhia tur mipa a piang i nih hi, a rûkin i kapah a bet ṭaiin a nia ka rin ni. Hmeichhe fiam dân pawh hrelo, ṭawng thei si, thinchhe bawk si hei vâng a nih hi bialnu pawh i hmuh theihloh” Mawiin a ti ve bawk.

“I pasal nih hi ka hlau ber pasalte zâwk i bawh ut ut duhin a nia ka rin ni. Âwm hmul te hi i nei hial lo maw?” pakhatin a tih leh laiin “I nupui nih hi ka hlau fe zâwk, nupuite thawhchhuah sa a awm hiau hiau chîng tur i nih hi, thatchhe si samdala ang mai kha i nih hi. A rûk hian ilo tuai ru reng a nilo maw? Keichuan bialpa te hmangaih te pawh ka nei, nang chuan bialnu chu sawiloh zawhte tak ngial pawhin an ngaizawng peih lovang che” an in sual titih tawh.

“A va hahthlâk, Faka pawh chu engvanga in hnial reng nge maw an nih le, Mawii rilru hah lai laia, a buaithlâk thei emai” ka ti nâng nâng a, u Rinpuia erawhin ngawi rengin a ena “An la in duh vat ang” a ti zuia.

“Iti awihawmloh emai, an inhnial renga engtin nge an in duh ang. An in khai hlum lo chauh tawh a nih saw,” ti a ka sawi lai chuan a rawn nui haka “Nakinah ka sawi dik zia ila hre thuai mai ang” a rawn ti supa, ka chhâng dâwn chiah tih chuan “Ehe! Tlân vat ang” rin ang ngeiin an lo in kêk tawn leh ngawng ngawng a nih chu. 

Sâwma te lah chuan ṭhelh ta nge pawh tilo in an nuih uar uara “Aw...aw...aw a chak chak ka ṭan, kha ai khân han in kêk na leh deuh teh u” tiin an lo la fuih sauh sauha, an bul kan thlen rualin kan pawtsawn nghal vata.

Pawhsawn lah an har, an la inmelh rum dûn nasa mai “Tinge in insual reng reng, Faka mipa in hmeichhia kut an thlâk ngailo” ka sawi zawh hma hma chuan “Kut ka thlâk lo ka kêk a nih kha, kawlh si hmeichhia pawh a nih loh kha mipa sam sei a nihkha mipa sam sei, hmeichhia chu nilo la maw” a tih lai chuan Mawii lah in a “Min tilui reng a nih kha, i kawlh lo biklo. Hmeichhia chu nila ka khawih hrep ang che” a ti ve leh bawk.

Huiham! Engtikah tak an inhnial hi tâwp ang maw “Kal vat ang u, mikhualten min lo hmu ange, insual tawh reng reng suh u. In ngeih deuhte hian awm ve tur” tiin ka in lam pan chuan ka kai phei dun dâwr dâwr a.

“Aw le, nu ber a rawn che e. Kan la hmu duh a sin le, a lehpekah chuan kha ai nasa deuh khân aw” Sawma rawn au leh chu rum zetin ka ena, hetiang em em a mâwl vek hi engtin nge an nih theih, inhnial reng hlawm mai.