MANGRAM PASALṬHA CHAPTER 7

MANGRAM PASALṬHA 

CHAPTER 7 

“Saw thil saw i tih a ni em?” a bul ka thlen rual chuan ka pasalṭha thah tâk chu a kâwk vu a, “Nilo midang nên alawm an in beih” ka tih chuan a âwih loh hmêl ngei mai.

Chutihlai chuan ka la beih loh pa chuan “Nangnu kha ka lawm pa i thah man hi i hmu dâwn khawp” a rawn ti ta kûk kûk mai. Saithana chuan min rawn enin a rum ta nghut mai “Dawt i sawi a maw?” tinghutin pasalṭha pakhat la dam pa min rawn khawih tum chu lo dangin amah chuan a hmachhawn zuia.

Ka en reng mai, hlauhthâwnna pawh ka nei lêm lo. A in beih thiam zia ka hre miau a lawm, chupa thinrim lah chu a au kûk kûk renga. Saithana chu sah fuh ngei tumin a chem chu a vai fur fur bawk, Saithana lah chuan awlsam zet zet hian a chem vai chu a lo dan saka.

Chutah “Keimah ve thung aw” tia a vai lêt tak tak chu chupa chu rei pawh a ding lo chiang khawp, a lu chu a per nawlha. Mipui lam chu an lo au deuh tuar mai, “Kan lal chhûngkua kha in rawn chhuah dawn nge in hotute ang hian thih ve in duh zâwk?” tiin Lal chhûngkua la man tute lam chu a en zuia.

Chuveleh an hmachhawn ngam lo nge lal chhungkua chu an rawn chhuah zuia, “Lalpa an chungah engtin nge ro i rêl dawn le?” pa Saian a tihchuan Lalpa chu rawn ding chhuakin “Rip ah khung vek rawh u, tin khâng mi tenawm pahnih lu khân ka sahlam an mawi ngei tur a ni, naktûkah ral lu lamin hun kan hmang ang, tin Darpuii leh Saithana kha hetah hian rawn chho teh u” a tihchuan Saithana chu ka melh haw a.

Engtin tak min tih tum ang maw? Muangchang chuan Lal luhkhapui lam chu kan pan chho a, kan din fel rual chuan “Kan nunna in chhana, Darpuii phei chu i chungah ka lâwm hle a ni, khatiangin hmeichhia lehnghâl in engtin nge pasalṭha satliah pawh nilo i hneh theih ni?” a tihchuan ka kûn ngara.

Saithanan min hau leh dâwn tih ka hre chiang lutuk, ka hmanrua lek fo lo turin min ti kha a nia “Vawiinah hian in pahnihin huaisen nopui hlan cheu ka duh a ni, Darpuii pawh hmeichhia mah nila pasalṭha tam tak tih theih loh i ti thei hi he huaisen nopui hi i phu hrim hrim. Nangmah avânga kan chhûngkua pawh la him kan ni e” tiin seki chuan zu chu min rawn pe zuia, lâk loh theih hek loh le.

Lâksakin tlêm te chu ka in ta zauha, Saithana pawh chuan a in ve bawk. Mipui lam chuan kut an lo beng dar dara, tlangvâl ṭhenkhat min en dân dang ta dawrh chu ka hmuh hmaih biklo. Saithana nên chuan chhuk zuiin in lam pan chuan ka kal zuia, a salu an rawn zâwn chu ka hmuh hmaih lo, Tumpang chu a kâp ngei tih ka hre nghal mai, a peng mai dawn emaw tihlaiin min rawn zui zel chu mak tizet hian ka ena.

“Enge” ka sawi zawh hma chuan ka bânah rawn vuanin ram lamah chuan min pawt lût dawr dawra, engmah sawilo chuan ka zui ve tawp bawk. “Engvanga kha mihring kha lo hmachhawn nge i nih?” a rawn ti ta ṭhawt a, a hmêlah thinrimna ka hmu thei.

“Ka tihlohin Lal chhûngkua kha kan chân dâwn a sin, chutiang ka duh bik hleinem. Tinge i thinrim vaka, in awm bawk silo khatia ka tih mai kha a ngai a lawm” ka tih pawh chuan a lâwm hmel loh “Hmeichhia i nih hi i hria em? Thi ta la engtin nge ka awm ang tih i ngaihtuah êm? Min lo nghâk theilo em ni? Kha mihring khân a that thei che a sin” ka dârah chuan rawn dawmin min hmer vaka.

Ka ner sak mai “Ka hria lawm; mahse keimah ka in vêng thei a lâwm, min chân dâwn lo. Thinrim tawh suh, Tumpang chu i kâp ta em? An rawn zâwn kha chu ka hmu ngei mai a, i kah a ni ngei em tih ka chiang silova” tiin thudangah chuan pakai pui ka tuma.

“Kap, thil dang ah pakai tum suh. Ka tello in vawikhat mah ral bei tawh suh ang che i hria em? Hmeichhia i nih hi, lo awm mai mai rawh” a tihchuan ka thaw ta haka “Tinge thil ṭha ka ti angah ka ngai a sin, i pa khân hmachhawn ta se lo chân la i na dâwn, a ni chu a upa tawh. Engtin nge khatiang pasalṭha tuaitur kha a hneh tawh ang, thiamthil ngah viau mahse an upa tawha a ding chang lo thei tih hre rengin ka beih tir anga maw? Teuhlo mai, chân la i nat tur zia hre rengin engtin nge ka hmachhawn tir duh ang” tiin ka au chhuak ve ta ṭhat a.

Min melh rûn rûn mai “Mawh? Min chhâng ta che, i pa chân la engtin nge i awm ang? I na tho dawn, ka ngaihtuah ve che a sin. Engkim hi i tâna ti vek ka ni, ka hmangaih vâng chauh che a sin” ka hmuiah chuan rawn fâwp tawn tawnin thingkungah chuan min nawr beta, ka hnute chu a ṭhâm vak vak bawk. A thinrim hle tih ka hre mai, keipawhin ka dim bik lo.

A hnungah chuan ka ṭhâm sak vak a, chutah leiah chuan min bawhtlu rawkin ka puan chu hlip pawpin a thehsawn zuia “Saithankhum” ti a lo dan ka tum chu ka kutah rawn man betin ka kut pahnih chu a kut pakhat chuan ka lu lamah a nem bet hmaka, ka che thei tawh lo.

“Engvanga ka lakah hian in ui êm êm nge i nih? Keilo midang duh i nei em ni?” a tihchuan ka thaw haka “I duh duh sawi suh, awmsawn rawh ka haw tehmai che a nia, englai pawhin min hauin min sawisêl reng bik mai. Ka ning tawh lutuk” ti a tlawh sawn ka tum lai chuan a nui ro haka.

“Keichuan ka ning ve hleinem” tiin ka taksa ah chuan a rawn lût zuia “Ka hua che ka haw lutuk che” tiin ka mittui chu a luang zui ngiai ngiaia, englai maha ka thu a ngai pawimawh ngai lo hi ka hua ka haw hluah hluah, ka rilru a tina bawk. Ka hmangaih tih hria in hetiang hian ka chungah a che duh a nia.

Ka lak aṭanga a awmsawn hnu pawh chuan ka mut ngai chuan mu in ka melh ngai ka melh tlawk tlawka. Min rawn tung tho va ka puan bih min siamṭhat sak mawlh mawlh lai pawh chuan ka che lo hrim hrim, ka rilru na lutuk chuan ka mittui a ti luang ngiai ngiaia.

“Ka tihpalh” a rawn tih pawh chu ka chhâng lo, ngawi rengin kan piah khâm chu ka pana “Enge tih i tum?” ti a min rawn zawhna pawh chu ka chhâng hek lo, ka hmalam chu pan zêlin khâm hmawr ka thleng dâwn chiah tih chuan min rawn pawt lêt dawrha.

“Darneihpui enge i hriata? In thah i tum a maw?” a rawn tih hrawk rual chuan a kut chu ka thing thla a“Nang hian nawm chenna atân bak min duhlo, englai pawhin min ngaihsakna leh hmangaihna pawh iti lang ve ngai hleinem. I duh hunah min mutpui anga, i duh hunah min kalsan leh si anga maw? Saithankhum i nep takzet” mittui tling pam chuan ka ṭawng chhuaka.

“Vawi engzât nge ka hrilhfiah dawn che, min ring ngai hauh lo zâwk anih hi. Tehchai che hian, a ṭha e ka khawihin ka ti buai leh tawh lovang che, i duh duh dân chuan awm ta che. Ka rawn hmu leh tawh lovang che” tiin a kalsawn zui nul nula, a hnung lam aṭang chuan mittui tling pamin ka en reng ringawt.

Zân lamah a salu lawmna ah pawh ka kal lova, a ni pawhin min rawn biak emaw pawh a tum lo. A tûk lam thlengin a sawi ang tak takin ka lak aṭangin a in la hrang hmaka, Thanpari te a lam pui chu ka en reng a, ka hmêlah erawh engmah langchhuak lo turin ka insûm ṭang ṭang thung.

Ni e a ni chu pasalṭha leh khawnbawl fa hial ania, a hmêlṭha bawk nen tu hmeichhia in nge hnar phal ang? Tumahin an hnar phal hauh lovang, ka nu nên chuan ruai ṭheh zawh rualin kan haw a. Ka nu pawhin thil awmzia hria ih min kuahin a ṭap chhuaka, “Bawihte tinge kan vanduai em em mai le?” a tihchuan keimah zâwk chuan ka hnema.

“Nu lungngai miah suh, enga tân mah ka ngai hleinem. A duhthlanna a lâwm, ka pa hi hmuh ve ka châk a ni, vawikhat tal ka pa hmuh ve ka duh” ka tihchuan a mittui a hru zauh zauha, ka nu hi ala upa lova, kum 35 vêl bâk a la ni lo, a taksa pawh a la nalh viau mai.

Ka pa hi hmuh pui ngei ka duh a ni, “Bawihte, nupui a nei tawh ang. Kan tibuai mai mai dâwn, nangmah hi a ni ka ngaihtuah che ni, engvanga khatianga Saithana khân awm khum che nge a nih?” a tihchuan ka nuih sak a.

“Kan in haua, bâkah kei nên chuan kan dinhmun a inthlau lutuk, nu i sawi dik a ni. Kan phuloh kan hmangaih avângin kan nat phah a nih hi” tiin ka phun sapa, ka mittui tla tur chu ka khap kîr sak sak pawh.

Zânah pawh ka muhil thei lova, rilru hah chuan ka thaw leh hak ṭhin. Khatianga awm kha ka duh bik lo, mahse tlêm talin min ngaihsak ve se ka duh mai a sin, zan dangah rawn lêng ngei ngei ṭhin kha a reh ta hmak chu a nia.

Zîngah chuan thing ekin tualah chuan ka awm a, chutih lai chuan Saithankhuma rawn chhuk nghauh nghauh chu ka hmu a, min biak a tum a ni ang ti a ka ngaihchân lai chuan ka hnung lam aṭangin hmeichhe aw ka hria a, ka hawi lêt vat mai.

Kawt chhuah lam aṭang chuan hmeichhe pakhat leh Saithankhuma rawn haw tirha zui tu te kha an rawn lang ṭhap a, enge an rawn tih ni ang. Chu hmeichhia lah chu a hmêlṭha em em mai lehnghâl, Saithana a hmuh rual chuan rawn tlân chho in Saithana chu a kuah nghâl thlawpa. Ka rilru tina bertu erawh Saithana chuan a kuah lêt ve a nih chu.

“Rawn lêt leh rawh ka ti che a, i rawn lêt har lutuka ka rawn kal tawp a nih hi, ka ngai tawh lutuk che” chunu chuan tiin Saithana chu a nuih var vara, Lal fanu a ni ang tih ka ring thiam mai. A hmêlṭha in keichuan tluk lo tak ka ni.

“Ka buai deuha, keipawhin ka ngai che a lawm” min rawn en kher pah chuan Saithana chuan a ti a, ka hawisawn vat. Lawmnu a lo nei renga, chuti chung chuan min lo mutpui vêl a maw? Tenawm hian engtin nge ka lo hmangaih theih? Ka ṭah chhuak lutuk chu in chhûngah ka luta, ka nu chu ka kuah thlawp mai.

“Chemte insûm rawh, miin an hre palh hlau ange. I tuar chhuak thei em em ang” a tihchuan ka hmui chu ka pet fan fana, Saithankhuma ka huatna chu a nasa sauh bawk. Engtin nge khati chung khân ka hmangaih che min lo tih theih, hmanlai pasalṭha an sawi chu a tak ngei a lo nihkha, kawp lâwr tak chu a lo nih ngei kha.

Ka nu chuan min thlamuan mawlh mawlha, pâwn pawh ka chhuah a phallo. A chhan chu Saithana leh chu lalfanu amah chhanchhuaktu khuate lalfanu ngei mai chu an in zui nasat zia hmu kher lo mah ila khua in an sawi miau a lâwm.

Ni a liam leha, Saithana pawh chu lalfanu thlah tur chuan an khuaah a kal dâwn tih ka hria. Dan ka duha, mahse ka thei silo, a hmaa in lan ka duh tawh miau silo va, a rawn lêt leh chuan engkim keipawhin ka hmachhawn thiam tawh mahna.

Zâna thing senga pâwn ka chhuak chu tu emaw hian ka ka rawn hupin min pawm sawn nawlha, ka tal ve tak nangin ka tal chhuak thei hauh lo. Tunge a nih ang? Engvanga min man nge a nih, “Keimah” kawt chhuah kan thlen rual chuan Saithana aw ngei chu a rawn ri chhuaka, chuveleh ka tal nghal phat mai 

“Engvanga min man nge i nih? Kal bo rawh” ti a in lam pan ka tum chu min dang leh tlata “Naktukah ka zin chhuak dawn” a rawn tihchuan ka ner saka “Chu chu enga tân nge min hrilh?” tiin ka nui deuh haka, ka huat a zual ngei mai.

“Ka awm loh chhungin engthil mah lo ti suh ang che. I hria em?” a tihchuan ka nui haka “I sawi tûr an awm lo, tin i nupui tur tih ka hria a. Ka lawmpui a che, ilo rinawm hle mai dâwt in bul min lo ṭanpuia, ka bo lai pawh khân min zawng nek lova nge, kha nu nêna in inkar thup nân min lo hmang ṭangkai zâwk a nilo maw? Oh! Nilo chupawh nilo in i hmangaih ber chu amah kha a lo nih zâwk dawn kha, keichuan nang nena inzawmna neih ka duh tawhlo, ṭhian kan lo nih ṭhinna pawh tâwp rawh se. Kha hei pawh hi” tiin a ṭhi val min pêk englai maha ka phelh ngai loh chu ka pe lêt a.

“Kan inhmuh pawhin inhre ngailo kan ni tawh ang, ka lâwm e. Mipa lakah fimkhur a ṭul zia leh hmangaih mai mai tlâk an nih loh zia min zirtirtu i ni” ti kal ka tum chu min rawn man bet ta chata “Chutiang thu chu i sawi thei a maw? Tin lalfanu Sairengi kha ka nupui tur a ni hauhlo tih hria ang che,ka rawn lêt hunah engkim kan sawi ṭha ang, kha hei hi awrh leh rawh” tiin ṭhi bawk chu min rawn pêk leh a tuma.

“A teuhlo mai, hmeithai fanu leh khawnbawl fapa chu englai mahin kan inkawp rem ngai lovang, mangṭha Saithankhum” tiin a ṭhi min pêk chu kawtchhuah lungah chuan ka vaw chat ta hmawka, a ṭhen an keh bawk.

“Hlim takin” tiin ka inher hmaka, min dân pawh a tum tawh bik lo. Ni e engkim harsa mahse tih tâwp vek hi a ṭha zâwk. “Darneihpui” a aw ah chuan natna a lang chhuak thei “Engmah i hriat hma in hetiang hi maw awm i duh dân chu ni a?” a rawn tih leh chuan ka in hum ruh ṭang ṭanga.

“I duhthlanna alâwm Saithan, i duhthlanna. Min kalsantu i nih kha” tiin ka mittui chu ka hru zauha “Khatiangin dâwt in min puh hauh suh, i taksa chauh mamawh ah min chhuah in inthah hial i tuma, khati chung khân min hmangaih i inti thei a maw?” a rawn tileh hrawka.

A aw ah chuan a thinrim hle tih ka hre thei “Aw... Ka lakah i rilru i ti chiang duh lova, i rilru tak pawh ka hre thei heklo. Khanu kha i lâwm nu a nih pawh ka ring e, ka hmuh lai ngeia i kuah khân a tichiang bawk. Nang nên chuan inzawmna kan nei tawh lo, a hmeltha a a vun pawh a nalhin lalfanu a nia, in inhmeh viau ang chu” tiin engmah dang sawi tawh lo chuan in lam panin ka kal zuia.

Ni e, kan dik lo ve ve. Mahse kha hmeichhia a kuah kher khân ka thin a tirim zual, a tûk lamah chuan a sawi ang ngeiin kha hmeichhe thlah tur khân an chhuaka, an khaw thleng va thlah tur chu a tân a pawimawh tâwk tih a hriat reng mai.

Ka nu lah chuan min khawngaihin a theih ang angin min tihhlim a tuma, ka lainat lêt zâwk. Keite chu ka ṭhat teh lul nên tukkhat ka thawh hma chuan ka nu au ṭhat ri hria in ka hmanrua chu banin khum aṭang chuan ka zuang thova, ka nu awmna lam ka pan chu ka ding chawt mai.

Ka nu chu mipa Lal tih hriat tak hian a lo kuaha, ka nu pawhin a kuah lêt ve bawk. “Hetah a nimaw ilo awm a Nguri” a tihchuan ka hawi â hle, tunge ni ang? A hmêl lah chu a la naupang in a hmêlṭha hle lehnghâl “Tinge min kal bosan?” tiin ka nu chu a en kalha, keichu min la hmulo animahna.

“U Khum” ka nu chuan tiin a ṭap leh dar dara, thil ka man thiam ta ka pa tihchu “Pa” tisepin ka mittui a tling nghal pam mai. Pa ka neih châk em em ṭhin chu ka nei ve thei dâwn ta, ka lam a rawn hawi rual chuan ka nu chu zawhna mitmeng in a ena.

“U Khûm nang nena kan fa a nih hi, i fanu Darneihpuii” ka nu in a tihchuan ka pa hmela lawmna chu ka hmuh hmaih lo, ka lamah a bân a rawn phar rual chuan ṭap chungin ka va kuah ta thlawpa, ka pa ka hmuh châk em em ka hmu ta chuan ka lung a tichhe lutuk.

Tûnah chuan pa ka nei ve ta, Lal a la ni zui.

ZAWMNA

“Hetah in nufa in hrehawm tuarin in lo awm a maw? Tûn aṭang chuan ka bulah i nu nên in awm reng tawh ang” a tihchuan ka en deuh ha a, “Kan inah kan khuaah ka hruai haw ang che u, tumahin an hmusitin an tiduhdah leh tawh lovang che u. Nangpawh lalfanu i nihna ang ngeiin hahdam takin i awm tawh ang” a tihchuan ka in ngaihtuaha.

Ka ngaihtuahna ah Saithana a rawn lang zawn mai, kal bosan ta ila engtin nge a awm ang? Mahsela kei min kalsanin kha hmeichhia kha a pana, ka awmna hmun hriat hi a phulo a ni. “U Khûm nupui i la nei lo em ni?” ka nu in a tihchuan pâwn lam aṭang chuan thâwm rawn awmin “Nguri kan Lalpa khân a nghâk reng che a lawm, a zawng reng bawk che a. Nangmah avângin a nih kha tûn thlenga nupui neilova a la awm” tiin mipa puitling ṭhuau hi an rawn lût a.

“Ni e Nguri nangmah ka zawn avâng che in tumahin nupui nei turin min nawr lui theilo a nih hi. Ka nu leh pa pawh an awm tawh lova, keimah tlawng hi ka ni tawh mai, in nufa hian hruai haw cheu ka duha, min zui haw turin ka duh cheu a ni, nang nêna inṭhen hran reng ka duhlo” ka pa chuan a ti dap dapa.

Keichuan zui pawh ka pawi tilo, a chhan chu Saithana ka theihnghilh theihna tur a ṭha ber a ni dâwn tih ka hria. Ka nu pawh chu ṭap leh hakin ka pa nên chuan an inkuah leh vawng vawnga “Pa tumahin an la hmu lo cheu tiraw?” ka tihchuan ka pa chu a bu nghata.

“A nih chuan ngawi rengin kan kal thei a ngem? Tumahin kan zui haw che tih hre suh se, ṭhenawm te hi chuan kan pem dâwn tih hre chauh sela ka duh, chutilo chu Saithanan min rawn ûm zui ngei ngei dâwn” ka tihchuan ka pa chu a hamhaih deuha.

Ka nu chuan lo hrilhfiahin a ni pawh a bu nghat mai “A nihchuan kan kal nghal mai dâwn a nia, mi thawh tam hma hian a ṭha ang” a tihchuan kan insiam zui mawlh mawlha. Bungrua kan ngah loh bâkah ka pa in kan mamawh tur Lal inah a awmsa vek thu a sawi miau avângin kan ran leh buh vêl chu ka nu chuan ṭhenawm te kutah dahin kan in mangṭha zuia.

Khua kan chhuah sân dâwn chuan hawi kirin Saithana chu ka ngaihtuah vang vanga “Hlim takin aw Saithankhum, tlâng tluan thang pasalṭha hming thang lo ni zêl ang che. Ka hmangaih che” tisepin midang ho chu ka zui leh ta thuaia.

SAITHANA POV...

“Thangpui kan haw phawt ange khaw lamte kan ngaihtuah ve tawha, kan châm rei tâwk tawh viauin ka hria” Lal leh Lalnu chuan ka lam an rawn hawia “A va hma êm aw, la châm reng la ka duh a sin. Engpawh chu nise khawlam i ngaihtuah tawh chuan i haw mai dâwn ania” Lalpa in a rawn tihchuan ka bu nghata.

“Chaw eikham ah ka chhuak nghal mai ang” Thangpuii hnual hmêl chu hmu reng mah ila ka ngaihsak thei tawh tehchiam lo, min duh hle tih ka hria a. Hun fâl min neih pui pawh a tum nasa, mahsela Darpuii thil sawi kha ka hre renga, phatsan tumna ka neilo.

Ka lakah a thinrim hle tih pawh ka hria, chuvanga haw vat duh pawh ka ni. Ka awm a ti nuam thei hauhlo, ka mumangah lah hmun hla takah min lo kalsana, ka auhna pawh min chhâng hauh lo lehnghâl. Chuvang chuan a rang lama ka haw a ṭha ber.

Chaw eikham chuan insiam sawk sawkin ka chhuak zuia, kar kawngah zanhnih bâk riah a ngai lo bawka chawlh em em pawh nei lovin ka kal par par mai.

Ka hmanhmawh tawh riau, Darneihpuii thusawi khân ka ngaih a ti ṭha thei lo. Ka awm loh chhûngin thil nilo lo a lo ti ang tih pawh ka hlau hlel love.

Khua ka thlen chuan an in ka en hmasa bera, a lo inkhâr ṭhiap chuan ka awm a ti nuam lo nghal. In lam pan hlâwk hlawkin ka nu leh pa in min lo hmuh rual chuan min lo kuah nghâl vata.

“In lo ṭha maw? Nu Darpuii te in khu tinge a inkhâr tlat ni” ka tihchuan ka nu hmêl chu a rawn dang nghal dawrh mai. “Ka fapa an pêm tawh a lawm, an ṭhenawm te sawi dân chuan a rawn hruaitu kha khaw khat lal a nih hmêl a, kan hriat loh lamah hian pi Nguri kha Lal nupui pawh a lo ni theia, Darpuii pawh lalfanu a lo ni reng a nimahna, an kalna khua erawh an sawi duh hauh lo” ka nu chuan a rawn ti a.

Ka mumang a thleng dik tih ka hria, engtin nge min kalsan theih zâwk? Min nghâk turin ka ti a, ka zawn hmuh leh hunah chuan a pa Lal a ni emaw tumahin ka hruai kîrna min dâl dâwn lo, ka ta a ni leh ngei ang. 

Min kalsan ngailoh tur thu a sawi hnu a min kalsan leh si man hi a hmu khawp ang.

A ni la la chuan chhuakin khaw ṭhenawm vêlah kal kualin ka zawnga, ka hmu hauhlo. Khawi khaw lal nge ni ang, henglai tlâng dungah hriat loh ka neih âwm ka hre hauh silova, nge ni a an thukru zâwk? Ka hmalama tlâng dung chu ka thlir vang vanga “Tinge Darneihpui min rin duh loh tlat mai le? Khawiah nge i awm?” tiin ka phun chhuak supa, ka hmuh leh hun hunah chuan a chan tur ka sawi theilo.

Ka kal tir leh tawh ngai hek lovang, khawiah tak awmin engtin nge a awm ang? Ka fa a pai a ngem tih ngaihtuaha ka buai em em laiin min kalsan thei chu a nia, min nghâk tur khân ka ti a. Min kal bosan a duh avângin khatiang thil kha a lo ti vel a maw? 

Ka hmuh hunah chuan hremna a pumpelh hauh lovang le, engvanga a lalfanu nihna ka lakah zêp nge a nih tih ka zâwt ngei bawk ang. Têt tê aṭanga ka hriat a ni a, mahsela lalfanu a ni ang tih rêng rêng ka lo ngaihtuah pha ngai lo, ka lakah a zêp miau si a. Ka tân hriatchhuah ngaihna a awm hek lo.

Min lo hmangaih emaw ka tihchuan min lo rin loh zia ka hriat thar leh hian ka thinrim ut ut bawk. Tlâng dung cham put chu enin ka thaw chhuak hrawka, tûnah rih chuan ka zawnna chu ka tih tâwp rih mai angai ang.

Engtikah emaw chuan a rawn lang chhuak leh dâwn tih ka hria, ka lakah a inthup rei hauh lovang. “Darneihpui kan inhmuh leh hunah chuan ka lak aṭangin khawiah mah i biru leh tawh lovang” ti chhuak supin khaw lam pan chuan ka inher zui ta ruai ruaia.

DARPUII POV...

“Ka nupui eh ka fanu an nih hi, hun rei tak ka zawn hnuah ka hmu leh ta a, tûnah chuan Lalnu in nei ve ta e, ṭha taka in lo en ka beisei” ti a ka pa thusawi chu khaw mipui te chuan kut beng chungin an lo chhâwn a, an au dur dur bawk.

Ka hmêlṭha an tih thu lo sawi tâwk lah bo lo, ka zak lek lek zâwk. Hawi kual vang vangin ka khaw thar lo nita chu ka thlir vang vanga, Saithana te khua ang a lian chu ni lo mahse a tê chhe hauh lo, pasalṭha pawh an awm ve nuk mai.

Nui sakin ka pa bânah chuan ka kuaha “A mawi hle mai, a nuam dâwn tih ka hre thei” tiin ka nui ta var vara, ka nu pawh a hlim tih ka hria. A hmêl êng sar leh a chêt dân zâng vah chuan a ti lang chiang viau bawka, nau neih ka châk tawh nen nau pai vat vat se tihchu ka nghahhlelh ber a ni.

Ka nu leh pa lah an la upa lo va, an tleirawl lâi fa ka ni bawka. An hmêl pawh a la ṭha rêng a ni, lal upa ho leh pasalṭha ho chuan Lal in chhûngah min zui lûtin min lo lawm thu an sawi leh duaha, an hlim ve hle tih a hriat. 

Ka pa hi khawhar takin a lo awm ṭhin tih an sawi te chuan ka ngaihtuahna a ti thui hle. Saithana ka ngaihtuah lo thei lo, min ngai ve angem le? Ka pa in ka nu a ngai ang chiah hian min ngai ve angem tih ka ngaihtuahna chuan ka awm a ti nuam ta hauh lo.

Mahse hmeichhe dang bulah min kalsan a nih kha tiin ka inthiamlo lutuk duh ta bik lo. Bul ka ṭan thar anga, hmangaih dangte pawh ka la tawng leh hial mai thei a sin. A ni kha chuan kha lalfanu kha a lawm a duh, engtikah mah min hre chhuak ngai pawhin ka ring lo.

Ka tello pawhin an hlim hle kha maw. Kal lo tûra ka duh em em laiin kha hmeichhia kha an khaw thleng a zuia, ka hmuh lai ngeiin a kuah bawk. Chuvang chuan a hnenah ka kîr tawh tur a nilo, a tan ka pawimawh ve lo bawk.

Khua chu fang kualin min lo hmu a piang chuan min lo be sap sap hlawma, nui var varin ka chhâwn ve zel bawk. Naupang ho lahin hmêlṭha min tih thu an lo sawi ve reng bawka, mi an ti nui leh ṭhin. Tupawh mai chu an nelawm em em vek mai, ka awm rei anga ṭhianṭha tak tak ka la chhar ngei ka beisei.

Kan khaw hmasa ah kha chuan ṭhian kha Saithana bâk ka nei hauhlo, hmeithai fanu ka nihna avâng khân ka hmeichhiat pui tam zâwk kha chuan min hnaih duhlo kha a nia.