MANGRAM PASALṬHA CHAPTER 6

MANGRAM PASALṬHA 

CHAPTER 6 

“Ka hman e” ka hmanrua chu ka kâwngah chuan vet betin Saithana chu ka ena, ka zui tur chu a la duh lo hle tih ka hre thei. “I ei tur zawngin chhuah ka tuma, min zui leh chuan awmzia a awm lo nangmahin kâp law law rawh” tiin lâwm lo zet hian ram lam panin a kal zui nul nula.

Ka nu nên chuan in enin kan nui ringawta, ka luhlul a ti ve ngang aniang, mahse ka ngai pawimawh duh lêm lo. A bula awm reng ka duh tawh, a hnungah chuan zui vatin min ngaihsak lo lek a a kal nul nul chu ka ûm zuia, “Saithan min lo nghâk, thinrim tawh lo la. I bulah a tam thei ang ber hun hman ka duh a lâwm, nangma lem chang kha chuan ka bulah awm nuam a ti a sin aw, nang chu” ka sawi zo hman lo ding thutin min rawn hnaih ruaka, alamah min pawt nghâl dawrh bawk.

“Engmaw i sawi kha, khapa nên khân min tehkhin a maw?” lâwm lo lutuk hian a rawn ti chhuaka, ka fiam châk bawk nen ka kut ka kuangkuah hmak. “Nang chu ka bulah awm pawh i thlahlel lova, a ni kha chuan ka bula awm dân ringawt a zawng zâwk a sin, ka tehkhin lo che u. A ni kha chuan min ngaihsak” ka tihlai chuan ka bânah chuan a rawn hmer vaka.

“Kha mihring phiangsen khân keiaiin a ngaihsak che a maw? Darneihpui eng thu teh hrep nge i sawi le” tiin min thing deuh nawka, ka lu a hai nghal muai muai thei. “Min tina a nia, ka sawi mai mai a nih kha, bâkah nupa nun hial min hmanpui tawha, ka hlauthâwng ve alâwm, pasalṭha chuan ngaisangtu in ngahin khawtinah duhtu in nei thei ania. Min phatsan te hi ka hlau a maw? I hmêlṭha ve ver vur sia, khawi emaw laia lal fanu, khawnbawl fanu hmêlṭha tak tak te hian an lo chhai tlu aiah!” ka lu a rawn tuk rilawlh a nihchu!

Ka intuai vut vuta, “Enge. Ka sawi dik lo em ni? Hmeichhia in an nâwk salh salh chuan mipa chu an insûm theilo hle tih ka hre ve alawm, i rinawm dâwn lo ka tilo. Mahsela khatiang kha ka tâwk ve palh ang tih ka hlau a lâwm, tu emaw in i fa an pai thu an rawn sawi thut ang tih te ka hlau ve a” ka tih leh lai chuan rawn kûn hniamin ka hmuiah chuan a rawn fâwp vang vanga.

“Ka phatsan ngai lovang che, nang nêna kan inkârah hmeichhe dang an awm ngai dâwn lo. Lo be ve ṭhin pawh ni ila ka thinlunga hmun i chan tawh hi tu hmeichhia mahin an luahlan ngai lovang che” a tihchuan thaw huaiin a âwmah chuan ka bei ta kak a.

“Ka hmangaih che Saithankhum” tiin ka nuih var vara, ka biangah rawn piai zauh pah chuan ka chalah a rawn fâwp vang vanga. “Kal ang le, i sakhi ei tur kan nang hman lo hlauh ange, bengchhen leh chêt sek phal a nilo aw” a tihchuan ka bu nghauh nghauh mai.

A thinrim tawh lo chu ka thaw huai mai, a lungawi loh lah hi a pe na bawk si. A thing sa channa tura a siamah chuan kan ṭhu khara, ka nuih za viau mahse ka insûm hrâm hrâm a ni, mahse a har lutuk, a hmeichhia zâwk pawh Sakhi kâp tur awm ang hrima ka awm ve khar chuan ka nuih a tiza.

Tawitaw rah chu chângin kan ṭhu khara, tlailam a ni tawhin ni chu a tla dâwn suar suar tawha, ka mawngkhat lutuk insiam rem ka tum chu Saithana chuan min chelh beta, thâwm lo tur chuan a mitmei chuan min hrilh nghal zauh bawk.

Keipawh chu che sawn ngam tawh lovin ka ṭhu ngawi khiaua, chutah le kan hnuai zâwn ah chuan sakhi pa tuai chu a rawn chhuak ta zân zân mai. Thui lo tê tê kalin a dinga, a hawi kual leh zak zak ṭhin, a fîmkhur ve hle tih a hriat a beng chu a tun hra hra bawka.

Saithana chuan a kah rem hun chângin a tin vâng tawha, a kah ṭhelh ang tih ka hlau lutuk chu thâwk pawh ka thaw ṭha ngam tawh lo. Chutah leh a rawn hawi chhuah lai tak chuan Saithana silai chu a puak zui ta dawpa, Sakhi tuai pawh chu zuang zawkin hnim kârah chuan a zuang lût a. Chu veleh thing aṭang chuan chhuk vatin Saithana mi dan hma in ka hmanrua nên chuan Sakhi zuan luhna ah chuan ka zuang lût ve ta tawpa.

Chutah lo tlân chhiat a tum chu ka hrui chu vaiin a lung zâwnah ka thir zum chu a lût ta thaiha. Tlân leh tur a awm tawh lo, tlu in a tal khûr ta char chara, Saithana pawh a rawn lang nghâl vat. Sakhi lo thi der a hmuh chuan min melh zawkin a pan hnaia, a kahna chu a en chiang zui mawlh mawlh bawk.

“I va ûmzui khera, a thi dâwn tho a nih hi, khatiang kha chîng tam hauh suh. Sapui lam phei chu a hnaih pawh hnaih suh ang che; ka ngaihtuah zâwngin awm tawh hauh suh, Sakhi nilo phei se chuan ka hau ngei ang che. Savawmte sanghal te kan tâwk palh a nih pawhin a him chinah awm zêl tawh ang che” a tifiah hmak hmaka.

A sawi chiang kêk kâwk bawka ka ṭawng ngam lo, sakhi chu a ippuiah chuan a khunga, a lian vak lêm lo bawk a a leng tâwk viau mai. Min ṭhut chawlh pui leh tê tê in vaibel chu a pak hlarh hlarha “Khatiang kha chîng tam suh, i ha a bâl vek ang” ka lo ti chu a rawn nui haka.

“Ha nawhna ka nei ṭha a lawm, ka nu hian min hrilh ngun bawka ka bo chhûng zawng pawh khân ka la zâwm ṭha e” tiin a rawn ṭhen khera, ngeiawm lutuk. A ha var rual ṭhah chu a chhuang tih hi a hriat ngawih ngawih.

“I ha kuh” ka lo ti chu a rum nghuta, ka kawngah rawn chelhin min la hmer zui vak lehnghâla. Ka au ṭhat chu ka hmaiah a rawn seh vak mai, ana ka ti lutuk chu ka mittui a tling nghal pam bawk “Saithankhum” tiin mittui tling piau chuan ka ena.

Min seh rei lo nangin ana lutuk tho, ka hmai chu asa hut hut bawka. A sen leh vek dâwn a nih hi, a nilah chuan ka hmai tai chu hmuhnawm a tinge min en vung vung mai “I sual si min khawih tawh reng reng suh ang che. Misualpa, a na lutuk” ka ṭap titiha, a ni lah a nui mai mai zui.

Chu chuan min ti thinrim zual, a dâr ah chuan ka seh sak ve ta vaka, a ni pawh a rûm hak mai. Ka thlah duh mai lo chu min rawn nam sawnin leiah chuan min delh bet zuia “Min cho deuh em ni?” ti a ka dul zâwn vêlah chuan a zût thla riak riaka.

Ka ngei lutuk tlat “I hur kha a nihchu nau ka pai vaih chuan” ka tihlai chuan harh chhuak zawkin ka namsawna, ṭhu chhuakin ka dul chu ka khawih ringawta, rai thei dinhmunah ka ding tih ka hriatna chuan min ti hlauthâwng ngei mai.

Saithankhuma ka en lah chuan ka che vêl chu a biang dawm meuh hian min lo ena, engmah pawh a sawi chuang lo “Ka rai anga?” ti a hlauthâwng zeta ka en chu a rawn ner saka “Ka fa pai chu i hlau em ni? Min dan bîk loh tawp kha, in ngaihtuah hah chiam suh, thil a nih tur ang a ni vek tawh. Midang ka nei dawn pawh a nilo” a tihchuan ka ngawi reng thunga.

Chutah ka bulah rawn tawlh hnai leh in “Darpui ka fa pai chu i fuh lo em ni?” dam dapa a rawn tihchuan ka lu ka thing nar nara “Chutiang pawh a nilo, ka duh a lawm. I fa pai ka duhlo rêng rêng lo haw tawh ang” tiin ka tho chhuaka, a ni pawhin engmah a sawi tawh bik lo.

Kan vak hla lêm lo bawka khua chu thim chian hma in kan thleng leh der tawh. Kan inah chuan sa chu chanin ṭhenawm te chu min hleh tir bawka, an sa tur tlêm a zâwng chu la in a dang zawng zawng chu min pe veka.

“Keini chuan kan ngah, i ei châk kha tikham rêp ṭhen ula, i ei châk hun apiangah i ei mai dawn ania, min hnial hauh suh. Zânah ka lo kal leh ang” tiin a haw zui ta nul nula, ka nu nên sakhi chek vêl chu siamin rawng chu kan bâwl zung zunga.

Chaw kan eikham meuh chuan a tlai leh duai tawh mai, tlangvâl ho chu an rawn chuangkai leh phak phaka, lo chhâwn zung zungin ṭhutna chu ka lo kawhhmuh zung zunga. Kan in a lian lêm lo bawka an khat leh titih tawh mai.

Saithana pawh a sawi ang ngeiin a rawn lang a, thim laiah ṭhut a tum chu tlangvâl ho chuan an zahthiam zia tilangin ṭhutna ṭhalai chu an kiana, ka bulah a rawn ṭhut chuan ka lo en zawka. Meiling chu lo chhuan sak ve in tlangvâl ho titi chu ka ngaithla kara.

“Ramchhuah hi Lalpa hian rawt sela aw, pangen ngaw an tihah sâwn tumpang kiu thâwm an hria a ni âwma, kei zim ka châk asin. A ki a ropui viauin ka ring a ni, an sawi dân phei chuan kan khaw ṭhenawm te ram aṭanga rawn lût kha a nih duh hmela, a sawi tu khân a hmutu in a ki ropui zia a sawi bang theilo an tih kha” tlangvâl pakhatin a rawn sawi chuan midang chu an lo ngawi ṭhap mai.

“Pasalṭha nang lal bulah ngên la, hna âwl lai chuh hian va châng teh ang u” tiin Saithana chu an rawn en ṭhapa, an mitmenga beiseina chu ka hmuh hmaih lo, Saithana chuan pawm se an ti tih an hmêlah a chiang reng mai. A ni lahin mitchhing duar duar hian vaibel chu a pak hlat hlata.

A hmêlṭha ver vawr lutukah chuan vensak pawp ania ka châk ni. Ngeiawm lutuk, miin an nghâk tih hre reng chunga chutianga la awm ngar ngar chu ka ngei zâwng tak a ni.

“Ka pa ka lo hrilh dâwn ania, a ki chu engtin nge an sawia? Kah thiang lo te hi alo ni reng ange” a tih tâkah chuan tlangvâl dangte chu an phûr ngei mai, a rawn sawi chhuak tu bawkin a Tumpang ki sei leh mawi zia chu a rawn sawi leh par par a, a ki kual mâwi zia a hmuna awm ang mai a a sawi thiam na chuan midang pawh a ti ngawi chiang ngei mai.

Kei pawh chuan ka lo ngaithla ve kara, Tumpang hi an hlauhawm zia pasalṭha thawnthu aṭang vêkin ka lo hria a, Saithana hian a awm danah kah ngei a tum dawn tih ka hre bawk nen ka hlauthâwng ru ngei mai. A rawn sawi chhuaktu tlangvâl chu ka ngei lek lek a ni.

Saithana lah chu a hmêl danglam hauh lo mahsela chu tumpang kah a châk zia a mitmenga lang chu ka hmuh hmaih lo. Lalpa dil ngei tur a in sawi phur hlawmin lêng hnawt ar a khuan tâkah chuan midang ho chu an ṭin zui phak phaka.

Saithana erawh a la awm thung “Tumpang chu pelh i tum em?” tiin ka ena, min rawn enin “Ka hrelo le, ka thangchhuah theihna hmanraw zîng a mi a ni a, kei kher lo pawhin an kâp thei bawk. Va en ve hrim hrim chu a ṭha ang chu” a tihchuan ka hlauthâwng ru ngei mai.

“Kal lo mai la ka duh, ka ngaihtuah che a nia. I chesual palh thei, tumpang phei chu an kawlhin an hlauhawm zia an sawi ka hre ṭhin a, i chetsual ka hlau a nia aw” ka tihlai chuan a rawn nui haka.

“Min ngaihtuah suh, he khawvêlah mihringte aia chungnung an awm theilo” ti awlsam et in a tho chhuak zuia. Ka rilru erawh a nuam lo viau thung, phur vak lo chuan thlahin inchhungah ka luhsan ta daiha, zân dangah kha chuan inkuahin kan inthlah ṭhin kha ania, zanin chu ka lung a ti awi miau silo.

ZAWM LEH TUR

ZAWMNA 

“Tinge min biak duh miahloh?” ka bula Saithana ding chu ka melh zawk a, a mi biakna pawh chhâng lo chuan ka thing eh lai bawk chu ka eh zawma. Ram chhuahna ah tello turin ka duh thu ka sawi a, min chhân dân avâng khân ka la lâwm lo reng mai. 

“Tinge hetia i awm tlat, kan kal dâwn tawh ania. Min be duh lo khân awm suh” ka la en duh lo chu a ning nge ka kutah rawn vuanin ka hrei chu min lâk saka, kâwm kâr lamah chuan min pawt lût nghal hmak bawk. 

“Tinge ka thangchhuah i duh lo em ni?” a rawn ti ta khauha, ka en nghal kar mai “Duhte chu duh e, mahse ka ngaihtuah che a lâwm. A hma angin awm leh in emaw bo leh daih ta la engtin nge ka awm anga, kha lasi sual unaute khân an rawn tihbuai leh che te ka hlau a lawm” tiin ka rilru chu ka sawi chhuak ta nge nge a.

Chuveleh alamah min pawt hnaiin a âwmah chuan min kuah beta “Chuvang chu maw ilo tih tauh bêr bêra, min ngaihtuah lutuk suh. Ka in vêng thei a lawm, him takin ka rawn haw leh ang tih ka tiam a che, Tumpang leh mu van lai chiah hi ka thangchhuahna dâl tu an ni tawha, Naupangtea thang ka chhuah theih chuan a ṭha dâwn em a sin, keimah kher lo pawhin an kâp thei thova, min chân ngai lovang. Tumahin min ṭhen hrang tawh lovang ka tih kha” tiin min kuai dâk a.

Ka hmuiah chuan a rawn fâwp vang vang bawk, ka hmaiah chuan chûl heuh heuh in “Min chân leh tawh lovang, i tân ka lo kîr leh ngei ang tih ka tiam a che” tiin ka chalah chuan a fâwp leh zauha, ka thaw huai mai.

“Hlawhtling taka ilo kîr leh hun ka lo nghâk ang che, kal tawh rawh. I tlai bîk lutuk ang” tiin ka nawr dat data, kâwm kâr aṭanga kan chhuah rual chuan kawtchhuah lam panin a kal ta vata. A hnung lam aṭang chuan ka en reng bawk, phun sep sêlin inchhungah chuan ka thing eh sa nên chuan ka lût zui ta thuaia.

Ka nu chuan min lo en ran mai “Chemte i ṭhianpa nêna in inkârah hian awm a awm ani tiraw? Ṭhianṭha mai chu in ni lovin ka hria” a rawn tihchuan a bulah ka ṭhu hnaia, chhân erawh ka chhâng mai lo thung.

“I nu hi min hrilh teh, ka lakah zêp nei hauh suh” a tih leh tâkah chuan “Nu a dik e, kan in hmangaih a lâwm” tiin ka kûn chala. Min hau dâwn emaw ka tih laiin min rawn kuaha “Bawihte a va pawi ve aw, in inkâwm mah tih tawh nak a lai, a ni khawnbawl fapa niin nang lah hmeithai fa mai i ni si a, kan phu lo tih i hria ang tiraw? A nu leh pa khian mo atân an duh kher lo mai thei che a sin, kan inkar zau zia i hria ani lo'm ni?” tiin rilru hah zet chuan a thaw chhuak a.

“Nu, nu Zampuii te chu an fel êm hi. Min duh êm êm ang” ka tih leh lai chuan a kut chu a rawn vai zauha “Ṭhian anga an hriat vâng cheu pawh a ni thei, in inkara thil thleng hi an hriat vaih chuan an pawm che in ka ring lo, bawihte kalsan tum zâwk rawh. Keima dinhmun anga i awm ve ka duhlo, ka tawrh hnu tih i hriat kha, khatianga awm ve tur khân ka duh lo che” a tihchuan ka ṭap lo chauh.

“Ka theilo min duh êm êm ang, an fel a lawm. Ka kalsan theilo” ka tih leh tâkah chuan ka nu chuan fiah zeta min enin “Zawlpuan in phah dûn tawh em ni?” a rawn ti ta faka, ka dâk chhuak nghal zawk mai, chiang zeta min lo en avâng chuan ka kûn leh ta thuaia.

“Min chhâng teh” a rawn tih leh tâkah chuan ka bu nghata “Nu ka tihpalh, ka hmangaih a ka kalsan thei tawh lo, a ni pawhin min kalsan duh lovang” ka tihchuan min rawn kuaha “A van pawi tak em, bawihte hmeithai leh mi ṭha fate in thlauh zia hi i hre lo em ni? Miin engtin nge min ngaih ang, mi min hmuhsitna mah tih tawh nak laiin” a tihchuan hrehawm ka ti ngei mai.

Mahse Saithana ka kalsan thei bîk ngawt silo, vawikhat mai pawh nilo in kan chesual ngun tawh mah mah. A fa ka pailo ang tih pawh a sawi theih tawh loh lai hian engtin nge ka kalsan phal bîk ang.

“Nu ka tuar mai ang, a ni pawhin min hmangaih a lawm. A fa ka pai nge pai lo tih pawh ka hre loa, ka ṭhen thei tawh lo a ni, ka tihpalh ka bo lai pawh khân a ni pawhin min zawn vângin asin khâng lasi te nên khân an buai ni. Keimah vâng vekin lasi hial a bei a nia, ka thlah thei tawhlo” ka tih leh tâkah chuan ka hnungah a beng thek theka. 

“A ṭha e, mahse fimkhur ula miin an hriat hlauh chuan kan nufa mai nilo in an ni chhûngkua pawh an mualpho tel dawn tih hre reng rawh” a tihchuan ka bu nghat nghat mai.

Chaw ei kham chuan thing tê phur leh in ka hmanrua chu hman dân ka zir phaha, nuam ka ti tawh viau. Saithana te pawh an ram riah tumna an thleng tawhin ka ringa, an riahna tur ram ngaw dur khup leh thing lian pui pui ding khup te chu ka en vang vanga.

Kal ve châk viau mah ila hmeichhe tiha mawi a ni silo, rawn hlawhtling ngei se tih hi ka duhthusam ani. Kum 20 lekah thang a chhuah theih chuan a ropui dâwn em a sin, hmanlaia thangchhuah Pasalṭha an ngaihsân zia lah ka hai biklo, kan khaw nula te hian an ngaizawng ru ṭhup tih lah ka hailo.

Chûng zînga a langsâr ber chu Thanpari a ni, zahthlâk khawpin Saithana te in a chuangkai tam tih ka hria, in hlat viau mah ila mi titi lêng vêl aṭangin nu Zampuii a tlawn harh harh zel a nih hmêl. Zaktheilo lutuk, Saithankhuma hi ka ta chauh a nih hi.

Saithanate ramchhuah aṭanga a ni lina chhûn lamah chuan mikhual duhawm loh zet kan neih thu ṭhenawm nu ho chuan an rawn sawia, Lal chhûngkua an kutah an awm an tih rual chuan ka hmanrua chu la in ka nu phallo chung chu lal mual lamah ka tlân chho a.

Kan pasalṭha ho an ram chhuak vek bawk nên a pasalṭha awm ho lah tar uaithla lam pa Saia te ho bâk an awm lo tih ka hre ve kar bawk nen keimah ka chet mai a ngai a ni.

Lal mual ka thlen chuan mipui an lo pungkhawm mur mura, Pasalṭha pahnih leh an ṭhuihhruaite ni ngei tur panga chuan Lal chhûngkua chu an lo hnungkhirh ṭhap bawk nen ka rum nghata, Saithana te awm se chuan an châk lo viau ang chu.

An pasalṭha pahnih lo au kuk kuk chu en chiangin ka pan hnaia, ka hlau duh bîk ṭhak lo. Pa Saia chuan hmachhawn a tum chu ka au ṭhat a, mipui chuan ka lam an rawn hawi ṭhap bawk.

“Pa ka lo bei zâwk ange, lo châwl rawh. Nang nên chuan in tha pawh a in ṭhat hleih tawh lutuk, keimahin ka lo hmachhawn ang” ka ti chu mipui lam chuan mak ti lutukin min ena, Lal chhûngkua leh pa Saia te nupa pawh chuan mak min tih hmêl lutuk.

A ni reng ang chu, hmanlaiah hmeichhia in ral an do in hriam an lek mai mai ngailo tlata. Kei erawhin engkim hi ka thlâk danglam ang, bâkah pa Saia chu a upa tawha. Thi ta se Saithana engtin nge ka hnem ang? Ka ngaihtuah ngam lo, chuvang chuan keimah ngeiin ka hmachhawn tur a ni.

“Uai a va hmêlṭha kher em? Nula i hrechiang a maw? Min nei zâwk la nuamsa takin ka siam ang che, min neih phawt chuan in lal chhûngkua pawh hi ka kaltîr nghal ang. I duh em? Ka nupui i nih chuan i rethei hauh lovang” tiin min rawn thlem zui hauh hauha, ka nui hak ringawt.

“A pawi khawp mai duh dang ka nei tawh tlat, bâkah Lal pawh zah lova khatianga tingam chu mi ṭha tak i ni lo tawp ang, min hmachhawn ngam loh chuan sawi mai rawh. Keichuan mipa i nihna avâng khân ka hlauh phah lo che” tiin ka hmanrua ka kâwnga ka hrên chu la thla in ka vai kual pap papa.

Mak tiin an meng kâwk kâwk hlawm mai, hetiang hmanrua la hmu ngai dâwn heklo. Nu Zampuii erawhin engkim a hre ngeiin ka ring “Hmeichhia ka bei anga maw? A va mak ngai êm” tiin a nui leh haka, ka ning riau tawh.

“Bei tur che i zawng a ni lo'm ni? Kan pasalṭha te awm loh lai i chân avângin helaiah i rawn lût a, an ni an awm tâk lohah chuan kan in hmachhawn mai angai a nih hi. Hmeichhe hmaah hian i tlâwm dawn nge i ral chem kha i chawi dâwn” tiin ngeiawm zet chuan ka nuih zuia.

Ka nu chuan min lo au ve chûl reng bawk, mahsela bânsan mai mai ka tumlo “Pa Sai min ngaihtuah suh, keimah in ka bei ang ka tihkha min lo vêng zâwk rawh, Saithana te pawh an rawn haw ṭep tawhin ka ringa, heng mihring ho hi a zuah hauh lovang” tiin chupa chu ka pan pheia.

“I duhthlang rawh min bei dâwn nge bawkkhupin ka hmaah ngaihdam i dil dâwn” ka ti chu a rawn sa ta phat mai. “Hmeichhia te te si i va chaltlai em em ve, kha lo in ring rawh. Ka ta ah ka siam khawp ang che” tiin chem chu a rawn vai zui ta buan buana, mipui lam lah hlauthâwng in an lo au chêl chûl bawk.

Nui sakin ka hrui chu ka vai kuala, chupa awm chu a thi nghal sar sar mai. Chumi a hmu chiah phei chu meng rum tawh tak a ni, a hma a a hmêl kha bo in mi thah ngei tum tih hriat tak hian min rawn vai zui ta sawk sawka, awm sawn pahin ka lo in dang char char thung.

A rawn zuang lai chu remchângah la in ka hrui chu vai leh zâwkin ka chem hmawr zum tak chuan a hrawk a kilh nghal hmak a, che leh tur awm tawh lovin leiah chuan a tal khûr nghal char char bawk. 

A zal chu a ni der mai, mipui lam lah kut an lo beng dur dura, a ṭhianpa thinrim lutukin min rawn pan a beih leh ka tum lai tak chuan Saithana aw ka hre zuia, chuveleh ka hmanrua chu dah ṭha vatin alam chu ka pan ta daiha, midangin silaiin hmelma ho chu an rawn tin bawk nên tumahin chêt an la ngam tawh biklo, Saithana chu va kuahin ka nuiha.

Ka thiltih kha a rawn hmuh hman loh hrâm ka beisei.