DUHLAI ZORINPUIA CHAPTER 7

DUHLAI ZORINPUIA

CHAPTER 7

“I duh ve em? Kha ei ve rawh, haw vat ang u. Mi in kalsan emaw tia thingkungah in lo awm mai mai tho sia, zanin chu i inhmu lo hlawm phawt teh ang u aw. Kan Thankhawloa hlei kan tuar na emai, i inhmu nawn fo lo vang u, in hmêl ka hmuh reng chuan ka hmêl ka hriatchhuah phah ziah” tiin u Rinpuia chu Bîl chu ka pe ve a, a lo la ve mai bawk.

An ni pawh rawn chhukin muangchangin kan inzui haw leh diah diaha, an hmêl chu ka en ṭhin. Nuih loh a har bawk si, insûm sên pawh a nilo, keimah pawh tiamin kan hmelchhe vêl vek, infak chiam dawn pawh ni ila kan in fak hmêlṭha zo lovang tih ang vêl a ni.

An mit leh hmui bui vûng lûk chuan phone a khuai zuk avânga hmelchhe lutuk hmui lian vek mipa kha min hriatchhuah tir lo theilo. Ka nui leh ṭhin chu Bîl ei pah chuan min rawn melh leh ṭhin “Nui reng suh, i bialpa kha zuk ve se chuan i nuih âwm tawp silo, a ni kha engtin nge a him theih bîk? I bialpa kha a hmelchhe ber tur ania” tiin an thil eina kâwr chuan min rawn vawma.

“Awwww a a nite chu a finga, bâkah khuaiin zuk pawh nise hmêlṭha tho tho dawn. Awi kan va han chhe chêr chûr hlawm tak tiru?” ka nui zui haka, “Lalthanliana vâng vekin kan luck lo dâwn hle a ni, nihnih tal chu nghah a ngai ngei ngei ang. A naupang ber tih takah a ninhlei hi a la reh theilo a nih hi, kum te han tling sela a puitling ve mai ang” an tichu Thantea a lâwm lo ngei mai.

“Ka ning kum ka tling tawh tih in hre reng, min ti duhdah bik viau suh u. Ka tello a awm thei tawp silo, hnathawh dawnin i naupang nang chu lo âwl rawh in ti chuang silo, thil dangah chang hian ka naupan thu in sawi bik reng mai. An kawlh tih ka hre bik hleinem, nidangah pawh kan vawm fo va min zuk ngailo, naupang sairawkherh nei ho in an perh kawlh a ni'ang chu. Min puh bîk reng suh u” a ti hlak hlaka.

A ṭhiante'n an naupang chhe chei thei bîk lutuk chu a lâwm lo ve hle tih a hriat. Midang lah hian a thinrim han ang ve ṭhin lah hi engah an ngaihsak duh lêm lova; an nuih liam mai mai zela, an tihluih an ṭhulh phah hek lo. Ṭhian ho ah hi chuan naupang ber hi tihluih ber an ni ngei ngeia, duat pawh an hlawh ber bawka.

“Mate ṭap suh bang bang, inah rumpum kan lei dâwn che a nia” Faka chuan a lo ti dût dût mai. “Kha en teh enge ka neih hi” naupang ang tak tak chuan a han chei bâwla, Thantea lungawi lo lutuk chuan a ke ah a lo chhir sak nghâl ṭawk mai. Midang chu an lo nui vak vaka, an ni pahnih erawh an in melh rum ṭha fia fia thei viau thung.

“Rumpum mai maia thlêm lungawi theih ka nilo aw, Lalfakzual min nau chei ziah suh. I hmelchhiat bei bui nen” tiin an in tin leh zuau zuau ṭhin, pakhatin nau zâwk a nih hi ti a ṭha deuha biak chu awm lo, pakhat lahin u zâwk ti a ngawihsan tum bik ṭhak lo. 

An ni ho awm khâwm tawh hi chu an inhnial ngei ngei ti ila kan sawisual lovang, khawiah pawh awm se an kalna chin a hriat bîk lutuk. An inhnial ri hi a hriat nghâl theih ngei ngei, heti chung hian an inkawm ngeih em em tho bawk sia. Ṭhian inhnial peih deuh hi chu pakhat zawk zawk awm loh hunah an khua a har duh phian an ti ṭhin a, a dik ka ring.

Inhnial reng te, in khak fek fek reng hi hi han awm hrang se an lo in ngai thei lutuk. An nunah kimlo riau a awm tawh ṭhin, an inhuat vâng êm êm pawh nilo in ṭhian zîngah emaw in ngaizawngte ah pawh inhnial mi hrim hrim hi an awmin ka hria, an sual vâng pawh nilo mihringteah hian a bet tlat ni berin ka hria, kei leh Sawma pawh kan ni tho.

Mihringte hian pakhat tal chu in haw hauh silo in inhnial pui peih bik kan nei ṭheuh a; kan in hnial peih ang hu in kan in pawh leh riau tho si. Inhau leh inhnial reng mah ila a hunah leh midangten min sawisêl hunah kan thlavang kan inhauh na leh viau tho.

Huatna pawh nei lêm lova inhnial peih deuh a bikin mipa leh hmeichhia, inhnial peih deuh in haw chuang miah lo te hi an lo in duh ru duh chawkin ka hria, inhnial peih reng. Thinrim chuanglo leh in haw chuang lova awm reng ta na na na chu an in hnial karin duhna a lo piang ve thei tlat, chu chu ka hriat chian tawh a ni.

Huatna hi hmangaihna a a inthlâk loh chuan tireh thei tu a awm lo. Chutiang bawkin hmangaihna pawh huatna ah a chang thei bawk, a ti tâwp thei tu chu mi pahnih te chiah an ni, midangin tih tâwp theihna an neilo.

Khawvêlah duh bîk riau nei turin kan pianga, kan duh zawng zawng erawh kan nei thei chuang lova, ṭhenkhat rinawm êm êm an awm laiin, mi ṭhenkhat te erawh hmangaihna pawh ring lêm lo. Mi kawp kual nuam ti tlat mi an awm bawk, chutiang mi chu mi vanduai berah ka ngai kei chuan, luck vâng ka ti ve theilo. Rilru leh thinlung piangsual an ni berin ka hria.

Siamtu in mipa leh hmeichhia innei turin min duha, kan kawppui tûra kan thlan tawh miau chuan phatsan leh hi keichuan ka ngaisang ve lo, kan kawppui tur an nih chuan belh chiana. Kan kumkhaw neih theih tur an ni angem tih hi kan en reng an ngai rêng a ni.

Tam tak chuan an hmêlṭha kan tih vâng ngawt leh chhelo kan tih avâng ngawtin min hmangaihtu leh kan hmangaih ni lêm lo kan ngaihzawngin kan nei pawp pawpa, chu chuan keimahni zâwk min vaw lêt leh ṭhin.

Mi a rinawm êm avânga a na a a single  nih chuan nuihzat chi ah ka ngai lova, a rinawmna kha ka ngaisang zâwk. Ngaihzâwng ngah lo in tih theih pui vak te, midangte thinlung bum kuala nuih sawh chîng mi hi ka huat ber an ni bawk, an mahni hmangaihtu an tina a, a tâwpah an inchhîr leh ngei ngei ṭhin.

“Zanin chu inkhâwm ngam pawh a nih loh hi, nula ho in min tihluihna tur an ngah dâwn emai. Khaw chhûng thlen rualin ka hmai ka tuam tlat dâwn?” tiin an rawn ri leh phak phaka, kan khuai chu ka ngei tak tak. Ka chal pawh a la thak nauh nauh mai “Nia rawn lêng miah suh u, keipawh hma deuhah ka mu dâwn” lo ti ve in ka thlan ka beka luang zaih zaih chu ka hru a.

“Awi ka chau lutuk, kan va han thleng har tawh ka bawp hi a bal dâwnin ka hria” tiin ka ding leh riha, min rawn en hâw hlawmin “In pa rawn lêng se i hnar phal meuh ang maw? Kha i bulah a awm ve reng kha, rawn lêng suh han ti teh. Chutia i tih ngam chiahin kan rawn lêng lovang, a hrim hrimin kal theilo ropui si engah nge i feh ve reng reng, i thau lutuka chuvang a nih kha” Sawma chuan tiin an ṭhu nghâl phak phaka.

“Chawl leh mai ang u, tlai haw ho in min rawn ûm pha ang tih pawh a hlauhawm. Chhûn chaw fâk rualin kan haw vea, haw hma man pawh a awm lo Hmingeki hian min ti muang lutuk, nghâk dawn lo ila a ṭawng thei ve bawk sia mi a chhuah chhâl ang tih pawh a hlauhawm si a, châwl leh phawt mai ang u aw” tiin an ṭhu zuia.

Chhâng peih tawh lo in u Rinpuia bulah ṭhu in ka in zâp hauh hauha, thlifîm rawn thaw heuh heuh chu in chhem tirin ka mit ka chhing diar diara, chauhthlak viau mahse nuam ka ti. Zo thlifîm ngei mai rawn thaw heuh heuh te, hmun hla taka tlâng in pharh lang paw ruih mai te, romei zâm chûk te chuan lung a tilengin a ti hmanlai ngawih ngawih a.

Suangtuahna kawma hahdam taka mut mai mai a châkawm ngei mai, “U Rinpui ka lu hi ana” ka lu hi a hai muai muai a nih chu, khuaiin min zuh vâng kha nge maw ni dâwn ni. A lum bawk si, ka sa pup pup mai.

“I nuam lo viau em? Ka paw leh mai dawn che em ni?” a tihchuan ka lu ka thing nak naka, kan haw kawng thui nen chho kan kal hrep tawh bawk sia. Ka duh lo hrim hrim “Ka sawi mai mai a nihkha ana lutuk lo a nia, ka kal thei em em ang. Bâkah i chau tih ka hria, ka nawi lutuk chuan min hruai duh tawh lo palh ang, khuai min zuh vâng kha a niang” ka tihchuan a bu nghata.

“I chalah a ni bawk sia, an tûr a chak ve bawk nên chuvang a nih kha, haw vat zâwk ila a ṭha ang. I zual hlauh ange” tiin ding chhuakin a kut chu min pe a, ka lo vuan nghâl vat bawk. “Kan in puak chhuak mai dawn em ni? Kan chauh pui vak nâng, tiru pua ang u” Faka chuan tiin min rawn hnaih zui phak phaka.

Lo hnial ka tum chu “Ngawi hle hle rawh, i kal theih loh chuan engmah sawi a ngailo, nidangah chuan inah lo awm tawp la a ṭha ang. Min ti buai emai” tiin hnial theih tawh miah loh hian a hnung a rawn dawh zui zata,u Rinpuia chuan “Ka lo hmasa ber ange kan inchhawk zêl mai dawn a nia, tirawh le. Rawn lâwn rawh” tiin a hnung chu a dawha, kal lamah min paw tawh bawk. 

Ka lâwn duh mai lo chu min en ṭhapa “Ka duhlo, in vûng in in chau ve em ema, keimah avânga in hrehawm ka duh lo. Nuam pawh ka tilo, ka kal thei a lâwm” ti a kal mai ka tum chu min rawn pawt in min pawm kâng lâwp a, u Rinpuia hnungah chuan min dah nghal hmak a nihchu.

“Inthlahrun a ngailo, Thantea hian a paw tam ber tur che a ni. Engah nge khuai a lo vawm ni, keini pawh kan hmai hi a ni lêk lûk ania, haw vat zâwk ang u. Hnial khawmawi a ngailo, kan paw peih mah che hi lâwm hle rawh, i luck hmêl ve deuh ang” tiin an kal zui nal nala.

U Rinpuia chuan muangchang in min kalpuia, hetiang tur chuan feh ka dil tawh miah lovang ka inthlahrung, ka tlaw bîk lutuk chu min iai palh ka hlau bawk si. Engmah pawh ka sawi ngam tawh lo, ngawi rengin a dârah bei chung chuan ka awm ta tawpa.

“Inthlahrung tur chu i nia lawm; mahse a ruk chuan nuam i ti, kan hre vek a lawm. Inthlahrung vêl suh, ṭhianpa leh bialpa fel tak tak i nei hi i lâwm em? Min vin pâwng pâwng ṭhin mahla kan fel zia hi hre reng ang che, khawi ka lo paw ve tawh ange, khua kan thleng ṭêp tho a. In chhâwk zung zung ang u” tizatin Sawma chuan min rawn paw ve a.

Ka ṭawng duh tawh der lo, min inti thlahrung zo vek tawh. Engmah sawi chi pawh ka nilo, a lehlamah erawh hmai vûng ul chunga min paw vu vu chu phungpui chhungkua te pawh kan ang hlawm lutuk. An vai mai chuan phun nawi hauh lovin min in puak chhâwk a, min tihluihna pawh ka haw peih tawh lo. Ka tân an ṭangkaiin ka chungah an ṭha bawk si, hetiang mipa fel leh mi ngaihsak tu ka tawng hi ka lâwm a ni.

“Ehe! Nang ni ho chu enga tinge chêr chûr hlawm nge in va vûng nasa ve, khuaiin a zuk cheu em ni?” khaw chhûng kan lût ṭan chiah tihin pa pakhat kan tâwk hlawla, min en ha lehnghâl. “Nia feh kawng ah khuai kawlh an lo awm pek a lâwm mawle, enge i tih dâwn a” u Rinpuia chuan a chhâng a, chupa chu a rawn nui hak mai.

“Hei thing vawkin sakna tur kan pu ange ka tia, a nih dâwn tak kha ka rawn hmu thut cheu kha mak ka ti cheu a lâwm, eng pawh chu nise ka kal phawt ange” tiin engmah dang sawi tawh lo chuan a kalsawn zuia, keipawh khaw chhûng kan thleng ta bawk nên ka chhuk thuaia.

Ka in a hnai bawka thlen vat vat ka duh, miten min rawn hmu leh riau riau ange a zahthlâk nasa si. “Anih ka pêng phawt aw” ti a kal mai ka tum chu u Rinpuia chuan min rawn zui thuaia, engtin mah ka be tawh lêm lo. Kawngka chu chahbi chuan hawngin kan inzui lût a, ṭhutthlengah chuan ka ṭhu nghâl hnawk mai.

“I la na viau em?” ti a min rawn hnaihin ka chal thak lai chu a rawn hiat leha, ka mit ka chhing diar diar mai “Na lutuk lo e, i haw ve phawt dâwn lo vem ni? I intifai ve duh ang, keipawh kan in bual phawt ange” tiin ka tho chhuaka. 

“Intifai phawt la keichu nakinah ka haw mai ang, zânah ka rawn kal leh ang” a tihchuan ka hnial duh lo, inthlâk sawk sawkin inbual tur chuan bathroom lam ka pan zuia, rei pawh inbual lo in ka chhuak leh thuai bawk. Ka chau bawk nen mut vat vat ka duh zâwk.

Ka inthlâk chhûng zawng chuan min lo nghâk a, ka chhuah leh pawhin a lo la awm reng mai “I duh chuan haw mai rawh aw, ka ngaihtuah awm loh ania, ka mu anga ka zia leh mai ang” tiin a bulah chuan ka ṭhu thla a. Chu veleh min lo kuahin a malah min pawt mu a.

“Ka ngaihtuah loh che in tuin nge ngaihtuah ang che. I nu leh pa lah an awm hla si a, keimahin ka ngaihtuah loh che chuan na i tih vâng te in ilo ṭah ka hlaua, chubâkah i dam loh a ngaihsaktu i neih loh kha ka duh lo a lawm, i bialpa ka nia. He khua hmelhriat ṭha leh laina i neih loh na hmun ah i awm tih hre rengin engvangin nge nangmaha natna tuar turin ka awm tir ngawt ang che? Muhil rawh, i mutthilh hunah ka haw anga; mahse zânah ka rawn kal leh dâwn tih hria ang che” tiin ka lu ah chuan duat takin a chûl a.

Ka lâwm lutuk chu ka luna te pawh an dam sawng sawngin ka hria, min duat zia ka hai bik lo. Ni e a sawi ang ngeiin tumah ka dam lo a nih pawhin min rawn kana min buaipui tu tur an awm lova, amah chiah hi ka neih chhun chu a ni. Tûnah pawh hian min ngaihsak miah lovin haw daih ta sela ka lâwm lo viauin ka ring.

A kum ang zawng chuan mi upa a ni hauh lo, mahse a rilru puitlin zia erawh a ni tel hian ka hre thar bawk. Hetianga ka sawngnawi chung pawh hian min hauh leh mi duhlo ang in emaw, mi nuih khum lam a ti ngai lo, a dawh thei em em bawk si. Ka duh kha ka inchhîr tawh lo hrim hrim.

“A nih ka muhil dâwn aw, haw har lo la. I nuten an lo ngaihtuah tawh ang che, na êm êm ka nilo a nia, ka feh ve ngai siloa ka chau a nih hi” tiin ka mit chu ka chhing zui riai riaia.

Dik tak chuan ka ke leh mal vêl hi a rawl ṭhum mai. Mahse sawi pawh ka tum lo, ka zak tawh, vawikhat ka feh ve a puak haw ka ngai dêr chu a nia. A rapthlâk zâwk.

Ka harh leh chuan a lo awm tawh lova, ka luna pawh a zia huai mai. Ka taksa erawh a na in a rawl ṭhûm mai, ka ner sak saka rawng chu peihlo zeta bâwlin ka che zui sat sata, chutih lai chuan tlângau rawn au in zing lamah mipui halla kal khâwm tur tiin a au lauh lauh mai.

Kâ ngeia a au chu a dangdai phian mai, khulamah te chuan Mike ah an puang dum dum zel kha a nia, keipawh kâr tâwp lam chu nu naupai ho zirtîrna vêl pêk a ngai tawh dâwn a, ka huphurh viau nângin hriatsa leh thiam sa chu ka buai lutuk bîk lo turah ka ngai.

Rawngbawl zawh chuan chaw ka ei zui ta vata, mahni chauh chuan ei tui a har bawk nên tam erawh ka ei lo chiang hle. Chaw eikham chuan ṭhutthleng seiah chuan ka mu zala, Sawma te ho pawh rawn lêng lo tura ka tihna chu an awih nge ni thâwm an rawn la neilo hrim hrim.

Ka muhil dâwn siar siar tihah kawngka chu rawn ri rakin u Rinpuia chu a rawn lang zuia. Sarangah hian artui a rawn khai bawk, tho chhuakin ka lo en ha a. “I muhil tur ka rawn ti harh che a nimaw? Kha hei zo artui ania hip zâwk ka i mu leh dâwn a nia” a tihchuan ka nuih saka.

Min ngaihtuah lutuk chuan ka awm a ti nuam lutuk tlat, artui chu amah chuan thukah chuan min hem sakin a chêt dân chu ka en renga. Thil manto tak tak min pe ve kher lo mahsela min ngaihtuahna leh ka tâna a thiltih chuan min ti lâwm tâwk em em tho. Heiaia ṭha chuan tu mahin an bialnute an ngaihsak bik hauh lovang.

A theih tâwk chuan min ngaihsaka, sum leh ei tur ṭha pui pui min pe lo mahsela a phâk tâwka min ngaihsakna hian ka tân chuan mipa dang aia ka thlan chhan tur a ni. A nihna thingtlâng tlangvâl tih hre reng chunga hnaih ka ni a, han zahpui emaw iaina pawh ka nei lêm lo.

A nihna ang ang hian ka duh êm êm ringawt “Kha le hip rawh le. A lum lai hian a ṭha bik ania” tiin min chhemsak hauh hauha, ka nuih sak mai “Ka lawm e ka pasalṭha i ni ringawt, min duat lutuka ka na duh reng mai thei a ni” tiin ka nuih var vara, a rawn nui ve vur vur mai.

“Ka duati hi a na lutuk ang tih ka hlau a lâwm, i chal pawh kha a chum nalh tawh khawp mai” tiin artui chu a chhîp lam tuk kehin zau vak lo hian a kheha “Kha le hip vat la, ka nu in i tân liau liau min rawn ken tir a nih hi. I ei zawh ngei ngei angai ania” a tihchuan ka lâwm ngei mai.

A chhûngte thlenga min duhsak êm êm hi ka beisei phâk loh a ni, an fapa nên kan inkar an hria a. Mi iaina leh sawiselna an nei ngai miah lo te hi an mak ka ti zâwk, artui chu hipin ka lem khalha “Awi a tui lutuk, a hâng dep dep mai” tiin pumkhat la awm chu ka bana “I duh ve em?” ka tihchuan a lu a thing nar nara.

“Ei rawh keichuan inah ka hip tawh a lawm, i taksa a rawl nasa dawn sia zo artui hi chu a ṭha a nia” a tihchuan ka bu nghat nghata, “Ka bulah hian lo ṭhu rawh, chhuatah ṭhu suh i bal ang” tiin ka bula ṭhu tur chuan ka pawt chho zuia, a ni pawh rawn ṭhu in ka artui hipna chu tukverhah chuan a paih chhuaka.

“I lu chu ala na em? Ka rawn kal vat thei lova” tiin a darah chuan min bei tirin ka lu ah chuan a chûl hliau hliau a “Ka nêp i ti em? Ka vawikhat rawn feh ve naah hetiang hian ka awm nghal sia, i chhûngte pawhin nêp min ti âwm. Ka zak e a, nidangah chuan ka na mai mai tawh lovang” ka tihchuan a rawn nui deuh haka.

“Iai lah love thil chu tih ngailoh a awm ve a, phai hmun lumah chuan lu te hi ana duh bika, tih ṭhan a ngai ve a lawm, nakinah i dam leh var mai ang” tiin ka kut ṭang sin sei sâng mai chu a rawn hum chata “I kut a va tê ve” tizuiin a ma kut nên chuan a teh vela, a chêt dân naupangchhia tak chuan ka nuih a ti za riau lehnghâl.

Nui sen senin a kut lian leh thap hrup mai chu ka hum lêt vara, a hnathawhna avângin a kut te chu a thapin a ro rep rupa, mahse pawi tihna ka neilo. Ka kut chuan ka sih sak neuh neuha “Duati kei sawrkar hna neilo leh kut leh ke char hrup mai hi  min duhin min zahpui lo tak tak ang maw?” a kut ka en kual avâng chuan a zâm ve deuh a ni ngei ang.

Tâwp chatin amah chu ka en chho va “A pawi ka tilo, i hnathawhna avângin i kut hi durhin chhe vek mahse, i ke sir pawh ro in khi pawh nise pawi ka tilo. Sawrkar hna i neih loh pawhin a pawilo, thlan tla zawih zawihin nitin nisa hnuaiah i thawk a nih pawhin ka zahpui ngai lovang che. I hnathawhna avângin i kut te hi chang hrep hrup mahsela a pawilo, ka ta i nih phawt a min hmangaih phawt chuan engmah dang ka mamawh lo, hêng te hi ka zahpui che i ring a maw? Ka ngaisang zâwk che, ka taimapa kut, ka thingtlângpa duh em em kut a ni tih ka hriat theihna tur a nih hi” tiin a kut thap hrup mai chu ka tawh sak zauha.

“Ka zahpui ngai lovang che, kuthnathawktu kut chu a zahawm a sin, he kut hian thil tam tak a thawka.  Eirukna leh hlemhletna tel hauh lovin ama thawh rah liau liauin a chhûngte a châwm thei bawka. Chuti chung chuan ka zahpui anga maw? In chhuang zâwk tur i ni a sin, keichuan he ka taimapa kut hi ka thlah ngai lovang” ka sawi zawh rual chuan ka chalah a rawn fâwp vang vanga.

A thaw huai mai bawk “Puitling ve reuh lutuk, keipawhin he hmeichhe tereuhte ṭawng thei ve em em hi ka duh ber. Ka duat ber bawk, a chal vûng lâk te pawh a inhmeh vek” a tikher chu a âwmah chuan ka chum sak data, hriat loh der tum hrâm hrâm laia rawn sawi chhuak ziah mai.

Ka hmelchhe lutuk tih inhria in ka haw hnu ah darthlalangah pawh ka la in en duh lo hrim hrima, khuai zuk ho hmêl mak theih zia a taka hmu tu ka ni bawk nên ka in en loh khân ka ngaih a ṭha zâwk. Ka in hmuh chuan ka rilru hah leh mai mai dawn ka duh teuhlo, tihian hre tho siin inhmu miahlo ila a ṭha zâwk.

“Ka hmelchhe rih tihte chu ka hre ve tho a nia aw, sawi sawi suh. Tunkar tawp chu naupai ho zirtîrna pêk te ka ngai dâwn a, in khaw ho hrim hrim an hriselna dinhmun te pawh hotute lamah report ka ngai dâwn bawka. Ka peih lo ngei mai, tar ho te hi an la rawn in en tir miah lo a, in khua hi in hrisêl a nih ber hi. Rawn in entir an tlêm thei emai” ka tihlai chuan a lo bu nghat nghata.

“I awm rei anga an zia chho mai ang, i la awm reilo emaia. Kan tân damdawiin han pan zung zung a theih siloh a, kei ngei pawh hi min la enkawl ka ngai mai thei a nia” a tihchuan ka nuih hak mai. “Dam lo la chuan ka theih tâwkin ka enkawl ngei ngei ang che, mahse tûnah chuan i la dam emai tiraw? Taka naktuk i feh leh angem?” tiin amah chu ka en ha a.

Ka feh ve thei rih âwm silo, a ni chu a feh leh ngei chu ka ring “Ka tum  dân chu a ni a lawm, mang khawh zawh vata sawhthing lin vat ka duha. Keimah chauh mai ka nih tawh avâng hian ṭan a ngai zuala, nang chu inah lo awm mai mai rawh. I na zual ang” kal ve ka dil a hlau a ni tih a hriat lutuk.

Kei min feh pui chu hrehawm a ti bawk aniang, ka dil hman lohin a insawi khalh fai vek a lawm; a hrehawm ve reng ang chu. Min paw char char miau hek, mahse ka dam hunah chuan ka feh ve leh tho tho ang.

“Naktuk chu ka lo awm mai a niang chu, Mawii hi a feh a ngem le? Keimahte chuan a reh leh âwm sia, ka van ngei tak, ka rawn feh leh tho tho ang. Ka thlai tuh te kha an ṭiak em tih te ka hre duh, tûnah chuan an la ṭiak dâwn lo phawta. Kumtluanin ka awm dâwn a, fehna hun chu ka la ngah dawn a lawm tiraw?” a bu nghat ringawt.

Ka feh chu a hlau nge mawni? Nidangah chuan ka in puak tir tawh miah lovang, ka feh ve a phalloh bur phei chuan ka titau ziah ang tichuan ka in ngaihtuah a, amah maia a feh tur chu ka khawngaih ve tho bawk si.

“Zanin chu Sawma te ho an rawn lang lo tak tak a nih hi, an vûng nasa sia mi hmuh an hlau tak tak a niang. Khatiang thil kha ka vawikhat tawnna a ni, ka pian tirh aṭangin khuaiin vawikhat min zuhna” tiin ka chal dûp thaih thaih mai chu ka khawiha, deh a nuam phian lehnghâl.

“I bân vêl kha a na ve miahlo em ni? A vûng nasa ve tho sia” ka tihchuan a lu a thing maia “A mar deuh tih loh chu ka na love, i mut chu a chhuak tawh lo em ni? Riahpuite i duh em? I in a fâl bawk sia i duh chuan i ṭhiannu emaw pawh kha sâwm la, ram hnuai i hnaih bawk sia” a tihchuan ka ngawih deuh rauh rauha.

Ka hlau ve ṭhin tho, bâkah tûn phei chu mitthi vêl nên khân ka thla a muang chiah lo tak tak. Mahnite phei chuan a reh bawk nen perhpawng hrâm vêl bâk hriattur a awm der bawk silo.

“Min riahpui ta la miin min sawi nasa viau angem le?” tiin ka ṭhu ṭha deuha. A ni pawh ṭhutthleng nghêng ar ar chuan meizial chu a ṭan zui zata “Mi chu ngaih pawimawh loh tur, thilsual kan ti dâwn pawh ni hleilo, nangmah chauha riah tir ṭhin che ka hlauhthâwn vâng a nia. Hetiangah i awm ngai dâwn silo va, i lo mu ṭha theilovang tih ka hlauh vâng zâwk ania” a tihchuan ka bu nghat nghata.

“Um i duh leh riak la, puan sin tur ka nei tho a lawm” tiin ka lo aw ve ta nge nge a. Kan chetsual loh phawt a hnu ka hlau ve tho nên mipa chutah pawh ka rin em em maiin min riahpui chuan ka thla pawh a muang dâwn tih ka hria.

“Ṭhutthlengah hian em ni i mut mai ang? Nge chhuatah pher kan phah mai dâwn?” ka tihchuan ka biangah a rawn piai zauha “I bulah ka mu ang chu ka lo timai a sin; nge min hlau zâwk nge?” min fiam tih ka hre reng, “I ngam a thu le, ka bulah pawh a mut theih tho ania” tiin ka mit chu ka siai zauha.

A rawn nui nghal hawk hawk mai “Um mu dâwn tawh ang hmiang. Ka mutna chu min siamla, ka nute ka lo be lawk ange aw” tiin pâwn lam a pan zuia. Ka hnial duh bik lo, ka awmna hi ramhnuai nên a inhnaih êm avâng hian a sawi ang tak takin hmeichhe tân phei chuan a thlamuan thlâk loh.

Mitthi an awm phei chuan thingkung kâr thim mup hmuh phei chuan thlahrang thawnthu a ngaihtuah loh theihloh. Ngaihtuah nasat pauh leh kan hlau tulh tulh zêl leh nghal, ka kawm thlangah in hnih an awm ve tak nangin kan in hlat ve deuh bawk nen u Rinpuia min riahpui pawh chu pawi ka ti em em lo.

Bâkah tumah vakin an hria in ka ring lo bawk, chhuatah chuan pher chu phahin a mut dam tur nên chuan ka phah sak thlapa. Khua a lum ṭan tawh avângin vawt a ti êm êm in ka ringlo, ka rizai ken pakhat chu la chhuakin a sin turin ka dah zuia, a ni pawh a rawn lût leh tawha.

“Ka peih tawh e, i duh chuan i mu thei” ka tihchuan kawngka chu kalhin min rawn pan pheia, ka lo en kar bawk. A phone ah chuan eng emaw a chhu pah mual mual bawk, ka bul a rawn thlen chuan a mu mai dawn emaw tih laiin min pawt mu ve a. 

Ka au chhuak tur chu ka hmui a hup chat bawk “Shhh...miin kan thâwm an hre hlauh ange, tikhan mu rawh. Zanin chu kan pahnih ngeiin kan mu ang chu, hlauthâwng lo la, i duh lo chung ka khawih lui ngai dâwn lo che ka tihkha, kan inneih hma chuan ka insûm thei a nia; chuvang chuan hahdam tak khân mu mai mai rawh” tiin ka hnunglam aṭang chuan min kuah bet rana.

A thusawi chu ka ringhlel lêm lo, inthlah dul rial rialin “Ka lukham ka va la ve lawk ange” ka tih tâkah chuan min kuahna chu phelhin a mu ṭha a, keipawh chu ka tho chhuak nghal vata, room-ah chuan lûtin ka lukham leh Teddy bear lem chu la chhuakin u Rinpuia lam chu ka pan zuia.

“Lo mu vat la” tiin a sir chu a beng thuk thuka, hepa pawh hi a phawk a chhuah hi chuan min tilai ziah zel “Ti khân min en suh” tiin mu thla mai lo chuan ka hawisawn a, ka teddy bear chu ka pawm nghet sauh bawk.

“Timaw? Lo mu vat teh, hei zân a tlai tawh a nia. I mut vat loh chuan kan ṭhu chhuak leh law law ang” a tihchuan ka duh bik lo nen muangchang chuan ka ṭhu thla a, min lo kuah mu nghal vat mai.

“Tikhan mu leh rawh, i chau tih ka hria alawm. Khawhar in pawh riahpui loin ka u ka riah tir mai a nihkha, ka ngaihtuah che sia. Keimah lo ngaihsaktu i neilo tih ka hre bawk nên ka rawn kal tawp a nih hi” a tihchuan alamah inherin ka kuaha, ka zak duh ṭit ṭet tawh lo, a chhan chu a thusawi ang ngeiin sual lam a ngaihtuah ngai lova, min khawih a tum ngai heklo. 

Ka hmuiah pawh vawihnih bâk la fâwp lo a nia. Mipa lerh leh hlei zawk zawk a nih lohna pawh hi amah min duh zual tir tu zel a ni. Min kuahin ka bulah mu ve bawk mahsela, vawikhatmah tisa thil lam zâwngin min la khawihlo hrim hrima. Kei pawhin ka tumlo bawk, pasal neih hma chuan ka insum tur a ni tiin ka lo intiam tawh miaua.

“Ka lâwm e, tak takin mitthi hi ka hlau mai mai ngailova, mahse tûn ṭum chu ka awmna dan vâng nge ka hlau tlat nia. Tui tla a lo ni kher kher bawk nên ka awmna lah ramhnuai a hnaih sia ka thla a ngam chiah lo a. Ilo langa ka thlamuang suai suai a lâwm, taka i nute chuan an phal em ni?” tiin amah chu ka ena.

Nula leh tlangvâl riak dûn tur chu ngaihdan ṭha lo an neih ka hlau a ni ber mai. An fapa mah nisela kei min ngai dik lo viau thei tih ka hre ve miaua “Engah nge an phalloh ang? Ka hrilh vek tawh a lawm, hahdam deuh khân awm rawh, i ngaih angin thil an ngaihtuah vak vak ngai lo a nia. Bâkah kan lo chesual a nih leh kan inru nghal a nga a nimai a lawm, min duh lo em ni?” tiin anui deuh saka.

Phâwk zetin ka en chu a mit a rawn sân leh uk mai “Ka hrelo, min chetsual pui chu i tum em ni? Inneih hma chu kan tih kha mu mai mai rawh” ka tinghal zung zung chu za tak mai hian a rawn nui hawk hawka. “Tih hlauhthâwn i nuam hle mai, aw le, mu tawh ang hmiang. I dam lo sia i menrei chuan i nat zual phah hlauh ange, naktûk chu kan inah chaw i rawn ei mai dawn em ni?” a tihchuan rang zet hian ka lu ka thinga.

Teuhlo mai a pa khân min tilui leh dâwn chiang lutuk “Keimahin ka inbawl thei a lawm, a ngai miahlo a nia. Ka duhlo” ka tih lai chuan ka kut rawn man betin “Aw le aw le ka hrethiam, i zak leh tawh a nimaw? Ka nu leh pa hian an ngaina hle che a nia, monu tur pawhin an iai miahlo che. Nang hian keimah ang chiahin an lakah danglamna eng emaw chu i nei chiang a lawm” tiin ka kut chu la in a kâwngah min kuah tira.

“U Rinpui min hmangaih em?” ka zâwt khauh mai. Ka hre châk miau sia lawm, keichuan duhna mai ni lovin ka hmuh hmasak ber aṭang khân ka hmangaih tih ka hria a, a lakah ka thinlung a bet nghal thlap bawk. A ni thinlung erawh ka hre hauh lo a, min hmangaih nghâlin ka ring hauh lo.

“Duati dâwt hrilh che ka duh lo, ka nunhlui i hre tawh in ka ring a. Hrilh lo che a an awm ka ring hek lo, nang nên kan in tawn hma hian hmeichhia ka thinlung zawng zawnga hmangaih leh neih hial ka tum tawh a lo awm tawha. Mahsela min phatsan avânga hetiang thleng hi ka ni bawk, i rilru erawh tina lo la ka duh. A kiangah ka lêt tawh dâwn lova, ka duh che tih i hria, mahse ka hmangaih che em tih chu hunin ala hril mai turah ngai ang, tûnah rih chuan awlsam taka ka hmangaih che tih sawi ka thei hauh lova, mahsela phatsanna thinlung leh tihnat che tumin ka hnaih lo ang che tih ring rawh” ka lu ah chuan a chûl hliau hliau a.

Chutah sawi zawm lehin “Fiamkual mai mai atân chuan ka hnaih hauh lo che a nia. Hunin a la hril mai ang ka tih kha, ka bialnu hlui lakah chuan thik tur erawh i nei tawh lovang. Kîr leh ka tum tawh lo ka tih kha” a tihchuan ka thaw ham hama, engmah ka sawi duh rihlo.

Mipa chu hmangaih nei mai mai lo, hmangaih an neih chhun pawh hrilh duh lo leh tilang lutuk duh hauh lova in thup thiam leh in duhtâwk an ni ve tlata. Tam tak chuan thih dâwn ah chauh an hmangaihna an lan tir ṭhin tih ka nu khân min hrilh ṭhin.

Engvanga mipa te hian hmangaih tih hi sawi harsa ti êm êm nge an nih bik le? A sawi ṭhin ṭhenkhat lah awlsam takin an sawia, hmeichhe dang bulah an sawi lehnghâl thei tho va, mipa rilru hi chu khawvela hriat har ber niin ka hria. Hmeichhia chuan kan rilru kan thup ve thiam lova, a nihna ang angin kan lan tir mai ṭhin.

Hmeichhia in hmangaih kan neih tawh chuan kan ring bura, miin an nihna an sawi kha kan pawm ve thei lova, a tâwpah kan nat phah châwk. Mahsela mipate ai hian hmangaihna ah kher kher hi chuan kan huaisen in kan luhlul ka ti ve tlat, duh kan neih tawh chuan engkim chân huamin kan vuan ngama. Nu leh pa tui thlar huamin kan chelha, mipa erawh chuan an thei ve hauh lo.

Hmangaihna ah chuan kan nunrawngin kan huaisen thei viau lai hi hmeichhiate kan makna a ni ve in ka hria. Mualpho huam leh mite sawisêl huamin kan mipa hmangaih tawh chu kan vuana, min hmangaih miahlo tu kan hmangaih avângin tam tak chuan sâwn an paia, mite lahin a hmeichhe rilru tur leh a mipa a hmangaih vâng tih hre hauh lovin kan sawiselin kan rêl luai luaia, sâwn pai mai mai tiin kan chirh theh zuia.

Mahse hei erawh hetiang ti tam tak hi an sawisêl leh rêl te dinhmuna lo ding ve tho an lo ni leh daih a. Naupai sa a pasal neiin an dinhmun anga rawn ding hmeichhia ṭha ber âwm ang hrimin an rêlin an nuih sawha, mahni nun hmu lêt lêk lovin a mipa in min neih mai avânga mualpho lo in hmangaihtu der an tawn avânga daipelhte kan han sawi chhe vak vak ṭhin hi chu kan mak ka ti ṭhin.

Mihring chu tihsual nei vek kan nia, famkim kan awm hauh lo. Mahni nun pawh hmu duh lo a midangte nun va hmuhsak lutuk te, thil tisual ngai lo ang maia thil tisualtute ânchhia kan lawh vak vak ṭhin te hi kei ṭha ka tilo, media hmang thiam lo vin engkim post tur emaw kan ti a, keimahni hnampui te ngei post mual pho in hnamdang in kan hnam ngei min rawn hmuh dik loh phaha, min rawn sawisêl haw leh em em si in mahni hnampui tih mualpho erawh kan sim chuang hlei lova.

“Duati i thinrim em ni?” ka ngawih reng avâng chuan mak a ti nge a rawn ṭawng chhuak leh ta nge nge a. “Timaw?” ti a ka en lai chuan ka biangah rawn khawih zauhin a nui saka, chutah thawk la ham hamin chunglam a melha, a chêt dân chu ka en reng thung.

“Ka hmangaih lo che ka tihna a ni hauh lo a nia, mahse i hria ang. Chawp leh chilhin hmangaihna hi a piang nghâl ngawt ngai lo, nangin min hmangaihna pawh kha a lem ka ti hauh lova. Mahsela duhna hi hmangaihna emaw kan ti fo a nia, chuvâng chuan ka lakah pawh fîmkhur la ka duh. I nun tichhe tu ka nihchuan ka inthiam thei ngai lovang, min hmangaih tak tak lo ka tihna a ni hauh lova; mahsela min hmangaihna avâng khân min ring bur lo turin ka duh che, mipa ka nih i hria. Insûm theih loh hun pawh ka nei ang, chutiang hunah chuan i mi hmangaihna kha min thunun tu ah ṭan tir turin ka duh che m” a thusawi awmzia chu ka hre thiam mai hauh lo.

“Enge a awmzia, ka hmangaih che chu i duh lo tihna em ni?” ka tihchuan a lu a thing nar nara “Nilo e, min hmangaih avângin min ring lutuk suh ka tihna ania, ka ngaihtuahna pawh a sual ve theia. Min hmangaih avânga i nat ka duh lo, i rilru tihnat lutuk ka duh loh vâng zâwk mai ani, mipa ka ni a. I rin ang reng leh mi fel tak anga min hmuh  ang hi ka ni reng thei dâwn lo, chutiang hunah chuan i mi hmangaihna khân min thunun turin ka duh che” a mah chu ka ena.

“Ka rinawm dâwn lo i tihna em ni?” ka chalah chuan a rawn tauh data “Mi â nu, thil hrethiam theilo lutuk, ka rinawm dâwn lo ka tilo va, mahsela i rin ang mizia lo pawh ka nei dâwn a, chutiang huna i nat lutuk loh nân ka hrilh mai che. Mahsela min hmangaihna kha danglam ngai turin ka duh lo tih hria ang che” tiin a nui zui haka.

Ka chal a tauhna lah a vûng sa nen a zâwng raih raih mai. “I chhiat vek nân min hnaih lo la; mahsela ka ṭhatna tur in min hmangaih ang che. Nangmah ka hmangaih theih nân che chu chu hre reng ang che, i lakah ka lo nelawm loh viau anih pawhin min kalsan mai lovin i hmangaihna khân min vuan la, ka insûm theih loh changa min thunun thei tu ni turin ka duh che” tiin a phun sapa.

A thusawi chu ka hrechiang ta viau, ka hmangaih avângin alakah engkim ka phal dâwn tih a hria a. Ka hmangaihna remchanga hman a duh lo tih leh, ka hmangaih avângin a duh ang anga awm turin min duh lo tih ka hre thiam ta chiah. Amah hmangaih tura min duh rualin kei min hmangaih lêt theih nân a laka che turin min duh bawk tih ka hre ta chiah.

A thusawi dân kha a dangdai lutuka kei atân chuan hriatthiam mai chi pawh a nilo rêng a ni.

“Aw le, ka kalsan ngai miah lovang che. Ka lakah i lâwm lo emaw i lakah ka lungawi lo a nih pawhin hmangaihna nên ka dawh ang che, chutiang chiah chuan nang pawhin min hmangaih lêt ve i tum ka beisei. Tûnah chuan i hmangaih hmasa ber chu i tân theihnghilh a harsa dâwn tih ka hria; mahsela ka nghâk ang che” tiin ka nuih ta var vara.

Ni e a nuna mi thar kei hian, engtikah mah a hmangaih hmasa ber nihna kha ka chang thei ngai dâwn lo tih pawh ka hria. A nunah a hmasa ber ni turin ka tlai tawh a, a hmangaih hmasa ber nihna ang kha keimah ah a hmu dâwn lo, hmuh tir pawh ka tum hek lo. Engtikah mah a hmangaih hmasa ber chu ka tluk ngai dâwn lo, mahsela a hmangaih hnuhnung ber leh a hriatreng tur, kha a mah duhloa kalsantu aia ka ṭhatna leh ka hmangaih zâwk zia tihlan erawh ka tum tlat dâwn.

Engtikah mah a hmangaih hmasa ber an kha ka tum ngai dâwn lova, ka nihna ang anga min hmangaih tur erawh chuan ka bei thung ang. A nunah ka lang har tih ka hria a, keiai Lalna lo chang hmasa tawh tu chu ka tluk kher tawh lovang. Ngaihtuah châng a nei dâwn; kei erawh chuan ka danglam zia leh a ni ang mizia neih tum kher lova keima nihna nên ngeia in hmangaih tir ka tum dawn a ni.

“Ka hre reng a ni hauh lo ania, i rilru tihnat pawh ka duh lo. Ka tân i awm tawha, ka nunah hmeichhe dang an awm ngai tawh lova, i rawn lan a chinah khân ngaihzâwng ka ngaihven leh chiah a ni. I dangdaia, i lakah thup a awm ve hek lo. Min duhna i thup miah lo te kha a tîrah chuan mak ka tia; mahsela i mize langtlang leh nangmaha thup awm ve lo khân min hip nghal êm avângin ka ngaihven ta chauh che a nih kha” a tihchuan ka bu nghata.

“Min hmangaih theilo a nih chuan min hrilh tawp la ka inthiar fihlim ang” tiin ka phun leh sapa, dik tak chuan a hmangaih hmasa ber ni thei ila ka ti lutuk. Mahsela khuanu in a hmangaih hmasa ber ni turin min ruat miau silo a.

Ka kûn reng chu min kuai dakin “Shh.. tikhan hnual nghal ngawt lo la, ka tân i hlu lutuk tih in hre tawp rawh. Hmeichhe dang an awm tawh lovang ka tih tawh kha, ka tân a awm chhun i ni tawh ang. Tinge ka thusawi mai avânga i in tih lungngaih ni, min chânin min hloh ngai lovang” tiin ka biangah chuan a chûl hliau hliau a.

Engmah ka la sawi chuang lo “Tinge i thinrim em ni?” a rawn ti leh supa, “Ka chau mu ang” tiin lehlam ka hawi daiha. Dik tak chuan ka lâwm lo em em pawh a ni lo; mahse a hmangaih hmasa ber a theihnghilh theilo tih ka hriatna hian min tina ve lo theilo.

Ka thik rual nilo mahse a hmangaih nih ve ka châk mai chauh zawk a ni. Ka hnunglam aṭanga min rawn kuahin ka tukkhum zâwnah a thaw ham hama, ka ngawi kar ringawt “Ka tihpalh, i natna tur chu min zâwt lo la ka duh a sin” a tihchuan ka thaw haka, ka la ngawi tlat tho.

“Duati” alamah min kuai her a, ka en kar ringawt “Tinge ka nunhlui avânga i nat? Ka nunhluiah ka chêng tawh lova; nang ka tawn hma che a ni tih hre reng rawh, nunhlui hriatreng ka duh lova. Ka kalsan thil avângin min hlat i tum a nihchuan i duhthlanna a ni, keichuan ka ti lui thei hauh lo che” a tih leh tâkah chuan ka hmui ka pet zauha.

“Ka thinrim hleinem, ka thik mai mai alawm. Ka mipa hmangaih ber thinlung a nei thei bîk a nia, a vânnei êm a sin. Keichuan engtikah mah ka nei ve thei lo hial mai theia, a ni erawh chuan ka awm hma zawng zawng nên a nei veka, i ngaihsak tur zia pawh ka hria. Amah hmangaihtu a chân duh chu hmeichhe mâwl tak ani ngei ang, muttui aw” ka thusawi zawh rual chuan min kuai dâk sauhin ka hmuiah chuan a rawn fâwp a.

Chhân lêt emaw pawh ka tum chuang lo, ka kâwngah rawn hmer salh rualin ka chungah an bawk rana. “Enge tih i tum? Chhuk rawh, ka mu duh” tiin namsawn ka tum a, a theih ṭhak loh lehnghâl. Enge a hriat ni? Nge ka lungawi lo min thlêm a tum dân nge ni dâwn ni.

“I thinrimna a reh hma loh chu heti hian kan awm ang, a ṭul leh ka ru haw hmiah mai ang che” a tihchuan phâwk zetin ka ena, tûnah khân min rûk a tum tihna em ni? “Ka duh bawk lo, tikhan awm rawh. Min ru miah lovang” a rawn nui nghal hawk hawka, ka sîrah chuan let thla lehin a kuta innem kâng chung chuan min ena.

“Ka ru duh mai thei che a ni. I lungawi lo hian mipa dang i melh daih ang tihte ka hlaua, chuvâng chuan dan khat a inneih nghâk thleng lo hian ka ru daih ang che. Mipa dang i melh tih ka hriat rual rualin ka ru nghal ang che” a tihchuan ka tûm hmuka.

“Ka duh bawk lo, inruk ai chuan pasal ka neilo mai ang. Bâkah tûnah inneih pawh ka la duh lo, hna ka thawk ve dâwn chauha, min rûk chuan ka chhûngte an thinrim dâwn lutuk” ti a ka ṭawng mawlh mawlh lai chuan a kut chuan min rawn dang leh chata.

“Ka hria e, mahse mipa dang i melh ka phallo ka tih kha ka ti tak tak a nia, an lam hawi zâwnga nuih pawh phal a nilo. I biak vaih chuan ka lâwm lo viau ang” ala ti zuia, engvanga thikthu pe chhe nghal êm êm nge maw a nih le.

Keite chuan a hmeichhe biak lam pawh ka la ngaihven hauh silo va “Min biak miau chuan ka chhângin ka en ve bawk ang chu. A hrim hrimah nula kan nia rimte chu kan thiang a lawm, tlangvâl chhelo deuhte pawh an lo awm thei a” ka sawi zawh hma chuan ka zakah a rawn dêk vaka.

“Sawi pawh sawi suh, ka ta i nih hi. Tu tân mah ka phallo che. Ka tân awm reng la min phatsan ngai suh, keipawhin ka phatsan ngai lovang che” a rawn ti leh dap dapa, “I nat dâwn ai chuan ka nunhlui kha hrelo la ka duha, min zâwt miau si a. Hei erawh hmangaih mah ila a tello in ka awm thei tih hre reng rawh, nang i awm chhûng chuan a ni kha ka mamawh lo. Awm lo pawh nila ka mamawh chuang lovang, hmeichhe pakhat vâng mai maia indawm kûn turin min ngai deuh em ni?” a mitmeng fiah zeta min en chunga a tih chuan chhan mai dân tur ka hrelo.

“I in dawm kûn dâwn pawh ka tih loh kha, mu rawh min ti ve a, min be char char bawk si” a rawn nui nghal hak mai. “Aw le i sawi ngun emai i mut a chhuak bawk aniang, mitchhing la muhil nghal ang che. Chutilo chu ka be leh reng dawn che a nia, i thinrim tawh lo tih sawi phawt la” engah nge ka thinrim pawh chu a hlauh em em mai ni.

“Thinrim lo” ka tichu “I thinrim reng kha” a ti leh bawk si, huiham! Engtia tihchi nge maw ni “Ka thinrim ka tihin thinrim suh i tia, ka thinrim lo tih lahin i thinrim min ti bawk si. Engtia awm turin nge min duha?” ka tichu rawn nui vur vurin “Aw tihian i awm tawp ang” a la rawn ti zui.

“Mu ang, ninawm i ṭawng thei sâwt si tikhan awm mai mai rawh” tiin ka mit ka chhinsan ta daiha. Min biak lehna pawh ka chhâng duh tawhlo, a buaithlâk thei emai, hetiang reng chuan mut tih kan nei dâwn lo. Bâkah ka lungawi lo ve laklawh tawh bawk nen mut vat vat ka duh.

A ni pawh a ṭawng tawh biklo, min kuahin a ke chuan min khan rûn bawka. Ka tâl sawn duh bik lem lo, a pangtilum nghen hi nuam ka ti “Ka duh lutuk nu muttui le” rawn ti leh supin a thâwm chu a reh zui ta daiha.

A mit a chhing a nih ringa ka meng ru de de chu min lo la en rûn a nih chu! Ka la phu zawk zui, rawn nui hawk hawkin a âwmah chuan min kuah beta “Duhawm lutuk, i thinrim ve te pawh hi i duhawm vêl vek. Tihian awm reng la, ka tân awm reng la. Ti tau bûr bûr ṭhin mahla a pawilo, ka thlêm zel mai ang che” tiin ka hnungah chuan a beng thek theka.

Ka la lungawi chiah lo nângin a nunhlui a ni tawha hriat sak reng erawh ka duh biklo, engtikah emaw chuan a hmangaihna ka la hlawh chhuak ve mai thei a sin. Chutih hunah chuan khanu kha a theihnghilh tawh ngei tih chiang taka ka hriat chuan hlim takin ka awm ve thei tawh mahna.

“I nunhluiah kîr tawh lo la, keimah nên hmalam hun suangtuah tawh la ka duh. Keichu ka thikthu a chhia a, ka ta ni a ka ngaih tawh chu ka hauhna ṭhin ania, i thinlungah keiai hmun lo chang hmasa tu chu khûm mai mai a harsa tawh dâwn tih pawh ka hria, mahsela kei ai a hmangaihna che leh a duhna bik tur che erawh ka hrelo, i la thlang fan a nih pawhin a pawilo, ka inthiar fihlim nghal ang” ka tihchuan min hmer na salha.

“Tin,keilo hmeichhe dang i hnaih dâwn ai chuan min hnaih lo law law la, ka duh êm che avânga min induhkhum dâwn a nih chuan min hnar ngam rawh. Keichuan mipa, hmeichhe ṭhian nei tih vêl ngaihzâwn te hi ka duh ve lo, ṭhian hming pu siin an ngaihzâwng te nen an kar ah an inrawlha, mi induh tawn tak pawh ṭhian sual chuan an ṭhen hrang ṭhin. I ṭhian hmeichhia te avânga kan buai fo angai anga, ṭhian tih hming chhâla lâk hran che an tum thei. Ṭhian ti reng si a an ṭhian mipa ngaizawng em em ka hre ṭeuh, ṭhian an nih miau avângin an ringaz an inkâr a chhiat phah ṭhin. Keimah chiah hi hmeichhia anga i en nih ka duh, i nunah hmeichhe dang awm suh se” tiin ka sawi dap dapa.

Ka ti tak tak bawk, keichu hetiang lam hi ka ti ve theilo. Mipa leh hmeichhia hi rei tak ṭhian a nih theih ka ring lo, pakhat zâwk zâwkin feelings an neih tawh chinah chuan an ngaihzâwng te nên an inkârah khi a awm nghal ngei ngeia, hmeichhia phei chu kan nunrawngin kan ṭhiante ngaihzâwng duh loh leh pawh ṭhen mai kan hreh silo.

Keichuan hmeichhe ṭhian nei miahlo ka duha, englai pawha min ngaihsaka min dawhthei mi ka duh bawk. Ka thikthu a chhia a, hmeichhe ṭhian a kâwm a nih chuan ka thik dâwn tih ka hailo, tûn angah an ṭhian hmeichhia in an bialnute va bia a, an mahni vânga buai ka hre tam bawk nen keichuan ka ngaihzâwng atân chuan hmeichhe ṭhian nei lo ngei ni sela ka duh.

A ṭhian a lâwm ka nih. Ti ve ṭhin bawk mahse an ṭhiante ngaihzâwng ah an in rawlh thui leh em em tho si, duhpui loh mai avânga inṭhen tir phêt tum lah bo lo. 

“Ka neilo tih i hriat kha, nang pawhin mipa ṭhian i nei bik tur a nilo, chu chu kan inkar thu thlung ni rawh se. Keichuan ka nei ngai bawk hek lovang, i tân ka tiam tawh a, ka rinawm turah ngai rawh” a rawn tileh dap dapa, ka ringhlel duh lo.

A hmeichhe kawm âwm ka la hmu miah lo miauva, “Aw le, i nunhlui chu i nunhlui a ni tawha. Kei nên hmalam hun thlir tawh rawh aw, ka phatsan ve ngai hauh lovang che” tiin ka nuih ta var vara, dik tak chuan alakah hian ka thinrim rei theilo a ni ber mai.

Ka duh êm avâng te pawh hi a niang chân ka hlau hluah hluah, rei meng tawh lo chuan kan muhil zui ta thuaia.

A pangtilum nghêng a mut chu a nuam ngei mai ka mutui viau mai lehnghâl. 

Zîngah chuan midang thawh hma in a haw a, a artui rawn ken chu hem a hip leh turin min chah thlap lehnghâl. Min ngaihtuah vâng tih ka hria a, ka hnial duh lo, bâkah a tui ka ti bawk nen ei tur neih phawt chuan ei reng mah ila pawi ka ti lo chiang khawp mai.

In vai liamin keipawh mu nawn tawh lêm lo chuan rawng ka bawl zui ta thuaia, zân lam ai ngawt chuan ka awm pawh a nuam viau e, ka chal erawh chu a langsar êm a, nuih loh tum pawhin a har mah chu a ni e.

A vûng erawh chu a reh tawh viau thunga, engtikah tak reh fel ang maw? Ka mut lah chu a la chhuak phian lehnghâla, mut nawn ka châk ngei mai.