DUHLAI ZORINPUIA CHAPTER 7

DUHLAI ZORINPUIA

CHAPTER 7

“Thingpui in in tawh em?” tiin ka va zâwt a, chêt zui mai ka tum chu u Rinpuia zâwk chuan min lo dang vata, a ngaihna hrelo taka ka en lai chuan chair chu pawt chhuakin min ṭhut tir zuia “Lo awm mai mai rawh, nizânah khân ka sawi chiang viauin ka hria, i ke kha i tihnat belh duh loh chuan lo awm mai mai rawh, enge i rawn vah ve de de renga” a ti zui kher chu ka ner khum nâng a.

Sâwma te ho lah an lo nui vak vak zui bawk nên lâwm lo zet chuan ka en hlawma, ka ngaihtuah vâng a ni reng sia. “Ni e kan in duhlo, in pa in chêt a phalloh kha awm mai mai rawh, hei kan khêl zo anga kan haw ang” an rawn tihchuan mak ti deuh tak chuan ka ena “Hetah chaw in ei dawn lo em ni? Ei ve ula” ka ti chu an lu an rawn thing nak nak mai.

“Ina kan ei loh chuan kan chhûngten min hau ang tih a hlauhawm, kan chhûngte hi puak thei thil vek an nia kan va haw zâwk ange” tiin an tho chhuak zui phak phaka, u Rinpuia erawh chuan engmah a sawi ve lo a, nizâna a thusawi kha a ti tak tak te pawh aniang.

“Ei ve ula in be mai dawn a lawm” ka lo ti leh chu an ban rawn phar hluaiin an nui pût pût a, enge an ngaihtuah leh pek dâwn ni. An mitte chu min la sân euh euh leh ta nghala, reuh hlawm chuan a.

“In pa nên khân lo ei rawh u, kha chaw chhum a siam vek tawha min chhum kep lo tih hriat reng, nupa tuak thar te chu chance kan pe ve ang che u. Kan lui kal tur lah kha nangmah avângin kan ṭhulh angaih hmêl, i ke kha tihdam vat tum phawt la, chaw ei tui u” tiin an au chhuak zui lâng lâng a.

An aw hi a zângkhai ṭhin bawk nen an bula awm hi a nuam ka ti ṭhin, mipa mah nise kawm an nuama. A lehlam takah chuan hmeichhia ai nêl châng ka ngah, mipa hi chu sawisêl hi an nei ve lêm loa, han in kawm pawh hian tumah sawisêl lêm lo hian an ngawi maia, kan thlavang hauh a hunah erawh chuan kan ṭangkai puiin kan thlamuan pui leh hle thung si, hau ve pawh ni ila haw lo in an ngawi maia, hmeichhia ai hi chuan ṭhian nihna ah hi chuan tam takah kawm an nuam ka ti zâwk ṭhin.

U Rinpuia che turh turh chu en in ka nui saka “I nute'n an phal em ni? Tinge ila awma? Ka lo in bâwl mai dawn a lawm” tiin a bulah chuan ṭhut tumin ka bai phei auh auha, ka ke chu kan tuam lûk bawk nên rah a nuam chiahlo. Bâkah tihnat belh ka hlauh avângin ka rap na ngam lo a ni ber mai.

“Lo vâk ve de de reng suh ka tihkha i intina leh ang, lo ṭhu mai mai rawh. Buaipui ngai renga i awm chuan ka hawsan ang che, ka nute chu ka be tawh, an ni chu inah an la che thei ang. I ke dam hma chu keimahin ka awmpui ang che” a tihchuan chhâng mai lo hian ka ngawi rana, antui tur chhum tumin a buai zui leh mawlh mawlh chu ka en renga.

A thutak in a timai mai lo tih pawh ka hria a, chutia buaipui ngaia ka awm chu ka inthlahrung viau bawk nên ka awm a nuam thei meuhlo. Ka ke na kher kher chu ka ngei hle bawka, chutih rual erawhin u Rinpuia min ngaihsakna leh inpekna chuan min ti lâwm viau thung.

“Engmah tiloa awm mai mai kha ka duh bik lo a lawm, a nuam lo ve a. Mipa i ni lehnghâl, rawngbawl kha i inhmeh chiah lo” ka ti sapa, chhêm thei chuan mei chu chhemin alu chu a vêl pah mawlh mawlha. Ka thusawi chu engah vak a ngai lo tih hriat tak hian a awmdân a danglam phah eihlo.

“Mipa ka nih avângin rawng ka bâwl lohna chhan tur a awm hleinem, in puih tawn hi a ngai rêng a sin. Nangmah kha in ngaihtuah hmasa phawt rawh, i dam loh rei chuan lui kal i châk êm kha” a tihchuan ka nui sak mai.

Min ngaihtuah ve tak tak niin ka hria a, keimahah a tla na leh riau tawh mai. Chutih lai chuan ka phone rawn riin ka en rual chuan ka nu a ni tih ka hria a, u Rinpuia chu melh zawkin phone chu ka chhâng zuia.

“Aw nu” ka tihrual chuan ka nu chu lehlam aṭang chuan a rawn au zui lâng lâng a “Bawihi i ṭha em? Min va rawn be khât ve, khalam kha nuam i ti viau a nimaw?” a rawn ti mawlh mawlha, ka nuih ringawt. A hma kha chuan khawiah pawh kal chhuak ila ka be sek ṭhin a, heta ka awm hnu hian ka be khât êm a an ngaihdan chu âwm ka tih pui viau mai.

“Nia ka buai ve thei lutuka, bâkah min rawn biak in tum bik loh kha aw” ka ti nâng nâng chu ka pa zâwk chuan min rawn au lung lung mai, phone aṭanga ka nu in a vin hlak hlak chu ka hre zuia. Ka nu leh pa hi chu nupa in hmangaih tak an ni a, keini an fate pawh hian kan hmu chiangin ka nu leh pa hi chu fa enkawlna lamah chuan ka fak hle bawk.

Chhûngkaw hlimna hi fate kan enkawl dânah chauh nilo hian nu leh pa kan inhmangaihna ah hian a in nghat ve in ka hria a, nu leh pa in hmangaih tak kâra seilian naupangte pawh hian kan nu leh pa te hi kan thlir ber an ni a, nu leh pa inhmangaih tak hnuaia awm chu a hlimawm zuala, chhûngkaw nun pawh a nuam ṭhin. Keipawh hian ka pa ang maia hmangaihna ngah mipa hi tawn ve ka tuma, nupa kan nih hnu thlenga min hmangaiha khawvêla hmeichhe mawi ber hmuha min hmu tlat reng tur mi hi hmuh ka duh bawk.

Chutiang mi ka tawng thei a nih ngai chuan ka chhuah hauh lovang, “Nu, helamah te lo zin ve ula, keipawh ka feh ve a i sawi ang tak takin a nuam a nia aw. Ṭhian thar ka neia, an fel hlawm lutuk” ka tihchuan ka nu pawh in a lâwm thu a rawn sawi ve a, heta ka kal dawn kha min ngaihtuah viau kha a nia.

“A ṭhat nasat chu, ṭhian siam i harsat si a, i pa nen kan lo ngaihtuah lutuk che a, chutia ṭhian i neih chuan a ṭhat hlauh chu, nakinah remchângah kan la rawn zin dâwn a nia, nang hi bialpa te hi i nei a nilo maw? I tlei riaua ka ringhlel tlat, bialpa te ilo nei riau riau ange” a rawn tihchuan ka nui ringawta, u Rinpuia che mawlh mawlh chu ka melh zawka.

A ni erawh chuan min en lo hian alu chu belah chuan a thlâk a, a che reng reng aṭang chuan rawngbâwl ṭhang tak a ni tih a hriat, a zei thlarha. A hmêl a tak ran bawk “Bialpa ka neilo, neih tur pawh ka hmu lo” ka tihlai chuan tap lama che mawlh mawlh pa chu a rawn hawia, ka thusawi avâng nge a mit a chuar nung mai. 

A hmêlah chuan a lâwm chiah lo tih a hriat theih, ni e tûnah rih chuan ka sawi ang tak takin bialpa ka neiloa, tumah vên thawn tur ka nei hek lo, u Rinpuia nên pawh kan kârah eng thu thlunna mah a la awm lova, chuvanga bialpa neilo ka ni ti pawh ka ni bawk.

“A ṭhat nasat chu, helamah pasal chu neila kan duha, khalamah chuan retheih bâk in hmachhawn dâwn lo, chuvang chuan khalamah ngaihzâwng nei reng reng suh ang che. Hmeichhe tân chuan min châwm thei tu tur neih hi a ṭha ber, i hna avâng pawh khân ngaihzâwn tum che an tam dawn tih hria la, tûnlaiah nupuite ringa nupui te in châwm tir tum mipa an tam tawh lutuk, hmeichhe hna neilo iai tlat mipa te an awm tawha, nupuite châwm tum lo nupuite hna neilo iai tlat an awm tawh avângin i fimkhur dâwn ania” a rawn ti zuia.

Ka nu hi chuan min ngaihtuah ṭhin, a lehlamah erawh chuan a ngaihdân chu a dikna leh dik lohna a awm ve tho, keichuan tûna ka mipa duh hi chu ka ring tâwk a, la in ngaizawng hauh lo mah ila nupuite inchawm tir chi leh ka hna avânga min hnaih a nilo tih ka chiang. 

Ka hna avâng chauha min hnaih nise min be kur nguai tawh anga, min bem thluk theih hma chu min be peih in ka ring. Mahsela u Rinpuia mizia hi ka hre chianga, nupuite thawh chhuah ring chi a nilo tih pawh ka hria, a mah a zia a dam ruih angin a rinawma, a ṭawng tam loh ang chiahin a thusawi chhunah dâwt a tel ngailova, a nghet charh ṭhin, ka mipa zia duh ang zawng zawng chu amahah hian a kima.

Ze danglam hlek chu an tam lutuk, mahsela kan ze duhzâwng tak mi erawh tlêm te an ni thung. An zia kan duh êm avânga kan ngainat te, an hmêl leh neih a vanga hmangaih mai theih te pawh an awma, sum leh pai a awm chuan tûn angah chuan nupui pasal zawn a har lo.

Mahsela kei erawh ka ngaihdân a hrang hlawk thung, thawnthua mipa te ang hi ka zawnga. Ze nghet tlut, hausakna aia hmangaihna thlang mi, hmelṭhatna aia nungchang mawi duh mi, rinawm tak leh a thu sût mai mai ngai lo tur mi ka duh a, chutiang chu tawn ngei ka tum bawk, famkim turin ka ti bik lova, mahsela rinawm sela ka duh ber a ni.

Hma hun kan hrelo va, a hausakna leh retheih lamah ka buai ve vak dâwn lo. Keichuan ka damchhung a ka hlimpui theih tur, ka mangan leh tlakchhiat ber lai pawha min thlah thlam lo tur mi a ni em tihah ka rilru ka sêng zâwk ṭhin, dinhmun chu ṭhat hun leh chhiat hun awm a ni a, englai pawhin dinhmun a ṭha reng lova, a chhe reng heklo. Nupa kan pawimawhna a ni bawk, keichuan hmangaihna dik ka duh, reilote nilo damchhung piah lam thleng daih tur hmangaihna a ni ka duh ni.

Phone kan dah hnuah chuan ka ngawi deuh vang vanga “I nu chu hausak a va châk awm ve” rawn ti khauh tu chu ka melh zawka, min lo en reng avâng chuan hawisawn lehin “Chak vak bik nâng kan hma hun a ngaihtuah vâng a lawm” ka tihchuan a nui suka, antui chu a chawk rak rak bawk.

“Hmangaihna nilo vin hausakna i en dawn tihna em ni?” a rawn ti khauha, chu a thu rawn sawi chuan min ti meng kâwk lo theilo, engtin nge chutiang mi ah min ngaih mai theih.

“Dawn lo, chutiang pawh ka sawi loh kha, keichuan hmangaihna ka duh. A hausa emaw a rethei emaw min hmangaihtu a nih phawt chuan a dinhmun ka en ve ngai lovang, min hmangaih a nih chuan rethei leh hrehawm taka ka awm a phal dâwn lova, a theih ang tâwka min enkawltu leh duattu thlazâr hnuai ai bâka thlakhlelhawm a awm chuang lo, sum leh pai te chu reilote chhûng pawha chhe vek thei a nia, hmangaihna erawh in kumkhua a daih thung” ka ti sapa, engvanga chu thu chu sawi nge ka nih pawh ka hre chuang lo, mahse ka rilruah a rawn lang tlat miaua.

U Rinpuia chu a rawn nui saka, a nui mawi leh pek hle tawha, ka thusawi chu a lâwm hle a nih pawh ka ring.

“I sawi dik e, anih leh hmangaihtu nge i thlan ang i hmangaih?” a rawn ti leh khauha, min ti bangbo leh hle tawh. Chutiang min sawi pui turah ka lo ngai lova, a hmêl ka en lah chuan a thutak leh hle tawh.

“Ka hrelo, hmangaihtu chu an hlu a, mahse kan hmangaihte pawh an nêp chuang lo. Min hmangaihtu zawng zawng hi kan hmangaih lêt ve thei miau siloa, hmangaihna chu neih kawp ila chuan awlsam takin ka thlang thei mai ang” tiin amah chu ka en leha, a hmêl nung sar reng chu hmuh a nuam takzet.

“A nih chuan hmangaihtu leh i hmangaih dinhmun nihna chu ka lo hauh ang chu, i duh phawt chuan bumna tel hauh lovin chu hmangaihtu nihna leh hmangaih nihna chu i hauh thei ang” a aw chu a nghet charh a, fiamthu reng reng a lang lo bawk, a thil tih lai chawlhsanin ka kiangah a rawn ṭhu a, ka mut chu hûm vang vangin “I duhthlanna a ni, keichuan ka bem ve chiam dâwn lo che, thilpêk hmanga thlêm ve vak che pawh ka tum lo, i thinlung min pe la, hmangaihtu nihna ka hmuh tir ang che, bumna leh dâwt tel hauh lovin” a ti sapa, a thusawi chhûng zawng chuan hmun dang a melh heklo.

Kan vela thâwm dang chu a reha, u Rinpuia thusawi erawh chuan ka beng an luah renga, ka lungphu a rang hle bawk. Tûnah hian hmangaihna vâng nge, duhna vâng mai mai ni zâwk ang, ka lungphu hi a pângngai hauh loa, chhûngril lam aṭanga rawn tur ut ut tu pawh hi engvang zâwk chu nge ni ang tih ka ngaihtuaha, hei erawh ka hria, a hmangaih niha hmangaihtu dinhmun chu hmuha neih ka duh a ni.

“Min chhâng dâwn em?” a rawn tileha, ka in ngaihtuah rauh rauh mai. “Intiamna i neih hmasak phawt loh chuan eng inzawmna mah siampui che ka duhlo” ka tihchuan min rawn en vuta, a hmêlah chuan zawhna a lang bawk nên ka nuihsaka.

“Hmeichhe dang an awm tur a nilo, Rohlui kha chiang takin i hrilh bawk tur a ni, tin, i nunhluiah eng chiah nge i tawn ka hrelova, hmeichhia i rin loh phahna leh enga tân maha i ngaih loh chhan an awm tih ka hria, chu thil chu paih bo turin ka duh che, i nunhluia i tawn tawh hmeichhia nên khân min tehkhin ngai lo la ka duh bawk, a ni chu i hun kal tawh a mi a ni a, kei erawh i tûn hun leh hma lam hun a mi pawh ka ni thei, keimah ka nihna ang ngei hian i nunah luh ka duh, midang sûlhnu tel miahlo in. A ni kha hre reng lo bawk la ka duh, keichu ka thikthu a chhe dâwn a nia” ka ti ta tawla.

Ka ngaihdan dik tak a ni bawk, bul ṭan hma hian engkim sawi fel vek ka duha, kan mizia leh kan duhzâwng te in hre hmasa phawt ila, kan mizia leh nungchang te in hre sa chunga kan in ngaizawng a nih chuan hriatthiamna a tel dâwn a, in hre chiang hmasa lova awm ka duh lo a ni ber mai

“Min ring rawh i hnu leh hi chu hmeichhe dang an awm tawh lovang, an awm leh dâwn a nih chuan nang chu ka theihnghilh tawh che tihna a ni ang. Tin, Rohlui lakah chuan hlauthâwng suh, a insawi theihna tur in eng thu mah ka thlun pui hek lo, a zia i hre tawh hialin ka ringa. Chuti nilo se khatiang khân i sawi dawn lo tih pawh ka hria, ka tum loh deuhin mi hian in ngaizawng angah min ngai a, mahsela tu hmeichhia mah hi thutak a han biak ka neilo, nang hi a hmasa ber ini” a rawn ti sapa.

A thusawi chu ka ringhlel lêm lo, a aw te a mitmeng leh a chêtzia aṭang hian mi rintlâk tak a ni dâwn tih pawh ka hria a, thu zuk leh mai ṭhin a nih ka ring lo ve tawp bawk. Min tina a, min kalsan a duh a nih chuan chu erawh ka dang ngai lovang, a duhthlanna a nihna angin atâna ṭha tur chu a hriat ka ring bawk.

“Nangmah te hian min iai zâwk ang tih a hlauhawm, thingtlângpa bulah hian i hlim tak tak ang maw?” a rawn ti leha, a kut chuan ka kut chu a hum rauh rauh bawk. A aw ah chuan chian lohna a lang bawk, ka nu nên a kan thusawi a hriat vâng te pawh kha a nih ka ringa, chutianga a mah a in dah hniam chu ka duh hauh lo bawk.

A lamah inherin a mitah tak chuan ka melha, “A pawi ka tilo, i hnathawhna avângin i kut hi durhin chhe vek mahse, thap hrep hrup pawh nise pawi ka tilo. Sawrkar hna i neih loh pawhin a pawilo, thlan tla zawih zawihin nitin nisa hnuaiah i thawk a nih pawhin ka zahpui ngai lovang che. I hnathawhna avângin i kut te hi chang hrep hrup mahsela a pawilo, ka ta i nih phawt a min hmangaih phawt chuan engmah dang ka mamawh lo, hêng te hi ka zahpui che i ring a maw? Ka ngaisang zâwk che, ka taimapa kut, ka thingtlângpa duh em em kut a ni tih ka hriat theihna tur a nih hi” tiin a kut thap hrup mai chu ka tawh sak zauha, ka thusawi avânga a hmêl êng sar chu ka hmu zuia.

“Ka zahpui ngai lovang che, kuthnathawktu kut chu a zahawm a sin, he kut hian thil tam tak a thawka.  Eirukna leh hlemhletna tel hauh lovin ama thawh rah liau liauin a chhûngte a châwm thei bawka. Chuti chung chuan ka zahpui anga maw? In chhuang zâwk tur i ni a sin, keichuan he thingtlângpa kut hi ka lak aṭanga a in la hrang ta te a nih loh chuan ka thlah ngai lovang, ka chelh tlat ang, kut dang vawn a duh te a nih loh chuan” ka ti a, ka nuih ver ver bawk,  ka sawi zawh rual chuan ka chalah a rawn fâwp vang vanga.

A thaw huai mai bawk “Puitling ve reuh lutuk, keipawhin he hmeichhe tereuhte ṭawng thei ve em em hi ka duh ber. Ka nunah beiseina meichher i rawn chhi thara, ti mit tawh hauh suh ang che, mei chu a thih loh nân vêng ṭha la, mahsela i tâna a pawi theihna tûra kan kai che a tum a nih erawh chuan i timit thei ang” a rawn ti dam dapa.

A thusawi chu ka man pha ve chiah lo, enge ka tâna a kâng kai theih na tur chu ni “Ka man chiah lo, ka kang i hlau tihna em ni?” tiin ka en ha a, a rawn nui nghal suka. Ka biangah chuan rawn piaiin ka chalah chuan a chalin a rawn si a, a thaw zui ham ham bawk. A chêt dân rêng rêng chu a muangin a cool raiha, a engkim hian min hneh ngawih ngawih ni ta ber hian ka hria.

“Ka meichher a thih loh nân i hmangaihna in min ti alh la,  mahsela ka tihnat che a, i rilru ka hliam dâwn leh i tâna pawi thei tura ka che a nih chuan chu meichher chu hlat vat turin ka duh che, ka nunah beidawnna ka lo tuar tawha. Khatiang kha a thlen ka hlauh lutuk na lamah, ka mei alhin a kan nat mai che ka hlaua, ka ta ni tura ka duh lutuk na lamah che i chungah nunrawng takin ka che palh thei tih thu ah ka hrilh mai che a nihchu, mahsela i duh lo chung erawh ka khawih ngai lovang che” tiin a in la hrang zuia.

A thusawi chu ka ngaihtuah rauh rauh mai, a bialnu hlui chuan engtiang chiaha na in nge a lo hliam tawh ang. Engtiang chiaha beidawng leh kehchhia in nge a lo siam ang tih ka hre pha lo, darthlalang keh tawh ka rem khâwm dâwn nge ni a, vur tlang ang maia sak thinlung zâwk ka hmachhawn dâwn ka hrelo, mahsela ka hnênah thu a tiama, ka hnaih theih nân chu thinlung khal chu a ti tui ve tûrah ka ngai.

Ka tâna thinlung thar hlak tur, a tân erawh a nuna a pahnihna tur ka ni a, chu thinlungah chuan awm hmun siam tumin ka lût anga, engtiang chiaha neih harsa nge a nih ang ka hrelo, mahsela chu thinlung chu neih ngei ka duh. Ka lan hma thila lo tina tu chu a hriat tawh loh nân a thinlung chu ka tân chauh siam ka duh bawk.

A rawngbawl chhunzawmtu chu ka en zui vang vanga, dâwt mai mai min fah dawn lo tih ka hria a, fiamthu mai maiin inzawmna min siampui dâwn lo tih pawh ka hria. Saw thinlung saw neih ka duh anihchuan ka beih nasat viau a ngai ang tih lah ka hai hek lo.

Hmangaih hmasa ber kan theihnghilh thei lova, kan nunah engkimah an bet tawha. Mi thar tawng pawh ni ila an engkimah kan hmangaih hmasa ber nên tehkhin loh theih an ni lova, chu chuan hriatrengna a thi tawh emaw kan tih kha rawn ti nung thar leh in, hmana kan ta lo ni ṭhin kan lo hmangaih em em ṭhin sûlhnu khân min rawn chên chilhin, chu chuan kan kawp mêkte nêna kan inkar a tichhe ve dawrh thei tih hre thu ka ni bawk.

Mahse hei erawh ka tum tlat thung, a nunah mi pawimawh ber. Atâna ṭha ber leh a mah hmangaih em em tu nih erawh ka tum tlat a ni.

“Ka lawm e aw, nang rawn awm lo la chuan tûn thlengin rawng pawh ka la bâwl thei awm silova, i nu leh pa in an hau lo ang che chu tiraw?” ka tihlai chuan a rawn nui haka.

“An monu tur ka awmpui ka tia, min hau ngam teuhlo. Nupui nei turin min nawr fo a, ka nupui tur ka bem mêk thu che ka hrilha, an hlim em em zâwk ang” nui chunga a rawn tihchuan ka lai ru viaua, za lo zetin ka ṭhen sak sak bawk.

A thusawi engkim hian min tidanglam ṭhin, a fiamthu thawh ka hmu ve ta te chuan min ti hlim viau bawk, a bul chhuatah chuan ṭhu thluang duaiin a che vêl chu ka en renga, ka mit a la viau hi a chhan ka hre biklo.

A ni aia mipa hmêlṭha leh chhelo tak tak te pawhin min lo bem ve fo va, mahsela tûmah ka ngaihsak ngai lova, han melh taih deuh pawh ka neilo. Bialpa nei ngai lo tawp chu ka ni bik lova, mahse ka bialpa neih lai pawh khân hetiang taka u Rinpuia ka vei leh ka duh ang hian tumah ka veiin ka duh ngai lo, ka tân chuan ka suangtuahna ang mai hian keimahah a ngheta, ka hlimpui ni berin ka hria, ka suangtuahna hlimawm lai zawng zawng kha a mahah a beta, chuvâng te pawh chu aniang ka hlat theih miah loh.

Ka tân chuan magnet ang mai a ni a, kei a hip beh thir ang mai hi ka ni thung. Kal hlat san ka tum poh leh a hma aia chak zâwkin min hip lêt a, ka tlân chhiat san theilo ani ber mai. Magnet ang maiin a engkim hian min hip bet a, khawi dangah mah ka tâl chhuak thei tawhin ka ringlo, ka thir hip thei hmuh tawh ah chuan zûn ngah leh duhthusam zân khawpa hmêlṭha a ni tlat.

“Tho la chaw ei ang hmiang” a rawn tih lai mêk chuan information Mike chu a rawn ri rût rût a, u Rinpuia nên chuan in be mai lovin kan ngaichâng leh riha. Tûn ang zîng kârah eng thu tak chu ni ang maw ti a ka ngaihtuah lai mêk chuan chhiat tawh thu an rawn puang zuia, u Rinpuia chu ka melh zawka, ani erawhin chaw ei siam pah chuan a ngaithla tih ka hre mai.

A che mawlh mawlh reng tho va, kal ve a duh ngeiin ka ring bawk. “Pu Lalduhzuala zîng ram kal Savawm nên an in tâwk palha, mipa ram kal thei chin te chawi ei kham veleh pu Lalduhzuala te lo lam pan tur a ni” ti an rawn au chuan ka chhûngte nilo mahsela thin a lo phu ve dawt dawta. 

Savawm in a seh hlum tih chiang takin a hriat bawk nên ka awm anuam vak lo, ramhnuai kal pawh a hlauhawm tawh dâwn riau hian ka hre lehnghâl. Helam phei chu sa an la tama, Sakei te hial pawh an awm ka ring, ngaw an la nei ṭha bawk nên u Rinpuia hlauthâwng taka ka en lai chuan a ni erawh a hmêl a pângngai renga, chi ai hmêl pawh a pu ve lo.

“A pawi e, Savawm ber kher a tawng chu ka ngaihtuah zâwng ringawt pawhin min rap tlat, a Savawm a chu a la awm a ngem le?” amah pawh be em em lo chuan ka ti ta hapa, Savawm mi beih thu hi phone aṭang chuan ka hre tama, mahsela a tak a hmuh erawh ka la nei lo thung, chuvâng te pawh chu a niang thinphu a mumal thei meuhlo.

Keilah mitthi in lamah pawh ka kal thei dâwn lo tih ka hria a, a lehlamah ka inthlahrung viau thung. Ka ke hi lo tina lo ila chuan nula ka nihna ang te pawhin ka chêt a maw a sin mawle.

“A awm tawh lovang, an hmuh tawh dânah a Savawm chu a tlânchhe tawh te pawh animahna, naktûkah chhui zui an ti ngei dawn a nih chu. Hlauthâwng lo la, tin, mitthi in lama kal kha lo tum rih lo la a ṭha, i ke kha enkawl hmasak phawt a ngai ka tih tawh kha. Chaw hi ei vat ila keipawh ka kal ngei a ngai dawna, che zung zung ang hmiang, chhûnah engmah lo ti hauh suh ang che” a ti zuia.

A awm loh chuan keimah ka chêt ngei a ngai ang tih erawh ka hre chiang viau thung, Savawm seh pa ringawt chu ka rilruah a awm a. A zîng feh tih a hriat renga, a chhûngte engtin tak awm ang maw? An hrilh hai ve viau in ka ring.

Chaw chu kan ei zung zunga, thlêng erawh ka lo sil ve theih mai ka rin avâng chuan u Rinpuia chu haw turin ka ti zuia “Lo vâk chhuak suh ka tih kha aw, nula an tam thoa, i ke na chunga i lo va tel ve khân midang i tibuai mai mai dawn a nia. Ka kal phawt ange, tlai ah ei rawngbâwl chu min lo nghâk mai dawn ania” tiin a che zui sawk sawka 

“Fimkhur rawh aw, tawhsual tawh palh ve theih ania nangmahin kal hrang miah suh” tiin ka au zui ve tak nang in min chhâng tawh lêm lo, a kal liam chu ka thlir zui vung vunga.

Ngaih chu a ṭha chiah lo, Pasalṭha thawnthu ka ngaihthlâk aṭang hian Savawm ho mâwl zia chu ka hre ve tawh bawk nên a lo la awm anga. Ruang zâwn tumtu te a lo bei leh mai ang tih a hlauhawm, a bîkin u Rinpuia mawlh ka ngaihtuaha, silai kenna châng a hre êm ang chu maw.

Rei pawh a nilo ka kawmchhak kawngah chuan mipa rual ṭawng phei nawk nawk a rawn ri zuia, an inzui duah diah chu ka sumhmun aṭang chuan ka lo thlir renga.

A ṭhen an nui dar dara, a ṭhen erawh an titi mûk viau thunga, u Rinpuia lah ka hmu mai lo lehnghâl. Sâwma te pawh hmuh tur an awm hek lo, an ni hi an la insiam zo lo nge ni dâwn ni.

“Hmingek tunge i zawn?” chu aw ri rawn chhuahna lam chu ka en zui vata, Sawma te ho chu ngaihtuah zawh rual chiah chuan an rawn lang leh hlawl mai. U Rinpuia pawh a rawn tel ve ta bawk nên tlêm chuan ka ngaihtuahna pawh a reh ve ta deuh, a ṭhiante an awm chuan an in vêng thei tur ah ka ngai..

“Tumah ka zawng lo, fimkhur rawh u aw” tiin ka lo au ve zuia, an ban an vai lauh lauh mai. U Rinpuia chuan an hmuh loh turin awmze nei tak hian min rawn nuiha, keipawhin ka nuih lêt lo theilo. Hmui phun chuan fimkhur tur bawk chuan ka chah leha, Savawm chu a mi thah bul aṭanga a awm hlat vak ka rin loh vâng a ni pakhat.

Midang an na ve a tih mawlh chu ka hlau a, keimaha ramhnuai kal tur phei chuan ka ngam ka ring tawh lo, u Rinpuian chêt a phallo bawn nên ṭhutthlengah chuan ka mu zâl mai maia, Mawii nên kan in be pah bawk. A ni erawh mitthi in lamah a awm tawha, thingpui an lum mêk thu a sawi chuan tlêm chuan ka inthlahrung ve deuha.

Nula ka ni ve a, he khaw chhûng a mite pawh hian min hre ve bawk nên chutia kal lo nihchu ka inthlahrung a, miin tlâwmngai lo min tih te pawh ka hlau ve bawk nên keimah chuan ka rilru a hah ve tet tet ringawt, ka ke lo na te chu ka ngei lek lek tawh.

Pâwn lama thâwm a âwm tâkah chuan ka ngawi kara, nutling rual ṭap ri te chu ka hriat hmaih lo. Awm hmunah ka lo ipik ve ṭûn a, an ṭap ri te chuan lung an ti zîng ve takzet. Mi ṭap ri hi ngaihthlâk hrehawm ka ti a, keimah a lungno chi ka nih vâng nge pawh ka hrelo, ka ṭah hi a lo chhuak ve ṭûn zela, mitthi ina ka kal hian ka mitttui a tla ve ziah lehnghâl.

Midang inhliam an awm lo a ni chêk anga, chu chuan min ti hahdam huai bawk. Tûmah rawn pêng kawi an awm lova, an ruang zâwn nên rawn pên a rem dâwn lo tih ka hriat avâng chuan keimah pawh dâk chhuak lêm lo in phone chu ka khawih leh malh malha, ka ṭhiannu chu chin ka hrilh mawlh mawlh bawk.

U Rinpuia nên kan inkar te chu ka hrilha, a rawn phûr nasa mai. A thlalak min dil nghal chûk chûk a, chu erawh ka la neih miau loh avângin pek ngaihna a awm lo, tûnah bul kan ṭan ve dawn chauh a ni sia.

Chhûn a rawn nih chuan rin loh lutukin ka khua a sik hlat hlata, ka taksa chu ana nghâl urh bawk nên ka ke na chuan min tur tel et et bawk a, damdawi la tur takngial pawhin ka tho peihlo, u Rinpuia biak duh viau mah ila thlân laihna lamah an la awm ka ring bawk si, keimah chuan ka na avâng in ka insût leh faih ṭhin.

Ka taksa chu ana em em bawk nên ṭah loh theih pawh a nilo, ka thâwk thlengin a sa a ka lu a na ut ut bawk. Ka phone rawn ri chu peih lo zet hian ka ena, u Rinpuia hming ka hmuh rual erawhin ka lâwm ngei mai.

Ka la vata, tûnah hian ka bulah awm thei se ka duh takzet. “Aw” ka ti sapa, ṭawng pawh ka ṭawng ring theilo, ka na chuan min tur ut ut tawh “I ṭha em? Hei kan châwl chiaha, i ke chu enge a an?” a rawn tihchuan ka insut leh hraiha, min ngaihsakna ri ka hriat chuan ka lung a tichhia a, tûnah chuan amah chauh belh tur ka neih a ni bawk nên ka bulah awm se ka duh takzet.

“Tinge, i enge na? Duati i khawilai nge na?” a rawn tihchuan “Ka taksa hi a na vek, ka khua a sik bawka. A hrehawm lutuk” ka ti leh sapa, ka ṭah chhuak lutuk erawh ka insûm thung, khawsik satliah chu nise ka ṭap bik hauh lovang, ka taksa zawng zawng hi chhûnglam aṭangin an rawn na nauh nauh ni ber hian ka hria a, chu chuan ka mittui a ti tla lo theilo, a hrehawm lutuk tlat.

“Aw le, ka lo phei vat dawn a nia aw. Midang ka be lawk anga, ka rawn haw vat dawn a nia” a tihchuan ka lo aw rang ngei mai. Pawh pên duh lo viau mah ila tûnah hi chuan keimahin engmah ka ti thei miau silo a, ka kiangah awm se ka duh. Ka nu lah tûnah ka hlat takah a awm bawk nên u Rinpuia tal ka bulah a awm chuan ka thlamuang deuh in ka ring bawk.

Ka taksa chu her rem deuhin mut ṭhat tum chuan ka insiam rema, chu ringawt pawh chu har tak a ni. Ka khûr beuh beuh renga, a hrehawm ka ti takzet, puan sin tur pawh ka la peihlo. Ka zâwngin ka na ṭhem ṭhum a ni ber mai, u Rinpuia chu a rawn thleng har ka ti takzeta, chutih rual erawhin midang buai em em laia a rawn haw ngai chu a inthiamlo ve dawn tih lah ka hai bik lova, ka nawr lutuk duh ta lo.

Ṭhutthlengah chuan in kuah khâwm ṭâtin ka mu kawm ngala, sana ri te chu ka bengah chuan an hla duk mai. Ka khûr lah chu a reh thei lova, chu chuan ka taksa chu a tina zual, ka mittui chu ka hru leh zeuh ṭhin.

Ṭah chu duh lo viau mah ila ka ṭap lo thei bawk silo, ka chhûngte awm ve se ka ti takzet, ka nu ka ngaihna a zuala, ka bulah awm se chuan heti taka ka tuar hi ka ring lo bawk. Nu leh pa bula thla a lo muan bik zia chu awm hran chiah hian ka hrechiang leh zualin ka hria.

Ka sumhmun lam aṭanga thâwm a rawn awm tâkah chuan hawi phei vatin u Rinpuia hmanhmawh taka a rawn lût chu ka hmu zuia, ṭhutthlenga ka lo mu min hmuh chuan min rawn hnaih nghal ruak mai.

Artui hi sarangah a rawn kenga, khawi a mi nge a lâk dâwn ni. Ka pang chu a rawn deka, a chek nghâl hluk mai bawka, kei erawh ka mit chhingin ka mu zawi ngiai renga, ka ṭawng ṭha peih meuhlo.

“Min rawn hrilh vat tur che a lawm, damdawi ei rawh aw” tiin min pawm kâng nawlha, ka room lam pana min pawm phei lai chuan a pangtilum chu ka lo nghêng hnai talh talh mai bawka. Ka vawt ti nên a taksa ka nghen tâkah chuan nuam ka ti in ka hahdam nghâl sawng sawng bawk.

Khumah chuan min mut tîrin puan chu min rawn sintîr zuia, “Tikhan lo awm lawk la, khawiah nge i damdawi vêl i dah?” dam dapa a rawn tihchuan min tih thlamuan zia a hre hauh lovang le, “Pawhdawhah sâwn a awm ang, ilo thleng har ka ti lutuka” ka ti sepa, puan chu ka sin ṭha sauh sauh bawk.

“Sawma te ho ka be kawi leha, kan YMA lam hotute nên, engmah sawi lova rawn haw kha ka duh silova, ka rei phah deuh a lâwm” tiin ka pawhdawh lam chu a pana, damdawi chu zawngin a kheh zui mawlh mawlh a. Thaw huaiin ka mu zang thala, ka mit ka chhing vang vang bawk.

Ka la khûr reng bawk nên a ruk tak chuan hrehawm ka ti a, u Rinpuia hmuha tuar zuau lutuk anga lan erawh ka duh bik hauh lova, min ngainêp lutuk ang tih ka hlau a ni ber mai. 

“Khale ei vat la, a chhâwk hunah che artui saw i hip leh dâwn a nia” tiin ka lu chu a rawn dawm kâng a, damdawi chu min barhin tui chu min tulh zuia, keipawh chuan ka lo ei ve mai bawka. Ka kâ chu a da duk mai hian ka hria a, a phak chuap mai bawk nên thil ei pawh a ti harsa zual.

Duat deuh hian ka lu ah rawn chulin min en vang vanga, kei erawh vawt ka la ti bawk nên ka hmui te chu a duk vek tawhin ka ring.

“I khawsik a lo va sâng hmanve, i bulah ka lo mu ang aw? Vawt i ti a nih kha” tiin ka puan chu rawn keuvin ka bulah chuan a rawn mu zuia, rang zet chuan ka kuah nghâl vat bawk. A taksa lum chu ka thlahlel a ni ber mai, a mal leh mal inkârah chuan ka ke chu ka rawlh lût a.

A âwmah chuan ka hmai ka nawr nak nak bawka, a pangtilum chu ka thlahlelin ka vâwt ti lutuk pawh a reh ta deuh bawka, ka hahdam sawng sawng mai.

“I nat chuan min lo hrilh vat zêl rawh aw, nangmah maia na i tawrh ka duh hauh lo ania. Ka rawn kal vat zel ang” a tihchuan ka thaw chhuak haka “Ka inthlahrunga, mi zîngah i awm bawk si a, lo tihbuai che kha ka duh lo a lawm, engmah tilo chu nila ka lo phone ang che a, mahse mitthi an awm bawk si a” ka ti niah niaha, kan ṭawng ring lo dûn viau mai.

“Inthlahrun angai lo, i na a nih chuan min rawn be zêl rawh, ka lakah in thlahrung tûrin ka duh hauh lo che, min mamawh a min ngai a nihchuan min lo be tawp zel la, i hlatah ka awm rei hauh lovang. Helaiah tumah chhûngkhat laina i neilo tih hre reng chung chuan nangmah chauha na i tawrh ka duh hleinem, i neih chhun ka ni riha, i bialpa ka ni bawk. Ka lakah thuruk emaw nei ngai suh, min mamawh hunah chuan i chhûngkua angah min ngai ang che” tiin ka chalah chuan a rawn fâwp vang vanga.

Min kuah nghet sauh sauhin a âwmah chuan ka hmai chu a kuah beta “Hre reng rawh, helaiah chuan i chhûngkua ka ni ang. I bialpa, i nu leh pa pawh ka nih kawp mai ang chu” tiin a nui ri suka, keipawh ka nui ve hak mai.

“Nangmaha na lo tawrh tum reng reng suh ang che, i nat apiangin min rawn bia la ka theih ang a rangin ka lo kal ṭhin ang” a tihchu hriat a nuam in ka hahdam pui sawng sawng mai.

Ni e hetah hian ka ṭhiante tih loh hi chu tumah chhûngkhat kan nei lova, hmelhriat ṭha pawh an awm heklo. Sâwma te ho lah pawh lutuk turin kan la inkâwm rei bawk silova, inthlahrunna chen ka neilo theilo.

“Khawia mi nge artui saw?” ka ti leh chu a nui pût pût mai “Ka nu ta ka ru a” tiin a lei a chhuah zuka, ka nuilo theilo. Tlangvâl puitling pui tawhin a nu artui han rûk tawp mai chu, ka nuih a ti za takzet.

“Min hau ange aw?” tiin ka nui ve hak haka “Hau lo ang, nakinah ka hrilh mai dawn a lawm. Ka pa in a hriat kha, khitah kan inah tlai chaw chu kan ei mai dawn a nia” a rawn ti a, ka huphurh nghal pang mai. 

A nu leh pa hi an theihai kan rûk aṭang kha chuan hmuh ka hreh lutuk tlat, ka inthlahrung vek bawk nên hmuh hi ka hreh lutuk tawh. Rûkrûk hmang lutuk angah min ngai ang tih pawh ka hlau bawk.

“A chiloh e, hetah ei mai ila. Bâkah chaw ei pawh ka châk lo” ka ti niah niaha, tûnah chuan thil ei lam pawh a lang lo, ka luak hi a chhuak hlui ringawt.

“Nilo e, i dam loh chhûng chu kan inah kan ei ang, heta che ringawt tur chuan a ṭha lo, mite pawhin an lo hmu mak thei che. Keimah chuan pawi ka ti hauh lova, mahsela nangmah ka ngaihtuah vâng che tih hre reng rawh” tiin ka hmui ro deuh chalah chuan a rawn fâwp zauha.

“Ka rimchhia ang” ka ti chu a nui leh ringawta “Rimchhe lo e, i rimtui lutuk. Englai pawhin i fresh sar renga, ka hmuh tirh aṭang che khân ka mit i la nghala, mak ti taka min lo en pawh kha ka hmu reng che a sin, ka âng phiaua i awm ka hmuh che khân duhawm ka ti lutuk che” a rawn tihchuan ka lei ka chhuah zauh mai, tûnah chuan na pawh ka hre leh tawhlo, ka bulah a awm a ka hlim em em ringawt.

A lai ve deuh nge maw ni a a hawisawn vuta, a hnar a tuai zauh chu ka hmu reng bawk.

“Muhil tawh rawh, min en reng lo la tlaiah kan inah kan chho dâwn a nia” a tihchuan engmah ka sawi tawh biklo, ka damdawi khân min rawn chhâwk ṭan te pawh aniang, a hma ang em em chuan ka taksa pawh a na tawh hauh lova, chu chuan min ti thaw huai bawk.

U Rinpuia kuah chial chung chuan ka mit ka chhing zui ta siar siara, ka mamawh hunah a awm reng thei hi amah min duh zual tirtu a ni a, buaina ka tawh rualin a rawn lang chat chat thei te hi amak ka ti zâwk.

“Ka mingmingte tho tawh rawh le” mipa aw ka hriat rual in peih lo zet hian ka meng chhuaka, eng hmingin nge min koh leh tak kha ni? Mingming min ti nimaiin ka hria.

“Engtin maw min koha? Khatiang hming a ṭhing lutuk” ka ti chu a rawn nui deuh ruh ruh lehnghâla, ka va han ngei mai mai tak.

“Mûnga” ka ti chu a ner nghal suk mai, duh loh hmêl lutuka min rawn en chu mit sân ak akin ka ena, ngeiawm min tih hmêl em em mai lehnghâla, “Tikhan ka ko zel tawh ang che” ti in ka ṭhu chhuaka, ka khawsik a reh tawh bawk nên ka zâng huaiin ka hria, chutih rual erawhin ka taksa erawh an la zâwng ṭhûm mai.

“Artui hi hip lawk rawh le.  Khawhar in pawh riahpui loin ka u a riak in ka ringa, ka ngaihtuah che sia. Keimah lo ngaihsaktu i neilo tih ka hria a, zanin pawh i bulah ka riah leh mai angai ang, hlauthâwng lo la inneih hma chuan ka khawih lovang che” a tihchuan alamah inherin ka kuaha, ka zak duh ṭit ṭet tawh lo, a chhan chu a thusawi ah a ding nghet dâwn tih ka hria. 

Hmeichhia in hmangaih kan neih tawh chuan kan ring bura, an tân engkim hlan kan huam ṭhin, miin an nihna an sawi kha kan pawm ve thei lova, a tâwpah kan nat phah châwk. Mahsela mipate ai hian hmangaihna ah kher kher hi chuan kan huaisen in kan luhlul ka ti ve tlat, duh kan neih tawh chuan engkim chân huamin kan vuan ngama. Nu leh pa tui thlar huamin kan chelha, mipa erawh chuan an thei ve hauh lo.

A artui min pêk chu tuk kehin ka hipa, ala lum thar thar dânah a hemna a la reilo a nih ka ring, “U Rinpui ka lawm e aw, ka bulah i awm reng avâng pawh hian ka lawm, ih hma i timai theia mahse keichuan ka hmangaih che ” ka ti ta tawla, ni e ka hmuh tirh aṭang khân hmangaihna keimahah chuan a piang daih tawha, zêp ka tum lêm lo bawk.

“Ka hria alawm, mahsela fimkhur la, duhna hi hmangaihna emaw kan ti fo a nia, chuvâng chuan ka lakah pawh fîmkhur la ka duh. I nun tichhe tu ka nihchuan ka inthiam thei ngai lovang, min hmangaih tak tak lo ka tihna a ni hauh lova; mahsela min hmangaihna avâng khân min ring bur lo turin ka duh che, mipa ka nih i hria. Insûm theih loh hun pawh ka nei ang, chutiang hunah chuan i mi hmangaihna kha min thunun tu ah ṭan tir turin ka duh che” a thusawi awmzia chu ka hre thiam mai hauh lo.

“Enge a awmzia, ka hmangaih che chu i duh lo tihna em ni?” ka tihchuan a lu a thing nar nara “Nilo e, min hmangaih avângin min ring lutuk suh ka tihna ania, ka ngaihtuahna pawh a sual ve theia. Min hmangaih avânga i nat ka duh lo, i rilru tihnat lutuk ka duh loh vâng zâwk mai ani, mipa ka ni a. I rin ang reng leh mi fel tak anga min hmuh  ang hi ka ni reng thei dâwn lo, chutiang hunah chuan min hmangaih miau avângin min dan i hreh ang, mahse kha min hmangaihna vêk kha kan pahnih hma hun ngaihtuaha min thunun tu ah ṭang rawh se” a rawn ti leha, ka en deuh ha mai, a thusawi chu ka ngaihtuah loh lam daih a ni, a sawi dik chiah bawka, keichuan a lakah ui ka nei dâwn hauhlo.

“Ka rinawm dâwn lo i tihna em ni?” ka chalah chuan a rawn tauh data “Mi â nu, thil hrethiam theilo lutuk, ka rinawm dâwn lo ka tilo va, mahsela i rin ang mizia lo pawh ka nei dâwn a, chutiang huna i nat lutuk loh nân ka hrilh mai che. Mahsela min hmangaihna kha danglam ngai turin ka duh lo tih hria ang che” tiin a nui zui haka.

Ka chal a tauhna lah chu a na phian lehnghala,  “I chhiat vek nân min hnaih lo la; mahsela ka ṭhatna tur in min hmangaih ang che. Nangmah ka hmangaih theih nân che chu chu hre reng ang che, i lakah ka lo nelawm loh viau anih pawhin min kalsan mai lovin i hmangaihna khân min vuan la, ka insûm theih loh changa min thunun thei tu ni turin ka duh che” tiin a phun sapa.

A thusawi chu ka hrechiang ta viau, ka hmangaih avângin alakah engkim ka phal dâwn tih a hria a. Ka hmangaihna remchanga hman a duh lo tih leh, ka hmangaih avângin a duh ang anga awm turin min duh lo tih ka hre thiam ta chiah. Amah hmangaih tura min duh rualin kei min hmangaih lêt theih nân a laka che turin min duh bawk tih ka hre ta chiah.

A thusawi dân kha a dangdai lutuka kei atân chuan hriatthiam mai chi pawh a nilo rêng a ni.

“Aw le, ka kalsan ngai miah lovang che. Ka lakah i lâwm lo emaw i lakah ka lungawi lo a nih pawhin hmangaihna nên ka dawh ang che, chutiang chiah chuan nang pawhin min hmangaih lêt ve i tum ka beisei. Tûnah chuan i hmangaih hmasa ber chu i tân theihnghilh a harsa dâwn tih ka hria; mahsela ka nghâk ang che” tiin ka nuih ta var vara.

Ni e a nuna mi thar kei hian, engtikah mah a hmangaih hmasa ber nihna kha ka chang thei ngai dâwn lo tih pawh ka hria. A nunah a hmasa ber ni turin ka tlai tawh a, a hmangaih hmasa ber nihna ang kha keimah ah a hmu dâwn lo, hmuh tir pawh ka tum hek lo. Engtikah mah a hmangaih hmasa ber chu ka tluk ngai dâwn lo, mahsela a hmangaih hnuhnung ber leh a hriatreng tur, kha a mah duhloa kalsantu aia ka ṭhatna leh ka hmangaih zâwk zia tihlan erawh ka tum tlat dâwn.

Engtikah mah a hmangaih hmasa ber an kha ka tum ngai dâwn lova, ka nihna ang anga min hmangaih tur erawh chuan ka bei thung ang. A nunah ka lang har tih ka hria a, keiai Lalna lo chang hmasa tawh tu chu ka tluk kher tawh lovang. Ngaihtuah châng a nei dâwn; kei erawh chuan ka danglam zia leh a ni ang mizia neih tum kher lova keima nihna nên ngeia in hmangaih tir ka tum dawn a ni.

“Ka hre reng a ni hauh lo ania, i rilru tihnat pawh ka duh lo. Ka tân i awm tawha, ka nunah hmeichhe dang an awm ngai tawh lova, i rawn lan a chinah khân ngaihzâwng ka ngaihven leh chiah a ni. I dangdaia, i lakah thup a awm ve hek lo. Min duhna i thup miah lo te kha a tîrah chuan mak ka tia; mahsela i mize langtlang leh nangmaha thup awm ve lo khân min hip nghal êm avângin ka ngaihven ta chauh che a nih kha” a tihchuan ka bu nghata.

“Min hmangaih theilo a nih chuan min hrilh tawp la ka inthiar fihlim ang” tiin ka phun leh sapa, dik tak chuan a hmangaih hmasa ber ni thei ila ka ti lutuk. Mahsela khuanu in a hmangaih hmasa ber ni turin min ruat miau silo a.

Ka kûn reng chu min kuai dakin “Shh.. tikhan hnual nghal ngawt lo la, ka tân i hlu lutuk tih in hre tawp rawh. Hmeichhe dang an awm tawh lovang ka tih tawh kha, ka tân a awm chhun i ni tawh ang. Tinge ka thusawi mai avânga i in tih lungngaih ni, min chânin min hloh ngai lovang, mu leh rawh a la hma deuh ” tiin ka biangah chuan a chûl hliau hliau a, a mitah chuan a thusawi chu a timai mai lo tih pawh ka hria, a tum ngei bawk ang, mipa rintlâk tak a ni miaua.

Engmah ka la sawi chuang lo “Tinge i thinrim em ni?” a rawn ti leh supa, “Thinrim lo, mu rawh itih kha ka mu dâwn a nih hi ” tiin lehlam ka hawi daiha. Dik tak chuan ka lâwm lo em em pawh a ni lo; mahse a hmangaih hmasa ber a theihnghilh theilo tih ka hriatna hian min tina ve lo theilo.

Ka thik rual nilo mahse a hmangaih nih ve ka châk mai chauh zawk a ni. Ka hnunglam aṭanga min rawn kuahin ka tukkhum zâwnah a thaw ham hama, ka ngawi kar ringawt “Ka tihpalh, i natna tur chu min zâwt lo la ka duh a sin” a tihchuan ka thaw haka, ka la ngawi tlat tho.

“Mingming” a rawn ti leh chu ka melh rum kha kha mai, engvanga mingming min ti tlat nge maw a nih le? “Tikhan min ko ziah suh” ka lo tihmuka, a nui deuh hak mai “Tinge ka nunhlui avânga i nat? Ka nunhluiah ka chêng tawh lova; nang ka tawn hma che a ni tih hre reng rawh, nunhlui hriatreng ka duh lova. Ka kalsan thil avângin min hlat i tum a nihchuan i duhthlanna a ni, keichuan ka ti lui thei hauh lo che” a tih leh tâkah chuan ka hmui ka pet zauha.

“Ka thinrim hleinem, ka thik mai mai alawm. Ka mipa hmangaih ber thinlung a nei thei bîk a nia, a vânnei êm a sin. Keichuan engtikah mah ka nei ve thei lo hial mai theia, a ni erawh chuan ka awm hma zawng zawng nên a nei veka, i ngaihsak tur zia pawh ka hria. Amah hmangaihtu a chân duh chu hmeichhe mâwl tak ani ngei ang, kal ang” tilehin alamah ka inher a,  ka ke chu a na deuh zawk bawk, ka thusawi zawh rual chuan min kuai dâk sauhin ka hmuiah chuan a rawn fâwp a.

Chhân lêt emaw pawh ka tum chuang lo, ka kâwngah rawn hmer salh rualin khumah chuan min bawh bet rana. “Enge tih i tum? Chhuk rawh, i rit ” tiin namsawn ka tum a, a theih ṭhak loh lehnghâl. Enge a hriat ni? Nge ka lungawi lo min thlêm a tum zâwk ni, ka biangah chuan rawn chûl dân dânin khawi dang mah hawi lo hian min en renga.

“I thinrimna a reh hma loh chu heti hian kan awm ang, a ṭul leh ka ru haw hmiah mai ang che” a tihchuan phâwk zetin ka ena, tûnah khân min rûk a tum tihna em ni? A chi hian a chi loh lutuk tlat “Ka duh bawk lo, tikhan awm rawh. Min ru miah lovang” a rawn nui nghal hawk hawka, ka sîrah chuan let thla lehin a kuta innem kâng chung chuan min ena.

“Ka ru duh mai thei che a ni. I lungawi lo hian mipa dang i melh daih ang tihte ka hlaua, chuvâng chuan dan khat a inneih nghâk thleng lo hian ka ru daih ang che. Mipa dang i melh tih ka hriat rual rualin ka ru nghal ang che” a tihchuan ka tûm hmuka.

“Ka duh bawk lo, inruk ai chuan pasal ka neilo mai ang. Bâkah tûnah inneih pawh ka la duh lo, hna ka thawk ve dâwn chauha, min rûk chuan ka chhûngte an thinrim dâwn lutuk” ti a ka ṭawng mawlh mawlh lai chuan a kut chuan min rawn dang leh chata.

“Ka hria e, mahse mipa dang i melh ka phallo ka tih kha ka ti tak tak a nia, an lam hawi zâwnga nuih pawh phal a nilo. I biak vaih chuan ka lâwm lo viau ang” ala ti zuia, engvanga thikthu pe chhe nghal êm êm nge maw a nih le.

Keite chuan a hmeichhe biak lam pawh ka la ngaihven hauh silo va “Min biak miau chuan ka chhângin ka en ve bawk ang chu. A hrim hrimah nula kan nia rimte chu kan thiang a lawm, tlangvâl chhelo deuhte pawh an lo awm thei a” ka sawi zawh hma chuan ka zakah a rawn dêk vaka.

“Sawi pawh sawi suh, ka ta i nih hi. Tu tân mah ka phallo che. Ka tân awm reng la min phatsan ngai suh, keipawhin ka phatsan ngai lovang che” a rawn ti leh dap dapa, “I nat dâwn ai chuan ka nunhlui kha hrelo la ka duha, min zâwt miau si a. Hei erawh hmangaih mah ila a tello in ka awm thei tih hre reng rawh, nang i awm chhûng chuan a ni kha ka mamawh lo. Awm lo pawh nila ka mamawh chuang lovang, hmeichhe pakhat vâng mai maia indawm kûn turin min ngai deuh em ni?” a mitmeng fiah zeta min en chunga a tih chuan chhan mai dân tur ka hrelo.

“I in dawm kûn dâwn pawh ka tih loh kha, mu rawh i tia min be zel bawk si” ka ti a, thutak zeta ka sawi lai chuan a rawn nui nghal hak mai. “Aw le i sawi ngun emai mu phawt rawh, nakin deuhah inah chuan kan chho dâwn ania. Chutilo chu ka be leh reng dawn che a nia, i thinrim tawh lo tih sawi phawt la” engah nge ka thinrim pawh chu a hlauh em em mai ni, ka thinrim tak tak tawp siloa.

“Thinrim lo” ka tichu “I thinrim reng kha” a ti leh bawk si, huiham! Engtia tihchi nge maw ni “Ka thinrim ka tihin thinrim suh i tia, ka thinrim lo tih lahin i thinrim min ti bawk si. Engtia awm turin nge min duha?” ka tichu rawn nui vur vurin “Aw tihian i awm tawp ang” a la rawn ti zui.

“Mu ang, ninawm i ṭawng thei sâwt si min hnial ziah mai” tiin a chungah chuan ka bawk zuia.  A nui leh vur vur tawh chu ka seh vak zâwk dawn emawni, nuam a ti lutuk hi ka ngeia, a hmêlṭha deuhah hian na deuh taka seh ka châk.

Kan ngawi zui rauh rauha, a hrawk bâwk chu khawih sakin ka zut ka zuta, a chil lem zâwnga a hrawk bâwk che ralh zêl hi mawi ka ti. Mipa hi chu an hrawk bâwk hi ka en ngei ngei zel, an inhmeh ka ti miaua.

“Muhil rawh, tikhan min khawih reng lo la min khawih reng chuan ka tibuai leh ang che” a ti a, rang zet chuan ka mit chhingin ka lei ka chhuah vak ringawta,  a nui ri deuh hawk mai.

A mit a chhing a nih ringa ka meng ru de de chu min lo la en rûn a nih chu! Ka la phu zawk zui, rawn nui hawk hawkin a âwmah chuan min kuah beta “Duhawm lutuk, i thinrim ve te pawh hi i duhawm vêl vek. Tihian awm reng la, ka tân awm reng la. Ti tau bûr bûr ṭhin mahla a pawilo, ka thlêm zel mai ang che” tiin ka hnungah chuan a beng thek theka.

Ka la lungawi chiah lo nângin tihlan erawh ka tum lêm lo, a bialnu hlui ringawt chuan ka rilru a luaha, ka thik lo theilo chu keimah pawh ka in hau ru mawlh mawlh renga, engtikah emaw chuan a hmangaihna ka la hlawh chhuak ve mai thei a sin. Chutih hunah chuan khanu kha a theihnghilh tawh ngei tih chiang taka ka hriat chuan hlim takin ka awm ve thei tawh mahna.

“I nunhluiah kîr tawh lo la, keimah nên hmalam hun suangtuah tawh la ka duh. Keichu ka thikthu a chhia a, ka ta ni a ka ngaih tawh chu ka hauhna ṭhin ania, i thinlungah keiai hmun lo chang hmasa tu chu khûm mai mai a harsa tawh dâwn tih pawh ka hria, mahsela kei ai a hmangaihna che leh a duhna bik tur che erawh ka hrelo, i la thlang fan a nih pawhin a pawilo, ka inthiar fihlim nghal ang” ka tihchuan min hmer na salha.

“Tin,keilo hmeichhe dang i hnaih dâwn ai chuan min hnaih lo law law la, ka duh êm che avânga min induhkhum dâwn a nih chuan min hnar ngam rawh. Keichuan mipa, hmeichhe ṭhian nei tih vêl ngaihzâwn te hi ka duh ve lo, ṭhian hming pu siin an ngaihzâwng te nen an kar ah an inrawlha, mi induh tawn tak pawh ṭhian sual chuan an ṭhen hrang ṭhin. I ṭhian hmeichhia te avânga kan buai fo angai anga, ṭhian tih hming chhâla lâk hran che an tum thei. Ṭhian ti reng si a an ṭhian mipa ngaizawng em em ka hre ṭeuh, ṭhian an nih miau avângin an ringa, an inkâr a chhiat phah ṭhin. Keimah chiah hi hmeichhia anga i en nih ka duh, i nunah hmeichhe dang awm suh se” tiin ka sawi dap dapa.

Ka ti tak tak bawk, keichu hetiang lam hi ka ti ve theilo. Mipa leh hmeichhia hi rei tak ṭhian a nih theih ka ring lo, pakhat zâwk zâwkin feelings an neih tawh chinah chuan an ngaihzâwng te nên an inkârah khi a awm nghal ngei ngeia, hmeichhia phei chu kan nunrawngin kan ṭhiante ngaihzâwng duh loh leh pawh ṭhen mai kan hreh silo.

Keichuan hmeichhe ṭhian nei miahlo ka duha, englai pawha min ngaihsaka min dawhthei mi ka duh bawk. Ka thikthu a chhia a, hmeichhe ṭhian a kâwm a nih chuan ka thik dâwn tih ka hailo, tûn angah an ṭhian hmeichhia in an bialnute va bia a, an mahni vânga buai ka hre tam bawk nen keichuan ka ngaihzâwng atân chuan hmeichhe ṭhian nei lo ngei ni sela ka duh.

“Ka neilo tih i hriat kha, nang pawhin mipa ṭhian i nei bik tur a nilo, chu chu kan inkar thu thlung ni rawh se. Keichuan ka nei ngai bawk hek lovang, i tân ka tiam tawh a, ka rinawm turah ngai rawh, Sawma te ho erawh i duh chuan i kâwm thei ang, ka ṭhiante an ni a, an ni lakah erawh ka thik thu ka pe chhe lovang” a rawn tileh dap dapa, ka ringhlel lêm lo, bâkah Sawma te ho chu kan tân an ṭha êma, tûnah pawh hian an niin min hmehbel phêt lo sela chuan u Rinpuia nên hian bul kan la ṭan ka ringlo.

 “Aw le, i nunhlui chu i nunhlui a ni tawha. Kei nên hmalam hun thlir tawh rawh aw, ka phatsan ve ngai hauh lovang che” tiin ka nuih ta var vara, dik tak chuan alakah hian ka thinrim rei theilo a ni ber mai.

Ka duh êm avâng te pawh hi a niang chân ka hlau hluah hluah, amah khan chial chung chuan ka thaw chhuak suai suaia, ka pang chu a rawn dek leh zauh zauh ṭhin. Ka khawsik chu a reh chiang em tih hriat a tum ni ber in ka hria a, chu erawh ka duhdân tak, min ngaihsak zia tilang tu ah ka ngaia, ka haw phallo.

“I nu leh paten min lo hau angem le? Ka inthlahrung e, artui pawh kha i rawn ru khera ka lei mai ang. Engzât man nge?” ka tihlai chuan min kuahna chu a rawn ti nghet salha, min rawn melh nghal ngur bawk.

“Pek angai lo, kan ar a nia ka thuneihna pawh a awm ve tih hria la, an hau lovang che. Man neiin thil ka pe lo che, ka bialnu damlo ka kan a nimai, a bâk sawi tûr dang a awm lo. Engtin mah an ti dâwn lo che, khatiang thu sawi tawh reng reng suh, nakinah inah ka sawi mai ang” a ti leh a, a aw ah chuan pawisa pêk ka tum chu a duh lo hle tih ka hria.

Engmah ka sawi tawh bik lêm lo, rei vak lo kan mut leh hnuah tho chhuakin an in lam pan tum chuan kan insiama, a hnung a dawh leh vâng tawh mai. Engmah sawi buai lêm lo chuan ka bawk kai vata, ka zak buai peih tawh vêl lo, ke na chunga kal luih chu a hrehawm bawk nên, a hnunga bei chial chung chuan pâwn lam chu kan pan zui ta thuaia.