DUHLAI ZORINPUIA CHAPTER 6

DUHLAI ZORINPUIA 

CHAPTER 6 

Tlaiah chuan rilṭâm vak lo mah ila chaw chu ka ei luia, ka luna erawh chu an reh tawh thunga, ka thaw huai mai. Chutih rual erawh chuan ka la zawi viau mai, ka tha hi a awm hlawl lo hian ka hria a, zân ka menrei vâng nge ka taksa chau tawng khawng lutuk tih pawh ka hre chuang lo.

Tukverhah chuan dâk chhuakin tlai ni tla tur kan piah ral tlâng a sen phût lam chu ka ena, thlasik boruak reh ṭan in nipui rim a rawn nam leh ṭan a. Thing hnah rawn chawr no leh ṭan te chu hmuh an nuam hle bawka, lunglên chhan tur hre silo hian ka lung a rawn lêng vawng vawnga.

Tukverh tlâng bawh chuan ka en renga, nakinah chuan kan vânglai te hi la liam ve in kan la tar ve ngei anga, eng hun nge ka ngaih ber ang tih ka hre thei loa. Tûna ka hun hman mêk ka lung ti lêng vawng vawng tu hi ang hi ka tawng leh angem ka hre hek lo, suangtuahna in hmalam hun ka thlir a, mipa duh tak ka la tawng ve ngei chuan ka ringa, tûnah hian chu ka mipa nghah, ka suangtuahna zawng zawng kawl tu a hmêl ka hmuh theih siloh chu engtikah nge ka hringnunah a rawn lan ang tiin ka ngaihtuah vang vanga.

“Ka duhthusam leh ka suangtuahna zawng zawng nei tu ka lasi tlangvâl, engtikah nge ka nunah i rawn lan anga. Engtikah nge hlim taka kan lên dun ve ang? Nang lah chu tûn thlengin i reh vung vunga, kha ka suangtuahna kha engmah lo maia chang a tân chuan ka phal bîk hauh lo a, engtikah nge ka duhthusam zawng zawng nên khân ka hmaah i rawn lan dâwn, ka nghâk reng che a nia aw, ka duhthusam kengtu ka tawnmang lasi” tiin ka phun sap sapa.

Ka lung lên viau chhan ka hrelo, mahse ngaihtuahna ah hian a châm tlata. Ka suangtuahna mipa ngei kha a ni ka ngaihtuah ni, tûnah hian takram rawn chang in ka kiangah hian rawn awm thei sela. Nghet taka kuahin a âwmah ka bei anga, ka ngaihzia hi ka hrilh ngei ang le.

Engtianga rei nge he ka suangtuahna lalfapa hi ka tawn anga, engtikah nge ka hmaah rawn in lana hlimna zawng zawng min pêk ang tih ka hre lova, chu hun lo thlen hun tur chu keimahah hian a hla tawh lo ang tlata hriatna ka neia, kha ka suangtuahna lasi lalfapa ngei mai kha a rawn hnai tawh tih ka thinlung hian a hre tlata, a rimte hial ka hre theiin ka hria, ka ti mah mah em ka hrelova, mahsela ka nghâk mêk chu a nih si hi.

Ni chu a tla tawha, chutih rual erawh chuan kâwl chu a la sen phût a, van mawi zia chu ka sawi chhuak thiam kher lovang. Siamtu kut them thiam zia chu a thilsiamte aṭang hian an lang chiang viau in ka hria a, chûng zawng zawng zînga mawi zual ber erawh kha ka lasi tlangvâl kha a ni ngei ang

Khua a thim hnu pawh chuan tukverhah chuan ka dâk ta renga, ka che châng peih lo a ni ber mai. Ka zawi ngiai renga, ka taksa chu an rawl ṭhum mai bawk nên ka inchum leh dat dat ṭhin. 

“Hmingek kan lo lêng” Sawman a rawn tihrualin inchhûng an rawn dai lût a, ka lo en mâwl tawp ringawt. “Eh va hawi lunglêng deuh ve, zanin chu in pa kan rawn hruai lo mai, an theihai ruk kan tum bawk si a” Mama chuan a rawn tinghal zata, an thawveng phawr phawr thei bawk sia, an nunah hian lungngaihna leh lunglenna te hi a awm ve pawh ka ring lo. An nun hi a hlim reng mai hian ka hria a, an awhawm mah zâwk. 

“Ka nuam lo a nih hi, theihai rûka? Tu ta maw rûk in tum?” an sawi chiang lo bawk nên ka zâwt chiang lo theilo, Aizawl lamah kha chuan englai pawhin ei tur a awm ti ila a sual tam hauh lovang, bâkah a phai deuh bawk nên helam ai thlai leh thei an thar hma ṭhin a, helamah erawh theihai pawh an thûr ṭan chauh thung.

“Zorina te ta mawle, nuam lo tih chhuanlam siam phal anilo, va lo vat ang u. I tel ve ngei a ngai” Mama chuan a rawn ti leha, chutianga rukrûk in sâwm chu ka vawikhat tawnna a ni bawk nên mak ti zet in ka en hlawma, an lo thutak phian bawk si a an ti tak tak a nih ka ring.

“Engah nge rûk kher chu, buaina te kan tâwk ange aw ka duh hauh lo a nia, dîl mai ula an phal em em ang” ka lo ti chu an lu an thing nawk nawka. An in melh kual hrek hreka, enge an ngaihtuah ni dâwn ni an awmdân hian ka ngaih a ti ṭha miah lo.

“A nu kan hlau a, a la tê a ti dawn chiang sa a, chuvang chuan rûk a ṭha zâwk. Rawn kal rawh, mi awm loh lai kan chuh a ngai a nia, hetah kan bawl dâwn a nia. A thûr tui tawh viau ang, an phal dâwn lo tih hre renga dil chuan an inring mai mai, an hriat loh lai hian ru ila a ṭha ber” Sawma chuan rawn tiin ka inrin hma chuan min pawt tho va.

Pâwn lamah chuan min kai chhuak nghal dawr dawr bawk, kei erawh ka ṭang deuh ṭung mai. Chutia mi thil rûk ringawt chu a, ka duh chiah lo, ei châk viau mah ila mi thil rûk kher kher chu ka ṭha tih loh zâwng a ni ve tlat. An ni lah an phûr tawh mai si, midang ta chu nise ka hrethiam, u Rinpuia te ta kher kher rûk an la tum zui a nia, a chi loh hrim hrim.

Min la rawn be hauh lova, Rintluanga chungchânga kan in biak aṭang khân a hmuh pawh ka hmu tawh hek lo. Chutiang avâng te pawh chuan an thei rûksak chu ka duh lo bura, min man chhuah phei chuan zahna tur hlir a ni tih lah ka hailo.

“Ka duh miah lo ania aw, khawi maw min thlah teh u. Nangmah ni khân va lo mai ula, chutia miin lawh a la hun lo an tih tawh ber a hnu, lawh kher kher angai em ni? Nangmah ni ten in nei ve nange?” tiin ka kut chu thin thlâk ka tuma, an chelh nghet deuh deuh lehnghâl. 

Ka sawi ang hi helam chu inbul huanah hian thlai leh thei chi hrang hrang hi an nei deuh veka, lei ngai hauh lovin an mahni ta ngei an ei ṭhin bawk. Chutih lai a kara mi ta zâwk rûk an tum chuan mak min tih tira, “Neilo, chuvang alawm rûk kan tih, kan dil dâwn te chuan an phal dâwn lo. Zorina chuan phal pawh nise nu Âsangi kan ngam teuhlo mai kal ang u” tiin u Rinpuia te in lam chu min panpuia.

Kei erawh ka ke na nên ka la kal ṭha theilo, “Ka duh ve miah lo a nia aw, mite an man chhuah vaih chuan a tihchi loh viau ang, ka zak a nia. Nangmahniin lo ve mai rawh u” ka ti chu an rawn chek hluka, min pawt kal zui dawr dawr mai bawk nên a tihngaihna tak pawh ka hrelo, u Rinpuia te in lam chu kan hnaih tial tial bawk si, ka awm a tinuam lo ru ngei mai.

“Ilo duty ringawt dâwn a lawm a bâk tihve a ngailo, chubâkah i awm chuan Zorinan engtin mah min tilo ang, kan chhuanlam tur i nih hi” an la ti zuia, enge maw u Rinpuia nên pawh chuan min hmehbel phêt an tum mai chu le. Tûnah phei chuan min biak chu sawi loh lên pawh a rawn lêng duh lo a nih ber hi.

Thui pawh kal tawh lovin u Rinpuia te huan lam chu kan pan zuia, ka lunglah chu a phu dup dup renga. A chhan ka hrelova, ka hlauhthâwn lutuk vâng te pawh a nimahna, Sawma chu an palah chuan lût in theihai kûng lam chu a pana, a phone light a chhi bawk. Midang pawh chu va lût ve in a hnuaiah chuan a ṭhenin an lo châng bawka, ka awm anuam thei miahlo.

Lût ve duhlo chuan pâwn lam aṭang chuan ka lo en renga, “A tâwk tawh lo em ni? Haw tawh ang u ka hlauthâwng ania” ka tih leh laiin an ni erawh chuan ka biakna chu hre lo ang mai hian theihai kungahte chuan an la che luai luaia. Ka thaw hâwk mai, an rei hi ka han ti êm êm khawpa, ka haw san daih mai dawn emaw ni.

Chutih lai tak chuan “Tunge kan theihai ru” ti a nu pakhat aw fiak ṭhat rawn chhuah rual chuan theihai kunga lâwn ho chu hrilh chawp an ngailo, an rawn zuangthla ri ṭawk ṭawk a, an chêt zâwng chuan theihai kûng chu a che luai luai bawk si. 

Sâwma te ho chu nui uar uar chung chuan an rawn tlân chhuak hlawma “Nu Âsang, min hau suh aw in monu tur kan rawn dah a nih kha” tiin an tlân zuia, tlân ve mai ka tum chu ka ke chu a rawn ri leh tuar mai. Ka au ṭhat a, leiah chuan ka ṭhu hnawk bawk. Ka ke chu a na vawng vawng mai.

Sâwma te lah chuan min tlân liam san vek bawk si, hlauthâwng lutuk leh zak bawk si chuan ka hawi kual a, chutih lai chuan u Rinpuia te tual aṭang chuan hmeichhia hi rawn langin light chuan min rawn chhun zuia “Ehe! Hmingi hetah enge i tih ve? Kan mimâwl ho kha i rawn zui em ni?” a rawn tihchuan ka chhâng ngam lo, ka zak lutuk chu hnuai lam bih chuan ka kûn ngar ngara.

Khuk ral vang vang ka châk takzet, midang chu nise ka zah pawh a nêp deuh ang. Mahsela u Rinpuia nu ber kherin ka rûkru lai min hmu chu nuam lo ka ti takzet, ka zah ru viau bawk nên a hmêl pawh ka en ngam tawh lo.

Ka bulah rawn kal hnaiin min rawn en dika “Tinge, i ke i tina elo? Ava pawi ve aw, ngati nge Sawmmawla te chu i rawn zui kher kher le aw, hetiang hian an rawn ti ziah lehnghala, tih loh loh hi an ti a, naktuk lam chu hauh hrep an ngai a nih hi. Bawiha rawn chhuak teh” tiin inchhûng lam hawi chuan a au zui lâng lâng a.

Lalpa leh! U Rinpuia ala au zui, a va han fuh lo tak. Kei erawh thawh chhuah ka tuma ka tho thei der bawk silo, ka mipa ṭha tih rûk em em te theihai ka rûk saka, min la man zuia. Khaw hawi a nuam duh viau lo, u Rinpuia a ko kher kher te chuan min ti zak zual, ka rilruin Sawma te ho chu ka hau mawlh mawlha. An ni erawh an thâwm a reh vek tawh bawk si ngawihah ka tlâk ta ringawta.

Chutah thâwm rawn awmin kawngka inhawng riin a zuia, kan lam pana ke pên ri rawn awm chuan ka lungphu a ti ring zual sauh bawk. Min chawi tir ngei ngei dawn a nih hi, ‘Ka lo ve lo’tihchi a ni bawk silo, a lawhna ah ka tel ve miaua, an âwih kher in ka ring lo bawk.

“Enge ni?” mipa awm dam dup rawn chhuah rual chuan hmundang ka hawisawn daiha, a hmêl pawh ka hmu ngam lo. Rukrûk hmang anga min hriat chu duh lo viau mah ila tûnah chuan chutiang chuan min hmu dâwn bawk si.

“Hei Hmingtei hian a ke a tina a nih hi in chhûngah rawn hruai lût rawh, i ṭhian mâwl tak tak ho in theihai lawhnaah an rawn hruai tel a nih pek kha, naktûkah ka hau hrep teh ang. Mâwl lutuk, kha an la tlânsan vek lehnghâl” ti zui hlak hlakin nu Âsangi chu in chhûng lamah a lût zuia.

A awm tâk lohah chuan boruak chu a reh duka, kei lah ka lungphu chu a ri ring zual sauha. Ka vêl boruak te chu a lum deuh pup pup mai hian ka hria a, ka khûr deuh der der reng chu vawt tih vâng nilo in ka zâm lutuk vâng tih ka hre chiang hle thung.

“I ke chu ka lo en ange” tiin ka bulah chuan a rawn ṭhu hniama, ka ke ka dawmna kut chu rawn la sawnin a en zui vang vanga. An pâwn light in a hmêl a rawn chhun en rei ruai chu en in ka ngawi kar mai, a tak ran a. A hmui a chip hmak bawka, a hmêl lan dân chuan min ti inthlahrung zual.

“Tinge i rawn zui ve reng renga, hei a duk vek a nih hi. A rang lama enkawl a ngai ang, theihai i ei châk chuan min dil la ka pe mai dawn che a lawm” a tih pawh chuan ka chhâng ngam tawh lo. Mi thil rûk kher kher hi chu a zahthlâk em a ni.

Chutah min rawn pawm nawlhin zo zet hian min pên pui zuia, an inchhûng lam min panpui tih ka hriat chuan ka tâl deuh faiha “Ka duhlo, in in chhûngah ka lût duh miah lo ania, min chawi tir i duh pawhin ka in lamah kal zâwk ang. U Rinpui khawngaihin ka in lam pan ang” tiin hlauthâwng tak chuan ka en chhoa, a ni erawh a hmêlah nuihza hmêl a rawn langa, a khi nghal suk mai.

“I theihai rûk manah ka nupui i nih mai angai ang” ala rawn ti zuia, Lalpa leh! Engkim hian min ti zak tawh, in chhûng kan luh ṭan tawh avâng chuan ka chhâng ngam tawh bawk silo. Ka zak lutuk chu u Rinpuia âwmah hmai ka phûm ta ringawta, a chhûngte ka hmu hreh a ni ber mai.

“Nupui ka rawn hâwn ania” zah sa mah nak alai chuan u Rinpuia chuan a chhûngte hmaah chuan tiin an bulah chuan min ṭhut tira, tumah ka en ngam lo. Lalpa, helai hmun aṭang hian intih bo theih se in tihbo daih ka châk takzet.

“Aw haw a nimaw? Chu mo hmêlṭha deuh kan nei dâwn tihna a nimaw? A va lâwmawm ve, hetah lo ṭhu teh ka fanu” a pa ni ngei tur hian a rawn ti a, a aw chu u Rinpuia ang maiin a damin hriat a nuam hle a. Pa phawk tak a nih ka ring bawk.

Kei erawh ka zak bawk nên ka la hawi chhuak chuang lo, kûn chung hian ka ke chu ka en reng ringawta, ka kut chu ka insual tir ngar ngar bawk. Ka vêl boruak chuan zahna hlir a ni min thlen ni, Lalmalsawma te kha ka hmuh hunah chuan an châk lo viau ang.

“Hei a mah tak chuan a lo lo, Zorina ṭhiante ho hian an rawn hruai tel ve pek a nih dâwn kha. An ni lah kha uang zet in an tlân liam zuia, an hmeichhe hruai kha an ngaihtuah zui tawh hauh lo a nia, hauh deuh hlek chu an ngai. Kumtin hian kan theihai hi an rawn ru a, min dîl ve mai tur ania ka seh dâwn pawh a nilo” a nu in a lo tih laiin u Rinpuia chu a rawn lang leha.

“I hlauhawm ve êm a lawm, an dil che a nihchuan ilo hau leh emaw a nia nga, mifing chuan dil ai che chuan rûk kha an thlang vek ang chu” a pa chuan lo ti lehin a nui zui hawk hawka. Chutia thinrim aw râwl leh mi hau an awm loh avâng chuan tlêm in ka awm pawh a nuam deuh, ka hawi chhuak chuan ka melh kual zawka 

Ka lam an lo hawi vek tih ka hriat chuan ka kûn leh vat bawk. U Rinpuia lah chuan a chhûngte pawh be lêm lo hian ka ke chu a en mawlh mawlha, a rawn herh leh hmet deuh chu insûm hman lo in ka au tuar mai, a na lutuk chu ka mittui a luang nghal zung zunga.

“Khaiha bawiha, hrilh hmasa ve ta che. A ke chu a lo na viau a nimaw?” tiin a nu zâwk chuan rawn tiin kan bulah chuan a rawn ṭhu zuia, ka ke chu a en nghal zat bawk.

Kei erawh ka na ti chu ka ṭhen chak chaka, ka in pet ruh fan fan bawk. Ka lu te hi a ti hik mup theiin ka hria, ka thaw kâwk kâwk mai, hetiang khawp hian ka lo ti si sual nasa ang tih ka hre lo hrim hrim.

“A ruh ka hmeh dikna sa kha a lo ti pelh leh a nih hi, a inah ka va thlah lawk ange” a tihchuan a nu pawh chuan a lo sawisêl lêm lo, min hau miah lo chu ka lâwm in an chhûngkua chu mi rilru zâu leh fel tak an nih ka ring, u Rinpuia hian a chhûn fuh hle in ka hria.

Ka ke la en a a kûn ngar ngar chu ka en renga, duh lo viau mah ila ka mamawh hun taka a awm reng zêl hian alaka ka rilru put dân sa kha tizualin ka duh zual telh telh hian ka hria a, duh lo teh mah ila a ni tel hian a zûnah hian ka uai zual zel nimaiin ka hre tawh.

Ka lakah vei awm ngawih ngawih turin a la che lova, mahsela hetia a awm mai mai pawh hian ka lung a dum em em tho si. Khuanu hian ka tân a ruat ka tawng fuh ta nge, ka neih theih loh tur min tawn tir zâwk dawn pawh ka hre thiam ta lo, hetiang khawpa min hneh tu mipa hi ka la tawng lova, a engkim hi sawisêl tur ka hrelo a ni ber mai.

Chutah in siam remin a hnung a rawn dawha, “Lo bawk rawh, ka lo pua ang che” a rawn ti a, a hnung zâng hlai hlap chu ka en reng ringawt. Ka bawk mai ngam lo, a nu leh pa ka en chu min lo en kara, chu chuan min ti awm nuamlo, min en reng bawk si a, an hmuh laia u Rinpuia in puak tir chu ka duh hauh lo.

“Hmanhmawh la, i inah damdawi nên kan in enkawl ve dawn a nia, a damlo enkawl tu tur zâwk ni si hi nangmah zawk hi enkawl i ngai reng mai” a tihchuan ka hmui ka pet zauha, a va han sual thiam tak. Ke a nat tawh miau chuan engtin nge ka tih vak chuan ang ni ti a chhân ka châk ngei mai.

“Ni e Hmingte in puak tir vat rawh, khatiang chuan i kal thei lovang, i ke kha a nat zual chuan a pawi thei a nia. Va in enkawl vat teh u” a nu in a rawn tih tâkah chuan tlêmin ka awm pawh a nuam deuha, min hmu dik lovin kutkem neia min ngaih ka hlau ru viau thung.

Lalmalsawma te kha ka hmuh leh vaih chuan an châk lovang, min la tlânsan vek leh ta nghala. Mahni ṭha tih rûk em em te thei rûk sak chu a nuam viau lo, muangchangin u Rinpuia hnungah chuan ka bawk kaia, a nu leh pa lo nui sâng erawh chuan ka awm an tinuam huai huai thung.

A tirah kha chuan zaktheilo min tiin min hau vak dâwn emaw ka ti a, mahsela chutiang lam an sawi hauh silo. Ṭha deuhin min bia a, ka ke te hial min la enkawl sak zâwk a nia, u Rinpuia chuan min din chhuahpuiin pâwnlam chu min panpui zuia, engmah sawi lo chuan a dârah chuan ka dâk chhuak kar mai.

Tûnah tak hi chuan naupang inthlahrung lutuk ka ang ka ti a, ka nuihza ru viau mahse nuih chhuah chi ni hek lo ngawi reng chuan a mi puak ang ang chuan ka awm a. A kut tha chak taka min chelhtu leh a hnungzang hlai hlap maia bei chu ka thlamuang hliah hliah hian ka hria a, ka hriat miah lohin ka lo nui leh ver ver tawh.

Hepa hi pehhêl ka tum nasat poh leh ama lamah hian min hip nghet tawlh tawlh nimai hian ka hria a, magnet ang mai hian kan inhip tawn nimaiin ka hria. Engtiang pawhin inhlat tum mah ila magnet ang chiah chuan rang tak leh a hma aia chiang zâwkin kan in hnaih leh ṭhin.

Min be leh tawh miah lova, a hma a ka tihdan kha ka ngaihtuah a. Ka inthiam lo ve deuh bawk nên a rûk chuan ka in ngaihtuah neuh neuha, mipa ka lo be ve fo in lên chhuahpui te pawh ka lo nei ve tawh ṭhin. Mahsela u Rinpuia anga min ngaihsak tu leh ṭawng tam hauh siloa ka thinlung leh rilru luah hnem tu an la awm miah lo, a thil tih engkim hote thleng hian ka thlamuan puiin ka hmu mawi vek tawhin ka hria.

“Ka lâwm e” ka ti ta sapa, hrilh ngei ka duh. Ka ke na min hmehsaka, chumai nilo in tihian ka ke avângin min paw reng chu a nia. Ka lakah a thawk na telh telh tih hi a inhrethiam a ngem le, nge ni a engah a ngai ve lo zâwk ang tihchu ka ngaihtuah pah neuh neuha, a rimtui inkah rim te chuan ka hnar a verhin a pa hliah hliah hian ka hria a, hnar ka tumna zawng zawng te kha tûnah chuan ka rilru a dang leh vek tawhin ka hria.

“I bialpa in a ngaihsak vak na che nge” a rawn ti chu ka ner deuh saka, Rintluanga a rawn sawi leh chu ka ngei thar leh. Amah avângin ka be hrep tih a hre âwm der silo, a thlavang ka hauh tih pawh a hre tawp nâng.

“Ka bialpa a ni bawk lo, min dem tei vet ziah suh” ka ti hlaka, keiin lâwm vak lo a ka en laiin rawn hawi lêt zawkin a nui saka, a nui mawi leh pek tawh. Nasa taka a nui ka la hmu lova, hetia a khîk suk suk hian a pa ka ti ṭhin.

“Ehe ka phone a awm miahlo” ka in dap kuala, ka phone ka hmu lo tak tak. An inah khân ka theihnghilh a ni hrim hrim ang “U Rinpui in inah khân ka theihnghilh aniang” ka ti ta sapa,ding chungin a rawn hawi lêt vut mai. Ka lo en kar a hmuh chuan dim tê hian min nghat thla a, ka ke a na tih hria in min dimdawi thiam hle lehnghâl.

“Tihian lo awm la, ka va la lawk ang. Lo kal sawn miah suh ang che” tiin engmah pawh sawi tawh lo chuan a lêt zui vuta. Ka en zui vang vang mai, kawng sirah chuan ka lo dinga, keimah avânga a buai lutuk chu ka inthiamlo ru viau mai.

Min pua a, amah bawk a lêt leha. A inthlahrun awm ngawih ngawih mai, thim kârah chuan lo nghâkin a khât tawkin a kalna lam chu ka en leh ṭhin a, kan thleng thui tawh bawk nên a rawn lang har phian mai.

Chutih laiin ka chhak lam step aṭang chuan mipa rual thâwm a rawn awma, an rawn ṭawng nawk nawk mai. An rui tih hriat tak hian an rawn in kuah khâwm a, an pai deuh khat khat bawk nên ka lo awmsawn deuha, min kal pêl mai dawn emaw ka tih lai chuan “Va chhelo ve” tihpahin pakhat chuan ka mawngah a rawn beng thlawpa.

Chu kher kher chuan min ti thinrim phat maia, an lamah in herin min khawih tupa chu ka beng nghâl sawk mai. “I va han zak lo ve, tunge i niha?” ti khar khara ka en lai chuan min rawn hnaih sauhin ka bânah chuan a rawn vuana, a zu rim te chu rimchhe tizet hian ka ner nghal sawk sawk bawk.

A ṭhiante lah chuan engmah tih an tum lo nge min lo en renga, an ṭhianpa chu rawn khap pawh an tum hek lo. “Kut min thlâk ngam a maw, hmeichhia te te lehnghal, ka khawih hrep zâwk dawn che maw ni, rawn kal teh” tiin alamah min pawt dawrha, ka ke chu a rawn na lehnghâl zawk bawk nen ka au nghâl ṭhat mai.

“Min thlah rawh, i va zak lo em em ve. Engvanga min rawn khawih ringawt nge i nih? Ka kut hi thlah vat rawh” ka ti leh ṭhat a, ka kut chu tâl pit tumin ka pawt ngat ngat bawka, ka tâl chhuak theilo chu ka thinrim ṭûn tawh.

Chutih lai chuan hnunglam aṭang hian mipa aw chang beng bawng hian “Thlah nghâl rawh” a rawn ti tawi taka. U Rinpuia a ni tih ka hre nghal, ka thlamuang nghal huai bawk, chupa lah chuan ka kut chu ala thlah lova, u Rinpuia lam chu a en nghal kar bawk.

“Lo inrawlh suh Zorin, inrawlhna tur chhan i neilo” a tih leh lai chuan u Rinpuia nui hul hak chu ka hre thei. Ka bân lehlamah chuan a rawn vuana “Ka sawi nawn tawh lovang thlah rawh” a rawn ti leh a, a aw chu a la dam dap nangin thinrim insûm ri a tel tlat tawha, a khawih duh mai ang tih pawh ka hre bawk.

“Thlah duh lo ta ila, engtin nge min tih ang?” a sawi zawh rual chuan u Rinpuia chuan a hmaiah chuan a hnek nghal sawka, a bawh zui nghal bawk nên an insual chu a ni nghâl der, au ṭhat in ṭhelh ka tuma. Mahsela an in khawih nasa bawk si hnaih ngam pawh an nilo, a tâwpah min tibuai tupa ṭhiante chuan an pawt hrang thei ta hrâma.

Ka mawng bêng tu chu a hmai a thi phung mai “U Zorin ngaidam rawh, a rui sual deuha. Chuvang a nih kha, kan tihpalh takzet, nula nangpawhin min ngaidam dâwn a nia, zu a in nasa deuha” an tihchuan ka chhâng lo, ka ngawi ngar ringawt. Ka mawng ben kher kher hi ka ngai theiloa, in it vâng leh hur sual naah ka ngai bawk.

“Vawikhat mah lo ti buai tawh suh se, Lalnunkim chiang takin hei hi lo hria ang che. He hmeichhia hi vawikhat mah lo tibuai tawh suh ang che, ka hmu leh che a nih chuan kha ai thui kha ka kal tawh ang” ti nghutin engdang mah sawi tawh lo chuan ka kutah kaiin min kalsawn pui zuia.

Ngawi reng chuan a hnungah chuan ka zui ve zel ringawt, khapa khân a hnek ve ngei tih ka hria a, a thim bawk nên a hmêl ka hmuh theih tawh loh avângin ka thlêk leh ha ha ṭhin a, a thinrim viau a nih ka ring a, ka be hmasa ngam der lo, chutah ding chawtin ka lam chu a rawn hawia.

“I ṭha em?" a rawn ti ta hrâm a, kei ka lo ngawi reng thung. Ka dâr tawn tawnah rawn vuanin min kuai dâka, chiang tak hian min en bawk “An lo khawih na hman che em? Ngawi reng lo khân min chhâng rawh” a rawn ti leha, ka taksa chu a en kual dun duna, zân thimah chuan a hmuh theih a ring nge mawni.

“Na lo, a hmaiah ka bensaka, khapa bâk khân min khawih hleinem. Ka ṭha ania aw, nangmah zâwk kha i ṭha em?” tiin ka zâwt lêt a, an insualna lamah khân him pial a a awm chu ka ring bik lova, ka ngaihtuah ru takzet.

“Ka ṭha ka na lo, kha i phone chu” tiin a kekawr ip te aṭang chuan ka phone chu a rawn phawrha, ka kutah chuan a rawn dah zui nghal bawk. “Ka lâwm e, ka tibuai hle mai che” zâwi tê chuan ka ti a, rawn lang lo se chuan khâng ho khân ka chungah enge an tih ang tih pawh ka ring thiam lo zâwk.

Ka biangah rawn chulin a nui ri ta haka, chu chuan min ti thaw ve huai huai mai. “Eng tham mah a nihloh kha, tu mipa dang mahin an khawih che ka phal hleinem, lo kal rawh le haw vat ang” tiin ka hmaah chuan a ṭhu hniam leh a, keipawh chu ka bawk lehnghâl vat a, ka nui ver ver bawk.

Tûnah chuan bialnu a nei nge neilo lam pawh ka ngaihtuah tawh lova, ka hlim em em ringawt. A hnungah chuan beiin ka in ngaihtuah neuh neuha, hepa hian min bemna thu a sawi hauh lova, mahse ka duh lutuk tawh. A ni têl hian hmu lo hian ka awm thei lo nimaiin ka hria a, heti êm êm a zûn ngah hi an lo awm thei a nimaw ti a in ngaihtuah neuh neuhin ka kuah nghet sauh sauha.

“Ilo muhîl a nge aw, i ke kha kan en leh a ngai a nia” nuihza aw zet hian a rawn ti a, ka nui ve hak mai. Ka mut a chhuak tak tak, amah a lum nuam bawk nên ka mut a tichhuak zual. “Min kai tho leh mai dawn a nia” ka tihchuan a nui leh haka.

Ka in pawh kan hmu pha tawh, ka kawmchhakah chuan Sawma te ho kha an ni ngei ang an lo ding khâwm ṭhap a, ka hmuh rual chuan ka ner sak bawk. 

“An va han châk dâwn lo tak êm, an chawh viau ang” ti a phun sapin u Rinpuia hnung aṭang chuan ka melh rum ṭan ringawta, min hmu thei âwm tawp silo.

An bul kan thlen rualin min lo en ṭhapa “Ehe! Ngati nge in rawn in puak haw? Hmingi i na em ni?” Sawman a rawn tih chuan ka hawisawn nghal hmaka, ka lung an ti awi lo ve êm bawk a ni. Mi hauh tuar turin min hnutchhiah a nia, tu fa nge lawm bik ang, dam ṭha phei ila chuan ka bêng nghal pawp pawp duh ang chu.

U Rinpuia chuan “Vawikhat mah khatiang hmunah hruai tawh suh ang che u, in la tlânsan leh ta nghal” lâwm vak lo chuan a lo ti a, an ni lah chuan an ngaih holam hmêl khawp mai, an in melh hrek hreka “I bialnu hual a nia, tikhan in awm dâwn tih kan hria a, hun kan pe che a nih kha, rem kan hriat zia hi aw” an la ti zuia, in sawi fiahna tur hi chu an hre thei a nia.

“Chhuk phawt ang u, in chungah hian ka lâwm miah lo a nia aw, khatianga min tlânsan zêl dâwn a nih chuan vawikhat mah ka kâwm tawh lovang che u” ti ve hmakin u Rinpuia hnung aṭang chuan ka melh kha kha hlawma, tlêm chuan an inthlahrun ve hmêl deuh.

“Kan tihpalh a nih kha, Zorina te an nia engtin mah an ti dawn lo che tih kan hriat avâng ania, midang chu nise kan tlânsan lovang che” tiin in lam kan pan thlâk pah chuan an ṭawng thla pah mawlh mawlha, chhan pawh ka chhâng tawh lem lo, ka in chu hawngin kan inzui lût diah diaha.

U Rinpuia chuan ṭhutthlengah chuan min nghat thla in a mah chu a che zui vuta, min tihdan chu naupang ka ang ka ti riau lehnghala, Sawma te ho erawh chuan an theihai lawh chu ei tumin chi thak an siam thunga, ka ke chu ka ena, a lo la vûng al a, a na leh et et tawh mai.

U Rinpuia chuan tuilum a chhuang leha, a che vêl chu awm hmunah chuan ka lo thlir kual ve char chara “Nupui te hi a duat dâwn ania, zanina i bem tlûk tawh loh chuan i zei lo hle ani ang. Hmeichhia hi tlanchhiatsan reng loh tur, i tlânsan ngun lutuka i senior zo mai dawn” tiin Mama te ho lah chuan an ti lui zuk zuk renga.

“A hrim hrimin i mit te hi a kalh nge hmeichhe hmêlṭha hi i tlanchhiat san renga, a ṭha lêm lo te hi i duh leh bawk si” Fakan a rawn tih lai tak chuan keimah zâwk chu ka lo insûm theilo “A kalh thlâwt lo” ka lo ti ngawt peka, u Rinpuia chawpa ka lam an rawn hawi avâng chuan ka zak leh si chu lei chhuah zukin an awm lohna lamah chuan ka insiam chhe vak vak ringawt.

Kha thu kha engvanga lo sawi ve ringawt nge maw ka nih le, an ni lah an ngawi deuh ṭhap bawk si. Ka ngaih an ti ṭha miah lo, lai deuh taka ka va hawi leh de de chu min lo nuih ṭhaw hlawma, ka va han ngei tak. 

“Mitkalh chu a ti phal chiahlo che a ang, a ni pawh hian a rûk hian a lo i maita chiang che a lawm, kha theihai rûk hnathawh chu a ṭha zâwngin nghawng a neih mai kha” Sawma chu beng châk viau mah ila tûnah chuan ka ke pawh ka hmang thei silo, awm hmun aṭang chuan ka tin zuau zuau ringawt.

“Bialnu mah hmu theilo khân khati khân min ti reng suh u, nangmah ni avângin ka ke a la nat belh lehnghâl. Khatiang bialnu a neia, min hmeh bel tum kha bânsan rawh u” ka ti sapa, ka ṭawng erawh a zawi viau thunga, ka sawi ring ngam hauhlo, a chhan chu keipawh hian ngaihzâwng a nei tak tak nge nei tak tak lo tihchu ka hre bîk lo a, ka ṭawng huai ngam lo a ni ber.

“Bialnu i neilo tih pawh a hre miahlo a nih saw” tiin an nui zui kur kura, ka thusawi chu an ngai ho hle tih ka hre thei. Hetiang lam ka sawi apiang hian u Rinpuia bialnu neih thu hi an sawi ngai hauh lova, mak ka ti. A tir aṭang tawh khân a neilo tih pawh an sawi chuang lova, a nei tih pawh an sawi heklo.

Mi hi an bâwl kual mai mai nge tih pawh ka hre tawh lo e “Min bâwl miah suh u aw, a bialnu pawh ka hmu tawh, amah lah chu ka inah” tiin ka ṭawng thui dâwn lutuk tih hria in ka ngawi zui ta daiha. Ka va sawi chhuak teuh deuh ve, mipa hriat chi lah a ni hauh lo.

“Enge sawi zawm ta che, i inah a rawn kal em ni?” an tihchuan ka lu ka thing nak naka, ka sawi theilo. An rilru tak tak pawh ka hrelo lehnghâl “Chutiang engmah a awm lo” ka ti a, ka rilru tak erawh chuan kha nu min rawn ṭawng khum dân zawng zawng kha pakhat mah ka theihnghilh lo.

“A nihchuan i duh ve mai lo em ni? Hei a hmêl te hi an ṭha a, keini chuan farnu ang in kan en che a, bâkah kan duhzâwng i nilo hrim hrim, i kawlh bawk si” Kimkima berin a rawn tihchuan ka thaw haka “Vantluangkim i duhzâwng nih kha ka duh ther tê lo aw, ka hmêlṭha ve tâwk. Ka fel êm êm bawk ” ka lo ti chu an nui zui leh dar dara.

U Rinpuia erawh chuan engmah a sawi ve lo, tuilum chu a so ta aniang suanthla in ka chawlhtawlh chu a va la zuia, rawn lût in tuilum nên chuan min rawn pan zuia, kei pawh ka lo in siamṭha sawt sawt mai. 

Sâwma te ho erawh chuan min rawn ngaihven tawh lo hlauh a, theihai in chuh chuan an au chêl chûl mai. “Vak chhuak tawh hauh suh, i ke a dam chian hma chuan inah awm ang che. I kal theih loh hlen chuan i inchhirna tur bawk a ni” a tihchuan ka chhâng lo, a sawi dik chiah.

Ka puan chu a awmna kawh hmuh lehin a va la vuta, kan awmdân chu nupa induat deuhte pawh kan ang tak tak. A rawn lêt rual chuan ka ke chu la kangin a en zui rauh rauha, enge a ngaihtuah ni dâwn ni a ngawi vung vung mai.

“Lo in ring rawh aw, a na leh dâwn a nia” a tihchuan ka bu nghata, ka huphurh ngei mai. A rawn hmet ṭan chiah chu ka ṭhen nghal chawk chawk mai, engtin nge heti tak hian ka tihnat theih ṭhin ni, ka kal thei har hian ka ring bawk nên engtin nge ka awm ang, keimah chauh ka ni bawk nên ka rilru a hah ru et eta, Mawii sâwm dâwn ringawt ila an inah a chêt angai bawk si.

Tunge min awm pui ta ang,keimah chuan ka chêt har tur zia ka hailo. Rilru hah zet chuan ka thaw chhuak ta haka, u Rinpuia chuan min rawn en nghal vut mai, a mitmeng chuan zawhna min zâwt a “Engmah ka rilru a hah deuh mai maia, ka ke hi ka ti che ṭha thei dâwn silova, keimah te chuan ka buai dâwn tih ka ngaihtuah mai mai mawle” tiin hnuailam chu ka en daiha.

Ka ke hmeh pah chuan min en hauh silo in “Ka awm hi, engah nge i lungngaih ni. Ka nute kan be dâwn a nia, hetiang chung chuan engmah i ti thei hauh lovang, i ke hi i dim loh chuan ana hlen thei ania, ngaihloh lamah ngai lo la, tûmah hetah hmelhriat ṭha i nei lo, i inluahnate nupa lah an boruak chhiat lai ania an pui thei hauh lovang che, keimahin ka awmpui ang che” a rawn ti a.

A aw ah chuan a timai mai lo tih ka hria, min awmpui a tumna chu lâwm viau mah ila miin engtin nge min ngaih ang tihchu ka ngaihtuah leha, tûnah mah an rawn lêng mai mai pawh lo sawi duh tâwk an awm leh tawh laia amah chauhin min awm pui ta se engtin nge min sawi leh ang tih pawh hriat a niloa, aw pawh mai ka harsat phah.

“Miin min hmuh dân a dang vek dâwn a sin” ka ti ta sapa, a lakah hi chuan thil hi zêp reng a ngaihna ka hre lêm lo. Ka rin tâwk avâng tepawh a nimahna “Mi ngaihtuah suh, ngaihtuah hman pawha i khawsak loh hi. Nangmah in ngaihtuah hmasak i ngai zâwk. I ke na chunga i che lui reng a nihchuan a nat belh mai mai dawn, i duh chuan Sawma nên sâwn kan riahpui ang che, mi chuan engmah an sawi lovang, an sawi a nih pawhin an ni enkawl tur i nilo” a ti ringawta.

A thusawi chu a dik ka tiin ka hnial ta lo, ka ke chu a hmeh zawh chuan hliam ka tuamna chu va la in amah chuan min tuam sak zuia. Ana pawh tûnah chuan a reh ta deuh, nachhawkna chu eiin ṭhutthlengah chuan ka mu zâl a, mipa ho erawh games an khêl a niang an in vin nasa mai, an in chûm ri leh awk ṭhin.

In dim lam hi chu an hlat tlâng ve hian ka hria, u Rinpuia pawh an bulah va phei zawkin Sawma chu a va be zuia, a ni lah chuan awlsam zet hian “Kan riak anga a nimai a lawm, bâkah amah chiahin a awma, hmeichhia a ni bawk nên zu rui sual te pawh a tawn a hlauhawm” mi pawh rawn en lo hian a lo ti awlsam then a, keipawh ka thaw huai mai.

Min riahpui theih chuan chu aia hlu chu a awm lo ang, bâkah ruah leh thli a tleh leh palh chuan ka thla a muang theilo ema, ṭhutthlengah chuan phone khawih pahin ka mu ar ara, ka awmdân chu a nuam phian mai. U Rinpuia chu ka bulah rawn ṭhu ve in in be lêm lo hian kan awm renga, ka biak hmasak loh hi chuan min be hmasa khât khawp mai.

“Tikhan lo awm rawh u, Zorina chuan Hmingeki mutbu dang kha ṭâwm ve mai rawh se, keini erawhin kan mutna tur kan va la ange, lo in chuk zeuh zeuh pawh kha a pawilo aw” an la rawn ti zui, mi an ti buai leh zo vek tawh, mahni lo mah a zah sa nâk a laiin, an theihai kan rûk aṭang khân ka zah a la reh lo hrim hrima, amah pawh ka en ṭha ngam miahlo lehnghâl.

Midang an chhuah hnu chuan boruak a reh ta duk a, rannung hrâm bâk hriat tur a awm tawh meuhlo. Ka phone en lai pawh rilru ah a awm thei lo, engtin emaw hian boruak chu a uap deuh churha, keimah aṭang chuan danglamna eng emaw a awm chiang a ni, u Rinpuia ka ena, a phone ala bih ngar avâng erawh chuan ka awm a nuam ta huai mai.

A awm lohna lam zâwng chuan inherin ka phone chu ka dah zui ta daiha “Tinge khatia i awm?” a rawn ti khauh mai, ka zah ru tih hi a hre ve lo emaw ni. Tûnah pawh ka khûr chhe lo chauh chu a nih hi, kan pahnih chauha kan awm tawh hi chuan chhan awm silo hian ka danglam vek zela, chu chu duh lo viau mah ila keia thunun theih a ni hek lo.

“Engtin mah ka awm lo, ka mutdan ka siam rem mai a nih hi” ka ti ve sapa, chutah a phone chu dahin a taksa chu a rawn her zuia, enge tih a tum tiin ka lo ngaichâng reng thung.

Ka tukkhum za mer mer aṭang chuan min en reng tih ka hriaa, a rûk chuan ka infuih sauh sauh mai. Chutah a aw thian kharhin alam hawi tur chuan min ti zuia, dâra a rawn vawn rual chuan ka phu zuk lehnghâla, hahthlâk hian. Hepa hian keimahah danglamna a thlen nasa ṭhin lutuk hi dawithiam emaw ka ti hial tawh zâwk.

Alamah chuan min kuai hera, a mi pawhna chu a na hauhlo, mahsela ka inher awlsam em em bawk si. Ka lung chu a phu dup dupa, ka hmai leh ka taksa pum chu a sa pup pup bawk, kan vela thâwm dang awm te chu an reh zui duk a, ka hmaa mipa hmel leh a rimte, a thaw ri leh a mi khawihna bâk hriat ka nei tawh meuh lo, eng boruak emaw zâm awm tak, mahsela hlimawm tak ni tel si hi a rawn zâm vêl nimaiin ka hria a, kan mit leh mit a intawn rual chuan ka chil ka lem nghâl khawlh mai.

Rawn kûn hniamin ka hmuiah chuan dim tê hian a rawn fâwp zuia, ka ṭek lehnghâl chhawk tawh. Ka marphu a ranga, ka taksa chu a za chiai chiai bawk, ka lungphu ti ranga, ka marphu ti danglam a min siam danglamtu hi hlauhna vâng nilo vin duhna, nasa taka min nawr kal tu, ka beisei phâk loha duhna ka neih vâng tih ka hria a, ka hnâwl phal hek lo.

A awmsawn rual chuan mitmeng vai riai hian ka ena, ka biangah chuan a rawn chûl heuh heuha, a nui suk bawk. A nui hmêl mawi lutuk ka hmuh leh lek phei chuan danglam hneh tak ka ni, ka ṭawng ngam lova, ka hawisawn phal hek lo, amah chauh chu a ni ka en ni.

Chhimbâl ang mai a mawina nei tu chu tûnah hian ka nunah a rawn zâm lût meka, ka do theihloh khawpa mawi a ni bawk.

Tûnah chuan ka thinlung ka hrethiam ve ta, keihian a ni hi ka duha, huatna avâng nilo in duhna nasa lutuk avânga danglam tum ka lo ni a, mahse chu thil chuan keimah min vaw lêt in a hma aia duhna nasa zâwk nên min rawn deng nawn leh saka, ka hnar phal tawh heklo.

“Ka bialnu i ni duh angem?” a tih ri chu a ring lo, mahsela ka bengah chuan a chiang em em thung. Tûnah hian ka mipa duh rûk em em chuan a bialnu ni turin min sâwm mek a ni, ka hnar dâwn nge ka chhâng ve dawn tih chu keimahah a in nghata, ka hriat theih zawng erawh he mipa hi ka hnar thei tawh ngang lo tih hi a ni.

Huat ka tum poh leh ka veia, hlat ka tum poh leh ka hmu châka, duhloh ka tum poh leh ka duh zual tulh tulha, tûnah chuan amahah hian ka kâng ral tawh a ni ber mai.

“U Rinpui” ka ti ta sapa, a bâk thil dang ka sawi thei tawh lo, ka dang te chu ka chauh vâng ni hauh lo hian a ro hulh a, chil lem tur takngial pawh ka nei tawhlo.

“Min chhâng la, min duh em?” a rawn ti leha, ka rilru a fim ta deuh bawk nên ka harh chhuak zawk mai. A bialnu kha! Engtin nge ka lo theihnghilh theih, ka namsawn ta thuaia, a ṭhen thu pawh ka la hre reng reng hleinem, tûnah khân ka tum loh tawpin ka che a ni.

Khâng ka suangtuahna neih hman zawng zawng te kha thli na takin a chhêm lan dawr dawr ang mai hian an bo ta duak mai.

“Bialnu i neih kha, enga tinge hetianga ka laka i awm reng. I bialnu i ṭhen hmasa phawt a nih loh chuan keichuan eng chhânna mah pêk che ka tum lo, keimah avânga hmeichhe dang rilru na tur ka duhlo, i bialnu khân min rawn bia a. Nang hi kalsan tur che in min rawn ti hial a sin, chuvang chuan i ṭhena i kalsan thei a nih loh chuan min bem tawh suh, ka huat vâng che leh ka duh loh avâng che a nilo, i bialnu anga mite'n an ngaih kha tâwpna siam pui phawt rawh” ka ti sapa.

Ka ngaihdân hi min dem phahdâwn mahse pawi ka tilo, ka lo in fawh tir pawh kha keimah pawh ka dem awm hle reng bawk, mahsela a bialnu kha ṭhen phawt sela ka duh. A mah in a duh lo a nih pawhin alaka beiseina a neih tawh loh nân ṭha deuhin hrilh sela ka duh.

“Chu zawng chu em ni i sawi duh? Ka lo chingfel mai ang, mahsela bialnu ka nei hauh lo tih hi i hre dâwn ania, enge Rohlui chuan a rawn sawi? Hetah a rawn kal amaw?” a tihchuan ka bu nghata, a thusawi erawh ka sawi duh kher lo. Mipa bula han rêl chiam kha ka hmeichhiatpui a nihna angin a mawi lo viau tih ka hre ve tlata, min ṭawng khum dân kha mawi lo viau mahsela mipa bula han zualko erawh ka duh bik hauhlo.

“Min hrilh rawh, hetianga ka laka i inkharkhip tlat nachhan pawh hi a ni ngei bawk ang, ka hre ngei duh chhânna ka duh bawk. Eng chhuanlam mah sawi lo leh dâwt tello in min hrilh rawh, min hnar tlatna chhan pawh hi a ni ngei bawk ang” nelawm vak loh hian a rawn ti a, a mitmeng chu a rum deuh al bawk. 

A hmêlah chuan a lâwm viau lo tih pawh ka hria, a kut chuan ka mutna ṭhutthleng chu a tuk ri dat data, keimah chauh chu min en bawk nên ka chhân hma loh thil dang sawi a tum lo tih a hriat.

“Engmah a nilo, ka mu lût duha min pui lawk ta che” ka ti ta daiha, kan thil sawi lai chu thlâk ka duh takzet a, sawi nuam pawh ka tilo. A ni lahin min en reng bawk si, engtin nge ka tih dawn ni?

Sâwma te ho an rawn lêt tâkah chuan ka lo thaw deuh huai tawha, an ni an awm chuan min zawh zui ka ring lo bawk nên ka hlim hmêl chu a hmu nge a hmui chu a ti kawi nawka, Sawma te ho lah an rawn ṭawng lût bawrh bawrha. Mutna tur an inchuh tih hriat takin a enga mah hma in an in buan leh nghal phawta, an in tina ang tih pawh hlauhawm chuan. 

Chhuatah an in keuh ri dawp dawp bawk nên “In in tina ang, in bengchheng emai ṭhenawm te pawhin an ning ang, mu mai mai teh u. Chhuat a zau kha, in mutui tho ang” ka ti ta hlaka, an reh mai dawn emaw ka tih laiin a ngai te bawk in an ri leh nghal dawp dawp mai.

An na lo zâwk nge ka nat ai hi na se a ṭha zâwk tur, “Aihah ka til mu a keh dâwn.......Lal...dampui, awmsawn vat rawh ana lutuk awi ka nu, ka thi dâwn” Faka au tuar tuar rualin Mama chu a awmsawn vata, Sawma te lah an lo nui uar uar bawk nên kan thâwm chu rannung pawhin bengchheng an tih bawk a niang nichina hrâm ṭha em em kha tûnah chuan an reh zui diak tawh.

“Ka va han ning tak, ka lu an tina lutuk” tiin ka thaw hapa, ka ner sak sak bawk. U Rinpuia chuan min en vung vungin min pawm kâng ta nawlha, ka room lamah chuan min luhpui nal nal bawk “Lawi ṭhat zân an hmang dâwn a nih saw, tirawh u mu daih ang u, nakinah an rawn awi awi ri ka hre peih lo” Sawma chuan rawn tiin midang chu an lo nui zui dar dara.

“Lalmalsawm i duh duh kha sawi reng suh, ka ke hi chu na lo se i lu kha ka vaw keh rawp tawh ang. Dâwt sawi te lah hi i hnehsawh si kha vâng a nihkha bialnu pawh i hmuh theih loh?” ka tihlaiin haw duh hauh lo hian “Khavang a nihkha nangpawh bialpa i hmuh theih loh, kan in ang chiah a ni” a rawn ti leh hrâma, awi ṭawngkam te hi an thiam bawk si, engtin nge hetiang em em a hnial khân an thiam ni.

“Chhang tawh suh, i chhân peih chhûng chu an hnial peih ang che” u Rinpuia chuan a rawn ti leha, keipawh chuan a sawi dik viauin ka hria. Ka khumah chuan dimte hian min mutthla a, ka ke lam chu min siamrem sak thlap bawk.

“Ti hi chuan tumahin an hre tawh lovang, ni china kan thusawi kha chhunzawm ngei ka duh, a hma pawh khân i ina a rawn kal thu i sawi kha ka hai hauh lo ania, min hrilh vek ang che. Chutilo chu ka hre chhuak leh dâwn tho tho” a tihchuan ka en reng ringawt, engvanga chu pawh chu buaipui êm êm nge maw a nih le.

“Engmah a nilo ka tih kha, nangmah hi hlat tur che in min ti a a nimai, a bâk engmah a awm lo. Chhuak tawh rawh, ka mu duh tawh i bialnu ania a duh duh a sawi thei a lawm” ti lehin amah pawh en duh tawh lo chuan hmun dang ka en ta daiha.

“Ka la hre chhuak tho ang, ka tâwp san dâwn hauh lo che a nia” tiin a chhuak zuia, kei erawh ka thaw huai thung. Chutih rual erawhin a ṭawng tam lova,  a ṭawng chhuah chhun erawh thu ho mai mai a ni ve ngai hek lo, a ti leh duh ngei dawn tih ka hre bawk, a hriat hma chuan a beidawng hek lovang.

Engvanga heti taka ka laka awm nge a nih a, min ngai pawimawh êm êm nge a nih ang? A ni hian min duh ve tak tak em ni? Tihte thleng chuan ka ngaihtuaha, engpawh chu nise midang kalsana keimah chauh ka nih theih hunah engkim ka la pe mahna, tûnah rih chuan atân tih theih ka la neilo, midang ta a nihna paih thla a, ka ta nihna vawn a duh hunah chuan a tân ka thinlung kawngkhâr ka hawng anga, atân engkim ka tihsak tawh thung ang.

Pâwnah chuan an thâwm nak nak renga, chutia an awm tâkah chuan keipawh ka thlamuang ta huai bawk. An ni hi awm lo se chuan ṭhian kawm tur ka vân viauin ka ring, Sawma te ho ka lo kâwm chu ka vânnei ka in ti a, an chungah ka lâwm viau bawk, chuvang a nia hetiang khawpa min tibuai chung pawha ka huat duh ngai loh.

Kan mangan hunte, kan mamawh hunte a tlân chhe ngai lo mi chu mi hlu tawp khâwk an ni a, an pawimawh lo theilo. Mangan laia rawn lang ṭhin te hi min duhsak tu te an ni a, kan hlimna leh lâwmna min ṭawmpui tu te hi min ngaina tu te an ni bawka, kan beidawn tâwp khâwk leh neih engmah kan neih loh huna rawn lang ṭhinte erawh min hmangaihtu an ni thung.

Kan hlim lai leh chan ṭha kan chan hun chauha rawn lang ṭhin ṭhian hi ka ngaina ngai lova, ka mamawh hun leh puih ka ngaih huna rawn lang ṭhinte hi puih lêt ve ngei ka duh bawk. Ṭhian hi ka ngaihlu a, ṭhian ka nei a nih chuan keichuan unau ang maiin ka en ṭhin, a nazawnga kan kawm leh biak ve mai mai kan neih rualin ṭhenkhat erawh kan unaute ang maia kan tâna hlu an awm ṭhin, chutiang mite erawh ṭhianṭha tâwp khâwk an ni thung.

An thâwm ngaithla chuan ka nui sak saka, zan danga thâwm awm hleka ka hlauh em em ang kha zaninah chuan ka nei tawh lova. Ka bulah mipa ṭhianṭha em em te an awm tih ka hria a, an mahni hlauhna pawh ka nei chuang lo, mipa sual an nilo tih ka hre chiang viau tawha, ka tân chuan mi hlu tak an ni tawh tlat a ni.

Zîngah chuan thâwm bengchheng zet chuan min ti harha, peihlo zet chuan meng chhuakin ka ṭhu chhuak zuia, ka mit chu nuai zui chat chatin ka ham pah buai buai bawk. Sâwma te ho ṭawng lâwng lâwng reng chu hai der theih pawh anilo, ka puan chu hlîm in ka ke chu ka hlâng thla a, a intuam bar ka hmuh chuan ka en vung vung mai.

Ka nute ka hrilh duh lêm lova, hetah pawh hian an phallo chunga kal ka nih avângin ka intina tih hria sela chuan min ko haw duh hial ang. Chuvâng chuan hrilh lo law law ila a ṭha, sawrkar hna an thawh ve ve avâng leh an fanu neih chhun ka nih avângin mi an ngaihtuah ṭhin bawk nên ka hrilh anih chuan min hauh pahin min ko haw dawn tih ka hria, keilah helai hi nuam ka ti ṭan bawk nên haw san mai ka phal lo.

Room aṭanga ka chhuah chuan an lo tho chhuak ṭhap tawha, mei an lo chhêm thlap bawk. Games an lo khêl leh tawh a nih hmêl, u Rinpuia erawh chaw chhum siamin a lo buai nasa mai. Mak ti zet chuan ka en haw a, chutianga a chêt chu ka ring lo bawk nên mak ka ti viau pawh chu a âwm hliah hliah.

Mipa rawngbawl ka la hmu ngai lova, an awm ve tih chu hre ve mah ila a takah la hmu heklo. Ka pa takngial pawhin ka hmuh laiin rawng a la bâwl ngai lova, helam chu ka awm rei anga an zia ka hre chiang dâwn chauh niin a lang, thawh hreh an nei bawk silo chu ka ngaisang viau bawk.