DUHLAI ZORINPUIA CHAPTER 2

DUHLAI ZORINPUIA

CHAPTER 2

A tûk lamah chuan keimah te chuan ka awm rak raka, nutling ṭhenkhatin an fate hritlang vêlah min rawn bia tih loh chu tih tur vak a awm lo. Helam chu natna satliah ang hi chu an ngai zam deuh bawk nen in entir mai mai an tum hmel loh, a lehlamah chuan an tuarchhel a nih ka ring.

Ka nu khân khawsik chung pawhin ṭul tak tak chuan an feh tho a tia a dik ka ring, keini lam ai an tuarchhel daih mai. A reh bawk nen ka mu mai maia, tih tur thlâwt ka hrelo, in a awm te chu awm ve bawk mahse nu nau pawm leh naupang school kal, tar ho an nimaia. Hmelhriat ka la nei bawk silo lênna tur thlawt ka hrelo, khua a la lian em em bawk silo.

Mu ta na na na chu ka muhîl ta rênga, ka harh leh meuh chuan a lo tlai duai tawh mai. In phih harhin rawng ka bâwla, chhûna mutthilh hi chu kan ni nghulh zêl maiin ka hria, zinglama ka chaw hmeh siam sa a la awm bawk nên bâwl em em ka ngai lova, chaw chu ei zuiin games ka khel ta char chara.

Mi biak vak ai chuan games khelh hi nuam ka ti bawk nen ka hunawl ah chuan ka khêl reng zêl, a nuam ka ti bawk. Rilru hah chânga han khelh phei chuan ka zâng huai zêl, tûnah phei chuan ka hna hahthlâk lutuk a nilo bawk nên ka âwl tih piahlam a ni.

Sâwma te ho an ram chhuak bawk nên in leng pawh ka nei lêm lova, khumah mu in ka chhûngte ho ka bia a, mi an ngaih thu an sawi ve sap sapa, keipawhin ka ngai. Hetah chuan kawm tur an vâng bawk si in lam thlakhlelhna a na lo theilo.

Reife in bia in ka awmna chanchin vêl te chu ka sawi mawlh mawlha, ṭhian ka neih nghâl thu vêl ka sawi chuan ka nu leh pa pawh an thaw huai mai. Ka kal dawn pawh khan mi an ngaihtuah viau kha ania, keimah midang biak hmasak hreh chi ka lo ni bawk nen; ṭhian siam zung zung te hi ka harsata, keimah ka inkiltawih ka ti dâwn nge. A lehlamah erawh ṭhian kawm vak pawh hi rilru ana duh ka ti ṭhin, hmeichhia ve ve inkawm phei chu tûn ang laiah mahni ṭhiante ngei pawh rel duh an lo awm veleh bawk si.

Kan bula an awm lai chuan mi fakin midang rêl tur an zawnga, midang bulah an awma mi rêl leh thei zel ṭhian ka nei ang tih ka hlau ṭhin. Keichu ka fello a, ka fing hek lo, mi ka ring hma a. Ka rilru a nat hma ang bawkin ka dam leh hma bawk, chuvang chuan midang hnaih mai ka tum lo, mi ka rin hmat em avang hian keimah bawk ka na a, mahni a awm tawp hi a ṭha berin ka hria, chutih rual erawhin min kawm duh tu erawh ka hnar ngai lo thung.

Mi chanchin chhe lai sawi mai mai ka duh lova, ka chanchin pawh rawn sawi lo se ka duh. Chutihrual erawh chuan kan chunga rilru dik lo an put tlat chuan tlawn emaw va biak ṭhat huam ang kha ka tum miah lo thung.

Lem chan ka thiam ve lo va, ka nihna ang anga lan duh mi ka ni. Ka na a nihchuan hlim hmêl put luih ka thei ve lo va, chutih rual erawhin nat renga, mahni in tihchhiat vek ka duh ve hek lo. Ka hlim chuan ka hlim leh maia, midangte care a keimah ka nihna bo ṭhak khawpa awm lah ka duh hek lo. Ka nihna lo anga ka lan khân lanchhuah hun a awm tho tho dâwn, chu ai chuan ka nihna ang hian lang tawp ila, min ngaina tuin min ngaina anga, min ngaina lo tu chuan min hnaih lo mai rawh se tih hi ka duh dân a ni.

“Sakhi ka kap a, lo kal ve la a pum khân i hmu châk sia" u Rinpuia message chu ka hmuh sual emaw ka ti hial mai. Dar 8 a ri tawha, an rawn haw tawh a ni ngei ang, tho chhuak vatin ka in siamṭha sawk sawka, phur zet chuan an in lam pan chuan ka kal nghal hlawk hlawk mai.

Min rawn hrilh duh chu ka lâwm ngei mai, an in ka thlen dawn tak tak chuan ka zak leh deuh bawk nen ka tawi hrut hruta “Ih min lo hmuak thei angem, keimah chuan ka zak" tihchu ka thawna, a rawn seen nghal vat mai. Min lo hmuah tur thu a sawi avâng chuan muangchangin ka phei leha.

An in kawt ka thleng sumhmun ka kai tur chu kawng rawn inhawng leh ui bauh ri a rawn inrual ṭhawt a, chak lutuka tlân in u Rinpuia rawn chhuak chiah taksa ah chuan ka zuangkai nghal nawlh mai. Ka rak chûl bawk, chu ui lah chu a rawn hnai tawh nasa mai si.

“Min chhan rawh ka hlau a nia, awi awi" a dârah chuan ka lâwn chho titiha, ka rak pah tuar tuar bawk. Chutah ui chu han vin ṭhat in ui pawh chu a ngawi zuia, ka thaw huai mai. Ui en paha amah ka en leh chuan kan in melh tawn ta ngara, a mitmeng dam dup chuan engtin emaw min siam leh tawh. 

A ni lahin khawdang hawi lek lovin min en bawk nen keimah zâwk chu laiin ka hawisawn ta thuaia “Ka lâwm e" ti a ka chhuk fel chiah chu inchhûng lam aṭangin Sâwma te ho chu an rawn chhuak nuisawng mai, min lo hmu vek tih ka hre nghâl.

“Nula a pumpa ui hlauin mi taksa ah bet ṭai mai a nimaw?" Kimkima chuan rawn ti lâwng lâwngin an nui zui dar dara, an va han ngeiawm tak.“Ka hlau a lawm, mi te a seh thei a sin" lo tihlarin u Rinpuia chu ka ena “Ih thil chu in chan tawh em?" ka tih tâkah chuan lu thing nar narin “I hmu châk sia kan la chan lo, lo kal rawh" tiin inchhûng lamah chuan kan lut zui ta ṭham ṭhama.

A nu leh pa leh a unaute ka hmuh tel tâkah chuan chutia a tel ve pawh nilo ka va kal chu ka zak bawk nen ṭawng pawh ka ṭawng ṭha ngamlo, an sakhi kah ka hmuh chuan nalh ka ti ngei mai. A thau hmel bawk sia a tui ngawt ang, “Ehe ilo kal a nimaw? Hetah lo ṭhu ve rawh, heta i rawn thawk chu a lâwmawm mange nat zual deuh châng hian mi angin khawpui han pan zung zung hi a harsa sia, nang i rawn awm chuan damloh pawhin kan tân kawng a awlsam deuh ang chu" tiin a nu chuan min lo be nghal sawk sawka.

Ngawi reng chuan ka pan ve mai bawk, ka hming leh eng eng emaw chu min zâwt luama. Rinai kawm a nuam daih mai, nuih a duh bawk nên keipawh chu reiloteah ka tlangnel ta thuai a “Hei sum hi a vâng bawk sia ramsa hi kan ei ve chhun a ni bawk nen a vânneihthlâk tak tak, lo nghâk la i hâwn ve ang chu. Sakhi sa tharlam tak pawh i la ei in ka ring lo" a rawn tileha.

“Nia mahse a ngailo, in tam si a in in chan lo palh ange, a puma ka hmuh châk vang mai mai a nia, a sa chu ka duh lêm lo. Keichu min ngaihtuah suh u" ka ti ve tak nangin midang pawh chuan an rawn sawi zêl bawk nen ka hnial hneh thlâwt lo, ka awm a nuam lo vek. Lo va kal loh tawp tur a nia, a phurtu zîngah pawh ka tel bawk silo.

Sakhi chu a vun te chu lipin an chan zui zung zunga, an sa chan dân chu ngun takin ka lo ena, an hnehsawh khawp mai. A bikin u Rinpuia che vel chu ka en lo theilo, a che a rangin sa chu a chan hnehsawh par par viau mai, an zawh chuan chan insemin midang chu a tlai tawh bawk nen an haw nghâl veka.

Kei erawh la awm turin min tih avang chuan ka la ṭhu thung, “Kha hei hi lo ei ve rawh, a tam lêm lo na chu i vawikhat ei tal a lo tlin tâkin, rawn leng fo rawh aw. Kawm tur pawh ila nei âwm silova mite hi be ve bawrh bawrh la, an fel hlawm ania" a nu chuan rawn ti lehin sakhi sa chu hrang nga vêl hi min pe ve a.

Hnial a mawi tawh chiah lo nen ka lâksak ta tawpa, a rûk erawhin ka inthlahrung takzet. An mahni chhûng nen phei chuan a sa a tam silova, rêp tur pawh an nei ngut dâwn lo a nih hi, lâwmthu te chu sawiin haw tum chuan ka tho chhuak zuia “Ka lo thlah ang che" u Rinpuian a rawn tihchuan ka hnial lêm lo.

Kha ui mawlh kha a lo awm leh ang tih a nia ka hlauh, ui lian ngat phei hi chu kan ui te an nih ngawt loh chuan ka nel thei lo. Mi an seh in an â thei an ti bawk si, ka nel lo hrim hrim, in zui chhuakin ngawi reng chuan kan kal duna.

Zân a tlai tawh bawka, pâwn chhuak an awm tawh meuh lo, a reh deuh dûk mai. “Awi ka duh theilo, chu chu engthil nge" tiin thil hrâm rapawm lutuk avâng chuan ka kuah chawta, ka hawi hruk hruk bawk. “Chingpirinu a nih chu i hre ngai lovem ni? A hlauhawm loh, kal rawh" tiin a nui deuh haka.

Ka in awmna hi ram a hnaih bawk nên ramsa thâwm eng eng emaw hriat tur a awm deuh reng mai. “A hming chu ka hria a, a hrâm ka la hrelo va, chuvâng a nih kha a va hrâm rapawm reng reng veleh! Helai thleng hi a nimai, muttui aw,ka lawm lutuk" tiin ka in pengah chuan chhuh mai ka tuma, min rawn chelh nghal chat mai.

Ka mur leh er er tawh, tinge hepa min tawhna hi ka hriat em em mai ni. Bialnu nei lai lehnghâl, zâm deuh tak chuan a mah chu ka ena, min rawn hnaihin min en reng tih ka hre thei, ka zâm lutuk chu sawi mai tur pawh hrelo in ka chil ka lem khawlha, ka lungphu lah chuan rawn chhuah a tum nge a rawn phu rang lutuk tlat.

“Ih...eng..enge i tih dâwn?" ti bah deuh nakin a mi chelhna kut chu ka vawn hnana “I  mawi lutuk" a tihchuan ka hmai chu a sa nghal hat hat mai, hepa hi min tih laih phêt a tum nge mawni? Ka hmui petin ka sawi tur hre lo chuan ka ke chuan lei chu ka chhir ka chhir ringawt.

“Min en teh Hmingi" tiin ka khabeah chuan a rawn dawma, min hnaih sauh bawk. Muangchanga dâk chhuakin ka ena, chutah ka lamah a rawn kûn hniam ruai ruai avâng chuan a thil tih tum chu ka lo nghak tawp bawk. A rimte, a chetdan engkim chuan min ti danglam chiang a lawm.

Chet pawh ka che sawn ngam lo, chutah le ka hmuiah chuan rawn fawpin ka tukkhumah a vuana, a hmui chu zawi muanga ti che in ka hmui chu a zuk dek dek mai. Mit khap fawk fawkin ka ding khawng renga, chhan pawh ka tum chuang lo, thingtlawn ang maiin ka ding zum zu ringawt.

Ka kawngah hmer salhin ka chhan lêt loh vang nge a hma aia duhthawh chuan min rawn fâwp a, ka chhâng let ve ta nge nge bawk. Ngaihzâwng nei a ni tih hre reng mah ila a rûka ka duh ngawih ngawihin min fawhna chu ka hnar phal bik ngang lo. Tenawm pawh ka in ti a, mahse ka thinlung hi ka control thei bik lo a ni.

A zak hnuaiah zen lûtin dak ar chuan ka fawp let ve mial miala, kan pahniha lungphu rang lutuk leh ring lutuk chu kan in hriat hmaih hek lo, hlauhthâwnna ka neih rualin nuam tihna pawh ka nei tel bawk. Ka rilru chu a kual nuaih mai hian ka hria.

Ka lak aṭang chuan awmsawnin ka hmui chu a chûl zui heuh heuha, kei erawh en pawh en ngam tawh lovin ka kûn chal thung. Ka lungphu lah a la pangngai thei hek lo, engvângin nge min fawh ni ang? A ni hian min duh ve tho em ni? Mahse bialnu a nei bawk si, ka rilru a ti buai zo vek.

“Ka haw phawt ange, muttui" tiin ka awmsawna, a ni pawhin min chelh lui tawh bik lo. “Muttui le" tiin a din ngai chuan a la ding reng thung; ka kal hun a nghâk a nih ka rin avâng chuan ka in lam pan chuan ka tlanthla zuia, ka in rap sual deuh nawk nawk mai.

Inchhûng ka luh rual chuan kawngka kalhin ka nghêng zuia, ka lungphu la pângngai thei miah lo chu dawmin ka in ngaihtuah neuh neuh mai. Tûn lawka thil thleng khân min ti danglam hneh bawk nen engtia han hmachhawn tur nge pawh ka hrelo.

Thâwk la ham hamin ka in ngaihtuah neuh neuha, khatianga alaka ka awm mai kha min ngainêp viauin ka ring bawk si. Min rawn fawh mai kha ka ring biklo, bialnu nei reng chunga khatianga engvanga min tingam nge a nih ang? Nge kei hi min hmu mak viau zâwk nge? Khawpui nula ka nih avângin min ngai khawlo viau zâwk.

Ka star tihchu ka phalo, mahsela tûn aṭang chuan min ngaihnêp theihna tur tih ka tum tawh hauh lo. He khuaah ka awm ve dêk dêk a, an mi rêl leh sawichhiat theih tura awm ka tum lo. 

A rûka ka duhna hi tâwk tîr mai ka tum anga, a hriatthiam theih tur in ka awm tawh tur anilo. Engpawh chu nise tûn aṭang chuan ka in vêng tawh tur a ni, mi inkara inrawlh ka duh hauh lo. A bîkin mi bialpa chhuhsak duh tur khawp chuan hmeichhe zaktheilo ka ni biklo.

Reife ka ṭhut hnuah ka sakhi sa hawn chu fridge ah dahin ka room lam ka pan ta chauh va, khumah pawh muhil thei lovin ka let ka let mai, a chet dan ringawt kha ka mitthlaah a langa, mutthilh theih pawh a nilo. Min tibuai zo vek, khatiang khân che miahlo se ka duh; mahse kei ngei pawhin ka chhâng lêt a nihkha.

Tinge ka ta ni miah lo tur leh min duh thu pawh sawi lo tu heti tak maia ka duh mai ni? Ka thinlung hi biak theih se ka hau hrep duh ngei ang, engvângin nge i ta ni miah lo tur lakah i kûn a, i phut tak mai ni. Engvângin nge mi ngaihzawng kher zûna i uai? I â lutuk, i phut pangngaia phu theilo tur leh nakina i natna thlen tu a ni thei a sin; tiin ka hau ngei ngei ang.

Reife ka leh kual hnuah ka muhil thei hrama, zîngah thovin an sakhi sa min pêk chu ka chhûm ve a, a rim a tui ngei mai. Ka huana phuihnam nen chuan chhum pawlhin hmarcha chu ka râwt bawka, chawhmeh dang vak pawh ka siam lo. Sa ka hmeh dâwn tho va ka ei sen loh tur bâwl vak kha chu a buaithlâk mai mai a ni.

Rawng ka bawl lai chuan ka inluah neitunu a rawn lang hlawl. A tirah phei chuan ka hre mailo, a mah a rawn inhmelhriat tir takah chuan ka thaw huai mai.

“Mi kan luah tir lohna a rei tawha, in chung vel hi kan pa ka rawn check tir dawn a nia, fur pui a rawn thlen hunah i talbuai loh nan a neitu kan nihna angin kan rawn siam te pawh a ngai a lawm. Saw lah tuihmun chu ilo siamṭha dêr tawh elo?” a tihchuan ka en ve zauha.

“Nia, Sawma te ṭhianhovin min rawn pui a a lâwmawm tak tak. In khua hi a nuam dâwn riauin ka hria, in tlâwmngai hlawm bawk si” ka ti ve duah chu a rawn nui ve var var a.

“A lâwmawm nasat chu, kan khaw tlangvâl ho hi an fel a nia. I kawm thiam phei chuan i tân pawh an la ṭangkai ngawtin ka ring, ka haw leh phawt ange. Chhûn lamah kan pa chu ka rawn tir dâwn a nia aw, chaw ei tui phawt aw” tiin a chhuak zuia.

Keipawh chuan chhâng lêt ve in chaw ei chu ka siam zui mawlh mawlha, ka chêt hmanhmawh loh chuan rawn lêng tur an awm leh palhin a buaithlâk dawn tih ka hria.

Ni lêng chuan keimahte chuan ka awm malh malha, a khât tâwka mi rawn lêng lût leh  naupang dam lo an rawn kal pui te chu damdawi te pe in ka lo en ve a, a châng chuan hrehawm ka ti ve ṭhin. Ka chhûngte tal awm se a nuam deuh ang, zânah a nih loh chuan kawm tur em em an awm lo bawk nen a reh tlawk tlawk mai.

“Hmingsek i hman em? Inthlannaah chuan lo kal ve la"ka zanriah ei zawh rualin Sâwma te chu an rawn au leh lâwng lâwng tawha, engtin nge hetiang em em a an thawven theih zawk ni? A lehlamah chuan kawm an nuam phian bawk si, enghelh an neilo lutuk hi an nun hi a nawm hmel ka ti ngawih ngawih.

“Awi ka rawn kal ve lo mai ang, helaiah member pawh ka ni ve bawk silo. A chiloh, bâkah ka zak inthlan zawhah nangmahni kha lo lêng ula, thingpuite ka lo lum zawk ange" tiin ka chhâng zui thuaia, dik tak chuan member nilo a zu kal ve nghâl ngawt kha ṭhenkhatin ‘Mikhual te te si a va han zak lo' min lo tih ve mai ka hlau bawk sia, ka ngam chiah lo.

“A va ho e aw, rawn kal ve mai la" ti nung nungin an rawn lût a, ka lo nuih ringawt. An inchei dân ala inang hlawm em em lehnghâl, an in thurual emaw ni. U Rinpuia pawh rawn tel ve in a ni erawh a ngawi renga, a sam hma chu a ti phir leh sâng tawha, a inhmeh leh pek hle. 

Cher lutuk lo thau lutuk silo hian a taksa a in phut mawi em em a, amah a hleitling bawk nen en leh veng veng a ngai ṭhin. Mahse min hmuh hma chuan ka hawisawn leh vata, inṭhen a rilru na leh duh rûk em em ten bialnu an nei tih kan hriat avânga kan rilruna hi a inang rengin ka hria.

A rûka duhtu thinlung natna hi a nêp bik hauhlo, hrilh rem silo. Thik pawhin lan tîr a rem lova, a rûka tuar tlawk tlawk ngai lai hi a hrehawm zual lai chu a niin ka hria, mipa hi ka duh hmasain ka ring ngai lova; mahsela tûnah meuh chuan zêp theih loh khawpin duh ka nei ve ta chu ania, ka ta a la nilo zui.

“Zu kal rawh u, keimahin ka lo awm ange. In rawn haw hunah thingpui leh kurtai tui tawk ka lo chhawp ang che u, ka tan a nuam lo. Miin min lo sawisel palh ang, bâkah mi kara la awm vak loh hi a him" tiin ka nuih sâng hlawma.

Zorinpuia erawh ka ennawn duh tawh hauh lo, ka rilru a hre tur a nilo. Bialnu a neilo emaw tiin ka lo vei ve em ema, ka zak zawk; tûnah chuan ṭhian ang a nih loh chuan ka be duh tawh lo. “Ka lo awmpui ange, ka kal peih chuang lo" u Rinpuia chuan a rawn ti khauhva, ka lo en ha mai.

A thutak nasa mai si “Eh, i rawn kal ve dâwn emaw tia, a nanga pawh chu. Taka Hmingek, a ni pawh i u tho keini pawh min u rawh" Mama bawk, an ṭawngthei ania aw. Tin zuau zuaua ka pan chu tlânchhe chungin an chhuak fai ta veka “Lo ṭhu la, tinge kal i tum loha?" tiin ṭhutthleng chu ka kâwk zauh a.

Rawn ṭhut thlâk pah chuan a insiam rema, “Nangmaha awm nuam i ti lo palh ang, a reh ve a vawiin lam pawh i khua a har viau lo maw?" a rawn tihchuan ka nui ringawta, nizân kan awmdân vang pawhin chhan mai ka harsat, ka ngaihtuah tlat bawk si.

“Nge nangmaha awm nuam i ti zâwk nge?" a rawn tihzawm leh zata, thingpui pêk paha a bulah ṭhu thla in “Nia a châng chuan mahni chauha awm hi a ṭha zawk asin; kan thurûkte kan buaina te a chhuak ngai lova, mi pawi sawi lah a har. Mi biak tam lutuk pawh keichu mi ring hma chi ka nih avâng hian ka lo ṭawng leh duah ṭhina, mi tân ka lo hnawksak viau mai thei ani" tiin ka nui hak haka.

Ka thusawi vel chu ngun takin min lo en thung, enge a hriat ni dâwn ni. A awmdan hi a cool raiha, mahse engtin emaw tak hian min awmtîr ka timai, ngaihtuah bing tak nei a ang bawk. 

“Nangte hi i kal ve lova, hruaitu atân an lo duh phian mai thei che a sin, i ṭha ngawtin ka ring. Kal ve tûr che a lâwm" tiin ka nui hak haka “Aaa ka peih ve lo, hruaitu nih chu mi mitah ṭhat a har, sawisel kan kai nghal mai zel, hetia kan awm mai mai laia kan ṭhianṭha te hi nihna han neih chiah hian min sawiseltu an lo ni leh ṭhina; mi mit tlun a har bawk nen hetia awm mai mai hi a ṭha zawk" tiin a thingpui chu a in nghal zat a.

A sawi chu a dik ve tho mai, hotu nih chuan mi ṭawngkam chhia leh ṭha zawng zawng dawn angaia, dawhtheih a ngai dâwn si kei ka peih chi a nimiahlo, u Rinpuia sawi pawh hi a dik chiah mai, hotu nih chuan haw tu leh duh tu kan ngah ve ve an tih ṭhin kha.

“Um i bialnu i rim leh dawn lovem ni?" ka zâwt lo theilo, engtin nge min chhan ang tih ringawt rilruah a awm ”In lêng dang a nei ve ang chu. Bâkah ka lêng reng bik hleinem, nang bialpa teh i nei em?" a tihchuan ka lu ka thing nar nara.

Ka rilru chuan “Tinge bialnu i lo neih? Keipawh hian ka hmuh tirh aṭang che khân ka duh tawh che a sin, engvângin nge i lo neih kher le? A tir te khân lo hria ila chuan ka duh lo tur che" tihchu ngaihtuahin Sâwma ka dem leh hnuhnawh, a single a tih miau avâng khân ka lo ring nghal mai kha a nisia.

“I hmelṭhat nen bialpa neilo atân chuan i uiawm" tiin a nui haka “Nia kan duh kan tawn hunah te chuan kan la nei ve ang chu, tûnah rih chuan hetia la awm hi a nuam rih. Kan duh tak kan tawn hunah te chuan kan la nei ve ang chu" tiin ka thingpui chu ka in zauha, a ngawi leh vung vung tawh.

Enge a hriat dâwn ni, ṭawng duh lutuk chu nilo mahse tuna a awmdân kher kher chu nidaang ai a cool zual riau mai “I rilru a hah em ni?" ka ti ta tawpa, a awmdân hian ngaih ti ṭha heklo, a kulmuk ru tlat bawk sia, a hre ṭha lo tân phei chuan a ngaihṭhat thlâk miah loh. Misual thil ṭha lo tih tum in ngaihtuah muk rûn hi a ang ber.

“Hah lo e, nizân kha" a rawn tih tâkah chuan ka zak chu ka hawisawn vata, ka sa nghal pup pup mai, a rawn sawi chhuah ka lo ring tawh lo kha a nia, rin loh lama a rawn sawi leh ta si chuan min ti zak takzet. 

“Ih....ka sawi tawh lo teh ang, bialnu i nei bawk nen thleng palh angah ngai rawh, ka" engmah ka sawi belh hman hma chuan min rawn chelha “Keimah zâwk hi ka dik lo ania'ng, in siamṭhat ka ngai a nih hi, i ti dik e. Bialnu ka neia, a tân chuan ka rinawm tur a nia lawm. I sawi dik chiah; mipa le lo tak ang maiin a lâwm le ka awm ni" tiin a nui hul haka, ka hrethiam ve tho mai.

A rilru a buai a ni ngei ang, mahsela engvângin nge a buai ang? Keimah vângin maw? Tihchu ngaihtuahin amah chu ka va en leh ṭhin, ngawi reng hian hmalam ngawt chu a ena, a in ngaihtuah buai viau pawh a niang, kei erawh engmah ngaihtuah tawh loh tumin ka in fuih sauh sauh thung.

Bialnu nei lai a ni a, mi zaktheilo ber anga lo zar buai ve chhên kha ka tum pawh a ni heklo.

“Mipa chu tlangvâl lai chuan a ni ve alâwm, in thiam lo duh suh. Mahsela bialnu i nei a nihchuan a tân chauh rinawm rawh; rinawmna hi a hlu a nia" tiin ka nuih var vara, “Ka duh nge duh lo pawh ka hrelo" a tichu mak ti zet hian ka ena, a ngaihzâwng a nia a duh leh a duh loh pawh a hrelo chu ka ngaihdan a dang leh zual sauh, mipa lerh tak a nih dâwn hi, hnaih lo ila ka tân a ṭha ber.

“Ka va awih lo" ka tichu a phun hluka “A ni a lawm , bâkah i bialnu tisek lo teh" a rawn tihchuan ka hmui ka ner nawka, a va han ngeiawm tak. Eilo tih hriat taka ka awm chu min rawn melhin “Hmeichhia han duh huam huam leh ngaihsak khuk chûk hi ka tum lêm lo " a rawn ti deuh hmak mai.

“Eee a nihchu, i duh tak tak loh chu hnaih lo ngam mai la. Duh loh pui nih pui si chu mipa lerh tak i nih chu a” ka ti chu a rawn nui haka. “I ngaihdan dân le, hmeichhia te chu rinawmna neilo, sum hmanga thlêm mai mai theih a lâwm in nih? Ka sawi dik em? Hmeichhe rintlâk loh lutuk laka lo rinawma, lo ngaihsak chiam kha ka hna a nilo” a tileh maia.

A thusawi zâwng te chuan a ner sawk sawk mai, a eilo tak tak viau pawh a niang. A ngaihdan ka hriat tâkah phei chuan ṭha ka tih rûkna chu lan tira hriat tir ka tum lo bur. A hmeichhe ngaihdan a thlâk te anih ngawt loh chuan engtikah mah a hre ngai lo bawk ang.

“I ngaihdan a mak hle mai, hmeichhe pakhat tawn fuh loh mai avâng hian hmeichhe dang hmuh dik loh hi a fuh ber lo. Nakinah nupuite pawh i la nei duh dâwn lehnghâl, i ngaihdan kha han ngaihtuah lêt la, nangmah i dik loh vâng zâwk te pawh an ni thei, hmeichhia i hmu hnem viau animahna, mahse infiam nâna hman tur chu an ni bik lo ania” ka tihchuan a nui leh maia.

“Chu nangpawh ka bem tlu thei ang che i tihna em ni? Ka zûna uai hi na an ti viau a sin” a rawn tihrual chuan ka ner sawka, a va han zâm lo mai mai tak. Ka va en chu a lo la nui sâwng zuia.

“A nih chu, khatiang sawi tawh lo teh ang, khatiang sawi pui tur che pawhin kan inhre chiang hauh lo” tiin thingpui chu thlitin ka pe zuia.

Kan in be tawh lêm lo, ngawi reng chuan kan ngaihtuahna kan kâwm tih a hriat. Hnaih lo tur leh a zûna uai lo tur chuan ka infuih sauh sauha, ka star tih pawh hi hre suh se. A zia hi ka hriatchian tâkah chuan ka mipa duh chi mizia a pu hauhlo, a lerh dawn tih a chiang ropui si.

“Nang i zûna uai an awm ve tawh em? Nang ang khawpui nula no leh chhelo te chuan duhtu pawh i ngah ang chu tiraw? Keini thingtlâng tlangvâl ai ṭha ṭha” a thusawi zâwng a a hmêl nui sâwng chu ka hmuh hmaih lo, mi a nuihsawhna leh a mi hmuh dân dik lo riau avâng chuan ka lâwm hauh lo, ka tum hmaka.

“I hriat tur chin chu in vêng information ah an rawn puang mai ang” ti ve hmakin ka phone chu ka en san daiha, ka ngei zo vek tawh. Ṭha te kha ka lo ti ve em em a, tûnah chuan a hmêl te hi ka ngei chi. Chutih rual erawhin mi hipna chu a nei na tak tak.

Nula te duhzâwng tak a ni tih a inhriat vâng pawh a nimahna a in rin tâwk em em ni. Ka mipa mize duh loh ber a ni, chapo, ṭhat in hre em em leh midang enga tân mah ngailo mi hi.

“Oh! A lo nimaw? Ni dâwn tak e, ka lo zâwt thui palh che a nih chu, tûnlai enge i thawh ṭhin? Keichuan ka ngaihtuah reng zêl che” a rawn tileh chu rum zetin ka ena, hetiang khawpa mipa nghal leh mahni induh tâwk hi ka la hrelo. Ka hmuh tirha ka ngaihdan kha a thlâk vek mai.

Tûnah hi chuan mipa ngeiawm leh hmêlṭha bawk, ngeiawm bawk si chiah chiah a ni ka hmuh ni. A ke chu khawkherh ûtin ṭhutthleng nghenchhanah chuan a bân a kham ar ara, a mit ko min la sân zuk zuk bawk. Ngam ila chuan ka vaw thlu tawp ang.

“I zak lo hle mai, inthlannaah khân engvanga kal ve lo nge i nih? Zu kal leh daih rawh” tiin ka melh ram rama, kan inhriatna la reilo mahse hlauhna pawh ka neilo, a zia hian min ti thinrim tlat.

A hmêlṭha zet chu a rawn ti sawi nawka “Kei tal in ka awm pui loh che in, min ngai dik lo ta sa sa bialnute pawh ka la duh belh theia, midang awm loh lai hi chân a ngai a lawm. A rûk tak chuan min star deuhin ka hria” rawn tiin a nui vur vura.

“I hmêl bakkhate kha a nihchu, ka star thlâwt lo che. Nang ai star tur an tam lutuk hi e ka zak zâwk, i zak lo hle mai, mikhual nula biak dân pawh i thiamlo” ka thusawi avâng chuan a rawn nui hawk hawka.

“Keiai star tur an tam, mahse a ruk tak chuan ṭha chu min ti. Hmêlṭha min tilo tu hi chu an vâng ania, ka zûnah i la uai lovang tih pawh a hriat miahloh. Hmeichhia hi chu in zia ka hrechiang ve tâwk a lawm, mikhual nula i ni tih ka hriat avângin a lawm ka rawn rîm che. Mikhual nula chhelo tak” tiin a nui leh kur kura.

Min tih thinrim nuam a ti hle tih ka hre mai “Haw vat teh, i rawn lên ve pawh a ngai lo ang. Mi hmuhah tlangvâl fel ber âwm ang zia zangin i awma, mahse nula i biak dân a mawilo hle mai” ti hmakin kawngka lam chu ka ena.

“I ti dik chiah, hmai hnih nei hi an tam asin. Keipawhin ka nei angah ngai rawh, tin, in lêng an hnar haw ngailo, i inlêng ka ni tlat sia ka la rawn lêng fo ang, fawh i nuam khawp mai” ka insûm hman tawhlo ka bula lukham awm chuan ka vawm pawpa.

Lo man chat hian a mitmeng chu a inthlâk hlawka, a meng rum deuh ta al mai. “Min bem tum dân chu a danglam hle mai, ka hmeichhe duh chi tak i ni. Ka rawn lêng leh ang, mangṭha phawt le ka bialnu hual” tikherin a tho chhuaka, pâwnlam chu a pan zui nal nala.

“Hmelchhepa, nghal lutuk” ka ti chu alo la hre pha nge “Nia ka hmêlṭha ka hria a lawm, nangpawh i hmêlṭha” a rawn tileh chu thinrim zet hian chhuat ka per dat data, ka lungawi lo leh tlâwm la si chu ka in sawh tau nghawng nghawng mai.

A tira pa ka tiha, cool ka tih tehlul nên tûnah chuan a nghal ka ti khat tlat, ngam phei hi chuan ka va thlu tawp duh ang. Mize pahnih chu a nei chiang a nih kha, a bialnu hmasa in a kalsan an tih chhan pawh kha a ngeiawm lutuk vâng bâk hi a nilo ang.

Keimahte chuan ka phun ka phuna, vawiin thleng kha chuan cool ka tiin ka duh ve em em a, tûnah chuan a ngeiin ka ngei. A hmelṭhat a chhuang lutuk pawh kha ka ngei bawk

 A sakhi sa min pêk pawh lâwm thu sawi ka duh tehlul nên a zia nên khân ka ngei zo veka, ramsa to zia ka hria a. Ka lâwm viau rualin amah kher kha chu lâwm thu ka hrilh nguar ang, ka ngei lutuk. A lehlamah erawh ka awm ve ṭan dâwn dek deka, chutia huat ka hlawh nghâl ringawt chu ka inthiamlo ve deuh bawk si, mahse a mah leh a zia khân a cho êm a ni.

Chutia ka lo ṭhut tûm bûr lai chuan thâwm rawn awmin Sâwma te ho ṭawng ri ka hre zuia, ka in siamṭha nghal vata. An uang thei bawk nên min rawn hmuh chuan mi an fiam leh char char dâwn tih lah ka hailo, an ngeiawm thiam ropui si. Reilote chiah la in hre mah ila mi an nêl bawk nên hmêl hmuhnuamloa ka lo awm an hmuh chuan an ngaih a ṭha lo anga, thil min zâwt vak dâwn bawk si, hmêl hlim sâng chuan ka lo hmachhawn luia. 

Nuih erawh har tak a ni, ka rilru in Zorinpuia chu ka sawichhe vak vak ringawt. Khatiang mize nghal lutuk kha engtin nge a neih theih zâwk?

“Kan rawn haw e, zanin chu nuam par par ve, kan duh tak te an tling vek e" Sâwma chuan a rawn ti lût nghal lung lunga, an awm tawh hi chuan thâwm hi ana nghâl em em mai a nih hi, nui hak hakin “A va nuam âwm tak ve, chu in zuk thlang fuh viau a nimaw?" tiin ka tho chhuaka.

“Thingpui in duh em?" ti a ka zawhna chu han nui leh dar dar phawtin “Kan in tawh, an sem zawm deuh renga, thingpui puarin kan puar alâwm, khawnge Zorina chu?" tiin an ṭhu thla a, keipawh chu ka ṭhu thla veleh nghal mai bawk. Kha mi nghal lutuk pa chanchin sawi pawh kha ka phûr lo e a.

“A haw“ ka lo ti deuh hmuk chu min en ṭhapa, enge an hriat ni? “Enge khatia min en vak? A haw a nimai a lawm” ka ti chu in en kualin an nui haka “A ze ngeiawm ilo tawng fuh pek a nimaw? Hmeichhia nên chauha an awm tawh hi chuan a zûna an uai loh chuan an thinrim ngei ngei, chu pawh hmêlṭha ti chungin, a mah ngei tu te hi chuan hmêlṭha an ti tho a nia” Sawman a rawn ti chu ka ner saka.

“Ka ti ve bawk lo, khatianga ṭawng thei lutuk mipa kha ka la hrelo. A bialnu chu a vanduai ve ngawt ang” ka lo ti leh hmanhmawha, ka ṭawngkam fimkhur lam pawh ka ngaihtuah thei tawhlo. Khapa Zorinpuia kha ka ngei êm bawk a ni, ka star na zawng zawng a ti reh nghal vekin ka hria, a hmêlṭhat a hre lutuk pawh kha ka ngei chi a ni tawh hrim hrim.

“Nang ni pahnih chu kan awm loh chhûngin in lo in ngei hman hle a nimaw?" Sâwma chuan min nuih vur vur  chung chuan a rawn ti a, Mama te pawhin ka lam an rawn hawi nghâl ṭhap mai. Min an ti lai dâwn dâwn mai, enge an hriat ni? Awm an tinuam lo, mi an en rawn ṭhup bawk si.

“Engmah ka sawi peihlo" lo tiin ka ngawi zui ta daiha, an bula ka rêl vak chuan an lo va hrilh leh ang tih ka hlau bawk nên sawi thui loh a ṭha zâwk. Bâkah ka la hre chiang hlawm lova, tumah han rin nghal bur leh han rêl nghal chu ka duh biklo. Min hmuh dân te pawh a dang hlawk thei, mipa vek an ni bawk si. 

“Zorina hi chu hriatthiam a ngai a nia, ngei lutuk suh aw. A zia i la hre chiang lo a nihkha, hmeichhe pakhat avângin hmeichhia a hmuh dân hi a dang zo va. Chuvang mai mai a nih kha, a duhzâwng tak i ni pawh a ni thei” an ti chu ka ner saka.

“A duhzâwng nih pawh kha ka duh lo ea, sawi tawh lo teh ang u. Khatiang mi chimawm lutuk kha, a chanchin sawi ka peih tawh lo, keimah pawh min tidanglam vek” ka ti chu an nui leh dar dara, ka thusawi chu an ngai thutak pawhin ka hrelo. Engkim chu an nuihpui niber tawh hian ka hria.

“I lo hmuh changtupa ve nên, changtupa aṭangin misualpa ah a chang daih mai em ni?” Sawma bawk chuan a rawn tileha, ka tin nghal uaih uaih mai.

Ka awm tirh aṭangin ngeiawm lutuk hlir hian a awm a mi a tizak ziah lehnghâl. “Engmah chutiang a awm lo, ngawi ve mai mai rawh. In khua ka rawn kal hma a ka awm dang ang  chiah khân ka awm, engmah hre hawt silo vin i duh duh sawi tawh hauh suh" tiin Sawma chu ka melh ngheka.

A ni erawh tifuh intih hmel lutukin a lo nui suk suk ringawt, mi fiam chu nuam an ti tih a hriat, ka ṭhu tum bura, an inthiam lo leh deuh nge “Tak takin in amah avângin mi be duh lo ten i awm ange, i ṭhiante kan nih hi. Mipa pakhat avângin ṭhiante huat loh tur, Zorina pawh haw suh, nakinah i tân a la ṭangkai phian thei ania" an han ti leh ngei a, a âwih hian ka âwih hlawl lo, khapa kha ka ṭangkai pui anga maw? Teuhlo, ani puih pawh kha ka ngâi ngai lovang.

“Ka ṭangkai pui dâwn hian ka hrelo, a hrim hrimah khatiang hlir khân em ni a awm ṭhin? Min hrilh duh loh vaih chuan ka be duh lo nghal ang che u, in ṭawngthei emai. Biak pawh in phulo" ka tichu an au nasa mai, an awm hi chuan kan bengchheng nghal em em zêl chu anih hi, thâwm dim lam lah hi an tum der silo.

“Ni bik love, hmeichhia hi a ngai dik lo laklawha, hriatthiam a ngai a nia. Hmeichhe pakhat khân a lo bum nasa êm a, hmeichhia hi vai huatin a hawlo chauh a nih hi. Bialnu a han nei te lah hi a ngaihsak thei tawh lova, an buai ve fo ania, chutih rual erawhin mipa sual tak chu ani bik lo a nia, an bum dân kha a tenawm êm a. Hmeichhia hi a ring thei tawh lo a ni zawk" Faka chuan a rawn ti ta khauh khauha.

An ṭhianpa thlavang chu a awm loh lai pawhin an hauh ve ṭang ṭang a, sawisêlna thu an la chhak chhuak hauhlo. Ṭhianṭha tak tak hi chu kan awm loh hunah kan chanchin an sawi leh dân aṭang hian an hriat ve viau mai. An ni pawh hian an ṭhianpa chu hmeichhe bulah pawh an sawichhe duh hauh lova, an pa fak ṭang ṭang zâwk chu a nih hi, mipa fing tak an niin ka hria.

“Sawi tawh lo teh ang u, amah Zorina ber pawh a awm tawh loh hi. Hmingi nang pawh kan sawi tawh ang khân, a fiam ve mai mai che a nih kha, a fiamthu ah ngaihsak la thinrim pui lo turin kan duh che a nia. Hmeichhia a hmuh dân hi a dang tlat tawh a, thil dang sawi tawh ang u, kumin chu kan lo neihna tur a hnai deuh dâwna, han kâng ṭha hrâm se aw” tiin Sawma bawk chuan thudangah a pakai san ta daiha.

“Ni e, kâng hlum kan awm tawh lo tur ah ngai ila, awm tawh lo hrâm se ka ti bawk. An thla a hrân leh chuan e keichu khawhar in riah pawh ka tim rei phah a nia aw, thâwm a han awm reng kha chu ka ngaina hlawllo” an rawn tihchuan ka meng phâwk nghal hru mai.

“Engmaw thlahrang maw? A ni tak tak em ni? Tûnah ala hrâng em?” ka ti chu an in en kuala, ka hlauthâwng hmêl an hmuh vâng nge “A hrang tawh lo, a tir te a a hran bâk kha chu tumahin a thâwm pawh an hre tawh lo. A hlauhawm loh ania, a thihna a rei tawh lutuk nikum daih a ni tawh” an tih tâkah chuan ka thaw huai mai.

Ramhuai lam hi ka ngaina miahlo, hmuh ai chuan in vuak thih dan tawp pawh ka duh zâwk. Thlahrang ka ngainat loh avâng hian a thawnthu emaw a film emaw pawh ka en ngailo, ka dawih bawk nên ka tâl buai phah ṭhin a ka nu leh pa hian ka naute pawh an khap vek zel.

“A ṭhat chu, kei ka ngaina hauh lo a nia aw, sawi tawh lovang u. Engtikah maw lo chu in hal dâwn a” tiin ka en ha ha hlawma, an lo hal te pawh hmuh ve ka châk bawk nên ka ngaihven lo thei lo

“Kan hâl har tawh lovang, tûn thla chhûnga hal hman ngei ngei a ngaia. Chutilo chu sawrkar lam dân kan bawhchhiata, ram a kan palh hian action an la na ṭhin sia, dai hnai nei ho phei chuan an hâl vek tawh zâwk mawle” tiin lo chungchangah chuan an pakai hlawma.

Chutia titi dang an vawrh thei ta chu ka thaw huai mai. “A hrim hrimah bialnu te hi in nei lo em ni? Hetah in rawn lêng vek zel bawk sia, in bialnute in rîm ve ka rin nên, nge in hmu zo lo” ti a ka zâwt chu an la na ngâih ngâih teh e.

“A awihawm loh emai, kan hmu kan hmu, kan ngaizawng duh lo mai mai alawm. Hmingeki ngeiawm viau suh aw, Zorina kan ko leh mai tur a nia, i khawhar hlauin kan rawn lêng mai mai a nih hi, chu min hnar tihna em ni? Dik tak chuan maw i hmel hi kan duh chi a nilo" Sâwma bawk, ka ngei lutuk chuan tho chhuakin ka va chum nghal awk awka, a lo au nasa mai.

“Kha pui hetiang hmeichhe kawlh lutuk hi kan lo rim duh a ni, keichu ka haw daih dâwn" tiin a tho chhuak zuia, chutiang chuan ṭawng mahse a thinrim tak tak lo tih a lang reng “A ngailo la awm ve mai mai rawh u" midang pawh an lo din tâk suau avâng chuan ka ti vata, an la nui ṭhaw zui.

“Bialnu nei ve lo min hmusit emai kan haw mai ange, ngaihzâwng neihloh hi a va na ngai êm.  Tikhan hmangaih thu di te kha ramhuai lo infah dun tir la, mangṭha phawt le" tiin an tlanchhuak ngeia, an va han chimawm thiam tak em. Ka thil hlauh ka lo sawi duh palh palha, mi an tih ṭhaih duh hialin a nia ka rin.

Mi an ti hlau zo vek, ka in lah hi ramhnuai a hnaiha. Thâwm mak pui pui hriat tur a tamin keimah chauh ka la ni leh zêl nên thla chu muang lo duh tak a ni.

Kawngka chu kalh sawk sawkin room lam chu ka pan thuaia, khawvawt nên thlamuang lo tak chung chuan ka khumah chuan mu in ka phone chu phawrhin ka ṭhiante leh mipa min rawn private tu ho chu ka chhâng a, chutia ka rilru ka lâk pên tâkah chuan ka hlauhna te pawh a zia awm ve deuha, a rûk tak erawh chuan thâwm awm hlek se ka phu leh zuk ṭhin.

Keimahin ka awm ngai siloa, ka chhûngte tal awm se ka ti ngei mai. Ka mut a rawn chhuak ṭan a, Pasalṭha thawnthu chu ngaithla in suangtuahna ka kâwm neuh neuha, Zorinpuia nên kan inhnialna te chu ka ngaihtuah neuh neuha, a ngeiawm thiam lutuk kha a mak ka ti zâwk. Chutih rual erawhin a sawi ang tak tak khân ka duh rukna erawh a la reh hauhlo.

Mihring in hip tawnna hi a lo maka. Inhmuh rei leh reiloh te, in hriatna rei leh reiloh pawh a ni lo, mihring pahnih thinlung taka inhmu nghal tlat hi an awm ve a, lungphu ti danglama ti rang hlawktu hi an awm ve a.

An mizia kan hriatchian leh an mahni kan hmuh ngun avanga duh chu kan nei ṭhina, mahsela keichuan vawikhat inhmuhnaa keimahni ngei kan nihna hloh khawpa min ti danglam theitu an awma an zûn hi na ka ti zawk, inhriatchian avangin inzawmna hi a nghet reng kher lova, in hmuh ngun leh hmelṭha in tih avâng ngawt te in tu thinlung mah a neih theih loh bawk, mihring thinlung ti danglam tur chuan keimah ni a chê a awm angai a ni.

Kan hmangaih nghal mai theih mihring an awma, kan hmuh ngun viau chung pawha min hneh thei miah lo tur an awm bawka. Hmangaihna awm chhun zawm zêl tûr chuan mi pahnih tena an bawhzui a ngai, 

Chutih rual erawhin Zorinpuia lakah erawh ka rilru hriat tir mai mai ka tum hauh lo. A mizia lah kha khati kha a ni a, hmeichhia a ngainêp hle tih a hriat renga, tûna a bialnu pawh eng teh ualah a ngai lo tih a tilang reng bawk.

“Hmelṭhanu i la meng em? Zanin chu a nuam hle mai tiraw?” Zorinpuia message chu seen pawh ka seen duh lawk lova, ka ngei tlat. Min rawn biak tirh te kha chuan ka lâwm hman nen, a number te chu delete leh mai ka châk ut ut.

“I mak hle mai” ka ti ringawta, “Mak ve ang chu, nangpawh i mak alawm. I hmêl ang an awm lo hrim hrim pawh kha i makna chu ania, kan mak ve ve” a rawn tinghal zata.

Ka message chu a châng reng emaw ni. Kan inhnial chho char chara, amah avângin ka hlauh pawh a reh leh vek tawh. Hetiang khawpa min hnial thinrim thiam hi ka la tawng lo, “Ka mu dâwn, nang hnial nân che ka meng rei peih lo” ti a dah mai ka tum rilrûk lai chuan a message chu a rawn thleng leha.

“A tîrah khân ka cool thiam phian lo maw? Min en ngun teh lul nên khân, I star ṭhelh ka nih ber mai hi tiraw? Min hmuh MAN hman tehlul dâwn nên aw. Ka Sakhi kah kha tui ti deuhin ilo ei dawn a nia, pasalṭha sa kah i ei thei tur te kha lâwm hle rawh. Hmelṭhat man a nih kha, a nih leh muttui” tihzawng sawiin a offline zui hmaka.

Ka ner nawng nawng tawh, a thusawi lah chu a dik ang fek fawk lutuka. Chhân mai dân tur pawh ka hre tawh lo, ka en ngun zia kha a lo hmu ve reng aniang, ka va han ngei tak.

Tûn aṭang chuan ka hlat a ngai a nih hi, a ṭawng thei sia a bula ka awm reng chuan a hri ka kai ve palh ang tih ka hlau. Chhâng duh tawh bik lovin ka mu zui ve ta daiha, ka rin loh lutukin mipa duh rûk deuh ka nei ve a, a hma aia min ṭhawng turin mizia mak deuh nei a la ni zuia, keimah hi ka dik lo nge amah kha a dik lo zâwk pawh ka hrelo e a.

Star chu ka nei ve ṭhina, mipa min bem tute pawh an awm ve bawk, Mahse tûn ang em em a ka mipa tawn anga mak tih leh ka star ni chunga ka ngei ber ni thei ang hi an la awm lo, thu tam tak sawi lo mahsela a ṭawngkam tlêm te pawh khân min ti thinrim thei em em bawk si.

Hmangaih ka nei ang tih ka lo ngaihtuah ve ṭhin a, hmangaihna ka suangtuah dân pawh mawi tak ni turin ka ngaia.

Hmangaihna kuhmum ṭan tir chu a mawia, a duhawma. A hlimawm bawk, mi pahnih ten kûng khatah par rual tuma, hmun insiam tawn chunga an han ṭhang chho dûn tur ngaihtuahin chu hmun ka siam pui theih tur chu tunge ni ang tih ka ngaihtuah fo ṭhin, chu chu Zorinpuia ka hmuh khân ka beiseia, mahsela ka han bêl chianga, ka rin ang a lo ni lo hle bawk si.

Ka in ngaihtuah a. A lehlamah chuan a chêt dân kha danglam riau hi ka tia, min hneh ru riau pawh kha a mak ka ti zawk, khatiang anga min han hnial fak fak leh a nui sâwng reng mai ka hmuh khân ngei viau chung si khân ka en lo phallo, nêp ka inti a. Mahse ka thinlung hi ka thunun thei lova, a vawikhatna atâna a phut dân thlâk danglamtu a hmu chu a awm tir reng thei ngang lo niah ka ngai.

Ka ṭhiannu ka va hrilha, “Awi ava ngeiawm tak ve, ka hmu ve châk e a, khatiang mipa nghal lutuk kha an zûn ana phian an i ti a nia aw ?" a rawn ti duah chu ka ner sak mai “A awihawmloh emai, a zûnah chuan ka uai hauh lovang, ka ngei vek tawh. A hmel chu a ṭha, mahse e ka ngei a ni” ka tileh chu a rawn nui vaka.

Ka nuih pawh a za ve lo, ka ngaihtuah chiang a. Ni e hmeichhe duhzâwng chu a ni chiang alawm, kei ngei pawhin hmêlṭha chu ka ti, mahse amak a ni amak.

“Nakinah chuan ila duh viau mai thei a sin, ka sawi kha hetiang mipa hi an luck in an zûn ana lutuk, i la uai hnup lovang tih pawh a hriat loh, a hmêlṭha tak tak em ni? "a nui pah har hara  “Aw, ka hmuh tirh kha chuan vai film ang khân vawikhat kan in melha, thli a rawn thaw heuh heuha, chuan ka bengah rimawi rawn ri in ka en ta renga, mahsela kha a mizia a rawn ti lang chiah kha chu maw, chûng thli thaw heuh heuh chu rehin thli na pui pui a rawn tleha, mi a chhêm per lâwp ang chiah hi a ni, a bam fai vek”  ka tih leh lai chuan.

“Awi awi awi vai film a nih loh kha Mizo a nih kha, amah te kha ka hmu châk riau, a thlalâk te nei la, ka bem chhin châk. Thawnthu ang hian a zia zawng zawng hloh vek khawpa, ka zûna uai tura siam ka châk ” a rawn tihchuan “Awi sawi lo zâwk teh, siam ṭhat theih pawh anilo ang, amah tawp kha bad boy" ka ti chu a ngawi ve vung vung mai.

“Kha tak kha a lawm ka sawi duh, min han vei bur sela. Keimah avângin a sualna te han kalsan sela, a nuam dâwn em a sin. I sawi nasat poh leh keichu a mizia kha ka duh chi, awm ve ila chuan a bialnu neih leh neih lohah ka buai lovang, a tih ang chiah khân ka tilêt daih mai dawn a ni, a ṭha viau lo ang, mipa ngeiawm leh mahni thuduh deuh hi ka duh, hetiang mite hi belhchian an dâwl in an danglamna haichhuah tur a tam ania” tiin a chawl data.

“Mi hi an pâwnlam lan dân ringawta thlir tur an ni ngailo, misual ber te pawh hian ṭhatna lai an lo neia, hlim taka nuih hawk hawk hun an neia. Mi hi an hmêl aṭang te, an landan aṭang te a teh ngawt tur anilo, kan nêl miah loh pawh kan tâna mi ṭha tak an lo ni theia, kan mangan huna min pui tu an ni daih thei a nia, kan sawichhiat fo pawh kan lama ṭang te an lo ni leh daih a nia” a tihchuan ka chhâng tawh lo, a dik chu ka ti ve tho.

Han vin ve pawng pawng ṭhin mahse min ngaihtuah zia ka hre chianga, a thusawi pawh ka haw ngai lêm lo. Min hmangaih vâng tih ka hria “Um ka hria a lawm, ka hua pawh anilo, mahse a mi tihdan kha ka ngei ve ema, a inla hmêlṭha lutuk kha ka hua, a hmêlṭha tho na chu" ka ti chu a rawn nui ring ngei mai.

Thutak ve tehlul nen chutia thutak lai laia a lo nui chu ka mit ka chuar nâng a “A nuihzatthlâk miah lo ania, ka zak ve thoa. Ka star tih pawh ka phalo, mahse hmaichhana a rawn sawi fak fak kha chu e, dâwt sawi mai loh chu tih theih dang awm hek lo, ka hnial ta ngawt a nihkha. A mitmeng kha min hmu tlâng vek ni maiin ka hria" ti a ka sawi leh lai chuan a rawn nui leh har hara.

“A pawi hleinem, tupawh a star theih a la

 Pathianin min siam chhan pawh a nia, star chu duh leh neih ṭeuh pawh a pawilo, a hek theilo. Star neih chu a thiang a lawm, engah nge kan duhzâwng tak hmêl kan hmuh chuan kan duh loh bik ang? Tumahin duh suh u, mi ta a ni tawh pawh an la tih loh kha a ho lutuk, bem hmiah rawh" a thusawi dân lah hi enghelh neilo thawveng lutuk tih hi an hriat ṭhin ngawih ngawih zel.

Mahse hei hi a ṭhatna tak ani, miin a zia an hria a. An lungngaih leh buaina an tawh hunah keimah pawh tiamin a thurawn lâk tuma betu pawh an tama, mi harsatna sut kian a thiam hle bawk. Ka ṭhiannu mah nise ka ngaisang, hmangaihna lam thawnthu ziah a tuipui hle a, chuvanga tûn thlenga la single a ni bawk. 

“Ka suangtuahna ang lal fapa ka la hmu lo, ka hmuh hma chu len tar ngai pawh nise ka lêng tar mai ang. Keichuan mi ngaihsaka min ngaipawimawh tu leh, dawhthei taka min enkawl tur ka hmuh hma chuan ka neilo mai ang, tihian ziak mai mai ila ka duh tâwk rih mai" a timai zela, keipawhin ka tilui duh ngai lêm lo, dik tak chuan bemtu pawh a ngah lutuk. Mahse mipa hi a ngaihsak hlawl lo a ni.

A mah bem tu an awm leh hian a nuih a za tlata; fiamthu an thawh khum emaw tih turin amah bem tuma thu thlum tak tak an fah te hian a nuih uar uar zêl, mahse biak dân a thiam leh hle thung. Keini phei chuan amah bemtute hi a bâwl in a fiam mai mai emaw kan tia, a nihna takah erawh chuan ṭhian ah a lo chhuah hmak ṭhin zâwk. A ṭha ka ti phian, amah a fela bialpa chu ṭha tak a hmu dâwn a sin mawle.

Amah lah hi bialpa nei rawh tih lah hian "Ka duhzâwng tak mize nei ka la hmu lo” a ti mai zela, kan tilui duh tawh bik lo. Amahin a duhzâwng tak a hmuha, a duh hunah chuan a nei ve mai ang tih hi ka ngaihdan a ni tawh; bâkah tûnlaiah chuan a hmei a pa hian mi rinawm leh rintlâk hi an vâng tawh a, rinawm anga insawi, mahse mi kawp hreh miah lo hi an tam tawh bawk nen fimkhur hi a ngai reng a ni.

Rei vak lo kan in biak hnuah in mangṭha in keipawh chu ka muhil zuia.

Zîngah tho in ka hmai te chu ka phih fai sawk sawka, chaw chhum tur chu siamin gas ah chuan ka chhuang zuia. Ka sakhi sa chhum ala awm bawk nên chawhmeh kangin hmarcha ka rawta, ka duh tâwk der.

Chaw la ei mai ka peih loh avâng chuan in aṭang chuan chhuakin dawr lam chu ka pana, ka kawmchhak kawngpuiah chuan pheiin dâwr lam pan pah chuan khawchhûng chu ka en kuala.

“Saw saw hmeichhe rawn awm thar kha a ni lo'm ni? Sâwma te ho nên an inzui nghal an tih kha, zah a hrelo aniang. A tlangnel nghal emai, mipa in an zui nghal chat a nia, khawpui nula tih takah a nasa ru phian ang, a inchei duhdân te kha” kawngsira hmeichhe pathum lo ding ka kal pêl mai tur chu an thusawi avâng chuan ka ding data.

An lam ka hawi veleh an ṭawng chu an tâwp hmaka, min en hrek hrek bawk. Thaw hak chuan chhâng duh lovin kal ka siam zuia, ka awmna a la reiloh ngaihtuahin ka fimkhur hle a ngai dâwnin ka hria. Nihnih vêl lek ka la awm chung pawh in khatiang kha ka tâwk nghal a nia, mi hian engvanga kan hriatchian loh pui zel dina thusawi hi hmang êm êm nge an nih le.

Thui vak lo ka kal hnuah tuala thing lo ek mêk ka hmuh avâng chuan ka ding data. Tûnah chuan mi ngeiawm leh chimawm lutuk hmêl kha hmuh tur a awm lo, a hmêl chu a tak râna. A biangah thlan a luang zaih zaih bawk, ngawi reng chuan ka thlira.

A mitmeng nalh zet chuan khawdang hawi miah lo hian a thing eh lai ngawt chu a ena, a tak ran bawk nên hmuhnawm ka ti leh pek hle. Chutah a thlan hru tur rawn hawi chhuak chuan min rawn hmu fuha, a hmêl cool raih kha bo in a rawn nui leh sâwng tawh mai. 

A mit chu a rawn sân nghal zuk zuka, ka tûm nghal hmuk bawk. “Eh! Ka hmuhnawm hi chu i ti mawle, ka chak i ti em? Lo kal rawh, hmêlṭha hi chu kan hnathawk lai te hi hmuh kan nuam a sin” tiin a hrei chu a dahthla a, ka lam rawn hawi lehin a nui saka.

Chhân pawh ka tum lo, ngawi reng chuan kalsanin dawr lam pan chuan chak zet hian ka kala, ka hnunglam aṭanga min nuih ri pawh ka hailo. Ngeiawm viau lo se chuan ka vei zual ngei ang, hetia ka laka ngeiawm a chhuah chung pawh hian ka vei em em chu a ni sia.

Kan duh tur ni miah lo kan duhna lai tak hi kan ât na a nih hi, mahsela ât phahna tur pawh nise pawi ka ti hauh silo.

Dâwr aṭanga ka lêt leh lam chuan a lo awm tawh miahlo, hawi kual zak zaka ka kal mai tur chu “Barakhaih!” a rawn tih thut avâng chuan ring zetin ka au tuara, ka zuang zawk bawk. Chutia ka phu nasa lutuk zuang zawk chu min nuih hawk hawka, ka ngei bawk si, tihvak ngaihna ka hrelo chuan kalsan mai ka tuma.

“Min hmuh châk chuan min ko zel la ka lo chhuak zel mai dawn a lawm, tûnah pawh khân min zawng ru chiang lutuk” tiin ka dârah chuan a rawn kuah thaka, a nui sâng bawk. A mah chu enin “Tinge min tih buai reng” ka ti sapa, nichina hmeichhe ho kha an rawn phei bawk nên kalsawn vat vat ka duh.

Min sawi belh tura awm ka tumlo, an ni lahin min melh leh hru hru tawha. Ka melh ve reng bawk nên Zorinpuia chuan a en phei ve a “Hey, khalaia nghazuang pathum kha, kal vat rawh u. Ka bialnu hual hi in lo rêl leh a nihchuan” tiin a ngawi deta, “Ka sawi leh lovang, ka mizia chu in hriat chian kha, nichina in tihdan pawh kha ka hria a nia, lo ti leh vaih teh u. Nghazuang an tih ang tak takin ka rêp ang cheu, aiah! tikhan min lo sik suh” tiin a naka ka lo sihsak avâng chuan a ner zui saka.

“Tikhan min tiziah suh, i bialnu hual pawh ka nilo. Min thlah teh ka haw duh” tiin ka tâl nghâl fat fata, a taksa ka tawh reng pawh hi ka duhlo, min ti danglam tlat bawk si.

A rawn nui zui hak haka, ka bengbulah rawn awm hnaiin ka biang chu a nul dan dana, ka thâwk ka lo ip ṭang ṭang mai. A rawn thaw zui ham hama, enge tih a tum pawh ka hrelo, ka taksa chu a mur er era. Aikaih ang mai hian ka awma, chêt pawh ka che ngam tawh lo.

“Phallo ta ila engtin nge min tih ang?” a rawn ti supa, a aw chu a thum deuh chhaka. A dam ta dap bawk, a hma anga ngeiawm rawng kaiin min be tawh lova, amah hrim hrim a rawn chêt dân chu ka beisei loh lam daih a ni.

Ka ngawi rênga miin min hmuh ka hlau bawk si, tûnah khawlai vâk chhuak an la awm rih lo chu ka vânneih pui a ni ber. Bâkah an thing khawnin min hliah bawk nên ka vânneih phah ka tilo theilo.

“Zanah lo lên ka tum ang, a nih loh pawhin ka ram chhuak nghâl mai theia, min lo ngai lutuk lo la aw” ti a nui hakin a awm sawn zuia, engmah ka sawi ve tawh lo. A awm dân chuan min ti danglam vek bawk nên lâi zet chuan ka in luah lam pan chuan ka tlân deuh hlawk hlawka.

Rei a nilo in ka thlen hnu deuh lawkah lo hâl tura kal khâwm tur a nih thu chu rawn auin mipa ho chu ka in chhak kawngah chuan an rawn kal phei ṭhâm ṭhâm a, Sawma te ho pawh ka hmu nghal zat mai.

Zorinpuia rawn tel ve lah chuan a mit chu a ṭhiante hmuh loh tur hian min rawn siai saka, Sawma te ho erawh chuan min rawn bia in chaw ka ei tawh leh tawhloh te chu min rawn zâwt hlawma.

Keipawh chuan chhâng vatin fimkhur tur te chuan ka chah ve mawlh mawlha, kan in bia lah patling ṭhenkhat chuan minlo en in min rawn fiam ve bawk. Rinai fiamthu an duh hlawm dâwn hian ka hria, in bye bye lauh lauhin an kal liam chu ka thlir zui renga.

Him taka a rawn lêt ngei ka beisei, ahma khân kâng hlum an awm an ti lehnghâla. A hmuh tal hmu pha ila ka ngaihtuahna pawh a reh deuhin ka ring. Kan inhriatna la rei lo mahse ka ngaihtuahin thla an ti muanglp, an thawveng ve ropui si, kan inkawmna a la reiloa, chutih rual erawh in rei tak ka lo hriat tawh nen an in ang reng.

A bikin Zorinpuia kha ka ngaihtuah zual, ngeiawm viau mahse tûnah pawh hian hmuh hreh ai, hmuh châk tho siin ka awma, a hrehawm zâwk. Inhmuh leh thuaia, a bula awm ka thlahlel reng ni berin ka hria, ka ngaihtuahna hi hmeichhe ngaihtuahna atân chuan a rapthlâk in zaktheilo pawh ka inti, mahse ka lungphu tirangtu hian min luahkhat hneh êm bawk ani.

An kal liam chiah tihah lo hal naa kal tur chu YMA tlangauna aṭang chuan in nghah khâwmna tur rawn sawiin mipui lam pawh ramhnuaia tumah vâk chhuak rih lo turin an rawn puang lauh lauha, an fimkhur pawh chu a âwm viau mai. Lo a hla lutuk siloa, mei chhuah palhah a alh vêk vêk chuan thliin a pui tawha, a kâng chak bawk nên tih ngei ngei tûrah ka ngai.

A enga mah hma in vân lam chu ka han thlir ngawta, vân chu a thiang kuka, chhûm rêng rêng hmuh tur awm lovin a pâwl thiang kak mai. Nui var varin boruak chu ka hipa, tûnah chuan thingtlâng nun tak tak chu ka tem chho ve dawn ta in ka hria.

An lo chu an hal ṭan tih hriat takin kan piah tlâng letliam lam aṭang chuan mei khu a rawn chhuak a, ngawi reng chuan enin ka thlîr renga. Putar ṭhenkhat lo halna a kal thei tawh lo ho chuan tiang nên an in tual aṭang chuan an thlir ve ṭhap bawk.

An chêt dân reng reng hi an la hmanlai ve deuha, mahse hmuh an nuam ka ti. Bâkah thingtlâng boruak chu nuam ka ti bawk, hetianga ka hlimpui theih thil a awm dawn tih hre lâwk lovin ka kala, huphurhna pawh ka nei lêm chuang lo. Ka beisei loh deuhin a boruak mah nuam tih tawh laiin a vawikhat nâna ka mipa duh hmasak ber tur ka tawnga, ka theihnghilh mai mai tawhin ka ring lo.

Meikhu chu rawn tam tial tialin vanah chuan ni chu han hliahin ni êng chu a rawn sen khupa, mei khu leh romei zam nen khua chu a hnim ruiha. Lunglêng ṭhin te tân phei chuan thu leh hla lam tam tak an phuah chhuak leh ngei ang.

A khu rawn dum deuh khuk aṭang chuan a kâng ṭha a nih ka ring ve ringawta, a hmuhnawm let ling phian mai. An lo hal vâp te chu khawchhungah chuan a rawn lêng lût a, ka thaw hap mai. Tumah an inti palh êm lovang chu maw? A kang ṭhat hmêl si a, inti palh an awm ang tih a hlauhawm zâwk.

“I va thlir tui ve” hmeichhe aw rawn chhuak avâng chuan ka chhak lam chu ka hawi vata, nula la upa bik lo tih hriat tak hian min lo nuih var vara, ka nuih lêt ve bawk. 

“Nia ka vawikhat hmuhna a nia”ka tihchuan ka bulah rawn ṭhut pahin "Nia a hmuhnawm dangdai ve riau a sin, i khua a har lo em ni? I rawn awmna a la rei siloa, ka lo hre lawk lo che a, khawi aṭangin nge i lo kal?” a tihchuan nui hakin “Um Aizawlah kan awm a, ka pa hna avangin a ni pakhat, khawhar lêm lo e. In khaw ho hi an fela, zânah pawh min rawn kawm hlim theia, ka lâwm viau asin, tunge i hming ni a?” ka tihchuan bu nghat nghat hian van lam chu a en vung vunga.

“Mawii min ti mai rawh, nang teh? Rawn lêng ṭhin ila a pawi angem?” a tinghal zata, a nelawm bawk nen keipawhin ka nel nghal mai a ṭawng duh bawk si. “Teh reng mai, hmeichhia kawm tur ka neilo a, ka be hmasa mai ngam bawk siloa, min kawm duh chuan ka lâwm viau ang” ka ti chu a rawn nui var vara.

“An hming i hriat loh phei chuan i rawn awm tir bawk nên i thiamawm lutuk alawm, keipawh hi mi biak hmasak leh han kawm bawrh bawrh hi ka nei lêm lova; mahse nang chu ka rawn hmuh che khân ka nel mai che a, ṭhian ka nei bik em em lova. Heta i awm chhûng chu kan inkawm ang chu, dik tak phei chuan keipawh hi mi biak hmasak hreh chi ka nia, ka zak ṭhina, tûn erawh ka rawn be hmasa tawp che" tih pahin ka bulah chuan a rawn ṭhu a.

Ka en reng, mi langtlang tak a nih ka ring. A fel viau in ka ring bawk “Tehreng mai, keipawhin ṭhian ka ngah bik lo, i duh phawt chuan rawn lêng zel rawh. Helama in awmdan tam tak ka la hre bawk siloa, nang i awm chuan ka tân pawh a nuam sawt ngei ang, min hrilh zel thei anga, taka lo in nei ve dawn em?” ti a ka zawh chuan a bu nghat nghata.

Helamah chuan lo neilo an vâng a nih hi, keipawh Sawma te ho ka bia anga, an kâng var hmuh ve ngei ka duh. Phone aṭanga ka biak ṭhin ho hian an rawn status ṭhina, kal ka châk ve em em kha a nia. Hetia a taka thingtlâng ka awm tâkah chuan an tih ang tam tak hi ka buai em em loh chuan tih ve zel ka duh.