MANGRAM PASALṬHA SEASON 2 CHAPTER 1

MANGRAM PASALṬHA S2

CHAPTER 1

“Ka fanu" nu pakhat chawr che zet chu ka hmu a, a hmêl chuan khawngaih a la hliah hliah bawk. Ka en chianga, ka nu nen an in ang riau te hian ka hria; chutah chiang leh zualin ka hmuh rual chuan ka mengkawk mai “Nu" tiin ka phun sapa, chu veleh harh chhuakin ka thaw ham ham mai.

Ka room banga ka nu thlalak in tar chu ka en renga, chutah bang chu rawn êng uarin mipa pakhat hmelṭha zet a rawn lang thuta, ka mengkawk mai “Tu...tunge i nih?" tiin ka zâwta, “Ka mamawh che" tiin bangah chuan min pawt lût thuta, ka au tuar mai. 

Eng uar chu rehin tu emaw hi ka bawhtlu tawpa, min lo kuah bet nghal zat mai. Tunge tih hriat tuma ka en chu mipa Pasalṭha tih hriat tak hian min lo ena, ka hre ngai hauh lo ,chutah ka lu chu rawn kiu vung vungin ka mitthla ah chuan thil eng emaw hi a rawn lang zut zuta.

Mipa naupang hmanlai inthuama inthuam nena kan inkawm dan te, ṭhanglian dûn zela mahse kan in ṭhen hran dan te chen chuan, a mitmeng hriam hrak mai leh a hmui leh khabe phîr ṭhaih te chuan a ti hmelṭha zual, ka lu chu dawmin thawk ka la kawk kawka “I ṭha em Darpui" ti a min rawn sâwi tu an awm avâng chuan mengchhuakin ka ena, khapa min pawt lut tu bawk kha a ni.

“Engvanga helaiah hian awm thei nge ka nih?" tiin ka hawi kual vêl ruaia “Ka mamawh vang che a ni, chuan kha mipa i hmuh khabe phir ṭhaih mai kha i ṭhianṭha ber a nih kha" a tihchuan a thusawi chu ka man mai hauhlo, a inthuamna te chu hmanlai inthuamna ang vek a ni. Kei ngei pawh hi mawle, mumang ramah ka chêng ni ber in la ka hria.

“He khawvel mi dik tak hi i ni a, mahse i ṭhianṭha ber leh i mipa hmangaih lak aṭangin lasi ten an dah bo che a ni, i hriatna chenin an la bo bawka" a tihleh chuan mak ti zetin ka ena.

“Lasi lalfanu in i mipa hmangaih chu a hmangaih ve miau si a, a chan theih nân nang chu khawvêl dangah an thawn ta che a ni" a tihchuan mak ka ti deuh deuh, ka thil hriat chu movie vela dawithiamho thil tih ang mai a ni. A awm thei ang tih pawh ka hre hek lo, ka â deuh chhuih mai.

“Hei hi ka mumang mai mai a ni lo tiraw?" tiin amah chu mak ti zetin ka ena, a rawn nui hak mai. “Nilo e, a tak ngei a ni e, i mipa hmangaih chu lasi te thu hnuaiah a awm meka, nang hi a mamawh che. Lasi te'n an thunun tawh chuan nang hi a hrechhuak tawh lo ang che anga, kumkhua in lasi te chhiahhlawhah a ṭang kum khua tawh ang, i hmuh hunah chuan engkim i hre chhuak mai ang. Daiah ka dah che a, hetah hian kal la i chhak lawk khi in khua a ni e, tin i nu pawh helaiah ngei hian damin ala awma, a ni bulah chuan i awm dâwn ania, dai bul maiah a in a awm kha" a tihchuan mak ka ti deuh deuh.

Ka nu te chu a thi tawh si a, “I mipa hmangaih chuan a theihnghilh ṭan mêk che a, inhriat chhuah tîr leh ngei ang che. A hming chu Saithankhuma a ni e, a pa chu Pasalṭha Saihlira a ni bawk e, a lo nghâk reng tawh che a nia, a la hriat lai che khian lasi ten an thunun loh nân veng ang che" tiin ka kutah hian thil mum chithlum ang zet hi a rawn daha.

“Ei rawh hei hian avengin a chhanhim zêl ang che, lasi te pawhin an khawih theih hek lo ang che" tiin min hrilha, thu awih tak chuan ka ei ve mai bawk. “He khawvela ka hruai luh nachhan che chu, lasi thuhnuaiah in Pasalṭha tuai tir hi a awm a nih vaih chuan nang chu i thâmral hlen ang. I khawvelah pawh khân i lêt thei tawh hek lo ang, che zung zun rawh, khuaah a awma tûnah la la hian hmu la ka duh" a tihchuan bu nghatin a sawina lamah chuan ka kal zuia.

Chutah reiloteah khua chu lutin ka mitthla ah chuan ka hun kal tawh ngei chu an rawn lang zut zut mai. “Nu, keimah Darneihpuii" tiin ka nu chu pâwn aṭangin ka au lang langa, ka nu pawh chu inchhûng aṭang chuan rawn tlân chhuak zawkin min hmuh rual chuan a rawn ṭap chhuak rawih rawiha.

“Awi chemtê ka chân tawh che emaw ka ti a sin, tinge i va rawn let har em em ve, tûnah chuan i nu hian hmangaihtu pawh a nei tawh hleinem" tiin ka nu chu min kuah chungin a ṭap rawih rawiha, kuah letin ka hnem pah mawlh mawlh bawk.

Kan thâwmah ṭhenawm khawveng ho chu an rawn dâk chhuaka, min hmuh chuan min rawn hnaih nghal sap sap hlawma. Kei erawhin tumah ka be lêm lo, chutah mipui chu rawn pung tam zêlin ka hawi chhuak chuan mipa lian tak, mitmeng hriam hrak leh Pasalṭha tih hriat ngawih ngawih, hmui leh khabe phîr ṭhaih mai kha mipa ka hmuh hnu ngei kha a rawn lang ta.

Ka en renga, a ni pawhin min en ve reng bawk. “Saithankhuma" tiin ka phun sapa, a ni erawhin ngawi reng leh rum tak hian min en renga. Ngawi reng chuan ka nu kuahna ata chu awm sawnin ka pan zuia.

“I dam maw Saia" tiin ka kut chu ka phara, mahse a rawn vuan hauh lo. A mengrum ul reng ringawt “Thil dik lo a awm em ni? Nge i ṭhiannu hi min hre tawh lo zâwk?" ka tih lai chuan min rawn man thutin mipui kâr aṭang chuan min kalsawm pui zuia “Awi u Darpuii chu a hma ai daihin a hmelṭha a vun a no in a var nasa si" ti a naupang ṭhenkhat ṭawng chu ka hre pha renga.

“Khawiah phiangsen nge i awm bo" ramhnuai kan thlen rual chuan thingkunga min nem beh chawt pah chuan a rawn ti a, a hmelah chuan a lawm lo hle tih ka hre bawk.

“Hun eng emaw chhûng chu thil zir tumin ka kal alâwm, chuan ilo danglam tawh hle mai. Nangmah i ang lo" ka tihchuan a ṭhen suka, ni e a vai chuan ka hre tawh lo nangin hetianga rorum leh nelawm loh hi a ni ngai lo, lasi te chuan an lo tidanglam tawh viau pawh a nimahna.

A kâwngah chuan kuahin ka nuih ver vera “Min ngai ve miah lo in ka hria ka ṭhianpa hian, nge ni a min theihnghilh tawh zâwk?" ka tihchuan rum nghutin min kuah beta, dik tak chuan ka pian a hnu lamah hetiang khawpa mipa hmelṭha tih hi ka la neilo, ka ṭhianpa mahnisela hmelṭha ka ti takzet.

A âwma min kuah beh ringawt pawh chuan ka danglam thei “Nang hian a nih hi min hre chang tawh lo zâwk chu, engmah sawilo in i bo hmiah bawka, ka zawng nasa che a sin" a tihchuan ka nui haka “Min zawng nasa lo deuh ania'ng, tak takah ka ngai hle mai che" tiin en chho in ka nuih ver vera, a rawn nui ve ta suk mai.

“Ka nu hi ilo ngaihtuah ṭhalo deuh ani maw?" ka zawhna avâng chuan thaw hakin “I bo bawk nen ka ngaihsak ṭha theilo a ni e, bâkah ramhnuaiah ka awm tam lutuka" a tihchuan khapa thu min hrilh kha ka hre chhuak nghâl. Kei hian lasi te lak aṭanga lâk hrannan chuan engpawh ka ti ang.

An dawi ṭan tih lah ka hailo, kei min hmangaih tur hian ka siam ngei ang “Um ka ngaidam mai ang che, ti teh nu Zampuii te pawh ka hmu châk tawh" tiin khawchhung lam pan chuan ka kalpuia, min hmu apiang chuan min lo en vawng vawng hlawm mai, ka mak viau emaw ni.

An in pawh ka hai lo nasa, pâwn aṭang chuan nu Zampuii te chu ka au lâng lânga, an rawn dâk chhuak vat mai. Min hmuh rual chuan an ni pawhin Chhuani nen chuan min rawn kuaha, an insut hlawp hlawp mai.

“Awi i la dam tih hi ka awih theilo, i thi tawh riakah kan lo ngai a sin, ka lawm emai" nu Zampuii chuan tiim min kuah nawk nawka, pa Saia pawh a rawn chhuak ve bawk. “Ka ram kal kha ka bo thuta, khaw pakhatah nupa lo feh ten min lo hmu hlauha, an khuaah ka awm char char alâwm, helaiah rawn lêt dân tûr ka hre mai siloa, ka haw phawt ange Saithan zânah lo lêng rawh aw, ka nu ka ngaihtuah tawh emai ka haw nghal mai ang" tiin ka mangṭha zui hlawma.

Khapa thu min hrilh nen ka theihtâwp chhuah ka duh, Saithankhuma awm danah khân a pangngai tawh chiah lo niin ka hria, amah ah khan ram lama thlakhlelhna ka hmu thei tlat a. ni. Tûnah chuan ka theih tawpin ka veng tawh ang.

Ka haw rual chuan ka nu nên chuan thil dang dang sawiin kan titi duna, a lawm lutuk chu a ṭap deuh reng mai. Keipawh ka nu ka hmu leh thei chu ka lawm takzet, a kut cher riak lam tawh chu hum sakin ka kuah vawng vawng renga.

Zanriah bar a hun tâkah chuan ei zuiin eikham hnu lawkah tlangvâl an rawn chuangkai phak phak hlawma. Rinai inlêng ka ngah phian lehnghâl a, vaibel chu lâk kai sakin ka vir zak zaka, an ni erawh ka haw leh dân vel hre chakin an phun mar mar thunga.

Engmah sawi duh lo chuan ka ngawi kar thung, chutihlai chuan Saithana chu rawn lutin tlangval titi ho chu an ngawi nghal diaka. Saithana chu an hlau hle tih an chêtzia aṭang chuan ka hre thei, “Lo ṭhu rawh hei helaiah a ṭhalaiah hian ṭhutna ala awm ania, tinge in ngawih vek hlawma, Saithanate chu ngaipawimawh lêm suh u, ṭawng leh bawrh bawrh ta che u" ka tihchuan an nui haka.

“Pasalṭha huhang hi chu ana a nia, kan Pasalṭha meuh a rawn len chuan keini tân a ṭawng vak kha a mawilo a" an tihchuan Saithana zawk chuan inthlahrung lo tura tiin ka bulah chuan rawn ṭhu in thil ngaihtuah muk tih hriat tak hian a ṭhu ngawi renga, mei eng hlir chu a en bawk. Hetiang hi chuan chêt ka lak vat angai tih ka hria.

Tlangval te chu leng hâwn ar a khuan takah chuan tho sap sapin an chhuak zuia, keipawh chuan luhka thleng chuan va thlahin ka mangṭha hlawma, Saithana erawh a la awm thung.

“Naktuk chu thing phur ang hmiang" tiin a bulah chuan ka ṭhu a, a lo bu nghat mai. Lasi lalfanu in a hmangaih a nih chuan ani pawhin an duh lêt ve a nih vaih zawngin ka tân kawng a ping tawh dâwn tih ka hria, chuvângin theihtâwp a hma ka lâk vat a ngai tih ka hria, an dawi a chak si a, kei mai mai tân chuan hneh an har hle ngei ang.

Mahse Saithankhuma hi an ni lasi mai maiin awlsam taka an dawi theih ka ring lo thung. “Lungdawhah innghah kan ti ania'ng chu, hriang hmun lam kha kan phur dâwn ania" tiin ka ena, min rawn en vung vung mai.

A mitmeng hi rei ka en ngam ṭhinlo, a zahawm ka ti tlat zêl, a mah lah a hmelṭha in khaw nula ho ngaihzâwn rawn a la ni zuia “Kan phur dâwn ania, nangmah chauha thlah fâl che chuan i bo leh palh ang" tiin a nui haka, ka nui ve nghal hak bawk. 

Haw tura a thawh chhuah ve tâkah chuan pawn thlenga thlahin ka luhsan zuia, muthmunah chuan ka in ngaihtuah nasa mai. Engtin nge kan awm zêl ang ka hrelo, lasi hnên aṭangin engtin nge ka laksawn ang, engmah ka ngaihtuah thei meuhlo. 

Engpawh nise a tla chawpin ka kalpui zel mai ang chu, engpawh nise kan pahnih inkar hi ka siam danglam deuh chu a ngai ani.

A tuk lamah chuan thingphur tur chuan kan kal ta ngeia, ka ṭawng char char laiin a ni erawh a ngawi reng thung, thingfawm zawha kan chawlh lai chuan a dar ka nghenga, min namsawn pawh a tum bik chuang lo.

“Kan naupan lai kha a ngaihawm reuh e, i harh theih zia kha min la runluih peih em em a" tiin ka nui hak haka, a rawn nui chhuak ve hawk mai. 

“I ṭahbelh lutuk avâng khan ka insual phah fo chu ania" a rawn ti ve supa, nui dun hak hakin a ban chu ka kuaha, chutih lai chuan thil danglam thleng tur chu ka hre lâwk thei tlat nia, kan piah thing bul aṭanga khapa sawi lasi ngei chu ka hmu a, rum takin min rawn en bawk.

“Saithankhum min lo en teh" tiin ko a, chunu chu hmu miah lo sela ka duh, tûn hi hun ṭha a ni bawk. Ka lam a rawn hawi rual chuan a hmuiah tak chuan ka fâwp ta siaha, a ni erawh a ṭhu khawng nghal auh mai, mahse min namsawn bik hauh lo, a taksa chu kuahin chunu en chuan ka fawp luia, a mit meng rang leh mi thah chak hmel zet hian min en ve reng bawk.

A ruka khi sakin a bo hnu chuan Saithana chu ka ena “I thinrim em?" ka tihchuan thaw hawkin ka darah a rawn hmer chawta “Khatiang khân engvanga che nge i nih? Ṭhian kan ni tih i hria a ni lo'm ni?" a rawn ti ta hmuka, a lawm vak lo tih ka hre nghal “Ṭhian chiah nih ka duh hleinem" tiin ka hnaih leh deuh chu ding chhuak hluaiin haw a rawt zuia.

Ka tilui duh ta bik lo, a rilru thunun ru tlat tu an awma, chu thil chu ka tihreh ngei a ngai a ni.

ZAWM LEH TUR