DUHLAI ZORINPUIA

DUHLAI ZORINPUIA

CHAPTER 1 

A HMASA IN HE STORY HI A TAK THIL THLENG BEHCHHANA ZIAH A NI E.

“Kan lo lawm a che, helai hi ania i inluah tur chu. Luah man a to lem lo a, i duh ang chu maw" ka awmna tûr khaw Vc te chuan min lo hmuak in ka inluah tûr vel chu min en puia, he khuaah hian health worker hna thawkin ka awm dâwna, ka phur ru phian mai. Hmelhriat ka la neih loh vang erawh chuan ka la kimki ve deuh thung.

Ṭhian siam mai ka harsata, keimah hi nel sa loh bulah chuan ṭawng chiam mi ka nilo bawk nen ka hriat ngai miah loh khuaa ka han awm chu a lehlam takah chuan ka huphurh bawk. “Um a nawm hmel lutuk, keimah chauhin ka ni dâwn bawk nen a zau chiam a ngai lo" tiin ka hawi kuala, a chhuat chu thing vek a niin a bang chu tile an hmang thunga.

A chung pawh rangva a ni in thingtlâng in tak tak a ni tih a hriat viau mai, ka bungrua te chu an fate nen chuan min dah luhpuia, chutia hna thawh tlân takah chuan an fate nen chuan in nel zui thuaiin kan in be bawrh bawrha, tlangval an ni ve bawka zanlama rawn len an tum thu an sawi chuan nui hak hakin ka lo rem ti ve mai bawk. Khua a thim ti tih tawh bawk nen kan hmanhmawh hlawm viau mai.

Chutia bungrua kan lo dah fel mawlh mawlh lai chuan naupang rual tih hriat tak hian “Haw le haw haw, haw le haw haw" ti a au ṭhat ṭhat in ka inchhak kawng chu an rawn zawh dam dama, kan hawi chhoh nak chuan sakhi an lo zâwn laih laih chu niin. Hmuhnawm ti tak chuan ka en dauh dauha, sakhi pum atak ngeia ka vawikhat hmuhna a ni bawk nen a hmuh nawm dangdai riau mai.

“Kha Remte tu kah nge?" u Daman a tihchuan “A u Rinpuia kah a nih hi" pakhat chuan a rawn ti a, “A va tui dâwn ve aw. Rintea tak hi chu sa te hi a kâp thei ania, khi a mah pawh a rawn lang alâwm" tiin naupang ho hnung deuha, silai pu ngauh chunga mipa pakhat sang lam pan pian inkhaithli thlarh, taksa in phut mawi tak mai chu a rawn lang zuia, a hawi chhuah miau loh avangin a hmel tak erawh ka hmu theilo thung.

“Rina, kha i va hlawhtling ve lei te i phal angem?" u Dama chuan a lo ti leha, midang pawh chuan an lo be ve bawk, a rawn hawi thla nen chu ka lo melh renga, chutah ka lung chu a phu rang nghal hle. Patling ni tura ka ngaihchu tlangval naupang zawk zawk tawhlo tih ka hre nghal, a mitmeng mawlh mai chu mawi ka ti takzet, a hmui a chip hmaka. A hmui pan lam leh a hmai tlang vel chu hmelṭha lutuk tih tur ani hauhlo, Mahse hmeichhiaten a pâ kan tih tur ang chi hi a ni.

A hmel chu ṭha ka tihchi tak a nih vâng nge hmundang ka hawisawn thei mailo, a nilah chuan min rawn en thutin a hmêlah chuan engmah a lang chuang lo. Lukhum parh a khuma, a thawmhnaw vel pawh chu hnathawhna tih hriat takin a ṭet lai a awm zeuh zeuh bawk.

“Ka vânnei a nih hi, kan lo vaua Taitaw kha ka châng e ka ti a, hei rin loh takin ka kap hlauh a nih hi, tun ṭum chu a lian lem lo a ka hralh in ka ringlo. Chhûngte hleh kual leh a ngai dâwn si a" a aw chu a thum lam a niin ka lo en renga, a mah a sangin a chak hmel bawk si. He ti em ema ka vawikhat hmuhna min hiptu mipa ka la hre ngailo.

“Aw a nih chu, nidangah i kah leh leh min hrilh dawn a nia, kan ramvak ve thei tawh siloa, ramsa ei a khât riau, taka hei khawpui nula ngat kan khuaah a rawn awm dâwn a nia, rim ngei ngei chi. A tu emaw ber hian nupui atân han rimthluk tum teh u" u Chhanan a tihchuan a ni chu a nui suk ringawta, ka lo en reng thung. A vun uk kharh te chuan a ti lang pa in a chet phung reng reng chuan min hip nghal em em tawp.

“I mit a tla ange" Sawman a rawn tih avang chuan harh chhuak zawkin ka hawisawna, a rawn nui hak mai. “Rinpuia te chu a luck a sin, a mah hi a hmelṭhat bakah a taima a, kan khaw nula te biak ṭhat a hlawh teh a nia. Hman deuh khân a lehkhazir pui khawpui lam mi nen khân inneih an tum lawka, mahse hei an ṭhulh leha tihian a la tlangval ta reng a nih hi" a tihchuan Rinpuia lam chu ka en leha.

A lo kal liam ṭep tawh lehnghâl “Pasalṭha a ang reuh e" ka tihchuan a rawn nui haka “Sa a kâp thei alawm, helamah chuan kan sa hmuh ber chu ramsa hi an ni maia, sa leina tur nei ve reng loh chuan ramsa leh sava vêl bak hi kan ei tur a awm ve mang siloa, dân in a rawn hum te hi a lehlamah chuan thingtlang mi tân chuan a buaithlâk teh a sin, mahse hei kan la kâp ve reng tho chu ania. Hum sên ni heklo, Sakei an hum te hi kei ṭhat lohna a nei ka tia, mihring beih mai an hreh silo, mihring nunna aia hlu a awm loh laia a tina thei thil kan lo hum tlat te hi a hum tute hian manin mihring an tihbuai theihlohna ah dah mai sela, man thei chuang silo thah phal bawk silo, hetiang chuan miin an hlau ve tho si a, an hmuh chuan an him nan an thah ngei ngei angai bawk si" a tihchuan dik ka ti ve viau mai.

“I duh chuan zânah ka lo lênpui ang" a tihchuan ka lei ka chhuah a “I zak lo ka duh kher lo" tiin in chhûngah chuan ka luhsan ta daiha, ka bungrua te an dah zawh chuan inchhung chu tifaiin ka che zui mawlh mawlha, ka intihfel meuh chuan khua a thim fel der tawh mai.

Rawng chu bawl leh in ka tlai tawh bawk nen artui leh Waiwai chu chhumin ka ei ta tawpa, rei pawh ani lo ka thleng sil mawlh mawlh lai chuan “Hmingi, Hmingbuk kan lo lêng" Sawma aw rawn rik rualin in chhûngah an rawn lût fel chu a nimai, ka lo en hau a. Amah chu mak ka ti pawh anilo, a hnunga rawn zui ve tu ka hmuh avâng chuan mak ka ti a nimai zawk.

Rinpuia ngei chu tshirt leh Jogger pants rawn ha in a rawn zui lut a, ka lo en leh reng tawh. A hnathawh thawmhnaw inbel lova ka hmuh leh takah phei chuan chhelo ka ti lehzual, a ngal sei zet chu a kekawr hak nen chuan a inrem thlap leh nghal, thingtlâng tlangvâl a ni na vângin a pian chu nalh tak a ni ringawt. Hnathawh thawmhnaw nên lo phei chuan a fresh lutuk tlat.

“Hei i chhailai di a ka rawn hruaia, vawiin tlai ai kha chuan a hmêl pawh a ṭha lehzual ania" Sawma chu rum zetin ka ena, ka zak bawk si ka kûn nghal tlat bawk. A châk lo viau ang, mawl lutuk mai. 

“Thingpui te min rawn thlit ve la, nula pui si khatia i awm reng ni?" a rawn tihleh chuan “I ninawm Lalsawmsang" ti hmakin no chu la in thingpui chu ka va pe a, “Kha khatah khân ṭhu rawh, i ṭhu châk tih ka hre reng" a rawn tihleh phei chuan ka tihngaihna hrelo chu ka nui tawi tak ringawt, Rinpuia ka en chu min lo en ve renga, tlaiah khân a hmel kha ka hmu chiang lova, a bal deuh bawk nen tuna hnai taka ka hmuh takah chuan hmelṭha ka tizual sawt mai.

   

A sam chu a ti phir deuh sâng a, a tshirt hak chuan a taksa a phuar ṭang bawk nen a pian chu a nalh tâwk hle tih a hriat, thaw ham hamin a bulah chuan ka ṭhu thla a, ṭawng pawh ka ṭawng ngam lo Lallawmsanga vang vek a ni. Engkim a ti dik lo zo.

“Aizawl mi maw i nih?" rawn ti thum chhak tu chu buk nghat pahin ka ena, min lo la en char char nia! Ip chawihin ka hawisawn vata, a nui suk ri chu ka hrechiang viau mai, Lalpa! Hetiang khawpa zam hi ka la nei ngailo, ka lungphu lah chu an hria ang tih ka hlau ngei mai, a ni lah zawitea rik chu sawiloh a ri thum dup dup lehnghâl.

“Kha be bawrh bawrh ta che, i rawn len pui loh chuan ka lâwm lo viau ang i tihkha" Sawma bawk, ka vaw chak ania aw “Dawt kha sawi ziah suh, ka tih tawp loh kha. Nangmahin ka lo lênpui ang i ti a nih kha" ka tihchuan an nui dun haka, kei lah ka che dik thei tawh lo.

“Chu lo leng lo tur ka lo leng a nimaw? Kan haw leh mai ange" tiin Rinpuia chu a tho chhuak ta mai, kal a tum rual chuan a kutah ka vuana, a kut lum ham ham ka hum rual chuan ka ṭek nghal chhawkin ka hria, ka taksa chu a mur chem chem bawk. 

“Chutiang pawh anilo rawn ṭhu leh rawh, Sawma vang vek kha a lawm, nangmah ilo len ka phallo pawh anilo" tiin a kutah chuan ka chelh bet tlata, chutia ka tih tâkah chuan nui chungin a rawn ṭhu ve leh mai bawk. An nuih sung avâng chuan min fiam tih ka hre mai.

“In va han sual dûn tak em, mi tihluih nuam in ti chiang lutuk" tiin ka thaw haka, chutia kan pathuma kan ṭhut ṭhap lai chuan kawngka chu an rawn kik karh karha “Lo lût rawh" ka tihlai chuan mipa panga hi rawn lutin an la in nam zuk zuk zuia, lût hmasa tur an in nawr tih a chianga, kan lo en ṭhap avang chuan rawn nui ṭha hlawmin “Nula kan rawn rim ve dâwn a, u Rina te chu in lo awm der elo? In rang thei bik hle mai" tiin an rawn ṭhu ve a.

“Um rawn ṭhu ve rawh u, hei nula kan neih belha, a chhelo ania" Sâwma chuan a lo ti ve bawk a. Rinai a rawn thleng thar ho chuan fiamthu an thiam bawk nen kei ngei pawh ka nio hak hak renga, an kiangah ka tlangnel nghal mai bawk.

“Tikhan lo ṭhu rawh u no hi kan va sil lawk ange aw" tiin ka thawh sana, an thingpui inna no chu lakhawm zung zungin tuihmun lam chu ka pana, keini lam anga bathroom vel leh thleng silna tur a hran awm ve heklo, glass tile vel pawh a awm lo. Rua leh thing hmangin an siama, chuta sil chu a ni mai.

An tuihmun chu rei tak hman loh a nih avâng nge mawni a lo mawih deuha, ka lût chiah chu ka tla hawlh chiang ngei mai. Ka au ṭhata, ka no ken ho pawh chu ka thloh vek bawk, ka inlêng ho chu an rawn tlân chhuak phak phaka. Keilah ka ke lehlam raw kârah chuan sei lutukin a la lawr thla zuah bawk si nen ka che thei mailo.

“Aw khaih, a va zia lo ve a mawih deuh animaw?" rawn tiin min rawn pui hlawma, u Rinpuia chuan keichu min rawn pawm chhuak nghal nawlh mai. Ka ngal lah chu a thip sep sepa, a pilh a ni ngei ang, ka zak deuh bawk si mahsela zak lutuk ang chuan ka lang duh hauh lo thung.

“Lo va lût rawh u, keimah niin kan lo ti ange, naktûkah kan rawn siamṭhat sak dâwn che a nia. An luah lohna a rei tawha, i inchhûng awmdan aṭang pawhin i hria ang chu. Engpawh nise naktukah rua vêl kan la anga, ṭha deuhin kan siam sak dâwn che a nia" an tihchuan ka lâwm ngei mai.

Mipa pathum chuan ka no vêl chu silin an buaipui zuia, keini erawh inchhûng lamah kan lut thung. “I insawh na hman em?" u Rinpuia chu enin ka lu ka thing nak naka, ka ngal a na deuh tih loh chu na dang em em ka neilo. Light ênga ka en chuan a lo thi a, chutianga thi chhuak nasa erawh a ni lo thung.

“Tikhan lo awm rawh, kan inah dettol vêl kan va la lawk ange" tiin Sâwma chu a chhuak zuia, u Rinpuia erawhin ngawi reng hian puanin ka ngal thi vêl chu a lo hru hul thunga. Ka thaw huai mai, a na ve reuh zêk lehnghâl.

“I che fuh hle mai" tiin a nui suka, a nui mawi em em lehnghâl. Amah hi a ngo hauh lo, mahse hâng ngaihnobei an tih ang chi hi a ni a. A hmel a ṭha lutuk tlat, a mithmul sei leh buk deuh tak chu a mawi phian bawk, “Sual suh aw, ka hlauhthâwn hman zia kha" tiin ka ngal chu ka chhêm hauh hauha.

Midang an rawn luh tâkah chuan engmah a sawi tawh lem lo. An ni ho lah ka che sual chu fiamthuah la in an nui hak hak renga, keipawh ka insum theilo bawk nen a nui nasa ber ber ah chuan ṭangin kan hlimzui ta phian mai.

Sâwma pawh chu a rawn thleng har lo, lapua leh dettol chu rawn kengin min pe zuia, ka lo la vat. “Zak miah suh, inlêng neih lai te hian chet sual ve zeuh zeuh tur, chuti nilova nula confi leh tlangnel hma lutuk chu miin an hmuh dan a dang duh, khatia i chêt buai vêl khân midang tan pawh hlimna i ni nghala, in pawh lehzualna a nih kha" a la tizuia.

Hepa hi chuan mi hi a ngam nghal em em mai a nih hi, “Sual viau suh u aw, a mawih tih ka hre hleinem, tlaia ka kal kha chuan engtin mah ka awm silova, naktûk chu min lo pui thei tak tak dâwn em ni?" hnathawh an ngaih ka ring bawk nen ka beisei ngam chiahlo; mahsela keimahte chuan ka ti thei âwm tawp silo, tuboh chhut dan hre mah ila perek ka ti kawi vek ang tih pawh hlauhawmin, bâkah engtin nge rua leh thing ka lâk ang? 

Ka ngaihtuah zâwng ringawt pawh hian ka zuam lo nghal em em ringawt, thing tlângah ka awm ngai lova. Hetiang ti ngai hek lo, keimah ka in ti khawlo ang tih ka hlau.

“Lungngai suh, nula hmelṭhate chu puih kan châk a lawm, bâkah nangmaha siam i tum em ni? I thiam chuan a pawilo" pakhat chuan nui vur vurin a rawn ti a,  mi an fiam tih ka hre reng. 

“A pawilo keimah pawhin ka lo ti ve lâwp lâwp mai ang chu, nang ni hnathawh in ngai dawn sia. Ka tân pawh a inthlahrunawm dawna, in thu thu a nimai, bâkah ka chhûngte pawh in ni siloa, min pui turin han ngen ngawt dâwn cheu ila zaktheilo min ti dâwn bawk sia, Vc te ka be leh mai ang chu" tiin ka nuih sânga.

“I tum tak tak loh kha, kan pui ang che kan tihchuan kan pui dâwn che a nimai" Sâwma chuan a rawn ti hluka, ka lo nuih ringawt, “In hming pawh ka la hre hlawm lo, min hrilh ula. Ka rawn awm ve chauh si a, ka hmelhriat awmchhun in ni nghal a, khawlaia intawh palha kan in hmelhriat loh koh palh hlauh ange" ka tihchuan an hming chu an rawn sawi hlawma.

An panga chuan ṭhianho an nih hmel, an fiamthu duh dân chu ka lawm zâwng tak an ni. “Kan rawn pui vek ang che lungngai lo la, nula hmelṭha khawpui nula ngat puih phei chu kan châk lutuk a lawm, ngaihṭha deuhin awm rawh. Bâkah zanah kan rawn len apianga i tlakhawlh chuan i in ti sil âwng zovang tih pawh a hlauhawm, hma laia siam vat kha a ṭha" Maman a rawn tihchuan ka lawm ngei mai.

“Ka lâwm viau ang, engmah thiam ka nei ve silo a, chhûn chaw tui tâwk ka siam sak dâwn cheu ania" tiin ka nuih var var hlawma. An ni ho pawh an insawi phur bawk nên an titi zui nak naka, u Rinpuia erawh a ṭawng tam vak lo, midang in bia chu a lo ngaithla a, a lo nuihpui ve leh ṭhin.

Ka lo en leh veng veng tawh, mipa ka vawikhat hmuhnaah hetianga en ngun hi ka neih awm pawh ka hrelo, mihring hian vawikhat hmuhnaah duh kan nei thei an tih hi ka lo âwih ngai lova, ṭha tih chu ngah mah ila. Thinlung hian duhzâwng bik tê hi a lo nei ve tih chu tûn hunah hian ka hrechiang viau, a hmâah chetsual ka hlau em em chungin ka chesual tho a, zâm loh ka tumna zawng zawng bovin a rûk chuan ka tha a khur dar dar thung.

Miten love at first sight an tih hi ka tawng ve ta niin ka hria, ka lungphu a ti ranga. Ka awmdân pangngai min hloh tirin midang en nawn ngai em em lo khan ka enkham thei mawlh lo, hmelṭha lutuk ti dâwn ila a mawilo viau ang. Mahsela, ka mitah erawh ‘Hei chu ka hmuh tawh zawng zawng zingah a hmelṭha' ber tiin ka ṭhiante hmaah chuan ka sawi ngei ang le.

A ni chuan min ngaihsak em em pawhin ka hrelo; mahse ka tân chuan ka danglamna a ni tlat si. Zaktheilo pawh min timai thei, mahse ka thlir lai hi a hmelṭha êma, midang en turin ka mit hian a thei tlat lo. Ka tâna khuanu ruat ngei ni sela tih te thleng chuan ka ngaihtuah hman vek.

Aw..ka lungphu tiranga, ka tha ti khur a. Ngaihtuah ngailoh suangtuahna din tura min tur tu saw ka ta ni sela ka duh, ka ta a nih phawt chuan midang ka ngaiin ka ring bik lo, tinge ka vawikhat hmuhna mai mai lehnghalah hetiang taka ka vei tak? Zâwlaidi min tat a ni ngei ngei ang.

“I va ngawi rei ta vung vung ve, tinge khatia a melh ngai i melh tak renga, nang hi ramhuaite hi ilo zawl te a ni ange. Ka hlauthâwng riau mai, tlanchhiat vang vang ka duh ut ut a nia, khatianga biak pawh hre thei miah lova i hawi ngur ngur te chuan i inlengte tân hian hamhaih a awl teh a nia" Faktean a rawn tihchuan ka inthing harh zawka.

“Tihpalh u, thil ka lo ngaihtuah nasa deuha. Thingpuite in la duh belh em? Ala tam ania" tiin ka nuih sâng hlawma, an rawn nui hawk hawk hlawm mai. Tlêm a tlemah ka talbuai lo chauh chu a nih kha, u Rinpuia ka en chu min lo en ve lai tak ani bawk nen ka hawisawn lehnghâl daih.

Ka zak lutuk, tûn aṭang chuan ka en tawh mai mai lovang, bâkah a le loh thlâk. Ka vawikhat hmuhna chauh lehnghâl, amahin hre phei se chuan min ngainêp viau mai thei a ni.

“Khawi maw rawn thli la, thingpui te chu zopa nun tikalhkim tu a nia, in tluk tluk mai tur a lawm. A aia tui reng reng a awm bik loh hi maw" in la puitling deuh taka a naupang ber rawn ṭawng chu midang chuan an eilo tih hriat zetin an lo “Eeeeee" nasa mai.

Tho chhuakin ka no sil tawh ho chu ka la khâwm leha, naktuk lamah ka sil tawh mai a ni'ang chu. Chutilo zawng ka chesual leh ang tih ka hlau, zîng rawngbawlna tur erawh chu tuithâwl a awm tho va. Ka daih thei maiin ka ring.

Thingpui chu ka va chhawp leh hlawma, an ni pawh eng eng emaw sawiin an titi leh ta luama. Kei erawh ka ngawi leh kar tawh, sawi tûr em em ka hre bik bawk si lova, lo ngawih tawp bâk chu tih theih ka neilo.

An lo hal tur chanchinte chu sawi hovin an nui leh hak ṭhin. “A kang ṭhat loh chuan mangkhawh tur kan ngah leh dâwn mange, mahse a kan ṭhat chu ka ring. Chap a ro tawh emai, Rinpui nang silaite i keng leh dâwn em? Lo hal in a rawn ûm chhuah sa eng emaw an awm leh ka ring tlat ania kei, nang sa kâp thei deuhah keng la, min sem ve ang chu" tiin an nui dar dara.

U Rinpuia pawh chu an ring tawk hle tih a hriat, an lo hal chu ka hmu châk ve takzet. Huan hal te a nih loh chuan Aizawl lamah chuan hmuh tur a vâng ve êm bawk a “Khua aṭang hian in lo hal chu a hmuh angem? Ka hmu ve chaka, vawikhat mah hetiang thingtlâng lo hal tih hi ka la hmulo a" lo tive in ka ke chu ka kherh ata.

“Theih tehreng dâwn e, mangkhawh hunah i feh duh chuan kha Rinpuia kha zui rawh, anuam i ti ber ang" Sâwma bawk chuan a lo ti leh tawh. Hepa hi engvanga mi tihluih nuam ti em em nge maw a nih le, ngeiawm lutuk mai.

“I duh chuan ilo tel ve dâwn ania, mahse i bal vek dawn ania" u Rinpuia chuan a rawn tih veleh tâkah chuan ka bu ta nghata, “Thawmhnaw chhe deuh ka lo zawn angai dâwn a nih chu, ka hmu ve chaka, vawikhat mah ka la feh ve lova, bâkah heta ka awm chuan ka hna nen hunawl ka ngah zawk dawna, a ṭha zawk a lawm. Nang ni pawh lo lêng ziah rawh u, mahnitea awm chu a khawhar thlâk emai" tiin ka phun sap sapa.

An ni pawh chu bu nghat nghat hlawmin an in fiam leh zuk zuka “Haw tawh ang u, a motor chuang nen hahchawlh te a duh ang, kan awm reng chuan a muhil thei nang" u Rinpuian a tihchuan an tho chhuak nghal sap sapa, ka dang ve tak nangin an inzui chhuak diah diah mai.

Mangṭha in keipawh chu mut tum chuan ka inbuatsaiha, thla a la sik bawk nên a vawt vur mai. Ka khumah chuan inthawlhin ka in ngaihtuah pah neuh neuha, u Rinpuia chuan bialnu a neilo tih ka hre phawta, a hma in tu nên nge an in ngaihzâwn ang? 

U Rinpuia hian a la hre reng angem le? Keilah chuan a eng amah hma hauhin ka duh chu a ni sia, a ruka mi duh hi a hrehawm tak zet. In ngaizawng chuang silo in hmeichhe dang bula an awm pawhin kan lo thik ve em em a, awmzia neilo in kan rilru an tinaa, sawi chhuah ngam silohin an lakah thikthu pe chhe em em in kan awm ṭhin chu ani sia.

A hmeichhia zâwkin bem dâwn ila thil tih chi a ni der silo, a zahthlâk bawk si. Huiham, he khuaah ka awm ve dek deka, mipa pakhat zunah ka uai nghal der chu a ni sia. A nilah chuan a ngaih la tawka awmdan a thiam si, a cool lutuk te,  a changa an khi suk zêl te khan min hneh ngawih ngawih.

Hetiang khawpa mipa vei leh ngaihtuah zui hi ka nei ngailo, bialpa ka lo nei ve tawh ṭhina, mahsela tuna ka tawn meuh zawng a dân a dang tlat si. Keimah min tidanglam zo va, ka ngaihtuah ngai miahloh pasal neih thlengin min ngaihtuah tîr nghal vek chu a nih hi.

Zingah chuan ka harh ruala tho vatin min rawn puih an tum bawk nen rawng ka bâwl sawk sawka, tui hmunah erawh ka kal nawn duh rihlo. Ka ngal a la thip hut hut bawk nen an siamṭhat hma chu kal ka tum tawh lo hrim hrim bawk.

Chaw ka ei kham hnuah ka nghâk ve fe mai, chaw chu ka chhum sa a , naupang ho lah chuan mi rawn hnaih an châk tih hriat takin ka in bulah chuan an rawn kala, an inhrilh ru sar sar bawk “Lo kal rawh u" ka tih tâkah chuan nui chunga min rawn panin an rawn tlân khawma.

“Ih heta lo awm tûr em ni i nih? I hmelṭha reuh e, chuan maw a nute pawhin an hmu che a, hmelṭha an ti lutuk che. Pate Rinpuia pawhin i hmelṭha a ti" naupang pakhat chu ka en nghal chata “U Rinpuia maw? I patea em ni a nih?" ka tihchuan a rawn bu nghat nghata, ka nui nghal sak mai.

“A patea chu a hmelṭha lutuk, nizânah pawh a lo len kha. A u, hmelṭha i ti ve em? Patea chu duh mai la" a rawn tihchuan ka nui nghal hak mai “I patea chuan min duh dâwn em ni?" ka tihchuan phur zet hian “Duh ang, a ni pawhin hmelṭha a ti che alâwm, ee saw â patea chu a rawn kal e" tiin ka hnunglam chu a kawka.

“A pate, a u hi hmelṭha i ti tiraw? Ka lo hrilha, bialnu daih rawh aw." a lo ti nghal zat mai. U Rinpuia chu laih hmel deuh tak hian a nui suka “Chutiang sawi loh tur, naupang i nih kha, enge hetah in tih ve reng renga. Hna kan thawk dawna, hmun dangah lo infiam rawh u" tiin naupang ho chu a enkuala.

“Aih, a u hian lo kal rawh u a ti alâwm, tiraw a u?" tiin keichu chhan beisei zet hian min rawn hnaih hlawma “Nia awm ve mai rawh se, mi an ti buai em em nang" tiin ka lo chhan a, an au nghal chûl mai.

Ka in bul vêlah chuan awm khawmin an inkhualtelem hlawma “An hnawksak dawn ania, an harh si a enga tinge ilo rem tih a?" u Rinpuia chu ka melh zawka, “A nuam ve alawm, a khawhar thlâk loh deuh ang chu. Midang hi an la rawn kal nange?" tiin ka hawi kuala.

“Aniang" tih ringawta min chhân avâng chuan chhân dan tur a vang tawh bawk nen kan ngawi dun ta renga. “Kan lo thleng,min lo ngai em?" Mama chu a rawn langa, a hnungah chuan midang pawh an rawn lang nghal phak phak mai.

“Awi in rawn kal vek elo? Ka van lâwm" tiin ka nuih var var hlawma, chutia min rawn pui tur chu ka hlim takzet. “Lo hal hma hi chu mipa tan chuan hna a awm vak lova, lawm em em rawh. Min duat viau la a nimai, tirawh u rua la tûr leh thing la tur kan insiam rem mai dâwn em ni?" tiin an chêt dân tur chu an sawikhawm nghal nak naka.

Hriat vak nei ve heklo, an bulah chuan ka lo ding ngawi kar mai. “Pali in rua la sela, pathumin thing. A mah chauha a chet na tur a ni bawka, zau em em angai nâng" tiin an inṭhen zui phak phaka, kal ve ka tum erawh an phal hauh lo.

Au lawng lawng chungin ram lam pan chuan an liam diaka, naupang ho nen chauh chuan kan awm tawh. “A u hei hi min lo lawh" pangpar chu an kawk va va a, bepui par a nih hmel, pan pheiin ka lawhsaka, an ni pawh an mahni tawkah an buai nak nak hlawm viau mai.

Nui var varin an inkhualtelem chu ka thlira, a ṭhen in nu leh fa ang chiaha awm ve in an ṭawng tui nasa mai, tih tur em em a awm bawk silo. An chawhmeh tûr lei te pawh angai tho bawk nen naupang ho chu bia in dawr awmna lamah ka inhruai tira.

Engmah ka la hriat loh avangin ka la bo viau mai, “Saw laiah sawn dawr chu a awm" tiin dawr lam pan chuan an tlân nghala. An hnungah chuan ka zui ve zel bawk “U Sangsang, thil kan lo lei dâwn?" tiin dawr nghâktu nula chu an bia a, a ni pawhin alo fiam lêt zuk zuk mai. 

Ka luh ve tâkah chuan min lo ve vatin ka thil duh te chu min zawta, keipawhin sanghaṭin vêl ka duh thu ka sawi chuan rawn la in thil dang chu lâk tur ka en kuala, a vâng phian lehnghâl. Eng pawh nise a hlang tawp pawhin a tui an ti thovang.

Naupang ho chu thil leisak ve in an ni pawh an hlim ve viau mai, haw pahin khawlaia bahkhawr ṭha zet lo awm chu la in sawhthing chu naupang ho chu an neih leh neih loh ka zawta, pakhat chuan an neih thu a min chhângin an inlamah chuan a tlân haw zuia.

In kan thlen hnu rei vak lo ah u Rinpuia te ho pawh chu raw pu chungin an rawn thleng zui ṭak ṭaka. “Thingpui nge tui in in ang?" ti a ka zawh chuan thingpui zâwk an thlang leha, an ngaina hle tih ka hre mai, nui var varin inchhungah chuan lutin ketli leh no keng chuan ka chhuak leha.

Thingpui chu thlit sakin an bulah chuan ka ṭhu ve a, an chau ve bawk ania'ng an thlan a luang ngiai ngiai hlawma, a rûk tak chuan ka inthlahrung viau mai. An mahni hna kalsanin min rawn pui nghal chu ania; an tlâwmngaihna chu ka fak lo theilo.

“In chau êm? Kei lahin tih theih ka nei silo va, a inthlahrunawm hle mai" an mahni en pah chuan ka ti a, an lu thing nak nakin an nui haka “Khua hia lum ema, chuvang a nih hi, rawng bâwl hma mahla a pawi lovang, midang hi an la rawn thleng lo em ni?" Faktean a tihchuan ka lo bu nghata.

“A nihchuan thingpui hi ka hnut chhiah ang cheu nga, lo inthlit zel mai ru aw. In chhûngah kan lut ange, in ril a ṭam tawh hmêl emai, ka bâwl reilo ang" tiin ka thawhchhuah san a, naupang ho chuan min rawn zui nghal diah diah bawk.

A lu chu haiin sanghaṭin ka lei chu ka kang zuia, ka alu baiah chuan hmarcha leh bahkhawr chu telhin ka che buai mawp mawpa, ka rawngbawl chhung chuan midang pawh an rawn thleng nghal tih ka hre mai.

Ka tuihmun chu ṭhiatin an ri laih laiha, naupang ho lo va kal hnai an hau ri chu ngaithla in ka nui leh hak ṭhin. Vawiin chu kan chhangchhe takzet a ni e, hmarcha te ka rawt zawh chuan puih tumin ka chhuaka, an lo ṭhiat fel vek tawh tih ka hmuh chuan ka thaw huai mai.

“In va thawk chak em em, tih theih te ka nei em ka lo pui ve ang che u" ti a ka pan hnaih chuan “Lo awm mai mai rawh, engmah i thiam chuang lo ang. Rua te hi phel a ngaia, ban khur laih lamah sâwn lo va kal zawk rawh. An lei laih saw i lo hai chhuak zêl dâwn ania, chubak i tih theih a awm lovang" Sawma chuan rawn tiin keipawhin ka hnial duh lem lo.

Rua chu phel dâwn ila ka in sat ang tih a hlauhawm bawk si, an lei laihna lamah chuan pheiin ka va puia, thirtianga an chhun khawh sa chu lo hai chhuak zêlin kan infiam pah paha, ka tân chuan thil thar zêl ani bawk nen a hahthlâk tih lam ai chuan nuam ka ti mah zawk.

Lalrina nen chuan kan lai dun mawp mawpa, kan laih sa ah chuan u Rinpuia te ho chuan ban an rawn phun nghal zela, rinai kan hnathawk chu kan chak ka ti phian mai. Nui pah har harin ka kut lei ka haina avanga berh ve luai te chu ka ena, ka hlimpui phian mai.

“Nula hmelṭha hnathawh pui hi chu a nuam a sin, vawiinah zawh hman tum ang aw, inbualna tur a neilo hlauh ange" tiin an che zung zung hlawma. Kut hnathawh chu hneh sawh tak an ni, keini lamah chuan kuthnathawk hmuh tur an vanga, office kal leh a tam zawk kha chu zirlai te an ni bawk nen hetiang ka hmu chu nuam ka ti phian.

Khawpui lam anga vâk kuala, leng mai mai lah hmuh tur an vang. Khawlaia an chhuak pawh hi thil tih tur pawimawh nei an ni deuh fur mai.

“Rinpuia hian sa a kap thei si a, a ramchhuah leh hun chu zui ve ila a ṭha ang, min hruai ve ngei angai ang aw" tiin u Rinpuia chu an en hlawma “In rawn kal duh leh le; mahsela kan hlawhtling kher lo mai thei ania" tive in a rawh phel lai chu a phel zawm mawlh mawlha.

Keiin an titi chu ka lo ngaithla thung, an titina kâra lo inrawlh ve pawh engmah ka hrethiam lo nen ka lo ngawi kar mai.

“Chaw kan ri phawt dâwn em ni?" an tih avâng chuan dar 12 a ri tawh bawk nen ka lo hnial duh lem lova, tho chhuak phak phakin in chhûngah kan lut a, naupang ho pawh chhûn chaw eiturin an mahni in lamah an haw phak phak mai.

“Zanin chu rawn inkhawm ve la, kan rawn sâwm dawn che a nia" an tihchuan ka lo aw ve maia “Inthlahrun miah loh tur, inthlahrung lo in che bawrh bawrh zêl ila, kan tlangnel hma a nimai,  chutilo a i kimkit duk reng chuan hmelhriat i ngah har ang" tiin an kut chu an sil sawk sawk hlawma.

Keipawh chuan sil ve vatin chaw ei chu ka siam zung zunga “Wow rawng i bâwl thiam hle mai, chil a ti pût thei alawm, ei ṭeuh ang aw" tiin thleng chu an kil bial laiha. Ka thaw huai mai, ei rawngbawl lam hi chu ka thiam ve na tak a ni bawka, awmpui nei mah ila ka nu hian mo in la ni dâwna tiin engkim min zirtir vek ṭhin.

Ka nu pawh hi thingtlâng lam mi a ni nghe nghe, a taima em em bawka. Keini unau pawh amah avângin thingtlâng nun kan hre nasa a; mahsela khawpuia awm ta na na na chu a sawi bâk loh kan hre ngailo. An khua a ngai thei hle a, ka pa hian a chângin a zinpui zeuh zela, Keini erawh school kan kal avângin a chângin kan tel ve zeuh chauh a ni.

“Ei ṭeuh ru aw, in puar lo hlauh ange, in hah bawk si a. Puar deuhin ei rawh u" tiin chawhmeh chu ka suah belh zung zunga, mi fiam zuk zuk pah chuan an ni pawh chuan an ei mawp mawpa, mipa an ni bawka. An chaw lâk pawh ana tlâng hle mai.

Ka chaw chhum chu a zo ṭep a ni “Rawn ei ve vat rawh, a nula ber khatia i awm te chuan nula bula chaw ei te kan châk ve alâwm" tiin ṭhutna chu min kian hlawma, keipawh chu ṭhu thla in ka zak duh tawh vak lo, an zia ka hrechiang tawh bawka ka fiam let ve zauh zauh mai.

Ka chaw chhum chu kan ei zo veka, kei ngei pawh ka puar ngei mai. An khawtlang hruaitute'n engkim an lo dahsa a, bungrua ka tan lei tûr a awm lo va, ka vânnei phian mai. 

Chaw eikham chuan thlêng chu min seng puiin a ṭhenin min sil pui bawk, ka hnial ve nangin an tilui tlat bawk nen an dan theih loh. “Lalfakzual i ṭawp lutuk" Sâwma chu a rawn phun hluka, midang pawh an hnar an hup ṭhap mai.

“Vawih uih lutuk, ṭhinga, pâwnah va kal rawh. Khatiang ṭhiante karah vawih chi a ni em ni?" midang chuan an hau mawlh mawlha, a vawih ber a lah a nui uar uar thung. An hauhna chu engah a ngaih hmel vak loh, keipawh in ka hre pha, mahse huatah pawh a kal theilo. An in ngam tlâk hle tih a hriata; mahse ṭhet uih ve tak chu a ni.

“Nula bulah i awma, in sum ve ta che. Kha tiang chuan tu nula mahin an hnaih duh lo ang che, ṭhing lutuk mai" tiin an thawh chhuahsan veka, tualah chuan an va ṭhu dial mai. 

Nui hak hakin thleng sil sa chu ka rem pah mawlh mawlha, “Kuhva i duh ve em?" u Rinpuia chu ka bulah rawn kalin min zawta, ka lo bu nghat mai. Kuhva hi chu tui ka ti bawka, ka ei ve zeuh zeuh zêl.

A ipte chu zen in a rawn phawrha, min rawn pêk rual chuan ngawi reng chuan la in ka insiam mawlh mawlha “Ka lâwm e" tiin ka pe leta, ka hmawm nghal zauh mai. Ka bulah chuan ngawi rengin a lo awm ve a, ka zâm ru viau.

Ka in rem zawh chuan pâwnlam panin kan inzui chhuaka “Lo in zui fal a chi loh ang, ṭhiante thlim reng reng loh tur" midang lah chuan an lo la tizuia, mi fiam hi nuam an ti nimaiin ka hria.

“Kan inzui fal lo, nangmahni in lo chhuak thawt thawt anih kha" tiin an bulah chuan kan va ṭhu ve a “Tlai chaw in ei leh angem?" ti a ka zawh chuan tlai lam chu an inah an ei tur thu sawiin “Lalfakzuala vawih uih lutuk avângin in chhûngah awm reng theih heklo, a vawihin min ur thidang lo chauh a nih kha" an tihchuan kan nui hak haka.

A vawih a ber lah hian zah a tum hmel vak loh, a lo faifuk hlurh hlurh ringawt “In ho ve reuh e" tiin ka nui hak haka “Ho lo ila mi i nel leh si nang, tlangval sual tak emaw pawh min lo tidaih thei" tiin an nui huk huka “In ho emaia, engah nge ka tih ngawt ang cheu? Vawiinah chuan kan zo hman dawn em ni?" tiin kan thilsiam chu ka ena.

“Kan zo ang kan tih kha, mi ring mai rawh" an tihchuan engmah ka sawi tawh bik lem lo, a thawk tu berin an sawi chuan kan ring mai ang chu. 

“Le thawk ṭan ang u hmiang, kan zo har lutuk ange" tiin an che zui leh sap sapa, tih theih ka nei tawh rih lo nen an hnathawk chu ngawi rengin ka lo thlir tawpa, an chak bawka. Reiloteah a chhuat vêl chu kilh bet zung zungin a bang chu an ping zuia.

An mahni lah chau hmel pawh an la pulo, an phur hmel em em reng mai. An hnathawk hmel chu hmuh a hahdam thlâk, ka tân phei chuan ka inthlahrun loh phah ve bawka. Awm an ti nuam huai huai mai, an bulah chuan lo va dingin perek tih vel chu ka lo pe ve zela, an ṭangrual bawk nen dar 4 velah kan zo ta tak taka.

Ka lâwm ngei mai “Awi a nuam dawn lutuk" tiin ka en kual vela, ka bel leh ṭin vel chu min dah sak zung zungin tui herh hawna vel chu min siamsak nghal vek bawk. An chungah ka lâwm takzet.

An zawh chuan zân inkhawm an tum bawk nen an haw zuia, inkhâwm min rawn sâwm dâwn bawk nen keipawh chu chaw chhum zung zungin chawhmeh erawh a ṭhing chu ka ring thunga.

“I hman tawh em?" Faka aw ka hriat chuan tho chhuakin “La hman lo deuh, lo lût rawh u chaw ka eikham chiah, kan insiam ange" tiin ka room-ah chuan ka lut zuia, ka insiam nghal sawk sawk mai.

An hmanhmawh hmel bawk nen min ti hmanhmawh zo “Muangchang khân insiam rawh, dar pawh ala ri hleinem kan rawn fiam mai mai che a nih kha" an rawn tih tâkah chuan ka thaw huai mai.

Insiam zui malh malhin ka hmai vêl chu ka chei thuak thuaka, makeup ka hmang nasa lutuk ngailo bawka inchei chu ka harsat lem lo. Pheikhawk sâng vak lo chu bunin ka chhuak zuia, “I pian chu a nalh mawle. Tirawh u, kal ang u hmiang" tiin kan in zui chhuak dam dama.

U Rinpuia chu a rawn tel ve hauh lo, engmah sawi ve lêm lo chuan an kârah chuan ka kala “Naktuk chu kan ramchhuak dâwn a, sa kan kah hlauh leh kan lo hleh ve ang che. I ei khât awm ropui si" an tihchuan nui hak hakin ka lo chhâng leta.

Ni e, ramsa lam hi chu ka ei ngai miahlo. Ranvulh lam erawh kan ei nasa viau thung, “Keimahin em ni ka ṭhut ang? Hmelhriat pawh ka la nei silo" ka tihchuan “Nula an tam alâwm, an bulah va ṭhu tawp la, a pawina a awm lo. An lo kawm bawrh bawrh mai ang che" tiin an nui zui hak haka.

Ka nui ve ta ringawt, Biak in kan thlen dâwn chuan u Rinpuia leh hmeichhe pakhat hi kan ûm pha a, an in ngeih hmel em em lehnghâl “Nang ni pahnih chu in va sawi muk awm ve" Sâwma te ho chuan an fiam nak naka, an ni pahnih pawh an rawn hawi let nghal vat.

Rawn nuiin “Engmah vak kan sawilo, kha kan nula chu in rawn sâwm chhuak thei a nimaw? Tirawh kan ṭhu tlang dawn ania, Rempuii ka nia" a tihchuan nui sakin ka hmingte chu ka hrilh ve a, u Rinpuia ka en chu min lo en in a ṭhen suk mai.

“Bialnute bula kal loh hi hlauh viau loh tur" ti a an fiam nak nak lai chuan kei erawh hrehawm tizetin ka ngawi kar mai. A hma khân bialnu a neih loh thu kha min hrilh sia; mahse dawt min lo hrilh mai mai ani ang, hei tûnah a lan nghâl rêng hi.

Engmah sawi duh ta lo chuan ngawi rengin ka kal ve zela “I rawn inkhâwm ve thei dâwn animaw?" midang in biak buai lai chuan ka bulah rawn kalin a rawn tisupa, ka lo bu aw tawpa, engmah ka sawi belh lêm lo.

A ni pawhin min biak dân tur a hre tawhlo nge a ngawi zui rauh rauha, Biak in kan thlen rual chuan in zui lût diah diahin Rempuii nen chuan a hma lamah kan ṭhu zuia, a dar rikna a la reilo bawka kal an la awm vak lo. Hla chu sa ve in ka hawi kuala, an Biak in chu rinai a lian ve daih mai, mi pawh chu an rawn thleng phak phaka.

Min en duh hlawm em em lehnghâl, awm an tinuam lo lek lek mai. Hawisawn duh tawh miahlo chuan maichâm lam hawi chuan ka zai a, rilru lah chu a ipik ṭun lehnghâl, ka duh ruk em em in bialnu a nei tih ka hriatna chuan min ti na ru veng veng mai.

Ka bialpa pawh ni hauh silo in min tina thei chu mak pawh ka in ti, a rûka duh neih hi a hrehawm takzet. Thaw a ipik ṭuna, lung ana veng veng bawk, en loh tum pawh ni ila ka en leh lo thei ṭhin lo, inkhâwm e tilo chuan ka rilru chu a hrehawm ngei mai.

Ngaihtuah loh pawh tum mahila ka ngaihtuah lo theilo, engpawh nise keite chu mi thar chiah ka la ni a, hetiang hian ka awm tûr a nilo tihchuan ka infuih ru mawlh mawlha.

Dar an nawn tâkah chuan ka hla bu chu khupin ka ṭhut dan ka siam rema, chair rawn ding chhuakin Bible a chhiar lai chuan ka lo ngaithla renga, a thu chu ka duh chi tak a ni. Ni e khawvêl mite mithmuhah chuan kan ṭha lovin sawiselna kan tâwk reng dawna, chu chu hringnun pianken a ni, kan nunah sawisel tur hmu rengtu chuan an chungah ṭha eng ang mahila min sawisêlna tur an hmu reng dawna, chuvang chuan tupawhin min lo sawisel sela, mahni chak loh phah nâna hmang lovin in tih chak nân hmang hlauh zawk ila.

Min sawiseltute hian kan tlukchhiat lai hmel hmuh an duh avâng te in min relna tur an hre reng ṭhin. Mahse chûng chu kan nun aṭangin hmuh tîr hauh loh tur, min sawiseltuten min sawi anga kan awm anih chuan kan lakah an duh an puitlina, min nuihsawh lehzual nan an hmang hlauh ṭhin.

Chu ai chuan engkim tithei, engkim kan nihna hre vek tu kan neia, midangin min sawisel mahse insawifiah tum lo in ngawi reng hian awm ila, Pathian engkim hretu kan nei alâwm ti a beidawn mai loh hi a ṭha ber.

Inkhâwm bânah chuan in zui haw leh diah diahin Sawma te ho chu rawn len tlang an tuma. U Rinpuia erawh a bialnu inah chuan a lêng dâwn a nih hmel, thik viau mah ila lantîr ka tum lêm lo. A ni tân chuan engmah ka ni lova, min duh ve hek lo, keiin ka duh mai avanga ka ta nih tîr ka lo tum ve ngawt kha a dik lova, keiin ka duh ang chiahin a ni pawhin a duh a nimaia, kei chu atân engmah ka nilova, pawimawhna pawh ka nei hek lo, a tân chuan mi thar mai ka ni.

Ngawi rengin ka awma, ka ṭawngtam lo viau bawk. Ka thil ngaihtuah khân sawi tur min ti hrelo a ni ber mai, thawk la ham hamin ka in kan thlen chuan chahbi chuan ka hawng zuia “Lo kal rawh u, mahse bengchheng lutuk lo ula" tiin ka fiam zauha, an nui nasa mai.

“Au vak vak ila i ṭhenawm te ho an mu theilo anga nimai alâwm" tiin inchhungah chuan kan lut zuia, thingpuite chu chhuanglum in a so hun nghâk chuan an bulah ka ṭhu pheia “In Biak in chu a nuam hle mai, rinai daihin a lian" tiin ka sawia.

“Nia mihring kan tam ve tawh a, a ngai alawm zirtawp zan chu YMA kan in thlang dâwn a, ka kal peih ange maw?" Maman a rawn tihchuan ka en ha a, midang pawh chu an lo muk ran mai “Enga timaw?" ka tihchuan an rawn nui haka.

“Party lam ai mah chuan kohhran ang zawnga in erna hi ana sia, hruaitu tur pawh hian kum dangah chuan inthlanna ah an kal ṭha duh lova, a kal thei naupang deuh ho kha hruaitu turin an thlanga, a kal peih lo khân an sawisel leha, hei tûnah pawh khawtlang group ah chuan an rawn sawi leh tawh hi, mi sawichhiat lam nilo in keichuan thil dik taka tih hi ka duh, an ni chu chhungkaw hung te, an ṭhiante sawmkhawmin kohhran ah pawh nise hruaitu nih loh hlauin an in punkhawm a, hruaitu nih kan châk loh nen an ni chuan midang er ranin midang inthlan dâwnah sawi chhiat an hmanga, an rilru hi a kristian zia lo. An mahni chu kohhran ah te chuan ringtu ṭha lutuk angin an awm mawle, mahse hruaitu nih loh hlau reng renga midang an sawichhe kher hian min ti lâwm lo ve deuh" a tihchuan ka lo bu nghat nghata.

A TAK BEHCHHAN AW

Ni e, tûnlai mite hi chu kohhran leh khawtlângah hian nihna neihloh kan hlaua, a hausa sa hi duhsak an la ni bawka. Mi dik ai chuan mi sum neite'n duhsak an hlawha, an hausakna avâng khân an tlawn ani ber mai.

“Keipawh ka ning tawh, hruaitu nih hi ka châk lo, an duhzâwng tak an thlan kha chu an sawisel ngam lo va, an duh loh an er deuh te miin an thlan khân sawiselna tur an zawng leh char chara. Kan rilru puthmang hi a mak tawh a nih hi, kan nihna te hi party rilru leh mimal hlâwkna duh in kan kalpui tawha, hetiangah hi chuan khawtlang hruaitu ṭha a awm tak tak theihloh. YMA pawh hi mahni mimal hlâwk nana hmang an awm duh ta zel mai" Faktea chuan a rawn ti ve bawka.

Keini lamah pawh a ni tho mai, dikna duh leh thudik sawi fak fak ngamte hian huat an hlawha, ei ru leh midang thamna avanga tling ten a dik a te an paih thla a, kan khawtlang ṭhatna tur bo vin mimal zawk kan lian thur thur zel mai chu a nih hi, khawvel a ṭhang zela, dikna in hmun a chang tawh lova, mi hausate din channa khawvel a ni ber tawh mai.

“A ṭha lo khawp mai hetiang hi chu, mi dik, a huna thudik sawi ngam. Mi dik lote nihna sawi fak fak hi kan mamawh a, ka rawn kal ve ang chu. Nang niin ṭha in tih in sawi anga kan thlang ve hrim hrim ang chu" tiin ka lo tui hnih ve a, an nui hak mai.

“Kal pawh kan lo tum lêm hleinem, an chhungkaw hnaivai ho an rawn in pun khâwm leh anga a dik ho an tling vek kher lovang" an tihchuan bu nghat nghatin “Kan ṭanrual a ngai a nih chu" tih sawiin thingpui so avâng chuan ka kalsawn zawka.

No ah chuan thli chhuak hlawmin an bulah chuan ka va hûnga “Tak takin helam pawh party boruak velin a lo tibuai ve tho a ni maw? Vc inthlan te a hnai tawh bawk sia keipawh ka haw leh rih angai ang, ka awm loh chhûngin ka in hi min lo en sak zeuh zeuh ula" tiin ka thingpui tur la chuan an bulah ka ṭhu leha.

“Tehreng mai, kan lo en lutuk ang. VC pawh in thlan dâwnah a candidate ho an fel em em a, in thlan a zawh a an tlin leh meuh chuan an nihna dik tak a rawn lang leh lawia, mi lem hi kan ni ringawt, kei te hi ka in candidate thut dâwn emaw ni?" an nui zui dar dara, chutah thu dangah pakaiin an ramvah tur chungchang te chu an sawi ho a.

Sa an la tam ve a nih hmel, bâkah an khua hi thing a la tama, khawchhungah ngei pawh thingkung hmuh tur an la awm thluaha. Keini lam nen chuan a in ang lo ngei mai, building sâng pui pui hmuh tur awm lo in thingkung sang leh lian tak tak, zâr buk nalh tak tak hmuh tur an la tam viaua.

Ramngaw an la nei ṭha tih a hriat viau mai, “Rawn kap ngei rawh u, u Rinpuiate nên chuan em ni in chân ho ang? Nge nangmahniin in kal dâwn?" tihchu ka zawta, a chhan pawh vawiin lamah khan an inzui tur thu kha an sawi sia ka hre chak riau.

“Sa a kap thei alâwm, bakah sa zeizia a hria a, a tlawmngai bawk nen ramchhuahnaa zui pawh a nuam. Keini in kâp ve miah lo mah ila a zahve te min la pe zêl duh ania, bâkah a puitlinga sa awmna pawh a hre thei, helamah chuan kan sa ei ve chhun a nimaia, sawhthing te kan hralh loh chuan sum hmuhna tur hi avâng ve a, sa lei theih reng hek loh le" tiin thildang chu an sawi zawm leha.

“Saza kan châng dawna, kan kah hlauh chuan a hlâwk ve deuh ang chu. Mi pasarih velina sakhi pakhat chauh te kan kah chuan chan a lawi kan nei leh dawn silova, saza kâp tura ṭawngṭai char char angai" tiin an nui dar dara. Keipawh chu ka lo nui ve hak mai, phone vêlah bak ka la hmu miah lova, a puma a tak ngei hmuh ve ka châk ngei mai.

“Rawn hlawhtling hlauh ula aw, a takah ka la hmu miah lova, sahuanah awm ve mahse kal ngai hek lo. In rawn kah hlauh chuan ka en ve ang" an thingpui inzawh avâng chuan no chu ka sengkhâwm zung zunga, hetia an rawn lêng chu ka lâwm takzet.

A reh ve bawk sia, ramhnuai ka hnaih bawk nen ka hlau ve lek lek mai. U Rinpuia chu ka ngaihtuaha, tûnah te hian a bialnu bulah hlim takin a nui ngei awm sia tihte chu ngaihtuah neuh neuhin thinlung tak chuan nuih har ka ti.

A lehlamah a hmeichhia zâwkin duh tlat chu zahthlak ka ti bawk si, rilru siam dân tur avâng ngei mai. Ka hringnunah a vawikhat nan mipa ka duh hmasa ve a, ka la chang lo zui! Vanduaithlâk hian a, ngaihtuah chian phei chuan ka nuih lam lam aza, mi bialpa ka lo duh ru ve em em chu ania. Min hria ang tih ka hlau leh hnuhnawh, ka duh tih hre vaih se chuan biak pawh min be duh tawh kher lovang.

“Zanin chu kan men hrep dâwn che a nia, thil eikhâwm ang u. Nula pawh kan rim lova, kan ṭhianpa alâwm kan rim ni" Sâwma chu ka tin nghal zuau zuau a, ngeiawm lutuk mai.

“Sual thiam viau zel suh, ka be duh tawh lo mai ang che aw. Mipa ka ni bawk lo, enge in ei chak?" tia ka zawhna chu an lo phur pui phiana, an pawisa rawn phawrh diat diatin “Waiwai chhûm ang u, kan va naupang chhia dâwn mahse a pawilo, a tui chuan a tawk. Khawi kan lo va lei ang" tiin Mama te chu an chhuak zuia.

An phur lutuk chu ka nuih tawp “Hmingbalui rawn awm hlauh chu lênna tur te kan neih phaha a nuam, kan khaw nula te lah hian min hawi ve lêm silo va. A mah tal hian min hawi rawh se" Sawma bawk. Mi ṭawng thei tak chu a nih ve hi “Ngawi ve mai mai rawh, ṭawngtheih lutuk hi a pawi an lo tih ṭhin kha" chutia ka lo ṭawng lai tak chuan ka kawngka chu rawn in hawngin chulam chu kan hawi ṭhapa.

Chutah patling hakuh fir fer a ha hmai a hmui pâwnlama rawn lâwr chhuak far chu a rawn lût hlawla, ka nuih a za tlat a nih chu. A hmêl chu en loh theih siloh, ahrehawm ngei mai.

Ka inthiam lo viau nangin ka nuih a za tlat bawk si, a ha lam ai mah chuan a rawn mengphawk bawk sia chu chuan ka nuih a tiza a niber, “Enge i rawn tih dawn pa Zuat" Bawihpuia chuan a lo ti a “I nu in lo haw lawk rawh se pawimawh a awm a ti a nih chu, call i la thei silo va" a rawn tih tâkah chuan Bawihpuia pawh chu a tho chhuak vata.

“Ka phone ka silent-a chuvang a nih chu, kal nghal mai ila, ka va haw lawk ange" tiin a chhuak zuia. An kal liam hnu âwm ang velah chuan “Pa Zuata hi chu nuih loh tum pawhin nuih angai leh nge nge zêl, kan hrethiam che" an tihchuan ka lu ka thing nar nara.

“A rawn hlauhthâwn hmêl lutuka, chuvang a nia Mama te pawh chu an va rei ve" ka tihlai tak chuan “Kan rawn thleng, min lo rêl reng reng suh u" tiin an rawn lut Zuia “Kha nang nula ah chhum nghal rawh, ril a ṭam ania" tiin ṭhutthlengah chuan an ṭhu zuia, keipawh chu tho chhuak vatin an waiwai rawn lei chu ka siam nghal zung zunga.

Ka artui lei sa vêl chu telhin ka buai zui rak raka “A rimtui hle mai, ka van ei châk tawh tak em, tlaiah chaw ka ei theilova. Ei ṭeuh teh ang" Kimkima chuan rawn tiin a rawn au zui lâng lâng a “A hmin ṭep e, lungngai suh i ei ṭeuh ang" tiin ka au leta, a naupang ber a ni bawka a rilru pawh a la naupang chhia ve viau mai.

Ka thil chhum a hmin chu suanin fian leh ka thleng kum neih ang ang nen chuan ka chhawp phei zung zunga. “Ei vat ang u, ka nghâk dâwn lo cheu ania" tiin Kimkima bawk chu a suak hmasa berah chuan a ṭanga, midang chuan nui chungin engtin mah an ti biklo, a naupang ber a ni bawka an duat ru ve riau mai.

A suah zawh chuan keini pawhin kan thlêng ah ṭheuh chuan suak in kan ei sap sapa, Waiwai chhum hi chu keimahin ka ngainat êm avang hian chhum chu ka thiam ka in ti ve reng. In fak lam pawh nilo sela, ka nute bula ka awm lai pawhin chhûnah chaw ei lo in ka ei mai zel.

“Khamawm loh ve, kan naua hian a heh bawk sia, engpawh chu nise naute hi chu ken ve te an ngai, puitling rilru an la pu siloa. An ṭap ang tih a hlauhawm" Mama chuan Kimkima chu a kâp zauha. Midang chu kan lo nui thung.

“Kha tikhan min ti bik ziah suh u, naupang mah ila mi inkâwm duh tho kha, bâkah kum 19 ka ni ve tawh reng" tiin a tum bur mai. “Ni e, a puitling tawh nuthlawi rai rual zet chu a nih ve tawh kha"fiamthu bawk chuan an lo tileha, pakhat lah in a huat tawk a tling em em bawk si. 

An ṭhianho inpawhna chu ka ngaisang ru phian mai, bâkah mipa hi chu in rêl leh in sawichhiat tih vêl hi an nei ve vaklo, hmeichhia te zawk hi mahni ṭhiante ngei ngei pawh rel thei kan ni leh zela, mipa nên hi chuan tehkhin chi pawh kan nilo.

“A va tlai chak ve, kan haw leh mai dawn em ni?" naktuk lam tih tur neite kan ni si a" tiin an tho chhuak phak phaka. “A la hma a lawm, la lêng rih ula" ka ti ve tak nangin an haw zui phak phaka.

“Naktuk zân chu kan hman lo phawta, zirtawp zânah inthlan naa kal turin kan lo sâwm ang che. Lo in ring la, muttui phawt" tiin an kal liam zuia, keipawh in chhûngah lût in kan thingpui inna vêl leh thil eina chu ka sil leh phawta, a vawt ṭha ngei mai.

Khur hlak hlakin ka inrem zung zunga, tui a hik bawk nen ka kut te chu a vâwt vek mai. Mu zui vatin rizai chuan ka inkhuh hluna, movie chu en leh te te in ka nui leh hak ṭhin, a chang leh ka thinrim pui bawk. A changtunu te an nêp thei lutuk hi a châng chuan ka haw lek lek zêl.

“Hi" chu message ka hmuh avang chuan WhatsApp lamah lût leh phawtin a dp en ka tuma, ka hmu theilo. “Hi" a pawimawh ringin ka chhâng ve tawpa “I mu tawh em?" tih chu a rawn thawn leh nghala, tu tak ni ang maw. A hming lah R tih bâk dah hek lo.

“Mu dawn chiah, tunge i nih aw?" tiin ka zâwt a, ka number a neih dân tur awm ang ka hre miahlo “Zorinpuia ka nia" a rawn tihchuan u Rinpuia em ni ang? Tih chu ka ngaihtuaha; mahsela ka ring chiah bawk silo, hming in ang te chu a tam a lâwm tiin amah chu a nih ka ring lo bur.

“Um, eng khua nge i niha? Ka van hre ngailo che" tihchu thawn leh in keimahte chuan ka khi saka, a mi rawn biak dân chu mi a hre sa emaw ni ka ti hial. “Min hre duh lo a nimaw? Ṭhian emaw kan nih ka lo ti a, vawiinah pawh in zîngah ka lo tel ve ngei kha" a tihrual chuan ka lung a phu nghâl dawt dawt mai.

Ka hriatsual nge ni anga, amah tak tak? “U Rinpuia maw? Engtin nge ka number i neiha?" min dîl bawk silo, ka number a neih dan chu ka hre lo tak zet. Mahse a ruk tak chuan ka lawm, a number ka dil hreh bawk si a, amahin min lo be hlauh chu chhûngril lamah ka hlim veng veng thei.

“Neih a harsa hleinem, VCP hnên aṭangin, kan makpa a nia" a tihchuan ka ngaihtuah rauh rauha, a hma khân an in sawi hauh silova. “Um..a nih chu nang i mu tawh em? Nge i la leng?" a bialnu kha a la rim angem tih chu ka hre châk tlat nia.

“Ka haw tawh, a tlai tawh alâwm. Zanin chu in hlim maw? Ka rawn tel ta silo va" tihchu a rawn thawn leha, ka ner sak mai. A bialnu chu a ngaihsak viau ang tihchu ka rin sa a ni a, mahse a taka hriat chu ka tan chuan a nuam lo duh takzet. Ka rilru chuan “Keipawhin ka hmuh tirh aṭang che in ka duh che a sin" tihchu sawiin engmah erawh ka hrilh duh lem lo.

“Hlim a ni mai ang chu, nangpawh nuam iti viau ang chu. Bialnute bula awm chu a nuam alâwm" tiin emoji nui lai lem chu ka va daha. Engtin tak min rawn chhâng ang maw? Ka rilru a hriat loh hram ka beisei.

“Nuam a nimai ang chu, bialnute bula kan hlim bawk loh in" ka chhiara, ka chhang mailo. A rûk chuan ka thik takzet “Um muttui phawt aw" tiin ka phone chu ka hmet thim zui ta daiha, chhan rêng pawh ka châk lo, ka rilru a hrehawm mai mai.

Keichu ka rilru ka thup thiam lo, tin induhna leh hmangaihna ah hi chuan a rei leh reiloh ka thliar lo, vawikhat inhmuhnaah hmangaihna piang theilo sela miin love at first sight an lo ti miah lo ang, min dem pawh nise pawi ka tilo, vawikhat nâna ka hmuh tirh aṭanga ka duh awm chhun mipa chu ka hriattir ve tûr alawm, zaktheilo tih pawh ka hlawh ang. A chhan chu an khuaah ka awm ve chauh ania, Mahse mihring thinlung leh rilru in an vek loh zia tilang tu a niin ka hria. Min sêlna pawh nise ka pawi ti lêm chuang lo, duh neih chu a thiang alâwm.