MANGRAM PASALTHA CHAPTER 9

MANGRAM PASALTHA

CHAPTER 9 

Zualtei nen thing phurin kan titi malh malha “Nei lui mai la, i nu leh pa pawhin pawm hun an la nei mai ang chu" a tihchuan ka lu ka thing nak naka “Lalpa hian a fanu rilru tina tu chu a zuah duh i ring em ni? Bakah Saihlira chuan min hmu duh tawh hleinem, a hlim tawh lutuk" tiin ka mittui chu ka hru mawlh mawlha, Zualtei chuan khawngaih hmel zetin min kuah ringawta.

Chutia kan lo thut lai chuan thawk leh khatah hnim kar atang chuan mipa rual rawn chhuak thutin min man bet zuia, “Nang maw " tiin Thanpui lalfapa chu ka en haw a, min nuih suk pahin “Min hnar reng lo la chuan hetiang thil ka tihkher a ngai lo tur" a tihchuan ka melh ram ram mai “Mipa tenawm tak i ni, ka thiannu hi kal tir rawh" ka tihchuan min rawn hnaih sauh a.

“Thil pakhat min neih dawn chiahin ka chhuah ang, a nih loh chuan helaiah hian a nun ka la ang" a tihchuan a ti duh tak tak dawn tih ka hria “Awle a nihchuan kal tir rawh, ka zui ang che " ka tihchuan Zualtei chuan tilo turin min lo ti ve bawk “Khuaah let la, chuan Saihlira khan min rawn zawn a tum a nihchuan min rawn zawng suh se, min hmu tawh dawn lo kal rawh, min rawn zawng turin ka duh ve lo tih hrilh ang che" tiin ka mit ka chhing zuia.

Zualtei pawh chu kal tura an nawr luih takah chuan khawlam pan chuan a tlana, Thanpui lalfapa chuan min kai tho lawpin “Hmanhmawh ang u min rawn umzui ngei dawn a nia" a tihchuan ka nui saka “Saihlir min rawn zawng miah suh ka tihkha, ka bo hunah min rawn zawng suh ka tihkha hre reng ang che. Mangtha le ka hmangaih, chhungkaw hlim tak din nang che " tisepin thanpui lalfapa te chu ka zui hnak hnaka.

SAIHLIRA POV...

Nguri leh lawmpa te pahnih nena lal luhka a kan lo awm lai chuan Zualtei mangang taka rawn tlan haw chu kan hmu a, kan hnaih nghal ruak mai “U Zampuii an man, Zampuii Thanpui lalfapa te khan an man a nia " a tihchuan ka nghing lawih mai “Lawmpa hmanhmawhin kan kal a ngai" Ngurthangan a rawn tihchuan chet chhuah mai ka tum chu Zualtei thu rawn sawi avang chuan ka ding data.

“U Saihlir Zampuii chuan min rawn zawng suh se, tumahin min rawn zawng suh se a ti. A bikin nangmah i hnenah thusawi turin min ti a ni, a bo hlen dawn tih a sawia, zawng miah lo turin a ti che" a tihchuan ka hlauthawng zual sauh, a khawvela let a tum tih ka hrethiam mai. Nilo ka kaltir hauh lovang. hmanhmawh zet chuan in lam pan chuan ka tlan zuia.

Insiam sawk sawkin ka nu chu thil awmzia ka hrilha, a ni pawh a lo hlauthawng hle lehnghal. Ka tlan chhuak leh vata, Kapkima kawtchhuaha lo awm ka hmuh chuan nuisakin Ngurthanga pawh chu a rawn thleng zuia “Hmanhmawh kan ngai, Zampuii khan a khawvela let a tum a nihkha, muangchang thei kan nilo " tiin ram lam pan chuan ka tlan nghal puat puata. An thing phurhna hmun kan thlen chuan hnu chu zawng zuiin thlang lama hnu lang raih ka hmuh chuan ka zui vata.

An kal thui tawh hle ang tih a chianga, an thingphurhna a hla tham bawk nen Zualtei rawn thlen kha chuan an thleng thui tawh viau in ka ring. Thawk la ham hamin ka thiante pahnih pawh nghak hman lo lek chuan ka tlana,  “Lawmpa ka lo va kal hmasa mai ange, lalfapa nen khan muangchangin rawn kal mai rawh u" tiin Ngurthanga thaw hlawp hlawp chu ka melh zawka, Kapkima pawh chuan a lo pawm ve mai bawk.

Keimah chuan hnu chhui chuan chak takin ka tlana, Zampuii bak ka ngaihtuah theilo. Khua a rawn thim pawh chuan chawl lovin ka kal par para, an tinzawn khua ka hre bawk nen ka bo lem lo, ralkhata meichher ka hmuh chuan ka kalchak zual sauh va,  ka hnaih takah chuan thawm dim tak chuan ka pan hnaia, mi pahnih chiah ka hmuh avang chuan ngaihtha lo zetin a sir lam chu ka melh kuala. Hmuh ka neih loh avang chuan chu mi te pahnih chu ka bih ngara.

Che chhuak thutin pakhat lu chu ka sat lir tawla , pakhat erawh a chem kenna lam chu ka sah bun sak hmawk thung “Khawiah nge Zampuii in dah, khawiah nge in lalfapa " ka tihchuan hlauh hmel zetin min ena “Lalfapa chu khuaah pasaltha te nen an let tawh, keini chu hetah lo chelh khawmuang tur cheu in min awm tir a ni, engtin nge kan mei kha i rawn hmuh theih, i hmeichhe sawi chu a bo tawh. Inthiar tura a kal kha a bo thu Lalfapa in thinrim taka a rawn sawi bak kan hrelo" a tihchuan sah leh chu tumin ka zak chu ka kau va.

Mahsela nun tura min ngen tawk tawk avang chuan Zampuii hre chhuakin ka inthlahdula, “Kal la in lalfapa chu ka la rawn hmu dawn tih hrilh ang che" tihmukin ka hnungchhawn zuia, a tlanchhe ri ka hriat takah chuan Zampuii chu ka au vaka, a reh tlawk tlawk mai “Ka tihpalh, lo let rawh i tello in engtin nge ka awm ve tawh ang, he mipa hi nunrawng taka a chhuah leh i duh em ni? Ka hmangaih lo let rawh" tiin leiah chuan ka thu thla hnawka.

Ka huat em em thin mittui chu ka biangah chuan a luang thla pap papa “Lawmpa" Ngurthangate chu ka hmaah an rawn ding a “Khawnge Zampuii chu " an tihchuan ka chhang lo, thil awmzia an hriat thiam avang chuan ka darah chuan an rawn beng thak thaka “In ti chak rawh, engtin nge kan awm zui dawn" Kapkiman a rawn tih chuan ka chhang lo, ka ban chu ka en vang vanga, ka kuta a la sen phuar ka phelh ngai loh chu en rengin ka phun sup supa.

“Let phawt mai ang u, khua atang ro kan rel tha leh dawn ania, Zampuii pawh a lo let mai thei a sin," Ngurthangan a tih pawh chuan ka chhang lem lo. A lo let tawh dawn lo tih ka chiang si “Ka hmeichhe hmangaih hmasak ber a ni a sin" ka thusawi avang chuan min en dun renga “Ka tina a, a taksa hial min hlan chungin keichian ka tina a ni, a rawn let tawh dawn lo. Ka bo chuan min zawng suh min hmu tawh ngai lovang tiin min hrilh thin" za lo zeta nui chung chuan ka sawia.

An pahnih chuan min en reng ringawt,khua a kan leta chanchin an hriat chuan ka nu chu a tap rawih rawiha “Ka fanu, i chungah kan lo nunrawng lua em ni le? Khawiah nge i kal tak ang, nu leh pa tello in i awm rei mah tih laia keini i nu leh pa neih chhun lahin i hmangaih pawh kan neih tir thei silo che" ti a a tahna chu chhan duh viau mah ila chhang turin eng thu mah ka chhak chhuak theilo.

Thanpui khaw run an tihchu ka pawma, kha lalfapa kha ka zawn hmuh hma loh chuan ka chawl dawn lo. Zampuii ru chhuak kher lo se chuan hetiang thil hi a thleng lo tur, a in ah chuan kalin a bungrua in rem fel thlap chu ka thlira, lo haw tur ang maiin ka ngai lehnghal. “Engtin nge i tello va ka awm ve ang le" tisupin a mutbu chu ka khawiha, a rim la nam veng veng chu hipin thawk harsa tizet chuan ka thaw chhuak hrawk a.

“Min ngaidam rawh, ka hnenah lo let leh hram rawh Zampui, vawikhat tal kuah leh che ka va chak em?" ti a phun sup supin a khumah chuan ka thu renga, he inah hian a mahin khawhar takin a cheng dawn chu a ni sia le, hetiang a thleng dawn tih hria ila chuan vawikhat tal ka lo hmu tur, tunah chuan engtikah mah ka tawng tawh dawn lo tih ka chiang si, ka va han ngai tak em.