MANGRAM PASALTHA CHAPTER 5

MANGRAM PASALTHA 

CHAPTER 5 

SANGPUII POV...

“Mikhual min thleng thei angem" ka in pawn atanga rawn ti tu avang chuan ka hawi a ho a, chu aw lah chu ka hriat hnu a ang em em lehnghal. Saihlirate khua ka chhuahsan atangin thla chuang fe a liam leh tawha, khawlian vak lo belin an lal chuan a in bul maiah in min sak saka, ka lawm viau bawk. Kei atan midang chim buai vak kha ka duh loh vanh a ni.

“Thei tehreng mai lo lut rawh u" ka tihzawh rualin kawngka ah chuan mipa lianpui a rawn luta, a hmel erawh eng hnungchhawn zawnga a din tlat avangin ka hmu theilo thung. ”Tunge i nih aw, khawi lam atanga lo kal nge i nih?" ka tihchuan min rawn hnaihin ka hmuh theih tur chuan a dinga, a hmel ka hmuh rual chuan ka mengkawk mai, Saihlira maw?

Sawi tur pawh hrelo chuan ka ding ngawi renga “Zawn hmuh i har hle mai Zampui" tiin min nuihsuka, kei erawh tawng nachang pawh ka hrelo. Engvanga helai hmuna rawn kal nge a nih ang, “Eng..engtin nge ka awmna i hriat" min rawn hnaih ruaka, ka lo tawlhsawn dat mai. “Ka zawng che mawle, chuan ka nu leh pa in lo haw turin an duh che, ka nu nangmah avangin a hriselna a tlakhniam phah a sin" a thusawi avang chuan ka en ha a.

“Maw ka nu chu engtin nge a awm?" hlauthawng zet chuan ka ena, a rawn thaw haka “Ka rualin rawn let rawh" a tihchuan ka hawi buai nak mai, Lalfanu nen an inneih tawh ka ringa, nilo ka hmu dun thei lovang “Ka duhlo" ka chhanna avang chuan a nui saka, min hnaih lehin alamah min pawt hnaia. A awmah chuan ka bei titih lehnghal “Ilo let ang, a nih loh chuan ka nu leh pa hnenah min duh avang tlanbo i ni tih ka hrilh ang" phawk lutukin ka en chho va.

Zualteiin a hrilh a ni chiang mai “Duhtawk rawh, ka lo let loh chuan hria pawh nise a pawilo, ka lo let tawh dawn lo min chhuahsan rawh" min thing nghal nawka “Ngawi hmak rawh i rawn let ang i hria em, he khua hi ka haldarh i duh loh chuan rawn haw ang che" a tihchuan ka tap lo chauh, a thinchhia in a sual an tihchu a lo dik a nih hi. “Misual tak i ni" ka thusawi avang chuan a nui suka.

“Insiam rawh Lalin ah kalin ka ruala i rawn let tur thu sawi ang che, i ti duh lo a nihchuan he khua hi ka ti boral ang" rum zetin ka ena, mahse a sawt der silo. A ti duh tak tak dawn tih ka hria, bakah a hming hi khawtin in an hria ang tih theih a ni. He khuaah ngei pawh a larin an hlau hle a nihkha, insiam hnak hnakin thla tam tak ka lo chen ve tawhna in chu ka en vang vanga, ka lung a ti leng nghal vawng vawng mai.

Min kai chhuakin Lalin lam chu min panpuia, “Buarpui lal inah kan lo lawi lut thei angem, Sailak pasaltha Saihlira ka ni e " a tihrual chuan Lalin lam atang chuan an rawn chhang vata, kan lut min lo hmuh chuan lalpa chu a mengkawka “Kha Zampui i lo tel ve a ni maw? " a tihchuan ka bu nghata “Lalpa Zampuii hi ka hmeichhia a ni a, a ni nen hian kawng lakah in hlohin tun hun hi kan thleng ta a ni. Rei tak ka zawnga hetah ka rawn hmu hi ka lawm teh a sin, vawiinah hian khua hi chhuahsan kan duh a ni, ka nuten inlamah min lo nghak ve reng si a" a tihchuan mak tiin ka en kawka.

Lalpa lah chuan a lo la awih thlap zui, engmah ka sawi ve lo a chhan pawh a thinrim chuan lalpa meuh pawh a that duh mai a ka rin vang a ni. Chubakah he khua ka luh tirh khan ka chanchin ka hrilh vak lo hrim hrima, kawngbo awmna tur neilo ang khan ka insawi tawp kha a nia. “Aw a lo nihchu, in inhmu leh thei hlauh chu a va tihzia em aw, ni e tluang takin in kal dawn a nia, kan fanu ang chiaha kan en a nia, a ngaihawm dawn hle mai" a tihchuan lalpa leh lalnu chu ka kuah vang vanga.

Ka tah a chhuak takzet “Ka ngai dawn lutuk cheu, in mi duhsakna zawng zawngah ka lawm e" titiauin ka thawhsan zuia, an hmel atangin an ni pawh an lungngai tih ka hria. Fa an nei thei lo bawk nen ka khawngaih takzet “Pasaltha min rawn tlawhpui thin rawh aw, kan ngen a che. Fa kan nei thei lova, kan fa ang hiala kan ngaih chuan min kalsan leh mai dawn si a " an tihchuan an hmuh loh lamah mittui ka hru mawlh mawlha.

“Awle a khat tawkin ka rawn zinpui thin ang tih ka tiam a cheu, kal rawh le Sangpui" a tihchuan pawn lam pan chuan kan chhuak zuia, lalnu leh lalpa pawh chuan min rawn zui chhuak ve bawk. Kawtchhuah thleng khaw mipui a awm awm chuan min rawn thlaha, he khua hi ka lo ngaina ve tawh nen kalsan ka hreh tih piahlam a ni. Kan liam thleng chuan ka tawng lo, thui fe kan thlen hnuah Saihlira chu a ding chawta.

“Engvanga tlanbo nge i nih?" a rawn tihchuan ka melh ngheka “Ka hua che, ka haw lutuk che" tiin ka chum zawt zawta “I kianga awm reng ka peih lo, i nupui nen chuan awm ve mai mai ta che u. Nupui i neih tawh ber a hnu engvanga min la rawn zawng leh nge i nih?" tiin ka au khum tuar tuar a, ”A chhan chu nupui ka la neihloh avangin, a chhan chu ka duh che avangin" a rawn tih ve hrawk avang chuan mak tizetin ka ena.

Enge a sawi kha? A ni hian min duh ve amaw? Nilo ka hriatsual a ni ngei ngei ang “I...i ti tak tak lo" ka tisepa, a rawn khi nghal sak mai “Ka thusawi zingah dawt i hre ngai em?" a rawn tih khauh chuan ka ngawi vang vanga, a thusawi chu a dik tihna. A nihchuan min duh maw, ka mumang chu a nisilo, hnaih ruakin ka nuih ver vera “Kal vat ang" a rawn ti daih a nihchu, hepa hi chu aw. Phur zet chuan ka zuia.

Thui fe kan kal hnuah ka chau lutuk chu ka thu hnaka ”Khua a thim dawn hi ka chau tawh, ka kal peih tawh lo" ka tihchuan ding chatin a rawn kira, ka hmaa a rawn thuthniam chuan zawhna mitmengin ka lo en ha bawk. ”Lo lawn rawh, kan piah deuh ah sawn zan hmasa a ka riahna a awma, tah chuan kan riak dawn a nia" a tihchuan ka hnial bik lo, a hnungah chuan lawnin ka kuaha, min dinpui nghal nawlh mai.

Min zo tih piahlam a ni, muangchang chuan min kalpui zuia, a puk sawi kan thlen chuan khua a thim fel der tawh. Meichu chhem zung zungin chaw a chhum zuia, kei erawh ka chet a phal miah lo thung, puk bang ngheng chuan ka thu ar ara, a rawngbawl lai chu ka en reng bawk “Ei ang le" a tihchuan ka hnaih vata, sa rep hem nen chuan chaw chu tui tizetin ka eia.

Ka ei kham rual chuan ka dul chu chul hauh hauhin “A van tui tak, ramhnuaia chaw ei hi a lo tui zual bik a nih hi " tiin ka tho chhuaka. Saihlira a rawn khawm ve rual chuan chaw eina chu tifel zung zungin kan awmna puk kotlangah chuan thla eng kan thlira, a dar chu ka ngheng nghal zat “Min duh ve tak tak em? " chu chu ka hre duh, nge ni a min hruai haw na hmanrua mai zawk ni ang. 

“Ka duh che tih ka sawi tawh kha, fiah kher ka la ngai em ni. Hmeichhia ka hnaih ngai loh zia i hria ang" a tihchuan ka ner nanga “Hrelo, lalfanu i rim reng" ka chal chu a ri lawlh mai ”Sawi ve ziah suh, ka nau a ni" a tihchuan ka awih chuang lo, ka lam rawn hawiin min kuai daka, enge tih a tum ka hriat loh avang chuan ka lo dawh mawl tawp bawk. Chutah a hmuiin ka hmui a rawn tawh avang chuan phu zawkin a awmah chuan ka kut ka nghata.

A hmui a ti che lem lo, hmanlaiah pasaltha thawnthu ka ngaihthlak kha an infawh tir ve fo va mak ka ti lutuk lem lo. Mahse a hmui tiche heklo keimah zawk chuan ka hmui tiche in ka fawp zuia, ka puan kar atanga ka mal lang chu rawn chulin a duhthawh zual sauh va. Ka puan chu pawtthla in min delh mut dawn takah chuan ka harh chhuak zawk mai, awlsam takin ka lo in pe tep a ni tih ka hriat chuan ka zak ngei mai.

Hmeichhe sihhnip lutukah min ngaih loh hram ka beisei “U Sai, hei chu tilo ang. I nupui ka niha i kianga ka chen hlen theih hunah chiah aw" ka tihchuan a thaw deuh hawka “Ka tan i inpe pumhlum turah ka ngai a sin" a tihchuan ka hnaih vat mai “Nilo i tan ka ui reng renglo, mahse mudunin min kalsan leh si la engtin nge ka awm ang, pasaltha tam tak chanchin ka lo hre tawha. Thenkhat chuan khawdangah fa nei fo in an nupui te an phatsan fo tih te ka hre ve bawk a sin, hmeichhia chu kan dinhmun a hniam hle tih ka hai lo" tiin ka ngawi daiha.

“Hmeichhia ka kawp ve duah lo" a rawn tih hmuk chuan a kut chu ka humsak vata “Thil ka hrilh ang che, ka nihna diktak. Chuan min ring turin ka duh bawk che" tiin ka chanchin an hunlai a mi ka nih loh thu te chu ka sawia, mak a tih hmel em em lehnghal. ”Rin a har ang tiraw, mahse ka chetdan ka thilsiamte atang pawh khan mak in tih em kha" ka tihchuan a ngawi vung vunga.

“A nihchuan i kir leh thut thei tihna em ni?" ka bu nghat nghata, nghet zeta min rawn kuah avang chuan ka hamhaih lawk ngei mai “Bo daih suh aw, ka ngai lutuk palh ang che. Ka kiangah awm reng rawh" a tihchuan ka nuihsak ringawt.