MANGRAM PASALTHA CHAPTER 11

MANGRAM PASALTHA 

CHAPTER 11 

Saihlira nupui ka nih takah chuan an inlamah ka insawn leha, mutbu engkim chu la chho in a ni pawh zawlbuk la kai tho mahse zanlaiah rawn haw in ka bulah a mu ziah thunga, keiin ka thlahlel bawk nen pawi ka ti vak lo. Lalfanu lah kan lakah a lawm lo hle tih ka hria a, ka pa khawnbawl a nihna ang leh Saihlira pasaltha ber a nih avangin kan chungah thil thalo an ti ngam lo ni berin ka hria.

Chuti nilo se chuan eng emaw tak an tih ngei chu ka ring, nau ka pai mai bawk nen ka nu leh pa pawh an hlimin an theih ang tawkin min duata, Saihlira sa kah thin nen ka chaw ei a tuiin ka thau lam mah tawh chu a ni e. Tukkhat ka tui chawi haw chu in thlen hma deuhin Lalfanute thian dun nen kan intawka, kal pelh mai ka tum laia an thusawi avang chuan ka ding chat mai.

“Engmaw in sawia" tifakin ka melh ngara “Mahni unaute ngaizawng duh hmeichhia hi an rapthlak kan ti mawle" a rawn tileh chu ner sakin ka phur chu ka nghat tha te te “Chu Saihlira nen min tihchhan tihna em ni?" ka tilet ve ngata, lalfanu mah nise zahlo taka min betu chu zah let ka tum bik lo “A nih mai lohvin, mahni enkawltu pawh zah zo lova mahni taksa mawina hmanga mipa thlem dun dun, kha i hlawhtling ta phawt chu a nia" a tihchuan insum zo lo in ka beng sawka.

A rawn thinrim nghal phat mai, insual zuiin ka hnek sawka, na tur khawp erawh chuan ka khawih duh bik lo thung. Lalfanu a ni tlat, chutia kan lo buailai chuan zawlbuk atanga tlangval rawn tlanchhuakte chuan min rawn thelha. “Saizampui enge i tih" lalfanu tap en chunga Saihliran a rawn tih hrawk chuan phu zawkin amah chu ka ena “An mahniin min ti hmasa a nihkha" ka tichu “Ngaihdam dil rawh" a rawn tih avang chuan mak tiin ka en ho a.

“Teuhlo mai lalfanu mahnise ka dikna ah ngaihdam ka dil a tulna ka hrelo" tiin ka kut chu ka kuangkuah ata “Dil rawh ka tihchu" a kut chu rawn lek uaihin a insum leha, lalfanu tap der min rawn nuih saktu chu ka hmuh hmaihlo, a enga mah hmaa Saihliran min dem ringawt chu ka lawm lo hle bawk “Ka dillo ang i duh chuan lalfanu kha nei rawh" tiin ka em chu phur sawk sawkin in lam ka pana, tuihmun ah chuan nghat sawk sawkin inchhung pawh lut lo chuan ram hnuai lam ka pan daiha.

Khaw pawn kham sang zetah chuan thu in thlifim chu ka inchhem tir heuh heuha, ka mittui luang chu ka hru leh zeuh thin. Ka thlavang pawh hauh miah lovin lalfanu thlavang kha a hauh vela, engmah thu bul bal hre hawt silo in min la hau zui bawka, lalfanu hmela chawh min tihna lah kha ka hai der silo. Kham hmawr te ah chuan thu in ka piah ral hla tak chu ka thlir vang vanga.

Reife ka thut hnuah min au ri ka hria a, Saihlira leh Kapkima an rawn lang zui nghal chat. Kham hmawra ka lo thu reng an hmuh chuan Saihlira chu a chi ai hmel nghal hle “Zampui lo phei rawh" tiin min rawn hnaih ruaka, en pawh duh tawh lovin kham lam bawk chu ka hawi san leha “Lo phei rawh le ka tihpalh, inah haw tawh ang" ka tihchuan in her riai riaiin a hmel chu ka ena “Inthen ang" ka thusawi avang chuan a mengkawka.

“Inthen ka duh, ka fa lo piang tur hi chu ka enkawl ve thei mai ang, pasal ka thlavang hauh ngam lo tu neih ka duh lo" ka tihleh fak fak chuan min en reng ringawt, chutah ka lam rawn panin kham hnaih lo tur chuan min ti pah renga, “Inthen kha sawi suh i bulah lo ka awm theilo ka tihkha" tiin ka hma ah chuan a rawn dinga “Teuhlo, lalfanu kha va nei rawh. A hma ang bawk lalfanu a vangin keimah bawk min dem leha, nei la ka nunah rawn lang tawh suh. Ka fa chu ka enkawl thei em em ang nang nena inzawmna neih reng ka duhlo" alamah chuan min pawt hnaiin min kuaha.

Kuah let pawh ka tumlo “Ka tihpalh, i duh chuan he khua hi kan chhuahsan dawn a nia. Engkim ka hre tawh e, min ngaidam thei a ngem? Ka fa nen in tello chuan ka awm theilo ang, he khua hi kan chhuahsan dawn a nia, tun atang chuan i hmaah ka ding zel tawh ang min ngaidam thei angem? " a tihchuan ka chhang duh mai lova, ngaihthat loh hmel zeta min en takah chuan thawk la hakin alam chu ka pana.

“Ngaidam thei lo che ti ta ila engtin nge i tih ang?" ka tihchuan thaw huaiin min rawn kuaha “Min ti hlauthawng a lawm, engtiang pawhin min hlat tum mahla i awmna hmun a piangah ka awm zel thovang" a tihchuan ka kuah let ve ta vang vanga. “Khua ah let ang hmiang kan lalpa ka biak angai ta e, he khua a ka nupui leh fa hi an him lo a nihchuan an himna hmun turah chuan ka nunna pawh chan huamin ka hruai chhuak mai tur a ni" a tih chuan ka nui haka.

“Chung em chu thleng suh se" tiin khawchhung lam chu kan pan duna, lal mualah chuan mipui an lo pung khawm luai luaia, Saihlira nen chuan min lo en thupa “Lalpa he khaw tan ka lo thawh tawh thinnaah dil duh che ka nei a ni" Saihliran a tihchuan lal chu a rawn ding chhuaka “Sawi ta che ka pasaltha ka fanu chet dan ka lo hria a, a pawi hle mai" a tihchuan Saihlira chuan lawm thu a hrilh hnuah a kal chhuaka.

A bulah chuan min hruai tel ve zel bawk “Lalpa lunglohah min laksak lo la, he khua hi kei leh ka nupui hian chhuahsan kan duh a ni" a tihchuan mipui thawm reh thuap chu phun mur mur thawmin a rawn luaha, a then lahin min zui an duh thu an lo sawi ve bawk. Lalfapa leh Kapkima chuan min rawn hnaih vata “Lawmpa i tello in he khua hi a ding rei thei dawn em ni?" an rawn tihchuan Saihlira chu a ngawi ngur ringawt.

“Ka pasaltha in rilru chu ka hre thiam tho nangin ka fanu thil tihsual avang chuan khua chhuahsan lo hram rawh u. I tello chuan he khua hian ropuina a nei tawh nang, min ngaidam teh khai. Ka fanu pawh a pu te hnen lamah ka dah dawn e, khawngaihin he khua chu chhuahsan lo hram rawh u" ti a a rawn ngen leh takah chuan keimah zawkin Saihlira kut chu hum nghetin ka ena.

“Lalpa thiamloh i nei love, ni e he khua chhuahsan hi keipawh in ka duhlo. Neih neilo a ka awm laia min lo tuam hlawm tu khua hi keichuan ka haw love, a nuam ka ti hle zawk a sin" tiin Saihlira chu ka nuih ver vera, a ni pawh hian a seilenna khua leh a thiante hi a kalsan hreh dawn tih ka hria. Chu chu ka duh biklo, lal pawh chu a thaw huaia, ka nui sak mai.

“Haw ang le. Lalpa ngaihtha takin awm rawh u" tiin Saihlira kai chuan inlam chu ka panpuia, ka nu leh pa pawh chuan min zui ve bawk. Zualtei te chenin mawle, khaw mipui pawh chu an tin darh sang sanga “Awi in pem tak tak ang tih ka hlauhzia, he khua a kan awm chhan ber in pem leh kha chuan a ho dawn sia" Zualtein a rawn tihchuan ka nuih haka.

Saihlira leh Kapkima pawh an titi dun mawlh mawlha, ka nu leh pa in thil thlendan min zawh chuan ka hrilh ve maia. An nipawhin lalfanu chu an dem ve viau mai. 

Hun a liama ka naupai pawh rawn lian ve zelin Saihliran min duat bawk nen ka vun chu hmanlaia awm e tilo in a no surh maia, khualzin velin min hmuh changin min la en zui vawng vawng fo mai, pasal ka nei tih hre lova min rawn la beisei tawk lah bolo. Mahse ka pum puar luah tawh hmu tan chuan haider theih ni heklo le, zankhat chu tlai atanga ka pum nuam lo chu na zualin nau ka vei zuia.

Saihlira chuan nau chhar thiam chu ko in min buaipui chawta, ka nu pawhin min fuih ve reng bawk. Ana lutuk chu ka thlan te chu a luang bawrh bawrha, Saihlira lah puan an zar pawn lamah Ngurthanga leh Kapkima nen an lo teikual ve sek bawk, ruah lah chu a sur hum huma tek a tla ri chuai chuai bawk nen boruak chu a ipik thlak ngawih ngawih mai. 

A tawpah chuan naute chu a rawn tap ngak ngaka ”Mipa i nei e, a lian tha hle lehnghal. He khaw pasaltha tur a piang leh ta" an tihchuan ka thaw huai mai. Ka fapa var lutuk lah chu mak ka ti, a hmutu apiang chuan a la hmeltha dawn an ti reng bawka, ka bula an rawn mut hnuah Saihlira pawh chu a rawn lut ve ta a, ka lo nuihsak mai. Ka bulah chuan rawn thu thla in a fapa hmel chu a thlir vawng vawnga, a hmelah chuan a lawmzia hai rual a nilo.

Ka pa chuan a hmingah Saithankhuma tih a sa ta a, a pa kut chu vuan in a mit a chhing chial chu ka en ngawih ngawih mai. Pasaltha leh mi tam tak in nghahna rawn ni mawlh tehse “Ka hmangaih che Zampui" titu chu ka hrilh let ve sapa, ka kalsan leh tawh ngai lo ang.

LE TIHIAN A TAWP RIHA, AN FAPA THAWNTHU ERAWH HUN REMCHANGAH KA RAWN ZIAK LEH ANG